༄། །རྣམ་ཀུན་མཆོག་ལྡན་སྟོང་པ་ཉིད་དང་། །མཆོག་ཏུ་མི་འགྱུར་བདེ་ཆེན་ཟུང་འཇུག །ཟབ་མོ་ཆོས་སྐུ་རྩ་བའི་བླ་མར། །མཆོད་པ་འབུལ་ལོ་དངོས་གྲུབ་སྩོལ་ཅིག །འོག་མིན་གནས་ན་མཚན་དཔེའི་དཔལ་འབར། །དག་པའི་འགྲོ་ལ་ཐེག་ཆེན་ཆོས་སྟོན། །རྟག་བརྟན་ལོངས་སྐུ་རྩ་བའི་བླ་མར། །མཆོད་པ་འབུལ་ལོ་དངོས་གྲུབ་སྩོལ་ཅིག །རབ་འབྱམས་ཞིང་ན་སངས་རྒྱས་བྱང་སེམས། ཉན་རང་མཁས་གྲུབ་སྒྱུར་རྒྱལ་ལ་སོགས། །སྣ་ཚོགས་སྤྲུལ་སྐུ་རྩ་བའི་བླ་མར། །མཆོད་པ་འབུལ་ལོ་དངོས་གྲུབ་སྩོལ་ཅིག །གང་ཐུགས་རྒྱལ་བ་རྣམས་དང་དབྱེར་མེད། །གསུང་ནི་དམ་ཆོས་ཀུན་གྱི་འབྱུང་གནས། །ཚོགས་མཆོག་འདུས་སྐུ་རྩ་བའི་བླ་མར། །མཆོད་པ་འབུལ་ལོ་དངོས་གྲུབ་སྩོལ་ཅིག །ཕུང་ལྔ་རྒྱལ་བ་འབྱུང་བཞི་ཡུམ་ཆེན། །སྐྱེ་མཆེད་སེམས་ཚོགས་ཚིགས་ཆེན་ཁྲོ་རྒྱལ། །གདན་གསུམ་ཀུན་བདག་རྩ་བའི་བླ་མར། །མཆོད་པ་འབུལ་ལོ་དངོས་གྲུབ་སྩོལ་ཅིག །ཀུན་རྫོབ་བླ་མ་སངས་རྒྱས་ཀུན་དངོས། །དོན་དམ་བླ་མ་འཁོར་འདས་ཀུན་ཁྱབ། །གདོད་མའི་མགོན་པོ་རྩ་བའི་བླ་མར། །མཆོད་པ་འབུལ་ལོ་དངོས་གྲུབ་སྩོལ་ཅིག །དེ་ལྟར་མཆོད་པའི་དགེ་བ་གང་དེས། །བླ་མ་དམ་པ་རྟག་ཏུ་མཉེས་ནས། །ཅི་བསམ་ཐམས་ཅད་ཆོས་བཞིན་འགྲུབ་པར། །སྔགས་འཆང་ཆེན་པོས་བྱིན་གྱིས་རློབས་ཤིག། །།
དཔྱད་གཏམ་སྤེལ་མཁན་ལ་གསལ་བརྡ།