ནམ་ཤེས། དཀར་མཛེས།
དྲུད་ནས་ཡོང་བའི་ཐག་པ་རིང་མོ།།
ཁུར་ནས་ཡོང་བའི་རྨི་ལམ་ལྗང་ཁུ།།
རླུང་དང་གྲིབ་མའི་ཁ་དོག་འདྲ་བ།།
ལོ་ཟླ་ཡིན་པའི་གཏན་ཚིགས་ཡིན་ན།།
མུན་པ་སྟུག་པའི་སྡོང་བོའི་འཁྲིས་ཀྱི།།
ཉི་མ་འདྲ་བའི་འོད་ཟེར་དེ་ལ།།
ལག་པས་རེག་དུས་ཨ་ཅང་བསིལ་བ།།
འཁྲུལ་སྣང་མིན་པའི་གནས་ལུགས་མ་རྙེད།།
སྟོན་ནམ་ཚེས་པའི་བརྡ་གླུ་སིང་སིང་།།
འཇའ་ཚོན་ཁུད་ཀྱི་མེ་ཏོག་ཐར་ཐོར།།
སྐད་ཅིག་ཅིག་གི་ཕྱི་ནང་འདྲ་བ།།
འཇིག་རྟེན་སྲིད་པའི་གཟུགས་བརྙན་ཡིན་ན།།
རྩྭ་ཟིལ་སྒུལ་བའི་རྣང་མའི་ཞིང་གི།།
རླུང་བུ་ལྡང་བའི་དུས་ཚིགས་དེ་ལ།།
སྐྲ་ལོས་བྱིལ་དུས་མིག་ཆུ་བཞུར་བ།།
འཁྲུལ་སྣང་མིན་པའི་གནས་ལུགས་མ་རྙེད།
གཙང་བོ་རུམ་པའི་སྣང་བ་སུལ་སུལ།།
སྣང་བ་གཡོ་བའི་ཆུ་རྡུལ་མོག་མོག།
སེམས་དང་བསམ་པའི་འཁྱུག་རིས་འདྲ་བ།།
རྟོག་འགྱུ་ཕྲ་མོའི་བསླུ་བྲིད་ཡིན་ན།།
ཕྱང་ཕྲུལ་མོད་པའི་སྒྱུ་མའི་ཀློང་གི།།
གཡུལ་ས་འདྲ་བའི་གཅོང་རོང་དེ་ལ།།
སེམས་པས་སྙེག་དུས་བདེ་བ་འདྲ་བ།།
འཁྲུལ་སྣང་མིན་པའི་གནས་ལུགས་མ་རྙེད།
བཞད་ནས་ཐོར་བའི་ལོ་མ་སྔོན་པོ།།
མེ་ལོང་ནང་གི་མིག་ཆུ་དྭངས་མ།།
གྱེས་གདུང་མཚོན་པའི་གཟུགས་སྒྲ་འདྲ་བ།།
རེ་དོགས་ཤིག་གི་གཏིང་མཐའ་ཡིན་ན།།
ས་སྲོས་སླེབས་པའི་ནམ་མཁའི་དབྱིངས་ཀྱི།།
མཚམས་སྤྲིན་མཛེས་པའི་མེ་ཏོག་དེ་ལ།།
མཆུ་སྒྲོས་གླན་པའི་ཚོར་བ་ཞིམ་པོ།།
འཁྲུལ་སྣང་མིན་པའི་གནས་ལུགས་མ་རྙེད།།
ཕྱིར་ཡོང་མེད་པའི་སྐར་མ་ཆུང་ཆུང་།།
མཚན་མོར་གོམས་པའི་ཟླ་བ་སྒོར་སྒོར།།
དུས་ཚིགས་གང་གི་བྱ་ར་འདྲ་བ།།
ཚེ་སྲོག་མཚོན་པའི་རླུང་བུ་ཡིན་ན།།
སྐྱིད་སྡུག་གསལ་བའི་མཚོ་མོའི་ངོས་ཀྱི།།
ངང་ཁྱུ་འཕུར་བའི་གཤོག་སྒྲ་དེ་ལ།།
རྣ་བ་སྨྲེང་བའི་སྐྱོ་བ་རེ་རེ།།
འཁྲུལ་སྣང་མིན་པའི་གནས་ལུགས་མ་རྙེད།།
དཔྱད་གཏམ་སྤེལ་མཁན་ལ་གསལ་བརྡ།