འདི་ནི་དཔའ་བོ་གཙུག་ལག་འཕྲེང་བས་མཛད་པའི་དམ་པའི་ཆོས་ཀྱི་འཁོར་ལོ་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་པ་ལས་བཤུས་ཏེ་བོད་ཁ་བ་ཅན་གྱི་རིག་གནས་དོན་གཉེར་ཆེ་བ་མཐའ་དག་གི་འདྲེན་བྱེད་ཟུང་གི་བདུད་རྩིར་སྤེལ་བ་ཡིན་ནོ། །
དེ་ཡང་སྙིང་རྗེ་ཆེན་པོ་པད་དཀར་ལས། །ཀུན་དགའ་བོ་ང་མྱ་ངན་ལས་འདས་ནས་འོད་སྲུང་དང་ཁྱོད་གཉིས་ཀྱིས་ལོ་བཞི་བཅུ་ལྷག་ཙམ་དུ་ངའི་དམ་པའི་ཆོས་འཛིན་པར་འགྱུར་རོ། །གྲོང་ཁྱེར་བཅོམ་བརླག་རི་སྤོ་དང་ངོས་ཆེ་བ་ཞེས་བྱ་བར་ཡུལ་གླན་པ་ཞེས་བྱ་བའི་དགེ་སློང་དང་། །ཡང་དེར་དགེ་སློང་དགའ་མཛེས་བྱ་བ་འབྱུང་། །རི་ཨུ་ཤི་རར་དགེ་སློང་བཞི་ཁྲི་སྟོང་དང་།གྲོང་ཁྱེར་སྐྱ་ནར་གྱི་བུར་ཀུན་དགའ་ར་བ་ལ་ཞེས་བྱ་བར་དགེ་སློང་རྟ་སྦས་དང་། དེར་བྱ་གག་གི་ཀུན་དགའ་ར་བར་དགེ་སློང་བླ་མ་དང་། ཡུལ་ཡན་ལག་ཏུ་ལོ་ལྔའི་དུས་སྟོན་པ་དགྲ་བཅོམ་པ་ཁྲི་སུམ་སྟོང་དང་། གྲོང་ཁྱེར་གསེར་གྱི་བྲེར་དགེ་སློང་མཁས་པ་ཞེས་བྱ་བ་དང་ཡང་དག་པར་རྒྱལ་བ་ཅན་ཞེས་བྱ་བ་གཉིས་དང་། གྲོང་ཁྱེར་གནས་བཅས་སུ་དགེ་སློང་བརྩོན་འགྲུས་ཆེ་དང་། བྱང་ཕྱོགས་ཀྱི་རྒྱུད་ཀྱི་ཡུལ་སྤོས་འཛིན་དུ་དགེ་སློང་འོད་སྲུང་སྟེ་དགེ་སློང་དེ་དག་ཐམས་ཅད་རྫུ་འཕྲུལ་ཆེ་བ་མཐུ་ཆེ་བ་དབང་ཆེ་བར་གྲགས་པར་གསལ་བ་འཇིགས་པ་མེད་པ་མང་དུ་ཐོས་པ་འདུལ་བ་འཛིན་པ་མདོ་སྡེ་འཛིན་པ་མངོན་པ་འཛིན་པ་ཡང་དག་པར་སྟོན་པ་འཛིན་དུ་འཇུག་པ། གཟེངས་བསྟོད་པ། རབ་ཏུ་དགའ་བར་བྱེད་པས་ངའི་བསྟན་པ་རྒྱས་པར་བྱེད་དོ། །བྱང་ཕྱོགས་ཀྱི་རྒྱུད་དུ་གྲོང་ཁྱེར་རྡོ་འཇོག་ཅེས་པར་ཁྱིམ་བདག་རལ་པ་ཅན་ཞེས་པ་འབྱུང་། །དེས་ངའི་ལུས་དང་ཉན་ཐོས་རྣམས་མཆོད་པར་འགྱུར་ཏེ་བསྐལ་པ་སྟོང་ནས་བསྐལ་པ་བཟང་བྱེད་ལ་བཀོད་པ་ཆེན་པོས་ལེགས་པར་བརྒྱན་པའི་འཇིག་རྟེན་དུ་སངས་རྒྱས་ཀུན་ཏུ་སྣང་བ་ཞེས་བྱ་བར་འགྱུར་རོ། །བྱང་ཕྱོགས་ན་ཕོ་བྲང་རྒྱས་ལྡན་དུ་བྲམ་ཟེ་དང་ཁྱིམ་པ་བསྟན་པ་ལ་དད་པ་མང་པོ་འབྱུང་སྟེ་ཤི་ནས་དགའ་ལྡན་དུ་སྐྱེ་ལ། རབ་ཏུ་བྱུང་བ་ཕལ་ཆེར་ཆོས་བཞིན་མི་སྤྱོད་པས་ལོག་པར་ལྟུང་ངོ་། །དེར་དགེ་བསྙེན་ཆོས་འཕེལ་ཞེས་བྱ་བ་རྫུ་འཕྲུལ་དང་ལྡན་པ་ཞིག་འབྱུང་ངོ་། །བྱང་ཕྱོགས་སུ་དགེ་སློང་འཚོ་བྱེད་ཅེས་པ་ཐེག་ཆེན་པ་ཞིག་འབྱུང་སྟེ་དེས་སངས་རྒྱས་ཀྱི་མཆོད་རྟེན་ཞིག་པ་འཆོས་ཤིང་གསེར་གྱིས་བརྒྱན་པ་ལ་སོགས་ལོ་ལྔ་པ་བྱེད་དུ་འཇུག་ཅིང་བདེ་བ་ཅན་དུ་སྐྱེའོ། །མཐའ་འཁོབ་ཀྱི་ཡུལ་ནགས་ཀྱི་ས་ན་རྒྱལ་པོའི་ཕོ་བྲང་ཞི་བ་ན་རྒྱལ་པོ་མེས་སྤྱིན་ཞེས་བྱ་བས་སྐུ་གདུང་དང་ཉན་ཐོས་རྣམས་མཆོད་དེ་དེར་དགྲ་བཅོམ་པ་སུམ་སྟོང་ལྷག་ཙམ་འདུའོ། །བྱང་ཕྱོགས་ཀྱི་རྒྱུད་ན་གྲོང་ཤིང་ཀུན་སྐྱེ་བ་ཞེས་བྱ་བར་ཚེམས་མཆེ་བ་ལ་མཆོད་པ་རྒྱ་ཆེན་པོ་བྱེད་ཅིང་དགེ་སློང་ཁྲིམས་ལྡན་མང་དུ་འབྱུང་སྟེ་ཐམས་ཅད་ཐེག་པ་གསུམ་གྱིས་མྱ་ངན་ལས་འདའ་སྟེ་དེ་རྣམས་ཀྱིས་ངའི་བསྟན་པ་རྒྱས་པར་བྱེད་པར་འགྱུར་གྱིས་མྱ་ངན་མ་བྱེད་ཅེས་གསུངས་སོ། །
ལང་ཀར་གཤེགས་པར། ལྷོ་ཕྱོགས་བེ་དའི་ཡལ་དུ་ནི། །དགེ་སློང་དཔལ་ལྡན་ཞེས་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་བསྟན་པ་འཇིག་རྟེན་དུ། །བླ་མེད་ཐེག་ཆེན་རབ་བཤད་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་དང་། འཇམ་དཔལ་རྩ་རྒྱུད་ལས། དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་འབོད་འབྱུང་། །བསྟན་པ་ལ་ནི་དད་ཅིང་ཕན། །རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་པོ་དེས་ཀྱང་འགྲུབ། །བསྟན་བཅོས་སྣ་ཚོགས་དོན་དང་ནི། །དངོས་པོ་མེད་པའི་དོན་དེ་རིག གང་ཚེ་ལུང་དེ་བོར་པ་ན། །བདེ་བ་ཅན་དུ་སྐྱེ་བར་འགྱུར། །དེ་ནི་མཐར་གྱིས་སངས་རྒྱས་ཉིད། །ངེས་པ་ཁོ་ནར་ཡང་དག་འཐོབ། །ཅེས་ཀླུ་སྒྲུབ་ལུང་བསྟན་ནོ། །
