༼བརྗོད་གཞི་གཉིས་པ་སྤྲོས་བྲལ་གྱི་དོན།༽
ད་ནི་རྒྱལ་བ་ཐམས་ཅད་ཀྱི་དགོངས་པ་མཐའ་ཐུག གསུང་རབ་ཐམས་ཅད་ལྟ་བའི་ཡང་སྙིང་སྤྲོས་བྲལ་གྱི་སྐོར་ཅུང་ཟད་ཞུ་ན། དེའང་གསེར་མདོག་པཎ་ཆེན་ཤཱཀྱ་མཆོག་ལྡན་དེ་ཉིད་ཀྱིས་དབུ་མ་རྣམ་པ་ངེས་པའི་ཆོས་ཀྱི་བང་མཛོད་ལུང་དང་རིགས་པའི་རྒྱ་མཚོ་ཞེས་བྱ་བའི་ལེའུ་དང་པོ་ལས། ངེས་དོན་མཐའ་ཐུག་ངོས་བཟུང་བ་ཞེས་པའི་ས་བཅད་མཛད་དེ་སྤྲོས་བྲལ་གྱི་དོན་འདི་ལྟར་འཆད་དེ། ཇི་སྐད་དུ། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཉིད་མཚན་ཉིད་དོ། །ཞེས་དང་། བརྗོད་པར་བྱ་བ་བཟློག་པ་སེ། །སེམས་ཀྱི་སྤྱོད་ཡུལ་བཟློག་པས་སོ། །ཞེས་དང་། བསྟན་པ་འཆི་མེད་ཡོད་མེད་ལས། །འདས་པ་ཟབ་མོ་ཞེས་བཤད་པ། །ཆོས་ཀྱི་ཁུད་པ་ཡིན་ཞེས་བྱ། །ཞེས་དང་། རྒྱལ་བ་རྣམས་ཀྱི་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །ཞེས་སོགས་རྒྱ་ཆེར་གསུངས་པའི་དོན་རྣམས་ལ་རྣམ་པར་བརྟགས་པ་ན། རྗོད་བྱེད་ཀྱི་སྒྲ་དང་རྣམ་པར་རྟོག་པའི་ཡུལ་ལས་འདས་ཤིང་ཡོད་མེད་དང་། ཡིན་མིན་ལ་སོགས་པའི་མཐའ་གང་དུ་ཡང་བསམ་པ་དང་བརྗོད་པར་མི་ནུས་ལ། རྒྱལ་བས་ཀྱང་ཐ་སྙད་ཀྱི་སྒོ་ནས་སྒྲོ་བཏགས་ནས་སྟོན་པ་མ་གཏོགས་རང་གི་ངོ་བོ་ཇི་ལྟ་བ་བཞིན་དུ་བསྟན་པར་མི་ནུས་པའི་དབྱིངས་ནམ་མཁའ་ལྟ་བུ་ཞིག་ལ་ངེས་པའི་དོན་དང་དོན་དམ་པའི་བདེན་པ་དང་། དེ་ཁོ་ན་ཉིད་ཅེས་བྱ་བའི་མིང་གིས་བཏགས་ནས་བསྟན་པ་ཡིན་ནོ། ཞེས་དང་། འདི་ཡང་ཡུལ་གྱི་དབང་དུ་བྱས་པ་ཡིན་ལ། ཡུལ་ཅན་གྱི་དབང་དུ་བྱས་ན་དབྱིངས་དེ་དང་ངོ་བོ་ཐ་དད་པ་ལྟ་བཞོག ལྡོག་པའི་ཁྱད་པར་ཙམ་ཡང་ཀུན་མཁྱེན་གྱིས་མ་གཟིགས་པའི་ཡེ་ཤེས་དེ་ཉིད་ཀྱང་ངེས་པའི་དོན་དུ་འཆད་དགོས་པ་ཡིན་ཏེ། ཟླ་བའི་ཞབས་ཀྱིས་དོན་དམ་བདེན་པ་འཇོག་པའི་དུས་ཀྱི་དོན་དམ་པ་གང་ཡིན་པ་དེ་ཉིད་དོན་དམ་པའི་བདེན་པར་བཤད་པ་བཞིན་ནོ། །འདིའི་ལུང་དང་རིགས་པ་ཡང་འོག་ནས་འཆད་པར་འགྱུར་རོ། །གནས་འདི་ལ་གངས་ཅན་དུ་ཕྱིས་བྱོན་པའི་ཆེན་པོ་དག་ན་རེ། དོན་དམ་བདེན་པའི་མཚན་གཞི་ངོས་གཟུང་བར་མི་ནུས་པ་དང་། དེ་སྨྲ་བསམ་བརྗོད་མེད་དུ་ཁས་ལེན་པ་དང་། ཆོས་ཀྱི་དབྱིངས་ཡོད་མེད་ལ་སོགས་པའི་མཐའ་གང་དུ་ཡང་ཁས་མི་ལེན་ཞིང་། བསམ་བྱུང་གི་རིགས་པས་ཀྱང་དེ་དང་དེ་དག་ཏུ་ཡིད་ལ་མི་བྱེད་པར་འདོད་པ་དེ་དག་ནི། སྔོན་གངས་ཅན་དུ་ལོག་པའི་ཆོས་དུ་མ་བྱུང་བ་དག་ལས། ཧྭ་ཤང་གིས་བཤད་པའི་ཆོས་དཀར་པོ་ཆིག་ཐུབ་དང་། གཞན་ཡང་ཞི་བྱེད་དང་། རྫོགས་ཆེན་དང་། ཕྱག་རྒྱ་པར་གྲགས་པ་དག་གི་ལུགས་བླ་ན་མེད་པ་ཡིན་པས་དབུ་མའི་ལྟ་བ་རྟོགས་པའི་གོལ་ས་ཆེན་པོ་ཡིན་ནོ། །དེའི་ཕྱིར་གནས་ལུགས་ཀྱི་དོན་མཐར་ཐུག་སེམས་པ་ལ་ཞུགས་པ་དེའི་ཚེ་ན། མྱུ་གུ་བདེན་སྟོང་ལྟ་བུ་དོན་དམ་པའི་མཚན་གཞི་དང་། མྱུ་གུ་ལྟ་བུ་ཡང་བདེན་པས་སྟོང་པར་ཁས་ལེན་གྱི། དེ་དེས་སྟོང་པ་ཡིན་ནོ་ཞེས་བརྗོད་དུ་མི་རུང་བ་དང་། བདེན་སྟོང་དེ་ཡང་ཡོད་པར་ཁས་ལེན་གྱི། དེ་ཡོད་པ་མ་ཡིན་ནོ། །ཞེས་བརྗོད་དུ་རུང་བ་མ་ཡིན་ཏེ། རྩོད་བཟློག་ལས། རང་བཞིན་མེད་པ་ཉིད་ལོག་ན། །རང་བཞིན་ཉིད་དུ་གྲུབ་པར་འགྱུར། །ཞེས་བཤད་པས་སོ། །ཞེས་གསུང་ངོ་། །དེ་ལྟར་འཆད་པ་དེ་དག་ནི། ཀླུ་སྒྲུབ་ཡབ་སྲས་ཀྱི་བཞེད་པ་ལ། རྒྱལ་བས་ཆོས་སྟོན་ཚུལ་གྱི་རིམ་པ་གསུམ་འབྱུང་བ་དེའི་ནང་ནས། བར་དུ་བདག་བཟློག་པའི་ལུང་དང་རིགས་པ་གསུངས་པ་རྣམས་ཀྱི་དོན་དང་ཅུང་ཟད་ཉེ་བ་ཡིན་མོད། ཐ་མར་ལྟ་བ་ཀུན་བཟློག་པ་ཞེས་བྱ་བའི་ལུང་དང་རིགས་པ་རྣམས་ལས་ཆེས་ཤིན་ཏུ་རྒྱབ་ཀྱིས་ཕྱོགས་པར་གྱུར་པ་ཡིན་པས། ཇི་སྐད་དུ་ཡུམ་ལས། གཟུགས་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །མི་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །ཞེས་དང་། སྡུད་པ་ལས། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང་། ཟླ་བའི་ཞབས་ཀྱིས་ཚིག་གསལ་དུ་མདོ་དྲངས་པ་ལས། འོད་སྲུངས་གང་དག་བདག་ཏུ་ལྟ་བ་རི་རབ་ཙམ་ལ་གནས་པ་ནི་བླའི། སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །ཞེས་དང་། འཕགས་པ་ཉིད་ཀྱིས། གང་དག་སྟོང་པ་ཉིད་ལྟ་བ། །དེ་དག་སྒྲུབ་ཏུ་མེད་པར་གསུངས། །ཞེས་དང་། བླུན་པོ་མཁས་པའི་ང་རྒྱལ་ཅན། །སྟོང་ལ་མངོན་པར་ཞེན་མི་བྱ། །ཞེས་དང་། བརྒྱ་པ་ལས། ཡོད་དང་མེད་དང་ཡོད་མེད་དང་། །གཉིས་མིན་ཞེས་ཀྱང་བྱ་བ་སྟེ། །ནད་ཀྱི་དབང་གིས་ཐམས་ཅད་ཀྱང་། །སྨན་ཞེས་བྱ་བར་འགྱུར་མིན་ནམ། །ཞེས་སོགས་རྒྱ་ཆེར་གསུངས་པ་རྣམས་ལས་ཕྱིན་ཅི་ལོག་ཏུ་གྱུར་པའི་ཕྱིར་རོ། །དེ་ལ་འདི་སྐད་ཅེས། གང་ལ་བདག་མེད་དོ་སྙམ་པའི་འཛིན་སྟངས་ཀྱི་ཤུགས་དྲག་པོ་མེད་པ་དེས་ནི། བདག་ཏུ་འཛིན་པའི་བློ་ལ་གནོད་པ་བྱེད་ནུས་པ་མ་ཡིན་ཏེ། དེ་དང་འཛིན་སྟངས་འགལ་བ་མེད་པའི་ཕྱིར་རོ། །གཞན་དུ་ན། གཉིད་འཐུག་པོ་དང་འདུ་ཤེས་མེད་པའི་སྙོམ་འཇུག་གིས་ཀྱང་དེ་ལ་གནོད་པ་ཧ་ཅང་ཐལ་ལོ། །དེ་བས་ན་མཉམ་གཞག་ཏུ་གང་ཟག་གི་བདག་དང་ཆོས་ཀྱི་བདག་གིས་སྟོང་ངོ་། །ཞེས་པའི་རྣམ་པ་ཅན་གྱི་འཛིན་སྟངས་ཀྱི་ཤུགས་དང་མ་བྲལ་བ་བྱ་དགོས་ཏེ། རྗེ་བཙུན་གྱིས། ཇི་སྐད་དུ། ངེས་འབྱེད་ཡན་ལག་དང་མཐོང་བའི། །ལམ་དང་བསྒོམ་པའི་ལམ་ཉིད་ལ། །ཡང་དང་ཡང་དུ་སེམས་པ་དང་། །འཇལ་དང་ངེས་རྟོག་སྒོམ་པའི་ལམ། །ཞེས་གསུངས་པ་ལས་གསལ་བ་ཡིན་ནོ། །ཞེས་འཆད་དོ། །དེ་ཡང་རིགས་པ་མ་ཡིན་ཏེ། ཇི་ལྟར། མགོན་པོ་ཀླུ་སྒྲུབ་རྗེས་འབྲང་དང་བཅས་པའི་གཞུང་ལས། བདེན་འཛིན་གྱི་སྤྲོས་པ་གཅོད་པའི་རིགས་པ་དང་བདེན་མེད་ཀྱི་སྤྲོས་པ་གཅོད་པའི་རིགས་པ་གཉིས་གསུང་པ་དང་། རྗེ་བཙུན་བྱམས་པའི་གཞུང་ལས། རྫས་འཛིན་རྟོག་པའི་གཉེན་པོ་སྒོམ་པའི་རིམ་པ་དང་། བཏགས་འཛིན་རྟོག་པའི་གཉེན་པོ་སྒོམ་པའི་རིམ་པ་གཉིས་གསུངས་པ་ལས། ཁྱེད་ཀྱི