ཁྲག་གདོང་། དཀར་མཛེས།
བརྩེ་ལྡན་ལྷ་ཡི་ལྷ་ཚོགས་དྲི་མེད་དབྱིངས་སུ་བཞུགས་པ་ལས། །
ཞི་བའི་དབྱངས་ཀྱི་འགྲོས་ལས་མི་ཤེས་རྨོངས་པ་རབ་ཏུ་སེལ། །
ཟོལ་མེད་ཐུགས་རྗེ་ཆེན་པོས་འགྲོ་བ་ཚོགས་ནི་བདེ་ལ་བཀོད། །
ངག་རིག་དབྱངས་ཀྱི་བདག་མོ་དབྱངས་ཅན་མ་ལ་ཞེ་སྙིང་དད། །
ཉམས་འགྱུར་རླབས་ལྟར་གཡོ་བ་ཡིད་འོང་འདྲེན་ལ་ཟླ་མེད་མ། །
བཅོམ་ལྡན་འདས་མ་ཁྱེད་ཀྱིས་བསམ་པའི་དོན་ནི་སྨིན་གྱུར་ལ། །
དབང་མེད་སྲིད་པའི་ཁུར་ཆེན་ངལ་བ་མེད་པའི་ལམ་བསྟན་ཏེ། །
དགའ་བདེའི་སྤྲོ་ཚོགས་སྩོལ་ལ་དཔལ་མོ་ཁྱེད་ལས་གཞན་པ་སུ། །
སྣང་བའི་དབྱངས་ལ་བཞད་ནས་གར་གྱི་སྤྲོ་ཚོགས་རབ་ཏུ་སྨིན། །
རྣམ་དག་བརྩེ་བའི་སྤྱན་ཡངས་གདུལ་བྱའི་མོས་པ་ཇི་བཞིན་ཏེ། །
གསལ་ལ་མ་འདྲེས་ཚུལ་དུ་ཐབས་ཤེས་ཟུང་གིས་དག་པའི་ཆོས། །
བློ་བདེ་བག་ཕེབས་ཀློང་ནས་དང་བ་འདྲེན་པའི་སྐྱབས་ཀྱི་གཙོ། །
སྤྲུལ་པ་ཚོགས་ཀྱི་དབུས་སུ་ཐུགས་རྗེའི་རླབས་ཕྲེང་རབ་ཏུ་རྒྱུད། །
རང་སྣང་དྭངས་ཤིང་གཙང་མས་ཡིད་ལ་མི་སྡུག་ངག་གིས་ཁྱབ། །
མི་ཤེས་རྨོངས་པའི་དོན་ལ་དཔྱོད་པའི་ཤེས་རབ་སྨིན་ཞིང་གྲོལ། །
གཞོན་ནུ་ལང་ཚོས་རྒྱན་པའི་ཚོར་བྱུང་ཚངས་སྲས་མ་ལ་འདུད། །
འདབ་བརྒྱད་ཡིད་ལ་བྲིས་ཤིང་དངོས་གྲུབ་སྩོལ་ལ་མྱུར་བའི་ལྷ། །
སྨྲ་བསམ་བརྗོད་མེད་ཀློང་ནས་ཞི་བའི་དབྱངས་ཀྱི་ང་རོ་ཚོགས། །
སྤྲོས་མེད་སྟོང་པའི་དབྱིངས་སུ་དགའ་བའི་སྣང་ཚོར་དལ་བུ་རུ། །
རིང་བའི་ལམ་ཐག་བཅད་དེ་བྱིན་རླབས་འདི་ཡང་ཉེ་བར་གྱུར། །
ཚོར་བའི་རླབས་ཀྱི་མེ་ཏོག་སྙིང་ལ་སྡུག་པའི་གར་གཞས་མཁན། །
ཚོར་བའི་དབྱངས་ཀྱི་འགྱུར་ཁུག་སྣང་བའི་གཏིང་དུ་སྨིན་པ་ལ། །
ཚོར་བྱུང་ཡུན་རིང་རྒྱུད་པའི་རྣམ་དག་ལས་ཀྱི་ཡིད་འོང་ཚོགས། །
ཚོར་བས་རབ་ཏུ་ཟིན་ཞིང་བརྩེ་ལྡན་ཁྱེད་ལ་བདག་ཡིད་ཕྱོགས། །
