༄༅། །ཛཡསརྦེཥཱཾཙིཏྟཤྱཱཀགམྦྷཱིརམདྷྱནྟཏྭཾསམུདཱཡསྱཝཱཙོདྡིཥྚནྣིཏཱརྠཔྲཀཱཤནཱམབིཧརཏིསྨ།།
༄༅། །རྒྱལ་བ་ཐམས་ཅད་ཀྱི་ཐུགས་ཀྱི་དགོངས་པ་ཟབ་མོ་དབུ་མའི་དེ་ཁོ་ན་ཉིད་སྤྱིའི་ངག་གིས་སྟོན་པ་ངེས་དོན་རབ་གསལ་ཞེས་བྱ་བ་བཞུགས་སོ།།
༄༅། །རྒྱལ་བ་ཐམས་ཅད་ཀྱི་ཐུགས་ཀྱི་དགོངས་པ་ཟབ་མོ་དབུ་མའི་དེ་ཁོ་ན་ཉིད་སྤྱིའི་ངག་གིས་སྟོན་པ་ངེས་དོན་རབ་གསལ་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །གང་གི་ཐུགས་ནི་མཁའ་ལྟར་སྙོམ་པ་འཇིག་རྟེན་ཀུན་ལ་རྒྱུ་མེད་བཞིན་དུ་བྱམས། །དེ་ཡི་མཁྱེན་པ་ཉི་ལྟར་གསལ་བ་ཐར་འདོད་འགྲོ་ལ་མ་བཅོལ་ལེགས་པར་མཛད། །ཁྱོད་ཀྱི་མཛད་པ་རྒྱ་ཆེན་འོད་ཟེར་གདུལ་བྱ་པད་མཚོའི་མ་འདྲེས་མཛའ་བཤེས་ཏེ། །གང་ཞིག་སྲེད་པའི་ཞགས་པས་འབྲེལ་བ་མེད་ཀྱང་སྲིད་པའི་གཉེན་འདུན་གྱུར་ལ་འདུད། །གནས་བརྟན་རྒན་པོ་སྐྱེ་དགུའི་བདག་ཏུ་གྱུར་ཀྱང་འཇིག་རྟེན་གསུམ་ན་གཞོན་ལུས་གཅིག་པའི་སྐུ། །ཁོང་ནས་སྐྱེ་མེད་ཚིག་ཀུན་བརྗོད་པ་སྤངས་ཀྱང་རྡོ་རྗེ་རྣོན་པོ་ཡི་གེ་དྲུག་པའི་གསུང་། །ནམ་མཁའི་མཐའ་ལ་ནམ་མཁས་ལོངས་སྤྱོད་གྱུར་ཀྱང་ཀུན་མཁྱེན་ཡེ་ཤེས་རྒྱ་མཚོ་བརྙེས་པའི་ཐུགས། །སྟོང་དང་མེད་པ་ནམ་མཁའ་ལས་བྱུང་གྱུར་ཀྱང་སྒྱུ་འཕྲུལ་དྲྭ་བའི་རོལ་པར་སྟོན་ལ་འདུད། །རྒྱལ་བའི་མདུན་ན་རྒྱལ་སྲས་གཞོན་ནུ་འཇིག་རྟེན་ཀུན་གྱིས་མཐོང་ན་དགའ་བར་གྱུར། །དེ་ཡི་བསྟན་ལ་དགེ་སློང་དཔལ་ལྡན་ཆེར་གྲགས་དེ་མིང་ཀླུ་ཞེས་བོད་པ་སྟེ། །ཡོད་མེད་ཕྱོགས་འཇིག་ཐེག་མཆོག་བསྟན་ནས་རབ་དགའི་ས་བསྒྲུབས་བདེ་བ་ཅན་དུ་བགྲོད། །དྭང་བའི་འོད་དུ་འཇིག་རྟེན་འདྲེན་པར་འགྱུར་བའི་མགོན་པོ་དེ་ཡི་མཁྱེན་བརྩེས་སྐྱོངས། །གང་གི་ལེགས་བཤད་ཆུ་གཙང་མ་འདྲེས་པ། །བློ་གྲོས་སྙིམ་པས་སྐལ་བཟང་གདུལ་བྱ་ལ། །རྣམ་པར་བཀྱེ་མཛད་འགྲེལ་བྱེད་སངས་རྒྱས་བསྐྱངས། །ལེགས་ལྡན་འབྱེད་དང་ཟླ་བའི་ཞབས་ལ་སོགས། །འཕགས་ཡུལ་བཤད་པའི་བརྒྱུད་འཛིན་མཆོག་རྣམས་དང་། །རབ་འབྱམས་རྒྱལ་བའི་གདུང་འཛིན་སྒྲ་བསྒྱུར་རྔོག །མཐའ་བྲལ་དབུ་མའི་སྲོལ་འཛིན་ཉི་མ་གྲགས། །རྣམ་མང་འགྲོ་བའི་ཡོངས་འཛིན་ས་སྐྱ་པ། །བཀའ་དྲིན་མཉམ་མེད་དམ་པ་བརྒྱུད་པར་བཅས། །སྙིང་གི་པད་མོའི་ཟེའུ་འབྲུར་རྟག་བཞུགས་ནས། །ལྷན་སྐྱེས་ཡིད་ཀྱི་མུན་པ་ཀུན་བསལ་ཏེ། །གནས་ལུགས་རྟོགས་པའི་བློ་གྲོས་བསྐྱེད་དུ་གསོལ། །ངེས་དོན་མདོ་སྡེ་ཀུན་གྱི་ཟབ་མོའི་བཅུད། །ངེས་འབྱུང་ཐེག་པ་གསུམ་གྱི་བགྲོད་གཅིག་ལམ། །ངེས་ལེགས་བྱང་ཆུབ་གསུམ་གྱི་འབྲས་སྟེར་བའི། །ངེས་པ་འཐད་ལྡན་སྐྱེས་པའི་གྲུབ་མཐའི་རྩེ། །མཐའ་བྲལ་དབུ་མའི་གདམས་པ་ཟབ་མོའི་གནད། །སྔོན་སྦྱངས་བག་ཆགས་བླ་མའི་གསུང་རབ་ཀྱིས། །སད་པ་ལས་རྟོགས་ལེགས་བཤད་ཉི་མ་འདི། །གཟུར་གནས་བློ་ལྡན་དོན་གཉེར་རྣམས་ལ་སྦྱིན། །སྐྱོབ་པ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཐུགས་རྗེ་ཅན་གྱིས། འགྲོ་བ་མཐའ་དག་སྲིད་པ་དང་ཞི་བའི་རྒུད་པ་ལས་སྐྱབས་པའི་ཐབས་སུ་ལེགས་པར་གསུངས་པའི་དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཞེས་མདོ་ལས་གསུངས་ཏེ། རྗོད་བྱེད་ལུང་གི་ཆོས་ནི་ཐོས་པའི་དུས་སུ་ཐོས་པའི་དོན་བཟུང་བས་མོས་པ་དང་ཡིད་ཆེས་པའི་དད་པའི་རྒྱུ་བྱེད་པས་ཐོག་མར་དགེ་བ། བསམ་པའི་དུས་སུ་དོན་དེ་ཐོབ་པར་ནུས་པར་ཤེས་ནས་དགའ་བའི་རྒྱུ་བྱེད་པས་བར་དུ་དགེ་བ། བསྒོམ་པའི་དུས་སུ་དོན་དེ་ཇི་ལྟ་བ་བཞིན་རྟོགས་པའི་བློ་གྲོས་ཀྱི་རྒྱུ་བྱེད་པས་ཐ་མར་དགེ་བ། བརྗོད་བྱ་ཀུན་རྫོབ་དང་དོན་དམ་པའི་བདེན་པ་གཉིས་དང་ལྡན་པས་དོན་བཟང་པོ། ཚིག་དང་ཡི་གེ་འཇིག་རྟེན་ན་གྲགས་པས་བཟུང་སླ་བས་ཚིག་འབྲུ་བཟང་པོ། བརྗོད་བྱ་རྟོགས་པའི་ཆོས་ནི་ཚངས་སྤྱོད་ཡོན་ཏན་བཞི་ལྡན་ཏེ། མྱ་ངན་ལས་འདས་པའི་ལམ་ཡིན་པས་མུ་སྟེགས་བྱེད་དང་ཐུན་མོང་མ་ཡིན་པས་མ་འདྲེས་པ། ཁམས་གསུམ་གྱི་ཉོན་མོངས་པ་རྣམས་སྤོང་བའི་གཉེན་པོ་རྫོགས་པས་ཡོངས་སུ་རྫོགས་པ། རང་བཞིན་གྱི་དྲི་མ་མེད་པས་ཡོངས་སུ་དག་པ། གློ་བུར་གྱི་དྲི་མ་དང་བྲལ་བས་ཡོངས་སུ་བྱང་བ་སྟེ། མདོ་སྡེ་རྒྱན་ལས། དད་དང་དགའ་དང་བློ་རྣམས་ཀྱི། །རྒྱུ་ཕྱིར་ཆོས་འདི་དགེ་བ་ཡིན། །དོན་རྣམས་གཉིས་ལྡན་བཟུང་སླ་དང་། །ཡོན་ཏན་བཞི་ཅན་ཚངས་སྤྱོད་སྟོན། །གཞན་དང་ཐུན་མོང་མ་ཡིན་ལྡན་པ་དང་། །ཁམས་གསུམ་ཉོན་མོངས་རྣམ་སྤོང་རྫོགས་བྱེད་དང་། །ངོ་བོ་ཉིད་དག་དྲི་མས་དག་པ་སྟེ། །ཚངས་སྤྱོད་ཡོན་ཏན་བཞི་ལྡན་ཡིན་པར་འདོད། །ཅེས་གསུངས་སོ། །དེ་ཉིད་གདུལ་བྱའི་བློའི་རིམ་པ་དང་འཚམས་པར་བསྟན་པའི་ཚུལ་ཡང་། རིན་ཆེན་ཕྲེང་བ་ལས། བརྡ་སྤྲོད་པ་དག་ཇི་ལྟ་བུར། །ཡི་གེའི་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་སེམས་ཅན་ལ། །ཇི་ཙམ་བཟོད་པའི་ཆོས་སྟོན་ཏོ། །ཁ་ཅིག་དག་ནི་སྡིག་པ་ལས། །རྣམ་པར་ཟློག་ཕྱིར་ཆོས་སྟོན་ཏོ། །ཁ་ཅིག་བསོད་ནམས་གྲུབ་བྱའི་ཕྱིར། །ཁ་ཅིག་ལ་ནི་གཉིས་བསྟན་པ། །ཁ་ཅིག་ལ་ནི་གཉིས་མི་བསྟན། །ཟབ་མོ་ཁུ་འཕྲིག་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་གསུངས་ཏེ། ཚིགས་བཅད་དང་པོས་དཔེ་དང་བཅས་ཏེ་སྟོན་ཚུལ་མདོར་བསྟན། དེ་ནས་རྐང་པ་གསུམ་གྱིས་མངོན་མཐོ་དོན་དུ་གཉེར་བ་རྣམས་ལ་དགེ་སྡིག་གི་བླང་དོར་སྟོན་པ་དང་། དེ་ནས་གཅིག་གིས་ངེས་ལེགས་དོན་དུ་གཉེར་བ་ཉན་ཐོས་སྡེ་གཉིས་ཀྱི་གྲུབ་མཐས་བཀྲི་དགོས་པ་རྣམས་ལ་གཟུང་འཛིན་ཐ་དད་སྟོན་པ་དང་། དེ་ནས་གཅིག་གིས་སེམས་ཙམ་པའི་གྲུབ་མཐས་བཀྲི་དགོས་པ་རྣམས་ལ་གཟུང་འཛིན་གཉིས་མེད་སྟོན་པ་དང་། དེ་ནས་གསུམ་གྱིས་དབུ་མའི་གྲུབ་མཐས་བཀྲི་ནུས་པ་རྣམས་ལ་ཁྱད་པར་བཞི་ལྡན་གྱི་དབུ་མའི་ལམ་སྟོན་པའི་ཚུལ་རྣམས་སྟོན་ཏེ། ཁྱད་པར་བཞི་ནི་ཡུལ་གྱི་ཁྱད་པར་རྟོགས་པར་དཀའ་བས་ཟབ་མོ། རྟོགས་པ་པོའི་ཁྱད་པར་སྟོང་ཉིད་ལ་བག་ཆགས་བཞག་པའི་ཁུ་འཕྲིག་ཡོད་པས་རྟོགས་པ་དང་ལྡན་ཞིང་དེ་ལས་གཞན་པ་འཇིགས་པ་བསྐྱེད་པ། ཡུལ་ཅན་གྱི་ཁྱད་པར་སྟོང་ཉིད་སྙིང་རྗེའི་སྙིང་པོ་ཅན། འབྲས་བུའི་ཁྱད་པར་བླ་ན་མེད་པའི་བྱང་ཆུབ་སྒྲུབ་པའོ། །དེ་ལྟར་གྲུབ་མཐའ་བཞི་ལ་ལམ་དང་འབྲས་བུའི་དབང་དུ་བྱས་པའི་ཐེག་པ་གསུམ་གསུམ་ཡོད་པར་འདྲ་ཡང་། སྡེ་སྣོད་དང་གྲུབ་མཐའི་དབང་དུ་བྱས་ན། ལང་ཀར་གཤེགས་པ་ལས། ཆོས་ལྔ་དང་ནི་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང་། །བདག་མེད་གཉིས་ཀྱི་ནང་དུ་ནི། །ཐེག་ཆེན་མཐའ་དག་འདུས་པར་ཟད། །ཅེས་གསུངས་པའི་བརྗོད་བྱ་དེ་དག་མི་འདོད་པ་ནི་ཉན་ཐོས་པའི་གྲུབ་མཐའ་སྟེ། འདི་ལ་རྩ་བའི་སྡེ་གཉིས་སམ། སྡེ་པ་བཞིའམ། གྱེས་པ་བཅོ་བརྒྱད་ཀྱི་གྲུབ་མཐའ་རྣམས་ཡོད་དོ། །བརྗོད་བྱ་དེ་དག་འདོད་པ་ནི་ཐེག་པ་ཆེན་པོའི་གྲུབ་མཐའ་སྟེ། འདི་ལ་སེམས་ཙམ་དང་། དབུ་མའི་གྲུབ་མཐའ་གཉིས་སོ། །འདི་གཉིས་ཀྱི་ཁྱད་པར་ནི། ཆོས་ལྔ་ལ་བདེན་པར་ཡོད་མེད་ཕྱེ་བ་དང་། རང་བཞིན་གསུམ་ལ་བདེན་པར་ཡོད་མེད་ཕྱེ་བ་དང་། རྣམ་ཤེས་བརྒྱད་གཞན་དབང་རང་གི་མཚན་ཉིད་ཀྱིས་གྲུབ་པར་འདྲ་ཡང་། བྱང་ཆུབ་མ་ཐོབ་ཀྱི་བར་དུ་རྒྱུན་བརྟན་པའི་བདེན་གྲུབ་ནི་ཀུན་གཞི་ཁོ་ནར་འདོད་པ་དང་། བདག་མེད་གཉིས་ཀྱང་བདག་བཀག་ཙམ་མ་ཡིན་པར་བདག་མེད་པས་ཁྱད་པར་དུ་བྱས་པའི་རྣམ་ཤེས་སམ། དེ་བཞིན་ཉིད་བདེན་གྲུབ་དུ་འདོད་པ་ནི་སེམས་ཙམ་པ་ཡིན་ལ། དེ་དག་ཐམས་ཅད་ཀུན་རྫོབ་སྣང་ཙམ་དུ་མ་བརྟགས་མ་དཔྱད་པར་ཁས་ལེན་ཅིང་། དོན་དམ་པར་སྤྲོས་པའི་མཐའ་གང་དུའང་མ་གྲུབ་པར་འདོད་པ་ནི་དབུ་མ་པའོ། །མདོར་ན་གཟུང་འཛིན་གཉིས་སྟོང་གི་རྣམ་ཤེས་བདེན་གྲུབ་དུ་འདོད་པ་དང་། བདེན་མེད་དུ་འདོད་པ་ལ་འཕགས་པ་ལྷས་བཤད་དོ། །དེ་ལྟ་བུའི་དབུ་མ་དེ་ཡང་མཐར་ཐུག་ལ་ལྟོས་ནས་བདེ་བར་གཤེགས་པའི་གསུང་རབ་ཐམས་ཅད་དེ་བཞིན་ཉིད་ལ་འབབ་ཅིང་གཞོལ་བ་ཁོ་ན་ཡིན་པས། དེ་དག་གི་བརྗོད་བྱ་ཡིན་ཡང་གནས་སྐབས་ཐེག་པ་ཆེ་ཆུང་གཉིས་སུ་ཕྱེ་བའི་ཚེ་ཐེག་པ་ཆེན་པོ་དང་། དྲང་དོན་ངེས་དོན་གཉིས་སུ་ཕྱེ་བའི་ཚེ་ངེས་དོན་གྱི་མདོ་སྡེ་ཤེར་ཕྱིན་འབུམ་པ་ལ་སོགས་པ་ཐམས་ཅད་ཀྱི་བརྗོད་བྱ་ཡིན་ལ། དེ་དག་གི་དགོངས་པ་ཕྱིན་ཅི་མ་ལོག་པར་འགྲེལ་པ་ཡང་། སངས་རྒྱས་མྱ་ངན་ལས་འདས་པའི་འོག་ཏུ་ཆོས་ཉིད་དོན་དམ་པའི་བདེན་པ་མངོན་སུམ་དུ་མཐོང་ནས་བཀའི་དགོངས་པ་རང་དབང་དུ་འགྲེལ་པ་ནི་འཕགས་མཆོག་ཀླུ་སྒྲུབ་སྟེ། དེའི་གཞུང་ལུགས་ཀྱི་རྗེས་སུ་འབྲངས་ནས་ཟབ་མོ་དབུ་མའི་དེ་ཁོ་ན་ཉིད་བཤད་པ་ལ་དོན་རྣམ་པ་བཞི་སྟེ། བཤད་པ་ལ་འཇུག་པའི་ཡན་ལག བཤད་བྱའི་ཆོས་ཀྱི་ཆེ་བ་བརྗོད་པ། བཤད་བྱ་དང་འཆད་བྱེད་ཀྱི་རབ་ཏུ་དབྱེ་བ། བཤད་བྱའི་དབུ་མ་གཏན་ལ་དབབ་པའོ། །དང་པོ་ལ་གསུམ་སྟེ། སྲོལ་འབྱེད་སློབ་དཔོན་གྱི་ཆེ་བ་བརྗོད་པ། དེས་སྲོལ་ཇི་ལྟར་ཕྱེས་པའི་ཚུལ། དེ་ཉིད་ལ་བཤད་ཉན་གྱིས་འཇུག་པའི་ཚུལ་ལོ། །དང་པོ་ནི། སྔོན་གྱི་མཁས་པ་དག བརྙེས་པ་ཡོན་ཏན་གྱི་དང་། མཛད་པ་ཕྲིན་ལས་ཀྱི་དང་། རྗེས་སུ་བསྔགས་པའི་ཁྱད་པར་གསུམ་གྱི་སྒོ་ནས་འཆད་པར་བཞེད་པ་ལས། དང་པོ་ལའང་གཉིས་ཏེ། སྤངས་པའི་ཁྱད་པར་དང་། རྟོགས་པའི་ཁྱད་པར་རོ། །དང་པོ་ནི། སློབ་དཔོན་འདི་བྲམ་ཟེའི་རིགས་ཤིག་སྟེ། དེ་ཁྱིམ་གྱི་བདེ་བ་ལ་མ་ཆགས་པར་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། བསྙེན་པར་རྫོགས་པའི་དགེ་སློང་དུ་གྱུར་པ་ལས། རང་བཞིན་དང་བཅས་པའི་ཁ་ན་མ་ཐོ་བ་ཕྲ་རག་ཙམ་གྱིས་ཀྱང་མ་གོས་པ་དང་། མཐོང་བས་སྤང་བར་བྱ་བའི་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའོ། །གཉིས་པ་ནི། སྤྱིར་རིགས་པའི་གནས་ལྔ་ལ་མཁས་པ་དང་། བྱེ་བྲག་ཏུ་བདེ་བར་གཤེགས་པའི་གསུང་རབ་རབ་འབྱམས་ལ་རྟོགས་པའི་སྣང་བ་ཐོབ་པ་དང་། དེ་ཡང་ཁྱད་པར་ཐེག་པ་ཆེན་པོའི་ངེས་དོན་གྱི་མདོ་སྡེ་དང་། རྒྱུད་སྡེ་ཕྱིན་ཅི་མ་ལོག་པར་རྟོགས་པས་ལུང་གི་ཆོས་ཁོང་དུ་ཆུད་པ་དང་། ས་དང་པོ་ཆོས་ཀྱི་དབྱིངས་ཀུན་ཏུ་འགྲོ་བའི་ཚུལ་གྱིས་མངོན་སུམ་དུ་རྟོགས་ཤིང་དུས་གཅིག་ཏུ་སངས་རྒྱས་བརྒྱའི་ཞལ་མཐོང་བ་ལ་སོགས་པའི་ཡོན་ཏན་བརྒྱ་ཕྲག་བཅུ་གཉིས་ཐོབ་པས་རྟོགས་པའི་ཆོས་ཐུགས་སུ་ཆུད་པའོ། །གཉིས་པ་ལ་ས་དང་པོར་གཙོ་བོར་སྤྱོད་པ་སྦྱིན་པའི་ཕར་ཕྱིན་ལ་ཁྱད་པར་དུ་བསླབ་པའི་ཚུལ་དང་། རང་གཞན་གྱི་དོན་ཕུན་སུམ་ཚོགས་པ་ཐོབ་དགོས་པའི་རྒྱུ་དཀོན་མཆོག་གསུམ་གྱི་རྟེན་འཛུགས་པར་མཛད་པ་གཉིས་ལས། དང་པོ་ནི། གསེར་འགྱུར་གྱི་རྩི་ལ་སོགས་པས་ཕྱིའི་ཡོ་བྱད་ལ་མངའ་བརྙེས་ཤིང་མ་ཆགས་པར་གཏོང་བ་དང་། ནང་རང་གི་དབུ་ཡང་དོན་དུ་གཉེར་བའི་སྐྱེ་བོ་ལ་གནང་བས་ཆགས་པ་མེད་པ་ཟང་ཟིང་གི་སྦྱིན་པ་དང་། ནད་དང་ཀླུ་ལ་སོགས་པའི་གདོན་གྱིས་འཇིགས་པ་ལ་གསོ་དཔྱད་དང་། བསྲུང་བ་ལ་སོགས་པ་མཛད་པས་མི་འཇིགས་པ་སྐྱབས་ཀྱི་སྦྱིན་པ་དང་། ཀླུའི་ཡུལ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་འབུམ་པ་ལ་སོགས་པ་དང་། ཨུ་རྒྱན་གྱི་ཡུལ་ནས་གསང་སྔགས་ཀྱི་རྒྱུད་སྡེ་མང་པོ་གདན་དྲངས་ཤིང་དེ་དག་གི་དོན་ཕྱིན་ཅི་མ་ལོག་པར་གསལ་བར་བྱེད་པའི་བསྟན་བཅོས་མཛད་པས་ཟག་པ་མེད་པའི་ཆོས་ཀྱི་སྦྱིན་པའོ། །གཉིས་པ་ལ་སངས་རྒྱས་དཀོན་མཆོག་གི་རྟེན་འཛུགས་པ་ནི། མཁན་པོ་སྒྲ་གཅན་འཛིན་བཟང་པོའི་བཀས་གཙུག་ལག་ཁང་བྱེ་བར་བརྩིགས་ཏེ་སངས་རྒྱས་ཀྱི་སྐུ་གསུང་ཐུགས་ཀྱི་རྟེན་བཞེངས་པ་དང་། ཆོས་དཀོན་མཆོག་གི་རྟེན་འཛུགས་པ་ནི། སྔར་བཤད་པའི་མདོ་སྡེ་དང་། རྒྱུད་སྡེ་དུ་མ་གདན་དྲངས་ཤིང་། དེ་དག་གི་དོན་གསལ་བར་བྱེད་པའི་བསྟན་བཅོས་མཛད་པས་ལུང་གི་ཆོས་དང་། ས་དང་པོ་མཐོང་བའི་ལམ་ཐོབ་པས་རྟོགས་པའི་ཆོས་དང་། དགེ་འདུན་དཀོན་མཆོག་གི་རྟེན་འཛུགས་པ་ནི། རང་ཉིད་དགེ་སློང་བྱང་ཆུབ་སེམས་དཔར་གྱུར་ནས་གཞན་དེ་དག་ལ་བཀོད་པའོ། །གསུམ་པ་ལ་གསུམ་སྟེ། སྐྱེས་ཐོབ་མཚན་གྱི་སྒོ་ནས་བསྔགས་པ་དང་། འཇིག་རྟེན་ལ་གྲགས་པའི་སྒོ་ནས་དང་། བདེ་བར་གཤེགས་པའི་མདོ་རྒྱུད་དུ་མ་ནས་ལུང་བསྟན་པའི་སྒོ་ནས་བསྔགས་པའོ། །དང་པོ་ནི། ནཱ་ག་ནི་ཀླུ་དང་། ཨརྫུ་ན་སྲིད་སྒྲུབ་ལ་འཇུག་པ་ལས། སྲིད་མི་མངོན་པར་བྱ་སྟེ། ཀླུ་ཞེས་པས་ལྟ་བ་ངན་པའི་མཐའ་ལ་མི་གནས་པ་དང་། ས་དང་པོར་ཡེ་ཤེས་ཀྱི་རྒྱ་མཚོར་སྐྱེ་བ་བརྙེས་པ་དང་། བདེ་བར་གཤེགས་པའི་གསུང་རབ་ཀྱི་བང་མཛོད་ཀྱི་བརྗོད་བྱ་ཟབ་མོ་སྐྱེ་འགག་མེད་པའི་རིན་པོ་ཆེ་ལ་མངའ་བརྙེས་པ་དང་། མཐོང་བའི་དུག་ཆོས་ཐམས་ཅད་བདག་མེད་པར་ལྟ་བ་ལས་བྱུང་བའི་རིགས་པའི་མེས། རང་གཞན་གྱི་སྡེ་པས་བཏགས་པའི་གྲུབ་མཐའ་ངན་པའི་བུད་ཤིང་མ་ལུས་པར་བསྲེགས་པ་དང་། གྲུབ་མཐས་མ་བསླད་པ་འཇིག་རྟེན་ཐ་མལ་པའི་ཡིད་ཀྱི་མུན་པ་སེལ་བར་མཛད་པ་སྟེ་ལྔས་ཀླུ་དང་མཚུངས་པ་དང་། སྲིད་སྒྲུབ་ཞེས་པ་གཉིས་སུ་མེད་པའི་ཡེ་ཤེས་ཀྱི་གསུང་དྲང་ཞིང་འབིགས་པ་རྒྱལ་པོ་སྲིད་སྒྲུབ་ཀྱི་མདའ་དང་འདྲ་བ་ཉིད་ཀྱིས། གདུལ་བྱ་ལྷ་དང་བཅས་པའི་འཇིག་རྟེན་ལ་ཁམས་གསུམ་དུ་སྲིད་པའི་དགྲ་སྡེ་མ་ལུས་པ་བཅོམ་ནས་ཆོས་ཀྱི་རྒྱལ་སྲིད་གཏོད་པར་མཛད་པ་སྟེ་གཉིས་ཀྱིས་སྲིད་སྒྲུབ་དང་ཆོས་མཚུངས་པར་བསྟན་པ་སྟེ། འགྲེལ་པ་ཚིག་གསལ་ལས། གང་ཞིག་མཐའ་གཉིས་གནས་ལ་གནས་བསལ་ཞིང་། །རྫོགས་སངས་རྒྱས་བློ་རྒྱ་མཚོར་སྐྱེ་བ་བརྙེས། །དམ་ཆོས་མཛོད་ཀྱི་ཟབ་མོ་ཉིད་ཇི་ལྟར། །རྗེས་སུ་རྟོགས་བཞིན་ཐུགས་རྗེས་སྟོན་པར་མཛད། །གང་གིས་ལྟ་བའི་མེ་དག་གིས། །ད་དུང་ཕས་རྒོལ་གཞུང་ལུགས་ཀྱི། །བུད་ཤིང་དང་ནི་འཇིག་རྟེན་གྱི། །ཡིད་ཀྱི་མུན་རྣམས་འཇོམས་པར་མཛད། །གང་གི་གཉིས་མེད་ཡེ་ཤེས་གསུང་མདའི་ཚོགས། །ལྷ་དང་བཅས་པའི་གདུལ་བྱའི་འཇིག་རྟེན་ལ། །ཁམས་གསུམ་དག་ཏུ་རྒྱལ་ཐབས་ལེགས་མཛད་པས། །སྲིད་པའི་དགྲ་སྡེ་མ་ལུས་འཇོམས་མཛད་པའི། །མགོན་པོ་ཀླུ་སྒྲུབ་དེ་ལ་ཕྱག་འཚལ་ལོ། །ཞེས་གསུངས་སོ། །གཉིས་པ་ནི། འཛམ་བུའི་གླིང་དུ་སངས་རྒྱས་གཉིས་པར་གྲགས་པའོ། །གསུམ་པ་ནི། སྤྲིན་ཆེན་པོའི་མདོ་ལས། ཀུན་དགའ་བོ་ལིཙྪ་བཱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི། ང་ཡོངས་སུ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱིས་རབ་ཏུ་དྭང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་དང་། ལང་ཀར་གཤེགས་པ་ལས། བློ་གྲོས་ཆེན་པོས། བདེར་གཤེགས་མྱ་ངན་འདས་གྱུར་ནས། །བསྟན་པ་སུ་ཡིས་འཛིན་འགྱུར་ལགས། །ཞེས་ཞུས་པའི་ལན་དུ། བདེར་གཤེགས་མྱ་ངན་འདས་གྱུར་ནས། །བསྟན་པ་འཛིན་པར་འགྱུར་བ་ནི། །དུས་དག་འདས་ཏེ་འབྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །ལྷོ་ཕྱོགས་བྷེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ང་ཡི་བསྟན་པ་འཇིག་རྟེན་ན། །ཡོད་དང་མེད་པའི་ཕྱོགས་འཇིག་པ། །བླ་མེད་ཐེག་ཆེན་རབ་བསྟན་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོ་འོ། །ཞེས་དང་། འཇམ་དཔལ་རྩ་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཞི་བརྒྱ་ལོན་པ་ན། །བསྟན་པ་འདི་ལ་ཕན་བརྩོན་པ། །དགེ་སློང་ཀླུ་ཞེས་བྱ་བ་འབྱུང་། །རྨ་བྱ་ཞེས་བྱའི་རིག་པ་བསྒྲུབས། །ཁམས་དོན་བསྟན་བཅོས་དུ་མ་དང་། །དངོས་མེད་དོན་གྱི་དེ་ཉིད་རིག །ལོ་ནི་དྲུག་བརྒྱ་འཚོ་བར་འགྱུར། །ལུས་དེ་བོར་བར་གྱུར་ནས་ནི། །བདེ་བ་ཅན་དུ་འགྲོ་བར་འགྱུར། །དེ་ཡི་རྗེས་ཐོགས་ཉིད་དུ་ནི། །སངས་རྒྱས་ཉིད་དུ་ངེས་པར་འགྲུབ། །ཅེས་དང་། རྔ་བོ་ཆེའི་མདོ་ལས། ཀུན་དགའ་བོ་ལིཙྪ་བཱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི། ང་ཡོངས་སུ་མྱ་ངན་ལས་འདས་ནས་ལོ་བརྒྱད་ཅུ་ལོན་པ་ན། དགེ་སློང་བློ་འཆང་ཞེས་བྱ་བར་འགྱུར་ཏེ། རྔ་བོ་ཆེའི་མདོ་འདི་འཛིན་པར་འགྱུར་རོ། །ཞེས་བྱ་བ་ལ་སོགས་པ་དང་། ཡང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་དགེ་སློང་འཚོ་བྱེད་ཅེས་བྱ་བར་གྱུར་ནས་ངའི་བསྟན་པ་རབ་ཏུ་རྒྱས་པར་འགྱུར་ཞེས་པ་ལ་སོགས་པ་དུ་མར་གསུངས་སོ། །གཉིས་པ་དེས་སྲོལ་ཇི་ལྟར་ཕྱེ་བའི་ཚུལ་ལ་གཉིས་ཏེ། སློབ་དཔོན་ཉིད་ཀྱིས་ཇི་ལྟར་ཕྱེ་བའི་ཚུལ། རྗེས་འཇུག་གིས་དེའི་དགོངས་པ་ཇི་ལྟར་བཀྲལ་བའོ། །དང་པོ་ནི་སློབ་དཔོན་འདིས་སྤྱིར་རིག་པའི་གནས་ལྔ་ཆར་གསལ་བའི་བསྟན་བཅོས་མང་དུ་མཛད་པ་ལས། སྐབས་སུ་བབ་པ་ནང་དོན་རིགས་པ་ལ། ལྟ་སྤྱོད་གཉིས་ལུང་གི་སྒོ་ནས་སྟོན་པ་དང་། རིགས་པའི་སྒོ་ནས་སྟོན་པ་གཉིས་ལས། དང་པོ་ནི་མདོ་སྡེ་ཀུན་ལས་བཏུས་པའོ། །གཉིས་པ་ལ། རིགས་ཚོགས། བསྟོད་ཚོགས། གཏམ་ཚོགས་དང་གསུམ་ལས། དང་པོ་ལ། དགེ་བའི་བཤེས་གཉེན་རྨ་བྱ་བའི་བཞེད་པས། གཙོ་བོ་ལུས་ལྟ་བུའི་བསྟན་བཅོས་རྩ་བ་ཤེས་རབ་དང་། རིགས་པ་དྲུག་ཅུ་པ་གཉིས། འཕྲོས་པ་ཡན་ལག་ལྟ་བུའི་བསྟན་བཅོས་རྩ་བ་ཤེས་རབ་ཀྱི་རྐྱེན་བརྟག་པ་ལས་འཕྲོས་པ་རྩོད་པ་ཟློག་པ། འདུ་བྱེད་བརྟག་པ་ལས་འཕྲོས་པ་སྟོང་ཉིད་བདུན་ཅུ་པ། དངོས་པོ་རྣམས་རང་བཞིན་མེད་ན་རང་བཞིན་ཚད་མས་གྲུབ་པ་དང་འགལ་ལོ་ཞེས་རྒོལ་བའི་ལན་དུ་ཞིབ་མོ་རྣམ་འཐག