སྟོན་པ་བཀའ་དྲིན་ཅན་གྱི་བསྟན་པ་འདི། །
དེ་འཛིན་དམར་སེར་འདུས་པའི་དགེ་འདུན་སྡེ། །
དར་ཞིང་རྒྱས་པའི་ཆེད་དུ་གཎྜི་ཡི། །
རྣམ་བཤད་གོ་བདེ་འཆད་ལ་ཅིས་མི་སྤྲོ། །
ཞེས་ལམ་ཡོངས་པོར་ཕྱེས་ནས་གང་ཞིག་གླེང་བ་ནི་གཎྜི་ཡིན་ལ། དེའང་རྒྱུར་རུང་བ་ནི། ཤིང་བཅུ་དྲུག་གམ་ཡང་ན་བཅོ་ལྔ་གང་རུང་ལ་དགོས་ཞེས་གསུངས་ལ། ཨ་ཤྭད་ཐ་སོགས་ནི་ཡུལ་དུས་ཀྱིས་མི་རྙེད། བིལ་བ་དང་སྐྱུ་རུ་ར་སོགས་ནི་རྒྱ་གར་དང་བལ་ཡུལ་གྱི་ནག་ཁྲོད་ལ་ཡོད་ཀྱང་། བོད་ལ་མེད་པ་བཤད། ཙནྡན་དཀར་དམར་ནི་དཔལ་འབྱོར་ཆེན་པོ་ཡོད་ན་མ་གཏོགས་རྙེད་དཀའ་འོ། །བོད་ལ་ཡོད་པ་ནི། སྟར་བུ་དང་། སྟར་ཁ་གཉིས་ཡིན་ལ། དེའང་སྟར་བུ་ནི། ཤིང་ཚེར་མ་ཅན་ཞིག་འདི་ལ་གནམ་སྟར་དང་། བར་སྟར་དང་། ས་སྟར་ཟེར་བ་གསུམ་ཡོད། ཚེར་མ་རྣོན་པོས་ཁྱབ་པ། ལོ་མ་མ་སྐྱེས་གོང་ནས་མེ་ཏོག་འཆར་བའི་ཤིང་ཞིག་གོ །སྟར་ཁའམ། ཡང་ན་སྟར་ག་དེ་གཉིས་ནི་མིང་གི་རྣམ་གྲངས་ཡིན་ལ། ཁམ་བུ་བཅའ་རྒ་སྐྱེ་སའི་ཤིང་དེ་ལའོ། །གཞན་ཡང་རྒྱ་ཤུག་དང་སྟག་པ་གཉིས་ཀྱང་བྱ་རུང་བར་མཚོ་སྣ་བས་བཞེད་པས། རྒྱ་ཤུག་ཟེར་བ་ནི་ཡོངས་གྲགས་ལ་ཤུག་པ་ཟེར་བའི་བསང་མཆོད་དུས་ཀྱི་ཤིང་དེ་ལའོ། །སྟག་པ་ནི་གྲོལ་ག་ཅན་གྱི་ཤིང་དེ་ལའོ། །གཎྜི་གྱི་མདོ་ལས། འོ་སེ་ལ་ནི་འབད་དེ་བྱ། །ཞེས་གསུངས་པས་ན་དེ་ནི་བོད་ལའང་ཡོད་པས་འོ་སེ་ལོན་ན་མཆོག་ཏུ་གྱུར་པ་ཡིན་པས་དེ་ལ་འབད་དགོས་པ་ཡིན་ནོ། །ཚད་ནི་སྲིད་དུ། ཚད་ནི་མཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་དུ་སོར་དྲུག་བྱ་བ་སྟེ། །ཞེས་གསུངས་པས་མི་འབྲིང་ཚད་ཀྱི་སོར་བརྒྱད་ཅུ་གྱ་བཞིའམ། ཡང་ན་ཁྲུ་གསུམ་དང་ཕྱེད་དམ་སོར་བཅུ་གཉིས་ཡིན་ནོ། །ཞིང་ནི་སོར་དྲུག །དཔང་དུ་སོར་གཉིས། བརྒྱད་གཞོགས་དེའང་སོར་གཉིས་གཉིས་དང་ལྡན་པ། རྩེ་མོ་གཉིས་ལ་སྦལ་བའི་མགོ་འདྲ་བར་དགོས་ཞེས་གསུང་། གཎ་གཡོག་ཀྱང་གཎྜི་གྱི་ཤིང་དེ་ཉིད་ལས་བཅད་པ་ཞིག་ངེས་པར་དུ་དགོས། དེའི་ཚད་ནི་སྲིད་ལ་སོར་ཉེར་བཞིའམ། ཡང་ན་ཁྲུ་གང་ངོ་། །དབྱིབས་ནི་ཟླུམ་པོ། དེའང་ཕྱེད་སོར་བཅུ་