མཆོད་ལྡན་མཆོད་པའི་མེ་ཏོག
་་་་་་་སྐྱབས་མགོན་གོང་མ་ཁྲི་འཛིན་རཏྣ་བཛྲ་རིན་པོ་ཆེའི་སྐུའི་འཁྲུངས་སྐར་ལ།
ཨོ་བདེ་ལེགས་སུ་གྱུར་ཅིག།
རཏྣའི་མཚན་གྱིས་རབ་བརྗིད་ཅིང་། །
རིགས་ནི་མཐོ་བའི་རུས་སུ་བལྟམས། །
རང་གཞན་རིས་སུ་མི་གཅོད་པའི། །
རིན་པོ་ཆེ་ཉིད་མཇལ་པས་རངས། །
དེང་ནི་ཁྱོད་ཀྱི་འཁྲུངས་སྟོན་ཞེས། །
ཀུན་གྱིས་སྲིད་ན་བསྒྲགས་པའི་གཏམ། །
བདག་གི་རྣ་བར་ལྷུང་བ་ཡིས། །
ཡིད་ནི་དགའ་བའི་དཔལ་གྱིས་བཟི། །
མཚན་མཆོག་གསུམ་གྱི་རིགས་སྲས་སུ། །
བལྟམས་པ་ཙམ་གྱིས་བཀུར་འོས་མོད། །
ཁྱོད་ལ་དེ་བས་ལྕི་བ་ཡི། །
ཡོན་ཏན་ལྡན་དེས་ལྷག་ཏུ་དད། །
ཡབ་རྗེ་དབང་གི་རྒྱལ་པོ་དང་། །
མཁན་ཆེན་ཡོན་ཏན་བཟང་པོ་སོགས། །
མཁས་བརྒྱའི་མན་ངག་བདུད་རྩི་ནི། །
ཁྱོད་ཐུགས་བུམ་པའི་བཅུད་དུ་འཁྱིལ། །
ཆུང་ནས་བྱིས་སྤྱོད་མི་མངའ་ཞིང་། །
སྒམ་པོའི་ཐུགས་ནི་འགྲོ་ལ་བྱམས། །
ཀུན་ལ་དཔྱད་པས་འཇུག་པ་ཁྱོད། །
ས་པཎ་ཞབས་ཀྱི་དཔེ་ཟླར་འོས། །
སྤྱོད་པ་ཉན་ཐོས་ལས་དུལ་ཞིང་། །
ལྟ་བ་བིར་ཝ་པ་དང་མཉམ། །
མདོ་རྒྱུད་མན་ངག་མཛོད་གྱུར་པ། །
ཁྱོད་ནི་བསྟན་པའི་ཉིན་བྱེད་ལགས། །
ཁྱད་པར་གསུང་ངག་ཟབ་མོའི་བཅུད། །
རིས་མེད་གདུལ་བྱ་སྟོང་གི་ཁྱུར། །
བརྩེ་བས་གདམས་པའི་སྙན་པ་ཡིས། །
བསྟན་པའི་རྒྱལ་མཚན་འཛིན་པར་བྱས། །
འཇམ་དཔལ་དབྱངས་ཀྱི་མཁྱེན་པ་དང་། །
ཕྱག་ན་རྡོ་རྗེའི་ནུས་པའི་མཐུ། །
སྤྱན་རས་གཟིགས་ཀྱི་བརྩེ་བ་སོགས། །
ཁྱོད་ལ་ལྡན་ཞེས་མཁས་རྣམས་སྒྲོགས། །
མདོར་ན་ཏིང་འཛིན་ལྷན་སྐྱེས་སུ། །
མངའ་བའི་དམ་པ་ཁྱོད་འདྲ་བ། །
སྐྱེ་རྒུའི་ཡིད་ལ་མངོན་པ་ཡིས། །
བདག་གི་མིག་ནི་སྐལ་ལྡན་གྱུར། །
ཞེན་ནས་བསྟོད་པ་མ་ལགས་ཏེ། །
འཐད་པ་ཁོ་ནས་བཀུར་པ་ལགས། །
