༧ དྲི་མེད་འཁོན་གྱི་གདུང་བརྒྱུད༧ དཔལ་ལྡན༧ས་སྐྱ་པའི་༧སྐྱབས་མགོན༧གོང་མ་རིན་པོ་ཆེ་༧ རཏྣ་བཛྲ་རིན་པོ་ཆེ་མཆོག་ལ་སྒོ་གསུམ་དྭངས་བར་འདྲེན་པའི་སྒོ་ནས་སྐྱབས་སུ་མཆིའོ།
༼བསླབ་བྱ་ནོར་བུའི་ཕྲེང་བ།༽
བློ་གྲོས་གསལ་བས་གཞུང་ལུགས་ཀུན་ལ་མཁས།།
རྒྱལ་སྲས་བྱང་ཆུབ་བཟང་བོའི་སྤྱོད་པས་མཛེས།།
མདོ་སྔགས་གཅིག་ཏུ་བསྡུས་པའི་ཀུན་མཁྱེན་པ།།
༧འཁོན་གདུང་རཏྣ་བཛྲ་མཆོག་ལ་འདུད།།
བཀྲ་ཤིས་དགེ་བའི་དུས་ཀྱི་ཆ་ཚད་འདིར།།
ཏྲེ་ཧོར་ས་དགོན་ལྔ་ཡི་དྲྭ་ཚིགས་སུ།།
༧འཁོན་གདུང༧སྐུ་དངོས་བྱོན་པར་ལེགས་བསུ་དང་།།
ཡུལ་དུས་ཚིགས་མཚམས་གསུང་གི་བདུད་རྩིར་རྨད།།
དེ་རིང་བསྐལ་པ་བཟང་པོའི་དུས་ཀྱི་ཆར།།
༧འཁོན་གདུང་སྐུ་བགྲེས་གསུངས་སྒྲོས་ཐོས་པ་འདིས།།
ས་དགོན་བློ་གསལ་ཚུལ་མཐུན་དོན་གཉེར་ཅན། །
༧སྟོན་པ་དངོས་མཇལ་ལྟ་བུའི་རྟེན་འབྲེལ་བཟང་།།
༧ སྟོན་ལ་དད་ཅིག་ཚུལ་ཁྲིམས་རྣམ་དག་ཐོག།
ཕན་བདེ་འབྱུང་གནས་རྒྱལ་བའི་བསྟན་པ་འདིར།།
ཡུན་དུས་གནས་ཕྱིར་རང་ངོས་བསྟན་ལ་བརྩོན།།
ཐུབ་བསྟན་པད་ཚལ་རྒྱས་པའི་དགེ་འདུན་མཐུན།།
ཕྱི་དངོས་རྟེན་གསུམ་གསར་བཞེངས་ལེགས་ན་ཡང་།།
བསྟན་པའི་རྣམ་དག་རྒྱུ་རུ་མི་འགྲོ་བས།།
རང་རྒྱུད་ཐར་འདོད་ཐུགས་རྒྱུད་འཁྲུངས་པ་འདིས།།
ཐུབ་དབང་དགྱེས་ཕྱིར་བསྟན་པ་དེ་ལས་དབེན།།
སྲིད་ཞིའི་གདུང་སེལ་ཡོངས་རྫོགས་བསྟན་པའི་དཔལ།།
ངེས་འབྱུང་ཚུལ་ཁྲིམས་ཡང་དག་ལེགས་ཕྱུག་ཅིང་།།
ཐོས་བསམ་སྒོམ་པའི་སྡེ་སྣོད་འཛིན་པ་དང་།།
དགེ་འདུན་ཐུགས་མཐུན་བདེ་བའི་དཔལ་ལ་སྤྱོད།།
སངས་རྒྱས་བསྟན་ལ་འཇུག་པ་བྱ་བའི་ཕྱིར།།
ཆོས་འདུལ་ཡང་དག་སྤྱོད་པའི་འདུ་པར་སྡེ།།
བསོད་ནམས་ཞིང་སའོ་དགོས་པ་གྲྭ་ཚང་སོགས།།
ཡར་རྒྱས་གང་འཕེལ་དགོས་པས་བརྩོན་པ་རིགས།།
དྲི་མེད་ཆོས་ཀྱི་སྙིང་པོ་ཤེས་པའི་ཐོག།།
འདུ་སྡེར་ཚོགས་དང་ཆོས་གྲྭ་སྒྲུབ་མཆོད་སོགས།།
དགའ་དད་སྤྲོ་གསུམ་དྭངས་བས་བྱ་བར་བགྱི།།
ཡང་དག་དགེ་བའི་བསོད་ནམས་དཔལ་དུ་དགེ།
བསྟན་པ་རིན་ཆེན་ཡུན་དུ་གནས་པ་ལ།།
དགེ་འདུན་འདུ་སྡེ་མཐུན་པར་བདེ་བ་དང་།།
འགྲོ་ཀུན་འདྲེན་པར་རྒྱུ་རུ་འགྲོ་བའི་ཕྱིར།།
ཕན་བདེའི་མཐུན་ལམ་གནས་ལ་རྟག་ཏུ་འབོད།།
ཆོས་གནས་ཚུལ་ཁྲིམས་ཕུན་སུམ་ཚོགས་པའི་ཐོག།
བསྟན་པའི་སྙིང་པོ་སྒྲུབ་པ་ཉམས་ལེན་ལ།།
