༅༅།།རྣམ་འདྲེན་བཞི་བ་སྟོན་མཆོག་ཐུབ་པའི་དབང་པོ་གང་དུ་མངོན་པར་སངས་རྒྱས་པའི་གནས་རྡོ་རྗེ་གདན་ལ་ཆེད་དུ་བསྟོད་པའི་གཏམ་ལྷ་ཡི་རོལ་མོ་ཞེས་བྱ་བ་བཞུགས་སོ།།
རྩོམ་པ་པོ། དགེན་ཨ་འདུས་སྐལ་བཟང་རྒྱ་མཚན།
གཉིས་འཛིན་བུད་ཤིང་སྐམ་པོ་མ་ལུས་འཁྲུལ་ཟད་ཡེ་ཤེས་འོད་ཀྱི་མེ་དཔུང་གིས།།
སྲེག་མཛད་དུས་གསུམ་རྒྱལ་བའི་ཚོགས་ཀྱིས་རྙེད་དཀའ་ཕུན་ཚོགས་བྱང་ཆུབ་དམ་པའི་འབྲས།།
མངོན་དུ་བྱེད་པའི་གནས་ཀྱི་མཆོག་གྱུར་རབ་ཡངས་རྡོ་རྗེའི་འཛིན་མ་གང་དེ་ཡི།།
ཐལ་བའི་རྡུལ་ཡང་དད་པའི་གཙུག་གིས་མཆོད་དོ་བདག་བློ་ཡང་དག་ཆོས་སུ་ཁྲིད་པར་མཛོད།།
རྣམ་འདྲེན་བཞི་བས་བྱང་ཆུབ་བསྒྲུབས་པའི་གནས།།
རྡོ་རྗེ་གདན་ཞེས་གྲགས་པ་གསལ་ལྡན་པར།།
ལན་གཅིག་མཇལ་པའི་མྱོང་བ་གང་མཆིས་རྣམས།།
དཔྱོད་ལྡན་གྲོགས་ཀྱི་གཟིགས་མོར་བྲི་བར་བྱ།།
བརྩེ་བ་མཐའ་ཀླས་སྟོན་པ་མཆོག་དེ་ཡིས།།
བསྐལ་མང་སྔོན་ནས་བྱང་ཆུབ་སྒྲུབ་པའི་སླད།།
བགྲང་ཡས་ལུས་སྲོག་བཏང་བའི་རྣམ་ཐར་ལ།།
བསམ་ན་དད་པའི་ལུས་སྐྱེས་དབང་མེད་གཡོ།།
རང་ལས་གཞན་སྐྱེས་འཛིན་པའི་བྱང་ཆུབ་སེམས།།
གྲངས་མེད་གསུམ་དུ་ཡང་ཡང་བསྒོམས་པའི་མཐར།།
གནས་འདིར་རྫོགས་སངས་རྒྱས་ཀྱི་གོ་འཕང་མཆོག།།
བརྙེས་པའི་ཚུལ་དེར་མཁས་པ་སུ་མི་དགྱེས།།
རིགས་གཟུགས་ལང་ཚོའི་དཔལ་གྱིས་རབ་མཐོ་བའི།།
མིག་སྟོང་ཅན་དང་གདོང་བཞི་བ་ལ་སོགས།།
སྲིད་འདིའི་ཆེ་རྒུའི་དྲེགས་པའི་བྲག་རི་རྣམས།།
གང་མཚན་གནམ་ལྕགས་གཅིག་གིས་འཇོམས་པར་བྱེད།།
སྲིད་པའི་ཕུན་ཚོགས་སྤྲུལ་གྱི་ཚང་ལས་ཀྱང་།།
འཇིགས་པར་མཐོང་ནས་དབེན་པའི་གནས་རྣམས་སུ།།
ཡང་དག་ལམ་མཆོག་སྒྲུབ་ལ་གཞོལ་བའི་ཚུལ།།
སླར་ཡང་དྲན་ནོ་འཇིག་རྟེན་སྒྲོན་མ་ཀྱེ།།
སྔོན་ཚེ་རྒྱལ་དང་རྒྱལ་སྲས་བྱེ་བ་བརྒྱས།།
ཐུགས་སྐྱེད་ཟླ་བ་གསར་བའི་འོད་རླབས་ཀྱིས།།