་འདོད་པ་དེ་རིམ་པ་དང་པོ་དེ་དང་དེའི་ནང་དུ་ཆུད་པ་ཙམ་ཡིན་ཀྱང་། རིམ་པ་གཉིས་པ་དེའི་ནང་མ་ཚུད་པར་གསུངས་ཤིང་། དེ་ཡང་ཇི་ལྟར་ཞེ་ན། ཇི་སྐད་དུ། སྤྱོད་འཇུག་ལས། སྟོང་ཉིད་བག་ཆགས་གོམས་པ་ཡིས། །དངོས་པོའ་ིབག་ཆགས་བཟློག་པར་འགྱུར། །ཞེས་པའི་གཞུང་གིས་བསྟན་པའི་དོན་ལ། ཁྱེད་ཀྱི་འདོད་པ་དེ་ཅུང་ཟད་ཉེ་བར་མཁོ་ཡང་། ཅི་ཡང་མེད་ཅེས་གོམས་པ་ལས། །དེ་ཡང་ཕྱིས་ནས་སྟོང་བར་འགྱུར། །ཞེས་པའི་གཞུང་གི་དོན་ལ། ཁྱེད་འཆད་པའི་རིགས་པ་དེ་དག་གིས་མ་བསྙབས་པ་གསུངས་ཏེ། དབུ་མའི་རྩ་བ་ལས། སྟོང་ངོ་ཞེས་ཀྱང་མི་བྱ་ཞིང་། །མི་སྟོང་ཞེས་ཀྱང་མི་བྱ་ལ། །གཉིས་དང་གཉིས་མིན་མི་བྱ་སྟེ། །ཞེས་པ་ངེས་དོན་མཐར་ཐུག་གི་དབང་དུ་བྱས་པ་དང་ཐ་སྙད་ཀྱིས་སྟོན་པའི་ཚེ་ཇི་ལྟར་བྱ་སྙམ་པ་ལ། དེ་ཉིད་ལས། གདགས་པའི་དོན་དུ་བརྗོད་པར་བྱ། །ཞེས་གསུངས་པ་དེའི་དོན་ཟླ་བའི་ཞབས་ཀྱི་འགྲེལ་པ་ན། སྟོང་ངོ་ཞེས་ཀྱང་བརྗོད་བྱ་ལ། །མི་སྟོང་ཞེས་ཀྱང་བརྗོད་བྱ་སྟེ། །གཉིས་དང་གཉིས་མིན་བརྗོད་པར་བྱ། །ཞེས་བྱ་བའི་དོན་དུ་བཤད་པ་རྣམས་ཀྱིས། ཁྱེད་ཅག་གི་འདོད་པ་དེ་སུན་དབྱུང་བའི་ཕྱིར། བྱམས་པའི་གཞུང་གི་དོན་ཡང་ཁྱེད་ཀྱིས་ལེགས་པར་མ་བཤད་དེ། ཁྱེད་ཀྱིས་དབུ་མའི་ལྟ་བར་བཤད་པ་དེ་ནི་རྗེ་བཙུན་གྱི་བཞེད་པའི་བཏགས་འཛིན་རྟོག་པ་དེ་ཉིད་ལས་མ་འདས་པའི་ཕྱིར་དང་དེའི་གོ་དོན་ཡང་བཏགས་པ་ཙམ་དུ་བདེན་པར་འཛིན་པ་ལ་འཆད་ན། རྫས་འཛིན་རྟོག་པ་དང་ཁྱད་པར་མི་ཕྱེད་པའི་ཕྱིར་དང་། ཇི་སྐད་དུ། མ་མཐོང་སྟོན་པར་མཛད་པ་དང་། །ཞེས་སོ་སོར་རྟོག་པའི་ཤེས་རབ་ཀྱིས་ཅིར་ཡང་མ་མཐོང་བ་ལ། དེ་ཁོ་ནའི་དོན་མཐོང་བར་མིང་བཏགས་པ་ཡིན་གྱི། སྟོང་ངོ་སྙམ་དུ་མཐོང་དགོས་པར་མ་བཤད་པའི་ཕྱིར་དང་། ངེས་འབྱེད་ཡན་ལག་ཅེས་སོགས་ཀྱི་དོན་ཡང་སྐབས་དེ་དང་དེར་སྤྲོས་པའི་མཐའ་གང་དུ་ཡང་མ་གཟིགས་པ་དེ་ཉིད་ལ་སེམས་པ་དང་འཇལ་བ་ལ་སོགས་པའི་དོན་ཡིན་གྱི། སྦྱོར་ལམ་དུ་གཟུགས་སོགས་བདེན་པས་སྟོང་པར་ཞེན་པའི་འཛིན་སྟངས་ཀྱི་རྒྱུན་ཡོད་པ་དེ་ཉིད་ལ། མཐོང་སྒོམ་ལམ་གིས་མཉམ་པར་འཇོག་དགོས་པར་སྟོན་པ་མ་ཡིན་ཏེ། ཇི་སྐད་དུ། རྣམ་པ་མངོན་ཞེན་ལ་སོགས་འགོག །ཅེས་སྐབས་དེར་ཡང་བདེན་སྟོང་དུ་ཞེན་པ་འགོག་དགོས་པར་གསུངས་པའི་ཕྱིར་རོ། །འོ་ན་བདེན་མེད་དུ་འཛིན་པའི་སྤྲོས་པ་གང་གིས་གཅོད་ཅེ་ན། ཇི་སྐད་དུ། རྩ་བ་ལས། གལ་ཏེ་སྟོང་མིན་ཅུང་ཟད་ཡོད། །སྟོང་པ་ཅུང་ཟད་ཡོད་པར་འགྱུར། །མི་སྟོང་ཅུང་ཟད་ཡོད་མིན་ན། །སྟོང་པ་ཡོད་པར་ག་ལ་འགྱུར། །ཞེས་དང་། ཡེ་ཤེས་སྙིང་པོས། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །ཞེས་དང་། སྐྱེ་བ་ལ་སོགས་བཀག་པ་ཡང་། །དམ་པའི་དོན་དང་མཐུན་ཕྱིར་འདོད། །དེ་བས་འདི་ནི་ཀུན་རྫོབ་སྟེ། །ཞེས་དང་། རྒྱན་ལས། ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །ཞེས་སོགས་གསུངས་པའི་རིགས་པ་ལས་སོ། །དེ་ལ་ཡང་འདི་སྐད་ཅེས། སྐྱེ་སོགས་བཀག་པས་ཁྱད་པར་དུ་བྱས་པའི་མ་ཡིན་པར་དགག་པ་དེ་ཉིད་ཀུན་རྫོབ་བདེན་པར་སྟོན་པ་ཡིན་གྱི། སྐྱེ་སོགས་བདེན་གྲུབ་བཀག་པའི་མེད་དགག་དེ་དེར་སྟོན་པ་མ་ཡིན་ནོ། །ཞེས་ཟེར་རོ། །དེ་ཡང་མ་ཡིན་ཏེ། གཞུང་གི་འཕྲོས་དང་མི་མཐུན་པའི་ཕྱིར། ཇི་ལྟར་ཞེ་ན། གཞུང་དེའི་གོང་དུ། གྲུབ་མཐས་སྒྲོ་མ་བཏགས་པའི་སྐྱེ་བ་ཙམ་ཡང་དག་ཀུན་རྫོབ་དང་། དེས་སྒྲོ་བཏགས་པའི་སྐྱེ་བ་ལ་སོགས་པ་ལོག་པའི་ཀུན་རྫོབ་ཏུ་བཤད་པ་ལ་འཕྲོས་ནས་དེ་བཀག་པའི་མེད་པར་དགག་པ་དེ་ཡང་ཡང་དག་པ་མ་ཡིན་པའི་ཀུན་རྫོབ་ཏུ་འགྱུར་རོ་སྙམ་པ་ལ། དགག་བྱ་བཀག་ཙམ་གྱི་ཆ་ནས་དོན་དམ་པ་དང་མཐུན་པ་དང་། རིགས་པས་དཔྱད་མི་བཟོད་པའི་ཆ་ནས་ཀུན་རྫོབ་ཡིན་ཞེས་བྱ་བའི་དོན་དུ་གསལ་བར་བཤད་པའི་ཕྱིར་དང་། སྐྱེ་བ་བདེན་གྲུབ་བཀག་པས་ཁྱད་པར་དུ་བྱས་པའི་མྱུ་གུ་ལྟ་བུ་དེ། མཐུན་པའི་དོན་དམ་ཡིན་ཞེས་ཟེར་བ་ཡེ་ཤེས་སྙིང་པོའ་ིརྨི་ལམ་དུ་ཡང་མི་རྨི་བའི་ཕྱིར་དང་། ཁྱེད་ལྟར་ན། ཇི་སྐད་དུ། ཡང་དག་ཏུ་ན་བཀག་མེད་གསལ། །ཞེས་པའི་སྐབས་ཀྱི་བཀག་པ་དེ་མྱུ་གུ་ལྟ་བུ་མ་ཡིན་དགག་ཞིག་ལ་འཆད་དགོས་ལ། མེད་པར་གསལ་ཞེས་པའི་དོན་ཡང་། བདེན་པར་མེད་ཅེས་པ་ལ་འཆད་དགོས་པས། དེ་ལྟ་ན། དགག་བྱ་ཡོད་པ་མ་ཡིན་པས། །ཞེས་སོགས་ཀྱི་གཞུང་གི་དོན་བདེན་གྲུབ་བཀག་པས་ཁྱད་པར་དུ་བྱས་པའི་མྱུ་གུ་བདེན་པར་མེད་དེ། དགག་བྱ་བདེན་གྲུབ་བདེན་པར་ཡོད་པ་མ་ཡིན་པའི་ཕྱིར། ཞེས་འཆད་དགོས་པས། བློ་དང་ལྡན་པ་སུ་ཞིག་ཡིད་ཆེས་པར་འགྱུར། གལ་ཏེ་འོ་ན། བདེན་མེད་དུ་འཛིན་པ་དང་། སྤྲོས་བྲལ་དུ་འཛིན་པའི་མཚན་མ་ཡང་གཅོད་པ་དེའི་ཚེ། དོན་དམ་བདེན་པའི་མཚན་གཞི་ངོས་གཟུང་བར་མི་ནུས་པ་དང་། གང་དོན་དམ་པའི་བདེན་པ་ཡིན་ན། བརྗོད་པ་ཐམས་ཅད་དང་བྲལ་དགོས་པ་དང་། ཡོད་མེད་ལ་སོགས་པའི་མཐའ་གང་རུང་མ་ཡིན་དགོས་པ་འདི་ལ། ཡིད་ཆེས་པའི་ལུང་མེད་ན་སུ་ཞིག་མགུ་བར་འགྱུར་ཏེ། དོན་དེ་ཤིན་ཏུ་ལྐོག་ཏུ་གྱུར་པའི་ཕྱིར་སྙམ་ན། བཤད་པ། ཇི་སྐད་དུ། དབུ་མའི་རྩ་བ་ལས། དམིགས་པ་ཐམས་ཅད་ཉེར་ཞི་ཞིང་། །སྤྲོས་པ་ཉེར་ཞི་ཞི་བ་སྟེ། །སངས་རྒྱས་རྣམས་ཀྱིས་གང་དུ་ཡང་། །སུ་ལའང་ཆོས་འགའ་མ་བསྟན་ནོ། །ཞེས་དང་། ཡེ་ཤེས་སྙིང་པོས། འཇམ་དཔལ་གྱིས་ནི་ཡང་དག་དྲིས། །རྒྱལ་བའི་སྲས་པོ་མི་གསུང་བཞུགས། །ཞེས་དང་། ཟླ་བའི་ཞབས་ཀྱི་ཚིག་གསལ་དུ། འཕགས་པ་རྣམས་ཀྱི་དོན་དམ་པ་ནི་ཅི་ཡང་མི་གསུངས་པ་ཡིན་ནོ། །ཞེས་གསུངས་པ་རྣམས་ཀྱི་དོན་ལ་རྣམ་པར་བརྟགས་པས་ཡིད་ཆེས་པར་འགྱུར་རོ། །ཅི་སྟེ་དེ་དག་སྟོང་པ་ཉིད་ལ་མཉམ་པར་བཞག་པའི་ཤེས་ངོ་ལ་དགོངས་པ་ཡིན་ནོ། །ཞེས་ཟེར་མོད། དེའི་ཚེ་ཁོ་བོ་ཅག་གི་འདོད་པ་གྲུབ་ལ། ཁྱེད་ཅག་གི་གང་མི་འདོད་པ་དེ་ཉིད་ལག་ཏུ་ཐོབ་པར་འགྱུར་ཏེ། ཅི་ཡང་ཡིད་ལ་མི་སེམས་པ་ཞེས་བྱ་