་སར་ལ་དཔྱད་པ་ཡིད་དམ་བཀའ་སྲུང་དགྱེས་པའི་མཆོད་སྤྲིན།
ཡིད་དམ་རྒྱུད་སྡེའི་ལྷ་ཚོགས་ལ།།
གུས་པས་འདུད་དེ་བདག་གིས་ནི།།
གེ་སར་རྒྱལ་པོ་གང་ཡིན་དཔྱད།།
ད་ལྟའི་ས་དགོན་འགའ་ཞིག་ལ།།
བླ་མ་གཞན་གྱི་ཤུགས་རྐྱེན་གྱིས།།
གེ་སར་རྒྱལ་པོ་ཞེས་བྱ་བ།།
ཡིད་དམ་སྲུང་མ་བྱེད་སྲོལ་དར།།
དེ་ལ་རེ་ཞིག་བརྟག་པར་བྱ།།
གེ་སར་ཡིད་དམ་ལྷ་ཡིན་པའི།།
རྒྱུ་མཚན་རྒྱུད་དང་རྒྱ་གཞུང་ནི།།
གང་ལ་ལྟོས་པར་སྨྲ་དགོས་སོ།།
གལ་ཏེ་ཡིད་དམ་ཡིན་པ་ལ།།
རྒྱུ་མཚན་རྒྱ་གཞུང་དགོས་མོད་ཀྱི།།
སྲུང་མ་ཙམ་ཞིག་བྱེད་པ་ལ།།
རྒྱུད་དང་རྒྱ་གཞུང་ལ་སོགས་པའི།།
རྒྱུ་མཚན་མེད་ཀྱང་རུང་བ་སྟེ།།
བོད་ཀྱི་ལྷ་མི་གཞན་འགའ་ཞིག།
སྲུང་མ་བྱེད་སྲོལ་ཡོད་པར་ལྟར།།
འདི་ཡང་བྱས་ཀྱང་ཆོག་སྙམ་ན།།
མ་ཡིན་འདི་ལ་དགོས་དོན་མེད།།
ཅི་ཕྱིར་ཞེ་ན་སྲུང་མ་ནི།།
མགོན་པོ་སོགས་ཀྱིས་ཆོག་པའི་ཕྱིར།།
ད་དུང་བླ་རྒན་འགའ་ཞིག་གིས།།
མགོན་པོ་ལས་ཀྱང་གེ་སར་མཆོག།
བཤད་པ་བདག་གིས་གོ་ཐོས་བྱུང་།།
བླ་མ་དེ་འདྲའི་སྙིང་དཀྱིལ་ལ།།
བདུད་སྡེ་ཞུགས་ནས་སྨྲས་པ་སྟེ།།
ཡིད་དམ་སྲུང་མའི་གནད་འཆུག་ན།།
སྒྲུབ་པ་པོ་ལ་དངོས་གྲུབ་མེད།།
ཐུབ་པས་རྒྱུད་སྡེ་རྣམས་ལས་གསུངས།།
ས་སྐྱ་པ་ཡི་ལེགས་བཤད་ལས།།
འགྲོ་མགོན་སངས་རྒྱས་བཞུགས་བཞིན་དུ།།
སྟོན་པ་གཞན་ལ་བསྟེན་པ་ནི།།
ཡན་ལག་བརྒྱད་ལྡན་ཆུ་འགྲམ་ནས།།
བ་ཚྭའི་ཁྲོན་པ་བཀོལ་བ་བྱེད།།
ཅེས་གསུངས་འདི་འདྲའི་དོན་ལ་དགོངས།།
སྤྱིར་བཏང་གེ་སར་ཡོད་མེད་ལ།།
དོགས་པ་ཡོད་དེ་སྔོན་བྱོན་ཀྱི།།
མཁས་པའི་དབང་པོ་དགེ་ཆོས་ཀྱིས།།
མེད་པ་དངོས་སུ་གསུངས་པས་སོ།།
གལ་ཏེ་ཡོད་དུ་ཆུག་ན་ཡང་།།
ཇག་ཚང་ཞིག་གི་ཇག་དཔོན་ལས།།
གཞན་པ་བསྟན་དང་འགྲོ་བའི་དོན།།
མཛད་མཁན་ཞིག་ནི་མིན་པར་ངེས།།
རྙིང་མ་པ་ཡི་བན་རྒན་འགས།།
གེ་སར་ཡོད་དེ་མཚན་བརྗོད་ལས།།
དཔའ་བོ་བདུད་དགྲ་འདུད་འདུལ་པས།
བདུད་གཞིའི་འཇིགས་པ་སེལ་བར་བྱེད།།
ཅེས་གསུངས་ལུང་གིས་བསྟན་ཞེས་ཟེར།།
ལུང་དེ་འཇམ་དབྱངས་བསྟན་པའི་ཚིག།
ཡིན་པས་གེ་སར་ག་ལ་བསྟན།།
གེ་སར་ཡིད་དམ་བྱེད་པའི་སྲོལ།།
སྔར་འགྱུར་རྙིང་མའི་ལུགས་ཡིན་གྱི།།
དཔལ་ལྡན་ས་སྐྱ་པ་ལ་མེད།།
བླུན་པོ་ཆུ་སྣ་ག་ཁྲིད་ལྟར།།
