དེ་རིང་ནི་ངོར་དགོན་ཆུ་མིག་སྒྲོལ་མ་ལྷ་ཁང་གི་ཚེ་དབང་ཆེན་མོ་སྟེ། དེ་ཡང་བོད་ཀྱི་ལོ་རྒྱུས་དེབ་ཐེར་ཁག་ཏུ་འཁོད་པའི་ཆུ་མིག་ཆོས་འཁོར་ཆེན་མོའི་དུས་དྲན་གྱི་ཉིན་མོ་ཡིན།
དུས་བཟང་འདིར་གནས་དེ་གར་དད་ལྡན་མང་ཚོགས་ཁྲི་ཕྲག་ལྷག་ཙམ་དང་དགེ་འདུན་བརྒྱ་ཕྲག་གཅིག་ལྷག་ཙམ་བཅས་འདུས་ནས་སྙིགས་དུས་འགྲོ་བའི་མགོན་པོ་འཇམ་དབྱངས་མི་ཡི་རོལ་གར་དཔལ་ངོར་དགོན་ཨེ་ཝཾ་ཆོས་ལྡན་གྱི་
༧སྐྱབས་རྗེ་མཁན་ཆེན་རྡོ་རྗེ་འཆང་༧འཇམ་དབྱངས་ཐུབ་བསྟན་སྙིང་པོ་མཆོག་ནས་མགོན་པོ་ཚེ་དཔག་མེད་ཀྱི་དབང་དང་འབྲེལ་ནས་སྡིག་སྤོང་དགེ་སྒྲུབ་ཀྱི་བླང་དོར་གྱི་གནད་ཟབ་མོའི་དམ་པའི་ཆོས་ཀྱི་འཁོར་ལོ་བསྐོར་ཏེ་དད་ལྡན་སེར་སྐྱ་ཡོངས་ལ་ཐར་པ་དང་ཐམས་ཅད་མཁྱེན་པའི་ས་བོན་འཇོག་གནང་མཛད་ཀྱིན་ཡོད། ཆུ་མིག་སྒྲོལ་མ་ལྷ་ཁང་ཞེས་པའི་གནས་འདི་ནི་ཐོག་མར་གླགས་བྱང་ཆུབ་རྒྱལ་མཚན་གྱིས་ཕྱག་བཏབ་ཅིང་བོད་ཁྲི་སྐོར་བཅུ་གསུམ་གྱི་ནང་གི་ཆུ་མིག་ཁྲི་སྐོར་ཞེས་པ་དེ་ཡིན།
གནང་འདི་ངོར་དགོན་ཨེ་ཝཾ་ཆོས་ལྡན་གྱི་མཁན་རབས་རིམ་བྱོན་རྣམས་ཀྱི་བདག་སྐྱོང་མཛད་བཞིན་ཡོད་པ་དང་པ་དང་། ལོ་རྒྱུས་དེབ་ཐེར་ཁག་ཏུ་འཁོད་པ་ལྟར་དཔལ་ས་སྐྱའི་འགྲོ་མགོན་ཆོས་རྒྱལ་འཕགས་པ་རིན་པོ་ཆེས་ཆོས་འཁོར་རིམ་པ་གསུམ་བསྐོར་ནས་བོད་གངས་ཅན་ལྗོངས་སུ་སྨོན་ལམ་ཆེན་མོ་ཚོགས་པའི་སྲོལ་གཏོད་མཛད་པ་སྟེ།
དེ་ཡང་འགྲོ་མགོན་ཆོས་རྒྱལ་འཕགས་པ་རིན་པོ་ཆེ་དགུང་ལོ་༢༩ སྤྱི་ལོ་ ༡༢༦༣ལོར་ཆུ་མིག་ཆོས་འཁོར་དང་པོ་བསྐོར། དགུང་ལོ་༣༣སྤྱི་ལོ་ ༡༢༦༧ ལོར་ཆུ་མིག་ཆོས་འཁོར་གཉིས་པ་བསྐོར།
དགུང་ལོ་༤༣ སྤྱི་ལོ་༡༢༧༧ ལོར་གནས་འདིར་དགེ་འདུན་ཁྲི་ཕྲག་བདུན་ལྷག་དང་དད་ལྡན་མི་དམངས་ཁྲི་ཕྲག་གསུམ་བཅས་སྐྱ་སེར་འབུམ་ཕྲག་ལྷག་ལ་དམ་པའི་ཆོས་ཀྱི་འཁོར་ལོ་གསུམ་པ་རྒྱ་ཆེར་བསྐོར་གནང་མཛད། དེ་བཟུང་ཆུ་མིག་ཆོས་འཁོར་ཞེས་གྲགས་ཤིང་། དེ་རྗེས་བོད་བརྒྱུད་ནང་བསྟན་གྱི་གྲུབ་མཐའ་རིས་མེད་རྣམས་ཀྱིས་སྨོན་ལམ་ཆེན་མོ་ཚོགས་པའི་སྲོལ་དར་རྒྱས་སུ་ཕྱིན་པ་ལོ་རྒྱུས་དེབ་ཐེར་ཁག་ཏུ་གསལ་བར་འཁོད་ཡོད།
དཔྱད་གཏམ་སྤེལ་མཁན་ལ་གསལ་བརྡ།