༼ཏ༽
༄༅། །སྲུང་འཁོར་བྲི་ཚུལ་བཞུགས།།
༄༅། །བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །འདིའི་སྲུང་བའི་འཁོར་ལོ་ལ་དོན་ལྔ་སྟེ། བྲི་བའི་གཞི། དུས། སྣག་ཚ། བྲི་བའི་ཐབས། བྲིས་ནས་ཇི་ལྟར་བསྒྲུབ་པའོ། །དང་པོ་ནི། དར་རམ། རས་སམ་ཤོག་བུ་ལ་སོགས་པའོ། །དུས་ནི་ཚེས་གཅིག་ནས་ཉའི་བར་གཟའ་སྐར་བཟང་པོའི་ཚེའོ། །སྣག་ཚ་ནི་རང་གི་ལག་པ་གཡོན་པའི་སྲིན་ལག་གི་ཁྲག་དང༌། གི་ཝང་གིས་སོ། །བྲི་བའི་ཐབས་ནི་འཁོར་ལོ་དཔེ་ཆུང་ལྟར་རོ། །བྲིས་ནས་ཇི་ལྟར་བསྒྲུབ་པ་ནི། གནས་ཁང་བྱི་དོར་བྱ། མཆོད་པ་བཤམ། གཏོར་མ་གསུམ་བཤམ། རྗེ་བཙུན་གྱི་ཐང་སྐུ་ཞལ་དབྱེ། དེ་ནས་རང་ཉིད་རྗེ་བཙུན་དུ་བསྒོམས་ལ། བཟླས་པ་ཅུང་ཟད་བྱ། དེ་ནས་འཁོར་ལོ་ཟངས་གཞོང་ལ་སོགས་པའི་སྟེང་དུ་བཞག་ལ། རྡོ་རྗེ་དང་བཅས་པའི་ལག་པ་གཡོན་པས་རེག་སྟེ། སྭ་བྷཱ་ཝའི་སྔགས་བརྗོད་པས་སྟོང་པར་བསམ། སྟོང་པའི་ངང་ལས་པྃ་ལས་པདྨ་འདབ་བརྒྱད་ཀྱི་ལྟེ་བ་ལ་ཧྲཱིཿ ཤར་གྱི་འདབ་མ་ལ་ཧ། ལྷོར་ཧཱུྃ། ནུབ་ཏུ་ཕ། བྱང་དུ་ཊ་སྟེ་ཡི་གེ་འབྲུ་ལྔ་ལས་ལྷ་ལྔ་རྫོགས་པར་བསྐྱེད་ལ། ཡེ་ཤེས་པ་གཞུག གནས་གསུམ་བྱིན་གྱིས་བརླབ། དབང་བསྐུར་བསྒྲུབ་ཐབས་ལྟར་བྱ། དེ་ནས་མཆོད་པ་ལྔ་དབུལ་ཏེ་བྱུང་རྫོགས་སམ། རྐང་ཐོན་དུ་བྱའོ། །དེ་ནས་སྙིང་པོ་བདུན་ལ་སོགས་པ་བཟླས་པའི་མེ་ཏོག་གཏོར་བས་རབ་གནས་བྱས་ལ། སླར་འཁོར་ལོའི་རྣམ་པར་གྱུར་པར་བསམ། བར་འདིར་དམ་ཚིག་ཅན་ལ་གཏོར་མ་གཅིག་གཏང༌། དེ་ནས་རང་གི་ཐུགས་ཀའི་ས་བོན་དང་འཁོར་ལོའི་ཡིག་འབྲུ་ལས་འོད་ཟེར་འཕྲོས་པས་གང་བསྲུང་བར་བྱ་བའི་ལུས་ལ་འཁོར་ལོའི་དབྱིབས་བསྟིམ། ཡང་འོད་ཟེར་འཕྲོས་པས། དེའི་རྣམ་ཤེས་བཀུག་ནས་སྔགས་ཀྱི་ཡིག་འབྲུ་ལ་བསྟིམ། ཡང་མཆོད་པ་དབུལ། གཏོར་མ་གཅིག་གཏང༌། དེ་ནས་རྡོ་རྗེ་ལ་གཟུངས་ཐག་བཏགས་པ་འཁོར་ལོའི་སྟེང་དུ་བཞག