ཁྱེད་ལ་རང་དབང་གི་ཁ་ཕྱོགས་ཤིག་མེད་ཅིང་། གཞན་དབང་གི་ལུང་ཤུར་དུ་གཡོ་དགོས་པ་ཅི་རེད། ཚེ་སྲོག་དང་འདུ་ཤེས་རླུང་གིས་འཁྱེར་ནས་མཛེས་སྡུག་གི་ལང་ཚོ་ཁ་ཆར་དང་བུ་ཡུག་ཁྲོད་ཧྲལ་ཧྲུལ་དུ་གྱུར། །མ་གཞི་ཁྱེད་རང་གནས་པའི་ལབ་རྩེ་དེ་ལུང་ཤུར་ཏག་ཏག་ཡིན་མོད་ཁྱེད་ཀྱི་རྩ་བ་འདི་ལྟར་ཚུགས་པ་སུ་ཡིས་རྟོགས། མི་ཚོས་ཟེར་ན་འདི་ནི་
མི་རབས་དུ་མར་བརྒྱུད་པའི་ཕ་མེས་ཀྱིས་ལབ་རྩེ་ཡིན་པས་ཆེས་རྩ་ཆེན་ཞིག་ཏུ་སྣང་མོད། ངས་བལྟས་
ན། འདི་ནི་རྨོངས་དད་རྒྱུན་འབྱམས་དང་ཀླད་རྙིང་མཁྲེགས་བཟུང་ཁོ་ན་ལས་མ་འདས། རྒྱུ་མཚན་ནི་
འདི་ལྟ་བུའི་ལབ་རྩེ་རྙིང་གོག་འདིར་ཁ་མདོག་རྣམ་པར་བཀྲ་བའི་དར་ལྕོག་འདི་ལྟར་འཛུག་དགོས་པའི་
རྒྱུ་མཚན་སུ་ལའང་བཤད་རྒྱུ་མེད་ལ་ཆུང་སོ་དཀར་ནས་རྒན་མགོ་དཀར་བར་ལབ་རྩེ་འདིའི་ལོ་རྒྱུས་ཤེས་
མཁན་གཏན་ནས་མེད། ཡིན་ནའང་། གཅིག་བྱས་ན་ང་རང་དར་ལྕོག་ལ་ཞེན་དྲག་པས་ཡིན་སྲིད་ཀྱང་
གང་ལྟར་ངས་འདི་ལ་རྒྱུ་མཚན་གཏན་ནས་མ་མཐོང་། གལ་ཏེ་དར་ལྕོག་འདི་ཁྱིམ་གཞི་དྲོ་མོ་ཞིག་གི་
ཡང་ཐོག་ཏུ་བཙུག་ཡོད་ན། མཛེས་སྡུག་དང་རང་དབང་གི་ཕྱོགས་སུ་གཡོས་ཏེ་རྟེན་འབྲེལ་གྱི་ལྷ་དར་
དང་བསང་མཆོད་ཀྱི་རྒྱན་ཡོད་ངེས་རེད་ལ་དབྱིབས་ལེགས་པའི་དར་སྒྲོམ་ཞིག་ཀྱང་བཟོས་ཡོད་ངེས་རེད།
ཡིན་ནའང་། ད་ཆ་ཁྱེད་རང་སྲ་ཞིང་མཁྲེས་པའི་རྡོ་ཧྲུག་གི་བཙིར་ནས་ལུས་ལ་གནར་གཅོད་ཀྱི་རྨ་ཁ་མོད་
ལ། དཀའ་སྡུག་གིས་ལང་ཚོ་ཚལ་བར་གས་མོད། སུས་ཀྱང་ཁྱེད་ལ་དུས་རབས་ཀྱི་ཁ་ཕྱོགས་སྟོན་མཁན་མ་
བྱུང་། ཁྱེད་ཀྱི་ཚེ་སྲོག་གི་རྒྱུན་ཐག་ཕྲ་མོ་འདི་ལྟའི་འཆིང་རྒྱའི་ཁྲོད་ཆད་ལ་ཉེ། ངོ་མ། ངུ་བྲོ་ཡང་ངུ་མི་
ནུས་པ་འདྲ། འདི་སུས་ཕབ་པས་བཀའ་རེད། སུས་སྐུལ་བའི་ཁྲལ་རེད། འདི་ནི་ཇི་སྲིད་བར་གནས་དགོས།
ངོ་མ་རྙིང་རྗེ། ལུང་ཤུར་གྱི་དར་ལྕོག །
སྤྱི་ལོ། ༢༠༡༠ ཟླ་༡༢ ཚེས་༢༩ ཉིན་བྲིས་པ་ཞིག་ཡིན།།
དཔྱད་གཏམ་སྤེལ་མཁན་ལ་གསལ་བརྡ།