གཉིས་རྡུང་བྱེད། ཕྱེད་སོར་བཅུ་གཉིས་ལག་པས་གཟུང་བར་བྱ་བའི་ཆང་གཟུང་གི་རྣམ་པར་སྣེ་མོ་གཉིས་ཀ་ལ་ནེའུ་ལེའི་མགོ་འདྲ་བར་དགོས་གསུང་། ཁ་ཅིག་གིས་སོར་བཅུ་གཉིས་ཁོ་ན་ཡིན་ཟེར་བ་མི་འཐད་དེ། མདོ་དེ་ཉིད་ལས། དེ་ནས་རྡུང་བར་བྱེད་པ་ཡང་། །ཤིང་དེ་ཉིད་ལ་བཅད་དེ་བྱ། །སོར་བཅུ་གཉིས་ཀྱི་ཚད་དག་ལ། །ཟླུམ་ཞིང་རྩེ་གཉིས་ནེའུ་ལེའི་མགོ །ཆང་ཟུང་དག་ཀྱང་དེ་བཞིན་ནོ། །ཞེས་གསུངས་སོ། །གཎྜི་ཆུང་བ་ལ། སོར་ཉེར་བཞིའམ། ཡང་ན་ཁྲུ་གང་ངོ་། །གཎ་གཡོག་ཀྱང་དེ་དང་མཚམ་པ་ཞིག་དབྱིབས་སོགས་སྔར་མ་དེས་རིག་འགྲེའོ། །འོན་ཀྱང་འདི་བོད་འགྲེལ་ཕལ་མོ་ཆེ་ལས་བཤད་ཀྱང་མདོ་ལས་བཤད་པ་མ་མཐོང་ངོ་། །བཞག་ས་ནི། ཁང་སྟེང་ངམ་ཡིད་དུ་འོང་བའི་གནས་སུ་ན་བཟའ་གསོལ་བ་དང་བཞུགས་ཁྲི་སྟེང་ལ་བཞག་པར་བྱའོ། །མ་གུས་པར་བྱ་བ་རྣམས་སྤང་ནས། ཤིན་ཏུ་ནས་གུས་པར་བྱའི་ཡུལ་ཡིན་ནོ། །བརྡུང་པའི་གནས་ནི། གཙུག་ལག་ཁང་གི་སྟེང་ལ་སོགས་པ་གཎྜིའི་སྒྲ་ཀུན་གྱིས་ཐོས་པའི་གནས་ཞིག་ཏུ་བྱའོ། །རབ་གནས་ནི། མདོ་ལས། ཤིན་ཏུ་བརྟན་པ་ཆོས་ཀྱི་སྐུ། །སྐྱེ་བ་མ་ཡིན་འཇིག་བྱེད་མིན། །གདོད་ནས་མ་སྐྱེས་བར་སྐྱེ་བ། །དེ་ལྟར་རབ་ཏུ་གནས་བྱས་ནས། །དེ་ནི་སྤྱན་དབྱེར་གྱུར་པ་ཡིན། །ཞེས་གསུངས་པར་ལྟར། ཆོས་སྐུ་སྐྱེ་འགག་གནས་གསུམ་དང་བྲལ་བའི་སྟོང་པ་ཉིད་གདོད་མ་ནས་མ་སྐྱེས་ཤིང་དགེ་བ་ཡུམ་ཆེན་མོར་མོས་པ་བྱས་ནས། བཀྲ་ཤིས་པའི་ཚིགས་སུ་བཅད་པ་བརྗོད་པ་སྟེ། ལུས་ལ་ཆོས་གོས་གསུམ་གྱི་བཀྲ་ཤིས་ཤོག །ངག་ལ་སྡེ་སྣོད་གསུམ་གྱི་བཀྲ་ཤིས་ཤོག །སེམས་ལ་བསླབ་པ་གསུམ་གྱི་བཀྲ་ཤིས་ཤོག །ཀུན་ལ་དཀོན་མཆོག་གསུམ་གྱི་བཀྲ་ཤིས་ཤོག །ཆོས་རྔ་ཆེན་པོའི་སྒྲ་ཡིས་ནི། །སྡུག་བསྔལ་སེམས་ཅན་ཐར་བགྱིད་ཤོག །བསྐལ་བ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་གྱུར་ཅིག །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོར་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱི་བཀྲ་ཤིས་ཤོག །ཅེས་དང་། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང་། །གུས་པས་འཕགས་པའི་སྤྱན་ནི་དབྱེ་བགྱིས་པས། །ནམ་མཁའི་མཐར་ཐུག་གྱུར་པའི་སེམས་ཅན་རྣམས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤྭ་དྷཱ་ནི་སྭཱ་ཧཱ། ཡེ་ཤེས་ཀྱི་སྤྱན་རྣམ་པར་དག་པ་དང་ལྡན་ཞིང་། སེམས་ཅན་གྱི་དོན་ལ་འཇུག་པའི་མཐུ་ཕུན་སུམ་ཚོགས་པ་དང་ལྡན་པར་གྱུར་ཅིག །ཅེས་ལན་གསུམ་བརྗོད་ཅིང་རྟེན་གྱི་སྤྱན་གཡས་གཡོན་དུ་ཕྱེ་བའི་ཚུལ་བྱའོ། །འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །གཞན་གནོད་གཞི་བཅས་སྤོང་ལ་གོམས་པའི་མཐུས། །རྨི་ལམ་ན་ཡང་སྡིག་སེམས་མི་འབྱུང་ཞིང་། །བྱང་ཆུབ་སེམས་དང་ནམ་ཡང་མི་འབྲལ་ཞིང་། །ཚུལ་ཁྲིམས་ཕུན་སུམ་ཚོགས་པའི་བཀྲ་ཤིས་ཤོག །མི་འགྱུར་ལྷུན་པོ་སྐུ་ཡི་བཀྲ་ཤིས་ཤོག །ཡན་ལག་དྲུག་ཅུ་གསུང་གི་བཀྲ་ཤིས་ཤོག །མཐའ་བྲལ་དོན་རྟོག་ཐུགས་ཀྱི་བཀྲ་ཤིས་ཤོག །རྒྱལ་བའི་སྐུ་གསུང་ཐུགས་ཀྱི་བཀྲ་ཤིས་ཤོག །བསྟན་པའི་དཔལ་གྱུར་བླ་མའི་ཞབས་པད་བསྟན། །བསྟན་འཛིན་སྐྱེས་བུ་ས་སྟེང་ཡོངས་ལ་ཁྱབ། །བསྟན་པའི་སྦྱིན་བདག་མངའ་ཐང་འབྱོར་བ་རྒྱས། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཅེས་སོགས་གསུངས་ན་ལེགས། མཚོ་སྣ་བས། བཀྲ་ཤིས་པའི་ཚིག་བྲི་བ་དང་ཞེས་གསུངས་པས། ཨོཾ་ཡེ་དྷཱ་རྨཱ་་་ཧེ་ཏུ་་་པྲ་བྷ་བ། ཧེ་ཏུན་་་ཏེ་ཥཱན་་་ཏ་ཐཱ་ག་ཏོ། ཧྱ་ཝ་དཏ་་་ཏེ་ཥ྅་་་ཙ་ཡོ་་་ནི་རོ་དྷ། ཨེ་ཝཾ། བཱ་དཱི། མ་ཧཱ་ཤྲ་མ་ཎཿསྭཱ་ཧཱ། ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཨོཾ་ཨ་ར་པ་ཙ་ན་དྷཱིཿ གོང་གི་ཚིག་བཅད་འགའ་ཞིག་དང་སྔགས་དེ་རྣམས་བྲིས་ན་བཟང་ངམ་སྙམ། གཞུང་ལས་སེར་སྔགས་བྲི་བར་བྱ་སྟེ་བརྡུངས་པ་ལས་གནོད་པ་ཞི་བའི་དགོས་པ་ཡོད་ཅེས་གསུངས་ཚུལ་ལས་ཤེས་ནུས་པ་ཡིན་ནོ། །སེར་སྔགས་ནི་དེང་སང་མི་དགོས་པ་འདྲ། བརྡུང་མཁན་ནི། དགེ་སློང་དང་དགེ་ཚུལ་ཚུལ་ཁྲིམས་རྣམ་དག་དང་ལྡན་པས་བརྡུང་། གསོ་སྦྱོང་གི་སྐབས་སུ་དགེ་བསྙེན་གྱིས་ཀྱང་བརྡུང་བར་གསུངས་སོ། །བསམ་པ་ཇི་ལྟ་བུས་བརྡུང་ཞེ་ན། གཎྜི་ཡུམ་ཆེན་མོར་མོས་པ་དང