ཡིད་འོང་ལྷུག་པར་གྲོལ་བའི་ཚངས་སྲས་དབྱངས་ཀྱི་ལྷ་མོ་ཁྱེད། །
ཡིད་བློ་བདེ་བར་བཀོད་པའི་ངག་རིག་དབྱངས་ཀྱི་གར་མ་ཁྱེད། །
ཡིད་སྙིང་རབ་ཏུ་བཀུག་པའི་ཚོར་བྱུང་དབྱངས་ཀྱི་སྲས་མོ་ཁྱེད། །
ཡིད་ཀྱི་དབུས་སུ་འཚོ་བའི་ངག་དབང་དབྱངས་ཅན་ལྷ་མོ་ཡིན། །
བརྩེ་སེམས་རབ་ཏུ་ཡངས་པའི་དབྱངས་ཅན་ལྷ་མོ་ཁྱེད་ཉིད་དེ། །
བརྩེ་བའི་རང་བཞིན་བཟང་ལ་ཞི་བའི་ངག་རིག་གཞན་ལ་སྩོལ། །
བརྩེ་བའི་རླབས་ཀྱི་ཕྲེང་བ་རྒྱུན་ཆད་དབེན་པ་སྩོལ་ཞིག་ལགས། །
བརྩེ་ལྡན་ཁྱེད་ཉིད་ཇི་བཞིན་བདག་གི་རྨོངས་པ་བསལ་ཞིག་ཀྱེ། །
ལེགས་ལེགས་དགེ་བ་ཚོགས་ལ་བློ་གྲོས་འདབ་བརྒྱ་རབ་ཏུ་སྨིན། །
ལེགས་ལེགས་ཆོས་ཀྱི་ཡང་སྙིང་སྲིད་ཞིའི་དབུས་སུ་ཁྱབ་པ་ཡང་། །
ལེགས་ལེགས་བདེན་པ་ཉིད་ལ་སྲིད་ཞི་ཟུང་གི་མཐའ་འགོག་ནས། །
ལེགས་ལེགས་ཚོགས་ཀྱི་སྙིང་པོ་ལྷ་མོ་ཁྱེད་ཀྱིས་གནང་ཞིང་ཨང་། །
མཛེས་མཛེས་རྟག་ཏུ་རྒྱས་ཤིང་ཡིད་འོང་ལས་ལ་ཅི་ཡང་མཛེས། །
མཛེས་མཛེས་དམ་ཚིག་ཟབ་པ་ཟོལ་མེད་དོན་ནི་ཅི་ཡང་མཛེས། །
མཛེས་མཛེས་འདི་འདྲ་དཀོན་པ་ཡིད་ཀྱི་ལྷ་ཁྱེད་ཅི་ཡང་མཛེས། །
མཛེས་མཛེས་དབྱངས་ཀྱི་ལྷ་མོ་ཁྱེད་རང་ཇི་ལྟར་སུ་ཞིག་མཛེས། །
དྲི་མེད་ཟླ་བའི་གར་ལ་གཟུགས་མཛེས་རྣམ་པ་སྣ་ཚོགས་འཆར། །
དྲི་མེད་དབྱངས་ཀྱི་འགྲོས་ལ་འགྲན་མེད་ལས་ཀྱི་གླུ་ངག་འཚང་། །
དྲི་མེད་ལྷ་མཆོག་གང་ལ་ལེགས་ཚོགས་དབྱར་གྱི་ཆར་བ་བཞིན། །
དྲི་མེད་དབྱིངས་ལྟར་གཙང་པའི་ངག་གི་དཔལ་མོ་ཁྱེད་ལ་གུས། །
དགའ་བའི་དང་བ་འདྲེན་དུས་ཀ་མ་ལ་ཡི་རང་མདངས་བཞིན། །
དགའ་བ་ཇི་སྙེད་ཚོགས་ལ་ཡིད་འོང་དཔག་ཏུ་མེད་པ་འཁྲུངས། །
དགའ་བའི་སྣང་བ་སྩོལ་ཞིང་བྱིན་རླབས་མྱུར་བའི་ལྷ་མོ་མཆོག །
དགའ་བ་རྟག་ཏུ་འདྲེན་པའི་སྨོན་ལམ་མཐའ་ཡས་ངག་ཏུ་ལེན། །
