ཡོང་ཁུངས། སེམས་ཀྱི་ཉི་ཟླའི་བོད་ཡིག་དྲ་བ།
སྤྲེའུ་དང་བྲག་སྲིན་མོ་ལ་བརྟེན་ནས་བོད་ཀྱི་མི་རྣམས་སྤེལ་བའི་མཛད་པ།
ཨོཾ་མ་ཎི་པདྨ་ཧཱུྃ། སྤྱན་རས་གཟིགས་དབང་བཅུ་གཅིག་ཞལ།། ཕྱག་སྟོང་ཉོན་མོངས་སྐྱོབ་པའི་ཕྱག། སྤྱན་སྟོང་ཤེས་རབ་འོད་གསལ་བ།། འགྲོ་དོན་མཛད་ལ་ཕྱག་འཚལ་ལོ།། ལྷ་ཇོ་བོ་ཐུགས་རྗེ་ཆེན་པོའི་བཞུགས་གནས་ལྷ་ས་འཕྲུལ་སྣང་གི་གཏེར་ཆོས་འདི་ལ་གཉིས། མཛད་པ་ལོ་རྒྱུས་ཀྱི་སྐོར་དང་། གསུང་སྒྲོས་མན་ངག་གི་སྐོར་རོ།། མཛད་པ་ལོ་རྒྱུས་ཀྱི་སྐོར་ལ་གཉིས། སངས་རྒྱས་ཤཱཀྱ་ཐུབ་པའི་བསྟན་པ་ལ་མཛད་པའི་ལོ་རྒྱུས་ནི། བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ། ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པས་བཀའ་སྩལ་པ། བོད་ཁ་བ་ཅན་ཞེས་བྱ་བའི་རྒྱལ་ཁམས། བཅོམ་ལྡན་འདས་ཤཱཀྱ་ཐུབ་པའི་སྐུའི་ཞབས་ཀྱིས་མ་བཅགས། གསུང་གི་འོད་ཟེར་གྱིས་མ་ཁྱབ། ཐུགས་ཀྱིས་བྱིན་གྱིས་མ་བརླབས་པ་དེ། བྱང་ཆུབ་སེམས་དཔའ་ཁྱོད་ཀྱིས་འདུལ་བར་འགྱུར་བས། ཐོག་མར་འགྲོ་བམི་སྤེལ་ཏེ། དེ་ནས་ཟང་ཟིང་དང་ཆོས་ཀྱི་སྦྱིན་པས་བསྡུས་ལ་དེ་དག་གི་རྒྱུད་སྨིན་པར་གྱིས་ཤིག དེ་ནས་འཕགས་པ་སྤྱན་རས་གཟིགས་དབང་ཕྱུག་གིས། སངས་རྒྱས་སྣང་བ་མཐའ་ཡས་ལ་མཉན་ཏེ། རི་བོ་པོ་ཏ་ལའི་རྩེ་མོ། རིན་པོ་ཆེ་སྣ་ཚོགས་ཀྱི་ཁང་པར་བྱོན་ཏེ། བོད་ཁ་བ་ཅན་གྱི་གདུལ་བྱ་ལ་གཟིགས་པས། དེར་སྐྱེས་པའི་སེམས་ཅན་རྣམས་ལྕགས་ཀྱི་ཟ་མ་ཏོག་ཁ་བཅད་པ་འདྲ་བར་ངན་སོང་ནས་ཐར་ས་མེད་པར་གཟིགས་ནས། ཕྱག་མཐིལ་གཡོན་པ་ལས་འོད་ཟེར་གཅིག་འཕྲོས་པས། སྤྲེའུ་བྱང་ཆུབ་སེམས་དཔའ་ཅིག་ཏུ་གྱུར་ཏེ་བོད་ཁ་བ་ཅན་གྱི་ནགས་ཁྲོད་དུ་འདུག་ནས་བསམ་གཏན་སྒོམ་པར་བྱེད་དོ།། འཕགས་མ་སྒྲོལ་མས་ཀྱང་ཁ་བ་ཅན་དུ་མི་སྤེལ་བའི་ཆེད་དུ་བྲག་སྲིན་མོ་ཞིག་ཏུ་སྤྲུལ་ལོ།། དེའི་ཚེ་སྟོད་གཡའ་དང་གངས་ཀྱི་བར་ན་གཅན་གཟན་དང་རི་དྭགས། བར་ནགས་དང་བྲག་གི་གསེབ་ན་སྤྲེའུ་དང་བྲག་སྲིན། སྨད་ཐང་དང་ཆུ་ལ་གླང་པོ་ཆེ་དང་བྱ་སྣ་ཚོགས་ཀྱིས་དབང་བྱས་ཏེ། སེམས་ཅན་མི་བྱ་བའི་མིང་ཡང་མེད་པ་ལ། དུས་ཅིག་གི་ཚེ་བྲག་སྲིན་མོ་འདོད་ཆགས་ཀྱིས་གདུང་པས་སྤྲེ་མོའི་ཆ་བྱད་དུ་བྱས་ཏེ། ཞག་བདུན་གྱི་བར་དུ་སྤྲེའུའི་དྲུང་དུ་འོངས་ནས། འདོད་པ་སྤྱོད་ཅིག་པའི་བརྡ་བྱས་ཀྱང་། སྤྲེའུ་དེ་འདོད་པས་སེམས་གཡོས་པར་མ་གྱུར་ཏོ།། དེ་ནས་བྲག་སྲིན་མོ་དེས་ཡང་སྤྲེའུའི་གན་དུ་འོངས་ནས་སྨྲས་པ། བདག་ཁྱོད་དང་ཁྱིམ་ཐབས་བྱའོ།། སྤྲེའུས་སྨྲས་པ། བདག་ཁྱོད་དང་ཁྱིམ་ཐབས་བྱར་མི་རུང་ངོ་།། བྲག་སྲིན་མོས་སྨྲས་པ། སྤྲེའུའི་རྒྱལ་པོ་བདག་ལ་དགོངས་ཤིང་གསོན།། བདག་ནི་ལས་ཀྱི་དབང་གིས་སྲིན་མོར་སྐྱེས།། འདོད་པའི་དབང་གིས་ཁྱོད་ལ་ཞེན་ཅིང་ཆགས།། ཆགས་པའི་དབང་གིས་ཁྱོད་ལ་འཁོར་ཞིང་གསོལ།། ཁྱོད་ཀྱིས་བདགལ་ཁྱིམ་ཐབས་མ་བྱས་ན།། བདག་ནི་སྲིན་པོ་དག་དང་འགྲོགས་པར་བྱེད།། སྲིན་པོའི་ཕྲུ་གུ་དཔག་མེད་སྐྱེས་གྱུར་ནས།། ནང་མ་རེ་ལ་སྲོག་ཆགས་སྟོང་སྟོང་ཟ།། ཉི་མ་རེ་ལ་སྲོག་ཆགས་ཁྲི་ཁྲི་གསོད།། ཁ་བ་ཅན་གྱི་ཡུལ་ཕྱོགས་འདི་དག་ཉིད།། སྲིན་པོའི་རང་བཞིན་དག་ཏུ་གྱུར་ནས་ཀྱང་།། སྲོག་ཆགས་གཞན་དག་སྲིན་པོས་ཟ་བར་འགྱུར། །བདག་ནི་ལས་ཀྱི་དབང་གིས་ཤི་ནས་ཀྱང་།། སེམས་ཅན་དམྱལ་བ་ཆེན་པོའི་གནས་སུ་ལྷུང་།། དེ་ཕྱིར་བདག་ལ་དགོངས་ཏེ་ཐུགས་རྗེས་ཟུངས།། དེ་ནས་སྤྲེའུ་དེས་ཆགས་པ་མེད་པར་སྙིང་རྗེས་ཀུན་ནས་བསླངས་ཏེ། འཕགས་པ་ལ་གསོལ་བ་བཏབ་པ། ཀྱེ་མ་འགྲོ་བའི་མགོན་པོ་ཐུགས་རྗེ་ཅན།། བདུད་ཀྱི་རིགས་ཀྱི་སྲིན་མོ་ཆགས་ཅན་ཞིག། བདག་ལ་ཐོ་འཚམ་བར་ཆད་བྱེད་དུ་བྱུང་།། དེ་ལ་བདག་གིས་ཇི་ལྟར་བགྱི་བ་སྩོལ།། འཕགས་པས་བཀའ་སྩལ་པ། བྲག་སྲིན་མོ་དང་ཁྱིམ་ཐབས་གྱིས་ཤིག