༼ཕ༽
༄༅། །ཡང་ལྷན་སྐྱེས་ཀྱི་སྒྲུབ་ཐབས་བཞུགས།།
༄༅། །བླ་མ་དམ་པའི་ཞབས་ལ་ཕྱག་འཚལ་ལོ། །དཔལ་བདེ་མཆོག་ལྷན་ཅིག་སྐྱེས་པ་བསྒོམ་པར་འདོད་པས། སྟན་བདེ་བ་ལ་བསྡད། བླ་མ་དང་དཀོན་མཆོག་གསུམ་ལ་སྐྱབས་སུ་འགྲོ་བ་ལན་གསུམ་བྱ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་དོན་དུ་འཁོར་ལོ་བདེ་མཆོག་བསྒོམ་སྙམ་དུ་བྱང་ཆུབ་ཀྱི་སེམས་བསྒོམ། དེ་ནས་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། ཞེས་བརྗོད་པས་བདག་དང་སྣང་བ་ཐམས་ཅད་སྟོང་པར་བསྒོམ། སྟོང་པའི་ངང་ལས་སྔོན་གྱི་སྨོན་ལམ་གྱི་མཐུས་རང་གི་སེམས་པྃ་ལས་པདྨ་རྃ་ལས་ཉི་མའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ཡོངས་སུ་གྱུར་པ་ལས་རང་སྐད་ཅིག་གིས་འཁོར་ལོ་བདེ་མཆོག་ཏུ་གྱུར་པར་བསྒོམ། དེ་ཡང་སྐུ་མདོག་སྔོན་པོ་པདྨ་དང་ཉི་མའི་གདན་གྱི་སྟེང་དུ་ཞབས་གཡས་བརྐྱང་བས་དུས་མཚན་མ་དམར་མོ་དང༌། གཡོན་བསྐུམ་པས་འཇིགས་བྱེད་ནག་པོ་མནན་པ། ཞལ་གཅིག་ཕྱག་གཉིས་པ། སྤྱན་གསུམ་པ། ཕྱག་གཡས་པས་རྡོ་རྗེ་དང༌། གཡོན་པས་དྲིལ་བུ་འཛིན་པས་ཡུམ་ལ་འཁྱུད་པ་མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་གིས་བརྒྱན་པ། དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་པ། ཕྱག་གཡས་པས་གྲི་གུག་འཛིན་པས་ཕྱོགས་བཅུར་བསྡིགས་ཤིང༌། གཡོན་པས་བདུད་རྩི་ལྔས་གང་བའི་ཐོད་པ་འཛིན་པས་ཡབ་ལ་འཁྱུད་པ། མི་མགོ་སྐམ་པོ་ལྔས་དབུར་བརྒྱན་ཞིང༌། སྐམ་པོ་ལྔ་བཅུའི་དོ་ཤལ་ཡོད་པ། རུས་པའི་རྒྱན་ལྔས་བརྒྱན་པ། ཡབ་ཡུམ་གཉིས་ཀ་སྟོང་པ་དང་སྙིང་རྗེ་གཉིས་སུ་མེད་པ་ཟུང་འཇུག་གི་སྐུ་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་དང་འདྲ་བར་བསྒོམ། གཉིས་ཀའི་དཔྲལ་བར་ཨོཾ། མགྲིན་པར་ཨཱཿ སྙིང་གར་ཧཱུྃ་བསམ། ཧཱུྃ་ལས་འོད་འཕྲོས་པས་འོག་མིན་གྱི་གནས་ནས་འཁོར་ལོ་བདེ་མཆོག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བ་རང་གི་མདུན་དུ་སྤྱན་དྲངས། ཛཿཧཱུྃ་བྃ་ཧོཿ ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅་ཧྃ་གིས་རང་ལ་གཉིས་སུ་མེད་པར་བསྟིམ། སྤྱི་བོར་རྡོ་རྗེ་སེམས་དཔས་དབུར་བརྒྱན་པར་བསམ། དེ་ལྟར་ལྷའི་སྐུ་སྣང་ལ་རང་བཞིན་མེད་པ་ལ་སེམས་གཏད་དེ་ཡིད་མཉམ་པར་གཞག སྔགས་ཟློ་བར་འདོད་ན། རང་གི་སྙིང་གའི་ཧཱུྃ་ལས་ཡིག་འབྲུ་འཕྲོས་པས་ཡབ་ཀྱི་ཞལ་ནས་འཐོན། ཡུམ་གྱི་ཞལ་དུ་ཞུགས། ཡུམ་གྱི་མཁའ་ནས་འཐོན། ཡབ་ཀྱི་གསང་གནས་སུ་ཞུགས་ནས་འཁོར་བའི་འོད་ཀྱིས། བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་སྦྱངས། སངས་རྒྱས་ཐམས་ཅད་ཀྱི་བྱིན་རླབས་རང་གི་རྒྱུད་ལ་ཞུགས་པར་བསམ་ཞིང༌། ཨོཾ་ཧྲཱི་ཧ་ཧ་ཧཱུྃ་ཧཱུྃ་ཕཊ། ཅེས་ཅི་ནུས་པ་བཟླའོ། །དེ་ནས་ཚོགས་ཀྱི་མཆོད་པ་བྱེད་པར་འདོད་ན། མཆོད་པ་བཤམས་པ་རྣམས། ཨོཾ་ཨ་མྲྀ་ཏེ་ཧཱུྃ་ཕཊ། ཅེས་བརྗོད་པས་མ་དག་པ་བསང༌། ཨོཾ་སྭ་བྷཱ་ཝས་སྟོང་པར་བསམ། སྟོང་པའི་ངང་ལས་ཨོཾ་ཨཱཿཧཱུྃ་ལས་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི། ཞལ་ཟས། རོལ་མོའི་སྒྲ་རྣམས་ངོ་བོ་བཟང་ཞིང་ནམ་མཁའ་གང་བར་བསྐྱེད། དེ་ནས་མདུན་དུ་དམིགས་པའི་རྟེན་ཡོད་དམ་མེད་ཀྱང་རུང་སྟེ། རང་གིས་བསྒོམས་པ་ལྟར་འཁོར་ལོ་བདེ་མཆོག་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་བསྐྱེད་པ་ལ་སྔ་མ་ལྟར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྟིམ། དེ་ལ་མཆོད་པ་རྣམས་ཀྱིས་མཆོད་པར་བསམ་ཞིང༌། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སམྦ་ར་མཎྜལ་ཙཀྲ་སརྦ་བཱི་ར་ཡོ་གི་ནཱི་ཞེས་ཐམས་ཅད་ལ་སྦྱར་ལ། ཨརྒྷཾ་པྲ་ཏཱིཙྪ་སྭཱ་ཧཱས་མཆོད་ཡོན། པཱ་དྱཾ་པྲ་ཏཱིཙྪ་སྭཱ་ཧཱས་ཞབས་བསིལ། བཛྲ་པུཥྤེ་ཨཱཿཧཱུྃ་གིས་མེ་ཏོག བཛྲ་དྷཱུ་པེ་ཨཱཿཧཱུྃ་གིས་བདུག་སྤོས། བཛྲ་ཨཱ་ལོ་ཀེ་ཨཱཿཧཱུྃ་གིས་མར་མེ། བཛྲ་གནྡྷེ་ཨཱཿཧཱུྃ་གིས་དྲི་ཆབ། བཛྲ་ནཻ་ཝི་དྱེ་ཨཱཿཧཱུྃ་གིས་ཞལ་ཟས། བཛྲ་ཤཔྟ་ཨཱཿཧཱུྃ་གིས་རོལ་མོ་དབུལ། དེ་ནས་ནང་མཆོད་སྔར་བཞིན་བསང་ཞིང་སྦྱངས། སྟོང་པའི་ངང་ལས་ཨཱཿལས་ཐོད་པ་ཡངས་ཤིང་རྒྱ་ཆེ་བའི་ནང་དུ། ཨོཾ་ཨཱཿཧཱུྃ་གིས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་བསྐྱེད། ཨོཾ་ཨཱཿཧཱུྃ་གིས་བྱིན་གྱིས་བརླབས་མཐེབ་སྲིན