(ཞར་བཀོད་བཞི།) སྨོན་དུང་ཁྲག རྔ་བ།
ང་ནི་ཁྱོད་ཀྱིས་བྲིས་པའི་རི་མོ་སྟེ
གད་སྙིགས་སྒམ་དུ་བལྟབས་ཆག་གི་ཤོག་ངོས་སུ་ཡོད།
ཁྱོད་ནི་ང་ཡི་ནམ་མཁར་འཕུར་བའི་བྱེའུ་སྟེ
འཇའ་ཚོན་དང་ཉི་འོད་གང་ཡང་མཐོང་ཐུབ་ཀྱིན་མེད
རྒྱབ་གཟུགས།
ཆུང་དུས་སུ་རི་རྩེར་ལྟ་བ་བཞིན་མགོ་བོ་དགྱེས་ཏེ་བལྟས
ཉི་འོད་ཀྱི་ཐིགས་པ་རེ་རེ་བཞིན་སེམས་སུ་ཟེགས
ལྷོད་ཆགས་པའི་དུས་ཚོད་རེ་རེའི་ནང་རྒྱང་རིང་གི་རྨི་ལམ་ལ་གྱུར
བདག་གི་ལུས་ངག་ཡིད་གསུམ་གྱི་ཆེས་མེད་དུ་མི་རུང་བའི་ཆ་ཤས་སུ་གྱུར
ད་ལྟ མཚེའུ་བཞིན་འདས་མ་ད་གསུམ་མཐོང་ཐུབ་པའི་མེ་ལོང་ཞིག
ཁ་རོག་གེར་ཟེགས་པའི་རྔུལ་ཆུ་དང་སེམས་ཁྲལ ན་ཟུག་དང་སྐྱོ་ཡུས
རྣག་ཁྲག་གི་ལག་པ རྨས་སྐྲངས་ཀྱི་ལུས་པོ
ཡོད་ཚད་ནས་ཡོད་ཚད་ཁྱེད་ཀྱི་རྒྱབ་གཟུགས་ལས་མཐོང་ཐུབ
སྔར་བཞིན ཆེས་མེད་དུ་མི་རུང་བའི་ལུས་ངག་ཡིད་གསུམ་གྱི་ཆ་ཤས་དང་རྒྱང་རིང་གི་རྨི་ལམ་མོ།།
མཐོང་བ།
ཟིན་དེབ་རྙིང་རལ་ཞིག་སྐྱི་བསེར་རླུང་གིས་ཕྱེས་པས
མུན་ནག་གི་ལྡེབས་སུ་བྲིས་པའི་རྨི་ལམ་མང་པོ་མཐོང
གྲང་འཁྱགས་ཀྱི་ཁུགས་ལ་བཏུམ་པའི་གངས་རི་མང་པོ་མཐོང
ད་དུང་དྲག་དུ་མཆོང་ལྡིང་བྱེད་པའི་རྙིང་གསོན་པོ་ཞིག་ཀྱང་མཐོང
གྱེས་བྲལ།
ང་རང་བྱེའུ་བཞིན་སྐྱོ་ཡས་ཀྱི་འཇིག་རྟེན་འདིར་བསླེབས་རྗེས།
ཡང་བསྐྱར་རྡུལ་གྱིས་གོས་པའི་ནམ་མཁར་འཕུར།
མི་ཚོགས་ཀྱིས་གྲུབ་པའི་ནམ་མཁའ་འདིར་ཉོན་མོངས་ཀྱི་དུག་རླངས་ཁྱབ་པས།
ཞེན་ཆགས་ཀྱི་ཁ་བ་ལྷབ་ལྷུབ་ཀྱང་ནག་པོ་རེད།
ཚོར་ཤེས་ཀྱིས་བཞེངས་པའི་མཛེས་པ།
རང་བྱུང་ཁམས་ཁོ་ན་ཡིན་ཀྱང་།
གྱེས་བྲལ་གྱི་རྒྱ་ལས་ཐར་མི་འདུག
བྱ་དངོས་ཡོད་དོ་ཅོག་གིས་གྱེས་བྲལ་གྱི་མེ་ལོང་ནང་།
གཟུགས་ཡོད་གཟུགས་མེད་ཀྱི་མིག་ཆུ་གཏོང་གིན་འདུག
རྒྱང་རིང་གི་ཁྱོད་ལ་ཕུལ་བ།
རྒྱང་རིང་ནི་ཁྱོད་ཀྱི་མིག་ཟུང་ན་འདུག
གྱེས་བྲལ་གྱི་གདུང་བ་སྲབ་པའི་ཁྱོད།
ལོ་མ་རེ་རེ་བཞིན་ངའི་ཕྱི་ནང་གསང་གསུམ་ནས་ཟེགས་ཏེ།
རྒྱང་རིང་གི་གཙང་བོར་འཐིམ།
དྲན་སྣང་དང་ཕྱིར་མིག་མེད་པར་སྤྲིན་པ་བཞིན་རྒྱང་དུ་འཕགས།
རྒྱང་རིང་ནི་ཁྱོད་ཀྱི་མིག་ཟུང་ན་མི་འདུག
ཡིད་ཆེས་ཀྱི་འཇའ་ཚོན་ཡལ་བའི་ཁྱོད།
སྨྲེང་བའི་ཁང་ཆག་དེར་ལོ་བརྒྱའི་ཁེར་ཧྲེང་གི་སྡུག་བསྔལ་འཆའ་ཞོར།
འཇིག་རྟེན་འདིའི་སྒྱུ་འཕྲུལ་རེ་རེའི་མེ་ལྕེའི་ཁར།
སྙིང་ལ་གཟན་པའི་ཕྱེ་མ་ལེབ་ཅིག་དང་འདྲ་བར་འཕུར།
རྒྱང་རིང་ནི་ཁྱེད་ལ་བཅངས་པའི་ཞེན་ཆགས་དེ་རེད།
རྒྱང་རིང་ནི་ཁྱེད་ཀྱི་ཆེད་དུ་བཏུས་པའི་མེ་ཏོག་དེ་དང་།
དེའི་རྗེས་ཀྱི་མིག་ཆུ་དེ་རེད།
དེ་བས་རྒྱང་རིང་གི་ཕྱིར་རྒྱང་དུ་གྱེས་པའི་ཁྱོད།
རྒྱང་ནས་ལྡིང་འོང་བའི་རླུང་བུ་བཞིན་འཁྱག་སིབ་སིབ།
དཔྱད་གཏམ་སྤེལ་མཁན་ལ་གསལ་བརྡ།