དེའི་གཟུངས་ཐག་ནས་བཟུང་སྟེ། ལྷ་ལྔའི་སྔགས་ཀྱི་མཐར་བསྲུང་བྱའི་མིང་དང༌། རུས་སྤེལ་བའི་རཀྵ་རཀྵ་ཞེས་པ་བརྒྱ་རྩ་བརྒྱད་དམ། སྟོང་རྩ་བརྒྱད་ལ་སོགས་པ་བཟླས། དེ་ནས་ཨཱ་ལི་ཀཱ་ལིའི་མཐར་ཡང་མིང་དང་རུས་དང་རཀྵ་རཀྵ་སྭཱ་ཧཱ། ཞེས་པ་ཉི་ཤུ་རྩ་གཅིག་བཟླས་ནས། ཡི་གེ་བརྒྱ་པས་བརྟན་པར་བྱའོ། །དེ་ནས་འཁོར་ལོ་དྲིལ་ཏེ་ལ་ཆ་ལ་སོགས་པས་གཏུམས་ལ། བསྲུང་བྱའི་སྣ་བུག་ནས་གུ་གུལ་གྱི་དུད་པས་བདུག གཏོར་མ་གཅིག་སརྦ་བིགྷྣཱན་ན་མསྶརྦ་ཏ་ཐཱ་ག་ཏེ་བྷྱོ་ལ་སོགས་པའི་སྔགས་ཀྱི་གནོད་བྱེད་ལ་བྱིན་ལ། ལུས་ལ་ཞུགས་པའི་གདོན་གཏོར་མ་ཟ་བའི་བར་ལ། སྲུང་འཁོར་བསྲུང་བྱའི་དཔུང་པ་གཡོན་པར་གདགས། དེ་ནས་རང་གི་ལག་པ་གཡས་པས་བསྲུང་བྱའི་དཔུང་པ་འཁོར་ལོ་དང་བཅས་པ་ལ་འཇུས་ཏེ། ཡི་གེ་བརྒྱ་པ་ལན་གསུམ་མམ་བདུན་བརྗོད་དེ་བརྟན་པར་བྱའོ། །དེ་ནས་བླ་མ་ལ་ཡོན་དབུལ་ཞིང་དགའ་སྟོན་བྱའོ། །ཕྱི་ནས་བླ་མས་བསྲུང་བྱ་དེ་རང་གི་སྙིང་གར་ཡོད་པར་ཡང་དང་ཡང་དུ་དྲན་པར་བྱའོ། །བསྲུང་བྱས་ཀྱང་འཇིགས་སྐྲག་ནམ་བྱུང་དུས་སུ་འཁོར་ལོ་ལ་མགོན་སྐྱབས་ཞུ་བར་དམིགས་ཏེ་འཇུ་བ་དང༌། བླ་མ་ལ་གསོལ་བ་གདབ་བོ། །ཤིན་ཏུ་ཟབ་བོ། །ཨི་ཐི།། །།དོན་ཡོད་ཞགས་པའི་སྲུང་འཁོར་བྱེད་ན། འཁོར་ལོ་རིམ་པ་ལྔ་རུ་བསྐོར་ཏེ། ལྟེ་བ་ལ་ཧྲཱིཿ དེའི་མཐའ་མར། ན་མསྶ་མནྟ་བུདྡྷཱ་ནཱཾ། ཞེས་པའི་སྔགས་དང༌། ཆེ་གེ་མོ་ལ་རཀྵ་རཀྵ་སྭཱ་ཧཱ་ཞེས་པ་བྲིའོ། །དེའི་མུ་ཁྱུད་ལ་རྟེན་འབྲེལ་སྙིང་པོ། དེའི་ཕྱི་རོལ་པདྨ་འདབ་བརྒྱད་ཀྱི། ཤར་དུ་དོན་ཞགས་ཀྱི་ཨོཾ་ཧྲཱིཿཏྲཻ་ལོ་ཀྱ། ལྷོར་རྟ་མགྲིན་གྱི། ནུབ་ཏུ་ཨེ་ཀ་ཛ་ཊཱིའི། བྱང་དུ་ཁྲོ་གཉེར་ཅན་གྱི་སྙིང་པོ་སྤེལ་ཚིག་དང་བཅས་པའོ། །མཚམས་ཀྱི་འདབ་མ་བཞི་ཆུང་བར་བྱ་སྟེ། དེ་ལ་ཤར་ནས་ཧ་ཧཱུྃ་ཕཊ་ཞེས་བྲི། དེའི་མུ་ཁྱུད་ལ་དབྱངས་ཡིག དེའི་ཕྱིར་གསལ་བྱེད་བྲིའོ། །ཨི་ཐི།། མུ་ཁྱུད་ནང་མ་ལ་དབྱངས་ཡིག པད་འདབ་ཀྱི་ཕྱི་མ་ལ་གསལ་བྱེད། དེའི་ཕྱི་རིམ་དུ་རྟེན་འབྲེལ་སྙིང་པོ་ཕྱི་རུ་རྡོ་རྭ་མེ་རི་བྱས་ན་སྲུང་འཁོར་སྤྱི་དང་མཐུན་པར་གདའོ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།