་། བརྡུང་བའི་ཚེ་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། བརྡུང་བའི་སྒྲ་དེ་ལས་ཟབ་པ་དང་རྒྱ་ཆེ་བའི་ཆོས་ཀྱི་སྒྲ་འབྱུང་བར་མོས་པ་དང་། རྒྱལ་བའི་བསྟན་པ་མི་ནུབ་ཅིང་འཕེལ་བ་དང་། སེམས་ཅན་ཐམས་ཅད་ལ་ཕན་པའི་བསམ་པ་སྐྱེད་ནས་བརྡུང་བར་བྱའོ། །ཤེར་རབ་སྙིང་པོའི་སྔགས་འདོན་བཞིན་པའི་ངང་ནས་བརྡུང་ཚུལ་ཡང་བཤད་འདུག །གང་ལྟ་གཎྜི་བརྡུང་བའི་གནས་སུ་སོང་སྟེ། ཆོས་གོས་གྱོན་ནས་ཐོག་མར་དཀོན་མཆོག་གསུམ་ལ་ཕྱག་བྱས་ནས་བསམ་གཏན་ལ་མཉམ་པར་བཞག་པ་སོགས་ལ་གནོད་པ་སྤང་བའི་ཕྱིར་དུ་ཤངས་ཙ་ལན་གསུམ་བྱེད། དེ་ནས་རྒྱུད་གསུམ་དང་ཏོག་གསུམ་བཅས་རྒྱས་པ་ཞིག་བརྡུང་ན། དེའང་རྒྱུད་རེ་ལ་གཅིག་ནས་བཅོ་བརྒྱད་བར་ཇེ་ཆེ་དང་། བཅུ་དགུ་ནས་སོ་དྲུག་བར་ཇེ་ཆུང་དང་། དེ་འདྲའི་ཚན་པ་གསུམ་ལ་རྒྱུད་གསུམ་ཟེར། དེ་ལ་ཉ་ལྟར་བརྡུང་བར་ཟེར། དེའང་ཟླ་བ་གཅིག་གི་རིང་ལ་ཚེས་གཅིག་ནས་བཅོ་ལྔ་བར་ཟླ་བའི་དཀྱིལ་འཁོར་ཇེ་ཆེར་དང་། ཚེས་བཅུ་དྲུག་ནས་གནམ་སྟོང་བར་ཇེ་ཆུང་ཡིན་པས་ཟླ་བའི་འཕེལ་འགྲིབ་ལ་སྦྱར་ནས་གསུངས་སོ། །སྡོམ་ན་བརྡེག་ཐེངས་བརྒྱ་དང་བརྒྱད་དོ། །དེ་ནས་ཏོག་གསུམ་མོ། །དགེ་འདུན་ཡོངས་རྫོགས་འཚོགས་པ་ཆེན་པོ་འཚོགས་ཚེ་དེ་འདྲ་དགོས་སོ། །གསོ་སྦྱོང་དང་བསྙེན་རྫོགས་ཀྱི་ལས་ཆོག་སོགས་འཚོགས་དགོས་ཚེ། ཤངས་ཙ་ལན་གསུམ་དང་། དེ་ནས་རྒྱུད་གཅིག་དང་། ཏོག་གསུམ་མོ། །ཤི་བའི་ཕུང་པོ་ལ་བསྔོ་སྨོན་དགོས་ཚེ་ཤངས་ཙ་ལན་གསུམ་དང་། རྒྱུད་གཅིག་ཁོ་ནའོ། །ཏོག་མེད་པའོ། །དགེ་འདུན་ཟས་ལ་བསྡུ་བའི་དོན་དུ་དང་པོ་གཎྜི་ཆུང་ངུ་བརྡུངས་ཏེ། ཁྲུས་དང་སྤྱོད་ལམ་གྱི་བྱ་བ་ལ་ཅུང་ཟད་རོལ། དེ་ནས་གཎྜི་ཆེ་བ་བརྡུང་ཏེ་བསྡུ་བར་བྱེད་དོ། །ཞེས་དང་། གཞན་ཡང་། དགྲ་བཅོམ་པ་ས་ག་ལྷས། དགེ་སློང་མདོ་སོགས་མཁས་པ་ལ། །ལམ་ཕྱེད་འོངས་པ་ཐོས་པ་ན། །ཇི་སྲིད་དཔག་ཚད་ཕྱེད་དང་གསུམ། །བ་དན་བསྒྲེང་སོགས་སྔོན་འགྲོ་བས། །གཎྜཱི་བརྡུངས་ཏེ་དགེ་འདུན་གྱིས། །རང་གི་ནུས་སྦྱར་བསུ་བར་བྱ། །ཞེས་གསུངས་པ་ལྟར་ཤེས་དགོས་པས། སྡེ་སྣོད་གསུམ་དང་གཉིས་དང་གཅིག་ལ་སོགས་པ་མཁས་པ་དག་ལམ་ནས་འོངས་བ་ཐོས་པ་ན། བསུ་བ་པོས་རང་གི་གནས་ནས་དཔག་ཚད་ཕྱེད་དང་གསུམ་ཡོད་པའི་དགེ་འདུན་རྣམས་ཀྱིས་རང་གི་ནུས་པ་དང་སྦྱར་ནས་བསུ་བར་བྱའོ། །ཞེས་གསུངས་པ་དང་། ཚུལ་ཇི་ལྟ་བུས་བསུ་ཞེ་ན། གཎྜཱི་བརྡུངས་ཏེ་རྒྱལ་མཚན་དང་བ་དན་བསྒྲེང་བ་དུང་འབུད་པ་སོགས་སྔོན་དུ་འགྲོ་དགོས་པ་བཤད་འདུག །རྒྱལ་མཚན་ལ་དབྱེར་ན་ལྔ་ཡོད་དེ། རིམ་བཞིན། ནམ་མཁའ་ལྡིང་དང་། སེང་གེ་དང་། ཆུ་སྲིན་དང་། ཁྱུ་མཆོག་དང་། གླང་པོ་ཆེའི་ཏོག་གིས་སྤྲས་པའི་རྒྱལ་མཚན་དང་བཅས་པའོ། །དེའང་རྒྱལ་མཚན་གྱི་གཏོགས་དེ་ཉིད་གཟུགས་བརྙན་དེ་རྣམས་བཀོད་པ་ལ་གསུངས་སོ། །མདོར་ན་དེང་སང་སེར་ཕྲེང་གི་དུས་སུ་གཎྜཱི་བརྡུངས་བ་དང་རྒྱལ་མཚན་སྣ་ལྔའི་རྣམ་པ་རེ་ཡོད་ན་སངས་རྒྱས་ཀྱི་གསུངས་དང་མཐུན་པས་ཧ་ཅང་རྟེན་འབྲེལ་བཟང་ངོ་། །འོན་ཀྱང་དེང་སང་འདི་གཉིས་ཕལ་ཆེར་ཆད་སོང་བ་འདྲའོ། །དེ་ལས་གཞན་དུ་གཎྜཱི་ལ་བེད་སྤྱོད་མེད་པ་འདྲའོ། །ཆབ་སྲིད་དང་དཔལ་འབྱོར་གྱི་ཆེད་དུ་སེར་ཕྲེང་ཡིན་ན་འདི་རྣམས་མི་ཉན་པར་ཞུ། དེ་རྣམས་ལ་རྒྱ་གླིང་སོགས་ཀྱིས་བསུ་ན་རྟེན་འབྲེལ་བཟང་ལོ། །ཁ་དོག་ནི། མདོ་དང་མདོའི་རྒྱ་འགྲེལ་ཕལ་ཆེར་ལས་བཤད་པ་མ་མཐོང་། འཕགས་ཡུལ་གྱི་རྒྱུད་འགྲེལ་འགའ་ལས། ཉན་ཐོས་སྡེ་བ་བཞི་པོ་སོ་སོའི་ཁ་དོག་བཤད་དུས་གཞི་ཐམས་ཅད་ཡོད་སྨྲ་ལ་དམར་པོ་བཤད་པ་དང་། ཡང་གཎྜཱི་དམར་པོ་ཞེས་གསུངས་པ་ཡོད་ཀྱང་འདིར་སྒྲུབ་བྱེད་འགྲོ་བཀའ་འོ། །དགེ་ལྡན་པའི་འདུལ་འཛིན་ཁ་ཅིག་གིས་ཟེར་ན། དམར་པོ་དང་། སེར་པོ་སོགས་བཤད་ཚུལ་ཅུང་ཟད་ཡོད་དོ། །ཁོ་བོའི་རྟོག་པ་ལ་ནི། དྲི་བཟང་དང་ཁ་ཕྱེ་ཤ་རྐམ་སོགས་གཙང་སྦྲ་དང་ལྡན་པའི་ཁ་བསྒྱུར་ན་ཧ་ཅང་ལེགས། རྒྱུར་རུང་བའི་སྐབས་སུ། ཁ་ཅིག་གིས་འོ་སེ་ནི་སེང་ལྡེང་ལ་གོ་དགོས་པ་ཡིན་ཟེར་བ་ནི་གྱི་ནའོ། །ཀ་བ་ཞེས་པ་དེ་བུམ་པ་ལ་གོ་དགོས་ཟེར་བ་དང་མཚུངས་སོ། །ཤིང་དེ་གཉིས་ད་ལྟ་བོད་ལ་སོ་སོར་ཉིད་དུ་ཡོད་པས་འོ་སེ་སེང་ལྡེང་ལ་གོ་དགོས་ཞེས་པའི་གདུལ་བྱ་བསླུ་བའི་འཆལ་གཏམ་མ་སྨྲ་ཤིགས། འོན་ཀྱང་མཁས་པ་འགའ་ཞིག་གིས་འདི་གཉིས་གཅིག་ཏུ་བགྲང་བ་སྣང་ངོ་། །སྤྱིར་ན་མདོའི་སྒྲུབ་བྱེད་ལ་བསམ་ན་སེང་ལྡིང་ཡང་རུང་བ་སྣང་སྟེ་དཔྱད་དོ། །ཡང་ཁ་ཅིག་གི་ཤིང་དེ་རྣམས་མ་རྙེད་ན་ཤིང་ཇི་ལྟར་རིགས་པ་ལའང་རུང་ངོ་། །ཞེས་གསུངས་ཀྱང་མི་འཐད་དེ། མདོ་དེ་ཉིད་ལས། རྒྱལ་པོ་འབད་པས་ཐམས་ཅད་དུ། །འདི་དག་མེད་ན་མི་བྱའོ། །ཚད་མེད་ཤིང་ངན་ལས་བྱས་དང་། །བརྡུངས་ན་སྒྲ་ནི་མི་འབྱུང་བའི། །སངས་རྒྱས་ཡུམ་འདི་བརྡུངས་ན་ནི། །ཡུལ་འཁོར་འཚེ་བ་ངེས་པར་འབྱུང་། །ཞེས་གསུངས་སོ། །དེས་ན་ཚད་དང་མི་ལྡན་པ་རྒྱུ་མི་རུང་བ་ཤིང་ངན་པ་ལས་བྱས་པ་དང་། བརྡུང་ཡང་སྒྲ་མི་འབྱུང་བ་དང་། བརྡུང་ཚུལ་མི་མཐུན་པ་དང་། བག་མེད་སོགས་སྐྱོན་དང་བཅས་བརྡུང་ན་བཀྲ་མི་ཤིས་པ་དང་དོན་མི་འགྲུབ་པའི་རྒྱུ་ཉིད་དུ་འགྲོ་བ་སྟོན་པ་སངས་རྒྱས་ཀྱི་གསུངས་པས་དགོས་པ་ལས་དགག་བྱ་ཆེ་བ་སེམས། ཆེ་ཆུང་གི་ཚད་བཤད་སྐབས་མཁས་པ་སོ་སོའི་མདོ་ལུང་མི་འདྲ་བ་སྣ་ཚོགས་པ་ཞིག་དྲང་སྟེ། དཔེར་ན་ཨ་མས་རིན་པོ་ཆེས། ཚད་ནི་ཆུང་དུ་སོར་ཚད་ཀྱིས། །བརྒྱད་ཅུ་རྩ་བཞི་ཉིད་བྱ་ཞིང་། །ཞེས་དང་། མདོ་ཆ་ཚང་དྲང་སྐབས། ཚད་ནི་མཆུ་རུ་སོར་ཚད་ཀྱི། །ཞེས་གསུངས་པའི་མ་དཔེ་ནི་འཇང་བཀའ་འགྱུར་ལྟར་ཡིན་ནོ། །སྡེ་དགེའི་ཤིང་པར་དང་། ད་ལྟའི་ཨེ་ཕེས་ནང་ནས་བལྟ་ཐུབ་པའི་བཀའ་འགྱུར་ནང་ལ། ཚད་ནི་ཆུང་ངུ་སོར་བརྒྱད་ཀྱི། །ཞེས་དང་། རི་བོ་དགེ་ལྡན་པས་དྲངས་པའི་མདོ་ལུང་ཕལ་མོ་ཆེ་ལས། ཚད་ནི་ཆུང་ངུ་སོར་ཚད་ཀྱིས། །ཞེས་དང་། ས་སྐྱ་པའི་མཁས་དབང་ཕལ་ཆེར་བས། ཚད་ནི་མཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེས་གསུངས་པའི་མདོ་ལུང་འདི་དྲང་ངོ་། །གལ་སྲིད་ཁྱེད་ཚོས་བཤད་པར་ལྟར་མདོ་དེས་ཆུང་ཚད་བསྟན་པ་ཡིན་ན། ཆེ་ཚད་བསྟན་པའི་མདོ་ཚིག་ཅིག་དྲང་དང་ཁོ་བོའི་གཏོང་བསྡགས་སོ། །དེས་ན་ཁོ་བོའི་ཕྱི་མ་འདི་ཉིད་རིག་པས་ཀྱང་གྲུབ་འདུག་པས་འཐད་ཕྱོགས་སུ་བཟུང་ངོ་། །འོན་ཀྱང་དེང་སང་བཀའ་འགྱུར་མ་དཔེར་མི་འདྲ་བ་མང་དུ་ཡོད་པ་ལས། འདིའང་ཅུང་ཟད་མི་འདྲ་བ་ཡོད་དམ་སྙམ། ད་ལྟར་བོད་ལ་ཡོད་པའི་བཀའ་ཡིན་ན་བཀའ་འགྱུར་ནང་ལ་ཡོད་པས་མ་ཁྱབ་ཅིང་། བཀའ་འགྱུར་ནང་ཡོད་པ་ཡིན་ནའང་བཀའ་ཡིན་པས་མ་ཁྱབ་བོ། །བོད་ཀྱི་ཆོས་རྒྱུད་ཁག་སོ་སོའི་འཐེན་ཁྱེར་ལ་བརྟེན་ནས་ཡ་ང་བའི་ལོ་རྒྱུས་ཡང་མང་ངོ་། །བརྡུང་ཚུལ་ལ་དཔྱད་པ། འཇམ་མགོན་ཨ་མེས་རིན་པོ་ཆེས། སྔར་གྱི་བརྡུང་ཚུལ་དེ་ལ། དཔེ་དང་འགལ་བ། རིག་པ་དང་འགལ་བ། ལུང་དང་འགལ་བའི་སྐྱོན་བརྗོད་ནས། རང་ལུགས་ལ་གཎྜིའི་མདོ་ལས། སངས་རྒྱས་ཀླུ་ཡི་དབང་པོ་ལ། ཀླུ་བདུན་གྱིས་ནི་བརྒྱན་པ་ལྟར། །བསྐྱེད་པའི་རིམ་པས་བརྡུང་བར་བྱ། །ཞེས་གསུངས་པའི་དོན་ལ། གཅིག་ནས་བཅུ་བདུན་བར་ཇེ་ཆེ་ཡིན་ལ། བཅོ་བརྒྱད་པ་དེ་ཆེས་ཆེ་བ་ཞིག་ཡིན། བཅུ་དགུ་ནས་སོ་ལྔའི་བར་ཇེ་ཆུང་ལ་འགྲོ་བར་བརྡུངས་པ་ནི་རྒྱུད་གཅིག་ཡིན་གསུང་། དེ་འདྲ་ཚན་པ་གསུམ་ལ་བརྒྱ་དང་ལྔ་ཡིན་ལ། དེ་ནས་ཏོག་གསུམ་དང་བཅས་ལ་བརྒྱ་དང་བརྒྱད་ཅེས་དེ་ལྟར་བརྩི་དགོས་གསུངས་སོ། །དེའང་ངོར་ཆེན་དང་མུས་ཆེན་གཉིས་ཀྱི་ལུང་ཞིག་དྲང་ནས་བསྒྲུབ་འདུག །རིག་པའི་གཙོ་བོ་ནི་སངས་རྒྱས་ཀླུ་དབང་གི་མགོ་ལྔ་ལ་སྦྲུལ་བདུན་རེ་བྱས་ཀྱང་སོ་ལྔ་མ་གཏོགས་མེད་ལ། སྦྲུལ་བདུན་ལ་མགོ་ལྔ་རེ་བྱས་ཀྱང་སོ་ལྔ་ལས་གཞན་མི་འབྱུང་གསུངས་འདུག །འོན་ཀྱང་ཀླུ་བདུན་གྱིས་བརྒྱན་པར་ལྟར་ཞེས་གསུངས་པ་དེ་ནི་བརྡུང་བའི་གྲངས་ངེས་ལ་གོ་རྒྱུ་མ་ཡིན་པར་བརྡུང་བའི་སྒྲ་ཆེ་ཆུང་ལ་གོ་དགོས་ཏེ། དཔེར་ན་སངས་རྒྱས་ཀླུ་དབང་གིས་དབུ་ལ་ཡོད་པའི་སྦྲུལ་མགོ་ལྔ་པོ་དེ་དབུས་མཐོ་བ་དང་། ཐོག་མཐའ་གཉིས་དམའ་བའི་གོ་རིམས་དེ་བཞིན་དུ་འདིའི་བརྡུང་ཚུལ་ལའང་གཅིག་ནས་བཅོ་བརྒྱད་པར་ཇེ་ཆེ་དང་བཅུ་དགུ་ནས་སོ་དྲུག་བར་ཇེ་ཆུང་ལ་གོ་དགོས་པ་ཡིན་གྱི་གྲངས་ངེས་ལ་གོ་ལ་ཧ་ཅང་ཐལ་ལོ། །འོ་ན་སྔར་གྱི་བརྡུང་ཚུལ་གཉིས་པོ་གང་ཡིན་ཞེ་ན། སྔ་མ་དེ་སྨད་འདུལ་བའི་ལུགས་དང་། ཕྱི་མ་དེ་སྟོད་འདུལ་བའི་ལུགས་ཡིན་ཏེ། ཀུན་མཁྱེན་རོང་སྟོན་ཆེན་པོས་སྟོད་འདུལ་བའི་ལུགས་ལ་ཤར་ཕྱོགས་སུ་བཏེག་པ་བཅོ་བརྒྱད། མར་དབབ་པ་བཅུ་བདུན་དང་། ལྷོ་ཕྱོགས་སུ་གྲངས་དེ་དང་