ཆོས་རྗེ་ཁུ་བོན་དང་ཆེན་པོ་ཧོར་གྱི་རྒྱལ་རབས་དང་འབྲེལ་འདྲེས་བྱུང་ཚུལ།
རྩོམ་པ་པོ། སྟག་ལྗོངས་འཆི་མེད།
དེ་ཡང་ཤིང་ཡོས་ ༡༡༩༥ ལོར་བོག་ཏ་ཆིང་གེ་སེ་ཁཱང་གི་དྲག་པོའི་སྟོབས་ཤུགས་བོད་ཀྱི་ས་མཚམས་སུ་སླེབས་རྗེས། ས་མཚམས་ཀྱི་སྡེ་མགོན་ཁག་ནས་ཁཱང་གི་དམག་དཔོན་རྣམས་ལ་རྒྱུ་ནོར་རྒྱ་ཆེན་པོས་བརྔན་ཏེ་ང་ཚོས་བོག་ཏ་རྒྱལ་པོའི་ལག་པ་ལྟ་བུ་བྱས་ནས་དཔྱ་དང༌། ཁྲལ་འབུལ་ལོ་ཞེས་འཕྲིན་བཏང༌། དེ་རྗེས་རབ་བྱུང་བཞི་པའི་མེ་ཡོས་ ༡༢༠༧ ལོར་བོད་ནང་སོག་པོའི་དཔུང་དམག་བཏང་བ་འགོག་ཐབས་སུ་སྡེ་དཔོན་རྣམས་ནས་འདབ་ནོར་ཟེར་བའི་དངོས་ནོར་ཕྲན་བུ་རེ་བོག་ཏོ་ཁཱང་ལ་སྤྲོད་རྒྱུ་བྱས། བོག་ཏ་ཆིང་གེ་སེ་ཁཱང་དགུང་ལོ་དྲུག་ཅུ་ཐམ་པ་མེ་ཕག ༡༢༢༧ ལོར་ཚ་བའི་ནད་ཕོག་སྟེ་གཤེགས། ཁོང་གི་སྲས་གསུམ་པ་ཨུ་གེ་ཏའི་ཞེས་པ་ཁཱང་གི་གོ་སར་ཕེབས། ཆིང་གེ་ཁཱང་གཤེགས་པའི་གཏམ་ཏེ་བོད་ཕྱོགས་ནས་ཐོས་ཏེ་བོད་པས་འདབ་ནོར་ལོ་འགའ་ཤས་མ་སྤྲད་པས། གོ་དན་ཁཱང་ཁྲོས་ཏེ་ལྕགས་ཕྱི་ ༡༢༤༠ ལོར་དམག་དཔོན་ལི་ཅི་དང༌། དོར་ཐའི་འོག་ལ་སོག་དམག་ཁྲི་ཚོ་གསུམ་བཏང༌། རཱ་སྒྲེང་དང༌། རྒྱལ་ལྷ་ཁང་སོགས་མེར་བསྲེགས། སོ་སྟོན་སོགས་བཙུན་པ་ལྔ་བརྒྱ་བསད། ཅེས་སོགས་འཁོད་པ་ལྟར་བོད་མི་རྣམས་ལ་གསོད་འཕྲོག་གཏོར་གསུམ་གྱི་ལམ་ནས་བརྡབ་གསིག་ཚོད་མེད་བཟོས། དེ་ནས་གོ་དན་ཁཱང་གིས་ཧོར་སོག་གི་ཡུལ་དུ་ལམ་གྱི་གནད་སྟོན་ཤེས་པའི་བླ་མ་བཟང་པོ་ཞིག་དགོས་པས། དེང་དུས་དབུས་གཙང་ན་སུ་བཟང༌། ཞེས་དྲི་བ་འབྱོར་བར། དོར་རྟས། དགེ་འདུན་གྱི་སྡེ་ནི་བཀའ་གདམས་པ་ཆེ། མི་ཆོས་ནི་སྟག་ལུང་པ་མཁས། གཟི་བརྗིད་ནི་འབྲི་གུང་པ་ཆེ། ཆོས་ཀྱི་ས་སྐྱ་པཎྜི་ཏ་མཁས། ཞེས་ལན་བཏང་བས། གོ་དན་ཁཱང་གིས། གསེར་ཡིག་པ་རྡོར་སྲི་མགོན་དང༌། དབོན་ཇོ་དར་ཅན་ཆེད་མངགས་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོ་སོག་ཡུལ་དུ་གདན་ཞུར་བཏང་ངོ༌།།
