༡ བསྐོར་བ་བྱེད་པའི་ཁུངས།
ལུང་གཞི་ལས།
མཁས་པ་གང་ཞིག་རབ་ཏུ་སེམས་དད་པས།།
སངས་རྒྱས་མཆོད་རྟེན་ལ་ནི་གོམ་འདོར་བ།།
འཛམ་བུ་ཆུ་བོའི་གསེར་གྱི་ཞེང་ཚད་ནི།།
སྟོང་ཕྲག་བརྒྱ་ཡང་དེ་དང་མཉམ་པ་མིན།།
ཞེས་སོགས་མཆོད་རྟེན་བསྐོར་བའི་མདོ་དང་། སྙིང་རྗེ་པདྨ་དཀར་བོའི་མདོ་རྣམས་ལས་མང་དུ་གསུངས་སོ།།
༢ བསྐོར་བ་གཡས་ཕྱོགས་སུ་འགྲོ་བའི་རྒྱུ་མཚན།
མདོ་ལས་སངས་རྒྱས་ཀྱི་མཚན་དཔེ་གསུངས་སྐབས། ལམ་གྱི་བསྐོར་ཕྱོགས་དང་མཐུན་པ། ཞེས་པ་ལྟར། གཡས་ཕྱོགས་བསྟན་པ་དང་། འཇིག་རྟེན་གྲགས་ཚོད་ལའང་གཡས་ཕྱོགས་ནི། ལམ་ཡང་དག་དང་། གཡོན་ཕྱོགས་ལ། གཡོན་ལྷུང་ཞེས་ལོག་ལམ་དུ་ངོས་འཛིན་ནོ།།
བོན་གཞུང་ལས་ཀྱང་གཡས་བསྐོར་དུ་བཤད་པ་མང་སྟེ། མདོ་དྲི་མེད་ལས། གཡུང་དྲུང་ཞབས་ནི་གཡས་བསྐོར་རོ།། ཞེས་དང་། དལ་འགྲོས་དང་ལྡན་པར་གཡས་བསྐོར་དུ་གཤེགས། ཞེས་སོ།།
གཞན་ཡང་། མཁའ་འགྲོ་ཡེ་ཤེས་མཚོ་རྒྱལ་གྱི་རྣམ་ཐར་དང་། བོན་གཞུང་ཚད་ལྡན་མང་བོར། གཡས་བསྐོར་ཕྱག་རྒྱ་ཆེན་པོ་དང་། གཡོན་བསྐོར་རྫོགས་པ་ཆེན་པོ། ཞེས་གཞི་མཐུན་དུ་བཞེད་ལ། དེ་ནི་བརྗོད་སྙིང་ཟབ་པས་འདིར་མི་སྤྲོའོ།།
༣ བསྐོར་བ་ཇི་ལྟར་བྱ་ཚུལ།
ལམ་རིམ་སོགས་ལས། ཕྱག་དང་སྔགས་བཟླ་ཚེ། ལུས་དང་ལྕེ་གྲངས་མེད་ཀྱིས་བཟླས་ན། འགྱུར་ཁྱད་ཆེ་བར་གསུངས་པ་ལྟར། ཡིག་བརྒྱ་དང་ལྟུང་བཤགས་གང་མོས་རེ་བཏོན་ཏེ་བསྐོར་བ་ཕྱིན་ན་དགོས་པ་ཆེ་ལ།
ཁྱད་པར་དུ། རྟེན་ལས་འོད་བྱུང་ནས་རང་ལ་ཕོག་པས། སྡིག་སྒྲིབ་བག་ཆགས་དང་བཅས་པ་བྱང་སོང་སྙམ་པའི་མོས་པ་བསྐྱེད་དགོས་སོ།།
བསྐོར་བའི་འགྱུར་སྔགས་ཤེས་ན། དེ་འདོན་བཞིན་ཕེབས་ན་འགྱུར་ཁྱད་ཆེ་ལ། གལ་ཏེ་རྟེན་གྱི་གྲིབ་མ་ལ་འགོངས་དགོས་བྱུང་ན། ཨོཾ་བཛྲ་བེ་ག་ཨ་ཀྲ་མ་ཧཱུཾ། ཞེས་གསུངས་ཏེ་འགོངས་ན་ཉེས་པ་མེད་དོ།།
༤ བསྐོར་བའི་ཕན་ཡོན།
འདུལ་བ་ལུང་ལས།
གང་ཞིག་དད་ཅིང་མོས་པའི་སེམས་ཀྱིས་སུ།།
སངས་རྒྱས་མཆོད་རྟེན་ལ་ནི་གོམ་འདོར་ན།།
འཛམ་བུ་ཆུ་བོའི་གསེར་གྱི་གྲངས་ཚད་ནི།།
སྟོང་ཕྲག་བརྒྱ་ཡང་དེ་དང་མཉམ་པ་མིན།།
ཞེས་དང་། མཆོད་རྟེན་བསྐོར་བའི་མདོ་ལས། དལ་འབྱོར་འཐོབ་ཅིང་། དྲན་དང་། བློ་གྲོས་དང་། ཁ་དོག་ལྡན་ཞིང་མཛངས་པར་འགྱུར་བ་དང་། ཚེ་དང་ལོངས་སྤྱོད། སྙན་གྲགས་དང་དབང་ཐང་། སྟོབས་དང་བརྩོན་འགྲུས། རྫུ་འཕྲུལ་འཐོབ་པ། མའི་ལྟོར་བདེ་ཞིང་བུ་ཕྲུག་བདེ་བར་བཙའ་བ་སོགས་ཕན་ཡོན་མང་དུ་གསུངས་སོ།།
བོད་ཀྱི་སློབ་འབྲིང་དྲ་བ་ལས་བཏུས།
དཔྱད་གཏམ་སྤེལ་མཁན་ལ་གསལ་བརྡ།