བ། ཧྭ་ཤང་གི་འདོད་པར་ཁྱོད་ཀྱིས་བསྒྲུབ་པ་དེ་ཉིད་སླར་འོངས་པའི་ཕྱིར། ཞེས་ལུང་དང་རིགས་པ་ཡང་དག་པའི་ལམ་ནས་དབུ་མ་སྔ་རབས་པ་དང་ཕྱི་རབས་པའི་བར་གྱི་མཐའ་ཐུག་དབུ་མའི་ལྟ་བ་གཏན་ལ་འབེབ་སྟངས་ཀྱི་ས་མཚམས་ལེགས་པར་ཕྱེས་འདུག་པས་མི་ཚེ་རྡོ་ཅལ་གྱི་སྟེང་དུ་ཐལ་སྒྲ་བརྡབ་མཁན་གྱི་རིགས་པ་སྨྲ་བ་དག་གི་མིག་གི་བདུད་རྩི་དང་རྣ་བའི་ལོངས་སྤྱོད་ཉིད་དུ་འཁུམས་སོ། མཁས་པའི་བྱ་བ་འཆད་རྩོད་རྩོམ་གསུམ་ལས་ཆོས་རྩོད་ནི་འཐད་ལྡན་རིག་པའི་ལམ་ནས་ཡིན་ལུགས་དཔྱད་པར་མེད་དུ་མི་རུང་བའི་ཡག་དག་པའི་རིག་པའི་རྣམ་བཞག་ཅིག་ཡིན་པ་ལས་འཇིག་རྟེན་པའི་ཆགས་སྡང་ཉེ་རིང་གིས་ཀུན་ནས་བསླངས་པའི་ཁ་རྩོད་སྣ་རྩོད་དང་གཏན་ནས་མི་འདྲ། ཆོས་རྩོད་ནི་ཆོས་རྩོད་ལས་གཞན་ཞིག་གི་ངོ་བོར་ནམ་ཡང་བསྒྱུར་མི་རུང་། སྐབས་འདིར་རིས་མེད་ཀྱི་ལྟ་གྲུབ་གླེང་པའི་སྐབས་ཡིན་པས་ཆོས་བརྒྱུད་ཕན་ཚུན་གྱི་ལྟ་གྲུབ་བར་དགག་པ་རྒྱབ་རེས་བྱས་འདུག་སྙམས་ཏེ་འགའ་ཞིག་གི་ཐུགས་ལ་ཕོག་སྲིད་ཀྱང་། དེ་ནི་ཧ་ཅང་ཐུགས་གུ་དོག་དྲགས་པ་ཡིན་ཏེ། ཆོས་གྲྭ་ཆེན་པོ་དག་གི་ནང་དུ་ཉིན་རེ་བཞིན་འདིར་ལྟར་རྩོད་པ་རྒྱབ་བཞིན་ཡོད་ཅིང་། ཕན་ཚུན་བར་ཚིག་གི་འདའ་མོ་སྣ་ཚོགས་འཕེན་རེས་བྱེད་ཅིང་མཚམས་རེར་ཐལ་ཅག་དང་རྡོག་འདེད་ཀྱང་གཞུ་རེས་བྱེད་ཀྱི་ཡོད། འོན་ཀྱང་ཕན་ཚུན་འཁོན་འཛིན་དང་སྡང་བ་གང་ཡང་མེད་པར་སེམས་ཐག་ཇེ་ཉེ་དང་བློ་བསྐྱེད་ཇེ་རྒྱས་སུ་འགྲོ་བཞིན་ཡོད། དེ་ནི་བོད་གངས་ཅན་པའི་བླ་ན་མེད་པའི་ཆོས་སྲོལ་བཟང་པོ་ཞིག་ཡིན། ཆོས་བརྒྱུད་ཕན་ཚུན་བར་ལྟ་གྲུབ་ཀྱི་དགག་བཞག་བྱེད་དུས་ཐུགས་ལ་ཕོག་མཁན་དག་ནི་ཆོས་ར་ཆེན་པོའི་ནང་དུ་རྩོད་པའི་གྲལ་དུ་གཏན་ནས་ཞུགས་མ་མྱོང་པའམ་ཞུགས་མྱོང་ཡང་ཞུགས་གོ་མ་ཆོད་པ་ཡིན། ཐལ་སྒྲ་འབྱིན་དུས་སྙིང་རླུང་སྡང་ན་རིག་པ་སྨྲ་བའི་ཞབས་འདྲེན་ཡིན་པས་གཟབ་འཚལ། ང་ཚོའི་རིས་མེད་འདི་ཕན་ཚུན་བར་ཆོས་དང་མཐུན་པའི་དགག་བཞག་གང་ཡང་བྱེད་ཆོག་ལ་བྱེད་དགོས་ངེས་ཤིག་ཡིན། ཆོས་ལུགས་གཞན་ཕལ་མོ་ཆེ་ཞིག་གིས་བླ་མས་ཆོས་བཤད་དུས་ལུང་འབོག་པ་ལྟ་བུ་ཞིག་དང་སྒྲུང་བཤད་པ་ལྟ་བུ་ཞིག་ལས་དེ་ལ་ཡར་དོགས་འདྲི་དང་དགག་བཞག་གི་རྩོད་པ་རྒྱབ་མི་ཆོག་པར་ཅི་གསུངས་བཞིན་རྗེས་སུ་འདུར་རྒྱུགས་བྱེད་དགོས་པའི་རྨོང་དད་ཀྱི་ལམ་སྲོལ་དང་མི་འདྲ་བར་རིགས་པ་ཡང་དག་པའི་ལམ་ནས་དགག་བཞག་གང་ཡང་བྱེད་ཆོག་པའི་ལམ་སྲོལ་བཟང་པོ་ཞིག་ཡོད་པ་འདི་ནི་ང་ཚོའི་བསོད་ནམས་དང་གཟི་རྗིད་ཅིག་ཡིན་པས་འདི་གོ་ལ་ཧྲིལ་པོར་ངོམས་སུ་ཆོག་པ་ཞིག་བྱེད་དགོས། ངས་འདི་ལྟར་གསལ་བཤད་བྱེད་དོན་ནི་སེམས་ཆུང་འགའ་ཞིག་གི་ཐུགས་ལ་ཕོག་ཏུ་དོགས་ཏེ་ཞུས་པ་ཡིན་པས་ཐུགས་ལ་ངེས་པར་འཚལ།
༼བརྗོད་གཞི་གསུམ་པ་ས་ལུགས་ལ་མདོ་སྔགས་གཉིས་ཀྱི་ལྟ་བ་གནད་གཅིག་ཏུ་ཐུག་པ་མ་ཟད་ཐལ་རང་གཉིས་ཀྱི་མཐའ་ཐུག་གི་ལྟ་བ་ལའང་ཡང་ལྕི་མེད་པའི་ཚུལ།༽ མཚམས་འདི་ནས་ས་ལུགས་ལ་མདོ་སྔགས་གཉིས་ཀྱི་མཐའ་ཐུག་གི་ལྟ་བའི་ཁྱད་པར་ཅུང་ཟད་ཞུ་ན། ཆོས་ཀྱི་རྗེ་ས་སྐྱ་པཎྜི་ཏས། སྡོམ་གསུང་རབ་དབྱེ་ལས། ཕ་རོལ་ཕྱིན་པའི་ལྟ་བ་ལས། །ལྷག་པའི་ལྟ་བ་ཡོད་ན་ནི། །ལྟ་དེ་སྤྲོས་པ་ཅན་དུ་འགྱུར། །སྤྲོས་བྲལ་ཡིན་ན་ཁྱད་པར་མེད། །ཅེས་པའི་གསུང་དེ་ནི་མདོ་སྔགས་གཉིས་ཀའི་མཐའ་ཐུག་གི་ལྟ་བའི་གནད་གཅིག་ཏུ་གཞོལ་བའི་ཆོས་ཀྱི་སྡོམ་ཆེན་པོ་ཞིག་སྟེ་འདིའི་ཐད་དུ་ཅུང་ཞིག་གླེང་ན། དགེ་རྩེ་མ་ཧ་པཎྜི་ཏ་ཚེ་དབང་མཆོག་གྲུབ་ཀྱིས། གྲུབ་མཐའ་ཆེན་པོ་བཞིའི་རྣམ་པར་བཞག་པ་མདོ་ཙམ་ཕྱེ་བ་ངེས་དོན་དགོངས་པ་གསལ་བྱེད་ལས། དོན་འདི་ལ་ཆོས་རྗེས་སྟོང་ཉིད་སྤྲོས་བྲལ་ཙམ་ལ་ཆོས་སྤྱིའི་ལྟ་བ་བཞག་པའི་སྐབས་གཅིག་དང་། ཉམས་མྱོངས་དེ་ཁོ་ན་ཉིད་ཀྱི་ཡེ་ཤེས་ལ་གསང་སྔགས་ཐུན་མོང་མ་ཡིན་པའི་ལྟ་བ་བཞག་པའི་གནས་སྐབས་གཉིས་མ་རྟོགས་པར། ཁ་ཅིག་གིས་ཆོས་རྗེ་ལ་དགག་པ་མཛད་པ་མི་འཐད་པའི་ཚུལ་གསུངས་ཏེ། དགེ་རྩེ་མ་ཧ་པཎྜི་ཏ་ཉིད་ཀྱིས་ཆོས་རྗེའི་གསུང་དེའི་དགོངས་པ་འགྲེལ་པ་ན། གོང་དུ་ལུང་དྲངས་མ་ཐག་པའི་ཆོས་རྗེའི་གསུང་ཤོ་ལོ་ཀ་གཅིག་པུ་དེའི་རྐང་པ་དང་པོ་གཉིས་ཐོག་མར་ལུང་དུ་དྲངས་ཏེ། འདིའི་དགོངས་པ་ཇི་བཞིན་བླངས་ཚེ། སྔགས་ཀྱི་ལྟ་བ་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཟབ་གསལ་གཉིས་མེེད་དེ་ཉིད་ངོ་བོའི་ཆ་ནས་སྤྲོས་པའི་མཐའ་གང་དུའང་མ་ལྷུང་བ་ལ་དགོངས་ནས་ལྟ་བ་དེའི་མཚན་ཉིད་སྤྲོས་པ་དང་བྲལ་བ་ཡིན། དེ་ལྟ་ཡིན་པས་སྤྲོས་བྲལ་གྱི་ཆ་ནས་དབུ་མའི་སྤྲོས་བྲལ་ལས་ལྷག་པ་མེད། དེ་མེད་པས་སྤྲོས་བྲལ་གྱི་ངོས་ནས་དབུ་མ་དང་གསང་སྔགས་ཁྱད་པར་མེད་པའི་དོན་ཤེས་དགོས་ཏེ། དེ་མ་ཐག་ཏུ། སྤྲོས་བྲལ་ཡིན་ན་ཁྱད་པར་མེད། །ཅེས་གསུངས་པའི་ཕྱིར་རོ། སྤྲོས་བྲལ་དེ་ཡང་སྤྱིར་ཡོད་མེད་སོགས་གང་དུའང་ཁས་བླངས་མེད་པའི་དོན་ཙམ་ལས། བོད་འགའ་ཞིག་གི་ཞེ་འདོད་ལྟར་མེད་དགག་གི་སྟོང་ཉིད་ཁོ་ནར་བཞེད་པ་མིན་ཞིང་། སྤྲོས་བྲལ་དེ་ལ་རྣམ་པའི་བདེ་བ་ཆེན་པོ་དང་སོ་སོ་རང་རིག་གི་རིག་པས་ཉམས་སུ་མྱང་བྱར་གྱུར་པ་སྔགས་ཀྱི་ལྟ་བའི་ཁྱད་ཆོས་སུ་བཞེད་པ་ཡིན། ཞེས་གསུངས་པ་འདི་ལས་ལྷག་པའི་ཆོས་རྗེའི་དགོངས་པ་འགྲེལ་མཁན་ཞིག་མ་མཐོང་བས་ཐེངས་འདིར་མཁས་པ་གཞན་གྱི་ལུང་དྲངས་མེད། མདོ་སྔགས་གཉིས་ཀྱི་ལྟ་བ་ལ་ཁྱད་པར་མེད་ན་ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོང་དང་། ཞེས་སོགས་གསུང་རབ་དུ་མ་ལས་མདོ་ལས་སྔགས་ཁྱད་པར་འཕགས་ཚུལ་དུ་མ་ཞིག་གསུངས་པ་མ་ཡིན་ནམ་ཞེ་ན། དེའི་ལན་དུ་ས་སྐྱའི་བསྟན་འཛིན་ཀུན་གྱིས་མགྲིན་གཅིག་ཏུ་འདི་ལྟར་གསུངས་ཏེ། ཐབས་ཀྱི་སྒོ་ནས་མདོ་ལས་སྔགས་ཁྱད་པར་དུ་འཕགས་པ་ལས་ལྟ་བའི་སྒོ་ནས་ཁྱད་པར་དུ་འཕགས་པ་མི་འདོད། མདོ་སྔགས་གཉིས་ཀའི་མཐའ་ཐུག་གི་ལྟ་བ་སྤྲོས་བྲལ་ལ་ཐུག་ཅིང་། སྤྲོས་བྲལ་ལས་ལྷག་པའི་ལྟ་བ་ཞིག་མདོ་སྔགས་གང་དུའང་ཡོད་པར་མི་འདོད་དོ། མདོ་སྔགས་གཉིས་ལ་ཐབས་ཀྱི་ཁྱད་པར་ཙམ་ལས་ལྟ་བ་ལ་ཁྱད་པར་མེད་པར་མ་ཚད་ཐེག་པ་གསུམ་ལའང་ཐབས་ཀྱི་ཁྱད་པར་ཙམ་ལས་ལྟ་བ་ལ་ཁྱད་པར་ཡོད་པར་མི་འདོད་དེ། ཐམས་ཅད་ཀྱིས་བདག་མེད་པ་དང་སྟོང་པ་ཉིད་ཁས་ལེན་པའི་ཕྱིར། འགའ་ཞིག་གིས་ཆོས་ཀྱི་སྡོམ་བཞི་འམ་ལྟ་བ་བཀའ་བཏགས་ཀྱི་ཕྱག་རྒྱ་བཞིས་ཕྱི་ནང་གི་གྲུབ་མཐའི་ཁྱད་པ་འབྱེད་མི་ནུས་ཏེ། ཉན་ཐོས་མང་བསྐུར་བས་བརྗོད་དུ་མེད་པའི་བདག་ཁས་ལེན་པའི་ཕྱིར་ཟེར། དེ་ནི་རུང་བ་མ་ཡིན་ཏེ། སྟག་ཚང་ལོ་ཙྭ་བས་གྲུབ་མཐའ་ཀུན་ཤེས་ལས། རང་སྡེ་བྱེ་སྨྲར་གཏོགས་པ་འགའ་ཞིག་བདག་འདོད་ཅིང་སྐད་ཅིག་གིས་མི་འཇིག་པའི་འདུས་བྱས་ཁས་ལེན་པ་ཡང་ཡོད་མོད། ཕུང་པོ་ལས་དོན་གཞན་དག་རྟག་པར་མི་འདོད་ཅིང་། གཏན་འཇིག་མི་སྲིད་པའི་རྟག་དངོས་སུ་ཁས་མི་ལེན་པས་མུ་སྟེགས་དང་ཁྱད་པར་ཆེའོ། ཞེས་ལེགས་པར་གསུངས། ཕྱི་རོལ་མུ་སྟེགས་བྱེད་དང་ནང་པའི་ཁྱད་པར་གཙོ་བོ་ཡང་ཕྱི་རོལ་གྲངས་ཅན་སོགས་ཀྱིས་བདག་ཁས་ལེན་ཅིང་། དེའང་ཁྱད་ཆོས་ལྔ་ལྡན་དང་ཡོན་ཏན་དུ་མ་འབྱུང་བའི་བརྟེན་དུ་འདོད། དེ་ལས་བཟློག་སྟེ་སངས་རྒྱས་ཀྱིས་བདག་འཛིན་དེ་ཉེས་པ་ཀུན་གྱི་རྩ་བ་ཡིན་པ་ཐེག་པ་གསུམ་དང་མདོ་སྔགས་གཉིས་ཀར་ལེགས་པར་གསུངས་ཤིང་བདག་མེད་པའི་ཆོས་ཚུལ་ལེགས་པར་སྲོད་བཏོད་པས་བདག་ཁས་ལེན་མིན་གྱིས་ཕྱི་ནང་གི་ཁྱད་པར་འབྱེད་མི་ནུས་ཟེར་བ་ནི་ལོག་པར་བཤད་པ་ཆེན་པོའོ། ཐ་སྙད་འདོགས་པའི་བདག་ཙམ་ལ་ནི་དགག་པ་བྱེད་པ་མ་ཡིན། བདག་ཅིག་འདོད་ཚད་ལྟ་བ་བཀའ་བཏགས་ཀྱི་ཕྱག་རྒྱ་བཞིའི་ནང་ཚན་ཆོས་ཐམས་ཅད་སྟོང་ཞིང་བདག་མེད་པ་ཞེས་པའི་དགག་བྱ་རུ་གྱུར་པའི་བདག་དེ་ཡིན་པས་མ་ཁྱད་པའི་ཁྱད་པར་འབྱེད་ཤེས་དགོས། དེ་མ་ཤེས་ན་ཕྱི་ནང་གི་ཁྱད་པར་ཙམ་ཡང་འབྱེད་མི་ཤེས་པའི་མུན་སྤྲུལ་དུ་འགྱུར་རོ། སྟོང་ཉིད་བསྟན་ཚུལ་ལ་གསལ་རྒྱས་རྫོགས་པའི་ཁྱད་པར་ཡོད་ཀྱང་སྟོང་ཉིད་ཐམས་ཅད་ལ་བསྟན་ཅིང་། དེ་མ་བསྟན་ན་འཁོར་བ་ལས་ཐར་ཐབས་མེད་པའི་ཕྱིར། འོན་ཀྱང་ཐབས་ཀྱི་སྒོ་ནས་ཐེག་ཆེན་ཁྱད་པར་འཕགས་ཏེ་ཐབས་སྙིང་རྗེ་ཆེན་པོའམ་ཐེག་ཆེན་སེམས་བསྐྱེད་དེ་ཐེག་དམན་ལ་བསྟན་པ་མེད་པའི་ཕྱིར། མདོར་ན་ཕར་ཕྱིན་ཐེག་པའི་ལུགས་ལ་གཞི་དབུ་མ་བདེན་གཉིས་ཟུང་འཇུག ལམ་དབུ་མ་ཐབས་ཤེས་ཟུང་འཇུག འབྲས་བུ་མ་སྐུ་གཉིས་ཟུང་འཇུག་དང་གཅིག་ཏུ་མཐུན་པར་སྔགས་ཀྱི་སྐབས་སུ་གཞི་འཁོར་འདས་དབྱེར་མེད། ལམ་གསལ་སྟོང་འཛིན་མེད། འབྲས་བུ་སྐུ་བཞི་དང་ཡེ་ཤེས་ལྔའམ། ཡང་ན་རྒྱུད་གསུམ་གྱི་སྒོ་ནས་རྒྱུད་ཀྱི་དོན་མ་ལུས་པར་བསྡུས་ཏེ་གསུངས་པ་དང་། མདོ་སྔགས་གང་གི་ལུགས་ལའང་སྟོང་པ་ཉིད་དང་སྙིང་རྗེ་དང་། བྱང་ཆུབ་ཀྱི་སེམས་གསུམ་ནི་སྲོག་ཤིང་ལྟ་བུར་ཡིན་ཅིང་། སྤང་བྱ་དང་འབྲས་བུ་གང་གི་ཆ་ནས་ཀྱང་ཁྱད་པར་ཏིལ་འབྲུ་ཙམ་ཡང་མ་དམིགས་སོ། ཁྱད་པར་གཅིག་ཡོད་པ་དེ་ནི་ཐབས་ཀྱི་ཁྱད་པར་ཙམ་མོ། དཔེར་ན་ཕར་ཕྱིན་ཐེག་པའི་སྐབས་སུ་བྱང་ཕྱོགས་སོ་བདུན་དེ་སེམས་ལ་གནད་དུ་བསྣུན་ནས་བཤད་ཅིང་། དེ་ཉིད་སྔགས་ཀྱི་སྐབས་སུ་ལུས་ལ་གནད་དུ་བསྣུན་ནས་བཤད་པ་ལྟ་བུའོ། ད་དུང་ཐལ་རང་གཉིས་ལ་མཐའ་ཐུག་དབུ་མའི་ལྟ་བ་གཏན་ལ་འབེབ་བྱེད་ཀྱི་རིག་པ་གཏོང་ཚུལ་མི་འདྲ་བའི་ཁྱད་ཙམ་ལས་ལྟ་བ་ལ་མཐོ་དམན་ཅུང་ཟད་ཙམ་ཡང་ཡོད་པ་འཇོག་ཏུ་མི་རུང་ཞིང་། དེས་མ་ཚད་ཐེག་པ་གསུམ་ཀར་མཐའ་ཐུག་གི་ཐར་པ་མཚན་ཉིད་པ་རེ་རེ་འཐོབ་རྒྱུ་ཡོད་པ་གཅིག་མཚུངས། མདོ་སྔགས་གཉིས་ཀར་ད་ལྟའི་ཐ་མལ་པའི་ལུས་འདི་མ་སྤངས་པར་ལུས་འདི་ཉིད་ཀྱི་སྟེང་དུ་འཚང་རྒྱ་རུང་བ། མདོ་ལུགས་དང་སྔགས་ལུགས་གཉིས་ཀར་སོ་སོའི་རང་རྐང་གི་ལམ་ནས་མཐའ་ཐུག་སངས་རྒྱས་ཀྱི་སར་བགྲོད་ཐུབ་པ་གཅིག་མཚུངས། དབུ་མ་ཐལ་འགྱུར་པའི་ལུགས་ལ་གནས་ལུགས་དཔྱོད་པའི་རིགས་ངོར་དགག་གཞི་དགག་བྱ་ཐ་དད་དུ་འཇོག་མི་རུང་བ་དང་། སྔགས་ཀྱི་ལུགས་ལ་སྦྱང་གཞི་དང་སྦྱོང་བྱེད་གཅིག་ཏུ་སྦྱར་དགོས་པའི་གལ་གནད་སོགས་ཡིད་འཕྲོག་པའི་ས་སྐྱའི་ཐུན་མིན་གྱི་འཆད་ཚུལ་དུ་མ་ཞིག་ཡོད་ཀྱང་ཐེངས་འདིར་ཡིག་ཚོགས་མང་གིས་དོགས་ཏེ་སྡོམ་ཚིག་ཙམ་ཞིག་བཀོད་པ་ཡིན།
༼བརྗོད་གཞི་བཞི་པ་སྔགས་ལམ་ལ་ཞུགས་པར་དབང་སྐུར་སྔོན་དུ་འགྲོ་དགོས་པའི་གནད།༽ ངོར་ཆེན་དཀོན་མཆོག་ལྷུན་གྲུབ་ཀྱིས། སྣང་གསུམ་མཛེས་རྒྱན་ལས། སྤྱིར་འཕགས་ཡུལ་གྱི་གྲུབ་ཆེན་རྣམས་ཀྱིས་རྡོ་རྗེ་ཐེག་པའི་ལམ་གྱི་སྲོག་ཤིང་ལ་གནད་དུ་ཆེ་བ་དྲུག་བཤད་དེ། སངས་རྒྱས་ཡེ་ཤེས་ཞབས་ནི། སྲིད་པའི་སྡུག་བསྔལ་གྱི་རྩ་བ་ཐ་མལ་རྣམ་རྟོག་ཡིན་པས། དེའི་གཉེན་པོ་ལྷའི་ང་རྒྱལ་བསྒོམ་པ་བསྐྱེད་རིམ་གནད་དུ་ཆེ་བར་བཞེད་དེ། སྒྲུབ་ཐབས་ཀུན་བཟང་ལས། ཐ་མལ་རྣམ་རྟོག་རྒྱུན་ནི་མ་གཏོགས་པར། སྲིད་པའི་སྡུག་བསྔལ་གཞན་ཅིའང་ཡོད་མ་ཡིན། །དེ་དང་རྣམ་པ་འགལ་བར་གྱུར་སེམས་ལ། །སེམས་ནི་དངོས་སུམ་དག་ཏུ་རྟོགས་པར་འགྱུར། །ཟབ་ཅིང་རྒྱ་ཆེ་བ་ཡི་བདག་ཉིད་ཅན། གང་ཡིན་དེར་ནི་ཀུན་རྟོག་སྣང་མི་འགྱུར། །ཞེས་གསུངས། འཕགས་པ་ཀླུ་སྒྲུབ་ནི། འཁོར་བའི་སྡུག་བསྔལ་གྱི་རྩ་བ་རླུང་ལ་བརྟེན་ནས་སེམས་ཀྱི་འཕྲོ་འདུ་སྣ་ཚོགས་བྱས་པ་ལས་བྱུང་བའི་ཉོན་མོངས་དང་རྣམ་རྟོག་ཡིན་པས། དེའི་གཉེན་པོ་རླུང་བསྒོམ་པ་གནད་དུ་ཆེ་བར་བཞེད་དེ། རིམ་ལྔ་ལས། རླུང་རྣམས་ཕྲ་བའི་གཟུགས་ཀྱིས་ནི། །ཤེས་དང་ཡག་དག་འདྲེས་གྱུར་ཏེ། །དབང་པོའི་ལམ་ནས་བྱུང་ནས་ནི། །ཡུལ་ཀུན་ལ་ནི་དམིགས་པར་བྱེད། །ཅེས་གསུངས། རྡོ་རྗེ་དྲིལ་བུ་པ་ནི། འཁོར་བའི་རང་བཞིན་རྒྱུ་རྣམ་རྟོག་དང་། འབྲས་བུ་སྡུག་བསྔལ་ཡིན་ལ། དེའི་གཉེན་པོ་མྱང་འདས་ཀྱི་རྒྱུ་ཏིང་ངེ་འཛིན་ཡིན་ཞིང་། ཏིང་ངེ་འཛིན་དེ་ཡང་ཐབས་གཞན་ཇི་ཙམ་འབད་ཀྱང་སྐྱེ་དཀའ་ལ། བླ་མ་དང་མཁའ་འགྲོའི་བྱིན་རླབས་ཞུགས་ན་སྐྱེ་སླ་བས། བྱིན་རླབས་གནད་དུ་ཆེ་བར་བཞེད་དེ། དེས་མཛད་པའི་བསམ་གྱིས་མི་ཁྱབ་པའི་རིམ་པ་ལས། བླ་མའི་བྱིན་རླབས་ཙམ་གྱིས་ནི། །སྐད་ཅིག་ཉིད་ལ་འབྱུང་གང་ཡིན། །འཁོར་ལོ་སྡོམ་པ་སྦས་པ་ཡི། བྱིན་རླབས་རིམ་པ་འདི་བཤད་བྱ། ཞེས་གསུངས། རྒྱ་ཆེན་ཨིནྡྲ་བྷཱུ་ཏི་ནི། འཁོར་བའི་རང་བཞིན་སྡུག་བསྔལ་ཡིན་ལ། དེའི་གཉེན་པོ་བདེ་བ་ཡིན་ཞིང་། བདེ་བའི་གཙོ་བོ་ཕྱག་རྒྱ་བསྟན་པ་ལས་འབྱུང་བས། ཕྱག་རྒྱའི་ལམ་གནད་དུ་ཆེ་བ་བཞེད་དེ། དབང་ཡོན་ཏན་རིམ་པ་ལས། བདེ་བས་བདེ་བ་ཆེན་པོ་ཀུན། །སྲིད་པའི་སྡུག་བསྔལ་གཅོད་བྱེད་ཅིང་། །མྱ་ངན་འདས་པའི་གནས་ཐོབ་ཅེས། །བཅོམ་ལྡན་འདས་ཀྱིས་དེ་སྐད་གསུངས། །ཞེས་གསུངས། གྲུབ་ཆེན་ས་ར་ཧ་དང་ཏོག་རྩེ་པ་ལ་སོགས་པ་ནི། འཁོར་བའི་སྡུག་བསྔལ་གྱི་རྩ་བ་དངོས་པོ་ལ་མངོན་པར་ཞེན་པ་ཡིན་པས། དེའི་གཉེན་པོ་སྟོང་ཉིད་ཕྱག་རྒྱ་ཆེན་པོ་བསྒོམ་པ་གནད་དུ་ཆེ་བར་བཞེད་དེ། དོ་ཧ་ལས། ཀྱེ་ལགས་གང་སྨྲས་རྫུན་ཞིང་ལོག་སྨྲ་དེ་བོར་ལ། །གང་ལ་ཞེན་པ་ཡོད་པ་དེ་ཡང་ཐོང་། རྟོགས་པར་གྱུར་ན་ཐམས་ཅད་དེ་ཡིན་ཏེ། །དེ་བས་གཞན་ཞིག་སུས་ཀྱང་ཤེས་མི་འགྱུར། །ཞེས་གསུངས། སློབ་དཔོན་བིར་ཝ་པ་ནི། འཁོར་བའི་སྡུག་བསྔལ་གྱི་རྩ་བ་ཀུན་ནས་ཉོན་མོངས་ཀྱི་རྟེན་འབྲེལ་ལས་བྱུང་བ་ཡིན་ལ། དེའི་གཉེན་པོ་རྣམ་བྱང་གི་རྟེན་འབྲེལ་ཡིན་ཞིང་རྟེན་འབྲེལ་གྱི་གནད་ཤེས་ན། ཉོན་མོངས་དང་རྣམ་རྟོག་ཀྱང་ལམ་དུ་འགྱུར་ལ། གནད་མ་ཤེས་ན་ལྷ་དང་སྟོང་ཉིད་བསྒོམ་པ་རྣམས་ཀྱང་བར་ཆད་དུ་འགྲོ་བའི་སྐབས་སྲིད་པས་རྟེན་འབྲེལ་ཉིད་གནད་དུ་ཆེ་བར་བཞེད་དེ། གསུང་ངག་ལས། རྟེན་ཅིང་འབྲེལ་བ་འབྱུང་བ་ལྔས་ལམ་ཡོངས་སུ་རྫོགས་པར་བསྟན་ཏོ་ཞེས་གསུངས། དེས་ན་གནད་དུ་ཆེ་བ་ལྔ་ཡང་རྟེན་འབྲེལ་གནད་དུ་ཆེ་བ་ཞེས་བྱ་བ་འདིར་འདུ་བས་ན། ལམ་འདི་གཞན་ལས་རྒྱ་ཆེ་ཞིང་སྒྲོ་སྐུར་དང་བྲལ་བ་ཡིན་པར་བཞེད་དོ། དེ་ལྟ་བུའི་རྟེན་འབྲེལ་གྱི་ཐོག་མ་དབང་ནས་སྒྲིག་དགོས་པར་བཞེད་དེ། རྗེ་ས་ཆེན་གྱིས་དབང་བཞིའི་ངོ་སྤྲོད་ལས། རྣལ་འབྱོར་དབང་ཕྱུག་བིར་ཝ་པ། །གསང་སྔགས་རྡོ་རྗེ་ཐེགས་པ་ལ། །རྟེན་འབྲེལ་གནད་དུ་ཆེ་བར་བཞེད། །རྟེན་འབྲེལ་གྱི་རྩ་བ་དབང་བསྐུར་ཡིན། །ཞེས་དང་། དེའི་རང་འགྲེལ་ལས། སྤྱིར་གསང་སྔགས་རྟེན་འབྲེལ་ལམ་དུ་བྱེད་པ་ཡིན་ལ། རྟེན་འབྲེལ་ཐམས་ཅད་དབང་གི་དུས་སུ་སྒྲིག་པ་ཡིན་པས། ཐོག་མར་བླ་མ་ཞིག་ལ་དབང་བཞི་རྫོགས་པར་ཐོབ་པར་གལ་ཆེ། དབང་དེ་ཡང་བརྡ་ཙམ་མམ། ངོ་སྤྲོད་ཙམ་མམ། བྱིན་རླབས་ཙམ་མ་ཡིན་པར། གྲུབ་པའི་བླ་མ་བརྒྱུད་པའི་བཀའ་མ་ཆད་པ། ལྷད་མ་ཞུགས་པ། ལུས་ངག་ཡིད་ཡེ་ཤེས་སྐུ་བཞིར་བྱིན་གྱི་རློབ་པའི་རྟེན་འབྲེལ་སྒྲིག་མཁྱེན་པ་ཞིག་ལ་དཀྱིལ་འཁོར་ཆེན་པོར་དབང་བསྐུར་ཐོབ་དགོས་སོ་ཞེས་གསུང་ཞིང་། དེ་ལྟར་དབང་བཞི་ཚུལ་བཞིན་ཉམས་སུ་བླངས་པས་བུམ་དབང་གིས་ས་དྲུག གསང་དབང་གིས་ས་བཞི། ཤེས་རབ་ཡེ་ཤེས་ཀྱིས་ས་གཉིས། དབང་བཞི་པས་ས་ཕྱེད་ཐོབ་སྟེ་མཐར་འབྲས་བུར་སྤྲུལ་སྐུ། ལོངས་སྐུ། ཆོས་སྐུ། ངོ་བོ་ཉིད་སྐུ། ཤིན་ཏུ་རྣམ་པར་དག་པ་ངོ་བོ་ཉིད་ལྷུན་གྱིས་གྲུབ་པའི་སྐུ་སྟེ་ལྔ་ནི་གོ་རིམ་བཞིན་དུ་རྟེན་འབྲེལ་ལྔ་འགྲིགས་པའི་འབྲས་བུའོ། དེའང་རྟེན་འབྲེལ་འགྲིག་པའི་གཞི་ནི། རྒྱུ་རྟེན་བརྟེན་པ་གཉིས་ལས། རྟེན་ལ་ཕྱི་རོལ་གྱི་ཡུལ། ལུས་རྩ། རྩ་ཡི་གེ ཁམས་བདུད་རྩི། སྙིང་པོ་ཡེ་ཤེས་རླུང་སྟེ་ལྔ་དང་། བརྟེན་པ་སྒོ་ལྔའི་རྣམ་ཤེས། ཡིད་ཀྱི་རྣམ་ཤེས། ཉོན་ཡིད། ཀུན་གཞི་རྣམ་ཤེས། དེརྣམས་ཀྱི་ཆོས་ཉིད་དེ་ལྔ་ནི། གོ་རིམ་བཞིན་དུ་ཕྱི། ནང་། གསང་བ། དེ་ཁོ་ན་ཉིད། མཐའ་ཐུག་རྟེན་འབྲེལ་རྣམས་སོ། ལམ་ནི་སྨིན་བྱེད་དབང་ལ་འཇུག་པ་ཡན་ཆད་དང་། བུམ་དབང་སོགས་དབང་བཞི་དང་། གྲོལ་བྱེད་ལམ་གྱི་སྔོན་འགྲོ། བསྐྱེད་རིམ། རང་བྱིན་རླབས། དཀྱིལ་འཁོར་འཁོར་ལོ། རྡོ་རྗེ་རྦ་རླབས་ཏེ་ལྔ་ནི་གོ་རིམ་བཞིབ་དུ་རྟེན་འབྲེལ་ལྔ་འགྲིག་པའི་ཐབས་སོ། རྣམ་འབྱོར་གྱི་དབང་ཕྱུག་རྗེ་བཙུན་རིན་པོ་ཆེ་གྲགས་པ་མཚན་ལ་འཕན་ཡུལ་གྲོང་པའི་རྣམ་འབྱོར་བྱང་ཆུབ་སེངྒེའི་དྲིས་ལན་དུ། བྱང་ཆུབ་སེངྒེས་ཞུས་དོན། དབང་བསྐུར་མ་ཐོབ་པར་གསང་སྔགས་སྤྱོད་པའི་བཤད་པ་ཨེ་ཡོད་ཅེས་དང་། རྡོ་རྗེ་རྣལ་འབྱོར་མའི་བྱིན་རླབས་ཀྱིས་དབང་བསྐུར་གོ་ཨེ་ཆོད། ཁྱེད་གསང་སྔགས་ཀྱི་བདག་པོ་ཡིན་པས་གསང་སྔགས་ཀྱི་ལམ་འགྲོ་ཚུལ་ཅི་འདྲ་ཞིག་ཡིན། ནཱ་རོ་པ་དང་མར་པ་ལ་ལས་མཇལ་བར་འདོད། ལ་ལས་མ་མཇལ་བར་འདོད་པ་ལ་ཁྱེད་ལ་དེའི་རྒྱུས་མངའ་འམ་ཟེར་ནས་ཇི་ཡིན་གྱི་རྒྱུ་མཚན་ཐུག་ལ་འདོགས་པར་ཞུ། ཞེས་དྲི་བ་བཞི་བཏང་བ་ལས་དྲི་བ་དང་པོའི་ལན་དེ་སྐབས་འདིར་ཉེ་བར་འཁོ་བས་དེའི་ལན་དུ་རྗེ་བཙུན་གྲགས་རྒྱན་གྱིས་འདི་ལྟར་གསུངས་ཏེ། སྤྱིར་མ་སྨིན་པ་ལ་གསང་སྔགས་བཤད་པར་བྱ་བའི་རྒྱུད་ཀྱི་བྱེ་བྲག་རྟོག་པའི་རྒྱུད་ཅེས་བྱ་བ། འཕགས་པ་དོན་ཡོད་ཞགས་པ་ལ་སོགས་པ་འགའ་མ་གཏོགས་པ་རྒྱུད་སྡེ་བཞི་པོ་ཐམས་ཅད་ལས་རང་རང་གི་ཆོ་གས་སྨིན་པར་བྱས་པ་ལས་མ་སྨིན་པ་གཞན་ལ་བཤད་པར་བྱ་བ་གནང་བ་མ་མཐོང་སྟེ། དེ་ཡང་བྱ་བའི་རྒྱུད་ཀྱི་རྩ་བ་ལྟ་བུར་དཔུང་པ་བཟང་པོ་ལས། རིགས་དང་དམ་ཚིག་མ་ཐོབ་སྙིང་རྗེ་མེད། །དེ་བཞིན་བྱང་ཆུབ་སེམས་ནི་མ་བསྐྱེད་ཅིང་། །སངས་རྒྱས་མ་དད་ལྷ་གཞན་ལ་བརྟེན་པས། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་བཤད་ཅེས་དང་། བྱ་བའི་རྒྱུད་ཀྱི་དཀྱིལ་འཁོར་ཀུན་ཏུ་འཇུག་པར་མ་ནུས་ན་ཡང་དཀྱིར་འཁོར་གཅིག་ཙམ་དུ་འཇུག་དགོས་ཏེ། དེ་ཉིད་ལས། བསམ་པ་ཞན་ཅིང་ཉམས་ཀྱིས་མི་ལྕོགས་པས། །དཀྱིལ་འཁོར་ཐམས་ཅད་བལྟ་བར་མི་ནུས་ནའང་། །དེ་ལས་གང་ཡང་རུང་བའི་དཀྱིལ་འཁོར་ནི། །གཅིག་ཙམ་ཞིག་ཀྱང་དད་པས་མཐོང་གྱུར་ན། །གནོད་སྦྱིན་ཚོགས་དང་མཚན་མོ་རྒྱུ་བ་དང་། །ས་བླའི་གདོན་དང་ཀུན་དང་ཀླུ་བདག་དང་། །ལྷ་ལ་སོགས་དང་བགེགས་དང་ལོག་འདྲེན་དང་། །བརྟུལ་ཞུགས་གནས་པ་དེ་ལ་གླགས་མི་བལྟ། །ཞེས་བྱ་བ་གསུངས་སོ། སྤྱོད་པའི་རྒྱུད། འཇམ་དཔལ་རྩ་རྒྱུད་ལས་ཀྱང་། ཇི་ལྟར་ཡང་དག་པའི་ལྟ་བ་མེད་པ་ལ་སྡོམ་བརྩོན་མེད་པ་དང་། སྐྱབས་སུ་མ་སོང་བ་ལ་ཆོས་པར་གཏོགས་པ་མེད་པ་དང་། བྱང་ཆུབ་ཏུ་སེམས་མ་བསྐྱེད་པ་ལ་བྱང་ཆུབ་སེམས་དཔའ་མེད་པ་ལྟར་མངོན་པར་དབང་བསྐུར་མ་བྱས་པ་ལ་ཡང་སྔགས་པའི་ཐ་སྙད་མེད་པར་རིགས་པར་བྱའོ། ཞེས་དང་། དེའི་རྒྱུད་ཕྱི་མ་ཁྲོ་བོ་རྣམ་པར་རྒྱལ་བ་ལས་ཀྱང་། ཁྱོད་ཀྱིས་དབང་མ་བསྐུར་བ་རྣམས་ལ་མིང་ཙམ་ཡང་བསྟན་པར་མི་བྱའོ་ཞེས་བཤད་དོ་ཞེས་དང་། རྣལ་འབྱོར་རྒྱུད་ཀྱི་འཕགས་པ་དེ་ཁོ་ན་ཉིད་འདུས་པ་ལས་ཀྱང་། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མི་བྱ་སྟེ། ཁྱོད་དམ་ཚིག་ཉམས་པར་འགྱུར་ཏ་རེ། ཞེས་འབྱུང་ངོ་། དེ་དག་ཐམས་ཅད་པས་ཀྱང་རྣལ་འབྱོར་ཆེན་པོའི་རྒྱུད་འདི་ནི་ཤིན་ཏུ་གསང་ཞིང་སྦ་བར་བྱ་སྟེ། དབང་གི་སྔོན་དུ་ཡང་དམ་ལ་བཞག་པ་བཞི་ལ་སོགས་པ་རྒྱས་པར་གསུངས་ལ། དཔལ་ཕྱག་རྒྱ་ཆེན་པོ་ཐིག་ལེ་ལས་ཀྱང་། དབང་མེད་ན་ནི་དངོས་གྲུབ་མེད། །བྱེ་མ་བཙིར་ཡང་མར་མེ་བཞིན། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་སྐྱེ། །ཞེས་གསུངས་ཏེ། དངོས་གྲུབ་ཐོབ་ཀྱང་ཞེས་བྱ་བ་ནི། ཐུན་མོང་གི་དངོས་གྲུབ་ནམ་མཁའ་ལ་འགྲོ་བའི་བར་ཐོབ་ཀྱང་ངན་འགྲོར་འགྲེོ་སྟེ། དབང་མ་ཐོབ་པར་ལམ་ཟབ་མོ་ཉམས་དུ་བླངས་པའི་ཕྱིར་རོ། ངེས་བརྗོད་བླ་མ་ལས་ཀྱང་། གང་ཞིག་དབང་བསྐུར་མེད་པ་ལ། །གཞན་དུ་དེ་ཉིད་མ་བསྟན་ཅིག ཅེས་གསང་སྔགས་ཀྱི་ལམ་ལ་འཇུག་པར་རྒྱུད་སྡེ་བཞི་ཀར་དབང་བསྐུར་སྔོན་དུ་འགྲོ་དགོས་པ་དང་། ཁྱད་པར་དུ་བླ་མེད་ཀྱི་ཟབ་ལམ་ལ་འཇུག་པར་ངེས་པར་དབང་བསྐུར་སྔོན་དུ་འགྲོ་དགོས་པ་རྒྱལ་བས་ཡང་ཡང་གསུངས་ཤིང་། ཆོས་རྗེ་འཇམ་དཔལ་དབྱངས་ས་སྐྱ་པཎྡི་ཏས་སྡོམ་གསུམ་རབ་དབྱེ་ལས། གྲུབ་མཐའི་རྣམ་དབྱེ་མི་ཕྱེད་ཅིང་། །རྒྱུད་སྡེའི་རིམ་པ་མི་ཤེས་པར། །རྣམ་བཞག་ལེགས་ལེགས་འདྲ་ན་ཡང་། །ལྷམ་དཔེ་ཞྭ་ལ་བཀལ་བ་ཡིན། །དེས་ན་རྒྱུད་སྡེ་བཞི་པོ་ཡི། །དབང་དང་ལམ་གྱི་དབྱེ་བ་ལ། །མི་འདྲའི་དབྱེ་བ་རྣམ་བཞི་ཡོད། །རང་རང་ཆོ་ག་བཞིན་བྱེད་ན། །དེ་ནས་གསུངས་པའི་དངོས་གྲུབ་འབྱུང་། །ལ་ལ་དབང་བསྐུར་མ་བྱས་ཀྱང་། །གལ་ཏེ་སྔགས་ལ་མོས་ཐོབ་ན། །དེ་ཉིད་ཆོས་ཀྱི་སྒོ་ཡིན་པས། །གསང་སྔགས་བསྒོམ་དུ་རུང་ཞེས་ཟེར། །འོ་ན་སྡོམ་པ་མ་ཐོབ་ཀྱང་། །རབ་ཏུ་བྱུང་ལ་མོས་པ་ཉིད། །སྡོམ་པ་ལེན་པའི་སྒོ་ཡིན་པས། །སྡོམ་པ་སྲུང་བས་ཆོག་གམ་ཅི། །སེམས་བསྐྱེད་སྡོམ་པ་མ་ཐོབ་ཀྱང་། །སེམས་བསྐྱེད་པ་ལ་མོས་པ་ཉིད། །བྱང་ཆུབ་སྤྱོད་པའི་སྒོ་ཡིན་པས། །སེམས་བསྐྱེད་བླངས་ཡང་ཅི་ཞིག་དགོས། །དེ་བཞིན་སོ་ནམ་མ་བྱས་ཀྱང་། །ལོ་ཐོག་ལ་ནི་མོས་པ་ཉིད། །བཟའ་རྒྱུ་ཟ་བའི་སྒོ་ཡིན་པས། །སོ་ནམ་ལ་ཡང་འབད་ཅི་དགོས། །འདི་འདྲའི་རིགས་ཀྱི་ཆོས་ལུགས་ཀུན། །དེ་འདྲའི་རིགས་ཀྱིས་སུན་ཕྱུང་ངོ་། །ཞེས་དང་། དབང་བསྐུར་ཆོས་སྒོ་ཙམ་མ་ཡིན། །གསང་སྔགས་རྟེན་འབྲེལ་ལམ་བྱེད་པས། །རྟེན་འབྲེལ་བསྒྲིག་པའི་གདམས་ངག་ཡིན། །ཕུང་པོ་ཁམས་དང་སྐྱེ་མཆེད་ལ། །སངས་རྒྱས་ས་བོན་བཏབ་ནས་ནི། །ཚེ་འདིར་སངས་རྒྱས་བྱེད་པ་ཡི། །ཐབས་ལ་དབང་བསྐུར་ཞེས་སུ་བཏགས། །དེས་ན་གང་ཟག་དབང་པོ་རབ། །དབང་བསྐུར་ཉིད་ཀྱིས་གྲོལ་བར་གསུངས། །དབང་གིས་གྲོལ་བར་མ་ནུས་པའི། །གང་ཟག་གཞན་ལ་བསྒོམ་དགོས་སོ། །དེས་ན་དབང་བསྐུར་ཐོབ་པ་དེ། །བསྲུང་ཞིང་འཕེལ་བར་བྱེད་པ་ལ། །བསྒོམ་པ་ཞེས་སུ་བཏགས་པ་ཡིན། །དེ་ཕྱིར་ཕ་རོལ་ཕྱིན་པ་ལ། །སེམས་བསྐྱེད་མེད་པའི་ཆོས་གཞན་མེད། །རྡོ་རྗེ་ཐེག་པའི་སྒོར་ཞུགས་ནས། །དབང་བསྐུར་ལས་གཞན་ཆོས་མེད་དོ། །དེས་ན་ཐུབ་པས་རྒྱུད་སྡེ་ལས། །དབང་བསྐུར་ཁོ་ན་བསྔགས་པ་དང་། །མཁས་རྣམས་ཅི་ནས་དབང་བསྐུར་ལ། །གུས་པའི་རྒྱུ་མཚན་དེ་ལྟར་ཡིན། །ཞེས་རྡོ་རྗེ་ཐེག་པའི་སྒོར་ཞུགས་པར་དབང་བསྐུར་ལས་གཞན་པའི་ཐབས་མེད་པར་གསལ་བར་གསུངས་ཤིང་། དབང་བསྐུར་གྱི་དོན་ནི་དབང་ཆོག་དང་དབང་རྫས་ཙམ་ལ་རྟེན་དགོས་པའི་དོན་མིན་པར་དབང་བཞི་པོ་རེ་རེ་ལའང་མཉམ་བཞག་དང་། རྗེས་སྤྱོད། བཟའ་བ། བསྲུང་བ། མི་འབྲལ་བའི་དམ་ཚིག་སྟེ་ལྔ་ལྔ་གསུངས་ཤིང་། དཔེར་ན་བུང་དབང་གི་མཉམ་མཞག་དམ་ཚིག་བསྐྱེད་རིམ། གསང་དབང་གི་མཉམ་བཞག་རྩ་རླུང་། ཤེས་རབ་ཡེ་ཤེས་ཀྱི་མཉམ་བཞག་དཀྱིལ་འཁོར་འཁོར་ལོ། དབང་བཞི་པའི་མཉམ་བཞག་རྡོ་རྗེའི་རྦ་རླབས་ལྟ་བུར་སོར་སོར་ཡོད་ཅིང་། ངོར་ཆེན་དཀོན་མཆོག་ལྷུན་གྲུབ་ཀྱིས་ལམ་འབྲས་བུ་དང་བཅས་པའི་གདམས་ངག་གི་གཞུང་ཤིང་རྒྱས་པ་གཞུང་ཇི་ལྟ་བཞིན་བཀྲི་བའི་ལམ་གྱི་དངོས་གཞིའི་ཁྲིད་ཡིག་རྒྱུད་གསུམ་མཛེས་པར་བྱེད་པའི་རྒྱན་ཞེས་བྱ་བ་ལས། རྡོ་རྗེ་ཐེག་པའི་ལུགས་ཀྱི་བརྟེན་པ་སེམས་ལ་རྟོགས་པ་འཆར་བ་རྟེན་ལུས་ལ་གནད་དུ་བསྣུན་པར་རག་ལས་པར་གསུངས་པའི་ཕྱིར་རོ། དེས་ན་སྐབས་འདིར་བསྟན་གྱི་ལུས་ནི་རྟེན་དཀྱིལ་འཁོར་བཞི་ཆར་ལ་གོ་དགོས་སོ། གང་དུ་དབང་བསྐུར་བ་གདན་སོགས་སོགས་ཏེ། བུམ་དབང་གི་དེ་ཁོ་ན་ཉིད་ལྷ་གདན་གསུམ་ཚང་བ། གསང་དབང་གི་དེ་ཁོ་ན་ཉིད་ཡི་གེ་ལ། ཤེས་རབ་ཡེ་ཤེས་ལྷའི་དེ་ཁོ་ན་ཉིད་བྱང་སེམས་ལ། དབང་བཞི་པ་ཡེ་ཤེས་ཀྱི་དེ་ཁོ་ན་ཉིད་རླུང་ལ་གདན་གསུམ་ཚང་བ་སྟེ། དེ་ཡང་སྐུར་བྱེད། བསྐུར་བྱ། སྐུར་རྫས་གསུམ་ཆར་ལ་གདན་གསུམ་ཚང་བ་ཤེས་ཤིང་བསྒོམ་པ་དང་ལྡན་པའི་སྒོ་ནས་སོ། གང་དུ་བསྐུར་རྒྱུའི་དབང་སྟེ། བྱིན་རླབས་ཕྲ་མོ་ཙམ་ལ་དབང་དུ་མིང་བཏགས་པ་ཙམ་མམ། རང་གིས་བདག་འཇུག་ལེན་པ་ཙམ་མམ། རྗེས་གནང་ཙམ་མ་ཡིན་པར། རྒྱུད་སྡེ་ནས་བཤད་པའི་དབང་གི་ཆོ་ག་ཚང་ལ་མ་ནོར་བ་ཞིག་གིས་བསྐུར་རོ། མདོར་ན་