༧སྐྱབས་མགོན་གོང་མ་ཁྲི་ཆེན་རྡོ་རྗེ་འཆང་གི་སྐུའི་འཁྲུངས་སྐར་བསུ་བའི་མཆོད་སྤྲིན་དད་གསུམ་འཆི་མེད་བདུད་རྩིའི་ཟེགས་མ་བཞུགས་སོ། །
རྩོམ་པ་པོ། མཁན་ཆེན་ངག་དབང་ཤེས་རབ་རིན་པོ་ཆེ།
ཨོཾ་སྭ་སྟི། གང་སྐུ་མཚན་དཔེའི་དཔལ་འབར་རྡོ་རྗེའི་སྐུ། །
གང་གསུང་ཐོས་པས་རང་གྲོལ་དྲུག་ཅུའི་དབྱངས། །
གང་ཐུགས་མཁྱེན་པའི་དཔལ་འབར་ཟབ་མོའ་ིཐུགས། །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
མཁྱེན་པའི་རྩལ་རྫོགས་རྗེ་བཙུན་འཇམ་དཔལ་དབྱངས། །
བརྩེ་ཆེན་བྱམས་པའི་བླ་མ་སྤྱན་རས་གཟིགས། །
ནུས་པའི་དབང་ཕྱུག་ཕྱག་ན་རྡོ་རྗེ་དངོས། །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
གསང་གསུམ་མཛད་པས་གླིང་ལྔའི་མཁའ་ལ་ཁྱབ། །
རྒྱལ་བསྟན་མཐའ་གྲུར་སྤེལ་བའི་འདྲེན་པ་མཆོག །
འབྲེལ་ཚད་གཏན་བདེར་བཀོད་པའི་དྲིན་ཆེན་རྗེ། །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
འཛམ་གླིང་ཚན་རིག་སྨྲ་བའི་སྙིང་གི་ནོར། །
འཛམ་གླིང་ཆེན་པོ་ཡོངས་ཀྱི་སྤྱི་བོའ་ིབརྒྱན། །
འཛམ་གླིང་ཞི་བདེའི་དེད་དཔོན་དགེ་བའི་བཤེས། །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
དབྱིན་བོད་སྐད་གཉིས་སྨྲ་བའི་ལོ་ཙཱ་བ། །
གནའ་དེང་རིག་པའི་རྩལ་རྫོགས་སྨྲ་བའི་སེང་། །
ཟླ་བྲལ་མཁས་པའི་གཙུག་རྒྱན་པཎ་ཆེན་མཆོག །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
རིས་མེད་བསྟན་པ་ཡོངས་ཀྱི་བླ་མ་རྗེ། །
ཕྱོགས་མེད་གདུལ་བྱ་སྐྱོང་བའི་སྐྱབས་མགོན་མཆོག །
འཛད་མེད་གདམས་པ་རྒྱ་མཚོའི་འབྱུང་གནས་ཆེ། །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ།
མ་ལུས་རིགས་བརྒྱའི་ཁྱབ་བདག་འཁོར་ལོའ་ིམགོན། །
མ་འདྲེས་གྲུབ་མཐའ་ཡོངས་ཀྱི་སྤྱི་མེས་ཆེ། །
འཕགས་བོད་མཁས་གྲུབ་དུ་མའི་རྣམ་རོལ་མཆོག །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
མཐོང་གྲོལ་སྐུ་མཆོག་བསྐལ་བརྒྱར་རྟག་བརྟན་གསོལ། །
ཐོས་གྲོལ་གསུང་དབྱངས་མཁའ་མཉམ་འགྲོ་ལ་བསྐོར། །
མོས་གྲོལ་ཐུགས་ཡིད་ཀློང་ནས་འགྲོ་ཀུན་གྲོལ། །
སྐྱབས་མགོན་ཁྲི་ཆེན་གོང་མའི་འཁྲུངས་སྐར་བསུ། །
སྐྱབས་མགོན་གོང་མ་ཁྲི་ཆེན་རིན་པོ་ཆེ། །
སྐུ་ཚེ་ཞབས་པད་བསྐལ་བརྒྱར་རྟག་བརྟན་ནས། །
ཉམ་ཐག་ཕྱོགས་མེད་གདུལ་བྱའི་ཚོགས་རྣམས་ཀུན། །
འབྲལ་མེད་གསུང་དབྱངས་དཔལ་གྱིས་འཚོ་བར་ཤོག །
རིལ་ཟླུམ་གོ་ལའི་ལྗོངས་ཀྱི་སྐྱེས་འགྲོ་ཀུན། །
སྟོང་གསུམ་རྩྭ་མཆོག་རླུང་གིས་བསྐྱོད་པ་བཞིན། །
སྐལ་བཟང་མཆོད་སྤྲིན་བསུ་བའི་དགའ་སྟོན་གྱིས། །
འཇིག་རྟེན་གསུམ་འདི་ལང་ལོང་གཡོ་བར་བྱེད། །
བདག་ཀྱང་སྐྱབས་མགོན་གོང་མ་རིན་པོ་ཆེའི། །
མཐོང་གྲོལ་སྐུ་མཆོག་མཇལ་བའི་འདུན་པ་ཡིས། །
མོས་གུས་དད་པའི་རྦ་ཀློང་གཡོ་བའི་ངང་། །
འཁྲུངས་སྐར་མཆོད་སྤྲིན་རྒྱ་མཚོས་བླ་མ་མཆོད། །
ཅེས་རྗེ་བཙུན་བརྩེ་བ་ཆེན་པོ་ཡབ་སྲས་བརྒྱུད་པར་བཅས་པའི་སློབ་འབངས་རྟ་ནག་ཐུབ་བསྟན་རྣམ་པར་རྒྱལ་བའི་འདུ་ གསུམ་པ་ངག་དབང་ཤེས་རབ་ནས་བོད་རབ་བྱུང་བཅུ་བདུན་པའི་མེ་སྤྲེལ་ལོའ་ི ཟླ་བ་བདུན་པའི་ཚེས་ཉེར་དགུ་ཉིན་བྱང་འབྲོག་ ཤེལ་ཚྭ་རྫོང་འཁྱགས་བོང་གི་རྩྭ་ཐང་ནས་ཤར་མར་ཕུལ་བ་དགེའོ། །
དཔྱད་གཏམ་སྤེལ་མཁན་ལ་གསལ་བརྡ།