རྩོམ་པ་པོ། རབ་གསལ།
ཕྱོགས་བཅུའི་རྒྱལ་བའི་ཡེ་ཤེས་སྐུ།
གཅིག་བསྡུས་སྨྲ་བའི་སེང་གེ་མཆོག།
ཁ་བའི་ལྗོངས་སུ་བསམ་བཞིན་དུ་།
མཚན་དཔེའི་གཟུགས་སྐུ་བཞད་ལ་འདུད་།
ཡི་གེའི་ཕྱི་མོ་སྔོན་ནས་མཁྱེན།
ཆོས་རྣམས་གསན་པ་ཙམ་གྱིས་དང་།
རྨི་ལམ་ཡུལ་དུ་ཐོས་ཙམ་གྱིས།
ཡོངས་རྫོགས་མཁྱེན་པ་ཁྱོད་ཉིད་ཙམ།
བཅུ་ཕྲག་རིག་གཞུང་གངྒའི་རྒྱུན།
གངས་རིའི་ལྗོངས་སུ་ལེགས་དྲངས་ཏེ།
གྲངས་མེད་མཁས་དབང་པད་མོའི་ཚལ།
ལེགས་པར་བཞད་པ་ཁྱོད་ཀྱི་དྲིན།
འཕྲོག་བྱེད་མུ་སྟེགས་སྟོན་པ་དྲུག།
ཁྱོད་ཀྱི་རིག་པས་ཚར་བཅད་དེ་།
ཐུབ་བསྟན་རྒྱལ་མཚན་ལེགས་བསྒྲེངས་པ།
གངས་རིའི་ཁྲོད་དུ་ཁྱོད་ཉིད་ཙམ།
འཕགས་པའི་ཡུལ་གྱི་མཁས་རྣམས་ཀྱིས།
མངོན་པར་མཆོད་པའི་བོད་བརྩམས་ཆོས།
བསྟན་ཆོས་ཚད་མ་རིགས་གཏེར་ཞེས།
འཕགས་པའི་ཡུལ་དར་ཁྱེད་བསྟོད་དོ་།
འཆད་པ་བཅུ་ཕྲག་རིག་པ་སྟོན།
རྩོད་པས་མུ་སྟེགས་རྒོལ་བ་བཅོམ།
རྩོམ་པས་མདོ་རྒྱུད་གསལ་བར་མཛད་།
མཁས་པའི་ཡང་རྩེ་ཁྱེད་ཕྱག་འཚལ།
རླབས་ཆེན་འཕྲིན་ལས་རྨད་པོ་ཆེས།
རྒྱ་བོད་ཧོར་གྱི་ཡུལ་གྲུ་སོགས།
གྲངས་མེད་གདུལ་བྱ་སྨིན་མཛད་དེ་།
བདེ་ཅན་གཤེགས་ལ་མགོས་ཕྱག་འཚལ།
སླར་ཡང་ས་ལམ་ཡོངས་བགྲོད་ནས།
དྲི་མེད་སངས་རྒྱས་ཉིད་འགྱུར་ཞེས།
ལུང་བསྟན་དབུགས་དབྱུང་མཛད་པ་བཞིན།
བསམ་ཡས་རྣམ་ཐར་འཛིན་ལ་འདུད་།
ལུས་དང་ལོངས་སྤྱོད་དགེ་ཚོགས་ཀུན།
ཁྱེད་སྐུ་མཆོད་པའི་རྒྱུ་རུ་བསྔོ།
མདོ་རྒྱུད་མན་ངག་བང་མཛོད་ལ།
རྟག་ཏུ་སྤྱོད་པའི་དབང་ཐོབ་ཤོག།
སྐྱེ་བ་འདི་དང་ཚེ་རབས་ཀུན།
འཇམ་མགོན་བླ་མས་རྗེས་བཟུང་སྟེ།
ཆོས་ཀྱི་ཚིག་དོན་མ་ལུས་ཀུན།
ལེགས་པར་རྟོགས་པའི་མཐུ་ཐོབ་ཤོག།
ཅེས་འཇམ་དཔལ་དབྱངས་དངོས་མི་ཡི་གཟུགས་སུ་དངོས་སུ་ཕེབས་པ་གངས་ལྗོངས་མཁས་པའི་ཡང་རྩེ་པཎྚིཏ་ཆེན་པོ་ས་སྐྱ་པཎ་ཆེན་ཀུན་དགའ་རྒྱལ་མཚན་དཔལ་བཟང་པོ་ཞེས་མཚན་གྱི་ཅོད་པན་སྲིད་པ་གསུམ་དུ་མངོན་པར་གྲགས་པའི་བདག་ཉིད་ཆེན་པོ་གང་གི་སྐུ་མྱ་ངན་ལས་འདའ་བའི་ཚུལ་སྟོན་པའི་དུས་ཆེན་ཁྱད་པར་ཅན་གྱི་ཉིན་ཆོས་མེད་ཆོས་པའི་གྲལ་དུ་སྡོད་པའི་འཁྱམ་པོ་སྡེ་སྣོད་རབ་གསལ་གྱིས་མ་ལེ་ཤི་ཡ་ཤར་ཕྱོགས་གྲོང་ཁྱེར་ཀུ་ཆིང་ཞེས་པའི་ཡིད་འོང་ལྟ་ན་སྡུག་པའི་གླིང་དུ་ས་སྐྱ་བྱམས་བརྩེ་ཆོས་ཚོགས་ཀྱི་རང་ཤག་བསམ་གཏན་ཁང་བུར་ཡིད་ཀྱི་མཆོད་སྤྲིན་དུ་དམིགས་ཏེ་བསྟོད་ཅིང་གསོལ་བ་འདེབས་པའི་ཚིག་འདི་བགྱིས་སོ། སརྦ་མངྒ་ལཾ། ༢༠༡༨/༡༢/༢༡ ཉིན།
དཔྱད་གཏམ་སྤེལ་མཁན་ལ་གསལ་བརྡ།