གྱིན་འདའ་བ། ཁྲི་འདུ།
ཕྱི་ཨ་གསར་གྱི་སྒྲུན་རྩོད་བྲེལ་མྱུར་ཆེ་ཞིང་།།
ནང་རྣམ་རྟོག་གི་ཉོན་མོངས་དྲག་ཏུ་ལྡང་རུང་།།
སེམས་རང་གཤིས་ཀྱི་ལྕགས་རི་བརྟན་པོར་གྱུར་ན།།
བྱ་ལད་མོ་ཡི་ཟློས་གར་འཁྲབ་དགོས་མེད་དོ།།
ཕྱི་ཟང་ཟིང་གི་དགྲ་ཉོན་བསླུ་འབྲིད་རྒོད་ཅིང་།།
ནང་ཀུན་རྟོག་གི་བཟེ་རེ་སྒུལ་ཤུགས་ཆེ་རུང་།།
སེམས་ཞི་གནས་ཀྱི་ཏིང་འཛིན་བསྐྱེད་པ་ནུས་ན།།
ལས་སྒྲུན་སེམས་ཀྱི་མཚོ་མོར་བརྒལ་དགོས་མེད་དོ།།
ཕྱི་དུས་རབས་ཀྱི་འཕོ་འགྱུར་རབ་ཏུ་སྐྱེན་ཞིང་།།
ནང་དགའ་སྐྱོ་ཡི་ཚོར་འདུ་ངེད་མེད་སྐྱོམ་རུང་།།
གཤིས་གནས་ལུགས་ཀྱི་ངོ་བོ་རིག་པས་མཐོང་ན།།
སེམས་གུ་དོག་གི་ཚད་གཅུན་འཆིང་དགོས་མེད་དོ།།
ཕྱི་འཇིག་རྟེན་གྱི་སྣང་བར་ཁ་དོག་བཀྲག་ཅིང་།།
ནང་ཚོགས་དྲུག་གི་རེ་ཁ་ཕྱི་ནང་མོད་རུང་།།
སེམས་ཆོག་ཤེས་ཀྱི་བསམ་གཏན་ཞི་བར་གནས་ན།།
ཞེ་འདོད་རྔམ་གྱི་རྙི་རུ་འཚུད་དགོས་མེད་དོ།།
ཕྱི་ལོ་འདོད་ཀྱི་བརྐམ་པས་ཁྲེལ་གཞུང་བསླུས་ཞིང་།།
ནང་འཕྲལ་ཡུན་གྱི་བདེ་དགས་ཕྱི་མ་ཕོངས་རུང་།།
ལས་བདེན་དོན་གྱི་འབྲས་བུ་ཚུལ་བཞིན་སྲུང་ན།།
རྗེ་ཆོས་རྒྱལ་དང་འཕྲད་ཀྱང་བྲེད་དགོས་མེད་དོ།།
དཔྱད་གཏམ་སྤེལ་མཁན་ལ་གསལ་བརྡ།