ཕྱི་ལོ་ ༢༠༡༩ ཟླ་ ༤ ཚེས་ ༥ རེས་གཟའ་པ་སངས་ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Andaz Hotel གསོལ་མགྲོན་ཁང་དུ་སྤྱི་ཚོགས་དང་། སེམས་མྱོང་། བཟང་སྤྱོད་བཅས་སྤེལ་བའི་ཤེས་ཡོན་སློབ་གསོའམ་སཱི་ཤེས་ཡོན་སློབ་གསོའི་བསླབ་གཞི་རྒྱལ་སྤྱིའི་ཐོག་དབུ་འབྱེད་མཛད་ཐོག་ཏུ་༧ དཔལ་ས་སྐྱའི་སྐྱབས་མགོན་གོང་མ་ཕུན་ཚོགས་ཕོ་བྲང་གི་གདུང་སྲས་སྐྱབས་རྗེ་ཨ་བི་ཀྲྀ་ཏ་བཛྲ་རིན་པོ་ཆེ་མཆོག་ཆིབས་བསྒྱུར་བསྐྱངས་གནང་བ་མ་ཟད། ལྡི་ལི་མངའ་སྡེའི་སྤྱི་ཁྱབ་བློན་ཆེན་གཞོན་པ་དང་ཤེས་རིག་བློན་ཆེན་གཅིག་ལྕོགས་སྐུ་ཞབས་ Manish Sisodia མཆོག་དང་། བྱིས་པའི་ཐོབ་ཐང་འཐབ་རྩོད་པ་ནོ་ལྦེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ཀེ་ལཤི་སཏྱཱརཐི་མཆོག ཨེ་མོ་རི་གཙུག་ལག་སློབ་གྲྭའི་སློབ་དཔོན་ཆེན་མོ་བློ་བཟང་བསྟན་འཛིན་ནེ་གི་ལགས། ཤེས་ཡོན་སློབ་སྟོན་པ། དགོན་སྡེ་གྲྭ་ཚང་ཁག་གི་མཁན་པོ་དང་ལས་ཚབ། རྒྱ་གར་གྱིས་གཙོས་འཛམ་གླིང་རྒྱལ་ཁབ་ཁག་ ༣༧ ནས་སློབ་གྲྭ་ཁག་གི་སྐུ་ཚབ་དང་། སྤྱི་ཚོགས་ཞབས་ཞུ་བ། ཤེས་ཡོན་དང་འབྲེལ་བའི་ཚོགས་པ་ཁག་གི་སྐུ་ཚབ་སོགས་ཁྱོན་མི་གྲངས་ ༡༣༠༠ ལྷག་ལྷན་འཛོམས་ཀྱིས་ཐོག་མར་གོ་སྒྲིག་ཚོགས་ཆུང་གི་འབྲེལ་ཡོད་རྣམས་ནས་ཕེབས་བསུའི་གསུང་བཤད་གནང་གྲུབ་མཚམས་བློ་བཟང་བསྟན་འཛིན་ནེ་གི་ལགས་ཀྱིས་ངོ་སྤྲོད་གསུང་བཤད་གནང་། དེ་རྗེས་ལྡི་ལི་མངའ་སྡེའི་སྤྱི་ཁྱབ་བློན་ཆེན་གཞོན་པ་མཆོག་དང་། ནོ་ལྦེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ཀེ་ལཤི་སཏྱཱརཐི་མཆོག་བཅས་ཀྱིས་གསུང་བཤད་གནང་འདུག དེང་སྐབས་ཚན་རིག་པ་ཚོས་ཀྱང་འགྲོ་བ་མིའི་གཞི་རྩའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་ཡིན་སྐོར་བཤད་ཀྱི་ཡོད། ང་ཚོ་སྤྱི་ཚོགས་ལ་བརྟེན་པའི་སེམས་ཅན་རེད། རང་ཉིད་འཚོ་བར་གཞན་གྱི་བྱམས་བརྩེ་ལ་མཐའ་གཅིག་ཏུ་བརྟེན་དགོས་པ་རེད། ཐོག་མར་ཆུང་བྱིས་པའི་དུས་སུ་མའི་བྱམས་བརྩེར་བརྟེན་དགོས་པ་དང་། ན་ཚོད་ཡར་རྒས་སྐབས་གྲོགས་པོ་གྲོགས་མོའི་བྱམས་བརྩེའི་འབྲེལ་བར་བརྟེན་དགོས། གོང་དུ་གསུང་བཤད་གནང་བ་ལྟར་ཕྲུ་གུ་ཚོར་ཤེས་ཡོན་སློབ་སྦྱོང་སྤྲོད་འགོ་འཛུགས་སྐབས་བཟང་སྤྱོད་དེ་དག་ཐོག་དོ་སྣང་གང་ཡང་བྱེད་ཀྱི་མེད། དེང་དུས་ཤེས་ཡོན་སློབ་སྦྱོང་དེ་གཙོ་བོ་ཕྱི་དངོས་པོའི་དཔལ་འབྱོར་མཐུན་རྐྱེན་གོང་འཕེལ་གཏོང་ཐབས་ལ་དམིགས་བཞིན་ཡོད། དེར་བརྟེན་བྱིས་པའི་བློ་ལྷན་སྐྱེས་སུ་ཡོད་པའི་བྱམས་བརྩེའི་བསམ་བློ་དེ་རིམ་བཞིན་བག་ལ་ཉལ་བའི་ཚུལ་དུ་གནས་བཞིན་ཡོད། ལྷན་སྐྱེས་སུ་ཡོད་པའི་བྱམས་བརྩེའི་བློ་དེ་བག་ལ་ཉལ་བའི་ཚུལ་དུ་གནས་ནས་ཕྱི་དངོས་པོའི་མཐོན་སྐྱེས་ལ་དང་དོད་ཤུགས་ཆེ་བྱས་པར་བརྟེན་པ་སོགས་ཀྱི་བགྲོ་གླེང་གནང་འདུག
དཔྱད་གཏམ་སྤེལ་མཁན་ལ་གསལ་བརྡ།