འཁོར་བས་བལྟོས་ན་གདོང་མཁན་བྲེལ་འཚུབ་མཐོང་།།
གདོང་མཁན་མཐོང་གསལ་འཁོར་བ་བྲེལ་ཟིང་བསྙུར།།
གཞན་ངོར་གདོང་མཁན་སྤྲོ་འཁྱམས་ཉུལ་བར་མཐོང་།།
གདོང་མཁན་མགྲིན་ལག་ཐུན་མོང་གནད་ལ་བྲེལ།།
བསྟན་སྲིད་སྤྱི་དོན་ཕྲག་གོང་སྒང་དུ་ཁུར།།
ནོར་འཛིན་ཁོད་སྙོམས་རྒྱ་གར་ལྡི་ལི་གྲོང་།།
ནམ་དུས་དྲོད་གཤེར་ཁ་རླངས་དྲི་ངན་ལྡང་།།
སྲོག་གཤེད་དུག་སྦྲང་ནད་ཡམས་མང་ན་ཡང་།།
རྒྱ་གར་གྲོས་ཚོགས་འཐུས་མི་ལན་རེར་མཇལ།།
ད་ནི་ལས་དོན་གྲུབ་མཚམས་རང་གནས་སུ།།
གཉིད་མིན་སད་མིན་གཞུང་ལམ་སྒང་དུ་ཡོད།།
གྲང་ངར་མ་བཟོད་རྐང་ལག་འདར་སིག་དང་།།
མཚམས་རེར་ཚ་བས་མགོ་རྐུབ་རླན་གཤེར་རྒྱས།།
མི་འདོད་སྡུག་བསྔལ་གཉུག་མའི་ལྷན་སྐྱེས་འདིར།།
བཟོད་གླགས་མེད་པ་མྱངས་པ་ཡོད་ན་ཡང་།།
ངེས་འབྱུང་སྤུ་སུད་བསམ་པས་ཟིན་པའི་ལམ།
ཐར་འདོད་སེམས་ཀྱི་འཆར་སྒོར་ཡལ་མྱོང་མེད།།
དེ་རིང་ལམ་དུ་འགྲུལ་བཞུད་ཡར་ཞོར་དུ།།
དྲོད་གྲང་མི་སྙོམས་འཁོར་བའི་ཆོས་ཉིད་འདིར།།
བསམ་གཞིགས་བསམ་ཚེ་སྙིང་པོ་མེད་པ་མཐོང་།།
མཚམས་རེར་འཛིན་མའི་འདོད་གཟུགས་མཐོང་བའི་སྐབས།།
དྲན་པའི་ཤིང་རྟའི་ཁ་ལོ་དབང་མེད་ཤོར།།
སེམས་ངོགས་སྲེད་པའི་དྲོད་བཤེར་དལ་གྱིས་འཁོལ།།
གདོང་མཁན་ངོ་ཡང་ཚ་ལ་དགོད་ཡང་བྲོ།།
འཁོར་བས་བལྟོས་ན་གདོང་མཁན་བྲེལ་འཚུབ་བདེན།།
གདོང་མཁན་མཐོང་གསལ་འཁོར་བ་བྲེལ་བསྙུར་དང་།།
སྡུག་བསྔལ་གཉུག་མའི་ཕ་ཁྱིམ་དྲོད་མོ་ཞིག།
༢༠༡༩/༡/༨ ལམ་ཞོར་དུ་འཆར་སྣང་གང་དྲན་ཐལ།
དཔྱད་གཏམ་སྤེལ་མཁན་ལ་གསལ་བརྡ།