ཡུན་ནས་ཡུན་དུ་རང་ངོས་བརྩོན་པ་དང་།།
སྒོ་གསུམ་དྲི་བསུང་ཕུལ་དུ་ཕྱིར་བར་བྱས།།
སྣ་ཚོགས་ཤེས་རིག་འཕྲུལ་གསར་དར་བའི་དུས།།
ཆོས་ཀྱི་ཡང་སྙིང་གཞན་ཕན་བྱང་ཆུབ་སེམས།།
ཡ་རབས་སྤྱོད་བཟང་མིའི་གཤིས་ཀུན་གྱི་གཞིས།།
འགྲོ་ཀུན་བདེ་ཕྱིར་ཡིན་ཚུལ་བཀའ་སློབ་ཕེབས།།
འབྱུང་འགྱུར་རང་སྐྱིད་གཞན་བདེ་ཕན་པའི་སླད།།
དམ་ཆོས་མདོ་དང་སྔགས་ཀྱི་ཉམས་ལེན་ལ།།
མཁྱེན་ཡངས་བློ་གསལ་དག་གིས་ལྔ་བདོའི་དུས།།
བརྩོན་པ་ཡང་ཡང་དགོས་པའི་གསུང་སྒྲོས་ཕེབས།།
རྒྱུན་ལྡན་དགེ་རྩ་བྱང་ཆུབ་སེམས་བསྐྱེད་དང་།།
འདོད་ཆུང་ཆོག་ཤེས་ཡ་རབས་བག་ཕེབས་ངང་།།
ཀུན་མཐུན་གཞན་ཕན་དོན་ལ་འབོད་པའི་ཐོག།
བརྩོན་པ་ཆུ་བོའི་རྒྱུན་བཞིན་བསྟེན་པར་གནང་།།
ཀུན་སྤྱོད་གཙང་བས་གཞན་ངོར་འདོད་པའི་འཐད། །
སྨྲ་བ་ཉུང་ཞིག་ཕོག་ཐུག་མེད་པ་དང་།།
དད་བརྩོན་དྲན་ཤེས་བརྟན་པོས་ཉིན་རེ་ལ།།
སྒོ་གསུམ་གཡོ་ཟོལ་མེད་པས་སྲུང་བརྩི་བྱས།།
དྲི་མེད་༧ ས་སྐྱའི་༧སྐྱབས་མགོན༧འཁོན་གདུང་པས།།
ཟབ་རྒྱས་བསླབ་བྱ་མ་ནོར་ལམ་བཟང་ཞིག།
དུས་མཚམས་སྦྲང་ཆར་བདུད་རྩིའི་འདོད་འཇོ་འདིས།།
དད་གཉེར་བློ་གསལ་དག་གི་ཅི་འཆར་རྣམས།།
རིག་པའི་དཔྱད་ན་རང་བློ་སྨིན་པའི་རྒྱུ།།
བསྟན་འགྲོའི་བདེ་ཐབས་བསྒྲུབ་པ་མཆོག་ཏུ་འགྱུར།།
དེའི་ཕྱིར་རང་ཡུལ་ས་དགོན་ཆོས་གྲོགས་ཚོས།།
སྙིང་ལ་ཆོངས་ཤིག་དད་གཉེར་ཆོས་གྲོགས་ཚོ།།
མཁྱེན་དཔྱོད་མཁའ་ལྟར་ཡངས་པའི་འཁོན་གྱི་གདུང་།།
ཐུགས་རྒྱུད་བྱམས་བརྩེས་ཕྱུག་པའི་རྒྱལ་བའི་སྲས།།
མ་གྱུར་འགྲོ་ཀུན་ཕན་ཕྱིར་བཀའ་སློབ་འདིས།།
སློབ་འབངས་གདོང་མཁན་གཙོས་བའི་སེམས་སུ་སྨིན།།
འདི་ལྟར་བསླབ་བྱ་བགྱིས་པའི་རྣམ་དཀར་དགེ།
དུས་གསུམ་བདེ་གཤེགས་སྲས་བཅས་ཐམས་ཅད་ཀྱི།།
མཛད་པ་སྨོན་ལམ་མ་ལུས་སྒྲུབ་པ་དང༌།།
ལུང་རྟོགས་དམ་ཆོས་འཛིན་པའི་རྒྱུ་རུ་བསྔོ།།
ཡུལ་དུས་ཆོས་ཉིད་འགལ་སྐྱོན་སྲང་ལམ་ནས།།
གདོང་མཁན་མིང་པས་སུག་བྲིས་བགྱིས་པ་འདིས།།
འོལ་ཚོད་རྨོངས་མུན་ལམ་ནས་འགྲོ་མིན་ཡང་།།
དད་གུས་ལྷག་བསམ་དྭངས་བས་མགྲིན་ནས་ཐལ།།
གདོང་ཐོག་དགོན་གྱི་མཁན་མིང་ཙམ་འཛིན་པ་ལྟ་གྲུབ་སློབ་དཔོན་ཀཿབྲག་དངོས་གྲུབ་བསོད་ནམས་ཀྱིས་སྦྱར། ༢༠༡༦/༨/༡༠ རེས་གཟའ་ལྷག་པར་བསླབ་བྱ་ཤར་མ་བྲིས། སརྦ་མངྒ་ལཾ།
དཔྱད་གཏམ་སྤེལ་མཁན་ལ་གསལ་བརྡ།