་གྱིས་གཏོར་ཞིང༌། སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པ་མཆོད་པར་བཞེས། ཞེས་རྩ་བའི་བླ་མ་དང༌། བླ་མ་བརྒྱུད་པ་ཐམས་ཅད་མཆོད་པར་བཞེས། ཞེས་བརྒྱུད་པའི་བླ་མ་དང༌། རང་གི་སྔགས་ཀྱིས་ཡི་དམ་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པར་བཞེས། ཞེས་པས་དེ་དག་ལ་མཆོད་ནས། ལྕེ། དཔྲལ་བ། མགྲིན་པ། སྙིང་གར་རེག་པས་རང་གི་ལུས་ཀྱི་ལྷ་མཆོད་ནས། ཆོས་སྐྱོང་སྲུང་མ་དང༌། འབྱུང་པོ་ཐམས་ཅད་མཆོད་ཅེས་པས་དེ་དག་ལ་དབུལ་ལོ། །དེ་ནས་ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང༌། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཞེས་པས་བསྟོད་དོ། །དེ་ནས་གཏོར་མ་སྦྱངས་པ་གོང་གི་ནང་མཆོད་ལྟར་བྱིན་གྱིས་བརླབས་པས་མདུན་བསྐྱེད་ཀྱི་ཧེ་རུ་ཀ་དང་ལྷ་ཐམས་ཅད་ལ་མཆོད་པར་བསམ་ཞིང༌། རྡོ་རྗེ་ཐལ་མོ་ཁ་གྱེན་དུ་ཕྱེ་ལ། ཨོཾ་ཨཱ་རལླི་ཧོ། ཛཿཧཱུྃ་བྃ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ། དྲྀ་ཤྱ་ཧོ། ཨོཾ་ཨཱཿཧཱུྃ་ཞེས་གསུམ་མམ་བདུན་གྱིས་དབུལ། སྔ་མ་ལྟར་མཆོད་ནས་བདག་གི་བར་དུ་གཅོད་པ་ཐམས་ཅད་ཞི་བ་དང༌། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ་བོ། །དེ་ནས་ཚོགས་ཀྱི་ཡོ་བྱད་ནང་མཆོད་ལྟར་བྱིན་གྱིས་བརླབས་པའི་ཕུད་མཆོད་གྲལ་དང༌། གཏོར་མར་ཕུལ་བས་ལྷ་དང་འབྱུང་པོ་རྣམས་མཆོད་ནས་ཤེས་རབ་ཀྱི་རྫས་ལས་ཀྱི་སློབ་མས། འདིར་ནི་ཆོས་རྣམས་བཟང་པོར་ལྟོས། །འདུ་བ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་ཡང༌། །རང་བཞིན་གཅིག་པ་ཉིད་དུ་བཞེས། །ཞེས་པས་དྲང༌། ལེན་པ་པོས། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་སྤངས། །གཟུང་དང་འཛིན་པ་དང་བྲལ་བའི། །དེ་བཞིན་ཉིད་ལ་གུས་ཕྱག་འཚལ། །ཞེས་བརྗོད་ཅིང་བླང༌། ཕུད་ཀྱིས་སྔར་ལྟར་མཆོད་ནས། རང་གི་སྙིང་གར་བླ་མ་དང་ལྷ། ལྟེ་བར་ཆོས་སྐྱོང་དང་འབྱུང་པོའི་ཚོགས་ཐམས་ཅད་དམིགས་ལ་མཆོད་པར་བསམ་ཞིང་ལོངས་སྤྱད། ཁ་ཟས་ཀྱང་དེ་དང་འདྲ་བར་ལོངས་སྤྱད་དོ། །ཐབས་ཀྱི་རྫས་ལ་བ་ལ། ཤེས་རབ་ཀྱི་རྫས་ལ་མ་ད་ན། བཟའ་བ་ལ་ཀྲི་པི་ཏ། ཞེས་བྱ་བ་ལ་སོགས་པ་བརྗོད་པར་བྱའོ། །གནས་སྐབས་ཐམས་ཅད་དུ་ལྷའི་རྣལ་འབྱོར་མ་ཉམས་པར་བྱའོ། །བཟའ་བཏུང་གིས་ཚིམ་པ་དང༌། ལྷག་མ་བསྡུས་པ་ནང་མཆོད་ཀྱི་ཁ་ཕྲུས་བཏབ་ནས། ཨོཾ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ལ། ཨོཾ་ཨུ་ཙྪིཥྚ་བ་ལིནྟ། བྷཀྵ་སཱི་སྭཱ་ཧཱས་ལྷག་མ་ལ་དབང་བའི་འབྱུང་པོ་ལ་བྱིན་ནས། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་ཚིག་ཀྱང་ཚད་མའི་མཆོག་ཡིན་པ། །བདེན་པ་འདིས་ནི་ལྷ་མོ་འདི་དག་རྣམས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །བདག་དང་སེམས་ཅན་ཐམས་ཅད་ཤིན་ཏུ་བཀྲ་ཤིས་པར་གྱུར་ཅིག ཅེས་པ་དང༌། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པས་དགེ་བའི་རྩ་བ་བསྔོས་ལ། ཨོཾ་བཛྲ་མུཿ། ཞེས་བརྗོད་པས་མདུན་བསྐྱེད་གཤེགས་སུ་གསོལ་ལ། རང་གི་གནས་གསུམ། ཨོཾ་ཨཱཿཧཱུྃ་གསུམ་གྱིས་བསྲུངས་ནས། ལས་ཀྱི་རྗེས་བསྡུས་ལ། ཅི་བདེ་བར་སྤྱད་དོ། །ཚོགས་ཀྱི་མཆོད་པའི་ཆོ་གའོ།། །།སྤྱོད་ལམ་སྣ་ཚོགས་ལ་འཇུག་པའི་ཚེ། ཨོཾ་ཞེས་བརྗོད་པས་བདག་དང་སྣང་བ་ཐམས་ཅད་ལྷ། ཨཱཿཞེས་བརྗོད་པས། བརྗོད་པ་དང་གྲག་པ་ཐམས་ཅད་སྔགས། ཧཱུྃ་ཞེས་བརྗོད་པས་རྟོག་པའི་འདུ་འཕྲོ་ཐམས་ཅད་ཏིང་ངེ་འཛིན། དེ་ཐམས་ཅད་ཀྱི་རང་བཞིན་སྟོང་པ་ཉིད་དུ་བསམས་ལ་ཡུལ་རྣམས་ལ་སྡང་ཞེན་མེད་པར་སྤྱད་དོ། །ནུབ་མོ་ཉལ་བའི་ཚེ་ཆོས་ཐམས་ཅད་འགའ་ཡང་མི་དམིགས་པ་སྟོང་པ་ཉིད་ཀྱི་ངང་ལ་ཉལ། ནང་པར་ལྡང་བའི་ཚེ་ལྷའི་སྐུའི་ང་རྒྱལ་གྱིས་ལྡང་ངོ༌། །དེ་ལྟར་རྒྱུན་དུ་རྣལ་འབྱོར་དུ་བྱེད་ཅིང༌། དམ་ཚིག་རྣམ་པར་དག་པ་ལ་གནས་པ་ནི་རིང་པོར་མི་ཐོགས་པར་ཧེ་རུ་ཀ་ཆེན་པོའི་གོ་འཕང་ཐོབ་པར་འགྱུར་བ་ཉིད་དོ། །ཚུལ་འདི་སྔགས་འཆང་འཕགས་པ་ལ། །དགེ་བཤེས་ཇོ་སྲས་ཕག་མཆུ་ཡིས། །བསྐུལ་བའི་དོན་དུ་སྦྱར་བ་ཡི། །དགེ་བས་སངས་རྒྱས་ཐོབ་པར་ཤོག། །།ས་མོ་ཡོས་ཀྱི་ལོ་དཔྱིད་ཟླ་འབྲིང་པོའི་ཚེས་ལྔའི་ཉིན་པར་ཆུ་མིག་དཔལ་གྱི་སྡེ་ཆེན་དུ། སངས་རྒྱས་གྲགས་ཀྱིས་ཡི་གེ་བྱས་ནས་སྦྱར་བའོ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།