དེ་ཡང་རབ་བྱུང་བཞི་པའི་ཤིང་འབྲུག་ཕྱི་ལོ་ ༡༢༤༤ ལོར་ཆོས་རྗེ་མཆོག་ས་སྐྱ་ནས་ཕེབས་ཐོན་གྱིས་ལྷ་ས་དང༌། བྱང་མི་ཉག་སོགས་བོད་ཀྱི་སྡེ་མང་པོ་བརྒྱུད་དེ་མེ་ལུག་སྤྱི་ལོ་ ༡༢༤༧ ལོར་ལིང་ཇུ་ལ་ཞབས་སོར་འཁོད། རང་གི་ཚ་བོ་འཕགས་པ་བློ་གྲོས་རྒྱལ་མཚན་དང་འགྲོ་མགོན་ཕྱག་ན་གཉིས་ཕྱག་ཕྱིར་ཁྲིད། སྐབས་དེར་གོ་ཏན་ཁཱང་སོག་ཡུལ་ནས་ཚུར་བྱོན་པའི་ལམ་བར་སྐབས་དང་འཁེལ་ཏེ་དེར་མཇལ་འཕྲད་ཐོག་མར་བྱུང༌། དེ་གར་རྒྱལ་བློན་འབངས་དང་བཅས་པར་སྐྱབས་འགྲོ་དང༌། ལས་འབྲས། དགེ་སྡིག་བླང་དོར། ཐེག་པ་ཆེན་པོའི་སེམས་བསྐྱེད་སོགས་གསུངས་ནས་མི་དགེ་བ་བཅུ་སྤོང་གི་ལམ་དུ་འཇུག་པར་མཛད། ཕྱི་ལོ་ ༡༢༤༧ ནས་ ༡༢༥༡ བར་ས་པཎ་ཀུན་དགའ་རྒྱལ་མཚན་གྱིས་ཆོས་ཀྱི་མཛད་པ་རྒྱ་ཆེར་བསྐྱངས། དགུང་ལོ་ ༧༠ ཐོག་ལིང་ཇུ་གྲོང་ཁྱེར་དུ་ངོ་མཚར་བའི་ལྟས་དུ་མ་དང་བཅས་ཞི་བར་གཤེགས། དེ་ནས་རིང་པོར་མ་སོང་བར་རྒྱལ་པོ་གོ་དན་ཁཱང་ཡང་གྲོངས།
སེ་ཆེན་རྒྱལ་པོ་དང་འགྲོ་འགོན་འཕགས་པའི་བར་གྱི་འབྲེལ་བ།
ཕྱི་ལོ་ ༡༢༥༣ ལོར་ཀུབ་ལའི་ཁཱང་ངམ་སེ་ཆེན་རྒྱལ་པོ་རྒྱལ་ཁྲིར་ཕེབས། དེ་དུས་ཌྷགྲོ་མགོན་ཆོས་རྒྱལ་འཕགས་པ་དགུང་ལོ་ ༡༩ ལ་ཕེབས་པ་ཁཱང་གིས་རང་གི་རྒྱལ་སར་གདན་དྲངས། ཁཱང་གིས་ཟླ་བ་མང་པོའི་རིང་ཆོས་ཕྱོགས་ཀྱི་དཀའ་གནད་མང་པོ་དྲི་བ་ཞུས་པར་ཐོགས་པ་མེད་པར་ལན་འདེབས་མཛད། ལྷག་པར་ཁཱང་གིས་བོད་ཡུལ་ཀླ་ཀློའི་ཡུལ་ལྟ་བུར་ངོས་འཛིན་བྱེད་པས་ན། འཕགས་པས་བོད་རྗེས་གཉའ་ཁྲི་བཙན་པོ་ནས་གླང་དར་བར་གྱི་རྒྱལ་རབས་དང༌། ཆོས་འབྱུང༌། ལོ་ཚིགས། རྒྱ་རྒྱལ་གྱི་སྲས་མོ་གཉིས་སྔ་རྗེས་བོད་ཀྱི་རྒྱལ་པོའི་བཙུན་མོར་དྲག་ཤུལ་གྱིས་བླངས་པ་དང༌། རྒྱའི་གོང་མའང་ཁྲི་ལས་ཕབ་པའི་ལོ་རྒྱུས་རྣམས་ཞིབ་ཏུ་གསུངས་པས། ཁཱང་ཡིད་མ་ཆེས་པར་རྒྱའི་ལོ་རྒྱུས་ཁག་ལ་བཙལ་ནས་དེ་ལྟར་ཐོན་པས། རྒྱལ་པོ་བོད་ལ་དགའ་གུས་ཡི་རང་བར་གྱུར། འཕགས་པས་སོག་རྒྱལ་གྱི་ཞུ་བསྐུལ་བཞིན་སོག་པོའི་སྐད་དང་མཐུན་པའི་སོག་ཡིག་གསར་བཏོད་མཛད།
ཀུབ་ལའི་ཁཱང་གིས་འཕགས་པར་གསང་སྔགས་རྡོ་རྗེ་ཐེག་པའི་དབང་བསྐུར་ཐུགས་རྗེས་འཛིན་པར་ཞུ་ཞུས་པས། སྤྱིར་ཁྱེད་ཀྱིས་ཆོས་ཞུ་བའི་དམ་ཚིག་བསྲུང་མི་ཐུབ་ཅིང༌། ད་རེས་ལོ་ཙཱ་བ་མཁས་པ་ཡང་མེད་པས་ཕྱིས་སུ་འཆད་པར་གསུངས་པས། རྒྱལ་པོ་ཁཱང་ན་རེ། དམ་ཚིག་ཅི་བསྲུང་དགོས་ཞུས་པར། དབང་བསྐུར་ཞུས་པ་ནས་བཟུང་བླ་མ་གྲལ་མགོར་བཞུགས། ལུས་ཀྱིས་ཕྱག་འཚལ། ངག་གིས་ཅི་གསུངས་བཀའ་བཞིན་བསྒྲུབས། ཡིད་ཀྱིས་ཐུགས་དང་མི་འགལ་བ་བྱ་དགོས་ཡིན་ཞེས་གསུངས་པས། ཆོས་ཞུ་བའི་དུས་དང༌། རྒྱུན་དུ་བླ་མ་གོང་ལ་བཞུགས། རྒྱལ་རྒྱུད་དང༌། མི་དཔོན། མི་མང་བཅས་ཚོགས་པའི་སྐབས་སུ་རྒྱལ་ཁབ་གནོན་དགོས་པས་རྒྱལ་པོ་གོང་དུ་བཞུགས། བོད་ཕྱོགས་ཀྱི་བྱ་བ་ལ་བླ་མས་ཅི་གསུངས་དང་དུ་བླངས། བླ་མའི་བཀའ་མེད་པར་རྒྱལ་པོས་ལུང་མི་གནང༌། རྒྱ་སོག་གི་ཡུལ་གྲུ་ཀུན་ཏུ་བྱ་བ་ཆེ་ཆུང་གཞན་ལ་བླ་མ་སྙིང་རྗེ་ཆེ་བས་ཞུ་ངོ་འཚོལ་དུ་བྱུང་ན་རྒྱལ་ཁམས་མི་གནོན་པས་བླ་མས་མི་གསུང་བ་བྱ་རྒྱུ་ཞེས་ཞུས་པས་བླ་མས་ཞལ་གྱིས་བཞེས།
དེ་ནས་ཡུ་གུར་གྱི་ལོ་ཙཱ་བ་བརྒྱད་ནས་རྒྱལ་པོ་ཁཱང་དང་བཙུན་མོས་གཙོས་བློན་ཆེན་རྣམས་ལ་དཔལ་ལྡན་ས་སྐྱ་བའི་ཁྱད་ཆོས་དཔལ་ཀྱེ་རྡོ་རྗེའི་དབང་བཞི་ཟབ་མོ་ཡོངས་སུ་རྫོགས་པ་ལན་གསུམ་བསྐུར་བར་མཛད། དེ་ནས་བཟུང་སོག་ཡུལ་དུ་གསང་སྔགས་རྡོ་རྗེ་ཐེག་པའི་བསྟན་པ་དབུ་བརྙེས། དེའི་དབང་ཡོན་དང་པོར་བོད་ཡུལ་ཁྲི་སྐོར་བཅུ་གསུམ་གྱི་དབང་རིས་བདག་ཐོབ་དང་བཅས་པ་ཕུལ། དབང་ཡོན་གཉིས་པར་བོད་ཆོལ་ཁ་གསུམ་གྱི་ཕུལ ( ཕུལ་ཟེར་བ་དེ་ཡང་སྐབས་དེར་། བོད་ས་ཡོངས་རྫོགས་སོག་པའི་མངའ་འོག་ཏུ་ཡོད་ནས་ཕུལ་བ་ལྟ་བུ་ཞིག་ལ་གོ་རྒྱུ་མེད། དེ་ནི་ཆབ་སྲིད་པས་བྱེད་སྟངས་ཙམ་ལས་མིན། མདོར་ན་སྐབས་དེར་སོག་པའི་མངའ་ཐང་རྒྱས་བཞིན་པའི་སྐབས་ཡིན་པ་དང་། བོད་ཀྱི་སྟོབས་ཤུགས་རྒུད་པའི་སྐབས་ཡིན་སྟབས་གོ་དན་དང་ཁྰང་སོགས་ཀྱིས་སོ་སོས་གང་བཤད་ལྟར་ཡིན་སྣང་ཤར་བ་ཙམ་ཡིན། ) དབང་ཡོན་གསུམ་པར་ཆོས་དུང་དཀར་མོ་རྒྱང་གྲགས་མ་དང༌། རྒྱ་ཡི་མི་ཡུར་ཆེན་མོ་སོགས་ཕུལ། ཏི་ཤྲི་ཞེས་པའི་རྒྱལ་པོའི་དབུ་བླའི་གོ་གནས་ཀྱང་ཕུལ། དེ་ལྟར་འགྲོ་མགོན་ཆོས་རྒྱལ་འཕགས་པ་དང༌། སོག་རྒྱལ་ཀུབ་ལའི་ཁཱང་སེ་ཆེན་རྒྱལ་པོའི་སྐབས་སུ་བོད་སོག་མཆོད་ཡོན་གྱི་འབྲེལ་བ་ཐོག་མར་དབུ་བརྙེས་པ་ཡིན་ནོ།།
ཕྱི་ལོ་ ༡༣༤༤ བར་མིང་རྒྱལ་རྒྱུད་ཀྱིས་བོད་ལ་འབྲེལ་བ་བྱེད་རྒྱུའི་ཐོབ་ཐང་སོག་པོ་ཆིང་ཁེ་སེ་ཁཱང་གི་སྐབས་སུ་བྱུང་ཚུལ་ཟེར་ཡང༌། ཆིང་ཁེ་སེ་ཁཱང་གི་མི་རྒྱུད་ནས་འཛམ་གླིང་ཡུལ་གྲུ་གང་སར་མངའ་ཐང་རྒྱ་བསྐྱེད་བྱེད་སྐབས་བོད་ཀྱི་ས་ཆ་འགའ་ཤས་ལ་དྲག་པོའི་དབང་ཤུགས་ཀྱི་གྲིབ་མ་ཙམ་སླེབས་ཡོད་ཀྱང༌། དེའི་རྗེས་སྤྱི་ལོ་ ༡༢༥༣ ལོར་ཀུབ་ལའི་ཁཱང་གིས་འགྲོ་མགོན་ཆོས་རྒྱལ་འཕགས་པར་བོད་ཆོལ་ཁ་གསུམ་མངའ་རིས་དང་བཅས་པ་ཕུལ་བ་ནས་བཟུང༌། བོད་སོག་གཉིས་རང་བཙན་བཙང་མའི་མངའ་བདག་གི་གནས་སྟངས་འོག་མཆོད་ཡོན་གྱི་འབྲེལ་བ་བྱུང་བ་དང༌། དེ་རྗེས་ཕྱི་ལོ་༡༣༦༨ ལོར་རྒྱ་ནག་གོང་མ་མིང་ཐེ་ཙུ་སྐབས་ནས་བཟུང་གཞི་ནས་སོག་པོའི་འོག་ནས་རྒྱ་ནག་ལ་རང་བཙན་ཐོབ་པ་ལགས་སོ།།
གསལ་བཤད། རྩོམ་ཡིག་འདི་ནི་དེང་སང་གི་མི་ལས་མེད་ཁག་ཅིག་གིས་ཆོས་རྗེ་ཁུ་བོན་གྱི་རྣམ་ཐར་འཁྱོག་བཤད་བྱས་པ་སོགས་འགའ་རེ་གོ་ཐོས་བྱུང་བས་མ་བཟོད་ནས་བརྩེ་བའི་བསམ་པས་ལེགས་བཤད་སྦྱིན་པ་ཙམ་ཡིན།
དཔྱད་གཏམ་སྤེལ་མཁན་ལ་གསལ་བརྡ།