མཛད་པ་པོ། ཤར་རྒྱལ་བ་ཙོང་ཁ་པ་ཆེན་པོ།
རིག་གནས་རྒྱ་མཚོའི་ཕ་རོལ་སོན་གྱུར་པས།།
གསུང་རབ་ནོར་བུའི་གླིང་ལ་མངའ་སྒྱུར་ཞིང་།།
སྙན་གྲགས་ཀུན་གྱི་རྣ་བའི་རྒྱན་གྱུར་པས།།
ངོ་མཚར་བསྔགས་པའི་གནས་གྱུར་ས་སྐྱ་པ།།
མཁྱེན་པས་ཤེས་བྱ་ཀུན་གྱི་དེ་ཉིད་གཟིགས།།
བརྩེ་བས་ལེགས་བཤད་དགའ་སྟོན་འགྲོ་ལ་སྩོལ།།
མཛད་པས་རྒྱལ་བ་མཉེས་པ་འབའ་ཞིག་སྒྲུབ།།
མཚན་ནས་བརྗོད་པར་དཀའ་བ་ཁྱེད་ལ་འདུད།།
ཁྱེད་ནི་བློ་གྲོས་དྲི་མ་མེད།།
མུ་མཐའ་བྲལ་བའི་ཤེས་བྱ་ལ།།
ལྷ་ཡི་ལམ་ལ་འོད་སྟོང་བཞིན།།
འཇུག་པར་མཐོང་ཚེ་བདག་གི་ཡིད།།
ཡ་མཚན་གྱུར་ནས་དེ་ཡི་དཔེར།།
འཇམ་དཔལ་དབྱངས་ཀྱི་མཁྱེན་པ་བཙལ།།
དེ་ནས་དེ་གཉིས་དབྱེར་མེད་པར།།
མཐོང་བས་བདག་གིས་དཔེ་མ་རྙེད།།
རབ་འབྱམས་རྒྱལ་བའི་ཡེ་ཤེས་འཇམ་དཔལ་དབྱངས།།
རབ་དཀར་གངས་རིའི་ལྗོངས་སུ་འགྲོ་རྣམས་ཀྱི།།
རབ་མཛེས་གཙུག་གི་རྒྱན་དུ་བྱོན་གྱུར་ནས།།
རབ་རིབ་མ་ལུས་སེལ་བའི་ས་སྐྱ་པ།།
མ་ལྟར་བརྩེ་བའི་ཐུགས་རྗེས་ལུས་ཅན་ཀུན།།
སྲིད་ལས་སྒྲོལ་བའི་ཐབས་ལ་ཤིན་ཏུ་དགའ།།
མཁྱེན་བརྩེའི་དཔུང་གིས་བདུད་སྡེའི་དཔུང་བཅོམ་ནས།།
བསྟན་པའི་རྒྱལ་མཚན་འཛིན་པ་ཁྱེད་ལ་འདུད།།
ཁྱེད་ཀྱིས་ཐུབ་བསྟན་ནོར་བུ་ཡི།།
དྲི་མ་རིགས་པའི་ཆུ་ཡིས་བཀྲུས།།
ཡིད་ཆེས་ལུང་གིས་བྱི་དོར་བྱས།།
སྒྲུབ་པའི་རྒྱལ་མཚན་རྩེ་རུ་མཆོད།།
ཉིན་མཚན་དུས་ནི་ཐམས་ཅད་དུ།།
བསྟན་པ་འབའ་ཞིག་དགོངས་པ་ཁྱེད།།
སྙིགས་དུས་འགྲོ་བ་སྐྱབས་མེད་ལ།།
རྒྱལ་བ་པས་ཀྱང་ཐུགས་རྗེ་ཆེ།།
ཐ་སྙད་གཙུག་ལག་ནང་གི་སྡེ་སྣོད་ཀྱི།།
བདེ་བཤེགས་དགོངས་པ་ཐམས་ཅད་ལེགས་རྟོགས་ནས།།
མ་རྟོགས་པ་དང་ཕྱོགས་རེས་ཚིམས་པ་དང་།།
ཇི་བཞིན་མིན་པར་རྟོགས་པའི་འགྲོ་བ་ལ།།
ལྷག་པར་བརྩེ་བ་སྐྱེས་ནས་ཡིན་ལུགས་དོན།།
རྣར་སྙན་ཡིད་འབབ་གོ་བར་སླ་བ་ཡི།།
སྐྱོན་སྤངས་གསུང་གིས་ཡང་ཡང་འདོམས་མཛད་པ།།
ཁྱེད་ལ་བསམ་པ་དག་པས་བདག་ཕྱག་འཚལ།།
ས་སྟེང་འགྲན་ཟླ་བྲལ་བ་ཆོས་ཀྱི་རྗེ།།
ཤེས་བྱ་ཀུན་ལ་ཐོགས་མེད་འཇམ་པའི་དབྱངས།།
གནས་ལྔ་མངོན་དུ་གྱུར་པའི་པཎྜི་ཏ།།
གངས་ཅན་འགྲོ་བའི་སྐྱབས་གཅིག་ས་སྐྱ་པ།།
ཉིན་མཚན་ཀུན་ཏུ་གུས་པས་གསོལ་བ་འདེབས།།
སྐྱེ་ནས་སྐྱེ་བར་མཚན་དཔེའི་གཟི་འབར་བ།།
ཁྱེད་སྐུ་མཐོང་ཞིང་ཐེག་མཆོག་སྒྲོག་པ་ཡི།།
ཁྱེད་གསུང་རྒྱུན་ཆད་མེད་པར་ཐོས་པར་ཤོག།
ཅེས་པ་འདི་ནི་རྒྱུད་སྡེ་འཛིན་པ་ཡར་ཀླུང་པ་སེང་གེ་རྒྱལ་མཚན་པས་བསྐུལ་བའི་དོན་དུ་ཆོས་རྗེ་དེ་ཉིད་ལ་མི་ཕྱེད་པའི་གུས་པ་དང་ལྡན་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་མོན་མཁར་བཀྲིས་གདོང་དུ་སྦྱར་བའོ།།
དཔྱད་གཏམ་སྤེལ་མཁན་ལ་གསལ་བརྡ།