སྐྱེ་རྒུའི་ཡིད་ཀྱི་ཀུན་ད་སྐྱེད་པའི་གཏམ།།
བྱུང་རབས་རྒན་པོའི་ངག་ལས་རྡོལ་བར་བྱེད།།
དེང་འདིར་རྡོ་རྗེ་གདན་གྱི་ཞིང་དག་ཀྱང་།།
དམ་ཆོས་རྣལ་མས་དབེན་པའི་ཡུལ་གྱུར་ཏེ།།
མུ་སྟེགས་པ་དང་ཀླ་ཀློས་ཁེངས་པའི་ཚུལ།།
མཐོང་ན་སྐྱོ་བའི་མཆི་མ་དབང་མེད་འཕྱུར།།
འོན་ཀྱང་བསྟན་པ་འཕེལ་འགྲིབ་ཡོང་ངོ་ཞེས།།
རྒྱལ་བ་ཁྱོད་ཀྱི་གསུང་རྣམས་དྲན་པ་ན།།
སླར་ཡང་ཆོས་ཀྱི་ཉི་མ་འཆར་སྙམ་སྟེ།།
སྐྱོ་བའི་མུན་པ་ཐོལ་གྱིས་ཡལ་བར་བྱེད།།
སྔོན་ཚེ་སྙིགས་ལྔའི་དུས་འགྱུར་དྲགས་པོའི་ཁྲོད།།
འཚེ་ལ་རབ་དགའ་ཀླ་ཀློའི་དམག་དཔུང་གིས།།
བྱམས་བརྩེའི་རྒྱལ་ས་བཅོམ་པའི་གཏམ་ངན་གྱིས།།
དཔྱོད་ལྡན་ཚོགས་ཀྱི་སྙིང་ཁམས་དངངས་བར་བྱེད།།
འོན་ཀྱང་རྒྱལ་བ་ཁྱོད་ཀྱི་འཕྲིན་ལས་ནི།།
རྒྱ་མཚོའི་གཏིང་དང་ནམ་མཁའི་མཐའ་བཞིན་དུ།།
ཀུན་ལ་ཁྱབ་པས་ཀླ་ཀློ་བ་རྣམས་ཀྱང་།།
དེང་འདིར་དད་པའི་ཐལ་མོ་སྦྱོར་བ་མཐོང་།།
ཚུལ་འདི་བསམ་ན་སྲིད་འདིའི་དོན་རྣམས་ཀྱང་།།
རང་བློ་འཁྲུལ་བས་རང་དགར་བཏགས་པའི་དོན།།
འཕགས་བོད་མཁས་པའི་གསུང་མན་ངག་བཞིན།།
ཅུང་ཟད་ཐོས་སོ་སྙམ་པའི་དགའ་བའང་སྐྱེ།།
དེ་ལྟར་ཀུན་རྟོག་འཁྲུལ་བའི་ཞགས་ཐག་གིས།།
རང་བློ་འཆུན་བཞིན་གསོལ་འདེབས་མཆོད་པའི་སྤྲིན།།
ལན་མང་ཕྱོགས་སུ་གཏོར་བའི་ལེགས་བྱས་ཀྱིས།།
ཡིད་ཀྱི་ཟླ་བ་དགའ་སྤྲོའི་དབྱིངས་སུ་འཕུར།།
ཁྱད་པར་སྟོན་མཆོག་དགུང་གྲངས་སུམ་ཅུ་པའི།།
སྣང་བརྙན་བིཤྭོཀརྨས་ལེགས་བཞེངས་པའི།།
བྱིན་ཅན་སྐུ་མཆོག་ཐོག་མར་མཇལ་བ་ན།།
མོས་གུས་མཆི་མས་ཡིད་ཁམས་བརླན་པར་བྱས།།
དེ་ནས་བསིལ་འཇམ་གྲིབ་མའི་རེག་བྱ་ཡིས།།
ཡིད་ཀྱི་ངལ་དུབ་སེལ་བར་བྱེད་པ་ཡི།།
རིན་ཆེན་ཤིང་དབང་དྲུང་དུ་སླེབས་པ་ན།།
བསམ་གཏན་བདེ་བས་ཡིད་ཁམས་བཟི་བར་བྱེད།།
ཞབས་ཟླུམ་རྩེ་མོ་ཅུང་ཟད་རྣོ་བ་ཡི།།
བྱང་ཆུབ་ཤིང་གི་ལོ་མ་གསར་བའི་ཚོགས།།
