སྔར་གྱི་གཞུང་དེའི་འགྲེལ་པར་རིགས་པའི་སྟོབས་ཀྱི་དོན་ལ་ངེས་པ་ནི་བསླུ་བར་མི་འགྱུར་ཏེ། དེའི་ཕྱིར་ཚུལ་གསུམ་པའི་རྟགས་ཀྱིས་བསྐྱེད་པའི་རྟོགས་པ་གང་ཡིན་པ་དེ་ནི་དམ་པ་ཡང་ཡིན་ལ། དོན་ཡང་ཡིན་པས་དོན་དམ་པའོ། །དེས་གཏན་ལ་ཕབ་པའི་དོན་ཡང་དོན་དམ་པ་སྟེ། མངོན་སུམ་ལ་སོགས་པ་བཞིན་དུ་བརྗོད་དོ། །ཞེས་གསུངས་པས་སོ། །འདི་ནི་རྣམ་གྲངས་པའི་དོན་དམ་བདེན་པ་ཡིན་ལ། རྣམ་གྲངས་པ་མ་ཡིན་པ་ནི་གཉིས་སྣང་དང་བཅས་པའི་བློའི་ཡུལ་ལས་འདས་པའི་སྤྲོས་བྲལ་ཏེ། བདེན་གཉིས་ལས། ཡོད་མེད་དངོས་པོ་མཁྱེན་པ་པོ། །ཀུན་མཁྱེན་པས་ཀྱང་གང་མ་གཟིགས། །དེ་ཡི་དངོས་པོ་ཅི་འདྲ་ཞིག །ཤིན་ཏུ་ཞིབ་པའི་ལྟ་བས་དཔྱོད། །ཅེས་དང་འགྲེལ་པར་མདོ་ཁུངས་སུ་མཛད་པ་ནི། དེ་ལ་ཀུན་རྫོབ་ཀྱི་བདེན་པ་གང་ཞེ་ན། ཇི་སྙེད་འཇིག་རྟེན་གྱི་ཐ་སྙད་གདགས་པ་དང་། ཡི་གེ་དང་། སྐད་དང་། བརྡ་བསྟན་པ་དག་གོ །དོན་དམ་པའི་བདེན་པ་ནི་གང་ལ་སེམས་ཀྱི་རྒྱུ་བ་ཡང་མེད་ན་ཡི་གེ་རྣམས་ལྟ་སྨྲོས་ཀྱང་ཅི་དགོས་ཞེས་གསུངས་པ་དྲངས་ཤིང་། དེའི་དོན་འཇིག་རྟེན་གྱི་ཐ་སྙད་གདགས་པ་ནི་ཤེས་པ་དང་། ཤེས་བྱའི་མཚན་ཉིད། ཡི་གེ་ཞེས་པ་མན་ཆད་ཀྱིས་བརྗོད་བྱ་རྗོད་བྱེད་ཀྱི་མཚན་ཉིད་བསྟན་པ་དང་། གང་ལ་སེམས་ཀྱི་རྒྱུ་བ་ཡང་མེད་པའི་དོན་རྟོག་པའི་སེམས་ཀྱི་རྒྱུ་བ་མེད་པ་ལ་བྱེད་ན་ཡི་གེ་རྣམས་ལྟ་སྨྲོས་ཀྱང་ཅི་དགོས་ཞེས་པ་དང་ཟློས་པའི་སྐྱོན་ཡོད་པས་ཐམས་ཅད་མཁྱེན་པའི་ཡེ་ཤེས་ཀྱི་བར་གྱི་ཡུལ་ལས་ཀྱང་འདས་པ་ལ་འཇོག་ཚུལ་ཞིབ་ཏུ་བཤད་པས་སོ། །བདེན་གཉིས་སྟོན་པའི་མདོ་འདི་རྒྱན་གྱི་འགྲེལ་པར་བློ་གྲོས་མི་ཟད་པའི་མདོ་ལས་ཞེས་ཁུངས་སུ་མཛད་ཅིང་སློབ་དཔོན་ཟླ་བའི་འགྲེལ་པ་རྣམས་ལས་ཀྱང་ཡང་ཡང་དྲངས་པས་ཐལ་རང་གི་སྐྱེས་ཆེན་རྣམས་དོན་དམ་བདེན་པ་མཚན་ཉིད་པའི་ངོས་འཛིན་ལ་མི་འདྲ་བའི་ཁྱད་པར་མེད་པར་མཐོང་ངོ་། །དེས་ན་སློབ་དཔོན་འདིའི་ལུགས་ཀྱི་བདེན་གཉིས་ཀྱི་མཚན་ཉིད་རིམ་པ་ལྟར། གནས་ཚུལ་དཔྱོད་པའི་བློ་ངོར་བདེན་པའམ། གཉིས་སྣང་དང་བཅས་པའི་བློའི་ཡུལ་ལས་འདས་པའི་སྤྲོས་བྲལ་གང་རུང་གིས་བསྡུས་པ་དང་། མཐར་ཐུག་དཔྱོད་པའི་རིགས་ཤེས་ལས་གཞན་པའི་གཉིས་སྣང་དང་བཅས་པའི་བློ་ངོར་བདེན་པའི་བདེན་པ་གཉིས་སུ་ཕྱེ་བའི་དོན་དམ་བདེན་པ་ལ་རྣམ་གྲངས་དང་རྣམ་གྲངས་མ་ཡིན་པ་གཉིས་ཡོད་པས་དེ་ལ་དོན་དམ་བདེན་པ་མཚན་ཉིད་པས་མ་ཁྱབ་པ་ནི་སློབ་དཔོན་འདིའི་ལུགས་སུ་སྣང་བས་ཇོ་བོ་རྗེས་སྐྱོན་བརྗོད་པའང་འདི་ལ་དམིགས་པ་འདྲའོ། །སློབ་དཔོན་ཞི་བ་འཚོས་ཀྱང་འདིའི་ལུགས་ཅི་ལྟ་བ་བཞིན་བཞེད་པར་སྣང་སྟེ། རྒྱན་ལས་སྐྱེ་བ་མེད་པ་ལ་སོགས་པའང་ཡང་དག་པའི་ཀུན་རྫོབ་ཏུ་གཏོགས་པ་ཡིན་དུ་ཟིན་ཀྱང་། དམ་པའི་དོན་དང་མཐུན་པའི་ཕྱིར། །འདི་ནི་དམ་པའི་དོན་ཞེས་བྱ། །ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །དོན་དམ་པ་ནི་དངོས་པོ་དང་དངོས་པོ་མེད་པ་དང་། སྐྱེ་བ་དང་མི་སྐྱེ་བ་དང་། སྟོང་པ་དང་མི་སྟོང་པ་ལ་སོགས་པ་སྤྲོས་པའི་དྲྭ་བ་མཐའ་དག་སྤོང་བའོ། །སྐྱེ་བ་མེད་པ་ལ་སོགས་པ་ནི་དེ་ལ་འཇུག་པ་དང་མཐུན་པའི་ཕྱིར། དོན་དམ་པ་ཞེས་ཉེ་བར་འཇོག་གོ་ཞེས་གསུངས་པས་སོ། །སློབ་དཔོན་ཀ་མ་ལ་ཤཱི་ལས་ནི། བློ་མ་འཁྲུལ་པས་བཞག་པའི་དངོས་པོའི་ངོ་བོ་དང་། བློ་འཁྲུལ་པས་བཞག་པའི་དངོས་པོའི་ངོ་བོ་གཉིས་ལ་བཞེད་དེ། དབུ་མ་སྣང་བ་ལས། སྒྱུ་མའི་སྐྱེས་བུ་ལ་སོགས་པ་བཞིན་དུ་དངོས་པོ་ཐམས་ཅད་ལ་རྣམ་པར་ཤེས་པ་འཁྲུལ་པ་དང་། མ་འཁྲུལ་པས་རྣམ་པར་བཞག་པའི་ངོ་བོ་ཉིད་ཀྱིས་གོ་རིམ་བཞིན་དུ་བདེན་པ་གཉིས་རྣམ་པར་དབྱེ་བ་རྣམ་པར་བཞག་སྟེ། འདི་ལྟར་སྒྱུ་མའི་སྐྱེས་བུ་ལ་འཁྲུལ་པའི་རྣམ་པར་ཤེས་པ་དང་ལྡན་པའི་མི་དག་གིས་བཞག་པའི་ངོ་བོ་ཇི་ལྟ་བ་བཞིན་དུ་དངོས་པོ་ཐམས་ཅད་ལ་བརྫུན་པའི་རྣམ་པ་ཅན་གྱི་ཤེས་པས་སྒྲོ་བཏགས་པའི་ངོ་བོ་གང་ཡིན་པ་དེ་ནི་ཀུན་རྫོབ་ཀྱི་བདེན་པའོ། །ཞེས་ཐ་སྙད་གདགས་ལ་སྒྱུ་མའི་སྐྱེས་བུ་ལ་སོགས་པ་དེ་ཉིད་ལ་རྣམ་པར་ཤེས་པ་མ་འཁྲུལ་པ་ཅན་དག་གིས་བཞག་པའི་ངོ་བོ་ཇི་ལྟ་བ་དེ་བཞིན་དུ་དངོས་པོ་ཐམས་ཅད་ལ་ཡང་དག་པའི་ཚད་མས་ཡོངས་སུ་གཏན་ལ་ཕབ་པའི་ངོ་བོ་གང་ཡིན་པ་དེ་ནི་དོན་དམ་པའི་བདེན་པ་ཡིན་ནོ། །ཞེས་གསུངས་པས་སོ། །བློ་མ་འཁྲུལ་བ་ནི་རིགས་ཤེས་ཚད་མ་ནས་བཟུང་སྟེ་འཕགས་པའི་མཉམ་གཞག་གི་བར་ལ་བཞེད་པར་སྣང་སྟེ། སྔར་སྒྲ་དོན་གྱི་སྐབས་སུ་དྲངས་པའི་ལུང་ལས་ཤེས་སོ། །སློབ་དཔོན་ལེགས་ལྡན་འབྱེད་ཀྱི་དགོངས་པ་ལ། མཚན་ཉིད་འདི་དང་འདྲ་བར་འཇོག་ཏུ་རུང་བར་སྣང་ཞིང་། ཡུལ་ཅན་གྱི་བློ་དོན་དམ་པ་ནི་འཕགས་པའི་མཉམ་གཞག་དང་། དེས་དྲངས་པའི་རྗེས་ཐོབ་གཉིས་ལ་བཞེད་དེ། དེའང་སྔར་སྒྲ་དོན་གྱི་སྐབས་སུ་དྲངས་པའི་ལུང་ལས་ཤེས་སོ། །གཉིས་པ་ནི་རྔོག་ལོས། ཀུན་རྫོབ་བདེན་པ་དང་། དོན་དམ་བདེན་པའི་མཚན་ཉིད་རིམ་པ་ལྟར། བློའི་དམིགས་པའམ་ཇི་ལྟར་སྣང་བ་དང་། ཅི་ལྟར་ཡང་མ་ཡིན་པ་ཞེས་བཞེད་པ་ལ་གཙང་ནག་པས་ཀུན་རྫོབ་བདེན་པའི་མཚན་ཉིད་དེ། ཤེས་བྱ་དང་གཟུང་བྱའི་ལྡོག་པར་འགྱུར་བ་དང་། དངོས་པོ་ལ་དེ་དག་གིས་ཁྱབ་པར་མངོན་སུམ་ཉིད་ཀྱིས་གྲུབ་པས་དོན་དམ་པའི་བདེན་པར་ལོག་པར་རྟོག་པར་མི་སྲིད་པར་འགྱུར་བའི་ཕྱིར་དང་། ཅིར་ཡང་མ་ཡིན་པའི་དོན་མཚན་ཉིད་ཅི་ཡང་མ་གྲུབ་པ་ཡིན་ན་མེད་པའི་ཕྱོགས་སུ་འགྱུར་ལ་སྤྲོས་པ་དགག་པ་ལྷུར་བྱས་ཏེ་ཆོས་ཅིར་ཡང་མ་གྲུབ་པ་ཞིག མཚན་ཉིད་དུ་བརྗོད་ནའང་མི་རུང་སྟེ། སྣང་བ་དེ་དང་དངོས་འགལ་གྱི་ཆོས་ཙམ་དུ་མངོན་སུམ་གྱིས་གྲུབ་པས་དོན་དམ་པའི་དངོས་པོ་རྣམ་བཅད་ལ་ཁེགས་པར་ཐལ་བ་དང་། མཚོན་བྱའི་དོན་ཆོས་སུའང་མི་གནས་པས་མཚན་ཉིད་དུ་འགལ་བའི་ཕྱིར་རོ། །ཞེས་དགག་པ་མཛད་ནས་རང་ལུགས་ལ་ཀུན་རྫོབ་བདེན་པའི་མཚན་ཉིད་གང་ལ་ཞེན་ནས་འཆིང་བར་འགྱུར་བ་ཐ་སྙད་པའི་ཡུལ་དུ་གྱུར་པའི་བཅོས་མ་ཞེས། ངོ་བོ་དང་། བྱེད་པ་དང་། ཡུལ་ཅན་གྱི་ཁྱད་པར་གསུམ་པར་གསུངས་ལ། རིགས་མི་མཐུན་གཅོད་པའི་དབང་དུ་བྱས་ནས་ཐ་སྙད་པའི་བློ་ངོར་རྙེད་པ་ཉིད་དོ། །དོན་དམ་བདེན་པའི་མཚན་ཉིད་གང་ཞིག་རྟོགས་པས་ལུས་ཅན་རྣམས་གྲོལ་བར་འགྱུར་བ་ཆོས་རྣམས་ཀྱི་རང་བཞིན་རིགས་པས་གནས་པ་ཞེས་ཁྱད་པར་གསུམ་ལྡན་དུ་མངོན་ཏེ། དེ་ཡང་རིགས་མི་མཐུན་ནི་རང་ལྡོག རིགས་པས་རྙེད་པ་ཉིད་ཀྱིས་ཆོག་མོད་ཀྱི་ཆོས་གསུམ་ཚོགས་པ་ལ་བརྡ་སྦྱར་བའང་རུང་ངོ་། །འོ་ན་མཚན་ཉིད་དེ་ལྟར་དངོས་པོར་སྨྲ་བ་རྣམས་ཀྱང་འདོད་པས་དེ་དང་རྩོད་པ་མེད་པར་འགྱུར་རོ་ཞེ་ན། མཚན་ཉིད་མཐུན་ཡང་དེ་གང་ལ་ལྡན་པའི་མཚན་གཞི་ལ་རྩོད་པར་འཐད་དེ། མཚན་གཞི་མི་མཐུན་པའི་ཕྱིར་རོ། །དེས་ན་རྩ་ཤེར་ལས། གཞན་ལས་ཤེས་མིན་ཞི་བ་དང་། །ཞེས་སོགས་དང་། ཡུམ་ལས། དོན་དམ་པ་ནི་མཚན་ཉིད་ཐམས་ཅད་ལོག་པ་ཞེས་སོགས་འབྱུང་བ་ནི་ལོག་རྟོག་ཟློག་པའི་ཕྱིར། གཞན་དང་མི་མཐུན་པའི་མཚན་གཞི་ལྷུར་བྱས་ནས་བསྟན་པར་ཟད་དོ་ཞེས་བཞེད་དོ། །འོན་ཀྱང་འདི་ལའང་ཀུན་རྫོབ་བདེན་པའི་མཚན་ཉིད་དེས་ལོག་པའི་ཀུན་རྫོབ་ལ་མ་ཁྱབ་པ་དང་། དོན་དམ་བདེན་པའི་མཚན་ཉིད་ལ་རིགས་པས་རྙེད་པ་ཞེས་སྦྱར་བས་འཕགས་པའི་མཉམ་གཞག་གི་གཟིགས་ངོའི་སྤྲོས་བྲལ་ལ་མ་ཁྱབ་པའི་སྐྱོན་གནས་སོ། །ཁྱུང་རིན་ཆེན་གྲགས་ཀྱིས། ཀུན་རྫོབ་བདེན་པའི་མཚན་ཉིད། ཤེས་བྱའམ། གཞལ་བྱའམ། བརྗོད་བྱ་ཙམ་ཡིན་ལ། དོན་དམ་བདེན་པའི་མཚན་ཉིད་ཤེས་བརྗོད་གཞལ་བྱ་ཐམས་ཅད་ལས་འདས་པའོ། །ཞེས་བཞེད་ལ། རྨ་བྱས་དེ་ལྟར་ན་དངོས་པོ་རྣམས་ལ་དོན་དམ་བདེན་པར་ལོག་རྟོག་མི་སྲིད་པར་འགྱུར་ཏེ། ཀུན་རྫོབ་ཀྱི་བདེན་པའི་དོན་ཤེས་བརྗོད་གཞལ་བྱ་ཙམ་དུ་འཇིག་རྟེན་གྱི་མངོན་སུམ་ཉིད་ཀྱིས་གྲུབ་པའི་ཕྱིར་རོ། །དེ་ཉིད་ཀྱི་ཕྱིར་ན་དངོས་པོ་རྣམས་དེ་ཁོ་ན་ཉིད་དུ་བདེན་པར་ཡོད་པའི་ལོག་རྟོག་འགོག་པའི་རིགས་ཤེས་དོན་མེད་པར་འགྱུར་ལ་དེ་བཞིན་དུ་དངོས་པོ་རྣམས་ཀུན་རྫོབ་ཏུ་སྨྲས་པས་ཤེས་བརྗོད་གཞལ་བྱ་ཙམ་དུ་སྨྲས་པར་འགྱུར་ཞིང་། དོན་དམ་མ་ཡིན་པར་སྨྲས་པས་ཤེས་བརྗོད་གཞལ་བྱ་ལས་འདས་པ་མ་ཡིན་པར་སྨྲས་པར་འགྱུར་ལ་དེ་ལྟར་ན་དངོས་པོར་སྨྲ་བ་རྣམས་དང་མི་མཐུན་པ་མེད་པར་འགྱུར་རོ། །ཞེས་དགག་པ་མཛད་ནས་རང་ལུགས་ལ་ཐ་སྙད་པའི་བློ་འཁྲུལ་པའི་ཡུལ་དུ་བདེན་པ་དང་། བློ་མ་འཁྲུལ་པའི་ཡུལ་དུ་བདེན་པ་སྟེ། འཕགས་པའི་མཉམ་གཞག་མ་འཁྲུལ་པའི་ཡུལ་ལམ་མཐར་ཐུག་དཔྱོད་པའི་རིགས་ཤེས་ཀྱི་ཡུལ་དུ་བདེན་པའོ་ཞེས་བཞེད་དོ། །འདི་ལའང་དབང་པོ་སྐྱོན་ལྡན་གྱི་ཤེས་པ་རྣམས་ཐ་སྙད་པའི་བློར་ཁས་བླངས་པར་སྣང་བས་དེའི་ཡུལ་རྣམས་འཇིག་རྟེན་གྱི་ཐ་སྙད་དུ་གྲུབ་པར་ཐལ་བའི་སྐྱོན་ཡོད་དོ། །དཔལ་ལྡན་ས་སྐྱ་པཎྜི་ཏའི་བཞེད་པས་མཚན་ཉིད་རིམ་བཞིན་མ་དཔྱད་པའི་བློ་ངོར་གྲུབ་པ་དང་། དཔྱད་པའི་བློ་ངོར་མ་གྲུབ་པ་ཞེས་གསུངས་པ་ནི་འཕགས་པའི་མཉམ་གཞག་གི་གཟིགས་ངོར་སྤྲོས་བྲལ་དེ་ཉིད་སྤྲོས་པ་ཐམས་ཅད་ལས་འདས་པས་རང་གི་ངོ་བོ་མཚན་ཉིད་གང་གིས་ཀྱང་མཚོན་པ་མི་ནུས་ཀྱང་སོ་སོ་སྐྱེ་བོའི་རྟོག་བཅས་ཀྱི་བློ་ངོར་དཔྱད་པའི་ཚེ་མཐའ་གང་དུའང་མ་གྲུབ་པ་དེས་སྤྲོས་བྲལ་མཚན་ཉིད་པ་དེ་མཚོན་པར་རློམ་ཞེས་པའི་དོན་ཏེ། ཇོ་བོ་རྗེས། བསྟན་པའི་ཚིག་གི་སྦྱོར་བ་ཡིས། །སྐྱེ་མེད་འགག་མེད་སོགས་པས་མཚོན། །ཞེས་གསུངས་པ་དང་མཐུན་ནོ། །འདིའི་དོན་དེ་ལྟར་ཡིན་གྱི་སྒྲ་ཇི་བཞིན་པ་ཡིན་ན་ཀུན་རྫོབ་བདེན་པ་ཐམས་ཅད་དང་། རི་བོང་གི་རྭ་ཡང་དོན་དམ་བདེན་པར་ཐལ་བ་དང་། དཔྱད་པའི་བློ་ངོར་མ་གྲུབ་པ་ཙམ་གྱི་མེད་དགག་ལ་དགོངས་ན་ནི། ཐལ་རང་གི་སྐྱེས་ཆེན་ཐམས་ཅད་དང་། བདག་ཉིད་ཆེན་པོ་འདིས་ཀྱང་ཀུན་རྫོབ་བདེན་པར་བཞེད་པས་ཀྱང་དེ་དོན་དམ་བདེན་པའི་མཚན་ཉིད་དུ་འཇོག་པ་མི་སྲིད་དོ། །དེས་ན་འདིའི་དགོངས་པ་ནི་མ་དཔྱད་པའི་བློ་ངོར་གྲུབ་པས་དེའི་ངོར་བདེན་པ་ཞེས་དང་། དཔྱད་པའི་བློ་ངོར་མ་གྲུབ་པའི་ཆ་ནས་མི་བསླུ་བའི་བདེན་པར་འཇོག་པ་ཞེས་པའོ། །གསུམ་པ་ནི་སྤྱིར་བདེན་གཉིས་ཡུལ་ཅན་གྱི་བློ་རྨོངས་མ་རྨོངས་སམ་བརྫུན་པ་མཐོང་བ་དང་། ཡང་དག་མཐོང་བའམ། འཁྲུལ་མ་འཁྲུལ་གྱི་སྒོ་ནས་འཇོག་དགོས་པས་ཡུལ་ཅན་གྱི་བློའི་སྒོ་ནས་འཇོག་པ་ནི་རྒྱ་གར་གྱི་ཐལ་རང་ཐམས་ཅད་མཐུན་པར་སྣང་ལ་འོན་ཀྱང་རང་རྒྱུད་པ་དག་ནི་བདེན་པ་གཉིས་སུ་ཕྱེ་བའི་དོན་དམ་བདེན་པ་ལ་གནས་ལུགས་དཔྱོད་པའི་རིགས་ཤེས་ཀྱིས་གཏན་ལ་ཕབ་ཅིང་སྒྲས་བསྟན་པའི་བསྟན་པ་དོན་དམ་དང་། འཕགས་པའི་མཉམ་གཞག་གི་གཟིགས་པའི་ངོར་སྤྲོས་པ་ཐམས་ཅད་དང་བྲལ་བའི་རྟོགས་པ་དོན་དམ་གཉིས་ཡོད་པར་དགོངས་ནས་ཡུལ་ཅན་མ་འཁྲུལ་བ་ལའང་དེ་གཉིས་སུ་ཡོད་པར་འདོད་པ་ནི་རློམ་ཚོད་དང་སོང་ཚོད་བསྲེས་ནས་མཚན་ཉིད་འཇོག་པར་སྣང་བས་གཞན་སེལ་གྱི་གནད་དང་སྦྱར་ན་ཅུང་ཟད་མི་བདེ་སྟེ་དཔེར་ན་གཟུགས་ཀྱི་སྐྱེ་མཆེད་ཀྱི་མཚན་ཉིད་མིག་ཤེས་ཀྱི་ཡུལ་དུ་གྱུར་པ་ཞེས་འཇོག་པའི་ཚེ་རློམ་ཚོད་མིག་ཤེས་ཀྱི་ཡུལ་དུ་གྱུར་པའི་གཟུགས་རང་མཚན་པ་དང་། སོང་ཚོད་རྟོག་པའི་ཡུལ་དུ་གྱུར་པའི་གཟུགས་ཀྱི་དོན་སྤྱི་གཉིས་གཅིག་ཏུ་བསྲེས་ཏེ། མཚོན་བྱ་ལ་དེ་གཉིས་ཡོད་པར་སྨྲ་བ་དང་འདྲའམ་སྙམ་མོ། །འོན་ཀྱང་མ་རྟོགས་པའི་དབང་གིས་སྐྱེས་ཆེན་གོང་མ་ལ་དགག་པར་བརྗོད་པའི་ཆ་སྣང་ན་བཟོད་པར་མཛོད་ཅིག དཔལ་ལྡན་ཟླ་བ་དང་ཇོ་བོ་རྗེ་གཉིས་ནི། དོན་དམ་བདེན་པའི་ཡུལ་ཅན་མ་འཁྲུལ་པ་ནི་འཕགས་པའི་མཉམ་གཞག་ཁོ་ན་ལ་བྱས་ནས། དེའི་ངོར་མི་བསླུ་བ་དོན་དམ་བདེན་པ་ཡིན་ནོ་ཞེས་སོ་སོ་སྐྱེ་བོའི་རིགས་ཤེས་ཀྱིས་རྣམ་པར་དཔྱད་ནས་གཏན་ལ་འབེབས་པ་ཡིན་པས་ན་མཚན་ཉིད་འཇོག་པའི་ཚེ་ཡུལ་ཅན་མ་འཁྲུལ་བ་ནི་འཕགས་པའི་མཉམ་གཞག་ཁོ་ནར་རློམ་ཡང་། རིགས་ཤེས་ཚད་མ་ནི་དེའི་ཁོངས་སུ་གཏོགས་པའོ། །ས་སྐྱ་པཎྜི་ཏའི་དགོངས་པའང་འདི་དང་མཐུན་ཏེ། དཔྱད་པའི་བློ་ངོར་མ་གྲུབ་པ་ཞེས་པས་དཔྱད་པའི་བློ་དེ་རྟོགས་པ་དོན་དམ་གྱི་ཡུལ་ཅན་དུ་མི་བཞེད་པའི་ཕྱིར་ཏེ། གཞན་དུ་ན་དཔྱད་པའི་བློ་ངོར་གྲུབ་པ་ཞེས་པའམ། དེའི་ངོར་བདེན་པ་ཞེས་འཇོག་དགོས་པའི་ཕྱིར་རོ། །བཞི་པ་མཚན་གཞི་ལ་མཚན་ཉིད་ངེས་བྱེད་ཀྱི་ཚད་མ་ལ་གཉིས་ཏེ། དངོས་པོར་སྨྲ་བའི་བདེན་གཉིས་བསྒྲུབ་ཚུལ་དགག་པ་དང་། དབུ་མ་པའི་བདེན་གཉིས་བསྒྲུབ་ཚུལ་གཞག་པའོ། །དང་པོ་ནི། བདེན་པ་གཉིས་ཀྱི་སྒོ་ནས་ཤེས་བྱའི་གནས་ལུགས་འབྱེད་པ་ནི་སངས་རྒྱས་བཅོམ་ལྡན་འདས་ཀྱི་གསུང་རབ་ལ་འཇུག་པའི་སྒོ་ཐུན་མོང་མ་ཡིན་པ་ཡིན་པས་ཕྱི་རོལ་པ་དག་ནི་དེ་གཉིས་ཀྱི་དོན་དང་ཐ་སྙད་གཉིས་ཀ་ལས་ཉམས་ཏེ། ཇི་ལྟར་སྣང་བའི་དངོས་པོ་བོར་ནས་དབང་ཕྱུག་དང་གཙོ་བོ་སོགས་འཇིག་རྟེན་གྱི་བྱེད་པ་པོར་སྒྲོ་བཏགས་པས་ཀུན་རྫོབ་ཀྱི་བདེན་པ་ལས་ཉམས། བདེན་དངོས་རིགས་པས་དཔྱད་བཟོད་ཁས་བླངས་པས་དོན་དམ་པའི་བདེན་པ་ལས་ཉམས་པའི་ཕྱིར་ཏེ། འཇུག་འགྲེལ་ལས། མུ་སྟེགས་ཅན་འདི་དག་ནི་དེ་ཁོ་ན་ཉིད་ལ་འཇུག་པར་འདོད་པས་སྐྱེ་བོ་མ་བྱང་བ་གནག་རྫི་དང་བུད་མེད་ལ་སོགས་པ་ཡན་ཆད་ལ་གྲགས་པའི་དངོས་པོ་སྐྱེ་བ་དང་འཇིག་པ་ལ་སོགས་པ་ཕྱིན་ཅི་མ་ལོག་པར་ཡང་དག་པར་ངེས་པར་མ་བཟུང་བར་ཕུལ་དུ་བྱུང་བར་འགྲོ་བར་འདོད་པས་ཤིང་ལ་འཛེགས་པས་ཡལ་ག་སྔ་མ་བཏང་ནས་ཡལ་ག་ཕྱི་མ་མ་བཟུང་བ་ལྟར་ལྷུང་བ་ཆེན་པོས་ལྟ་བ་ངན་པའི་རི་སུལ་དག་ཏུ་ལྟུང་བར་འགྱུར་ཞིང་། བདེན་པ་གཉིས་མཐོང་བ་དང་བྲལ་བས་འབྲས་བུ་མི་ཐོབ་པར་འགྱུར་རོ། །ཞེས་གསུངས་པས་སོ། །རང་སྡེ་དངོས་པོར་སྨྲ་བ་སུམ་ཆར་བདེན་པ་གཉིས་ཀྱི་སྒོ་ནས་ཤེས་བྱའི་གནས་ལུགས་འབྱེད་པ་དང་། གསུང་རབ་ཀྱི་དགོངས་པ་འགྲེལ་བར་འདྲའང་བདེན་གཉིས་ཀྱི་ངོས་འཛིན་དང་སྒྲུབ་བྱེད་ལ་དབུ་མ་པའི་རིགས་པས་གནོད་པས་བདེན་གཉིས་ཕྱིན་ཅི་མ་ལོག་པར་མ་རྟོགས་ཏེ། འདི་ལ་བསྒྲུབ་བྱ་ངོས་གཟུང་། སྒྲུབ་བྱེད་ངོས་གཟུང་། དེ་ལ་དབུ་མ་པའི་རིགས་པས་ཇི་ལྟར་གནོད་པའི་ཚུལ་དང་གསུམ་ལས། དང་པོ་ནི་བྱེ་བྲག་སྨྲ་བས། གདགས་གཞི་ཤེས་བྱ་གཞི་ལྔ་བདེན་པར་གྲུབ་པ་ནི་དོན་དམ་བདེན་པ་དང་། དེ་ལ་བཏགས་པའི་ལྷས་བྱིན་སོགས་གང་ཟག་གི་ཐ་སྙད་དང་། བུམ་སྣམ་སོགས་ཆོས་ཀྱི་ཐ་སྙད་བཏགས་ཡོད་ནི་ཀུན་རྫོབ་བདེན་པར་འདོད། མདོ་སྡེ་པས་དོན་ཤེས་རྫས་གྲུབ་དོན་དམ་བདེན་པ་དང་དེ་ལ་བཏགས་པའི་སྤྱི་མཚན་ཀུན་རྫོབ་བདེན་པར་འདོད། སེམས་ཙམ་པས་གཟུང་འཛིན་གཉིས་སྟོང་གི་ཤེས་པ་དང་། ཆོས་དབྱིངས་བདེན་པར་གྲུབ་པ་ནི་དོན་དམ་བདེན་པ་དང་། གཟུང་འཛིན་གཉིས་སུ་སྣང་བའི་མ་དག་གཞན་དབང་དང་། དེ་ལ་བཏགས་པའི་གཟུང་འཛིན་གཉིས་ཀྱིས་བསྡུས་པའི་ཀུན་བརྟགས་རྣམས་ནི་ཀུན་རྫོབ་བདེན་པར་འདོད་པས་གསུམ་ཆར་གྱིས་ཀྱང་གདགས་གཞི་དོན་དམ་བདེན་པར་གྲུབ་པ་དང་། དེ་ལ་བཏགས་པའི་ཀུན་རྫོབ་བདེན་པར་མེད་པ་ནི་བསྒྲུབ་བྱར་འདོད་དོ། །གཉིས་པ་ནི་བྱེ་བྲག་སྨྲ་བས་བཅོམ་པའམ་གཞིག་པ་ན་དེ་འཛིན་གྱི་བློ་འདོར་བ་ནི་ཀུན་རྫོབ་བདེན་པར་མེད་པའི་སྒྲུབ་བྱེད་དང་། མི་འདོར་བ་ནི་དོན་དམ་བདེན་པར་ཡོད་པའི་སྒྲུབ་བྱེད་དུ་འདོད། མདོ་སྡེ་པས་སྤྱི་དངོས་མེད་དུ་སྒྲུབ་པའི་རིགས་པ་བརྒྱད་དམ་གཙོ་བོར་དོན་བྱེད་མི་ནུས་པ་ནི་ཀུན་རྫོབ་བདེན་པ་མེད་པའི་སྒྲུབ་བྱེད་དང་། སྔར་གྱི་རིགས་པ་བརྒྱད་ལས་ལྡོག་པའམ་གཙོ་བོར་དོན་བྱེད་ནུས་པ་ནི་དོན་དམ་བདེན་པར་གྲུབ་པའི་སྒྲུབ་བྱེད་དུ་འདོད། སེམས་ཙམ་པས་གཟུང་འཛིན་རྫས་གཞན་འགོག་པའི་རིགས་པ་རྣམས་ཀུན་རྫོབ་ཇི་ལྟར་སྣང་བ་ལྟར་བདེན་པར་མེད་པའི་སྒྲུབ་བྱེད་དང་། རང་རིག་ནི་གཟུང་འཛིན་གཉིས་སྟོང་གི་དག་པ་གཞན་དབང་བདེན་པར་ཡོད་པའི་སྒྲུབ་བྱེད་དང་། ཆོས་ཐམས་ཅད་ཀྱི་གནས་ལུགས་མཐར་ཐུག་པ་ནི་ཆོས་དབྱིངས་བདེན་པར་ཡོད་པའི་སྒྲུབ་བྱེད་དུ་འདོད་དོ། །གསུམ་པ་ནི་ཀུན་རྫོབ་བདེན་པར་མེད་པ་དང་། དེའི་སྒྲུབ་བྱེད་ཙམ་ལ་དབུ་མ་པས་གནོད་པ་མི་སྟོན་ཀྱང་། དོན་དམ་བདེན་པ་རྫས་ཡོད་མི་འགྲུབ་པས། དེ་ལ་བཏགས་པའི་ཀུན་རྫོབ་ཉིད་ཀྱང་མི་འགྲུབ་བོ། །ཞེས་བདེན་པ་གཉིས་ཆར་ལས་ཀྱང་ཉམས་པའི་གནོད་པ་སྟོན་ཏེ། འཇུག་འགྲེལ་ལས། གཟུགས་མེད་པར་རྣམ་པར་ཤེས་པ་ཙམ་ཞིག་འདོད་པས་ནི་ཀུན་རྫོབ་དང་དོན་དམ་པ་དག་གི་རིམ་པ་ཅི་སྐད་དུ་སྨྲས་པ་བཤིག་པར་འགྱུར་ལ་དེ་ལྟར་བདེན་པ་དག་གི་རིམ་པ་དེ་དག་བཤིག་ནས་ཀྱང་། ཁྱོད་ཀྱི་རྫས་ནི་འགྲུབ་པར་མི་འགྱུར་རོ། །ཅིའི་ཕྱིར་ཞེ་ན། གང་གི་ཕྱིར་སྔར་རྫས་བཀག་པ་དེའི་ཕྱིར་ཁྱོད་ཀྱི་ངལ་བ་དོན་མེད་པར་འགྱུར་རོ། །ཞེས་གསུངས་སོ། །བྱེ་བྲག་ཏུ་ཀུན་རྫོབ་ཀྱི་བདེན་པ་ལས་ཉམས་པ་ནི། གཞན་གྱི་ལྟར་ན་རྫས་ལ་ཆགས་པ་ཡིས། །འཇིགས་རྟེན་གྲགས་པའི་རྣམ་གཞག་ཀུན་ཀྱང་བརླག །ཅེས་པའི་འགྲེལ་པར། ཤེས་རབ་མེད་པས་རྫས་ཤེས་ཙམ་ལ་ཆགས་པའི་སྒོ་ནས་གཞན་གྱི་དབང་གི་བུམ་པ་སོ་མ་བཏང་བར་ཆུ་དང་འདྲ་བ་བླུགས་ནས་རང་གི་བློ་གྲོས་ཀྱི་ཚུལ་ངན་པའི་ཕྱིར་འཇིག་རྟེན་གྱི་རྣམ་པར་གཞག་པ་འཇིག་རྟེན་ཁོ་ན་ལས་གྲུབ་པ་འདུག་ཤིག སོང་ཤིག བྱོས་ཤིག ཚོས་ཤིག་ཅེས་བྱ་བ་དེ་ལྟ་བུ་ལ་སོགས་པ་དང་། དེ་བཞིན་དུ་གཟུགས་དང་ཚོར་བ་ལ་སོགས་པ་གང་ཡིན་པ་དེ་དག་ཐམས་ཅད་འཇིག་པར་རྟོགས་ཏེ། དེའི་ཕྱིར་འདི་ལ་རྒུད་པ་ཉིད་འབའ་ཞིག་སྲིད་པར་འགྱུར་གྱི་མངོན་པར་མཐོ་བ་ནི་མ་ཡིན་ནོ། །ཞེས་གསུངས་སོ། །འདི་དག་སེམས་ཙམ་ལ་གནོད་བྱེད་བརྗོད་པ་ཡིན་ཀྱང་ཀུན་རྫོབ་བདེན་པའི་གདགས་གཞིར་དོན་དམ་བདེན་པ་རྫས་ཡོད་འདོད་པ་ཐམས་ཅད་ལ་རིགས་པའི་ཚུལ་འདི་གནོད་བྱེད་དུ་འབབ་པར་ཁྱད་མེད་དོ། །དོན་དམ་བདེན་པའི་ངོས་འཛིན་སྒྲུབ་བྱེད་ལ་སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་པ་ལྟར། བྱེ་བྲག་སྨྲ་བས་ལྡན་མིན་འདུ་བྱེད་དང་། འདུས་མ་བྱས་ཀྱི་གཞི་རྫས་གྲུབ་ཏུ་འདོད་པ་ལ། མདོ་སྡེ་པས་གནས་སྐབས་དང་གནས་སྐབས་ཅན་དེ་ཉིད་དང་གཞན་ཉིད་དུ་བརྗོད་དུ་མེད་པའི་རིགས་པ་དང་། དངོས་པོ་རྟག་པ་འགོག་པའི་རིགས་པ་རྣམས་ཀྱིས་གནོད། དེ་དང་མདོ་སྡེ་པ་གཉིས་ཆར་གྱིས་ཕྱི་དོན་བདེན་གྲུབ་ཁས་ལེན་པ་ལ་སེམས་ཙམ་པའི་དྲུག་གི་ཅིག་ཅར་སྦྱར་བའི་རིགས་པས་གནོད། གསུམ་ཆར་གྱིས་ཤེས་པ་བདེན་གྲུབ་ཏུ་ཁས་ལེན་པ་ལ་དབུ་མ་པའི་གཅིག་དུ་བྲལ་སོགས་ཀྱི་རིགས་པས་གནོད་དེ། ཡེ་ཤེས་སྙིང་པོ་ཀུན་ལས་བཏུས་ལས། རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམས་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་ཕྱིར་ནམ་མཁའི་པདྨ་བཞིན། །ཞེས་གསུངས་པ་ལྟར་རོ། །གཉིས་པ་ལ་གཉིས་ཏེ། ཀུན་རྫོབ་བདེན་པའི་སྒྲུབ་བྱེད་དང་། དོན་དམ་བདེན་པའི་སྒྲུབ་བྱེད་དོ། །དང་པོ་ལ་གཉིས་ཏེ། མི་འཐད་པའི་ཆ་དགག་པ། འཐད་པའི་ཆ་གཞག་པའོ། །དང་པོ་ནི། རྒྱ་གྲགས་བསོད་ན་རེ། སྣང་སྟོང་ཚོགས་པ་སྒྱུ་མ་ལྟ་བུ་མཐར་ཐུག་དཔྱོད་པའི་རིགས་ངོར་གྲུབ་སྟེ། དེ་མཐར་ཐུག་དཔྱོད་པའི་གཏན་ཚིགས་ཀྱི་བསྒྲུབ་བྱ་ཡིན་པའི་ཕྱིར་ཞེས་ཟེར་བ་མི་འཐད་དེ། མཐར་ཐུག་དཔྱོད་པའི་རིགས་པས་ཁེགས་པས་དེའི་ངོར་གྲུབ་པ་འགལ་བའི་ཕྱིར་དང་། མཐར་ཐུག་དཔྱོད་པའི་རིགས་ངོར་ཡོངས་གཅོད་དུ་གྲུབ་པའི་ཆོས་ཅི་ཡང་མེད་པའི་ཕྱིར། སྒྲུབ་བྱེད་ཀྱང་མི་འཐད་དེ་མཐར་ཐུག་དཔྱོད་པའི་རིགས་པ་དེས་སྣང་བའི་སྟེང་དུ་བདེན་པ་འགོག་གི་སྣང་སྟོང་ཚོགས་པའི་སྒྱུ་མ་ལྟ་བུ་མི་སྒྲུབ་པའི་ཕྱིར་རོ། །རྨ་བྱ་བྱང་ཡེ་ན་རེ། ཀུན་རྫོབ་བདེན་པ་ནི་བློ་འཁྲུལ་པའི་ངོར་བདེན་པ་ཡིན་པས་མ་དཔྱད་པར་འཇུག་པའི་འཁྲུལ་པ་རྐྱང་པས་འགྲུབ་བོ་ཞེས་ཟེར་བའང་མི་འཐད་དེ། མ་དཔྱད་པར་འཇུག་པའི་འཁྲུལ་པ་རྐྱང་པས་སྣང་བ་ཙམ་འགྲུབ་ཀྱང་། དེའི་སྟེང་དུ་བདེན་པ་མི་ཁེགས་ལ་དེ་མ་ཁེགས་ན་ཡུལ་བརྫུན་པར་མི་འགྲུབ། དེ་མ་གྲུབ་ན་ཡུལ་ཅན་གྱི་བློ་འཁྲུལ་པར་མི་འགྲུབ། དེ་མ་གྲུབ་ན་དེའི་ངོར་བདེན་པ་མི་འགྲུབ་པའི་ཕྱིར་རོ། །པ་ཚབ་ལོ་ཙཱ་བ་ན་རེ་སྣང་བའི་སྟེང་དུ་བདེན་པ་ཁེགས་པ་ན་སྣང་སྟོང་ཚོགས་པ་སྒྱུ་མ་ལྟ་བུ་འགྱུར་བས་མཐར་ཐུག་དཔྱོད་པའི་རིགས་པ་རྐྱང་པས་འགྲུབ་བོ། །ཞེས་གསུངས་པའང་མི་འཐད་དེ་སྣང་བ་ཁས་ལེན་པ་རྣམས་ལ་དེ་ཙམ་གྱིས་འགྲུབ་པ་སྲིད་ཀྱང་། སྣང་བ་ཉིད་ལ་སྐུར་བ་འདེབས་པའི་ཆད་པར་ལྟ་བ་དུ་མ་ཡོད་པས་དེའི་ངོར་སྣང་བ་ཉིད་ཀྱང་བསྒྲུབ་དགོས་པའི་ཕྱིར་རོ། །གཉིས་པ་ལ་གཉིས་ཏེ། མཚན་གཞི་སྒྲུབ་བྱེད་དང་། མཚན་ཉིད་སྒྲུབ་བྱེད་དོ། །དང་པོ་ནི། ཐ་སྙད་བདེན་པ་ལ་བརྟེན་ནས་མེད་པ་སྐུར་འདེབས་ཀྱི་མཐའ་འགོག་པའི་རིགས་པ་རྣམས་ཏེ། འདི་ལ་སྐུར་བ་འདེབས་ཚུལ་དང་། དེ་འགོག་པའི་རིགས་པ་གཉིས་ལས། དང་པོ་ནི། གཞི་ལ་སྐུར་བ་འདེབས་པ་རྒྱང་འཕན་པས་སྐྱེ་བ་སྔ་ཕྱི་དང་། ལས་རྒྱུ་འབྲས་མེད་པར་འདོད་པ་དང་། དབང་ཕྱུག་པ་རྣམས་ཀྱིས་དབང་ཕྱུག་མཆོད་པའི་ཆེད་དུ་སེམས་ཅན་གྱི་སྲོག་བཅད་པ་ལ་མི་དགེ་བའི་ལས་ལམ་མེད་པར་འདོད་པ་དང་། ཚངས་པའི་རྗེས་འབྲང་རྣམས་ཀྱིས་བྲམ་ཟེས་གཞན་གྱི་ནོར་མ་བྱིན་པར་ལེན་པ་བྱས་པ་ལ་མི་དགེ་བའི་ལས་ལམ་མེད་པར་འདོད་པ་ལ་སོགས་པའོ། །ལམ་ལ་སྐུར་པ་འདེབས་པ་ནི་རྗོད་བྱེད་ཀྱི་དབང་དུ་བྱས་ན་ཉན་ཐོས་པ་དག་གིས་ཐེག་པ་ཆེན་པོ་བཀའ་མ་ཡིན་པར་འདོད་པའོ། །བརྗོད་བྱའི་དབང་དུ་བྱས་ན་བྱང་ཆུབ་སེམས་དཔའ་ལ་ས་བཅུ་མེད་པར་འདོད་པ་དང་། གང་ཟག་ལ་བྱང་ཆུབ་སེམས་དཔའ་འཁོར་བར་སྐྱེ་བ་ལེན་པ་མེད་པར་འདོད་པ་དང་། གཞན་ལ་ཆོས་སྟོན་པ་མེད་པར་འདོད་པ་ལ་སོགས་པའོ། །འབྲས་བུ་ལ་སྐུར་པ་འདེབས་པ་ནི་དཔྱོད་པ་པས་རྣལ་འབྱོར་མངོན་སུམ་མེད་པར་འདོད་པ་དང་། བྱེ་བྲག་ཏུ་སྨྲ་བས་ལོངས་སྐུ་མེད་པར་འདོད་པ་ལ་སོགས་པའོ། །གཉིས་པ་དེ་འགོག་བྱེད་ཀྱི་རིགས་པ་ནི་རྒྱང་འཕན་པའི་འདོད་པ་སོགས་འགོག་པ་ཕལ་ཆེར་རྟོག་གེ་དང་འདྲ་ལ། ཐུན་མོང་མ་ཡིན་པ་ནི་རྒྱུ་མེད་ལས་སྐྱེ་བ་འགོག་པའི་སྐབས་སུ་འཆད་དོ། །ཐེག་པ་ཆེན་པོར་བཀར་མི་འདོད་པ་འགོག་པ་ནི། རིན་ཆེན་ཕྲེང་བ། སྤྱོད་འཇུག རྟོག་གེ་འབར་བ་རྣམས་ལས་འབྱུང་བའི་ཐེག་ཆེན་བཀར་སྒྲུབ་ཀྱི་རིགས་པ་རྣམས་སོ། །བྱང་སེམས་ལ་ས་བཅུ་མེད་པ་འགོག་པ་ནི། རིན་ཆེན་ཕྲེང་བ་ལས། ཇི་ལྟར་ཉན་ཐོས་ཐེག་པ་ལས། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུ་འོ། །ཞེས་གསུངས་པ་ལྟ་བུ་སྟེ། ཉན་ཐོས་པ་ཁྱེད་རང་གི་ཐེག་པ་ལ་ས་བརྒྱད་ཡོད་པ་བཞིན་བྱང་ཆུབ་སེམས་དཔའ་ལའང་ས་བཅུ་ཡོད་ཅེས་པ་སྟེ། དཔེ་ཉེར་འཇལ་གྱི་ཚད་མ་ལ་བརྟེན་ནས་འགོག་པའོ། །བྱང་སེམས་འཁོར་བར་སྐྱེ་བ་མི་ལེན་པ་དང་། གཞན་ལ་ཆོས་མི་སྟོན་པ་འགོག་པ་ནི། མགོན་པོ་བྱམས་པས། དབང་པོ་རྟུལ་དང་རྣོན་པོ་དག །ཅེས་སོགས་གསུངས་པ་ལྟ་བུ་སྟེ། ཉན་ཐོས་ཞུགས་གནས་བདུན་ལ་གང་ཟག་བཅུ་དགུར་ཕྱེ་བ་འཁོར་བར་སྐྱེ་བ་ལེན་པ་ཡོད་པ་བཞིན། བྱང་ཆུབ་སེམས་དཔའ་ལའང་ཡོད་ཅིང་། རང་སངས་རྒྱས་ལ་ཆོས་སྟོན་པ་ཇི་ལྟར་ཡོད་པ་བཞིན་བྱང་སེམས་ལའང་ཡོད་ཅེས་པ་སྟེ། དཔེ་ཉེར་འཇལ་གྱི་ཚད་མ་ལ་བརྟེན་ནས་འགོག་པའོ། །རྣལ་འབྱོར་མངོན་སུམ་མི་འདོད་པ་འགོག་པ་ཕལ་ཆེར་རྟོག་གེ་དང་འདྲ་ལ། ཐུན་མོང་མ་ཡིན་པ་ནི་རིན་ཆེན་ཕྲེང་བར། འཇིག་རྟེན་མཐའ་དང་ལྡན་ནམ་ཞེས། །ཞུས་ན་རྒྱལ་བ་མི་གསུང་བཞུགས། །དེ་ལྟར་ཟབ་མོའི་ཆོས་རྣམས་ནི། །སྣོད་མིན་འགྲོ་ལ་མི་གསུང་བ། །དེ་ཉིད་ཕྱིར་ན་མཁས་རྣམས་ཀྱིས། །ཀུན་མཁྱེན་ཐམས་ཅད་མཁྱེན་པར་ཤེས། །ཞེས་དང་། འཕགས་པ་ལྷས་ཀྱང་། ཐུབ་ལ་མཛད་དང་མཛད་མིན་དང་། །གསུང་བྱ་གསུང་བྱ་མིན་མངའ་བ། །དེས་ན་ཀུན་མཁྱེན་ཀུན་མཁྱེན་ནི། །མིན་ཞེས་བྱ་ལ་རྒྱུ་ཅི་ཡོད། །ཅེས་གསུངས་པ་ལྟར་རོ། །ལོངས་སྐུ་མི་འདོད་པར་འགོག་པ་ནི་རྒྱུད་བླར། རྒྱུ་མཐའ་ཡས་དང་སེམས་ཅན་ཟད་མེད་དང་། །བརྩེ་དང་འཕྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུད་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཞེས་སོགས་མཛད་པ་ཕྲིན་ལས་རྒྱུན་མི་ཆད་པར་སྒྲུབ་པའི་རིགས་པ་རྣམས་སོ། །དེ་བཞིན་དུ་མདོ་སྡེ་ས་བཅུ་པ་དང་། འཇུག་པར་གསུངས་པ་ལྟར། ལུས་ངག་གི་མཚན་མ་ལས་སངས་རྒྱས་ཀྱི་རིགས་ཡོད་པ་དཔོག་པ་དང་། ཤེར་ཕྱིན་གྱི་མདོ་དང་། བསྟན་བཅོས་ལས་གསུངས་པ་ལྟར་ལུས་ངག་གི་ཐ་སྙད་ལས་རྫོགས་བྱང་ལས་ཕྱིར་མི་ལྡོག་པར་བསྒྲུབ་པ་སོགས་ཀུན་རྫོབ་བདེན་པའི་མཚན་གཞིའི་ལྡོག་པ་སྒྲུབ་བྱེད་མཐའ་ཡས་སོ། །གཉིས་པ་ནི། མཐོང་བ་བརྫུན་པས་རྙེད་པའི་དངོས་པོའི་ངོ་བོའམ། བློ་འཁྲུལ་པའི་ངོར་བདེན་པ་ཞེས་པའི་ཡུལ་ཅན་སྟོན་བྱེད་ཀྱི་ཚིག་གིས་ཡུལ་བརྫུན་པར་ཤུགས་ལ་བསྟན། ཡུལ་ཅན་དེ་ལ་བདེན་པར་སྣང་བ་ཞེས་པས་སྣང་བ་ཙམ་དངོས་སུ་བསྟན་ཏེ། དེ་ལྟར་ན་སྣང་བ་དང་སྟོང་པ་ཚོགས་པ་ནི་ཀུན་རྫོབ་བདེན་པའི་དོན་ལྡོག་མཚན་ཉིད་ཀྱི་དོན་ཏེ། དེས་ན་འདི་བསྒྲུབ་པ་ལ། སྣང་བ་སྒྲུབ་བྱེད་དང་། སྟོང་པ་སྒྲུབ་བྱེད་དང་། སྣང་སྟོང་ཚོགས་པ་སྒྲུབ་བྱེད་གསུམ་དགོས་པ་ལས། དང་པོ་ནི་ཚིག་གསལ་ལས། འཇིག་རྟེན་ན་ཡོད་ན་ནི་ཐམས་ཅད་མངོན་སུམ་དུ་དམིགས་པར་བྱ་བ་ཡིན་པའི་ཕྱིར་ན་ལྐོག་ཏུ་མ་གྱུར་པ་ཡིན་ཏེ། དེའི་ཕྱིར་དེའི་ཡུལ་ཅན་གྱི་རྣམ་པར་ཤེས་པ་དང་ལྷན་ཅིག་ཏུ་མངོན་སུམ་ཉིད་དུ་རྣམ་པར་བཞག་གོ །ཟླ་བ་གཉིས་ལ་སོགས་པ་དག་ནི་རབ་རིབ་ཅན་མ་ཡིན་པའི་ཤེས་པ་ལ་ལྟོས་ནས་མངོན་སུམ་ཉིད་མ་ཡིན་ལ། རབ་རིབ་ཅན་ལ་སོགས་པ་ལ་ལྟོས་ནས་ནི་མངོན་སུམ་ཉིད་ཁོ་ན་འོ། །ལྐོག་ཏུ་གྱུར་པའི་ཡུལ་ཅན་རྟགས་བསྒྲུབ་པར་བྱ་བ་ལ་མི་འཁྲུལ་བ་ལས་སྐྱེས་པའི་ཤེས་པ་ནི་རྗེས་སུ་དཔག་པའོ། །དབང་པོ་ལས་འདས་པའི་དོན་མངོན་སུམ་དུ་རིག་ཅིང་ཡིད་ཆེས་པར་འགྱུར་བ་དག་གི་ཚིག་གང་ཡིན་པ་དེ་ནི་ལུང་ངོ་། འདྲ་བ་ལས་ཉམས་སུ་མྱོང་བའི་དོན་རྟོགས་པ་ནི་ཉེ་བར་འཇལ་བ་སྟེ། དཔེར་ན་བ་མེན་ནི་བ་ལང་དང་འདྲའོ་སྙམ་པ་ལྟ་བུའོ། །དེའི་ཕྱིར་དེ་ལྟར་ཚད་མ་བཞི་ལས་འཇིག་རྟེན་གྱི་དོན་རྟོགས་པར་རྣམ་པར་འཇོག་པ་ཡིན་ནོ། །ཞེས་གསུངས་པ་ལྟར། མདུན་གྱི་མེ་ལྟ་བུ་མངོན་གྱུར་འགའ་ཞིག་མངོན་སུམ་གྱིས་གྲུབ་ལ་རྒྱབ་ཀྱི་མེ་ལྟ་བུ་དུ་བ་སོགས་གཏན་ཚིགས་དང་འབྲེལ་བའི་ལྐོག་གྱུར་འགའ་ཞིག་རྗེས་དཔག་གིས་འགྲུབ། བོད་པ་ལ་ལྟོས་ཏེ་བ་མེན་ལྟ་བུ་གཏན་ཚིགས་དང་མ་འབྲེལ་ཡང་དཔེ་དང་འབྲེལ་བའི་ལྐོག་གྱུར་འགའ་ཞིག་དཔེ་ཉེར་འཇལ་གྱི་ཚད་མས་འགྲུབ། སྦྱིན་པ་གཏོང་བ་ལས་ལོངས་སྤྱོད་འབྱུང་བ་ལྟ་བུ་ཤིན་ཏུ་ལྐོག་གྱུར་རྣམས་ནི་ལུང་ཚད་མས་འགྲུབ་པ་སྟེ། མདོར་ན་འཇིག་རྟེན་ན་གྲགས་པའི་ཚད་མ་བཞི་ལས་སྣང་བ་ཙམ་འགྲུབ་བོ། །གཉིས་པ་ནི་གཅིག་དུ་བྲལ་ལ་སོགས་པའི་དབུ་མའི་གཏན་ཚིགས་རྣམས་ཏེ་དོན་དམ་སྒྲུབ་བྱེད་ཀྱི་སྐབས་སུ་བཤད་པ་དང་ཁྱད་པར་མེད་དོ། །གསུམ་པ་ནི་སྟོང་ཉིད་བདུན་ཅུ་པར། འདུ་བྱེད་དྲི་ཟའི་གྲོང་ཁྱེར་དང་། །སྒྱུ་མ་སྨིག་རྒྱུ་སྐྲ་ཤད་དང་། །དབུ་བ་ཆུ་བུར་སྤྲུལ་པ་དང་། །རྨི་ལམ་མགལ་མེའི་འཁོར་ལོ་མཚུངས། །ཞེས་སོགས་དབུ་མའི་གཞུང་ལུགས་རྣམས་ལས། འཇིག་རྟེན་ཉིད་ལ་ལྟོས་ནས་ཀྱང་བརྫུན་པའི་ཐ་སྙད་བྱེད་པའི་སྒྱུ་མའི་དཔེ་བརྒྱད་དང་། དབུ་བ་རྡོས་པ་ལ་སོགས་པ་དཔེ་ལྔ་པོ་རྣམས་ཀྱིས་སྟོན་ཏེ། དེ་དག་ནི་འཇིག་རྟེན་པ་ཉིད་ཀྱིས་སྣང་བ་དང་། སྟོང་པ་ཚོགས་པར་གྲུབ་ཟིན་པའི་ཕྱིར་རོ། །གཉིས་པ་དོན་དམ་བདེན་པ་བསྒྲུབ་ཚུལ་ལ་གསུམ་སྟེ། བསྒྲུབ་བྱ་ངོས་གཟུང་། སྒྲུབ་བྱེད་ཀྱི་རབ་དབྱེ་བཤད། དེ་དག་སོ་སོའི་དོན་གཏན་ལ་དབབ་པའོ། །དང་པོ་ནི། དོན་དམ་པ་མཐའ་བཞིའི་སྤྲོས་པ་དང་བྲལ་བ་འདི་ཉིད་ཡིན་ཏེ། ཡེ་ཤེས་སྙིང་པོ་ཀུན་ལས་བཏུས་ལས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པས། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ན། །ཞེས་གསུངས་པས་སོ། །གལ་ཏེ་དོན་དམ་བདེན་པ་དེ་དགག་སྒྲུབ་དང་། ཤེས་བརྗོད་ཀྱི་ཡུལ་ལས་འདས་པ་མ་ཡིན་ནམ་ཅིའི་ཕྱིར་བསྒྲུབ་བྱར་འཇོག་ཅེ་ན། དོན་དམ་བདེན་པ་རང་གི་ངོ་བོ་འཕགས་པའི་མཉམ་གཞག་སོ་སོ་རང་གི་རིག་པའི་ཡེ་ཤེས་ཀྱིས་རིག་པར་བྱ་བ་ཡིན་གྱི་དགག་སྒྲུབ་དང་ཤེས་བརྗོད་ཀྱི་ཡུལ་དུ་མི་རུང་སྟེ། ཇི་སྐད་དུ་འཕགས་པ་བདེན་པ་གཉིས་ལ་འཇུག་པ་ལས། ལྷའི་བུ་གལ་ཏེ་དོན་དམ་པར་ན་དོན་དམ་པའི་བདེན་པ་ལུས་དང་ངག་དང་ཡིད་ཀྱི་ཡུལ་གྱི་རང་བཞིན་དུ་འགྱུར་ན་ནི་དེ་དོན་དམ་པའི་བདེན་པ་ཞེས་བྱ་བའི་གྲངས་སུ་མི་འགྲོ་སྟེ། ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །འོན་ཀྱང་ལྷའི་བུ་དོན་དམ་པར་ན་དོན་དམ་པའི་བདེན་པ་ནི་ཐ་སྙད་ཐམས་ཅད་ལས་འདས་པ་བྱེ་བྲག་མེད་པ། མ་སྐྱེ་པ། མ་འགགས་པ། སྨྲ་བར་བྱ་བ་དང་། སྨྲ་བ་དང་། ཤེས་པར་བྱ་བ་དང་། ཤེས་པ་དང་བྲལ་བའོ། །ལྷའི་བུ་དོན་དམ་པའི་བདེན་པ་ནི་རྣམ་པ་ཐམས་ཅད་ཀྱི་མཆོག་དང་ལྡན་པ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་གྱི་བར་ལས་འདས་པ་ཡིན་ཏེ། ཇི་ལྟར་དོན་དམ་པའི་བདེན་པའོ། །ཞེས་བརྗོད་པ་ལྟར་ནི་མ་ཡིན་ནོ། །ཆོས་ཐམས་ཅད་ནི་བརྫུན་ཏེ་བསླུ་བའི་ཆོས་སོ། །ལྷའི་བུ་དོན་དམ་པའི་བདེན་པ་ནི་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། གང་གིས་སྟོན་པ་དང་། ཅི་སྟོན་པ་དང་། གང་ལ་སྟོན་པའི་ཆོས་དེ་དག་ཐམས་ཅད་ནི་དོན་དམ་པར་རབ་ཏུ་མ་སྐྱེས་པའོ། །རབ་ཏུ་མ་སྐྱེས་པའི་ཆོས་རྣམས་ཀྱིས་རབ་ཏུ་མ་སྐྱེས་པའི་ཆོས་རྣམས་བཤད་པར་མི་ནུས་སོ། །ཞེས་གསུངས་སོ། །འོན་ཀྱང་དོན་དམ་བདེན་པ་མཚན་ཉིད་པ་རྟོགས་པའི་ཕྱིར་དུ་ཐ་སྙད་སྒྲོ་བཏགས་པའི་སྒོ་ནས་རྗེས་མཐུན་པ་བརྗོད་པ་སྒྲའི་སྒོ་ནས་བསྟན་དུ་ཡོད་ཅིང་། རྟོག་བློས་ཡུལ་དུ་བྱར་ཡོད་དེ། མདོ་ལས། འཇིག་རྟེན་མཁྱེན་པས་གཞན་ལས་མ་གསན་པར། །བདེན་པ་འདི་གཉིས་ཉིད་ཀྱིས་སྟོན་པར་མཛད། །ཅེས་དང་། རྩ་ཤེར་ལས། གདགས་པའི་དོན་དུ་བརྗོད་པར་བྱ། །ཞེས་སོགས་རྩ་འགྲེལ་སྔར་དྲངས་པ་རྣམས་དང་། འཇུག་འགྲེལ་དུ། ས་དྲུག་པའི་བྱང་སེམས་ཀྱིས་རྟེན་འབྲེལ་སྐྱེ་མེད་ཀྱི་དོན་རྟོགས་ཚུལ་ཇི་ལྟ་བ་བཞིན་ཟླ་བ་གྲགས་པ་བདག་གིས་རང་དབང་དུ་བསྟན་པར་མི་ནུས་ཀྱང་། སློབ་དཔོན་ཀླུ་སྒྲུབ་ཀྱིས་ལུང་དོན་ཕྱིན་ཅི་མ་ལོག་པར་ཐུགས་སུ་ཆུད་པའི་བསྟན་བཅོས་ཀྱི་རྗེས་སུ་འབྲངས་ནས་བསྟན་ནུས་པར་གསུངས་པ་ལྟ་བུའོ། །དེ་ལྟ་བུའི་དོན་དམ་བདེན་པ་མཚན་ཉིད་པ་དང་རྗེས་སུ་མཐུན་པ་གཉིས་ངོ་བོ་ཐ་དད་དུ་ཡོད་པ་མ་ཡིན་གྱི་དོན་དམ་བདེན་པ་མཚན་ཉིད་པ་དེ་ལ་བཤད་ཉན་བྱེད་པར་རློམ་ནས་འཆད་པ་པོས་བརྗོད་པ་སྒྲའི་སྒོ་ནས་བསྟན་ཅིང་ཉན་པ་པོས་ཐོས་བསམ་གྱི་རྟོག་པས་བཟུང་བའི་ཚེ་སྒྲ་རྟོག་གི་དངོས་ཡུལ་ནི་དོན་དམ་བདེན་པ་རྗེས་སུ་མཐུན་པ་སྟེ། རྒྱན་ལས། དམ་པའི་དོན་དང་མཐུན་པའི་ཕྱིར། །འདི་ནི་དམ་པའི་དོན་ཞེས་བྱ། །ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཉིད། །ཅེས་གསུངས་པས་སོ། །དེས་ན་དོན་དམ་བདེན་པ་སྤྲོས་པ་དང་བྲལ་བ་དེ་ཉིད་དགག་སྒྲུབ་ཀྱིས་སྤྲོས་པར་བྱས་པས་སྤྲོས་བྲལ་དེ་ཉིད་རྟོགས་པར་འགྱུར་ཏེ། དཔེར་ན་སྒྲ་བྱས་མི་རྟག་པ་གསུམ་པོ་ངོ་བོ་གཅིག་ཏུ་རྟོག་པའི་ཕྱིར་དུ་རེ་ཞིག་གཞན་སེལ་གྱི་བློ་ངོར་ལྡོག་པ་ཐ་དད་དུ་ཕྱེ་བས་མཐར་དེ་དག་ངོ་བོ་གཅིག་ཏུ་རྟོགས་པར་འགྱུར་བ་བཞིན་ནོ། །མདོར་ན་འཕགས་པའི་མཉམ་གཞག་གི་བློ་ངོའི་སྤྲོས་བྲལ་མཚན་ཉིད་པ་གཏན་ལ་ཕབ་པར་རློམ་ནས་རྟོག་ངོར་དོན་དམ་བདེན་པ་མཐའ་བཞིའི་སྤྲོས་པ་དང་བྲལ་བ་ནི་བསྒྲུབ་བྱའོ། །གཉིས་པ་སྒྲུབ་བྱེད་ཀྱི་རབ་དབྱེ་བཤད་པ་ལ་དགག་བྱའི་སྒོ་ནས་མཐའ་བཞིའི་སྤྲོས་པ་འགོག་པའི་རིགས་པ་བཞི། གཏན་ཚིགས་ཀྱི་སྒོ་ནས་གཅིག་དུ་བྲལ་ལ་སོགས་པའི་གཏན་ཚིགས་ལྔ། འགྲེལ་ཚུལ་གྱི་སྒོ་ནས་ཐལ་འགྱུར་དང་རང་རྒྱུད་ཀྱི་རིགས་པ་གཉིས། བསྒྲུབ་བྱའི་སྒོ་ནས་ཆོས་ཀྱི་བདག་མེད་དང་། གང་ཟག་གི་བདག་མེད་སྒྲུབ་བྱེད་ཀྱི་རིགས་པ་གཉིས་ཏེ་བཞིའོ། །དེ་དག་ཀྱང་རྣམ་གྲངས་ཀྱི་སྒོ་ནས་ཕྱེ་བ་ཡིན་གྱི་མཐའ་བཞིའི་སྤྲོས་པ་འགོག་པའི་རིགས་པ་ནི་ཆོས་ཀྱི་བདག་མེད་སྒྲུབ་པའི་རིགས་པ་ཡིན་ཞིང་གཅིག་དུ་བྲལ་ལ་སོགས་པའི་གཏན་ཚིགས་རྣམས་ནི་དེའི་མཐའ་དང་པོ་འགོག་བྱེད་ཀྱི་རིགས་པ་དང་། ཐལ་རང་གི་རིགས་པ་རྣམས་ནི་སྟོང་ཉིད་སྒྲུབ་བྱེད་ཀྱི་རིགས་པ་ཐམས་ཅད་ལ་རང་རྒྱུད་ཀྱི་དམ་བཅའ་དང་། རང་རྒྱུད་ཀྱི་གཏན་ཚིགས་མི་འདོད་པ་དང་འདོད་པའི་སྒོ་ནས་ཕྱེ་བ་ཡིན་པས་རིགས་པའི་གཙོ་བོ་ཕྱི་མ་གཉིས་ཀྱི་ནང་དུ་འདུས་སོ། །དེས་ན་ཀླུ་སྒྲུབ་ཀྱིས། བདག་མེད་རྣམ་པ་གཉིས་མཐོང་ན། །སྲིད་པའི་ས་བོན་འགག་པར་འགྱུར། །ཞེས་དང་། སློབ་དཔོན་ཟླ་བས། འཇུག་པར་བདག་མེད་གཉིས་བསྒྲུབ་པ་གཙོ་བོར་མཛད་པའི་གནད་ཀྱང་འདི་ཉིད་ཡིན་ནོ། །གསུམ་པ་དེ་དག་སོ་སོའི་དོན་གཏན་ལ་དབབ་པ་ལ་བཞི་ལས། དང་པོ་མཐའ་བཞིའི་སྤྲོས་པ་འགོག་པའི་རིགས་པ་ལ་གཉིས་ཏེ། སྤྲོས་པའི་མཐའ་བཞི་རིགས་པས་ཇི་ལྟར་འགོག་པའི་ཚུལ་དང་། དེ་དག་འགོག་ཏུ་མི་རུང་བའི་ལོག་རྟོག་དགག་པའོ། །དང་པོ་ལ་གཉིས་ཏེ། མཐའ་དང་པོ་འགོག་པའི་རིགས་པ། མཐའ་ཕྱི་མ་གསུམ་འགོག་པའི་རིགས་པའོ། །དང་པོ་ལ་བཞི་སྟེ། རིགས་པ་གང་གིས་འགོག གཞི་གང་ལ་འགོག དགག་བྱ་གང་འགོག དེ་ལྟར་བཀག་པའི་དགོས་པའོ། །དང་པོ་ནི། གཞུང་ལས་འབྱུང་བའི་རིགས་པ་ཕལ་ཆེ་བ་སྟེ། གཅིག་དུ་བྲལ་ལ་སོགས་པའི་གཏན་ཚིགས་རྣམས་སོ། །གཉིས་པ་ལ་བོད་ཀྱི་སྐྱེས་ཆེན་ཁ་ཅིག་ཤེས་བྱ་ཐམས་ཅད་ལ་མཚན་ཉིད་གསུམ་གསུམ་དུ་ཕྱེ་བའི་ཚེ་ཀུན་བརྟགས་དང་། གཞན་དབང་གིས་བསྡུས་པའི་ཆོས་རྣམས་བདེན་པར་མེད་པས་གཅིག་དུ་བྲལ་ལ་སོགས་པའི་གཏན་ཚིགས་རྣམས་ཀྱིས་དེ་ལ་བདེན་པ་འགོག་ལ་ཡོངས་གྲུབ་ཀྱིས་བསྡུས་པའི་ཆོས་རྣམས་བདེན་པར་གྲུབ་པས་དེ་དག་བདེན་པ་འགོག་མི་ནུས་སོ། །དེས་ན་བདེན་པ་གཉིས་སུ་ཕྱེ་བའི་ཚེ་ཀུན་རྫོབ་བདེན་པ་དང་འདུས་བྱས་འདུས་མ་བྱས་གཉིས་སུ་ཕྱེ་བའི་ཚེ་འདུས་བྱས་དང་། དངོས་པོ་དངོས་མེད་གཉིས་སུ་ཕྱེ་བའི་ཚེ་དངོས་པོ་ལ་བདེན་པ་འགོག་གི་ཐམས་ཅད་ལ་མ་ཡིན་ནོ། །འདི་ནི་ངེས་དོན་གྱི་མདོ་སྡེ་རྣམས་དང་། བྱམས་པའི་ཆོས་ལྔ། ཐོགས་མེད་སྐུ་མཆེད། ཕྱོགས་གླང་། ཆོས་གྲགས་རྣམས་ཀྱིས་མཛད་པའི་དབུ་མའི་གཞུང་ལུགས་རྣམས་ཀྱི་དགོངས་པ་ཡིན་ཅིང་། ཀླུ་སྒྲུབ་ཡབ་སྲས་ཀྱང་བཞེད་དོ་ཞེས་ཟེར་རོ། །དེ་དག་ནི་ངེས་དོན་གྱི་མདོ་སྡེའི་དགོངས་པ་མ་ཡིན་ཏེ། ངེས་དོན་གྱི་མདོ་སྡེ་ལས། མྱ་ངན་འདས་མེད་མྱང་འདས་སུ། །འཇིག་རྟེན་མགོན་གྱིས་བསྟན་པ་མཛད། །མཁའ་ལ་མདུད་པ་བོར་བ་ནི། །ནམ་མཁའ་ཉིད་ཀྱིས་བཀྲོལ་བ་བཞིན། །ཞེས་དང་། མྱ་ངན་ལས་འདས་པའང་རྨི་ལམ་ལྟ་བུ་སྒྱུ་མ་ལྟ་བུ། མྱ་ངན་ལས་འདས་པ་ལས་ལྷག་པའི་ཆོས་གཞན་ཞིག་ཡོད་ན་དེའང་རྨི་ལམ་ལྟ་བུ། སྒྱུ་མ་ལྟ་བུ་ཞེས་གསུངས་སོ། །བྱམས་ཆོས་ཕྱི་མ་གསུམ་དང་། ས་སྡེ་ལྔ་ལ་སོགས་པའི་དགོངས་པའང་མ་ཡིན་ཏེ། དེ་དག་ལས་གཞན་དབང་དང་ཡོངས་གྲུབ་གཉིས་ཀ་བདེན་གྲུབ་ཏུ་གསུངས་པའི་ཕྱིར་ཏེ། དབུས་མཐའ་ལས། ཡོད་པས་མེད་པས་ཡོད་པས་ན། །དེ་ནི་དབུ་མའི་ལམ་ཡིན་ནོ། །ཞེས་གསུངས་ཤིང་། གཞན་རྣམས་ལས་ཀྱང་དེ་ལྟར་དུ་གསུངས་པའི་ཕྱིར་རོ། །དེ་དག་དབུ་མའི་གཞུང་ལུགས་སུ་འདོད་པའང་མི་འཐད་དེ། དེ་ལྟར་ན་བོད་ན་སེམས་ཙམ་པའི་ལྟ་བ་སྟོན་པའི་གཞུང་ལུགས་མེད་པར་ཐལ་བའི་ཕྱིར་རོ། །དོན་དམ་བདེན་པ་དང་། འདུས་མ་བྱས་ལ་བདེན་པ་མི་འགོག་པ་ཀླུ་སྒྲུབ་ཀྱི་དགོངས་པར་འདོད་པའང་མི་འཐད་དེ། བསྟོད་ཚོགས་ལས། ལྟ་བ་ཐམས་ཅད་སྤང་བའི་ཕྱིར། །སྟོང་ཉིད་བདུད་རྩི་སྟོན་མཛད་ན། །གང་ཞིག་དེ་ལ་ཞེན་གྱུར་པ། །དེ་ནི་ཁྱོད་ཀྱིས་ཤིན་ཏུ་སྨད། །ཅེས་དང་། རྩ་ཤེར་ལས། སྐྱེ་དང་གནས་དང་འཇིག་པ་དག །མ་གྲུབ་ཕྱིར་ན་འདུས་བྱས་མེད། །འདུ་བྱས་རབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་གྲུབ། །ཅེས་གསུངས་པས་སོ། །དངོས་སྨྲ་བ་ལ་བརྗོད་པའི་སྐྱོན་ཐམས་ཅད་དབུ་མ་པ་རང་ལ་ལོག་པར་འགྱུར་ཏེ། བདེན་པར་གྲུབ་པའི་ཆོས་དམ་བཅས་པ་ཡོད་པའི་ཕྱིར་དང་། རིགས་པས་དཔྱད་པའི་ཚེ་ཡོད་པའི་ཕྱོགས་གཟུང་དུ་ཡོད་པའི་ཕྱིར། ཇི་སྐད་དུ་རྩོད་ཟློག་ལས། གལ་ཏེ་ངས་དམ་བཅས་འགའ་ཡོད། །དེས་ན་ང་ལ་སྐྱོན་དེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །སྒྲུབ་པའམ་བཟློག་པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཅེས་དང་། བཞི་བརྒྱ་པ་ལས། ཡོད་དང་མེད་དང་ཡོད་མེད་ཅེས། །གང་ལ་ཕྱོགས་ནི་ཡོད་མིན་པ། །དེ་ལ་ཡུན་ནི་རིང་པོ་ནའང་། །ཀླན་ཀ་བརྗོད་པར་ནུས་མ་ཡིན། །ཞེས་གསུངས་པས་སོ། །དེ་ལ་སྐྱོན་སྤང་བར་འདོད་ནས། ལུང་དེ་དག་ལས་འདུས་མ་བྱས་དང་མྱ་ངན་ལས་འདས་པ་མ་གྲུབ་པར་གསུངས་པ་རྣམས་མཉམ་གཞག་ལ་བློ་ལ་དགོངས་པ་ཡིན་གྱི་རྗེས་ཐོབ་ཤན་འབྱེད་ལ་དགོངས་པ་མ་ཡིན་ལ། འདིར་རྗེས་ཐོབ་ཡུལ་གྱི་གནས་ལུགས་འབྱེད་པའི་ཚེ་ཆོས་དབྱིངས་བདེན་གྲུབ་ཏུ་འདོད་པས་སྐྱོན་མེད་དོ་ཞེས་སྨྲའོ། །འདི་ནི་ཤིན་ཏུ་ངོ་མཚར་ཆེ་སྟེ། དེའི་དོན་མཉམ་གཞག་ལ་བློའི་སྐབས་ཀྱི་ཆོས་དབྱིངས་རྗེས་ཐོབ་ཀྱི་ཚེ་བདེན་གྲུབ་ཏུ་དམ་མི་བཅའ་ཞེས་པའི་དོན་ཡིན་ནམ། མཉམ་གཞག་གི་ཚེ་དེ་ལྟར་དུ་དམ་མ་བཅས་པས་རང་ལ་སྐྱོན་མི་འགྱུར་ཞེས་པའི་དོན་ཡིན། དང་པོ་ལྟར་ན་རང་གི་གྲུབ་པའི་མཐའ་དང་དངོས་སུ་འགལ་ཞིང་། ཕྱི་མ་ལྟར་ན་དབུ་མ་པ་ལ་དམ་བཅའ་ཡོད་མེད་དང་། དངོས་སྨྲ་བ་ལ་སྐྱོན་བརྗོད་པ་དང་སྐྱོན་དེ་རང་ལ་འཇུག་པའི་རྩོད་པ་ཟློག་པ་རྣམས་མཉམ་གཞག་ལ་གནས་པའི་ཚེ་ཡིན་གྱི་རྗེས་ཐོབ་ཀྱི་གནས་སྐབས་མ་ཡིན་པར་སྨྲ་བ་འདི་ལ་དཔྱོད་ལྡན་སུ་ཞིག་ཡིད་ཆེས་པར་འགྱུར། རྩ་བའི་གྲུབ་མཐའ་ཉེས་པའི་སྐྱོན་སྤོང་མཐར་འདི་ལྟར་འགྱུར་བ་འདི་ལ་སོམས་ལ་གྲུབ་པའི་མཐའ་རེ་མ་སྤེལ་ཞིག དེ་ན་མཐའ་དང་པོ་གང་ལ་འགོག་པའི་གཞི་ནི་གང་ཞིག་བདེན་པར་ཡོད་མེད་རྩོད་ན་རྩོད་གཞི་དེ་ཉིད་ཡིན་ཏེ། ཡེ་ཤེས་སྙིང་པོ་ཀུན་ལས་བཏུས་ལས། རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམས་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་ཕྱིར་ནམ་མཁའི་པདྨོ་བཞིན། །ཞེས་གསུངས་པ་ལྟར་རོ། །བདེན་འཛིན་ཞུགས་པ་གཙོ་ཆེ་བའི་དབང་དུ་བྱས་ན་དངོས་པོ་ཐམས་ཅད་ཡིན་ཏེ། རྩ་ཤེར་ལས། དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་དང་། དེའི་འགྲེལ་པར་ཚིག་གསལ་ལས། དེ་ལ་གང་དག་ཅེས་བྱ་བའི་སྒྲ་ནི་བརྟེན་པའི་ཚིག་སྟེ། སུ་དག་ཅེས་བྱ་བའི་སྒྲའི་རྣམ་གྲངས་སོ། །ཞེས་གསུངས་པས་སོ། །སྤྱིར་ཆོས་ཐམས་ཅད་ཡིན་ཏེ། སྟོང་གཞིའི་ཆོས་ཅན་ཉི་ཤུས་མ་བསྡུས་པའི་ཆོས་ཅི་ཡང་མེད་ཅིང་། དེ་དག་ལའང་ཐོག་མར་བདེན་པ་བཀག་ནས་མཐར་བཞི་ཆར་གྱི་སྤྲོས་བྲལ་དུ་བྱ་དགོས་པའི་ཕྱིར་རོ། །འོན་ཀྱང་གཞུང་ལས། འདུས་བྱས་དང་། དངོས་པོ་དང་། སྣང་བ་རྣམས་ལ་བདེན་པ་འགོག་པ་གཙོ་བོར་གསུངས་པ་ནི་བདེན་འཛིན་འཇུག་པའི་གཞིའི་གཙོ་བོ་ཡིན་པས་དེ་དག་ལ་བདེན་པ་བཀག་པས་གཞན་རྣམས་ལ་བདེན་པ་ཁེགས་པ་དོན་གྱིས་འགྲུབ་པ་ལ་དགོངས་ཏེ། དཔེར་ན་རྟོག་གེའི་བསྟན་བཅོས་ལས། དངོས་པོའི་ཡུལ་ཅན་གྱི་སྒྲ་རྟོག་ནི་སྒྲུབ་པས་འཇུག་སྙམ་པའི་ལོག་རྟོག་འཇུག་པའི་གཞིའི་གཙོ་བོ་ཡིན་པས་དེ་དག་སྒྲུབ་པས་འཇུག་པ་རྒྱས་པར་བཀག་པས་དངོས་མེད་ཀྱི་ཡུལ་ཅན་སྒྲ་རྟོག་སྒྲུབ་པས་འཇུག་པ་ཤུགས་ལ་ཁེགས་པར་གསུངས་པ་བཞིན་ནོ། །གསུམ་པ་ནི་གཞི་དེ་དག་གི་སྟེང་དུ་བདེན་པར་གྲུབ་པ། དོན་དམ་པར་གྲུབ་པ། ཡང་དག་པར་གྲུབ་པ། ངོ་བོ་ཉིད་ཀྱིས་གྲུབ་པ། རང་བཞིན་གྱིས་གྲུབ་པ། རང་གི་མཚན་ཉིད་ཀྱིས་གྲུབ་པ། བདེན་པའི་སྐྱེ་བ། བདེན་པའི་དངོས་པོ་ཡོད་པ་ཙམ་ལ་སོགས་པ་སྒྲུབ་པའི་སྒོ་ནས་གཟུང་བའི་ཆོས་ཐམས་ཅད་འགོག་སྟེ་ཐལ་རང་གཉིས་ཆར་གྱིས་དགག་གཞི་དེ་དག་ལ་རིགས་པས་དཔྱད་པའི་ཚེ་ཡོངས་གཅོད་དུ་གྲུབ་པའི་ཆོས་ཅི་ཡང་མེད་པར་འདོད་པའི་ཕྱིར་རོ། །བཞི་པ་ལ་སྡུག་བསྔལ་སྤང་བའི་དགོས་པ་དང་། བྱང་ཆུབ་ཐོབ་པའི་དགོས་པ་གཉིས་ལས། དང་པོ་ནི། ཆོས་ཕུང་པོ་ལ་བདེན་པར་འཛིན་པའི་བདེན་འཛིན་ཡོད་ན་དངོས་འབྲས་གང་ཟག་གི་བདེན་འཛིན་ངེས་པར་འབྱུང་། དེ་ཉིད་ཡན་ལག་བཅུ་གཉིས་ཀྱི་ཐོག་མའི་མ་རིག་པ་ཡིན་ཞིང་། དེ་ལས་ཡན་ལག་ཕྱི་མ་རྣམས་འབྱུང་བས་སྡུག་བསྔལ་གྱི་རྒྱུའི་གཙོ་བོ་ནི་ཆོས་ལ་བདེན་པར་འཛིན་པའི་བདེན་འཛིན་ཡིན་ཏེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཀྱང་ནི་སྐྱེ་བ་ཡིན། །ཞེས་དང་། དབུ་མ་རྩ་བར། མ་རིག་བསྒྲིབས་པས་ཡང་སྲིད་ཕྱིར། །འདུ་བྱེད་རྣམ་པ་གསུམ་པོ་དག །མངོན་པར་འདུ་བྱེད་གང་ཡིན་པའི། །ལས་དེ་དག་གིས་འགྲོ་བར་འགྲོ། །ཞེས་དང་། སྟོང་ཉིད་བདུན་ཅུ་པར། རྒྱུ་རྐྱེན་ལས་སྐྱེས་དངོས་པོ་རྣམས། །ཡང་དག་ཉིད་དུ་རྟོག་པ་གང་། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང་། །ཞེས་གསུངས་པས་སོ། །དབུ་མའི་གཞུང་ལས་བཤད་པའི་མཐའ་དང་པོ་འགོག་པའི་རིགས་པ་ལ་བརྟེན་ནས་རྟེན་ཅིང་འབྲེལ་བར་འབྱུང་བ་སྐྱེ་མེད་ཀྱི་དོན་རྟོགས་ན་གང་ཟག་གི་བདག་འཛིན་འགགས་ཤིང་། དེས་ཉོན་མོངས་པ་མི་བསྐྱེད། དེས་ལས་མི་སོག་པས་འབྲས་བུ་སྡུག་བསྔལ་ཀྱི་ཕུང་པོ་མཐའ་དག་འགགས་ཏེ། དབུ་མ་རྩ་བར། མ་རིག་འགགས་པར་གྱུར་ན་ནི། །འདུ་བྱེད་རྣམས་ཀྱང་འབྱུང་མི་འགྱུར། །མ་རིག་འགག་པར་འགྱུར་བ་ནི། །ཤེས་པས་དེ་ཉིད་བསྒོམས་པས་སོ། །ཞེས་དང་། དེའི་འགྲེལ་པར། རྟེན་ཅིང་འབྲེལ་བར་འབྱུང་བ་དེ་ཉིད་ཕྱིན་ཅི་མ་ལོག་པ་ཇི་ལྟ་བ་བཞིན་བསྒོམས་པས་མ་རིག་པ་རབ་ཏུ་སྤོང་བར་འགྱུར་རོ། །འདི་ལྟར་གང་གིས་རྟེན་ཅིང་འབྲེལ་བར་འབྱུང་བ་ཡང་དག་པར་མཐོང་བ་དེས་ནི་དངོས་པོ་ཕྲ་མོའི་ཡང་རང་གི་ངོ་བོ་དམིགས་པ་མ་ཡིན་ཏེ། གཟུགས་བརྙན་ལྟར་དངོས་པོ་རྣམས་རང་བཞིན་གྱིས་སྟོང་པ་ཉིད་དུ་འཇུག་པར་འགྱུར་རོ། །དེ་དེ་ལྟར་དངོས་པོ་ཐམས་ཅད་རང་བཞིན་གྱིས་སྟོང་པ་ཉིད་དུ་ཞུགས་པས་ཆོས་ཅུང་ཟད་ཀྱང་དམིགས་པར་མི་འགྱུར་རོ། །དེ་མ་དམིགས་པས་འགར་ཡང་མི་རྨོངས་སོ། །མ་རྨོངས་པས་ལས་མི་བྱེད་དོ། །ཞེས་དང་བཞི་བརྒྱ་པར། རྟེན་ཅིང་འབྲེལ་བར་འབྱུང་བ་ནི། །མཐོང་ན་གཏི་མུག་འབྱུང་མི་འགྱུར། །དེ་ཕྱིར་འབད་པ་ཀུན་གྱིས་འདིར། །གཏམ་དེ་ཁོ་ན་བསྙད་པར་བྱ། །ཞེས་དང་། སྤྱོད་འཇུག་ལས། འདིར་ནི་སྡུག་བསྔལ་རྒྱུར་གྱུར་པའི། །བདེན་པར་ཞེན་པ་བཟློག་བྱ་ཡིན། །ཞེས་གསུངས་པ་རྣམས་མཐའ་དང་པོ་ཐོག་མར་འགོག་པ་ལ་ཚད་མ་ཡིན་པའི་ཕྱིར་རོ། །གཉིས་པ་ནི། བྱང་ཆུབ་ཐོབ་པར་འདོད་པ་དག་གིས་བདེན་པ་དགག་དགོས་ཏེ། ཉན་ཐོས་ཀྱི་བྱང་ཆུབ་ཐོབ་པ་ལ་ཉེར་ལེན་གྱི་ཕུང་པོའི་སྟེང་དུ་བདེན་པ་དགག་དགོས། རང་རྒྱལ་གྱི་བྱང་ཆུབ་ཐོབ་པ་ལ་དེའི་སྟེང་དུ་གཟུང་བ་ཕྱི་རོལ་གྱི་དོན་དང་ཀུན་ནས་ཉོན་མོངས་ཀྱི་ཆོས་སོགས་ལ་བདེན་པ་དགག་དགོས། ཐེག་ཆེན་གྱི་བྱང་ཆུབ་ཐོབ་པ་ལ་མཐའ་བཞི་ཆར་གྱི་སྤྲོས་པ་དགག་དགོས་པའི་ཕྱིར་རོ། །དེ་དག་གི་རྒྱུ་མཚན་ཡང་ཉེར་ལེན་གྱི་ཕུང་པོ་བདེན་མེད་དུ་མ་རྟོགས་ན་གང་ཟག་གི་བདག་མེད་རྟོགས་པར་མི་འགྱུར། གཟུང་བ་ཕྱི་རོལ་གྱི་དོན་དང་ཀུན་ནས་ཉོན་མོངས་ཀྱི་གཟུང་བ་སོགས་བདེན་མེད་དུ་མ་རྟོགས་ན་རང་རྒྱལ་གྱི་ལམ་གྱི་ཁྱད་ཆོས་མི་འགྲུབ། མཐའ་བཞིའི་སྤྲོས་པ་མ་བཀག་ན་ཐེག་ཆེན་ཐུན་མོང་མ་ཡིན་པའི་ལྟ་བ་མི་འགྲུབ་པའི་ཕྱིར་རོ། །འདི་དག་ནི་བྱམས་མགོན་དང་། ཀླུ་སྒྲུབ་ཀྱི་གཞུང་ལ་སྒྲོས་ངན་གྱི་ལིང་ཐོག་གིས་མ་བཀབ་པའི་མིག་གིས་བལྟས་ན་གསལ་བར་མཐོང་བར་འགྱུར་རོ། །གཉིས་པ་མཐའ་ཕྱི་མ་གསུམ་འགོག་པའི་རིགས་པ་ལའང་སྔར་ལྟར་བཞི་ལས། དང་པོ་རིག་པ་གང་གིས་འགོག་པ་ལ་མཐའ་གཉིས་པ་འགོག་པའི་རིགས་པ་ནི། རྩ་ཤེར་ལས། དངོས་པོ་ཡོད་པ་མ་ཡིན་ན། །དངོས་མེད་གང་གི་ཡིན་པར་འགྱུར། །ཞེས་དང་། རྩོད་ཟློག་ལས། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །ཞེས་དང་། བདེན་གཉིས་ལས། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །ཞེས་དང་། རྒྱན་ལས། སྐྱེ་ལ་སོགས་པ་མེད་པའི་ཕྱིར། །སྐྱེ་བ་མེད་ལ་སོགས་མི་སྲིད། །ཅེས་སོགས་གསུངས་པ་རྣམས་སོ། །མཐའ་གསུམ་པ་འགོག་པའི་རིགས་པ་ནི། སྔར་བཤད་པའི་རིགས་པ་གཉིས་ཆར་རོ། །མཐའ་བཞི་པ་འགོག་པའི་རིགས་པ་ནི་བདེན་པར་ཡོད་པ་དང་། བདེན་པར་མེད་པ་གཉིས་ཀ་མ་ཡིན་པ་ཞིག་ཏུ་གཟུང་ན། མཐའ་གཉིས་སྤངས་པའི་དབུས་ལ་དམིགས་པའི་སྒོ་ནས་གནས་པར་འགྱུར་ལ། དེ་ལའང་དམིགས་པའི་སྒོ་ནས་གནས་པར་མི་བྱ་སྟེ། དེ་མ་གྲུབ་པའི་ཕྱིར་དང་། གལ་ཏེ་གྲུབ་ན་དེའང་མཐར་འགྱུར་བའི་ཕྱིར་ཞེས་པ་སྟེ། མདོ་ཏིང་ངེ་འཛིན་གྱི་རྒྱལ་པོ་ལས། སྟོང་དང་མི་སྟོང་འདི་ཡང་མཐའ་ཡིན་ཏེ། །གཙང་དང་མི་གཙང་འདི་ཡང་མཐའ་ཡིན་ནོ། །དེ་ལྟར་མཐའ་གཉིས་རྣམ་པར་སྤངས་ནས་ནི། །མཁས་པས་དབུས་ལའང་གནས་པར་མི་བྱའོ། །ཞེས་གསུངས་པས་སོ། །འོ་ན་མཐའ་གཉིས་སྤངས་པའི་དབུ་མ་རྟོགས་བྱར་བཤད་པ་དང་འགལ་ལོ་ཞེ་ན་རིགས་པས་དཔྱད་པའི་ཚེ་ཡོད་མེད་སོགས་ཀྱི་མཐའ་བཞི་པོ་གང་ཡང་མ་མཐོང་བ་ལ་དབུ་མ་རྟོགས་ཞེས་དང་། གནས་ལུགས་རྟོགས་ཞེས་ཐ་སྙད་བྱས་པ་ཙམ་ཡིན་གྱི་མཐའ་གཉིས་སྤངས་པའི་དབུ་མ་ཞིག་གྲུབ་ནས་དེར་གཟུང་བར་བྱར་ཡོད་པ་མ་ཡིན་ཏེ། དེ་ལྟར་བཟུང་ན་མདོ་ལས། འོད་སྲུངས་གང་ཟག་གི་བདག་ཏུ་ལྟ་བ་རི་རབ་ཙམ་ནི་སླའི་སྟོང་པ་ཉིད་དུ་ལྟ་བ་མངོན་པའི་ང་རྒྱལ་ཅན་ནི་དེ་ལྟ་མ་ཡིན་ནོ། །ཞེས་དང་། ཀླུ་སྒྲུབ་ཀྱིས་སྟོང་པ་ཉིད་ལ་མངོན་པར་ཞེན་པ་སྨད་པའི་གནས་སུ་ཡང་ཡང་གསུངས་པས་སོ། །དེ་ལྟར་ན་འཇིག་རྟེན་ཐ་མལ་པ་དང་ཁྱད་པར་མེད་པར་འགྱུར་རོ་སྙམ་ན། དེ་ནི་མ་ཡིན་ཏེ་དེ་དག་གིས་ནི་མ་བཙལ་ནས་མ་རྙེད་པ་ཡིན་ལ། འདི་ནི་བཙལ་ནས་གཟུང་བར་བྱ་བའི་ཆོས་གང་ཡང་མ་རྙེད་པ་ཡིན་པའི་ཕྱིར་ཞེས་རྗེ་བཙུན་གྲགས་པ་རྒྱལ་མཚན་གསུང་ངོ་། །དེང་སང་དབུ་མའི་ལྟ་བ་ལ་ཆོམ་ཀུན་བྱེད་པ་དག་གིས་ལྟ་བ་བསྒོམ་པའི་ཚེ་ཐོག་མར་དགག་བྱ་ངོས་གཟུང་དེ་བཀག་པའི་རྗེས་སུ་བཀག་པ་འདི་ཡིན་ནོ་ཞེས་ངོས་བཟུང་ནས་བསྒོམ་དགོས་ཏེ་དཔེར་ན་རྐུན་པོ་བཙལ་བའི་ཚེ་རྐུན་པོ་འདིའོ་ཞེས་ངོས་ཟིན་ནས་གཟུང་དགོས་པ་བཞིན་ནོ་ཞེས་པའི་དཔེ་དང་བཅས་ཏེ་སྨྲ་བ་གྲག་གོ །འདི་དག་ལ་བཀའ་དང་བསྟན་བཅོས་རྣམ་དག་ནས་སྨན་མ་ཞུ་བ་དུག་ཏུ་སོང་བ་དང་། རིགས་སྔགས་མེད་པས་དུག་སྤྲུལ་གྱི་མགོ་ནས་རིན་པོ་ཆེ་ལེན་པ་དང་། ནོར་མེད་ལ་ནོར་དུ་གཟུང་བ་དང་། མིང་མེད་ལ་མིང་དུ་གཟུང་བ་སོགས་དཔེ་དུ་མའི་སྒོ་ནས་སྨོད་པས་འཛིན་པ་ལྟ་ཅི་སྨྲོས་ཐོས་པར་གྱུར་ནའང་རྣ་བ་དགབ་བོ། །གཉིས་པ་གཞི་གང་ལ་འགོག་པ་ནི་མཐའ་དང་པོ་འགོག་པའི་གཞི་གང་ཡིན་པ་དེ་དག་སྟེ། གཞི་གང་ཡང་རུང་བ་གཅིག་ལ་མཐའ་དང་པོ་བཀག་ཟིན་ནས་ཕྱི་མ་གསུམ་དུ་མངོན་པར་ཞེན་ན་དེའང་དགག་སྟེ། མཐར་མཐའ་བཞིའི་སྤྲོས་བྲལ་དུ་བྱ་དགོས་པའི་ཕྱིར་རོ། །དཔེར་ན་ཡེ་ཤེས་སྙིང་པོ་ཀུན་ལས་བཏུས་ལས། གཉིས་མེད་ཀྱི་རྣམ་ཤེས་གཅིག་དུ་བྲལ་གྱི་རྟགས་ཀྱིས་བདེན་མེད་དུ་བསྒྲུབས་པའི་རྗེས་སུ་དེ་ཉིད་ལ་མཐའ་བཞིའི་སྤྲོས་བྲལ་གསུངས་པ་ལྟ་བུའོ། །གསུམ་པ་དགག་བྱ་གང་འགོག་པ་ནི། མཐའ་དང་པོ་བཀག་པའི་རྗེས་སུ་རྣམ་རྟོག་གིས་གང་དུ་ཞེན་པའི་ཡུལ་དེ་ཉིད་འགོག་པ་སྟེ། བཞི་བརྒྱ་པ་ལས། རྟོག་པས་མཐོང་བ་འཆིང་བ་སྟེ། །དེ་ནི་འདི་རུ་དགག་པར་བྱ། །ཞེས་དང་། རྣམ་འགྲེལ་ལས། འདི་ཡུལ་སུན་དབྱུང་མེད་པར་ནི། །དེ་སྤོང་བར་ནི་ནུས་མ་ཡིན། །ཞེས་གསུངས་པར་ལྟར་རོ། །མཐའ་བཞི་མཚན་གཞིར་བྱས་ནས་དེའི་སྟེང་དུ་བདེན་པ་འགོག་པ་ནི་མཐའ་དང་པོ་འགོག་པའི་རིགས་པ་སྟེ། རང་བཞིན་སྟོང་པ་ཉིད་ཀྱིས་སྟོང་གཞིའི་ཆོས་ཅན་ལ་བདེན་པར་འགོག་པ་བཞིན་ནོ། །བཞི་པ་དེ་ལྟར་བཀག་པའི་དགོས་པ་ནི། ཐེག་ཆེན་གྱི་བྱང་ཆུབ་ཐོབ་པ་ལ་མཚན་མེད་ཚང་བར་རྟོགས་པ་དང་། ཆོས་ཀྱི་བདག་མེད་གསལ་བ་དང་རྒྱས་པར་རྟོགས་དགོས་པས་དེའི་ཆེད་དུ་ཡིན་ཏེ། ཀླུ་སྒྲུབ་ཀྱིས། མཚན་མ་མེད་པར་མ་རྟོགས་པར། །ཁྱོད་ཀྱིས་ཐར་པ་མེད་པར་གསུངས། །དེ་ཡི་ཕྱིར་ན་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་དང་། འཇུག་འགྲེལ་ལས། ཆོས་ཀྱི་བདག་མེད་པ་གསལ་བར་བྱ་བའི་ཕྱིར་ཐེག་པ་ཆེན་པོ་བསྟན་པ་ཡང་རིགས་པ་ཉིད་དེ་རྒྱས་པར་བསྟན་པ་བརྗོད་པར་འདོད་པའི་ཕྱིར་རོ། །ཉན་ཐོས་ཀྱི་ཐེག་པ་ལས་ནི་ཆོས་ཀྱི་བདག་མེད་པ་མདོར་མཚོན་པ་ཙམ་ཞིག་ཏུ་ཟད་དོ། །ཞེས་གསུངས་པས་སོ། །གཉིས་པ་དེ་དག་འགོག་ཏུ་མི་རུང་བའི་ལོག་རྟོག་དགག་པ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་སུན་དབྱུང་བའོ། །དང་པོ་ནི། ཕྱིས་ཀྱི་དབུ་མ་པར་རློམ་པ་བསྟན་པའི་སྙིང་པོ་སྤྲོས་བྲལ་ལ་མཐའ་གཅིག་ཏུ་སྡང་བ་དག་ན་རེ། དེ་ལྟར་བདེན་པ་བཀག་ཟིན་ནས་བདེན་པ་བཀག་པའི་སྟོང་ཉིད་དེར་མངོན་པར་ཞེན་པ་ནི་དགག་ཏུ་མི་རུང་སྟེ། དེ་ཡུལ་གྱི་གནས་ལུགས་རྟོགས་པའི་བློ་ཡིན་པའི་ཕྱིར་དང་། དབུ་མའི་དགག་བྱ་ནི་བདེན་པ་ཁོ་ན་ཡིན་ལ། དེས་བདེན་པར་མ་བཟུང་བའི་ཕྱིར་དང་། སྔ་མས་བདེན་པ་བཀག་ཟིན་ནས་ཕྱི་མས་དེའང་འགོག་དགོས་ན་བློ་སྔ་མ་གནོད་བཅས་དང་། ཕྱི་མ་ཐུག་མེད་དུ་འགྱུར་བའི་ཕྱིར་རོ། །འོ་ན། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པ། །ཞེས་སོགས་ཡུལ་གྱི་གནས་ལུགས་མཐའ་བཞི་ཆར་གྱི་སྤྲོས་པ་དང་བྲལ་བ་དང་། བློས་མཐའ་བཞི་གང་དུའང་གཟུང་དུ་མི་རུང་བར་གསུངས་པ་རྣམས་དང་འགལ་ལོ་སྙམ་ན་དེའི་དོན་ནི་དོན་དམ་དུ་ཡོད་པ་ཡང་མ་ཡིན་ཀུན་རྫོབ་ཏུ་མེད་པ་ཡང་མ་ཡིན་པས་བློས་ཀྱང་དེ་ལྟར་འཛིན་དུ་མི་རུང་ཞེས་པའི་དོན་ཡིན་གྱི་ཡོད་མིན་མེད་མིན་སྒྲ་ཇི་བཞིན་དུ་ཁས་ལེན་དུ་མི་རུང་སྟེ། དགག་པ་གཉིས་ཀྱི་རྣལ་མ་གོ་བས་ཡོད་པ་མ་ཡིན་ན་མེད་དགོས་ཤིང་། མེད་པ་མ་ཡིན་ན་ཡོད་དགོས་པའི་ཕྱིར་རོ། །བློས་མཐའ་གང་དུའང་མི་འཛིན་པ་དབུ་མའི་ལྟ་བར་འདོད་པ་ནི་རྒྱ་ནག་ཧ་ཤང་གི་ལྟ་བ་དང་མཚུངས་པས་བདེན་པ་བཀག་ཟིན་ནས་བདེན་པས་སྟོང་པའི་སྟོང་ཉིད་དེ་ཁོ་ནར་གཟུང་བ་ནི་གནས་ལུགས་རྟོགས་པའི་བློ་ཡིན་ནོ། །དེ་ལྟར་བདེན་འཛིན་ལེགས་པར་ངོས་ཟིན་ན་བདག་འཛིན་གཉིས་མ་ཡིན་པའི་རྟོག་པ་དུ་མ་ཞིག་ཡོད་པ་ཤེས་པར་འགྱུར་བས་རྟོག་པས་གང་གཟུང་གི་ཡུལ་ཐམས་ཅད་དེ་ཁོ་ན་ཉིད་ལ་དཔྱོད་པའི་རིགས་པས་འགོག་པར་འདོད་པའི་ལོག་རྟོག་ཐམས་ཅད་བཟློག་པར་འགྱུར་རོ། །ཞེས་འཛེར་ཏོ། །གཉིས་པ་ནི། བདེན་པ་བཀག་ཟིན་ནས་དེ་བཀག་པའི་སྟོང་ཉིད་དུ་མངོན་པར་ཞེན་པ་དག་དགག་ཏུ་མི་རུང་བར་འདོད་པ་ནི་དབུ་མའི་གཞུང་ལུགས་ཀྱི་གནད་ཆེན་པོ་འཕྱུགས་པ་སྟེ། མདོ་སྡུད་པ་ལས། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང་། ཡུམ་བར་མ་ལས། གཟུགས་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །གཟུགས་མི་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །ཞེས་སོགས་དབུ་མའི་གཞུང་ལུགས་ཁུངས་ཐུབ་ཐམས་ཅད་ནས་སྟོང་མི་སྟོང་ལ་སོགས་པའི་གཉིས་འཛིན་ཐམས་ཅད་དགག་བྱར་གསུངས་པར་མཐུན་པའི་ཕྱིར་རོ། །བདེན་པས་སྟོང་པའི་སྟོང་པ་ཁོ་ནར་བཟུང་བ་དབུ་མའི་ལྟ་བ་མཐར་ཐུག་རྟོགས་པར་བྱས་ནས་དེ་དགག་ཏུ་མི་རུང་བ་ནི་གསང་སྔགས་ཀྱི་རྒྱུད་སྡེ་རྣམས་ལས་རྣམ་གྲངས་དུ་མས་སྨད་ཅིང་རྣལ་འབྱོར་ཆེན་པོའི་སྐབས་སུ་རྩ་ལྟུང་བཅུ་གཅིག་པར་འགྱུར་བར་གསུངས་པ་སོགས་མང་དུ་ཡོད་ཀྱང་འདིར་སྐབས་མ་ཡིན་པས་མ་སྤྲོས་སོ། །དབུ་མའི་རིགས་པས་དགག་བྱ་བདེན་པ་ཁོ་ན་ཡིན་པ་ལའང་རིགས་པས་གནོད་དེ། དེ་ལྟར་ན་མཐའ་གང་རུང་གཅིག་དང་བྲལ་ན་དབུ་མར་འགྱུར་བས་ཁྱབ་པར་ཐལ། དབུ་མའི་རིགས་པས་དགག་པར་བྱ་བའི་མཐའ་ནི་བདེན་པར་ཡོད་མེད་གཉིས་ཀྱི་ནང་ནས་བདེན་པ་ཁོ་ན་དང་ཡང་དག་པར་ཡོད་མེད་གཉིས་ཀྱི་ནང་ནས་ཡང་དག་པར་ཡོད་པ་ཁོ་ན་སོགས་ཡིན་པའི་ཕྱིར། གལ་ཏེ་མཐའ་གཉིས་སུ་བྱས་པའི་མེད་མཐའ་ནི་ཀུན་རྫོབ་ཏུ་མེད་པ་ཡིན་པས་སྐྱོན་མེད་དོ་སྙམ་ན། འོ་ན་གནས་ལུགས་དཔྱོད་པའི་རིགས་པས་དཔྱད་པའི་ཚེ་སྣང་བའི་དངོས་པོ་རྣམས་ཀུན་རྫོབ་ཏུ་ཡོད་པར་འགྱུར་ཏེ་དེའི་ཚེ་མཐའ་བཞི་ཆར་བཀག་པས་སྣང་བའི་དངོས་པོ་ཀུན་རྫོབ་ཏུ་མེད་པའང་དགག་དགོས་པའི་ཕྱིར། ཁྱབ་པ་ནི་ཁྱེད་ཅག་ཨེ་དྲན། འདོད་ན་ཅི་ལྟར་འགྱུར་སོམས་ཤིག