༈ །རྒྱལ་ཁམས་ཕྱོགས་མེད་ཡངས་པའི་སྨན་ལྗོངས་སུ། །ཤེས་ལྡན་གཟུར་གནས་ནམ་མཁའི་མཐའ་ཀླས་པར། །ཀུན་སྤངས་ཆོས་རྗེའི་ཕྲིན་ལས་སྐྱོང་བའི་དཔལ། །བློ༷་གས༷ལ་རྒྱ༷་མཚོ༷འི་ཞབས་ལ་གསོལ་བ་འདེབས།།
༈ །ཚར་ཆེན་ཆོས་ཀྱི་རྒྱལ་པོའི་སྐུ་བསྟོད་ཞལ་གསུངས་མ་ནི། ༈ །གང་བློ༷་འདྲེན་པའི་དེད་དཔོན་གྱིས་བཟུང་ཞིང་། །རིམ་གཉིས་འོད་གས༷ལ་བདེ་ཆེན་བརྗིད་བཅས་ཏེ། །སྙན་བརྒྱུད་རྒྱ༷་མཚོ༷འི་ཕ་རོལ་མཐར་སོན་ནས། །དངོས་གྲུབ་ནོར་བུའི་དཔལ་འཛིན་དེ་ལ་འདུད། །རྗེ་བཙུན་བླ་མ་འཁོར་ལོའི་མགོན་དུ་མཐོང་། །མཐའ་ཡས་འགྲོ་ལ་བརྩེ་བས་རྗེས་སུ་ཆགས། །སྣང་སྲིད་ཆོས་ཀུན་སྒྱུ་མའི་ངང་དུ་དགོངས། །བྱ་བྲལ་ངུར་སྨྲིག་འཆང་བ་དེ་ལ་འདུད། །རྡོ་རྗེ་ཐེག་པའི་སྐྱེད་ཚལ་ཡངས་པའི་གཞིར། །གྲུབ་མཆོག་ཞལ་གྱི་པད་མའི་སྦྲང་རྩིའི་ལས། །ཉིན་བཞིན་མྱོང་བའི་ཉམས་མྱོང་བཅུད་ཆེན་པོ། །ལྷན་སྐྱེས་བདེ་བས་མྱོས་པ་དེ་ལ་འདུད། །གངས་རིའི་ཁྲོད་འདིར་བློ༷་གས༷ལ་བྱེ་བའི་ཁྲོད། །སྙན་བརྒྱུད་སློབ་བཤད་སྒྲ་དབྱངས་སྒྲོག་མཁས་ཤིང་། །རྒྱུད་སྡེ་རྒྱ༷་མཚོ༷འི་དོན་གྱི་བཅུད་ཕྱུང་བ། །རྒྱ་ཆེ་འགྲོ་བའི་མགོན་དུ་འགྱུར་བར་ཤོག །དེ་སྐད་རང་ལ་རང་གིས་ནི། །བསྟོད་པ་འདི་ནི་མི་འོས་ཀྱང་། །ཚིག་འདིས་གསོལ་བ་འདེབས་བྱེད་ན། །དེ་ལ་བྱིན་རླབས་ངང་གིས་འཇུག། །
༈ །ཚར་ཆེན་རྡོ་རྗེ་འཆང་གི་རྣམ་ཐར་གསོལ་འདེབས་བཀྲ་ཤིས་མཚན་བཟང་མ་བཞུགས་སོ།། ༈ །ཨོཾ་སྭསྟི། བཀྲ་ཤིས་མཚན་བཟང་ཡིད་ལ་དྲན་ཙམ་གྱིས། །ཕུན་ཚོགས་སྲིད་ཞིའི་དགེ་ལེགས་ཀུན་སྟེར་བ། །རབ་འབྱམས་རྒྱལ་བ་ཀུན་དངོས་ཚར་པ་རྗེ། །སྙིང་ནས་དྲན་ནོ་ཐུགས་རྗེ་ལྕགས་ཀྱུས་ཟུངས། །མགོན་ཁྱོད་གདོད་མའི་དབྱིངས་ནས་སངས་རྒྱས་ཀྱང་། །གྲངས་མེད་གདུལ་བྱའི་ཁམས་དང་བསམ་པ་བཞིན། །ངོ་མཚར་སྐྱེས་པའི་ཟློས་གར་བཅུ་གསུམ་གྱིས། །ཕན་བདེའི་དགའ་སྟོན་སྤེལ་ལ་གསོལ་བ་འདེབས། །བདག་སོགས་རྨུ་རྒོད་འགྲོ་ལ་བརྩེར་དགོངས་ནས། །ལྗོངས་འདིར་འཆི་མེད་རིགས་ཀྱི་ཐིག་ལེ་ལས། །བསམ་བཞིན་རྡོ་རྗེ་ཐེག་པའི་པད་ཚལ་གྱིས། །བོད་ཡུལ་འགྲོ་བའི་གཉེན་དེར་གསོལ་བ་འདེབས། །གཞོན་ནུའི་དུས་ནས་རང་ལུས་ལྷ་སྐུར་གཟིགས། །དམ་ཅན་སྲུང་མས་དངོས་སུ་གཏོར་མ་བླང་། །ཀློག་དང་ཡི་གེ་མ་བསླབས་ཐུགས་སུ་ཆུད། །བྱིས་པའི་སྤྱོད་ལས་འདས་ལ་གསོལ་བ་འདེབས། །འཁོར་བའི་ཕུན་ཚོགས་འབར་བའི་མེ་འོབ་ལྟར། །གཟིགས་ནས་ངེས་འབྱུང་ཚུལ་ཁྲིམས་དཔལ་གྱིས་འཁྱུད། །བཅས་དང་རང་བཞིན་ཉེས་པ་རིང་དུ་སྤོང་། །དགྲ་བཅོམ་ཆེན་པོའི་ཞབས་ལ་གསོལ་བ་འདེབས། །དྲུག་ཅུ་རྩ་གསུམ་གདམས་པའི་ཡོངས་འཛིན་བསྟེན། །མདོ་སྔགས་གསར་རྙིང་དམ་ཆོས་ཇི་སྙེད་པ། །ཐོས་བསམ་བསྒོམས་པས་འཁྲུལ་མེད་ཐུགས་སུ་ཆུད། །རྩོད་དུས་ཀུན་མཁྱེན་གཉིས་པར་གསོལ་བ་འདེབས། །བསྐལ་བཟང་དང་པོའི་སངས་རྒྱས་རྡོ་རིངས་པས། །རྗེས་བཟུང་ས་སྐྱའི་བླ་ཆེན་ཐུགས་ཀྱི་བཅུད། །སྙན་བརྒྱུད་སློབ་བཤད་ཆོས་ཀྱི་འཁོར་ལོ་སྒྱུར། །སྐལ་བཟང་གདུལ་བྱའི་གཉེན་དེར་གསོལ་བ་འདེབས། །བརྗོད་བྲལ་བདེ་ཆེན་གནས་ལུགས་མངོན་གྱུར་ཀྱང་། །རིམ་གཉིས་བཟླས་པ་བཅས་པའི་རྣལ་འབྱོར་ལ། །ནམ་ཡང་གཡེང་མེད་སྒྲུབ་པ་ལྷུར་ལེན་པའི། །གྲུབ་པའི་གཙུག་རྒྱན་མཆོག་ལ་གསོལ་བ་འདེབས། །ཨོ་རྒྱན་པདྨ་དུས་དགྲ་མ་ཧེའི་ཞལ། །རྡོ་རྗེ་བཙུན་མོ་ཡང་གསང་ཁྲོས་པ་སོགས། །ལྷ་མཆོག་དུ་མས་དངོས་སུ་ཞལ་གཟིགས་ཏེ། །ལུང་བསྟན་སྣང་བ་ཐོབ་ལ་གསོལ་བ་འདེབས། །གུར་གྱི་མགོན་པོ་དཔའ་བོ་བྲམ་ཟེའི་གཟུགས། །འཆི་བདག་དབང་ཕྱུག་གིང་ལྔ་གཟའ་གདོང་སོགས། །དམ་ཅན་རྒྱ་མཚོ་དངོས་སུ་བྲན་དུ་འཁོལ། །མཐུ་སྟོབས་ནུས་པའི་གཏེར་ལ་གསོལ་བ་འདེབས། །བགྲང་ཡས་གདུལ་བྱའི་ཁམས་དང་བསམ་པ་བཞིན། །ཉིད་ཀྱིས་ཇི་ལྟར་གཟིགས་པའི་ལམ་བསྟན་ནས། །བཀའ་བཞིན་མཁས་དང་གྲུབ་པའི་སར་བཀོད་དེ། །འཁྲུལ་མེད་ལམ་སྟོན་ཁྱོད་ལ་གསོལ་བ་འདེབས། །ཞིང་འདིའི་མཛད་པ་ལེགས་པར་མཐར་ཕྱིན་ཏེ། །ཀུན་སྤངས་ཆེན་པོས་བྱོན་ཞེས་བསྐུལ་བའི་ཚེ། །བགྲང་ཡས་ངོ་མཚར་ལྟས་དང་ལྷན་ཅིག་ཏུ། །མཁའ་སྤྱོད་གནས་སུ་གཤེགས་ལ་གསོལ་བ་འདེབས། །ཆོས་དབྱིངས་ངང་ལས་སྒྱུ་མའི་སྐུར་བཞེངས་ཏེ། །གུས་ལྡན་སློབ་མའི་རྨི་ལམ་སྣང་བ་ལ། །ཞལ་བསྟན་དབུགས་དབྱུང་ལྟོས་པར་བཅས་པ་ཀུན། །རྗེས་འཛིན་ལུང་བསྟན་མཛད་ལ་གསོལ་བ་འདེབས། །བློ༷་གས༷ལ་གདུལ་བྱའི་རྒྱ༷་མཚོ༷་ཀུན་གྱི་གཉེན། །གྲགས་བསྟན་སྙན་བརྒྱུད་བསྟན་པའི་རྒྱལ་མཚན་འཛིན། །དོན་གཉིས་དཔལ་འབྱོར་བཟང་པོ་ཚར་པ་རྗེའི། །ཉིན་མཚན་རྣམ་ཐར་དྲན་ཞིང་གསོལ་བ་འདེབས། །གུས་པས་ཕྱག་འཚལ་རབ་འབྱམས་མཆོད་སྤྲིན་འབུལ། །ཉེས་པ་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་བསྐོར་ཞིང་བཞུགས་པར་གསོལ་བ་འདེབས། །དགེ་དེས་འགྲོ་ཀུན་བླ་མས་རྗེས་འཛིན་ཤོག །དེ་ལྟར་ཁྱེད་ལ་གུས་པས་གསོལ་བཏབ་པས། །དུས་འདི་ནས་བཟུང་བྱང་ཆུབ་སྙིང་པོའི་བར། །འབྲལ་མེད་ཐུགས་རྗེའི་ལྕགས་ཀྱུས་རྗེས་བཟུང་ནས། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །གང་གི་ཞབས་སེན་ཡིད་ལ་དྲན་ཙམ་གྱིས། །ཕྱི་ནང་བདུད་ལས་རྒྱལ་བའི་དཔལ་ཡོན་ཅན། །རྡོ་རྗེ་འཆང་དབང་ཚར་པ་ཆོས་ཀྱི་རྗེའི། །བསྟན་པ་ཕྱོགས་བཅུར་རྒྱས་པའི་བཀྲ་ཤིས་ཤོག །ཅེས་མཁྱེན་བརྩེའི་དབང་ཕྱུག་གི་གསུང་འཁྲུལ་མེད་དགེའོ།།
༈ །དུས་གསུམ་རྒྱལ་བའི་བྱིན་རླབས་རྒྱ་མཚོ་ལས། །དངོས་གྲུབ་ཡིད་བཞིན་ནོར་བུ་ལེགས་བླངས་ཏེ། །འགྲོ་ལ་ཕན་བདེའི་ཆར་འབེབས་ས་སྐྱ་པ། །སྔགས་འཆང་ཆེན་པོའི་ཞབས་ལ་གསོལ་བ་འདེབས། །ངག་དབང་ལྷ་ཡི་མཁྱེན་བརྩེ་ནུས་པའི་གཟུགས། །ཀུན་ནས་དགའ་བའི་ཐུགས་མཚོ་ལས་འཕོས་པའི། །བསོད་ནམས་ཡེ་ཤེས་མཆོག་