༈ །ཤར་ཆེན་ཀླུ་ལྡིང་མཁན་ཆེན་རྡོ་རྗེ་འཆང་གི་གསོལ་འདེབས་དྲང་སོང་བདེན་སྨོན་རྡོ་རྗེའི་གླུ་དབྱངས་ཞེས་བྱ་བ་བཞུགས་སོ།།
༈ །འཇམ་དཔལ་དཔའ་བོའི་སྤོབས་པའི་གཏེར་ཆེན་ཚོགས། །དབྱངས་ཅན་དགའ་མས་གཅིག་ཏུ་སྤུངས་པའི་དཔྱིད། །བསྟན་པའི་སྤྱི་ནོར་སྲིད་མུན་དྲུང་འབྱིན་པའི། །ཐེག་ཆེན་ཆོས་ཀྱི་ཉི་མ་འཚོ་གཞེས་གསོལ། །བྱམས་པའི་དཔལ་གོས་བརྩེ་བའི་གེ་སར་ཅན། །དམིགས་མེད་སྙིང་རྗེའི་ཡལ་འདབ་འབོལ་བའི་ཁྲོད། །ཟབ་དགུའི་མཁྱེན་རྟོགས་འདབ་སྟོང་དགོད་པའི་ཕུལ། །རྣམ་འདྲེན་བྱེ་བའི་གཙུག་རྒྱན་འཚོ་གཞེས་གསོལ། །ཆོས་ཅན་ཀུན་རྟོགས་སྣང་ཆ་ཇི་སྙེད་ཚོགས། །གཞན་དབང་གདན་གསུམ་དཀྱིལ་འཁོར་རོལ་མོར་འཆར། །ཆོས་ཉིད་ཡོངས་གྲུབ་བདེ་ཆེན་ཡེ་ཤེས་ཀྱི། །དོན་སྟོན་གསུང་གསང་འཛིན་པ་འཚོ་གཞེས་གསོལ། །ཚོགས་གཉིས་ནོར་འཛིན་མ་མས་བསྐྱེད་བསྲིངས་པའི། །རྣམ་གསུམ་ཁྲིམས་ཀྱི་ནོར་བུའི་རྐང་འཐུང་མཆོག །དོན་གཉིས་འབྲས་བུའི་གཡུར་ཟ་ཁུར་ལྡན་སྐུ། །མི་ཤིགས་རྡོ་རྗེའི་ཆོས་བདུན་གྲུབ་པར་སྨོན། །རྩེ་གཅིག་གསོལ་བའི་མ་ལ་ཡ་རླུང་གིས། །རྗེས་བརྩེའི་སྤྲིན་སྔོན་ཕུང་པོ་གཡོ་བ་ལས། །གྲུབ་གཉིས་བདུད་རྩིའི་ཐིག་ཕྲེང་ཕེབས་པ་དང་། །སྐུ་བཞིའི་འབྲས་བཟང་མཆོག་གི་སྨིན་པ་སྩོལ། ། ཞེས་པའང་བསྟོད་ཡུལ་ཉིད་ལ་དད་པའི་སློབ་བུ་རྣམས་ཀྱི་རེ་སྐོང་ཕྱིར་ཤར་པ་མཁན་མཉྫུའི་མིང་ཅན་གྱིས་སྨྲས་པ་དོན་ཅན་དུ་གྱུར་ཅིག། །།སརྦ་མངྒ་ལཾ།། །།
དཔྱད་གཏམ་སྤེལ་མཁན་ལ་གསལ་བརྡ།