ཁམས་ཟླ་སྲས། དཔལ་ཡུལ།
བདག་གིས་འཁོར་བའི་ཐང་ནས་ངལ་དུབ་ལ། །
འཛེམ་མེད་དཀའ་སྡུག་ཅི་ཙམ་མྱོང་ན་ཡང་། །
གང་གི་སྤྱན་རས་ཕྱོགས་སུ་འཆར་ཙམ་གྱིས། །
སྐྱེ་བའི་ལས་ཀྱི་བསོད་ནམས་རྫོགས་པར་ངེས། །
དཔྱིད་ཀྱི་མེ་ཏོག་འཛུམ་པའི་ངང་ཚུལ་གྱིས། །
བཅོས་མིན་ཞལ་རས་སྙིང་ལ་ཡང་ཡང་སྡུག །
ཁྱོད་ཀྱི་མཛེས་པ་ཐམས་ཅད་མིག་མདུན་ནས། །
ཡལ་བ་མེད་པར་གཏན་དུ་གནས་པས་ཆོག །
ལྗོན་ཤིང་བསིལ་གྲིབ་འོག་ཏུ་འགྱེལ་ན་ཡང་། །
གཙང་པོའི་འགྲམ་གྱི་ལྷ་ཡི་སྡུ་གུ་མས། །
ཕྱག་གིས་བདག་ལ་བརྡ་ཞིག་གནང་བ་ནི། །
ཡུན་དུ་སེམས་ནས་བརྗེད་ཐབས་མི་འདུག་མོད། །
གསོན་མཐར་འཆི་བ་འགྲོ་བའི་ཆོས་ཉིད་ཅིག །
བཟློག་རྒྱུ་མེད་པ་རི་གཟར་རྦབ་རྡོ་སྟེ། །
ཐོབ་པ་གཅིག་ཀྱང་འཁྱེར་དབང་མི་འདུག་པར། །
ཤུལ་དུ་བསྐྱུར་དགོས་བྱུང་ཡང་སྐྱོ་དོན་མེད། །
རང་རང་འཚོ་བའི་སྐབས་ཀྱི་འཇིག་རྟེན་དུ། །
མཛེས་སྡུག་གྲངས་ཀྱི་མི་ཆོད་སྐྱིད་ཆུའི་འགྲམ། །
ལྷ་ཁྱོད་མེ་ཏོག་འདྲ་ཞིག་མཛའ་གྲོགས་སུ། །
འགུགས་པས་བདག་བློ་ཞེ་སེམས་གཏིང་ནས་ཚིམ། །
ངག་སྙན་འགྱུར་ཁུག་དབུས་ནས་ཁྱོད་ལ་འབོད། །
མཛེས་མཛེས་མེ་ཏོག་ཚལ་ནས་ཁྱོད་ལ་བཙལ། །
གང་ལྟར་མུ་མཐའ་བྲལ་བའི་སྲིད་ཁམས་ནས། །
ཁྱོད་རང་འཚོལ་ཆེད་མི་ཚེ་རིམ་བཞིན་རྫོགས། །
གཞན་གསོས་ཁུ་བྱུག་བུ་མོའི་གདངས་དབྱངས་སུ། །
རྣ་བ་གཏད་དེ་ཅི་ལྟར་ཉན་ན་ཡང་། །
ཁྱོད་ཀྱི་གསུང་འཕྲིན་ཡིན་སྙམ་དོགས་པ་ལས། །
དགོས་མེད་རིང་དུ་གྲགས་པར་ག་ལ་སེམས། །
འདི་ན་ཁྱོད་ཞལ་སྙིང་ལ་སྡུག་པ་ཡི། །
ངག་མཁན་ཁེར་རྐྱང་བདག་འདྲའི་ཚོར་སྣང་གིས། །
སྤྲིང་པའི་སྙན་ཚིག་ཐོལ་བྱུང་འབབ་པ་ཡང་། །
འུ་གཉིས་ལས་དབང་ཡོད་པའི་མཚན་མར་འཛིན། །
དཔྱད་གཏམ་སྤེལ་མཁན་ལ་གསལ་བརྡ།
You must be logged in to post a comment.