མེ་ཏོག་གང་ལ་ཕོག་པའི་འཛུམ་ཞལ་འཕྲོ་ནས་དབྱངས་ཅན་མ། །
མེ་ཏོག་ཡིད་འོང་ཇི་བཞིན་འཁོར་བའི་མི་ཚོགས་ཞེ་སྙིང་དགའ། །
མེ་ཏོག་དྲི་མ་དག་ཅིང་རྒྱུད་མངས་དེ་ཡང་དབྱངས་རླབས་རྒྱས། །
མེ་ཏོག་འགྲན་ལ་བཟོད་པའི་ངག་རིག་ལྷ་དེས་སྐྱབས་སུ་གསོལ། །
ཡིད་ལ་མངོན་དུ་འཕགས་པ་འཛུལ་དཀར་གཡོ་བའི་ལྷ་མོ་ཁྱེད། །
ཡིད་ཀྱི་དབུས་སུ་བཞུགས་པ་སྐད་ཅིག་ཙམ་ཞིག་མ་ཡིན་ཨང་། །
ཡིད་ཀྱིས་སྨོན་པའི་མཆོག་ཁྱེད་ཞི་བའི་སྤྱན་རས་རབ་ཏུ་ཡངས། །
ཡིད་དང་གཏན་ཏུ་འབྲལ་མེད་ལྷ་དབང་ལྷ་ཡི་མཆོག་གྱུར་ཡིན། །
ལང་ཚོའི་མེ་ཏོག་བཞད་ཅིང་ཡིད་འོང་འདབ་བརྒྱ་རབ་ཏུ་སྟུག །
ལང་ཚོ་ཅི་ཡང་མཛེས་ཤིང་བཅུ་དྲུག་གཞོན་ནུའི་ན་ཚོད་རྫོགས། །
ལང་ཚོ་ལྷུན་གྱིས་སྨིན་ཞིང་དགའ་བདེའི་སྣང་བ་དལ་གྱིས་ཁྲིད། །
ལང་ཚོའི་དཔལ་ཡོན་བཞད་པའི་ཟླ་བའི་ལྷ་མོ་མཆོག་ཁྱེད་རྒྱལ། །
ངག་རིག་ངག་གི་དབང་ཕྱུག་ངག་དབྱངས་ངག་རབ་ངག་གི་ལྷ། །
ངག་རིག་ངག་ལ་འགྲན་མེད་ངག་མཛེས་ངག་མཆོག་ངག་གི་ལྷ། །
ངག་རིག་ངག་རྒྱུན་དཔེ་མེད་ངག་དབང་ངག་དགའ་ངག་གི་ལྷ། །
ངག་རིག་ངག་ཡག་ཁྱེད་ཀྱིས་ངག་རིག་ངག་གི་བྱིན་རློབས་སྩོལ། །
དབྱངས་ཅན་ངག་རིག་སྙན་མོ་སྲིད་ཞི་ཟུང་ལ་འགྲན་ཟླ་དཀོན། །
དབྱངས་ཀྱི་འགྲོས་མཐུན་བཟང་པོ་སྐྱོན་དང་དྲི་མས་མ་གོས་པ། །
དབྱངས་ལ་ཚིག་ཕྲེང་སྒྲིག་པའི་ང་རོའི་གཟུགས་ཀྱི་རྣམ་པ་ཀུན། །
དབྱངས་ཀྱི་ལྷ་མོ་མཆོག་ལ་དད་གསུམ་པད་མོ་སླར་ཡང་ཕྱོགས། །
མ་ལུས་གདུལ་བྱའི་མགོན་ལ་ཟོལ་མེད་དད་པ་རྒྱས་ཤིང་རྫོགས། །
མ་ལྟར་བརྩེ་རྒྱུན་རིང་བའི་དབྱངས་ཅན་ཟླ་བའི་ཞལ་འཛུམ་མ། །
མ་བཅོས་བྱིན་རླབས་ཆད་མེད་འགྲོ་བའི་སླད་དུ་རབ་ཏུ་འབྱོར། །
མ་གཅིག་རྒྱལ་བའི་སྤྱན་སྔར་རྣམ་དག་སྨོན་ལམ་ངག་ནས་ཤོར། །
