༧མདོ་སྔགས་རབ་འབྱམས་སྨྲ་བའི་དབང་པོ། ཡོངས་ཀྱི་དགེ་བའི་བཤེས་གཉེན་ཆེན་མོ་བདེ་བར་
གཤེགས་པ་མཁན་ཆེན་ལེགས་བཤད་ཀུན་དགའ་འམ། ཡོངས་གྲགས་སུ་མཁན་པོ་མིག་དམར་ཞེས་ཞུ་བ་གང་ཉིད་ཕྱི་ལོ་ ༡༩༩༩ ཕྱི་ཟླ་ ༢ ཚེས་ ༡༤ ཉིན་དགོངས་པ་ཞིང་གཞན་དུ་གཏད་ནས་ད་བར་མི་ལོ་ཧྲིལ་པོ་ཉི་ཤུ་ལོན་ལ་ཉེ་བའི་སྐབས་འདིར། དཔལ་ས་སྐྱའི་མཐོ་རིམ་སློབ་གྲྭའི་འདུས་སྤྱིའི་ངོས་ནས་དམ་པ་གང་གི་ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་འགྲུབ་ཏུ་རྫོགས་ཤིང་། ལེགས་མཛད་བཟང་པོའི་བཀའ་དྲིན་རྗེས་དྲན་གྱི་མཆོད་འབུལ་སྨོན་ལམ་རྒྱ་གང་ཆེ་ཞིག དཔལ་ས་སྐྱའི་༧སྐྱབས་མགོན་༧གོང་མ་ཁྲི་འཛིན་ཞེ་གཉིས་པ་མཆོག་དབུ་བཞུགས་ཐོག ཕྱི་ལོ་ ༢༠༡༩ ལོའི་ ཟླ་ ༢ ཚེས་ ༡༤ ཉིན་དཔལ་ས་སྐྱའི་མཐོ་རིམ་སློབ་གྲྭར་འཚོགས་གཏན་ཁེལ་བ་ལགས་ན། དམ་པ་གང་གི་དངོས་དང་བརྒྱུད་པའི་ཞལ་སློབ་ཏུ་གཏོགས་པ་དག་དང་འབྲེལ་ཡོད་ཁག་དགོངས་རྫོགས་མཆོད་འབུལ་སྨོན་ལམ་དེར་ངེས་པར་མཉམ་ཞུགས་ཡོང་བའི་འབོད་སྐུལ་སྙིང་དབུས་ནས་ཞུ་བ་དང། དེ་བཞིན་དགོངས་རྫོགས་སྨོན་ལམ་དང་འབྲེལ་མཁན་ཆེན་བདེ་བར་གཤེགས་པ་གང་ཉིད་ཀྱི་རྣམ་ཐར་དང་གསུང་རྩོམ་རིགས་སྤར་སྐྲུན་ཞུ་ཐུབ་པའི་རེ་བ་ཤིན་ཏུ་ཆེ་བས། མགོན་པོ་གང་ལ་ཐུགས་རྒྱུས་ཆེ་བ་རྣམ་པས་རྣམ་ཐར་འབྲི་རྩོམ་དང་། ལྷག་པར་དུ་མཁན་རིན་པོ་ཆེའི་ཞལ་གདམས་དང་གཞུང་བཤད་སྐོར་སོགས་དབྱིན་བོད་ཅི་རིགས་ནས་གསུང་རྩོམ་དང་སྒྲ་ཕབ་ཞུས་པ་དེ་འདྲ་ཡོད་ན་འདི་ལོའི་ཕྱི་ཟླ་༡༡ པའི་སྔོན་ཚུད་དུ་འདི་གར་ལག་སོན་ཡོང་བའི་མཐུན་འགྱུར་གསོལ་འདེབས་ནན་པོ་ཞུ་བ་བཅས།
ས་སྐྱ་མཐོ་སློབ་ཀྱི་ཡིག་ཚང་ནས་ཕྱི་ལོ་༢༠༡༨ ཟླ་༠༩ ཚེས་༥ ཉིན་ཕུལ།
འབྲེལ་གཏུགས་གནང་ཡུལ། ཞལ་པར་དང་སྐད་འཕྲིན་ཨང་། ་གློག་འཕྲིན་ཁ་བྱང་།
མཁན་པོ་ཐུབ་བསྟན་རབ་གསལ། ༨༠༧༧༥༢༥༡ thuptent_lama@yahoo.com
མཁན་རིན་པོ་ཆེ་མིག་དམར་ཚེ་རིང་མཆོག་གི་རྣམ་ཐར་མདོར་བསྡུས། (རྣམ་ཐར།)བོད་ནུབ་ཕྱོགས་སུ་སྐུ་འཁྲུངས་ཤིང་།དགུང་ལོ་བཞིར་ལོན་པ་ཕྱི་ལོ་༡༩༥༩ལོར་བོད་དུ་རྒྱ་ནག་གི་བཙན་འཛུལ་བྱས་པས་ཁོང་བཙན་བྱོལ་དུ་ཕེབས་ཏེ་རྒྱ་གར་ལྷོ་ཕྱོགས་སུ་བཞུགས།རིམ་གྱིས་སློབ་གྲྭར་ཞུགས་ཏེ་སྔོན་འགྲོའི་སློབ་སྦྱོང་ཆ་ཚང་གནང་།དེ་ནས་ཝ་ཎ་མཐོ་སློབ་ཏུ་ཞུགས་ཏེ་རྒྱ་བོད་དབྱིན་གསུམ་སོགས་ལ་སྦྱངས་པ་མཛད།ཕྱི་ལོ་༡༩༧༢ལོར་ས་སྐྱ་མཐོ་སློབ་དབུ་བརྙེས་པ་ན་དམ་པ་འདི་ཡང་མཐོ་སློབ་ཏུ་འཛུལ་ཞུགས་གནང་སྟེ་མཁན་ཆེན་དམ་པ་ཨ་པད་རིན་པོ་ཆེ་མཆོག་གི་སྐུ་མདུན་ནས་མདོ་སྔགས་ཀྱི་གཞུང་ལུགས་བསམ་གྱི་མི་ཁྱབ་པར་གསན་བསམ་མཛད་པས་མཁན་སློབ་ཀུན་གྱིས་ཁོང་ནི་སློབ་མ་རྣམས་ལས་རིག་པ་དང་ཀུན་སྤྱོད་སོགས་རྩེ་ཕུད་ཀྱི་གྲས་སུ་ངོས་འཛིན་དང་བསྔགས་བརྗོད་ཡང་ཡང་གནང་།དམ་པ་ཁོང་ནི་འདི་གའི་སློབ་གཉེར་བ་ཐོག་མའི་གྲས་སུའང་ཡིན།སྔར་ཕྱིར་༧སྐྱབས་མགོན༧གོང་མ་རིན་པོ་ཆེ་མཆོག་དང་།བཅོ་བརྒྱད་ཁྲི་ཆེན་རིན་པོ་ཆེ།།ངོར་ཀླུ་ལྡིང་མཁན་ཆེན་རྡོ་རྗེ་འཆང་སོགས་ཀྱི་སྐུ་མདུན་ནས་དབང་ལུང་མན་ངག་དང་བཅས་མཐའ་ཡས་པ་གསན། 
…Created on སྤྱི་ཟླ་བཅུ་པ། 12 20142. དཔལ་ས་སྐྱའི་མཐོ་རིམ་སློབ་གྲྭ་ཆེན་མོའི་ངོ་སྤྲོད་མདོར་བསྡུས། (དགོན་སྡེ།)… འདིའི་ཕྱི་ནང་གི་བཀོད་པ་མཛེས་རིས་དང་བཅས་པའི་འཆར་འགོད་ཡོངས་རྫོགས་འཆར་འགོད་པ་གཞན་སུ་ལའང་ལྟོས་པ་མེད་པར་རྗེ་བླ་མ་ཉིད་ཀྱི་ཟླ་མེད་པའི་བློ་གྲོས་ཀྱི་རྩལ་ལས་འཁྲུངས་པ་ཞིག་གོ།དེ་ནས་ཞལ་སློབ་རྣམས་ཀྱི་ཐོས་བསམ་གྱི་བློ་གྲོས་དང་བསྒོམ་པའི་ཉམས་རྟོགས་གང་འཚམ་ནར་སོན་པ་ན།༡༩༨༤ལོར་ཡོངས་ཀྱི་བཤེས་གཉེན་དམ་པ་མཁན་ཆེན་ཨ་པད་རིན་པོ་ཆེ་གང་ཉིད་སྒོམ་སྒྲུབ་ལ་རྩེ་གཅིག་ཏུ་གཞོལ་ཞིང་ཐུགས་སྲས་རྣམས་ལ་བསྟན་པའི་ཐུགས་འགན་གཏོད་པའི་དགོངས་པ་སྔར་ནས་ཡོད་པ་བཞིན།༧སྐྱབས་མགོན་གོང་མ་རིན་པོ་ཆེ་མཆོག་ནས་ཀྱང་དེ་བཞིན་དུ་དགོངས་འཁྲོལ་གནང་ཞིང་ཁོང་གཉིས་ཀྱི་ཐུགས་ཀྱི་བཞེད་པ་གཅིག་ཏུ་བབས་ནས།ཉིད་ཀྱི་ཐུགས་སྲས་མཁན་པོ་འཇམ་དབྱངས་བསྟན་འཛིན་ལགས་ཆོས་གྲྭ་འདིའི་མཁན་པོ་དང་འཛིན་སྐྱོང་པ་གཅིག་ལྕོགས་ཏུ་དབང་བསྐུར་ཞིང་བསྟན་པ་གཏད་པ་བཞིན།ཁོང་གིས་ཀྱང་རྩ་བའི་བླ་མ་རྣམས་གཉིས་ཀྱི་བཀའ་དགོངས་སྤྱི་བོར་བླངས་ཏེ།༡༩༨༩ལོའི་བར་བགྲང་བྱ་ཧྲིལ་པོ་ལྔ་ཡི་རིང་རྒྱལ་བའི་བཀའ་དགོངས་འགྲེལ་དང་བཅས་པའི་གཞུང་ལུགས་རྒྱ་མཚོའི་བཤད་ཁྲིད་བླ་མའི་མན་ངག་གིས་དྲངས་ཏེ།རྣམ་མང་འདུལ་བྱའི་སློབ་ཚོགས་བསྐྱངས་པས་ཧ་ལམ་མཁན་ཆེན་ཉིད་ཀྱིས་གཟིགས་སྐྱོང་དངོས་ཀྱིས་འཚོ་བ་ལྟ་བུའི་འཆད་ཉན་གྱི་བསྟན་པ་དར་ཞིང་སློབ་ཚོགས་དགེ་འདུན་པའི་གྲངས་སྔར་བས་འཕེལ་ཞིང་རྒྱས་པའི་སྒོ་ནས་བཤད་སྒྲུབ་ཀྱི་རྒྱུན་ཚུགས་པའི་འཕྲིན་ལས་བླ་མེད་བསྐྱངས།དེ་ནས་སྤྱི་ལོ་༡༩༩༠ལོར་སྐྱབས་མགོན་གོང་མ་རིན་པོ་ཆེ་མཆོག་དང་མཁན་ཆེན་ཨ་པད་རིན་པོ་ཆེ་མཆོག་རྣམ་གཉིས་ཐུགས་གྲོས་གཅིག་མཐུན་བྱུང་བར་བརྟེན་ཞི་གཤེགས་དམ་པ་མཁན་པོ་མིག་དམར་ཚེ་རིེང་མཆོག་ཆོས་གྲྭ་འདིའི་བསྟན་པའི་བདག་པོར་མངའ་གསོལ་ཞུས་པ་བཞིན་བླ་མའི་བཀའ་ལུང་སྤྱི་བོར་བཞེས་ཏེ།སྐུ་ཚེ་འདུ་བྱེད་མ་སྟོངས་བར་བཤད་སྒྲུབ་ཀྱི་བསྟན་པ་བླ་ན་མེད་པ་སྤེལ་ཞིང།འཇམ་དབྱངས་མི་ཡི་རྣམ་རོལ་༧སྐྱབས་རྗེ་འཁོན་གདུང་རཏྞ་བཛྲ་རིན་པོ་ཆེ་དང་༧འཁོན་གདུང་ཛྙ་ཎ་བཛྲ་རིན་པོ་ཆེ་རྣམ་གཉིས་ཀྱིས་གཙོས་བསྟན་འཛིན་གྱི་སྐྱེས་བུ་དམ་པ་བརྒྱ་ཕྲག་དུ་མ་བསྐྲུན་པ་མ་ཟད།དུས་དང་དུས་སུ་རྒྱལ་ཡོངས་མཁས་པའི་རང་བཞིན་གྱི་བགྲོ་གླེང་བསྡུས་ཏེ་གདན་ས་ཆེན་པོ་འདིའི་མཚན་སྙན་དང་མཛད་རྗེས་ཕྱོགས་ཀུན་ཏུ་ཁྱབ་པར་མཛད་ཅིང་།དཔལ་ལྡན་ས་སྐྱ་པ་སྤྱི་དང་བྱེ་བྲག་རྩ་བའི་བླ་མ་རྣམ་གཉིས་ཀྱི་ཐུགས་དགོངས་ཡོངས་སུ་རྫོགས་པའི་འཕྲིན་ལས་ཀྱི་འཇུག་པ་བསྐྱངས།སྤྱི་ལོ་༡༩༩༩ལོའི་ཟླ་བ་དང་པོའི་ནང་མཁན་རིན་པོ་ཆེ་མིག་དམར་མཆོག་དགོངས་པ་ཆོས་དབྱིངས་སུ་ཐིམས་སྟེ་བསྟན་པ་སྤྱི་དང་།སྒོས་སུ་ཆོས་གྲྭ་འདི་ལ་བར་ཆད་ཚད་མེད་བྱུང་ནས་དུས་སྐབས་གཉན་ཕྲང་གཅིག་ལ་སླེབས་སྟབས།མཁན་ཆེན་ཨ་པད་རིན་པོ་ཆེ་བལ་ཡུལ་ནས་འདི་གར་དངོས་སུ་ཞབས་པད་བཀོད་དེ་ཉིན་ཤས་བཞུགས་རིང་དགེ་སློབ་རྣམས་ལ་དགྱེས་བརྩེའི་བཀའ་སློབ་དང་བླང་དོར་ལམ་སྟོན་གྱིས་དབུགས་དབྱུང་མཛད་ཅིང་།ད་ལྟའི་རོང་སྟོན་ཁང་ཚན་དང་པཎ་ཆེན་ཁང་ཚན་གྱི་གྲྭ་ཤག་གསར་བཞེངས་ཀྱི་འཆར་བཀོད་དང་རྨང་གཞི་བཏིང་པས་མཚོན།མ་འོངས་འཕེལ་རྒྱས་ལ་ཕྱོགས་པའི་ལས་འཆར་བཀོད་སྒྲིག་དང་སྔར་བཞིན་འཆད་ཁྲིད་གནང་ཕྱོགས་ཀྱི་བཀོད་འདོམས་ཞིབ་པར་གནང་ཞིང་ལྔ་རིག་སྨྲ་བའི་དབང་པོ་མཁན་ཆེན་བསོད་ནམས་རྒྱ་མཚོ་ལ་བསྟན་པ་གཏད་པ་བཞིན།ལོ་དེའི་ཟླ་བ་བདུན་པའི་ནང་བརྩེ་ཆེན་བསྟན་པའི་མངའ་བདག་ཁྲི་ཆེན་རྡོ་རྗེ་འཆང་སྐྱབས་མགོན་གོང་མ་རིན་པོ་ཆེ་དབུ་བཞུགས་ཐོག་མཁན་རིན་པོ་ཆེ་བསོད་ནམས་རྒྱ་མཚོ་རིན་པོ་ཆེ་ཆོས་གྲྭ་འདིའི་བསྟན་པའི་བདག་པོར་མངའ་གསོལ་ཞུས་པ་བཞིན།མཁན་ཆེན་མཆོག་ནས་ཀྱང་རྩ་བའི་བླ་མ་རྣམས་ཀྱི་བཀའ་ལུང་གི་ཅོད་པན་གཙུག་གིས་བཞེས་ཏེ་འཆད་ཁྲིད་གནང་རྒྱུའི་མཚོན་པའི་ཕྱི་ནང་གི་འཛིན་སྐྱོང་གི་བྱེད་སྒོ་ཚགས་ཚུད་མཐུས་སྒོ་སྔར་བས་ཇེ་ཚང་དུ་བཏང་བ་དང་།ལྷག་པར་དུ་འདི་གར་སློབ་བཞུགས་བྱེད་པའི་ཆ་རྐྱེན་བོད་ཀྱི་བརྡ་དག་དང་རྒྱལ་རབས་ཆོས་འབྱུང་གི་ཤེས་ཚད་ངེས་ཅན་ཞིག་དགོས་པས།ཡིག་ཚད་ལོན་པ་རྣམས་མ་གཏོགས་སློབ་ཞུགས་བྱེད་པའི་གོ་སྐབས་མེད་སྟབས།མཁན་རིན་པོ་ཆེ་མཆོག་ནས་ཡུལ་དུས་དང་སྤྱི་ཚོགས་ཀྱི་གནས་བབ་ལ་གཟིགས་ནས།ཐོས་བསམ་དོན་དུ་གཉེར་བའི་དགེ་འདུན་པ་ཚང་མར་བགོ་སྐལ་སྤྱི་སྙོམས་སུ་སྩོལ་ཕྱིར་རིག་སྦྱོར་འཛིན་གྲྭ་ཞེས་པ་ལས་དང་པོ་རྣམས་ལ་བོད་ཀྱི་བརྡ་དག་སྙན་གསུམ།ས་སྐྱ་ལེགས་བཤད།རྒྱལ་རབས་ཆོས་འབྱུང་།དེ་བཞིན་བློ་རྟགས་བསྡུས་གསུམ་སོགས་ཀྱི་འཛིན་གྲྭ་ཞིག་གསར་དུ་སྲོལ་འབྱེད་གནང་ཞིང་།དེར་ལོ་གཅིག་སྦྱོང་བརྡར་གནང་ཏེ་ཡིག་ཚད་འཕྲོད་པ་རྣམས།
དཔྱད་གཏམ་སྤེལ་མཁན་ལ་གསལ་བརྡ།