ཐོགས་མེད་ཅེས་བྱའི་དགེ་སློང་ནི། །བསྟན་བཅོས་ཀྱི་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །འཇིག་རྟེན་རིག་པ་སྟོན་བདག་ཉིད། །གཞུང་འབྱེད་ངང་ཚུལ་ཅན་དུ་འགྱུར། །དེ་ཡི་རིག་པ་གྲུབ་པ་ནི། །པ་ལའི་ཕོ་ཉ་མོ་ཞེས་བརྗོད། །དེ་ཡི་སྔགས་ཀྱི་མཐུ་ཡིས་ནི། །བློ་ནི་བཟང་པོ་སྐྱེ་བར་འགྱུར། །བསྟན་པ་ཡུན་རིང་གསལ་བྱའི་ཕྱིར། །མདོ་ཡི་དེ་ཉིད་དོན་སྡུད་བྱེད། །ལོ་ནི་བརྒྱ་དང་ལྔ་བཅུར་འཚོ། །དེ་ལུས་ཞིག་ནས་ལྷ་ཡུལ་འགྲོ། །འཁོར་བ་རྣམས་སུ་འཁོར་བ་ན། །ཡུན་རིང་བདེ་བ་རྗེས་མྱོང་ནས། །བདག་ཉིད་ཆེན་པོ་མཐར་གྱིས་ནི། །བྱང་ཆུབ་འཐོབ་པར་འགྱུར་བ་ཡིན། །ཞེས་ཀྱང་ཐོགས་མེད་ལུང་བསྟན་ནོ། །ང་ནི་མྱ་ངན་འདས་འོག་ཏུ། །ལོ་ནི་དགུ་བརྒྱ་ལོན་པ་ན། །ཞེས་ཟེར་བ་ནི་རྒྱུད་ན་མེད་དོ། །འོན་ཀྱང་རྒྱའི་སློབ་དཔོན་རྫོགས་གསལ་གྱིས་དགོངས་འགྲེལ་པར་བྲིས་པའོ།།
ཕྱི་མ་དེ་ཚེ་དུས་དག་ཏུ། །དགེ་སློང་དགྲ་བཅོམ་ཞེས་བྱ་བ། །དེ་ནི་སྔགས་དོན་བདག་ཉིད་ཅན། །རྒྱུད་ཤེས་དེ་བཞིན་མང་དུ་ཐོས། །གནོད་སྦྱིན་སྔགས་ནི་རབ་བརྗོད་པས། །དེ་ལ་བུམ་པ་བཟང་པོ་གྲུབ། །ཅེས་སོགས་ཀྱིས་དགྲ་བཅོམ་ལུང་བསྟན་ནོ། །
དགེ་སློང་མང་དུ་ཐོས་པ་ནི། །དེ་ཡི་ཚེ་ན་འབྱུང་འགྱུར་བ། །མ་ཁོལ་ཞེས་ཀྱང་བྱ་བ་སྟེ། །ང་ཉིད་ཀྱི་ནི་བསྟོད་བྱེད་པ། །ཇི་བཞིན་ཡོད་དམ་བཟང་པོ་ནི། །ཇི་ལྟ་བཞིན་དུ་བརྗོད་པར་འགྱུར། །ཀུན་ནས་སེམས་ནི་རབ་དང་ཞིང་། །སངས་རྒྱས་རྣམས་ཀྱི་བསྟན་ལ་དད། །སྒྲུབ་དཀའ་སྔགས་ནི་རབ་གྲུབ་ཅིང་། །འཇམ་པའི་དབྱངས་ཀྱིའང་དེ་བཞིན་ནོ། །ཡོན་ཏན་ལྡན་ཞིང་ཚུལ་ཁྲིམས་ལྡན། །མང་དུ་ཐོས་ཤིང་ཆོས་ཀྱང་སྨྲ། །ཞེས་པ་ནས། ཐམས་ཅད་མཁྱེན་པའི་བྱང་ཆུབ་འཐོབ། །ཅེས་པའི་བར་གྱིས་མཱ་ཏི་ཅི་ཏྲ་ལུང་བསྟན་ནོ། །
