དཔལ་ཀྱེའི་རྡོ་རྗེའི་དབྱིན་འགྱུར་དེབ་ཀྱི་སྐོར་ལ་སྩལ་བཀའ་སློབ།

༄༅། ། རྡོར་གདན་དཔལ་ས་སྐྱའི་སྨོན་ལམ་ཆེན་མོ་སོ་བཞི་པའི་སྐབས་བརྒྱད་ཁྲི་བཞི་སྟོང་ཚོགས་པས་དབྱིན་འགྱུར་གནང་བའི་རྩ་རྒྱུད་བརྟག་གཉིས་དབུ་འབྱེད་ཀྱི་མཛད་སྒོར་༼སྐྱབས་མགོན་ས་སྐྱ་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་ཞལ་སྔ་ནས། བརྒྱད་ཁྲི་བཞི་སྟོང་ཞེས་པའི་བཀའ་བསྟན་ཕབ་སྒྱུར་ཚོགས་པའི་ཕྱག་ལས་སྐོར་དང་། དཔལ་ཀྱེའི་རྡོ་རྗེའི་དབྱིན་འགྱུར་དེབ་ཀྱི་སྐོར་ལ་༽ སྩལ་བའི་བཀའ་སློབ།

བསྟན་བདག་བླ་ཆེན་རྣམ་པ་དང་། དགེ་འདུན་ཕོ་མོ་བགྲེས་གཞོན་ཚང་མར་ཞུ་རྒྱུར། ད་ལན་གནས་མཆོག་ཁྱད་པར་ཅན་རྡོ་རྗེ་གདན། དུས་གསུམ་གྱི་སངས་རྒྱས་ཐམས་ཅད་མངོན་པར་རྫོགས་པ་སངས་རྒྱས་པའི་གནས་ཁྱད་པར་ཅན་འདིར། དུས་ཁྱད་པར་ཅན་བདག་ཅག་རྣམས་ལ་བཀའ་དྲིན་ལྷག་པར་དུ་ཆེ་བ་ཤར་ཆེན་༧ངོར་ཀླུ་ལྡིང་མཁན་ཆེན་རྡོ་རྗེ་འཆང་གི་དགོངས་རྫོགས་དུས་ཆེན་དང་སྟབས་བསྟུན་ནས་སྨོན་ལམ་ཆེན་མོ་སྐབས་སུམ་ཅུ་སོ་བཞི་པ་འཚོགས་པའི་དུས་ཚོད་བྱུང་བ་རེད། དེས་ན་ཚོགས་བཅར་བ་ཚང་མར་སྙིང་ནས་དགའ་བསུའི་འཚམས་འདྲི་དང་འབྲེལ་བཀྲ་ཤིས་ལེགས་ཞུ་རྒྱུ་ཡིན།
དེ་ནས་སྐབས་སུ་བབ་པ་བརྒྱད་ཁྲི་བཞི་སྟོང་གིས་བཀའ་བསྟན་གྱིས་མཚོན་པའི་ཆོས་ཚན་མང་པོ་ཞིག་དབྱིན་སྐད་སོགས་ཕྱིའི་སྐད་ཡིག་མང་པོའི་ནང་འགྱུར་རྒྱུའི་ལས་གཞི་ཧ་ཅང་ཆེན་པོ་ཞིག རྫོང་སར་མཁྱེན་བརྩེ་རིན་པོ་ཆེའི་བླ་ན་མེད་པའི་ཐུགས་བསྐྱེད་དང་། རླབས་ཆེན་གྱི་མཛད་འཕྲིན་འོག་ནས་དབུ་འཛུགས་གནང་བ་རེད།

ཐོག་མར་དབུ་འཛུགས་གནང་སྐབས་གོང་དུ་གསུངས་པ་བཞིན། བཀའ་འགྱུར་བསྒྱུར་བྱ་བ་དེ་བློར་ཤོང་དཀའ་བ་ཞིག་ཡིན། དེ་ཇི་ལྟར་འགྲུབ་ཡོང་བསམ་པ་ལྟ་བུ་བྱུང་ཡོད་ནའང་། མཁྱེན་བརྩེ་རིན་པོ་ཆེའི་བླ་ན་མེད་པའི་ཐུགས་བསྐྱེད་ཀྱི་འོག་ནས། ད་ཆ་བརྒྱ་ཆ་ལྔ་ཙམ་མ་གཏོགས་ཕལ་ཆེར་འགྲུབ་ལ་ཉེ་བ་དེ་ཤིན་ཏུ་ངོ་མཚར་ཆེན་པོ་དང་། གནད་འགག་ཆེན་པོར་གྱུར་ཡོད་དེ། འགྲོ་བ་ལྷ་དང་བཅས་པའི་ཕན་བདེ་མ་ལུས་པ་འབྱུང་བའི་གཞི་རྩ་དེ་སངས་རྒྱས་ཀྱི་བསྟན་པ་ཡིན། རང་རེས་ཁ་ཏོན་ཙམ་ཞིག་བཏོན་ནའང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་ཞེས་གསུང་གི་ཡོད།

དེས་ན་རང་རེ་ནང་པའི་ཡུལ་གྲུ་གཅིག་པོ་མ་ཡིན། འཇིག་རྟེན་ཁམས་ཀྱི་སེམས་ཅན་ཐམས་ཅད་སྡུག་བསྔལ་ལས་བསྐྱབ་པ་དང་། བདེ་བ་ལ་འགོད་སླད་ཡིན། དེ་ལ་དེང་སང་སྐད་ཡིག་དེ་སྔ་མོའི་དུས་དང་མི་འདྲ་བ་ཡིན། སྔ་མོ་ཡིན་ན། རང་རེ་བོད་ལ་ལོ་པཎ་དང་། ཆོས་རྒྱལ་ཚོའི་ཐུགས་རྗེ་བཀའ་དྲིན་ལ་བརྟེན་ནས་སངས་རྒྱས་ཀྱི་བསྟན་པ་ཆ་ཚང་ལ་སྤུས་དག་པ། མཁས་པའི་རྣམ་དཔྱོད་དང་། གྲུབ་པའི་ངོ་མཚར་སོགས་གང་གི་ཐད་ནས་ཀྱང་བསམ་གྱིས་མི་ཁྱབ་པ་བྱུང་ནའང་། རྒྱ་ཆེ་ས་ནས་རྒྱ་དཀར་ནག་ཙམ་མ་གཏོགས། ཡུལ་གྲུ་མང་པོ་ཞིག་ལ་ཁྱབ་ཐུབ་པ་དེ་གནས་དུས་གང་གི་ཆ་ནས་ཀྱང་དཀའ་བ་ཡིན།
དེང་སང་དུས་ཀྱི་འགྱུར་བ་དང་། འཕྲུལ་ཆས་སོགས་མང་པོ་ཞིག་ཡར་རྒྱས་ཕྱིན་པས། འཛམ་གླིང་ཆུང་དུ་སོང་ཟེར་བཞིན་ཡོད། ས་ཆ་ཆུང་དུ་སོང་མེད་ནའང་། འགྲིམ་འགྲུལ་སྟབས་བདེ་རུ་སོང་བས། དེང་སང་འཛམ་གླིང་ཆ་ཚང་ཉིན་གཅིག་ལ་བསྐོར་ཐུབ་པ་ཡིན། དུས་སྐབས་འདིར་སངས་རྒྱས་ཀྱི་བསྟན་པས་སེམས་ཅན་ཐམས་ཅད་ལ་ཕན་པའི་སླད་དར་ཁྱབ་དགོས་པ་དེ་ཤིན་ཏུ་གལ་ཆེན་པོ་ཡིན།

དེའི་སླད་དུ་བཀའ་འགྱུར་དང་བསྟན་འགྱུར་མ་བསྒྱུར་ན་ཤེས་མི་ཐུབ་པ་ཡིན། དེ་ཡང་དབྱིན་སྐད་ནང་དུ་བསྒྱུར་ཟིན་ན། སྐད་ཡིག་གཞན་ལ་འགྱུར་བར་ཅུང་ལས་སླ་བོ་ཡིན་ངེས། རྫོང་སར་མཁྱེན་བརྩེ་རིན་པོ་ཆེས་དབུ་ཁྲིད་པའི་ཐོག་ནས་བརྒྱད་ཁྲི་བཞི་སྟོང་གི་ཚོགས་མི་ཐམས་ཅད་ཀྱིས་ད་ལྟའི་བར་ཕྱག་ལས་ཧ་ཅང་གི་རྒྱ་ཆེན་པོ་དང་། རླབས་ཆེན་པོ་གནང་བ་ལ་སྙིང་ནས་རྗེས་སུ་ཡི་རངས་ཞུ་བ་དང་ཆབས་ཅིག་ཏུ་བཀའ་དྲིན་ཆེ་ཞུ་བ་ཡིན།

ད་དུང་ཡིན་ནའང་འཕྲོས་ལུས་དང་། བཀའ་འགྱུར་གྱི་འགྲེལ་བ་བསྟན་འགྱུར་ཡིན་པས། དེ་དག་མུ་མཐུད་ནས་བསྒྱུར་དགོས། ད་ལན་དཔལ་ཀྱཻ་རྡོ་རྗེ་རྩ་བའི་རྒྱུད་བརྟག་པ་གཉིས་པ་བསྒྱུར་འདུག འདི་ཤིན་ཏུ་གལ་ཆེན་པོ་ཡིན་ཏེ། གྲུབ་མཐའ་བཞི་དང་། རྒྱུད་སྡེ་བཞི་ཚང་མ་ཚར་ནས། སྔགས་ཀྱི་རིམ་པ་ཀུན་ཤེས་ནས། ། དེ་རྗེས་ཀྱཻ་ཡི་རྡོ་རྗེ་བརྩམ། ། གསུངས་པ་ཡིན། དེས་ན་རྒྱུད་ཐམས་ཅད་ཀྱི་རྒྱལ་པོ་ལྟ་བུ་དེ་ཡིན། འདི་ཉིད་དེ་རིང་གནས་མཆོག་རྡོ་རྗེ་གདན་དུ་དབྱིན་སྐད་ནང་བསྒྱུར་ཏེ་དེབ་གཟུགས་སུ་དབུ་འབྱེད་བྱ་རྒྱུའི་གོ་སྐབས་ཐོབ་པ་དེར་ང་རང་ཡིན་ན་ཤིན་ཏུ་དགའ་བོ་བྱུང་།

ངས་ཤེས་ཡོན་སོགས་གང་ཐད་ནས་ཁྱེད་རྣམས་པར་ཐུགས་ཕན་གསོས་པའི་བསླབ་བྱ་རྒྱ་ཆེན་པོ་དེ་འདྲ་གང་ཡང་ཞུ་ཤེས་པ་མེད་ནའང་། ངས་ག་དུས་ཡིན་ནའང་ངས་སྨོན་ལམ་འདེབས་བཞིན་ཡོད། རླབས་ཆེན་གྱི་བྱ་བ་དེ་མཐར་ཕྱིན་པ་དང་། མཐར་ཕྱིན་པ་ཙམ་དུ་མ་ཟད་འགྲོ་བ་དཔག་ཏུ་མེད་པ་ལ་ཕན་ཐོགས་རྒྱ་ཆེན་པོ་ཡོང་བ་དང་། དེ་ལྟ་བུའི་དགེ་བའི་རྩ་བ་རླབས་པོ་ཆེ་བསགས་པ་ལ་བརྟེན་ནས། སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་རྒྱས་ལ་ཡུན་རིང་དུ་གནས་པ་དང་།

དེ་འཛིན་ཀུན་གྱི་གཙུག་རྒྱན་༧སྤྱི་ནོར་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་གི་དབུས་པའི་བསྟན་འཛིན་གྱི་སྐྱེས་བུ་དམ་པ་ཐམས་ཅད་སྐུ་ཚེ་ཞབས་པད་བསྐལ་བ་རྒྱ་མཚོར་བརྟན་ཅིང་། ཐུགས་ཀྱི་བཞེད་དོན་ཐམས་ཅད་གེགས་མེད་ལྷུན་གྱིས་འགྲུབ་པ་དང་། བརྒྱད་ཁྲི་བཞི་སྟོང་གི་ཕྱག་ལས་གནང་སྒོ་མཐའ་དག་གེགས་མེད་ལམ་སློང་མཐར་ཕྱིན་ནས་བསྟན་པ་དང་འགྲོ་བའི་དོན་རྒྱ་ཆེན་པོ་སྒྲུབ་ཐུབ་པའི་སྨོན་ལམ་ཞུ་བཞིན་ཡོད། ཐུགས་རྗེ་ཆེ། ཞེས་བཀའ་སྩལ་ཏོ། །

ཅེས་པའང་ཚེས་བཅུའི་དགུང་མོར་ཉིན་རྡོར་གདན་ས་དགོན་གྱི་རང་སྦྱིལ་དུ་ཨ་འདུས་སྐལ་བཟང་རྒྱ་མཚོས་ཡི་གེར་ཕབ་པ་འདིས་ཀྱང་བརྒྱད་ཁྲི་བཞི་སྟོང་གི་འགྱུར་གྱི་ལས་དོན་མཐའ་དག་ལེགས་འགྲུབ་ཡོང་བར་ཞེ་ཐག་པ་ནས་སྨོན་པའོ།།

84000: Translating the Words of the Buddha
The Great Sakya Monlam Foundation
Dzongsar རྫོང་སར།
Dzongsar Jamyang Khyentse
The 42nd Sakya Trizin Ratna Vajra Rinpoche
ཨ་འདུས་ སྐལ་པེ།

ངོ་དེབ་ལས་བཏུས།