འཇོ་མདའ་པདྨ།
སྤྲིན་གྱི་ཕག་ནས་ཟླ་འོད་འཛུམ། །
སྐར་མ་རེ་ཟུང་དབྱིངས་ནས་འདར། །
ཁོར་ཡུག་ཀུན་ལ་འུར་ཟིང་བྲལ། །
མི་རྣམས་ངལ་གསོའི་དཔལ་ལ་རོལ། །
མཚན་གྱི་རླུང་བུ་དལ་གྱིས་ལྡང་། །
གདོང་གི་ཤ་ལ་བྱིལ་བྱིལ་གནང་། །
སྣང་བ་བདེ་བའི་དབྱིངས་སུ་ཁྲིད། །
སེམས་པ་སྤྲོ་བའི་གནས་སུ་སྐྱེལ། །
བྱ་ཁྱུ་རང་རང་ཚང་དུ་ལོག །
ནོར་ནག་ལྷས་ཀྱི་ནང་དུ་འཛོམས། །
སྒོ་ཁྱིའི་ཟུག་སྐད་ཡོངས་སུ་འཇགས། །
མཚན་གྱི་དུས་ལ་བག་རེ་ཕེབས། །
མལ་ཁྲིའི་གཡས་གཡོན་དྲོད་ཀྱིས་གཏམས། །
ཚ་རུའི་ཉལ་ཁེབས་ལུས་ལ་འཇམ། །
ཤ་རུས་གསེབ་ནས་སྐྱིད་སྣང་འཕེལ། །
རྨི་ལམ་ཞིང་ཁམས་ལྷོད་ཀྱིས་འགྲིམ། །
དཔྱད་གཏམ་སྤེལ་མཁན་ལ་གསལ་བརྡ།
You must be logged in to post a comment.