ཅི་ཙམ་ཁྱོད་ལ་དཔྱད་པ་ཡིས། །
བདག་གི་བློ་ནི་གུས་པར་གྱུར། །
སྔོན་ཚེ་རྗེ་བཙུན་གྲགས་པ་དང་། །
བར་དུ་ཡབ་རྗེ་སྔགས་འཆང་རྗེས། །
ས་བསྟན་གདུགས་དཀར་འཕྱར་བ་བཞིན། །
མཛད་པའི་རྣམ་ཐར་ཨེ་མ་ཧོ། །
རིས་མེད་མཁས་པ་གདན་འཛོམས་པའི། །
རྒྱུད་སྨད་ཆོས་ཀྱི་གྲྭ་ཆེན་པོར། །
ཁྱེད་ཀྱི་ལེགས་བཤད་སྒྲ་བརྒྱ་པས། །
མཁས་མང་མདོང་མདའ་ཚིམ་པར་བྱས། །
ཁྱེད་ནི་མདོ་ལ་མི་རྨོངས་ཤིང་། །
རྒྱུད་སྡེ་མ་ལུས་བྱང་ཆུབ་པས། །
མཁས་པའི་མཁས་པ་དག་གིས་ཀྱང་། །
ཁྱེད་ཞབས་བསྟེན་པའི་མཐའ་མ་རིག །
མདོར་ན་དགྱེས་པ་རྡོ་རྗེ་ཡི། །
ཐུན་མིན་བཀའ་སྲོལ་འཆད་པ་ལ། །
སྲིད་ན་ཟླ་བོས་མ་བཟུང་བ། །
ཁོ་ནས་མཁས་རྣམས་དགའ་བར་བྱས། །
སླད་ཀྱང་བསྙུངས་ཚུལ་མི་མངའ་ཞིང་། །
ཐུགས་ཀྱིས་ཞི་ཉིད་མི་འཚོལ་བར། །
ཇི་སྲིད་སྐལ་བ་རྒྱ་མཚོའི་མཐར། །
བསྟན་འགྲོའི་མགོན་དུ་བཞུགས་གསོལ་འདེབས་། །
བདག་ཀྱང་དེང་ནས་ཚེ་རབས་ཀུན། །
དམ་པ་ཁྱོད་ཀྱིས་རྗེས་བཟུང་སྟེ། །
གཉུགས་ཡིད་རྗེན་ཅར་མ་རྟོགས་པར། །
ཐུགས་རྗེའི་འབྲལ་མེད་སྐྱོངས་གྱུར་ཅིག །
དེ་ལྟར་བསྟོད་དབྱངས་སྙན་པའི་སྤྲིན། །
དད་གུས་ཆར་དང་འགྲོགས་པ་ལས། །
རྟག་ཏུ་རྒྱལ་བསྟན་དག་པའི་མཁར། །
སྙན་ངག་འཇའ་འོད་སྤྲོ་བར་ཤོག །
ཅེས་པའང་༧སྐྱབས་མགོན་འཁོན་གདུང་རནྟ་བཛྲ་རིན་པོ་ཆེ་མཆོག་གི་འཁྲུངས་སྟོན་ཉིན་མོར་མགོན་པོ་གང་གི་སློབ་འབངས་རྒྱ་མཚོའི་གྲལ་མཐར་སྙེགས་ཤིང་དྲི་མ་མེད་པའི་གསུང་གི་བདུད་རྩི་མྱང་ཞིང་ཞབས་རྡུལ་ལ་མགོས་ཕྱག་བྱ་བའི་སྐལ་བ་ཅན་ཨ་འདུས་སྐལ་བཟང་རྒྱ་མཚོས་ཀ་སྤུངས་ས་དགོན་འཕྲིན་ལས་ཀུན་ཁྱབ་གླིང་དུ་བྲིས་ཟིན་པར་ཅུང་ཁ་སྣོན་དང་བཅས་ས་སྐྱ་མཐོ་སློབ་ཀྱི་རང་ཤག་ཉི་འོད་ཅན་དུ་ཤར་མར་བྲིས་སོ། །
དཔྱད་གཏམ་སྤེལ་མཁན་ལ་གསལ་བརྡ།