ཡིན་པས་དེང་སོང་ས་སྐྱ་པའི།།
བླུན་དགོན་འགའ་ལ་སྲོལ་དེ་དར།།
འདི་ལ་གནད་དོན་ཆེ་མཐོང་བས།།
དེ་བས་ཚིག་རྩུབ་སྨྲས་པ་ཡིན།།
མདོར་ན་ཁོ་བོས་ཟེར་རྒྱུ་ནི།།
མྱོང་བ་མེད་ཕྱིར་མངོན་སུམ་མིན།།
གཏན་ཚིགས་མེད་པས་རྗེས་དཔག་མེད།།
དེས་ན་གེ་སར་ཡོད་དོ་ཞེས།།
བཤད་པ་དེ་ཚོ་རྫུན་གཏམ་ཡིན།།
བདག་གིས་འདི་ལྟར་སྨྲས་པའི་ཚེ།
བསམ་པ་དག་པས་གེ་སར་ལ།།
དད་འདུན་ཡོད་མཁན་གཞན་དག་རྣམས།།
དགོངས་པ་མ་འཚོམས་ཁོ་བོས་ནི།།
ང་ཚོའི་བསྟན་པ་ཁུང་དག་ཅིག།
གནས་ན་བསམ་ནས་བྲིས་ཡིན་གྱི།།
གེ་སར་ཁོང་དང་ང་གཉིས་ལ།།
མི་མཐུན་པ་ནི་ཅུང་ཙམ་མེད།།
ཁྱེད་ཀྱིས་གེ་སར་ཡིད་དམ་ལྷ།།
བྱེད་ན་བདག་ལ་ཕན་གནོད་གང་།།
ཡོད་པ་མིན་པས་བདག་གིས་ཀྱང་།།
ཁྱེད་ལ་མི་དགའ་ཅི་ཞིག་བྱེད།།
མ་ཟད་ད་ལྟའི་དུས་སྐབས་སུ།།
དད་དང་བསམ་པ་རང་དབང་ཞེས།།
ཀུན་གྱིས་བཤད་པ་ཉི་ཟླ་ལྟར།།
ཡོངས་གྲགས་ཡིན་པ་ངས་ཀྱང་གོ།
འཇིག་རྟེན་པ་ཡི་ལྷ་ཚོགས་ལ།།
བསང་མཆོད་བྱེད་པའི་གནས་སྐབས་སུ།།
གེ་སར་ལ་ཡང་བསང་མཆོད་ཅིག།
བྱེད་ན་འགལ་བ་གང་ཡང་མེད།།
སུམ་ཅུ་པ་ཡི་རྩ་བ་ལས།།
དགོས་པའི་དབང་གིས་རྟག་ཞི་ལ།།
མཆོད་བརྗོད་བྱས་པ་ལྟ་བུ་ཡིན།།
དེ་མིན་སྐྱབས་འགྲོའི་ཡུལ་བཟུང་ན།།
སྐྱབས་འགྲོའི་སྡོམ་པ་འཇིག་པར་འགྱུར།།
དེ་སྐད་དུ་ཡང་ས་པཎ་གྱིས།།
བསྟན་བཅོས་ཐུབ་པ་དགོངས་གསལ་ལས།།
འདི་འདྲའི་དོན་དག་གསལ་པོར་གསུངས།།
དེས་ན་ཡིད་དམ་སྲུང་མའི་གནད།།
འཆུག་ན་བསྟན་དང་འགྲོ་བའི་དོན།།
མི་འགྲུབ་པ་ནི་གསུངས་པས་ན།།
ཀུན་གྱིས་འདི་ལ་དཔྱད་པར་ཞུ།།
ཆོས་བཞིན་སྒྲུབ་པའི་གང་ཟག་ལ།།
བར་ཆད་སྲུང་བ་ཁས་བླངས་པའི།།
ཆོས་སྐྱོང་སྲུང་མའི་ཚོགས་དག་དང་།།
སྐད་ཅིག་ཙམ་ཡང་འབྲལ་མེད་ཤོག།
དཔལ་ས་སྐྱའི་ཆོས་སྡེ་ཆེན་མོ་རྫོང་སར་དགོན་དང་འགུ་ཟི་དགོན་སོགས་ཀྱིས་ད་སྐབས་གླིང་རྗེ་གེ་སར་རྒྱལ་པོའི་དབང་ལུང་མན་ངག་སྤེལ་ནས་ཤིན་ཏུ་རྩ་ཆེན་བྱེད་བཞིན་ཡོད་པའི་གནས་ཚུལ་ལ་དམིགས་ནས་འགུ་ཟི་པད་བློས་རང་གི་བསམ་ཚུལ་ཙམ་ཞིག་བྲིས་པ་ཡིན་པས་སུ་ལའང་དགོངས་འགལ་མེད་པར་ཞུ་ཞེས་སྙིང་ནས་གསོལ་བ་འདེབས་པ་ལགས་ན་དེ་དེ་བཞིན་དུ་འགྲུབ་པར་གྱུར་ཅིག། དགེའོ།།
དཔྱད་གཏམ་སྤེལ་མཁན་ལ་གསལ་བརྡ།