༼བ༽
༄༅། །གོ་པེ་ལས་རྒྱས་འབྲིང་བསྡུས་གསུམ་བཞེངས་པའི་མཚོན་བྱེད་བཞུགས།།
༄༅། །གསུང་རབ་རིན་པོ་ཆེ་རྣམ་པར་བཀོད་པའི་མཚོན་བྱེད་ཅེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བླ་མ་དམ་པ་རྣམས་ཀྱི་རང་བཞིན་ནི། །བླ་མེད་སངས་རྒྱས་ཐམས་ཅད་གཅིག་བསྡུས་སླད། །བླ་ན་མེད་པའི་དཔལ་འབྲས་ཀུན་སྩོལ་བའི། །བླ་མེད་བླ་མའི་ཚོགས་ལ་ཕྱག་འཚལ་ལོ། །ལྷར་བཅས་འཇིག་རྟེན་སྣང་མཛད་སྒྲོན་མ་མཆོག །ལྷ་བརྒྱའི་གཙུག་གི་ནོར་བུས་ཞབས་མཆོད་ཅིང༌། །ལྷ་མིན་སྡེ་དང་བཅས་པ་ཟིལ་གནོན་པ། །ལྷ་ཡི་ལྷར་གྱུར་ལྷ་མཆོག་སངས་རྒྱས་རྒྱལ། །ཆོས་གང་ཐོག་མ་བར་དང་མཐར་དགེ་བས། །ཆོས་མིན་རྡུལ་དང་མུན་པ་རྣམ་བསལ་ནས། །ཆོས་ཀྱི་སྣང་བས་ཞི་བའི་དཔལ་བསྐྱེད་པ། །ཆོས་བཟང་ངེས་འབྱིན་ལམ་ལ་ཕྱག་འཚལ་ལོ། །དགེ་བ་སྤྱད་པའི་རྒྱུ་ལས་ལེགས་བསྐྲུན་ཞིང༌། །དགེ་ལེགས་ལམ་ལ་གཅིག་ཏུ་གཞོལ་གྱུར་པ། །དགེ་འདུན་རྒྱ་མཚོ་རྒྱ་མཚོའི་སྤྲིན་ཚོགས་ལ། །དགེ་བ་སྤེལ་སླད་ཕྱག་འཚལ་མཆོད་པར་བགྱི། །སྐྱེ་འགག་དུ་མར་སྣང་བའི་ཆོས་རྣམས་ཀུན། །སྐྱེ་འགག་མེད་པའི་དབྱིངས་སུ་ལེགས་བསྟན་པས། །སྐྱེ་སོགས་སྲིད་ཞིའི་མཐའ་ལས་རྣམ་གྲོལ་བ། །སྐྱེ་མེད་རྒྱལ་བའི་ཡུམ་ལ་ཕྱག་འཚལ་ལོ། །འདི་ལྟར་བསྐལ་པའི་མཆོག་གྱུར་བསྐལ་བཟང་གི། །སྐྱེ་དགུའི་ཚེ་ལོ་བརྒྱ་པའི་དུས་བབས་ཚེ། །ཤཱཀྱའི་རྒྱལ་པོ་ཆོས་ཀྱི་རྒྱལ་པོར་བྱོན། །གསུང་རབ་རིན་ཆེན་འགྲོ་ལ་རབ་གསལ་གྱུར། །དེས་བསྟན་བསྟན་པ་ལྔ་བརྒྱ་བདུན་པ་ལ། །འཛམ་བུས་མཚོན་པ་འཛམ་གླིང་བྱང་ཕྱོགས་སུ། །ཧོར་གྱི་རིགས་བྱུང་རིགས་གཞན་ཟིལ་གནོན་པ། །ཇིང་གིར་གན་ཞེས་རབ་གྲགས་གྲགས་ཆེན་དེས། །རང་གི་དབང་གིས་ཡུལ་ཀུན་དབང་དུ་བྱས། །དེ་རྗེས་རྒྱལ་རབས་ལྔ་པའི་རྒྱལ་པོ་མཆོག །གོ་པེ་ལ་ཞེས་འགྲོ་ལ་རབ་གྲགས་པས། །རྒྱལ་ཐབས་མཛད་པས་རྒྱལ་སྲིད་སྔ་མ་བས། །ཆེས་ཆེར་འཕེལ་ཞིང་ཆོས་བཞིན་རྣམ་པར་བསྐྱངས། །འགྲོ་བ་དཔལ་འབྱོར་གཉིས་ཀྱིས་འབྱོར་པར་གྱུར། །ས་བདག་དེ་ནི་བསྟན་ལ་རབ་གུས་ཤིང༌། །ཁྱད་པར་བོད་ཁམས་དག་ལ་ཐུགས་བརྩེ་བས། །གངས་ཅན་སྐྱོང་བའི་བཀོད་པ་རྒྱ་ཆེར་མཛད། །བྱེ་བྲག་མདོ་ཁམས་ཟལ་མོ་སྒང་ཞེས་པ། །ཤར་ནུབ་ལྷོ་བྱང་སྡེ་དང་ཡན་ལག་བཅས། །ཀུན་ལ་ཕན་ཕྱིར་ཀུན་གྱི་གཙོ་བོར་ནི། །སྟོན་ཚུལ་ཞེས་བྱ་བ་ལ་དབང་རབ་བསྐུར། །དེ་ཡི་གྲོགས་དང་ཡུལ་ཁམས་བསྲུང་བའི་ཕྱིར། །ཡུ་གུར་རིགས་བྱུང་ག་ར་གོ་ཇོ་ཡི། །མཁར་དུ་སྐྱེས་པ་ག་ནིམ་དུ་ཞེས་བྱ། །དེ་ཡི་བུ་ནི་དུ་གལ་ག་ཡ་སྟེ། །དེ་ཡི་ཁྱིམ་ཟླ་དུར་མིས་དེ་རིམ་མོ། །དེ་དག་གི་བུ་ཡུག་རུན་ག་ཡ་སྟེ། །དེ་ཡི་ནུ་བོ་ཟེ་འུན་ག་ཡ་ཡིན། །ཐ་ཆུང་ཨེ་སེ་ན་ཞེས་བྱ་བ་འདི། །ལུང་དང་བཀའ་རྟགས་ཕྱག་རྒྱ་དང་བཅས་པ། །ཉེ་བར་བསྐོས་ཤིང་བསྐོས་པའི་བྱ་བ་བསྒྲུབས། །འདི་ཡི་བླ་མ་སྲིད་གསུམ་གསལ་མཛད་པ། །ཁམས་གསུམ་རྣམ་འདྲེན་ལམ་གསུམ་སྟོན་པ་པོ། །ས་སྐྱ་པཎྜི་ཏ་ཞེས་གྲགས་པ་ཡིན། །དེ་ཡི་དྲིན་གྱིས་བསྟན་ལ་རབ་ཞུགས་ནས། །བསྟན་པས་བསྒྲུབ་བྱ་སངས་རྒྱས་ཐོབ་ཕྱིར་དང༌། །རྒྱལ་པོ་ཡབ་སྲས་བཙུན་མོར་བཅས་པ་རྣམས། །སྐུ་ཚེ་རིང་ཞིང་ཆབ་སྲིད་བརྟན་ཕྱིར་དང༌། །ཕ་མ་སོགས་ཀྱི་དྲིན་ལན་བསབས་ཕྱིར་དང༌། །རྒྱལ་ཁམས་ཆོས་ཀྱིས་ཤིས་པར་བྱ་བའི་ཕྱིར། །དུས་གསུམ་རྒྱལ་བ་ཀུན་གྱི་ཡུམ་གྱུར་པ། །ཤེས་རབ་ཕ་རོལ་ཕྱིན་མ་རྒྱས་འབྲིང་གསུམ། །ཤིང་ཕོ་ཁྱི་ལོའི་སྟོན་ཟླ་རྣམ་གསུམ་ལ། །སྨར་ཁམས་ཙོམ་མདོ་གནས་སར་ཞེས་བྱ་བར། །བཟོ་སྦྱངས་མཁས་པའི་ཚོགས་རྣམས་སྤྱན་དྲངས་ཏེ། །བཻཌཱུརྻ་དང་མཚུངས་པའི་གཞི་རྟེན་ལ། །གསེར་བཟང་ཞུན་མས་ལེགས་པར་བཞེངས་ནས་ཀྱང༌། །ཞུས་དག་དྲས་དང་གླེགས་ཤིང་གླེགས་ཐག་དང༌། །ན་བཟའི་བར་གྱིས་རིམ་གྲོ་ཆེར་བགྱིས་ཤིང༌། །དྲི་མེད་ལུང་གི་ཚུལ་ལས་འབྱུང་བ་བཞིན། །རབ་ཏུ་གནས་པ་ཡོངས་སུ་རྫོགས་བགྱིས་ཏེ། །ཁ་ན་མ་ཐོ་མེད་ཅིང་དགེ་བ་ཡི། །ཡོ་བྱད་ཚོགས་ཀྱིས་བསྙེན་བཀུར་འབུལ་བ་བགྱིས། །སླད་ནས་དགེ་བ་སྤེལ་ཞིང་རྒྱུན་བསྲིང་ཕྱིར། །ཆོས་འདི་ལེགས་པར་གསན་ཞིང་ཐུགས་ཆུད་པས། །བསོད་ནམས་ཞིང་གི་མཆོག་ལ་ཕུལ་ནས་ཀྱང༌། །ཀློག་དང་ཁ་ཏོན་མཆོད་པ་རྒྱས་བགྱིད་པའི། །བཀོད་པ་བགྱིས་པའི་དགེ་བ་རྒྱ་ཆེན་དང༌། །གཞན་ཡང་ཕྱོགས་བཅུའི་དུས་གསུམ་དགེ་བ་ཀུན། །ལྷག་བསམ་དག་པས་གཅིག་ཏུ་བསྡོམས་བགྱིས་ནས། །བདག་དང་མཁའ་མཉམ་སེམས་ཅན་ཐམས་ཅད་ཀྱིས། །རྫོགས་པའི་བྱང་ཆུབ་དམ་པ་ཐོབ་པར་ཤོག །གནས་སྐབས་ས་བདག་ཡབ་སྲས་སྐུ་ཚེ་རིང༌། །རྒྱལ་ཁམས་ཆོས་དང་ལྡན་ཞིང་བདེ་ལེགས་ཤོག །བདག་ཀྱང་ཚེ་རིང་ནད་མེད་བར་ཆད་ཞི། །བསམ་པ་ཐམས་ཅད་ཆོས་བཞིན་འགྲུབ་པ་དང༌། །མི་ཕམ་རྒྱལ་པོ་མངོན་པར་བྱང་ཆུབ་ཚེ། །དེ་ཡིས་བྱང་ཆུབ་དམ་པར་ལུང་སྟོན་ཤོག །དེ་ལྟའི་དོན་སྟོན་བྱེད་པའི་ཚིག་སྦྱོར་འདི། །ཤིང་མོ་ཕག་ལོ་བྱ་སྦོའི་ཟླ་བ་ཡི། །བཅོ་ལྔའི་ཉིན་པར་ཙོམ་མདོ་གནས་སར་དུ། །ལེགས་པར་བྲིས་པ་ཀུན་ཏུ་བདེ་ལེགས་ཤོག། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།