སྤྱན་རས་གཟིགས་དབང་ཀུན་དགའ་སྙིང་པོ་ཞེས། །
མཚན་གྱི་གཡུ་འབྲུག་ལྡིར་བའི་དམ་པ་དེའི། །
ཆོས་དང་རིགས་ཀྱི་སྲས་སུ་གྱུར་པ་ཡི། །
བསོད་ནམས་རྩེ་མོའི་ཞབས་ལ་ཕྱག་འཚལ་ལོ། །
བྱིས་པའི་དུས་ནས་ཤེས་བྱའི་དོན་ཀུན་མཁྱེན། །
ཟབ་མོའི་ལམ་རྣམས་ཟག་མེད་ཐུགས་སུ་ཆུད། །
མཁའ་འགྲོ་བྱེ་བའི་ཚོགས་ཀྱི་བསུ་མ་བཅས། །
མཁའ་སྤྱོད་ཞིང་དུ་གཤེགས་པའི་ཉིན་མོ་དྲན། །
རྒྱ་གར་རྡོ་རྗེ་གདན་གྱི་སྒོ་གླེགས་སུ། །
མ་འཁྲུངས་སྔོན་ནས་མཁའ་འགྲོའི་ལུང་གིས་ཟིན། །
བལྟམས་མ་ཐག་ནས་ལེགས་སྦྱར་ཐུགས་སུ་ཆུད། །
ཐུགས་གྲོལ་ཁྱོད་ལ་སྙིང་ནས་ཕྱག་བགྱིའོ། །
བསླུ་མེད་ལུང་གིས་འཇམ་དཔལ་དབྱངས་སུ་བསྔགས། །
ཡང་དག་ཐུགས་ཀྱིས་ཚེ་རབས་མཐའ་དག་དྲན། །
མི་གཡོ་བ་དང་རྗེ་བཙུན་སྒྲོལ་མ་སོགས། །
ལྷག་ལྷ་དུ་མས་ཞལ་གཟིགས་མཛད་པ་དྲན། །
ཡབ་རྗེ་མཆོག་གི་ཐུགས་རྗེའི་ཟླ་ཟེར་གྱིས། །
ཁྱེད་ཐུགས་ཀུན་དའི་སྐྱེད་ཚལ་བསྐྱངས་པ་ན། །
བླ་མེད་ཐེག་པར་མཁས་པའི་སྙན་པ་ཡིས། །
འཕགས་ཡུལ་འཛིན་མ་སྒུལ་བའི་ཚུལ་དེ་དྲན། །
མཁས་པའི་འབྱུང་གནས་དཔལ་ལྡན་གསང་ཕུ་རུ། །
རིགས་པའི་དབང་ཕྱུག་ཆོས་ཀྱི་སེངྒེའི་དྲུང་། །
རིགས་སྨྲའི་རྗེ་བོ་འཁོན་གྱི་ཇོ་སྲས་ཞེས། །
སེང་ཆེན་མཐུར་མེད་གྱུར་བའི་ཚུལ་དེ་དྲན། །
བླ་མ་ཕལ་ཆེར་ལྷག་ལྷ་དངོས་སུ་གཟིགས། །
གདུལ་བྱའི་སྐྱེས་སུ་ཚད་ལྡན་བསྟན་བཅོས་མཛད། །
མེས་པོའི་གདན་ས་བཤད་སྒྲུབ་ཟུང་གིས་བསྐྱངས། །
དམ་པའི་ཚུལ་དགུའི་ངང་ཚུལ་ཡང་ཡང་དྲན། །
དེ་ལྟ་ནའང་སྙིགས་མའི་སྐྱེ་བོ་ལ། །
འདུ་ཤེས་མཆོག་དེ་སྐྱེ་བའི་རྟེན་འབྲེལ་སླད། །
སྐུ་ལུས་མ་སྤངས་འོད་གསལ་མཛད་པའི་ཚུལ། །
མཚན་མོའི་ཟླ་འོད་ཁྲོད་ནས་ལྷག་ཏུ་དྲན། །
ཁྱེད་ཀྱི་རྣམ་ཐར་ངོ་མཚར་རྒྱ་མཚོ་ལས། །
དད་པའི་རྟེན་དུ་ཅུང་ཟད་བླངས་པ་འདིས། །
སྐྱེ་བ་ཀུན་ཏུ་ཁྱེད་ཀྱི་ཟབ་ཆོས་དང་། །
འབྲལ་བ་མེད་པའི་གནས་སུ་སྐྱེ་བར་ཤོག །
ས་སྐྱའི་འཇའ་ལུས་པ་བསོད་ནམས་རྩེ་མོའི་འདས་མཆོད་ཉིན་གང་གི་རྣམ་ཐར་ལ་མཇལ་མྱོང་བའི་སྐལ་བ་ཅན་ཨ་འདུས་པས་གནས་མཆོག་རྡོ་རྗེ་གདན་དུ་ཤར་མར་བྲིས་སོ། །
དཔྱད་གཏམ་སྤེལ་མཁན་ལ་གསལ་བརྡ།