ཁྱོད་ཀྱི་བུ་ཚ་རིགས་རྒྱུད་འཕེལ་ཏེ། མཐར་མིར་གྱུར་ནས་ཆོས་ཀྱི་རྟེན་དུ་འགྱུར་རོ།། དེ་ནས་སྤྲེའུ་དེས་འཕགས་པའི་བཀའ་ལས་མཉན་ཏེ། སྲིན་མོ་དང་ཁྱིམ་ཐབས་བྱས་པས་རིགས་དྲུག་ལས་གཅིག་ལྷ་མ་ཡིན་ལས་ཚེ་འཕོས་པས་ཁོང་ཁྲོ་ཆེ་བ་རྩུབ་པ། གཅིག་མི་ལས་ཚེ་འཕོས་པས་འདོད་པ་དང་སྲེད་པ་ཆེ་བ། གཅིག་དུད་འགྲོ་ལས་ཚེ་འཕོས་པས་གོ་བ་དང་ཤེས་རིག་ཆུང་བ། གཅིག་ཡི་དྭགས་ལས་ཚེ་འཕོས་པས་ལྟོ་ལ་ངན་ལ་སེར་སྣ་ཆེ་བ། གཅིག་དམྱལ་བ་ལས་ཚེ་འཕོས་པས་གཏུམ་པ། སྡུག་སྲན་ཆེ་བ་ཅིག་བྱུང་། བུ་དེ་རྣམས་ཀྱང་ཕ་སྤྲེའུ་ཡིན་པས་ལུས་སྤུས་གང་བ། གདོང་དམར་བ། མ་བྲག་སྲིན་མོ་ཡིན་པས་མཇུག་མ་མེད་པ་ཤ་ཁྲག་ལ་དགའ་བ། སྐྲ་ཡོད་པ་སྨྲ་ཤེས་པའོ།། ཕ་སྤྲེའུ་དེས་བུ་ལྷོ་ཕྱོགས་ཀྱི་ནགས་རྨ་བྱ་ཚོགས་ཅན་ཞེས་བྱ་བར་སྤྲེའུ་ཡོད་པའི་ཟླ་ལ་བསྐྱལ་ཏེ། རེང་ཞིག་ལོན་ནས་བལྟར་ཕྱིན་ཙ་ན། སྤྲེའུ་ཡང་མ་ཡིན། མི་ཡང་མ་ཡིན་པ་མང་དུ་འཕེལ་ནས་འདུག་གོ། དེ་རྣམས་ཀྱང་ཁ་ཅིག་ནི་ཕའི་རིགས་སུ་གྱུར་ཏེ། དད་པ་དང་། བརྩོན་འགྲུས་དང་། ཤེས་རབ་དང་སྙིང་རྗེ་ལ་སོགས་པ་ཆེ་བ། དགེ་བའི་རྩ་བ་ཆུང་ངུས་མི་ངོམས་པ། བྱང་ཆུབ་སེམས་དཔའི་རིགས་ཅན་དུ་གྱུར་ཏོ།། ཁ་ཅིག་ནི་མའི་རིགས་སུ་གྱུར་ཏེ། སྲོགས་གཅོད་དང་ཤ་ཁྲག་ལ་དགའ་བ། ལུས་སྟོབས་དང་སྙིང་སྟོབས་ཆེ་བ། རྐང་ལག་གིས་འདུག་མི་ཚུགས་པ་གནོད་སྦྱིན་ཤ་ཟའི་རིགས་སུ་གྱུར་ཏོ།། དེའི་ཚེ་འཕགས་སྤྱན་རས་གཟིགས་དབང་ཕྱུག་གིས་སྤྲེའུ་ལ་ནོར་བུ་དང་འབྲུ་སྣ་ལྔ་གནང་སྟེ། ཁྱོད་ཀྱི་རིགས་རྒྱུད་དེ་རྣམས་ཀྱི་ཟས་སྐལ་གྱིས་ཤིག