༼ཉ༽
༄༅། །སོ་སོའི་སྒྲུབ་ཐབས་བཞུགས།།
༄༅། །ཨོཾ་སྭ་སྟི། ཡི་དམ་ལྷ་ལ་ཕྱག་འཚལ་ལོ། །སྤྱིའི་སྒྲུབ་ཐབས་བཞིན་བསྙེན་པ་ཡོངས་སུ་རྫོགས་ནས་སྒྲུབ་པ་དང་ལས་སྦྱོར་གྱི་དུས་ཀྱི་རྣལ་འབྱོར། ཕྱག་འཚལ་ཉེར་གཅིག་གི་མངོན་པར་རྟོགས་པ་རྣམས་ཀྱི་སྤྱིའི་མངོན་པར་རྟོགས་པ་ནི་འདི་ཡིན་ཏེ། ཚོགས་བསག་པའི་ཞིང་མདུན་གྱི་ནམ་མཁར་སྤྱན་དྲངས་ནས་མཆོད་པ་དང༌། ཡན་ལག་བདུན་པ་དང༌། ཚད་མེད་པ་བཞི་བསྒོམ་པ་སྟེ། བསོད་ནམས་ཀྱི་ཚོགས་བསག ཡེ་ཤེས་ཀྱི་ཚོགས་བསག སྟོང་ཉིད་བསྒོམ། སྟོང་པའི་ངང་ལས་པདྨ་དང་ཉི་མ་ལ་སོགས་པའི་སོ་སོའི་གདན་གྱི་སྟེང་དུ་རང་རང་གི་ས་བོན་ཙམ་ལས་སྐད་ཅིག་གིས་དམ་ཚིག་སེམས་དཔའ་བསྐྱེད་པ་དང༌། སྐྱེ་མཆེད་དང༌། སྐུ་གསུང་ཐུགས་དང༌། ཡན་ལག་དྲུག་བྱིན་གྱིས་བརླབ་པ་དང༌། ཡེ་ཤེས་ཀྱི་འཁོར་ལོ་དགུག་གཞུག་བྱ་བ་དང༌། དབང་བསྐུར་བས་རང་རང་གི་རིགས་ཀྱི་བདག་པོའི་རྒྱས་གདབ་པ་སྟེ། རང་རང་གི་ས་བོན་ལས། རང་རང་གི་དམ་ཚིག་སེམས་དཔའ་བསྐྱེད་པའི་སྐུ་མདོག་དང༌། ཕྱག་མཚན་དང༌། ཞལ་ཕྱག་གི་གྲངས་དང༌། གདན་དང༌། བཞུགས་ཚུལ་གྱི་ཁྱད་པར་དང༌། ཞི་ཁྲོ་དང༌། སྔགས་ཀྱི་ཁྱད་པར་རྣམས་སོ་སོའི་གཞུང་ནས་འབྱུང་བས་དེ་རྣམས་མ་གཏོགས་པའི་སྔོན་དུ་འགྲོ་བ་དང་མཇུག་གི་ཆོ་ག་རྣམས་ནི་སྤྱིའི་སྒྲུབ་ཐབས་དང་མཐུན་པས། འདིར་ཐོ་ཡིག་ཙམ་ལས་མ་བསྟན་པ་ཡིན་ནོ། །གཞུང་སོ་སོའི་མི་གསལ་བ་རྣམས་ཅུང་ཟད་ཙམ་བརྗོད་པར་བྱ་སྟེ། དང་པོ་དེ་བཞིན་གཤེགས་པའི་རིགས་ཀྱི་སྒྲོལ་མ་ཨོཾ་སེར་པོ་ལས་པྃ་ཞེས་བའི་སྒྲ་འབྱུང་བའི་སྐད་ཅིག་མས་བསྐྱེད་པར་བྱས་ནས་རྣམ་པར་སྣང་མཛད་ཀྱིས་དབུར་བརྒྱན་པའོ། །གཞུང་ལས། རབ་ཏུ་དགའ་བའི་ཕྱག་རྒྱ་ཞེས་བྱ་བ་ནི། རྡོ་རྗེ་དྲིལ་བུ་བསྣོལ་ཏེ་ཐུགས་ཀར་འཛིན་པའོ། །གཉིས་པ་གསུང་གི་རིགས་ནི་ཏཱ་ལས་བསྐྱེད་ནས་ཟླ་བའི་སྟེང་དུ་བཞུགས་པ་ནི་འོད་དཔག་མེད་ཀྱིས་དབུར་བརྒྱན་པའོ། །དྲུག་པ་ན་པུསྟི་བསྣམས་ཞེས་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟིའོ། །གསུམ་པ་རིན་པོ་ཆེའི་རིགས་ཀྱི་སྒྲོལ་མ་ནི་རེ་ལས་བསྐྱེད་པར་བྱའོ། །བཞི་པ་ལས་ཀྱི་རིགས་ནི་ཏུ་ལས་བསྐྱེད་པར་བྱའོ། །ལྔ་པ་གསུང་གི་རིགས་ནི་ཏཱ་ལས་སོ། །དྲུག་པ་གསུང་གི་རིགས་ནི་རེ་ལས་སོ། །བདུན་པ་རིན་པོ་ཆེའི་རིགས་ནི་ཏུ་ལས་སོ། །སྐྱེ་གནས་ཀྱི་སྟེང་ན་ཞགས་པ་བསྣམས་པ་ཞེས་བྱ་བ་ནི་པདྨའོ། །བརྒྱད་པ་ལས་ཀྱི་རིགས་ནི་རེ་ལས་སོ། །དགུ་པ་ལས་ཀྱི་རིགས་ནི་སྭཱ་ལས་སོ། །ཕྱག་དང་པོ་གཉིས་སྤྱི་བོར་རབ་ཏུ་དགའ་བའི་ཕྱག་རྒྱ་བཅིངས་པ་ཞེས་བྱ་བ་ནི་སྤྱི་བོར་པད་ཀོར་མཛད་པའོ། །བཅུ་པ་རིན་པོ་ཆེའི་རིགས་ནི་ཧཱ་ལས་ཅུང་ཟད་ཁྲོ་བ་བསྐྱེད་པར་བྱའོ། །བཅུ་གཅིག་པ་དེ་བཞིན་གཤེགས་པའི་རིགས་ནི་ཨ་ལས་སོ། །བཅུ་གཉིས་པ་པདྨའི་རིགས་ནི་བྷྲཱུྃ་ལས་བསྐྱེད་པར་བྱའོ། །བཅུ་གསུམ་པ་ལས་ཀྱི་རིགས་ནི་ཨ་ལས་སོ། །ཕྱོགས་དང་མཚམས་སུ་མྱུ་གུ་འཛིན་པ་ཞེས་བྱ་བ་ནི། ཕྱོགས་མཚམས་བརྒྱད་དུ་བྃ་ལས་རཏྣའི་ལྗོན་ཤིང་བསམ་པར་བྱའོ། །བཅུ་བཞི་པ་གསུང་གི་རིགས་ནི་ཏཱ་ལས་སོ། །པུསྟི་བསྣམས་པ་ཞེས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟིའོ། །བཅོ་ལྔ་པ་ཐུགས་ཀྱི་རིགས་ནི་ཨ་ལས་སོ། །གཡོན་པ་སྙིང་པོ་དང་བཅས་པའི་ཕྱག་རྒྱ་ཞེས་པ་ནི་ཨུཏྤ་ལ་བསྣམས་པའོ། །བཅུ་དྲུག་པ་ལས་ཀྱི་རིགས་ནི་ཤྃ་ལས་སོ། །བཅུ་བདུན་པ་གསུང་གི་རིགས་ནི་ཏཱྃ་ལས་སོ། །ཕྱག་དང་པོ་གཉིས་དགའ་བའི་ཕྱག་རྒྱ་དང་ལྡན་པ་ཞེས་པ་ནི། ཕྱག་གཉིས་ཐུགས་ཀར་འཁྱུད་པའི་སྟངས་སོ། །སྤྱི་བོར་པད་ཀོར་ཕྱག་རྒྱ་མཛད་པའོ། །བཅོ་བརྒྱད་པ་དེ་བཞིན་གཤེགས་པའི་རིགས་ནི་ཛ་ལས་སོ། །བཅུ་དགུ་པ་ལས་ཀྱི་རིགས་ནི་ཙེ་ལས་སོ། །ཉི་ཤུ་པ་རིན་པོ་ཆེའི་རིགས་ནི་ཕེཾ་ལས་བསྐྱེད་པར་བྱའོ། །སྐུ་མདོག་ལ་སོགས་པ་ནི་སོ་སོའི་གཞུང་ཉིད་དུ་གསལ་ལོ། །དབང་བསྐུར་ནས་རིགས་ཀྱི་བདག་པོ་ནི། རང་རང་གི་རིགས་ཀྱི་བདག་པོས་དབུར་བརྒྱན་པ་ཡིན་ནོ། །སོ་སོའི་སྔགས་ནི་རང་རང་གི་འོག་ནས། རང་རང་གི་ལས་ཀྱི་ཚོགས་ནས་འབྱུང་བས་དེར་བལྟ་བར་བྱའོ། །གོང་གི་ཆོ་ག་རྣམས་ནི་སྔར་ཉིད་དུ་བརྗོད་པར་བས་སོ། །སྒྲུབ་ཐབས་སོ་སོའི་མངོན་པར་རྟོགས་པའི་བརྗེད་བྱང༌།། ཨི་ཐི།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།