བློ་སྔ་མ་ཡུལ་གྱི་གནས་ལུགས་རྟོགས་པས་བློ་ཕྱི་མས་དེ་དགག་ཏུ་མི་རུང་ཞེས་པའང་གནད་མ་ཟིན་པའི་བློ་ངོར་འཐད་པར་སྣང་ཡང་གནད་ཟིན་ན་འདི་ལྟར་འགྱུར་ཏེ། རིགས་པས་བདེན་པ་བཀག་ནས་བདེན་མེད་དུ་མངོན་པར་ཞེན་པའི་བློ་དེ་བདེན་པ་བཀག་པའི་ཆ་ནས་ཡུལ་གྱི་གནས་ལུགས་རྟོགས་པ་ཡིན་ཀྱང་བདེན་མེད་དུ་མངོན་པར་ཞེན་པའི་ཆ་ནས་ཕྱིན་ཅི་ལོག་ཡིན་པས་བློ་ཕྱི་མས་དགག་དགོས་ཏེ། རིགས་པས་དཔྱད་པའི་ཚེ་བདེན་འཛིན་གྱི་ཞེན་ཡུལ་བདེན་པ་མེད་པ་ལྟར་བདེན་མེད་དུ་འཛིན་པའི་ཞེན་ཡུལ་བདེན་མེད་དེའང་མེད་པར་མཚུངས་པའི་ཕྱིར་རོ། །དཔེར་ན་བདེན་བཞིའི་སྟེང་དུ་རྟག་སོགས་བཅུ་དྲུག་བཀག་པའི་ཆ་ནས་མི་རྟག་ལ་སོགས་བཅུ་དྲུག་རྟོགས་པའི་བློ་ཡུལ་གྱི་གནས་ཚུལ་རྟོགས་པར་འཇོག་ཀྱང་ཞེན་ཡུལ་མི་རྟག་ལ་སོགས་བཅུ་དྲུག་པོ་རིགས་པས་དཔྱད་པའི་ཚེ་མ་གྲུབ་པས་དེར་ཞེན་པའི་བློ་ཕྱིན་ཅི་ལོག་ཡིན་པ་བཞིན་ནོ། །དེ་ཡང་མགོན་པོ་བྱམས་པས་མི་རྟག་ལ་སོགས་བཅུ་དྲུག་ལའང་མངོན་ཞེན་འགོག་པ་དང་། བདེན་བཞིའི་སྟེང་དུ་སྤྲོས་པ་སོ་གཉིས་བཀག་ནས་བསྒོམས་པས་མཐོང་ལམ་གྱི་སྐབས་སུ་སྤྲོས་པ་སོ་གཉིས་དང་བྲལ་པའི་སྤྲོས་བྲལ་མངོན་དུ་འགྱུར་བར་གསུངས་པ་དེ་ཉིད་འདི་ལ་ཚད་མ་ཡིན་ནོ། །དེ་བཞིན་དུ་འཁོར་གསུམ་དུ་མངོན་པར་ཞེན་པའི་སྒོ་ནས་སྦྱིན་པ་གཏོང་བ་དང་ཚུལ་ཁྲིམས་བསྲུང་བ་སོགས་སེར་སྣ་དང་འཆལ་ཚུལ་གྱི་གཉེན་པོ་ཡིན་ཡང་བློ་དེ་ཉིད་གནས་ཚུལ་ལ་ལྟོས་ཏེ་ཕྱིན་ཅི་ལོག་ཡིན་པས་འཁོར་གསུམ་མི་དམིགས་པའི་བློས་སྤོང་དགོས་པ་དང་། དེ་བཞིན་གཤེགས་པ་ལ་མཚན་འཛིན་དང་བཅས་ཏེ་ཕྱག་འཚལ་བ་མ་དད་པ་སོགས་ཀྱི་གཉེན་པོ་ཡིན་ཡང་གནས་ཚུལ་ལ་ལྟོས་ཏེ་ཕྱིན་ཅི་ལོག་ཡིན་པར་གསུངས་པ་སོགས་མཐའ་ཡས་པར་ཤེས་པར་བྱའོ། །གལ་ཏེ་དེ་དག་འདིར་ཁས་མི་ལེན་ནོ། །སྙམ་ན་མགོན་པོ་བྱམས་པས་ཡུམ་དོན་དབུ་མར་འགྲེལ་པའི་བསྟན་བཅོས་དབུ་མའི་སྐབས་སུ་ཁས་མི་ལེན་པ་ནི་ཧ་ཅང་མི་འཚམ་པའི་ལོག་རྟོག་ཡིན་པས་གཞན་དུ་བཀག་ཟིན་ཅིང་དབུ་མའི་གཞུང་ལུགས་འདིར་ཡང་། གལ་ཏེ་མི་རྟག་རྟག་གོ་ཞེས། །དེ་ལྟར་འཛིན་པ་ལོག་ཡིན་ན། །སྟོང་ལ་མི་རྟག་པ་འོ་ཞེས། །འཛིན་པའང་ཇི་ལྟར་ལོག་མ་ཡིན། །ཞེས་སོགས་རྟག་མི་རྟག་སོགས་ཕྱོགས་གཉིས་ཆར་ཕྱིན་ཅི་ལོག་ཡིན་པར་གསུངས་པ་དང་། ཁྱེད་རང་གིས་ཀྱང་མི་རྟག་ལ་སོགས་བཅུ་དྲུག་མངོན་སུམ་དུ་རྟོགས་པས་གང་ཟག་གི་བདག་མེད་རྟོགས་པ་གང་ཟག་གི་བདག་མེད་མཚན་ཉིད་ཡོངས་སུ་རྫོགས་པར་མ་རྟོགས་པར་ཁས་བླངས་པ་དང་འགལ་ལོ། །བློ་སྔ་མ་གནོད་བཅས་དང་། ཕྱི་མ་ཐུག་མེད་དུ་འགྱུར་རོ་ཞེས་པའང་མ་དཔྱད་པ་སྟེ། ཇི་སྲིད་མཐའ་བཞིའི་སྤྲོས་པ་མ་ལུས་པར་མ་བཀག་གི་བར་དུ་དེར་འགྱུར་བ་ནི་འདོད་ཐོག་ཏུ་བབ་པས་གནོད་བྱེད་མ་ཡིན་ལ། མཐའ་བཞིའི་སྤྲོས་པ་བཀག་ཟིན་ནས་ནི་དེར་མི་འགྱུར་ཏེ་བློ་སྔ་མས་མཐའ་གང་དུའང་མ་བཟུང་བས་ཕྱི་མས་དགག་པར་བྱར་མེད་པའི་ཕྱིར་རོ། །ཡོད་མིན་མེད་མིན་གྱི་དོན་དོན་དམ་དུ་ཡོད་པ་མ་ཡིན། ཀུན་རྫོབ་ཏུ་མེད་པ་མ་ཡིན་ཞེས་པ་ལ་འཆད་པ་ནི་བདེན་པ་གཉིས་ཆར་ལ་ལྟོས་ནས་རྟག་ཆད་སྤང་པའི་སྐབས་འགའ་ཞིག་ཏུ་དེ་ལྟར་འཆད་དགོས་པ་ཡོད་ཀྱང་། མཐའ་བཞིའི་སྤྲོས་བྲལ་གྱི་ཚེ་དེ་ལྟར་འཆད་དུ་མི་རུང་སྟེ། མཐའ་བཞིའི་སྤྲོས་བྲལ་མཚན་ཉིད་པ་ནི་འཕགས་པའི་མཉམ་གཞག་ཟག་པ་མེད་པའི་ཡེ་ཤེས་ཀྱི་གཟིགས་ངོ་ཡིན་ལ་རྗེས་མཐུན་པ་ནི་མཐར་ཐུག་དཔྱོད་པའི་རིགས་ཤེས་བློ་ངོར་རྟོགས་དགོས་ཤིང་དེའི་ཚེ་ཆོས་ཅན་བུམ་པ་ལྟ་བུ་ཀུན་རྫོབ་ཏུ་ཡོད་པར་ཁས་བླངས་དགོས་པར་སྔར་བཤད་ཟིན་ཅིང་དེའང་ཁས་བླངས་ན་ཐལ་འགྱུར་བ་རྣམས་ཀྱིས་མྱུ་གུ་བདག་ལས་སྐྱེ་བ་མེད་པར་བསྒྲུབ་པ་ལ་རང་རྒྱུད་བྱ་མི་རིགས་པའི་ཤེས་བྱེད་དུ་དེའི་ཚེ་ཆོས་ཅན་མྱུ་གུ་ཚད་མས་གྲུབ་པ་མེད་པ་འདི་ཉིད་གཙོ་བོར་བཀོད་པ་ཚིག་གསལ་ལས་གསུངས་པ་དང་འགལ་ལོ། །ཡང་ཡོད་མིན་མེད་མིན་གྱི་དོན་ཡོད་པར་ཡང་བདེན་པར་མ་གྲུབ། མེད་པར་ཡང་བདེན་པར་མ་གྲུབ། ཅེས་སོགས་ལ་འཆད་པ་ནི་བྱིས་པ་བསླུ་བར་བྱེད་པའི་གཏམ་སྟེ། སྤྱིར་འདུས་བྱས་རབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་འགྲུབ། །ཅེས་པ་ལྟ་བུ་འདུས་བྱས་དང་འདུས་མ་བྱས་གཉིས་ཀ་དགག་གཞིར་བྱས་ནས་དེའི་སྟེང་དུ་བདེན་པ་བཀག་པའང་ཡོད་མོད་ཀྱི་ཆོས་ཅན་གཟུང་འཛིན་གཉིས་སྟོང་གི་རྣམ་ཤེས་ལྟ་བུའི་སྟེང་དུ་མཐའ་བཞིའི་སྤྲོས་པ་བཀག་པ་ཡེ་ཤེས་སྙིང་པོ་ཀུན་ལས་བཏུས་ལས་གསུངས་པས་དེའི་ཚེ་ཡོད་པ་དང་མེད་པ་སོགས་བཞི་པོ་ཆོས་ཅན་དུ་བྱས་ནས་དེའི་སྟེང་དུ་བདེན་པ་བཀག་པ་ལ་འབྲེལ་ཅི་ཡོད་སོམས་ཤིག གལ་ཏེ་དེའི་དོན་གཟུང་འཛིན་གཉིས་སྟོང་གི་རྣམ་པར་ཤེས་པ་དོན་དམ་དུ་ཡོད་པ་མ་ཡིན། ཀུན་རྫོབ་ཏུ་མེད་པ་མ་ཡིན་ཞེས་སོགས་ལ་སྦྱོར་བ་ཡིན་ནོ་སྙམ་ན། རྣམ་པར་ཤེས་པ་ཆོས་ཅན་དོན་དམ་དུ་ཡོད་པ་དང་། ཀུན་རྫོབ་ཏུ་མེད་པ་གཉིས་ཀ་ཡིན་པར་ཐལ། དེ་གཉིས་ཀ་མ་ཡིན་པ་མིན་པའི་ཕྱིར། རྟགས་འབྲུ་གནོན་གྱི་ཐོག་ཏུ་དངོས་འགལ། ཁྱབ་པ་དགག་པ་གཉིས་ཀྱི་རྣལ་མ་གོ་བ་ལ་དངོས་འགལ་ཡིན་པས་རྗེས་འབྲང་དག་ལེགས་པར་སོམས་ཤིག དབུ་མའི་ལྟ་བ་ལ་དཔྱོད་པའི་སྐབས་འདིར་དགག་པ་གཉིས་ཀྱི་རྣལ་མ་གོ་བ་འདི་ལ་འཕགས་མཆོག་ཀླུ་སྒྲུབ་ཀྱིས། ཡང་དག་ཇི་བཞིན་ཡོངས་ཤེས་པས། །མེད་དང་ཡོད་པར་མི་འདོད་པ། །དེ་ཕྱིར་མེད་པ་པར་འགྱུར་ན། །ཅི་ཕྱིར་ཡོད་པ་པར་མི་འགྱུར། །གལ་ཏེ་ཡོད་པ་སུན་ཕྱུང་བས། །དོན་གྱིས་འདི་ནི་མེད་པར་བསླན། །དེ་བཞིན་མེད་པར་སུན་ཕྱུང་བས། །ཡོད་པར་ཅི་ཡི་ཕྱིར་མི་བསླན། །ཞེས་ཆེད་དུ་གཏད་པའི་དགག་པའང་མཛད་ཅིང་། གཞན་ཡང་ཆད་མཐའ་བཀག་ན་རྟག་མཐར་འགྱུར་པ་དང་། རྟག་མཐའ་བཀག་ན་ཆད་མཐར་འགྱུར་པ་དང་། མི་རྟག་ལ་སོགས་བཅུ་དྲུག་བཀག་ན་རྟག་སོགས་བཅུ་དྲུག་ཏུ་འགྱུར་བ་དང་། རྟག་སོགས་བཅུ་དྲུག་བཀག་ན་མི་རྟག་ལ་སོགས་བཅུ་དྲུག་ཏུ་འགྱུར་བར་ཐལ་བ་སོགས་སྐྱོན་གཞལ་དུ་མེད་པ་འབབ་པས། མཐའ་གཉིས་སྤངས་པའི་དབུ་མ་དོན་དུ་གཉེར་བ་དག་གིས་བཞི་མདོའི་རྩྭ་བཞིན་དོར་བར་བྱའོ། །མཐར་ཐུག་དཔྱོད་པའི་རིགས་ཤེས་ཀྱི་ངོར་སྤྲོས་པའི་མཐའ་བཞི་བཀག་པ་ལ་རྒྱ་ནག་ཧྭ་ཤང་གི་ལྟ་བ་ཡིན་ནོ་ཞེས་སྨྲ་བ་ནི་བརྟགས་དཔྱད་མ་བྱས་པའམ། ཐབས་ལ་བསླུ་བའི་བདུད་ཀྱིས་ཆེད་དུ་གཏད་ནས་སྨྲས་པ་སྟེ། རྒྱ་ནག་ཧྭ་ཤང་གིས་ནི་གནས་ལུགས་ཀྱི་དོན་ལ་བརྟགས་དཔྱད་མི་བྱེད་པར་རྟོགས་པ་རང་དགར་བཀག་ནས་ཅིའང་ཡིད་ལ་མི་བྱེད་པ་ཙམ་ལ་ལྟ་བ་མཐར་ཐུག་རྟོགས་པར་འདོད་པ་ཡིན་ཞིང་། དེ་ཉིད་མཁས་པ་ཀ་མ་ལ་ཤཱི་ལས་ལུང་དང་རིགས་པས་སུན་ཕྱུང་བ་ཡིན་ལ་འདིར་ནི་དབུ་མའི་གཞུང་ལུགས་ལས་བཤད་པའི་རིགས་པ་རྣམས་ཀྱིས་ཡུལ་གྱི་གནས་ལུགས་གཏན་ལ་ཕབ་ནས་མཐར་འཛིན་གྱི་ཞེན་ཡུལ་རེ་རེ་ནས་སུན་ཕྱུང་སྟེ་མཐར་ཡོད་མེད་ལ་སོགས་པའི་སྤྲོས་པ་གང་ཡང་མ་རྙེད་པ་ཙམ་ལ་དབུ་མའི་ལྟ་བ་རྟོགས་ཞེས་པའི་ཐ་སྙད་མཛད་པ་ཡིན་པའི་ཕྱིར་རོ། །བདག་འཛིན་གཉིས་མ་ཡིན་པའི་རྣམ་རྟོག་ཕུང་པོ་གསུམ་པ་དུ་མ་ཡོད་ཅེས་པའི་དོན་དེ་བདེན་འཛིན་གྱི་སྒྲོ་འདོགས་ཆོད་ནས་བཏགས་ཡོད་ཙམ་དུ་མངོན་པར་ཞེན་པའི་འཁོར་གསུམ་དུ་རྣམ་པར་རྟོག་པའི་བློའམ་དགག་བྱ་བཀག་པའི་བཀག་པ་ལ་མངོན་པར་ཞེན་པའི་བློ་ལ་ཆད་དགོས་ཏེ། དེ་ལས་གཞན་པ་མི་སྲིད་པའི་ཕྱིར་རོ། །དེའང་འདོད་ན་བློ་སྔ་མ་སྤང་བྱ་མ་ཡིན་པའམ་ཡང་ན་ཞེན་ཡུལ་སུན་མ་ཕྱུང་བར་ཞེན་བྱེད་ཀྱི་བློ་སྤོང་བ་ཡོད་པར་ཁས་ལེན་དགོས་པར་འགྱུར་རོ། །བློ་ཕྱི་མ་སྤང་བྱ་མ་ཡིན་པར་ཁས་ལེན་པར་སྣང་ཡང་བདེན་གཉིས་ལས། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །ཞེས་སོགས་དང་འགལ་བས་མི་འཐད་དོ། །རྣམ་རྟོག་གིས་གང་དུ་ཞེན་པའི་ཡུལ་ཐམས་ཅད་མཐར་ཐུག་དཔྱོད་པའི་རིགས་ངོར་དགག་བྱ་མ་ཡིན་པར་འདོད་པའང་མི་འཐད་དེ། རྣམ་རྟོག་གིས་གང་དུ་ཞེན་པའི་ཡུལ་ཐམས་ཅད་མཐར་ཐུག་དཔྱོད་པའི་རིགས་པས་དཔྱད་ནས་བདེན་མེད་དུ་གཏན་ལ་དབབ་དགོས་པའི་ཕྱིར་འོ་ན་ཀུན་རྫོབ་བདེན་པའང་མཐར་ཐུག་དཔྱོད་པའི་རིགས་ངོར་དགག་བྱར་འགྱུར་རོ་ཞེ་ན་ཤིན་ཏུའང་འདོད་དེ། མཐར་ཐུག་དཔྱོད་པའི་རིགས་པས་བཙལ་བའི་ཚེ་མི་རྙེད་པའི་ཕྱིར་རོ། །དེ་ལྟ་མ་ཡིན་ན་སྣང་བའི་སྟེང་དུ་བདེན་པར་ཡོད་མེད་རྩོད་པའི་ཚེ་རྒོལ་ཕྱི་རྒོལ་གཉིས་ཀ་ལ་མཐུན་སྣང་དུ་གྲུབ་པའི་ཆོས་ཅན་སྣང་བ་ཡོད་པར་འགྱུར་ཏེ། དེའི་ཚེ་སྣང་བའི་སྟེང་དུ་བདེན་པ་ཙམ་འགོག་གི སྣང་བ་མི་འགོག་པར་ཁས་བླངས་པའི་ཕྱིར་འདོད་ན་ཐལ་འགྱུར་བའི་ལུགས་ལས་ཉམས་སོ། །གཞན་ཡང་བདག་འཛིན་གཉིས་པོ་མ་ཡིན་པའི་རྟོགས་པ་ཕུང་པོ་གསུམ་པ་དེ་དག་སྤང་བྱ་ཡིན་ནམ་མ་ཡིན། མིན་ན་སངས་རྒྱས་ཀྱི་སར་རྟོག་པ་ཡོད་པར་འགྱུར་ཞིང་། ཡིན་ན་ཞེན་ཡུལ་སུན་མ་ཕྱུང་བར་ཞེན་བྱེད་ཀྱི་བློ་སྤོང་པ་ཡོད་པར་འགྱུར་ཏེ། དེའི་ཞེན་ཡུལ་སུན་དབྱུང་དུ་མེད་པར་ཁས་བླངས་པའི་ཕྱིར། གཞན་ཡང་མཚན་འཛིན་ཡིན་ན་བདེན་འཛིན་ཡིན་པས་ཁྱབ་པར་འགྱུར་ཏེ། དེ་ཡིན་ན་བདག་འཛིན་གཉིས་པོ་གང་རུང་ཡིན་པའི་ཁྱབ། དེ་གཉིས་གང་རུང་ཡིན་ན། བདེན་འཛིན་ཡིན་པས་ཁྱབ་པར་ཁས་བླངས་པའི་ཕྱིར། འདོད་ན། ཉན་ཐོས་དགྲ་བཅོམ་པས་མཚན་འཛིན་མ་ལུས་པར་སྤངས་པར་ཐལ། འདོད་པ་གང་ཞིག བདེན་འཛིན་ཡིན་ན་ཉོན་སྒྲིབ་ཡིན་པས་ཁྱབ་པར་ཁས་བླངས་པའི་ཕྱིར། འདོད་ན་དེས་མཚན་མེད་ཚང་བར་རྟོགས་པར་ཁས་བླངས་དགོས་པས་ཡབ་སྲས་ཀྱི་གཞུང་ལས་མཚན་མེད་ཚང་བར་རྟོགས་པ་ཐེག་ཆེན་གྱི་ཁྱད་ཆོས་སུ་གསུང་པ་དང་འགལ་ལོ། །རྣམ་རྟོག་གིས་གང་དུ་ཞེན་པའི་ཡུལ་ཐམས་ཅད་དགག་བྱར་འདོད་པ་ལོག་རྟོག་ཡིན་ན་མདོ་ལས་གཟུགས་སྟོང་པ་དང་། མི་སྟོང་པར་སྤྱོད་པ་སོགས་གཉིས་འཛིན་ཐམས་ཅད་མཚན་མ་ལ་སྤྱོད་པར་གསུངས་པ་དང་། ཏིང་འཛིན་རྒྱལ་པོ་ལས། མཐའ་གཉིས་སྤངས་ནས་དབུས་ལའང་མི་གནས་པར་གསུངས་པ་དང་། མགོན་པོ་བྱམས་པས། རྣམ་པར་མངོན་ཞེན་ལ་སོགས་འགོག །ཅེས་དང་། གཟུགས་སོགས་ཕུང་པོ་སྟོང་ཉིད་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་དང་། གང་ཞིག་ཡོད་མིན་མེད་མིན་ཡོད་མེད་མ་ཡིན་ཡོད་མེད་ལས་གཞན་དུའང་། །བརྟགས་པར་མི་ནུས་ངེས་ཚིག་དང་བྲལ་སོ་སོ་རང་གི་རིག་ཞི་བ། །ཞེས་དང་། དེ་བཞིན་དུ་ཀླུ་སྒྲུབ་ཡབ་སྲས་ཀྱི་གཞུང་ལུགས་རྣམས་ལས་སྔར་དྲངས་པ་ལྟར་མཐའ་བཞིའི་སྤྲོས་བྲལ་གསུངས་པ་ཐམས་ཅད་ལོག་རྟོག་ཏུ་འགྱུར་རོ། །དེ་བཞིན་དུ་ངེས་དོན་གྱི་མདོ་སྡེ་དང་འཕགས་ཡུལ་མཁས་གྲུབ་རྣམས་ཀྱི་བསྟན་བཅོས་རྣམ་དག་རྣམས་དང་། བོད་ཀྱི་སྐྱེས་ཆེན་མཁས་ཤིང་གྲུབ་པ་བརྙེས་པ་ཐམས་ཅད་མགྲིན་གཅིག་ཏུ་རྟོགས་པས་གང་དུ་ཞེན་པའི་ཡུལ་དེ་ཉིད་དགག་བྱར་གསུངས་པའི་ལོག་རྟོག་འདི་ཧ་ཅང་རྒྱ་མ་ཆེས་སམ་ལེགས་པར་དཔྱོད་ལ་སྨྲོས་ཤིག ད་ནི་གནད་ཀྱི་དོན་བསྡུས་ཏེ་བརྟན་པར་བྱ་སྟེ། སོ་སོ་སྐྱེ་བོས་གནས་ལུགས་ལ་དཔྱོད་པའི་ཚེ་ཐོག་མར་གཅིག་དུ་བྲལ་ལ་སོགས་པའི་གཏན་ཚིགས་ཀྱིས་མཐའ་དང་པོ་བདེན་པ་བཀག་པའི་ཚེ་རིགས་ཤེས་དེའི་བྱེད་པ་ནི་བདེན་པ་བཀག་པ་དོན་ཡིན་པས་བདེན་མེད་དུ་མངོན་པར་ཞེན་པ་སྐྱོན་མ་ཡིན་ཏེ་རྟོག་པས་བདེན་པ་བཀག་པ་ལ་བདེན་མེད་དུ་མངོན་པར་ཞེན་པ་ལས་མ་འདས་པའི་ཕྱིར། བློ་ཕྱི་མ་ལ་ལྟོས་ནས་དེ་ཉིད་སྐྱོན་ཡིན་པས་ཞེན་ཡུལ་བདེན་མེད་ཉིད་མ་རྙེད་པའི་སྒོ་ནས་བདེན་མེད་དུ་ཞེན་པ་ཉིད་ཀྱང་དགག་དགོས་ཏེ། དེའི་ཚེ་བློ་དེའི་བྱེད་པ་ནི་བདེན་མེད་དུ་ཞེན་པ་བཀག་པ་ཡིན་པས་བདེན་མེད་མ་ཡིན་ནོ་སྙམ་དུ་མངོན་པར་ཞེན་པ་སྐྱོན་མ་ཡིན་པ་ནི་སྔ་མ་དང་འདྲའོ། །དེའང་བློ་གསུམ་པ་ལ་ལྟོས་ནས་སྐྱོན་དུ་སོང་བས་གསུམ་པས་བདེན་མེད་མ་ཡིན་པར་མངོན་པར་ཞེན་པའང་བཀག་ལ། དེའང་བློ་བཞི་པ་ལ་ལྟོས་ནས་སྐྱོན་དུ་སོང་བས་བཞི་པས་དེའང་བཀག་སྟེ་མདོར་ན་མཐའ་བཞི་རིམ་པ་བཞིན་དུ་འགོག་པའོ། །བཞི་པ་ཕན་ཆད་ཀྱི་འཛིན་སྟངས་མི་སྲིད་པས་ཐུག་མེད་དུ་མི་འགྱུར་རོ། །རིགས་ཤེས་དེའི་རྒྱུན་གོམས་ནས་གནས་ལུགས་མངོན་སུམ་དུ་རྟོགས་པའི་ཚེ་མཐའ་བཞི་ཆར་གྱི་སྤྲོས་པ་མི་འབྱུང་བས་གཙོ་བོའི་སྒོ་ནས་དགག་དགོས་པ་ནི་མ་ཡིན་ནོ། །ས་བདུན་པ་མན་ཆད་ཀྱི་རྗེས་ཐོབ་ཏུ་ཞེན་པ་ནམ་བྱུང་བའི་ཚེ་དགག་དགོས་པ་ནི་སྔ་མ་དང་འདྲའོ། །གཉིས་པ་ནི་གཏན་ཚིགས་ཀྱི་སྒོ་ནས་གཅིག་དུ་བྲལ་ལ་སོགས་པའི་གཏན་ཚིགས་ལྔ་ནི་གང་ལ་དཔྱད་པར་བྱ་བའི་དགག་བྱའི་སྒོ་ནས་ངོ་བོ་ལ་དཔྱོད་པ་གཅིག་དང་དུ་བྲལ། རྒྱུ་ལ་དཔྱོད་པ་རྡོ་རྗེ་གཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག གཉིས་ཀ་ལ་དཔྱོད་པ་མུ་བཞི་སྐྱེ་འགོག ཐམས་ཅད་ལ་དཔྱོད་པ་རྟེན་འབྲེལ་གྱི་གཏན་ཚིགས་ཞེས་པའི་ཐ་སྙད་མཛད་ལ། གཏན་ཚིགས་ཀྱི་སྒོ་ནས་དང་པོ་བཞི་འབྲེལ་ཟླ་མ་དམིགས་པ་དང་། ཕྱི་མ་འགལ་ཟླ་དམིགས་པའི་གཏན་ཚིགས་ཞེས་པའི་ཐ་སྙད་སྔ་རབས་པ་རྣམས་མཛད་དོ། །འོན་ཀྱང་ཕྱི་མ་འདི་ལ་བདེན་པར་ཡོད་པ་འགོག་པ་ལ་སྦྱོར་བ་དང་། ཐ་སྙད་དུ་མེད་པ་འགོག་པ་ལ་སྦྱོར་བ་གཉིས་ཡོད་པས་དང་པོ་འགལ་ཟླ་དམིགས་པ་དང་། ཕྱི་མ་རང་བཞིན་གྱི་གཏན་ཚིགས་ཡིན་པར་སེམས་སོ། །ལྔ་པོ་འདི་དག་དགག་བྱ་འགོག་ཚུལ་དང་། ཚུལ་གསུམ་སྒྲུབ་ཚུལ་རྒྱས་པར་ནི་འོག་ཆོས་ཀྱི་བདག་མེད་བསྒྲུབ་པའི་སྐབས་སུ་འཆད་པར་འགྱུར་ཞིང་། ཐལ་འགྱུར་བས་གཞན་ལ་གྲགས་ཀྱི་རྗེས་དཔག་དང་། རང་རྒྱུད་པས་རང་རྒྱུད་ཀྱི་རྟགས་སུ་འདོད་པའི་ཁྱད་པར་ནི་ཐལ་རང་གི་ཁྱད་པར་གྱི་སྐབས་སུ་འཆད་པར་འགྱུར་རོ། །འོ་ན་མཐའ་དང་པོ་འགོག་པའི་རིགས་པའི་འཐད་པའམ། སྒྲུབ་བྱེད་དམ། གཏན་ཚིགས་དེ་དག་ཐལ་བ་ཙམ་གྱིས་ཡིན་ནམ། རང་རྒྱུད་ཀྱི་ཡིན་སྙམ་ན་དེའི་ལན་དུ། གསུམ་པ་འགྲེལ་ཚུལ་གྱི་སྒོ་ནས་ཐལ་འགྱུར་དང་རང་རྒྱུད་ཀྱི་རིགས་པ་བཤད་པ་ལ་ལྔ་སྟེ། དཔྱད་གཞི་རྒྱ་གར་མཁས་པའི་གཞུང་ལས་བཤད་ཚུལ་འགོད། དེ་ལ་སྔོན་གྱི་མཁས་པ་རྣམས་དཔྱད་པ་ཇི་ལྟར་མཛད་པའི་ཚུལ། དེ་དག་འཐད་མི་འཐད་ཀྱི་ཆ་སོ་སོར་དབྱེ་བ། ཕྱིས་ཀྱི་རང་དགར་བཏགས་པའི་རྣམ་གཞག་ཞིབ་ཏུ་དགག་པ། རང་ལུགས་འཐད་པའི་ཕྱོགས་རྣམས་སྒྲུབ་བྱེད་དང་བཅས་ཏེ་བཤད་པའོ། །དང་པོ་ནི། རྩ་བ་ཤེས་རབ་ཀྱི་མཐའ་བཞིའི་སྐྱེ་བ་བཀག་པའི་དམ་བཅའ་བཞི་པོ་སྒྲུབ་པའི་རིགས་པ་ལ་ཐོགས་མར་སློབ་དཔོན་སངས་རྒྱས་བསྐྱངས་ཀྱིས་དངོས་པོ་རྣམས་བདག་ལས་སྐྱེ་བ་མེད་དེ། དེ་དག་གི་སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་དང་། ཤིན་ཏུ་ཐལ་བར་འགྱུར་བའི་ཕྱིར་རོ། །དངོས་པོ་བདག་གི་བདག་ཉིད་དུ་ཡོད་པ་རྣམས་ལ་ནི་ཡང་སྐྱེ་བ་ལ་དགོས་པ་མེད་དོ། །ཅི་སྟེ་ཡོད་ཀྱང་སྐྱེ་ན་ནམ་ཡང་མི་སྐྱེ་བར་མི་འགྱུར་རོ། །ཞེས་སོགས་ཐལ་བའི་རྣམ་གཞག་གསུངས་སོ། །དེ་ལ་སློབ་དཔོན་ལེགས་ལྡན་འབྱེད་ཀྱིས། དེ་ནི་རིགས་པ་མ་ཡིན་ཏེ། གཏན་ཚིགས་དང་དཔེ་མ་བརྗོད་པའི་ཕྱིར་དང་། གཞན་གྱིས་སྨྲས་པའི་ཉེས་པ་མ་བསལ་བའི་ཕྱིར་དང་། ཐལ་བར་འགྱུར་བའི་ཚིག་ཡིན་པའི་ཕྱིར། སྐབས་ཀྱི་དོན་ལས་བཟློག་པས་བསྒྲུབ་པར་བྱ་བ་དང་། དེའི་ཆོས་བཟློག་པའི་དོན་མངོན་པས་དངོས་པོ་རྣམས་གཞན་ལས་སྐྱེ་བར་འགྱུར་བ་དང་། སྐྱེ་བ་འབྲས་བུ་དང་བཅས་པ་ཉིད་དུ་འགྱུར་བ་དང་། སྐྱེ་བ་ཐུགས་པ་ཡོད་པར་འགྱུར་བའི་ཕྱིར་གྲུབ་པའི་མཐའ་དང་འགལ་བར་འགྱུར་རོ། །ཞེས་པའི་སྐྱོན་བརྗོད་ནས་རང་ལུགས་རང་རྒྱུད་ཀྱི་རིགས་པ་འབའ་ཞིག་གིས་བསྒྲུབ་པར་མཛད་དོ། །དེ་ལ་སློབ་དཔོན་ཟླ་བས་ཁྱོད་ཀྱིས་སྐྱོན་དེ་དག་རང་རྒྱུད་ཀྱི་གཏན་ཚིག་དང་དཔེ་མ་བརྗོད་པ་སོགས་ཀྱི་སྒོ་ནས་བརྗོད་ན་སངས་རྒྱས་བསྐྱངས་ཀྱི་ལུགས་དེ་མི་རིགས་པར་མི་འགྲུབ་སྟེ། ཐལ་བས་གཞན་གྱི་ལོག་རྟོག་བཟློག་པས་རང་རྒྱུད་དགོས་པ་མེད་པའི་ཕྱིར་དང་། གཞན་དུ་ན་རང་རྒྱུད་ཀྱིས་ཀྱང་མི་ཟློག་པས་རང་རྒྱུད་ལ་ནུས་པ་མེད་པའི་ཕྱིར་དང་། དེའི་ཚེ་ཆོས་ཅན་མཐུན་སྣང་དུ་གྲུབ་པའི་སྟེང་དུ་ཁྱད་ཆོས་ཁས་མ་བླངས་པས་རང་རྒྱུད་ཉིད་མི་འཐད་པའི་ཕྱིར། ཞེས་སོགས་ཀྱི་སྒོ་ནས་སུན་ཕྱུང་ནས་རང་ལུགས་ཐལ་བ་འབའ་ཞིག་གིས་བསྒྲུབ་པའི་གཞུང་ལུགས་འཛུགས་པར་མཛད་དེ། འདི་དག་ནི་འོག་རྡོ་རྗེ་གཟེགས་མའི་སྐབས་སུ་ཞིབ་པར་འཆད་པར་འགྱུར་བས་འདིར་མ་སྤྲོས་སོ། །འཇུག་པའི་འགྲེལ་བཤད་མཛད་པ་ཛ་ཡ་ཨ་ནནྟས་ཀྱང་འདིར་ཐལ་འགྱུར་གྱི་མཚན་ཉིད་ནི་གཞན་གྱིས་ཁས་བླངས་པའི་སྒོ་ནས་གཞན་ལ་མི་འདོད་པ་སྟོན་པ་གང་ཡིན་པ་སྟེ། དཔེར་ན་གཞན་གྱིས་དངོས་པོ་བདག་ལས་སྐྱེ་བའི་མཚན་ཉིད་ཅན་གྱི་དངོས་པོ་ཁས་ལེན་ན་མྱུ་གུ་ལ་སོགས་པ་རྣམས་མི་སྐྱེ་བར་འགྱུར་རོ། །ཞེས་མི་འདོད་པ་བརྗོད་པར་བྱེད་པ་གང་ཡིན་པ་ལྟ་བུའོ། །དེ་ལ་འགའ་ཞིག་ན་རེ། གལ་ཏེ་ཐལ་འགྱུར་གཏན་ཚིགས་སུ་འདོད་ན་ཚད་མས་གྲུབ་པ་ཡིན་ནམ། འོན་ཏེ་མ་གྲུབ་པ་ཡིན། དེ་ལ་ཕྱོགས་དང་པོ་ལྟར་ན་དེའི་ཚེ་གཉིས་ཀ་ལ་གྲུབ་པ་ཡིན་པས་གཞན་གྱིས་ཁས་བླངས་པ་ཞེས་ཇི་ལྟར་བརྗོད། ཕྱོགས་གཉིས་པ་ལྟར་ན་གཞན་གྱིས་ཁས་ལེན་པར་མི་འོས་པ་ཡིན་པས་གཞན་གྱིས་ཁས་བླངས་པ་ཞེས་ཇི་ལྟར་བརྗོད་ཅེ་ན་དེའི་ལན་ནི་ཚད་མས་གྲུབ་པ་གང་ཡིན་པ་དེ་གཉིས་ཀ་ལ་གྲུབ་པ་ཡིན་ནོ་ཞེས་པ་དེ་ཉིད་ཁོ་བོས་མི་ཤེས་ཏེ། འདི་ལྟར་རྒོལ་བས་སྒྲུབ་བྱེད་བཀོད་པའི་དུས་ན་གང་གཏན་ཚིགས་འགོད་པ་དེ་ལ་ཚད་མས་གྲུབ་པ་ཡིན་ནམ། གཞན་ལ་ཚད་མས་གྲུབ་པ་དེས་ཇི་ལྟར་ཤེས་ཏེ། གཞན་གྱི་སེམས་ཀྱི་ཁྱད་པར་མངོན་སུམ་དང་རྗེས་སུ་དཔག་པའི་ཡུལ་མ་ཡིན་པའི་ཕྱིར་རོ། །རང་ཉིད་ལའང་ཚད་མས་གྲུབ་པར་ཇི་ལྟར་ཤེས་ཏེ་འཁྲུལ་པའི་རྒྱུ་མཚན་གྱིས་དུས་རིང་མོ་ནས་བཟུང་བའི་ཕྱིར་བསླུ་བ་སྲིད་པས་སོ། །དེའི་ཕྱིར་རྒོལ་བ་དང་། ཕྱི་རྒོལ་བ་དག་གིས་ཚད་མ་ཉིད་དུ་ཁས་བླངས་པའི་སྟོབས་ཀྱིས་དངོས་པོ་ཐམས་ཅད་ཀྱིས་རང་བཞིན་ཁས་ལེན་པ་ཡིན་ནོ། །དེས་ན་གཞན་གྱིས་ཁས་བླངས་པའི་སྒོ་ནས་གཞན་གྱི་ཕྱོགས་སུན་འབྱིན་པར་རིགས་པ་ཡིན་ནོ། །གཞན་ཡང་རང་རྒྱུད་ཀྱི་གཏན་ཚིགས་ཀྱི་ཕྱོགས་ལ་ཁྱབ་པ་ཚད་མས་གྲུབ་ན་འཐད་དུ་ཆུག་ཀྱང་ཁྱབ་པ་ནི་མངོན་སུམ་དང་རྗེས་སུ་དཔག་པའི་ཚད་མས་མ་གྲུབ་པས། འཇིག་རྟེན་པ་ཁས་བླངས་པ་ཙམ་གྱི་སྒོ་ནས་ཁྱབ་པ་གྲུབ་པ་ཡིན་པས་ན་ཐལ་འགྱུར་གྱི་གཏན་ཚིགས་ཀྱིས་གཞན་གྱི་ཕྱོགས་སུན་འབྱིན་པ་ཅི་ལྟར་མི་རིགས་ཞེས་ཐལ་འགྱུར་གྱི་གཞུང་འཛུགས་པར་མཛད་དོ། །སློབ་དཔོན་ལེགས་ལྡན་འབྱེད་ཀྱི་རྗེས་སུ་དེ་ཁོ་ན་ཉིད་སྣང་བར། བསྒྲུབ་བྱའི་ཆོས་དང་རྗེས་མཐུན་པ། །རིགས་པ་ཤེས་པས་ཆོས་ཅན་དུ། །རྟག་ཏུ་བྱེད་པ་དེ་ཡི་ཕྱིར། །མཁས་པས་རང་གི་ཆོས་ཅན་སྨྲོས། །དངོས་པོ་མེད་པ་ཉིད་ཀྱི་ཆོས། །བསྒྲུབ་བྱའི་བདག་ཉིད་རྗེས་མཐུན་པའི། །དངོས་པོ་མེད་ཉིད་ཆོས་ཅན་ཡིན། །དེ་བས་འདི་མ་གྲུབ་པ་ཡིན། །ཞེས་དང་། བདེན་གཉིས་ལས། རྒོལ་བ་གཉིས་ཀའི་ཤེས་པ་ལ། །ཇི་ཙམ་སྣང་བའི་ཆ་ཡོད་པ། །དེ་ཙམ་དེ་ལ་བརྟེན་ནས་ནི། །ཆོས་ཅན་ཆོས་ལ་སོགས་པར་རྟོག །དེ་ཚེ་རྗེས་སུ་དཔག་པ་འབྱུང་། །གང་གི་ཚེ་ན་གཞན་ན་མིན། །དེ་བས་རིགས་པ་སྨྲ་བ་རྣམས། །དེ་སྐད་སྨྲ་བ་སུ་ཞིག་འགོག །ཅེས་དང་། རྒྱན་ལས། གཞུང་གིས་བསྐྱེད་པའི་བྱེ་བྲག་གི །ཆོས་ཅན་སྤངས་ནས་མཁས་པ་དང་། །བུད་མེད་བྱིས་པའི་བར་དག་ལ། །གྲགས་པར་གྱུར་པའི་དངོས་རྣམས་ལ། །བསྒྲུབ་དང་སྒྲུབ་པའི་དངོས་པོ་འདི། །མ་ལུས་ཡང་དག་འཇུག་པར་འགྱུར། །དེ་ལྟ་མིན་ན་གཞི་མ་གྲུབ། །ལ་སོགས་ལན་ནི་ཇི་སྐད་གདབ། །ཅེས་དང་། དབུ་མ་སྣང་བར། ཁོ་བོ་ཅག་ཐལ་བར་འགྱུར་བ་འབའ་ཞིག་གིས་ཆོས་ཐམས་ཅད་སྟོང་པ་ཉིད་དུ་མི་བསྒྲུབ་ཀྱི་འོན་ཀྱང་ཡང་དག་པའི་ཚད་མའི་སྟོབས་ཀྱིས་བསྒྲུབ་བོ། །དེའང་བཅོམ་ལྡན་འདས་ཀྱིས་རྗེས་སུ་གནང་བ་ཁོ་ན་ཡིན་པས། ཁོ་བོ་ཅག་ཁས་ལེན་པ་བྱེད་དོ་ཞེས་རང་རྒྱུད་ཀྱི་གཞུང་འཛུགས་པར་མཛད་དོ། །གཉིས་པ་ནི། སྔོན་གྱི་མཁས་པ་ཐལ་འགྱུར་བ་ཆེན་པོ་འགའ་ཞིག་གིས། རང་རྒྱུད་པ་ནི་རྟགས་ཀྱི་ཚུལ། རྒོལ་ཕྱི་རྒོལ་གཉིས་ཀ་ལ་དངོས་པོ་སྟོབས་ཞུགས་ཀྱི་ཚད་མས་གྲུབ་པའི་རྟགས་ཀྱིས། བསྒྲུབ་བྱ་དངོས་པོ་ལ་མཐའ་གཅིག་ཏུ་ངེས་པར་སྒྲུབ་པར་བྱེད་པ་ཡིན་ལ་ཐལ་འགྱུར་བ་ནི་ཕྱོགས་ཆོས་ཁྱབ་པ་བསལ་བ་གསུམ། ཕ་རོལ་པོས་ཁས་བླངས་པའི་རྟགས་ཀྱིས་ཕ་རོལ་པོའི་བློ་ངོར་བསྒྲུབ་བྱ་མི་བདེན་པར་ཐལ་བ་འཕེན་པ་ཡིན་ནོ། །དེ་གཉིས་གང་ཞིག་འཐད་ཅེ་ན་འདི་ལ་གཉིས་ཏེ། རང་རྒྱུད་ཀྱི་ལུགས་དགག་པ་དང་། ཐལ་འགྱུར་གྱི་ལུགས་བསྒྲུབ་པའོ། །དང་པོ་ལ་གསུམ་སྟེ། འདི་ལྟར་དབུ་མ་པ་ལ་རང་གི་འདོད་པ་སྒྲུབ་པའི་རྟགས་རང་ལ་གྲུབ་པ་ཅན་གྱི་རང་རྒྱུད་མི་འཐད་དེ། རང་རྒྱུད་མི་དགོས་པ་དང་། མི་ནུས་པ་དང་། མི་འཐད་པའི་ཕྱིར་རོ། །དང་པོ་ནི། ཕ་རོལ་པོ་ཉིད་ཀྱིས་ཁས་བླངས་པའི་རྟགས་ལས་དེ་དང་བརྒྱུད་ནས་འགལ་པའི་ཕ་རོལ་པོའི་ལོག་རྟོག་སེལ་ནུས་པས་རང་རྒྱུད་མི་དགོས་སོ། །གཉིས་པ་ནི། ཁས་བླངས་དང་འགལ་བ་བསྟན་ཡང་ལོག་རྟོག་མི་འདོར་ན་རང་རྒྱུད་ཀྱིས་ཀྱང་སུན་འབྱིན་མི་ནུས་ཏེ། ཁོ་བོ་ཅག་ནི་སྨྱོན་པ་དང་ལྷན་ཅིག་རྩོད་པའང་མ་ཡིན་ནོ། །གསུམ་པ་ནི་དབུ་མ་པ་ཡིན་ན་རང་གི་རྒྱུད་ཀྱི་རྗེས་སུ་དཔག་པ་བྱ་བར་རིགས་པ་མ་ཡིན་ཏེ། དེ་ལ་རྒྱུ་མཚན་གསུམ། རང་འདོད་ཀྱི་དམ་བཅའ་མེད་པ་དང་། དཔྱད་བཟོད་ཀྱི་ཚད་མ་མེད་པ་དང་། ཆོས་ཅན་ལ་མཐུན་སྣང་མེད་པའོ། །དང་པོ་ནི་འོག་ཏུ་འཆད། གཉིས་པ་ནི། གལ་ཏེ་ཁྱོད་ཀྱི་དོན་དེ་རྣམས། །ཚད་མ་ཉིད་ཀྱིས་རབ་བསྒྲུབས་ན། །ཁྱོད་ཀྱིས་ཚད་མ་དེ་རྣམས་ནི། །ཇི་ལྟར་རབ་ཏུ་གྲུབ་པ་སྨྲོས། །ཞེས་གསུངས་པ་ཡིན་ཏེ། འདིའང་འོག་ཏུ་ཡོད་ངེས་ཀྱི་སྒྲུབ་བྱེད་ཚད་མ་དགག་པའི་སྐབས་ལས་ཤེས་པར་བྱའོ། །གསུམ་པ་ནི་མིག་སོགས་ནང་གི་སྐྱེ་མཆེད་ལྟ་བུ་དོན་དམ་པ་རང་ལ་མ་གྲུབ་ཅིང་ཀུན་རྫོབ་པ་གཞན་ལ་མ་གྲུབ། ཙམ་པོ་ཐུན་མོང་དུ་མ་གྲུབ་པའི་ཕྱིར་རོ། །རྟགས་ཕྱི་མ་མ་གྲུབ་སྟེ། སྒྲ་རྟག་མི་རྟག་རྩོད་པའི་ཚེ་ནམ་མཁའི་ཡོན་ཏན་གྱི་སྒྲ་ནང་པ་སངས་རྒྱས་པ་ལ་མ་གྲུབ་འབྱུང་བ་ལས་གྱུར་པའི་སྒྲ་ཕྱི་རོལ་མུ་སྟེགས་བྱེད་ལ་མ་གྲུབ་ཀྱང་སྒྲ་ཙམ་མཐུན་སྣང་དུ་གྲུབ་པ་དེ་བཞིན་དུ་འདིར་ཡང་དོན་དམ་དང་ཀུན་རྫོབ་ཀྱི་ཁྱད་པར་དུ་བྱས་པ་མ་གྲུབ་ཀྱང་མིག་སོགས་ནང་གི་སྐྱེ་མཆེད་ཙམ་པོ་མཐུན་སྣང་དུ་གྲུབ་པའི་ཕྱིར་རོ། །ཞེ་ན་དངོས་པོར་སྨྲ་བ་རྣམས་སྒྲ་ལ་སོགས་པའི་ཆོས་ཅན། དངོས་པོ་བ་གྲུབ་པར་འདོད་པས་དེའི་ལུགས་ལ་དེ་ལྟར་མི་འགལ་ཡང་དབུ་མ་པས་ནི་དེ་ལྟ་བུའི་ཆོས་ཅན་དངོས་པོ་བ་གྲུབ་པར་མི་འདོད་པས་གཞི་ཆོས་ཅན་མི་འགྲུབ་པས་སོ། །དོན་འདི་ནི་སློབ་དཔོན་ལེགས་ལྡན་འབྱེད་ཉིད་ཀྱིས་ཞལ་གྱིས་བཞེས་པར་གསུངས་ཏེ། ཚིག་གསལ་ལས། གང་གི་ཚེ་སྐྱེ་བ་བཀག་པ་བསྒྲུབ་བྱའི་ཆོས་སུ་འདོད་པ་དེའི་ཚེ་དེ་ཁོ་ནར་དེའི་རྟེན་ཆོས་ཅན་ཕྱིན་ཅི་ལོག་ཙམ་གྱིས་བདག་གི་དངོས་པོ་རྙེད་པ་ནི་ཉམས་པར་འགྱུར་བར་འདིས་རང་ཉིད་ཀྱིས་ཁས་བླངས་པ་ཉིད་དོ། །ཞེས་གསུངས་པས་སོ། །དེས་ན་དབུ་མ་པ་ལ་ཚུལ་གསུམ་དངོས་པོ་སྟོབས་ཞུགས་ཀྱི་ཚད་མས་གྲུབ་པའི་གཏན་ཚིགས་ཀྱིས་བསྒྲུབ་བྱ་དངོས་པོ་ལ་མཐའ་གཅིག་ཏུ་ངེས་པ་སྒྲུབ་པའི་རང་རྒྱུད་ཀྱི་རྟགས་མི་འཐད་པར་གྲུབ་བོ། །གཉིས་པ་ཐལ་འགྱུར་པའི་ལུགས་བསྒྲུབ་པ་ནི་དེ་ཁོ་ན་ཉིད་གཏན་ལ་འབེབས་པའི་ཚེ་རང་རྒྱུད་ཀྱི་རྟགས་མི་འཐད་པར་ཐལ་བ་ཙམ་འབའ་ཞིག་བྱ་བར་རིགས་ཏེ། དབུ་མ་པ་རང་ཉིད་ལ་ཞེ་འདོད་ཀྱི་ཁས་ལེན་ཅུང་ཟད་ཀྱང་མེད་པའི་ཕྱིར་ཏེ། དེའི་རྒྱུ་མཚན་ཡང་། གཟིགས་པ་དག་པའི་ཡེ་ཤེས་ཀྱི་གཟིགས་ངོའམ་མཐར་ཐུག་དཔྱོད་པའི་རིགས་ཤེས་ཀྱི་ངོར་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ལ་ཡོད་པའམ་མེད་པ། དགག་པའམ་སྒྲུབ་པ། བདེན་པའམ་མི་བདེན་པ་རང་བཞིན་པ་བདེན་པ་གཉིས་ཆར་དུའང་མ་གྲུབ་པ་སྟེ་མདོ་ལས། གཟུགས་རྟག་ཅེས་བྱ་བའམ་མི་རྟག་ཅེས་བྱ་བར་སྤྱོད་ན་མཚན་མ་ལ་སྤྱོད་ཀྱི་ཤེར་ཕྱིན་ལ་མི་སྤྱོད་ཞེས་སོགས་མང་དུ་གསུངས་པ་བཞིན་ནོ། །ཡང་ན་ཀུན་རྫོབ་རིགས་པས་མི་འགྲུབ་པ་དང་། །དོན་དམ་སྨྲ་བསམ་བརྗོད་ལས་འདས་པའི་ཕྱིར་ཏེ། །བདེན་པ་གཉིས་སུའང་རང་བཞིན་མེད་པའི་ཕྱིར། །དེ་དག་རྟག་པ་མ་ཡིན་ཆད་པ་མིན། །ཞེས་གསུངས་སོ། །དོན་དེ་ལ་དགོངས་ནས་ཀླུས་ཀྱང་། རྩོད་མེད་ཆེ་བའི་བདག་ཉིད་ཅན། །གང་རྣམས་ལ་ནི་ཕྱོགས་ཉིད་མེད། །གང་ལ་རང་ཕྱོགས་ཡོད་མིན་པ། །དེ་ལ་གཞན་ཕྱོགས་ག་ལ་ཡོད། །ཅེས་དང་། གལ་ཏེ་ངས་དམ་བཅས་འགའ་ཡོད། །དེས་ན་ང་ལ་སྐྱོན་དེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་དང་། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །དེ་ཕྱིར་འགོག་པར་བྱེད་དོ་ཞེས། །སྐུར་བ་དེ་ནི་ཁྱོད་ཀྱིས་བཏབ། །ཅེས་གསུངས་ཤིང་། ལྷས་ཀྱང་། ཡོད་དང་མེད་དང་ཡོད་མེད་ཅེས། །ཕྱོགས་ནི་གང་ལ་ཡོད་མིན་པ། །དེ་ལ་ཡུན་ནི་རིང་པོ་ནའང་། །ཀླན་ཀ་བརྗོད་པར་ནུས་མ་ཡིན། །ཞེས་དང་། གང་གི་ཕྱོགས་ལ་ཡོད་པ་དང་། །མེད་དང