ཁྱོད་ཀྱི་རིགས་རྒྱུད་མིར་གྱུར་པའི་ཚེ། མཐར་རིན་པོ་ཆེ་གསེར་དངུལ་ལ་སོགས་པས་ཀྱང་འཚོ་ཞིང་། རིན་པོ་ཆེའི་འབྱུང་ཁུངས་ཀྱང་དུས་དུས་སུ་ཁ་འབྱེ་བར་འགྱུར་རོ་ཞེས་བཀའ་སྩལ་ཏེ། ས་གཞི་རིན་པོ་ཆེའི་འབྱུང་ཁུངས་སུ་བྱིན་གྱིས་བརླབས་སོ།། དེ་ནས་སྤྲེའུ་བྱང་ཆུབ་སེམས་དཔའ་དེས་བོད་ཁ་བ་ཅན་གྱི་ཡུལ་དབུས་སུ་འབྲུ་དེ་དག་བཏབ་ནས་སྨིན་པ་དང་། སྤྲེ་ཕྲུག་རྣམས་བཀུག་ནས་འདི་ལ་ཟོ་དང་སྨྲས་པས། ཡུལ་དེ་ལ་ཟོ་ཐང་དུ་གྲགས་སོ། །དེ་དག་ནི་ཟང་ཟིང་གིས་བསྡུས་པའོ།། དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་ཕྱག་གཡས་པའི་མཐིལ་ནས་འོད་ཟེར་སྤྲོས་པ་ལས། འོད་ཟེར་དེ་ཁྱེའུ་མཚན་དང་དཔེ་བྱད་དུ་ལྡན་པ་ཅིག་ཏུ་གྱུར་ནས། སྤྲེ་ཕྲུག་རྣམས་ཀྱི་ཁྲོད་དུ་ཕྱིན་པ་དང་དེ་དག་གིས་སྨྲས་པ། ཁྱོད་ཀྱི་གཟུགས་མཛེས་པ་འདི་ཅི་ལས་བྱུང་། ཁྱེའུས་སྨྲས་པ། བདག་གིས་ལུས་ངག་ཡིད་གསུམ་གྱི་ཉེས་སྤྱོད་མི་དགེ་བ་བཅུ་སྤངས་ཤིང་དགེ་བ་བཅུ་སྤྱད་པ་ལས་བྱུང་ངོ་།། དེ་དག་གིས་སྨྲས་པ། ཁྱོད་ཀྱི་དེ་བདག་ཅག་རྣམས་ལ་ཡང་སློབས་ཤིག ཁྱེའུ་དེས་དེ་དག་ལ་ལུས་ངག་ཡིད་གསུམ་གྱི་ཉེས་སྤྱོད་མི་བ་བཅུ་སྤྱད་ན། ངན་འགྲོ་ལོག་པར་ལྟུང་ཞིང་དེ་ལས་བཟློག་སྟེ། ལུས་ངག་ཡིད་གསུམ་གྱི་ལེགས་སྤྱོད་དགེ་བ་བཅུ་སྤྱད་པས་བདེ་འགྲོ་མཐོ་རིས་ཀྱི་མི་རྣམས་དང་སྐལ་བ་མཉམ་པར་འགྱུར་རོ་ཞེས་ཆོས་བསྟན་ཏེ་དེ་དག་གིས་ཀྱང་། དེ་བཞིན་དུ་བྱས་པས་རིམ་གྱིས་མི་ལུས་བཟང་པོར་གྱུར་ཏེ། དེ་དག་ནི་ཆོས་ཀྱིས་བསྡུས་པའོ།། སྤྲེའུ་དང་བྲག་སྲིན་མོ་ལ་བརྟེན་ནས་བོད་ཀྱི་མི་རྣམས་སྤེལ་བའི་མཛད་པའོ།།
དཔྱད་གཏམ་སྤེལ་མཁན་ལ་གསལ་བརྡ།