གཏེར་འཇམ་དཔལ་དབྱངས། །ཀུན་དགའི་མཚན་ཅན་ཞབས་ལ་གསོལ་བ་འདེབས། །རྒྱལ་བའི་ཡེ་ཤེས་གཅིག་བསྡུས་མཁྱེན་པའི་གཏེར། །དམར་སེར་དྷཱིཿཡིག་འོད་ཀྱི་སྣང་བ་ཡིས། །བསྟན་འགྲོའི་དཔལ་སྟེར་རྗེ་བཙུན་ས་སྐྱ་པ། །ཀུན་དགའ་བློ་གྲོས་ཞབས་ལ་གསོལ་བ་འདེབས། །དྲག་ཤུལ་ནུས་ལྡན་པདྨ་ཀ་ར་ཡི། །ཕྲིན་ལས་སྒྱུ་འཕྲུལ་ཆེ་རྒུའི་གཙུག་གི་རྒྱན། །རིན་ཆེན་བསྟན་པ་སྤེལ་མཁས་ས་སྐྱ་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ངག་དབང་ལྷ་ཡི་རིགས་འཁྲུངས་འཇམ་པའི་དབྱངས། །མཐུ་སྟོབས་མངའ་བདག་འཁོན་རིགས་གསང་བའི་བདག །ས་སྐྱའི་རིགས་སྤེལ་དབང་ཕྱུག་གངས་ཅན་མགོན། །ཡབ་རྗེ་རྡོ་རྗེ་འཆང་ཆེན་གསོལ་བ་འདེབས། །ངག་ལ་དབང་བསྒྱུར་འཇམ་དབྱངས་ས་སྐྱ་པའི། །ཀུན་ལ་དགའ་སྟེར་སྙན་བརྒྱུད་གདམས་པའི་མཛོད། །རིན་ཆེན་བཤད་དང་སྒྲུབ་པའི་རྒྱལ་མཚན་རྩེར། །འགོད་མཁས་འདྲེན་མཆོག་བླ་མར་གསོལ་བ་འདེབས། །ངག་དབང་ཀུན་དགའི་རྒྱལ་མཚན་བསྒྲེང་བའི་མཚན། །མཚན་མཆོག་གསུམ་ལྡན་གདུང་དུ་རིམ་བྱོན་སླར། །སླར་ཡང་བསམ་བཞིན་འགྲོ་ཀུན་དགའ་བའི་དཔལ། །དཔལ་ལྡན་ཕྱོགས་ལས་རྣམ་རྒྱལ་མཚན་ཅན་འདུད། །ངག་གི་དབང་པོའི་བྱིན་རླབས་ཐུགས་ལ་ཤར། །བློ་གྲོས་ཆེན་པོའི་རྒྱལ་བའི་དགོངས་པ་རྟོགས། །གཞན་ཕན་ཕྲིན་ལས་ཕྱོགས་བཅུ་ཀུན་ཏུ་རྒྱས། །སྙིང་པོའི་བསྟན་འཛིན་མཆོག་ལ་གསོལ་བ་འདེབས། །འཇམ་པའི་དབྱངས་དང་གཉིས་སུ་མི་ཕྱེད་པའི། །མཁྱེན་པའི་དཀྱིལ་འཁོར་ཆ་ཤས་རབ་རྫོགས་ཤིང་། །བསྟན་འགྲོའི་ཆུ་སྐྱེས་བཞད་པའི་གཉེན་གཅིག་པུ། །དཔལ་ལྡན་འདྲེན་པ་བཟང་པོར་གསོལ་བ་འདེབས།། ༈ །གང་ཞིག་དད་པས་བླ་མའི་ཚོགས་རྣམས་ལ། །ཚེ་འདིར་རྟག་ཏུ་གསོལ་བ་འདེབས་བྱེད་ན། །བདག་སོགས་རྒྱུད་ལ་བླ་མ་ཁྱེད་རྣམས་ཀྱིས། །ཡེ་ཤེས་གཟིགས་པའི་བྱིན་རླབས་འཇུག་པར་ཤོག།
དཔྱད་གཏམ་སྤེལ་མཁན་ལ་གསལ་བརྡ།