ལམ་བཞི་བསྒོམ། ལྟ་བ་བཞི་རྟོགས། གྲུབ་མཐའ་བཞི་སྙོགས། འབྲས་བུ་བཞི་ཐོབ་པ་ལ་དབང་བར་བྱས་པས་ན་དབང་སྟེ། ཞེས་གསུངས། ཡང་འགའ་ཞིག་གིས་དབང་དང་ལམ་འགལ་བ་ལྟར་སྣང་ཡང་མི་འགལ་ཏེ། རྗེ་བཙུན་རིན་པོ་གྲགས་པ་རྒྱལ་མཚན་གྱིས། རྟག་པ་གཉིས་པའི་རྣམ་པར་བཤད་པ་མ་དག་པ་རྣམས་འཇོམས་པར་བྱེད་པའི་རྣམ་འགྲེལ་དག་ལྡན་ལས། དགའ་བཞི་བཤད་པའི་སྐབས་སུ་དབང་དང་ལམ་འགལ་བར་སྙམ་པའི་དོགས་པ་ཞིག་བསླངས་ཏེ། དེའི་ལན་དུ། དབང་གི་དུས་ཉིད་དུའང་ལམ་དུ་མི་འགྱུར་བར་དེའང་མི་རིགས་ལ། དབང་དང་ལམ་འགལ་བ་ཡང་མི་རིགས་ཤིང་། ཞེས་གསུངས། འཇིག་རྟེན་ཕལ་པ་དག་ནི་ད་རིང་ང་བླ་མ་སུ་ཞིག་གི་སྐུ་མདུན་དུ་དབང་ཞུ་བར་སོང་ཡང་ཚོགས་ཆང་ཁ་ལ་རག་མ་སོང་། རྡོ་དྲིལ་མགོ་ལ་བཞག་མ་སོང་བས་ང་ལ་དབང་ཐོབ་མ་སོང་ཟེར་ཞིང་། དེ་ལྟར་བྱུང་ན་དབང་ཐོབ་ཤག་ཤག་དང་། བླ་མས་ཀྱང་དབང་བཞིའི་ངོ་སྤྲོད་ཙམ་དང་། དབང་བཞིའི་ཉམ་ལེན་ཅུང་ཟད་ཙམ་ཡང་རྒྱུད་ལ་མེད་བཞིན་དུ་དབང་སྐུར་ཅི་ཐུབ་དང་དེའི་རྗེས་སུ་འཇིག་རྟེན་ཇི་སྙེད་ཅིག་ཇ་ཚོམ་དུ་འཇུག་པ་ནི་གསང་སྔགས་ཉམ་པའི་རྟགས་མཚན་མངོན་དུ་གྱུར་པ་ཡིན་པས་གཟབ་འཚལ། ངས་འདི་ལྟར་འབྲི་དོན་ནི་སྤྱི་དབང་དུ་གྲགས་ཚད་དང་། རྒྱུད་སྡེ་འོག་མ་གསུམ་གྱི་དབང་ཙམ་གྱི་དོན་བཤད་པ་མིན་པར་གསང་སྔགས་རྡོ་རྗེ་ཐེག་པའི་བླ་མེད་ཀྱི་དབང་བཞིའི་གལ་གནད་ངོ་འཕྲོད་པར་བྱ་བའི་ཕྱིར་ཡིན། དེ་ལྟར་ཤེས་ན་གསང་སྔགས་རྡོ་རྗེ་ཐེག་པའི་ལམ་ལ་འཇུག་པར་དབང་བསྐུར་ལ་མ་རྟེན་པར་ལམ་གཞན་མེད་པར་མཁྱེན་ཡོང་། དེ་ཤེས་པས་ཐ་མལ་གྱི་ལུས་འདི་མ་སྤངས་པར་ཚེ་གཅིག་ལ་འཚང་རྒྱ་ཐུབ་པའི་གསང་སྔགས་རྡོ་རྗེ་ཐེག་པའི་མྱུར་ལམ་ཟབ་མོ་ཤེས་པར་འགྱུར་རོ། དེའང་མཚན་ཉིད་ལྡན་པའི་བླ་མ་ལས་ཐོབ་དགོས་པ་བཤད་པ་ནི་ཆོས་དང་འཇིག་རྟེན་གྱི་ཤེས་བྱ་གང་ཡང་ཐོག་མར་བསླབ་མཁན་གྱི་དགེ་རྒན་མེད་པར་ཤེས་པར་དཀའ་ཞིང་། ལྷག་ཏུ་དུག་སྨན་དུ་སྒྱུར་བའི་སྨན་སྦྱོར་དང་། སྲོག་གི་ཉེན་ལ་ཐུག་པའི་བཤའ་བཅོས་ལྟ་བུ་ནི་ཉམས་མྱོང་དང་སྦྱངས་བ་གཉིས་ཀ་ལྡན་པའི་དགེན་ལ་མ་རྟེན་པར་ལག་ཏུ་ལེན་རྒྱུ་ཤིན་ཏུ་ཉེས་ཆེ་ཞིང་། དེ་བས་ཉེན་ཆེ་བ་དང་ལག་ལེན་དཀའ་བའི་མདོ་ཡི་སྐབས་སུ་ཉོན་མོངས་པ་འདོད་ཆགས་ཞེ་སྡང་རྣམས་སྤང་བྱ་བཤད་པ་དེ་དག་སྔགས་ཀྱི་སྐབས་སུ་སྤོང་མི་དགོས་པར་གྲོགས་ཀྱི་ཚུལ་དུ་རྟེན་ཏེ་སྐྱོན་ཡོན་ཏན་དུ་ལེན་པའི་གདམས་ངག བར་ཆད་དངོས་གྲུབ་ཏུ་ལེན་པའི་གདམས་ངག་ལྟ་བུའི་ལམ་ཟབ་མོ་དག་ཉམས་སུ་ལེན་པར་དེ་བསྟན་ཤེས་མཁན་གྱི་ལམ་སྟོན་མཁན་ཞིག་མེད་པར་ལམ་ལ་འཇུག་པར་མི་ནུས་པས་བླ་མའི་མན་ངག་ལ་རྟེན་དགོས་པར་བཤད་པ་ཡིན། གལ་ཏེ་སྨིན་བྱེད་ཀྱི་དབང་ལ་རྟེན་མི་དགོས་པར་རང་ཉིད་སྨིན་ཟིན་པའང་སྨིན་པའི་ལམ་གཞན་ཞིག་ཡོད་ན་བླ་མ་ལས་དབང་ལུང་མན་ངག་ཞུ་དགོས་དོན་ཅིའང་མེད། གལ་ཏེ་གལ་ཏེ་ལམ་གཞན་ཞིག་གམ་གནས་ཚད་ཚང་བཞིན་དུ་ད་དུང་བླ་མ་ལ་ངེས་པར་རྟེན་དགོས་ཟེར་ན་བླ་མ་རང་ཉིད་ཀྱི་ལྟོ་ཕོ་བ་དང་མིང་སྐམ་པོ་ཙམ་ལ་རེ་སྟེ་སངས་རྒྱས་ཀྱི་བསྟན་པ་སྒེར་དཔྱོད་བདག་དབང་བྱས་པ་ཙམ་ལས་གཞན་ཅི་ཡང་མ་ཡིན་པར་ཐག་ཆོད་པས་དུས་དེ་ནས་བཟུང་སྟེ་བླ་མ་འདོར་བར་བྱའོ། འོན་ཏེ་གསང་སྔགས་ལ་འཇུག་པའི་ལམ་ནི་དབང་འདི་ཉིད་ཁོ་ནར་ཐུག་འདུག་པས་དབང་གི་གོ་དོན་དང་གལ་གནད་ལ་ཏིང་ཚུག་པར་བསླབས་ཏེ་གཟབ་པར་བྱའོ།
༼བརྗོད་གཞི་ལྔ་པ་འཁོར་འདས་དབྱེར་མེད་དང་གསལ་སྟོང་འཛིན་མེད་ཀྱི་དོན།༽
ས་ལུགས་ལ་སྔགས་ཀྱི་ལྟ་བའི་ཆོས་སྐད་དུ་འཁོར་འདས་འབྱེར་མེད་དམ་གསལ་སྟོང་འཛིན་མེད་ཅེས་ཞུ། སྔགས་ལུགས་ཀྱི་ལྟ་བ་དེ་སྤྱིར་ངོ་བོའི་ཆ་ནས་ཕ་རོལ་དུ་ཕྱིན་པའི་སྐབས་ནས་བཞད་པའི་དོན་དམ་སྤྲོས་བྲལ་ལས་མ་འདས་ཀྱང་ཐབས་ཀྱི་སྒོ་ནས་ཁྱད་པར་དུ་འཕགས་པ་དུ་མ་ཞིག་བཤད་ཅིང་། དེའང་འཁོར་འདས་དབྱེར་མེད་ཅེས་པའི་དོན་ནི། མགོན་པོ་ཀླུ་སྒྲུབ་ཀྱིས། འཁོར་བ་མྱ་ངན་འདས་པ་ཞེས། །དེ་ཉིད་མ་མཐོང་པ་རྣམ་སྨྲ། དེ་ཉིད་གཟིགས་རྣམས་འཁོར་བ་དང་། །མྱ་ངན་འདས་པ་གཉིས་མི་བཞེད། །ཅེས་དང་། བྲམ་ཟེ་ཆེན་པོ་ས་ར་ཧས། འཁོར་བ་གང་དེ་མྱ་ངན་འདས་པར་ངེས། །དབྱེ་བ་གཞན་དུ་སེམས་པ་མ་ཡིན་ཏེ། །རང་བཞིན་གཅིག་གི་དབྱེ་བ་རྣམ་པར་ངེས། །ཞེས་དང་། གཉིས་མེད་སྟོང་ཉིད་གཅིག་པུ་ཡིན། ཅེས་འཁོར་འདས་དབྱེར་མེད་ཀྱི་དོན་ལེགས་པར་གསུངས། གསལ་སྟོང་འཛིམ་མེད་ཀྱི་དོན་ཡང་། ངོར་ཆེན་ཀུན་མཆོག་ལྷུན་གྲུབ་ཀྱིས་རྒྱུད་གསུམ་མཛེས་རྒྱན་ལས། ལྷན་ཅིག་སྐྱེས་པའི་ཆོས་གསུམ་གྱི་སྐབས་སུ། །མཚན་ཉིད་གསལ་བ་འཁོར་བ། རང་བཞིན་སྟོང་པ་མྱང་འདས། །ངོ་བོ་ཟུང་འཇུག་དབྱེར་མེད། ཉམས་སུ་བླང་བའི་གནད་གསུམ་གྱི་སྐབས་སུ། །ཆོས་ཅན་གསལ་བ་འཁོར་བ། ཆོས་ཉིད་སྟོང་པ་མྱང་འདས། ངོ་བོ་ཟུང་འཇུག་དབྱེར་མེད། རྒྱུད་གསུམ་གྱི་རྒྱུ་རྒྱུད་སྐབས་སུ། གསལ་བ་སེམས་ཀྱི་མཚན་ཉིད་འཁོར་བ། སྟོང་པ་སེམས་ཀྱི་རང་བཞིན་མྱང་འདས། བཅོས་མིན་སེམས་ཀྱི་ངོ་བོ་དབྱེར་མེད། ཐབས་རྒྱུད་ཀྱི་སྐབས་སུ། སྦྱང་གཞི་འཁོར་བ། སྦྱོང་བྱེད་མྱང་འདས། སྦྱང་གཞི་དེ་སྦྱོང་བྱེད་དེའི་ངོ་བོར་དག་པ་དབྱེར་མེད། འབྲས་རྒྱུད་ཀྱི་སྐབས་སུ། ལྷུན་གྲུབ་འཁོར་བ། གནས་གྱུར་མྱང་འདས། མི་འགལ་བར་དབྱེར་མེད། ཅེས་ཆོས་ཅན་དང་ཆོས་ཉིད་དང་། རྒྱུད་གསུམ་གྱི་སྒོ་ནས་གསལ་སྟོང་ཟུང་འཇུག་གི་དོན་གཏན་ལ་དབབས་ཚུལ་གསལ་བར་གསུངས། ཡང་དེ་ཉིད་དུ། སེམས་ཀྱི་མཚན་ཉིད་གསལ་བ། རང་བཞིན་སྟོང་པ། ངོ་བོ་ཟུང་འཇུག་གསུམ་གདོད་མ་ནས་དབྱེར་མི་ཕྱེད་པ། རྒྱུད་གཅིག ངོ་བོ་གཅིག རོ་གཅིག སོ་སོ་མ་ཡིན་ཐ་མི་དད་པ་དེ་ཉིད་ལ་འཁོར་འདས་ཀུན་གྱི་རྩ་བ་སེམས་ཉིད་ལྷན་ཅིག་སྐྱེས་པའི་ཡེ་ཤེས་ཞེས་བྱའོ། དེ་ལྟར་ཡང་རྩ་རྒྱུད་ལས། ལྷན་ཅིག་སྐྱེས་པ་གང་སྐྱེས་པ། །ལྷན་ཅིག་སྐྱེས་པ་དེ་བརྗོད་བྱ། །རང་བཞིན་ལྷན་ཅིག་སྐྱེས་ཞེས་བརྗོད། །རྣམ་པ་ཐམས་ཅད་སྡོམ་པ་གཅིག །ཅེས་དང་། ཡང་ལམ་ལྷན་ཅིག་སྐྱེས་པའི་ཆོས་གསུམ་གྱི་སྐབས་སུ་རྣལ་འབྱོར་དབང་ཕྱུག་གིས། འདི་ཉིད་གསལ་ཞིང་སྟོང་པ་ཉིད། །རིག་པ་དེ་ཉིད་མ་འགག་པ། །རང་རིག་ཡེ་ཤེས་སྐད་ཅིག་མ། །འདི་ནི་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་ཏེ། །འདི་ནི་མཆོག་ཏུ་བདེ་བ་ཉིད། །འདི་ལས་མཚོན་ཏེ་ཤེས་པར་བྱ། །འདིའི་རང་བཞིན་སྐུ་གསུམ་དང་། །ཡེ་ཤེས་ལྔ་ཡི་བདག་ཉིད་ཅན། །ཞེས་གསུངས་ཏེ། ཁ་ནང་བལྟས་ཀྱི་སེམས་རང་རིག་ཅིང་གསལ་ཙམ་མ་འགགས་པ་པར་མྱོང་བ་དེ་ཉིད་ལ་གསལ་བ་སེམས་ཀྱི་མཚན་ཉིད་ཅེས་བྱ། གསལ་ཙམ་དེ་ཉིད་རང་གི་ངོ་བོའི་སྒོ་ནས་ཐོག་མར་སྐྱེ་བ་མེད། །བར་དུ་གནས་པ་མེད། མཐར་འགག་པ་མེད། ཁ་དོག་དང་དབྱིབས་སུ་མ་གྲུབ། ལུས་ཕྱི་ནང་བར་གསུམ་གང་དུ་ཡང་མི་གནས། གང་དུ་བཙལ་ཡང་མི་བརྙེད། ཅི་ལྟར་བརྟགས་ཀྱང་མ་གྲུབ་པ་དེ་ཉིད་ལ་སྟོང་པ་སེམས་ཀྱི་མཚན་ཉིད་ཅེས་བྱ་ཞིང་། དེ་ལྟར་རང་བཞིན་ཅིར་ཡང་མ་གྲུབ་པའི་དུས་ཉིད་ན་རང་སྣང་གི་རྩལ་སྣ་ཚོགས་འགག་མེད་དུ་འཆར་བས་གདོད་མ་ནས་མེད་མ་མྱོང་། རང་སྣང་གི་རྩལ་སྣ་ཚོགས་འགག་མེད་དུ་འཆར་བའི་དུས་ཉིད་ན་རང་བཞིན་ཅི་ཡང་མ་གྲུབ་པས་གདོད་མ་ནས་ཡོད་མ་མྱོང་། གདོད་མ་ནས་ཡོད་མ་མྱོང་བའི་རང་བཞིན་སྟོང་པ། གདོད་མ་ནས་མེད་མ་མྱོང་བའི་མཚན་ཉིད་གསལ་བ་གཉིས་གདོད་མ་ནས་བྲལ་མ་མྱོང་བའི་རང་སྣང་དུ་གསལ་ལེ་བ། རང་སྟོང་དུ་སང་ངེ་བ། རང་རིག་ཏུ་རྗེན་ནེ་བ་དེ་ཉིད་སོ་སོ་རང་རིག་པའི་ཡེ་ཤེས་ཀྱིས་ཉམས་སུ་མྱོང་བར་བྱ་བ་ཙམ་ལས་དོན་དམ་གཤིས་ལུགས་ལ་ངོ་བོ་ངོས་བཟུང་མེད། བློས་གཟུང་དུ་མེད། ཚིག་བརྗོད་དུ་མེད། ཐ་སྙད་ཀུན་རྫོན་ཏུ་འཇིག་རྟེན་གྱི་རྨོ་པ་གསལ་བའི་ཕྱིར་གཉིས་མེད་ཅེས་བྱ། ཟུང་འཇུག་ཅེས་བྱ། བརྗོད་བྲལ་ཅེས་བྱ། བཅོས་མིན་སེམས་ཀྱི་ངོ་བོ་ཅེས་བྱའོ། དེ་ལྟ་བུའི་གནས་ལུགས་དེ་འཁོར་འདས་ཐམས་ཅད་ལ་ཁྱབ་ནས་ཡོད་ཀྱང་། རང་ངོ་རང་གིས་མ་ཤེས་པ་རྣམས་ལ་འཁོར་བ་ཞེས་བྱ། ཤེས་པ་རྣམས་ལ་མྱང་འདས་ཞེས་བྱ། འཁོར་འདས་ཞེས་པ་རྟོགས་མ་རྟོགས་ཀྱི་ངོས་ནས་སོ་སོར་བཞག་པ་ཙམ་ཡིན། གནས་ལུགས་རང་ངོས་ནས་འཁོར་བ་ཞེས་ངན་པ་ཞིག་ལོགས་སུ་སྤང་རྒྱུ་མེད། མྱང་འདས་བཟང་པོ་ཞིག་ལོགས་སུ་བསྒྲུབ་རྒྱུ་མེད། དེ་ལེགས་པར་རྟོགས་ན་འཁོར་འདས་དབྱེར་མེད་ཀྱི་ལྟ་བ་རྟོགས་པ་ཞེས་བྱ་བ་ཡིན་ནོ། དེ་ཡང་སློབ་དཔོན་ཨཱརྱ་དེ་བས། འཁོར་བ་མྱ་ངན་འདས་པ་ཞེས། །དེ་ཉིད་མ་མཐོང་པ་ཡི་སེམས། །འཁོར་མེད་མྱ་ངན་འདས་མེད་ཅེས། །དེ་ཉིད་མཐོང་བ་རྣམས་ཀྱི་སེམས། ཞེས་དང་། རྗེ་བཙུན་རིན་པོ་ཆེའི་མགུར་ལས། འཁོར་བ་བཙལ་བས་མ་བརྙེད་པ། །དེ་མྱ་ངན་འདས་པའི་རང་བཞིན་ཡིན། །འཁོར་འདས་མེད་པ་གོ་བ་དེ། །འཁོར་འདས་དབྱེར་མེད་ཀྱི་ལྟ་བ་ཡིན། །དབྱེར་མེད་ཀྱི་ངང་ལ་བདེ་མོ་འདུག །འདི་ལྟར་ཤེས་པའི་རྣལ་འབྱོར་པ། །བསྒྲུབ་རྒྱུ་མེད་ཀྱང་སྒྲུབ་ལ་བརྩོན། །བསྒོམ་རྒྱུ་མེད་ཀྱང་སྒོམ་ལ་བརྩོན། །བསྲུང་རྒྱུ་མེད་ཀྱང་དམ་ཚིག་སྲུང་། །དེ་ལྟར་ཤེས་ན་བདེ་སྟེ་མཆི། །བསྒྲུབ་རྒྱུ་མེད་པའི་སངས་རྒྱས་དེ། །རང་གི་སེམས་ལ་ཡོད་པ་ཡིན། །བསྒྲུབ་མེད་སངས་རྒྱས་གྲུབ་སྟེ་མཆི། །ཞེས་དང་། རྩ་རྒྱུད་ལས། འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་བརྙེད་པ་མེད། །སེམས་ནི་རྫོགས་པའི་སངས་རྒྱས་ཉིད། །སངས་རྒྱས་གཞན་དུ་བསྟན་པ་མེད། །ཅེས་གསུངས། སེམས་ཅན་གྱི་དུས་ནས་སངས་རྒྱས་རང་ཆས་སུ་ཡོད་ཅེས་མདོ་རྒྱུད་ཀྱི་ལུང་དུ་མ་ཞིག་ཡོད། དེ་ལ་འགའ་ཞིག་གིས་དྲང་དོན་ཡིན་ཟེར། གཞན་འགའ་ཞིག་གིས་ངེས་དོན་ཡིན་ཟེར། གཉིས་ཀར་དྲང་ངེས་འགྲེལ་ལུགས་རེ་ཡོད་ཅིང་། སྔ་མས་སེམས་ཅན་ཐམས་ཅད་སངས་རྒྱས་ཡིན་གསུངས་པ་དེ་ངེས་དོན་དང་། ཕྱི་མས་སེམས་ཅན་ཐམས་ཅད་སངས་རྒྱས་ཡིན་གསུངས་པ་དེ་དྲང་དོན་དུ་འགྲེལ་ལུགས་མི་འདྲ་ཙམ་ལས་སོ་སོ་སྐྱེ་བོ་རྣམས་སངས་རྒྱས་ཡིན་ཅེས་སུས་ཀྱང་མི་ཟེར། དེ་ལྟར་ན་ཡང་སྔ་མས་ངེས་དོན་ཡིན་ལུགས་ལ་སེམས་ཅན་ཐམས་ཅད་སངས་རྒྱས་ཡིན་ཞེས་པའི་སངས་རྒྱས་ཀྱི་གོ་བ་དེ་ཕྱི་མ་དག་གིས་ལོན་མི་འདུག་སྙམས། གང་ལགས་ཤེ་ན་སྔ་མ་དག་གིས་འདི་ལྟར་འདོད་དེ། དབུས་མཐའ་ལས། སྟོང་པ་ཉིད་ནི་མདོ་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ཀྱི་རྣམས་གྲངས་སོ། གཞན་མིན་ཕྱིན་ཅི་ལོག་མ་ཡིན། །ཅེས་པའི་དོན་དང་མཐུན་པར་ཆོས་དབྱིངས་དེ་བཞིན་ཉིད་ལ་སངས་རྒྱས་ཞེས་མིང་གི་རྣམས་གྲངས་སུ་འདོད་བཞིན་འདུག་པས་ཆོས་དབྱོངས་ནི་སོ་སྐྱེས་གང་ཞིག་གི་འཐོབ་བྱའི་འབྲས་བུ་ཡིན་མིན་དང་། དེ་བཞིན་གཤེགས་པ་རྣམས་ཀྱིས་གསུངས་པ་དང་མ་གསུངས་ལ་མ་ལྟོས་པར་དབྱིངས་ཀྱི་སངས་རྒྱས་དེ་ཡེ་ནས་ཡོད་ཡོད་པ་ཡིན་པས་དེའི་དོན་མཁྱེན་པར་གལ། ཕྱི་མ་དག་གིས་ནི་སོ་སྐྱེ་དང་སངས་རྒྱས་གཉིས་རྒྱུ་འབྲས་སུ་བཞག་སྟེ་སེམས་ཅན་ཐམས་ཅད་སངས་རྒྱས་ཡིན་ཅེས་པའི་མདོ་ལུང་དག་ནི་འབྲས་མིང་རྒྱུ་རུ་བཏགས་པར་འདོད་དོ། དེས་ན་སོ་སོའི་ཐུན་མིན་བཤད་པ་མ་འཆོལ་བ་དང་གཞན་གྱི་ལེགས་བཤད་ལེན་ཤེས་ན་བསྟན་པ་སྤྱིའི་གོ་བ་འཆར་སྟེ་རིས་མེད་ཀྱི་བསྟན་པ་རིན་པོ་ཆེར་དག་སྣང་ཕྱོགས་མེད་དུ་རྒྱས་ངེས་ཀྱང་ངེས། དེ་ནི་འཕྲོས་དོན་ཙམ་མོ། སྨོན་པ་བཟང་པོས་མཚམས་སྦྱར་ཏེ་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རི་གླིང་དུ་རིས་མེད་ཀྱི་མདོ་སྔགས་ཟུང་གི་ལྟ་གྲུབ་བགྲོ་གླེང་ཐེངས་དང་པོའི་དངོས་གཞིའི་གཏམ་བཤད་ཆེད་དུ་བྲིས་ཟིན་པ་ཞིག་ལ་ཁ་སྣོན་གཅོག་ཕྲི་ཅུང་ཟད་བཏང་སྟེ་བོད་རྒྱལ་ལོ་༢༡༤༥ རབ་གནས་ས་ཁྱི། ཕྱི་ལོ་༢༠༡༨ ཟླ་༠༦ ཚེས་༡༦ ཉིན་ཁྲིཿའགྱུར་མེད་རྡོ་རྗེ་འབོད་པས་རེ་ཞིག་འཇུག་གྲུབ་པར་བགྱིས། །དགེའོ། དགེའོ། དགེའོ།། །།
དཔྱད་གཏམ་སྤེལ་མཁན་ལ་གསལ་བརྡ།