་ཡོད་མེད་མི་སྒྲུབ་པ། །དེ་ལ་ནན་ཏན་ལྡན་པས་ཀྱང་། །ཅིར་ཡང་ཀླན་ཀ་བྱར་མི་ནུས། །ཞེས་དང་ཟླ་བའི་ཞབས་ཀྱིས་ཀྱང་། དབུ་མ་པ་ཡིན་ན་ནི་རང་གི་རྒྱུད་ཀྱི་རྗེས་སུ་དཔག་པར་བྱ་བར་རིགས་པ་མ་ཡིན་ཏེ། ཕྱོགས་གཞན་ཁས་བླངས་པ་མེད་པའི་ཕྱིར་རོ། །ཞེས་དང་། ཐལ་བར་འགྱུར་བ་བཟློག་པའི་དོན་དང་ཡང་ཕ་རོལ་པོ་ཉིད་འབྲེལ་པ་ཡིན་གྱི་ཁོ་བོ་ཅག་ནི་མ་ཡིན་ཏེ། རང་ལ་དམ་བཅའ་བ་མེད་པའི་ཕྱིར་རོ། །ཞེས་གསུངས་པས་རང་ལ་ཞེ་འདོད་ཀྱི་དམ་བཅའ་ཁས་ལེན་པ་མེད་པ་ལ་དེ་སྒྲུབ་པའི་རང་རྒྱུད་ཀྱི་རྟགས་ཤེས་བྱ་ལ་མི་འཐད་པ་ཡིན་ནོ། །དེས་ན་ཐལ་འགྱུར་གྱི་བྱེད་པས་ཀྱང་ཕ་རོལ་པོའི་ལོག་པར་རྟོག་པའི་དམ་བཅའ་འགོག་པ་ཙམ་ཡིན་གྱི། རང་གི་འདོད་པ་བསྒྲུབ་པ་ནི་མ་ཡིན་ཏེ། ཚིག་གསལ་ལས་ཐལ་བ་སྒྲུབ་པ་ནི་ཕ་རོལ་པོའི་དམ་བཅའ་བ་འགོག་པ་ཙམ་གྱི་འབྲས་བུ་ཅན་ཡིན་པའི་ཕྱིར་ཐལ་བ་ལས་ཟློག་པའི་དོན་ཅན་དུ་འགྱུར་བ་ཡོད་པ་མ་ཡིན་ཞེས་དང་། ཐལ་བ་སྒྲུབ་པ་ཁོ་ནའི་སྒོ་ནས་གཞན་གྱི་ཕྱོགས་སེལ་བར་མཛད་ཅེས་གསུངས་པས་སོ། །དེས་ན་དབུ་མ་པ་ལ་རང་འདོད་པའི་བསྒྲུབ་བྱ་མེད་པས་དང་། ཆོས་ཅན་ལ་མཐུན་སྣང་མེད་པས་རང་རྒྱུད་ཀྱི་རྟགས་མི་འཐད་ཅིང་གཞན་གྱི་འདོད་པ་འགོག་པ་ནི་ཕ་རོལ་པོ་ཉིད་ཀྱིས་ཁས་བླངས་པའི་རྟགས་ལས་དེ་དང་བརྒྱུད་ནས་འགལ་བའི་ཕ་རོལ་པོའི་འདོད་པ་འགོག་པ་ཐལ་འགྱུར་བའི་ལུགས་འདི་ཉིད་རིགས་པ་ཡིན་ནོ། །ཞེས་གསུངས་སོ། །སྔོན་གྱི་མཁས་པ་ཀླུ་མེས་ལ་སོགས་པའི་གསུང་ནས་དེ་ཐལ་འགྱུར་བའི་ལུགས་ཡིན་ཀྱང་རང་ལ་དམ་བཅའ་མེད་པ་དང་། ཆོས་ཅན་ལ་མཐུན་སྣང་མེད་པར་འདོད་པ་དེ་མི་རིགས་པ་ལས་དང་པོ་ནི་ཁྱེད་ས་ཕྱོགས་དག་པ་ན་བུམ་པ་མེད་པར་འདོད་དམ་མི་འདོད། མི་འདོད་ན་གཞན་གྱི་འདོད་པ་བཀག་པ་དག་ཀྱང་མེད་དོ། །དེ་འདོད་ན་གཞན་གྱིས་བཏགས་པའི་བདག་ལ་སོགས་མ་གྲུབ་པ་དགག་པའི་དམ་བཅའང་ཅི་སྟེ་མི་མཛད། དེ་ཁོ་ན་བདག་གིས་དབེན་པ་ལ་སོགས་པའི་བསྒྲུབ་བྱ་མེད་དེ། དེ་ཁོ་ན་དགག་བྱ་མེད་པས་བཀག་པའང་མེད་དོ་ཞེ་ན་དེ་ཁོ་ནར་དམ་བཅའ་བ་གཞན་སུ་འདོད། ཐ་སྙད་དུ་སྐྱེ་བ་མེད་པ་ལ་སོགས་པའི་དམ་བཅའ་ཡོད་པ་ཉིད་སློབ་དཔོན་གྱིས། བུ་རམ་རང་བཞིན་མངར་བ་དང་། །མེ་ཡི་རང་བཞིན་ཚ་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་འདོད། །ཅེས་དང་། མ་རིག་ནས་བརྩམས་རྒ་ཤིའི་བར། །རྟེན་འབྲེལ་ཡན་ལག་བཅུ་གཉིས་ཀྱི། །རྟེན་ནས་འབྱུང་བའི་བྱ་བ་ནི། །ཁོ་བོས་རྨི་ལམ་སྒྱུ་འདྲར་འདོད། །ཅེས་གསུངས་སོ། །གཞན་ཡང་རང་བཞིན་གྱིས་དབེན་པའི་བསྒྲུབ་བྱ་ཡོད་ཀྱང་ཁས་མི་ལེན་ནམ། མེད་ནས་ཁས་མི་ལེན་གྲང་། སྔ་མ་ལྟར་ན་འགལ་བ་ཁས་ལེན་ཀྱང་གཞན་གྱི་འདོད་པའང་མི་འགོག་པར་མི་འགྱུར་རོ། །འགལ་བ་བསྟན་པས་གང་ཡང་རུང་བ་ཁས་ལེན་དུ་མི་བཏུབ་པར་གོ་ཞེ་ན་རང་བཞིན་མེད་པས་དེ་བཀག་པ་བསྒྲུབ་བྱར་གྲུབ་བོ། །དེ་ལྟ་བུའི་བསྒྲུབ་བྱ་མེད་ནས་ཁས་མི་ལེན་ན་འགལ་བ་གནས་པ་ཉིད་ཀྱང་མེད་དོ་ཚིག་ཏུ་བརྗོད་པས་གྲུབ་བོ་ཞེ་ན་རང་བཞིན་བཀག་པ་ཉིད་ལ་བསྒྲུབ་བྱའི་མཚན་ཉིད་གནས་པ་སྟེ། ཕྱིར་རྒོལ་བས་གྲུབ་པ་མི་སྣང་ཞིང་ལྡོག་པ་གྲུབ་པའི་བསལ་བའང་མེད་ལ་རྒོལ་བ་དབུ་མ་པས་དེ་ལྟར་གཞན་ལ་བསྒྲུབ་པར་འདོད་པ་བསལ་ལོ། །ཆོས་ཅན་དང་རྟགས་དབུ་མ་པ་ཉིད་ལ་གྲུབ་པ་མེད་ན་འགལ་བ་སྨྲ་བ་པོའི་གང་ཟག་འགལ་བ་གནས་པ་ཉིད་ཀྱང་དབུ་མ་པ་ལ་མ་གྲུབ་པས་གཞན་ལ་ཐལ་འགྱུར་མི་བརྗོད་པར་འགྱུར་རོ། །ཕ་རོལ་དངོས་པོར་སྨྲ་བ་ནི་འགལ་བ་སྨྲ་བ་པོ་ཡིན་ལ་དེ་དག་འབྲས་བུ་ཡེ་ནས་ཡོད་པ་སྐྱེ་བར་སྨྲ་བ་ཐོས་པས་གྲུབ་བོ་ཞེ་ན་གཟུགས་ལ་སོགས་པ་ཆོས་ཅན་ཡིན་ལ་དེ་ལ་བརྟེན་ནས་འབྱུང་བའི་རྟགས་ཉིད་ཀྱང་དབུ་མ་པ་ལ་ཅིའི་ཕྱིར་མ་གྲུབ། དེ་དག་འཁྲུལ་པའི་ངོར་གྲུབ་ཀྱི་དེ་ཙམ་གྲུབ་པས་དེ་ཁོ་ན་དཔྱོད་པའི་ཆོས་ཅན་མི་རུང་ཞེ་ན་འོ་ན་འགལ་བར་སྨྲ་བ་པོའང་འཁྲུལ་པའི་ངོར་གྲུབ་པ་ཉིད་དོ། །གཞན་ཡང་ཆོས་དངོས་པོ་བསྒྲུབ་པ་ལ་གཞི་དངོས་པོ་དགོས་ཀྱི་ཆོས་དངོས་པོ་བཀག་པ་ཙམ་བྱེད་པ་ལ་གཞི་དངོས་པོར་གྲུབ་པ་མི་དགོས་ཏེ་རྣམ་པར་བརྟགས་པས་ཀྱང་ཆོག་གོ །དེ་ལ་བདག་བཀག་པའི་ཆོས་རྟེན་ཅིང་སྒྲུབ་ནུས་པའི་ཕྱིར་ཏེ། རིགས་པའི་དབང་ཕྱུག་གིས། ཡོད་མེད་གཉིས་ཀ་ལ་བརྟེན་པའི། །སྒྲ་དོན་ཆོས་ནི་རྣམ་པ་གསུམ། །དེ་དངོས་ཉེར་ལེན་མེད་པ་ཅན། །སྒྲུབ་ལ་དེ་མི་དམིགས་པ་ནི། །དེ་ལྟར་གཏན་ཚིགས་དེ་ཉིད་ནི། །མེད་པ་མ་ཡིན་སྒྲ་སྦྱོར་ཕྱིར། །ཞེས་བཤད་དོ། །གཞན་ཡང་། དཔེར་ན་མཁའ་སོགས་གཞན་དག་གིས། །སྔོན་མེད་རང་བཞིན་བསྐྱེད་མེད་མིན། །གཅིག་ཅར་སྒྲ་སོགས་རྒྱུ་མིན་ཕྱིར། །ཞེས་བཤད་པ་ལ་སུན་འབྱིན་པ། དེ་བཞིན་མཁའ་སོགས་ཆོས་ཅན་གྱི། །ངོ་བོའང་དངོས་མེད་ཅེས་བརྗོད་བཞིན། །དེ་ལྟར་འདོད་པའི་བསྒྲུབ་བྱ་ལ། །གནོད་པ་འགའ་ཡང་མེད་པ་ཉིད། །འདིས་ནི་གཉིས་ཀ་བསྒྲུབ་བྱ་ཉིད། །ཡིན་ན་ཆོས་ཅན་ལ་གནོད་གང་། །སྒྲུབ་པར་བྱ་བའི་ཆོས་འགོག་པས། །དེ་ལ་གནོད་ཅེས་བསྟན་པ་ཡིན། །ཞེས་བཤད་དེ། གཞི་དངོས་པོ་ཡིན་པར་དགག་པས་ཆོས་ཅན་འགོག་པར་འགྱུར་པའི་རྒོལ་བ་དང་། ཆོས་དགག་པ་ཙམ་སྒྲུབ་པ་ལ་གཞི་དངོས་པོར་མ་གྲུབ་པ་སྐྱོན་མེད་པའི་ཚུལ་བཤད་དོ། །དེས་ན་གྲགས་པའི་ཆོས་ཅན་ལ་རང་རྒྱུད་སྦྱོར་བ་ཡིན་ལ་གཙོ་བོ་ལ་སོགས་པ་མི་སྲིད་པའི་ཆོས་ཅན་ལ་ཐལ་འགྱུར་སྦྱོར་བ་ཡིན་ནོ། །དེ་ལྟར་ནའང་ཆོས་ཅན་ལ་མཐུན་པར་སྣང་བ་མེད་པས། དེ་ལ་ལྟ་བ་མི་འགྲུབ་སྟེ། གཞན་དག་གཟུགས་ལ་སོགས་པ་དངོས་པོར་གྱུར་པ་རང་བཞིན་པར་འདོད་ལ་དབུ་མ་པ་ནི་གཟུགས་ལ་སོགས་པ་སྒྱུ་མ་ལྟ་བུར་འདོད་དོ་ཞེ་ན། ཁོ་བོ་ཅག་ནི་རྟག་པ་དང་སྣང་བ་གཉིས་ཀ་ལ་མཐུན་སྣང་ཡོད་པར་མི་འདོད་ཀྱི་སྣང་བ་ཉིད་ལ་མཐུན་པར་སྣང་བ་ཡིན་ནོ། །གཟུགས་ལ་སོགས་པ་བརྟན་པར་གྱུར་པ་སྣང་བ་ནི་དངོས་པོར་སྨྲ་བ་ཉིད་ལའང་མི་འགྲུབ་པ་རང་གི་རློམ་པ་ཙམ་མོ། །དཔེར་ན་ཉེ་བར་ལེན་པའི་ཕུང་པོ་ལ་བདག་ཏུ་གཟུང་བའི་ཚེ་བདག་ནི་བདག་ཏུ་འཛིན་པ་པོ་ཉིད་ལའང་སྣང་བ་མེད་དོ། །གལ་ཏེ་ཡོད་ན་དགག་པར་མི་ནུས་ཏེ། སྣང་བའི་དངོས་པོ་གང་ཡིན་པ། །དེ་ནི་འགོག་པ་མ་ཡིན་ཉིད། །ཉམས་སུ་མྱོང་བ་གང་ཉིད་པ། །དགག་པར་ནུས་པ་མ་ཡིན་ནོ། །ཞེས་བཤད་པས་སོ། །ཕྱི་རྒོལ་བས་སྒྲ་རྟག་པར་གཟུང་བས་དེ་ལྟར་མི་འདོད་པ་དང་། གཉིས་སུ་སྣང་བ་ཙམ་ལ་མཐུན་པར་སྣང་བ་མེད་དམ་ཅི། སྒྲ་ནམ་མཁའི་ཡོན་ཏན་དང་འབྱུང་བ་ལས་གྱུར་པར་འདོད་པས་སྒྲ་ཙམ་ལ་མཐུན་པར་སྣང་བ་མེད་དམ། རབ་རིབ་ཅན་གཉིས་ལ་ཟླ་བ་གཉིས་མཐུན་པར་སྣང་བ་ལྟ་བུར་གྲུབ་པས་དེ་ཁོ་ནར་དཔྱོད་པའི་ཆོས་ཅན་དུ་མི་འགྲུབ་བོ་ཞེ་ན་དེ་ལྟ་ཡིན་དུ་ཆུག་ཀྱང་ཆོས་དགག་པ་བསྒྲུབ་པ་ལ་གཞི་དངོས་པོར་མ་གྲུབ་ཅིང་རྟག་པ་ཡིན་ཀྱང་སྐྱོན་མ་ཡིན་པའི་ཚུལ་བཤད་ཟིན་ཏེ། དབུ་མ་པ་ལ་སྣང་བ་དེ་གཞན་དག་ལ་སྣང་བར་མི་འགྲུབ་སྟེ། རྒྱུ་མཚན་གང་གིས་གྲུབ་ཅེ་ན་ཁས་ལེན་པར་ཡང་ཅིས་གྲུབ། གཞན་དག་སྨྲ་བས་སོ་ཞེ་ན་གཞན་དག་ཀྱང་འོ་སྐོལ་ལ་སྣང་བ་དང་མཐུན་པའི་འཇུག་པ་དང་ལྡོག་པ་བྱེད་ལ་ཚིག་ཏུའང་བརྗོད་པས་སོ། །གཞན་ཡང་སློབ་དཔོན་རིགས་པའི་དབང་ཕྱུག་ཆ་པའི་ཞལ་སྔ་ནས་ཆོས་ཅན་དེ་ལྟ་བུ་ཁས་བླངས་ནས་རྣམ་པར་དཔྱོད་པ་མ་ཡིན་གྱི་རྣམ་པར་དཔྱད་ནས་ཁས་ལེན་པ་ཡིན་ནོ། །རྣམ་པར་དཔྱོད་ནས་བདེན་པ་ཞིག་ན་ཁས་ལེན་པ་ཡིན་པས། རྣམ་པར་དཔྱོད་པ་དེ་ཉིད་ཁས་ལེན་པའི་ཐབས་ཡིན་ནོ། །ཐབས་ལ་འཇུག་པའི་ཚེ་ཐབས་ལས་བྱུང་བ་ཁས་བླང་པར་ནི་མ་གྲུབ་བོ། །དེ་བས་རྣམ་པར་དཔྱོད་པའི་དུས་ན་དབུ་མའི་གྲུབ་མཐའ་ཁས་བླང་བ་མེད་དོ། །དཔྱད་ནས་དེའི་འོག་ཏུ་ཁས་ལེན་པ་ཡིན་པས་སོ། །དེ་བས་ན་སྒྱུ་མ་ལྟ་བུའི་ཆོས་ཅན་ཞེས་ཀྱང་གྲུབ་པ་མེད། གཞན་དག་དངོས་པོར་སྨྲ་བའི་ལུགས་ཀྱང་ཁས་བླང་བ་མེད་དེ། དེ་ལ་དཔྱོད་པ་ཡིན་པས་སོ། །དེས་ན་བདེན་པའི་གཟུགས་ལ་སོགས་པའང་གྲུབ་པ་མེད་དོ། །མཁས་པ་ནས་བ་ལང་རྫིའི་བར་ལ་གྲགས་པའི་གཟུགས་ལ་སོགས་པ་ཁྱད་པར་དུ་བརྟགས་པ་དང་བྲལ་བ་ཆོས་ཅན་དུ་འཇོག་ཏེ། དེ་སྐད་དུ་སློབ་དཔོན་ཡེ་ཤེས་སྙིང་པོས། རྒོལ་བ་གཉིས་ཀའི་ཤེས་པ་ལ། །ཞེས་སོགས་དང་། མཁན་ཆེན་ཞི་བ་འཚོས་ཀྱང་། གཞུང་གིས་བསྐྱེད་པའི་བྱེ་བྲག་གིས། །ཞེས་སོགས་དང་དེའི་འགྲེལ་པར་ཡང་། དེ་ལྟ་མིན་ན་དུ་བ་དང་ཡོད་པ་ལ་སོགས་པས་མེ་དང་མི་རྟག་པ་ལ་སོགས་པ་བསྒྲུབ་པར་འདོད་པ་ཐམས་ཅད་ཀྱང་གཏན་ཚིགས་གཞི་གྲུབ་པར་མི་འགྱུར་ཏེ། སྒྲུབ་པའི་ཆོས་ཡན་ལག་ཅན་དང་། ནམ་མཁའི་ཡོན་ཏན་ལ་སོགས་པ་ངོ་བོ་རྣམས་མ་གྲུབ་པའི་ཕྱིར་ཞེས་པ་བཤད་དོ། །གཞན་ཡང་གཟུགས་ལ་སོགས་པའི་ཆོས་ཅན་མཐུན་པར་གྲུབ་པ་མེད་ན། འགལ་བ་ཁས་ལེན་པ་ཉིད་ལའང་མཐུན་པར་གྲུབ་པ་མེད་དེ། ཕ་རོལ་པོས་ཀྱང་འགལ་བ་ཁས་བླངས་ན་འགོག་པ་པོས་ཀྱང་དེ་ལྟར་འགལ་བར་སྨྲ་བ་རྟོགས་ནས་ཐལ་བ་བརྗོད་པ་མ་ཡིན་ནམ། མི་སྙོན་པས་གྲུབ་བོ་ཞེས་ན། གཟུགས་ལ་སོགས་པའང་རང་གིས་མཐོང་བ་ཇི་ལྟ་བའི་འཇུག་ལྡོག་བྱེད་པར་གྲུབ་པའི་ཕྱིར་རོ། །མཐུན་པར་སྣང་བ་གཏན་མེད་ན་འཆད་པ་པོས་ཀྱང་ཉན་པ་པོ་ལ་བཤད་པ་དོན་མེད་དེ། རང་གི་བསམ་པ་ཉན་པ་པོས་གཏན་མི་རྟོག་པའི་ཕྱིར་རོ། །དེ་ལྟ་བས་ན་ཐ་སྙད་དུ་རང་ལ་དམ་བཅའ་མེད་པ་མིན་ལ་དེ་སྒྲུབ་པའི་རྟགས་ཀྱང་རང་ལ་གྲུབ་པ་ཡོད་པ་ཉིད་དེ། རང་ལ་གྲུབ་པ་མེད་པར་གཞན་གྱིས་ལོག་ཤེས་ཀྱིས་ཁས་བླངས་པས་རང་གི་འདོད་པ་མི་འགྲུབ་སྟེ། དོན་དང་འབྲེལ་པ་མེད་པས་སོ། །གཞན་གྱི་འདོད་པ། གཞན་ལ་དེ་ལྟར་མིན་པར་བརྗོད་པ་བཞིན་དུ་རང་ཉིད་ཀྱང་རྟེན་ནས་འབྱུང་བ་དང་། རང་བཞིན་འགལ་བ་ཅི་སྟེ་མི་འདོད། ཇི་ལྟར་ཁས་བླངས་འགལ་བ་ཡོད་པ་ལྟར་ཤེས་བྱ་འགལ་བ་ཡང་ཅི་སྟེ་མེད། ངེད་ཤེས་བྱ་ཉིད་ཀྱང་མི་འདོད་དོ་ཞེ་ན། ངེད་ཁས་བླངས་པ་ཉིད་ཀྱང་མི་འདོད་དོ། །དེས་ན་སློབ་དཔོན་གྱིས་དམ་བཅའ་མེད་པར་གསུངས་པ་ནི་དེ་ཁོ་ནར་ཡིན་གྱི་ཐ་སྙད་དུ་དགག་པའི་དམ་བཅའ་སེལ་བ་མ་ཡིན་ནོ། །དེས་ན་ཐལ་བ་ཙམ་གྱིས་དགོས་པར་སྒྲུབ་མི་ནུས་པས། རང་གི་འདོད་པ་བསྒྲུབ་པ་ལ་ནི་རང་རྒྱུད་ཡིན་ལ་གཞན་སུན་འབྱིན་པའི་ཐལ་བ་བཟློག་ནས་རང་རྒྱུད་འཕེན་པའང་ཡིན་ནོ། །གཞན་གྱི་འདོད་པ་འགོག་པ་ནི་ཐལ་འགྱུར་ཡང་ཡིན་ལ་གཞན་གྱི་འདོད་པ་དང་མི་མཐུན་པའི་གཞན་ལུགས་བསྟན་པས་རང་རྒྱུད་ཀྱིས་ཀྱང་འགོག་ཞེས་གསུངས་སོ། །སྔོན་གྱི་ཐལ་འགྱུར་བ་ཆེན་པོ་ཁུ་ལོ་ཙཱ་བ་མདོ་སྡེ་དཔལ་གྱིས་བཞེད་པ་ནི་དབུ་མ་པ་ལ་རང་འདོད་ཀྱི་དམ་བཅའ་མེད་ཅེས་པའང་དོན་དམ་བདེན་པ་ལས་བརྩམས་ཏེ་རང་བཞིན་མེད་པའམ་སྐྱེ་བ་མེད་པ་ལ་སོགས་པའི་དམ་བཅའ་ཅིར་ཡང་ཁས་མི་ལེན་པ་ཡིན་གྱི་སྤྱིར་རང་འདོད་གྱི་དམ་བཅའ་མེད་པ་མ་ཡིན་ཏེ། ཐ་སྙད་ཀྱི་དེ་ཁོ་ན་དཔྱོད་པའི་ཚེ་རང་འདོད་ཀྱི་དམ་བཅའ་ཡོད་པས་སོ། །དེ་བཞིན་དུ་རང་རྒྱུད་ཀྱི་རྟགས་ཀྱང་དོན་དམ་བདེན་པའི་གནས་ལུགས་སྒྲུབ་པའི་རང་རྒྱུད་ཀྱི་རྟགས་ཁས་མི་ལེན་པ་ཡིན་གྱི་ཐ་སྙད་ཀྱི་དེ་ཁོ་ན་དཔྱོད་པའི་རང་རྒྱུད་ཀྱི་རྟགས་ཀྱང་ཞལ་གྱིས་བཞེས་སོ། །དེའི་རྒྱུ་མཚན་ཡང་འདི་ལྟར་དོན་དམ་པའི་བདེན་པ་ནི་ཡོད་པ་དང་མེད་པ་ལ་སོགས་པའི་མཐའ་བཞི་ལས་གྲོལ་བས་དེ་ལ་གཞལ་བྱའི་ཁྱབ་བྱེད་ཁེགས་པས་གཞལ་བྱ་དང་ཤེས་བྱ་ཙམ་མེད་པས་མངོན་གྱུར་དང་ལྐོག་གྱུར་གྱི་གཞལ་བྱར་ཡང་མ་གྲུབ་ལ་དེའི་ཕྱིར་དེ་ལ་མངོན་སུམ་དང་རྗེས་དཔག་གཉིས་འཇལ་བྱེད་དུ་མི་འཇུག་པའི་ཕྱིར་དང་། དེ་བཞིན་དུ་མཐའ་བཞི་ལས་གྲོལ་བས་ཡོད་མེད་སོགས་ཇི་ལྟར་ཡང་དམ་བཅས་པ་མེད་པས་ན་དོན་དམ་བདེན་པའི་གནས་ལུགས་སྒྲུབ་པའི་རང་རྒྱུད་ཀྱི་རྟགས་མི་འཐད་ཅིང་། ཡོད་མེད་སོགས་སུ་འཛིན་པའི་བློའང་གཞལ་བ་དང་བློའི་ཤེས་བྱ་ཐམས་ཅད་ཀུན་རྫོབ་ཀྱི་བདེན་པ་ཁོ་ན་ཡིན་པས་རང་རྒྱུད་ཀྱི་རྟགས་ཀྱང་དེ་ཁོ་ན་ལ་འཇུག་པ་ཡིན་ནོ། །དོན་དམ་པའི་བདེན་པ་ལ་ཅི་ཡང་ཁས་བླངས་པར་བྱར་མེད་བཞིན་དུ་དངོས་པོར་སྨྲ་བ་དག་ཁས་ལེན་པར་བྱེད་པས་དེ་འགོག་པ་ནི་རང་རྒྱུད་ཀྱིས་མི་འགོག་ཅིང་། རང་གི་ཁས་བླངས་ལ་བརྟེན་ཏེ་འགལ་བ་བརྗོད་པའི་ཐལ་འགྱུར་གྱིས་འགོག་པ་ཡིན་ཏེ། དཔེར་ན་རྣམ་པ་མེད་པར་སྨྲ་བ་ལ་སྣང་བ་བདེན་པར་མེད་པས་ཤེས་པ་དང་མ་འབྲེལ་བའི་ཕྱིར་སྣང་བ་ངེས་པར་མི་འཐད་ཅེས་བརྗོད་པས་སྣང་བ་ངེས་པ་འགོག་ལ། སྣང་བ་ངེས་པས་ཤེས་པ་དང་འབྲེལ་ཕྱིར་སྒྲོ་བཏགས་པར་མི་འཐད་ཅེས་པས་སྒྲོ་བཏགས་པ་འགོག་ཅིང་། རྣམ་པ་དང་བཅས་པར་སྨྲ་བ་ལ་རྣམ་པ་དུ་མ་དང་འབྲེལ་བའི་རྟགས་ཀྱིས་ཤེས་པ་ཆ་མེད་འགོག་ལ་ཆ་མེད་པའི་རྟགས་ཀྱིས་རྣམ་པ་དུ་མ་དང་འབྲེལ་བ་འགོག་པ་དང་། སྡེ་བ་དག་ལ་རགས་པ་རྩོམ་པའི་རྟགས་ཀྱིས། རྡུལ་ཆ་མེད་པ་འགོག་ལ་ཆ་མེད་པའི་རྟགས་ཀྱིས་རགས་པ་རྩོམ་པ་འགོག་པ་དང་། མུ་སྟེགས་བྱེད་ལའང་རྟག་པའི་རྟགས་ལས་དོན་བྱེད་པ་འགོག་ལ་དོན་བྱེད་པའི་རྟགས་ལས་རྟག་པ་འགོག་པ་ལྟ་བུ། ཕྱོགས་ཆོས་ཕ་རོལ་པོས་ཁས་བླངས་ལ་ཁྱབ་པའང་འཇིག་རྟེན་ལ་གྲགས་པ་ཙམ་ཡིན་པས་ཧ་ཅང་ཐལ་བས་ཁས་བླངས་པ་འགོག་གོ །ཞེས་གསུངས་སོ། །རིགས་པའི་དབང་ཕྱུག་ཆ་པའི་ཞལ་ནས་དབུ་མ་པ་དག་དོན་དམ་བདེན་པ་ལས་བརྩམས་ཏེ། དམ་བཅའ་བ་མེད་པས་རྟགས་མི་སྦྱོར་ཞེས་བྱ་བ་དེ་ཀུན་རྫོབ་ཀྱི་བདེན་པའི་ཟླར་གྱུར་པའི་དོན་དམ་འགའ་ཞིག་མི་སྲིད་པས་དེ་ལ་ཆོས་གང་ཡང་མི་བརྟེན་པས་དེ་ལ་དམ་བཅའ་དང་རྟགས་མི་སྦྱོར་ཞེས་བརྗོད་དམ། སྲིད་ཀྱང་དེ་ཡོད་པ་ལ་སོགས་པའི་ཆོས་སུ་མི་གནས་པས་དམ་བཅའ་དང་རྟགས་མི་སྦྱོར་ཞེས་བརྗོད། དང་པོ་ལྟར་ན་དེ་རྩོད་གཞི་ཆོས་ཅན་དུ་བྱས་པའི་རང་རྒྱུད་ཀྱི་རྟགས་མི་སྦྱོར་ཀྱང་རྟག་པའི་དངོས་པོ་འགོག་པའི་རྟགས་སྦྱོར་བ་ལྟར། ཤེས་བྱ་འགའ་ཞིག་གཞིར་གྱུར་པ་ལ་དེ་དགག་བྱར་བྱེད་པའི་རྟགས་སྦྱར་བས་དོན་དམ་པ་ཁེགས་པ་ན་དེའི་བྱེ་བྲག་མཐའ་བཞིའང་ཁེགས་པར་རང་རྒྱུད་ལས་གྲུབ་པས་ཐལ་བ་དོན་མེད་པར་འགྱུར་རོ། །གཉིས་པ་ཀུན་རྫོབ་པའི་ཟླར་གྱུར་བའི་དོན་དམ་སྲིད་ཀྱང་དངོས་པོ་དངོས་མེད་ལ་སོགས་པ་མཐའ་ཐམས་ཅད་དང་བྲལ་བས་ཅིར་ཡང་དམ་བཅའ་མེད་པས་རྟགས་མི་སྦྱོར་བར་འདོད་ན། འོ་ན་གཅིག་དང་དུ་མ་དང་བྲལ་བ་དང་མཐའ་བཞིའི་སྐྱེ་བ་ལ་སོགས་པ་དང་བྲལ་བས་ཡང་དག་པའི་དངོས་པོ་དགག་མི་ནུས་པར་འགྱུར་ཏེ། དོན་དམ་པ་ཡོད་ཀྱང་གཅིག་དང་དུ་མའམ་དངོས་པོ་ཡོད་མེད་ལ་སོགས་པ་གང་དུའང་ཁས་མི་ལེན་པའི་ཕྱིར་རོ། །གཞན་ཡང་དངོས་པོར་སྨྲ་བས་དམ་བཅས་པ་ལ་ཐལ་བ་སྦྱོར་རམ། མ་བཅས་པ་ལ་སྦྱོར། ཕྱི་མ་ལྟར་ན་རང་ཉིད་ལའང་ཐལ་བ་སྦྱོར་བར་འགྱུར་ལ། དང་པོ་ལྟར་ན་དོན་དམ་པའི་དངོས་པོ་ཡོད་པ་དངོས་སྨྲ་བས་དམ་བཅས་པ་ལྟར་དེ་མེད་པའང་དམ་བཅར་འགྱུར་ཏེ། འདོད་པ་ཁྱད་པར་མེད་པའི་ཕྱིར་རོ། །ཡོད་པ་དགག་པར་འདོད་ཀྱི་མེད་པ་སྒྲུབ་པར་མི་འདོད་དོ་ཞེ་ན། མེད་པ་དགག་པར་འདོད་ཀྱི་ཡོད་པ་སྒྲུབ་པར་མི་འདོད་ཅེས་ཀྱང་མཚུངས་སོ། །དོན་དམ་མེད་པ་བཀག་པ་ཉིད་ཡོད་པ་སྒྲུབ་པ་ཡིན་ནོ་ཞེ་ན། ཡོད་པ་བཀག་པའང་མེད་པ་སྒྲུབ་པ་ཡིན་ནོ་ཞེས་མཚུངས་སོ། །དེས་ན་དམ་བཅའ་བ་མེད་པར་མི་འཐད། གཞན་གྱི་འདོད་པ་འགོག་པའང་རང་རྒྱུད་ཀྱིས་དགག་དགོས་ཀྱི་ཐལ་བ་ཙམ་གྱིས་དགག་མི་ནུས་ཏེ། དེའི་ཕྱིར་རྣམ་པ་དུ་མ་དང་འབྲེལ་པ་ལ་སོགས་པའི་རྟགས་ཁས་བླངས་ཙམ་ཡིན་པའང་མི་འཐད་དོ། །ཁས་བླངས་པའི་རྟགས་དེས་དགག་བྱ་དགག་ནས་མི་སྲིད་པའི་ཕྱིར་ངེས་སམ། དགག་བྱ་ཤེས་བྱ་ལ་མི་སྲིད་པར་སྟོན་པར་བྱེད་པས་གེགས་བྱེད་པ་ཙམ་ཞིག་ཡིན། དང་པོ་ལྟར་ན་མི་འཐད་དེ། གཞན་དུ་ན་མུ་སྟེགས་བྱེད་དག་དངོས་པོ་ཐམས་ཅད་རྟག་པར་ཁས་ལེན་པས་ཀུན་རྫོབ་ཙམ་དུའང་དོན་བྱེད་མེད་པར་འགྱུར་ཏེ། རྟག་པ་དང་དོན་བྱེད་ནུས་པ་འགལ་བའི་ཕྱིར། རྟག་ཅེས་པའི་སྒྲ་དང་ནི། ཀུན་རྫོབ་པའི་དོན་བྱེད་པ་མི་འགལ་ལ་སྒྲ་དོན་ལ་འབྲེལ་པས་རྟག་པའི་དོན་མི་འགྲུབ་སྟེ་གྲུབ་ན་རང་གི་རྒྱུད་ཀྱིས་གྲུབ་པ་ཉིད་དུ་འགྱུར་རོ། །ཀུན་རྫོབ་པའི་དོན་བྱེད་པ་ཁེགས་ནའང་སུན་འབྱིན་པའི་ཚིག་གི་ཀྱང་ཕ་རོལ་པོའི་ལོག་རྟོག་ཇི་ལྟར་སེལ་བར་བྱེད། འོན་ཏེ་རྣམ་པ་དུ་མ་དང་འབྲེལ་བའི་ཚིག་གིས་ཤེས་པ་ཆ་མེད་འདོད་པ་ལ་གེགས་བྱེད་པ་ཡིན་ན། རང་གི་མ་ལ་མོ་གཤམ་དུ་ཁས་བླངས་པའི་བུ་སྐྱེད་པའི་ནུས་པ་མི་སྲིད་པར་བསྟན་ཀྱང་དངོས་པོ་ལ་ནུས་པ་དང་། དེ་དཔག་ཏུ་རུང་བ་དེ་མི་ལྡོག་པ་ལྟར། རྣམ་པ་དུ་མ་དང་འབྲེལ་ཞེས་པས་ཆ་མེད་མི་སྲིད་པར་བསྟན་ཀྱང་སྲིད་པར་དོགས་པ་མི་ལྡོག་པས་ཟློག་པ་ཇི་ཡང་ཁས་མི་ལེན་པ་ལ་སྦྱོར་བར་ཇི་ལྟར་ནུས། འདིར་སྨྲས་པ། མི་སྲིད་པ་ཡང་རྟགས་ལས་ཡིན། །སྲིད་ན་དམ་བཅའ་མེད་མ་ཡིན། །གནོད་བྱེད་མ་ཡིན་གེགས་བྱེད་མིན། །ཚིག་ཙམ་དགག་དང་སྒྲུབ་བྱེད་མིན། །སེམས་སོགས་བདེན་དང་སྟོང་ཉིད་ལ། །རྩོད་པའི་མཐུན་སྣང་མེད་ན་ནི། །རྟག་དང་མི་རྟག་རྩོད་པ་ན། །སྒྲ་ལའང་མཐུན་སྣང་མེད་པར་འགྱུར། །དྲན་པའི་ཤེས་ལ་སྣང་བ་ལྟར། །དངོས་ཙམ་མྱོང་བ་ཉིད་ལ་སྣང་། །དེ་ལྟ་མིན་ན་རྩོད་བྱེད་དེ། །བརྩད་པའི་སྐྱེས་བུ་ཇི་ལྟར་སྣང་། །ཐ་སྙད་རང་རྒྱུད་མེད་ན་ནི། །ཀུན་རྫོབ་གཞལ་བྱ་ཇི་ལྟར་བརྗོད། །ཀུན་རྫོབ་བརྫུན་པར་སྨྲ་བས་ཀྱང་། །རྟགས་ལས་བདེན་སོགས་འགོག་པར་གྲུབ། །རྟགས་དང་རྗེས་དཔག་མི་འདོད་ན། །དགག་པའི་བློ་ནི་གང་ཡིན་སྨྲོས། །ཡིད་དཔྱོད་ཡིན་ན་རྒྱུ་མཚན་དག །སེལ་ལ་འབྲས་བུ་ཅི་ཞིག་ཡོད། །ལོག་བློར་འདོད་ན་བདེན་དངོས་གྲུབ། །གཞན་གྱི་ཕྱོགས་ནི་འཕེལ་བར་འགྱུར། །ཚད་མ་འཇུག་པ་མེད་པ་ལ། །དཔྱད་པའི་ཡུལ་ཅན་ཇི་ལྟར་འཇུག །ཡོད་མེད་ཐེ་ཚོམ་ཟ་ན་ཡང་། །གལ་ཏེ་ཅི་ཡང་མི་སྨྲ་ཞིང་། །གལ་ཏེ་བདེན་དངོས་འདོད་པས་ན། །དབུ་མའི་ལམ་ལས་རྒྱང་རིང་འགྱུར། །ཞེས་བྱའོ། །དེའི་ཕྱིར་དོན་དམ་པའི་དངོས་པོ་འགོག་པར་བྱེད་པ་ན་ཕྱོགས་ཆོས་དང་ཁྱབ་པ་ཚད་མས་གྲུབ་པའི་རང་རྒྱུད་ཀྱི་རྟགས་ཁོ་ན་ལ་བརྟེན་ནས་དགག་རིགས་ཏེ། གཅིག་དང་དུ་བྲལ་སོགས་མེད་དགག་རྟགས་སུ་བཀོད་པ་རྣམས་ནི་ཁྱབ་བྱེད་མ་དམིགས་པ་ཡིན་ལ། རྟེན་འབྲེལ་ལ་སོགས་པ་སྒྲུབ་པ་རྟགས་སུ་བཀོད་པ་རྣམས་ནི་རང་བཞིན་འགལ་བས་ཁྱབ་པའི་རྟགས་ཏེ། དེ་ལྟ་བུའི་རང་རྒྱུད་ཀྱི་རྟགས་ལས་བདེན་དངོས་དགག་པར་རིགས་ཀྱི་ཧ་ཅང་ཐལ་བ་ཙམ་གྱིས་ནི་བདེན་པའི་སྤྲོས་པ་འགོག་མི་ནུས་སོ། །གལ་ཏེ་དེ་ཁོ་ན་ལ་གཞལ་བྱ་གྲུབ་ན་སྤྲོས་པ་དང་བཅས་པར་འགྱུར་རོ། །ཞེ་ན། འོ་ན་ཁྱོད་ལ་སྒྲ་ཉིད་གཞལ་བྱ་ཡིན་པའི་ཕྱིར། རྟག་པའི་དངོས་པོར་ཐལ་ལོ་ཞེས་བརྗོད་ན་ལན་ཅི་ཡོད། གཞལ་བྱ་ལ་རྟག་པའི་དངོས་པོས་སྟོང་པས་ཁྱབ་པའི་ཕྱིར། ཁྱབ་པ་ཚད་མས་གྲུབ་པའང་མེད་ལ། ཁས་ཀྱང་མ་བླངས་པས་ཁྱབ་པ་མེད་དོ་ཞེ་ན། འདིར་ཡང་དེ་བཞིན་ཏེ། གཞལ་བྱ་ལ་དོན་དམ་པའི་དངོས་པོས་སྟོང་པས་ཁྱབ་པའི་ཕྱིར་ན། ཁྱབ་པ་ཚད་མས་གྲུབ་པའང་མེད་ལ། ཁས་ཀྱང་བླངས་པ་མེད་དོ། །ཞེས་གསུངས་སོ། །དགེ་བའི་བཤེས་གཉེན་གཙང་ནག་པའི་ཞལ་ནས་དེ་ལྟར་གཞན་གྱིས་བརྟགས་པའི་མཐའ་འགོག་ཅིང་། ཤེས་བྱའི་ལུས་དང་། ཐུབ་པས་བསྟན་པའི་དོན་ངེས་པར་བྱེད་པའི་བློ་ནི་ཐམས་ཅད་དུ་ཡིད་ཆེས་པའི་ཚད་མ་ཡིན་ཏེ་དེའང་དོན་རང་གི་ངོ་བོ་རང་གི་སྣང་བའི་སྒོ་ནས་རྟོགས་པ་མངོན་སུམ་དང་། ཁྱབ་བྱ་མཐོང་བ་ལས་ལྐོག་གྱུར་རྟོགས་པ་རྗེས་དཔག་དང་། ཡིད་ཆེས་གཞན་གྱི་ཚིག་ལས་དོན་ངེས་པ་ལུང་གི་ཚད་མའོ། །དེ་ལྟར་རིགས་པའི་དངོས་པོ་གསུམ་པོ་དེ་ཉིད་འཇུག་པའི་ཚུལ་གྱིས་སློབ་དཔོན་གྱི་གཞུང་ལས་དཔྱད་གཞི་འཛིན་པའི་ཚད་མ་དང་། བསྒྲུབ་བྱ་དང་མཚུངས་པའི་མ་གྲུབ་པ་དང་། འགལ་འབྲེལ་ལ་བརྟེན་པའི་དགག་པ་གསུམ་སྣང་སྟེ། དེ་དག་ཀྱང་རིམ་པ་བཞིན་གཉིས་ཀའི་རྟེན་དང་མི་འདོད་པ་བཟློག་པ་དང་། གཞན་གྱི་འདོད་པ་འགོག་པའི་བྱེད་པ་ཅན་ཡིན་པས་ལུས་དང་གོ་ཆ་དང་མཚོན་ཆ་ལྟ་བུའི་རིགས་པར་ལྟའོ། །རིགས་པ་ཕྱི་མ་དེའང་རང་གི་མཚན་ཉིད་རྣམ་པར་བརྟགས་ནས་འགོག་པ་དང་། གཞན་དང་ཁྱད་པར་རྣམ་པར་བརྟགས་ནས་འགོག་པ་དང་། ཐལ་བའི་རྟགས་ཀྱི་སྒོ་ནས་དགག་པ་དང་། རང་རྒྱུད་ཀྱི་རྟགས་ཀྱི་སྒོ་ནས་དགག་པའོ། །དེ་དག་ཀྱང་ཅི་རིགས་པར་ཁས་བླང་དང་དངོས་པོའི་རིགས་པ་སྟེ་བྱེད་པ་གཉིས། སྒྲུབ་པ་དང་འགོག་པ་སྟེ་ལས་གཉིས། དངོས་སུ་བརྟག་པ་དང་སྲིད་པའི་མཐའ་འགོག་པ་སྟེ་དགག་ཚུལ་གཉིས། མཚན་ཉིད་རང་ལྡོག་ནས་འགོག་པ་དང་། ཁྱབ་བྱེད་སྤྱི་ལྡོག་ནས་འགོག་པ་བྱ་བ་གཉིས་ཏེ། དེ་ལྟར་ན་རིགས་པའི་དངོས་པོ་གསུམ་དང་། འཇུག་པའི་ཚུལ་བཞི་དང་། བྱ་བྱེད་ཀྱི་མཐའ་བརྒྱད་ཡིན་ནོ། །དེ་ལྟ་བས་ན་ཁོ་བོ་ནི་སྟོན་པ་དང་སློབ་དཔོན་གྱི་ལུང་དང་རིགས་པའི་སྒྲོན་མ་དག་གིས་ཤེས་བྱའི་ལུས་དབུ་མ་ཞེས་བྱ་བ་ཇི་སྐད་བརྗོད་པའི་ཕུན་སུམ་ཚོགས་པ་གསུམ་དང་ལྡན་པ་ཞིག་ཏུ་མཐོང་བས་ཆོས་དང་སྟོན་པ་ལ་དད་པ་དང་འགྲོ་བ་ལ་སྙིང་རྗེ་བ་དང་། རྒོལ་བ་ལ་མི་འཇིགས་པའི་གདེང་ཐོབ་སྟེ། དེ་རྒྱལ་མཚན་གྱི་ནོར་བུ་ལྟ་བུར་རང་ཉིད་གང་གིས་མཐོང་བའི་རིགས་པས་རྟོག་གེའི་ཚོགས་སུ་ལྷག་པར་ངོམས་ཤིང་བསྟན་པའི་སྒོ་ནས་སྒྲོགས་པར་བྱེད་དོ། །ཞེས་གསུངས་པའི་འཇུག་ཚུལ་བཞི་པ་རང་རྒྱུད་ཀྱི་རྟགས་ནི་གཅིག་དུ་བྲལ་དང་། རྡོ་རྗེ་གཟེགས་མ་དང་། ཡོད་མེད་སྐྱེ་འགོག་དང་། རྟེན་འབྲེལ་གྱི་གཏན་ཚིགས་དང་བཞི་ལ་བཞེད་པར་སྣང་བས་དོན་དམ་དཔྱོད་པའི་ཚེའང་རང་རྒྱུད་བཞེད་པར་སྣང་ངོ་། །རྨ་བྱ་ཆེན་པོའི་ཞལ་ནས་སྔ་རབས་པ་དག་དབུ་མ་པ་ལ་དབུ་མའི་ལྟ་བ་དང་། དགག་བྱ་དང་། འགོག་བྱེད་དང་། བསྒྲུབ་བྱ་དང་། སྒྲུབ་བྱེད་ཅི་ཡང་ཁས་ལེན་པ་མེད་དོ་ཞེས་སྨྲ་བ་ནི་ཤིན་ཏུ་མི་འཐད་དེ། ཐ་སྙད་དབུ་མའི་དོན་རྟེན་ནས་འབྱུང་བ་ཡིན་པས་ཁས་བླང་བྱའི་དབུ་མ་ཡོད་དགོས་པའི་ཕྱིར་ཏེ། རྟེན་འབྱུང་དེ་ཉིད་སྣང་ལ་རང་བཞིན་མེད་པའམ། རྒྱུ་འབྲས་དེ་ཉིད་དང་གཞན་ཉིད་དུ་མེད་པ་ཁས་བླངས་དགོས་པའི་ཕྱིར་རོ། །འོ་ན་མཁས་པས་དབུས་ལ་གནས་པར་ཡང་མི་བྱེད། ཅེས་གསུངས་པ་མ་ཡིན་ནམ་སྙམ་ན་དོན་དམ་པར་དེ་ལྟར་ཡིན་མོད། ཐ་སྙད་དུ་དབུ་མའི་ལྟ་བ་མེད་ན་སློབ་དཔོན་ཀླུ་སྒྲུབ་ལ་སོགས་པ་ལྟ་བ་གང་དང་ལྡན་པས་དབུ་མ་པར་བཞག གལ་ཏེ་དེ་དག་རང་ཕྱོགས་ཅིའང་མི་འཇོག་ཅིང་གཞན་ཕྱོགས་ཐམས་ཅད་འགོག་པས་སོ་ཞེ་ན། དེ་ནི་སུན་ཅི་ཕྱིན་གྱི་རྒོལ་བ་ཡིན་པས་གཞུང་ལས་ཤིན་ཏུ་སྨད་དོ། །གཞན་ཡང་བདེན་གཉིས་ཀྱི་ཡུལ་ལ་དབུ་མའི་ངག་སྦྱར་བས་ཀྱང་དབུ་མའི་ལྟ་བ་ཁས་ལེན་དགོས་ཏེ། འདི་ལྟར་དོན་དམ་པར་ཆོས་ཐམས་ཅད་སྤྲོས་པ་དང་བྲལ་ལོ། །ཞེས་པ་དང་། ཀུན་རྫོབ་ཏུ་ཆོས་རྣམས་སྒྱུ་མ་ལྟ་བུ་ཡིན་ནོ། །ཞེས་ངག་སྦྱོར་བས་ངག་གི་དོན་གྲུབ་བསལ་མེད་ལ་བསྟན་པར་འདོད་པའི་དམ་བཅའ་ཡོད་པར་ཇི་ལྟར་མི་འགྱུར། དེ་ནས་དབུ་མ་པས་ཀུན་རྫོབ་ཏུ་དགག་སྒྲུབ་ཀྱི་དམ་བཅའ་གཉིས་ཀའང་འདོད་ལ། བརྟགས་ཤིང་དཔྱད་པའི་ཤེས་ངོར་དོན་དམ་པར་དགག་སྒྲུབ་ཀྱི་དམ་བཅའ་མེད། དེ་ལ་ངག་སྦྱོར་བ་ཉིད་ཀྱང་མེད་དེ། ཇི་སྐད་དུ། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །ཞེས་གསུངས་པས་སོ། །ཐ་སྙད་དུ་དགག་སྒྲུབ་བྱེད་པའི་ཚད་མའང་ཡོད་དེ། ཚད་མ་ཡེ་མེད་པར་རྟོགས་ལྡན་ལ་གཞན་ཕྱོགས་འགོག་པར་འདོད་པ་ཉིད་མི་འབྱུང་བའི་ཕྱིར་ཏེ། གཞན་ཕྱོགས་བདེན་ན་དགག་པར་མི་ནུས་ཤིང་བརྫུན་ནའང་བརྫུན་པར་མ་ཤེས་ན་གཞན་གྱི་ལོག་རྟོག་ཟློག་པར་མི་ནུས། བརྫུན་པར་ཤེས་ན་བརྫུན་པ་ལ་བརྫུན་པར་ཤེས་པ་ཉིད་ཚད་མ་ཡིན་པས་ཚད་མ་མེད་པ་ཉིད་ཉམས་སོ། །དེས་ན་ཚུལ་གསུམ་ཚད་མས་གྲུབ་པའི་རྟགས་ལས་དགག་བྱ་དགག་པ་དང་བསྒྲུབ་བྱ་བསྒྲུབ་པའི་རྗེས་དཔག་ཡོད་པས་སྔར་གྱི་དེ་དག་ཐམས་ཅད་ཐ་སྙད་དུ་ཁས་ལེན་ནོ། །འོ་ན་རང་རྒྱུད་པར་ཅིའི་ཕྱིར་མི་འགྱུར་སྙམ་ན། རང་རྒྱུད་ཀྱི་དོན་ནི་ཚུལ་གསུམ་དངོས་པོ་སྟོབས་ཞུགས་ཀྱི་ཚད་མས་གྲུབ་པའི་རྟགས་ལས་བསྒྲུབ་བྱ་བསྒྲུབ་པ་ཡིན་ལ་འདིར་ནི་དངོས་པོ་སྟོབས་ཞུགས་ཀྱི་ཚད་མ་གཏན་མེད་པས་དེས་བསྒྲུབ་བྱ་བསྒྲུབ་པ་ནི་དོན་དམ་དང་ཐ་སྙད་གང་གི་སྐབས་སུའང་ཁས་མི་ལེན་ཅིང་རྟགས་ཀྱི་ཚུལ་ཐམས་ཅད་ཀྱང་འཇིག་རྟེན་ན་གྲགས་པའི་ཚད་མ་ཙམ་གྱིས་གྲུབ་པ་ཡིན་པས་རང་རྒྱུད་པར་མི་འགྱུར་རོ། །འཇིག་རྟེན་ན་གྲགས་པའི་ཚད་མ་དེའང་ཚིག་གསལ་ལས་གསུངས་པ་ལྟར་གྱི་མངོན་གསུམ་ལ་སོགས་པའི་ཚད་མ་བཞི་ལ་ངོས་འཛིན་པའི་རྣམ་གཞག་མཛད་དོ། །གསུམ་པ་དེ་དག་ལ་འཐད་མི་འཐད་ཀྱི་ཆ་སོ་སོར་དབྱེ་བ་ནི་སྔ་རབས་པ་དག་དབུ་མ་པ་རང་ལ་ཞེ་འདོད་ཀྱི་དམ་བཅའ་མེད་པར་འདོད་པ་ནི་ཀླུ་མེས་ཀྱིས་བརྗོད་པའི་སྐྱོན་རྣམས་ཀྱང་གནས་ཤིང་གཞན་ཡང་དབུ་མ་པས་མཐའ་བཞིའི་སྐྱེ་བ་དགག་པའི་དམ་བཅའ་བཞི་གསུངས་པ་དེ་ཉིད་རང་ཉིད་ཞེ་ནས་མི་འདོད་བཞིན་དུ་དམ་བཅས་པ་ཡིན་ན་ནི་མཐའ་བཞིའི་སྐྱེ་བ་ཡོད་པའང་དམ་བཅའ་རིགས་པར་འགྱུར་ཏེ། ཞེ་ནས་མི་འདོད་པར་མཚུངས་པའི་ཕྱིར། ཞེ་ནས་འདོད་པ་ཙམ་གྱིས་བདེན་གྲུབ་ཞེ་ནས་འདོད་པར་འགྱུར་བ་ནི་མ་ཡིན་ཏེ། བདེན་པར་ཡོད་མེད་ཀྱི་ཞེ་འདོད་ཐ་དད་པ་གཉིས་ཡོད་པའི་ཕྱིར་རོ། །རྩོད་མེད་ཆེ་བའི་བདག་ཉིད་ཅན། །ཞེས་སོགས་ཀྱི་གཞུང་རང་ལ་ཞེ་འདོད་ཀྱི་ཁས་ལེན་ཅུང་ཟད་ཀྱང་མེད་པའི་ལུང་དུ་ཡང་མི་རུང་སྟེ། དེ་དག་ནི་དོན་དམ་ལ་དཔྱོད་པའི་ཚེ་རང་རྒྱུད་ཀྱི་དམ་བཅའ་མེད་པའི་ལུང་ཡིན་ལ། ཞེ་འདོད་ཀྱི་ཁས་ལེན་ལ་རང་རྒྱུད་ཀྱི་ཁས་ལེན་གྱིས་མ་ཁྱབ་པའི་ཕྱིར་རོ། །ཀླུ་མེས་ཀྱིས་ཆོས་ཅན་དང་རྟགས་དབུ་མ་ཉིད་ལ་གྲུབ་པ་མེད་ན་འགལ་བ་སྨྲ་བ་པོའི་གང་ཟག་དང་འགལ་བ་སྨྲས་པ་ཉིད་ཀྱང་དབུ་མ་པ་ལ་མ་གྲུབ་པར་མཚུངས་ཞེས་པའང་མི་འཐད་དེ། ཐལ་འགྱུར་བས་ནི་ནང་གི་འདུ་བྱེད་བདག་ལས་མི་སྐྱེ་བར་བསྒྲུབ་པ་ལ་ཡོད་པ་རྟགས་སུ་བཀོད་པའི་ཚེ་ཆོས་ཅན་དང་རྟགས་དབུ་མ་པ་ལ་མ་གྲུབ་པར་ཁས་བླངས་ཀྱི་དེའི་ཚེ་ནང་གི་འདུ་བྱེད་ཀྱི་གནས་ཚུལ་དཔྱོད་པ་ཡིན་གྱི་འགལ་བ་སྨྲ་བ་པོ་དང་། འགལ་བ་སྨྲས་པའི་གནས་ཚུལ་ལ་དཔྱོད་པའི་སྐབས་མ་ཡིན་པའི་ཕྱིར་དང་། དེའི་གནས་ཚུལ་ལ་དཔྱོད་པའི་ཚེ་ཁས་མི་ལེན་པ་ནི་སྔ་མ་དང་མཚུངས་སོ། །གྲགས་པའི་ཆོས་ཅན་ལ་རང་རྒྱུད་སྦྱོར་བ་ཡིན་ལ་གཙོ་བོ་ལ་སོགས་པ་མི་སྲིད་པའི་ཆོས་ཅན་ལ་ཐལ་འགྱུར་སྦྱོར་བ་ཡིན་ནོ་ཞེས་པའང་མ་བརྟགས་པ་སྟེ། སློབ་དཔོན་གྱིས། གཟུགས་ཀྱི་རྒྱུ་ནི་མ་གཏོགས་པར། །གཟུགས་ན་གཟུགས་ནི་རྒྱུ་མེད་པར། །ཐལ་བར་འགྱུར་ཏེ་དོན་གང་ཡང་། །རྒྱུ་མེད་པར་ནི་གང་ནའང་མེད། །ཅེས་སོགས་ཐལ་འགྱུར་ཕལ་ཆེར་གྲགས་པའི་ཆོས་ཅན་ལ་སྦྱོར་བར་སྣང་པའི་ཕྱིར་རོ། །སློབ་དཔོན་ཆ་པས་རང་རྒྱུད་ཀྱི་ཆོས་ཅན་ཁས་ལེན་པའི་ཤེས་བྱེད་དུ་ཆོས་ཅན་མྱུ་གུ་ལྟ་བུ་ལ་རྒོལ་ཕྱི་རྒོལ་གཉིས་དཔྱད་པ་མ་ཞུགས་པའི་ཚེ་བདེན་པར་ཡོད་མེད་གང་གིས་ཀྱང་ཁྱད་པར་དུ་མ་བྱས་པའི་ཆོས་ཅན་མཐུན་སྣང་དུ་གྲུབ་པ་ཁས་ལེན་པ་ཡོད་ཅེས་བཀོད་པས་ནི་ཐལ་འགྱུར་བ་ལ་མི་གནོད་དེ། ཐལ་འགྱུར་བས་ཀྱང་དེའི་ཚེ་དེ་ལྟར་འདོད་པའི་ཕྱིར་རོ། །འདི་ནི་ཞིབ་པར་རང་ལུགས་ཀྱི་སྐབས་སུ་འབྱུང་ངོ་། །ཆོས་ཅན་མཐུན་པར་གྲུབ་པ་མེད་ན་འགལ་བ་ཁས་ལེན་པ་ཉིད་ལའང་མཐུན་པར་གྲུབ་པ་མེད་དོ་ཞེས་པའང་མི་འཐད་དེ། ཆོས་ཅན་དེའི་གནས་ཚུལ་ལ་དཔྱོད་པའི་སྐབས་ཡིན་གྱི་འགལ་བ་ཁས་ལེན་པའི་གནས་ཚུལ་ལ་དཔྱོད་པའི་སྐབས་མིན་པའི་ཕྱིར་རོ། །མཐུན་པར་སྣང་བ་གཏན་མེད་ན་འཆད་པ་པོས་ཉན་པ་པོ་ལ་བཤད་པ་དོན་མེད་དེ་ཞེས་སོགས་ཀྱི་སྐྱོན་བརྗོད་པ་ནི་ཕྱོགས་སྔ་དེ་སྨྲ་བ་པོ་ལ་སྐྱོན་དུ་འགྱུར་གྱི་ཐལ་འགྱུར་བས་ནི་དེ་ལྟར་ཁས་མ་བླངས་སོ། །སློབ་དཔོན་གྱིས་དམ་བཅའ་མེད་པར་གསུངས་པ་ནི་དེ་ཁོ་ནར་ཡིན་གྱི་ཐ་སྙད་དུ་དགག་པའི་དམ་བཅའ་སེལ་བ་མ་ཡིན་ནོ། །ཞེས་པ་འདིའང་དོན་མ་ཡིན་ཏེ། དམ་བཅའི་རང་ལྡོག་དོན་དམ་པར་མེད་པར་ཁས་བླངས་པ་ཙམ་གྱིས་དངོས་སྨྲ་བའི་སྐྱོན་ཟློག་པར་མི་ནུས་པའི་ཕྱིར་ཏེ། གལ་ཏེ་ནུས་ན་དངོས་པོ་བདེན་གྲུབ་པ་ཞིག་ཡོད་ཅེས་དམ་བཅས་ནས་དེ་ལྟ་བུའི་དམ་བཅའ་བདེན་པར་མེད་པར་ཁས་བླངས་པའི་ཚེ་ནའང་སྐྱོན་སྤོང་ནུས་པར་ཐལ་བའི་ཕྱིར་རོ། །ཁུ་ལོ་ཙཱ་བས། དོན་དམ་བདེན་པ་ལས་བརྩམས་ཏེ་རང་བཞིན་མེད་པའམ་སྐྱེ་བ་མེད་པ་ལ་སོགས་པའི་དམ་བཅའ་ཅི་ཡང་ཁས་མི་ལེན་པ་ཡིན་གྱི་སྤྱིར་ཐ་སྙད་ཀྱི་དེ་ཁོ་ན་ལ་དཔྱོད་པའི་ཚེ་རང་འདོད་ཀྱི་དམ་བཅའ་ཡོད་ཅེས་ཁྱད་པར་ཕྱེ་བའང་མི་འཐད་དེ། དེའི་དོན་དམ་བཅའི་རང་ལྡོག་དོན་དམ་བདེན་པ་ལས་བརྩམས་ཏེ་མེད་ཅེས་སྨྲ་ན་ནི་གཅིག་ཤོས་ལའང་མཚུངས་ཤིང་། མྱུ་གུ་ལྟ་བུ་སྐྱེ་མེད་དུ་བསྒྲུབ་པའི་ཚེ་ཞེ་འདོད་ཀྱི་དམ་བཅའ་མེད་པའི་དོན་ཡིན་ན་ནི་མཐའ་བཞིའི་སྐྱེ་བ་དགག་པའི་དམ་བཅའ་གསུངས་པ་དང་འགལ་བའི་ཕྱིར་རོ། །ཆ་པ་དང་གཙང་ནག་པས་དོན་དམ་གནས་ལུགས་ལ་དཔྱོད་པའི་ཚེ་རང་རྒྱུད་ཀྱི་གཏན་ཚིགས་དང་། ཆོས་ཅན་མཐུན་སྣང་དུ་གྲུབ་པ་ཡོད་པ་བཀོད་པ་དེ་དག་ཐམས་ཅད་རྒོལ་ཕྱིར་རྒོལ་དཔྱད་པ་མ་ཞུགས་པའི་གོང་དུ་ཆོས་ཅན་མཐུན་སྣང་དུ་གྲུབ་པ་ཡོད་ཀྱང་གཏན་ཚིགས་བཀོད་པ་མེད་ལ། གཏན་ཚིགས་བཀོད་པའི་ཚེ་སྔ་རྒོལ་གྱི་ཆོས་ཅན་དེའི་གནས་ལུགས་རྟོགས་ནས་ཕྱི་རྒོལ་ལ་སྟོན་པའི་སྐབས་ཡིན་པས་བློ་དེའི་ངོར་ཆོས་ཅན་མཐུན་སྣང་དུ་གྲུབ་པ་ཡོད་ན་བདེན་གྲུབ་ལས་མ་འདས་པའི་ཐལ་འགྱུར་བའི་གནད་ཆེན་པོ་མ་ཟིན་པར་སྣང་ངོ་། །རྨ་བྱས་རྣམ་པར་དཔྱད་པའི་ཚེ་དབུ་མའི་ལྟ་བ་ཁས་མི་ལེན་པ་ཡིན་གྱི་ཐ་སྙད་དུ་དབུ་མའི་ལྟ་བ་དང་། དགག་སྒྲུབ་དང་། དམ་བཅའ་དང་། གཏན་ཚིགས་ཐམས་ཅད་ཁས་ལེན་ཞེས་པ་འཐད་ཀྱང་གཞན་ལ་གྲགས་ཀྱི་རྗེས་དཔག་གི་སྐབས་སུ་ཚུལ་གསུམ་འཇིག་རྟེན་ན་གྲགས་པའི་ཚད་མས་གྲུབ་ཅེས་པ་འདི་ནི་ཤིན་ཏུ་འཁྲུལ་ཏེ། འཇིག་རྟེན་ན་གྲགས་པའི་ཚད་མ་ནི་ཚིག་གསལ་ལས་གསུངས་པའི་མངོན་སུམ་ལ་སོགས་པའི་ཚད་མ་བཞི་ཡིན་པར་རང་ཉིད་ཀྱི་ཀྱང་ཁས་བླངས་ཤིང་གཞུང་གི་དོན་ཡང་ཡིན་པས་དེའི་ཚེ་ཆོས་ཅན་འཇིག་རྟེན་ན་གྲགས་པའི་ཚད་མས་གྲུབ་པར་ཐལ་བའི་ཕྱིར་རོ། །དེའང་འདོད་ན། ཚིག་གསལ་ལས། ནང་གི་འདུ་བྱེད་བདག་ལས་སྐྱེ་བ་མེད་པར་བསྒྲུབ་པ་ལ་རང་རྒྱུད་མི་རིགས་པའི་ཤེས་བྱེད་དུ་རྩོད་ཟློག་ལས། གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །བསྒྲུབ་པའམ་བཟློག་པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཅེས་གསུངས་པ་དྲངས་པ་དང་འགལ་ལོ། །གལ་ཏེ་དེའི་ཚེ་ཚུལ་གསུམ་ཕྱི་རྒོལ་གྱིས་འཇིག་རྟེན་ན་གྲགས་པའི་ཚད་མས་གྲུབ་པའི་དོན་ཡིན་ནོ་སྙམ་ན་དེ་ནི་ཤིན་ཏུ་མི་རིགས་ཏེ། ཕྱི་རྒོལ་གྱིས་ནི་ཚད་མ་བཞིས་གྲུབ་པ་མ་ཡིན་གྱི་འགལ་བ་ཁས་བླངས་པ་ཡིན་པའི་ཕྱིར་རོ། །རང་རྒྱུད་ཀྱི་གཏན་ཚིགས་ཡིན་ན། ཚུལ་གསུམ་དངོས་པོ་སྟོབས་ཞུགས་ཀྱི་ཚད་མས་གྲུབ་པ་དགོས་ཞེས་པའང་མི་འཐད་དེ། རང་ཤ་སྟེར་ལ་གུས་པར་བྱས་པའི་རྟགས་ལས་ས་ཐོབ་པར་དཔོག་པ་དང་། དུ་བའི་རྟགས་ལས་མེར་བསྒྲུབ་པ་དང་། ལུས་ངག་གི་སྤྱོད་པ་ཁྱད་པར་ཅན་གྱི་རྟགས་ལས་ཕྱིར་མི་ལྡོག་པར་བསྒྲུབ་པས་ཐ་སྙད་ཀྱི་རྣམ་གཞག་གི་ཚེ་རང་རྒྱུད་ཀྱི་གཏན་ཚིགས་དུ་མ་ཞིག་གསུངས་ལ། དེའི་ཚེ་ཚུལ་གསུམ་དངོས་པོ་སྟོབས་ཞུགས་ཀྱི་ཚད་མས་གྲུབ་ན་ཁས་བླངས་ནང་འགལ་བའི་ཕྱིར་རོ། །གལ་ཏེ་དེ་དག་རང་རྒྱུད་ཀྱི་གཏན་ཚིགས་མ་ཡིན་ནོ་སྙམ་ན། ཆོས་ཅན་མཐུན་སྣང་དུ་གྲུབ་པ་མེད་པས་རང་རྒྱུད་ཀྱི་གཏན་ཚིགས་མ་ཡིན་ན་ནི་གཏན་ཚིགས་དེ་དག་སྔ་རྒོལ་དབུ་མ་པ་ཞིག་གིས་ཕྱི་རྒོལ་དབུ་མ་པ་ཞིག་ལ་འགོད་པའི་ཚེ་ཕྱི་རྒོལ་གྱིས་ཁས་བླངས་ན་སྔ་རྒོལ་གྱིས་ཀྱང་ཁས་ལེན་པར་གྲུབ་ཅིང་ཕྱི་རྒོལ་གྱིས་ཁས་མ་བླངས་ན་ནི་གཞན་ལ་གྲགས་ཀྱི་རྗེས་དཔག་ཏུའང་མི་འགྱུར་བས་གཏན་ཚིགས་གང་ཞིག་ཡིན་པ་སྨྲོས་ཤིག དེ་ལས་གཞན་རང་རྒྱུད་ཀྱི་གཏན་ཚིགས་མ་ཡིན་པའི་རྒྱུ་མཚན་མེད་དོ། །མདོར་ན། གལ་ཏེ་མངོན་སུམ་ལ་སོགས་པའི། །ཞེས་པའི་གཞུང་དེས་ཆོས་ཅན་རྒོལ་ཕྱི་རྒོལ་གཉིས་ཀ་ལ་འཇིག་རྟེན་ན་གྲགས་པའི་ཚད་མ་བཞི་པོ་གང་རུང་གིས་གྲུབ་པ་མེད་པའི་ཚེ་དེ་ལ་སྒྲུབ་ཆོས་བསྒྲུབ་པའམ་དགག་ཆོས་དགག་པའི་རང་རྒྱུད་ཀྱི་གཏན་ཚིགས་མི་འཐད་ཅེས་པ་སློབ་དཔོན་ཟླ་བའི་དགོངས་པར་གྲུབ་ལ། ཤུགས་ཀྱིས་དེ་ལྟར་གྲུབ་པའི་ཚེ་རང་རྒྱུད་ཀྱི་གཏན་ཚིགས་འཐད་པར་བསྟན་པས་ཐལ་འགྱུར་བའི་ལུགས་ལའང་ཐ་སྙད་ལ་དཔྱོད་པའི་ཚེ་རང་རྒྱུད་ཀྱི་གཏན་ཚིགས་ཡོད་པར་ཞང་ཐང་སག་པ་ཆེན་པོས་ཀྱང་། དོན་དམ་དཔྱོད་པའི་སྐབས་མིན་པས། །རང་རྒྱུད་བྱས་ཀྱང་འགལ་བ་མེད། །ཅེས་གསུངས་པར་གྲགས་པ་དང་། རོང་སྟོན་ཆེན་པོས་ཀྱང་འདི་བཞིན་དུ་བཞེད་པ་རྣམས་འཐད་པར་སེམས་སོ། །དངོས་པོ་སྟོབས་ཞུགས་ཀྱི་ཚད་མའི་དོན། རྣམ་འགྲེལ་ལས། དངོས་གང་ཇི་ལྟ་བུར་གྱུར་པ། །དེ་འདྲ་དེ་ནི་རྟགས་སེམས་ཀྱི། །རྒྱུ་ཡིན་དེ་ལས་དེ་ལྟར་གྱི། །དངོས་ལས་དེ་བསྐྱེད་རྟགས་ཅན་བློ། །ཞེས་གསུངས་པ་ལྟར་སྒྲུབ་རྟགས་གཉིས་ལ་བརྟེན་པའི་རྗེས་དཔག་རྟགས་འཛིན་སེམས་ལས་སྐྱེ། དེ་གཏན་ཚིགས་ལས་སྐྱེ། གཏན་ཚིགས་འབྲས་རྟགས་ཀྱི་སྐབས་སུ་ཆོས་ལས་སྐྱེ། རང་བཞིན་རྟགས་ཀྱི་སྐབས་སུ་ཆོས་དང་རྫས་གཅིག་ཡིན་དེའང་ཆོས་དེ་ལ་རྟགས་དེ་བསྐྱེད་པའི་ནུས་པ་དོན་དམ་པར་ཡོད་པའི་ཆོས་དེ་དང་རྟགས་དེ་དོན་དམ་པར་གཅིག་ཡིན་པ་ལ་རག་ལས་པ་ལ་འཇོག་དགོས་པར་བསམས་ནས་དངོས་པོ་སྟོབས་ཞུགས་ཀྱི་ཚད་མ་དབུ་མ་པས་ཁས་མི་ལེན་པར་རྨ་བྱ་ཆེན་པོས་བཤད་ཀྱང་། ས་པཎ་གྱིས་དངོས་སྨྲ་བ་རྣམས་ཀྱིས་དེ་ལྟར་འདོད་ཀྱང་། དབུ་མ་པས་ཆོས་དེ་ལ་རྟགས་དེ་བསྐྱེད་པའི་ནུས་པ་ཐ་སྙད་དུ་ཡོད་པའམ། ཆོས་དེ་དང་རྟགས་དེ་ཐ་སྙད་དུ་གཅིག་ཡིན་པ་ཙམ་གྱིས་ཆོག་པ་ལ་དགོངས་ནས་དངོས་པོ་སྟོབས་ཞུགས་ཀྱི་རིགས་པ་བཞེད་པར་བཤད་པ་ནི་ཤིན་ཏུ་ལེགས་སོ། །འོ་ན་མ་དམིགས་པའི་རྟགས་ལ་དངོས་པོ་སྟོབས་ཞུགས་ཇི་ལྟར་བྱ་སྙམ་ན། དེ་དག་གི་ཁྱབ་འབྲེལ་ཡང་སྒྲུབ་རྟགས་ཀྱི་འབྲེལ་པ་གཉིས་ལ་རག་ལས་པར་གསུངས་པ་ཤེས་དགོས་ཏེ་གཞན་དུ་རྟོགས་པར་བྱའོ། །སྔ་རབས་ཀྱི་སྐྱེས་ཆེན་དག་གི་བཤད་པར་འཐད་པའི་ཕྱོགས་རྣམས་ནི་རང་ལུགས་ཀྱི་སྐབས་སུ་འབྱུང་ངོ་། །བཞི་པ་ཕྱིས་ཀྱི་རང་དགར་བཏགས་པའི་རྣམ་གཞག་ཞིབ་ཏུ་དགག་པ་ལ་གཉིས་ཏེ། སྒྲོ་སྐུར་སྤངས་ཏེ་འདོད་པ་བརྗོད་པ། གཟུ་བོར་གནས་ཏེ་སུན་འབྱིན་བཤད་པའོ། །དང་པོ་ནི། ཆོས་རྗེ་ཙོང་ཁ་པའི་དྲང་ངེས་རྣམ་འབྱེད་དུ་ཐལ་འགྱུར་བ་ལ་བདག་མེད་རྟོགས་པ་དང་། བདག་འཛིན་ཕྲ་རགས་སོགས་ཀྱི་ཐུན་མོང་མ་ཡིན་པའི་ཁྱད་པར་དང་། ཕྱི་དོན་འཇོག་ཅིང་ཀུན་གཞི་རང་རིག་ཁས་མི་ལེན་པའི་ཐུན་མོང་མ་ཡིན་པའི་ཁྱད་པར་དང་། རང་རྒྱུད་ཁས་མི་ལེན་པའི་ཐུན་མོང་མ་ཡིན་པའི་ཁྱད་པར་གསུམ་དུ་བྱས་ནས་དང་པོའི་སྐབས་སུ་དེ་ལྟར་བདག་དང་ཆོས་རྣམས་ཀྱི་ཐ་སྙད་ཀྱི་དོན་བཙལ་བ་ན་གཅིག་དང་ཐ་དད་སོགས་ཅུང་ཟད་ཀྱང་མི་རྙེད་ལ། འོན་ཀྱང་མཆོད་སྦྱིན་ནོ། །མིག་གོ །ཞེས་སོགས་ཀྱི་ཐ་སྙད་ཀྱང་ངེས་པར་བྱ་དགོས་པས་ཐ་སྙད་ཀྱི་དབང་གིས་མ་བཞག་པའི་ངོ་བོ་མེད་པ་དང་། ཐ་སྙད་ཀྱི་དབང་གིས་ཡོད་པར་གཞག་པ་ལ་འཁོར་འདས་ཀྱི་རྣམ་གཞག་ཐམས་ཅད་ཆེས་ཤིན་ཏུ་འཐད་པའི་བདེན་གཉིས་ཀྱི་རྣམ་གཞག་འདི་ནི་སངས་རྒྱས་བསྐྱངས་དང་ཟླ་བའི་ཞབས་ཀྱི་ཁྱད་ཆོས་བླ་ན་མེད་པའོ། །དབུ་མ་པས་ཐ་སྙད་དུ་འཇོག་ཚུལ་ནི་འཇིག་རྟེན་པའི་ཐ་སྙད་ནི་ས་བོན་ལས་མྱུ་གུ་སྐྱེ་བ་སོགས་ཀྱི་རྣམ་གཞག་བྱེད་ཀྱང་ཐ་སྙད་ཀྱི་དོན་དེ་ཇི་ལྟར་ཡིན་བཙལ་ནས་བདག་གམ་གཞན་ལས་སྐྱེ་བ་སོགས་ཀྱིས་བཤད་པ་མེད་པ་ཁོ་ནར་འཇོག་པ་ཡིན་ཞིང་། འཕགས་པས་ཀྱང་དེ་ཁོ་ན་ལྟར་བཤད་པའི་ཕྱིར་དང་། གང་ཟག་ཞེས་མིང་དུ་བཏགས་པའི་དོན་རིགས་པ་ལྔའམ་བདུན་གྱིས་བཙལ་བ་ན་མེད་པར་འཇོག་ལ། དེ་ལྟར་བཙལ་བའི་ཚེ་ན་མི་རྙེད་པ་ནི་ལུགས་འདིའི་ཐུན་མོང་མ་ཡིན་པའོ། །ངར་འཛིན་ལྷན་སྐྱེས་ཀྱི་དམིགས་པ་ནི་ང་ཞེས་འཛིན་པའི་གཞི་ཡིན་པས་ཀྱང་གཞན་རྒྱུད་ཀྱི་གང་ཟག་རང་གི་མཚན་ཉིད་ཀྱིས་གྲུབ་པར་འཛིན་པ་གང་ཟག་གི་བདག་འཛིན་ཡིན་ཡང་འཇིག་ལྟ་མ་ཡིན་ནོ། །ལུགས་འདིའི་ཤེས་སྒྲིབ་ནི་འཇུག་འབྲེལ་ལས་གསུངས་པ་ལྟར་ཉོན་མོངས་པའི་བག་ཆགས་འབའ་ཞིག་ཡིན་ལ། དེའི་འབྲས་བུ་གཉིས་སྣང་འཁྲུལ་པའི་ཆ་ཐམས་ཅད་ཀྱང་དེར་བསྡུའོ། །ཤེས་སྒྲིབ་འདི་སྤོང་བ་ལ་དེ་ཁོ་ན་ཉིད་རྟོགས་པའི་ལམ་སྔར་བཤད་པ་ལས་གཞན་པ་མེད་མོད་ཀྱང་། ཐབས་ཀྱི་ཡན་ལག་ཚང་མ་ཚང་དང་། དུས་རིང་པོར་གོམས་མ་གོམས་ལས་ཐེག་པ་ཆེ་ཆུང་གི་སྤངས་པའི་ཁྱད་པར་བྱུང་ངོ་། །གཉིས་པའི་སྐབས་སུ་ཕྱི་རོལ་གྱི་དོན་འདོད་པ་ཙམ་དུ་ལེགས་ལྡན་འབྱེད་དང་འདྲའང་འདོད་ཚུལ་མི་འདྲ་སྟེ། ལེགས་ལྡན་འབྱེད་ཀྱིས་རང་གི་མཚན་ཉིད་ཀྱི་གྲུབ་པར་འདོད་ཅིང་འདི་བས་ཕྱི་རོལ་གྱི་དོན་ཞེས་མིང་གི་བཏགས་པ་ཙམ་གྱིས་གྲུབ་པར་འདོད་པའོ། །ཐ་སྙད་དུ་ཀུན་གཞིའང་ཁས་མི་ལེན་ཏེ། འཇུག་པར། ལས་འབྲས་ཀྱི་རྟེན་ཀུན་གཞི་མེད་ཀྱང་ལས་འགགས་ནས་ཡུན་རིང་དུ་ལོན་པས་ཀྱང་འབྲས་བུ་བསྐྱེད་པའི་རྣམ་གཞག་གསུངས་པའི་ཕྱིར་རོ། །ཕྱི་རོལ་ཁས་ལེན་པའི་གནད་ཀྱིས་ཀྱང་ཀུན་གཞི་མི་འཇོག་པ་ཡིན་ཏེ། དེ་ཁས་ལེན་ན། དབུ་མཐའ་ལས། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེ་བོ་དེ་དོན་མེད། །དེ་མེད་པས་ན་དེ་ཡང་མེད། །ཅེས་གསུངས་པ་ལྟར་འདོད་དགོས་པའི་ཕྱིར་རོ། །རང་རིག་ཐ་སྙད་དུ་ཁས་མི་ལེན་པའི་ཚུལ་ཡང་འཇུག་པ་རྩ་འགྲེལ་ལས། གཞན་གྱི་དྲན་པའི་རྟགས་ཀྱིས་རང་རིག་བསྒྲུབ་པ་བཀག་ནས་རང་ལུགས་ལ་རང་རིག་མེད་ཀྱང་དྲན་པ་སྐྱེ་བའི་རྣམ་གཞག་གསུངས་པའི་ཕྱིར་རོ། །དེས་ན་རང་རིག་ཐ་སྙད་དུ་མི་བཞེད་པའང་ཐ་སྙད་དུ་རང་གི་མཚན་ཉིད་ཀྱིས་གྲུབ་པ་འགོག་པ་འདིའི་མཐར་ཐུག་པ་ཡིན་ནོ། །མྱོང་བ་ལ་རང་གིས་དང་གཞན་གྱི་མྱོང་བ་གཉིས་སུ་ཁ་ཚོན་ཆོད་མ་ཆོད་གསལ་བར་མ་གསུངས་ཀྱང་མ་ཆོད་པ་དགོངས་པ་ཡིན་ཏེ། མར་མེས་རང་གིས་རང་གསལ་བར་བྱེད་པ་མི་བཞེད་ཅིང་གསལ་བར་ཡང་བཞེད་པས་རང་གིས་དང་གཞན་གྱིས་གསལ་བར་བྱེད་པ་གཉིས་སུ་ཁ་ཚོན་མ་ཆོད་པ་བཞིན་ནོ། །གསུམ་པའི་སྐབས་སུ་གསུང་རབ་ཀྱི་དོན་འདི་ལྟར་འགྲེལ་ན་རང་རྒྱུད་འདོད་དགོས་ལ། འདི་ལྟར་འགྲེལ་ན་དེ་འདོད་དུ་མི་རུང་ངོ་ཞེས་པའི་དོན་ངེས་པར་བྱ་དགོས་པས་རང་གི་ལུགས་ནི་དགོངས་འགྲེལ་ལས་གསུངས་པ་ལྟར་རང་གི་མཚན་ཉིད་ཀྱིས་གྲུབ་པར་འདོད་ན་ནི་ངེས་པར་རང་རྒྱུད་བྱ་དགོས་ཏེ། རང་སྡེ་དངོས་པོར་སྨྲ་བ་རྣམས་དང་། ལེགས་ལྡན་ལ་སོགས་པ་བཞིན་ནོ། །ཐ་སྙད་དུའང་རང་གི་མཚན་ཉིད་ཀྱིས་གྲུབ་པའི་ཆོས་མི་འདོད་ན་ནི་རང་རྒྱུད་ཁས་མི་ལེན་པ་གདོན་མི་ཟ་བར་བྱ་དགོས་པས་འདིའང་དགག་བྱ་ཕྲ་མོ་ནས་འགོག་པ་འདི་ལ་ཐུག་གོ །ཚིག་གསལ་ལས། རང་རྒྱུད་བྱ་མི་རིགས་པའི་ཤེས་བྱེད་དུ་རྩོད་ཟློག་ལས། གལ་ཏེ་ངས་དམ་བཅས་འགའ་ཡོད་ཞེས་སོགས་ཚིགས་སུ་བཅད་པ་གཅིག་གསུངས་པ་དྲངས་པ་ཡིན་ལ། དེའི་ཚིག་རྐང་དང་པོ་གཉིས་ཀྱི་དོན། འཇུག་པར་གང་ལ་ཕྱོགས་ཡོད་དེ་ལ་འགྱུར་གྱི་ཞེས་པའི་དོན་ཡིན་ལ། ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པའི་དོན་ཡང་བདག་ལ་ཕྱོགས་འདི་ནི། ཡོད་པ་མིན་པས་ཐལ་བར་འགྱུར་བ་འདི་ནི་སྲིད་མ་ཡིན། །ཞེས་པའི་དོན་ཡིན་པས་དམ་བཅའ་དང་ཕྱོགས་མེད་པ་ནི་རང་མཚན་ནམ་རང་བཞིན་གྱིས་གྲུབ་པའི་ཁས་ལེན་མེད་པའི་དོན་དུ་འཇུག་འགྲེལ་གྱིས་བཤད་པ་ལྟར་རོ། །དེས་ན་ཤེས་རབ་སྒྲོན་མར་གཞན་གྱི་སྐྱོན་བརྗོད་ཀྱི་སྐབས་ཤིག་ཏུ་རང་དབང་དུ་བྱས་ནས་སམ། སུན་འབྱིན་པའི་དབང་དུ་བྱས་ནས་བརྗོད། ཅེས་རང་དབང་ཞེས་བསྒྱུར་བ་འདི་དང་། རང་རྒྱུད་གཉིས་དོན་གཅིག་པས་ཕྱི་རྒོལ་གྱི་ཁས་བླངས་ལ་མ་འཁྲིས་པར་ཚད་མས་དོན་གྱི་སྡོད་ལུགས་ནས་རང་དབང་དུ་ཆོས་ཅན་གཉིས་དང་། རྟགས་ཀྱི་ཚུལ་རྣམས་གྲུབ་ཚུལ་ངེས་པར་བྱས་ནས་བསྒྲུབ་བྱ་རྟོགས་པའི་རྗེས་དཔག་བསྐྱེད་པ་ཞིག་རང་རྒྱུད་ཀྱི་དོན་ཡིན་ནོ། །དེ་ནི་ཡོད་པ་རྣམས་རང་གི་ངོ་བོས་ཡོད་པར་འདོད་པའི་ཕྱི་རྒོལ་ལ་བསྒྲུབ་བྱ་གྲུབ་མ་ཟིན་གྱི་གོང་དུ་རང་གི་ངོ་བོས་ཡོད་མེད་གང་གིས་ཀྱང་ཁྱད་པར་དུ་མ་བྱས་པའི་ཚད་མས་གཞལ་བྱ་གྲུབ་ལུགས་འདི་འདྲ་ཞིག་ཡིན་ནོ། །ཞེས་ངེས་པར་བྱ་མི་ནུས་པས་རྟགས་དང་བསྒྲུབ་བྱ་འདོད་ཀྱང་རང་རྒྱུད་ཀྱི་རྟགས་དང་བསྒྲུབ་བྱ་མི་འདོད་པ་ཡིན་ནོ། །རྟེན་འབྱུང་གི་གཏན་ཚིགས་དང་གཟུགས་བརྙན་གྱི་དཔེ་ལ་བརྟེན་ནས་མྱུ་གུ་རང་གི་ངོ་བོས་གྲུབ་པའི་རང་བཞིན་མེད་པར་བསྒྲུབ་པའམ་གཞན་གྲགས་ཀྱི་རྗེས་དཔག་འགོད་པ་ལ། རང་ཉིད་མྱུ་གུ་རྟེན་འབྱུང་དང་བརྟེན་ནས་འབྱུང་བ་ལ་རང་བཞིན་མེད་པའི་ཁྱབ་པ་ཁས་མི་ལེན་པའི་རྒྱུ་མཚན་གྱིས་གཉིས་ཀ་ལ་མ་གྲུབ་པ་དང་གཞན་གྲགས་ཞེས་ཟེར་བ་མིན་གྱི་སྔར་ལྟར་ཕྱི་རྒོལ་ལ་ཚད་མས་རང་དབང་དུ་བསྒྲུབ་པར་མ་བྱུང་བས་དེ་ལྟར་དུ་ཚད་མས་རང་གཞན་གཉིས་ཀ་ལ་མ་གྲུབ་པའི་དོན་ནོ། །མྱུ་གུ་དང་དེ་རྟེན་འབྱུང་སོགས་ཐ་སྙད་པའི་ལྷན་སྐྱེས་ཀྱི་ཚད་མས་གྲུབ་པའང་རྒོལ་ཕྱི་རྒོལ་གཉིས་ཀའི་རྒྱུད་ལ་ཡོད་མོད་ཀྱི་དེ་དང་རང་གི་ངོ་བོས་ཡོད་པ་འཇལ་བའི་ཚད་མ་གཉིས་ཕྱི་རྒོལ་གྱི་ངོར་འདྲེས་ནས་ལྟ་བ་མ་སྐྱེས་བར་དུ་མི་ཕྱེད་པས། སྔ་རྒོལ་གྱིས་ཕྱེད་ཀྱང་དེའི་རིང་ལ་སྟོན་མི་ནུས་སོ། །ཐལ་འགྱུར་བ་ནང་ཕན་ཚུན་ལ་ཁས་བླངས་མ་འཁྲིས་པར་ཚད་མས་གྲུབ་ཚུལ་བསྟན་དུ་ཡོད་ཀྱང་མིང་གི་ཐ་སྙད་ཀྱི་དབང་གིས་བཞག་པའི་ཚད་མ་ཡིན་གྱིས་དངོས་པོའི་རང་གི་ངོ་བོའི་དབང་གིས་བཞག་པ་མིན་པས་རང་རྒྱུད་མི་རུང་ངོ་། །མྱུ་གུ་ལྟ་བུ་རང་གི་ངོ་བོས་ཡོད་པར་འཛིན་པ་དང་མེད་པར་འཛིན་པ་དང་། དེ་གཉིས་གང་གིས་ཀྱང་ཁྱད་པར་དུ་མ་བྱས་པའི་འཛིན་པ་གསུམ་ཡོད་ལ་ལྟ་བ་སྐྱེས་པའི་རྒྱུད་ལ་གསུམ་ཀ་ཡོད་ཀྱང་ལྟ་བ་མ་རྙེད་པའི་རྒྱུད་ལ་དང་པོ་དང་ཐ་མ་གཉིས་ལས་མེད་པའི་ཁྱད་པར་རྣམས་ལེགས་པར་ཤེས་ན་རྟོག་པས་འདིའོ་སྙམ་དུ་གང་བཟུང་ཐམས་ཅད་རིགས་པས་མི་འགོག་པ་དང་། །ལྟ་བ་རྒྱུད་ལ་མ་སྐྱེས་གོང་གི་བྱང་ཆུབ་ཀྱི་སེམས་སྦྱོང་བ་ལ་སོགས་པ་ཐམས་ཅད་བདེན་འཛིན་ནམ། མཚན་འཛིན་དུ་འདུག་གོ་སྙམ་ནས་ལྟ་བ་རྒྱུད་ལ་སྐྱེས་པར་རློམ་པའི་འོག་ཏུ་སྤྱོད་ཕྱོགས་ཐམས་ཅད་ལ་ཞེ་རྩིས་མེད་པའི་ལོག་ལྟ་རྣམས་ལེགས་པར་ཁེགས་པར་འགྱུར་རོ། །དེས་ན་གཞན་གྲགས་ཀྱི་རྟགས་ཀྱིས་བསྒྲུབ་བྱ་བསྒྲུབ་པ་ལ་ཕ་རོལ་པོས་ཁས་བླངས་པ་ཙམ་གྱི་མི་ཆོག་གི་ཆོས་ཅན་གཉིས་དང་། རྟགས་ལ་སོགས་པ་རང་ངོས་ནས་གཞལ་ན་ཚད་མས་ཀྱང་གྲུབ་ལ། ཁོ་རང་ཡང་ངེས་པར་འདོད་དགོས་པའམ་འདོད་པ་ཅིག་དགོས་ཏེ། དེ་མེད་པར་ཞེན་ཡུལ་ལ་འཁྲུལ་ན་དེས་དེ་ཁོ་ན་ཉིད་རྟོགས་པའི་ལྟ་བ་བསྐྱེད་པར་མི་ནུས་པའི་ཕྱིར་རོ། །ཞེས་པ་རྣམས་བྲིས་སོ། །ཡང་འཇུག་པའི་ཊཱི་ཀར། ཡང་དག་པར་གྲུབ་པ། དོན་དམ་པར་གྲུབ་པ། བདེན་པར་གྲུབ་པ་གསུམ་ནི་ཐལ་རང་གཉིས་ཆར་གྱི་ཐུན་མོང་གི་དགག་བྱ་ཡིན་ཞིང་། རང་གི་མཚན་ཉིད་ཀྱིས་གྲུབ་པ། རང་བཞིན་གྱིས་གྲུབ་པ། ངོ་བོ་ཉིད་ཀྱིས་གྲུབ་པ་གསུམ་ནི་ཐལ་འགྱུར་བའི་ཐུན་མོང་མ་ཡིན་པའི་དགག་བྱ་ཡིན་གྱི་རང་རྒྱུད་པའི་དགག་བྱར་མི་བྱེད་དོ་ཞེས་བྱ་བ་བྲིས་སོ། །གཉིས་པ་ནི། ཐ་སྙད་ཀྱིས་བཞག་པའི་དོན་དམ། མིང་གི་བཏགས་པའི་དོན་བཙལ་བའི་ཚེ་མ་རྙེད་པ་ཐུན་མོང་མ་ཡིན་པའི་ཆོས་སུ་བྱེད་པ་རྣམས་སྔར་མཚན་གཞིའི་སྐབས་སུ་བཀག་ཟིན་ཅིང་། སླར་ཡང་ཁས་བླངས་ནང་འགལ་སྟོན་ན། ཐ་སྙད་པའི་ཚད་མས་བཙལ་བའི་ཚེ་མ་རྙེད་པ་ལ་བྱེད་ན་ནི་མིང་གིས་བཏགས་པ་ཙམ་གྱིས་བཞག་པའི་དོན་དེ་དག་ལ་རིགས་ཤེས་ཚད་མས་མི་གནོད་ཅིང་དེ་ལས་གཞན་པའི་ཚད་མས་ཀྱང་མི་གནོད་དེ། ཚད་མས་སྒྲུབ་པའི་ཕྱིར་རོ། །ཞེས་དྲང་ངེས་རྣམ་འབྱེད་ཉིད་དུ་བྲིས་པ་དང་འགལ་ལོ། །ཡང་དྲང་ངེས་རྣམ་འབྱེད་ལས། ཙམ་སྒྲས་ཐ་སྙད་ཀྱི་དབང་གིས་མ་བཞག་པ་གཅོད་པ་ཡིན་གྱི། ཐ་སྙད་པའི་ཚད་མས་གྲུབ་པ་ནི་མི་གཅོད་ཅེས་པ་འདི་དང་ཡང་འགལ་ཏེ། འདི་ནི་ལྷས་བྱིན་ཞེས་སོགས་གང་ཟག་གི་ཐ་སྙད་དང་། འདི་ནི་མིག་གོ་ཞེས་སོགས་ཆོས་ཀྱི་ཐ་སྙད་ཀྱི་དོན་རྣམས་ཐ་སྙད་ཀྱི་དབང་གིས་བཞག་པ་ལས་གཞན་པའི་འཇོག་བྱེད་ཡོད་པར་ཐལ། དེ་དག་ཐ་སྙད་པའི་ཚད་མས་གྲུབ་པའི་དབང་གིས་བཞག་པ་གང་ཞིག ཐ་སྙད་ནི་མིང་ཙམ་ལ་འདོད་པའི་ཕྱིར་རོ། །དེས་ན་ཐ་སྙད་ཀྱིས་བཏགས་པའི་དོན་ཚད་མས་གྲུབ་པར་འདོད་བཞིན་དུ་མིང་གིས་བཏགས་པ་ལས་གཞན་པའི་འཇོག་བྱེད་མེད་ཅེས་པ་འདི་ལ་དཔྱོད་ལྡན་སུ་ཞིག་ཡིད་ཆེས་པར་འགྱུར། གལ་ཏེ་བཏགས་པའི་དོན་དེ་དག་དོན་དམ་དཔྱོད་བྱེད་ཀྱི་རིགས་པས་བཙལ་བའི་ཚེ་མ་རྙེད་པའི་དོན་ཡིན་ན་ནི། དེ་དག་དོན་དམ་དཔྱོད་བྱེད་ཀྱི་རིགས་པས་བཙལ་བའི་ཚེ་མི་རྙེད་པ་ནི་རང་རྒྱུད་པ་རྣམས་ཀྱང་འདོད་པས་ཐལ་འགྱུར་བའི་ཐུན་མོང་མ་ཡིན་པའི་ཁྱད་ཆོས་སུ་ཇི་ལྟར་འགྱུར། འཇིག་རྟེན་ན་ས་བོན་ལས་མྱུ་གུ་སྐྱེ་ཞེས་པའི་ཐ་སྙད་ཀྱི་དོན་བཙལ་བའི་ཚེ་མ་རྙེད་པ་ནི་མཐའ་བཞིར་དཔྱད་པའི་ཚེ་མ་རྙེད་པ་ལ་འཇོག་པ་དང་། ས་བོན་ལས་མྱུ་གུ་སྐྱེ་བ་ལ་རིགས་ཤེས་ཚད་མས་གནོད་པ་འགལ་ཏེ། དེ་ལྟར་དཔྱད་ནས་ས་བོན་ལས་མྱུ་གུ་སྐྱེ་བ་མ་རྙེད་པའི་ཚད་མ་ནི་རིགས་ཤེས་ཚད་མ་ཡིན་པའི་ཕྱིར་རོ། །ས་བོན་ལས་མྱུ་གུ་སྐྱེ་བ་མཐའ་བཞིར་དཔྱད་པའི་ཚེ་མ་རྙེད་པ་དང་། གང་ཟག་རིགས་པ་ལྔའམ་བདུན་གྱིས་བཙལ་བའི་ཚེ་མ་རྙེད་པ་བཏགས་དོན་བཙལ་བའི་ཚེ་མ་རྙེད་པའི་དོན་དུ་བྱེད་པ་ནི་ཐལ་འགྱུར་བའི་ཐུན་མོང་མ་ཡིན་པའི་ཁྱད་ཆོས་སྒྲུབ་པར་འདོད་ཀྱང་ངོས་གཟུང་མེད་པ་ཞིག་བྱེད་པར་སྣང་སྟེ། ལེགས་ལྡན་འབྱེད་ཀྱིས་ཀྱང་ཆོས་ཅན་ནང་གི་འདུ་བྱེད་ལ་རིགས་པས་དཔྱད་ནས་སྐྱེ་སོགས་འགོག་པའི་ཚེ་ཆོས་ཅན་མཐུན་སྣང་དུ་གྲུབ་པ་ཁས་བླངས་པ་དང་། དེའི་ཚེ་རྟེན་ཆོས་ཅན་ཕྱིན་ཅི་ལོག་ཙམ་གྱིས་བདག་གི་དངོས་པོར་རྙེད་པ་ནི་ཉམས་པར་འགྱུར་བར་ལེགས་ལྡན་འབྱེད་རང་ཉིད་ཀྱིས་ཁས་བླངས་པ་གཉིས་ལ་སློབ་དཔོན་ཟླ་བས་ནང་འགལ་བསྟན་པས་ལེགས་ལྡན་འབྱེད་ཀྱིས་ཆོས་ཅན་ནང་གི་འདུ་བྱེད་སྐྱེ་སོགས་བཀག་པའི་ཚེ་མི་རྙེད་པར་ཁས་བླངས་པའི་ཕྱིར་རོ། །ཇི་སྐད་དུ། ཚིག་གསལ་ལས། ཇི་ལྟར་འདིར་ཆོས་དང་ཆོས་ཅན་སྤྱི་ཙམ་ཞིག་འཛིན་པ་དེ་བཞིན་དུ་འདིར་ཡང་ཁྱད་པར་དོར་བའི་ཆོས་ཅན་ཙམ་ཞིག་འཛིན་པར་འགྱུར་རོ་ཞེ་ན། དེ་ནི་དེ་ལྟར་མ་ཡིན་ཏེ། འདི་ལྟར་གང་གི་ཚེ་འདིར་སྐྱེ་བ་བཀག་པ་བསྒྲུབ་པ་བྱ་བའི་ཆོས་སུ་འདོད་པ་དེའི་ཚེ་དེ་ཁོ་ནར་དེའི་རྟེན་ཆོས་ཅན་ཕྱིན་ཅི་ལོག་ཙམ་གྱིས་བདག་གི་དངོས་པོ་རྙེད་པ་ནི་ཉམས་པར་འགྱུར་བར་འདིས་རང་ཉིད་ཀྱིས་ཁས་བླངས་པ་ཉིད་དོ། །ཕྱིན་ཅི་ལོག་དང་ཕྱིན་ཅི་མ་ལོག་པ་དག་ནི་ཐ་དད་པ་ཡིན་ནོ། །དེའི་ཕྱིར་གང་གི་ཚེ་རབ་རིབ་ཅན་གྱིས་སྐྲ་ཤད་ལ་སོགས་པ་ལྟར་ཕྱིན་ཅི་ལོག་གིས་ཡོད་པ་མ་ཡིན་པ་ཡོད་པ་ཉིད་དུ་འཛིན་པ་དེའི་ཚེ་ན་ནི་ཡོད་པར་གྱུར་པའི་དོན་ཆ་ཙམ་ཡང་དམིགས་པར་ག་ལ་འགྱུར། གང་གི་ཚེ་རབ་རིབ་ཅན་མ་ཡིན་པས་སྐྲ་ཤད་ལ་སོགས་པ་ལྟར་ཕྱིན་ཅི་མ་ལོག་པས་ཡང་དག་པ་མ་ཡིན་པར་སྒྲོ་མི་འདོགས་པ་དེའི་ཚེ་ནའང་གང་གིས་ན་དེའི་ཚེ་ཀུན་རྫོབ་ཏུ་འགྱུར་བ་ཡོད་པ་མ་ཡིན་པར་གྱུར་པའི་དོན་ཆ་ཙམ་ཡང་དམིགས་པ་ག་ལ་ཡོད། ཅེས་དང་། གང་གི་ཕྱིར་དེ་ལྟར་ཕྱིན་ཅི་ལོག་པ་དང་ཕྱིན་ཅི་མ་ལོག་པ་དག་ཐ་དད་པ་དེའི་ཕྱིར་ཕྱིན་ཅི་མ་ལོག་པའི་གནས་སྐབས་ན་ཕྱིན་ཅི་ལོག་ཡོད་པ་མ་ཡིན་པའི་ཕྱིར་ན་གང་ཞིག་ཆོས་ཅན་ཉིད་དུ་འགྱུར་བ་ཞིག་ཀུན་རྫོབ་པ་ལྟ་ག་ལ་ཡོད་ཅེས་གསུང་པས་སོ། །འདི་དག་གིས་དོན་ལ་དྲང་ངེས་རྣམ་འབྱེད་ལས་དོན་དམ་པ་དང་ཀུན་རྫོབ་པ་ལ་ཁྱད་པར་དོར་ནས་མིག་སོགས་ཙམ་ཞིག་ཆོས་ཅན་དུ་འཛིན་པས་དེའི་ལན་དུ་མིག་སོགས་ཀྱི་ཆོས་ཅན་ཀྱི་རང་གི་ངོ་བོ་དེ་ཕྱིན་ཅི་ལོག་ཙམ་གྱིས་རྙེད་པ་མིན་པར་ལེགས་ལྡན་རང་ཉིད་ཀྱིས་ཁས་བླངས་ལ། ཕྱིན་ཅི་ལོག་མ་ལོག་ཐ་དད་པ་སྟེ་དངོས་འགལ་ཡིན་པ་ལ་སོགས་པའི་རིགས་པ་བསྟན་ནས་བཀག་གོ །དེ་དག་གི་དོན་ནི་མིག་སོགས་བདག་ལས་མི་སྐྱེ་བར་བསྒྲུབ་པའི་ཆོས་ཅན་དུ་བདེན་གཉིས་ཀྱི་ཁྱད་པར་དོར་བའི་མིག་སོགས་ཙམ་བཞག་ཏུ་མི་རུང་སྟེ་ཆོས་ཅན་དེ་འཇལ་བའི་ཚད་མ་ནི་ཕྱིན་ཅི་མ་ལོག་པའི་བློ་ཡིན་པས་དེའི་ཡུལ་ན་ཕྱིན་ཅི་ལོག་རང་མཚན་གྱིས་མེད་བཞིན་དུ་དེར་སྣང་བའི་བརྫུན་སྣང་མེད་པའི་ཕྱིར་རོ། །གཏན་ཚིགས་སྔ་མས་ཁས་བླངས་པ་ནི་ཡོད་པ་ཐམས་ཅད་རང་མཚན་གྱིས་ཡོད་པར་ཁས་བླངས་པའི་ཕྱིར་རོ། །ཞེས་འཆད་དོ། །འདི་ནི་ལེགས་ལྡན་འབྱེད་ཀྱིས་བདེན་གྲུབ་ཁས་བླངས་སོ་ཞེས་སྐུར་བ་འདེབས་པའི་ཆེད་དུ་ཟླ་བའི་འགྲེལ་པ་ཕྱིན་ཅི་ལོག་ཏུ་བཤད་པ་སྟེ། ཕྱིན་ཅི་ལོག་ཙམ་གྱིས་བདག་གི་དངོས་པོ་རྙེད་པ་ནི་ཉམས་པར་འགྱུར་བར་འདིས་རང་ཉིད་ཀྱིས་ཁས་བླངས་ཞེས་པའི་དོན་ལེགས་ལྡན་གྱི་སྤྱིར་མིག་སོགས་ཆོས་ཅན་གྱི་ངོ་བོ་ཕྱིན་ཅི་ལོག་གིས་རྙེད་པ་མ་ཡིན་པར་ཕྱིན་ཅི་མ་ལོག་པས་རྙེད་པར་ཁས་བླངས་པའི་དོན་ཡིན་ན། འདིར་སྐྱེ་བ་བཀག་པ་བསྒྲུབ་བྱའི་ཆོས་སུ་འདོད་པའི་དེའི་ཚེ་དེ་ཁོ་ནར་དེའི་རྟེན་ཆོས་ཅན་ཞེས་སོགས་ཀྱི་དམིགས་བསལ་གསུངས་པ་དོན་མེད་དེ། སྐྱེ་བ་བཀག་པ་བསྒྲུབ་བྱའི་ཆོས་སུ་མ་བྱས་པའི་ཚེའང་དེ་ལྟར་འདོད་པའི་ཕྱིར། དེ་ཁོ་ན་དེའི་རྟེན་ཞེས་འདོད་པའང་མི་འཐད་པར་འགྱུར་ཏེ། མིག་སོགས་ལ་སྐྱེ་བ་བཀག་བའི་ཚེ་མིག་སོགས་དེ་ཁོ་ནར་གྲུབ་པར་ལེགས་ལྡན་གྱིས་ཁས་བླངས་ཞེས་པའི་གཞི་མེད་ཀྱི་སྐུར་བ་ཟླ་བས་མི་འདེབས་པའི་ཕྱིར་རོ། །མཇུག་ཏུ་ཕྱིན་ཅི་ལོག་མ་ལོག་འགལ་བས་ཕྱིན་ཅི་མ་ལོག་པའི་གནས་སྐབས་ན་ཕྱིན་ཅི་ལོག་མེད་པ་རྒྱུ་མཚན་དུ་བྱས་ནས་ཆོས་ཅན་ཉིད་དུ་འགྱུར་བ་མིག་ཀུན་རྫོབ་པ་ག་ལ་ཡོད་ཅེས་པ་དང་ཡང་འགལ་ཏེ། ཁྱེད་ལྟར་ན་ལེགས་ལྡན་གྱི་ལུགས་ལ་མིག་སོགས་འཛིན་པའི་བློ་དེ་ཕྱིན་ཅི་མ་ལོག་པ་ཡིན་པའི་ཕྱིར་རོ། །དེས་ན་འགྲེལ་པ་དེ་དག་གི་དོན་ནི་འདི་ཡིན་ཏེ། སློབ་དཔོན་ལེགས་ལྡན་གྱིས་ཀུན་རྫོབ་བདེན་པ་ཕྱིན་ཅི་ལོག་གི་བློས་བདག་གི་དངོས་པོ་རྙེད་པ་དང་། དོན་དམ་བདེན་པ་ཕྱིན་ཅི་མ་ལོག་པའི་བློས་བདག་གིས་དངོས་པོ་རྙེད་པ་ཡིན་པར་ཁས་བླངས་པས་དེ་ལྟར་ན་མིག་སོགས་ལ་སྐྱེ་བ་བཀག་པའི་ཚེ་ཆོས་ཅན་མིག་སོགས་ཙམ་གྲུབ་པར་འདོད་པ་དང་འགལ་ཏེ། མིག་སོགས་ལ་སྐྱེ་བ་བཀག་པའི་བློ་ནི་མིག་སོགས་ཀྱི་དོན་དམ་འཇལ་བའི་བློ་ཡིན་པས་དེའི་ཡུལ་ན་མིག་སོགས་མེད་དགོས་པའི་ཕྱིར་ཏེ། མིག་སོགས་འཇལ་བའི་བློ་ནི་ཕྱིན་ཅི་ལོག་ཡིན་པས་ཕྱིན་ཅི་མ་ལོག་པ་དང་། ཕྱིན་ཅི་ལོག་པ་འགལ་བའི་ཕྱིར། ཞེས་པའི་དོན་ཏེ། འདིས་ཀྱང་སློབ་དཔོན་ལེགས་ལྡན་གྱིས་མིག་སོགས་རང་གི་མཚན་ཉིད་ཀྱིས་མ་གྲུབ་པར་བཞེད་པར་གསལ་ལོ། །གཞན་རྒྱུད་ཀྱི་གང་ཟག་རང་གི་མཚན་ཉིད་ཀྱིས་གྲུབ་པར་འཛིན་པ་གང་ཟག་གི་བདག་འཛིན་ཡིན་ཡང་འཇིག་ལྟ་མ་ཡིན་པར་འདོད་པའང་མི་འཐད་དེ། སྤྱིར་གང་ཟག་གི་བདག་འཛིན་དང་། འཇིག་ལྟ་རང་རྒྱུད་ལ་འཛིན་པ་གཙོ་ཆེ་བའམ། བདག་དང་ང་དང་གང་ཟག་དང་སྐྱེས་བུ་སོགས་རྣམ་གྲངས་ཡིན་པ་ལ་དགོངས་ནས་དམ་བཅའ་བདག་ཏུ་འཛིན་པ་ཞེས་གསུངས་ཀྱང་འཛིན་སྟངས་ཐམས་ཅད་དེར་མ་ངེས་པས་འཇིག་ཚོགས་ལ་བརྟེན་ནས་གང་ཟག་ཏུ་བདེན་པར་འཛིན་པའི་བློ་དེ་འཇིག་ལྟར་འདོད་དགོས་པའི་ཕྱིར་ཏེ། ཅི་ལྟར་ཡན་ལག་ཚོགས་རྣམས་ལ། །འཇིག་རྟེན་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱའོ། །ཞེས་གསུངས་པའི་སེམས་ཅན་ནི་རང་རྒྱུད་ཀྱིས་བསྡུས་པ་ཁོ་ན་མ་ཡིན་པའི་ཕྱིར་རོ། །གཞན་དུ་ན་གཞན་རྒྱུད་ཀྱི་ཕུང་པོ་ལ། གང་ཟག་རྣམ་པ་ལྔས་བཙལ་བའི་རིགས་པ་དེ་འཇིག་ལྟའི་ཞེན་ཡུལ་སུན་དབྱུང་པའི་རིགས་པ་མ་ཡིན་པར་འགྱུར་ཞིང་། དེའང་འདོད་ན་དེ། རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་པའི་སྐབས་ཀྱི་བདག་འགོག་བྱེད་ཀྱི་རིགས་པ་མ་ཡིན་པར་འགྱུར་རོ། །སྒྲིབ་གཉིས་དང་དེའི་གཉེན་པོའི་ངོས་འཛིན་ཐུན་མོང་མ་ཡིན་པ་ནི་ལམ་དབུ་མའི་སྐབས་སུ་དཔྱད་པར་འགྱུར་རོ། །ཕྱི་རོལ་གྱི་དོན་ཁས་མི་ལེན་པའི་རྒྱུ་མཚན་དུ་ཕྱི་རོལ་གྱི་དོན་ཞེས་མིང་གིས་བཏགས་པ་ཙམ་གྱིས་བསྒྲུབ་པར་འདོད་པ་བཀོད་པ་ནི་སྔར་ཡང་ཡང་བཀག་ཟིན་ཏོ། །ཀླུ་སྒྲུབ་ཡབ་སྲས་ཀྱིས་ཀུན་གཞི་ཁས་མི་ལེན་ཞེས་པ་ལ་འདི་འདྲི་སྟེ། རྫོགས་པའི་སངས་རྒྱས་ཀྱི་ཐེག་པ་ཆེན་པོའི་སྡེ་སྣོད་ལས་ཀུན་གཞིའི་རྣམ་གཞག་མང་དུ་གསུངས་པ་ལ་དབུ་མ་པའི་འགྲེལ་ཚུལ་དང་། སེམས་ཙམ་པའི་འགྲེལ་ཚུལ་གཉིས་ཡོད་པའི་དང་པོ་ཁས་མི་ལེན་ཞེས་པ་ཡིན་ནམ། ཕྱི་མ་ཁས་མི་ལེན་ཞེས་པ་ཡིན་ནམ། སེམས་ཙམ་པའི་འགྲེལ་ཚུལ་ལས་འགྲེལ་ཚུལ་གཞན་མེད་ཅེས་པ་གང་ཡིན། དང་པོ་ལྟར་ན་དབུ་སེམས་ཀྱི་ནང་ནས་དབུ་མ་པའི་འགྲེལ་ཚུལ་ཀླུ་སྒྲུབ་ཡབ་སྲས་ཀྱིས་ཁས་མི་ལེན་ཞེས་པ་ནི་ཤིན་ཏུ་ངོ་མཚར་རོ། །གཉིས་པ་ལྟར་ན། གཞི་བདེན་པ་གཉིས་དང་། ལམ་ཚོགས་གཉིས་དང་། འབྲས་བུ་སྐུ་གསུམ་གྱི་རྣམ་གཞག་ཐམས་ཅད་ཀླུ་སྒྲུབ་ཡབ་སྲས་ཀྱིས་ཁས་མི་ལེན་པར་འགྱུར་ཏེ། དེ་དག་དབུ་སེམས་གཉིས་ཀྱི་ནང་ནས་སེམས་ཙམ་པས་ཇི་ལྟར་བཀྲལ་བ་ལྟར་ཁས་མི་ལེན་པའི་ཕྱིར་རོ། །གསུམ་པ་ལྟར་ན། ཉན་ཐོས་པ་བཀར་མི་འདོད་པའི་ཐེག་ཆེན་བཀར་སྒྲུབ་པའི་རིགས་པ་དབུ་སེམས་གཉིས་ཆར་གྱི་གཞུང་ལས་བྱུང་བས་བཀར་གྲུབ་ཟིན་པའི་ཐེག་ཆེན་ལ་འགྲེལ་ཚུལ་གཉིས་གཉིས་ཡོད་པར་གྲུབ་ཅིང་། ཁྱད་པར་ཀུན་གཞིའི་དོན་སེམས་ཙམ་པས་འགྲེལ་ཚུལ་དང་མི་འདྲ་བར་དབུ་མ་པ་རང་གི་ལུགས་གཞག་དགོས་པར་དགོངས་ནས། བྱང་ཆུབ་སེམས་འགྲེལ་ལས། ཀུན་གཞིའི་རྣམ་ཤེས་སྲིད་པ་གསུམ་པོ་ལེན་བྱེད་དུ་གསུངས་པ་དང་། དེའང་སྟོང་ཉིད་མ་ཡིན་པ་ལ་མི་རུང་བར་དགོངས་ནས། འཇུག་འགྲེལ་ལས། དངོས་པོ་ཐམས་ཅད་ཀྱི་རང་བཞིན་རྗེས་སུ་ཞུགས་པའི་ཕྱིར། ཐ་སྙད་དུ་སྟོང་པ་ཉིད་ལ་ཀུན་གཞིའི་སྒྲས་གསུངས་ཏེ། ཞེས་གསུངས་པའི་རྣམ་གཞག་ཐམས་ཅད་དང་འགལ་བར་འགྱུར་རོ། །འཇུག་པར། ཀུན་གཞི་མེད་ཀྱང་ལས་འབྲས་ཀྱི་རྣམ་གཞག་འཐད་པར་གསུངས་པས། ཐ་སྙད་དུ་ཀུན་གཞི་ཁས་ལེན་པ་ལ་ཅུང་ཟད་ཀྱང་མི་གནོད་དེ། དེ་ནི་ལས་འགགས་ནས་མེད་པ་དང་། ལས་ཀྱི་འབྲས་བུ་མ་སྐྱེས་ནས་མེད་པའི་བར་གྱི་བར་སྟོང་སྦྲེལ་བྱེད་ཀྱི་ཀུན་གཞི་འགོག་པའི་སྐབས་ཡིན་པའི་ཕྱིར་རོ། །ཀུན་གཞི་དྲང་དོན་དུ་གསུངས་པས་ཐ་སྙད་དུ་མེད་པར་འདོད་པ་ནི་བདེན་པ་གཉིས་ཀྱི་སྒོ་ནས་དྲང་ངེས་ཕྱེ་བའི་རྣམ་གཞག་དང་འགལ་བའི་གནད་མ་རྟོགས་པར་བློ་གྲོས་རྩིང་པའི་རྣམ་འགྱུར་ཏེ། དེ་ལྟར་ན་ཀུན་རྫོབ་བདེན་པ་ཐ་སྙད་དུ་མེད་པར་ཐལ་བའི་ཕྱིར་རོ། །ཀུན་གཞི་ཁས་ལེན་ན། དོན་དང་སེམས་ཅན་བདག་རྣམ་རིག །ཅེས་པ་ལྟར། འདོད་དགོས་པས་ཕྱི་རོལ་གྱི་དོན་ཁས་ལེན་པའི་ཐབས་མེད་ཅེས་པའང་ཀུན་གཞི་ལ་འགྲེལ་ཚུལ་གཉིས་ཡོད་པ་མ་རྟོགས་པའི་སྐྱོན་ཏེ། གཞན་དུ་ན་རྣམ་ཤེས་ཁས་བླངས་ན། གཟུང་དང་འཛིན་པ་ལས་གྲོལ་བའི། །རྣམ་པར་ཤེས་པ་དོན་དམ་ཡོད། །ཅེས་པ་ལྟར་འདོད་དགོས་པས། བདེན་མེད་ཁས་ལེན་ཐབས་མེད་ཅེས་རྣམ་པ་ཀུན་ཏུ་མཚུངས་སོ། །རང་རིག་ཐ་སྙད་དུ་མི་བཞེད་པའང་ཐ་སྙད་དུ་རང་གི་མཚན་ཉིད་ཀྱིས་གྲུབ་པ་མི་བཞེད་པ་འདིའི་མཐར་ཐུག་པ་ཡིན་ནོ། །ཞེས་པའང་མི་འཐད་དེ། འཕགས་པའི་མཉམ་གཞག་སོ་སོ་རང་གིས་རིག་པའི་ཡེ་ཤེས་ཁས་བླངས་ན་རང་གི་མཚན་ཉིད་ཀྱིས་གྲུབ་པའི་ཆོས་ཅན་ཁས་ལེན་མི་དགོས་པའི་ཕྱིར་དང་། རང་རྒྱུད་ཀྱི་ཤེས་པ་རང་རྒྱུད་ཀྱི་མངོན་སུམ་གཞན་གྱིས་རིག་ན་མངོན་སུམ་ཐུག་མེད་དུ་འགྱུར་བ་དང་། མངོན་སུམ་གྱིས་གཏན་མ་རིག་ན་རང་བློ་རང་ལ་ལྐོག་ཏུ་གྱུར་པ་དཔྱོད་པ་པའི་ལུགས་ལ་གནས་པར་ཐལ་བའི་ཕྱིར་རོ། །ཀུན་མཁྱེན་ཡེ་ཤེས་རང་གིས་རང་མ་རིག་ཅེས་པའི་དོན་ཀུན་མཁྱེན་ཡེ་ཤེས་རང་དོན་ཀུན་མཁྱེན་ཡེ་ཤེས་ཐ་སྙད་དུའང་མེད་པར་སོང་བ་ལ་བྱེད་དམ། ཐ་སྙད་དུ་ཡོད་ཀྱང་མ་རིག་པ་གང་ཡིན། དང་པོ་ལྟར་ན། ཀུན་མཁྱེན་ཡེ་ཤེས་མངོན་སུམ་དུ་རྟོགས་པའི་བློ་གཏན་མེད་པར་འགྱུར་ཞིང་། ཕྱི་མ་ལྟར་ན་ཀུན་མཁྱེན་ཡེ་ཤེས་དེས་ཤེས་བྱ་ཇི་སྙེད་པ་ཐམས་ཅད་མངོན་སུམ་དུ་མ་རིག་པར་འགྱུར་རོ། །རྩ་ཤེར་དང་། རྩོད་ཟློག་དང་། ཚིག་གསལ་ལས། རིགས་པས་དཔྱད་བཟོད་ཀྱི་རང་རིག་འགོག་པའི་ལུང་རྣམས་ཤེས་བྱེད་དུ་བྱས་ནས་རང་རིག་ཐ་སྙད་པ་འགོག་པ་ལ་སྦྱར་བ་ནི་ནོར་ཏེ། རྩ་ཤེར་ལས། རང་རིག་གི་དཔེ་མར་མེ་བཀོད་པ་ལ་དཔྱད་ནས་འགོག་པའི་ཚེ་རང་གསལ་བ་བཀག་པ་བཞིན་དུ། མུན་པ་སེལ་བའང་བཀག་པས་ཐ་སྙད་དུ་མུན་པ་སེལ་བའང་མི་འཐད་པར་ཐལ་བའི་ཕྱིར་དང་། རྩོད་ཟློག་ལས། ཚད་མ་དེ་རང་གིས་གྲུབ་པ་བཀག་པའི་ཚེ་ཚད་མ་གཞན་གྱིས་གྲུབ་པའང་བཀག་པས། ཐ་སྙད་དུ་ཚད་མའི་ཡུལ་ཅན་གཏན་མེད་པར་ཐལ་བའི་ཕྱིར་དང་། ཚིག་གསལ་ལས། རང་རིག་མེད་པའི་ཤེས་བྱེད་དུ་མྱང་བར་བྱ་བའི་སེམས་མི་རྙེད་པའི་མདོ་དྲངས་པས་ཐ་སྙད་དུ་མྱང་བྱའི་སེམས་ཉིད་ཀྱང་མེད་པར་ཐལ་བའི་ཕྱིར་རོ། །གལ་ཏེ་ལང་ཀར་གཤེགས་པ་ལས། ཇི་ལྟར་རལ་གྲི་རང་གི་སོ། །གཅོད་པར་མི་བྱེད་སོར་མོ་ནི། །རང་ལ་རེག་པར་མི་བྱེད་ལྟར། །རང་རིག་སེམས་ཀྱང་དེ་བཞིན་ནོ། །ཞེས་གསུངས་པས་ཐ་སྙད་དུ་རང་རིག་ཡོད་ན། ཐ་སྙད་དུ་རལ་གྲིའི་སོས་རང་གིས་རང་གཅོད་པར་འགྱུར་རོ་སྙམ་ན་རིགས་པས་དཔྱད་པའི་གནས་སྐབས་ཀྱི་དཔེ་ལ་བརྟག་པ་མཐའ་བཟུང་མང་སྟེ། གཞན་དུ་ན་ཐ་སྙད་དུ་ནམ་མཁའི་པདྨ་ཡོད་པར་ཐལ། འཕགས་པ་ལྷས། རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམས་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་ཕྱིར་ནམ་མཁའི་པདྨ་བཞིན། །ཞེས་གསུངས་ཞིང་། ཐ་སྙད་དུ་གཅིག་དང་དུ་མ་ཡོད་པའི་ཕྱིར། འཇུག་པ་རྩ་འགྲེལ་ལས་ནི། གཞན་དབང་བདེན་པ་གྲུབ་པའི་སྒྲུབ་བྱེད། རང་རིག་བཀོད་པ་ན་རང་རིག་གི་སྒྲུབ་བྱེད་གང་ཡིན་ཞེས་དྲིས་ཏེ། དྲན་པ་བཀོད་པ་ན་དྲན་པ་བདེན་པ་བ་བཀོད་ན་སྒྲུབ་བྱེད་བསྒྲུབ་བྱ་དང་མཚུངས་ཤིང་། དྲན་པ་ཐ་སྙད་པ་བཀོད་ན་ཁྱབ་པ་མ་ངེས་ཏེ། ཡུལ་མྱོང་ལས་ཀྱང་དྲན་པ་སྐྱེ་བའི་ཕྱིར། ཞེས་བཤད་ཀྱིས། རང་རིག་ཐ་སྙད་དུའང་མེད་པར་གཏན་མ་བཤད་དོ། །གཞན་དུ་ན་འགྲེལ་པར། མྱོང་བས་མྱོང་བ་དེ་དྲན་པས་མ་མྱོང་བའང་མ་ཡིན། མྱོང་བས་བཅད་པ་དེ་དྲན་པས་མ་བཅད་པའང་མ་ཡིན་ཞེས་གསུངས་པས་དྲན་པས་རང་དྲན་པ་ཡོད་པར་གསུངས་ཤིང་། དེ་ལྟར་ན་མྱོང་བས་རང་བཅད་དམ་མ་བཅད། བཅད་ན་རང་རིག་མེད་པ་དང་འགལ་ཞིང་། མ་བཅད་ན་འགྲེལ་བའི་དོན་དང་དངོས་སུ་འགལ་ལོ། །རང་གི་མཚན་ཉིད་ཀྱིས་གྲུབ་པ་འདོད་ན་རང་རྒྱུད་བྱ་དགོས་པ་དང་། དེ་ལས་བཟློག་ན་རང་རྒྱུད་ཁས་མི་ལེན་པ་གདོན་མི་ཟ་བར་བྱ་དགོས་ཞེས་པ་མི་འཐད་དེ། སྤྱིར་ཐལ་རང་གི་ཁྱད་པར་མཐའ་བཞིའི་སྐྱེ་བ་བཀག་པའི་རིགས་པའི་སྐབས་སུ། བྱུང་ཞིང་སྐབས་དེར་སློབ་དཔོན་ལེགས་ལྡན་གྱིས་ནང་གིས་འདུ་བྱེད་བདག་ལས་སྐྱེ་བ་མེད་པར་བསྒྲུབ་པ་ལ་རང་རྒྱུད་བྱས་པ་ཡིན་པས་གཏན་ཚིགས་དེས་ཆོས་ཅན་ནང་གི་འདུ་བྱེད་རང་གི་མཚན་ཉིད་ཀྱིས་གྲུབ་པར་བསྒྲུབ་པ་ཡིན་ནམ་ཆོས་བདག་ལས་སྐྱེ་བ་མེད་པ་རང་གི་མཚན་ཉིད་ཀྱིས་གྲུབ་པར་བསྒྲུབ་པ་ཡིན་ནམ། དེ་གཉིས་ཚོགས་པ་རང་གི་མཚན་ཉིད་ཀྱིས་གྲུབ་པར་བསྒྲུབ་པ་ཡིན། དང་པོ་ལྟར་ན་ཤིན་ཏུ་མི་འཐད་དེ། དེ་རང་གི་མཚན་ཉིད་ཀྱིས་སྐྱེ་བ་མེད་པར་བསྒྲུབ་པའི་སྐབས་ཡིན་པའི་ཕྱིར། གལ་ཏེ་དེའི་ཚེ་ཆོས་ཅན་ཁས་བླངས་པ་ཉིད་ཀྱིས་རང་གི་མཚན་ཉིད་ཀྱིས་གྲུབ་པར་ཁས་བླངས་པར་འཕུལ་ཐུབ་སྟེ། ཆོས་ཅན་དེའི་གནས་ཚུལ་དཔྱོད་པའི་སྐབས་ཡིན་པའི་ཕྱིར་རོ་སྙམ་ན་དེ་ལྟར་ན་ཡང་དག་པར་གྲུབ་པ་སོགས་ཀྱང་འཕུལ་ཐུབ་པས་དགག་བྱའི་ཁྱད་པར་འབྱེད་པ་དང་འགལ་ཞིང་། རིགས་པས་ཕུལ་ནས་ཁས་ལེན་དགོས་པ་དང་། རང་ངོས་ནས་ཁས་ལེན་པའི་ཁྱད་པར་ཡང་མ་ཕྱེད་པའོ། །ཕྱི་མ་གཉིས་ལ་ནི་དགག་པའི་གཞིའང་མེད་པས་རང་རྒྱུད་ཀྱི་རྟགས་ཀྱིས་རང་གི་མཚན་ཉིད་ཀྱིས་གྲུབ་པའི་ཆོས་བསྒྲུབ་ཅེས་པ་ནི་དཔྱད་པ་མ་ཞུགས་པའམ་ཞུགས་ཀྱང་མ་རྙེད་པའོ། །གལ་ཏེ་ངས་དམ་བཅས་འགའ་ཡོད། །ཅེས་སོགས་ཀྱི་དོན་རང་གི་མཚན་ཉིད་ཀྱིས་གྲུབ་པ་ཁས་བླངས་པའི་ཕྱོགས་མེད་པས་སྐྱོན་མེད་ཅེས་པ་ལ་འཆད་དགོས་པའི་སྐབས་ཡོད་ཀྱང་གཙོ་བོ་ནི་དེ་མ་ཡིན་ཏེ། ཚིག་གསལ་ལས། ཆོས་ཅན་དེའི་གནས་ཚུལ་ལ་དཔྱད་པའི་ཚེ་ཆོས་ཅན་མངོན་སུམ་ལ་སོགས་པའི་ཚད་མ་བཞིས་གྲུབ་པ་མེད་པས་དེ་ཁས་བླངས་པའི་སྟེང་དུ་དགག་སྒྲུབ་ཀྱི་ཁྱད་ཆོས་གང་ཡང་ཁས་བླངས་པ་མེད་པའི་དོན་དུ་བཤད་པའི་ཕྱིར་རོ། །འདིས་ཐ་སྙད་ཀྱི་རྣམ་གཞག་ལ་རང་རྒྱུད་མི་འདོད་པ་ལ་ལེགས་པར་གནོད་དེ། དུ་བའི་རྟགས་ཀྱིས་ལ་མེ་ལྡན་དུ་བསྒྲུབ་པ་དང་། ལུས་ངག་གི་མཚན་མའི་རྟགས་ཀྱིས་ཕ་རོལ་པོ་རིགས་སད་པའམ་ཕྱིར་མི་ལྡོག་པར་བསྒྲུབ་པའི་ཚེ་ཆོས་ཅན་དེ་དག་མངོན་སུམ་ལ་སོགས་པའི་ཚད་མ་བཞི་པོ་གང་རུང་གིས་གྲུབ་བམ་མ་གྲུབ། དང་པོ་ལྟར་ན་རང་རྒྱུད་མེད་པ་དང་འགལ་ཏེ། གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །བསྒྲུབ་པའང་བཟློག་པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཅེས་པའི་སྐབས་ཀྱི་བསྒྲུབ་པའམ་བཟློག་པ་དེ་རང་རྒྱུད་ཡིན་པ་གཞུང་གི་དོན་ཡིན་ཅིང་། རང་ཉིད་ཀྱང་ཁས་བླངས་པའི་ཕྱིར། མ་གྲུབ་ན་ཆོས་ཅན་དེ་དག་ཐ་སྙད་དུའང་མེད་པར་འགྱུར་ཏེ། ཐ་སྙད་འཇལ་བྱེད་ཀྱི་ཚད་མ་བཞི་པོ་གང་རུང་གིས་མ་གྲུབ་པའི་ཕྱིར། གཞན་ཡང་ཚིག་གསལ་ལས་བུམ་པ་ལ་སོགས་མངོན་སུམ་དུ་ཡོད་པ་རྣམས་མངོན་སུམ་ཚད་མས་གྲུབ་པར་གསུངས་པ་དང་། ཁྱེད་ཐ་སྙད་རྣམ་འཇོག་གི་ཚེ་ཆོས་ཅན་ཚད་མས་མ་གྲུབ་པར་འདོད་པ་འགལ་མི་འགལ་སོམས་ཤིག རང་དབང་དང་རང་རྒྱུད་དོན་གཅིག་ཅེས་པའི་རང་དབང་གི་དོན་ཕྱི་རྒོལ་གྱི་ཁས་བླངས་ལ་མ་འཁྲིས་པར་སྔ་རྒོལ་རང་གིས་ཐ་སྙད་པའི་ཚད་མ་བཞི་པོ་གང་རུང་གིས་གྲུབ་པ་ལ་བྱེད་ན་ནི། ལ་མེ་ལྡན་དུ་བསྒྲུབ་པའི་ཚེ་དུ་བ་རང་དབང་དང་རང་རྒྱུད་དུ་བསྙོན་མི་ནུས་པ་ཁས་ལེན་དགོས་ཤིང་། དེའི་དོན་དུ་མི་བྱེད་ན་སུན་འབྱིན་པའང་སྔར་རྒོལ་རང་གི་ཐ་སྙད་པའི་ཚད་མས་མ་གྲུབ་པར་གཞན་གྱི་ཁས་བླངས་ལ་འཁྲིས་པ་མ་ཡིན་པར་རྣམ་པ་ཀུན་ཏུ་མཚུངས་སོ། །དངོས་པོ་རང་གི་ངོ་བོས་གྲུབ་པར་འདོད་པའི་ཕྱིར་རྒོལ་ལ་བསྒྲུབ་བྱ་མ་གྲུབ་པའི་གོང་དུ་རང་རྒྱུད་ཀྱི་རྟགས་དང་བསྒྲུབ་བྱ་མི་འདོད་ཅེས་པ་ཤིན་ཏུ་མི་འཐད་དེ། དེའི་ངོར་རང་རྒྱུད་ཀྱི་རྟགས་དང་བསྒྲུབ་བྱ་འདོད་པའི་དུས་གཏན་མེད་པར་ཐལ་བའི་ཕྱིར་ཏེ། བསྒྲུབ་བྱ་གྲུབ་ཟིན་པའི་རྗེས་སུ་རང་རྒྱུད་ཀྱི་རྟགས་དང་བསྒྲུབ་བྱ་མི་འདོད་པའི་ཕྱིར་རོ། །རྟེན་འབྱུང་གི་རྟགས་ཀྱིས་མྱུ་གུ་རང་གི་ངོ་བོས་གྲུབ་པའི་རང་བཞིན་མེད་པར་བསྒྲུབ་པའི་ཚེ་མྱུ་གུ་རྟེན་འབྱུང་དུ་སྔ་རྒོལ་གྱིས་ཁས་ལེན་ཞེས་པ་ནི་མི་འཐད་དེ། དེ་ལྟར་ན་ཆོས་ཅན་མྱུ་གུ་དང་། དེའི་སྟེང་དུ་གཏན་ཚིགས་བརྟེན་འབྱུང་ཁས་བླངས་པས་རང་རྒྱུད་ཀྱི་རྟགས་སུ་ཐལ་བ་བཟློག་དུ་མེད་པའི་ཕྱིར་རོ། །ཐལ་འགྱུར་བ་ནང་ཕན་ཚུན་ལ་ཁས་བླངས་མ་འཁྲིས་པར་ཚད་མས་གྲུབ་ཚུལ་བསྟན་དུ་ཡོད་ཀྱང་མིང་གི་ཐ་སྙད་ཀྱི་དབང་གིས་བཞག་པའི་ཚད་མ་ཡིན་པས་རང་རྒྱུད་མི་རུང་ཞེས་པའི་དོན་ཚད་མ་དེ་ཚིག་གསལ་ལས་གསུངས་པ་ལྟར་གྱི་མངོན་སུམ་ལ་སོགས་པ་བཞི་པོ་གང་རུང་ཡིན་ན་ནི་རང་རྒྱུད་དུ་ཐལ་བ་བཟློག་ཏུ་མེད་ཅིང་། དེ་ལས་གཞན་པའི་ཐ་སྙད་འཇལ་བྱེད་ཀྱི་ཚད་མ་ནི་ཡབ་སྲས་གཉིས་ཀྱི་དབུ་མའི་གཞུང་ལས་མ་བཤད་དོ། །ལྟ་བ་མ་རྙེད་པའི་རྒྱུད་ལ་མྱུ་གུ་ལྟ་བུ་རང་གི་ངོ་བོས་ཡོད་མེད་གང་གིས་ཀྱང་ཁྱད་པར་དུ་མ་བྱས་པའི་འཛིན་པ་ཡོད་པའང་དབུ་མའི་གཞུང་དང་འགལ་ཏེ། ལུས་ལ་ལུས་དབང་ཇི་བཞིན་དུ། །གཏི་མུག་ཀུན་ལ་གནས་འགྱུར་ཏེ། །ཞེས་པའི་དོན། ལྟ་བ་མ་རྙེད་པའི་རྒྱུད་ཀྱི་མྱུ་གུ་འཛིན་པའི་རྟོག་པ་ཡིན་ན། མྱུ་གུ་བདེན་པར་འཛིན་པའི་བློ་ཡིན་པས་ཁྱབ་པའི་དོན་ཡིན་པའི་ཕྱིར་རོ། །གཞན་ཡང་དེའི་རྒྱུད་ལ་མྱུ་གུ་རང་གི་ངོ་བོས་མེད་པར་འཛིན་པའི་འཛིན་པ་ཡོད་པར་ཐལ། དེའི་རྒྱུད་ལ་མྱུ་གུ་རྟེན་འབྱུང་དུ་ཐ་སྙད་པའི་ལྷན་སྐྱེས་ཀྱི་ཚད་མས་གྲུབ་པ་ཡོད་པའི་ཕྱིར། རྟགས་ཁས་བླངས་ཏེ། དེའི་རྒྱུད་ལ་དེ་དང་དངོས་པོ་རང་གི་ངོ་བོས་ཡོད་པ་འཇལ་བའི་ཚད་མ་གཉིས་འདྲེས་ནས་ཡོད་པའི་ཕྱིར། དེས་ན་དེ་གཉིས་ཕྱི་རྒོལ་གྱི་རྒྱུད་ལ་འདྲེས་ནས་མ་ཕྱེད་པར་ཡོད་ཅེས་པ་འདི་ཐུགས་རྩེ་གཏད་མཚམས་མེད་པར་རང་དགར་སྨྲས་པ་ཡིན་པ་འདྲ་སྟེ། སྒྲ་མི་རྟག་པར་བསྒྲུབ་པའི་ཕྱིར་རྒོལ་གྱི་རྒྱུད་ལ་སྒྲ་རྟག་འཛིན་གྱི་སྒྲོ་འདོགས་དང་། སྒྲ་མི་རྟག་པར་རྟོགས་པའི་ཚད་མ་གཉིས་འདྲེས་ནས་མ་ཕྱེད་པར་ཡོད་པའི་ཚུལ་ནི་གཞན་སུས་ཀྱང་འཇོག་མི་ཤེས་པའི་ཕྱིར་རོ། །རྟོག་པས་འདིའོ་སྙམ་དུ་གང་གཟུང་ཐམས་ཅད་རིགས་པས་མི་འགོག་པ་ནི་སྔར་བཀག་ཟིན་ལ། ལྟ་བ་རྒྱུད་ལ་མ་སྐྱེས་གོང་གི་བྱང་ཆུབ་ཀྱི་སེམས་སྦྱོང་ལ་སོགས་པ་ཐམས་ཅད་བདེན་འཛིན་ནམ་མཚན་འཛིན་དུ་འདུག་སྙམ་དུ་གོ་བས་ལྟ་བ་རྒྱུད་ལ་སྐྱེས་པར་རློམ་པའི་འོག་ཏུ་སྤྱོད་ཕྱོགས་ཐམས་ཅད་ལ་ཞེ་རྩིས་མེད་པ་འབྱུང་བའང་མ་ངེས་ཏེ། དེའི་ཚེ་སྔར་གྱི་བདེན་འཛིན་གྱི་ཞེན་ཡུལ་དུ་གྱུར་པའི་བདེན་པ་བཀག་བྱར་གོ་བ་ཙམ་ཡིན་པའི་ཕྱིར་རོ། །གཞན་ལ་གྲགས་ཀྱི་རྟགས་ཀྱིས་བསྒྲུབ་བྱ་བསྒྲུབ་པ་ལ་ཕ་རོལ་པོས་ཁས་བླངས་པ་ཙམ་གྱིས་མི་ཆོག་པར་ཆོས་ཅན་གཉིས་དང་རྟགས་ལ་སོགས་པ་རང་ངོས་ནས་གཞལ་ན་ཚད་མས་གྲུབ་དགོས་པར་འདོད་པ་ནི། དཔལ་ལྡན་ཟླ་བས་ཚིག་གསལ་དུ། རང་རྒྱུད་བཀག་པའི་དགག་ཡུལ་མཐིལ་ཡིན་ཏེ། བདག་སྐྱེ་འགོག་པའི་སངས་རྒྱས་བསྐྱངས་ཀྱི་ལུགས་དེས་གཞན་ལ་གྲགས་ཀྱི་རྗེས་དཔག་བསྟན་པར་བཤད་པ་ན། མངོན་པར་མི་གསལ་བའི་བུམ་པ་ཆོས་ཅན། བདག་ལས་སྐྱེ་བ་མེད་དེ། རང་གི་ངོ་བོ་ཡོད་པའི་ཕྱིར། དཔེར་ན། མངོན་གསལ་གྱི་བུམ་པ་བཞིན་ཞེས་འགྱུར་བར་བཤད་པས། དེའི་ཚེ་ཆོས་ཅན་གཉིས་དང་། རྟགས་ལ་སོགས་པ་ཕ་རོལ་པོས་ཁས་བླངས་པ་ཙམ་མ་ཡིན་པར། རང་ངོས་ནས་ཚད་མས་གྲུབ་ན་གྲངས་ཅན་པའི་ལུགས་ཉིད་དུ་འགྱུར་པའི་ཕྱིར་རོ། །ལྟ་བའི་སྙིགས་མར་སོང་བས་འདི་འདྲའི་བཤད་པ་ལའང་རྗེས་འཇུག་རྣམས་ཡིད་ཆེས་སྐྱེ་བ་ཨ་རེ་མཚར་རོ། །ཆོས་ཅན་གཉིས་དང་རྟགས་ལ་སོགས་པ་སྔར་རྒོལ་རང་གི་ཚད་མས་མ་གྲུབ་ན་དེ་ཁོ་ན་ཉིད་རྟོགས་པའི་ལྟ་བ་བསྐྱེད་པ་མི་ནུས་ཞེས་པའང་དགག་ཡུལ་མཐིལ་ཡིན་ཏེ། ཚིག་གསལ་ལས། ཆོས་ཅན་དང་རྟགས་སོགས་སྔར་རྒོལ་རང་གིས་ཁས་མ་བླངས་ཀྱང་ཕ་རོལ་པོ་ལ་ཁས་བླངས་ནང་འགལ་བསྟན་པས་བདག་སྐྱེ་མེད་པར་རྟོགས་པའི་ལྟ་བ་བསྐྱེད་ནུས་ཤིང་། དེས་མ་ནུས་ན་རང་རྒྱུད་ཀྱི་རྟགས་ཀྱིས་ཀྱང་མི་ནུས་པས་ཁོ་བོ་ཅག་སྨྱོན་པ་དང་མི་རྩོད་པར་གསལ་བར་གསུངས་པའི་ཕྱིར་རོ། །གཞན་ཡང་གཅིག་དུ་བྲལ་གྱི་རྟགས་ཀྱིས་རྣམ་ཤེས་དམ་པའི་དོན་དུ་མེད་པར་བསྒྲུབ་པ་ལ་ནམ་མཁའི་པདྨོ་དཔེར་བཀོད་པ་འཕགས་པ་ལྷས་གསུངས་པ་འདི་གཞན་ལ་གྲགས་པ་མ་ཡིན་ན། དབུ་མའི་གཞུང་ལས་བཤད་པའི་གཞན་ལ་གྲགས་ཀྱི་མཚན་གཞི་སྟོན་དགོས་ཤིང་། ཡིན་ན་དེའི་ཚེ་ཆོས་ཅན་གཉིས་ཚད་མས་ཇི་ལྟར་གྲུབ་སོམས་ལ་སྨྲོས་ཤིག རང་གི་མཚན་ཉིད་ཀྱིས་གྲུབ་པ་སོགས་གསུམ་པོ་ཚད་མས་ཁས་ལེན་ཞེས་པའི་དོན། ཐལ་འགྱུར་བས་རིགས་པས་འཕུལ་བའི་ཚེ་ཁས་ལེན་དགོས་པ་ལ་བྱེད་དམ། རང་ངོས་ནས་ཁས་ལེན་པ་ལ་བྱེད། དང་པོ་ལྟར་ན་དེའི་ཚེ་ཡང་དག་པར་གྲུབ་པ་སོགས་གསུམ་པོའང་འཕུལ་ཐུབ་པར་མཚུངས་པས་དགག་བྱ་ཐུན་མོང་དང་ཐུན་མོང་མ་ཡིན་པའི་ཁྱད་པར་འབྱེད་པ་དོན་མེད་དོ། །གཉིས་པ་ལྟར་ན། ཤིན་ཏུ་མི་འཐད་དེ་རང་རྒྱུད་པས་ཀྱང་རང་གི་མཚན་ཉིད་ཀྱི་སྟོང་གཞིའི་ཆོས་ཅན་སྟོང་ཚུལ་རང་རང་ངོ་བོས་སྟོང་པར་འདོད་པའི་ཕྱིར་དང་། གཟུགས་སྒྲ་རོ་དང་རེག་པ་དང་། །དྲི་དང་ཆོས་དག་འབའ་ཞིག་པ། །ཞེས་པའི་འགྲེལ་པར། ལེགས་ལྡན་འབྱེད་ཀྱིས། འབའ་ཞིག་པ་ཞེས་བྱ་བ་ནི་ངོ་བོ་ཉིད་དྲི་ཙམ་གྱིས་ཀྱང་མ་གོས་པའི་དོན་ནོ་ཞེས་གསུངས་པའི་ཕྱིར་དང་བདེན་གཉིས་དང་རྒྱན་སོགས་རང་རྒྱུད་པའི་གཞུང་རྣམས་ལས་གཟུགས་སོགས་ཀྱི་དངོས་པོ་མ་བརྟགས་གཅིག་པུར་ཉམས་དགའ་བ་དང་། མ་ལུས་པ་གཟུགས་བརྙན་ལྟ་བུར་གསུངས་པའི་ཕྱིར་རོ། །གལ་ཏེ་རང་གི་མཚན་ཉིད་དང་། རང་བཞིན་དང་། ངོ་བོ་ཉིད་ཁས་བླངས་པས་དེ་དག་ཁས་བླངས་སོ་སྙམ་ན། དེ་ལྟར་ན་ཐལ་འགྱུར་བས་ཀྱང་དེ་དག་ཁས་ལེན་པར་འགྱུར་ཏེ། གཟུགས་ནས་རྣམ་མཁྱེན་གྱི་བར་གྱི་རང་གི་མཚན་ཉིད་དང་། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་བཤད། །ཅེས་དང་། དངོས་པོའི་ངོ་བོ་ཉིད་དང་དངོས་པོ་མེད་པའི་ངོ་བོ་ཉིད་རྣམས་བཞེད་པའི་ཕྱིར་རོ། །གལ་ཏེ་རང་གི་མཚན་ཉིད་བརྟེན་འགྱུར་ན། །ཞེས་པའི་ཕྱོགས་སྔ་སྨྲ་བ་པོས་འཕགས་པའི་མཉམ་གཞག་གིས་སྟོང་ཉིད་རྟོགས་པར་ཁས་བླངས་པས་རང་རྒྱུད་པ་ལས་འོས་མེད་དེ། དངོས་སྨྲ་བས་དེ་ལྟར་ཁས་མི་ལེན་པའི་ཕྱིར་ཞེས་འཛེར་ན། འདི་ནི་གསུང་རབ་ཀྱི་དགོངས་པ་འཆད་ཚུལ་ལ་བློ་རྒྱ་ཤིན་ཏུ་ཆུང་བ་སྟེ། སྟོང་ཉིད་ལྟ་དང་དེ་འགལ་ཕྱིར། །ཞེས་དང་། སྟོང་ཉིད་ལྟ་བས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན། །ཞེས་དང་། དེ་ཕྱིར་གཉིས་སྟོང་གང་ཡིན་པ། །དེ་ནི་དེའི་ཡང་དེ་ཉིད་ཡིན། །ཞེས་དང་། སྟོང་པ་ཉིད་ནི་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་ཉན་ཐོས་སྡེ་པ་དང་སེམས་ཙམ་པ་ཀུན་གྱིས་འཕགས་པའི་མཉམ་གཞག་གིས་རྟོགས་བྱའི་གནས་ལུགས་ལ་སྟོང་པ་ཉིད་ཀྱི་ཐ་སྙད་མཛད་པའི་ཕྱིར་རོ། །དེས་ན་གྲུབ་མཐའ་སྨྲ་བ་བཞི་ཆར་འཕགས་པའི་མཉམ་གཞག་གིས་སྟོང་ཉིད་རྟོགས་པར་འདོད་པར་མཚུངས་པའི་ཕྱིར་ཏེ་ཉན་ཐོས་སྡེ་པས་ཕུང་པོ་རང་མཚན་བདེན་པར་གྲུབ་ཀྱང་དེའི་སྟེང་དུ་གང་ཟག་གི་བདག་གིས་སྟོང་པ་ལ་སྟོང་ཉིད་དུ་འདོད་པ་དང་། རྣམ་རིག་པས་གཞན་དབང་བདེན་གྲུབ་གཟུང་འཛིན་རྫས་གཞན་གྱིས་སྟོང་པ་ལ་སྟོང་ཉིད་དུ་འདོད་པ་དང་། དབུ་མ་ཆད་སྟོང་པ་འགའ་ཞིག་དང་། ཟུང་འཇུག་པ་དག་ཀྱང་མཐའ་དང་པོ་བཀག་པའི་ཚེ་བདེན་པས་སྟོང་པ་ལ་སྟོང་ཉིད་དུ་འདོད་པ་དང་མཐར་མཐའ་བཞི་ཆར་གྱི་སྤྲོས་པས་སྟོང་པ་ལ་སྟོང་ཉིད་དུ་འདོད་པས་སྟོང་གཞིའི་ཆོས་ཅན་དང་། སྟོང་ཚུལ་གྱི་འདོད་ཚུལ་ནི་མི་འདྲ་བ་དུ་མ་ཡོད་པར་ཤེས་པར་བྱའོ། །འོ་ན་དེའི་ཕྱོགས་སྔ་སྨྲ་བ་པོ་སུ་ཞིག་སྙམ་ན་སེམས་ཙམ་པ་སྟེ། འགྲེལ་པར། གཞན་དབང་རང་གི་མཚན་ཉིད་ཀྱིས་གྲུབ་པ་དང་། འཕགས་པའི་མཉམ་གཞག་ལ་གཞན་དབང་མི་སྣང་བར་འདོད་པ་ལ་ཁས་བླངས་ནང་འགལ་བསྟན་པའི་ཕྱིར་དང་། དོན་དམ་པར་གཞན་སྐྱེ་འདོད་པ་ཞིག་ཡིན་པར་གཞུང་འོག་མའི་མཚམས་སྦྱར་ལས་ཀྱང་གསལ་བའི་ཕྱིར་རོ། །སྔར་གྱི་དགག་སྒྲུབ་དེ་དག་གི་དོན་བསྡུས་ཏེ་བསྟན་ན། འདི་གཉིས་ཀྱི་ཁྱད་པར་དོན་དམ་གྱི་ལྟ་བའི་སྒོ་ནས་འབྱེད་པ་མི་འཐད་དེ་གཉིས་ཀའང་མཐའ་བཞིའི་རིམ་པ་བཞིན་བཀག་ནས་མཐའ་བཞིའི་སྤྲོས་བྲལ་འདོད་པར་མཚུངས་པའི་ཕྱིར་རོ། །ཐ་སྙད་དུ་སྤྱིར་དམ་བཅའ་དང་། ཞེ་འདོད་ཀྱི་དམ་བཅའ་དང་། རང་རྒྱུད་ཀྱི་དམ་བཅའ་ཡོད་མེད་ཀྱི་སྒོ་ནས་འབྱེད་པའང་མི་འཐད་དེ། མཐའ་བཞིའི་སྐྱེ་བ་བཀག་པའི་དམ་བཅའ་སོགས་རྣམ་བཅད་དགག་པའི་དམ་བཅའ་རྣམས་དམ་བཅའ་དང་པོ་གཉིས་ཡིན་པ་ལ་འགལ་བ་མེད་ཅིང་རིགས་པས་གྲུབ་པའི་ཕྱིར་དང་། ཉན་རང་ཐུབ་དབང་ལས་སྐྱེས་པ་དང་། །སངས་རྒྱས་བྱང་སེམས་ལས་འཁྲུངས་པ་དང་། །ཆོས་གསུམ་བྱང་སེམས་ཀྱི་རྒྱུ་ཡིན་པ་དང་། །སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་སོགས་རྒྱུ་འབྲས་ཀྱི་དམ་བཅའ་དང་། སེམས་ཅན་ཀྱི་རྒྱུད་ལ་བདེར་གཤེགས་སྙིང་པོ་ཡོད་པ་དང་སྣོད་ཀྱི་འཇིག་རྟེན་ལ་བཅུད་ཀྱི་སེམས་ཅན་ཡོད་པ་སོགས་རྟེན་དང་བརྟེན་པའི་དམ་བཅའ་དང་། གཟུགས་ནི་གཟུགས་རུང་མཚན་ཉིད་ཅན། །སོགས་དང་། འདུས་བྱས་ཐམས་ཅད་མི་རྟག །ཅེས་སོགས་རང་མཚན་དང་སྤྱི་མཚན་གྱི་དམ་བཅའ་དང་། སྦྱོར་མཐོང་སྒོམ་གསུམ་ལ་གནས་པའི་བྱང་སེམས་ཕྱིར་མི་ལྡོག་པར་དམ་བཅས་པ་སོགས་ཆོས་ཅན་ཐ་སྙད་པའི་ཚད་མ་བཞི་པོ་གང་རུང་གིས་གྲུབ་པའི་སྟེང་དུ་ཁྱད་ཆོས་རང་གིས་ངེས་ནས་གཞན་ལ་ངེས་པའི་ཆེད་དུ་སྟོན་པའི་དམ་བཅའ་རྣམས་རང་རྒྱུད་ཀྱི་དམ་བཅའ་ཡིན་པར་རྩོད་ཟློག་གི་ལུང་གིས་བསྙོན་མེད་དུ་འགྲུབ་པའི་ཕྱིར་རོ། །དེའི་ཚེ་རང་རྒྱུད་ཀྱི་རྟགས་ཁས་ལེན་མི་ལེན་གྱི་སྒོ་ནས་འབྱེད་པའང་མི་འཐད་དེ། རང་རྒྱུད་ཀྱི་དམ་བཅའ་ཡོད་པའི་ཚེ་དེ་སྒྲུབ་བྱེད་ཀྱི་གཏན་ཚིགས་རང་རྒྱུད་ལས་འོས་མེད་པའི་ཕྱིར་རོ། །ཀུན་གཞི་དང་། ཉོན་ཡིད་དང་རང་རིག་སོགས་ཁས་ལེན་མི་ལེན་གྱི་སྒོ་ནས་འབྱེད་པའང་གོང་དུ་གསལ་བར་བཀག་ཟིན་ཅིང་ཐལ་འགྱུར་བས་ཀྱང་ཐ་སྙད་དུ་དེ་དག་ངེས་པར་ཁས་ལེན་དགོས་ཏེ་དེ་དག་ཚད་མ་བཞིའི་ནང་ནས་ལུང་ཚད་མས་གྲུབ་པའི་དོན་ཡིན་པའི་ཕྱིར་རོ། །ལྔ་པ་རང་ལུགས་འཐད་པའི་ཕྱོགས་རྣམས་སྒྲུབ་བྱེད་དང་བཅས་ཏེ་བསྟན་པ་ལ་གཉིས་ཏེ་གཙོ་བོ་གཞུང་འགྲེལ་ཚུལ་གྱི་སྒོ་ནས་འབྱེད་པ་དང་། ཞར་བྱུང་ཐ་སྙད་ཁས་ལེན་ཚུལ་གྱི་སྒོ་ནས་འབྱེད་པའོ། །དང་པོ་ལ་གཉིས་ཏེ། ཐ་སྙད་འཇོག་མཚམས་གཙོ་བོ་ངོས་གཟུང་བ་དང་། དེ་ཉིད་གཞུང་ཐམས་ཅད་ལ་སྦྱར་བའོ། །དང་པོ་ནི་རྩ་ཤེར། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་པའི་ཚིགས་སུ་བཅད་པ་འདིས་མཐའ་བཞིའི་སྐྱེ་བ་བཀག་པའི་དམ་བཅའ་བཞི་སྟོན་པར་ཐལ་རང་གཉིས་ཆར་འདོད་ཀྱང་ཐལ་འགྱུར་བས་ཐལ་འགྱུར་གྱི་དམ་བཅའ་དང་། རང་རྒྱུད་པས་རང་རྒྱུད་ཀྱི་དམ་བཅར་འདོད་པ་ནི་ཁྱད་པར་རོ། །དམ་བཅའ་བཞི་པོ་དེ་སྒྲུབ་བྱེད་ཀྱི་རིགས་པ་སློབ་དཔོན་སངས་རྒྱས་བསྐྱངས་ཀྱིས་ཐོག་མར་ཐལ་འགྱུར་གསུངས་ཤིང་། ལེགས་ལྡན་འབྱེད་ཀྱིས་དེ་བཀག་ནས་རང་རྒྱུད་མཛད། སློབ་དཔོན་ཟླ་བས་སྔ་མའི་སྐྱོན་སྤང་དང་། རང་རྒྱུད་ཀྱི་རིགས་པ་ཞིབ་ཏུ་བཀག་ནས་ཐལ་འགྱུར་གྱི་གཞུང་འཛུགས་པར་མཛད་པས་ཐལ་རང་གི་ཐ་སྙད་འབྱུང་བའི་གཞི་དང་། འབྱུང་བའི་མཚམས་དང་། འབྱུང་བའི་ཚུལ་ཐམས་ཅད་གཞུང་འདི་ཉིད་ཀྱི་སྟེང་དུ་ངེས་པར་བྱ་དགོས་པས་འདི་ལ་གཉིས་ཏེ། དམ་བཅའི་སྒོ་ནས་འབྱེད་པ་དང་། སྒྲུབ་བྱེད་ཀྱི་སྒོ་ནས་འབྱེད་པའོ། །དང་པོ་ནི་དངོས་པོ་གང་དག་ཅེས་པ་ནི་བརྟེན་པའི་ཚིག་སྟེ། མ་ལུས་པ་ཞེས་པའི་དོན་ཏོ། །གང་ན་ཡང་ཞེས་པ་ནི་རྟེན་གྱི་ཚིག་སྟེ་ཡུལ་དང་གྲུབ་མཐའ་གང་ན་ཡང་ཞེས་པའི་དོན་ཏོ། །ནམ་ཡང་ཞེས་པ་ནི་དུས་ཀྱི་ཚིག་སྟེ་དུས་ནམ་ཡང་ཞེས་པའི་དོན་ཏོ། །དེ་ལྟར་ན་ཕྱི་ནང་གི་དངོས་པོ་གང་དག་བདག་ལས་སྐྱེ་བ། ཡུལ་དང་གྲུབ་མཐའ་གང་ནའང་དུས་ནམ་ཡང་ཡོད་པ་མ་ཡིན་ཞེས་སྦྱར་ཞིང་དེ་བཞིན་དུ་དམ་བཅའ་བ་གཞན་གསུམ་ལའང་སྦྱར་བའོ། །འདི་ལའང་ཐལ་འགྱུར་བས་ནི་ཕྱི་རྒོལ་གྱིས་སྐྱེ་བར་འདོད་པའི་དངོས་པོ་མ་ལུས་པ་ཆོས་ཅན་དུ་འཛིན་ཞིང་དགག་བྱ་ལ་དོན་དམ་གྱི་ཁྱད་པར་མི་སྦྱོར་ལ་རང་རྒྱུད་པས་ནི་ནང་གི་འདུ་བྱེད་ཆོས་ཅན་དུ་གཟུང་ཞིང་དགག་བྱ་ལ་དོན་དམ་གྱི་ཁྱད་པར་སྦྱར་རོ། །ཅིའི་ཕྱིར་དམ་བཅའ་བཞིར་གྲངས་ངེས་ཤེ་ན། ལྷན་སྐྱེས་ཀྱི་བློས་སྐྱེ་བ་རང་བཞིན་གྱིས་ཡོད་པར་འཛིན་པ་ལྟར་དངོས་པོར་སྨྲ་བ་རྣམས་ཀུན་བརྟགས་ཀྱི་བློས་ཀྱང་འདོད་ལ་འདོད་ཚུལ་རྒྱང་འཕན་པ་དང་། གཙོ་བོ་དབང་ཕྱུག་དང་བཅས་པར་སྨྲ་བའི་གཅེར་བུ་པ་དང་། གྲངས་ཅན་པ་དང་། རང་གི་སྡེ་པ་དངོས་པོར་སྨྲ་བ་རྣམས་ཀྱིས་འདོད་ཚུལ་བཞི་པོ་འདི་ཁོ་ནར་ངེས་ཤིང་ལྔ་པ་མེད་པའམ། ལྷན་སྐྱེས་ཀྱི་ཞེན་ཡུལ་ཉིད་འགོག་པའི་ཚེ་སྐྱེ་བའི་དོགས་པ་ལ་མཐའ་བཞི་སྲིད་ཅིང་། ལྔ་པ་མི་སྲིད་པས་དོགས་པའི་མཐའ་དགག་པའི་དམ་བཅའ་བཞི་མཛད་པ་ཡིན་ཏེ། འདི་ལྟར་སྐྱེ་བ་རྒྱུ་ལ་ལྟོས་མི་ལྟོས་གཉིས་ལས་ཕྱི་མ་རྒྱུ་མེད་ཀྱི་ཕྱོགས་སུ་འདུས། དང་པོ་ལའང་རྒྱུ་དེ་འབྲས་བུ་ལས་ཐ་དད་མི་དད་གཉིས་སུ་ངེས་ལ། དེ་ལའང་ཐ་དད་པ་ཁོ་ན་ལས་སྐྱེ་ན་གཞན་སྐྱེའི་ཕྱོགས་སུ་འདུས། ཐ་མི་དད་པ་ཁོ་ན་ལས་སྐྱེ་ན་བདག་སྐྱེའི་ཁོངས་སུ་འདུས། གཉིས་ཀ་ལས་སྐྱེ་ན་གཉིས་ཀ་ལས་སྐྱེ་བའི་ཁོངས་སུ་འདུས་ཤིང་། དེ་ལས་གཞན་པའི་མཐའ་མི་སྲིད་པའི་ཕྱིར་རོ། །འདིས་དགག་པའི་དམ་བཅའ་བཞི་བསྟན་ན། གལ་ཏེ་ངས་དམ་བཅས་འགའ་ཡོད། །ཅེས་སོགས་དང་འགལ་ལོ་ཞེས་པའི་སྐྱོན་སྤང་ལའང་ཐལ་འགྱུར་བས་ནི། རང་རྒྱུད་ཀྱི་དམ་བཅའ་མ་ཡིན་པས་སྐྱོན་མེད་ཅེས་དང་། རང་རྒྱུད་པས་ནི་བདེན་གྲུབ་ཀྱི་ཆོས་དམ་བཅས་པ་མ་ཡིན་པས་སྐྱོན་མེད་ཅེས་པ་ནི་ཁྱད་པར་རོ། །གཉིས་པ་ལ་བཞི་ལས། དང་པོ་བདག་ལས་སྐྱེ་བ་དགག་པའི་འཐད་པ་སྦྱར་བ་ལའང་གཉིས་ཏེ། ཕྱོགས་སྔ་མ་བརྗོད་པ་དང་། འགོག་བྱེད་ཀྱི་རིགས་པའི་ཁྱད་པར་བརྗོད་པའོ། །དང་པོ་ནི། གྲངས་ཅན་པ་དག་བདག་ལས་མ་ཡིན་ཞེས་པ་ནི་མི་རིགས་ཏེ་དངོས་པོ་རྣམས་རྒྱུ་སོ་སོར་ངེས་པ་དང་། མེད་པ་མི་སྐྱེ་བས་རང་གི་བདག་ཉིད་དུ་གྱུར་པ་ལས་སྐྱེ་བའི་ཕྱིར་རོ། །སྐྱེ་བ་དོན་མེད་པར་ཡང་མི་འགྱུར་ཏེ། མི་གསལ་བ་གསལ་བར་འབྱུང་བའི་ཕྱིར་རོ། །ཐུག་པ་མེད་པར་འགྱུར་བའང་མ་ཡིན་ཏེ། མངོན་པར་གསལ་བར་གྲུབ་ཟིན་པ་སླར་ཡང་གསལ་བར་མི་འབྱུང་བའི་ཕྱིར་རོ་ཞེས་སྨྲ་བར་བྱེད་དོ། །གཉིས་པ་ལ་ལྔ་སྟེ། ཐལ་འགྱུར་གྱི་འཐད་པར་སྦྱར་བ། དེ་ལ་རང་རྒྱུད་པས་སྐྱོན་བཀོད་པའི་ཚུལ། ཐལ་འགྱུར་བས་དེའི་ཉེས་པ་སྤང་བ། རང་རྒྱུད་ཀྱི་འཐད་པ་སྦྱོར་བ་དགག་པ། ཉེས་པ་དེ་རང་ལ་མཚུངས་པ་སྤང་བའོ། །དང་པོ་ལ་གཉིས་ཏེ། ཟླ་བས་འཐད་པར་སྦྱར་བའི་ཚུལ། སངས་རྒྱས་བསྐྱངས་ཀྱིས་འཐད་པ་སྦྱར་བའི་ཚུལ་ལོ། །དང་པོ་ལ་གཉིས་ལས། སྐྱེ་བ་དོན་མེད་པར་ནི་རྒྱུའི་བདག་ཉིད་དུ་ཡོད་པའི་འབྲས་བུ་དེ་སྐྱེ་བ་དོན་མེད་པར་འགྱུར་ཏེ། རང་གི་བདག་ཉིད་དུ་ཡོད་པའི་ཕྱིར། མངོན་གསལ་གྱི་བུམ་པ་བཞིན་ནོ། །གཉིས་པ་རིགས་པ་དང་འགལ་བ་ལ་མ་གྲགས་པའི་དོན་ཐོབ་པ་དང་། གྲགས་པའི་དོན་མི་རུང་བ་དང་། རྒྱུ་འབྲས་ངོ་བོ་འཆོལ་བར་འགྱུར་བ་དང་། རྒྱུ་འབྲས་རྟོགས་པ་མཚུངས་པར་འགྱུར་བ་བཞི་ལས། དང་པོ་ནི། འབྲས་བུ་མྱུ་གུ་སྔོན་པོར་བདག་ཉིད་ལས་བདག་ཉིད་དུ་འབྱུང་བ་ལྟར་རྒྱུ་ས་བོན་སྐྱ་བོའང་བདག་ཉིད་ལས་བདག་ཉིད་དུ་སྐྱེ་བར་འགྱུར་ཏེ། རྒྱུ་མཚན་མཚུངས་པའི་ཕྱིར་རོ། །དེ་ལྟར་ན་རྟག་ཏུ་ས་བོན་གྱི་ངོ་བོར་སྐྱེ་བར་འགྱུར་བས་མ་གྲགས་པའི་དོན་ཐོབ་པའོ། །གཉིས་པ་ནི། རྒྱུ་མཚན་དེ་ཉིད་ཀྱིས་ས་བོན་སྐྱ་བོའི་གནས་སྐབས་འགག་པར་མི་འཐད་པས་མྱུ་གུ་སྔོན་པོའི་གནས་སྐབས་འབྱུང་བར་མི་འཐད་དེ། འབྲས་བུ་འབྱུང་བ་ལ་རྒྱུ་འགགས་པ་སྔོན་དུ་འགྲོ་དགོས་པའི་ཕྱིར་རོ། །གལ་ཏེ་རྐྱེན་ཆུ་ལུད་ལ་སོགས་པས་ཕན་བཏགས་པའི་སྒོ་ནས་ས་བོན་གྱི་མྱུ་གུ་བསྐྱེད་པར་བྱེད་ལ་མྱུ་གུས་དེ་ཉིད་ཀྱི་ཚེ་ས་བོན་འགག་པར་བྱེད་པས་སྐྱོན་གང་ཡང་མེད་དོ་ཞེ་ན་མ་ཡིན་ཏེ། དེ་གཉིས་བདག་ཉིད་གཅིག་ཡིན་པས་རང་ལ་རང་གི་བྱ་བ་འགལ་བའི་ཕྱིར་རོ། །གསུམ་པ་ནི། ས་བོན་གྱི་ཆོས་ལྔ་མྱུ་གུ་ལ་དམིགས་ཤིང་མྱུ་གུའི་ཆོས་ལྔ་ས་བོན་ལ་དམིགས་པར་འགྱུར་ཏེ། དེ་གཉིས་བདག་ཉིད་གཅིག་ཡིན་པའི་ཕྱིར། འདོད་མི་ནུས་ཏེ། ས་བོན་གྱི་དབྱིབས་ཟླུམ་པོ་དང་ཁ་དོག་སྐྱ་བོ་དང་། རོ་མངར་བ་དང་། ནུས་པ་མྱུ་གུ་བསྐྱེད་པ་དང་། སྨིན་པ་ཁ་བར་འགྱུར་བར་དམིགས་ཤིང་། མྱུ་གུ་ནི་དབྱིབས་རིང་པོ་དང་། ཁ་དོག་སྔོན་པོ་དང་། རོ་ཁ་བ་དང་། ནུས་པ་གྲིབ་མ་བསྐྱེད་པར་དང་། སྨིན་པ་མངར་བར་འགྱུར་བར་དམིགས་པའི་ཕྱིར་རོ། །བཞི་པ་ནི་མྱུ་གུ་དམིགས་པའི་ཚེ་མྱུ་གུ་ལྟར་དེ་དང་བདག་ཉིད་གཅིག་པའི་ས་བོན་ཡང་དམིགས་པར་འགྱུར་ཞིང་། ཡང་ན་ས་བོན་མི་དམིགས་པ་ལྟར་དེ་དང་བདག་ཉིད་གཅིག་པའི་མྱུ་གུ་ཉིད་ཀྱང་མི་དམིགས་པར་འགྱུར་རོ། །དེ་བཞིན་དུ་ས་བོན་དམིགས་པའི་ཚེ་ས་བོན་ལྟར་དེ་དང་བདག་ཉིད་གཅིག་པའི་མྱུ་གུའང་དམིགས་པར་འགྱུར་ཞིང་། ཡང་ན་མྱུ་གུ་མི་དམིགས་པ་ལྟར་དེ་དང་བདག་ཉིད་གཅིག་པའི་ས་བོན་ཉིད་ཀྱང་མི་དམིགས་པར་འགྱུར་ཏེ། དེ་དང་བདག་ཉིད་གཅིག་ཡིན་པའི་ཕྱིར། འདི་དག་ནི་འཇུག་པ་ལས་གསུངས་པའི་རིགས་པ་ཡིན་ལ། གཞན་ཡང་བསྟན་བཅོས་རྩ་བར་ཁ་འཕངས་པ་ནི། སྐྱེ་བ་འདི་ནི་མ་སྐྱེས་པས། །རང་གི་བདག་ཉིད་ཅི་ལྟར་སྐྱེད། །ཅི་སྟེ་སྐྱེས་པས་སྐྱེད་བྱེད་ནི། །སྐྱེས་ན་ཅི་ཞིག་བསྐྱེད་དུ་ཡོད། །ཅེས་དང་། རྒྱུ་དང་འབྲས་བུ་གཅིག་ཉིད་ན། །བསྐྱེད་བྱ་སྐྱེད་བྱེད་གཅིག་ཏུ་འགྱུར། །ཞེས་པ་ལ་སོགས་པའོ། །གཉིས་པ་སངས་རྒྱས་བསྐྱངས་ཀྱིས་འཐད་པ་སྦྱར་བའི་ཚུལ་ནི། དངོས་པོ་རྣམས་བདག་ལས་སྐྱེ་བ་མེད་དེ། དེ་དག་གི་སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་དང་། ཤིན་ཏུ་ཐལ་བར་འགྱུར་བའི་ཕྱིར་རོ། །དངོས་པོ་བདག་གིས་བདག་ཉིད་དུ་ཡོད་པ་རྣམས་ལ་ནི་ཡང་སྐྱེ་བ་ལ་དགོས་པ་མེད་དོ་ཅི་སྟེ་ཡོད་ཀྱང་སྐྱེ་ན་ནམ་ཡང་མི་སྐྱེ་བར་མི་འགྱུར་རོ། །ཞེས་གསུངས་སོ། །འདིའི་དོན་ཕ་རོལ་པོའི་བློ་ངོར་མཐའ་གཅིག་ཏུ་ངེས་པའི་དམ་བཅའ་བསྒྲུབ་པ་གཞན་ལ་གྲགས་པའི་རྗེས་དཔག་དུ་བཤད་པ་དང་། བཟློག་པ་དང་འབྲེལ་བའི་དམ་བཅའ་འཕེན་པ་འགལ་བར་བརྗོད་པའི་ཐལ་འགྱུར་དུ་བཤད་པ་གཉིས་ལས། དང་པོ་ནི། རྒྱུའི་བདག་ཉིད་དུ་ཡོད་པའི་འབྲས་བུ་བུམ་པ་ལ་སོགས་པའི་དངོས་པོ་རྣམས་ཆོས་ཅན། བདག་ལས་སྐྱེ་བ་མེད་དེ། རང་གི་བདག་ཉིད་དུ་ཡོད་པའི་ཕྱིར། བུམ་པ་བཞིན་ཞེས་པ་སྟེ། གཏན་ཚིགས་དེ་ནི་དཔེ་ལ་ཁྱབ་པ་བསྟན་པའི་ཤུགས་ལ་ཁྱབ་བྱ་རྩོད་གཞི་ལ་ཉེ་བར་སྦྱར་བ་ཐོབ་པས་ཤུགས་ལ་བསྟན་པ་ཡིན་ཏེ། འདི་ལྟར་དེ་དག་གི་ཞེས་པ་ལ་སོགས་པ་ནི་རང་གི་བདག་ཉིད་དུ་ཡོད་པ་སྐྱེ་ན་དོན་མེད་དང་ཐུག་མེད་དུ་འགྱུར་ཏེ། མངོན་གསལ་གྱི་བུམ་པ་བཞིན། ཞེས་བསྟན་ལ་དེ་སྐད་དུ་བསྟན་པས་ཀྱང་རང་གི་བདག་ཉིད་དུ་ཡོད་པ་ལ་བདག་ལས་སྐྱེ་བ་མེད་པས་ཁྱབ་པར་བསྟན་པའི་ཕྱིར་རོ། །གཉིས་པ་ལྟར་ན། དངོས་པོ་རྣམས་བདག་ལས་སྐྱེ་བ་མེད་དེ། ཞེས་པ་ནི་རྣལ་མ་ཡིན་ལ། དེ་ལྟ་མ་ཡིན་ན་གྲངས་ཅན་དེ་དག་གི་སྐྱེ་བ་དོན་མེད་པ་དང་། ཐུག་པ་མེད་པར་འགྱུར་ཏེ། ཡོད་པ་སྐྱེ་བའི་ཕྱིར་ཞེས་པའོ། །དངོས་པོ་ཞེས་པ་ལ་སོགས་པས་ནི་དེའི་ཁྱབ་པ་སྟོན་ཏེ་གོ་སླའོ། །གཉིས་པ་ནི། སློབ་དཔོན་ལེགས་ལྡན་འབྱེད་ཀྱིས་དེ་ནི་རིག་པ་མ་ཡིན་ཏེ། གཏན་ཚིགས་དང་དཔེ་མ་བརྗོད་པའི་ཕྱིར་དང་། གཞན་གྱིས་སྨྲས་པའི་ཉེས་པ་མ་བསལ་བའི་ཕྱིར་རོ། །ཐལ་བར་འགྱུར་བའི་ཚིག་ཡིན་པའི་ཕྱིར། སྐབས་ཀྱི་དོན་ལས་བཟློག་པས་བསྒྲུབ་པར་བྱ་བ་དང་། དེའི་ཆོས་བཟློག་པའི་དོན་མངོན་པས་དངོས་པོ་རྣམས་གཞན་ལས་སྐྱེ་བར་འགྱུར་བ་དང་། སྐྱེ་བ་འབྲས་བུ་དང་བཅས་པ་ཉིད་དུ་འགྱུར་བ་དང་། སྐྱེ་བ་ཐུག་པ་ཡོད་པར་འགྱུར་པའི་ཕྱིར་གྲུབ་པའི་མཐའ་དང་འགལ་བར་འགྱུར་རོ་ཞེས་སྐྱོན་སྨྲས་སོ། །འདིའི་དོན་སངས་རྒྱས་བསྐྱངས་ཀྱི་ངག་འདི་རང་རྒྱུད་ཡིན་ནམ་ཐལ་འགྱུར་ཡིན། དང་པོ་ལྟར་ན་དོན་དམ་པར་ནང་གི་སྐྱེ་མཆེད་རྣམས་བདག་ལས་སྐྱེ་བ་མེད་དེ། ཡོད་པའི་ཕྱིར་དཔེར་ན་ཤེས་རིག་སྐྱེས་བུ་བཞིན་ནོ། །ཞེས་བཀོད་པ་ལྟར་གཏན་ཚིགས་དང་དཔེ་བརྗོད་དགོས་པ་ལ། ཁྱོད་ཀྱིས་ཡོད་པའི་ཕྱིར་ཞེས་པའི་གཏན་ཚིགས་དང་ཤེས་རིག་སྐྱེས་བུ་བཞིན་ཞེས་པའི་དཔེ་མ་བརྗོད་པའི་ཕྱིར་ཡང་མི་རིགས་ལ། གཞན་ཡང་རང་རྒྱུད་ཀྱི་རྟགས་དང་བསྒྲུབ་བྱ་ལ་གཞན་གྲངས་ཅན་གྱིས་སྨྲས་པའི་གཏན་ཚིགས་འགལ་བ་དང་གྲུབ་པ་ལ་བསྒྲུབ་པའི་ཉེས་པ་མ་བསལ་བའི་ཕྱིར་ཡང་མི་རིགས་སོ། །གྲངས་ཅན་གྱིས་ཅི་ལྟར་སྨྲས་ན་འདི་སྐད་དུ་ཡོད་པའི་ཕྱིར་བདག་ལས་སྐྱེ་བ་མེད་དེ་ཞེས་པ་འདི་ཅི་འབྲས་བུ་མངོན་པར་གསལ་བའི་རང་བཞིན་དུ་ཡོད་པ་དེ་བདག་ལས་སྐྱེ་བ་མེད་ཅེས་བརྗོད་པ་ཡིན་ནམ་འོན་ཏེ་རྒྱུའི་བདག་ཉིད་དུ་ཡོད་པར་མངོན་པར་མི་གསལ་བའི་འབྲས་བུ་དེ་བདག་ལས་སྐྱེ་བ་མེད་ཅེས་པ་དེ་ཡིན་གྲང་། དང་པོ་ལྟར་ན་གྲུབ་པ་ལ་བསྒྲུབ་པ་ཡིན་ཞིང་། གཉིས་པ་ལྟར་ན་འགལ་བར་འགྱུར་ཏེ། སྐྱེ་བ་དང་ལྡན་པ་ཐམས་ཅད་རྒྱུའི་བདག་ཉིད་དུ་ཡོད་པ་ཁོ་ན་ཡིན་པས་རྒྱུའི་བདག་ཉིད་དུ་ཡོད་པ་ལ་བདག་ལས་མི་སྐྱེ་བ་ལས་བཟློག་པས་ཁྱབ་པའི་ཕྱིར་ཞེས་སྨྲས་པའོ། །གཉིས་པ་ཐལ་འགྱུར་ཡིན་ན། བཟློག་པ་དང་འབྲེལ་དགོས་པས་དངོས་པོ་རྣམས་བདག་ལས་སྐྱེ་བ་མེད་དེ་ཞེས་པའི་དམ་བཅའི་ཚིག་བཟློག་པས་དངོས་པོ་རྣམས་གཞན་ལས་སྐྱེ་བར་འགྱུར་བ་དང་། གཏན་ཚིགས་སྐྱེ་བ་དོན་མེད་པ་དང་། ཐུག་པ་མེད་པར་འགྱུར་བའི་ཕྱིར་རོ། །ཞེས་པའི་ངག་བཟློག་པས་སྐྱེ་བ་དོན་དང་བཅས་པ་དང་། ཐུག་པ་དང་བཅས་པར་འགྱུར་བས་ན་གྲུབ་པའི་མཐའ་གཞན་སྐྱེ་མེད་པ་དང་འགལ་བར་འགྱུར་རོ། །ཞེས་སྨྲས་པའོ། །གསུམ་པ་ལ་གཉིས་ཏེ། ཉེས་པ་དང་པོ་གཉིས་སྤང་བ་དང་། བཟློག་པ་དང་འབྲེལ་བའི་ཉེས་པ་སྤང་བའོ། །དང་པོ་ལ་གཉིས་ཏེ་རང་རྒྱུད་ཀྱི་དབང་དུ་བྱས་ནས་བརྗོད་ན་འགལ་བ་དང་། གཞན་ལ་གྲགས་ཀྱི་དབང་དུ་བྱས་ནས་བརྗོད་ན་མ་ངེས་པའོ། །དང་པོ་ལ་གསུམ་སྟེ་རྟགས་དང་པོ་འགལ་བ་དང་། གཉིས་པ་འགལ་བ་དང་། གཉིས་ཀ་འགལ་བའོ། །དང་པོ་ལ་གསུམ་སྟེ། རང་རྒྱུད་ཀྱི་རྟགས་དོན་མེད་པ་དང་། ནུས་པ་མེད་པ་དང་། རང་རྒྱུད་མི་རིག་པའོ། །དང་པོ་ནི། ཁྱོད་ཀྱིས་སངས་རྒྱས་བསྐྱངས་ཀྱི་ངག་ལ་གཏན་ཚིགས་དང་དཔེ་མ་བརྗོད་པའི་ཕྱིར་ཞེས་བརྗོད་པ་འདི་རང་རྒྱུད་ཀྱི་གཏན་ཚིགས་དང་དཔེ་མ་བརྗོད་པའི་ཕྱིར་ཞེས་པའི་དོན་ཡིན་ནམ། གཞན་ལ་གྲགས་ཀྱི་དབང་དུ་བྱས་ནས་བརྗོད། དང་པོ་ལྟར་ན་དེ་མ་བརྗོད་པའི་ཕྱིར་ན་མི་རིགས་ཞེས་པ་ནི་འགལ་ཏེ་གྲངས་ཅན་ལ་ཁྱོད་ཀྱི་དངོས་པོ་བདག་ལས་སྐྱེ་བར་འདོད་པའི་འབྲས་བུ་ཡོད་པ་ཉིད་རྒྱུ་དང་། དེ་ཉིད་སླར་ཡང་སྐྱེ་བོ་ཞེས་འདོད་པས་ཁས་བླངས་འགལ་ཏེ། རྒྱུའི་བདག་ཉིད་དུ་ཡོད་པའི་མངོན་པར་མི་གསལ་བའི་བུམ་པ་སོགས་ཀྱི་དངོས་པོ་ཆོས་ཅན། སྐྱེ་བ་དོན་མེད་པ་དང་། ཐུག་པ་མེད་པར་ཐལ། རང་གི་ངོ་བོ་ཡོད་པ་ཉིད་སྐྱེ་བའི་ཕྱིར། ཡང་དེ་ཆོས་ཅན། བདག་ལས་སྐྱེ་བ་མེད་པར་ཐལ། སྐྱེ་བ་དོན་ཡོད་པ་དང་སྐྱེ་བ་ཐུག་པ་དང་བཅས་པ་ཡིན་པའི་ཕྱིར། ཞེས་ཁས་བླངས་འགལ་བ་བརྗོད་པའི་ཐལ་འགྱུར་གྱིས་བདག་ལས་སྐྱེ་བ་འདོད་པའི་ལོག་རྟོག་ཟློག་ནུས་ཤིང་། དེ་བཟློག་པས་རང་བཞིན་གྱི་སྐྱེ་བ་ཡོད་པར་འཛིན་པའང་ཟློག་པས་སྐབས་འདིར་རང་རྒྱུད་ཀྱི་གཏན་ཚིགས་དང་དཔེ་མ་བརྗོད་པ་ཉིད་རིགས་པས་གྲུབ་པའི་ཕྱིར་རོ། །འོ་ན་སངས་རྒྱས་བསྐྱངས་ཀྱི་ངག་དེས་ཁས་བླངས་འགལ་བ་བརྗོད་མོད། གྲངས་ཅན་པས་ཅི་ལྟར་ཁས་བླངས་སྙམ་ན། འབྲས་བུ་ཡོད་པ་རྒྱུ་ཉིད་དང་། དེ་ཉིད་སྐྱེ་བོ་ཞེས་པ་ནི་བདག་སྐྱེའི་དོན་ཡིན་པས་ཐལ་བ་དང་པོའི་གཏན་ཚིགས་དང་། གཉིས་པའི་བསལ་བ་སྨྲས་པ་ཡིན་ནོ། །ཡོད་པ་སྐྱེ་ན་དོན་མེད་དང་ཐུག་མེད་དུ་མི་འགྱུར་རམ་ཞེས་པའི་ལན་དུ་མི་གསལ་བ་གསལ་བར་འབྱུང་བས་དོན་དང་བཅས་ཤིང་། གསལ་བའང་གསལ་བར་འབྱུང་བར་མི་འདོད་པས་ཐུག་པ་དང་བཅས་པ་ཡིན་ནོ། །ཞེས་སྨྲས་པས། ཐལ་བ་དང་པོའི་བསལ་བ་དང་། གཉིས་པའི་གཏན་ཚིགས་ཁས་བླངས་སོ། །གསལ་བའང་གསལ་བར་སྐྱེ་ན་སྐྱོན་ཅི་ཡོད་ཅེས་པའི་ལན་དུ་མངོན་པར་གསལ་བར་ཡོད་པའང་བསལ་བར་སྐྱེ་བ་ལ་དགོས་པ་མ་མཐོང་ཞིང་། ཐུག་པ་མེད་པར་ཡང་མཐོང་ངོ་ཞེས་སྨྲས་པས་ཐལ་བ་དང་པོའི་རྣལ་ཁྱབ་དང་། གཉིས་པའི་ལྡོག་ཁྱབ་ཁས་བླངས་པ་ཡིན་ནོ། །གཉིས་པ་ནི། འོན་ཏེ་ཕ་རོལ་པོ་རང་གིས་ཁས་བླངས་པ་དང་འགལ་བར་བརྩད་པས་ཀྱང་ལོག་རྟོག་མི་ཟློག་ན་དེའི་ཚེ་ངོ་ཚ་མེད་པ་ཉིད་ཡིན་པས་རང་རྒྱུད་ཀྱི་གཏན་ཚིགས་དང་། དཔེ་གཉིས་ཀྱིས་ཀྱང་མི་ཟློག་པས་རང་རྒྱུད་ལ་ནུས་པ་མེད་དོ། །གསུམ་པ་ནི་དབུ་མ་པ་ཡིན་ན་ནི་རང་གི་རྒྱུད་ཀྱི་རྗེས་སུ་དཔག་པ་བྱ་བ་རིགས་པ་མ་ཡིན་ཏེ། ཕྱོགས་གཞན་ཁས་བླངས་པ་མེད་པའི་ཕྱིར་རོ། །ཞེས་གསུངས་ཏེ། འདིའི་དོན་དབུ་མ་པ་ཡིན་ན་ནི། ཞེས་པ། བདག་སྐྱེ་བཀག་པ་ལྟ་བུ་དོན་དམ་ལ་དཔྱོད་པའི་སྐབས་སུ་ཞེས་པའི་དོན་ནོ། །དེའི་ཚེ་དངོས་པོ་བདག་ལས་མི་སྐྱེ་བར་བསྒྲུབ་པའི་རང་རྒྱུད་ཀྱི་རྗེས་སུ་དཔག་པ་བྱ་བར་མི་རིགས་ཏེ། རང་རྒྱུད་ཡིན་ན། ཆོས་ཅན་མངོན་སུམ་ལ་སོགས་པའི་ཐ་སྙད་པའི་ཚད་མ་བཞི་པོ་གང་རུང་གིས་རྒོལ་ཕྱི་རྒོལ་གཉིས་ཀ་ལ་མཐུན་སྣང་དུ་འགྲུབ་པའི་སྟེང་དུ་གཞན་ཕྱོགས་བདག་སྐྱེ་བཀག་ནས་རང་ཕྱོགས་བདག་སྐྱེ་མེད་པ་བསྒྲུབ་དགོས་པ་ལས་ཆོས་ཅན་དེ་ལྟར་མ་གྲུབ་པས་གཞན་ཕྱོགས་ལས་ཕྱོགས་གཞན་བདག་སྐྱེ་མེད་པ་ཉིད་ཀྱང་རང་རྒྱུད་དུ་ཁས་མ་བླངས་པའི་ཕྱིར་ཞེས་པ་སྟེ། འདིའི་ཤེས་བྱེད་དུ་འཕགས་པ་ལྷས། ཡོད་དང་མེད་དང་ཡོད་མེད་ཅེས། །ཞེས་སོགས་ཚིགས་བཅད་གཅིག་དང་། རྩོད་ཟློག་ལས། གལ་ཏེ་ངས་དམ་བཅའ་འགའ་ཡོད། །ཅེས་ཚིགས་བཅད་གཉིས་དྲངས་ཏེ། ཆོས་ཅན་ཐ་སྙད་པའི་ཚད་མས་གྲུབ་པ་ཁས་མ་བླངས་པ་ལ་ཐུག་པར་སྣང་ངོ་། །ཤུགས་ལ་ཐ་སྙད་རྣམ་འཇོག་གི་ཚེ་ཆོས་ཅན་ཐ་སྙད་ཚད་མས་གྲུབ་པ་ཡོད་པས་རང་རྒྱུད་ཡོད་པར་བསྟན་ཅིང་། རྨ་བྱས་ཆོས་ཅན་ཐ་སྙད་པའི་ཚད་མས་གྲུབ་ཀྱང་དངོས་པོ་སྟོབས་ཞུགས་ཀྱི་ཚད་མས་མ་གྲུབ་པས་རང་རྒྱུད་དུ་མི་འགྱུར་བར་བཤད་པའང་ངེས་པར་བསལ་བ་ཡིན་ནོ། །ཁ་ཅིག་འདིའི་དོན་བདག་སྐྱེ་བཀག་ནས་གཞན་སྐྱེ་བསྒྲུབ་པའི་རང་རྒྱུད་ཀྱི་གཏན་ཚིགས་མི་རིགས་ཏེ། བདག་སྐྱེ་ལས་ཕྱོགས་གཞན་གཞན་སྐྱེའང་ཁས་མ་བླངས་པའི་ཕྱིར་ཞེས་པ་དང་། གཞན་དག་གིས་རང་གི་མཚན་ཉིད་ཀྱིས་གྲུབ་པ་བསྒྲུབ་པའི་རང་རྒྱུད་ཀྱི་རྗེས་སུ་དཔག་པ་མི་རིགས་ཏེ། ཕྱོགས་གཞན་རང་གི་མཚན་ཉིད་ཀྱིས་གྲུབ་པ་ཁས་བླངས་པ་མེད་པའི་ཕྱིར། ཞེས་པ་གཉིས་ཀའང་ཕྱོགས་སུ་མ་ཕྱིན་ཏེ། འདིར་བདག་སྐྱེ་འགོག་པའི་རང་རྒྱུད་རིགས་མི་རིགས་དཔྱོད་པའི་སྐབས་ཡིན་ལ། དེའི་ཚེ་བདག་སྐྱེ་བཀག་ནས་གཞན་སྐྱེ་བསྒྲུབ་པ་དང་། རང་གི་མཚན་ཉིད་ཀྱིས་སྒྲུབ་པའི་ཆོས་བསྒྲུབ་པའི་རང་རྒྱུད་སུས་ཀྱང་བྱས་པ་མེད་པའི་ཕྱིར་རོ། །གཉིས་པ་ནི། སྐབས་འདིར་གྲངས་ཅན་གྱིས་སྨྲས་པའི་གྲུབ་པ་ལ་བསྒྲུབ་པ་དང་། གཏན་ཚིགས་འགལ་བའི་སྐྱོན་མ་བསལ་བའི་ཕྱིར་མི་རིགས་ཞེས་པ་ནི་འགལ་ཏེ། སྐྱོན་དེ་གཉིས་ནི་ནང་གི་འདུ་བྱེད་རྣམས་ཆོས་ཅན། བདག་ལས་སྐྱེ་བ་མེད་དེ། ཡོད་པའི་ཕྱིར་ཞེས་པ་ལྟ་བུར་རང་རྒྱུད་ཁས་བླངས་པ་ལ་བརྗོད་པ་ཡིན་ལ། འདིར་དེའི་གཞི་ཁས་མ་བླངས་པས་སྐྱོན་དེ་དག་བརྗོད་པ་ཉིད་ཀྱང་མེད་པའི་ཕྱིར་ཞེས་པའོ། །རང་རྒྱུད་ཁས་བླངས་པ་ལ་ཇི་ལྟར་བརྗོད་ན་ཡོད་པའི་ཕྱིར་བདག་ལས་སྐྱེ་བ་མེད་ཅེས་པའི་ཡོད་པ་འདི་རྒྱུའི་བདག་ཉིད་མངོན་པར་མི་གསལ་བར་ཡོད་པའམ། འབྲས་བུའི་བདག་ཉིད་མངོན་པར་གསལ་བར་ཡོད་པ་གང་ཡིན་ཞེས་པའི་སྒོ་ནས་སྔར་བརྗོད་པའོ། །གསུམ་པ་ནི་ཅི་སྟེ་དེའི་ཚེ་དབུ་མ་པ་ལ། རང་ལ་ཕྱོགས་དང་། གཏན་ཚིགས་དང་། དཔེ་མ་གྲུབ་པས་ཕྱོགས་ཆོས་དང་ཁྱབ་པ་ཐུན་མོང་དུ་གྲུབ་པའི་རྟགས་ཀྱིས་གཞན་གྱིས་དམ་བཅའ་བདག་ལས་སྐྱེ་བ་བསལ་བར་མ་གྱུར་མོད། འོན་ཀྱང་གཞན་གྱི་དམ་བཅའ་ལ་ཕྱོགས་ཆོས་ཁྱབ་པ་ཕ་རོལ་པོ་ལ་གྲུབ་པའི་རྟགས་ཀྱིས་འགལ་བ་བརྗོད་དགོས་ལ། ཕ་རོལ་པོའི་བློ་ངོར་རྟགས་ལ་འགལ་བ་ལ་སོགས་པ་དང་། དམ་བཅའ་ལ་གྲུབ་པ་ལ་བསྒྲུབ་པ་དང་། དཔེ་ལ་ཆོས་ཀྱི་སྟོང་པ་ལ་སོགས་པའི་སྐྱོན་དང་བྲལ་བར་བྱ་དགོས་པ་ལས་དེ་ལྟ་བུའི་གཏན་ཚིགས་དང་དཔེ་མ་བརྗོད་པའི་ཕྱིར་དང་། དེ་ལ་གཞན་གྱིས་སྨྲས་པའི་ཉེས་པ་མ་བསལ་བའི་ཕྱིར། མི་རིགས་པའི་ཉེས་པ་དེ་ཉིད་དུ་འགྱུར་རོ་ཞེ་ན། འདིའི་ལན་རྟགས་འདི་བརྗོད་པའི་ཚུལ་འོག་ནས་འབྱུང་བས་མ་བརྗོད་དུ་ཆུག་ཀྱང་མི་རིགས་པའི་སྐྱོན་མེད་དེ་བདག་སྐྱེ་འགོག་པའི་སྐབས་འདིར་སྒྲུབ་བྱེད་བསྒྲུབ་བྱ་དང་མཚུངས་པས་མ་གྲུབ་པ་འདི་ཉིད་འདིའི་སུན་འབྱིན་པ་ཆེས་གསལ་པོ་ཡིན་པས་ཕ་རོལ་པོ་ལ་གྲུབ་པའི་རྗེས་སུ་དཔག་པ་བརྗོད་པ་ལ་དགོས་པ་མེད་པའི་ཕྱིར་རོ། །འོ་ན་གྲངས་ཅན་པས་བཀོད་པའི་སྒྲུབ་བྱེད་གང་ཡིན་པ་དེ་བསྒྲུབ་བྱ་དང་མཚུངས་པས་མ་གྲུབ་པའི་ཚུལ་ཇི་ལྟ་བུ་སྙམ་ན། ཡོད་པ་སྐྱེ་དགོས་པའི་སྒྲུབ་བྱེད་དུ་མེད་པ་མི་སྐྱེ་བའི་ཕྱིར་ཞེས་པའི་གཏན་ཚིགས་མི་འགྲུབ་ཅིང་། རྒྱུ་སོ་སོར་ངེས་པ་ལ་བདག་ལས་སྐྱེ་བའི་དཔེ་མེད་པས་ཁྱབ་པའང་མི་འགྲུབ་པའི་ཕྱིར་རོ། །གཉིས་པ་ནི། གལ་ཏེ་གཞན་ཕྱིར་རྒོལ་ལ་གྲགས་པའི་གཏན་ཚིགས་དང་། དཔེ་མ་བརྗོད་པའི་ཕྱིར་དང་། དེ་ལ་གཞན་གྱིས་སྨྲས་པའི་ཉེས་པ་མ་བསལ་བའི་ཕྱིར་མི་འཐད་དོ་ཞེ་ན་འདིའི་ལན་ལ་གཏན་ཚིགས་དང་པོ་མ་གྲུབ་པ་དང་། གཉིས་པ་མ་གྲུབ་པ་གཉིས་ལས། དང་པོ་ནི། རྒྱུའི་བདག་ཉིད་དུ་ཡོད་པ་མངོན་པར་མི་གསལ་བའི་བུམ་པ་ལ་སོགས་པའི་དངོས་པོ་རྣམས་ནི་བདག་ལས་སྐྱེ་བ་མེད་དེ། རང་གི་བདག་ཉིད་དུ་ཡོད་པའི་ཕྱིར་རོ། །གང་རང་གི་བདག་ཉིད་དུ་ཡོད་པ་དེ་ལ་ནི་བདག་ལས་སྐྱེ་བ་མེད་དེ། མངོན་པར་གསལ་བའི་བུམ་པ་བཞིན་ནོ། །རྒྱུའི་བདག་ཉིད་དུ་ཡོད་པའི་བུམ་པ་དེའང་རང་གི་བདག་ཉིད་དུ་ཡོད་པས་དེ་བས་ན་བདག་ལས་སྐྱེ་བ་མེད་དོ་ཞེས་བྱ་བ་ལ་སོགས་པའི་གཏམ་རྒྱུད་སྣ་ཚོགས་པའི་སྦྱོར་བ་ཡན་ལག་ལྔ་པ་དེའང་སངས་རྒྱས་བསྐྱངས་ཀྱི་ངག་འདིས་དངོས་ཤུགས་ལ་བརྗོད་པ་ཉིད་ཡིན་པས་མ་བརྗོད་པའི་གཏན་ཚིགས་མ་གྲུབ་བོ་ཞེས་སྦྱར་རོ། །ཇི་ལྟར་བསྟན་ཅེ་ན། གཏན་ཚིགས་བསྒྲུབ་བྱའི་རྗེས་འགྲོ་བ། །བསྒྲུབ་བྱ་མེད་ན་མེད་པ་ཉིད། །ལྔ་པ་དེ་ནི་དཔེ་ཡིན་ཏེ། །གཏན་ཚིགས་ཉེ་བར་སྦྱོར་བ་ལ། །ཞེས་པའི་ཚུལ་གྱིས་དཔེ་ལ་ཁྱབ་པ་བསྟན་པའི་ཤུགས་ལ་ཁྱབ་བྱ་རྩོད་གཞི་ལ་སྦྱར་བ་དོན་གྱིས་ཐོབ་པ་ཡིན་པས་ན། སློབ་དཔོན་སངས་རྒྱས་བསྐྱངས་ཀྱིས་ཀྱང་རྒྱུའི་བདག་ཉིད་དུ་ཡོད་པར་མངོན་པར་མི་གསལ་བའི་བུམ་པ་ལ་སོགས་པའི་དངོས་པོ་རྣམས་ནི་བདག་ལས་སྐྱེ་བ་མེད་དེ་ཞེས་དམ་བཅའ་བ་བསྟན་ལ་དེ་དག་གི་སྐྱེ་བ་དོན་མེད་པར་འགྱུར་བའི་ཕྱིར་དང་། ཤིན་ཏུ་ཐལ་བར་འགྱུར་བའི་ཕྱིར་རོ་ཞེས་བཤད་པ་ནི་ཡོད་པ་སྐྱེ་ན་དོན་དང་ཐུག་པ་མེད་པར་འགྱུར་བས་ཡོད་པ་ལ་བདག་ལས་སྐྱེ་བ་མེད་པའི་ཁྱབ་པ་བསྟན་པ་ཡིན། དེ་ཡོད་པ་ནི་མངོན་པར་གསལ་བའི་བུམ་པ་ལྟར་ཡང་སྐྱེ་བ་ལ་དགོས་པ་མེད་པར་འགྱུར་ཞིང་། ཅི་སྟེ་ཡོད་ཀྱང་སྐྱེ་ན་ནམ་ཡང་མི་སྐྱེ་བར་མི་འགྱུར་རོ། །ཞེས་པ་ནི་ཡོད་པ་ལ་བདག་ལས་སྐྱེ་བ་མེད་པས་ཁྱབ་པ་དེ་ཉིད་དཔེ་མངོན་པར་གསལ་བའི་བུམ་པའི་སྟེང་དུ་བྱས་པར་བཤད་པ་ཡིན་པས་ན་དེའི་ཤུགས་ལ་མངོན་པར་མི་གསལ་བའི་བུམ་པ་ལ་སོགས་པ་དེ་དག་ཀྱང་རང་གི་བདག་ཉིད་དུ་ཡོད་པའི་ཕྱིར་ཞེས་ཁྱབ་བྱ་རྩོད་གཞི་ལ་ཉེ་བར་སྦྱར་བ་ཐོབ་པ་ཡིན་ལ། ཉེ་བར་སྦྱར་བའི་ཤུགས་ལ་རང་གི་བདག་ཉིད་དུ་ཡོད་པའི་ཕྱིར་རོ་ཞེས་པ་དང་པོའི་གཏན་ཚིགས་ཟིན་པ་ཡིན་ཏེ། ཕྱིས་རྩོད་གཞི་ལ་ཉེ་བར་སྦྱར་རྒྱུའི་ཁྱབ་བྱ་དེ་ཉིད་དང་པོ་གཏན་ཚིགས་སུ་སྟོན་པའི་ཕྱིར་རོ། །དེ་བས་ན་བདག་ལས་སྐྱེ་བ་མེད་དོ་ཞེས་པའི་མཇུག་བསྡུ་བ་ནི་དམ་བཅའ་བའི་ཤུགས་ལ་ཟིན་པ་ཡིན་ནོ། །དཔེར་ན་སྒྲ་མི་རྟག་སྟེ། བྱས་པ་མི་རྟག་པའི་ཕྱིར་གང་བྱས་པ་དེ་ནི་མི་རྟག་པར་མཐོང་སྟེ་དཔེར་ན་བུམ་པ་བཞིན་ནོ། །ཞེས་པ་འདི་ལ་དངོས་སུ་ཡན་ལག་ལྔ་པའི་གཏན་ཚིགས་བཀོད་པ་མེད་ཀྱང་ཁྱབ་པ་བསྟན་བཤད་གཉིས་ཀྱི་ཤུགས་ལ་སྒྲ་ཡང་བྱས་པའི་ཕྱིར་ཞེས་པའི་ཁྱབ་བྱ་རྩོད་གཞི་ལ་ཉེ་བར་སྦྱར་བ་ཐོབ་ཅིང་ཉེར་སྦྱར་གྱི་ཤུགས་ལ་བྱས་པའི་ཕྱིར་རོ་ཞེས་པའི་དང་པོའི་གཏན་ཚིགས་ཟིན་ལ། དེ་བས་ན་སྒྲ་མི་རྟག་གོ་ཞེས་པའི་མཇུག་སྡུད་དམ་བཅའི་ཤུགས་ལ་ཟིན་པས་ཡན་ལག་ལྔ་དོན་གྱིས་ཡོད་པ་ཡིན་ནོ་ཞེས་སྦྱར་རོ། །སྤྱིར་སྦྱོར་བ་རྣམས་ལ་ཁྱབ་པ་བསྟན་བཤད་གཉིས་མི་དགོས་མོད་ཀྱི་འོན་ཀྱང་འདིར་ནི་དོན་ལ་གཉིས་ཡོད་པས་དཔེ་ལའང་དེ་དང་འདྲ་བར་བཀོད་པ་ཡིན་ནོ། །གཏན་ཚིགས་གཉིས་པ་མ་གྲུབ་པ་ནི་རྒྱུའི་བདག་ཉིད་དུ་ཡོད་པ་མངོན་པར་མི་གསལ་བའི་བུམ་པ་ལ་སོགས་པ་བདག་ལས་སྐྱེ་བ་མེད་པ་བསྒྲུབ་བྱར་བྱེད་པ་ཡིན་པའི་ཕྱིར། གྲུབ་པ་ལ་བསྒྲུབ་པའི་སྐྱོན་དུ་མི་འགྱུར་ཞིང་ཕ་རོལ་པོ་ལ་དཔེ་མངོན་གསལ་གྱི་བུམ་པའི་སྟེང་དུ་རྗེས་འགྲོའི་ཁྱབ་པ་བསྟན་པས་འགལ་བའི་སྐྱོན་དུའང་མི་འགྱུར་བས་ཉེས་པ་བསལ་ཟིན་པ་ཡིན་ནོ། །གལ་ཏེ་རྗེས་འགྲོ་བསྟན་པས་འགལ་བར་མི་འགྱུར་མོད། བུམ་པ་ཁོ་ན་ཆོས་ཅན་དུ་བཀོད་པས་སྣམ་བུ་སོགས་ལ་བདག་སྐྱེ་མ་བཀག་པས་མི་མཐུན་ཕྱོགས་སུ་དོགས་ཤིང་དེ་ལ་ཡོད་པའི་རྟགས་འཇུག་པས་ལྡོག་པ་ལ་ཐེ་ཚོམ་ཟ་བའི་མ་ངེས་པར་འགྱུར་རོ་སྙམ་ན། མ་ཡིན་ཏེ། བུམ་པ་ལ་སོགས་པའི་ཞེས་པའི་སོགས་པའི་སྒྲས་གྲངས་ཅན་གྱིས་བདག་ལས་སྐྱེ་བར་འདོད་པའི་དངོས་པོ་མ་ལུས་པ་བསྡུ་བའི་ཕྱིར་རོ། །ཡང་ན་སངས་རྒྱས་བསྐྱངས་ཀྱི་སྦྱོར་བ་འདི་ནི་ཚུལ་གཞན་ཡིན་ཏེ། གྲངས་ཅན་པ་དག་གིས་ཤེས་བྱ་ལ་བེམ་རིག་གཉིས་སུ་སྨྲས་པའི་བེམ་པོ་ཉི་ཤུ་རྩ་གསུམ་པོ་རྣམས་ནི་གཙོ་བོའི་རང་བཞིན་དུ་ཡོད་པའི་བདག་ལས་སྐྱེ་བ་མེད་དེ། རང་གི་བདག་ཉིད་དུ་ཡོད་པའི་ཕྱིར་ཤེས་རིག་གི་སྐྱེས་བུ་བཞིན་ཞེས་བརྗོད་པ་ཡིན་པས་མ་ངེས་པའི་སྐྱོན་མེད་དོ། །གཉིས་པ་བཟློག་པ་དང་འབྲེལ་བའི་ཉེས་པ་སྤང་བ་ནི་སངས་རྒྱས་བསྐྱངས་ཀྱི་ངག་དེ་ཐལ་བའི་ངག་ཡིན་ཡང་བཟློག་པ་དང་འབྲེལ་པའི་ཉེས་པ་མེད་དེ། ཁྱབ་བསལ་ཚད་མས་གྲུབ་ཅིང་ཕྱོགས་ཆོས་ཁས་བླངས་ཀྱིས་གྲུབ་པའི་སྒྲུབ་བྱེད་འཕེན་པའི་ཐལ་འགྱུར་མི་བྱེད་པའི་ཕྱིར་ཏེ། དེའི་བྱེད་པ་དངོས་སུ་གཞན་ཕྱོགས་བཀག་ནས་ཤུགས་ལ་རང་རྒྱུད་བསྒྲུབ་པ་ཡིན་པ་ལས་སྐབས་འདི་རང་རྒྱུད་ཀྱི་དམ་བཅའ་མེད་པའི་ཕྱིར་རོ། །དེ་ལྟ་ནའང་ཕ་རོལ་པོའི་བློ་ངོར་བཟློག་པ་དང་འབྲེལ་བར་འགྱུར་རོ་སྙམ་ན་དེ་ནི་ཁོ་བོ་ཅག་འདོད་པ་ཡིན་ལ། རང་བཞིན་མེད་པར་སྨྲ་བ་ལ་དེ་ལྟར་མི་འགྱུར་ཏེ། སྒྲ་རྣམས་ནི་དབྱུག་པ་ཅན་དང་། ཞགས་པ་ཅན་གྱིས་སེམས་ཅན་འགའ་ཞིག་རང་དབང་མེད་པར་འཛིན་པ་ལྟར་སྨྲ་བ་པོ་རང་དབང་མེད་པར་བྱེད་པ་མ་ཡིན་གྱི་ནུས་པ་ཡོད་ན་བརྗོད་པར་འདོད་པའི་དོན་སྟོན་པ་ཙམ་ཞིག་ཡིན་པའི་ཕྱིར་རོ། །དེ་ལྟར་ཡང་སློབ་དཔོན་གྱིས་ནམ་མཁའི་མཚན་ཉིད་སྔ་རོལ་ན་སོགས་དང་། གཟུགས་ཀྱི་རྒྱུ་ནི་མ་གཏོགས་པར་སོགས་དང་། མྱ་ངན་འདས་པ་དངོས་པོ་མིན་སོགས་པས་ཕལ་ཆེར་ཐལ་བ་བསྒྲུབ་པ་ཁོ་ནའི་སྒོ་ནས་གཞན་གྱི་ཕྱོགས་སེལ་བར་མཛད་དོ། །གལ་ཏེ་སློབ་དཔོན་གྱི་ངག་རྣམས་ནི་དོན་གྱི་ངག་ཆེན་པོ་ཅན་ཡིན་པའི་ཕྱིར་རང་རྒྱུད་ཀྱི་སྦྱོར་བ་དུ་མ་ཡོད་དོ་ཞེས་རྟོགས་ན་འོ་ན་སློབ་དཔོན་སངས་རྒྱས་བསྐྱངས་ཀྱི་ངག་ཀྱང་དེ་ལྟར་རྟོགས་རིགས་པས་གཏན་ཚིགས་དང་དཔེ་མ་བརྗོད་པའི་ཕྱིར་ཞེས་བརྗོད་པ་དང་འགལ་ལོ། །འོན་ཏེ་རང་རྒྱུད་ཀྱི་སྦྱོར་བའི་ངག་རྒྱས་པར་བརྗོད་པར་བྱེད་པ་ནི་འགྲེལ་པ་མཁན་པོ་རྣམས་ཀྱི་ལུགས་ཡིན་ནོ་ཞེ་ན་དེའང་མ་ཡིན་ཏེ། རྩོད་པ་ཟློག་པའི་འགྲེལ་པ་མཛད་པ་ན་སློབ་དཔོན་གྱིས་ཀྱང་རང་རྒྱུད་ཀྱི་སྦྱོར་བའི་ངག་མ་གསུངས་པའི་ཕྱིར་རོ། །བཞི་པ་གཞན་ལུགས་རང་རྒྱུད་ཀྱི་འཐད་པ་སྦྱོར་བ་བཀག་པ་ནི་གཞན་ཡང་རྟོག་གེ་པ་འདིས་བདག་ཉིད་རྟོག་གེའི་བསྟན་བཅོས་ལ་ཁས་པ་ཙམ་ཞིག་བསྟན་པར་འདོད་པས་དབུ་མའི་ལྟ་བ་ཁས་ལེན་བཞིན་དུའང་རང་རྒྱུད་ཀྱི་སྦྱོར་བའི་ངག་བརྗོད་པ་གང་ཡིན་པ་དེ་ནི་ཆེས་ཤིན་ཏུ་ཉེས་པ་དུ་མའི་ཚོགས་ཀྱི་གནས་སུ་རྟོགས་ཏེ་ཞེས་སོགས་གསུངས་ཏེ། དབུ་མའི་ལྟ་བ་ཁས་ལེན་བཞིན་དུའང་ཞེས་པའི་དོན་ཆོས་རང་བཞིན་མེད་པར་བསྒྲུབ་པའི་སྐབས་སུ་ཞེས་པའི་དོན་ཡིན་པས། འདིས་ཀྱང་འཇིག་རྟེན་ལ་གྲགས་པའི་ཀུན་རྫོབ་ཀྱི་རྣམ་གཞག་གི་ཚེ་རང་རྒྱུད་ཡོད་པར་བསྟན་ཏོ། །འོ་ན་རང་རྒྱུད་ཀྱི་སྦྱོར་བའི་ངག་བརྗོད་པ་གང་ཞེ་ན་དོན་དམ་པར་ནང་གི་སྐྱེ་མཆེད་རྣམས་བདག་ལས་སྐྱེ་བ་མེད་པར་ངེས་ཏེ། ཡོད་པའི་ཕྱིར། དཔེར་ན་ཤེས་པ་ཡོད་པ་ཉིད་བཞིན་ནོ་ཞེས་སྨྲས་པ་ཡིན་ནོ། །དེ་ལ་ཉེས་པ་དུ་མའི་ཚོགས་ཅི་ལྟར་ཡོད་ན་འདི་ལ་དྲུག་སྟེ། ཁྱད་པར་དོན་མེད་པ། ཆོས་ཅན་མ་གྲུབ་པ། ཉེས་པ་དེ་ཡོད་པའི་གཏན་ཚིགས་ལའང་མཚུངས་པ། དེ་རང་གིས་ཁས་བླངས་པ། སྒྲུབ་བྱེད་གཞན་ལ་སྦྱར་བ། ཡོད་པའི་གཏན་ཚིགས་མ་ངེས་པའོ། །དང་པོ་ནི། འདིར་དོན་དམ་པར་ཞེས་པའི་ཁྱད་པར་དེ། དགག་ཆོས་བདག་ལས་སྐྱེ་བའི་ཁྱད་པར་དུ་བཀོད་པ་ཡིན་ནམ། ཆོས་ཅན་ནང་གི་སྐྱེ་མཆེད་ཀྱི་ཁྱད་པར་དུ་བཀོད་པ་ཡིན། དང་པོ་ལྟར་ན་དགོས་པ་ཅིའི་ཕྱིར་བཀོད་ཅེས་འདྲི། གལ་ཏེ་ཀུན་རྫོབ་ཏུ་བདག་ལས་སྐྱེ་བ་བཀག་ན་ལུང་དང་འགལ་བའི་ཉེས་པ་ཡོད་པས་དེ་དང་མི་འགལ་བའི་ཕྱིར་བཀོད་དོ་ཞེ་ན། དེའང་མི་འཐད་དེ། བདག་ལས་སྐྱེ་བ་ནི་ཀུན་རྫོབ་ཏུའང་མདོ་དང་སློབ་དཔོན་གྱི་ལུང་ལས་ཁས་མ་བླངས་པའི་ཕྱིར་རོ། །གལ་ཏེ་གཞན་གྱིས་ཀུན་རྫོབ་ཏུ་བདག་སྐྱེ་འདོད་པ་དེ་དགག་པར་བྱ་བའི་ཕྱིར་ཁྱད་པར་བྱས་སོ་ཞེ་ན། དེའང་མ་ཡིན་ཏེ་གྲངས་ཅན་གྱི་རྣམ་གཞག་ནི་དབུ་མ་པས་ཀུན་རྫོབ་ཏུའང་ཁས་མ་བླངས་པའི་ཕྱིར་དང་། བདེན་གཉིས་ཕྱིན་ཅི་མ་ལོག་པར་མཐོང་བ་ལས་ཉམས་པའི་མུ་སྟེགས་པའི་ལུགས་བདེན་པ་གཉིས་ཆར་དུ་འགོག་པ་དབུ་མའི་ཡོན་ཏན་ཡིན་པའི་ཕྱིར་རོ། །གལ་ཏེ་འཇིག་རྟེན་པའི་བློ་ངོར་བདག་སྐྱེ་གྲུབ་པས་དེ་མི་དགག་པར་བྱ་བའི་ཕྱིར་ཁྱད་པར་དུ་བྱས་སོ་ཞེ་ན། དེའང་མ་ཡིན་ཏེ། འཇིག་རྟེན་པ་ནི་མཐའ་བཞིའི་དཔྱད་པ་མེད་པར་རྒྱུ་ལས་འབྲས་བུ་འབྱུང་ངོ་ཞེས་བྱ་བ་འདི་ཙམ་ཞིག་ཁས་ལེན་པ་ཡིན་ལ་སློབ་དཔོན་ཡང་དེ་ལྟར་རྣམ་པར་གཞག་པར་མཛད་པའི་ཕྱིར་རོ། །གཉིས་པ་ནི། གལ་ཏེ་ཆོས་ཅན་ནང་གི་སྐྱེ་མཆེད་ཀྱི་ཁྱད་པར་དུ་སྦྱོར་ཏེ། འདིར་ཀུན་རྫོབ་ཏུའང་བདག་སྐྱེ་བར་དགག་པར་འདོད་པའི་ཕྱིར་རོ་ཞེ་ན། འོ་ན་ལེགས་ལྡན་འབྱེད་རང་ཉིད་ལ་གཞི་མ་གྲུབ་པའི་ཕྱོགས་ཀྱི་སྐྱོན་དང་གཏན་ཚིགས་ཀྱི་སྐྱོན་དུ་འགྱུར་ཏེ། རང་གི་དོན་དམ་པར་མིག་ལ་སོགས་པའི་སྐྱེ་མཆེད་ཁས་མ་བླངས་པའི་ཕྱིར་རོ། །གལ་ཏེ་ཀུན་རྫོབ་ཏུ་ཆོས་ཅན་མིག་སོགས་ཡོད་པའི་ཕྱིར་གཞི་མ་གྲུབ་པའི་ཕྱོགས་དང་། གཏན་ཚིགས་ཀྱི་ཉེས་པ་མེད་དོ་ཞེ་ན། འོ་ན་དོན་དམ་པར་ཞེས་པའི་ཁྱད་པར་འདི་གང་གི་ཡིན། གལ་ཏེ་མིག་སོགས་ཀུན་རྫོབ་པ་རྣམས་དོན་དམ་པར་སྐྱེ་བ་འགོག་པས་དོན་དམ་པར་ཞེས་པ་སྐྱེ་བ་འགོག་པའི་ཁྱད་པར་ཡིན་ནོ་ཞེ་ན། དེའང་མ་ཡིན་ཏེ། དེ་ལྟར་དུ་སྨྲ་དགོས་པ་ལས་མ་སྨྲས་པའི་ཕྱིར་དང་། སྨྲས་ནའང་ཕ་རོལ་པོས་མིག་སོགས་ཀུན་རྫོབ་པ་ཁས་མ་བླངས་པས་དེ་ལ་སྔར་གྱི་སྐྱོན་གཉིས་པོ་དེར་འགྱུར་བའི་ཕྱིར་རོ། །གལ་ཏེ་རང་གི་སྡེ་པ་དག་གིས་གྲངས་ཅན་གྱི་ངོར་སྒྲ་མི་རྟག་པར་བསྒྲུབ་པ་ན་རྟག་མི་རྟག་གང་གིས་ཀྱང་ཁྱད་པར་དུ་མ་བྱས་པའི་སྒྲ་ཙམ་ཆོས་ཅན་དུ་འཛིན་པ་བཞིན་འདིར་ཡང་བདེན་བརྫུན་གང་གིས་ཀྱང་ཁྱད་པར་དུ་མ་བྱས་པའི་ནང་གི་སྐྱེ་མཆེད་ཙམ་ཆོས་ཅན་དུ་འཛིན་པས་སྔར་གྱི་ཉེས་པ་གཉིས་པོ་མེད་དོ་ཞེ་ན། འདི་ལ་དོན་མི་འཐད་པ་དང་། དཔེ་མ་གྲུབ་པ་གཉིས་ལས། དང་པོ་ནི། དེ་ལྟར་ན་ལེགས་ལྡན་འབྱེད་རང་ཉིད་ཀྱིས་སྐྱེ་བ་དགག་པ་བསྒྲུབ་བྱའི་ཆོས་སུ་བྱེད་པའི་ཚེ་སྐྱེ་མེད་དེ་རྟེན་ཆོས་ཅན་ནང་གི་སྐྱེ་མཆེད་ཙམ་པོ་ནི་ཉམས་ཤིང་མ་གྲུབ་པར་ཁས་བླངས་པ་དང་འགལ་ཏེ། སྐྱེ་མེད་ཡུལ་དུ་བྱེད་པའི་བློ་ནི་རིགས་ཤེས་ཕྱིན་ཅི་མ་ལོག་པའི་བློ་དང་། མིག་སོགས་ནང་གི་སྐྱེ་མཆེད་ནི་ཕྱིན་ཅི་ལོག་ཙམ་གྱིས་བདག་གི་དངོས་པོ་རྙེད་པ་ཡིན་པར་ཁས་བླངས་པའི་ཕྱིར་རོ། །ཁྱབ་སྟེ་ཕྱིན་ཅི་ལོག་པ་དང་། ཕྱིན་ཅི་མ་ལོག་པའི་བློ་གཉིས་འཛིན་སྟངས་དངོས་སུ་འགལ་བ་ཡིན་པས་གཅིག་གིས་གྲུབ་པ་གཅིག་ཤོས་ཀྱིས་མི་འགྲུབ་པའི་ཕྱིར་རོ། །འདི་ལ་དྲང་ངེས་རྣམ་འབྱེད་ལས་བཤད་པ་ཕྱིན་ཅི་ལོག་ཏུ་བྱས་ཡོད་པ་ནི་སྔར་བཀག་ཟིན་ཏོ། །དཔེ་མ་གྲུབ་པ་ནི་དཔེ་དང་ཡང་མི་མཚུངས་ཏེ་སྒྲ་མི་རྟག་པར་བསྒྲུབ་པའི་ཚེ་རྟག་མི་རྟག་གང་གིས་ཀྱང་ཁྱད་པར་དུ་མ་བྱས་པའི་སྒྲ་ཙམ་རྒོལ་བ་གཉིས་ཀྱི་མཐུན་སྣང་དུ་གྲུབ་པ་ཡིན་ཀྱང་། ནང་གི་སྐྱེ་མཆེད་སྤྱི་ཙམ་ནི་དེའི་ཚེ་རྒོལ་ཕྱིར་རྒོལ་གཉིས་ཀྱིས་ཀུན་རྫོབ་ཏུའང་ཁས་མ་བླངས། དོན་དམ་པར་ཡང་ཁས་མ་བླངས་པའི་ཕྱིར་རོ། །གསུམ་པ་ནི། ཇི་སྐད་བཤད་པའི་ཉེས་པ་དེ་དག་ཡོད་པའི་ཕྱིར་ཞེས་པའི་གཏན་ཚིགས་ལའང་མཚུངས་ཏེ། ཡོད་པ་ཀུན་རྫོབ་པ་གཞན་ལ་མ་གྲུབ། དོན་དམ་པ་རང་ལ་མ་གྲུབ། ཙམ་པོ་ཕྱིན་ཅི་མ་ལོག་པའི་བློ་ངོར་མ་གྲུབ་པའི་ཕྱིར་རོ། །བཞི་པ་ནི། ཇི་སྐད་བཤད་པའི་ཉེས་པ་འདི་དག་ལེགས་ལྡན་འབྱེད་རང་ཉིད་ཀྱིས་ཁས་བླངས་པ་ཉིད་དེ་དངོས་སྨྲ་བས་ནང་གི་སྐྱེ་མཆེད་རྣམས་སྐྱེད་པར་བྱེད་པའི་རྒྱུ་ལ་སོགས་པ་ནི། ཡོད་པ་ཁོ་ན་ཡིན་ཏེ། དེ་ལྟར་དེ་བཞིན་གཤེགས་པས་གསུངས་པའི་ཕྱིར་རོ། །ཞེས་བཀོད་པའི་སྒྲུབ་བྱེད་འདི་ལ་ལེགས་ལྡན་འབྱེད་ཀྱིས་ཁྱོད་ཀྱི་གཏན་ཚིགས་གྱི་དོན་དུ་འདོད་པ་གང་ཡིན། དེ་བཞིན་གཤེགས་པས་ཀུན་རྫོབ་ཏུ་དེ་སྐད་གསུངས་པའི་ཕྱིར་རམ། འོན་ཏེ་དོན་དམ་པ་གསུངས་པའི་ཕྱིར་ཞེས་འགོད། དང་པོ་ལྟར་ན་རང་ལ་མ་གྲུབ་ལ། གཉིས་པ་ལྟར་ན་དབུ་མ་པ་ལ་མ་གྲུབ་པས་གཏན་ཚིག་མ་གྲུབ་པའི་དོན་ཉིད་དང་། འགལ་བའི་དོན་ཉིད་དོ་ཞེས་སྐྱོན་སྨྲས་པ་ཡིན་པའི་ཕྱིར་རོ། །ལྔ་པ་ནི་ཁྱོད་ཀྱིས་གཞན་སྐྱེ་དགག་པ་ལ་སོགས་པའི་རང་རྒྱུད་ཀྱི་རྟགས་སུ་བཀོད་པ་ཐམས་ཅད་ལ་གཞི་དང་རྟགས་དོན་དམ་པར་རང་ལ་མ་གྲུབ་ཅིང་། ཀུན་རྫོབ་པ་གཞན་ལ་མ་གྲུབ་ཙམ་པོ་ཕྱིན་ཅི་མ་ལོག་པས་མ་གྲུབ་ཅེས་པའི་ཉེས་པ་དེ་མཚུངས་པས། ཕྱོགས་ཆོས་ཁྱབ་པ་ཐུན་མོང་དུ་ཚད་མས་གྲུབ་པའི་རང་རྒྱུད་ཀྱི་རྟགས་མི་སྲིད་པ་ཡིན་ནོ། །དཔེར་ན་ཁྱོད་ཀྱིས་དོན་དམ་པར་ནང་གི་སྐྱེ་མཆེད་རྣམས་དེ་དག་གི་རྐྱེན་གཞན་ལས་སྐྱེ་བ་མེད་དེ། གཞན་ཡིན་པའི་ཕྱིར། དཔེར་ན་བུམ་པ་བཞིན་ནོ། །ཞེས་པའི་གཞི་དང་རྟགས་ལའང་སྔར་གྱི་དཔྱད་པ་ཐམས་ཅད་མཚུངས་པ་བཞིན་ནོ། །དྲུག་པ་ནི་ཁྱེད་ཅག་ལྟར་ན་ནང་གི་སྐྱེ་མཆེད་ཁོ་ནར་ཆོས་ཅན་དུ་བཀོད་པས་ཕྱིའི་སྐྱེ་མཆེད་བུམ་པ་ལ་སོགས་པ་བདག་ལས་སྐྱེ་བ་མེད་པར་མི་འགྲུབ་པས་མི་མཐུན་ཕྱོགས་སུ་དོགས་ཤིང་། དེ་ལ་ཡོད་པའི་རྟགས་འཇུག་པས་གཏན་ཚིགས་མ་ངེས་པར་འགྱུར་རོ། །ལྔ་པ་ཉེས་པ་དེ་རང་ལ་མཚུངས་པ་སྤང་བ་ནི་ཇི་སྐད་བཤད་པའི་གཞི་མ་གྲུབ་པའི་ཕྱོགས་ཀྱི་སྐྱོན་དང་། གཏན་ཚིགས་ཀྱི་སྐྱོན་རྣམས་ཁྱེད་ལའང་མཚུངས་ཏེ། གཞི་དང་རྟགས་ཐུན་མོང་དུ་གྲུབ་པ་མེད་པར་ཁྱེད་རང་གིས་ཀྱང་ཁས་བླངས་པའི་ཕྱིར་རོ་སྙམ་ན་མི་མཚུངས་ཏེ། རང་རྒྱུད་ཀྱི་རྗེས་དཔག་སྨྲ་བ་ལ་གཞི་རྟགས་ཐུན་མོང་དུ་གྲུབ་པར་དགོས་པ་ཡིན་ཡང་། ཁོ་བོ་ཅག་རང་རྒྱུད་ཀྱི་རྗེས་སུ་དཔག་པ་མི་སྦྱོར་བའི་ཕྱིར་ཏེ། སུན་འབྱིན་པའི་ཐལ་བའི་ངག་གིས་གཞན་གྱི་དམ་བཅའ་འགོག་པ་ཙམ་ཡིན་ལ། དེ་ལ་ནི་ཕྱོགས་ཆོས་དང་ཁྱབ་པ་ཕ་རོལ་པོས་ཁས་བླངས་པ་ཙམ་གྱིས་ཆོག་པའི་ཕྱིར་རོ། །དེའི་དཔེར་བརྗོད་ནི་གཞན་དག་མིག་ལ་རང་གི་བདག་ཉིད་མི་ལྟ་བའི་ཆོས་ཀྱང་འདོད་ལ། གཞན་ལ་ལྟ་བའི་ཆོས་མེད་ན་མི་འབྱུང་བ་ཉིད་དུའང་ཁས་བླངས་པ་ལ། གང་རང་གི་བདག་ཉིད་ལྟ་བ་མེད་པ་དེ་ལ་གཞན་ལ་ལྟ་བའང་ཡོད་པ་མ་ཡིན་ཏེ། དཔེར་ན་བུམ་པ་བཞིན་ནོ། །མིག་ལའང་རང་གི་བདག་ཉིད་མི་ལྟ་བ་ཡོད་པ་ཡིན་ཏེ། དེའི་ཕྱིར་གཞན་ལལྟ་བའང་འདི་ལ་མེད་དོ། །ཞེས་དེ་ལ་གྲུབ་པའི་རྗེས་སུ་དཔག་པས་སེལ་བར་བྱེད་པ་བཞིན། ཡང་རྒོལ་ཕྱིར་རྒོལ་གང་རུང་ལ་གྲུབ་པའི་རྗེས་སུ་དཔག་པའི་སྒོ་ནས་གནོད་པ་ཡོད་དམ་ཞེ་ན་དེའང་ཡོད་དེ། འཇིག་རྟེན་ན་རེས་འགའ་དཔང་པོ་རྒོལ་བ་དང་ཕྱིར་རྒོལ་བ་གཉིས་ཀྱིས་ཚད་མར་བྱས་པའི་ཚིག་གིས་རྒྱལ་བའམ་ཕམ་པར་འགྱུར་ལ། རེས་འགའ་ནི་རང་གི་ཚིག་ཁོ་ནས་འགྱུར་གྱི་གཞན་གྱི་ཚིག་གིས་རྒྱལ་བའམ་ཕམ་པར་འགྱུར་བ་མ་ཡིན་ཞིང་། འཇིག་རྟེན་ན་ཇི་ལྟར་ཡིན་པ་བཞིན་དུ་རིགས་པའི་བསྟན་བཅོས་སུའང་སྐབས་སུ་བབས་པའི་ཕྱིར་རོ། །དཔེར་ན་ལུང་གིས་གནོད་པའང་། གཉིས་ཀ་ལ་གྲུབ་པའི་ལུང་ངམ། རང་ལ་གྲུབ་པའི་ལུང་གིས་གནོད་པ་ཡིན་གྱི་གཞན་གྱི་ལུང་གིས་མི་གནོད་པ་བཞིན་ནོ། །བདག་ལས་སྐྱེ་བ་འགོག་པའི་ཐལ་རང་གི་ཁྱད་པར་བཤད་ཟིན་ཏོ། །གཉིས་པ་གཞན་ལས་སྐྱེ་བ་འགོག་པའི་འཐད་པ་ལ་གཉིས་ཏེ། ཕྱོགས་སྔ་མ་བརྗོད་པ་དང་། འགོག་བྱེད་ཀྱི་རིགས་པའི་ཁྱད་པར་བཤད་པའོ། །དང་པོ་ནི། རང་གི་སྡེ་པ་དོན་སྨྲ་བ་དག་དོན་དམ་པ་གཟུང་འཛིན་གཉིས་དང་། རྣམ་རིག་པ་དག་གཉིས་མེད་ཀྱི་དངོས་པོ་གཞན་དུ་གྱུར་པའི་རྐྱེན་བཞི་ལས་སྐྱེའོ། །ཞེས་སྨྲ་ཞིང་རང་རྒྱུད་པ་དག་ཀྱང་ཐ་སྙད་དུ་གཞན་སྐྱེ་ཡོད་པར་སྨྲའོ། །གཉིས་པ་ལ་ལྔ་སྟེ། གཞུང་ལས་འཆད་འགྱུར་གྱི་རིགས་པ། ཟླ་བས་བཀོད་པའི་རིགས་པ། སངས་རྒྱས་བསྐྱངས་ཀྱིས་བཀོད་པའི་རིགས་པ། དེ་ལ་ལེགས་ལྡན་གྱིས་སྐྱོན་བརྗོད་པའི་ཚུལ། དེ་སྤང་བ་བཤད་ཟིན་དྲན་པ་ལ་སྦྱར་བའོ། །དང་པོ་ནི། དངོས་པོ་རྣམས་ནི་གཞན་ལས་སྐྱེ་བ་མེད་དེ། གཞན་མེད་པའི་ཕྱིར། འདིར་ཡང་། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་ལ་ཡོད་མ་ཡིན། །ཞེས་བྱ་བ་དེར་འཆད་པར་འགྱུར་རོ། །གཉིས་པ་ལ་གཉིས་ཏེ། རིགས་ངོར་གཞན་སྐྱེ་དགག་པ་དང་། ཐ་སྙད་དུ་གཞན་སྐྱེ་དགག་པའོ། །དང་པོ་ལ་གཉིས་ཏེ། ཧ་ཅང་ཐལ་བས་དགག་པ་དང་། རྣམ་པར་བརྟགས་ནས་དགག་པའོ། །དང་པོ་ལ་གཉིས་ཏེ། ཐལ་བ་བརྗོད་པ་དང་། དེའི་ལན་དགག་པའོ། །དང་པོ་ནི། འབྲས་བུ་མྱུ་གུ་འདི་གཞན་དུ་གྱུར་པའི་ས་བོན་ལས་སྐྱེ་བ་ལྟར། རྒྱུ་མ་ཡིན་པ་མེ་དང་སོལ་བ་ལས་ཀྱང་སྐྱེ་བར་འགྱུར་ཏེ། གཞན་ཉིད་དུ་མཚུངས་པའི་ཕྱིར་ཞེས་པའོ། །གཉིས་པ་ནི། གལ་ཏེ་གཞན་དུ་མཚུངས་ཀྱང་རྒྱུར་མ་གྱུར་པའི་གཞན་ལས་མི་འབྱུང་བས་སྐྱོན་མེད་དོ་སྙམ་ན། དེའི་ལན་ལ་རྒྱུ་མཚན་མཚུངས་པ་དང་། ལྡོག་པ་གཅིག་པའི་ཁྱབ་པ་གཞན་དང་མཚུངས་པ་གཉིས་ལས། དང་པོ་ལ་གསུམ་སྟེ། ཁྱད་པར་གྱི་རྒྱུ་མཚན་འདྲི་བ་དང་། བརྗོད་པའི་རྒྱུ་མཚན་དགག་པ་དང་། རང་གི་ཀུན་རྫོབ་ལ་མཚུངས་པར་སྤང་བའོ། །དང་པོ་ནི། མི་འདྲ་ཉིད་དེ་དེ་ཡིན་ན། །གཏན་ཚིགས་ཁྱད་པར་བརྗོད་པར་བྱོས། །ཞེས་པའི་ཚུལ་གྱིས་གཞན་དུ་མཚུངས་བཞིན་དུ་གཅིག་ལས་སྐྱེ་ལ་གཅིག་ལས་མི་སྐྱེ་བའི་ཁྱད་པར་གང་ཡིན་དཔྱད་པར་བྱའོ། །གཉིས་པ་ལ་སྣང་བ་དང་། ནུས་པ་དང་། ཆོས་ཉིད་ལན་དུ་མི་རུང་བ་གསུམ་ལས། དང་པོ་ནི། དེ་ལྟར་མངོན་སུམ་གྱིས་མཐོང་བའི་ཕྱིར་སྙམ་ན། མ་དཔྱད་པའི་བློ་འཁྲུལ་བས་དེ་ལྟར་མཐོང་མོད། དཔྱད་པའི་ཚེ་མཐོང་བ་ལན་དུ་མི་རུང་སྟེ། སྐྱེ་བར་སྣང་ཡང་དངོས་པོར་སྐྱེ་བར་མི་འགྲུབ་པར་ཁྱེད་ཅག་ཉིད་ལ་གྲུབ་པའི་རྨི་ལམ་སྒྱུ་མ་ལ་སོགས་པའི་བརྟགས་པ་མཚུངས་པའི་ཕྱིར་རོ། །གཉིས་པ་ནི་ནུས་པ་ཡོད་པ་དང་། མེད་པས་དེ་ལྟར་ངེས་པ་ཡིན་ནོ་སྙམ་ན། དེའང་མི་འཐད་དེ། རིགས་པས་དཔྱད་པའི་ཚེ་དུས་གསུམ་ལ་ནུས་པ་ཁེགས་པའི་ཕྱིར། གསུམ་པ་ནི་གཞན་དུ་མཚུངས་ཀྱང་སྐྱེ་མི་སྐྱེ་དངོས་པོའི་ཆོས་ཉིད་དམ། རྟེན་འབྲེལ་གྱི་ཆེ་བ་ཡིན་ནོ་ཞེ་ན། ཆོས་ཉིད་ཡིན་པ་ལ་གནོད་བྱེད་མེད་ཅིང་སྒྲུབ་བྱེད་ཡོད་པ་ཅིག་དགོས་པ་ལས། སྐྱེ་བ་དང་། མི་སྐྱེ་བར་མཐོང་བས། གནས་ཚུལ་ལ་སྐྱེ་བ་དང་མི་སྐྱེ་བ་ཆོས་ཉིད་དུ་མི་འགྲུབ་པ་སྔར་དང་མཚུངས་པས་སྒྲུབ་བྱེད་ཀྱི་ཚད་མ་ཅི་ཡང་མེད་དོ། །གསུམ་པ་ནི་དེ་ལྟ་ན་ལས་ཡིན་པར་མཚུངས་པ་ལ་རྣམ་པར་སྨིན་པ་ངེས་པ་ལ་སོགས་པ་ཁྱེད་ཉིད་འདོད་པའི་ཀུན་རྫོབ་ཀྱི་ངེས་པ་ཐམས་ཅད་ཀྱང་མི་འཐད་པར་འགྱུར་རོ་ཞེ་ན། ཁོ་བོ་ཅག་ལ་རིགས་པས་དཔྱད་ན་ཀུན་རྫོབ་ཏུའང་ངེས་པ་མེད་མོད་ཀྱི་མ་དཔྱད་པ་བློ་འཁྲུལ་པའི་ངོར། ལས་འབྲས་ལ་སོགས་པ་མ་འཆོལ་བར་སྣང་བ་ཙམ་ལ་ཀུན་རྫོབ་ཏུ་ལས་འབྲས་ལ་སོགས་པ་ངེས་པར་བརྗོད་པ་ཡིན་པས་སྐྱོན་མེད་དེ། ཇི་ལྟར་ཁྱོད་ཀྱིས་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླངས། །འབྲས་ཕྱིར་འདི་དག་མེད་ཀྱང་ཡོད་དོ་ཞེས། །འཇིག་རྟེན་ངོར་བྱས་བདག་ནི་སྨྲ་བར་བྱེད། །ཅེས་གསུངས་པ་ལྟ་བུའོ། །གཉིས་པ་ལྡོག་པ་གཅིག་པའི་ཁྱབ་པ་གཞན་དང་མཚུངས་པ་ནི་མྱུ་གུ་དེ་གཉིས་ཀ་ལས་གཞན་དུ་མཚུངས་ཀྱང་ས་བོན་ལས་སྐྱེ། མེ་དང་སོལ་བ་ལས་མི་སྐྱེ་བས་ཁྱབ་པ་མ་གྲུབ་པར་མཚུངས་ན། ཁྱོད་ལ་ཁྱབ་ལྡན་གྱི་རྟགས་མེད་ན་རང་རྒྱུད་ཀྱི་རྟགས་ནུབ་པར་འགྱུར་ཞིང་། ཡོད་ན་གང་ཡིན་ཞེས་འདྲི་བར་བྱའོ། །གལ་ཏེ་གང་དུ་བ་ཡོད་ན་མེ་ཡོད་པས་ཁྱབ་དཔེར་ན་ཚང་མང་བཞིན། ལ་ལའང་དུ་ཙམ་ཡོད་དོ་ཞེས་པ་ལྟ་བུ་སྟེ། ཚང་མང་གི་དུ་ཙམ་ལ་མེས་ཁྱབ་པ་གྲུབ་པས་དེ་དང་དུ་ཙམ་དུ་ལྡོག་པ་གཅིག་པའི་ལའི་དུ་ཙམ་ལའང་མེས་ཁྱབ་པ་གྲུབ་པར་བརྗོད་ཅེ་ན། འདིར་ཡང་ས་བོན་གྱི་གཞན་ཙམ་ལས་མྱུ་གུ་སྐྱེ་བས་ཁྱབ་པས་དེ་དང་གཞན་ཙམ་དུ་ལྡོག་པ་གཅིག་པའི་མེ་དང་སོལ་བའི་གཞན་ཙམ་ལའང་མྱུ་གུ་སྐྱེ་བས་ཁྱབ་པར་མཚུངས་སོ། །དེ་ལྟར་ཡང་། རྒྱུ་དང་འབྲས་བུ་གཞན་ཉིད་ན། །རྒྱུ་དང་རྒྱུ་མིན་མཚུངས་པར་འགྱུར། །ཞེས་དང་། གཞན་ལ་བརྟེན་ནས་གལ་ཏེ་གཞན་ཞིག་འབྱུང་བར་འགྱུར་ན་ནི། །འོ་ན་མེ་ལྕེ་ལས་ཀྱང་མུན་པ་འཐུག་པོ་འབྱུང་འགྱུར་ཞིང་། །ཞེས་གསུངས་པ་ཡིན་ནོ། །གལ་ཏེ་བ་ལང་གི་སྲོག་ཆགས་ཙམ་ལ་ནོག་སོགས་ཀྱིས་ཁྱབ་པས་དེ་དང་སྲོག་ཆགས་ཙམ་དུ་ལྡོག་པ་གཅིག་པའི་མིའི་སྲོག་ཆགས་ལའང་ནོག་སོགས་ཀྱིས་ཁྱབ་པར་ཁྱོད་ལའང་འགྱུར་བས་ཀུན་རྫོབ་ཀྱི་རྣམ་གཞག་ཐམས་ཅད་ཉམས་པར་འགྱུར་རོ་ཞེ་ན། འདིའི་ལན་དུ་སྔ་རབས་པ་དག ལྡོག་པ་གཅིག་ལ་ཁས་མི་ལེན་པས་སྐྱོན་མེད་ཅེས་སོགས་ཀྱིས་སྤྲོས་པ་བྱེད་པ་སྣང་ཡང་གནད་ཀྱི་དོན་ནི་རིགས་པས་དཔྱད་པའི་ཚེ་བ་ལང་གི་སྲོག་ཆགས་ཙམ་ལ་ནོག་སོགས་ཀྱིས་ཁྱབ་པར་ཁས་བླངས་ན་དེ་མཚུངས་པ་བདེན་ཡང་། དེའི་ཚེ་བ་ལང་ཉིད་མི་རྙེད་པས་དེའི་སྲོག་ཆགས་ཙམ་ལ་ནོག་སོགས་ཀྱིས་ཁྱབ་པ་ཁས་མི་ལན་ཞེས་པའི་དོན་ནོ། །གཉིས་པ་རྣམ་པར་བརྟགས་ནས་དགག་པ་ནི་རྒྱུ་གཞན་ལས་སྐྱེ་ན། རྒྱུ་འགགས་པ་ལས་སྐྱེའམ་མ་འགག་པ་ལས་སྐྱེ། དང་པོ་ལྟར་ན་རྒྱུ་མེད་དུ་འགྱུར་ལ་ཕྱི་མ་ལྟར་ན་རྒྱུ་འབྲས་དུས་མཉམ་པར་འགྱུར་རོ། །གལ་ཏེ་རྒྱུ་མ་འགག་པར་འབྲས་བུ་སྐྱེའོ་ཞེས་པ་ནི་མི་སྨྲ་ཡི། འོན་ཀྱང་རྒྱུ་མ་འགགས་པ་ལས་འབྲས་བུ་སྐྱེ་ལ་སྐྱེ་བའི་དུས་ན་འབྲས་བུ་མེད་པས་དུས་མཉམ་པར་ཡང་མི་འགྱུར་རོ་སྙམ་ན་མ་ཡིན་ཏེ། སྐྱེ་བ་འདི་ནི་བྱེད་པོ་མེད་པར་རིགས་པའི་ངོ་བོའང་མིན། །ཞེས་པའི་ཚུལ་གྱིས་རྒྱུ་མ་འགགས་པའི་དུས་སུ་འབྲས་བུ་མེད་ན་སྐྱེ་བའི་བྱ་བ་མེད་པས་འབྲས་བུ་སྐྱེ་བ་ཉིད་དུ་མི་འཐད་པའི་ཕྱིར་རོ། །དེ་བཞིན་དུ་རྒྱུ་གཞན་ལས་སྐྱེ་ན་ཕྲད་ནས་སྐྱེའམ་མ་ཕྲད་ནས་སྐྱེ། དང་པོ་ལྟར་ན་རྒྱུ་དང་འབྲས་བུ་དུས་མཉམ་པར་འགྱུར་ལ། ཕྱི་མ་ལྟར་ན་འབྲས་བུ་སྐྱེ་བའི་དུས་ན་རྒྱུ་མེད་པས་འབྲས་བུ་རྒྱུ་མེད་པ་ལས་སྐྱེ་བར་འགྱུར་རོ། །གཞན་ཡང་རྒྱུའི་དུས་ན་འབྲས་བུ་ཡོད་པ་སྐྱེའམ་མེད་པ་སྐྱེ་ཞེས་ཡོད་མེད་སྐྱེ་འགོག་དང་། རྒྱུ་དང་འབྲས་བུ་གཉིས་ཀ་ལ་གཅིག་དང་དུ་མ་དཔྱད་པའི་རིགས་པ་རྣམས་ཀྱང་སྦྱར་བར་བྱའོ། །གཉིས་པ་ཐ་སྙད་དུ་གཞན་སྐྱེ་དགག་པ་ནི་མ་དཔྱད་པ་འཇིག་རྟེན་པའི་ངོར་ཡང་གཞན་ལས་སྐྱེ་བ་མེད་དེ། འཇིག་རྟེན་གྱིས་རྒྱུ་ལས་འབྲས་བུ་སྐྱེ་བ་ཙམ་ཞིག་མཐོང་གི་རྒྱུ་འབྲས་རྫས་གཞན་དུ་མ་མཐོང་བའི་ཕྱིར་ཏེ། རྒྱུ་བུའི་ས་བོན་ཙམ་བཏབ་ནས་ཕྱིས་ཀྱི་བུ་ལ་དམིགས་ཏེ། འདི་བདག་གིས་བསྐྱེད་ཅེས་དང་། ཤིང་གི་ས་བོན་ཙམ་བཙུགས་ནས་ཕྱིས་ཀྱི་ཤིང་སྡོང་ལ་དམིགས་ཏེ། འདི་བདག་གིས་བཙུགས་སོ་སྙམ་དུ་རྟོག་པའི་ཕྱིར་རོ། །འོ་ན་འཇིག་རྟེན་གྱི་ཐ་སྙད་དུ་བདག་སྐྱེ་ཡོད་པར་འགྱུར་རོ་སྙམ་ན་དེར་མི་འགྱུར་ཏེ་སྔར་གྱི་རྒྱུ་དེ་ཉིད་ད་ལྟར་གྱི་འདི་ཡིན་ནམ་ཞེས་དྲིས་པའི་ཚེ་དེ་ནི་མ་ཡིན་གྱི་སྔར་བུའི་ས་བོན་བཏབ་པ་དང་། ཤིང་གི་ས་བོན་བཙུགས་པ་ལ་རྟེན་ནས་ད་ལྟར་གྱི་འདི་འབྱུང་ཞེས་པ་ཙམ་ཞིག་སྨྲ་ཞིང་རྟོག་པར་བྱེད་པའི་ཕྱིར། དེ་ཉིད་ཀྱི་ཕྱིར་ཐ་སྙད་དུའང་རྒྱུ་འབྲས་དེ་ཉིད་དང་གཞན་ཉིད་དུ་མི་འཐད་པའི་ཟླ་བའི་རིགས་པ་ཕྲ་ཞིང་ཕྲ་བ་འདི་ནི་རྟོགས་པར་དཀའ་ཞིང་རྟོགས་ན་དོན་ཆེ་བར་ཞིག་ཏུ་སྣང་ངོ་། །ད་ནི་འདིར་དཔྱད་དུ་ཡོད་དེ། བསླབ་བཏུས་དང་། ཚིགས་གསལ་ལས། མདོ་དྲངས་པར་འཇིག་རྟེན་སྐྱེ་བའང་གཞན་ལ་འཆི་བའང་གཞན་ཞེས་དང་། སྤྱོད་འཇུག་ལས། འདི་ལྟར་འཆི་བའང་གཞན་ཉིད་ལ། །སྐྱེ་བ་ཡང་ནི་གཞན་ཉིད་ཡིན། །ཞེས་གསུངས་པ་ཐ་སྙད་དུ་རྒྱུ་འབྲས་གཞན་ཉིད་དུ་གྲུབ་བོ་སྙམ་ན། འདིར་གཞན་ཞེས་པ་ནི་གཅིག་མིན་པ་ལ་གཞན་མིང་བཏགས་པ་ཡིན་གྱི་མཐའ་བཞིའི་ནང་ཚན་དུ་གྱུར་པའི་གཞན་ཉིད་ནི་མ་ཡིན་ཏེ། འཕགས་མཆོག་ཀླུ་སྒྲུབ་ཀྱིས། མཐའ་བཞིའི་ནང་ཚན་གྱི་དེ་ཉིད་དང་གཞན་ཉིད་ཐ་སྙད་དུའང་མི་བཞེད་ཀྱང་ས་ལུ་ལྗང་པའི་མདོ་འགྲེལ་ལས། དེ་ལ་རྟག་པར་མ་ཡིན་པ་ནི་གང་གི་ཕྱིར་ས་བོན་ཡང་གཞན་ཉིད་ལ་མྱུ་གུའང་གཞན་ཉིད་དེ། ས་བོན་གང་ཡིན་པ་དེ་ཡང་མྱུ་གུ་མ་ཡིན། མྱུ་གུ་གང་ཡིན་པ་དེ་ཡང་ས་བོན་མ་ཡིན་ནོ། །ཞེས་གསུངས་པའི་ཕྱིར་དང་། ཚིག་གསལ་དུ་ས་ལུ་ལྗང་པའི་མདོ་དྲངས་པ་ལས། མ་རིག་པའང་གཞན་ཉིད་ལ། འདུ་བྱེད་ཀྱང་གཞན་ཉིད་དེ། མ་རིག་པ་གང་ཡིན་པ་དེའང་འདུ་བྱེད་མ་ཡིན། འདུ་བྱེད་གང་ཡིན་པ་དེའང་མ་རིག་པ་ཉིད་མ་ཡིན་ནོ་ཞེས་སོགས་རྒ་ཤིའི་བར་དུ་སྦྱར་ཏེ་གསུངས་པའི་ཕྱིར་རོ། །འདི་དག་གཅིག་མ་ཡིན་པ་ལ་གཞན་ཉིད་ཀྱི་མིང་གིས་བཏགས་པར་ཅིས་ཤེས་ཤེ་ན། ས་བོན་ཡང་གཞན་མྱུ་གུའང་གཞན་པའི་ཤེས་བྱེད་དུ་ས་བོན་གང་ཡིན་པ་དེ་མྱུ་གུ་མ་ཡིན། མྱུ་གུ་གང་ཡིན་པ་དེ་ས་བོན་མ་ཡིན་ཞེས་བཀོད་པ་ལས་ཤེས་ཏེ། རིགས་པ་དེ་ཉིད་ཀྱིས་གཞན་ཉིད་དུ་ཁས་ལེན་ན་ནམ་མཁའི་པདྨོ་དང་། མོ་གཤམ་གྱི་བུ་གཉིས་ཀྱང་གཞན་ཉིད་དུ་ཐལ་བའི་ཕྱིར་རོ། །དཔེར་ན་ས་ལུ་ལྗང་པའི་མདོ་འགྲེལ་ལས། རྒྱུ་ལྔ་དག་གིས་ཕྱི་རོལ་གྱིས། །རྟེན་ཅིང་འབྲེལ་བར་འབྱུང་བར་བཞེད། །ཅེས་པའི་རྒྱུ་ལྔ་ནི་རྟག་པར་མ་ཡིན། ཆད་པར་མ་ཡིན། འཕོ་བར་མ་ཡིན། རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བ་མ་ཡིན། འདྲ་བའི་རྒྱུད་དུ་གཏོགས་པ་རྣམས་ལས་འཕོ་བར་མ་ཡིན་པའི་སྐབས་སུ་ས་བོན་དུ་མྱུ་གུ་རིགས་མི་འདྲ་ཞེས་དང་། འདྲ་བའི་རྒྱུད་དུ་གཏོགས་པ་ཞེས་པའི་སྐབས་སུ་འདྲ་བར་གསུངས་ཀྱང་རིགས་མི་འདྲ་བའི་དོན་ཁ་དོག་དང་དབྱིབས་ཐ་དད་དུ་ཡོད་པ་ལ་དགོངས་པས་མི་འགལ་བ་དང་། འཇུག་པར། གལ་ཏེ་ཁྱོད་ཀྱི་ས་བོན་མྱུ་གུ་འདིར་གཞན་མ་ཡིན་ན། །ཞེས་པའི་དོན་ཡང་གཅིག་ཉིད་ལ་གཞན་མ་ཡིན་པའི་མིང་གིས་བཏགས་པ་བཞིན་ནོ། །གསུམ་པ་སངས་རྒྱས་བསྐྱངས་ཀྱིས་བཀོད་པའི་རིགས་པ་ནི་དངོས་པོ་རྣམས་གཞན་ལས་སྐྱེ་བ་མེད་དེ། ཐམས་ཅད་ལས་ཐམས་ཅད་སྐྱེ་བར་འགྱུར་བའི་ཕྱིར་རོ། །ཞེས་འཆད་དོ། །བཞི་པ་དེ་ལ་ལེགས་ལྡན་གྱིས་སྐྱོན་བརྗོད་པའི་ཚུལ་ནི་དེས་ན་དེ་ལ་ཐལ་བར་གྱུར་བའི་ངག་ཡིན་པའི་ཕྱིར། བསྒྲུབ་པར་བྱ་བ་དང་སྒྲུབ་པར་བྱེད་པ་བཟློག་པར་བྱས་ན་དངོས་པོ་རྣམས་བདག་གམ་གཉིས་སམ། རྒྱུ་མེད་པ་ལས་སྐྱེ་བར་འགྱུར་བ་དང་། འགའ་ཞིག་གིས་འགའ་ཞིག་སྐྱེ་བར་འགྱུར་བའི་ཕྱིར། ཕྱོགས་གོང་མ་དང་འགལ་བར་འགྱུར་རོ། །གཞན་དུ་ན་ཡང་ཐམས་ཅད་ལས་ཐམས་ཅད་སྐྱེ་བར་ཡང་འགྱུར་བའི་ཕྱིར་རོ། །དེ་བས་ན་དེ་ལ་སྒྲུབ་པ་དང་སུན་འབྱིན་པ་ཉིད་མེད་པའི་ཕྱིར། དེ་ནི་དོན་འབྲེལ་པ་མེད་པ་ཡིན་ཏེ། ཞེས་སུན་འབྱིན་པར་སྨྲའོ། །ལྔ་པ་དེ་སྤང་བ་བཤད་ཟིན་དྲན་པ་ལ་སྦྱར་བ་ནི་འདིའང་དོན་འབྲེལ་པ་མེད་པ་མ་ཡིན་ཏེ། གོང་ཁོ་ནར་བསྟན་ཟིན་པའི་ཕྱིར་དང་། གཞན་གྱིས་དམ་བཅས་པའི་དོན་སུན་འབྱིན་པར་བྱེད་པ་ཡིན་པའི་ཕྱིར་དང་། སུན་འབྱིན་པ་ཉིད་ཀྱང་ཡིན་པའི་ཕྱིར་འདི་ནི་གྱི་ནའོ། །དེས་ན་སླར་ཡང་འབད་པར་མི་བྱའོ། །གསུམ་པ་གཉིས་ཀ་ལས་སྐྱེ་བ་དགག་པའི་རིགས་པའི་ཁྱད་པར་ལ་གཉིས་ཏེ། ཕྱོགས་སྔ་བརྗོད་པ་དང་། དེ་དགག་པའོ། །དང་པོ་ནི། གཙོ་བོ་དབང་ཕྱུག་དང་བཅས་པར་སྨྲ་བ་དག་འབྲས་བུའི་དངོས་པོ་རྣམས་གཙོ་བོས་བྱས་པས་རང་ལས་སྐྱེ་ཞིང་། དབང་ཕྱུག་གིས་བྱས་པས་གཞན་ལས་ཀྱང་སྐྱེ་ལ་དེ་ལ་སྔར་བཤད་པའི་ཉེས་པར་མི་འགྱུར་ཏེ་རང་ཁོ་ན་དང་། གཞན་ཁོ་ན་ལས་སྐྱེ་བར་ཁས་མ་བླངས་པའི་ཕྱིར་ཞེས་སྨྲའོ། །གཉིས་པ་ལ་གཉིས་ཏེ། སྔར་བཤད་པ་དང་། མ་བཤད་པའི་རིགས་པས་དགག་པའོ། །དང་པོ་ནི། རང་ལས་སྐྱེ་བའི་ཆ་ལ་བདག་སྐྱེ་ལ་བཀོད་པའི་སྐྱོན་དང་། གཞན་ལས་སྐྱེ་བའི་ཆ་ལ་གཞན་སྐྱེ་ལ་བཀོད་པའི་སྐྱོན་རྣམས་འབབ་པའོ། །གཉིས་པ་ནི། གལ་ཏེ་རེ་རེས་བྱས་གྱུར་ན། །སྡུག་བསྔལ་གཉིས་ཀས་བྱས་པར་འགྱུར། །ཞེས་པའི་ཚུལ་གྱིས་རང་གཞན་རེ་རེ་ལ་བསྐྱེད་པའི་ནུས་པ་ཡོད་ན་གཉིས་ཀ་ཚོགས་པས་ཀྱང་བསྐྱེད་པར་འགྱུར་བ་ཞིག་ན་སྔར་བཤད་པའི་ཚུལ་གྱིས་རང་གཞན་རེ་རེ་ལ་བསྐྱེད་པའི་ནུས་པ་མེད་པའི་ཕྱིར། གཉིས་ཀ་ཚོགས་པས་ཀྱང་བསྐྱེད་པར་མི་འཐད་དེ། བྱེ་མ་དག་ལས་ཏིལ་མར་བཞིན་ནོ། །བཞི་པ་རྒྱུ་མེད་ལས་སྐྱེ་བ་འགོག་པའི་རིགས་པའི་ཁྱད་པར་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི། ཚུ་རོལ་མཛད་པ་བ་དག་ད་ལྟར་གྱི་རིགས་པ་ཙམ་དང་། བདེ་སྡུག་སྐྱེ་བ་སྔ་མའི་རིགས་པ་ཙམ་དང་། དགེ་མི་དགེའི་རྒྱུ་ལས་བྱུང་བ་མ་ཡིན་གྱི། འཇིག་རྟེན་འདིའི་འབྱུང་བ་འདུས་པ་དང་། མཐུན་རྐྱེན་གྱི་ཚོགས་པ་ཚང་བ་ཙམ་ལས་བྱུང་བ་ཡིན་ནོ་ཞེས་མ་མཐོང་བའི་རྒྱུ་མེད་པར་སྨྲ་ལ། དཔྱོད་པ་པ་དག ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟེངས་རིང་རྣོ་བ་དང་། །རྨ་བྱའི་མདོག་དབྱིབས་ལ་སོགས་ཆོས་རྣམས་ཀུན། །སུས་ཀྱང་མ་བྱས་རང་གི་ངང་གིས་བྱུང་། །ཞེས་མཐོང་བའི་རྒྱུའང་མེད་པར་སྨྲའོ། །གཉིས་པ་ལ་གསུམ་སྟེ། ཟླ་བས་བཀོད་པའི་རིགས་པ། སངས་རྒྱས་བསྐྱངས་ཀྱིས་བཀོད་པའི་རིགས་པ། ལེགས་ལྡན་གྱི་རྩོད་ལན་བཤད་ཟིན་དྲན་པ་ལ་སྦྱར་བའོ། །དང་པོ་ལ་གསུམ་སྟེ། རེས་འགའ་བ་མ་ཡིན་པར་ཐལ་བ་དང་། འབྲས་བུའི་ཆེད་དུ་རྒྱུ་ལ་འབད་པ་དོན་མེད་པར་ཐལ་བ་དང་། ཤེས་པའི་གཟུང་ཡུལ་དུ་མི་འགྱུར་བར་ཐལ་བའོ། །དང་པོ་ནི་དངོས་པོ་རྣམས་རྒྱུ་མེད་ཡིན་ན། ཡུལ་དུས་ཀྱི་ཁྱད་པར་ལ་སོགས་པ་གང་ལའང་ལྟོས་པ་མེད་པར་འགྱུར་བས་འགའ་ཞིག་འགའ་ཞིག་ཏུ་ལན་གཅིག་འབྱུང་བའམ། ཐམས་ཅད་ཐམས་ཅད་དུ་རྟག་ཏུ་འབྱུང་བར་ཐལ་ཏེ། ལྟོས་པ་མེད་པར་འབྱུང་བའི་ཕྱིར། གཉིས་པ་ནི་དངོས་པོ་རྣམས་རྒྱུ་མེད་ཡིན་ན། འབྲས་བུ་ལོ་ཏོག་ལ་སོགས་པའི་ཆེད་དུ་རྒྱུ་ཞིང་ལས་སོགས་ལ་འཇུག་པ་དོན་མེད་པར་འགྱུར་བ་ཞིག་ན་དོན་དང་བཅས་པར་མངོན་སུམ་དུ་དམིགས་པའི་ཕྱིར་དངོས་པོ་རྣམས་རྒྱུ་ལྡན་དུ་གྲུབ་བོ། །གསུམ་པ་ནི་དངོས་པོ་རྣམས་རྒྱུ་མེད་པའི་ཕྱིར་ནམ་མཁའི་མེ་ཏོག་ལྟར། ཁ་དོག་དང་། དབྱིབས་དང་། དྲི་ལ་སོགས་པ་ཤེས་པའི་གཟུང་ཡུལ་དུ་མི་སྣང་བར་འགྱུར་བ་ལས་དེ་དག་ཆེས་བཀྲ་བ་ཤེས་པའི་གཟུང་ཡུལ་དུ་གྱུར་པའི་ཕྱིར་ན། འཇིག་རྟེན་རྒྱུ་དང་ལྡན་པར་གྲུབ་སྟེ། རང་གི་བློ་བཞིན་ནོ། །གཉིས་པ་ནི་སློབ་དཔོན་སངས་རྒྱས་བསྐྱངས་ནི་དངོས་པོ་རྣམས་རྒྱུ་མེད་པ་ལས་ཀྱང་སྐྱེ་བ་མེད་དེ། རྟག་ཏུ་ཐམས་ཅད་ལས་ཐམས་ཅད་སྐྱེ་བར་ཐལ་བར་འགྱུར་རོ་ཞེས་འཆད་དོ། །གསུམ་པ་ནི་འདི་ལའང་སློབ་དཔོན་ལེགས་ལྡན་འབྱེད་དེ་ལའང་ཐལ་བར་འགྱུར་བའི་ངག་ཡིན་པའི་ཕྱིར། གལ་ཏེ་བསྒྲུབ་པར་བྱ་བ་དང་། སྒྲུབ་པར་བྱེད་པ་བཟློག་པ་གསལ་བ་དག་གི་དོན་དུ་མངོན་པར་འདོད་ན། དེའི་ཚེ་འདི་སྐད་དུ་དངོས་པོ་རྣམས་རྒྱུ་ལས་སྐྱེ་བར་འགྱུར་བ་དང་། ལན་འགའ་ཁ་ཅིག་ལས་ཁ་ཅིག་སྐྱེ་བར་འགྱུར་བ་དང་། རྩོམ་པ་འབྲས་བུ་དང་བཅས་པ་ཉིད་དུ་འགྱུར་བའི་ཕྱིར་རོ། །ཞེས་བསྟན་པར་འགྱུར་ན། བཤད་པ་དེ་ནི་མི་རིགས་ཏེ། སྔར་སྨྲས་པའི་སྐྱོན་དུ་ཐལ་བར་འགྱུར་བའི་ཕྱིར་རོ་ཞེས་སུན་འབྱིན་སྨྲའོ། །གཞན་དག་ན་རེ། འདི་ནི་མི་རིགས་ཏེ། སྔར་ལན་བཏབ་ཟིན་པའི་ཕྱིར་རོ་ཞེའོ། །འདི་དག་ནི་ཐལ་རང་གི་ཁྱད་པར་བྱུང་ཚུལ་གྱི་རྩ་བའམ་གཙོ་བོ་ཡིན་པས་ཞིབ་ཏུ་བཤད་པ་ཡིན་ནོ། །གཉིས་པ་དེ་ཉིད་གཞུང་ཐམས་ཅད་ལ་སྦྱར་བ་ནི་ཇི་སྐད་བཤད་པའི་མཐའ་བཞིའི་སྐྱེ་བ་འགོག་ཚུལ་ལ་ཐལ་རང་གི་ཁྱད་པར་ཡོད་པ་དེ་བཞིན་དུ་མཆོད་བརྗོད་ཀྱི་སྐབས་ཀྱི་འགག་པ་མེད་པ་སོགས་ཀྱང་ཆོས་གཞན་བདུན་བསྒྲུབ་པ་དང་། བསྟན་བཅོས་ལུས་ཀྱི་རྐྱེན་དང་འགྲོ་འོང་སོགས་ནས་ལྟ་བའི་བར་ཉི་ཤུ་རྩ་བདུན་ལ་དཔྱད་ནས་འགོག་པའི་རིགས་པ་དང་། རབ་བྱེད་རེ་རེའི་ནང་ནས་བདེན་དངོས་འགོག་པའི་རིགས་པ་རེ་རེ་ལའང་ཁྱད་པར་དེ་བཞིན་དུ་ཡོད་པར་ཤེས་པར་བྱ་སྟེ། དཔེར་ན་ལྟ་དེ་རང་གི་བདག་ཉིད་ནི། །དེ་ལ་ལྟ་བ་མ་ཡིན་ཉིད། །གང་ཞིག་བདག་ལ་མི་ལྟ་བ། །དེ་གཞན་དག་ལ་ཅི་ལྟར་ལྟ། །ཞེས་པ་ལྟ་བུ་ལ། ཐལ་འགྱུར་བས་རང་ལ་མི་ལྟ་བ་དང་། གཞན་ལ་ལྟ་བའི་ཆོས་གཉིས་ལ་འགལ་བ་བརྗོད་པའི་ཐལ་འགྱུར་དེ་ཉིད་ལ་ཡན་ལག་ལྔ་པའི་གཞན་ལ་གྲགས་ཀྱི་རྗེས་དཔག་བྱས་ནས་གཞན་ཕྱོགས་སེལ་བར་བྱེད་ལ། རང་རྒྱུད་པས་ནི་དོན་དམ་པར་བརྟེན་པ་དང་བཅས་པའི་མིག་ནི་གཟུགས་ལ་ལྟ་བར་མི་བྱེད་དེ། མིག་གི་དབང་པོ་ཡིན་པའི་ཕྱིར། དཔེར་ན་དེ་དང་མཚུངས་པ་བཞིན་ནོ་ཞེས་བྱ་བ་དང་། དེ་བཞིན་དུ་མིག་ནི་གཟུགས་ལ་ལྟ་བར་མི་བྱེད་དེ། འབྱུང་བ་ལས་གྱུར་པ་ཉིད་ཀྱི་ཕྱིར། དཔེར་ན་གཟུགས་བཞིན་ནོ། །ཞེས་སོགས་རང་རྒྱུད་ཀྱི་གཏན་ཚིགས་དང་དཔེ་བརྗོད་པ་བཞིན་ནོ། །གཉིས་པ་ཞར་བྱུང་ཐ་སྙད་ཁས་ལེན་ཚུལ་གྱི་སྒོ་ནས་འབྱེད་པ་ནི་རང་རྒྱུད་པ་ལ་མེད་པར་ཐལ་འགྱུར་བའི་ཐུན་མོང་མ་ཡིན་པའི་ཐ་སྙད་ནི་འདི་དག་སྟེ། ཐ་སྙད་དུ་འཇིག་རྟེན་ན་གྲགས་པའི་ཚད་མ་བཞི་ཁས་ལེན་པ་དང་།༡ དེ་དག་བདེན་གཉིས་འཇལ་བ་ལ་ལྟོས་ནས་རང་ལུགས་ལ་ཚད་མར་ཁས་ལེན་མི་ལེན་གྱི་ཁྱད་པར་དབྱེ་བ་དང་།༢ བདེན་དངོས་འགོག་པའི་ཚེ་རང་རྒྱུད་ཀྱི་རྟགས་དང་དམ་བཅའ་མེད་པ་དང་།༣ མཆོད་བརྗོད་ཀྱི་དགག་བྱ་སྐྱེ་སོགས་བརྒྱད་དང་། རབ་བྱེད་ཉི་ཤུ་རྩ་བདུན་གྱི་དགག་བྱ་རྐྱེན་ནས་ལྟ་བའི་བར་ཉི་ཤུ་རྩ་བདུན་པོ་རྣམས་དོན་དམ་དཔྱོད་པའི་རིགས་ངོར་དགག་བྱ་ཡིན་གྱི་ཐ་སྙད་དུ་ཡོད་མཉམ་ཡིན་པ་དང་།༤ མདོ་ལས་གསུངས་པའི་ཕུང་ཁམས་སྐྱེ་མཆེད་ཀྱི་རྣམ་གཞག་དང་། ཀུན་གཞི་དང་། ཉོན་ཡིད། མཚན་ཉིད་གསུམ་དང་། བདེར་གཤེགས་སྙིང་པོ་རྣམས་ཐ་སྙད་དུ་ཁས་ལེན་པ་དང་།༥ ཀུན་རྫོབ་བདེན་པ་དང་། མི་བསླུ་བའི་གཞི་མཐུན་མེད་པ་དང་།༦ བདེན་པ་གཉིས་ཀྱི་སྐབས་སུ་ཡང་དག་མཐོང་བ་དང་། བརྫུན་པ་མཐོང་བ་གཉིས་སུ་ཕྱེ་བའི་བརྫུན་པ་མཐོང་བ་དང་ཚད་མའི་གཞི་མཐུན་པ་མེད་པ་དང་།༧ ཀུན་རྫོབ་བདེན་པ་ལ་ཡང་ལོག་གཉིས་སུ་ཕྱེའང་། རང་ལུགས་ལ་བདེན་བརྫུན་གྱི་ཁྱད་པར་མི་འདོད་པ་དང་།༨ ཡུལ་ལ་ཡང་ལོག་གཉིས་སུ་ཕྱེ་བའི་ཚེ་ཡུལ་ཅན་ལའང་དེ་ལྟར་ཕྱེ་བ་དང་།༩ ཐ་སྙད་དུའང་གཞན་སྐྱེ་མེད་པ་དང་།༡༠ རྒྱུ་འབྲས་ཕྲད་མ་ཕྲད་དཔྱད་པའི་ཚེ་ཕྲད་པ་ཁས་མི་ལེན་ཡང་སྤྱིར་རྒྱུ་འབྲས་ཕྲད་པ་ཁས་ལེན་པ་དང་།༡༡ རྒྱུ་འགག་པའམ་མ་འགགས་པ་ལས་འབྲས་བུ་སྐྱེ་ཞེས་དཔྱད་པའི་ཚེ་འགག་པ་ཁས་མི་ལེན་ཡང་སྤྱིར་རྒྱུ་འགག་པ་ཁས་ལེན་པ་དང་།༡༢ རྒྱུའི་དུས་ན་འབྲས་བུ་ཡོད་མེད་དང་། འབྲས་བུའི་དུས་ན་རྒྱུ་ཡོད་མེད་ཀྱི་མཐའ་གཉིས་པོ་གང་ཡང་ཁས་མི་ལེན་པ་དང་།༡༣ ཐེག་པ་ཆེ་ཆུང་བདག་མེད་གཉིས་རྟོགས་པ་མཚུངས་ཀྱང་ལྟ་བ་སྤྲོས་བྲལ་ལ་ཁྱད་པར་ཡོད་པ་དང་།༡༤ ཐེག་དམན་འཕགས་པའི་མཉམ་གཞག་ལ་སྐྱེ་འགག་མི་སྣང་བས་མི་རྟག་ལ་སོགས་བཅུ་དྲུག་མི་སྣང་ཡང་གང་ཟག་གི་བདག་མེད་རྟོགས་པའི་ཁྱད་པར་འཇོག་ཤེས་པ་དང་།༡༥ སངས་རྒྱས་ཀྱི་ས་ན་སྐྱེ་འགག་མི་སྣང་ཡང་ཇི་ལྟ་ཇི་སྙེད་ཀྱི་ཆོས་ཐམས་ཅད་མཁྱེན་པའི་རྣམ་གཞག་དང་། དེར་སེམས་སེམས་བྱུང་མེད་ཀྱང་ཡེ་ཤེས་ཡོད་པའི་རྣམ་༡༦ གཞག་ཏེ་རེ་ཞིག་བཅུ་དྲུག་པོ་དེ་དག་གོ །གཞན་རྣམས་ནི། སྔར་རྒྱས་བཤད་ཀྱི་སྐབས་སུ་བཤད་ཟིན་པ་ལས་རྟོགས་པར་བྱ་ཞིང་ཚད་མ་བཞིའི་རྣམ་གཞག་ལ་རྩོད་ཟློག་གི་འགྲེལ་པར་མངོན་སུམ་ལ་སོགས་པའི་ཚད་མ་བཞི་གསུངས་པ་ལ་བརྟེན་ནས་ཚིག་གསལ་ལས། ཚད་མ་བཞིས་འཇིག་རྟེན་ན་དོན་རྟོགས་པར་གསུངས་པའི་དོན་ལ། དོན་དམ་སྒྲུབ་བྱེད་ཀྱི་ཚད་མ་བཞི་དང་། ཀུན་རྫོབ་སྒྲུབ་བྱེད་ཀྱི་ཐ་སྙད་པའི་ཚད་མ་བཞི་སྟེ་བཞི་ཚན་གཉིས་ལས་ཕྱི་མ་ནི་སྔར་ཀུན་རྫོབ་བདེན་པ་སྒྲུབ་བྱེད་ཀྱི་སྐབས་སུ་བཤད་ཟིན་པ་ལྟར་ཡིན་ལ། དེ་དག་ནི་ཐ་སྙད་པའི་ཚད་མ། འཇིག་རྟེན་ན་གྲགས་པའི་ཚད་མ། འཇིག་རྟེན་གྱི་ངོར་ཚད་མ་ཡིན་གྱི་དབུ་མ་པ་རང་ལུགས་ལ་ཚད་མ་ནི་མ་ཡིན་ཏེ། ཡུལ་བརྫུན་པ་དང་ཡུལ་ཅན་ཚད་མ་འགལ་བའི་ཕྱིར་དང་། ཚད་མ་ཡིན་ན་ཡང་དག་ཤེས་པའམ་ཡང་དག་མཐོང་བ་ཡིན་དགོས་པ་ལས། འདི་དག་བརྫུན་པ་ཤེས་པའམ། བརྫུན་པ་མཐོང་བ་ཡིན་པའི་ཕྱིར། ཕྱིས་ཀྱི་དབུ་མ་པར་རློམ་པ་དག་ཟླ་བ་གཉིས་སྣང་གི་དབང་ཤེས་སོགས་ཐལ་འགྱུར་བའི་ལུགས་ལ་ཚད་མ་ཡིན་པར་ནན་གྱིས་བསྒྲུབ་པ་ནི་རང་ཉིད་རྡོས་བཅས་ཀྱི་དངོས་པོ་གཅིག་ལ་རིགས་དྲུག་གི་མིག་ཤེས་དྲུག་ཚད་མར་ཁས་བླངས་པའི་གྲུབ་མཐའ་ངན་པའི་འབྲས་བུ་ཡིན་གྱི་ཐལ་འགྱུར་བའི་གཞུང་ལུགས་ཚད་ལྡན་དང་འགལ་ཏེ། མཐོང་བ་བརྫུན་པ་ལ་གཉིས་སུ་ཕྱེ་བའི་དབང་པོ་སྐྱོན་ལྡན་གྱི་ཤེས་པ་རྣམས་འཇིག་རྟེན་ཉིད་ལ་ལྟོས་ནས་ཀྱང་ལོག་ཤེས་ཡིན་པར་གསུངས་པའི་ཕྱིར་རོ། །དོན་དམ་སྒྲུབ་བྱེད་ཀྱི་ཚད་མ་བཞི་ལ་མངོན་སུམ་ནི་འཕགས་པ་གསུམ་གྱི་མཉམ་གཞག་སྟེ། གཉིས་སྣང་ནུབ་པའི་ཚུལ་གྱིས་དོན་དམ་བདེན་པ་མཐོང་བའི་རྣལ་འབྱོར་མངོན་སུམ་ཡིན་པའི་ཕྱིར་རོ། རྗེས་མ། >>>
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།