༈ །སྲིད་ཞིའི་གཙུག་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞབས་བརྟན་གསོལ་འདེབས་འཆི་མེད་རྡོ་རྗེའི་སྒྲ་དབྱངས་ཞེས་བྱ་བ་བཞུགས་སོ།།
༈ །རྣམ་ཀུན་མཆོག་ལྡན་ཤེས་རབ་ཕ་རོལ་ཕྱིན། །ངོ་མཚར་མཚན་དཔེའི་གཟུགས་སུ་ཤར་བའི་ལྷ། །འཕགས་མ་ཚེ་སྦྱིན་ཡིད་བཞིན་འཁོར་ལོ་ཡིས། །དེང་འདིར་འཆི་མེད་གྲུབ་པའི་དངོས་གྲུབ་སྩོལ། །རྗེ་བཙུན་འཇམ་དཔལ་གཞོན་ནུའི་མཚན་དཔེའི་སྐུ། །ངག་དབང་དབྱངས་ཅན་དགྱེས་པའི་སྙན་འགྱུར་གསུང་། །བློ་བཟང་རྒྱལ་བ་ཀུན་གྱི་ཡེ་ཤེས་ཐུགས། །བསྟན་འཛིན་རྒྱ་མཚོའི་དབང་པོ་ཞབས་བརྟན་གསོལ། །རྨད་བྱུང་ཐབས་མཁས་ཐུགས་རྗེའི་འོད་སྣང་གིས། །སྲིད་གསུམ་དགེ་བའི་ལམ་དུ་དབང་བསྒྱུར་ཞིང་། །འཛམ་གླིང་ཆེ་རྒུའི་སྙེམས་པ་འཕྲོག་པ་ལ། །མཚུངས་པ་མེད་པའི་མགོན་པོ་ཞབས་བརྟན་གསོལ། །ཆོས་ནོར་འདོད་ཐར་སྡེ་བཞིའི་དཔལ་ལྡན་པའི། །ཟབ་རྒྱས་ཆོས་ཀྱི་འཁོར་ལོ་ལེགས་བསྐོར་བའི། །འཕྲིན་ལས་བཟང་པོའི་འབྲེལ་ཚད་དོན་ལྡན་དུ། །མཛད་པའི་དེད་དཔོན་ཆེན་པོ་ཞབས་བརྟན་གསོལ། །རྣམ་དག་ཁྲིམས་ལྡན་བྱེ་བའི་མཁན་པོ་སྟེ། །རྒྱལ་སྲས་སེམས་དཔའ་ཡོངས་ཀྱི་བདག་ཉིད་གཙོ། །དཀྱིལ་འཁོར་རྒྱ་མཚོའི་ཁྱབ་བདག་འཁོར་ལོའི་མགོན། །ཡོངས་རྫོགས་བསྟན་པའི་མངའ་བདག་ཞབས་བརྟན་གསོལ། །ཚོགས་གཉིས་རིན་ཆེན་ཁམས་ལས་ལེགས་གྲུབ་ཅིང་། །གདུལ་བྱ་གླིང་བཞིའི་དབུས་ན་མངོན་མཐོ་བ། །རིས་མེད་བསྟན་འཛིན་རྒྱ་མཚོས་ཡོངས་བསྐོར་བའི། །སྐྱབས་མཆོག་རི་དབང་ལྷུན་པོ་ཞབས་བརྟན་གསོལ། །སྙིགས་མ་ལྔ་བདོའི་མེ་དཔུང་རབ་འཁྲུགས་པས། །བཟོད་དཀའི་གདུང་བས་མནར་བའི་འགྲོ་བ་ལ། །བྱམས་དང་སྙིང་རྗེའི་བྱིན་རླབས་ཆབ་རྒྱུན་གྱིས། །ཞི་བསིལ་བདེ་བའི་དབུགས་འབྱིན་ཞབས་བརྟན་གསོལ། །མགོན་པོ་གང་གི་འཕྲིན་ལས་རྟ་བདུན་གྱིས། །ལུང་རྟོགས་ཐུབ་བསྟན་ཉིན་བྱེད་ལེགས་དྲངས་པས། །བླང་དོར་སྣང་བས་དབེན་པའི་རྒྱལ་ཁམས་སུ། །ཕན་བདེའི་པད་ཚལ་རྒྱས་མཛད་ཞབས་བརྟན་གསོལ། །ཇི་སྲིད་ནམ་མཁའ་གནས་པ་དེ་སྲིད་དུ། །གང་འདུལ་ལྷུན་གྱིས་འགྲུབ་པའི་མཛད་འཕྲིན་གྱིས། །མཐའ་མེད་འཁོར་བར་འཁྱམས་པའི་སེམས་ཅན་དོན། །སྒྲུབ་མཛད་རྣམ་འདྲེན་དམ་པ་ཞབས་བརྟན་གསོལ། །དེང་ནས་བྱང་ཆུབ་སྙིང་པོ་མ་ཐོབ་བར། །བདག་སོགས་མཁའ་མཉམ་འགྲོ་བ་མ་ལུས་པ། །མགོན་པོ་ཁྱེད་ཀྱིས་འབྲལ་མེད་རྗེས་བཟུང་སྟེ། །གསུང་གི་བདུད་རྩིས་རྟག་ཏུ་འཚོ་བར་ཤོག །དེ་ལྟར་མི་ཕྱེད་དད་ཅིང་མོས་པའི་བློས། །རྩེ་གཅིག་གསོལ་བཏབ་སྨོན་པའི་བདེན་སྟོབས་དང་། །ཆོས་ཉིད་རྣམ་དག་ཆོས་ཅན་བསླུ་མེད་མཐུས། །ཇི་ལྟར་སྨོན་པའི་དོན་ཀུན་འགྲུབ་གྱུར་ཅིག །
ཅེས་སྲིད་ཞིའི་གཙུག་ནོར་༸གོང་ས་༸སྐྱབས་མགོན་ཆེན་པོའི་ཞབས་བརྟན་གསོལ་འདེབས་འཆི་མེད་རྡོ་རྗེའི་སྒྲ་དབྱངས་ཞེས་བྱ་བ་འདི་བཞིན་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་ནས་བསྐུལ་མ་མཛད་པ་བཞིན་ས་སྐྱ་ཁྲི་འཛིན་སྒྲོལ་མ་ཕོ་བྲང་པ་ངག་དབང་ཀུན་དགར་འབོད་པས་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག། །།
དཔྱད་གཏམ་སྤེལ་མཁན་ལ་གསལ་བརྡ།