འཇམ་མགོན་ས་པཎ་གྱི་འདས་མཆོད།

༄༅། །འཇམ་མགོན་ས་པཎ་གྱི་འདས་མཆོད།
རིག་གནས་རྒྱ་མཚོའི་ཕ་རོལ་སོན་གྱུར་པས།།གསུང་རབ་ནོར་བུའི་གླིང་ལ་མངའ་སྒྱུར་ཞིང།།སྙན་གྲགས་ཀུན་གྱི་རྣ་བའི་རྒྱན་གྱུར་པས།།ངོ་མཚར་བསྔགས་པའི་གནས་གྱུར་ས་སྐྱ་པ།།་མཁྱེན་པས་ཤེས་བྱ་ཀུན་གྱི་དེ་ཉིད་གཟིགས།།བརྩེ་བས་ལེགས་བཤད་དགའ་སྟོན་འགྲོ་ལ་སྩོལ།།མཛད་པས་རྒྱལ་བ་མཉེས་པ་འབའ་ཞིག་བསྒྲུབ།།མཚན་ནས་བརྗོད་པར་དཀའ་བ་ཁྱོད་ལ་འདུད།།ཁྱོད་ནི་བློ་གྲོས་དྲི་མ་མེད།།མུ་མཐའ་བྲལ་བའི་ཤེས་བྱ་ལ།།ལྷ་ཡི་ལམ་ལ་འོད་སྟོང་བཞིན།།འཇུག་པར་མཐོང་ཚེ་བདག་གི་ཡིད།།ཡ་མཚན་གྱུར་ནས་དེ་ཡི་དཔེར།།འཇམ་པའི་དབྱངས་ཀྱི་མཁྱེན་པ་བཙལ།།དེ་ནས་དེ་གཉིས་དབྱེར་མེད་པར།།མཐོང་བས་བདག་གི་དཔེ་མ་རྙེད།།རབ་འབྱམས་རྒྱལ་བའི་ཡེ་ཤེས་འཇམ་པའི་དབྱངས།།རབ་དཀར་གངས་རིའི་ལྗོངས་སུ་འགྲོ་རྣམས་ཀྱི།།རབ་མཛེས་གཙུག་གི་རྒྱན་དུ་བྱོན་གྱུར་ནས།།རབ་རིབ་མ་ལུས་སེལ་བའི་ས་སྐྱ་པ།།མ་ལྟར་བརྩེ་བའི་ཐུགས་རྗེས་ལུས་ཅན་ཀུན།།སྲིད་ལས་སྒྲོལ་བའི་ཐབས་ལ་ཤིན་ཏུ་དགའ།།མཁྱེན་བརྩེའི་དཔུང་གིས་བདུད་སྡེའི་དཔུང་བཅོམ་ནས།།བསྟན་པའི་རྒྱལ་མཚན་འཛིན་པ་ཁྱོད་ལ་འདུད།།ཁྱོད་ཀྱིས་ཐུབ་བསྟན་ནོར་བུ་ཡི།།དྲི་མ་རིགས་པའི་ཆུ་ཡིས་བཀྲུས།།ཡིད་ཆེས་ལུང་གིས་བྱི་དོར་བྱས།།སྒྲུབ་པའི་རྒྱལ་མཚན་རྩེ་རུ་མཆོད།།ཉིན་མཚན་དུས་ནི་ཐམས་ཅད་དུ།།བསྟན་པ་འབའ་ཞིག་དགོངས་པ་ཁྱོད།།སྙིགས་དུས་འགྲོ་བ་སྐྱབས་མེད་པ།།རྒྱལ་བ་བས་ཀྱང་ཐུགས་རྗེ་ཆེ།།ཐ་སྙད་གཙུག་ལག་ནང་གི་སྡེ་སྣོད་ཀྱི།།བདེ་གཤེགས་དགོངས་པ་ཐམས་ཅད་ལེགས་རྟོགས་ནས།།མ་རྟོགས་པ་དང་ཕྱོགས་རེས་ཚིམས་པ་དང།།ཇི་བཞིན་མིན་པར་རྟོགས་པའི་འགྲོ་བ་ལ།།ལྷག་པར་བརྩེ་བ་སྐྱེས་ནས་ཡིན་ལུགས་དོན།།རྣར་སྙན་ཡིད་འབབ་གོ་བར་སླ་བ་ཡི།།སྐྱོན་སྤངས་གསུང་གིས་ཡང་ཡང་འདོམས་མཛད་པ།།ཁྱོད་ལ་བསམ་པ་དག་པས་བདག་ཕྱག་འཚལ།།ས་སྟེང་འགྲན་ཟླ་བྲལ་བ་ཆོས་ཀྱི་རྗེ།།ཤེས་བྱ་ཀུན་ལ་ཐོགས་མེད་འཇམ་པའི་དབྱངས།།གནས་ལྔ་མངོན་དུ་གྱུར་པའི་པཎྜི་ཏ།།གངས་ཅན་འགྲོ་བའི་སྐྱབས་གཅིག་ས་སྐྱ་པ།།ཉིན་མཚན་ཀུན་ཏུ་གུས་པས་གསོལ་བ་འདེབས།།སྐྱེ་ནས་སྐྱེ་བར་མཚན་དཔེའི་གཟི་འབར་བ།།ཁྱོད་སྐུ་མཐོང་ཞིང་ཐེག་མཆོག་སྒྲོག་པ་ཡི།།ཁྱོད་གསུང་རྒྱུན་ཆད་མེད་པ་ཐོས་པར་ཤོག།།
        ཅེས་པ་འདི་ནི་རྒྱུད་སྡེ་འཛིན་པ་ཡར་ཀླུངས་པ་སེང་གེ་རྒྱལ་མཚན་པས་བསྐུལ་པའི་དོན་དུ་ཆོས་རྗེ་དེ་ཉིད་ལ་མི་ཕྱེད་པའི་གུས་པ་དང་ལྡན་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་མོན་མཁར་བཀྲ་ཤིས་གདོང་དུ་སྦྱར་བའོ།།
སརྦམངྒ་ལཾ། །