༼པ༽
༄༅། །སྦྱིན་སྲེག་གི་སྡོམ་ཚིག་བཞུགས།།
༄༅། །ན་མཿཤྲཱི་ཙཀྲ་སམྦ་རཱ་ཡ། ཉོན་མོངས་བུད་ཤིང་ཀུན་བསྲེགས་ཤིང༌། །ཡེ་ཤེས་ལྔ་ཡི་འོད་རབ་འབར། །འགྲོ་བའི་མུན་ནག་རྣམ་སེལ་བའི། །རྡོ་རྗེ་མེ་ལ་ཕྱག་འཚལ་ནས། །སྲིད་པའི་རླན་ལས་རྣམ་སྐྱེས་པའི། །ཉེས་ཚོགས་ཚང་ཚིང་བསྲེག་བྱའི་ཕྱིར། །སྤྱོད་པའི་རྡོ་རྗེའི་རྗེས་འབྲངས་ནས། །སྦྱིན་སྲེག་ཆོ་ག་བདག་གིས་བཤད། །ཞི་བ་ཤར་དུ་ཟླུམ་པོ་དཀར། །བུད་ཤིང་འོ་མ་ཅན་གྱི་རྩེ། །མེ་ནི་བྲམ་ཟེའི་རྒྱུན་ཞག་ཤིས། །རྒྱས་པ་ལྷོ་རུ་གྲུ་བཞི་སེར། །འབྲས་བུ་ཅན་གྱི་རྐེད་པའི་ཆ། །རྒྱལ་རིགས་ཁྱིམ་ནས་བྱུང་བའི་མེ། །དབང་ལ་ནུབ་ན་གྲུ་གསུམ་དམར། །མེ་ཏོག་དམར་པོ་ལྡན་པའི་ཤིང༌། །སྨད་འཚོང་མ་ཡི་ཁྱིམ་གྱི་མེ། །དྲག་པོ་བྱང་དུ་ཟླ་གམ་ནག །ཚེར་མ་ཅན་གྱི་རྩ་བའི་ཆ། །གདོལ་བའི་ཁྱིམ་ནས་བྱུང་བའི་མེ། །ཐབ་ཁུང་རྒྱར་ནི་ཁྲུ་གང་སོགས། །ཟབས་སུ་དེ་ཡི་ཕྱེད་ཡིན་ཏེ། །སོར་བཞི་ལ་སོགས་བསྐྱེད་བྱས་ནས། །དེ་ཡི་ཚད་ཀྱི་མུ་རན་བརྩིགས། །ལས་ཀྱི་ཁ་ཁྱེར་དེ་ཡི་ཕྱེད། །སོར་བཞིའི་རྒྱ་ལ་དེ་ཕྱེད་འཕང༌། །ནང་གི་ཁ་ཁྱེར་མུ་རན་ལ། །པདྨ་གྲི་གུག་ཕྲེང་བ་བྲི། །ལས་ཀྱི་ཁ་ཁྱེར་ལས་བཞི་ཡི། །རྡོ་རྗེ་རིན་ཆེན་པདྨ་དམར། །རྡོ་རྗེ་རྩེ་གསུམ་ཕྲེང་བ་བྲི། །ཐབ་དབུས་པདྨ་འདབ་བརྒྱད་ལ། །ལྟེ་བར་རྡོ་རྗེ་གྲི་གུག་དང༌། །ཕྱོགས་བཞིར་རིགས་བཞི་མཚམས་བཞིར་སྣོད། །ཕྱི་རོལ་འཁོར་ལོ་རིམ་པ་གསུམ། །གཞལ་ཡས་ཁང་བཅས་ཕྱོགས་མཚམས་སུ། །ལྕགས་ཀྱུ་སོགས་བཞི་གྲི་གུག་བཞི། །ཕྱི་རོལ་དུར་ཁྲོད་དེ་ཡི་མཐར། །མུ་ཁྱུད་ལ་གནས་ཤར་ཕྱོགས་སུ། །པདྨ་དབྱུ་གུ་ཕྲེང་བ་དང༌། །སྤྱི་བླུགས་རི་དྭགས་བགས་པའོ། །ལྷོར་ནི་རྩེ་གསུམ་ཟླ་ཚེས་དང༌། །རྒྱལ་མཚན་རལ་པའི་ཐོར་ཚུགས་མིག །ནུབ་ཏུ་འཁོར་ལོ་དུང་དང་ནི། །དབྱུག་ཐོ་རལ་གྲི་ཕུབ་རྣམས་སོ། །བྱང་དུ་མདུང་དང་དྲིལ་བུ་དང༌། །བ་དན་རྨ་བྱ་ར་སྐྱེས་བྲི། །ཕྱི་རོལ་རྡོ་རྗེའི་ཕྲེང་བ་ལ། །མཚམས་བཞིར་རྡོ་རྗེ་ཕྱེད་པའོ། །ཆས་གོས་འདུག་སྟངས་བསམ་པ་དང༌། །ལྷ་ཡི་རྟེན་དང་ཉམས་དང་མདངས། །གསང་སྔགས་ཀྱི་ནི་སྤེལ་ཚིག་སོགས། །ལས་དང་རྗེས་སུ་མཐུན་པར་བྱ། །མདའ་དགུ་ཚོན་སྐུད་མེ་ལོང་བཞི། །ཕུར་བུ་བཅུ་དང་ཀུ་ཤ་དང༌། །རྡོར་དྲིལ་དགང་བླུགས་ནང་མཆོད་དང༌། །བུམ་པ་ལྔ་དང་མཆོད་ཡོན་གཉིས། །བསྲེག་རྫས་ཡམ་ཤིང་མར་དང་ཏིལ། །བཅུ་པ་ཞོ་དང་ཀུ་ཤ་དང༌། །དཱུར་བ་ནས་གྲོ་སོ་བ་འབྲས། །སྲན་མ་དང་ནི་འབྲས་བུ་རྣམས། །ཁྱད་པར་དུ་ནི་ཞི་ལ་ཏིལ། །རྒྱས་ལ་ཞོ་དང་དབང་མེ་ཏོག །དྲག་པོ་ལ་ནི་ཤ་རྣམས་ཏེ། །མཆོག་གི་དོན་དུ་བཅུ་པ་དབུལ། །མཆོད་རྫས་རྣམ་བདུན་གཏོར་མ་གསུམ། །འཇམ་པོ་གསུམ་ལ་བསྲེག་རྫས་གཡས། །དྲག་པོ་དེ་ལས་བཟློག་པར་བཤམ། །ཕྱག་གཉིས་པ་ཡི་ང་རྒྱལ་གྱིས། །སྔགས་བཅས་ཕོ་ཉ་བཅུ་སྤྲོ་ཞིང༌། །སྟང་སྟབས་སྦྱོར་བས་བགེགས་བསྐྲད་ནས། །སྲུང་འཁོར་བསྒོམ་ཞིང་ཕུར་བུས་གདབ། །བུམ་བཟླས་མཆོད་ཡོན་བྱིན་གྱིས་བརླབས། །ཐབ་དང་ཡོ་བྱད་བསང་ཞིང་སྦྱང༌། །བསྐྱེད་ནས་བྱིན་གྱིས་བརླབ་པར་བྱ། །མེ་བཙལ་མེ་ལྷ་བསྐྱེད་བྱས་ནས། །སྤྱན་དྲངས་བྱོན་ཟན་དབུལ་ཞིང་མཆོད། །བསྟིམ་ནས་དབང་བསྐུར་རིགས་རྒྱས་གདབ། །ཀུ་ཤ་མདའ་སྐུད་མེ་ལོང་དགྲམ། །མེ་ལྷ་མཆོད་ནས་བསྲེག་རྫས་དབུལ། །བསྟོད་ནས་འབར་བར་གྱུར་པའི་དབུས། །ཡན་ལག་བཞི་རྫོགས་ཆོ་ག་ཡིས། །དཀྱིལ་འཁོར་བསྒྲུབས་ནས་གསང་སྔགས་དང༌། །ཕྱི་ནང་ཡིད་ལས་བྱུང་བས་མཆོད། །རྫས་རྣམས་སོ་སོའི་སྔགས་ཀྱིས་ནི། །སྤྱིའམ་ལྷ་ཡི་གྲངས་ཀྱིས་སམ། །ལྔ་ལ་རྣམ་ལྔ་གཞན་ལ་གཅིག །རེ་རེའི་མཐར་ཡང་མཆོད་བསྟོད་བྱ། །གཏོར་མས་མཆོད་ནས་དངོས་གྲུབ་བསླང༌། །གཤེགས་སུ་གསོལ་ནས་སྔོན་བཞིན་དུ། །མེ་ལྷ་མཆོད་ནས་དེ་ཉིད་དང༌། །ཕྱོགས་སྐྱོང་རྣམས་ལ་གཏོར་མ་དབུལ། །བཟོད་པར་གསོལ་ནས་གཤེགས་སུ་གསོལ། །སྨོན་ལམ་གདབ་ཅིང་བདག་ཉིད་བསྲུང༌། །ལས་ཀྱི་རྗེས་བསྡུ་ཐལ་བ་རྣམས། །རྒྱ་མཚོར་འབབ་པའི་ཆུ་བོར་དོར། །ཚུལ་འདི་ཧེ་རུ་ཀ་དཔལ་གྱི། །སྔགས་ཀྱི་ནུས་པ་འབྱིན་པ་དང༌། །ཐུན་མོང་པ་དང་ཁྱད་པར་གྱི། །དངོས་གྲུབ་ཐོབ་བྱེད་མཆོག་ཏུ་གསུངས། །མེ་འབྲུག་རྒྱལ་གྱི་ཟླ་བ་ཡི། །ཡར་གྱི་ངོ་ཡི་ཚེས་བཅུ་ལ། །ཧུ་ཆུ་ཞེས་བྱའི་གྲོང་ཁྱེར་དུ། །ལེགས་པར་བྲིས་པ་འདི་རྫོགས་སོ། །རྒྱལ་བའི་གསུང་རབ་གཅེས་པའི་མཛོད་འཛིན་ཡང་དག་གྲུབ་བརྙེས་བླ་མ་བརྒྱུད་པ་ལས་འོངས་པའི། །དངོས་གྲུབ་འགུགས་བྱེད་ལས་ཀྱི་མཆོག་རབ་སྦྱིན་སྲེག་ཆོ་གའི་རྣམ་གཞག་རིམ་པ་རབ་གསལ་བ། །ཆོས་ཀྱི་རྒྱལ་པོ་བཟང་པོའི་ཞབས་ཀྱི་ཞབས་རྡུལ་གུས་ལེན་འཕགས་པའི་མིང་དང་ལྡན་པ་ཡིས། །ལེགས་པར་བསྡེབས་ལས་བསོད་ནམས་མེ་འོད་རབ་ཏུ་འབར་བས་སྡུག་བསྔལ་བུད་ཤིང་བསྲེག་པར་ཤོག །སློབ་དཔོན་སྤྱོད་པའི་རྡོ་རྗེས་མཛད་པའི་རྗེས་སུ་འབྲངས་ནས་འཁོར་ལོ་སྡོམ་པའི་སྦྱིན་སྲེག་ལག་ཏུ་བླང་བའི་སྡོམ་ཉི་ཤུ་བདུན་པ་ཞེས་བྱ་བ་རྫོགས་སོ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།