སྟོན་པའི་གསུང་རབ་ས་སྟེང་དུ། །དུས་མཐའ་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བར་ཐེ་ཚོམ་མེད། །དཔེར་ན་མ་ཁོལ་ཞེས་བྱ་དང་། །མེ་ཏོག་ཅེས་བྱར་རྣམ་པར་གྲགས། །ཡི་གེ་མ་ཞེས་གཞོན་ནུ་ཞེས། །དང་པོ་ཐ་མར་ཆོས་ལ་དགའ། །ཀླུས་བོས་ཞེས་ཀྱང་རྣམ་པར་གྲགས། །རིན་ཆེན་འབྱུང་〔ཞེས་པ་སྟེ་ཤྰནྟི་པར་གྲགས་སོ〕ཞེས་བྱ་མིང་དང་། ། ཡི་གེ་ག་ཞེས་གཞོན་ནུ་ཞེས། །ཡི་གེ་བ་ཞེས་ཆོས་སེམས་བྱེད། །ཡི་གེ་ཨ་མིང་བདག་ཉིད་ཆེ། །སྟོན་པའི་བསྟན་པ་གཅེས་འཛིན་བྱེད། །བློ་ལྡན་ཡོན་ཏན་ཀུན་གྱིས་བཏུད། །དང་པོའི་ཡི་གེ་ལ་ཞེས་བསྟན། །རྒྱལ་པོ་སངས་རྒྱས་པ་ཡི་ཕྱོགས། །སྟོན་པའི་བསྟན་པ་གསལ་བར་བྱེད། །སྡོམ་བརྩོན་ཡི་གེ་ཨཱ(ཨནནྟ་གརྦྷ་ཀུན་དགའ་སྙིང་པོ)ཞེས་བསྒྲགས། །བྲམ་ཟེ་ལས་ནི་རབ་ཏུ་བྱུང་། །གྲོང་ཁྱེར་གནས་བཅས་གནས་པ་སྟེ། །དེ་བཞིན་ཚེ་ནི་བརྒྱད་བཅུར་འཚོ། །དང་ཡིག་ཡི་གེ་ཨ་དགེ་སློང་། །ལྷོ་ཡི་ཕྱོགས་སུ་འབྱུང་བར་འགྱུར། །བློ་ལྡན་ཚེ་ནི་དྲུག་བཅུར་འཚོ། །ཀ་ཤི་ཞེས་བྱའི་གྲོང་དུ་གནས། །ཡི་གེ་དྷ་(དྷརྨ་ཀིརྟི)ཞེས་སྡོམ་བརྩོན་ཉིད། །ལྷོ་ཡི་ཕྱོགས་སུ་རྣམ་པར་བསྒྲགས། །ཕ་རོལ་རྒོལ་པ་བཟློག་ནས་ཀྱང་། །དེ་བཞིན་སྡོམ་བརྩོན་སྔགས་ཀྱང་གྲུབ། །གཞན་ཡུང་རབ་བྱུང་དམ་པ་ནི། །སིང་ག་ལ་ཡི་གྲོང་དུ་གནས། །འཕགས་པ་མིན་ལ་འཕགས་པའི་མིང་། །སིང་ག་ལ་ཡི་གླིང་ན་གནས། །ཕ་རོལ་རྒོལ་པ་བཟློག་ནས་ནི། །མུ་སྟེགས་རྣམས་ཀྱི་སྔགས་སུན་ཕྱུང་། །དེ་དུས་འཇིགས་སུ་རུང་བ་ཡི། །དུས་ཀྱི་མཐའ་ལ་འབྱུང་བར་འགྱུར། །ཡི་གེ་ད་དང་ལ་དང་པོར། །སྡོམ་བརྩོན་གང་ཞིག་རབ་གསུངས་དང་། ཡི་གེ་ར་དང་བ་དང་པོར། །དགེ་སློང་གང་ཞིག་རབ་བྱུང་གསུངས། །སྟོན་པའི་བསྟན་པ་གསལ་བྱེད་པ། །འབྱུང་བར་འགྱུར་བར་ཐེ་ཚོམ་མེད། །རྒྱལ་པོ་ནག་པོ་ཞེས་བྱ་བར། །ཡི་གེ་མ་ཞེས་སྡོམ་བརྩོན་འབྱུང་། །མཆོད་རྟེན་ཀུན་དགའ་ར་བར་གནས། །རྫིང་དང་ཁྲོན་པའང་ཐམས་ཅད་དུ། །སྟོན་པའི་གཟུགས་བརྙན་དེ་བཞིན་བརྟགས། །གཟིངས་དང་ཟམ་པ་ཉིད་རྣམས་ནི། །བྱེད་པར་འགྱུར་བར་ཐེ་ཚོམ་མེད། མཚོན་གྱིས་ལུས་ཞིག་མཐོ་རིས་འགྲོ། །དེ་ནས་ཡི་གེ་ས་དང་ཀ ། དང་པོ་དག་ཏུ་བརྗོད་པ་དང་། །དེ་བཞིན་ཡི་གེ་ར་དང་གྷ། །དང་པོ་དག་ཏུ་རབ་བརྗོད་དང་། །དང་པོར་ཡི་གེ་པ་དང་ནི། །ལགས་བཞིན་ལེགས་ཏེ་སྡེ་ཞེས་བསྟན། །སྦྱིན་བྱེད་སྦྱིན་པར་བྱེད་པ་ཉིད། །གཞན་གྱི་གྲུབ་མཐའ་སུན་བྱེད་པ། །ཚོང་པ་སྔོན་དང་སྨན་པ་སྟོན། །གཉིས་ཀ་སྦྱིན་བྱེད་སྣ་ཚོགས་བྱེད། །ཡི་གེ་པ་ཞེས་སྡོམ་བརྩོན་བསྒྲུབས། །དེ་ལས་གཞན་དང་ཡི་གེ་ར། །དང་པོ་ཡི་གེ་བ་གྲགས་དང་། །སྟོན་པའི་གཟུགས་བརྙན་དོན་ཡང་བྱེད། །བློ་ལྡན་དང་པོ་ཡི་གེ་མ། །དེ་བཞིན་སྡོམ་བརྩོན་དད་པ་འབྱུང་། །རྣམ་པ་དུ་མ་སྡོམ་བརྩོན་གསུངས། །དེ་ཚེ་མཐའ་ཡས་འབྱུང་བར་འགྱུར། །(བ་སུ་བན་དྷུ་དབྱིག་གཉེན)སྡོམ་བརྩོན་ཐམས་ཅད་བསྒྲགས་པ་ཡང་། །སྟོན་པའི་བསྟན་པ་གསལ་བྱེད་པའོ། ། །བསྟན་པ་དེ་ཚོ་ས་སྟེང་དུ། །རྣམ་པར་ཉམས་ཤིང་སྣང་མེད་ལ། །སྟོན་པའི་གཟུགས་བརྙན་ཡིད་དུ་འགྱུར། །དེ་བཞིན་འཇིག་རྟེན་སྦྱིན་གནས་འགྱུར། །སྲིད་པ་གསུམ་གྱི་མཐར་ཡང་བྱེད། །སྔགས་དང་རྒྱུད་ལ་མངོན་བརྩོན་པས། །གྲགས་པ་འཛིན་པར་ཤེར་པར་བྱ། །ཞེས་སྡོམ་བརྩོན་རྣམས་ལུང་བསྟན་ལ། །དེ་ནས་བྲམ་ཟེ་ཁྱིམ་ན་གནས་པས་བསྟན་པ་ལ་བྱ་བ་བྱེད་པ་ནི། །བྲམ་ཟེ་ཆོས་ཀྱི་ངང་ཚུལ་ཅན། །ད་ནི་རབ་ཏུ་བརྗོད་པར་བྱ། །སྔགས་དང་རྒྱུད་ལ་མངོན་བརྩོན་པས། །རྒྱལ་པོའི་ལུགས་ལ་ཉེ་བར་གནས། །དེ་ཚོ་མི་བཟད་དུས་དག་ཏུ། །འཇིག་རྟེན་ཀུན་ལ་འབྱུང་བར་འགྱུར། །ཡི་གེ་པ་ཞེས་བྲམ་ཟེ་མཆོག །ཕྱུག་ཅིང་རིག་བྱེད་ཕ་རོལ་ཕྱིན། །དེ་འདིར་ས་རྣམས་མ་ལུས་པར། །རྩོད་པའི་ཕྱིར་ནི་རབ་ཏུ་རྒྱུ། །མཚོ་གསུམ་ས་ཡི་མཐར་ཐུག་པར། །ཕ་རོལ་མུ་སྟེགས་རྩོད་ལ་དགའ། །གང་ཕྱིར་དང་པོ་གཙོ་བོའི་ཚིག །སེམས་ཅན་རྣམས་ལ་ཕན་འདོད་པས། །གཞོན་ནུས་ཡོངས་སུ་གསུངས་གྱུར་པ། །ཡི་གེ་དྲུག་པའི་སྔགས་ཀྱང་ཟློས། །ཆོ་ག་རབ་འབྱམས་འདི་དག་ལས། །དེས་ནི་དེ་ཕན་དེ་ལ་བསྟན། །རྒྱལ་དང་ལེགས་པར་རྒྱལ་བ་དང་། །གྲགས་ལྡན་དགེ་བ་དེ་ལས་གཞན། །རིགས་ལྡན་ཆོས་དང་ལྡན་པ་དང་། །བརྩོན་ལྡན་ལེགས་པ་ཁྱབ་འཇུག་དང་། །སྦྲང་རྩི་སྦྲང་རྩི་བཟང་པོ་དང་། །དེ་བཞིན་གྲུབ་དང་ལེགས་བྲལ་དང་། །ར་གྷ་བ་དང་དམངས་རིགས་དང་། །དེ་བཞིན་ཀཱ་ཤིར་སྐྱེས་པ་གཞན། །གཞོན་ནུ་འདི་ཡིས་བཟླས་པ་ལ། །ཐམས་ཅད་ཀུན་ཀྱང་འབྱུང་བར་འགྱུར། །དེ་དག་ཀུན་ཀྱང་བཟང་པོ་སྟེ། །བློ་ལྡན་མང་དུ་ཐོས་པ་ཡིན། །ཞེས་དང་། དེ་འོག་རྣམ་པར་གྲགས་པ་ནི། །བྲམ་ཟེ་ཡི་གེ་དང་པོ་ཨ། །ཞོས་དོན་དགེ་བ་ལྡན་བདག་ཉིད། །བདེན་པར་སྨྲ་ཞིང་དབང་པོ་ཐུལ། །ཞེས་པ་དང་། །དེ་འོག་རྣམ་པར་གྲགས་ཁ་ནི། །བྲམ་ཟེ་ཆོས་དོན་སེམས་བྱེད་པ། །དེ་ནས་མཐར་ནི་ཡང་ཡིན་ཤ། །མ་ལའི་ཡུལ་དུ་དེ་ཉིད་འབྱུང་། །ཞེས་དང་། དེ་འོག་རྣམ་པར་གྲགས་པ་ནི། །ལྷོ་ཡི་ཕྱོགས་སུ་བྲམ་ཟེ་ནི། །ཡི་གེ་དང་པོ་བ་བསྟན་པ། །སྟོན་པའི་བསྟན་ལ་དེ་གཙོ་བྱེད། །མཆོད་རྟེན་ཀུན་དགའ་ར་བར་གནས། །སྟོན་པའི་གཟུགས་བརྙན་ཡིད་འོང་གིས། །ས་ནི་རྒྱ་མཚོ་གཉིས་མཐར་ཐུག ཐམས་ཅད་ཀྱི་ནི་རྒྱན་དུ་བྱས། །དེ་འོག་རྣམ་པར་གྲགས་པ་ནི། །བྲམ་ཟེའི་གཙོ་བོ་ནོར་ཆེན་ལྡན། །དང་པོ་ཡི་གེ་ན་ཞེས་པ། །ལྷོ་ཡི་ཕྱོགས་སུ་ཡང་དག་བརྟེན། བདག་ཉིད་ཆེན་པོ་སྔགས་ཟློས་ལྡན། །ངེས་པར་བྱང་ཆུབ་གཞོལ་བར་འགྱུར། །ཞེས་པ་འདི་གཉིས་དབྱིག་གཉིས་དང་ཕྱོགས་གླང་ལ་སྦྱོར་བ་མང་ཡང་སྡོམ་བརྩོན་ལས་ལོགས་སུ་ཕྱེ་བའི་བྲམ་ཟེ་ཡིན་པས་མ་ཡིན་ནོ། །དབུས་ཀྱི་ཡུལ་དུ་བྲམ་ཟེ་ནི། །བྲམ་ཟེ་གང་བ་བཟང་ཞེས་པ། །འདུལ་བ་དང་ནི་ཚུལ་བཟང་ཉིད། །གང་བ་བཅོམ་རླག་ཉིད་དུ་གནས། །དང་ཡིག་བྷ་ནི་ནོར་གྱི་སྤྱན། །རྒྱལ་པོ་རྣམས་ཀྱི་སྔགས་མཆོད་བྱེད། །བྲམ་ཟེ་འདི་དག་བསྟན་པ་ནི། །སྟོན་པའི་བསྟན་པ་མཆོད་བྱེད་པའོ། །ཞེས་བྲམ་ཟེ་ལུང་བསྟན་པའོ།། དྲན་གསལ་གྱིས་ཞུ་དག་བྱས།
བོད་ལྗོངས་རིག་གནས་དྲ་བ་ལས་བཏུས།
དཔྱད་གཏམ་སྤེལ་མཁན་ལ་གསལ་བརྡ།