། ནུབ་ཕྱོགས་སུ་ཡང་གྲངས་དེ་དང་། བྱང་ཕྱོགས་སུ་ཏོག་གསུམ་བྱས་ཏེ་བརྒྱ་རྩ་བརྒྱད་དོ་ཞེས་འཆད་དོ། །དེ་ལྟར་ན་སྟོད་འདུལ་པའི་ལུགས་ལ་རྒྱུད་གཅིག་ལ་གྲངས་ཉེར་ལྔ་དང་། སྨད་འདུལ་པའི་ལུགས་ལ་རྒྱུད་གཅིག་ལ་གྲངས་ཉེར་དྲུག་ཡིན་པས་བརྡུལ་ཚུལ་ཁྱད་པར་ཙམ་ཡིན་ནམ་སྙམ། སྤྱི་ན་གཎྜི་འདི་སྟོན་པ་སངས་རྒྱས་ཀྱིས་དམ་ཆོས་འདུལ་ལུང་ད་ལྟ་བོད་ལ་ཡོད་པའི་པོད་བཅུ་གསུམ་ནང་དུ་མ་གསུངས་ལ། འདུལ་བའི་ཕྱོགས་མཐུན་གྱི་མདོ་ཞེས་པའི་སྡེ་དགེའི་བཀའ་འགྱུར་མདོ་སྡེ་ཤ་དུམ་པའི་ནང་དུ་རྒྱལ་པོ་གསལ་རྒྱལ་ལ་དྲི་བ་དྲི་ལན་གྱིས་ཚུལ་དུ་ཚིག་ལྷུག་དང་ཚིག་བཅད་གཉིས་ཀ་ཅན་གྱི་གཎྜི་གྱི་མདོ་ཆ་ཚང་ལྡེབ་མ་གསུམ་ཙམ་ཞིག་འདུག་པས་དེ་ལྟར་བཤད་པ་ཡིན་ནོ། །རྒྱུད་སྡེ་ཁག་ཅིག་ལས་ཐུན་མོང་མ་ཡིན་པའི་གཎྜི་གྱི་བཤད་པ་དང་། མན་ངག་གིས་རྒྱུ་ཚད་དབྱིབས་སོགས་ཀྱི་བཤད་པ་ཧ་ཅང་མང་ངོ་། །དེ་གསང་སྔགས་ཡིན་པས་འདིར་མི་བཤད་དོ། །འོན་ཀྱང་དེ་གཉིས་གཅིག་ཏུ་འཁྲུལ་བ་མི་བྱའོ། །དེ་ལྟར་རྒྱུ་དང་ཚད་དབྱིབས་དང་བརྡུང་ཚུལ་ལ་སོགས་ལ་སྟོན་པ་བཀའ་དྲིན་ཅན་གྱི་གསུངས་དང་མཐུན་པའི་ཕྱག་ལེན་མཛད་ན། ཡུལ་ཕྱོགས་སུ་དགེ་འདུན་གྱི་སྡེ་འཕེལ་བ་དང་། དཔལ་ཕུན་སུམ་ཚོགས་ནས་བསྙན་པའི་གྲགས་པས་ཁྱབ་པ་དང་། ནད་དང་མུ་གེ་ལ་སོགས་པའི་གནོད་པ་མི་འབྱུང་བ་ཟང་ཟིང་གི་འབྱོར་པ་སོགས་མདོར་ན་བསྟན་པ་གནས་པ་དང་འགྲོ་བ་བདེ་བའི་བདེ་ལེགས་ཕུན་སུམ་ཚོགས་པའི་ཕན་ཡོན་དཔག་ཏུ་མེད་པར་གསུངས་སོ། །
སླར་སྨྲས་པ།
སྟོན་པས་མདོར་ལས་གསུངས་པའི་གཎྜི་འདི། །
བསྟན་པ་འཛིན་པའི་སྐྱེས་བུ་གདུལ་བྱའི་ཕྱིར། །
བསྟན་དང་འགྲོ་ལ་ཅུང་ཟད་ཕན་སྙམ་ནས། །
བསྟན་པ་ཡུན་རིང་གནས་པའི་ཆེད་དུ་བྲིས། །
ཁམས་ཀྱི་བྱེ་ཐང་ནས་འགུ་ཟི་མཁྱེན་བཟང་གིས་སྦྱར་བའོ། །
ཨོཾ་ཡེ་དྷཱ་རྨཱ་་་ཧེ་ཏུ་་་པྲ་བྷ་བ། ཧེ་ཏུན་་་ཏེ་ཥཱན་་་ཏ་ཐཱ་ག་ཏོ། ཧྱ་ཝ་དཏ་་་ཏེ་ཥ྅་་་ཙ་ཡོ་་་ནི་རོ་དྷ། ཨེ་ཝཾ། བཱ་དཱི། མ་ཧཱ་ཤྲ་མ་ཎཿསྭཱ་ཧཱ།
༼ ཨོཾཨཱཿཧཱུྃ། གུརུཔདྨདྷརྨཔདཾསརྦསིངྡྷཧཱུྃ། ༽
དཔྱད་གཏམ་སྤེལ་མཁན་ལ་གསལ་བརྡ།