ལྷ་མོའི་ཞི་དབྱངས་སྙན་མོས་སྡུག་བསྔལ་མཐའ་དག་སེལ་བ་ལ། །
ལྷ་མོའི་འཛུམས་ཞལ་ཡག་མོས་སྤྲོས་པའི་སྣང་བ་རྒྱང་དུ་གཏོང་། །
ལྷ་མོའི་ཐུགས་རྗེ་ཟབ་མོས་འགྲོ་བ་དཔག་མེད་མགོན་མཛད་དེ། །
ལྷ་མོ་དབྱངས་ཅན་ལྟ་བུ་འདི་ཕྱི་གཏན་གྱི་སྐྱབས་གཞན་དཀོན། །
བདེ་ལེགས་མུ་ཏིག་ཚིག་ཕྲེང་སྲིད་པའི་གཞུང་དུ་རིམ་གྱིས་སྒྲིག །
བདེ་དགའི་དཔལ་གྱི་ཚལ་དུ་འཁྲེང་ཞེན་རིང་མོ་ལྷག་ཏུ་འཁོར། །
བདེ་སྐྱིད་ཉི་མའི་འོད་ཟེར་དྲི་མེད་བཞིན་དུ་གསལ་ཞིང་འཚེར། །
བདེ་བའི་སྣང་ཚོར་སྩོལ་བའི་ཚངས་པའི་སྲས་མོར་ལྟག་ཏུ་གུས། །
ཚངས་པའི་བུ་མོའི་མགྲིན་གླུ་ངག་རིག་ཀུན་ལས་མཆོག་ཏུ་གྱུར། །
ཚངས་སྲས་ལྷ་མོའི་ཞལ་གྱིས་པད་མའི་མེ་ཏོག་ཟིལ་གྱིས་གནོན། །
ཚངས་དབྱངས་ངག་གི་ལྷ་ཁྱེད་ངག་ལ་བྱང་དུ་ཆུབ་སྟེ་འཕགས། །
ཚངས་པའི་སྲས་མོ་མཆོག་ལ་དད་ཕྱག་གུས་པ་སླར་ཡང་ཕྱོགས། །
རིག་བྱེད་སྤྲུལ་པའི་དབྱངས་སུ་གར་གྱི་འཁྱུག་པ་ཤིན་ཏུ་ཚོགས། །
རིག་གྲོལ་ངག་གི་འགྲོས་ལ་སྡིག་སྒྲིབ་གཉིས་ཀྱི་ནག་ནོག་སངས། །
རིག་པའི་དཔའ་ལ་མ་ཞུམ་རང་བྱུང་དབྱངས་ཀྱི་མགྲིན་སྙན་མ། །
རིག་རྩལ་ཕུལ་དུ་བྱུང་བའི་དབྱངས་ཀྱི་འདབ་ལག་རབ་ཏུ་རྒྱས། །
སྒྱུ་འཕྲུལ་བརྒྱ་སྟོང་ཚོགས་ལ་སྤྲུལ་པའི་སྣང་བ་ཐོགས་མེད་ངང་། །
སྐལ་ལྡན་སློབ་བུ་ཡོངས་ཀྱི་བསམ་པའི་རེ་འདུན་སྨིན་གྱུར་ནས། །
ཇི་ལྟར་ཇི་སྙེད་ཆོས་རྣམས་བརྩེ་བའི་རླབས་ཕྲེང་མ་གཡོས་ངང་། །
མ་འདྲེས་སོ་སོར་གསལ་ཞིང་འཆད་མཁས་ཁྱེད་ལ་རྟག་ཏུ་གུས། །
ཆོས་ཅན་ཆོས་ཉིད་གཉིས་ལ་སྤྲོས་པའི་སྣང་ཞེན་མ་ཐོགས་ནས། །
སྤྲོས་མེད་སྟོང་ཉིད་ཀློང་ནས་ཞི་བའི་དབྱངས་ཀྱི་ངག་རིག་སྩོལ། །
ངག་རིག་མཆོག་གི་གཙུག་རྒྱན་ཚོར་བྱུང་ངག་གི་དབང་ཕྱུག་མ།
བྱིན་རླབས་གཙང་མའི་དམིཊ་པ་སྲིད་པའི་ཞིང་དུ་ཕོག་པར་ཤོག །
