༼ཏ༽
༄༅། །མཚན་བརྗོད་འདོན་ཐབས་བཞུགས།།
༄༅། །བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །མཚན་ཡང་དག་པར་བརྗོད་པ་འདོན་པའི་གདམས་ངག་ལ་གསུམ། གསང་སྔགས་སུ་གདོན་པ་དང༌། བདག་མེད་པའི་ངང་ལས་གདོན་པ། ཆེ་བའི་ཡོན་ཏན་དུ་གདོན་པའོ། །དང་པོ་ལ་གཉིས། འཇམ་དཔལ་གྱི་རྣལ་འབྱོར་གྱིས་གདོན་པ་དང༌། ཡི་དམ་ལྷའི་ང་རྒྱལ་གྱིས་གདོན་པའོ། །དང་པོ་ནི་སེམས་བསྐྱེད་པ་དང༌། སྐྱབས་སུ་འགྲོ་བ་སྔོན་དུ་སོང་ནས། རང་སྐད་ཅིག་གིས་འཕགས་པ་འཇམ་དཔལ། སྐུ་མདོག་དམར་སེར་ཞལ་གཅིག་ཕྱག་བཞི་པ། གཡས་རལ་གྲི་དང༌། གཉིས་པ་མདའ། གཡོན་དང་པོ་ན་པུ་སྟི་དང༌། གཉིས་པ་གཞུ་འཛིན་པ། ཟླ་བའི་རྒྱབ་ཡོལ་ཅན། པདྨའི་གདན་ལ། རྡོ་རྗེ་སྐྱིལ་ཀྲུང་གིས་བཞུགས་པ། དར་སྣ་ཚོགས་ཀྱི་ཤམ་ཐབས་ཅན། །རིན་པོ་ཆེའི་རྒྱན་གྱིས་བརྒྱན་པ། མི་བསྐྱོད་པས་དབུར་བརྒྱན་པ་བསྒོམས་ལ། ཐུགས་ཀར་ཨ་བསམ། ཚིག་ཐམས་ཅད་ཨ་ལས་སྐྱེས་ཤིང་མི་དམིགས་པར་བསམས་ལ་གདོན། ཤེས་རབ་རལ་གྲི་མདའ་གཞུ་ཐོགས་ཞེས་པའི་གདམས་ངག་གོ །ཡི་དམ་ལྷའི་ང་རྒྱལ་གྱིས་འདོན་ན། ཁྲོ་བོ་ཡིན་ན་སྙིང་གར་ཉི་མའི་སྟེང་དུ་བསམ། ཞི་བ་ཡིན་ན་ཟླ་བའི་སྟེང་དུ་བསམ། ཚིག་ཐམས་ཅད་ཨ་ལས་སྐྱེས་ཤིང་མི་དམིགས་པར་བསམས་ལ་གདོན། རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མོད་འོད། །ཅེས་པའི་གདམས་ངག་གོ །བདག་མེད་པའི་ངང་ལས་འདོན་ན། སྐྱབས་འགྲོ་སེམས་བསྐྱེད་སྔོན་དུ་སོང་བས། ཆོས་ཐམས་ཅད་རྨི་ལམ་ལྟ་བུ་སྒྲ་བརྙན་དང་བྲག་ཆ་ལྟ་བུར་ཤེས་པར་བྱས་ལ་འདོན་ནོ། །སྟོང་ཉིད་སྨྲ་བའི་ཁྱུ་མཆོག་སྟེ། །ཟབ་ཅིང་རྒྱ་ཆེ་སྒྲ་སྒྲོགས་པ། །ཞེས་པའི་གདམས་ངག་གོ །ཆེ་བའི་ཡོན་ཏན་དུ་འདོན་ན། སྐྱབས་འགྲོ་སེམས་བསྐྱེད་སྔོན་དུ་སོང་བས། མདུན་གྱི་ནམ་མཁར་འཕགས་པ་འཇམ་དཔལ་བསམ། སངས་རྒྱས་དང་བྱང་ཆུབ་སེམས་དཔའ། ཉན་ཐོས་དང༌། རང་སངས་རྒྱས་དང༌། ཚངས་པ་དང་དབང་ཕྱུག་འཇིག་རྟེན་ལས་འདས་པའི་ལྷ་ཐམས་ཅད་འཕགས་པ་འཇམ་དཔལ་ཡིན་པར་བསམས་ལ་འདོན་ནོ། །འཇོག་པའི་དུས་སུ་མཆོད་པ་བྱས་ལ་རང་བཞིན་པར་གཤེགས་སུ་གསོལ། ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་གདམས་ངག་གོ །མདོ་བཏོན་དགེ་བའི་རྩ་བ་སངས་རྒྱས་སུ་བསྔོ། ཐུན་མོང་བ་ཆེ་བའི་ཡོན་ཏན་དུ་དམིགས་ལ་གདོན་པར་བྱའོ། །རྗེ་བཙུན་གྲགས་པ་རྒྱལ་མཚན་གྱི་ཞལ་སྔ་ནས་མཛད་པའོ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།