མེ་ཆར། ཡུལ་ཤུལ།
སྨུག་ཡོ་ལང་རྒྱ་མཚོའི་འཇིངས་སུ་བབས། །
ཡུལ་འཛིན་མའི་ཁ་དོག་གཡུ་ཡིས་བརྒྱན། །
དཔྱིད་ནམ་ཟླ་བསིལ་རླུང་ལྡང་དང་བསྟུན། །
བྱ་ཁུ་བྱུག་ལྷོ་མོན་ཡུལ་ནས་ཐོན། །
སྤྲིན་དཀར་པོའི་འདབ་མ་རླུང་གིིས་གཡོས། །
ཆུ་སྔོན་མོའི་རླབས་རིས་སེམས་སུ་ལྷུང་། །
ལྷོ་གཡུ་འབྲུག་འཁྱུག་པའི་ངར་སྐད་དེ། །
ཆར་ཟིལ་མ་འབབ་པའི་སྔ་ལྟས་རེད། །
ས་རི་ལུང་སྟེགས་བུ་སྔོ་ལྗང་ལྡེམ། །
དཔྱིད་ལྗང་བུ་འབུས་པའི་རྩེ་མོར་ཅེར། །
དེ་འདབ་མ་རྒྱས་པའི་རེ་སྙེག་ཆེ། །
ཆར་ཟམ་ཟིམ་འབབ་པའི་སྨོན་འདུན་ཟབ། །
དཔྱིད་དྲི་གཞོན་བུ་མོའི་འཆོར་སྒེག་ལ། །
ཆུ་གཙང་བོའི་དར་ཁ་ལྷོད་དུས་ན། །
ཉ་གཤོག་དྲུག་དལ་གྱིས་འཁྱུག་པ་དང་། །
ཡུལ་ངོ་མཚར་འཇའ་ཚོན་རི་མོ་བཀྲ། །
དཔྱིད་དཔལ་ཡོན་བཞད་པའི་ནེའུ་གསིང་ལས། །
སྤང་མེ་ཏོག་སྣ་ཚོགས་སྒོ་ཕྱེ་ཚེ། །
འབུ་སྦྲང་མའི་ཚོགས་རྣམས་གཉིད་ལས་སད། །
ནང་ཟེའུ་འབྲུའི་བཅུད་ལ་རོལ་བར་བྲེལ། །
གྲང་ལྷག་རླུང་བསེར་བུ་རྒྱང་དུ་བསྐྱལ། །
གངས་ཁ་བའི་འདབ་མ་ཆུ་ལ་འཐིམ། །
ཡུལ་ནོར་འཛིན་བུ་མོས་ལྭ་གསར་མནབས། །
མཛེས་ལང་ཚོའི་དཔལ་ཡོན་སྐྱེ་དགུར་ངོམ། །
ཤེས་འདབ་མ་རྒྱས་པའི་གླིང་ཁ་འདིར། །
དཔྱིད་དཔལ་མོའི་ལང་ཚོ་རབ་རྫོགས་པས། །
འདིར་འདུས་པའི་ཡིད་མཐུན་མཆེད་གྲོགས་ཚོགས། །
ལས་ཐོས་བསམ་གནས་ལ་སྤྲོ་བས་འཇུག །
ངག་སྙན་པའི་ཚིག་རྩལ་ང་མེད་ཀྱང་། །
དུས་དཔྱིད་དཔལ་བསུ་བའི་བརྡ་གླུ་ལེན། །
དགུན་ཟླ་བའི་ཁྲོད་ནས་སྨྲེང་ན་ཡང་། །
དཔྱིད་དཔལ་མོ་བཞད་དུས་དགའ་བས་བཟི། །
དུས་ནམ་ཟླ་མི་སྡོད་རེས་སུ་འཁོར། །
ངའི་སེམས་འགྱུ་སྙི་མོ་ཡང་གཅིག་དཀྲུགས། །
ཡིད་བག་ཆགས་ཟབ་པའི་དུས་ཚིགས་འདི། །
ཚིག་སྙན་མོའི་དབྱངས་ལ་སྐྱོན་ཙམ་བྱས། །
དཔྱད་གཏམ་སྤེལ་མཁན་ལ་གསལ་བརྡ།
You must be logged in to post a comment.