རླུང་བུས་སྐྱོད་དེ་ས་རུ་ལྷུང་བ་ན།།
སྐྱེ་རྒུའི་ཚོགས་ཀྱིས་དད་པའི་སོར་མོས་འཐུ།།
དེ་འོག་ཉིས་སྟོང་ལོ་ཡི་གོང་རོལ་ན། །
སྲས་གཙང་སྲས་ཀྱིས་ཞབས་ཟུང་འདིར་བཅགས་ཏེ། །
ཤེས་རབ་སྙིང་རྗེ་ཟུང་དུ་འབྲེལ་བའི་སྤྱན། །
འགྲོ་བ་ཡོངས་ལ་གཟིགས་པ་སླར་ཡང་དྲན། །
ལ་ལ་བསམ་གཏན་མལ་ན་ལྷོད་ཀྱིས་གཟིམས། །
འགའ་རེ་བཟླས་བརྗོད་གྲོང་ན་བྲེལ་བས་འདུར། །
ཀུན་ཀྱང་རྣམ་དཀར་ལས་ལ་བརྩོན་པ་ཡིས། །
བདག་གི་ཡིད་ནི་དད་མོས་གུས་ཀློང་དུ་བཙུད། །
ཁྱད་པར་བྱིན་རླབས་གཟི་འོད་འབར་བ་ཡི། །
རྒྱལ་དང་རྒྱལ་སྲས་བྱེ་བའི་རིང་བསྲེལ་ཚོགས།།
གཟུངས་གཞུགས་མཛད་པའི་མཆོད་རྟེན་ཆེ་ཆུང་རྣམས།།
དད་པའི་མིག་གིས་རྒུམ་ལ་ངལ་མ་གྱུར། །
སྔོན་ཚེ་ཐུབ་པ་ཆེན་པོ་བྱོན་པའི་རྗེས།།
བྲམ་ཟེ་སྤུན་གསུམ་ཨ་ཤོ་ཀ་ལ་སོགས།།
བསྟན་སྦྱིན་རྣམས་ཀྱིས་ལན་མང་བཞེངས་པའི་ཚུལ།།
ཡིད་ལ་དྲན་ཚེ་དད་པ་ལྷག་ཏུ་འཕེལ།།
དུས་ཀྱིས་འགྱུར་བས་ལན་མང་རྒུད་གྱུར་ཅིང་། །
དད་པས་སྟོབས་ཀྱང་ཡང་ཡང་བསྐྲུན་པའི་གཏམ། །
སྔོན་གྱི་བྱུང་རབས་མེ་ལོང་གསར་པའི་ངོར། །
འཆར་བ་འདིས་ཀྱང་སྟོན་མཆོག་དྲན་པར་བྱེད། །
དེ་ནས་བྱང་གི་སྐོར་ལམ་ཡངས་པོ་ན། །
མཛད་པའི་གྲངས་ཀྱི་འདབ་སྟོང་ཕྲེང་ཅན་དང་། །
འོད་ཟེར་འཕྲོ་བའི་གྷན་དྷོ་ལ་ལ་སོགས། །
འདྲེན་བྱེད་དཔལ་དུ་གྱུར་པའི་ལོ་རྒྱུས་མང་། །
མདོར་ན་ལྷ་ཡི་མངོན་ཤེས་མ་ཐོབ་ཅིང་། །
དག་སྣང་གཙང་མའི་ཡིད་ཁམས་མི་ལྡན་པའི། །
རྒྱང་གི་གྲོགས་པོ་རྟོགས་གེ་བ་དག་ལ། །
ཨ་འདུས་པ་ཡིས་དབུས་ནས་འདི་བསྲིངས་སོ། །
ཅེས་པའང་སྙིགས་དུས་འདིར་བྱམས་བརྩེའི་བདག་ཉིད་སྟོན་མཆོག་ཐུབ་པའི་དབང་པོའི་རྒྱལ་ཚབ་ལྟ་བུར་བཞུགས་པའི་རྡོར་གདན་མཆོད་རྟེན་མཐོང་གྲོལ་ཆེན་མོར་མཇལ་སྐབས་ཨ་འདུས་སྐལ་བཟང་རྒྱ་མཚོས་ཐོལ་བྱུང་དུ་སྨོན་པའོ། །
དཔྱད་གཏམ་སྤེལ་མཁན་ལ་གསལ་བརྡ།