རྩོམ་པ་པོ། སྒང་མེ་སྟག
གཙུག་ལག་རིང་ལུགས་དཔལ་ལ་དབང་འབྱོར་བས།།
ལུགས་གཉིས་སྨྲ་བ་སྟོང་གི་མཆོག་གྱུར་པ།།
འགྲོ་བའི་སྨག་རུམ་སྟུག་པོ་སེལ་མཛད་པའི།།
ཀུན་དགའ་རྒྱལ་མཚན་ཞབས་ལ་ལན་བརྒྱར་འདུད།།
ལུང་དང་རིགས་པའི་སྡེར་ཕྲེང་རྣོན་པོ་ཡིས།།
ཕལ་རྒོལ་ལག་ལྡན་སྟོང་གི་གློ་སྙིང་འགེམས།།
དམ་ཆོས་སྒྲོན་མེས་ཡུལ་གྲུ་ཁྱབ་བྱེད་པའི།།
སྨྲ་བའི་སེང་གེ་ཁྱེད་ལ་གུས་པས་འདུད།།
ཁྱེད་ཐུགས་ཀུན་གསལ་ཡངས་པའི་མཁའ་ལམ་དུ།།
དག་གཙང་དྲི་མེད་ལུང་རིགས་ཡོངས་འཁྲིགས་ཤིང་།།
འཆད་རྩོད་དག་ལ་འགྲན་མེད་གདོང་ལྔ་བཞིན།།
མ་ལུས་མཁྱེན་པ་ཁྱེད་ལ་མགོས་ཕྱག་འཚལ།།
བཟོ་དང་གསོ་བ་སྒྲ་དང་ཚད་མ་སོགས།།
མ་ལུས་གཏན་ལ་ཕབ་པའི་མཁས་ཆེན་པོ།།
ཁྱེད་འདྲར་འཇིག་རྟེན་འདི་ན་ཆེས་ཆེར་དཀོན།།
དེ་ལྟར་བསམ་བཞིན་གདུང་ཤུགས་ལྷག་ཏུ་འཕེལ།།
བྱམས་དང་སྙིང་རྗེའི་རྩ་བ་རབ་བརྟན་ཞིང་།།
གཞན་གྱི་དོན་དུ་རང་གི་སྲོག་སྦྱིན་མཛད།།
བྱང་ཆུབ་སེམས་པའི་ས་ལམ་རབ་རྫོགས་པའི།།
ཕ་རོལ་ཕྱིན་དྲུག་མངའ་ལ་ཕྱག་འཚལ་ལོ།།
མགོན་ཁྱེད་དྲན་པའི་ལུས་ཀྱི་སྤུ་ཟིང་ཞིང་།།
གདུང་བའི་སེམས་ཀྱི་མཆི་མ་རབ་འཁྲུགས་ནས།།
དད་ལྡན་བདག་གིས་ལྷ་ལྡན་ཞིང་ཁམས་སུ།།
ཧོར་གྱི་ཟླ་བའི་ནང་དུ་བྲིས་པ་དགེ །
དཔྱད་གཏམ་སྤེལ་མཁན་ལ་གསལ་བརྡ།