ངོ་གདོང་དེ་ནི་ལྷ་མོའི་གདོང་དང་འདྲ།
བདེ་ཆེན་རང་གྲོག
མ་ཡུམ་ལ་གཟུགས་མཐོང་ཁ་པར་ལས་ཁ་བརྡ་གློད་རྗེས།
༡
འབྲོག་རུ་སྡེ་ཆེ་རྒྱུ་ཆུང་རྒྱུ་མེད་ས་དེ་ག་ན།།
ངའི་མ་ཡི་འཛུམ་ལ་མེ་ཏོག་རྐང་གཅིག་བཞད་པ་མཐོང་།།
ད་དྲང་མོར་བཤད་ན་མེ་ཏོག་ཟེར་ཡང་འཛུམ་ཆུང་ལ།།
ངས་དཔེ་རུ་བཞག་སྟེ་བཤད་འདོད་ཞེ་ལ་ཤར་བས་ཡིན།།
མིའི་གདོང་དུ་མེ་ཏོག་རྐང་གཅིག་བཞད་པ་མཐོང་རྒྱུ་མེད།།
དོན་དེས་ཕྱིར་དཔེ་རུ་དྲངས་བ་ཡིན་པ་ངེས་པར་གྱིས།།
༢
ཉ་གང་ཟླ་བ་དོ་ནུབ་ཤར་གྱི་མ་བྱུང་ཐལ།།
ཟླ་བ་ཚང་དུ་ལོག་ནས་ཡུན་རིང་འགོར་བ་འདྲ།།
དེ་མིན་ཟླ་བ་མ་དང་འཕྲད་དུ་སོང་བ་འདྲ།།
ཟླ་བ་གོར་གོར་ཟིག་ནི་ཉིན་འགར་མ་རིག་ཐལ།།
དོ་ནུབ་གོར་གོར་ཅི་ཞིག་ང་ཡིས་རིག་པ་དེ།།
ཟླ་བ་ཨེ་ཡིན་སྙམ་ནས་དོགས་པ་སྐྱེ་དགོས་བྱུང་།།
རེད་དེ་ཟླ་བ་མིན་པ་ང་ཡི་གསལ་བོ་ཤེས།།
ཞེ་དྲག་དགའ་བ་བྱུང་སྟེ་ང་ཡི་མ་ལོ་ཡང་།།
རྟག་ཏུ་ཉ་གང་ཡིན་པའི་ཟླ་བ་ཡིན་ན་སྙམ།།
༣
ཕྱི་ནང་རྒས་ཀྱི་མེད་ན་གནམ་གྱིས་སྲུང་བ་ཨེ་ཡིན་ན།།
དེ་ན་གནམ་གྱིས་སྲུང་བའི་ཆག་དུ་ག་ལེར་བཞག་པ་ན།།
ནམ་ཞིག་གནམ་ཡང་སྐྱོ་བའི་ཟོལ་གྱིས་མ་ཡི་ཕྱི་ནང་གཉིས།།
ག་ལེར་རྒས་ཚུལ་སྣང་ན་སེམས་ཀྱི་ཆུ་མོ་འཁྱག་སིབ་སིབ།།
འདི་ནི་ང་མིན་གཞན་གྱིས་ཀྱང་ནི་མཐོང་ན་ལོས་ཀྱང་ཚོར།།
༤
གདོང་དཀར་བོ་ཡིན་ན་ཟླ་བ་ག་ལ་ཡིན།།
ངའི་མ་ཡི་གདོང་དེ་དཀར་བོ་པདྨ་ཡིན།།
ཆེས་མཛེས་པ་དེ་ཡང་མ་ཡི་ཞལ་ངོ་འོ།།
༥
སྐད་འཕྲིན་སྒང་ནས་གཟུགས་མཐོང་ཁྱོད་སར་བསྐུར།།
ཁྱོད་ཀྱི་འཛུམ་མདངས་མེ་ཏོག་མཛེས་པ་སྣང་།།
ཁ་དཀར་རྐྱང་གི་ངང་ཚུལ་ཡིན་ནམ་ཅི།།
ཁ་ལས་བཀྲ་ཤིས་སྨོན་ཚིག་སྨྲ་བ་ཐོས།།
མིག་གིས་ཁྱོད་སར་ལྟ་དུས་དྲིན་ཆེན་མ།།
གདོང་གི་གཉེར་རིས་མང་པོ་ལམ་ཕྲན་འདྲ།།
མི་ཚེའི་ཀྱག་ཀྱག་ལམ་ཕྲན་འདི་ཉིད་འདྲ།།
༦
ཉིན་རེ་རེ་བརྩིས་ན་འཆུག་འགྲོ་འུ།།
ཟླ་རེ་རེ་བརྩིས་ན་འཛོལ་འགྲོ་འུ།།
གང་ལྟར་ཀྱང་ཉིན་ཞགས་མ་ནོར་བར།།
དྲིན་མ་ལོ་རྩུབ་ན་ཡོད་ན་སྙམ།།
༧
དྲིན་མ་ལོ་བཤད་ན་རྡོ་བརྐོས་རི་མོ་ག་ལ་ཡིན།།
དྲིན་མ་ལོ་བཤད་ན་ལྷ་མོ་སྒྲོལ་མ་དཀར་མོ་འདྲ།།
དཔྱད་གཏམ་སྤེལ་མཁན་ལ་གསལ་བརྡ།