༼ན༽
༄༅། །ཤོ་དགོན་པ་འགྲོ་མགོན་རིན་ཆེན་ལ་སྤྲིང་པ་བཞུགས།།
༄༅། །ཨོཾ་སྭ་སྟི་སིདྡྷཾ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །བདེན་པར་སྨྲ་བ་འཕགས་པ་རྒྱ་མཚོའི་འཁོར། །འདུས་པའི་གཙུག་ན་སྟོང་ཉིད་སེང་གེའི་སྒྲ། །རྡུལ་བྲལ་དཔག་ཡས་འཇམ་པའི་ཡན་ལག་གིས། །སྒྲ་དབྱངས་སྒྲོགས་པ་དེ་ལ་ཕྱག་འཚལ་ལོ། །རྒྱལ་བའི་གསུང་རབ་ཇི་བཞིན་ཆོས་སྨྲ་ཞིང༌། །གྲུབ་པ་མཆོག་བརྙེས་དུ་མ་བཞུགས་པའི་གཞི། །དཔལ་ལྡན་ས་སྐྱའི་དགོན་པར་ལེགས་གནས་པ། །སྡེ་སྣོད་འཛིན་པ་དེ་ཡི་སྤྲིང་ཡིག་འདི། །དམ་པའི་གདན་ས་དགོས་འདོད་འབྱུང་བའི་གཞི། །རྟོགས་ལྡན་འཕགས་པའི་ཚོགས་ཀྱིས་རབ་གང་བ། །གྲུབ་པའི་གནས་མཆོག་ཤོ་དགོན་དབེན་གནས་སུ། །བཞུགས་པའི་འགྲོ་མགོན་རིན་ཆེན་ཕྱག་ཏུ་འབུལ། །དཔལ་ལྡན་ས་སྐྱ་པཎྜི་ཏས་ཞིང་ཁམས་རྣམ་པར་དག་པ། ཤར་ཕྱོགས་ཀྱི་རྒྱུད་ས་གཞི་དགོས་འདོད་འབྱུང་བ་སྨར་ཁམས་ཀྱི་ཆ། ཆུ་ཀླུང་དལ་གྱིས་འབབ་པ་ཟླ་ཆབ་དཀར་མོའི་ངོགས། ཕྱོགས་ཀུན་ན་རིན་པོ་ཆེའི་གཏེར་ཁང་དུ་མ་དང་ལྡན་ཞིང༌། འབྲུ་སྣ་ཚོགས་ཀྱི་འབྱུང་ཁུངས། འཁོར་ཡུག་གི་རི་བོ་རབ་ཏུ་མཐོ་ཞིང༌། ས་གཞི་ཡིད་དུ་འོང་བ་ལྷུན་པོའི་ངོས་ལ་འཇམ་པའི་སྤང་ལྗང་མེ་ཏོག་སྣ་ཚོགས་ཀྱིས་མཛེས་པར་སྣང་བ་ཙནྣན་གྱི་ནགས་ཚལ། ཡལ་ག་དང་ལོ་འདབ་མེ་ཏོག་དང་འབྲས་བུ་ཕུན་སུམ་ཚོགས་པས་མཛེས་པའི་བྱ་རྣམས་སྙན་པའི་སྒྲ་དབྱངས་སྒྲོགས་པ་དང་བཅས་པས། དགའ་བའི་ཚལ་ཀུན་དུ་བརྒྱན་པ་ལྟར། ལྷའི་བུ་དང་བུ་མོ་རྣམས་ཀྱང་ཡིད་འཛིན་པར་བྱེད་པའི་གནས། ཉམས་མྱོང་དང་རྟོགས་པ་འཕེལ་བར་བྱེད་པའི་དབེན་གནས་དམ་པ། དཔལ་གྱི་ཤོ་དགོན་ན་བཞུགས་པ། ཚུལ་ཁྲིམས་དང་བསྒྲུབ་པ་ཕུན་སུམ་ཚོགས་ཤིང༌། རྟོགས་པ་དང་མཁྱེན་བརྩེའི་ཡོན་ཏན་ཁྱད་པར་ཅན་དང་ལྡན་པའི་སྐྱེས་བུ་དམ་པ་རིན་པོ་ཆེ་གདན་ས་བའི་ཕྱག་ཏུ་འབུལ་བ། ཁྱེད་ཀྱིས་བླ་མ་དམ་པ་རྣམས་ལ་སངས་རྒྱས་སུ་འཛིན་པའི་རྣམ་པར་ཐར་པ་དང་ལྡན་པས། ཆོས་རྗེ་ས་སྐྱ་པ་ཆེན་པོའི་ཞབས་དྲུང་དུ་རིན་པོ་ཆེ་ཕག་མོ་གྲུབ་པས་གཏུགས། གདམས་ངག་དང་རྗེས་སུ་བསྟན་པ་མནོས་པའི་དབང་གིས་ངེད་ལ་ཡང་བརྒྱུད་པའི་བླ་མ་བཟུང་ནས། ངེད་ཀྱི་བུ་སློབ་རྣམས་ཀྱི་བདག་གཉེར་མཛད་ཅིང༌། བསྟན་པའི་སྲོག་ཤིང་དུ་བཞུགས་ནས་ས་སྐྱ་པ་དང་ཁྱད་མེད་དུ་མཛད་བྱ་བ་ཁྱེད་རང་གི་སློབ་མ་སྟོན་པ་ཚུལ་གཞོན་དག་ལས་ཐོས། དེ་ལ་དགའ་ཞིང་རྗེས་སུ་ཡི་རང༌། སླད་མ་ངེད་ལ་ཧོར་གྱི་རྒྱལ་པོས་བླ་མཆོད་ལ་འོང་དགོས་བྱ་བའི་གདན་འདྲེན་ནན་ཅན་ཡང་ཡང་བྱུང་བས་ད་ལོ་འགྲོ་བ་ལགས། ཁྱེད་ཀྱིས་ཀྱང་རྒྱལ་པོའི་བླ་མཆོད་རྒྱུ་དང༌། མི་གོ་ཆོད་འགའ་འདབ་ནོར་དང་ངེད་ཀྱི་ཟླ་ལ་བཏང་ནས་རྒྱལ་པོའི་གསེར་ཡིག་དང་འཇའ་ས་ཞུས་ན་ངོ་ལྟ་བརྟན་པ་ཡིན་པས་ཐུགས་ལ་འཐད་ན་ངེས་རོགས་ལྡན་གང་དགོས་བྱེད་པ་ལགས། ངེད་གར་ཡོད་ཀྱི་སྔོན་ལ་མི་ཐོང༌། ཁྱོད་ཀྱི་སློབ་མ་སྟོན་ཚུལ་ལ་སོགས་པ་ཀུན་ཡང་ཡོན་ཏན་ཆེ་བར་ཡོད། ཁྱེད་ལ་ཡང་མོས་གུས་དང་རེ་གཉིས་ཀ་ཆེ་བར་གདའ། ཁྱེད་བསྟན་པའི་སྒོར་ཞུགས་ཚད་རྣམས་ལ་སྐུ་གཅེས་པ་ཉ་དང་ཚེས་བརྒྱད་བྱུང་ངོ་ཅོག་ལ་རྣམ་རྒྱལ་སྟོང་མཆོད་མང་བ་རེ་མཛད་པར་ཞུ། ཡིག་རྟེན་དུ་ངེད་ལ་ཡ་ཙེ་རྒྱལ་པོས་ཁོང་རང་གི་ཐུགས་དམ་དུ་བཞེངས་ནས་ངེད་ལ་ཕུལ་བའི་གསེར་སྡུད་ཡིག་ཤོག་ཁྱད་པར་དུ་འཕགས་ཤིང༌། གླེགས་ཤིང་གི་རྒྱབ་རྐོས་ལ་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱོགས་བཅུའི་སངས་རྒྱས་ཀྱིས་བསྐོར་བ་དང༌། ལྡུམ་རྫིངས་དང༌། པ་ཏྲ་ལ་སོགས་པ་བཟོ་གནས་ཁྱད་པར་འཕགས་པ་དུ་མ་དང་ལྡན་པ། ཙོའུ་ཟི་དམར་པོ་དང༌། བོའུ་རས་དཀར་པོའི་ན་བཟའ་ཅན་སྣག་འབུམ་ཅིག་དང་ངོ་མཉམ་ཟེར་བ་ཅིག་ཐུགས་དམ་དུ་འབུལ། གཞན་དུ་མི་གཏང་བར་ཞུ། རས་དར་ཚོན་མ་ཡ་བ་ལེགས་པ་ཞིག་དང༌། ཀ་རའི་གླང་པོ་ཆེ་ཞིག་འབུལ་ཞིང་མཆིས། དུས་གསུམ་རྒྱལ་བ་སྲས་བཅས་བསྐྱེད་པའི་ཡུམ། །བདག་འཛིན་བུད་ཤིང་བསྲེག་པའི་ཡེ་ཤེས་མེ། །མ་རིག་མུན་པ་བསལ་བྱེད་རིན་ཆེན་སྒྲོན། །ཟབ་མོའི་དོན་སྟོན་གསུང་རབ་དྲི་མ་མེད། །སྡུག་བསྔལ་ནད་ཀུན་སེལ་བྱེད་སྨན་གྱི་མཆོག །ཞལ་གསུང་ཕ་རོལ་ཕྱིན་གཞུང་སུམ་བརྒྱ་པ། །མཐིང་ཤོག་གཞི་ལ་གསེར་ཡིག་ཁྱད་པར་འཕགས། །གླེགས་ཤིང་ངོས་ལ་ཕྱོགས་བཅུའི་སངས་རྒྱས་སྐུ། །འཛམ་བུའི་གསེར་ལས་བཟོ་གནས་དུ་མས་བརྒྱན། །དབུས་གཙང་མཐིལ་ན་ཁྱད་པར་འཕགས་པ་འདི། །དགེ་འདུན་རྒྱ་མཚོ་འདུ་བའི་ཕོ་བྲང་དུ། །མི་མཆོག་ཁྱེད་ལ་མཆོད་པའི་རྟེན་དུ་འབུལ། །ཀ་ཤིའི་རས་དང་ཀ་རའི་གླང་པོ་མཆོག །དངོས་པོ་ཤིན་ཏུ་ཕྲ་བར་གྱུར་ན་ཡང༌། །དགའ་བའི་ཡིད་ཀྱིས་རིང་ནས་བསྐུར་བ་འདི། །མོས་པའི་སྟོབས་ཀྱིས་ཕྱག་ཏུ་ཕྱིན་ནས་ཀྱང༌། །དྭངས་ཤིང་དགྱེས་པའི་ཐུགས་ཀྱིས་བཞེས་ནས་སུ། །གཞན་ཕན་ཐུགས་ལས་ཆུང་ལ་མི་གཞོལ་ཞུ། །འདིར་སྨྲས་པ། རྟོགས་པ་ཟླ་མཛེས་ཡོན་ཏན་དཀྱིལ་འཁོར་རྒྱས། །ཕྲིན་ལས་བསིལ་འོད་ཉོན་མོངས་གདུང་བ་སེལ། །སློབ་མ་ཀུནྡའི་ཚལ་རབ་རྒྱས་མཛད་པ། །སྐྱེས་མཆོག་རི་བོང་འཛིན་པ་རྒྱལ་གྱུར་ཅིག དགེ་ཞིང་བཀྲ་ཤིས་པར་གྱུར་ཅིག། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།