ཁྲག་གདོང་། དཀར་མཛེས།
སྐད་ཅིག་གློག་འགྱུར་ཇི་བཞིན་དལ་བུ་ངང་།།
ཀུན་རྟོག་རླབས་ལས་གྲུབ་པ་སྒྱུ་མའི་ཚོགས།།
སྐྱི་བསེར་རླུང་བུ་ནང་གི་གཡོ་ཐབས་ཤིག།
རེས་གསལ་རེས་མོག་ཚུལ་དུ་སྣང་བ་ཡང་།།
སྔོན་གྱི་རྒྱུ་ཡིས་བསགས་པའི་འབྲས་བུ་ཞིག།
དྲན་པས་མཇལ་རྒྱུ་དེ་དག་ཚོར་དུས་བྱུང་།།
ནམ་ཟླའི་མཐའ་རུ་འཆང་བའི་ནམ་ཟླ་བཞིན།།
མི་རྟག་སྟོན་ཁའི་སྤྲིན་ལྟར་གློ་བུར་བའི།།
ན་ཚོད་གོ་རིམས་ཀློང་ནས་འགྱུར་བག་ནི།།
ལྟོས་བཅས་འཚོ་བའི་འགྲོས་སུ་ཅི་ཆ་ཡོངས།།
ལུས་ཀྱིས་ཁྱེར་བ་དག་ཀྱང་རྣམ་སྨིན་ཏེ།།
ངག་གི་སྨྲ་བརྗོད་རིང་ཐུང་མཐའ་མེད་ཅིང་།།
ཡིད་ལ་འཆར་རྟོག་མི་འདྲ་འཛོམས་པ་འང་།།
ཟླ་བའི་མདངས་ལ་ཅེར་པའི་ལས་སྐལ་ནི།།
སྙིང་པོའི་མེ་ཏོག་ནང་གི་སྙིང་པོ་ཚོགས།།
སྒོ་གསུམ་མ་གཡེང་མ་ཆགས་ཚུལ་དུ་གསལ།།
རྟག་སྟོང་སྣ་ཚོགས་སེམས་ཀྱི་མེ་ལོང་དུ།།
སྤྲོས་པའི་འཆར་ཡན་རྡོལ་བ་ཐོལ་བྱུང་ཙམ།།
ཕྱི་ནང་འགྱུར་མདོག་དེ་ལས་ཉམས་དགའ་བ།།
མ་བཅོས་མི་རྟག་ཆོས་ཀྱི་རླབས་རིས་བསམ།།
འདི་བས་ལྷག་པའི་དྲན་རྒྱུ་འཚོལ་ཐབས་ནི།།
ནམ་ཞིག་ནམ་ཡང་མ་རྙེད་སེམས་པའི་བཅུད།།
རྟོག་བཏགས་དེ་རུ་མངོན་རྒྱུ་ལོ་ཟླའི་བརྙན།།
མི་འགྱུར་མི་ལྡོག་བྲལ་བའི་རང་བཞིན་དེ།།
བཅོས་བཅོས་འཚོ་བའི་ཉིང་ཁུ་འཇིག་པ་ལས།།
ནང་སེམས་བར་ཐག་མེད་པ་གློ་རྡེག་ཏུ།།
ཕྱི་ལུས་ཕྲ་ལ་རིང་བའི་ཚུགས་ཀ་ཆགས།།
འདི་ཡང་སྟོང་པའི་སྟོང་པ་ཇི་ལྟ་བུར།།
སྒྱུ་འཕྲུལ་ཀླད་དུ་མཐོང་བ་ག་ཚད་ཙམ།།
གཟུགས་སུ་འགྱུར་བ་སྲིད་པའི་ཟློས་གར་སྙམ།།
༢༠༢༢ ༤ ༢༤ མཚན་མོར་ཕ་ཡུལ་ནས།
དཔྱད་གཏམ་སྤེལ་མཁན་ལ་གསལ་བརྡ།