སྒྲུབ་པ་ཉམས་སུ་ལེན་ཚུལ།

༼ཏ༽

༄༅། །སྒྲུབ་པ་ཉམས་སུ་ལེན་ཚུལ་བཞུགས།།

༄༅། །ན་མོ་རཏྣ་གུ་ར་ཝེ། དལ་འབྱོར་འཛོམ་པའི་སྐལ་བ་ཅན། །སྐྱེ་འཆིས་འཇིགས་པའི་དད་པ་ཅན། །གསུངས་བཞིན་བསྒྲུབ་པའི་མོས་གུས་ཅན། །བུ་ཤེས་གསལ་འདི་བཞིན་སེམས་ལ་ཞོག །སྒྲུབ་པ་ཉམས་སུ་ལེན་པ་ལ། །སྙིང་རུས་སྤྱད་པ་ཆེ་བ་དང༌། །ཞེན་ལོག་རི་ལ་སྡོད་ཚུགས་དང༌། །ཚེ་འདི་བློ་ཡིས་ཐོང་ཀྱང་འཚལ། །ཡོན་ཏན་རྒྱུད་ལ་སྐྱེ་བ་ལ། །སྡོམ་གསུམ་དམ་ཚིག་གཙང་བ་དང༌། །ང་རྒྱལ་རློམ་སེམས་ཆུང་བ་དང༌། །ཐམས་ཅད་སྤྱི་བོར་ཁུར་ཡང་འཚལ། །རྗེ་ཡི་བྱིན་རླབས་འཇུག་པ་ལ། །སངས་རྒྱས་དངོས་ཀྱི་འདུ་ཤེས་དང༌། །རྣམ་ཐར་ལག་ཏུ་ལེན་པ་དང༌། །རྒྱུན་པར་གསོལ་བ་འདེབས་ཀྱང་འཚལ། །ལྟ་བ་གོ་ཡུལ་མ་སོང་ལ། །སྣང་བ་སེམས་སུ་ཐག་ཆོད་དང༌། །འཁོར་འདས་སྤང་བླང་མེད་པ་དང༌། །མཁན་པོ་དབྱིངས་སུ་དག་ཀྱང་འཚལ། །སྒོམ་པ་སེམས་འཛིན་མ་ལས་ལ། །བདེ་གསལ་ཞེན་པ་བྲལ་བ་དང༌། །རྩ་ཆད་རང་ས་ཟིན་པ་དང༌། །སྨྲ་བསམ་ཡུལ་ལས་འདས་ཀྱང་འཚལ། །སྤྱོད་པ་བླང་དོར་མ་ཤོལ་ལ། །གཉིས་འཛིན་རང་སར་གྲོལ་བ་དང༌། །ཆོས་བརྒྱད་མགོ་བོ་སྙོམས་པ་དང༌། །བཟང་རྟོགས་གཉེན་པོ་བྲལ་ཡང་འཚལ། །འབྲས་བུ་ཕྱི་དུས་མི་རེ་ལ། །རྟོགས་པ་མངོན་དུ་གྱུར་པ་དང༌། །མཉམ་རྗེས་གཉིས་པོ་འདྲེས་པ་དང༌། །བསྒྲུབ་པའི་ཞེ་འདོད་ཟད་ཀྱང་འཚལ། །འགྲོ་བ་གཞན་དོན་བྱེད་པ་ལ། །སྨོན་ལམ་འཕེན་པ་ཟད་པ་དང༌། །རྒྱུ་རྐྱེན་རྟེན་འབྲེལ་ཤར་བ་དང༌། །དམིགས་མེད་ཐུགས་རྗེ་འབྱངས་ཀྱང་འཚལ། །འཚལ་བ་བརྒྱད་ཀྱི་དབྱངས་ཆུང་འདི། །ཤེས་རབ་གསལ་ལ་བླངས་པ་ལགས། །འདི་བཞིན་དོན་དང་ལྡན་པར་མཛོད། །མི་ལྡན་བར་དུ་བསྒོམ་སྲན་བསྐྱེད། །ས་མཱཔྟ་མི་ཐི།།  །། ༈ གུ་རུས་དཔར་རྩ་སྤེལ་བའོ།།

རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག  www.gyalyongsachen.com