༼བ༽
༄༅། །ཀ་སོགས་སུམ་ཅུ་ལ་སྤེལ་བ་བཞུགས།།
༄༅། །ཨོཾ་སྭ་སྟི་སིདྡྷཾ། ན་མོ་མཉྫུ་གྷོ་ཥཱ་ཡ། ཀ་ལ་པིངྐའི་དབྱངས་ལྟར་སྙན་གསུང་གིས། །ཁ་ན་མ་ཐོའི་ཚོགས་འཇོམས་ཐར་པའི་གླིང༌། །ག་ལ་བ་དེར་གདུལ་བྱ་འདྲེན་མཛད་ཅིང༌། །ང་དང་ང་ཡིར་འཛིན་སྤངས་དེ་ལ་འདུད། །ཅ་ཅོ་རྩོད་དང་རྣམ་པར་གཡེང་བ་ཀུན། །ཆ་ཤས་ཀྱིས་ནི་རྣམ་པར་སྤང་བྱ་ཞིང༌། །ཇ་སོགས་ཀུན་ལའང་མ་ཆགས་ཟླ་བ་ནི། །ཉ་བ་ལྟ་བུར་ཞི་ཞིང་དེས་པ་བྱ། །ཏ་ལའི་སྡོང་པོ་ཀུན་ནས་རྒྱས་པ་ལྟར། །ཐ་དད་ཡོན་ཏན་ལོ་འདབ་དུ་མས་ཕྱུག །ད་ལྟར་གནས་དང་མ་འོངས་འགྲོ་བ་ཀུན། །ན་སོགས་གདུང་སྐྱོབ་བསིལ་གྲིབ་ལྡན་པར་བྱ། །པ་ལ་ཤ་ཡི་མེ་ཏོག་རྒྱས་པ་ལྟར། །ཕ་རོལ་ཕྱིན་དྲུག་ཡོངས་སུ་རྫོགས་བྱས་ཏེ། །བ་མཆོག་དཔག་བསམ་ཤིང་དང་བུམ་བཟང་བཞིན། །མ་ལུས་འགྲོ་བའི་རེ་བ་བསྐང་བར་བྱ། །ཙ་ཀོར་ཀུ་མུད་ཀྱིས་ཚིམ་པད་མོའི་ཚལ། །ཚ་ཟེར་གྱིས་རྒྱས་བྱེད་ལྟར་བློ་གསལ་སྐྱོངས། །ཛ་མན་ཨ་ནེའི་བུ་ཡིས་རྒྱལ་ངན་ལྟར། །ཝ་སྐྱེས་ལྟ་བུའི་ཕས་རྒོལ་གཞོམ་པར་བྱ། །ཞ་ལོང་ལ་སོགས་འགྲོ་བ་དམན་པ་ལའང༌། །ཟ་མ་ལོངས་སྤྱོད་དང་བཅས་ཅི་འབྱོར་སྦྱིན། །འ་ཡིག་ལྟ་བུར་ཉི་འོག་མ་གྲགས་ཀྱང༌། །ཡ་མཚན་ཆེ་བ་ལྟར་སྒྲོགས་གངས་རི་ཡི། །ར་བས་བསྐོར་བའི་གནས་འདི་མི་དགེའི་བཤེས། །ལ་ལས་སྦྱར་བའི་ལུགས་ངན་སྤང་བར་བྱ། །ཤ་ཁྲག་མི་གཙང་རང་ལུས་མ་ཆགས་ཤིང༌། །ས་ཆེན་ལྟ་བུར་གཞན་གྱི་རྟེན་བྱས་པས། །ཧ་ཅང་ཕོངས་པའི་སྐྱེ་དགུ་བདེ་ཐོབ་ནས། །ཨ་ལ་ལ་ཞེས་གད་མོའི་སྒྲ་སྒྲོགས་ཤོག །དེ་ལྟར་ཡི་གེའི་མ་མོ་ལ་སྤེལ་ནས། །ཚིགས་སུ་བཅད་པར་སྦྱར་འདི་འགྲོ་བ་ཡི། །སྒྲོན་མའི་གསུང་གི་ཟེར་གྱིས་བློ་གསལ་བ། །བློ་གྲོས་རྒྱལ་མཚན་དཔལ་གྱིས་སྦྱར་བ་ཡིན།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
ཀ་རྩོམ་འདིའི་སྐོར་དཔྱད་རྩོམ་བྲིས་པ་འདྲ་ཡོད་ན་ལམ་སྟོན་གནང་རོགས་་་རེ་བསྐུལ་ཆེན་པོ་ཡིན།
ཐུགས་སྣང་གནང་བར་བཀའ་དྲིན་ཆེ།