བསླུ་མེད་ཡུལ་གྱི་བརྩེ་འདང་སྲིད་པའི་གཞུང་ནས་རིང་དུ་གྱེས། །
བསླུ་བྲིད་ཚིག་གིས་མ་འཛིན་ཞི་བའི་དབྱིངས་སུ་འཁོར་བ་ནས། །
བསླུ་བའི་རྟོག་འཆར་བྲལ་ནས་བདེན་པའི་དོན་གྱི་ངོ་བོ་གསལ། །
བསླུ་ཚིག་ཡེ་ནས་མེད་པའི་ཁྱེད་ཀྱི་གསུང་དབྱངས་རབ་ཏུ་སྙན། །
སྣང་ཚོགས་རབ་ཏུ་རྒྱུད་དུས་ཡིད་འོང་ལས་ཀྱི་འཛུམ་དཀར་མ། །
འཛུམ་པའི་གཡོ་བ་འཕྲོ་ནས་ཡིད་འོང་དོན་ལ་སེམས་པ་འདྲེན། །
སེམས་པ་རང་དབང་འབྱོར་བའི་ཡིད་འོང་ལྷ་ཡི་མཆོག་གྱུར་མ། །
མཆོག་དང་དངོས་གྲུབ་སྩོལ་བའི་ཡིད་འོང་ལྷ་མོ་ཁྱེད་ལ་བཀུར། །
སྤྲོས་བཅས་ལས་ཀྱི་མཆོད་པ་ནང་སེམས་གཏིང་དུ་རུམ་པ་ནས། །
ཞེན་ཆགས་ཡེ་ནས་སངས་པའི་ཚོར་བྱུང་ཨུཏྤལ་མཛེས་ཤིང་ཡག །
བྱིན་གྱིས་རླབས་པའི་ཆར་བ་རྒྱུན་ཆད་མེད་པ་མཁའ་ནས་བྱུང་། །
སེམས་པ་རབ་ཏུ་དགའ་བའི་འཇའ་ཚོན་སྣ་ལྔ་འཆར་བར་སྨོན། །
ཡང་སྙིང་བསམ་པའི་དོན་ལ་ཡིད་དུ་འོང་བ་དཔག་མེད་ཆགས། །
དཔག་ཏུ་མེད་པའི་སྨོན་ལམ་དང་ཐོག་ཁྱེད་ལ་ཕུལ་བཞིན་ནས། །
ཁྱེད་ལ་རེ་དོགས་བྲལ་ཡང་དགའ་མགུ་གཉིས་ཀྱི་སྣང་བ་གསལ། །
སྣང་བ་དབྱངས་ལ་ཆགས་ཏེ་དབྱངས་ཀྱི་ལྷ་མོ་ཁྱེད་ཕྱག་འཚལ། །
རྣམ་དག་བརྩེ་བའི་མཁའ་ལ་སྤྲིན་པའི་རྡུལ་དང་བྲལ་གྱུར་ཞིང་། །
རྣམ་དག་ལམ་གྱི་གསལ་བྱེད་ཉི་ཟླའི་རླབས་ནི་ངང་གིས་འཆར། །
རྣམ་དག་ཐུགས་རྒྱ་ཡངས་པས་མ་རིག་སྒྲིབ་པའི་མུན་པ་སངས། །
རྣམ་དག་རྒྱལ་བའི་ལམ་ནས་མི་ཤེས་སྤངས་པའི་ཁྱེད་ཉིད་རྒྱལ། །
འདི་སྣང་སྤྲུལ་པའི་རྣམ་འཕྲུལ་མ་རིག་དབང་གིས་སྣང་བ་དང་། །
འདི་གྲགས་སྟོང་པའི་རང་བཞིན་མ་འདྲེས་ཇི་ལྟར་མཁྱེན་པ་ལ། །
རིག་པ་རིག་པའི་བདག་ཉིད་སྒྲོ་སྐུར་གཉིས་ལས་རབ་ཏུ་བརྒལ། །
ངག་དབང་ལྷ་མོ་མཆོག་ལ་དད་གསུམ་པད་མོ་ཡུན་རིང་ཕྱོགས། །
དཔྱད་གཏམ་སྤེལ་མཁན་ལ་གསལ་བརྡ།