སྤྱི་ལོ ༢༠༡༩ ཟླ། ༡༡ ཚེས། ༡༣ ཉིན་རྒྱ་གར་བྱང་ཕྱོགས་སྡེ་ར་ལྡུན་༸དཔལ་ས་སྐྱའི་བཙུན་མའི་མཐོ་སློབ་ཏུ་ཚོགས་མགོན་དུ་༸དཔལ་ས་སྐྱའི་སྐྱབས་མགོན་གོང་མ་ཁྲི་འཛིན་རིན་པོ་ཆེ་མཆོག་དབུ་བཞུགས་ཐོག་ས་སྐྱའི་བཙུན་མའི་མཐོ་སློབ་སྐབས་དང་པོའི་བཀའ་བཅུ་པའི་བསླབ་པ་མཐར་སོན་གྱི་མཛད་སྒོ་དང་ཆོས་ལུགས་རིས་མེད་ཆོས་བརྒྱུད་ཁག་གི་བཙུན་མའི་ཚད་མ་རྣམ་འགྲེལ་ལེའུ་དང་པོའི་ཐོག་ཏུ་བགྲོ་གླེང་ཆེན་མོའི་དབུ་འབྱེད་མཛད་སྒོ་ཚོགས་པ་དང་། ༸དཔལ་ས་སྐྱའི་བཙུན་མའི་མཐོ་སློབ་ནས་ཇི་ལྟར་གདན་ཞུ་གསོལ་འདེབས་ཞུས་དོན་ལྟར་སྔ་དྲོ་༸དཔལ་ས་སྐྱའི་སྐྱབས་མགོན་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་གིས་ས་སྐྱའི་བཙུན་མའི་མཐོ་སློབ་ཀྱི་བསླབ་པ་མཐར་སོན་གྱི་མཛད་སྒོ་སྐབས་དང་པོའི་སྐུ་མགྲོན་གཙོ་བོར་དབུ་བཞུགས་མཛད་པ་གཙོས་༸སྐྱབས་རྗེ་འཁོན་གདུང་ཨ་བི་ཀྲྀ་ཏ་བཛྲ་རིན་པོ་ཆེ་མཆོག་དང་༸སྐྱབས་རྗེ་འཁོན་གདུང་ཨ་སངྒ་རིན་པོ་ཆེ་མཆོག་གིས་དབུས་པའི་མཁན་བླ་སྤྲུལ་རྣམ་པ་དང་བོད་ཀྱི་ཆོས་བརྒྱུད་ཆེན་པོ་བཞིའི་སློབ་དཔོན་རྣམ་པ་དང་དགོན་ཁག་གི་དབུ་འཛིན་སྐུ་ཚབ་རྣམ་པ། དེ་བཞིན་སློབ་དཔོན་མ་དང་དགེ་བཤེས་མ། བོད་ཀྱི་བཙུན་མའི་ལས་འཆར་གྱི་ཐོག་མའི་དབུ་འཛིན་དང་ད་ལྟའི་དབུ་འཛིན་ལས་ཐོག མཐོ་སློབ་དེའི་ངེས་སྟོན་པ་དང་སློབ་སྤྱི་གཙོས་དགེ་ལས་སློབ་གཉེར་བ་བཅས་ལྷན་འཛོམས་ཀྱིས་༸དཔལ་ས་སྐྱ་ཁྲི་འཛིན་ར་ཏྣ་བཛྲ་རིན་པོ་ཆེ་མཆོག་གིས་བསླབ་པ་མཐར་སོན་གྱི་བཙུན་མ་བདུན་ལ་བཀའ་བཅུ་པའི་ཕྱག་འཁྱེར་གསོལ་བསྩལ་མཛད་པ་དང་།
༸སྐྱབས་མགོན་༸གོང་ས་ཁྲི་འཛིན་རིན་པོ་ཆེ་མཆོག་གིས་སྐབས་དེར་བསླབ་པ་མཐར་སོན་གྱི་བཙུན་མ་རྣམ་པར་དགའ་བསུའི་འཚམས་འདྲི་མཛད་པ་དང་འབྲེལ་ཏེ་ཕྱག་འཁྱེར་གསོལ་བསྩལ་གནང་རྗེས་བཙུན་མའི་མཐོ་སློབ་དེའི་ངོས་ནས་མཐོ་སློབ་ཀྱི་ངེས་སྟོན་པ་མཁན་ཆེན་བསོད་ནམས་རྒྱ་མཚོ་མཆོག་གི་བཀའ་དགོངས་བཞིན་སློབ་གཉེར་གནང་རྒྱུར་དམིགས་བསལ་གྱིས་འབད་བརྩོན་གནང་དགོས་པ་མ་ཟད་ལྷག་དོན་ནང་པའི་གཞུང་ལུགས་དག་ལ་སློབ་གཉེར་གནང་སྐབས་གཙོ་བོ་སེམས་རྒྱུད་འདུལ་ཐབས་གནང་རྒྱུ་གལ་ཆེན་པོ་ཡིན་པར་ལམ་སྟོན་བསྩལ་བ་དང་།
སྔ་དྲོ་ས་སྐྱའི་བཙུན་མའི་མཐོ་སློབ་ཀྱི་སྐབས་དང་པོའི་བཀའ་བཅུ་པའི་བསླབ་པ་མཐར་སོན་གྱི་མཛད་སྒོ་གྲུབ་པའི་རྗེས། སྐབས་ཐོག་མཐོ་སློབ་དེའི་ནང་ཚད་མ་རྣམ་འགྲེལ་ལེའུ་དང་པོའི་ཐོག་ཉིན་གསུམ་གྱི་རིང་བོད་ཀྱི་རིས་མེད་ཆོས་བརྒྱུད་ཁག་གི་བཙུན་མའི་བགྲོ་གླེང་ཆེན་མོ་ཞིག་ཀྱང་དབུ་འཛུགས་གནང་འདུག
རྩ་བའི་༸དཔལ་ས་སྐྱ་བཙུན་མའི་མཐོ་སློབ་དེ་ནི་ཕྱི་ལོ་ ༢༠༠༩ ཕྱི་ཟླ་ ༩ ཚེས་ ༢༦ ཉིན་༸དཔལ་སྐྱབས་མགོན་ས་སྐྱ༸གོང་མ་ཁྲི་ཆེན་རྡོ་རྗེ་འཆང་ཆེན་མཆོག་དང་༸དཔལ་ས་སྐྱའི་སྐྱབས་མགོན་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་རྣམ་གཉིས་ཆིབས་བསྒྱུར་བཀྲིན་བསྐྱངས་ཏེ་གསར་འཛུགས་གནང་བ་ཞིག་ཡིན་པ་དང་དེའི་ནང་ས་སྐྱ་མཐོ་སློབ་ཀྱི་སློབ་ཚན་གཞིར་བཟུང་ནང་དོན་རིག་པ་གཙོ་གྱུར་བོད་ཡིག་དང་དབྱིན་ཡིག་བཅས་ཀྱི་སློབ་ཁྲིད་གནང་མུས་ཡིན་པ་མ་ཟད་ད་ལྟའི་ཆར་མཐོ་སློབ་དེའི་ནང་ཁྱོན་བཙུན་མ་དྲུག་ཅུ་ཡོད་འདུག
དཔྱད་གཏམ་སྤེལ་མཁན་ལ་གསལ་བརྡ།