རང་བཞིན་མེད་ན་བོང་བུའི་རྭ་ལ་སོགས་པ་ལྟར་ཐ་སྙད་ཀྱི་རྣམ་བཞག་མི་འཐད་དོ་ཞེས་རྒོལ་བའི་ལན་དུ་ཐ་སྙད་གྲུབ་པ་དང་བཞི་སྟེ་དྲུག་ཡིན་ཞིང་། དེའི་ཕྱིར་སྔ་རབས་པ་ཁ་ཅིག་རིན་པོ་ཆེའི་ཕྲེང་བ་བསྣན་ནས་དྲུག་ཏུ་བྱེད་པ་དང་། ཁ་ཅིག་རིགས་པའི་ཚོགས་སམ་ཁྱུ་ཞེས་པ་ཡིན་གྱི། དྲུག་ཏུ་གྲངས་ངེས་པ་མེད་དོ་ཞེས་ཟེར་བ་དང་། ཡང་རང་བཞིན་མེད་པར་སྟོན་པའི་རིགས་པའི་ཚོགས་ཀྱི་བསྟན་བཅོས་ལྔ་ཡིན་ནོ་ཞེས་ཟེར་བ་ཐམས་ཅད་ཚུལ་འདིས་བསལ་བ་ཡིན་ནོ། །ཚུལ་འདི་ཉིད་རིགས་པ་དྲུག་ཅུ་པའི་འགྲེལ་པར། འདི་ལ་མཆོད་བརྗོད་མཛད་ནས་རྩོད་ཟློག་སོགས་གཞན་ལ་མི་མཛད་པའི་རྒྱུ་མཚན་དུ་འཕྲོས་ཚུལ་གསལ་བར་གསུངས་པ་ཡིན་ནོ། །ཞེས་བཞེད་དོ། །འདི་ལ་ཅུང་ཟད་དཔྱད་དུ་ཡོད་དེ། རིགས་པ་དྲུག་ཅུ་པའི་འགྲེལ་པར། རྩོད་ཟློག་དང་སྟོང་ཉིད་བདུན་ཅུ་པ་གཉིས་ཀྱི་འཕྲོས་ཚུལ་གསུངས་ཀྱི་གཞན་གྱི་འཕྲོས་ཚུལ་གསུངས་པ་མི་སྣང་ལ། ཐ་སྙད་གྲུབ་པ་ནི་བོད་དུ་མ་འགྱུར་ཞིང་། སློབ་དཔོན་ཟླ་བས་ཚིག་གསལ་དུ། སློབ་དཔོན་ཀླུ་སྒྲུབ་ཀྱི་གཞུང་ལུགས་མཐོང་ཚུལ་སྨྲོས་པ་ན་གཞན་ལྔ་སྨྲོས་ནས་འདི་མ་སྨྲོས་པས། རྒྱ་གར་ནའང་རིགས་ཚོགས་སུ་བགྲངས་པ་མིན་པར་སྣང་ངོ་། །ཕྱི་མ་ཁ་ཅིག རིན་ཆེན་ཕྲེང་བ་དང་དྲུག་ཏུ་བྱེད་པ་ནི་མི་འཐད་དེ། དེ་ནི་གཏམ་ཚོགས་ཡིན་པའི་ཕྱིར་རོ། །དེས་ན་འདི་ལྟར་བྱ་སྟེ། དགག་བྱ་གཞན་གྱིས་བཏགས་པའི་མཐའ་དགག་པ། རང་ལུགས་དབུ་མའི་ལུས་རྣམ་པར་བཞག དེ་ལས་འཕྲོས་པའི་ཚུལ་གྱི་རྩོད་པ་སྤང་བ་དང་གསུམ་ལས། དང་པོ་ནི་ཞིབ་མོ་རྣམ་པར་འཐག་པ་སྟེ། དེ་ཉིད་ལས། རྟོག་གེ་ཤེས་པའི་ང་རྒྱལ་གྱིས། །གང་ཞིག་རྩོད་པར་མངོན་འདོད་པ། །དེ་ཡི་ང་རྒྱལ་སྤང་བའི་ཕྱིར། །ཞིབ་མོ་རྣམ་འཐག་བཤད་པར་བྱ། །ཞེས་རྒོལ་བའི་ང་རྒྱལ་སྤང་བའི་ཆེད་དུ་དེ་ཉིད་ཀྱི་གྲུབ་མཐའ་འགོག་པར་གསུངས་ཀྱི། རང་གི་གཞུང་ལས་འཕྲོས་པར་མ་གསུངས་པའི་ཕྱིར་དང་། གཞུང་ལས་ཀྱང་རིགས་པ་ཅན་པའི་རྟོག་གེའི་ཚིག་དོན་བཅུ་དྲུག་དགག་པ་ཙམ་ཞིག་སྣང་གི་གཞན་མི་སྣང་བའི་ཕྱིར་རོ། །གཉིས་པ་ནི། རྩ་བ་ཤེས་རབ་དང་རིགས་པ་དྲུག་ཅུ་པ་གཉིས་ཏེ། འདི་གཉིས་ཀྱི་ཁྱད་པར། ཁ་ཅིག་རྟེན་འབྲེལ་སྐྱེ་འགག་སོགས་སྤྲོས་པའི་མཐའ་བརྒྱད་དང་བྲལ་བར་སྟོན་པ་རྩ་བ་ཤེས་རབ་དང་། སྐྱེ་འཇིག་གཉིས། ཡོད་མེད་གཉིས་ཏེ། སྤྲོས་པའི་མཐའ་བཞི་དང་བྲལ་བར་སྟོན་པ་རིགས་པ་དྲུག་ཅུ་པ་ཡིན་ནོ་ཞེས་འཆད་པ་དང་། ཡང་རང་སྡེ་དང་གཞན་སྡེ་ཐུན་མོང་དུ་འགོག་པ་དང་། རང་སྡེ་བྱེ་བྲག་ཏུ་འགོག་པ་གཉིས་ཡིན་ཅེས་དང་། ཡང་རྣམ་བཅད་དགག་པའི་སྒོ་ནས་རང་བཞིན་སྟོང་པ་ཉིད་དུ་སྟོན་པ་དང་། ཐ་སྙད་ཙམ་དུ་ཡོངས་གཅོད་སྒྲུབ་པའི་སྒོ་ནས་རང་བཞིན་སྟོང་པ་ཉིད་དུ་སྟོན་པ་རིམ་པ་ལྟར་ཡིན་ཅེས་པ་གསུམ་ལས། ཕྱི་མ་འདི་ཉིད་གཞུང་ལ་ཞུགས་པར་སྣང་ངོ་ཞེས་རྨ་བྱ་གསུངས་ཏེ་རྣམ་བཅད་དང་ཡོངས་གཅོད་ཀྱི་སྒོ་ནས་ཞེས་པའི་དོན། སྔ་མས་རང་བཞིན་བཀག་པ་གཙོ་ཆེ་ཞིང་ཕྱི་མས་རང་བཞིན་མེད་ཀྱང་སྣང་བ་སྒྱུ་མ་དང་། སྨིག་སྒྱུ་ལ་སོགས་པའི་དཔེས་བསྟན་པ་གཙོ་ཆེ་སྙམ་དུ་དགོངས་པའོ། །གསུམ་པ་ལ་གཉིས་ལས། རྩ་བ་ཤེས་རབ་ཀྱི་རྐྱེན་བརྟག་པར། གཞན་ལས་སྐྱེ་བ་བཀག་པ་ལ། རང་ཚིག་དང་འགལ་བར་སྤང་བ་ནི། རྩོད་ཟློག་ཏེ། དེ་ལྟར། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་ལ་ཡོད་མ་ཡིན། །བདག་གི་དངོས་པོ་ཡོད་མིན་ན། །གཞན་དངོས་ཡོད་པར་ག་ལ་འགྱུར། །ཞེས་ཕྱི་ནང་གི་འབྲས་བུ་རྣམས་སྐྱེ་བའི་སྔ་རོལ་ན་རྒྱུ་རྐྱེན་སོ་སོ་བ་དང་། འདུས་པ་དང་། དེ་ལས་གཞན་རྣམས་ལ་ཡོད་ན། དེ་དག་ལས་སྐྱེ་བར་འགྱུར་བ་ཞིག་ན་ཡོད་པའང་མ་ཡིན་ཏེ། སྣང་རུང་མ་དམིགས་པའི་ཕྱིར་དང་། སྐྱེ་བ་དོན་མེད་པར་འགྱུར་བའི་ཕྱིར་རོ། །དེའི་ཕྱིར་གང་ཞིག་གང་ན་མེད་པ་དེ་ནི་དེ་ལས་སྐྱེ་བ་མ་ཡིན་ཏེ། བྱེ་མ་དག་ལས་འབྲུ་མར་བཞིན། །དཔེརཾ་ན་དངོས་པོ་རྣམས་གཞན་དུ་འགྱུར་བ་ལས་སྐྱེ་བ་མེད་པས། རང་བཞིན་གྱིས་མེད་པའི་སྟོང་པ་ཉིད་ཡིན་ནོ་ཞེས་བསྟན་པ་ལ། གཞན་དག་འོ་ན་རིགས་པ་དེ་ཉིད་ཀྱིས་དབུ་མ་པ་ཁྱོད་ཀྱིས་རང་བཞིན་འགོག་པའི་དམ་བཅའི་ཚིག་ཀྱང་གཞན་ལས་སྐྱེ་བ་མེད་པས་རང་བཞིན་མེད་པའི་སྟོང་པ་ཉིད་དུ་གྲུབ་པའི་ཕྱིར་གཞན་ཕྱོགས་དགག་པར་མི་ནུས་ལ། འོན་ཏེ་ཚིག་དེ་རང་བཞིན་དུ་ཡོད་ན་ཁྱོད་ཀྱིས་ཆོས་ཐམས་ཅད་རང་བཞིན་མེད་པའི་དམ་བཅའ་ཉམས་ཤིང་ཚིག་ཁོ་ན་རང་བཞིན་དུ་ཡོད་པའི་ཁྱད་པར་གྱི་རྒྱུ་མཚན་ཡང་བརྗོད་དགོས་ཞེས། གལ་ཏེ་དངོས་པོ་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། །ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །འོན་ཏེ་ཚིག་དེ་རང་བཞིན་བཅས། །ཁྱོད་ཀྱི་དམ་བཅའ་སྔ་མ་ཉམས། །མི་འདྲ་ཉིད་དེ་དེ་ཡིན་ན། །གཏན་ཚིག་ཁྱད་པར་བརྗོད་པར་བྱོས། །ཞེས་པ་ལ་སོགས་པ་རྒོལ་བ་ལ་དེའི་ཚིག་རང་བཞིན་མེད་པས་སྔར་ཆོས་ཐམས་ཅད་རང་བཞིན་མེད་པར་བསྟན་པ་དང་མི་འགལ་ཞིང་། དེ་ཉིད་ཀྱི་ས་ན་ཁྱད་པར་གྱི་རྒྱུ་མཚན་ཡང་བརྗོད་མི་དགོས་ལ། ཚིག་རང་བཞིན་མེད་པས་དེ་ཁོ་ནར་གཞན་ཕྱོགས་དགག་པར་མི་ནུས་མོད། དེ་ཁོ་ནར་དགག་བྱ་འགོག་བྱེད་མ་གྲུབ་པས་གཞན་ཕྱོགས་འགོག་པ་ཉིད་དུའང་ཁས་མི་ལེན་ལ། རང་བཞིན་མེད་ཀྱང་ཐ་སྙད་དུ་གཞན་ཕྱོགས་འགོག་པ་མི་འགལ་ཏེ། སྒྱུ་མའི་སྐྱེ་བུས་གཞན་ཕམ་པར་བྱེད་པའམ། རྨི་ལམ་དུ་རྨིས་པའི་ཆུས་མེ་གསོད་པ་སྣང་བ་བཞིན་ནོ། །ཞེས་སྟོན་པ། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །དེ་ཕྱིར་འགོག་པར་བྱེད་དོ་ཞེས། །སྐུར་བ་དེ་ནི་ཁྱོད་ཀྱིས་བཏབ། །ཅེས་དང་། ཅི་ལྟར་སྤྲུལ་པས་སྤྲུལ་པ་དང་། །སྒྱུ་མའི་སྐྱེས་བུས་སྒྱུ་མ་ལ། །དགག་པ་བྱེད་པ་ཅི་འདྲ་བ། །དགག་པ་དེ་ཡང་དེ་འདྲར་འདོད། །ཅེས་གསུངས་པ་ཡིན་ནོ། །ཡང་འདུས་བྱས་བརྟག་པར་འདུས་བྱས་ཀྱི་མཚན་ཉིད་སྐྱེ་གནས་འཇིག་པ་རང་བཞིན་གྱིས་གྲུབ་པ་བཀག་པ་ལ་སྤྲིན་ཆེན་པོའི་མདོ་ལས། དགེ་སློང་དག་གསུམ་པོ་འདི་དག་ནི་འདུས་བྱས་ཀྱི་མིང་སྟེ། འདུས་བྱས་ནི་སྐྱེ་བ་དང་འཇིག་པ་དང་། གནས་པ་གཞན་དུ་འགྱུར་བ་ཡང་མངོན་ནོ། །ཞེས་གསུངས་པ་དང་འགལ་ལོ། །ཞེས་རྒོལ་བའི་ལན་དུ། སྟོང་ཉིད་བདུན་ཅུ་པ་གསུངས་ཏེ། དེ་དག་རང་བཞིན་མེད་ཀྱང་རྨི་ལམ་སྒྱུ་མ་ལྟར་ཐ་སྙད་པའི་ཤེས་པ་འཁྲུལ་བའི་དོན་སྐྱེ་གནས་འཇིག་པར་སྣང་བ་ཙམ་ལ་དགོངས་ནས་གསུངས་པ་ཡིན་གྱི། དེ་དག་རང་བཞིན་དུ་ཡོད་པར་གསུངས་པ་མ་ཡིན་པས་ཁོ་བོ་ཅག་གི་རང་བཞིན་དུ་ཡོད་པ་བཀག་པ་དང་མི་འགལ་ལོ། །ཞེས་སྟོན་པ། གནས་པའམ་སྐྱེ་འཇིག་ཡོད་མེད་དམ། །དམན་པའམ་མཉམ་དང་ཁྱད་པར་ཅན། །སངས་རྒྱས་འཇིག་རྟེན་བསྙད་དབང་གིས། །གསུངས་ཀྱི་ཡང་དག་དབང་གིས་མིན། །ཞེས་གསུངས་སོ། །དེ་ལྟར་འདི་ནི་ཚིག་གསལ་ལས། རིགས་ཚོགས་ལྔ་བགྲངས་ཤིང་། རིགས་པ་དྲུག་ཅུ་པའི་འགྲེལ་པར། ཕྱི་མ་གཉིས་ལ་མཆོད་བརྗོད་མི་མཛད་པའི་རྒྱུ་མཚན་དུ། ཕྱི་མ་གཉིས་ཀྱི་འཕྲོས་ཚུལ་ཁོ་ནར་གསུངས་ནས་དེའི་མཇུག་ཏུ་རིགས་པ་དྲུག་ཅུ་པ་འདི་ནི་དབུ་མ་བཞིན་དུ་འདིར་ཡང་གཙོ་བོར་རྟེན་ཅིང་འབྲེལ་བར་འབྱུང་བ་དཔྱད་པ་ལས་བརྩམས་ཏེ་མཛད་པའི་ཕྱིར། དབུ་མ་ལས་འཕྲོས་པ་ལྟ་བུ་ནི་མ་ཡིན་ནོ། །ཞེས་གསུངས་པས་ཟླ་བའི་དགོངས་པ་བླ་ན་མེད་པའོ། །གཉིས་པ་བསྟོད་པའི་ཚོགས་ལ་གསུམ་ལས། གཞི་ལ་བསྟོད་པ་ལ། ཆོས་ཅན་གསལ་བ་ལ་བསྟོད་པ་ནི། སེམས་ཀྱི་རྡོ་རྗེའི་བསྟོད་པ་སྟེ། །གང་གི་སེམས་བྱུང་དྲྭ་བ་ནི། །སེམས་ཉིད་ཀྱིས་ནི་གསལ་མཛད་དེ། །སེམས་ཀྱི་རྨོངས་པ་སེལ་བ་ཡི། །རང་སེམས་དེ་ལ་ཕྱག་འཚལ་ལོ། །ཞེས་སེམས་ཉིད་འཁོར་འདས་ཀུན་གྱི་གཞིར་གྱུར་པ་ལ་བསྟོད་པའོ། །ཆོས་ཉིད་དབྱིངས་ལ་བསྟོད་པ་ནི། ཆོས་དབྱིངས་བསྟོད་པ་སྟེ། གང་ཞིག་ཀུན་ཏུ་མ་ཤེས་ན། །སྲིད་པ་གསུམ་དུ་རྣམ་འཁོར་ལ། །སེམས་ཅན་ཀུན་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །ཅེས་དྲི་མ་ལས་མ་གྲོལ་བའི་ཆོས་དབྱིངས་བསྟོད་པའི་ཡུལ་དུ་མི་རུང་ངམ་སྙམ་པའི་དོགས་པ་བསལ་ནས། ཐབས་ཀྱི་མ་ཟིན་ན་འཁོར་བའི་རྒྱུར་གྱུར་པའི་ཆོས་དབྱིངས་ལ་བསྟོད་པའོ། །ལམ་ལ་བསྟོད་པ་ལ་ཐབས་སྙིང་རྗེ་ཆེན་པོ་ལ་བསྟོད་པ་ནི། སེམས་ཅན་མགུ་བར་བྱ་བའི་བསྟོད་པ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ལུང་ལས། བཅོམ་ལྡན་འདས་ཀྱིས་ཉན་ཐོས་ཆེན་པོ་བཅུ་དྲུག་ལ་བཀའ་སྩལ་པ་དེ་ཉིད་ལོགས་སུ་བཀོལ་ནས་བསྟོད་ཚོགས་ཀྱི་ནང་དུ་བཞག་པའོ། །ཤེས་རབ་འཕགས་བཞིའི་ཡུམ་ལ་བསྟོད་པ་ནི། ཤེས་རབ་ཀྱི་ཕ་རོལ་ཏུ་ཕྱིན་མའི་བསྟོད་པ་སྟེ། འདི་ལ་རྔོག་ལོས་ཐ་སྙད་དེ་ཉིད་དང་། ནག་ཚོས་རྣམ་པར་མི་རྟོག་པའི་བསྟོད་པ་ཞེས་ཐ་སྙད་མཛད་དོ། །འབྲས་བུ་ལ་བསྟོད་པ་ལ་སྐུ་གསུམ་ཅར་ལ་སོ་སོར་བསྟོད་པ་སྐུ་གསུམ་ལ་བསྟོད་པ་དང་། སྐུ་གསུམ་སོ་སོར་མ་ཕྱེ་བར་ལྟ་བ་རང་གི་ངོ་བོ་དང་། དེ་སྟོན་པའི་སྒོ་ནས་བསྟོད་པ་ནི། དོན་དམ་པར་བསྟོད་པ། དཔེ་མེད་པར་བསྟོད་པ། བསམ་གྱིས་མི་ཁྱབ་པར་བསྟོད་པ། འཇིག་རྟེན་ལས་འདས་པར་བསྟོད་པ། བསྟོད་པ་ལས་འདས་པར་བསྟོད་པ། བླ་ན་མེད་པའི་བསྟོད་པ་རྣམས་སོ། །ཁ་ཅིག་མཆོད་རྟེན་བརྒྱད་ཀྱི་བསྟོད་པ་གཉིས་དང་། འཇམ་དཔལ་གྱི་བསྟོད་པ་གཉིས་རྣམས་ཀྱང་འདིར་བསྣན་པར་སྣང་ངོ་། །གསུམ་པ་གཏམ་ཚོགས་ནི། རྒྱལ་པོ་ལ་གཏམ་ཏུ་བྱ་བ་རིན་པོ་ཆེའི་ཕྲེང་བ་དང་། བཤེས་པའི་སྤྲིང་ཡིག་གཉིས་ཏེ། ཚིག་གསལ་ལས། མདོ་སྡེ་ཀུན་ལས་བཏུས་དང་གཏམ་བྱ་རིན་ཆེན་ཕྲེང་དང་ཡང་དག་བསྟོད་པ་དང་། །འབད་པས་ཤིན་ཏུ་ཡུན་རིང་འཕགས་པའི་བསྟན་བཅོས་ལས་བསྟན་ཚིག་ལེར་བྱས་དེ་དང་། །རིགས་པ་དྲུག་ཅུ་ཞེས་བྱ་རྣམ་པར་འཐག་བཅས་སྟོང་ཉིད་བདུན་ཅུ་པ་དེ་དང་། །གང་ཡང་རྩོད་པ་རྣམ་པར་ཟློག་པ་བཀོད་པ་དེ་དག་ཀྱང་ནི་མཐོང་གྱུར་ཅིང་། །བརྒྱ་པ་ལ་སོགས་དེ་དག་དང་ནི་དེ་བཞིན་མདོ་སྡེ་ཟབ་མོ་རྣམ་མང་དང་། །སངས་རྒྱས་བསྐྱངས་ཀྱིས་མཛད་པའི་འགྲེལ་པ་མཐོང་ནས་ལེགས་ལྡན་འབྱེད་ཀྱིས་ལེགས་བཤད་གང་། །གཅིག་ནས་གཅིག་ཏུ་བརྒྱུད་ལས་འོངས་དང་བདག་གིས་རྣམ་པར་ཕྱེ་ལས་རྙེད་པ་གང་། །དེ་དག་བསྡམས་ཏེ་བློ་ཆེན་ལྡན་རྣམས་མགུ་བར་བྱ་ཕྱིར་ཡང་དག་བསྟན་པ་ཡིན། །ཅེས་འབྱུང་ངོ་། །གཉིས་པ་རྗེས་འཇུག་གིས་དེའི་དགོངས་པ་ཇི་ལྟར་བཀྲལ་བའི་ཚུལ་ནི། སློབ་དཔོན་འཕགས་པ་ལྷས། ལྟ་སྤྱོད་ཆ་མཉམ་དུ་སྟོན་པ་རྣལ་འབྱོར་སྤྱོད་པ་བཞི་བརྒྱ་པ་དང་། ལྟ་བ་གཙོ་བོར་སྟོན་པ་ཡེ་ཤེས་སྙིང་པོ་ཀུན་ལས་བཏུས་དང་། རབ་ཏུ་བྱེད་པ་ལག་པའི་ཚད་ལ་སོགས་པ་མཛད། སློབ་དཔོན་གྱིས་དབུ་མའི་བསྟན་བཅོས་རྣམས་ཀྱི་གཙོ་བོ་ནི་རྩ་བ་ཤེས་རབ་ཡིན་ལ། དེ་ལ་རང་འགྲེལ་ག་ལས་འཇིགས་མེད་དང་། དེ་ཝ་ཤར་མ་དང་། གུ་ན་མ་ཏི་དང་། གུ་ན་ཤྲཱི་དང་། སྡྱི་ར་མ་ཏི་དང་། སངས་རྒྱས་བསྐྱངས་དང་། ལེགས་ལྡན་འབྱེད་དང་། ཟླ་བ་གྲགས་པའི་འགྲེལ་པ་དང་བརྒྱད་ཡོད་ཅིང་། ག་ལས་འཇིགས་མེད་རང་འགྲེལ་དུ་རྒྱ་གར་བ་ཁ་ཅིག་དང་། བོད་སྔ་རབས་པ་རྣམས་ལ་གྲགས་པ་ལ། ཕྱི་མ་དག་རབ་བྱེད་ཉེར་བདུན་པའི་འགྲེལ་པ་ལས། བཙུན་པ་འཕགས་པ་ལྷས་ཀྱང་། ཉན་པ་པོ་དང་མཉན་བྱ་དང་། །སྨྲ་པོ་ཤིན་ཏུ་འབྱུང་བ་དཀོན། །དེ་ཕྱིར་མདོར་ན་འཁོར་བ་ནི། །མཐའ་ཡོད་མ་ཡིན་མཐའ་མེད་མིན། །ཞེས་བཤད་དོ། །ཞེས་བཞི་བརྒྱ་པའི་ལུང་ཤེས་བྱེད་དུ་དྲངས་པས་རང་འགྲེལ་གྱི་དོན་མེད་དོ། །སངས་རྒྱས་བསྐྱངས་དང་། ལེགས་ལྡན་འབྱེད་དང་། ཟླ་བ་གྲགས་པའི་འགྲེལ་པར། འགྲེལ་པ་དེའི་ཟུར་ཙམ་ཡང་མ་བྱུང་བས་ཀྱང་ཤེས་སོ། །ཞེས་གསུངས་པ་ནི་མེད་པར་སྣང་སྟེ། དེ་རང་འགྲེལ་ཡིན་ན་འགྲེལ་བྱེད་གཞན་རྣམས་ཀྱིས་འགྲེལ་པ་བྱེད་མི་རིགས་པའམ། ཡང་ན་འགྲེལ་བཤད་མཛད་པར་རིགས་པའི་ཕྱིར་དང་། རྟེན་འབྲེལ་གྱི་བཤད་པའི་སྐབས་སུ་འགྲེལ་པ་གཞན་རྣམས་དང་མི་མཐུན་པར་སྣང་བས། འགྲེལ་བྱེད་གཞན་རྣམས་ཀླུ་སྒྲུབ་ཉིད་ལ་རྒོལ་བར་ཐལ་བའི་ཕྱིར་རོ། །སློབ་དཔོན་ཟླ་བས། རང་རྒྱུད་པ་དག་གིས་རང་རྒྱུད་ཀྱི་ངག་སྦྱོར་བ་འགྲེལ་པའི་ལུགས་ཡིན་ཅེས་པའི་ལན་དུ་སློབ་དཔོན་གྱིས་རྩོད་པ་ཟློག་པའི་འགྲེལ་པ་མཛད་པ་ན་ཡང་། རང་རྒྱུད་ཀྱི་ངག་མ་གསུངས་པའི་ཕྱིར་ཞེས་གསུངས་པས་ཀྱང་ཤེས་ཏེ། གཞན་དུ་ན་རང་འགྲེལ་ལས་ཀྱང་མ་གསུངས་པའི་ཕྱིར་རོ། །ཞེས་གསུང་རིགས་པའི་ཕྱིར་རོ། །ཁ་ཅིག་འགྲེལ་པ་འདིར་དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་པའི་བདེན་པའོ་ཞེས་བཤད་པ་དེ། རང་ཉིད་ཆོས་དབྱིངས་བདེན་གྲུབ་ཏུ་འདོད་པའི་གྲུབ་མཐའ་ལ་ཕན་དུ་རེ་ནས། བཙུན་པ་འཕགས་པ་ལྷས་ཀྱང་ཞེས་ཞེས་མ་གསུངས་ཤིང་། དེའི་ཐད་དུ་སངས་རྒྱས་བསྐྱངས་ཀྱིས་སློབ་དཔོན་འཕགས་པ་ལྷས་ཀྱང་ཞེས་ཞེས་གསུངས་པས་རང་འགྲེལ་ཡིན་ནོ་ཞེས་སྨྲ་བ་ནི། གསུང་རབ་དང་འཇིག་རྟེན་གྱི་ཞེ་སའི་ཁྱད་པར་མ་ཕྱེད་པ་སྟེ། གསུང་རབ་ལས་སློབ་དཔོན་ལས་བཙུན་པ་ཞེ་ས་ཆེ་བའི་ཕྱིར་ཏེ། བཙུན་པ་བཅོམ་ལྡན་འདས་ཞེས་པ་ཞེ་ས་ཡིན་གྱི། སློབ་དཔོན་བཅོམ་ལྡན་འདས་ཞེས་བརྗོད་ན་ཞེ་སར་མི་འགྱུར་བའི་ཕྱིར་རོ། །དེས་ན་འགྲེལ་པ་འདིའི་རབ་བྱེད་ཀྱི་མཚམས་རྣམས་སུ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་དབུ་མ་རྩ་བའི་འགྲེལ་པ་ག་ལས་འཇིགས་མེད་ལས། ཞེས་པ་ཡོད་པས་འཁྲུལ་གཞི་བྱས་པར་སྣང་ཡང་། དེ་ནི་བྱེད་པ་པོ་བསྟན་བཅོས་རྩ་བ་ལ་སྦྱར་བའི་ཚིག་ཡིན་ཞིང་། ཀླུ་སྒྲུབ་མྱ་ངན་ལས་འདས་པའི་རྗེས་སུ་དཔལ་ལྡན་ཆོས་སྐྱོང་གིས་ཆེད་དུ་མཛད་པའི་བཞི་བརྒྱ་པའི་ལུང་དྲངས་པས་རང་འགྲེལ་གྱི་དོན་མེད་དོ། །རིགས་ཚོགས་གཞན་གསུམ་ལ་རང་འགྲེལ་ཡོད་པས་སློབ་དཔོན་ཟླ་བས་འགྲེལ་པ་མ་མཛད་ཅིང་། རྩ་ཤེར་དང་། རིགས་པ་དྲུག་ཅུ་པ་གཉིས་ལ་འགྲེལ་པ་མཛད་པ་འདིས་ཀྱང་ཤེས་པར་གྱིས་ཤིག སློབ་དཔོན་གྱི་དགོངས་པ་ཐལ་འགྱུར་དུ་འགྲེལ་པ་ལ་ཐོག་མར་སངས་རྒྱས་བསྐྱངས་ཀྱིས་འགྲེལ་པ་བུདྡྷ་པཱ་ལི་ཏས་མཛད། དེའི་རྗེས་སུ་སློབ་དཔོན་ཟླ་བས་ཚིག་གི་འགྲེལ་པ་ལེགས་ལྡན་འབྱེད་ཀྱིས་རྩོད་པ་སྤངས་ཏེ། སངས་རྒྱས་བསྐྱངས་ཀྱི་ལུགས་བསྒྲུབ་པ་ཚིག་གསལ་དང་། དོན་གྱི་འགྲེལ་པ་འཇུག་པ་རྩ་འགྲེལ་མཛད། དེའི་རྗེས་སུ་རིགས་པའི་ཁུ་བྱུག་ཆེ་ཆུང་གཉིས་ཀྱིས་གཞུང་མཛད་པ་མི་སྣང་ལ། དེའི་རྗེས་སུ་ཇོ་བོ་རྗེས་དབུ་མ་བདེན་གཉིས་ལ་སོགས་པ་འགའ་ཞིག་མཛད་དོ། །སློབ་དཔོན་གྱི་དགོངས་པ་རང་རྒྱུད་དུ་འགྲེལ་པ་ལ་ཐོག་མར་ལེགས་ལྡན་འབྱེད་ཀྱིས་ཚིག་གི་འགྲེལ་པ་ཤེས་རབ་སྒྲོན་མེ་མཛད། འདི་ཉིད་དེ་བ་ཤར་མའི་འགྲེལ་པ་དཀར་པོ་རྣམ་པར་འཆར་བའི་རྗེས་སུ་འབྲངས་པར་སྤྱན་རས་གཟིགས་བརྟུལ་ཞུགས་ཀྱིས་བཤད་དོ། །དོན་གྱི་འགྲེལ་པ་དབུ་མ་སྙིང་པོ། དེའི་འགྲེལ་པ་རྟོག་གེ་འབར་བ་མཛད་དོ། །དེའི་རྗེས་སུ་སློབ་དཔོན་དཔལ་སྦས་ཀྱིས་དེ་ཁོ་ན་ཉིད་ལ་འཇུག་པ་མཛད། དེའི་སློབ་མ་ཡེ་ཤེས་སྙིང་པོས། དབུ་མ་བདེན་གཉིས་རྩ་འགྲེལ་མཛད། དེའི་སློབ་མ་ཞི་བ་འཚོས་དབུ་མ་རྒྱན་རྩ་འགྲེལ་མཛད། དེའི་སློབ་མ་ཀ་མ་ལ་ཤཱི་ལས་རང་ཉིད་བསྒོམ་པའི་རྣམ་གཞག་སྒོམ་རིམ་ཐོག་མཐའ་བར་གསུམ། དེའི་རྒྱབ་བརྟེན་དུ་དབུ་མ་སྣང་བ་མཛད་དེ། འདི་གསུམ་རྒྱ་གར་ཤར་ཕྱོགས་ཀྱི་དབུ་མ་པ་ཡིན་པས་རང་རྒྱུད་ཤར་བ་གསུམ་དུ་གྲགས་སོ། །གསུམ་པ་དེ་ཉིད་ལ་བཤད་ཉན་གྱིས་འཇུག་པའི་ཚུལ་ལ་ལྔ་སྟེ། འཆད་པ་པོ་བླ་མའི་མཚན་ཉིད། དེས་ཇི་ལྟར་འཆད་པའི་ཚུལ། ཉན་པ་པོ་སློབ་མའི་མཚན་ཉིད། དེས་ཇི་ལྟར་ཉན་པའི་ཚུལ། འཆད་ཉན་གྱི་གནས་སྐབས་བསྟན་པའོ། །དང་པོ་ལ་འཆད་པ་པོ་རབ་ཏུ་གྱུར་པ་ནི། རྫོགས་པའི་སངས་རྒྱས་ཡིན་ཏེ། རྟེན་འབྲེལ་སྨྲ་བ་རྣམས་ཀྱི་དམ་པ་གཞན་དང་མཚུངས་པ་མེད་པའི་ཕྱིར། ཇི་སྐད་དུ། རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་དང་། རྩོད་ཟློག་ལས། གང་ཞིག་སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །སངས་རྒྱས་དེ་ལ་ཕྱག་འཚལ་ལོ། །ཞེས་གསུངས་སོ། །འཆད་པ་པོ་འབྲིང་དུ་གྱུར་པ་ནི། ཆོས་ཉིད་དོན་དམ་པའི་བདེན་པ་མངོན་སུམ་དུ་རྟོགས་ནས་གཞན་ལ་ཕྱིན་ཅི་མ་ལོག་པར་སྟོན་པ་མགོན་པོ་ཀླུ་སྒྲུབ་ལྟ་བུ་སྟེ། འཇུག་པ་ལས། ཇི་ལྟར་དེ་ཡིས་ཆེས་ཟབ་ཆོས་རྟོགས་པ། །ལུང་དང་གཞན་ཡང་རིགས་པས་ཡིན་པས་ན། །དེ་ལྟར་འཕགས་པ་ཀླུ་སྒྲུབ་གཞུང་ལུགས་ལས། །ཇི་ལྟར་གནས་པའི་ལུགས་བཞིན་བརྗོད་པར་བྱ། །ཞེས་དང་། དེའི་འགྲེལ་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་ཆོས་རྣམས་ཀྱི་བདག་ཉིད་ཇི་ལྟ་བ་ཉིད་ཇི་ལྟར་མཐོང་བ་དེ་ལྟར་འཕགས་པ་ཀླུ་སྒྲུབ་ཀྱིས་ལུང་ཕྱིན་ཅི་མ་ལོག་པར་མཁྱེན་ནས། དབུ་མའི་བསྟན་བཅོས་ལས་རིགས་པ་དང་ལུང་དག་གིས་ཆོས་རྣམས་ཀྱི་ཡང་དག་པ་ཇི་ལྟ་བ་ཉིད་རང་བཞིན་མེད་པའི་མཚན་ཉིད་ཅན་ཆེས་གསལ་བར་བསྟན་ཏོ། །ཞེས་གསུངས་སོ། །འཆད་པ་པོ་ཐ་མ་ནི། སོ་སོ་སྐྱེ་བོའི་མཁས་པ་སྟེ། དེའི་མཚན་ཉིད་ནི། རིན་ཆེན་ཕྲེང་བར། དགེ་བའི་བཤེས་གཉེན་དེ་དག་གི །མཚན་ཉིད་མདོར་བསྡུས་མཁྱེན་པར་མཛོད། །ཆོས་ཤེས་སྙིང་རྗེ་ཚུལ་ཁྲིམས་ལྡན། །ཉོན་མོངས་སེལ་བའི་ཤེས་རབ་ཅན། །དེ་དག་གིས་ནི་ཁྱོད་བསྟེན་ན། །ཁྱོད་ཀྱིས་མཁྱེན་གྱིས་གུས་པར་མཛོད། །ཅེས་མཚན་ཉིད་བཞི་ལྡན་དུ་གསུངས་ཤིང་། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་ངོ་། །ཞེས་མཚན་ཉིད་གཉིས་ལྡན་དུ་གསུངས་སོ། །གཉིས་པ་ལ་འཆད་པ་པོ་དང་པོས་འཆད་ཚུལ་ནི། འདུལ་བྱའི་བསམ་པ་དང་། དབང་པོ་དང་། བག་ལ་ཉལ་བ་དང་འཚམས་པར་རིམ་གྱིས་ཁྲིད་ནས་མཐར་ཐམས་ཅད་ཀྱང་སྟོང་ཉིད་ལ་སྦྱོར་བ་སྟེ། ལང་ཀར་གཤེགས་པའི་མདོ་ལས། ཇི་ལྟར་ནད་པ་ནད་པ་ལ། །སྨན་པས་སྨན་རྣམས་གཏོང་བ་ལྟར། །དེ་བཞིན་སངས་རྒྱས་སེམས་ཅན་ལ། །ཇི་ཙམ་བཟོད་པའི་ཆོས་སྟོན་ཏོ། །ཞེས་དང་། རྩ་བ་ལས། གང་གིས་ཐུགས་བརྩེ་ཉེར་བཟུང་ནས། །ལྟ་བ་ཐམས་ཅད་སྤང་བའི་ཕྱིར། །དམ་པའི་ཆོས་ནི་སྟོན་མཛད་པ། །གཽ་ཏམ་དེ་ལ་ཕྱག་འཚལ་ལོ། །ཞེས་སོ། །འཆད་པ་པོ་གཉིས་པས་འཆད་ཚུལ་ནི། གཞན་གྱིས་བྱས་པའི་བསྟན་བཅོས་ལ་རག་མ་ལས་པར། རང་ཉིད་ཀྱིས་གནས་ལུགས་མངོན་སུམ་དུ་མཐོང་བས་བཀའི་དགོངས་པ་རང་དབང་དུ་འགྲེལ་བའི་སྒོ་ནས་སྟོན་པ་སྟེ། འདི་ལ་དགོངས་ནས་རྒྱུད་བླར། གང་ཞིག་རྒྱལ་བའི་བསྟན་པ་འབའ་ཞིག་གི །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་ལོངས། །ཞེས་གསུངས་པ་སྟེ། བྱམས་པའི་ཆོས་ལྔ་དང་། ཀླུ་སྒྲུབ་ཀྱི་རིགས་ཚོགས་ལ་སོགས་པ་ལྟ་བུའོ། །འཆད་པ་པོ་གསུམ་པས་འཆད་ཚུལ་ནི། ངེས་ཤེས་སྐྱེད་ཚུལ་གྱི་དབང་དུ་བྱས་ནས་འགལ་འབྲེལ་གྱི་རིགས་པ། ཡིད་ཆེས་པའི་ལུང་། བླ་མའི་མན་ངག་གསུམ་གྱི་སྒོ་ནས་འཆད། གདུལ་བྱ་ཐོས་བསམ་དང་སྒོམ་པ་ལ་དགའ་བའི་དབང་དུ་བྱས་ནས། མཚན་ཉིད་གཏན་འབེབས་དང་། སྒྲུབ་པ་ཉམས་ལེན་གྱི་ཚུལ་གྱིས་འཆད། གདུལ་བྱ་དབང་པོ་རྣོ་འབྲིང་རྟུལ་གསུམ་གྱི་དབང་དུ་བྱས་ནས་མདོར་བསྡུས་པ་དང་། བར་མ་དང་། རྒྱས་པར་འཆད་པའི་ཚུལ་གྱིས་འཆད། རང་ཉིད་འཇུག་པའི་དབང་དུ་བྱས་ནས་སྦྱོར་བ་དང་། དངོས་གཞི་དང་། རྗེས་གསུམ་གྱི་སྒོ་ནས་འཆད་པའོ། །གསུམ་པ་ལ་ཉན་པ་པོ་སྣོད་ཀྱི་སྐྱོན་དང་ལྡན་པ་དང་ཡོན་ཏན་དང་ལྡན་པ་གཉིས་ལས། དང་པོ་ནི་རྩ་བ་ལས། སྟོང་པ་ཉིད་ལ་བལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ཉེས་པར་བསྒྲུབ་པ་བཞིན། །ཞེས་དང་། རིན་ཆེན་ཕྲེང་བ་ལས། ཆོས་འདི་ལོག་པར་ཤེས་གྱུར་ན། །མི་མཁས་རྣམས་ནི་ཆུད་ཀྱང་ཟ། །འདི་ལྟར་མེད་པར་ལྟ་བ་ཡི། །མི་གཙང་དེར་ནི་བྱིང་བར་འགྱུར། །ཞེས་གསུངས་ཏེ། སྟོང་ཉིད་ལ་བག་ཆགས་མ་བཞག་པའམ། བག་ཆགས་བཞག་ཀྱང་ཚོགས་མ་བསགས་པའི་སྟོབས་ཀྱིས་སྟོང་ཉིད་བཤད་ཀྱང་དེའི་དོན་གཏན་མེད་པར་བཟུང་ནས་སྟོང་པ་ཉིད་ལ་མི་མོས་པ་སྐྱེས་ཏེ་ལོག་པར་ལྟ་བས་ཆོས་སྤོང་བ་དང་ཡང་ན་ཐ་སྙད་དུ་ཡང་ལས་འབྲས་སོགས་མེད་པ་ཡིན་སྙམ་དུ་ཕྱིན་ཅི་ལོག་ཏུ་གཟུང་བ་དང་། གཞན་ཡང་གསུང་རབ་སྤྱི་ལས་སྐྱོན་དུ་བཤད་པའི་སྣོད་ཁ་སྦུབ་ལྟ་བུ་དང་། ཞབས་རྡོལ་ལྟ་བུ་དང་། དུག་ཅན་ལྟ་བུ་རྣམས་སོ། །གཉིས་པ་ལ་མཚན་ཉིད་གཏན་འབེབས་ཀྱི་ཉན་པ་པོ་དང་། སྒྲུབ་པ་ཉམས་ལེན་གྱི་ཉན་པ་པོ་གཉིས་ལས། དང་པོ་ནི་བཞི་བརྒྱ་པ་ལས། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བརྗོད། །ཅེས་པ་ལྟར། ཆོས་དང་གང་ཟག་ལ་ཕྲག་དོག་དང་། ཁོང་ཁྲོས་དབེན་པའི་བློ་གཟུ་བོར་གནས་པ་དང་། བཤད་བྱའི་དོན་དེ་རྟོགས་པར་ནུས་པའི་ཤེས་རབ་དང་ལྡན་པ་དང་། དོན་དུ་གཉེར་བའི་བརྩོན་འགྲུས་དང་ལྡན་པ་སྟེ་མཚན་ཉིད་གསུམ་ལྡན་ནོ། །གཉིས་པ་ནི། རིན་ཆེན་ཕྲེང་བ་ལས། དེ་ཡི་སྒྲུབ་པ་མདོར་བསྡུ་ན། །མདོར་ན་དད་དང་ཤེས་རབ་བོ། །དད་ཅན་ཡིན་ཕྱིར་ཆོས་ལ་བརྟེན། །ཤེས་རབ་ལྡན་ཕྱིར་ཡང་དག་རིག །ཅེས་པ་ལྟར་འགྲོ་བ་བཞི་ཡིས་ཆོས་ལས་མི་འདའ་བའི་དད་པ་ལྡན་པ་དང་། བཤད་བྱའི་དོན་དེ་རྟོགས་པར་ནུས་པའི་ཤེས་རབ་སྟེ་མཚན་ཉིད་གཉིས་ལྡན་དུ་གསུངས་སོ། །དེ་དག་ཀྱང་གཙོ་ཆེ་བའི་དབང་དུ་བྱས་ཀྱི། གཉིས་ག་ལའང་གཉིས་ཀ་དགོས་པར་ཤེས་པར་བྱའོ། །དེ་ལྟ་བུའི་ཉན་པ་པོ་དེ་དག་ཀྱང་གྲུབ་མཐས་བློ་མ་བསྒྱུར་བ་དང་བསྒྱུར་བ་གཉིས་སུ་འདུས་པ་ལས་དང་པོ་ནི། མདོ་སྡེ་ས་བཅུ་པར། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་པའི་རིགས་མཚན་མ་ལས་ཤེས་ཚུལ་ནི། འཇུག་པ་ལས། སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་རླན་ཞིང་། །ལུས་ཀྱི་བ་སྤུ་ལྡང་བར་འགྱུར་པ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་པ་ལྟར་རོ། །དེ་ལ་ནི་དང་པོ་ཉིད་ནས་མཚན་ཉིད་གཏན་འབེབས་དང་། སྒྲུབ་པ་ཉམས་ལེན་གྱི་ཚུལ་གྱིས་དོན་དམ་པའི་བདེན་པ་བསྟན་པར་བྱ་སྟེ། དེ་ལ་དེའི་རྗེས་སུ་འགྲོ་བའི་ཡོན་ཏན་འབྱུང་བའི་ཕྱིར་རོ། །གཉིས་པ་གྲུབ་མཐས་བློ་ཁ་བསྒྱུར་བ་ལ། སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་པ་ལྟར། ནང་པ་སངས་རྒྱས་པའི་གྲུབ་མཐའ་སྨྲ་བ་བཞི་པོ་རྣམས་འོག་མ་འོག་མའི་དོན་དམ་གྱི་འདོད་ཚུལ་ལ། གོང་མ་གོང་མས་གནོད་བྱེད་བརྗོད་ནས་གྲུབ་མཐའ་གོང་མ་ལ་སྦྱོར་བ་དང་། འཆད་པ་པོ་དབུ་མ་པ་ཁོ་ནས་རང་གཞན་གྱི་གྲུབ་མཐའ་སྨྲ་བའི་དངོས་སྨྲ་བ་རྣམས་ལ། གོང་མ་གོང་མའི་གནོད་བྱེད་བརྗོད་ནས་མཐར་དབུ་མའི་གྲུབ་མཐའ་ལ་སྦྱོར་བ་དང་། ཡང་དབུ་མ་པས་དེ་དག་ལ་རང་ལུགས་ཀྱི་གནོད་བྱེད་བརྗོད་པའི་སྒོ་ནས་མཐར་ཐུག་དབུ་མའི་གྲུབ་མཐའ་ལ་སྦྱོར་བ་གསུམ་ཡོད་པ་ལས། དང་པོ་ནི། རང་རང་གི་གཞུང་ན་གསལ། གཉིས་པ་ནི། དབུ་མའི་གཞུང་ལུགས་ཉིད་ལས། ཡོད་ན་མི་རྟག་པས་ཁྱབ་པའི་མདོ་སྡེ་པའི་གྲུབ་མཐས་འདུས་མ་བྱས་དངོས་པོར་ཡོད་པའི་བྱེ་བྲག་ཏུ་སྨྲ་བའི་གྲུབ་མཐའ་དགག དྲུག་གི་ཅིག་ཅར་སྦྱར་བའི་སེམས་ཙམ་པའི་རིགས་པས་མདོ་སྡེ་པ་རྡུལ་ཕྲན་བདེན་གྲུབ་ཏུ་འདོད་པ་དགག གཅིག་དུ་བྲལ་གྱི་རྟགས་ཀྱིས་སེམས་ཙམ་པ་སེམས་བདེན་གྲུབ་ཏུ་འདོད་པ་འགོག་པར་གསུངས་པ་ལྟ་བུའོ། །གསུམ་པ་ནི། གྲངས་ཅན་པ་བདག་སྐྱེ་ཁས་བླངས་པ་ལ་འགལ་བར་བརྗོད་པའི་ཐལ་འགྱུར་དང་། རང་སྡེ་དངོས་སྨྲ་བ་རྣམས་གཞན་སྐྱེ་ཁས་བླངས་པ་ལ་རྒྱུ་མཚན་མཚུངས་པའི་མགོ་སྙོམས་དང་། གཅེར་བུ་པ་གཉིས་ཀ་ལས་སྐྱེ་བ་ཁས་བླངས་པ་ལ། དེ་གཉིས་ཀའི་གནོད་བྱེད་དང་། རྒྱང་འཕན་པ་རྒྱུ་མེད་ལས་སྐྱེ་བ་ཁས་བླངས་པ་ལ། རྒྱུ་མཚན་མཚུངས་པའི་མགོ་སྙོམས་སོགས་བརྗོད་པའི་སྒོ་ནས་སྐྱེ་མེད་རྟོགས་པ་ལ་འགོད་པ་ལྟ་བུའོ། །མདོར་ན་གྲུབ་མཐའ་སྨྲ་བའི་དངོས་སྨྲ་བ་ཐམས་ཅད་དགག་སྒྲུབ་ཀྱི་སྒོ་ནས་དབུ་མའི་དེ་ཁོ་ན་ཉིད་ཉན་པོར་རུང་བར་ཤེས་པར་བྱའོ། །ཉན་པ་པོའི་རྣམ་གཞག་ཚུལ་འདི་ལྟ་བུ་མ་ཤེས་ན། གཞུང་ལས། ཉན་པ་པོ་ཐེག་ཆེན་གྱི་རིགས་སད་པ་དགོས་པར་གསུངས་པ་དང་། དགག་སྒྲུབ་ཐམས་ཅད་གྲུབ་མཐའ་ལ་ཞུགས་པ་ཁོ་ན་ལ་བྱེད་པ་དང་། གྲུབ་མཐས་བློ་མ་བསྒྱུར་བའི་དབུ་མའི་ལྟ་བ་ཉན་པར་འདོད་པ་དུ་མ་ཡོད་པ་འདི་དག་ཅི་ལྟ་བུ་ཞིག་ཡིན་སྙམ་དུ་འགྲོན་པོ་ཕྱོགས་སླད་པ་ལྟ་བུར་གྱུར་པ་དག་མཐོང་ནས་དེ་དག་ལ་བརྩེ་བའི་སྒོ་ནས་བཤད་པའོ། །བཞི་པ་ལ་སྦྱོར་བ་དང་། དངོས་གཞི་དང་། རྗེས་གསུམ་ལས་དང་པོ་ལ། འདུ་ཤེས་ནི་རང་ཉིད་ལ་ནད་པའི་འདུ་ཤེས། འཆད་པ་པོ་ལ་སྨན་པའི་འདུ་ཤེས། ཆོས་ལ་སྨན་གྱི་འདུ་ཤེས། ནན་ཏན་ཉམས་སུ་ལེན་པ་ལ་ནད་གསོ་བའི་འདུ་ཤེས་དང་། ཀུན་སློང་ནི། ཐེག་ཆེན་སེམས་བསྐྱེད་ཀྱི་ཀུན་ནས་སློང་བར་བྱའོ། །གཉིས་པ་ནི། སྣོད་ཁ་སྦུབ་ལྟ་བུ་རྣ་བར་མི་གཏོད་པ་དང་། སྣོད་ཞབས་རྡོལ་ལྟ་བུ་རྣ་བར་གཏད་ཀྱང་དྲན་ཤེས་བཞིན་གྱིས་མི་སྐྱོང་བ་དང་། སྣོད་དུག་ཅན་ལྟ་བུ་དྲན་ཤེས་བཞིན་གྱིས་བསྐྱངས་ཀྱང་ཆགས་སྡང་དང་ཟང་ཟིང་གིས་གཡེངས་ནས་ཐར་པའི་རྒྱུར་མི་འགྱུར་བ་དག་སྤངས་ནས་ཚུལ་བཞིན་དུ་རྟག་པར་དྲན་ཤེས་བཞིན་གྱིས་བསྐྱངས་ནས་ཐར་པའི་རྒྱུར་འགྱུར་བར་བྱའོ། །གསུམ་པ་ནི། འཁོར་གསུམ་མི་དམིགས་པའི་ཤེས་རབ་ཀྱིས་རྫོགས་པའི་བྱང་ཆུབ་ཏུ་བསྔོ་བའོ། །ལྔ་པ་ནི། དགེ་བའི་བཤེས་གཉེན་གཙང་ནག་པས་འདི་ལྟར་བཤད་དེ། དེ་ལ་རེ་ཞིག་ཆོས་ཁྱད་པར་དུ་འཕགས་པ་དེ་སྟོན་པའི་གང་ཟག་ནི་འདིའི་དོན་ཇི་ལྟ་བར་མི་ཤེས་པ་དང་། སྤོབས་པ་ཞན་པ་དང་ཟང་ཟིང་གཉེར་བ་དག་གིས་གྱ་ཚོམ་དུ་མི་བྱ་སྟེ། གཞན་ལ་མི་ཕན་ཞིང་རང་ཉིད་རྨོངས་པས་ཆོས་ལས་འདའ་བ་དང་། གཞན་གྱིས་བརྩད་ན་སྤོབས་པ་གཏུགས་པས་ཡིད་འབྱུང་། ཆོས་ཟབ་མོ་བཙོངས་པའི་སྡིག་ལྕི་བས་གོས་པར་འགྱུར་བའི་ཕྱིར་རོ། །དེ་ལྟ་ནའང་མདོ་སྡེ་དེ་དང་དེ་ལས་ཆོས་ལོག་པ་དང་ཟང་ཟིང་གི་ཕྱིར་སྟོན་པའི་ཉེས་པ་མི་ཟད་པ་གསུངས་པ་ཡིན་ནོ། །འོན་ཀྱང་ཆོས་འདི་སྟོན་པའི་དགེ་བའི་བཤེས་གཉེན་ནི་ཇི་སྐད་བརྗོད་པའི་སྒྲུབ་བྱེད་ཀྱིས་འདིའི་དོན་ཇི་ལྟ་བར་རྟོགས་པས་ཤེས་བྱའི་ཆོས་དང་སངས་རྒྱས་ཀྱི་གསུང་ཐམས་ཅད་སྟོང་པ་ཉིད་ལ་འབབ་པར་ཤེས་པ་དང་། དམིགས་པ་མེད་པའི་བྱང་ཆུབ་སེམས་ཀྱི་སྤྱོད་པ་དང་ཐབས་ལ་མཁས་པའི་བརྩོན་འགྲུས་ཀྱིས་གདུལ་བྱ་ཐེག་པ་ཆེན་པོ་ལ་སྦྱོར་བར་བྱེད་པ་སྟེ། ཇི་སྐད་དུ། རྒྱལ་བའི་ཡུམ་ལས། བྱང་ཆུབ་སེམས་དཔའི་དགེ་བའི་བཤེས་གཉེན་ནི་དེ་མི་དམིགས་པའི་ཚུལ་གྱིས་ཆོས་སྟོན་ཅིང་དགེ་བའི་རྩ་བ་ཐམས་ཅད་ཀྱང་རྣམ་པ་ཐམས་ཅད་མཁྱེན་པ་ཉིད་དུ་བསྔོར་འཇུག་པ་ཞེས་འབྱུང་བ་ཡིན་ནོ། །ཆོས་བསྟན་པའི་ཡུལ་ཡང་སུ་ཡང་རུང་བ་ལ་མ་ཡིན་ཏེ། རིགས་གཞན་དང་ཐེག་པ་ཆེན་པོ་ལ་གསར་དུ་ཞུགས་པ་དག་གིས་ཐོས་ན་སྐྲག་ཅིང་མ་དད་པས་གཞན་ཕུང་བ་དང་། བརྙས་ཤིང་དོན་དུ་མ་གྱུར་པས་ཆུད་ཟོས་པ་དང་། བྱ་བ་མ་ཡིན་པ་བྱས་པ་ཉིད་ཀྱིས་བདག་ཉིད་ལ་ཉེས་པར་འགྱུར་བའི་ཕྱིར་རོ། །དེ་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཡོངས་སུ་མ་སྦྱངས་པ་རྣམས་ཀྱི་མདུན་དུ་བསྟན་པར་མི་བྱའོ། །ཞེས་པ་དང་། བསྟན་ན་རྩ་བའི་ལྟུང་ཉིད་དང་། བདུད་རྩི་དུག་ཏུ་འགྱུར་བ་དང་། སེང་གེའི་འོ་མ་ཁམས་སའི་སྣོད་དུ་བླུགས་པ་ལྟར་འགྱུར་བ་ལ་སོགས་པའི་ཉེས་པ་དུ་མར་གསུངས་པ་ཡིན་ནོ། །མདོ་འགའ་ལས་མ་དད་པ་རྣམས་ཀྱི་རྣ་བར་ཡང་བསྒྲག་པར་གསུངས་པ་ནི་དེའི་ཉེས་པ་ལྕི་བ་ལས་སྐྱོབ་པའི་ཐབས་དེ་ཉིད་དུ་གཟིགས་པ་ཡིན་གྱིས་ཐམས་ཅད་དུ་ནི་མ་ཡིན་ཏེ། སྤྱིར་བཀག་པའི་ཕྱིར་རོ། །འོན་ཀྱང་ཐེག་པ་ཆེན་པོའི་རིགས་ཅན་རྗེས་སུ་མཐུན་པའི་དགེ་ཚོགས་ཀྱིས་རྒྱུད་སྦྱངས་པ་སྔོན་དུ་སོང་བས་འདི་ཐོས་ན་དད་པའི་རྣམ་འགྱུར་ལ་སོགས་པ་འབྲས་བུའི་རྟགས་དང་ལྡན་པའམ། བདག་ཉིད་ཀྱིས་སྨིན་པར་བྱ་བའི་རིམ་པ་ཤེས་པར་བྱ་བ་ཉིད་དུ་ལུང་དག་ལས་བཤད་དོ། །དེས་དེ་ལ་བསྟན་པའི་གནས་སྐབས་ནི་འཆད་པོ་དང་ཉན་པོ་དག་ཆོས་འདིར་སྤྲོ་ཞིང་མཐུན་པས་བསམ་པ་དགེ་བ་དང་། ཟས་སྐོམ་ལ་སོགས་པ་མཐུན་རྐྱེན་ཚོགས་པ་དང་། གེགས་མེད་པ་སྟེ་དེས་ཆོས་ཟབ་མོ་ལ་བརྟེན་པའི་སྒྲིབ་པ་དང་། བདུད་ཀྱི་ལས་ཇི་ལྟར་འབྱུང་བ་རྣམས་ཤེས་པར་བྱ་སྟེ། ཕྱོགས་བཅུའི་སངས་རྒྱས་ལ་གསོལ་བ་བཏབ་ཅིང་བརྩོན་འགྲུས་བསྐྱེད་པས་ཇི་ལྟར་བྱས་ན་དེ་དག་མི་འབྱུང་ཞིང་དོན་ཆེ་བར་འགྱུར་བའི་བསམ་པ་དང་། སྦྱོར་བས་བསྟན་པར་བྱའོ། །ཞེས་གསུངས་སོ། །དེ་དག་གིས་ནི་བཤད་པ་ལ་འཇུག་པའི་ཡན་ལག་བཤད་ཟིན་ཏོ། །གཉིས་པ་བཤད་བྱའི་ཆོས་ཀྱི་ཆེ་བ་བརྗོད་པ་ལ་གསུམ་སྟེ། དབུ་མའི་ཆེ་བ་སྤྱིར་བརྗོད། གཞི་དབུ་མ་བྱེ་བྲག་ཏུ་བསྔགས། དཔེའི་སྒོ་ནས་གསུམ་ཆར་བསྔགས་པའོ། །དང་པོ་ནི། ཐེག་པ་ཆེན་པོའི་དབུ་མ་ནི། རང་བཞིན་དང་། སྒྲུབ་བྱེད་དང་། དགོས་པའི་ཁྱད་པར་གསུམ་གྱིས་ཆོས་གཞན་ལས་མཆོག་ཏུ་གྱུར་པ་ཡིན་ཏེ། དེ་ལ་རང་བཞིན་ཕུན་སུམ་ཚོགས་པ་ནི་སངས་རྒྱས་རྣམས་ཀྱིས་བརྡར་བཏགས་པའི་དབུ་མ་ཞེས་པའི་མཚན་གྱི་དོན། མཐའ་དང་བྲལ་བ་དང་། མཐར་ཐུག་པ་དང་། རྗེས་སུ་འབྲེལ་བའི་ཡོན་ཏན་གསུམ་ལས། དང་པོ་མཐའ་དང་བྲལ་བ་འཇུག་པའི་ཡུལ་ཡང་གསུམ་སྟེ། གཞི་དབུ་མར་བརྗོད་པས་བདེན་པ་གཉིས་པོ་དག་ཕན་ཚུན་དང་སོ་སོ་ལ་ལྟོས་ནས་ཡོད་མེད་རྟག་ཆད་ཀྱི་མཐའ་དང་བྲལ་བ་དང་། ལམ་དབུ་མར་བརྗོད་པས་ཐབས་ཤེས་རབ་གཉིས་པོ་དེ་སྒྲོ་འདོགས་དང་སྐུར་བའི་མཐའ་དང་བྲལ་བ་དང་། འབྲས་བུ་དབུ་མར་བརྗོད་པས་མི་གནས་པའི་མྱ་ངན་ལས་འདས་པ་ནི། སྲིད་པ་དང་ཞི་བའི་མཐའ་གཉིས་དང་བྲལ་བའི་ཕྱིར་རོ། །མཐར་ཐུག་པ་འཇུག་པའི་ཡུལ་ཡང་གསུམ་ལས། བདེན་པ་གཉིས་པོ་ནི་གཞིའི་མཐར་ཐུག་ཡིན་ཏེ། ཤེས་བྱའི་ལུས་ཐམས་ཅད་ལ་ཁྱབ་པའི་ཆོས་ཅན་དང་ཆོས་ཉིད་ཡིན་པས་དངོས་པོའི་ལུས་ཉིད་དང་། རྟོགས་པས་སྒྲོ་སྐུར་གྱི་མཐའ་ཟད་པར་སྤོང་བས་ཤེས་བྱའི་གནས་ཉིད་དང་། དེ་ལ་འཁྲུལ་མ་འཁྲུལ་གྱིས་ཉོན་མོངས་དང་རྣམ་བྱང་དུ་འགྱུར་བས་ངེས་ལེགས་ཀྱི་དམིགས་པ་ཡིན་པའི་ཕྱིར་རོ། །ཐབས་ཤེས་རབ་གཉིས་ནི་ལམ་གྱི་མཐར་ཐུག་པ་ཡིན་ཏེ། དུས་གསུམ་གྱི་སངས་རྒྱས་ཐམས་ཅད་གཤེགས་ཤིང་རྗེས་སུ་གཤེགས་པའི་ཤུལ་ཡིན་པ་དང་། ཇི་སྐད་འཆད་པའི་འབྲས་བུ་འགྲུབ་པ་ལ་དགོས་ཤིང་ཚང་བས་ངེས་པའི་རྒྱུ་ཡིན་པ་དང་། མ་མཐོང་བའི་གཡང་ས་མེད་ཅིང་ཉམས་སུ་འབབ་པས་འཇུག་པ་བདེ་བའི་སྒོ་ཡིན་པའི་ཕྱིར་རོ། །མི་གནས་པའི་མྱ་ངན་ལས་འདས་པ་ནི་འབྲས་བུ་རྣམས་ཀྱི་མཐར་ཐུག་པ་ཡིན་ཏེ། བདག་གི་དོན་གྲུབ་པ་དང་། གཞན་གྱི་དོན་བྱེད་པས་སྐྱེས་བུ་ཆེན་པོ་རྣམས་ཀྱི་གཉེར་བྱའི་དོན་ཚང་བ་དང་། སྤངས་རྟོགས་ཡོངས་སུ་རྫོགས་པས་དེ་ལས་ལྷག་པའི་དོན་མེད་པ་དང་། འདས་པའི་ལམ་གྱིས་ཐོབ་པས་སླར་ལྡོག་པ་མེད་པར་སོན་པའི་ཕྱིར་རོ། །གསུམ་པ་དེ་དག་རྗེས་སུ་འབྲེལ་བ་ནི། གཞི་ལམ་འབྲས་བུ་གསུམ་པོ་དེ་དག་ཕན་ཚུན་ངེས་པས་འབྲེལ་བ་དང་། དགོས་པ་ཚང་བས་འཚམ་པ་དང་། ལག་རྗེས་མ་འཁྲུལ་བས་མཐུན་པའི་ཕྱིར་རོ། །གཉིས་པ་སྒྲུབ་བྱེད་ཕུན་སུམ་ཚོགས་པ་ནི། རང་བཞིན་ཕུན་སུམ་ཚོགས་པའི་དོན་ངེས་པར་མི་ནུས་སོ་སྙམ་ན་དེ་དག་ངེས་པར་བྱ་བ་ལ་དངོས་པོའི་རིགས་པ་དང་། ཡིད་ཆེས་པའི་ལུང་དང་། བླ་མའི་མན་ངག་གསུམ་ཡོད་པས་ངེས་པར་ནུས་ཏེ། རིགས་པས་ནི་ཆོས་ཀྱི་རྗེས་སུ་འབྲང་བ་དག་ངེས་པར་བྱེད། ལུང་གིས་ནི་དད་པའི་རྗེས་སུ་འབྲང་བ་དག་དད་པར་བྱེད། མན་ངག་གིས་དེ་གཉིས་ཀས་དོན་བདེ་བླག་ཏུ་རྟོགས་པར་བྱེད། ཡང་རིགས་པས་ནི་དབུ་མའི་གཞི་དང་ལྟ་བ་ངེས་པར་བྱེད། ལུང་གིས་འབྲས་བུ་དང་སྤོང་བ་ངེས་པར་བྱེད། མན་ངག་གིས་ལམ་གྱི་ཉམས་ལེན་ངེས་པར་བྱེད་པས་གཞུང་གཞན་ལས་ཁྱད་པར་དུ་འགྱུར་བའི་ཕྱིར་རོ། །གསུམ་པ་དགོས་པ་ཕུན་སུམ་ཚོགས་པ་ལ་དགོས་པའི་ངོ་བོ་དང་། དེ་རྙེད་པར་དཀའ་བ་དང་། དེ་བསྒྲུབ་པར་ནུས་པ་གསུམ་ལས། དང་པོ་ནི། དོན་དེ་དག་སྒྲུབ་བྱེད་དེ་དག་གིས་འགྲུབ་པར་གཞུང་དབུ་མས་བསྟན་པ་ལས་ཐོབ་པའི་ཕན་ཡོན་ཏེ། དེའང་གསུམ་ལས། རེ་ཞིག་འདི་ཐོས་པ་ཙམ་གྱིས་ཐོབ་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ནས་སྔང་བ་དང་ཉེས་པས་སྨྲ་བ་ལ་སོགས་པ་ཉེས་པར་སྤྱད་པས་ཀྱང་བྱང་ཆུབ་ཀྱི་རྒྱུ་ཡོངས་སུ་འཛིན་པ་དང་། དད་པ་དང་མཆོད་པ་དང་། འདོན་པ་ལ་སོགས་ལེགས་པར་སྤྱད་པའི་བསོད་ནམས་གཞན་པས་ཆེ་བ་དང་། དོན་ལ་ཐེ་ཚོམ་ཞུགས་པས་ཀྱང་འཁོར་བའི་རྒྱུ་ལ་གནོད་ཅིང་ལམ་དུ་ཆུད་པས་གཞན་ལ་ཡུན་རིང་སྤྱད་པ་བས་དོན་ཆེ་བའི་ཕྱིར་རོ། །འདིའི་རང་བཞིན་རྟོགས་པས་ཐོབ་པའི་ཕན་ཡོན་ནི་ཇི་སྐད་བརྗོད་པའི་སྒྲུབ་བྱེད་དག་གིས་དབུ་མ་གསུམ་གྱི་རང་བཞིན་ཇི་ལྟ་བར་རྟོགས་ན་དངོས་པོ་ཐམས་ཅད་ཀྱི་ལུགས་དང་སངས་རྒྱས་ཐམས་ཅད་ཀྱི་ལམ་དང་བསྟན་པ་ཐམས་ཅད་ཀྱི་དོན་ཤེས་པས་རང་གིས་ཡང་དག་པའི་དོན་རྟོགས་པ་དང་། གཉེན་པོ་ཐོབ་པ་དང་། སྨྲ་བ་རྣམས་ཀྱི་མཆོག་ཏུ་གྱུར་པའང་ཡིན་ཏེ། གནས་གསུམ་ལ་གཞན་གྱི་ཀླན་ཀ་བདེ་བླག་ཏུ་སྤོང་བ་དང་། མཐའ་གཉིས་ལ་ཞེན་པ་རྣམས་བརྩེ་བས་ཚར་བཅད་པ་དང་རྗེས་སུ་འཛིན་པའི་སྒོ་ནས་གཞུང་ལུགས་ངན་པ་འཇིགས་པར་བྱེད་པའོ། །འདི་ལ་ལེགས་པར་ཞུགས་པས་ཐོབ་པ་ནི་ལམ་ཉིད་ཀྱི་དུས་ནའང་རྒྱུའི་མཐུས་སེམས་ཅན་སྨིན་པ་དང་སངས་རྒྱས་ཀྱི་ཞིང་སྦྱོང་བ་དང་དམ་པའི་ཆོས་འཛིན་པ་ལ་སོགས་པ་ཡོན་ཏན་རྒྱ་ཆེན་པོ་ལ་སྤྱོད་པའོ། །དགོས་པ་དེ་རྙེད་དཀའ་བ་ནི། དེ་ལྟ་བུའི་སྟོན་པ་འབྱུང་བ་དཀོན་པ་དང་། བསྟན་པ་འཇིག་རྟེན་པའི་བློ་དང་མི་འཕྲོད་པ་དང་། ཆོས་འདི་ལ་མོས་པ་ཙམ་ཡང་དག་པའི་ཚོགས་མང་པོ་ལ་ལྟོས་པའི་ཕྱིར། ཡིད་བཞིན་གྱི་ནོར་བུ་ལྟར་དཀོན་པ་ཡིན་ཏེ། དེ་ཉིད་ཀྱིས་ན་སྐྱེ་བོ་མཁས་པ་རྣམས་ཀྱིས་ཀྱང་ཆོས་འདིའི་དོན་ལ་བློ་མ་ཕྱོགས་ཞིང་འདིར་སྤྱོད་པ་ལ་ཞུགས་པ་དག་གིས་ཀྱང་འདི་ཇི་ལྟ་བ་མ་རྟོགས་པར་སྣང་བས་གཞུང་གི་ཁྱད་པར་འདི་ཟློས་པའང་མ་ཡིན་ནོ། །གསུམ་པ་བསྒྲུབ་པར་ནུས་པ་ནི། དེ་ལྟ་ན་ཡང་དགོས་པ་དེ་འཇོག་པོའི་གཙུག་རྒྱན་གྱི་ནོར་བུ་ལྟར་བསྒྲུབ་པར་མི་ནུས་པ་དག་མ་ཡིན་ཏེ། དེང་སང་སྐལ་བ་དང་ལྡན་པའི་སྐྱེ་བོ་ཡོད་ཅིང་གཞུང་འདིས་གསལ་བར་འཆད་པའི་ཕྱིར་རོ། །གཉིས་པ་གཞི་དབུ་མ་བྱེ་བྲག་ཏུ་བསྔགས་པ་ནི་གསུང་རབ་ཐམས་ཅད་ཀྱི་བརྗོད་བྱ་ཡིན་པ་དང་། ཤེས་བྱ་ཐམས་ཅད་ཀྱི་གནས་ལུགས་ཡིན་པ་དང་། དེ་རྟོགས་པ་ཕན་བདེ་ཐམས་ཅད་ཀྱི་གནས་ཡིན་པ་དང་གསུམ་གྱིས་ཤེས་པར་བྱ་བ་ལས། དང་པོ་ནི། གཞི་དབུ་མ་བདེན་པ་གཉིས་པོ་ནི་གསུང་རབ་ཐམས་ཅད་ཀྱི་བརྗོད་བྱ་ཡིན་ཏེ། གསུང་རབ་ཐམས་ཅད་ནི་ངེས་དོན་གྱིས་གསུང་རབ་དང་དྲང་དོན་གྱི་གསུང་རབ་གཉིས་སུ་འདུས་ཤིང་། ངེས་དོན་གྱི་གསུང་རབ་ནི་བརྗོད་བྱ་དོན་དམ་པའི་བདེན་པ་སྟོན་པ་དང་། དྲང་དོན་གྱི་གསུང་རབ་ནི་བརྗོད་བྱ་ཀུན་རྫོབ་ཀྱི་བདེན་པ་སྟོན་པའི་ཕྱིར་ཏེ། ཏིང་ངེ་འཛིན་རྒྱལ་པོ་ལས། སྟོང་པ་བདེ་བར་གཤེགས་པས་བསྟན་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་གསུངས་སོ། །དེ་ལ་བརྗོད་བྱ་བདེན་གཉིས་ཤེས་མི་ཤེས་ཀྱིས་གསུང་རབ་ལ་མི་རྨོངས་པ་དང་རྨོངས་པར་འགྱུར་བ་ཡིན་ཏེ། བདེན་གཉིས་ལས། བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་རོལ་འགྲོ་བར་འགྱུར། །ཞེས་པ་དང་། རྩ་བ་ལས། གང་དག་བདེན་པ་འདི་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་དག་སངས་རྒྱས་བསྟན་པ་ཡི། །ཟབ་མོའི་དེ་ཉིད་རྣམ་མི་ཤེས། །ཞེས་གསུངས་པའི་ཕྱིར་རོ། །གཉིས་པ་ནི། ཤེས་བྱའི་ཆོས་རྣམས་ཐམས་ཅད་དཔྱད་ན་བདེན་བརྫུན་གང་དུ་ཡང་མ་གྲུབ་པའི་སྟོང་ཉིད་ཡིན་ཞིང་། མ་དཔྱད་ཐ་སྙད་དུ་བརྫུན་སྣང་རྟེན་འབྱུང་ཡིན་པ་དེ་སུས་ཀྱང་གཞན་དུ་བཟློག་པར་མི་ནུས་པ་ཡིན་པས་ན། བདེན་གཉིས་ཟུང་དུ་འཇུག་པ་ཤེས་བྱ་ཐམས་ཅད་ཀྱི་གནས་ལུགས་ཡིན་ཏེ། ཡུམ་བར་མ་ལས། མཚན་ཉིད་འདི་དག་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་གྱིས་དཀྲུག་པར་མི་ནུས་སོ། །ཞེས་གསུངས་སོ། །གསུམ་པ་ནི། བདེན་པ་གཉིས་ཀྱི་དོན་ལེགས་པར་རྟོགས་པ་ནི། སྤྱིར་འཕགས་པ་གསུམ་གྱི་ཕན་བདེ་བསྐྲུན་པའི་ཡུམ་ཡིན་ཞིང་། བྱེ་བྲག་ཏུ་དུས་གསུམ་གྱི་སངས་རྒྱས་ཀྱི་ཡུམ་ཡིན་ཏེ། ཤེར་ཕྱིན་གྱི་བསྟོད་པ་ལས། སངས་རྒྱས་རང་སངས་རྒྱས་རྣམས་དང་། །ཉན་ཐོས་རྣམས་ཀྱིས་ངེས་བསྟེན་མ། །ཁྱོད་ཉིད་གཅིག་པུ་ཐར་པའི་ལམ། །དེ་ལྟར་གཞན་དག་མེད་པར་ངེས། །ཞེས་དང་། གང་སླད་སངས་རྒྱས་འཇིག་རྟེན་གཙོ། །ཐུགས་རྗེ་ཅན་རྣམས་ཁྱོད་ཀྱི་སྲས། །དེ་ཡི་སླད་དུ་དགེ་མ་ཁྱོད། །སེམས་ཅན་ཀུན་གྱི་ཕྱི་མོ་ལགས། །ཞེས་གསུངས་སོ། །གསུམ་པ་གསུམ་ཆར་དཔེའི་སྒོ་ནས་བསྔགས་པ་ནི། གཞི་དབུ་མ་ནམ་མཁའ་དང་ཆོས་མཚུངས་པ། ལམ་དབུ་མ་ཤིང་རྟ་དང་ཆོས་མཚུངས་པ། འབྲས་བུ་དབུ་མ་ཡིད་བཞིན་གྱི་ནོར་བུ་དང་ཆོས་མཚུངས་པ་གསུམ་གྱིས་ཤེས་པར་བྱ་བ་ལས། དང་པོ་ནི། དཔེར་ན་ནམ་མཁའ་ནི་ཁྱབ་ཅིང་རང་བཞིན་མེད་ལ་གོ་འབྱེད་པ་ལྟར། གཞི་དབུ་མ་བདེན་གཉིས་ཀྱང་ཆོས་ཐམས་ཅད་ལ་ཁྱབ་ཅིང་། ཀུན་རྫོབ་སྣང་བ་ལ་བདེན་པའི་རང་བཞིན་མེད། དོན་དམ་སྣང་མེད་ལ་བདེན་བརྫུན་གཉིས་ཀའི་རང་བཞིན་མེད་ཅིང་། བདེན་གཉིས་མ་རིག་པས་འཁོར་བར་གོ་སྐབས་འབྱེད་ལ། བདེན་གཉིས་རིག་པའི་ཡུམ་གྱིས་ཞི་བ་ལམ་ལྔར་འཇུག་པ་ཡིན་ཏེ། དེ་གཉིས་ཀ་ལ་དགོངས་ནས་རིམ་པ་ལྟར་འཕགས་པ་སྡུད་པ་ལས། སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། །དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས། །ཞེས་པ་དང་། ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཞེས་གསུངས་པ་བཞིན་ནོ། །གཉིས་པ་ནི། ཤིང་རྟ་བརྟན། བདེ། མགྱོགས་པ་ལྟར། ལམ་ཚོགས་གཉིས་ཀྱང་སྲིད་ཞི་མི་ལྟུང་བས་བརྟན་ཞིང་། སྡུག་བསྔལ་དང་གནོད་པ་མེད་པས་བདེ་ལ། མྱུར་དུ་སངས་རྒྱ་བས་མགྱོགས་པ་ཡིན་ཏེ། དེ་དག་ལ་དགོངས་ནས་རིམ་པ་ལྟར། འཕགས་པ་སྡུད་པ་ལས། ཁམས་གསུམ་ཡང་དག་འདས་ལ་རྣམ་པར་གྲོལ་བའང་མིན། །ཞེས་པ་དང་། སྤྱོད་འཇུག་ལས། སྡིག་པ་སྤོང་ཕྱིར་སྡུག་བསྔལ་མེད། །མཁས་པའི་ཕྱིར་ན་མི་དགའ་མེད། །ཅེས་པ་དང་། འཕགས་པ་སྡུད་པ་ལས། ཟིལ་གྱིས་མི་གནོན་རྒྱལ་བའི་བྱང་ཆུབ་མྱུར་དུ་ཐོབ། །ཅེས་གསུངས་པའི་ཕྱིར་རོ། །གསུམ་པ་ནི། ཡིད་བཞིན་གྱི་ནོར་བུ་རིན་པོ་ཆེ་དཀོན་ལ་ཕན་འདོགས་ཆེ། རྣམ་རྟོག་མེད་པ་ལྟར། འབྲས་བུ་དབུ་མ་དོན་གཉིས་ཕུན་སུམ་ཚོགས་པའི་སངས་རྒྱས་ཀྱང་འཇིག་རྟེན་དུ་བྱོན་པ་ཤིན་ཏུ་དཀོན། བྱོན་ན་ཀུན་ལ་ཆེས་ཆེར་ཕན་ལ། རྣམ་རྟོག་ཡང་མི་མངའ་བ་སྟེ། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །ཅེས་པ་དང་། ཐེག་བསྡུས་ལས། ཇི་ལྟར་ནོར་བུ་སིལ་སྙན་དག །རྟོག་པ་མེད་པར་རང་ལས་འབྱུང་། །དེ་བཞིན་སངས་རྒྱས་ཕྲིན་ལས་དག །རྟོག་པ་མེད་པར་རང་ལས་འབྱུང་། །ཞེས་གསུངས་པའི་ཕྱིར་རོ། །གསུམ་པ་བཤད་བྱ་དང་འཆད་བྱེད་ཀྱི་རབ་དུ་དབྱེ་བ་ལ་གཉིས་ཏེ། བཤད་བྱ་དབུ་མའི་རབ་ཏུ་དབྱེ་བ་དང་། འཆད་བྱེད་དབུ་མ་པའི་རབ་ཏུ་དབྱེ་བའོ། །དང་པོ་ལ་གང་ལ་དབྱེ་བའི་གཞི། གང་དབྱེ་བའི་ངོ་བོ་གཉིས་ལས། དང་པོ་ནི། སྤྱིར་སངས་རྒྱས་པའི་གྲུབ་མཐའ་སྨྲ་བ་བཞི་པོ་རང་རང་གི་གྲུབ་མཐའ་དེ་རྟག་ཆད་སྤངས་པའི་དབུ་མར་འདོད་ཅིང་། དེ་ལ་བརྟེན་ནས་བྱང་ཆུབ་གསུམ་ཐོབ་པར་འདོད་པར་མཚུངས་པས། དངོས་པོར་སྨྲ་བ་རྣམས་ནི་དབུ་མ་ལ་དབུ་མ་ཞེས་མི་བརྗོད་པ། ངོ་བོ་ཉིད་མེད་པར་སྨྲ་བ་ཞེས་བརྗོད་དོ། །དེ་ལ་དངོས་པོར་སྨྲ་བས་རྟག་ཆད་སྤོང་ཚུལ་ལ། ལས་འབྲས་ལ་རྟག་ཆད་སྤོང་ཚུལ་དང་། ཤེས་བྱ་སྤྱི་ལ་རྟག་ཆད་སྤོང་ཚུལ་གཉིས་ལས། དང་པོ་ནི། འོག་ཀུན་རྫོབ་བདེན་པའི་སྐབས་སུ་འཆད། ཕྱི་མ་ལ་བྱེ་བྲག་ཏུ་སྨྲས་བས། ཤེས་བྱ་གཞི་ལྔས་བསྡུས་པའི་དོན་དམ་བདེན་པ་བདེན་པར་གྲུབ་པས་ཆད་པའི་མཐའ་ལས་གྲོལ། ཕུང་པོ་ལྔ་ལ་བཏགས་པའི་གང་ཟག་དང་། རགས་པ་དང་རྒྱུན་ལ་གཞག་པའི་ཆོས་ཀྱིས་བསྡུས་པའི་ཀུན་རྫོབ་བདེན་པ་བདེན་པར་མེད་པས། རྟག་པའི་མཐའ་ལས་གྲོལ་ཞེས་འདོད་དོ། །མདོ་སྡེ་པས་ནི་ཤེས་བྱ་གཞི་ལྔའི་ནང་ནས་སྣང་བ་གཟུགས། གཙོ་བོ་སེམས། འཁོར་སེམས་བྱུང་གི་གཞི་གསུམ་དོན་དམ་པར་གྲུབ་པས་ཆད་པའི་མཐའ་ལས་གྲོལ། ལྡན་པ་མ་ཡིན་པའི་འདུ་བྱེད་དང་། འདུས་མ་བྱས་ཀྱི་གཞི་གཉིས་དང་། སྔར་བཤད་པའི་གང་ཟག་དང་ཆོས་བདེན་པར་མེད་པས་རྟག་པའི་མཐའ་ལས་གྲོལ་བར་འདོད་དོ། །སེམས་ཙམ་པས་ནི་ཆོས་ཉིད་ཡོངས་གྲུབ་དང་། དེའི་གཞི་གཞན་དབང་རང་གི་མཚན་ཉིད་ཀྱིས་གྲུབ་པས་ཆད་པའི་མཐའ་ལས་གྲོལ། གཞན་དབང་བག་ཆགས་ཀྱི་དབང་གིས་གཟུང་འཛིན་གཉིས་སུ་སྣང་བའི་ཆོས་ཀྱི་བདག་དང་། ཕུང་པོ་ལ་བཏགས་པའི་གང་ཟག་བདེན་པར་མེད་པས་རྟག་པའི་མཐའ་ལས་གྲོལ་བར་འདོད་དོ། །དབུ་མ་པས་དེ་ལྟར་དངོས་པོར་སྨྲ་བ་རྣམས་ཀྱིས་རྟག་ཆད་ཇི་ཙམ་སྤངས་ཀྱང་རྟག་ཆད་ཀྱི་མཐར་གཟུང་བ་ལས་མ་འདས་ཏེ། དངོས་པོ་རང་བཞིན་གྱིས་གྲུབ་པར་འདོད་པས་རྟག་པའི་མཐའ་ལས་མི་གྲོལ། སྔར་རང་བཞིན་གྱིས་ཡོད་པ་ཕྱིས་གཏན་མེད་དུ་འགྱུར་བས་ཆད་པའི་མཐའ་ལས་མི་གྲོལ་བའི་ཕྱིར། ཞེས་བཞེད་དེ། དབུ་མ་རྩ་བ་ལས། གང་དག་རང་བཞིན་གྱིས་ཡོད་པ། །དེ་ནི་མེད་པ་མིན་པས་རྟག །སྔོན་བྱུང་ད་ལྟར་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་གསུངས་པའི་ཕྱིར། དེས་ན་དངོས་པོར་སྨྲ་བ་རྣམས་དང་ཐུན་མོང་མ་ཡིན་པའི་རྟག་ཆད་སྤོང་ཚུལ་སྤྱིར་མང་དུ་ཡོད་ཀྱང་། གཙོ་བོ་ནི་རྩོད་ཟློག་ལས། གང་ཞིག་སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །སངས་རྒྱས་དེ་ལ་ཕྱག་འཚལ་ལོ། །ཞེས་གསུངས་པ་ལྟར། རྟེན་ནས་འབྱུང་བ་ཉིད་ཀྱིས་རྟག་པ་དང་ཆད་པའི་མཐའ་གཉིས་ཀ་ལས་གྲོལ་བས་དབུ་མར་བཞག་ཅིང་། དབུ་མ་ཞེས་བྱ་བར་གྲུབ་ནའང་མཐའ་ལས་མ་འདས་པས་མཐའ་གང་དུ་ཡང་གྲུབ་པ་མེད་པ་དེ་ནི་སྐབས་འདིར་དབྱེ་གཞི་ཡིན་ནོ། །གཉིས་པ་གང་དབྱེ་བའི་ངོ་བོ་ལ། དགག་བྱ་དགག་ཚུལ་གྱི་སྒོ་ནས་དང་། བགྲོད་བྱ་ཐེག་པའི་སྒོ་ནས་དང་། བདེན་པ་གཉིས་ཀྱི་སྒོ་ནས་དང་། ཡུལ་ཅན་གྱི་བློའི་སྒོ་ནས་དང་། བརྗོད་བྱ་རྗོད་བྱེད་ལ་སོགས་པའི་སྒོ་ནས་དང་། གང་ཟག་གི་ཆ་རྐྱེན་གྱི་སྒོ་ནས་དབྱེ་བ་དང་དྲུག་ལས། དང་པོ་ལ། དགག་བྱ་རགས་པ་བཀག་པའི་དབུ་མ་དང་། ཕྲ་བ་བཀག་པའི་དབུ་མ་གཉིས་ལས། དང་པོ་ནི། རྡོ་རྗེའི་གཟེགས་མ་དང་། གཅིག་དུ་བྲལ་ལ་སོགས་པའི་གཏན་ཚིགས་རྣམས་ཀྱིས་སྣང་བ་བདེན་པར་གྲུབ་པ་བཀག་པས་རྟག་པའི་མཐའ་ལས་གྲོལ། མ་བརྟགས་མ་དཔྱད་པའི་བློ་ངོར་ཐ་སྙད་དུ་ལས་འབྲས་ལ་སོགས་པ་སྣང་བ་ཙམ་གྲུབ་པས་ཆད་པའི་མཐའ་ལས་གྲོལ་ཏེ། རིན་ཆེན་ཕྲེང་བ་ལས། མེད་པ་བ་ནི་ངན་འགྲོར་འགྲོ། །ཡོད་པ་བ་ནི་བདེ་འགྲོར་འགྲོ། །ཡང་དག་ཇི་བཞིན་ཡོངས་ཤེས་པས། །གཉིས་ལ་མི་རྟེན་ཐར་པ་ལགས། །ཞེས་གསུངས་སོ། །གཉིས་པ་ནི། དེ་ལྟར་བདེན་པ་བཀག་ཟིན་ནས། བདེན་པར་མེད་པ་དང་། གཉིས་ཀ་དང་། གཉིས་ཀ་མ་ཡིན་པའི་མཐའ་ཕྱི་མ་གསུམ་དང་། བདེན་པས་སྟོང་པའི་ཆོས་ཅན་གྱི་དངོས་པོ་བཏགས་ཡོད་ཙམ་ལའང་མངོན་པར་ཞེན་པ་བཀག་པས་ན། མཐའ་ཐམས་ཅད་དང་བྲལ་བས་ན་དབུ་མ་སྟེ། དབུ་མ་རྩ་བ་ལས། རྟག་དང་མི་རྟག་ལ་སོགས་བཞི། །ཞི་བ་འདི་ལ་ག་ལ་ཡོད། །མཐའ་དང་མཐའ་མེད་ལ་སོགས་བཞི། །ཞི་བ་འདི་ལ་ག་ལ་ཡོད། །ཅེས་དང་། ཡེ་ཤེས་སྙིང་པོ་ཀུན་ལས་བཏུས་ལས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་མིན་པའང་མིན། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ན། །ཞེས་གསུངས་པས་སོ། །འདི་ལ་དགག་བྱ་ཕྲ་རགས་སུ་འཇོག་པ་ནི་སྔ་མ་དགག་སླ་ཞིང་མ་བཀག་ན་འཁོར་བའི་སྡུག་བསྔལ་གྱི་རྒྱུར་འགྱུར་བ་ཡིན་ལ། ཕྱི་མ་དགག་དཀའ་ཞིང་མ་བཀག་ན་ཐེག་པ་ཆེན་པོའི་བྱང་ཆུབ་ལ་གེགས་བྱེད་པ་ཡིན་གྱི་འཁོར་བའི་སྡུག་བསྔལ་སྤངས་པའི་མྱང་འདས་ཙམ་ལ་གེགས་མི་བྱེད་པའོ། །གཉིས་པ་ལ། ཉན་ཐོས་ཀྱི་དང་། རང་རྒྱལ་གྱི་དང་། ཐེག་ཆེན་གྱི་བྱང་ཆུབ་ཐོབ་པར་བྱེད་པའི་དབུ་མ་གསུམ་ལས། དང་པོ་ནི། ཉན་ཐོས་ཀྱི་བྱང་ཆུབ་ཐོབ་པ་ལ་འཁོར་བས་བསྡུས་པའི་ལས་དང་ཉོན་མོངས་སྤང་དགོས་ཤིང་། དེ་སྤང་བ་ལ་དེའི་རྒྱུ་ངར་འཛིན་ལྷན་སྐྱེས་སྤང་དགོས། དེ་ལ་ཞེན་ཡུལ་ང་ཙམ་དེ་བཙལ་ཚུལ་རྣམ་པ་བདུན་གྱིས་བཙལ་བའི་ཚེ་མ་རྙེད་པའི་གང་ཟག་གི་བདག་མེད་དང་། གང་ཟག་ཏུ་གདགས་པའི་རྒྱུ་ཕུང་པོ་བཙལ་ནས་མ་རྙེད་པའི་ཆོས་ཀྱི་བདག་མེད་རྟོགས་དགོས་ཏེ། ཆོས་དབྱིངས་བསྟོད་པ་ལས། བདག་དང་བདག་གིར་ཞེས་འཛིན་པས། །ཇི་སྲིད་ཕྱི་རོལ་རྣམ་བརྟགས་པ། །བདག་མེད་རྣམ་པ་གཉིས་མཐོང་ན། །སྲིད་པའི་ས་བོན་འགག་པར་འགྱུར། །ཞེས་དང་། རྩ་བ་ཤེས་རབ་ལས། ལས་དང་ཉོན་མོངས་ཟད་པས་ཐར། །ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་དང་། མ་རིག་འགགས་པར་འགྱུར་ན་ནི། །འདུ་བྱེད་རྣམས་ཀྱང་འབྱུང་མི་འགྱུར། །མ་རིག་འགགས་པར་འགྱུར་བ་ནི། །ཤེས་པས་དེ་ཉིད་བསྒོམས་པས་སོ། །ཞེས་གསུངས་པས་སོ། །དེ་ལྟ་བུའི་བདག་གཉིས་པོ་ཁེགས་པས་རྟག་པའི་མཐའ་ལས་གྲོལ། ཀུན་རྫོབ་ཏུ་མི་དགེ་བ་བཅུ་སྤང་ཞིང་། དགེ་བ་བཅུ་སྤྱོད་པའི་སྤྱོད་པ་མི་འདོར་བས་ཆད་པའི་མཐའ་ལས་གྲོལ་བས་དབུ་མའོ། །གཉིས་པ་ནི། རང་རྒྱལ་གྱི་བྱང་ཆུབ་ཐོབ་པར་བྱེད་པ་ལ། སྔར་བཤད་པའི་བདག་མེད་གཉིས་ཀྱི་སྟེང་དུ་གཟུགས་སོགས་ཕྱི་རོལ་གྱི་གཟུང་བ་དང་། ཀུན་ནས་ཉོན་མོངས་དང་རྣམ་བྱང་སོགས་ནང་གི་གཟུང་བ་རང་བཞིན་མེད་པར་རྟོགས་པས་རྟག་པའི་མཐའ་ལས་གྲོལ། ཀུན་རྫོབ་ཏུ་བསྐལ་པ་བརྒྱར་སངས་རྒྱས་འབྱུང་བ་མཉེས་པ་སོགས་བྱེད་པའི་སྤྱོད་པ་མི་འདོར་བས་ཆད་པའི་མཐའ་ལས་གྲོལ་བས་དབུ་མ་དགོས་ཏེ། མངོན་རྟོགས་རྒྱན་ལས། གཟུང་དོན་རྟོགས་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་གསུངས་ཤིང་། གཟུང་དོན་རྟོགས་པ་དེ་ཡང་ལམ་གཉིས་པའི་རྣམ་པའི་སྐབས་སུ་གཟུང་བ་ཕྱི་རོལ་གྱི་དོན་དུ་བདེན་པར་འཛིན་པ་དང་། ལམ་གསུམ་པའི་རྣམ་པའི་སྐབས་སུ་ཀུན་ནས་ཉོན་མོངས་ཀྱི་གཟུང་བ་སོགས་སུ་མངོན་པར་ཞེན་པ་ལ་བཤད་པའི་ཕྱིར་རོ། །གསུམ་པ་ནི། བླ་ན་མེད་པའི་བྱང་ཆུབ་ཐོབ་པ་ལ་སྔར་བཤད་པའི་བདག་མེད་དེ་དག་གི་སྟེང་དུ་སྤྲོས་པའི་མཐའ་མཐའ་དག་བཀག་པས་རྟག་པའི་མཐའ་ལས་གྲོལ། ཀུན་རྫོབ་ཏུ་སྦྱིན་སོགས་ཀྱི་སྤྱོད་པ་རྒྱ་ཆེན་པོ་མི་འདོར་བས་ཆད་པའི་མཐའ་ལས་གྲོལ་བས་དབུ་མ་དགོས་ཏེ། རིན་ཆེན་ཕྲེང་བ་ལས། གང་ཞིག་བདག་དང་གཞན་གཉིས་ཀ །བྱང་ཆུབ་མྱུར་དུ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐས་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས། །ཞེས་གསུངས་པས་སོ། །དབྱེ་བའི་ཚུལ་འདི་ནི། དངོས་པོར་སྨྲ་བའི་གྲུབ་མཐས་ཐེག་པ་ཆེ་ཆུང་གང་གི་ཡང་བྱང་ཆུབ་ཐོབ་པར་མི་ནུས་པས་ཐེག་པ་གསུམ་གྱི་བྱང་ཆུབ་ཐམས་ཅད་ཀྱང་དབུ་མའི་ལམ་འདིས་འཐོབ་དགོས་སོ་ཞེས་ཤེས་པའི་ཆེད་དུ་ཡིན་ནོ། །གསུམ་པ་ལ་ཀུན་རྫོབ་སྣང་ཙམ་ལ་དབུ་མར་གཞག་པ་དང་། དོན་དམ་སྤྲོས་བྲལ་ལ་དབུ་མར་གཞག་པ་དང་། བདེན་གཉིས་ཟུང་འཇུག་ལ་དབུ་མར་གཞག་པ་གསུམ་ལས། དང་པོ་ནི། ཀུན་རྫོབ་སྣང་ཙམ་གྱི་རྒྱུ་འབྲས་འདི་དག་འབྲས་བུ་མྱུ་གུ་ལྟ་བའི་དུས་ན་རྒྱུ་ས་བོན་ལྟ་བུ་རྒྱུན་ཆད་པ་ཡང་མ་ཡིན་པས་ཆད་པའི་མཐའ་ལས་གྲོལ། མྱུ་གུའི་ཚེ་ས་བོན་ཡོད་པ་ཡང་མ་ཡིན་པས་རྟག་པའི་མཐའ་ལས་གྲོལ་བས་དབུ་མ་སྟེ། རྩ་ཤེར་ལས། གང་ལ་བརྟེན་ནས་གང་འབྱུང་བ། །དེ་ནི་རེ་ཞིག་དེ་ཉིད་མིན། །དེ་ལས་གཞན་པའང་མ་ཡིན་པ། །དེ་ཕྱིར་ཆད་མིན་རྟག་མ་ཡིན། །ཞེས་དང་། རིན་ཆེན་ཕྲེང་བ་ལས། རྒྱུ་དང་བཅས་པར་སྐྱེ་མཐོང་བས། །མེད་པ་ཉིད་ལས་འདས་པ་ཡིན། །རྒྱུ་དང་བཅས་པར་འགག་མཐོང་བས། །ཡོད་པ་ཉིད་དུའང་ཁས་མི་ལེན། །ཞེས་དང་། དེའི་དོན་འཇུག་པར། གང་ཕྱིར་མྱུ་གུ་ས་བོན་ལས་གཞན་མིན། །དེ་ཕྱིར་མྱུག་ཚེ་ས་བོན་ཞིག་པ་མེད། །གང་ཕྱིར་གཅིག་ཉིད་ཡོད་མིན་དེ་ཕྱིར་ཡང་། །མྱུག་ཚེ་ས་བོན་ཡོད་ཅེས་བརྗོད་མི་བྱ། །ཞེས་གསུངས་པས་སོ། །འདི་ནི་རྒྱུ་འབྲས་ཀྱི་འཇོག་ཚུལ་རྟོག་གེའི་གཞུང་ལས་བཤད་པ་དང་གཏན་མི་འདྲ་བར། འབྲས་བུའི་དུས་ན་རང་གི་རྒྱུ་དེ་ཡོད་པ་ཡང་མ་ཡིན། མེད་པ་ཡང་མ་ཡིན། ངོ་བོ་གཅིག་ཀྱང་མ་ཡིན། ངོ་བོ་ཐ་དད་ཀྱང་མ་ཡིན་པའི་སྒོ་ནས་རྟག་ཆད་སྤོང་ཚུལ་ཏེ། དེང་སང་དབུ་མ་ཐལ་འགྱུར་བའི་ལུགས་ལ་དགག་པ་གཉིས་ཀྱི་རྣལ་མ་གོ་བར་འདོད་པ་དག་གིས་ནི་བསྐལ་བའི་བར་དུ་མི་རྙེད་དོ། །གཉིས་པ་ནི། ཆོས་དབྱིངས་དོན་དམ་པའི་བདེན་པ་རིགས་པས་དཔྱད་པའི་བློ་ངོར་རིམ་པ་ལྟར་རམ། འཕགས་པའི་མཉམ་གཞག་གི་བློ་ངོར་གཅིག་ཅར་དུ་མཐའ་བཞིའི་སྤྲོས་པ་དང་བྲལ་བས་དོན་དམ་པའི་བདེན་པ་ཉིད་དབུ་མ་སྟེ། མཐའ་གཉིས་དང་བྲལ་བ་ལའང་དབུ་མར་འཇོག་ན། མཐའ་ཐམས་ཅད་དང་བྲལ་བ་ལ་དབུ་མར་འཇོག་པ་ཤིན་ཏུའང་འཐད་པའི་ཕྱིར་རོ། །གསུམ་པ་ནི། ཀུན་རྫོབ་སྣང་ཙམ་དུ་རྒྱུ་ལ་བརྟེན་ནས་འབྲས་བུ་འབྱུང་བས་ཆད་པའི་མཐའ་ལས་གྲོལ། འབྱུང་ཚུལ་དེ་ཉིད་ལ་མཐའ་བཞི་རིགས་པས་དཔྱད་པའི་ཚེ་མི་རྙེད་པའི་སྟོང་པར་སོང་བས་རྟག་པའི་མཐའ་ལས་གྲོལ་བས་དེ་གཉིས་དབྱེར་མེད་པ་དབུ་མ་སྟེ། དབུ་མ་རྩ་བ་ལས། རྟེན་ཅིང་འབྲེལ་བར་འབྱུང་བ་གང་། །དེ་ཉིད་ཁྱོད་ནི་སྟོང་པར་བཞེད། །དེ་ནི་བརྟེན་ནས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་དང་། རྩོད་ཟློག་ལས། གང་ཞིག་སྟོང་དང་རྟེན་འབྱུང་དག །ཞེས་སོགས་སྔར་དྲངས་པ་ལྟར་རོ། །འདི་ནི་སོ་སྐྱེའི་བློ་ལ་ལྟོས་ནས་སྔ་ཕྱི་རེས་འཇོག་བསྡམས་ནས་ཟུང་འཇུག་རྟོགས་ཚུལ་ཡིན་ལ། མཐར་ཐུག་ཟུང་འཇུག་མངོན་དུ་གྱུར་པའི་ཚུལ་ནི། སྲིད་ཞི་མཉམ་ཉིད་དང་། འཁོར་འདས་དབྱེར་མེད་དང་། ཀུན་ནས་ཉོན་མོངས་དང་རྣམ་བྱང་རོ་གཅིག་པ་སྟེ། མངོན་རྟོགས་རྒྱན་ལས། ཆོས་རྣམས་རྨི་ལམ་འདྲ་བའི་ཕྱིར། །སྲིད་དང་ཞི་བར་མི་རྟོག་པ། །ཞེས་དང་། དཔེ་མེད་པར་བསྟོད་པ་ལས། འཁོར་བ་སྤངས་པར་གྱུར་པ་ཡིས། །མྱ་ངན་འདས་ཁྱོད་མི་བཞེད་ཀྱི། །འཁོར་བ་མི་དམིགས་པ་ཉིད་ཀྱི། །ཞི་དེ་མགོན་པོ་ཁྱོད་ཀྱིས་རྟོགས། །ཁྱོད་ཀྱིས་ཀུན་ནས་ཉོན་མོངས་དང་། །རྣམ་བྱང་རོ་གཅིག་གྱུར་རིག་པས། །ཆོས་དབྱིངས་མངོན་པར་དབྱེར་མེད་པ། །ཀུན་ཏུ་རྣམ་པར་དག་པར་འགྱུར། །ཞེས་གསུངས་པས་སོ། །བཞི་པ་ལ་དེ་ལྟ་བུའི་དབུ་མ་ཐམས་ཅད་ལ་འཕགས་པའི་མཉམ་གཞག་གིས་བརྗོད་དུ་མེད་པའི་ཚུལ་གྱིས་རྟོགས་པའི་རྟོགས་པ་དོན་དམ་དང་། སོ་སོ་སྐྱེ་བོའི་རིགས་ཤེས་ཀྱི་བློས་བརྗོད་པ་དང་བཅས་པའི་ཚུལ་གྱིས་རྟོགས་པའི་བསྟན་པ་དོན་དམ་གཉིས་སུ་ཕྱེ་སྟེ། ཚིག་གསལ་ལས། སྟོང་ངོ་ཞེས་ཀྱང་མི་བརྗོད་དེ། །མི་སྟོང་ཞེས་ཀྱང་མི་བྱ་ཞིང་། །གཉིས་དང་གཉིས་མིན་མི་བྱ་སྟེ། །འདི་དག་ཐམས་ཅད་བརྗོད་པར་བྱ་བ་མ་ཡིན་མོད་ཀྱི། འོན་ཀྱང་མ་བརྗོད་ན་རྟོགས་པ་པོ་རྣམས་ཀྱིས་ཇི་ལྟ་བ་བཞིན་དུ་གནས་པའི་རང་བཞིན་རྟོགས་པར་མི་ནུས་ཏེ། དེའི་ཕྱིར་ཁོ་བོ་ཅག་ཐ་སྙད་ཀྱི་བདེན་པ་ལ་གནས་ནས་ཐ་སྙད་ཀྱི་དོན་དུ་གདུལ་བྱའི་སྐྱེ་བོའི་ངོར་ལྷག་པར་སྒྲོ་བཏགས་ནས། སྟོང་པ་ཞེས་ཀྱང་སྨྲ་ལ། མི་སྟོང་ཞེས་བྱ་བ་དང་། སྟོང་པ་ཡང་ཡིན་ལ་མི་སྟོང་པ་ཡང་ཡིན་ཞེས་བྱ་བ་དང་། སྟོང་པ་ཡང་མ་ཡིན་མི་སྟོང་པ་ཡང་མ་ཡིན་ཞེས་བྱ་བ་སྨྲའོ། །དེ་ཉིད་ཀྱི་ཕྱིར། གདགས་པའི་དོན་དུ་བརྗོད་པར་བྱ། །ཞེས་གསུངས་ཏེ། དགོས་པ་གང་གི་སྟོང་པ་ཉིད་ལ་སོགས་བསྟན་པའི་དགོས་པ་དེ་ནི་བརྟགས་པ་ལས་ཁོང་དུ་ཆུད་པར་བྱའོ། །ཞེས་གསུངས་ཤིང་། ཐལ་འགྱུར་བས་གཉིས་ཀའང་བདེན་པ་གཉིས་སུ་ཕྱེ་བའི་དོན་དམ་བདེན་པ་མཚན་ཉིད་པར་འདོད་ལ། རང་རྒྱུད་པའི་གཞུང་རྣམས་ལས་ནི། རྣམ་གྲངས་པ་དང་། རྣམ་གྲངས་མ་ཡིན་པ་གཉིས་སུ་ཕྱེ་བར་སྣང་ངོ་། །ལྔ་པ་ལ། བརྗོད་བྱ་དབུ་མ་དང་། རྗོད་བྱེད་དབུ་མ་གཉིས་ལས། དང་པོ་ནི། ཇི་སྐད་བཤད་པ་ཐམས་ཅད་དང་། ཕྱི་མ་ནི། མཐར་ཐུག་ལ་ལྟོས་ནས་བདེ་བར་གཤེགས་པའི་གསུང་རབ་ཐམས་ཅད། གནས་སྐབས་དྲང་ངེས་གཉིས་སུ་ཕྱེ་བའི་ཚེ། ངེས་དོན་གྱི་མདོ་སྡེ་བཀའ་བར་པ་མཚན་ཉིད་མེད་པའི་ཆོས་འཁོར་ལ་སོགས་པ་དང་། དེའི་དགོངས་པ་འགྲེལ་བར་བྱེད་པའི་རིགས་ཚོགས་ལ་སོགས་པ་རྣམས་སོ། །དྲུག་པ་ལ་གཞི་ལམ་འབྲས་བུའི་དབུ་མ་གསུམ་སྟེ། གང་ཟག་གཅིག་བྱང་ཆུབ་སྒྲུབ་པའི་ཆ་རྐྱེན་ལ་ཐོས་བསམ་གྱིས་གཏན་ལ་དབབ་པར་བྱ་བའི་གཞི། ཉམས་སུ་ལེན་པའི་སྤྱོད་པ། ཉམས་སུ་བླངས་པའི་འབྲས་བུ་དང་གསུམ་དགོས་པའི་དབང་དུ་བྱས་པའོ། །གཉིས་པ་འཆད་བྱེད་དབུ་མ་པའི་རབ་ཏུ་དབྱེ་བ་ལ་བཞི་སྟེ། སྔ་རབས་པའི་ལུགས་བརྗོད། མི་འཐད་པའི་ཆ་དགག འཐད་པའི་ཆ་གཟུང་། མ་ངེས་པའི་རྩོད་པ་སྤང་བའོ། །དང་པོ་ནི། སྔ་རབས་པ་ཁ་ཅིག དབུ་མ་པ་ནི་སྤྱིར་གཉིས་ཏེ། གཞུང་ཕྱི་མོའི་དབུ་མ་པ་དང་། གྲུབ་མཐའ་ཕྱོགས་འཛིན་གྱི་དབུ་མ་པའོ། །དང་པོ་ནི། འཕགས་པ་ཀླུ་སྒྲུབ་ཡབ་སྲས་སོ། །གཞུང་ཕྱི་མོ་རང་ནི་བཀའ་རྒྱས་འབྲིང་བསྡུས་གསུམ་དང་། དབུ་མ་རིགས་ཚོགས་དང་། བཞི་བརྒྱ་པ་ལ་སོགས་པ་རྣམས་སོ། །ཁ་ཅིག་ཐལ་འགྱུར་བ་ནི་ཁས་ལེན་ཐམས་ཅད་དང་བྲལ་བས་དེའི་ཕྱིར་གཞུང་ཕྱི་མོ་བའི་དབུ་མ་པའོ་ཞེས་ཟེར་རོ། །གྲུབ་མཐའ་ཕྱོགས་འཛིན་གྱི་དབུ་མ་པ་ལའང་། དོན་དམ་གྱི་ཕྱོགས་འཛིན་པ་དང་། ཀུན་རྫོབ་ཀྱི་ཕྱོགས་འཛིན་པ་གཉིས། དང་པོ་ལའང་དགག་བྱའི་དབང་དུ་བྱས་ནས་སྣང་སེལ་བ་དང་བཏགས་སེལ་གཉིས། དང་པོ་ནི། སྣང་བ་ཉིད་དགག་བྱར་བྱེད་པའོ། །གཉིས་པ་ནི། སྣང་བ་ཉིད་དགག་བྱར་མི་བྱེད་པར་སྣང་བའི་སྟེང་གི་བཏགས་པ་ཉིད་དགག་བྱར་བྱེད་པའོ། །བསྒྲུབ་བྱ་དོན་དམ་གྱི་དབང་དུ་བྱས་ནས་དབུ་མ་སྒྱུ་མ་ལྟ་བུ་དང་། རབ་ཏུ་མི་གནས་པར་འདོད་པ་གཉིས་སམ། ཁ་ཅིག་འགལ་འདུས་དོན་དམ་དུ་འདོད་པ་དང་གསུམ་ཞེའོ། །དང་པོ་ནི། སྣང་བ་རང་བཞིན་མེད་པ་སྒྱུ་མ་ལྟ་བུ་དེ་ཉིད་དོན་དམ་བདེན་པར་འདོད་པ་སྟེ། འདིའང་སྣང་སེམས་གཉིས་ཀ་སྒྱུ་མར་འདོད་པ་དང་། སེམས་ཉིད་གཅིག་པུ་སྒྱུ་མར་འདོད་པ་གཉིས་སོ། །གཉིས་པ་ནི། གཅིག་དུ་བྲལ་གྱི་རྟགས་ཀྱིས་སྣང་བའི་སྟེང་དུ་བདེན་པ་བཀག་པ་ཙམ་ཡིན་གྱི་བདེན་མེད་མ་བསྒྲུབས་པའམ། བསྒྲུབ་ཀྱང་མེད་དགག་ཙམ་ཞིག་ཡུལ་དུ་བྱེད་ཀྱི། མ་ཡིན་དགག་སྒྱུ་མ་ལྟ་བུ་རིགས་ཤེས་ཀྱིས་མི་འཇལ་བར་འདོད་པའོ། །ཁ་ཅིག་འདི་ལའང་སྤྲོས་བྲལ་དུ་འདོད་པའི་དབུ་མ་པ་དང་། ཁས་ལེན་ཐམས་ཅད་དང་བྲལ་བའི་དབུ་མ་པ་གཉིས་སམ། ཡང་བཞི་སྟེ། ཟུང་འཇུག་རབ་ཏུ་མི་གནས་པ་དང་། སྟོང་ཉིད་རབ་ཏུ་མི་གནས་པ་དང་། བཏང་སྙོམས་རབ་ཏུ་མི་གནས་པ་དང་། རྒྱུན་ཆད་རབ་ཏུ་མི་གནས་པའོ། །དང་པོ་ནི། སྣང་སྟོང་ཟུང་འཇུག་དང་། རིག་སྟོང་ཟུང་འཇུག་འདོད་པའོ། །གཉིས་པ་ནི། གཞན་གྱི་འདོད་པ་བཀག་ནས་རང་གི་འདོད་པ་མི་སྒྲུབ་པའོ། །གསུམ་པ་ནི་གཞན་མི་འགོག རང་མི་སྒྲུབ་པའོ། །བཞི་པ་ནི། དོན་དམ་རྟོགས་བྱར་འདོད་ཅིང་ཀུན་རྫོབ་རྟོགས་བྱར་མི་འདོད་པའོ། །གསུམ་པ་འགལ་འདུས་དོན་དམ་དུ་འདོད་པ་ནི། འདི་ལྟར་དགག་བྱ་ནི་དོན་དམ་པ་ཞེས་བྱ་བ་དཔྱད་ན་མི་འགལ་བའི་དོན་ཏོ། །དེ་བཀག་ནས་འགལ་བ་འདུས་པ་ནི་བསྒྲུབ་བྱ་སྟེ། དཔེར་ན་ཆ་ལ་སོགས་པ་དུ་མ་དམིགས་པས། རང་གི་ཁྱབ་བྱེད་གཅིག་ཡོད་དགོས་ལ། དུ་མ་དང་གཅིག་འགལ་བས་མེད་ཀྱང་དགོས་པས་འགལ་བ་ལྟ་བུ་དང་། ཡོད་པ་སྐྱེ་བ་དོན་མེད་པས་མེད་པ་སྐྱེ་དགོས་པས་ན་མེད་པ་དང་སྐྱེ་བའི་གཞི་མཐུན་མེད་པས་འགལ་བ་ལྟ་བུའོ། །གཉིས་པ་ཀུན་རྫོབ་ཀྱི་ཕྱོགས་འཛིན་པ་ལ་རྣལ་འབྱོར་སྤྱོད་པ་དང་། མདོ་སྡེ་སྤྱོད་པ་དང་། གཉིས་ཀའི་ལུགས་དང་མི་འགལ་བ་ཞེས་པའམ། སྤྱི་ཟུང་ཞལ་ཆེ་བ་དང་གསུམ་ཞེས་འཆད་དོ། །གཉིས་པ་ནི། ཐལ་འགྱུར་བ་ཁས་ལེན་ཐམས་ཅད་དང་བྲལ་བ་ནི་འགོག་པར་འགྱུར་ལ། དེ་གཞུང་ཕྱི་མོའི་དབུ་མ་པ་ཡིན་པའང་མི་འཐད་དེ། འདིར་གཞུང་ཕྱི་མོའི་དབུ་མ་པ་ནི། ཐལ་རང་གཉིས་ལ་སོགས་པ་གྲུབ་མཐའ་མི་མཐུན་པ་ཐམས་ཅད་ཀྱིས་གཞི་ཡིན་པ་གཅིག་དགོས་པའི་ཕྱིར་རོ། །གྲུབ་མཐའ་ཕྱོགས་འཛིན་གྱི་དབུ་མ་ལ་དོན་དམ་གྱི་ཕྱོགས་འཛིན་པ་དང་། ཀུན་རྫོབ་ཀྱི་ཕྱོགས་འཛིན་པ་གཉིས་སུ་ཕྱེ་བའང་མི་འཐད་དེ། དོན་དམ་གྱི་འདོད་ཚུལ་མི་མཐུན་ན། གཅིག་ཤོས་དབུ་མ་པ་མ་ཡིན་པར་འགྱུར་པའི་ཕྱིར་རོ། །དབུ་མ་སྒྱུ་མ་ལྟ་བུ་དང་། རབ་ཏུ་མི་གནས་པ་གཉིས་སུ་ཕྱེ་བ་ལ་ནི་རྔོག་ལོས་སྤྲིང་ཡིག་བདུད་རྩིའི་ཐིག་ལེར། སྒྱུ་མ་གཉིས་མེད་ཆོས་ཀུན་མི་གནས་དབུ་མ་ཡི། །ལུགས་གཉིས་རྣམ་འབྱེད་དེ་ཡང་རྨོངས་པ་མཚར་སྐྱེད་ཡིན། །ཞེས་དགག་པ་མཛད་པ་ནི་དོན་ལ་གནས་ཏེ། ཕྱོགས་སྔ་སྨྲ་བ་དེ་དག་གི་བསམ་པ་ལ་སློབ་དཔོན་ཆེན་པོ་ཞི་བ་འཚོ་ལ་སོགས་པ་ནི་སྒྱུ་མ་དོན་དམ་པར་བཞེད་པ་སྟེ། དངོས་པོར་སྨྲ་བས་བཏགས་པའི་བདེན་པ་བཀག་ནས། བརྫུན་པ་ཡོངས་གཅོད་དུ་རིགས་པས་བསྒྲུབས་པས་སོ། །ཞེས་བསམ་མོད། དེ་ནི་དགོངས་པ་མ་ཡིན་ཏེ། དབུ་མའི་རྒྱན་ལས། དེ་ཕྱིར་དངོས་པོ་འདི་དག་ནི། །ཀུན་རྫོབ་ཁོ་ནའི་མཚན་ཉིད་འཛིན། །གལ་ཏེ་འདི་བདག་དོན་འདོད་ན། །དེ་ལ་བདག་གིས་ཅི་བྱར་ཡོད། །ཅེས་བརྫུན་པ་སྒྱུ་མ་ལྟ་བུ་དེ་སྣང་བའི་ཡུལ་དུ་གསུངས་ཀྱི། དོན་དམ་པར་མ་གསུངས་པའི་ཕྱིར་དང་། རིགས་ཤེས་ཀྱིས་འཇལ་བའི་དོན་དམ་དེ་ནི་དོན་དམ་བདེན་པ་དང་མཐུན་པས། དོན་དམ་བདེན་པར་བཏགས་པ་དབུ་མ་རྒྱན་དང་། སྣང་བ་གཉིས་ཀ་ནས་གསུངས་པའི་ཕྱིར། འགལ་འདུས་དོན་དམ་དུ་འདོད་པའང་མི་འཐད་དེ། སྤྱིར་དབུ་མ་པའི་ལུགས་ལ་འགལ་བ་ལྟར་སྣང་ཡང་མི་འགལ་བས་ཟབ་ཅེས་པ་ཡོད་ཀྱི། འགལ་ན་ཆོས་ཅན་གཅིག་ལ་འདུ་མི་སྲིད་ལ། འདུ་ན་མི་འགལ་བའི་ཕྱིར་རོ། །ཁྱེད་ལྟར་ན་མི་འགལ་བ་ཡང་དགག་པར་ནི་མི་བྱ་སྟེ། མི་འགལ་བ་དང་འགལ་བ་དག་ཀྱང་གཞི་གཅིག་ལ་འདུ་བར་འགྱུར་བའི་ཕྱིར་ཏེ། འགལ་འདུ་ཤེས་བྱའི་གཤིས་ཡིན་པའི་ཕྱིར་མདོར་ན་དོན་དམ་འདོད་ཚུལ་གྱི་སྒོ་ནས་དབུ་མ་པའི་དབྱེ་བ་བྱེད་པ་འདི་ལ་རྗེ་བཙུན་གྲགས་པ་རྒྱལ་མཚན་གྱི་ཞལ་སྔ་ནས། དོན་དམ་པ་ལ་ཁ་ཅིག་སྒྱུ་མ་ལྟ་བུ་དང་། རྒྱུན་ཆད་རབ་ཏུ་མི་གནས་པ་དང་། ཟུང་འཇུག་རབ་ཏུ་མི་གནས་པའོ་ཞེས་ཟེར་ཏེ། འདི་ནི་གཞུང་གི་ཆ་མ་བརྟགས་པར་རང་དགར་སྨྲ་བར་བས་ཀྱི། དོན་དམ་པར་ན་རང་བཞིན་མེད་ཅིང་། བརྗོད་པ་དང་བྲལ་བ་འདི་ཉིད་ཁོ་ན་ལས་གཞུང་ཐ་དད་པ་གང་ཡང་མེད་དོ། །ཞེས་གསུངས་པ་འདི་ཉིད་ཀྱིས་ཐམས་ཅད་ཁེགས་སོ། །ཀུན་རྫོབ་འདོད་ཚུལ་གྱི་དབྱེ་བ་དེའང་མི་འཐད་དེ། རྣལ་འབྱོར་སྤྱོད་པ་དང་། མདོ་སྡེ་སྤྱོད་པ་གཉིས་སུ་མ་འདུས་པའི་བྱེ་བྲག་ཏུ་སྨྲ་བ་དང་ཚུལ་མཚུངས་པ་དང་། འཇིག་རྟེན་གྲགས་སྡེ་སྤྱོད་པ་གཉིས་ཀྱང་ཡོད་པའི་ཕྱིར་དང་། སྣང་བ་སེམས་སུ་ཁས་ལེན་པ་དང་། སྣང་བ་ཕྱི་དོན་དུ་ཁས་ལེན་པ་གཉིས་འགལ་བས། གཉིས་ཀ་དང་མི་འགལ་བ་ཞེས་པའང་མི་འཐད་པའི་ཕྱིར་རོ། །ཡང་ཕྱིས་ཀྱི་མཁས་པ་ཁ་ཅིག ཀུན་རྫོབ་ཁས་ལེན་ཚུལ་ལ་སྣང་བ་སེམས་སུ་ཁས་ལེན་པ་དང་། སྣང་བ་ཕྱི་དོན་དུ་ཁས་ལེན་པ་གཉིས། ཕྱི་མ་ལ་འཇིག་རྟེན་གྲགས་སྡེ་སྤྱོད་པ་དང་། བྱེ་བྲག་ཏུ་སྨྲ་བ་དང་ཚུལ་མཚུངས་པ་དང་། མདོ་སྡེ་སྤྱོད་པ་གསུམ་དུ་ངེས་ཞེས་པའང་ཅུང་ཟད་མི་འཐད་དེ། དབུ་མ་པ་རང་ལུགས་ཀྱི་ཀུན་རྫོབ་ཁས་ལེན་པ་གཅིག་ཡོད་དགོས་པའི་ཕྱིར་རོ། །གསུམ་པ་ལ་ཀུན་རྫོབ་ཁས་ལེན་ཚུལ་གྱི་སྒོ་ནས་དབྱེ་བ་དང་། དོན་དམ་གྱི་ལྟ་བ་རྒྱུད་ལ་བསྐྱེད་ཚུལ་གྱི་སྒོ་ནས་དབྱེ་བ་གཉིས་ལས། དང་པོ་ནི། འཁྲུལ་པ་ཟད་པའི་རྗེ་བཙུན་གྲགས་པ་རྒྱལ་མཚན་གྱི་ཞལ་སྔ་ནས། འདི་ལ་ནི་ཀུན་རྫོབ་ཀྱི་འདོད་པ་མི་མཐུན་པ་ལྔ་ཡོད་དེ། འཇིག་རྟེན་གྲགས་སྡེ་བ་དང་། བྱེ་བྲག་ཏུ་སྨྲ་བ་དང་ཚུལ་མཚུངས་པ་དང་། མདོ་སྡེ་སྤྱོད་པའི་དང་། སྒྱུ་མ་ལྟ་བུ་དང་། རྣལ་འབྱོར་སྤྱོད་པའི་དབུ་མ་ཞེས་བྱ་བ་ལྔ་ཡིན་ནོ། །ཞེས་གསུངས་པ་ལྟར་འཆད་ན། དང་པོ་ནི་ཟླ་བ་གྲགས་པ་སྟེ། ཕྱི་དོན་ཁས་བླངས་པས་རྣལ་འབྱོར་སྤྱོད་པ་དང་སྒོ་བསྟུན་པའང་མ་ཡིན། དེ་དབང་ཤེས་ལ་རྣམ་པ་གཏོད་བྱེད་ཀྱི་ལྐོག་ན་མོར་མི་འདོད་པས་མདོ་སྡེ་པ་དང་སྒོ་བསྟུན་པའང་མ་ཡིན། རིགས་པ་དྲུག་ཅུ་པའི་འགྲེལ་པར་བློ་རྣམ་བཅས་སུ་བཤད་ཅིང་བུམ་སྣམ་སོགས་ཀྱང་ཕྱི་དོན་དུ་བཤད་པས་བྱེ་བྲག་ཏུ་སྨྲ་བ་དང་སྒོ་བསྟུན་པའང་མ་ཡིན་གྱི། འོན་ཀྱང་འཇིག་རྟེན་ལྷན་སྐྱེས་ཀྱི་བློ་ངོ་ལ་ཇི་ལྟར་སྣང་བ་ལྟར་དོན་དང་ཤེས་པ་སོགས་ཀྱི་ཐ་སྙད་ཞལ་གྱིས་བཞེས་པའི་ཕྱིར། ཚིག་གསལ་དང་འཇུག་འགྲེལ་གཉིས་ཆར་དུ། མདོ་ལས། འཇིག་རྟེན་ང་དང་ལྷན་ཅིག་རྩོད་ཀྱི། ང་ནི་འཇིག་རྟེན་དང་ལྷན་ཅིག་མི་རྩོད་དོ། །གང་འཇིག་རྟེན་ན་ཡོད་པར་འདོད་པ་དེ་ནི་ང་ཡང་ཡོད་པར་བཞེད་དོ། །གང་འཇིག་རྟེན་ན་མེད་པར་འདོད་པ་དེ་ནི་ང་ཡང་མེད་པར་བཞེད་དོ། །ཞེས་དང་། ཀླུ་སྒྲུབ་ཀྱིས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་དང་། འཕགས་པ་ལྷས། ཇི་ལྟར་ཀླ་ཀློ་སྐད་གཞན་གྱིས། །གཟུང་བར་མི་ནུས་དེ་བཞིན་དུ། །འཇིག་རྟེན་པ་ཡི་མ་གཏོགས་པ། །འཇིག་རྟེན་གཟུང་བར་ནུས་མ་ཡིན། །ཞེས་གསུངས་པ་རྣམས་ཤེས་བྱེད་དུ་མཛད་ནས། ས་བོན་ལས་མྱུ་གུ་སྐྱེ་ཞེས་སོགས་ཀྱི་ཐ་སྙད་ཙམ་ཞིག་འཇིག་རྟེན་ན་ཇི་ལྟར་གྲགས་པ་ཁས་ལེན་པར་གསུངས་པས་སོ། །གཉིས་པ་ནི་འགྲེལ་བྱེད་འདི་ཡིན་ཞེས་པ་གསལ་བར་མི་སྣང་ཡང་། ཐོག་མར་བྱེ་བྲག་ཏུ་སྨྲ་བའི་གྲུབ་མཐའ་ལ་གནས་པ་ཕྱིས་དབུ་མ་ལ་ཞུགས་པའི་ཚེ། དེ་དང་ཚུལ་མཚུངས་པར་འདོད་པ་ངེས་པར་དགོས་ཏེ། བླ་མ་བྱམས་པའི་རྣལ་འབྱོར་པ་བཞིན་ནོ། །གསུམ་པ་ནི། སློབ་དཔོན་ལེགས་ལྡན་འབྱེད་དེ། ཕྱི་དོན་དབང་ཤེས་ལ་རྣམ་པ་གཏོད་བྱེད་ཀྱི་རྒྱུར་གསུངས་པའི་ཕྱིར་རོ། །འདི་ནི་སྔར་མདོ་སྡེ་པའི་རྟོག་གེ་ལ་ལེགས་པར་སྦྱངས་པ་ཞིག་ཕྱིས་དབུ་མ་ལ་ཞུགས་པར་སྣང་བས་ཀུན་རྫོབ་ཀྱི་རྣམ་གཞག་ལ་དེའི་འགྲེས་ཤོར་བ་མང་དུ་སྣང་ངོ་། །བཞི་པ་ནི། སློབ་དཔོན་དཔའ་བོ་སྟེ། དེ་ཉིད་ཀྱིས། དོན་དམ་བྱང་ཆུབ་ཀྱི་སེམས་བསྒོམ་པའི་མན་ངག་ལས། དེས་ན་མ་བརྟགས་ཉམས་དགའ་སྟེ། །སྒྱུ་མ་ཙམ་ལ་བརྟགས་པས་བསླུས། །སེམས་ནི་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དེས་ཀྱང་ཚིག་ཏུ་བརྗོད་སྤངས་ཏེ། །སྤྲོས་བྲལ་འཇམ་དབྱངས་མཐོང་བ་མིན། །སྒྱུ་མ་སྒྱུ་མ་ཙམ་མིན་ཏེ། །གལ་ཏེ་ཡིན་ན་དེ་མི་འགྲུབ། །གྲུབ་ན་གཞན་གྱི་གཞུང་ལུགས་ཀྱང་། །སྒྱུ་མའི་ཆོས་སུ་ཐལ་བར་འགྱུར། །དེ་ཕྱིར་སྒྱུ་མའི་རང་བཞིན་ནི། །སྒྱུ་བཞིན་འདི་ཞེས་བརྗོད་དུ་མེད། །འོན་ཀྱང་ཐུགས་རྗེ་ལྡན་པ་ཡིས། །བདེན་པ་གཉིས་ཀྱི་ཚུལ་གནས་ཏེ། །ཐ་སྙད་ལ་ནི་རབ་བརྟེན་ནས། །བདག་མེད་སེང་གེའི་སྒྲ་ཆེན་བསྒྲགས། །སྟོང་པ་ཉིད་སོགས་རྣམ་གྲངས་སྒོ། །སྒྱུ་མ་འདྲ་སོགས་དཔེ་མཐའ་ཡས། །ཐེག་པ་སྣ་ཚོགས་ཐབས་ཚུལ་གྱིས། །མི་གནས་དབུ་མ་ཉེ་བར་མཚོན། །མཚོན་ཀྱང་མཚོན་བྱ་མ་ཡིན་ཏེ། །འདི་ལ་བསལ་བྱ་ཅི་ཡང་མེད། །སྟོང་པ་ཉིད་ཀྱང་སྟོང་པས་སྟོང་། །འདི་ལ་སངས་རྒྱས་སེམས་ཅན་མེད། །བདག་གཞན་སྣང་ཞིང་སྲིད་པའི་ཆོས། །རྣམ་གྲོལ་རྣམ་པར་བཅིངས་པ་ཡང་། །མིང་ཙམ་མིང་ཡང་ཡོད་མ་ཡིན། །ཐམས་ཅད་ནམ་མཁའ་དང་འདྲ་སྟེ། །དེ་ལྟར་ཆོས་རྣམས་མཐོང་མེད་ན། །མི་མངོན་མི་སྣང་འཇམ་དབྱངས་མཐོང་། །སྐྱེས་དང་འཆི་བའི་སྲིད་པ་ཡི། །འཁོར་བའི་རྒྱ་མཚོའི་ཕ་རོལ་འགྲོ། །ཞེས་གསུངས་པས་སོ། །འདི་ངེས་པར་ཡོད་དགོས་པར་སྣང་སྟེ། ཀུན་རྫོབ་ཀྱི་རྣམ་གཞག་རང་སྡེ་དངོས་པོར་སྨྲ་བ་གསུམ་དང་ཚུལ་མཚུངས་པ་ཡོད་ན་དབུ་མ་པ་རང་ལུགས་ཀྱི་ཀུན་རྫོབ་སྒྱུ་མ་ལྟ་བུ་ཁས་ལེན་པ་ཞིག་ཀྱང་ངེས་པར་དགོས་པའི་ཕྱིར་རོ། །འོ་ན་དབུ་མ་པ་གཞན་རྣམས་ཀྱང་ཀུན་རྫོབ་སྒྱུ་མ་ལྟ་བུ་ཁས་ལེན་པས་ཁྱད་པར་ཅི་ཡོད་སྙམ་ན། འདི་དག་ནི། ཐ་སྙད་བདེན་པར་ཐབས་སུ་གྱུར་པ་དང་། དོན་དམ་བདེན་པ་ཐབས་བྱུང་གྱུར་པ་སྟེ། ཞེས་པ་ལྟ་བུ་དོན་དམ་རྟོགས་པའི་རྟེན་གྱི་ཀུན་རྫོབ་ཁས་ལེན་ཚུལ་གྱིས་ཕྱེ་བ་ཡིན་ལ། དེའི་ཚེ་གཞན་རྣམས་རང་རང་གི་འདོད་པ་ལྟར་གྱི་ཀུན་རྫོབ་ཁས་ལེན་ཅིང་། སློབ་དཔོན་འདིས་ནི་ཐོག་མར་ཀུན་རྫོབ་སྒྱུ་མ་ལྟ་བུ་བསྒྲུབས་ནས་དེའི་འོག་ཏུ་སྒྱུ་མ་ཙམ་ལའང་མངོན་ཞེན་བཀག་པའི་རབ་ཏུ་མི་གནས་པའི་དོན་དམ་བསྒྲུབ་པར་བཞེད་དེ། བདེན་པ་གཉིས་ཀྱི་ཚུལ་གནས་ཏེ། །ཐ་སྙད་ལ་ནི་རབ་བརྟེན་ནས། །ཞེས་པའི་དོན་ཏོ། །སྔ་རབས་པ་དག་དོན་དམ་འདོད་ཚུལ་གྱི་དབྱེ་བ་བྱས་པའང་འདིས་འཁྲུལ་གཞི་བྱས་པར་སྣང་ཡང་། འདི་ནི་བདེན་གཉིས་ཀྱི་རིམ་པ་ཡིན་ལ། དོན་དམ་རྟོགས་པའི་རྗེས་སུ་ཀུན་རྫོབ་སྒྱུ་མ་ལྟ་བུར་ཁས་ལེན་པ་ལ་ནི། དབུ་མ་པ་ཐམས་ཅད་ཁྱད་པར་མེད་དེ་གནད་དམ་པའོ། །ལྔ་པ་ནི་ཡེ་ཤེས་སྙིང་པོ་དང་། ཞི་བ་འཚོ་ལ་སོགས་པ་སྟེ། ཀླུ་སྒྲུབ་ཀྱི་རྗེས་སུ་ཡེ་ཤེས་སྡེས་ཕྱིས་དོན་ཁས་ལེན་མི་ལེན་གྱི་གསལ་ཁ་མ་བྱུང་བ་ལ། ལེགས་ལྡན་འབྱེད་ཀྱིས་ཕྱི་དོན་ཁས་བླངས་པས་མདོ་སྡེ་སྤྱོད་པ་དང་། ཡེ་ཤེས་སྙིང་པོས་སྣང་བ་སེམས་སུ་བཤད་པས་རྣལ་འབྱོར་སྤྱོད་པའི་དབུ་མ་པ་བྱུང་། ཞེས་སྔ་རབས་པ་རྣམས་ལ་གྲགས་ཏེ། དེ་ལྟར་ན་འདི་གཉིས་ཀ་རང་རྒྱུད་པའི་དབྱེ་བའོ། །གཉིས་པ་དོན་དམ་གྱི་ལྟ་བ་བསྐྱེད་ཚུལ་གྱི་སྒོ་ནས་ཐལ་འགྱུར་བ་དང་། རང་རྒྱུད་པ་གཉིས་ཏེ། དོན་དམ་གྱི་འདོད་ཚུལ་ལ་ནི་ཁྱད་པར་མེད་དོ། །བཞི་པ་དེ་ལ་མ་ངེས་པའི་རྩོད་པ་སྤང་བ་ནི་ཕྱིས་ཀྱི་མ་ངེས་པ་ཁ་ཅིག རྔོག་ལོས་དབུ་མ་པ་ལ་སྒྱུ་མ་རིགས་དྲུག་པ་དང་། རབ་ཏུ་མི་གནས་པ་གཉིས་སུ་དབྱེ་བ་རྨོངས་པ་མཚར་སྐྱེད་ཡིན་ཞེས་གསུངས་པ་ནི་སློབ་དཔོན་དཔའ་བོའི་དོན་དམ་བྱང་ཆུབ་ཀྱི་སེམས་བསྒོམ་པའི་མན་ངག་མ་མཐོང་བར་ཟད་དེ། དེ་ཉིད་ལས་སྔར་བཤད་པ་ལྟར་སྒྱུ་མ་ཙམ་དུ་བསྒྲུབ་པ་དང་། དེ་ལ་ཞེན་པ་བཀག་ནས་རབ་ཏུ་མི་གནས་པར་བསྒྲུབ་པ་རྣམ་པ་གཉིས་སུ་གསུངས་པའི་ཕྱིར་ཞེས་སྨྲའོ། །འདི་ནི་བློ་གྲོས་རྩིང་པའི་འཇུག་པ་སྟེ། རྔོག་ལོས་བཀག་པ་ནི་དབུ་མའི་དོན་དམ་གྱི་གྲུབ་མཐའ་སྨྲ་བའི་གང་ཟག་ལ་དེ་ལྟ་བུའི་དབྱེ་བ་བྱེད་པ་བཀག་ཅིང་། དཔའ་བོས་ནི་ཉམས་ལེན་གྱི་རྒྱུན་གཅིག་ཉིད་ལ་ཐོག་མར་སྣང་བ་ཐམས་ཅད་སྒྱུ་མ་ཙམ་དུ་བསྒྲུབས། དེ་ནས་སྒྱུ་མ་ཙམ་དེ་ལའང་མངོན་པར་ཞེན་པ་བཀག་ནས་མཐའ་གང་ལའང་མི་གནས་པར་གསུངས་པའི་ཕྱིར་རོ། །དེ་ཙམ་གྱིས་གྲུབ་མཐའ་སྨྲ་བའི་དབྱེ་བར་འགྱུར་ན། མི་རྟག་ལ་སོགས་བཅུ་དྲུག་སྨྲ་བའི་དབུ་མ་པ་དང་། མངོན་ཞེན་བཀག་པའི་དབུ་མ་པ་གཉིས་སུ་དབྱེར་རིགས་པར་འགྱུར་ཏེ། མངོན་རྟོགས་རྒྱན་ལས། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན་དེ་ཡི་ནི། །རྣམ་པར་མངོན་ཞེན་ལ་སོགས་འགོག །ཅེས་གསུངས་པའི་ཕྱིར། དེ་བཞིན་དུ་ཡོད་མཐའ་བཀག་པ་དང་། མེད་མཐའ་བཀག་པའི་དབུ་མ་པ་སོགས་བཞིར་དབྱེར་རིགས་པར་འགྱུར་ཏེ། སྟོང་ངོ་ཞེས་ཀྱང་མི་བྱ་སྟེ། །ཞེས་སོགས་གསུངས་པའི་ཕྱིར་དེ་ལ་སོགས་པ་མཐའ་ཡས་སོ། །དེས་ན་རྔོག་ལོས་བཀག་པ་དོན་ལའང་གནས་ཏེ། དེ་གཉིས་བདེན་གཉིས་རྟོགས་པའི་རིམ་པ་ཡིན་གྱི་གྲུབ་མཐའ་སྨྲ་བའི་དབྱེ་བ་མ་ཡིན་པའི་ཕྱིར་རོ། །བཞི་པ་བཤད་བྱའི་དབུ་མ་གཏན་ལ་དབབ་པ་ལ་གསུམ་སྟེ། ཤེས་པར་བྱ་བའི་གཞི་དབུ་མ། བསྒོམ་པར་བྱ་བའི་ལམ་དབུ་མ། ཐོབ་པར་བྱ་བའི་འབྲས་བུ་དབུ་མའོ། །དང་པོ་ནི། བདེན་པ་གཉིས་པོ་ཡིན་ལ། འདི་ལ་མཚན་གཞིའི་ངོ་བོ། མཚོན་བྱའི་རབ་དབྱེ། མཚོན་པར་བྱེད་པའི་མཚན་ཉིད། མཚན་གཞི་ལ་མཚན་ཉིད་ངེས་འབྱེད་དང་བཞི་ལས། དང་པོ་ལ་ཡང་གཉིས་ཏེ། ཐུན་མོང་དུ་བཤད་པ་དང་། སོ་སོར་བཤད་པའོ། །དང་པོ་ནི། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་ཡུལ་ཅན་གྱི་སྒོ་ནས་དང་། བདེན་གཉིས་ལས། ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་ཅིག་ཤོས་ཡིན། །ཞེས་ཡུལ་གྱི་སྒོ་ནས་བཞག་པ་རྣམས་ཀྱིས་བདེན་གཉིས་ཀྱི་མཚན་གཞི་བསྟན་ཏེ། འདི་ལ་ཡུལ་ཅན་གྱི་བློ་ངོས་གཟུང་། དེའི་ཡུལ་ལ་བདེན་གཉིས་གཞག་པའི་ཚུལ། དེ་གཉིས་སྐྱེ་འཕགས་ཀྱི་བློ་ལ་འཐད་པ། གྲུབ་མཐའ་གོང་འོག་གི་འདོད་ཚུལ་ལ་མི་འཐད་པ་དང་བཞི་ལས། དང་པོ་ནི་འཇུག་པར། མཐོང་བ་ཡང་དག་པ་དང་། མཐོང་བ་བརྫུན་པ་གཉིས་སུ་གསུངས་ཤིང་རང་རྒྱུད་པ་དག་འཁྲུལ་མ་འཁྲུལ་གཉིས་སུ་གསུངས་པ་གནད་འདྲ་སྟེ། འདི་ལ་རྨ་བྱས་སོ་སོ་སྐྱེ་བོའི་བློ་ཐམས་ཅད་དང་འཕགས་པ་འོག་མ་གསུམ་གྱི་རྗེས་ཐོབ་ནི་བློ་འཁྲུལ་པ་དང་། འཕགས་པ་འོག་མ་གསུམ་གྱི་མཉམ་གཞག་དང་། སངས་རྒྱས་ཀྱི་ཡེ་ཤེས་ནི་བློ་མ་འཁྲུལ་བར་བཞེད། བཟད་པས་དེ་བཀག་ནས་སོ་སོ་སྐྱེ་བོའི་རིགས་ཤེས་དང་། འཕགས་པ་འོག་མ་གསུམ་གྱི་མཉམ་རྗེས་ཐམས་ཅད་དང་། སངས་རྒྱས་ཀྱི་ཡེ་ཤེས་རྣམས་མ་འཁྲུལ་བ་ཡིན་ལ། དེ་ལས་གཞན་པའི་བློ་ཐམས་ཅད་འཁྲུལ་པ་ཡིན་པར་འདོད་དོ། །འོན་ཀྱང་འཇུག་པར་བཤད་པའི་མཐོང་བ་ཡང་དག་པ་ནི་འཕགས་པའི་མཉམ་གཞག་དང་། མཐོང་བ་བརྫུན་པ་ནི་བདེན་འཛིན་གྱི་མ་རིག་པས་བསླད་པའི་བློ་ཡིན་པར་བཤད་པས། སོ་སྐྱེའི་རིགས་ཤེས་དང་། འཕགས་པ་འོག་མའི་རྗེས་ཐོབ་དེ་ཉིད་དངོས་མིན་ཀྱང་སོ་སྐྱེའི་རིགས་ཤེས་ནི་དགག་བྱ་བདེན་པ་བཀག་པའི་ཆ་ནས། མཐོང་བ་ཡང་དག་པའི་ཁོངས་སུ་བསྡུ་ཞིང་། འཕགས་པ་འོག་མའི་རྗེས་ཐོབ་ཀུན་རྫོབ་འཛིན་སྟངས་ཀྱི་གཙོ་བོར་བྱེད་པས། མཐོང་བ་བརྫུན་པའི་ཁོངས་སུ་བསྡུ་བ་གསལ་ཏེ། ཀུན་རྫོབ་ལ་ཀུན་རྫོབ་བདེན་པ་དང་ཀུན་རྫོབ་ཙམ་གཉིས་སུ་དབྱེ་བ་དེ། སོ་སྐྱེའི་བདེན་འཛིན་དང་འཕགས་པ་འོག་མའི་རྗེས་ཐོབ་ཀྱི་སྒོ་ནས་དབྱེ་བར་གསུངས་པའི་ཕྱིར་རོ། །སོ་སྐྱེའི་མྱུ་གུ་བདེན་མེད་དུ་རྟོགས་པའི་རིགས་ཤེས་བསྟན་པ་དོན་དམ་རྟོགས་པའི་ཆ་ནས་མ་འཁྲུལ་པའི་ཁོངས་སུ་བསྡུ་ཡང་། དངོས་ཡུལ་ཀུན་རྫོབ་བདེན་པ་ཡིན་པས་འཕགས་པའི་མཉམ་གཞག་ལ་ལྟོས་ན་ནི་འཁྲུལ་ཤེས་ཡིན་ནོ། །གཉིས་པ་ནི། འཕགས་པ་བདེན་པ་གཉིས་ལ་འཇུག་པ་ལས། དོན་དམ་བདེན་པ་རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱི་ཡང་ཡུལ་མ་ཡིན་པར་གསུངས་ཤིང་། དོན་དམ་པའི་བདེན་པ་ནི་གང་ལ་སེམས་ཀྱི་རྒྱུ་བ་ཡང་མེད་ན་ཡི་གེ་རྣམས་ལྟ་སྨྲོས་ཀྱང་ཅི་དགོས་ཞེས་པའི་མདོ་བདེན་གཉིས་རང་འགྲེལ་དང་། ཚིག་གསལ་འཇུག་པ་རྣམས་སུའང་དྲངས་པས་ཡུལ་ཡུལ་ཅན་གཉིས་སུ་སྣང་བའི་ཡུལ་དང་ཡུལ་ཅན་ཐམས་ཅད་ནི་ཀུན་རྫོབ་བདེན་པ་དང་། འཕགས་པའི་མཉམ་གཞག་གིས་གཉིས་སྣང་ནུབ་པའི་ཚུལ་གྱིས་ཉམས་སུ་མྱོང་བར་བྱ་བའི་སྤྲོས་བྲལ་ནི་དོན་དམ་པའི་བདེན་པའོ། །འོན་ཀྱང་། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་པ་ལྟ་བུ་འཆད་པ་པོའི་སྒྲས་བསྟན་པ་དང་། ཉན་པ་པོས་ཐོས་བསམ་གྱིས་ཡུལ་དུ་བྱས་པའི་བདེན་པ་གཉིས་ནི། ཡུལ་ཅན་གྱི་བློ་དེ་ལ་ལྟོས་ནས་བདེན་གཉིས་སོ་སོར་གཞག་ཏུ་རུང་ཡང་། འཕགས་པའི་མཉམ་གཞག་ལ་ལྟོས་ནས་གཉིས་ཀའང་ཀུན་རྫོབ་ཡིན་ནོ། །གསུམ་པ་ནི། འཇིག་རྟེན་པ་བརྫུན་པ་བསླུ་བའི་ཆོས་ཅན་ལ་ཀུན་རྫོབ་ཞེས་གྲགས་ཤིང་། ཡང་དག་པར་མི་སླུ་བ་ལ་དོན་དམ་ཞེས་གྲགས་པའི་ཐ་སྙད་ཀྱི་རྗེས་སུ་འབྲངས་ནས་དབུ་མ་པ་བདེན་གཉིས་ཀྱི་རྣམ་གཞག་བྱེད་ཅིང་། དེ་དག་ངོས་གཟུང་བའི་གཞི་ནི་འཇིག་རྟེན་པ་དང་གཏན་མི་འདྲ་སྟེ། འཇིག་རྟེན་པ་ནི་ཇི་ལྟང་སྣང་བའི་དངོས་པོ་འདི་དག་གི་ནང་ནས་ཁ་ཅིག་ནི་བརྫུན་པ་བསླུ་བའི་ཆོས་ཅན་དུ་མཐོང་བས་ཀུན་རྫོབ་ཏུ་འདོད་དེ། དབང་པོ་སྐྱོན་ལྡན་གྱི་ཤེས་པ་ཡུལ་དང་བཅས་པ་རྣམས་སོ། །ཕལ་ཆེར་ནི་ཡང་དག་པར་མི་སླུ་བར་ཞེན་ནས་དོན་དམ་དུ་སྒྲོ་འདོགས་ཏེ་དབང་པོ་སྐྱོན་མེད་ཀྱི་ཤེས་པ་ཡུལ་དང་བཅས་པ་རྣམས་སོ། །འཇིག་རྟེན་པའི་དོན་དམ་དེ་ཉིད་ལ་དབུ་མ་པའི་རིགས་པས་རྣམ་པར་དཔྱད་པ་ན། བརྫུན་པ་བསླུ་བའི་ཆོས་ཅན་དུ་གྲུབ་པས་འཇིག་རྟེན་པའི་དོན་དམ་དང་ཀུན་རྫོབ་གཉིས་ཀའང་དབུ་མ་པའི་ཀུན་རྫོབ་ཡིན་ལ། དེ་རྣམས་ཀྱི་ཆོས་ཉིད་སྟོང་པ་ཉིད་མཐར་ཐུག་དཔྱོད་པའི་རིགས་ངོའམ། འཕགས་པའི་མཉམ་གཞག་གི་ངོར་ཡང་དག་པར་མི་སླུ་བར་གྲུབ་པས་དབུ་མ་པའི་དོན་དམ་སྟེ། མདོ་ལས། དགེ་སློང་དག་འདི་ནི་བདེན་པ་དམ་པ་སྟེ། འདི་ལྟ་སྟེ་མི་སླུ་བའི་ཆོས་ཅན་ནོ། །ཞེས་དང་ཚིག་གསལ་དུ་མདོ་དྲངས་པ་ལས། དགེ་སློང་དག་འདུས་བྱས་བསླུ་བའི་ཆོས་ཅན་གང་ཡིན་པ་དེ་ནི་བརྫུན་པ་ཡིན་ལ། མི་སླུ་བའི་ཆོས་ཅན་མྱ་ངན་ལས་འདས་པ་གང་ཡིན་པ་དེ་ནི་བདེན་པ་དམ་པའོ་ཞེས་དང་། རིགས་པ་དྲུག་ཅུ་པར། མྱ་ངན་འདས་པ་བདེན་གཅིག་པུར། །རྒྱལ་བ་རྣམས་ཀྱིས་གང་གསུངས་པ། །དེ་ཚེ་ལྷག་མ་ལོག་མིན་ཞེས། །མཁས་པ་སུ་ཞིག་རྟོགས་པར་བྱེད། །ཅེས་དང་། འགྲེལ་པར། དེའི་རང་བཞིན་མིན་པ་ཉིད་ཀྱིས་ན། །འདུ་བྱེད་ཐམས་ཅད་བརྫུན་པ་སྟེ། །བསླུ་བའི་ཆོས་ཅན་ཡིན་པའི་ཕྱིར། །སྨིག་སྒྱུའི་ཆུ་བཞིན་ནོ་གང་ཞིག་བདེན་པ་དེ་ནི་བསླུ་བའི་ཆོས་ཅན་མ་ཡིན་ཏེ། དཔེར་ན་མྱ་ངན་ལས་འདས་པ་བཞིན་ནོ། །ཞེས་དང་། བཞི་འགྲེལ་ལས། རང་བཞིན་སྟོང་པ་ཉིད་དུ་གང་བཤད་པ་དེ་ཉིད་བཅོམ་ལྡན་འདས་ཀྱིས་མྱ་ངན་ལས་འདའ་བར་གསུངས་སོ། །ཞེས་དང་། སངས་རྒྱས་རྣམས་ཀྱི་དོན་དམ་པ་ནི་རང་བཞིན་ཉིད་ཡིན་ཅིང་དེའང་བསླུ་བ་མེད་པ་ཉིད་ཀྱིས་དོན་དམ་པའི་བདེན་པ་ཡིན་ལ་ཞེས་དང་། འཇུག་འགྲེལ་ལས། ཀུན་རྫོབ་ཀྱི་བདེན་པ་ནི་བསླུ་བར་བྱེད་པ་ཉིད་ཀྱི་ཕྱིར་དོན་དམ་པའི་བདེན་པ་མ་ཡིན་ནོ་ཞེས་གསུངས་པས་སོ། །དེས་ན་འཇུག་འགྲེལ་ལས། སོ་སོ་སྐྱེ་བོ་རྣམས་ཀྱི་དོན་དམ་པ་གང་ཡིན་པ་དེ་ཉིད་འཕགས་པ་སྣང་བ་བཅས་པའི་སྤྱོད་ཡུལ་ཅན་རྣམས་ཀྱི་ཀུན་རྫོབ་ཙམ་ཡིན་ལ། དེའི་རང་བཞིན་སྟོང་པ་ཉིད་གང་ཡིན་པ་དེ་ནི་དེ་རྣམས་ཀྱི་དོན་དམ་པའོ། །ཞེས་པ་ལྟར་འཇིག་རྟེན་པའི་དོན་དམ་དབུ་མ་པའི་ཀུན་རྫོབ་ཡིན་པ་ནི་ཐལ་འགྱུར་བའི་ཁྱད་ཆོས་ཏེ། འདིའི་དབང་དུ་མཛད་ནས་འཕགས་པའི་ལུང་བདེན་གཉིས་ཀྱི་འགྲེལ་པར་དྲངས་པ་ལས། གཞན་གྱི་དོན་དམ་བྱས་གང་ཡིན། །དེ་ནི་གཞན་གྱི་ཀུན་རྫོབ་སྟེ། །གཞན་གྱིས་མར་འདོད་གང་ཡིན་དེ། །གཞན་གྱིས་ཆུང་མར་འདོད་པ་བཞིན། །ཞེས་དང་། རིགས་པ་དྲུག་ཅུ་པ་ལས་ཀྱང་། ཚངས་སོགས་འཇིག་རྟེན་འདི་ལ་ནི། །བདེན་པར་རབ་ཏུ་གང་སྣང་བ། །དེ་ནི་འཕགས་ལ་བརྫུན་ཞེས་གསུངས། །འདི་ལས་གཞན་ལྟ་ཅི་ཞིག་ལུས། །ཞེས་གསུངས་པའི་དགོངས་པ་བླ་ན་མེད་པའོ། །བཞི་པ་ནི་རང་རྒྱུད་པའི་སློབ་དཔོན་དག་གིས་མདོ་སྡེ་པ་དང་བྱེ་བྲག་ཏུ་སྨྲ་བའི་དོན་དམ་དབུ་མའི་ཀུན་རྫོབ་ཏུ་སྨྲ་བ་ནི་མི་འཐད་དེ། དེ་དག་གི་དོན་དམ་ནི་འཇིག་རྟེན་ན་སྣང་བ་ལས་བརྒལ་བས་ཀུན་རྫོབ་ཏུ་མི་རུང་ལ། དེ་ཁོ་ན་ཉིད་སྐྱེ་མེད་མ་ཡིན་པས་དོན་དམ་དུའང་མི་རུང་བའི་ཕྱིར་ཏེ། འཇུག་འགྲེལ་ལས། དེའི་ཕྱིར་ཁ་ཅིག་གིས་མདོ་སྡེ་པ་རྣམས་ཀྱི་ལུགས་གང་ཞིག་དོན་དམ་པར་སྨྲས་པ་དེ་ཉིད་དབུ་མ་པ་རྣམས་ཀྱིས་ཀུན་རྫོབ་ཏུ་འདོད་དོ། །ཞེས་གང་སྨྲས་པ་གང་ཡིན་པ་དེ་ནི། དབུ་མའི་བསྟན་བཅོས་ཀྱི་དོན་གྱི་དེ་ཁོ་ན་ཉིད་མངོན་པར་མི་ཤེས་པ་ཁོ་ནས་སྨྲས་པ་ཡིན་ནོ། །ཞེས་ཤེས་པར་བྱའོ། །ཡང་གང་དག་བྱེ་བྲག་ཏུ་སྨྲ་བ་རྣམས་ཀྱིས། གང་དོན་དམ་པར་སྨྲས་པ་དེ། དབུ་མ་པ་རྣམས་ཀྱིས་ཀུན་རྫོབ་ཏུ་ཡིན་ནོ་སྙམ་དུ་སེམས་པ་དེ་དག་གིས་ཀྱང་བསྟན་བཅོས་ཀྱི་དོན་གྱི་དེ་ཉིད་ཡོངས་སུ་མ་ཤེས་པ་དེ་ཁོ་ན་སྟེ། འདི་ལྟར་འཇིག་རྟེན་ལས་འདས་པའི་ཆོས་ནི། འཇིག་རྟེན་པའི་ཆོས་དང་མཚུངས་པར་མི་རིགས་པའི་ཕྱིར་ཏེ། ལུགས་འདི་ནི་ཐུན་མོང་མ་ཡིན་པའོ། །ཞེས་མཁས་པ་རྣམས་ཀྱིས་ངེས་པར་བྱའོ། །ཞེས་གསུངས་པས་སོ། །གཉིས་པ་ལ་གཉིས་ཏེ། ཀུན་རྫོབ་བདེན་པའི་མཚན་གཞི་དང་། དོན་དམ་བདེན་པའི་མཚན་གཞིའོ། །དང་པོ་ནི་ཤེར་ཕྱིན་གྱི་མདོ་ལས། ཆོས་ཐམས་ཅད་ནི་སྦྱིན་པའི་ངང་ཚུལ་ཅན་ཏེ། ཞེས་དང་། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་བཏགས་པ་ཙམ་ལ་སློབ་པར་བྱའོ། །ཞེས་གསུངས་ཏེ། འདི་ལ་ཀུན་རྫོབ་ཀྱི་རང་བཞིན་ངོས་གཟུང་བ་དང་། དེ་ལ་རྒྱུན་བསྒྲུབ་པ་དང་། རྒྱུན་ལ་ལས་འབྲས་འཇོག་པའི་ཚུལ་དང་གསུམ་ལས། དང་པོ་ལའང་གསུམ་སྟེ། དངོས་པོར་སྨྲ་བས་དོན་དམ་དུ་འདོད་པར་དགག དབུ་མ་པར་རློམ་པའི་ལུགས་གཞན་དགག གནད་ཀྱི་དོན་ངོས་གཟུང་བའོ། །དང་པོ་ནི། འོ་ན་འཇིག་རྟེན་ན་མེ་དང་ཆུ་ལ་སོགས་པར་སྣང་བ་འདི་གང་ཞེ་ན་འདི་ལ་བྱེ་བྲག་ཏུ་སྨྲ་བས། བློ་ལ་མ་ལྟོས་པར་ཡུལ་རང་གི་སྡོད་ལུགས་ཀྱི་ངོས་ནས་གྲུབ་པའི་ཕྱི་དོན་དངོས་སུ་འདོད་དོ། །དེ་ནི་མི་འཐད་དེ། ཡུལ་ཅན་གྱི་བློ་དང་ཕན་ཚུན་ལྟོས་ནས་གྲུབ་པའི་ཕྱིར་རོ། །མདོ་སྡེ་པས་ཕྱི་རོལ་དོན་གྱིས་རང་ངོས་ནས་གཏད་པའི་རྣམ་པ་ཡིན་པས་ཤེས་པ་ཡིན་ལ། གཏོད་བྱེད་ཀྱི་ཕྱི་དོན་ལྐོག་ན་མོའི་ཚུལ་གྱིས་ཡོད་དོ། །ཞེས་འདོད་པའང་མི་རིགས་ཏེ། མེ་ལ་སོགས་པའི་དོན་དངོས་ཡིན་པ་ལ་གནོད་བྱེད་མེད་ཅིང་། དེའི་འབྲས་བུར་གྱུར་པའི་ཤེས་པ་ཡིན་པ་ལས་སྒྲུབ་བྱེད་མེད་པའི་ཕྱིར་རོ། །རྣམ་བདེན་པ། དོན་ཡོད་མ་ཡིན་སེམས་ཉིད་དེ། །ཞེས་སོགས་ཀྱི་ལུང་དང་རིག་པའམ་གསལ་བ་ཡིན་པའི་ཕྱིར་ཞེས་པའི་རིག་པས་དབང་ཤེས་ལ་དོན་དུ་སྣང་བ་ནི་ཤེས་པ་ཡིན་ཞིང་། དེ་ཡང་གཏོང་བྱེད་ཕྱི་དོན་མེད་པར་བག་ཆགས་ཀྱི་དབང་གིས་ཡུལ་དུ་སྣང་བ་ཡིན་ནོ། །ཞེས་ཟེར་བ་མི་འཐད་དེ། ལུང་དྲང་དོན་ཡིན་པའི་ཕྱིར་དང་། རིག་བྱ་དང་གསལ་བྱ་རྟགས་སུ་བཀོད་ན་མ་ངེས། རིག་བྱེད་གསལ་བྱེད་རྟགས་སུ་བཀོད་ན་མ་གྲུབ་པའི་ཕྱིར་དང་། ཕྱི་རོལ་གྱི་ངོ་བོར་སྣང་གི སིམ་གདུང་ལ་སོགས་པའི་ངོ་བོར་མི་སྣང་བའི་ཕྱིར་རོ། །རྣམ་རྫུན་པས། ཕྱི་རོལ་དོན་མཐོང་ལོག་པ་ཡིན། །ཞེས་དང་། ཡོད་པ་མ་ཡིན་དོན་སྣང་ཕྱིར། །ཞེས་པའི་ལུང་དང་རིགས་པས་ཤེས་པ་ལ་ཁ་ཕྱིར་ལྟས་དོན་དུ་སྣང་བ་ནི་དོན་ཤེས་གཉིས་ཀ་མ་ཡིན་པས་འཁྲུལ་བའི་སྣང་བ་རབ་རིབ་ཅན་ལ་སྐྲ་ཤད་སྣང་བ་དང་འདྲ་བར་འདོད་པ་དེའང་མི་རིགས་ཏེ། བདེ་སྡུག་སིམ་གདུང་གི་དོན་བྱེད་པར་སྣང་བས་དངོས་པོར་འཇོག་པ་ལྟར། མེ་ཆུ་ཡང་ཚ་གྲང་གི་དོན་བྱེད་པར་མཐོང་བས་དངོས་པོར་ཁས་ལེན་དགོས་པའི་ཕྱིར་དང་། མཐོང་ཡང་གཅིག་དུ་བྲལ་གྱི་རྣམ་པར་དཔྱད་ན་མི་རྙེད་པ་ལྟར། ཤེས་པའང་དུས་ཀྱི་ཆ་ཤས་ཀྱིས་རྣམ་པར་དཔྱད་ན་མི་རྙེད་པར་མཚུངས་པའི་ཕྱིར་རོ། །དེ་ལྟར་དངོས་པོར་སྨྲ་བ་དག་ནི་ཤིང་ཐོག་དོན་དུ་གཉེར་བས་ཤིང་སྡོང་ལ་འཛེགས་ཏེ་ཡལ་ག་སྔ་མ་བཏང་ནས་ཕྱི་མ་མ་བཟུང་ན་ཤིང་ཐོག་མ་ཐོབ་པར་གཡང་ས་ཆེན་པོར་ལྷུང་བ་བཞིན་དུ། གནག་རྫི་ཡན་ཆད་ལ་གྲགས་པའི་འཇིག་རྟེན་གྱི་དངོས་པོ་དོར་ཞིང་། བདག་དང་ཆོས་གཞན་དུ་བཏགས་པས་དེ་ཁོ་ན་ཉིད་ཀྱང་མ་བཟུང་ཞིང་ལྟ་བ་ངན་པའི་རི་སུལ་དུ་ལྷུང་སྟེ་བདེན་པ་གཉིས་ལས་ཉམས་པས་འབྲས་བུ་མི་འཐོབ་པ་ཡིན་ནོ། །ཞེས་སློབ་དཔོན་ཟླ་བས་བཤད་དོ། །གཉིས་པ་དབུ་མ་པར་རློམ་པའི་ལུགས་གཞན་དགག་པ་ལ་བཞི་སྟེ། ཀུན་རྫོབ་ཐམས་ཅད་འཇིག་རྟེན་པའི་ལུགས་སུ་འདོད་པ་དགག་པ། བདེན་གཉིས་སྐྱེ་འཕགས་སོ་སོའི་ལུགས་སུ་འདོད་པ་དགག་པ། ཀུན་རྫོབ་ཡོད་མིན་མེད་མིན་དུ་འདོད་པ་དགག་པ། བཏགས་དོན་མེད་པའི་བཏགས་པ་ཡོད་པ་དགག་པའོ། །དང་པོ་ནི། དབུ་མ་པར་རློམ་པ་ཁ་ཅིག དབུ་མ་པ་ལ་རང་ལུགས་ཀྱི་ཁས་བླངས་ཅི་ཡང་མེད་དེ་དབུ་མ་པ་ནི་འཕགས་པའི་གང་ཟག་ཡིན་ལ་དབུ་མ་ནི་དེའི་མཉམ་གཞག་ཡིན་པས་དེའི་མཉམ་གཞག་གི་ངོ་ན་སྤྲོས་པ་ཐམས་ཅད་ཞི་བས་སོ། །དེས་ན་གཞུང་འདིར་བཀོད་པའི་གཞི་ལམ་འབྲས་བུའི་རྣམ་གཞག་ཐམས་ཅད་ནི་འཇིག་རྟེན་པའི་ལུགས་བཀོད་པ་ཙམ་སྟེ། བཞི་བརྒྱ་པར། ཇི་ལྟར་ཀླ་ཀློ་སྐད་གཞན་གྱིས། །གཟུང་བར་མི་ནུས་དེ་བཞིན་དུ། །འཇིག་རྟེན་པ་ཡི་མ་གཏོགས་པར། །འཇིག་རྟེན་གཟུང་བར་ནུས་མ་ཡིན། །ཞེས་དང་། འཇུག་པར། འཇིག་རྟེན་ངོར་བྱས་བདག་ནི་སྨྲ་བར་བྱེད། །ཅེས་དང་། འཇུག་འགྲེལ་ལས། ཡོད་པ་མིན་ཡང་འཇིག་རྟེན་ཁོ་ན་ལ་གྲགས་པར་གྱུར་པས་ཡོད་དོ་ཞེས་འཇིག་རྟེན་གྱི་ངོ་ཁོ་ནར་བརྗོད་པ་ཡིན་ཏེ། དེ་རྗེས་སུ་བརྗོད་པ་ནི་དེ་ཟློག་པའི་ཐབས་ཡིན་པའི་ཕྱིར་རོ། །ཇི་སྐད་དུ། བཅོམ་ལྡན་འདས་ཀྱིས་འཇིག་རྟེན་ང་དང་ལྷན་ཅིག་རྩོད་ཀྱི། ང་ནི་འཇིག་རྟེན་དང་མི་རྩོད་དེ། གང་འཇིག་རྟེན་ན་ཡོད་པར་འདོད་པ་དེ་ནི་ངས་ཀྱང་ཡོད་པར་བཞེད་དོ། །གང་འཇིག་རྟེན་ན་མེད་པར་འདོད་པ་དེ་ནི་ང་ཡང་མེད་པར་བཞེད་དོ། །ཞེས་གསུངས་པ་ལྟ་བུའོ་ཞེས་དང་། ཡང་དེ་ཉིད་ལས། གཞན་ལ་རག་ལས་པ་ཉིད་ཀྱི་སྒོ་ནས་བདག་གིས་ཀུན་རྫོབ་ཁས་བླངས་ཀྱི་རང་དབང་དུ་ནི་མ་ཡིན་ནོ། །ཞེས་དང་། དངོས་པོ་ཀུན་རྫོབ་པ་སྨིག་རྒྱུའི་ཆུ་དང་འདྲ་བ་རྣམས་ནི་འཇིག་རྟེན་པའི་ཕྱིན་ཅི་ལོག་ཁས་བླངས་ནས་རྐྱེན་ཉིད་འདི་པ་ཙམ་དུ་ཁས་བླངས་པ་ཁོ་ནས་གྲུབ་པ་ཡིན་གྱི་གཞན་གྱིས་ནི་མ་ཡིན་ནོ། །ཞེས་དང་། རིགས་པ་དྲུག་ཅུ་པའི་འགྲེལ་པར། བྱིས་པའི་སྐྱེ་བོའི་རྟོག་པའི་དབང་དུ་འཁོར་བ་དང་མྱ་ངན་ལས་འདས་པ་གཉིས་ཡོད་དེ། ཞེས་གསུངས་པར་ཞེས་འདོད་དོ། །དེ་ལ་འཇིག་རྟེན་པའི་དོན་གང་ཡིན་ཞེས་འདྲི། དེ་ལ་ཁ་ཅིག གྲུབ་མཐས་བསྒྱུར་བའི་དངོས་སྨྲ་བ་རྣམས་ནི་བདེན་པ་གཉིས་ཀ་ལས་ཉམས་པའི་ཕྱིར་འཇིག་རྟེན་ནི་གྲུབ་མཐའ་ལ་གཏན་མ་ཞུགས་པའི་འཇིག་རྟེན་ཐ་མལ་པ་རྣམས་ཡིན་པས་དེ་ལ་གྲགས་པ་རྣམས་གཞུང་འདིར་བཀོད་པའོ་ཞེ་ན། འོ་ན་གཞུང་འདིར་བཤད་པའི་སེམས་བསྐྱེད་པ་བཅུ་ལ་སོགས་པ་ཐེག་པ་གསུམ་གྱི་ས་ལམ་དང་འབྲས་བུ་སྐུ་དང་ཡེ་ཤེས་དང་ཕྲིན་ལས་ལ་སོགས་པ་རྣམས་ནི་གཞི་མ་གྲུབ་པར་འགྱུར་ཏེ། དབུ་མ་པ་ལ་ནི་རང་ལུགས་མེད་པས་དེའི་ལུགས་མ་ཡིན། དངོས་པོར་སྨྲ་བ་རྣམས་ནི་བདེན་པ་གཉིས་ཀ་ལས་ཉམས་པས་དེའི་ལུགས་ཀྱང་མ་ཡིན། འཇིག་རྟེན་ཐ་མལ་པ་ལ་ནི་ཅུང་ཟད་ཀྱང་མ་གྲགས་པས་དེའི་ལུགས་ཀྱང་མ་ཡིན་པའི་ཕྱིར། གལ་ཏེ་དེ་རྣམས་འཇིག་རྟེན་པ་ལ་དངོས་སུ་གྲགས་ཟིན་པ་མིན་ཀྱང་། གྲགས་སུ་རུང་བས་འཇིག་རྟེན་པའི་ལུགས་ཏེ། འཇིག་རྟེན་པའང་ནམ་ཞིག་ལམ་དེ་དང་དེ་ལ་ཞུགས་པ་ན་གྲགས་པར་འགྱུར་བས་སོ། །ཞེ་ན། དེ་ལྟར་ན་ཕྱི་ནང་གི་གྲུབ་མཐའ་སྨྲ་བས་བཏགས་པའི་བདག་དང་གཙོ་བོ་དང་། རྡུལ་དང་ཤེས་པ་བདེན་པ་བ་རྣམས་ཀྱང་འཇིག་རྟེན་པའི་ལུགས་སུ་ཐལ་ཏེ། ད་ལྟ་དངོས་སུ་གྲགས་ཟིན་པ་མེད་ཀྱང་ནམ་ཞིག་གྲུབ་མཐའ་དེ་དང་དེ་ལ་ཞུགས་པ་ན་གྲགས་པར་འགྱུར་བར་མཚུངས་པའི་ཕྱིར་རོ། །འདོད་ན། དེ་རྣམས་འཇིག་རྟེན་པའི་ལུགས་ལས་ཉམས་པར་གཞུང་ལས་བཤད་ཅིང་། ཁྱེད་རང་ཡང་འདོད་པ་དང་འགལ་ལོ། །གཞན་དག་འཇིག་རྟེན་ནི་མནར་མེད་པ་དང་སྲིད་རྩེའི་བར་དང་། ཆོས་མཆོག་ཆེན་པོའི་བར་གྱི་གང་ཟག་རྣམས་ཡིན་ལ། གང་ཟག་དེ་རྣམས་གྲུབ་མཐའ་ལ་ཞུགས་པའམ་མ་ཞུགས་པ་སུ་ཡིན་ཀྱང་སླ་སྟེ། དེ་རྣམས་ཀྱིས་ཐོག་མེད་ནས་གོམས་པའི་བློ་ནི་གྲུབ་མཐས་མ་བསྒྱུར་བ་ཡིན་ཞིང་། བློ་དེ་ལ་ཇི་ལྟར་སྣང་བ་དབུ་མའི་གཞུང་དུ་བཀོད་པའོ་ཞེ་ན། དེའང་མི་འཐད་དེ། འདིར་བཤད་པའི་གཞི་བདེན་པ་གཉིས་དང་། ལམ་མཐའ་དང་བྲལ་བའི་རྟེན་འབྲེལ་ལ་སོགས་པ་འཕགས་པའི་སྤྱོད་ཡུལ་ཡིན་གྱི། སོ་སོ་སྐྱེ་བོས་ཐོག་མེད་ནས་གོམས་པའི་བློའི་སྤྱོད་ཡུལ་མ་ཡིན་པར་གསུངས་པའི་ཕྱིར་ཏེ། འཇུག་འགྲེལ་ལས། དེའི་རང་གི་ངོ་བོ་ནི་མ་རིག་པའི་ལིང་ཐོག་མཐུག་པོས་བློའི་མིག་མ་ལུས་པར་ཁེབས་པ་བདག་ཅག་གི་ཡུལ་དུ་ཉེ་བར་འགྲོ་བ་མ་ཡིན་གྱི་དྲུག་པ་ལ་སོགས་པ། ས་གོང་མ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་ཡུལ་དུ་ནི་འགྱུར་བ་ཡིན་ཏེ་ཞེས་དང་། ཁོ་བོ་ཅག་ནི་རྣལ་འབྱོར་པ་རྣམས་ཀྱིས་དངོས་པོ་དེ་དག་འདི་ལྟར་གཟིགས་ཤིང་། གཞན་གང་དག་རྣལ་འབྱོར་པའི་ཡེ་ཤེས་ཐོབ་པར་འདོད་པ་དེ་དག་གིས་ཀྱང་ཆོས་ཀྱི་རང་བཞིན་དེ་སྐད་བཤད་པ་ལ་ལྷག་པར་མོས་པར་བྱའོ། །ཞེས་ལུང་ཇི་ལྟ་བ་བཞིན་དུ་རྣལ་འབྱོར་པའི་ཡེ་ཤེས་ཀྱིས་ཐུགས་སུ་ཆུད་པའི་སྒོ་ནས་དངོས་པོ་རང་བཞིན་མེད་པར་འཆད་པར་ཞུགས་པ་ཡིན་གྱི། རང་གི་ཤེས་པ་ལ་ལྟོས་ནས་ནི་མ་ཡིན་ཏེ། ཞེས་གསུངས་པས་སོ། །གལ་ཏེ་དེ་དག་དོན་དམ་བདེན་པ་ཁོ་ནའི་དབང་དུ་བྱས་སོ་སྙམ་ན། དེའང་མ་ཡིན་ཏེ། ཀུན་རྫོབ་རྟེན་འབྲེལ་སྒྱུ་མ་ལྟ་བུར་རྣམ་པར་གཞག་པ་ནི་དེ་ལྟ་བུའི་དོན་དམ་བདེན་པ་རྟོགས་པས་ཁྱད་པར་དུ་བྱས་པའི་ཕྱིར་རོ། །ཡང་ལ་ལ་དག་འཇིག་རྟེན་ནི་མནར་མེད་པ་ནས་ས་བཅུ་པའི་བར་མ་རིག་པ་དང་བཅས་པའི་གང་ཟག་མཐའ་དག་ཡིན་ལ། གང་ཟག་དེ་རྣམས་ལས་ཀུན་བཏགས་ཀྱི་ལྟ་བས་གསར་དུ་བཏགས་པ་ནི་ཐ་སྙད་དུའང་མེད་པས་གཞུང་འདིར་བཤད་པའི་རྣམ་གཞག་རྣམས་ནི་གང་ཟག་དེ་རྣམས་ལ་ཐོག་མེད་ནས་ཡོད་པའི་ལྷན་སྐྱེས་ཀྱི་མ་རིག་པའི་དབང་གིས་གཞི་དང་ལམ་དང་འབྲས་བུ་ཅི་རིགས་པ་རང་གི་ངང་གིས་འབད་མེད་དུ་སྣང་བ་རྣམས་ཏེ། སོ་སྐྱེ་ལ་མི་སྣང་བ་རྣམས་ཀྱང་འཕགས་པ་ལ་སྣང་བས། རྣམ་གཞག་ཐམས་ཅད་རུང་སྙམ་ན་དེའང་མི་རུང་སྟེ། འཕགས་པའི་མཉམ་གཞག་གི་ངོ་ན་ནི་གཞི་ལམ་འབྲས་བུའི་སྤྲོས་པ་ཐམས་ཅད་ཉེ་བར་ཞི་བས་གང་ཡང་མ་གྲུབ་ལ། རྗེས་ཐོབ་ཏུ་གཞི་ལམ་འབྲས་བུའི་རྣམ་གཞག་སྣང་བ་དེ་ཡང་། ལྷན་སྐྱེས་ཀྱི་མ་རིག་པའི་དབང་ཁོ་ནས་སྣང་ན། དེ་དག་སོ་སྐྱེ་ཐ་མལ་པ་ལའང་སྣང་བར་ཐལ་བའི་ཕྱིར་རོ། །གཉིས་པ་ནི་ཁ་ཅིག་དབུ་མ་པ་ལ་ནི། རང་ལུགས་ཀྱི་བདེན་གཉིས་ཀྱི་རྣམ་གཞག་མེད་ལ་གཞུང་འདིར་བཀོད་པའི་དོན་དམ་ནི་འཕགས་པའི་ལུགས་ཏེ། དོན་དམ་ལ་འཕགས་པ་འབའ་ཞིག་ཚད་མ་ཡིན་གྱི་སོ་སྐྱེ་ཚད་མ་མིན་པས་སོ། །ཀུན་རྫོབ་ནི་སོ་སྐྱེའི་ལུགས་ཏེ། ཀུན་རྫོབ་ནི་གཏི་མུག་འབའ་ཞིག་གིས་སྣང་ལ། དེའང་མིག་དག་པ་ལ་རབ་རིབ་ཅན་གྱི་སྐྲ་ཤད་མི་སྣང་བ་བཞིན་དུ་གཏི་མུག་དང་བྲལ་བའི་འཕགས་པ་རྣམས་ལ་མི་སྣང་སྟེ། ཚིག་གསལ་ལས། གང་ཞིག་བརྫུན་པའམ་བརྫུན་པ་མ་ཡིན་པར་འགྱུར་བ་འཕགས་པ་རྣམས་ཀྱིས་ནི་ཅུང་ཟད་ཀྱང་གཟིགས་པ་མ་ཡིན་ནོ། །ཞེས་གསུངས་སོ། །དེས་ན་དོན་དམ་འཕགས་པ་དང་། ཀུན་རྫོབ་སོ་སྐྱེའི་རྗེས་སུ་འབྲངས་ནས་སྨྲས་པ་ཙམ་དུ་ཟད་དེ། འཇུག་འགྲེལ་ལས། དོན་དམ་པ་ནི་དོན་དམ་པ་གཟིགས་པ་རྣམས་ཀྱི་ཁྱད་པར་གྱི་ཡུལ་ཉིད་ཀྱིས་བདག་གི་རང་གི་ངོ་བོ་རྙེད་པ་ཡིན་གྱི་ཞེས་དང་། གཞན་ནི་སོ་སོའི་སྐྱེ་བོ་མ་རིག་པའི་རབ་རིབ་ཀྱི་ལིང་ཐོག་གིས་བློའི་མིག་མ་ལུས་པར་ཁེབས་པ་རྣམས་ཀྱིས་མཐོང་བ་བརྫུན་པའི་སྟོབས་ལས་བདག་གི་ཡོད་པ་རྙེད་པ་ཡིན་ཞེས་དང་། བཞི་འགྲེལ་ལས། གང་གི་ཚེ་འཇིག་རྟེན་པའི་དངོས་པོ་བཤད་པར་འདོད་པ་དེའི་ཚེ་ཕྱི་དང་ནང་གི་དོན་གྱི་དབྱེ་བས་ཕུང་པོ་ལྔ་ཆར་ཡང་འཇིག་རྟེན་པའི་རྟོག་པ་ཚད་མར་བྱས་ཏེ་ཁས་བླང་བར་བྱའོ། །གང་གི་ཚེ་འཇིག་རྟེན་ལས་འདས་པའི་དེ་ཁོ་ན་ཉིད་བཤད་པར་འདོད་པ་དེའི་ཚེ་ཡེ་ཤེས་ལ་ལྟོས་ནས་ཕུང་པོ་ལྔ་ཆར་ཡང་རང་བཞིན་གྱིས་སྟོང་པར་བཤད་པར་བྱའོ། །དེ་ལས་གཞན་དུ་གང་རུང་གཅིག་མི་འདོད་པའི་རྒོལ་བས་ནི་དེ་ཁོ་ན་ཉིད་དང་འཇིག་རྟེན་པའང་བཤད་པར་མི་འགྱུར་ཞེས་དང་། གལ་ཏེ་སེམས་དང་སེམས་ལས་བྱུང་བ་རྣམས་ཡོད་ན་ནི། དེའི་ཚེ་བུམ་པ་དང་སྣམ་བུ་ལ་སོགས་པ་རྣམས་ཀྱང་ཡོད་དེ། འཇིག་རྟེན་མཐའ་དག་ལ་གྲགས་པའི་ཕྱིར་རོ། །ཅི་སྟེ་བུམ་པ་དང་སྣམ་བུ་ལ་སོགས་པ་དེ་རྣམ་པར་དཔྱད་པ་ན་མེད་ན་ནི་དེའི་ཚེ་སེམས་དང་སེམས་ལས་བྱུང་བ་རྣམས་ཀྱང་མེད་པར་འགྱུར་ཏེ། གཉིས་ཀའང་རིགས་པ་དང་བྲལ་བའི་ཕྱིར་རོ། །ཞེས་བཤད་པས་སོ། །ཞེ་ན། དེའང་མི་མཚུངས་ཏེ། འཕགས་པའི་མཉམ་གཞག་གི་དོན་ནི་དོན་དམ་ཡོད་མེད་ཀྱི་སྤྲོས་པ་ཞི་བས་དོན་དམ་གྱི་ཐ་སྙད་མི་འགྲུབ་ལ། ཀུན་རྫོབ་ནི་འཁྲུལ་སྣང་ཡིན་པས་དེའི་ཡུལ་དུ་དོན་དམ་མི་འགྱུར་བས་དོན་དམ་མ་གྲུབ་པའི་སྐྱོན་ཡོད་ཅིང་། ཀུན་རྫོབ་ཀྱང་མ་གྲུབ་པའི་སྐྱོན་ཡོད་དེ། སོ་སོ་སྐྱེ་བོའི་གཏི་མུག་དེས་ཀུན་རྫོབ་དེ་ཀུན་རྫོབ་ཡིན་པར་གྲུབ་བམ་མ་གྲུབ། མ་གྲུབ་ན་ཀུན་རྫོབ་ཡིན་པར་སུས་ཀྱང་མ་གྲུབ་པར་འགྱུར་ཏེ། འཕགས་པ་ལ་ནི་ཁྱེད་ལྟར་ན་ཀུན་རྫོབ་མི་མངའ་བས་མ་གྲུབ་ལ། སོ་སོ་སྐྱེ་བོས་ཀྱང་མ་གྲུབ་པས་སོ། །གྲུབ་ན་སོ་སྐྱེའི་གཏི་མུག་དེས་ཀུན་རྫོབ་དེ་བརྫུན་པ་བསླུ་བའི་ཆོས་ཅན་སྒྱུ་མ་ལྟ་བུར་གྲུབ་པར་ཐལ། དེས་ཀུན་རྫོབ་དེ་ཀུན་རྫོབ་ཡིན་པར་གྲུབ་པའི་ཕྱིར། ཁྱབ་སྟེ། ཚིག་གསལ་དུ་མདོ་དྲངས་པ་ལས། འདི་དག་ནི་བསླུ་བར་བྱེད་པའི་ཆོས་ཅན་ནོ། །འདི་དག་ནི་བརྫུན་པ་སྒྱུ་མ་བྱིས་པ་འབྲིད་པའོ། །ཞེས་གསུངས་པས་སོ། །གསུམ་པ་ནི། ཕྱིས་ཀྱི་དབུ་མ་པ་ཁ་ཅིག་ཐལ་འགྱུར་བའི་ལུགས་ལ་ཀུན་རྫོབ་ཐ་སྙད་དུ་བུམ་པ་དང་སྣམ་བུ་སོགས་ཡོད་མིན་མེད་མིན་དུ་ཁས་ལེན་དགོས་ཏེ། ལུང་ནི། ཡོད་མིན་མེད་མིན་ཡོད་མེད་མིན། །ཞེས་སོགས་མཐའ་བཞིའི་སྤྲོས་པ་བཀག་པའི་ལུང་རྣམས་དང་། རིགས་པ་ནི་ཡོད་ན་རྟག་པར་འགྱུར་ཅིང་། མེད་ན་ཆད་པར་འགྱུར་བའི་ཕྱིར། རྩ་ཤེར་ལས། ཡོད་ཅེས་བྱ་བ་རྟག་པར་ལྟ། །མེད་ཅེས་བྱ་བ་ཆད་པར་འཛིན། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་གསུངས་པས་སོ། །ཞེས་འདོད་དོ། །འདི་ལ་སྒྲུབ་བྱེད་མི་འཐད་པ་དང་། གནོད་བྱེད་ཡོད་པ་གཉིས་ལས། དང་པོ་ལ་མཐའ་བཞིའི་སྤྲོས་པ་བཀག་པའི་ལུང་རྣམས་ནི་དོན་དམ་ལ་དགོངས་པ་ཡིན་གྱི། ཀུན་རྫོབ་ལ་དགོངས་པ་མ་ཡིན་ཏེ། དོན་དམ་སྤྲོས་བྲལ་ཡིན་པའི་ཕྱིར་དང་། ཀུན་རྫོབ་སྤྲོས་བཅས་ཡིན་པའི་ཕྱིར་རོ། །རིགས་པའི་སྒྲུབ་བྱེད་ཀྱང་མི་འཐད་དེ་ཡོད་པ་ཙམ་ལ་རྟག་པས་ཁྱབ་ན། སློབ་དཔོན་འཕགས་པ་ལྷས། རེ་ཞིག་དངོས་གང་ཡོད་ན་ནི། །རྣམ་པར་འཇིག་པའི་གནས་ལ་གནས། །ཞེས་དངོས་པོར་ཡོད་ན་མི་རྟག་པས་ཁྱབ་པར་གསུངས་པ་དང་འགལ་བའི་ཕྱིར་དང་། མེད་པ་ཙམ་ལ་ཆད་པས་ཁྱབ་ན། བདག་མེད་གཉིས་ཀྱང་བདག་ཆད་པར་ཐལ་བའི་ཕྱིར་རོ། །གཞན་ཡང་འདི་ཡོད་ན་འདི་འབྱུང་ཞེས་པའི་རྟེན་འབྲེལ་ཡང་མི་འཐད་པར་འགྱུར་ཏེ། འདི་ཡོད་པ་མི་སྲིད་པའི་ཕྱིར་རོ། །གཉིས་པ་གནོད་བྱེད་ཡོད་པ་ལ་ལུང་གིས་གནོད་དེ། མདོ་ལས། བཅོམ་ལྡན་འདས་ཀྱི་འཇིག་རྟེན་ང་དང་ལྷན་ཅིག་རྩོད་ཀྱི། ང་ནི་འཇིག་རྟེན་དང་ལྷན་ཅིག་མི་རྩོད་དེ། གང་འཇིག་རྟེན་ན་ཡོད་པར་འདོད་པ་དེ་ནི་ངས་ཀྱང་ཡོད་པར་བཞེད་དོ། །གང་འཇིག་རྟེན་ན་མེད་པར་འདོད་པ་དེ་ནི་ང་ཡང་མེད་པར་བཞེད་དོ། །ཞེས་གསུངས་པ་དང་འགལ་ཏེ། འཇིག་རྟེན་ན་ཡོད་མེད་དེ་སྟོན་པས་ཐ་སྙད་དུ་ཡོད་མེད་ལ་བཞེད་པའི་ཕྱིར་རོ། །རིགས་པའི་གནོད་བྱེད་ནི། སྣང་རུང་གི་ཆོས་མ་དམིགས་པ་ལ་མེད་ཅེས་པ་དང་། སྣང་རུང་གི་ཆོས་དམིགས་པ་ལ་ཡོད་ཅེས་པའི་ཐ་སྙད་དེ་འཇིག་རྟེན་གྱི་ཐ་སྙད་དོན་མཐུན་མ་ཡིན་པར་འགྱུར་ཏེ། ཐ་སྙད་དུ་ཡོད་མེད་གང་དུའང་ཁས་མི་བླང་བའི་ཕྱིར་རོ། །གལ་ཏེ་དེ་དག་འཇིག་རྟེན་གྱི་ཐ་སྙད་ཡིན་ཡང་དབུ་མ་པས་ཁས་མི་ལེན་ནོ་སྙམ་ན། སྔར་གྱི་མདོ་དེ་ཉིད་དང་འགལ་ཞིང་། གལ་ཏེ་ཁྱོད་ལ་འཇིག་རྟེན་མི་གནོད་ན། །འཇིག་རྟེན་ཉིད་ལྟོས་འདི་ནི་དགག་པར་གྱིས། །ཞེས་པའང་རང་ལས་ལོག་པར་འགྱུར་རོ། །གྲགས་པ་དང་འགལ་བ་ནི་དབུ་མ་ཐལ་འགྱུར་བ་ཞིག་ལ་ཕྱི་རོལ་ནས་གཞན་ཞིག་གིས་ཁྱོད་ལ་མེ་ཡོད་དམ། ཆུ་ཡོད་དམ་ཞེས་དྲིས་པའི་ཚེ། དེ་དག་ཡོད་ན་ཡོད་ཅེས་དང་། མེད་ན་མེད་ཅེས་སྨྲ་བར་མཐོང་གི མེ་དང་ཆུ་ཡོད་པ་ཡང་མ་ཡིན། མེད་པ་ཡང་མ་ཡིན་ཞེས་སྨྲ་བར་མ་མཐོང་ཞིང་། སྨྲ་ན་ཡང་ཀླན་ཀའི་ཚིག་ཏུ་འགྱུར་གྱི་འཇིག་རྟེན་ན་གྲགས་པའི་དོན་གང་ཡང་མི་འགྲུབ་པའོ། །བཞི་པ་ནི། ཕྱིས་ཀྱི་དབུ་མ་པ་ཁ་ཅིག དངོས་འགལ་གཅིག་རྣམ་བཅད་ལ་ཁེགས་ན་གཅིག་ཤོས་ཡོངས་གཅོད་ལ་གྲུབ་པས། བདེན་པ་གཉིས་ཆར་དུའང་ཡོད་མིན་མེད་མིན་གཞི་གཅིག་ལ་མི་སྲིད་དོ། །དེས་ན་འདི་ནི་ལྷ་སྦྱིན་ནོ་འདི་ནི་མཆོད་སྦྱིན་ནོ་ཞེས་སོགས་གང་ཟག་དང་། འདི་ནི་ལྷ་སྦྱིན་གྱི་རྣ་བའོ། །ཞེས་སོགས་ཆོས་ཀྱི་ཐ་སྙད་ཐམས་ཅད་མིང་གིས་བཏགས་པ་ཙམ་ཡིན་གྱིས། བཏགས་པའི་དོན་དེ་བཙལ་ན་མི་རྙེད་པ་དེ་ཐལ་འགྱུར་པའི་ལུགས་ཐུན་མོང་མ་ཡིན་པ་ཡིན་པས་ཀུན་རྫོབ་ཀྱི་རྣམ་གཞག་ཐམས་ཅད་མིང་གིས་བཏགས་པ་ཙམ་ཡོད་ཀྱི། བཏགས་པའི་དོན་ནི་མེད་དོ་ཞེས་སྨྲའོ། །དེ་ལ་དོན་དམ་གྱི་དབང་དུ་བྱས་ནས་ཡོད་མིན་མེད་མིན་ཁས་མི་ལེན་པ་ནི་འོག་ཏུ་འགོག་ལ་ཀུན་རྫོབ་ཐ་སྙད་ལའང་སྣང་རུང་གི་ཆོས་རྣམས་ལ་ཡོད་མེད་དང་ཡིན་མིན་སོ་སོར་ཕྱེ་དགོས་པ་ནི་སྔར་བཤད་ལྟར་ཡིན་ཅིང་། སྣང་མི་རུང་གི་ཆོས་ལ་དངོས་འགལ་གཅིག་རྣམ་བཅད་ལ་ཁེགས་པས་གཅིག་ཤོས་ཡོངས་གཅོད་ལ་གྲུབ་པའི་ངེས་པ་མེད་དེ། གཞན་དུ་ན་མདུན་གྱི་གཞི་འདིར་ཤ་ཟ་ཡོད་པ་ཡིན་པར་ཐལ། དེ་མེད་པ་མ་ཡིན་པའི་ཕྱིར་རོ། །ཞེས་རང་བཞིན་གྱིས་བསྐལ་པ་དང་། དུ་བ་ལ་སོགས་པའི་གཏན་ཚིགས་མ་མཐོང་བའི་ལ་རྒྱབ་ན་མེ་ཡོད་པར་ཐལ། དེ་ན་དེ་མེད་པ་མ་ཡིན་པའི་ཕྱིར་ཞེས་ཡུལ་གྱིས་བསྐལ་པ་དང་། སང་ཉིན་གོས་སྔོན་པོ་གྱོན་པའི་ལྷ་སྦྱིན་འོང་བར་ཐལ། དེ་མི་འོང་བ་མ་ཡིན་པའི་ཕྱིར། ཞེས་དུས་ཀྱིས་བསྐལ་པ་རྣམས་ལ་ཡོད་མེད་གང་དུ་སྨྲ་ལེགས་པར་སོམས་ཤིག དེ་བཞིན་དུ་མྱུ་གུའི་དུས་ན་ས་བོན་ཡོད་པར་ཐལ། དེ་ན་དེ་མེད་པ་མ་ཡིན་པའི་ཕྱིར་ཞེས་བརྗོད་ན་ལན་ཅི་སྨྲ། འདོད་དོ་ཞེ་ན། རྒྱུ་རྟག་པར་འགྱུར་ཞིང་། མ་གྲུབ་བོ་ཞེ་ན། རྒྱུ་མེད་པར་འགྱུར་ཏེ། འཇུག་པར། གང་ཕྱིར་མྱུ་གུ་ས་བོན་ལས་གཞན་མིན། །དེ་ཕྱིར་མྱུག་ཚེ་ས་བོན་ཞིག་པ་མེད། །གང་ཕྱིར་གཅིག་ཉིད་ཡོད་མིན་དེ་ཕྱིར་ཡང་། །མྱུག་ཚེ་ས་བོན་ཡོད་ཅེས་བརྗོད་མི་བྱ། །ཞེས་གསུངས་པས་སོ། །མིང་གིས་བཏགས་པའི་དོན་བཙལ་བའི་ཚེ་ན་མི་རྙེད་ཅེས་པ་ནི། དོན་དམ་དུ་མི་རྙེད་པ་ལ་བྱེད་དམ། ཐ་སྙད་དུ་མི་རྙེད་པ་ལ་བྱེད། དང་པོ་ལྟར་ན། དེའི་ཚེ་འདོགས་བྱེད་ཀྱི་མིང་ཡང་མི་རྙེད་པས་མིང་གིས་བཏགས་པ་ཙམ་ཡོད་ལ། བཏགས་པའི་དོན་མེད་ཅེས་པ་འགལ་ཏེ། རིན་ཆེན་ཕྲེང་བ་ལས། གཟུགས་ཀྱི་དངོས་པོ་མིང་ཙམ་ཕྱིར། །ནམ་མཁའ་ཡང་ནི་མིང་ཙམ་མོ། །འབྱུང་མེད་གཟུགས་ལྟ་ག་ལ་ཡོད། །དེ་ཕྱིར་མིང་ཙམ་ཉིད་ཀྱང་མེད། །ཅེས་གསུངས་པའི་ཕྱིར་རོ། །ཕྱི་མ་ལྟར་ན། ཐ་སྙད་དུ་འདོགས་བྱེད་ཀྱི་མིང་དང་མིང་གིས་བཏགས་པར་བྱ་བའི་དོན་གཉིས་པོ་ཕན་ཚུན་ལྟོས་ནས་གྲུབ་པ་མ་ཡིན་པར་ཐལ། ཐ་སྙད་དུ་འདོགས་བྱེད་ཀྱི་མིང་ཡོད་ཅིང་མིང་གིས་བཏགས་པར་བྱ་བའི་དོན་མེད་པའི་ཕྱིར། འདོད་ན། ལས་དང་བྱེད་པ་པོ་ཕན་ཚུན་ལྟོས་ནས་གྲུབ་པ་མ་ཡིན་པར་ཐལ། འདོད་པ་དེའི་ཕྱིར། ཁྱབ་པ་གྲུབ་ཅིང་འདོད་མི་ནུས་ཏེ། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པོ་དེ་ཉིད་ལ། །བརྟེན་ནས་འབྱུང་བ་མ་གཏོགས་པར། །འགྲུབ་པའི་རྒྱུ་ནི་མ་མཐོང་ངོ་། །ཞེས་གསུངས་པ་དེ་ཉིད། འདོགས་པོ་གདགས་བྱ་ལ་ལྟོས་ཤིང་། །གདགས་བྱ་འདོགས་པོ་དེ་ཉིད་ལ། །བརྟེན་ནས་འབྱུང་བ་མ་གཏོགས་པར། །འགྲུབ་པའི་རྒྱུ་ནི་མ་མཐོང་ངོ་། །ཞེས་སོགས་ཕན་ཚུན་ལྟོས་གྲུབ་ཀྱི་ཆོས་ཐམས་ཅད་ལ་སྦྱར་བར་ཀླུ་སྒྲུབ་བཞེད་པའི་ཕྱིར། གཞན་ཡང་ཤེས་བྱེད་ཀྱི་བློ་དང་ཤེས་པར་བྱ་བའི་དོན་གཉིས་ཕན་ཚུན་ལྟོས་ནས་གྲུབ་པ་མ་ཡིན་པར་ཐལ། སྔར་གྱི་འདོད་པ་དེ་ཉིད་ཀྱི་ཕྱིར། ཁྱབ་ཅིང་འདོད་མི་ནུས་ཏེ། བྱང་ཆུབ་སེམས་འགྲེལ་ལས། ཤེས་པས་ཤེས་བྱ་རྟོགས་པ་སྟེ། །ཤེས་བྱ་མེད་པར་ཤེས་པ་མེད། །དེ་ལྟ་ན་ནི་རིག་བྱ་དང་། །རིག་བྱེད་མེད་པ་ཅིས་མི་འདོད། །ཅེས་གསུངས་པ་དེ་ཉིད། འདོགས་པས་གདགས་བྱ་རྟོགས་པ་སྟེ། །གདགས་བྱ་མེད་པར་འདོགས་པ་མེད། །དེ་ལྟ་ན་ནི་གདགས་བྱ་དང་། །འདོགས་བྱེད་མེད་པ་ཅིས་མི་འདོད། །ཅེས་སོགས་བྱ་བྱེད་ཐམས་ཅད་ལ་མཚུངས་པར་བཞེད་པའི་ཕྱིར་རོ། །རི་དྭགས་ཀྱི་རྒྱལ་པོ་སེང་གེ་ལ་བཏགས་པའི་མིང་དང་། བྲམ་ཟེའི་ཁྱེའུ་སེང་གེ་ཞེས་བཏགས་པའི་མིང་གཉིས་དངོས་མིང་དང་བཏགས་མིང་གི་ཁྱད་པར་མེད་པར་ཐལ། དེ་གཉིས་ཀྱིས་བཏགས་པའི་དོན་སེང་གེ་ཡིན་མིན་གྱི་ཁྱད་པར་མེད་པའི་ཕྱིར། ས་བོན་ལས་མྱུ་གུ་སྐྱེ་བ་དེ་ས་བོན་ལས་མྱུ་གུ་སྐྱེ་ཞེས་མིང་གིས་བཏགས་པའི་དོན་ཡིན་ནམ་མིན། ཡིན་ན་ས་བོན་ལས་མྱུ་གུ་སྐྱེ་བ་ཐ་སྙད་དུ་མེད་པར་འགྱུར། མིན་ན་དེས་ས་བོན་ལས་མྱུ་གུ་སྐྱེའོ་ཞེས་རྟོག་པས་བཏགས་པའི་དོན་མ་ཡིན་པར་འགྱུར་ཏེ། མིང་དང་རྟོག་པ་གཉིས་ཀྱིས་བཏགས་པའི་དོན་རྣམ་པ་ཀུན་ཏུ་མཚུངས་པའི་ཕྱིར་རོ། །འདོད་ན་ཆོས་ཐམས་ཅད་རྟོག་པས་བཏགས་པ་ཙམ་དུ་ཁས་བླངས་པ་དང་འགལ་ལོ། །མདོར་ན་ཐ་སྙད་དུ་མིང་ཡོད་ཅིང་། མིང་གིས་བཏགས་པའི་དོན་མེད་པ་ནི་ཀླུ་སྒྲུབ་ཡབ་སྲས་ཀྱི་ལུགས་ལས་ཕྱི་རོལ་ཏུ་གྱུར་པ་སྟེ། ཡབ་སྲས་ཀྱིས་གདགས་བྱ་འདོགས་བྱེད། ལས་དང་བྱེད་པ་པོ་ཉེ་བར་བླང་བྱ་དང་ཉེ་བར་ལེན་པ་པོ་སོགས་བྱ་བྱེད་ཀྱི་ཐ་སྙད་ཐམས་ཅད་ངོ་བོ་ཉིད་ཀྱིས་མེད་ཀྱང་ཕན་ཚུན་ལྟོས་ནས་གྲུབ་པར་གསུངས་པའི་ཕྱིར་ཏེ། བྱེད་པ་པོ་དང་ལས་དག་གིས། །དངོས་པོ་ལྷག་མའང་ཤེས་པར་བྱ། །ཞེས་པའི་འགྲེལ་པ་ཚིག་གསལ་ལས། ཤེས་རབ་ཅན་གྱིས་ཞེས་བྱ་བ་ནི་ཚིག་གི་ལྷག་མའོ། །ཤེས་རབ་ཅན་གྱིས་ལས་དང་བྱེད་པ་པོ་དང་། ཉེ་བར་བླང་པ་དང་ཉེ་བར་ལེན་པ་པོ་ལས་ཐ་དད་པ་དངོས་པོ་གཞན་གང་དག་བསྐྱེད་བྱ་སྐྱེད་བྱེད་དང་། འགྲོ་བ་དང་། འགྲོ་བ་པོ་དང་། བལྟ་བྱ་དང་ལྟ་བྱེད་དང་། མཚན་ཉིད་དང་མཚན་གཞི་དང་། འབྱུང་བར་བྱ་བ་དང་འབྱུང་བར་བྱེད་པ་དང་། དེ་བཞིན་དུ་ཡན་ལག་དང་ཡན་ལག་ཅན་དང་། ཡོན་ཏན་དང་ཡོན་ཏན་ཅན་དང་། ཚད་མ་དང་གཞལ་བྱ་ལ་སོགས་པ་དངོས་པོ་མ་ལུས་པ་དེ་དག་ལས་དང་བྱེད་པ་པོའི་རྣམ་པར་དཔྱད་པས་ངོ་བོ་ཉིད་ཀྱིས་ཡོད་པ་དགག་སྟེ་ཕན་ཚུན་ལྟོས་པའི་གྲུབ་པ་ཉིད་ཡིན་པར་ཤེས་བྱའོ། །དེ་དག་རྣམ་པར་དཔྱད་པའང་དབུ་མ་འཇུག་པ་ལས་ངེས་པར་བྱའོ། །ཞེས་གསུངས་པས་སོ། །གལ་ཏེ་མཐར་ཐུག་དཔྱོད་པའི་རིགས་པས་བཙལ་བའི་ཚེ་མི་རྙེད་པ་ལ་བྱེད་པ་ཡིན་ན་ནི་དེའི་ཚེ་ཆོས་ཐམས་ཅད་དེ་ལྟར་ཡིན་པས། མཛོད་ཕུག་ན་དར་གྱི་ཁུག་མའི་ནང་དུ་གཏུམས་པའི་དངོས་པོ་རིལ་རིལ་གཅིག་ཡོད་པ་མཐར་ཐུག་དཔྱོད་པའི་རིགས་པས་བཙལ་ན་མི་རྙེད་པ་དེ་དབུ་མ་ཐལ་འགྱུར་པའི་ལུགས་ཐུན་མོང་མ་ཡིན་པ་ཡིན་ཀྱང་གཞན་སུས་ཀྱང་མ་རྙེད་ཅེས་པ་དང་མཚུངས་པར་སྣང་ངོ་། །ཡང་འཇུག་པའི་ཊཱི་ཀར། ས་བོན་ལས་མྱུ་གུ་སྐྱེ་ཞེས་མིང་གིས་བཏགས་པའི་དོན་བདག་ལས་སྐྱེ་བའམ་གཞན་ལས་སྐྱེ་ཞེས་ཚོལ་བ་ན་དེ་ཁོ་ན་ཉིད་ལ་དཔྱོད་པར་འཇོག་གོ་ཞེས་པ་ལྟར་ན་མཐར་ཐུག་དཔྱོད་པའི་རིག་ངོར་རྙེད་མ་རྙེད་ལ་བཞག་པར་སྣང་ཞིང་ཐལ་འགྱུར་བའི་ལུགས་ཐུན་མོང་མ་ཡིན་པར་འདོད་པ་ལྟར་ན། ཐ་སྙད་པའི་ཚད་མས་རྙེད་མ་རྙེད་ལ་བཞག་པར་སྣང་སྟེ། རྟོག་པས་བཏགས་པའི་གྲུབ་མཐའ་ལ་བྱེའུའི་མཆུ་བཞིན་དུ་གར་བཙུགས་འདིར་བཙུགས་མེད་པ་རྟེན་འབྲེལ་གྱི་ཆོས་ཉིད་དོ། །འདི་དག་གི་འཁྲུལ་གཞི་ནི་རང་རྒྱུད་པས་ཐ་སྙད་དུ་གཞན་སྐྱེ་ཁས་བླངས་པས་མྱུ་གུ་སྐྱེ་ཞེས་པའི་དོན་མཐའ་བཞིར་དཔྱད་པའི་ཚེ་གཞན་ལས་སྐྱེ་བར་ཁས་བླངས་པ་ཡིན་ལ་དེའི་ཚེ་མྱུ་གུ་སྐྱེ་ཞེས་མིང་གིས་བཏགས་པའི་དོན་མཐར་ཐུག་དཔྱོད་པའི་རིགས་པས་དཔྱད་པའི་ཚེ་ཁས་བླངས་འདུག་པས་དེ་ནི་མི་རྙེད་པ་ཐལ་འགྱུར་བའི་ལུགས་ཐུན་མོང་མ་ཡིན་པར་སྨྲས་པར་སྣང་ངོ་། །འོན་ཀྱང་གནད་མ་རྟོགས་པ་སྟེ། མཐའ་བཞི་རིགས་པས་དཔྱད་པ་ནི་རང་རྒྱུད་པས་ཀྱང་རྡོ་རྗེ་གཟེགས་མའི་རིགས་པ་ཡིན་པས་མཐར་ཐུག་དཔྱོད་པའི་རིགས་པར་ཁས་བླངས་ལ་དེའི་ཚེ་གཞན་སྐྱེ་ཁས་མི་ལེན་ཏེ། གཞན་སྐྱེ་ལ་དགག་བྱ་དོན་དམ་གྱི་ཁྱད་པར་སྦྱར་བའི་དོན་ཡང་འདི་ཡིན་པའི་ཕྱིར་རོ། །མཐའ་བཞིར་མ་དཔྱད་པའི་ཚེ་གཞན་སྐྱེ་ཁས་བླངས་ཀྱང་མཐའ་བཞིའི་ནང་ཚན་གྱི་གཞན་སྐྱེ་ཡིན་མི་དགོས་ཏེ། གཅིག་དང་དུ་མ་ཁས་བླངས་ཀྱང་། གཅིག་དུ་བྲལ་གྱི་གཏན་ཚིགས་དཔྱད་པའི་གནས་སྐབས་ཀྱི་གཅིག་དང་དུ་མ་ཡིན་མི་དགོས་པ་བཞིན་ནོ་སྙམ་དུ་སེམས་སོ། །ཐལ་འགྱུར་བས་ནི་གཞན་སྐྱེ་ཡིན་ན་མཐའ་བཞིའི་ནང་ཚན་གྱི་གཞན་སྐྱེ་ལས་མ་འདས་ཏེ་བདག་སྐྱེ་བཞིན་ནོ། །དེས་ན་ཐ་སྙད་དུ་མེད་པར་འདོད་དོ། །གཞན་ཡང་འདི་ལ་བརྗོད་པར་བྱ་བ་མང་དུ་ཡོད་མོད་ཀྱི་རེ་ཞིག་བཞག་གོ །འདི་དག་ནི་རང་ལྟ་ལ་ཆགས་ཤིང་གཞན་ལྟ་ལ་སྡང་བས་བྱས་པ་མ་ཡིན་གྱི་རྟོག་པས་རང་དགར་སྦྱར་བའི་གྲུབ་མཐའ་རེ་རེ་མཆོག་ཏུ་བཟུང་ནས་གཞུང་གི་དོན་ཐམས་ཅད་སྒྲིབ་པར་མཐོང་བས་གནད་འདི་དང་འདི་ཙམ་ཞིག་ཡོད་དོ། །རིན་ཆེན་ཕྲེང་བ་སོགས་དབུ་མའི་གཞུང་རྣམས་ལས། ཆོས་ཐམས་ཅད་རྣམ་པར་རྟོག་པས་བཏགས་པ་ཙམ་དང་། མིང་གིས་བཏགས་པ་ཙམ་དུ་གསུངས་པའི་ཙམ་སྒྲས་བཏགས་པར་བྱ་བའི་དོན་གཅོད་པར་འདོད་པ་ནི་ཕན་ཚུན་ལྟོས་གྲུབ་ཀྱི་དོན་མ་ཤེས་པ་ཡིན་ལ། འོ་ན་གང་ཞིག་གཅོད་ཅེ་ན་རྣམ་དཔྱོད་དང་ལྡན་པ་དག་རྣ་བ་ཀླགས་ཏེ་ཉོན་ཅིག གང་ཞེ་ན་དངོས་པོར་སྨྲ་བས་བུམ་པ་ཞེས་མིང་གིས་བཏགས་པའི་ཚེ་བློ་ལ་འདོགས་བྱེད་དང་གདགས་བྱ་སྣང་བ་ནི་སྒྲ་སྤྱི་དང་དོན་སྤྱི་ཡིན་པས་དངོས་ཡུལ་དངོས་པོ་མེད་ལ། ཞེན་ཡུལ་སྒྲ་རང་མཚན་པ་དང་དོན་རང་མཚན་པ་རྫས་སུ་གྲུབ་པར་འདོད་པའི་ཕྱི་མ་ཙམ་སྒྲས་བཅད་ནས་བློ་སྣང་ཙམ་གྱི་གདགས་བྱ་འདོགས་བྱེད་དང་། ཤེས་བྱ་ཤེས་བྱེད་སོགས་ཀྱི་རྣམ་བཞག་འབའ་ཞིག་ཐ་སྙད་དུ་ཁས་ལེན་པ་ནི་དབུ་མ་པའི་ལུགས་ཐུན་མོང་མ་ཡིན་པ་སྟེ། དེང་སང་ཁོ་བོ་འབའ་ཞིག་གི་སྤྱོད་ཡུལ་ལོ་ཞེས་པའི་སྒོ་ཙམ་ཞིག་བསྟན་པ་ལ་གུས་པ་དང་སེམས་ཅན་ལ་སྙིང་བརྩེ་བའི་བསམ་པས་བཤད་པའོ། །གསུམ་པ་གནད་ཀྱི་དོན་ངོས་གཟུང་བ་ནི་དབུ་མ་པ་ལ་ཀུན་རྫོབ་ཀྱི་འདོད་ཚུལ་སྔར་བཤད་པ་ལྟར་ལྔ་ཡོད་ཀྱང་འདིར་གཙོ་བོར་གྱུར་པ་རྣལ་འབྱོར་སྤྱོད་པའི་དབུ་མ་པ་དང་། འཇིག་རྟེན་གྲགས་སྡེ་སྤྱོད་པའི་དབུ་མ་པའི་ལུགས་གཉིས་བརྗོད་ན། ལུགས་གཉིས་མདོ་ལས་གསུངས་པའི་ཚུལ། ཀླུ་སྒྲུབ་ཀྱིས་དགོངས་པ་སོ་སོར་བཀྲལ་བའི་ཚུལ། གདུལ་བྱའི་ངོས་ནས་གཉིས་སུ་འགྱུར་བའི་ཚུལ། ཐ་སྙད་ཀྱི་མཚམས་ངོས་གཟུང་ཞིང་སློབ་དཔོན་གཉིས་ཀྱིས་བཀྲལ་ཚུལ་སོ་སོར་བཤད་པ་དང་རྣམ་པ་བཞིས་རྟོགས་པར་བྱའོ། །དང་པོ་ནི། མདོ་སྡེ་ས་བཅུ་པ་ལས། ཀྱེ་རྒྱལ་བའི་སྲས་དག ཁམས་གསུམ་པོ་འདི་དག་ནི་སེམས་ཙམ་མོ། །ཞེས་དང་། ལང་ཀར་གཤེགས་པ་ལས། ཕྱི་རོལ་སྣང་བ་ཡོད་མེད་དེ། །སེམས་ནི་སྣ་ཚོགས་རྣམས་སུ་སྣང་། །ལུས་དང་ལོངས་སྤྱོད་གནས་འདྲ་བ། །སེམས་ཙམ་དུ་ནི་ངས་བཤད་དོ། །ཞེས་སོགས་སྣང་བ་སེམས་སུ་གསུངས་པའི་ལུང་མང་དུ་ཡོད་ཅིང་འཇིག་རྟེན་ང་དང་ལྷན་ཅིག་རྩོད་ཀྱི་ང་ནི་འཇིག་རྟེན་དང་ལྷན་ཅིག་མི་རྩོད་དོ། །ཞེས་སོགས་ཐ་སྙད་འཇིག་རྟེན་དང་མཐུན་པར་གསུངས་པའི་ལུང་ཡང་མང་དུ་ཡོད་དོ། །གཉིས་པ་ནི། དེ་བཞིན་དུ་མགོན་པོ་ཀླུ་སྒྲུབ་ཀྱིས་ཀྱང་སེམས་ཀྱི་རྡོ་རྗེའི་བསྟོད་པ་ལས། སེམས་མཐོང་བ་ནི་བྱང་ཆུབ་སྟེ། །སེམས་ནི་འགྲོ་བ་ལྔ་པོ་ཡིན། །བདེ་དང་སྡུག་བསྔལ་མཚན་ཉིད་དག །སེམས་ལས་མ་གཏོགས་ཅུང་ཟད་མེད། །འགྲོ་བ་ཀུན་གྱིས་མཐོང་བ་རྣམས། །ཅུང་ཟད་བསྒོམ་པའི་རྣམ་པ་ཡང་། །དེ་ཀུན་སེམས་ཀྱི་དྲྭ་བ་རུ། །དེ་ཉིད་གསུངས་པས་བསྟན་པ་ཡིན། །ཞེས་པ་དང་། རིགས་པ་དྲུག་ཅུ་པ་ལས། འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་ཡང་དག་འདུ། །དེ་ཤེས་པས་ནི་འབྲལ་འགྱུར་ན། །ལོག་པར་རྣམ་བརྟགས་མ་ཡིན་ནམ། །ཞེས་དང་། རིན་ཆེན་ཕྲེང་བ་ལས། ས་དང་ཆུ་དང་མེ་དང་རླུང་། །རིང་ཐུང་ཕྲ་དང་སྦོམ་ཉིད་དང་། །དགེ་སོགས་ཉིད་ནི་རྣམ་ཤེས་སུ། །འགག་པར་འགྱུར་ཞེས་ཐུབ་པས་གསུངས། །རྣམ་ཤེས་བསྟན་མེད་མཐའ་ཡས་པ། །ཀུན་ཏུ་བདག་པོ་དེ་ལ་ནི། །ས་དང་ཆུ་དང་མེ་དང་ནི། །རླུང་གིས་གནས་ཐོབ་འགྱུར་མ་ཡིན། །འདིར་ནི་རིང་དང་ཐུང་བ་དང་། །ཕྲ་སྦོམ་དགེ་དང་མི་དགེ་དང་། །འདིར་ནི་མིང་དང་གཟུགས་དག་ཀྱང་། །མ་ལུས་པར་ནི་འགག་པར་འགྱུར། །གང་མ་ཤེས་ཕྱིར་རྣམ་ཤེས་ལས། །སྔོན་ཆད་བྱུང་བ་དེ་ཀུན་ནི། །དེ་ཤེས་ཕྱིར་ན་རྣམ་ཤེས་སུ། །ཕྱིས་ནི་དེ་ལྟར་འགག་པར་འགྱུར། །ཞེས་སོགས་སྣང་བ་སེམས་སུ་གསུངས་པའང་མང་དུ་ཡོད་ཅིང་། སྟོང་ཉིད་བདུན་ཅུ་པ་ལས། གནས་པའམ་སྐྱེ་འཇིག་ཡོད་མེད་དམ། །མཉམ་པའམ་དམན་དང་ཁྱད་པར་ཅན། །སངས་རྒྱས་འཇིག་རྟེན་བསྙད་དབང་གིས། །གསུང་གི་ཡང་དག་དབང་གིས་མིན། །ཞེས་སོགས་ཐ་སྙད་འཇིག་རྟེན་དང་མཐུན་པར་གསུངས་པའང་མང་དུ་ཡོད་པ་རྣམས་ལུགས་གཉིས་ཀྱི་སོ་སོར་འགྲེལ་བའོ། །གསུམ་པ་ནི་གདུལ་བྱ་ལའང་ཐོག་མར་སྣང་བ་སེམས་སུ་མ་བསྒྲུབས་ན་དེ་ཁོ་ན་ཉིད་རྟོགས་མི་ནུས་ཤིང་། ཐ་སྙད་དུ་སྣང་བ་སེམས་སུ་བསྒྲུབ་པའི་སྟེང་དུ་དེ་ཁོ་ན་ཉིད་བདེ་བླག་ཏུ་གཏན་ལ་དབབ་ནུས་པའི་ཚེ་སྔ་མའི་ཐོས་བསམ་གྱི་བག་ཆགས་ཀྱི་དབང་གིས་བྱུང་བའམ། ཚེ་འདིར་རྣམ་རིག་པའི་གྲུབ་མཐའ་སྔོན་དུ་སོང་བ་ལ་དབུ་མའི་ལྟ་བ་སྟོན་ཚུལ་འཕགས་པ་ལྷས་གསུངས་ལ་དེ་ལ་ཐོག་མར་སྣང་བ་ཕྱི་རོལ་གྱི་དོན་དུ་ཕབ་ནས་དབུ་མའི་ལྟ་བ་བསྟན་པ་མ་ཡིན་གྱི་སྔར་སྣང་བ་སེམས་སུ་འདོད་པ་དེ་ཉིད་ཁོ་རང་གི་ལུགས་ཀྱི་དོན་དམ་དུ་འདོད་ཀྱང་དེ་ཉིད་དོན་དམ་རྟོགས་པའི་རྟེན་དུ་བྱས་ནས་གཅིག་ཏུ་བྲལ་རྟགས་ཀྱིས་བདེན་མེད་དུ་བསྒྲུབ་པ་ལྟ་བུའང་ཡོད་པས་གདུལ་བྱ་དེ་དག་གིས་དབང་དུ་བྱས་ནས་ལུགས་དང་པོ་དགོས་སོ། །ཡང་གདུལ་བྱ་འགའ་ཞིག་གིས་སྣང་བ་འདི་འཇིག་རྟེན་ན་ཇི་ལྟར་གྲགས་པ་ལྟར་ཁས་བླངས་ན་དེ་ཁོ་ན་ཉིད་བདེ་བླག་ཏུ་བསྟན་ནུས་ཤིང་། གཞན་དུ་ན་སྣང་བ་ཉིད་ལ་ལོག་རྟོག་སྐྱེས་ནས་དེ་ཁོ་ན་ཉིད་བདེ་བླག་ཏུ་རྟོགས་མི་ནུས་པའང་ཡོད་པས་དེའི་དབང་དུ་བྱས་ནས་ལུགས་ཕྱི་མ་སྟེ། སངས་རྒྱས་ཀྱི་མདོ་དང་། འཕགས་མཆོག་ཀླུ་སྒྲུབ་ཀྱིས་གདུལ་བྱ་བཀྲི་ཚུལ་ལ་དགོངས་ནས་གཉིས་སུ་གསུངས་པའང་གནད་དུ་ཤེས་པར་བྱའོ། །བཞི་པ་ནི་འོ་ན་ཐ་སྙད་དུ་སྣང་བ་སེམས་ཞེས་དང་། ཐ་སྙད་དུ་སྣང་བ་ཕྱི་དོན་ཞེས་པའི་ཐ་སྙད་ཀྱི་མཚམས་ཇི་ལྟ་བུ་སྙམ་ན། འདི་ནི་གསུང་རབ་འགྲེལ་ཚུལ་ལ་གནད་དུ་ཆེ་བར་སྣང་བས་བཤད་པར་བྱ་སྟེ། རྣལ་འབྱོར་སྤྱོད་པའི་དབུ་མ་པ་དག་གིས་ནི་གསུང་རབ་ལས་མྱུ་གུ་ལྟ་བུའི་སྣང་བ་གཅིག་ཉིད་ལ་ཕྱི་རོལ་གྱི་དོན་ཡིན་པར་བཤད་པའི་སྐབས་དང་། སེམས་ཡིན་པར་བཤད་པའི་སྐབས་དང་། དེ་དག་ཡིན་མིན་གྱི་སྤྲོས་པ་དང་བྲལ་བར་བཤད་པའི་སྐབས་གསུམ་ཡོད་པ་ལས། དང་པོ་ནི་འཇིག་རྟེན་མཐུན་འཇུག་དང་། གཉིས་པ་ནི་ཐ་སྙད་དཔྱོད་པའི་རིགས་པ་དང་། གསུམ་པ་ནི་དོན་དམ་དཔྱོད་པའི་རིགས་པ་ལ་དགོངས་ནས་གསུངས་སོ། །དེ་ལ་དང་པོ་ནི། སངས་རྒྱས་རྣམས་ཀྱི་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་པའི་སྐབས་ཀྱི་གསུང་རབ་ཀྱི་བརྗོད་བྱ་འཇིག་རྟེན་ཀུན་རྫོབ་ཀྱི་བདེན་པ་ཡིན་ཀྱང་། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་པའི་སྐབས་ཀྱི་ཐ་སྙད་ཀྱི་བདེན་པ་ནི་མ་ཡིན་ཏེ། དེ་ཁོ་ན་ཉིད་ལ་རེ་ཞིག་བློ་སྦྱར་མི་ནུས་པ་རྣམས་ལ་བསོད་ནམས་ཆ་མཐུན་དགེ་སྡིག་གི་བླང་དོར་བསྟན་པའི་རྟེན་དུ་གྱུར་པའི་ཐ་སྙད་ཙམ་ཡིན་པའི་ཕྱིར། གཉིས་པ་ནི་དེ་གཉིས་ཆར་ཡིན་ཏེ། གསུང་རབ་ཀྱི་བརྗོད་བྱ་བདེན་པ་གཉིས་ལས་མ་འདས་ཤིང་། དེ་ཁོ་ན་ཉིད་རྟོགས་པ་ལ་ཚུལ་གཉིས་ཀྱི་ཤིང་རྟ་ཞོན་དགོས་པར་གསུངས་པའི་ཕྱིར་རོ། །གསུམ་པ་ནི་ཐ་སྙད་བདེན་པའི་ཐབས་ལས་བྱུང་བའི་དོན་དམ་གྱི་སྐབས་ཉིད་ཡིན་ཏེ། འདི་ལ་ལུགས་སྔ་ཕྱི་གཉིས་ཆར་ལ་ཁྱད་པར་མེད་དོ། །དེས་ན་འཇུག་ཚུལ་གསུམ་པོ་འདིའི་སྒོ་ནས་གསུང་རབ་ཀྱི་དོན་ལ་འཇུག་པ་ནི་འཇུག་ཚུལ་རྨད་དུ་བྱུང་བ་ཞིག་འདུག་གོ །ཡང་སློབ་དཔོན་ཟླ་བའི་བཞེད་པས་གསུང་རབ་ཀྱི་བརྗོད་བྱ་བདེན་པ་གཉིས་སུ་ཕྱེ་བའི་ཀུན་རྫོབ་ཀྱི་བདེན་པ་ནི་འཇིག་རྟེན་ཀུན་རྫོབ་ཀྱི་བདེན་པ་ཡིན་གྱི་ཀུན་རྫོབ་བདེན་པ་ཙམ་ནི་མ་ཡིན་ཏེ། ལོག་པའི་ཀུན་རྫོབ་ནི། ཐ་སྙད་བདེན་པ་ཐབས་སུ་གྱུར་པ་དང་། །ཞེས་པའི་ཐབས་སུ་མི་རུང་བས་གསུང་རབ་ཀྱི་བརྗོད་བྱ་མ་ཡིན་པའི་ཕྱིར་དེས་ན་འཇིག་རྟེན་ཀུན་རྫོབ་ཀྱི་བདེན་པ་དང་། དོན་དམ་བདེན་པ་རྟོགས་པའི་དངོས་བརྟེན་དུ་གྱུར་པའི་ཐ་སྙད་ཀྱི་བདེན་པ་གཉིས་དོན་གཅིག་ཏེ། ས་བོན་ལས་མྱུ་གུ་སྐྱེ་ཞེས་པ་ལྟ་བུ་འཇིག་རྟེན་ལྷན་སྐྱེས་ཀྱི་བློ་ངོར་སྣང་ཞིང་སྣང་བ་ལྟར་ཐ་སྙད་བྱེད་པས་འཇིག་རྟེན་ཀུན་རྫོབ་ཀྱི་བདེན་པའང་ཡིན་ལ། སྐྱེ་ཚུལ་ཉིད་ལ་མཐའ་བཞིར་དཔྱད་པའི་ཚེ་སྐྱེ་བ་ཉིད་ཀྱང་མི་རྙེད་པས་དོན་དམ་རྟོགས་པའི་དངོས་བརྟེན་དུ་གྱུར་པའི་ཐ་སྙད་བདེན་པའང་ཡིན་པའི་ཕྱིར་རོ། །དེས་ན་འཇིག་རྟེན་གྱི་ཐ་སྙད་དེ་དང་དེ་ཉིད་རིགས་པས་བཙལ་བའི་ཚེ་མ་རྙེད་པའི་བར་དུ་དེ་ཉིད་སེམས་སུ་བསྒྲུབ་པ་དོན་མེད་དོ་སྙམ་ནས་སྣང་བ་སེམས་སུ་གསུངས་པའི་ལུང་རྣམས་དྲང་དོན་དུ་གཏན་ལ་དབབ་པར་མཛད་དེ། ལུགས་འདིའང་གདུལ་བྱའི་རིགས་འགའ་ཞིག་ལ་ལྟོས་ནས་དེ་ཁོ་ན་ཉིད་ལ་བཀྲི་ཚུལ་དང་། གསུང་རབ་འཆད་ཚུལ་རྨད་དུ་བྱུང་བ་ཞིག་སྣང་སྟེ་རྒྱས་པར་འཆད་པར་འགྱུར་རོ། །མདོར་ན་ཞི་བ་འཚོ་དཔོན་སློབ་ཀྱིས་འཇིག་རྟེན་ཀུན་རྫོབ་ཀྱི་བདེན་པ་ལ་འཇིག་རྟེན་མཐུན་འཇུག་དང་། དོན་དམ་རྟོགས་པའི་དངོས་བརྟེན་གྱི་ཐ་སྙད་བདེན་པ་གཉིས་སུ་ཕྱེ་ནས་ཕྱི་མའི་སྐབས་སུ་སྣང་བ་སེམས་ཡིན་པར་བཞེད་ལ། སློབ་དཔོན་ཟླ་བས་སྤྱིར་ཀུན་རྫོབ་བདེན་པ་ལ་ཡང་ལོག་གཉིས་སུ་ཕྱེ་ཡང་། འཇིག་རྟེན་ཀུན་རྫོབ་བདེན་པ་ནི་ཡང་དག་ཀུན་རྫོབ་ཉིད་ཡིན་པས་དེ་དང་། འཇིག་རྟེན་མཐུན་འཇུག་དང་། དོན་དམ་རྟོགས་པའི་དངོས་བརྟེན་དུ་གྱུར་པའི་ཐ་སྙད་བདེན་པ་གསུམ་ཀ་དོན་གཅིག་ལ་འདུས་པ་ནི། ས་བོན་ལས་མྱུ་གུ་སྐྱེ་བ་ལྟ་བུ་ཡིན་ལ་འཇིག་རྟེན་མཐུན་འཇུག་ཡིན་ན་གཞན་གཉིས་པོ་ཡིན་པས་ནི་མ་ཁྱབ་སྟེ། དངོས་པོ་རང་བཞིན་གྱིས་ཡོད་པར་གསུངས་པའི་སྐབས་དེ་འཇིག་རྟེན་མཐུན་འཇུག་ལ་དགོངས་པར་གསུངས་པའི་ཕྱིར་རོ། །ཞེས་བཞེད་དོ། །བློ་གྲོས་གསལ་བ་དང་ལྡན་པ་དག་རྣམ་དབྱེ་འདི་ཙམ་ཞིག་གིས་མིག་ཕྱེ་ནས་དབུ་མའི་གཞུང་ལུགས་ཚད་ལྡན་རྣམས་ལ་ཞིབ་ཏུ་དཔྱད་ན། ཐོག་མར་གོ་བ་བ་ནེ་བུ་ནེ་སྐྱེ་ཞིང་། དེར་རྗེས་ངེས་ཤེས་གསལ་ལེ་ཧྲིག་གེ་སྐྱེ་བར་འགྱུར་བ་ནི་རྫོགས་པའི་སངས་རྒྱས་ཀྱི་ས་བོན་དུ་གྱུར་བའི་ཐོས་བསམ་གྱི་ཤེས་པ་ཡིན་པས་སྐལ་པ་དང་ལྡན་པ་དག་འབད་པར་བྱའོ། །གཉིས་པ་དེ་ལ་རྒྱུན་བསྒྲུབ་པ་ནི་རང་སྡེ་དངོས་པོར་སྨྲ་བ་དག་གིས་རྒྱུན་རང་གི་ངོ་བོ་བཏགས་ཡོད་དུ་འདོད་ཀྱང་གདགས་གཞི་སྐད་ཅིག་སྔ་ཕྱི་ངོ་བོ་ཉིད་ཀྱིས་གྲུབ་པའི་གཞན་ཡིན་པ་ལ་འདོགས་པར་འདོད་ཅིང་། རང་རྒྱུད་པ་དག་གིས་གདགས་གཞི་སྐད་ཅིག་སྔ་ཕྱི་ཐ་སྙད་དུ་གཞན་ཡིན་པ་ལ་འདོགས་པར་འདོད་དོ། །དེ་ལ་སློབ་དཔོན་ཟླ་བས། དེ་ལྟར་ན་རྒྱུན་གཅིག་པ་དང་། རྒྱུད་གཅིག་པ་མི་འཐད་པར་འགྱུར་ཏེ། གཞན་ཡིན་པའི་ཕྱིར། དཔེར་ན་བྱམས་པ་བརྟེན་པའི་ཆོས་དང་ཉེར་སྦས་བརྟེན་པའི་ཆོས་བཞིན་ཞེས་བཀག་ནས། དོན་དམ་པར་སྐྱེ་འགག་མེད་ཀྱང་ཐ་སྙད་དུ་སྐད་ཅིག་སྔ་མ་འགགས་ནས་ཕྱི་མ་སྐྱེ་བར་སྣང་བ་བར་མ་ཆད་དུ་འབྱུང་བ་ལ་བརྟེན་ནས་རྒྱུན་གཅིག་པ་དང་རྒྱུད་གཅིག་པ་ཞེས་འདོགས་ཏེ། ཆུ་བོའི་རྒྱུན་ཆད་པ་དང་། མ་ཆད་པ་ཞེས་དང་། རྒྱུན་དུ་སྦྱོར་མི་སྦྱོར་ཞེས་དང་། ལམ་གྱི་དངོས་པོའི་རྒྱུན་དང་ལྡན་པ་དང་མི་ལྡན་པ་ཞེས་སོགས་འཇིག་རྟེན་དང་བསྟན་བཅོས་ལ་མཐོང་བའི་ཕྱིར་རོ། །དེའང་སྐད་ཅིག་སྔ་ཕྱི་དེ་ཉིད་དང་གཞན་ཉིད་ཡིན་ན་རྒྱུན་མི་འཐད་པ་ནི་བདག་སྐྱེ་དང་གཞན་སྐྱེ་ཐ་སྙད་དུའང་འགོག་པའི་རིགས་པས་གྲུབ་ལ། གཞན་དུ་མེད་པ་ལ་རྒྱུན་འཐད་པ་ནི་རྣམ་པར་ཤེས་པའི་རྒྱུན་ལ་སྐད་ཅིག་སྔ་ཕྱི་གཞན་དུ་མེད་པའི་རིགས་པས་གྲུབ་བོ་ཞེས་བཞེད་དོ། །འདི་ཅི་ལྟར་ཤེས་ཅེ་ན། རྩ་ཤེར་ལས། རྟེན་ཅིང་འབྲེལ་བར་འབྱུང་བ་ལ་སྐྱེ་འགག་ལ་སོགས་པ་སྤྲོས་པའི་མཐའ་བརྒྱད་བཀག་པ་དེ། འགྲེལ་བྱེད་གཞན་དག་ཐ་སྙད་དང་དོན་དམ་པའི་དབྱེ་བ་སོ་སོར་ཕྱེ་ནས་འཆད་ཀྱང་། སློབ་དཔོན་འདིས་དོན་དམ་པར་སྐྱེ་འགག་སོགས་སྤྲོས་པའི་མཐའ་བརྒྱད་བཀག་པས་ཁྱད་པར་དུ་བྱས་པའི་རྟེན་འབྲེལ་བསྟན་བཅོས་ཀྱི་བརྗོད་བྱའི་གཙོ་བོ་ཡིན་པར་གསུངས་པ་ཉིད་ཀྱིས་ཐ་སྙད་དུ་སྐྱེ་འགག་སོགས་བརྒྱད་ཁས་ལེན་པར་གསལ་ཏེ། མཐའ་བཞིའི་སྐྱེ་བ་དང་། གང་ཟག་རྣམ་ལྔར་གྲུབ་པ་སོགས་དགག་བྱ་ཐ་སྙད་དུའང་ཁས་མི་ལེན་པ་རྣམས་ལ་དོན་དམ་གྱི་ཁྱད་པར་སྦྱར་ནས་འགོག་པ་སློབ་དཔོན་འདིས་ལེགས་པར་བཀག་པའི་ཕྱིར་རོ། །དེ་ལྟར་ན་ཆད་པ་མེད་པ་རྟག་མེད་པ། །ཞེས་པའི་འགྲེལ་པར། ཆད་པས་ན་ཆད་པ་སྟེ། རྒྱུན་ཆད་པ་ཞེས་པའི་དོན་ཏོ་ཞེས་གསུངས་པས་རྒྱུན་ཆད་པ་ཐ་སྙད་དུ་ཁས་ལེན་པར་གྲུབ་ཅིང་། དེས་ན་ལོག་ཕྱོགས་རྒྱུན་མ་ཆད་པའང་ཐ་སྙད་དུ་ཁས་ལེན་དགོས་ཏེ། དེ་གཉིས་ཕན་ཚུན་ལྟོས་ནས་གྲུབ་པའི་ཕྱིར་རོ། །ཅི་ལྟར་ཞེ་ན། ས་བོན་ལས་མྱུ་གུ་དང་། མྱུ་གུ་ལས་སླར་ཡང་ས་བོན་འབྱུང་བ་སོགས་ཐོག་མ་མེད་པ་ནས་བར་མ་ཆད་དུ་ཡོད་པ་ལ་རྒྱུན་མ་ཆད་པ་དང་། ནམ་ཞིག་ས་བོན་མེས་བསྲེགས་ནས་མྱུ་གུ་སྐྱེ་བ་མེད་པར་འགྱུར་བའི་ཚེ་རྒྱུན་ཆད་པ་ཞེས་བྱ་བར་འཇོག་སྟེ། ག་ལས་འཇིགས་མེད་ལས་ཆད་པ་མེད་པ་ནི་ས་བོན་དང་མྱུ་གུ་བཞིན་ནོ། །ཞེས་གསུངས་པ་དང་མཐུན་ཞིང་། དེ་ཉིད་རིན་ཆེན་ཕྲེང་བ་ལས། རྒྱུ་དང་བཅས་པར་སྐྱེ་མཐོང་བས། །མེད་པ་ཉིད་ལས་འདས་པ་ཡིན། །རྒྱུ་དང་བཅས་པར་འགག་མཐོང་བས། །ཡོད་པ་ཉིད་དུའང་ཁས་མི་ལེན། །ཞེས་གསུངས་པའི་དོན་ཏོ། །འོ་ན་ཐ་སྙད་ཉིད་ལའང་རྟག་ཆད་སྤངས་པའི་དབུ་མ་འཇོག་པ་དང་འགལ་ལོ་སྙམ་ན་དེ་ནི། གང་དག་རང་བཞིན་གྱིས་ཡོད་པ། །དེ་ནི་མེད་པ་མིན་པས་རྟག །ཅེས་སོགས་ཀྱིས་བསྟན་པ་ལྟར་དངོས་པོར་སྨྲ་བས་བཏགས་པའི་རྟག་ཆད་ཡིན་ལ། མཐའ་བརྒྱད་ཀྱི་རྟག་ཆད་ནི་ཐ་སྙད་བདེན་པའི་དོན་གྱི་རྟག་ཆད་ཡིན་པས་དོན་མི་གཅིག་གོ །མདོར་ན་ཉོན་མོངས་དང་ལས་དང་རྣམ་སྨིན་གསུམ་པོ་བར་མ་ཆད་དུ་འབྱུང་བ་ལ་འཁོར་བའི་རྒྱུན་དང་། བྱང་སེམས་ཀྱི་དེ་ཉམས་ལེན་ལས་སངས་རྒྱས་དང་། དེ་ལས་ཕྲིན་ལས་དང་། དེ་ལས་བྱང་སེམས་ཕྱི་མའི་ཉམས་ལེན་སོགས་བར་མ་ཆད་དུ་འབྱུང་བ་ལ་ཕྲིན་ལས་ཀྱི་རྒྱུན་ཞེས་སོགས་དབུ་མ་པས་ཀྱང་བཞེད་དེ། ཀླུ་སྒྲུབ་ཀྱིས། གསུམ་པོ་རྣམས་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང་། །གསུམ་འབྱུང་སྲིད་པའི་འཁོར་ལོ་དེ། །ཉིད་ནི་ཡང་དང་ཡང་དུ་འཁོར། །ཞེས་དང་། བྱམས་པས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་ཆད་པར་འདོད། །ཅེས་པ་དེའང་དངོས་པོར་སྨྲ་བའི་ལྟར། སྐད་ཅིག་སྔ་མ་ངོ་བོ་ཉིད་ཀྱིས་འགགས་ཕྱི་མ་ངོ་བོ་ཉིད་ཀྱིས་སྐྱེ་བ་ལ་མི་འཐད་པས། སྐད་ཅིག་སྔ་མ་དེ་ཉིད་ཕྱི་མར་འོང་བའང་མེད་སྐད་ཅིག་སྔ་མ་ལ་མ་བརྟེན་པར་ཕྱི་མ་འབྱུང་བའང་མེད་པའི་རྟེན་འབྱུང་ཉིད་ལ་འཐད་དེ། ཀླུ་སྒྲུབ་ཀྱིས། ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང་། །མི་འཕོ་བར་ཡང་མཁས་རྟོགས་བྱ། །ཞེས་སྔ་མ་ཕྱི་མར་འོང་བ་མེད་པ་དངོས་སུ་བསྟན་ནས་གཅིག་ཤོས་ཤུགས་ལ་བསྟན་པའི་ཕྱིར་རོ། །གསུམ་པ་ལ་དོགས་པ་དགོད་པ་དང་། དེའི་ལན་འདེབས་པའི་ཚུལ་རྣམ་པ་གཉིས་ལས། དང་པོ་ནི། རྩ་ཤེར་ལས། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགགས་ན་འགགས་འགྱུར་བས། །ཇི་ལྟར་འབྲས་བུ་སྐྱེད་པར་འགྱུར། །ཞེས་གསུངས་ཏེ། དགེ་མི་དགེའི་ལས་དེ་རྫོགས་པར་བྱས་ནས་འབྲས་བུ་འབྱིན་པའི་བར་དུ་གནས་ན་ལས་རྟག་པར་འགྱུར་ཞིང་། སྐད་ཅིག་གཉིས་པར་འགགས་ན་མཚམས་དེ་ནས་འབྲས་བུ་འབྱིན་པའི་བར་དུ་ལས་གཏན་མེད་པས་ལས་ཀྱི་འབྲས་བུ་འབྱིན་པར་ཇི་ལྟར་འགྱུར་ཞེས་པའོ། །གཉིས་པ་ནི་རྩ་ཤེར་ལས་འབྲས་ཀྱི་རྟེན་རྣམ་ཤེས་ཀྱི་རྒྱུན་བཀག་ནས་ཆུད་མི་ཟ་འདོད་པའི་དངོས་སྨྲ་བའི་ལུགས་བརྗོད་དེ། དེ་བཀག་ནས་རང་ལུགས་གཞག་པའི་རིམ་པ་གསུམ་དུ་མཛད། འཇུག་པ་རྩ་བར་ཀུན་གཞི་བཀག་ནས་རང་ལུགས་གཞག་པ་དང་། འགྲེལ་པར་ཀུན་གཞི་དང་། ཆུད་མི་ཟ་དང་། ཐོབ་པ་དང་། རྣམ་ཤེས་ཀྱི་རྒྱུན་བཀག་ནས་རང་ལུགས་འཇོག་པ་མཛད་དོ། །དེ་ལ་ལས་འགགས་པའི་དོན་དངོས་སྨྲ་བས་ལས་རང་བཞིན་གྱིས་འགགས་པ་ལ་འདོད་ལ། དེའི་དོན་ཡང་འགག་བྱའི་ལས་དེ་དེ་ཕྱིན་ཆད་གཏན་མེད་པར་འདོད་དེ། སྐད་ཅིག་མ་དང་རྒྱུན་གང་ལ་སྦྱར་ནའང་འདྲའོ། །དེ་ལྟར་ན་ལས་འགགས་ཟིན་ནས་འབྲས་བུའི་བར་དུ་ལས་གཏན་མེད་པའི་བར་སྟོང་ཡུན་རིང་དུ་བྱུང་བས། དེ་སྦྲེལ་བར་བྱེད་པ་ལ་སེམས་ཙམ་པས་ལས་ཀྱིས་བཞག་པའི་བག་ཆགས་འདོད་ཅིང་། དེའི་རྟེན་ནི་ཀུན་གཞི་རྒྱུན་བརྟན་པའི་བདེན་གྲུབ་པ་འདོད་དོ། །བྱེ་བྲག་ཏུ་སྨྲ་བ་ཁ་ཅིག་ལས་ཀྱིས་བུ་ལོན་གྱི་དཔང་རྒྱ་དང་འདྲ་བའི་ཆུད་མི་ཟ་བསྐྱེད་པར་འདོད་པ་དང་། ཁ་ཅིག་ལས་ཀྱིས་ཐོབ་པ་བསྐྱེད་ནས་དེས་སྦྲེལ་བར་འདོད། མདོ་སྡེ་པས་བག་ཆགས་ཀྱིས་བགོས་པའི་རྣམ་པར་ཤེས་པའི་རྒྱུན་རྟོག་པར་བྱེད་དེ། སྦྲེལ་བྱེད་བག་ཆགས་ཡིན་པ་ནི་སེམས་ཙམ་པ་དང་འདྲ་ལ། དེའི་བསྒོ་གཞི་མི་འདྲ་བའོ། །དེ་དག་འགོག་པ་ལ་རྩ་ཤེར། གང་ཕྱིར་ལས་ནི་སྐྱེ་བ་མེད། །འདི་ལྟར་རང་བཞིན་མེད་དེའི་ཕྱིར། །གང་ཕྱིར་དེ་ནི་མ་སྐྱེས་པ། །དེ་ཕྱིར་ཆུད་ཟར་མི་འགྱུར་རོ། །ཞེས་དང་། འཇུག་པར། གང་ཕྱིར་རང་བཞིན་གྱིས་དེ་མི་འགག་པ། །དེ་ཕྱིར་ཀུན་གཞི་མེད་ཀྱང་འདི་ནུས་ཕྱིར། །ལ་ལར་ལས་འགག་ཡུན་རིང་ལོན་ལས་ཀྱང་། །འབྲས་བུ་ཡང་དག་འབྱུང་བར་རིག་པར་གྱིས། །ཞེས་གསུངས་ཏེ་སྔར་གྱི་ལས་འབྲས་ཀྱི་རྟེན་དེ་དག་ཐམས་ཅད་ནི་མི་འཐད་དེ། དེ་དག་ནི་ལས་རང་བཞིན་གྱིས་འགགས་པས་ལས་དང་འབྲས་བུའི་བར་དུ་དེ་གཉིས་གང་ཡང་མེད་པའི་བར་སྟོང་སྦྲེལ་བྱེད་དུ་རྟོག་པ་ཡིན་ལ། ལས་རང་བཞིན་གྱིས་མ་འགགས་པས་ཐ་སྙད་དུ་ལས་འགགས་ནས་འབྲས་བུའི་བར་དུ་ལས་གཏན་མེད་དུ་སོང་བ་མ་ཡིན་པའི་ཕྱིར་རོ། །བར་དེར་ལས་རང་གི་ངོ་བོ་ཡོད་པའང་མ་ཡིན་ཏེ། ལས་རྟག་པར་ཐལ་བའི་ཕྱིར་རོ། །དེང་སང་དབུ་མའི་ལུགས་ལ་དགག་པ་གཉིས་ཀྱི་རྣལ་མ་གོ་བར་འདོད་པ་དག་གིས་ནི་བསྐལ་པའི་བར་དུ་མི་རྙེད་ལ། དངོས་སྨྲ་བས་འབྲས་བུའི་དུས་ན་རྒྱུ་དེ་གཏན་མེད་པར་འདོད་ཅིང་། དབུ་མ་བས་འབྲས་བུའི་དུས་ན་རྒྱུ་དེ་མེད་ན་རྒྱུན་ཆད་པར་འགྱུར་ཞིང་། ཡོད་ན་རྟག་པར་ཐལ་བ་དང་། བདག་སྐྱེ་ཡོད་པར་ཐལ་བས་དེ་གཉིས་གང་དུའང་ཁས་མི་ལེན་པའི་ཁྱད་པར་མི་ཕྱེད་པའོ། །མདོར་ན་དངོས་སྨྲ་བས་དགེ་མི་དགེ་ལྟ་བུའི་ལས་དེ་འགགས་ནས་འབྲས་བུ་མ་འབྱིན་གྱིས་བར་དུ་ལས་གཏན་མེད་པར་འདོད་པས་དེ་གཉིས་ཀྱི་བར་དུ་ལས་འབྲས་ཀྱི་རྟེན་རྟོག་དགོས་ལ། འདིར་ནི་ལས་དེ་འགགས་ནས་འབྲས་བུའི་བར་དུ་ལས་རྒྱུན་མི་ཆད་ཅིང་འབྲས་བུ་དེ་ཟད་ནས་སླར་འབྲས་བུ་སྐྱེ་བ་མེད་པའི་ཚེ་ལས་རྒྱུན་ཆད་དེ། སླར་འབྲས་བུ་སྐྱེ་བ་ཡོད་ན་ད་དུང་རྒྱུན་མ་ཆད་པ་ས་བོན་དང་མྱུ་གུའི་དཔེས་བསྒྲུབ་པར་བཞེད་པས་བར་སྟོང་སྦྲེལ་བྱེད་ཀྱི་ལས་འབྲས་ཀྱི་རྟེན་རྟོག་པའི་དོན་མེད་པའོ། །སྤྱིར་ལས་འབྲས་གང་ལ་ལྡན་པའི་གཞི་སེམས་ཉིད་བདེན་པས་སྟོང་པ་ལ་འཁོར་འདས་ཀྱི་བྱ་བྱེད་རུང་བའི་ཀུན་གཞི་ལས་འབྲས་ཀྱིས་རྟེན་ཙམ་དུ་ཁས་ལེན་པ་ལ་ཉེས་པ་མ་མཐོང་ངོ་། །གལ་ཏེ་ལས་འགགས་ནས་འབྲས་བུ་མ་འབྱིན་གྱི་བར་དུ་ལས་རྒྱུན་མི་ཆད་ན་དགེ་སློང་གི་སྡོམ་པ་མངོན་གྱུར་དུ་ཡོད་པའི་སེམས་རྒྱུད་ལ་མི་དགེ་བའི་ལས་ཡོད་པར་འགྱུར་རོ་སྙམ་ན། རྒྱུན་མ་ཆད་པ་ཙམ་གྱིས་ཡོད་པར་ཁས་མི་ལེན་པ་ནི་གོང་དུ་བཤད་ཟིན་ཏོ། །ཕྱིས་ཀྱི་དབུ་མ་པར་རློམ་པ་ཁ་ཅིག་གིས་གནད་འདིར་མ་རྟོགས་པར་ཀུན་གཞི་སོགས་བཀག་ནས་ལས་དང་འབྲས་བུའི་བར་དུ་ཞིག་པ་དངོས་པོ་བས་སྦྲེལ་བར་འདོད་པ་ལ་ནི་གཞན་སྐྱེ་ཡོད་པར་ཐལ་བ། མ་ཕྲད་པར་སྐྱེ་བ་ཡོད་པར་ཐལ་བ། རྟེན་གཞན་ལ་བརྗོད་པའི་ཉེས་པ་མཚུངས་པ། དེ་ལས་ཀྱང་སྨད་པའི་གནས་སུ་གྱུར་པ། ཞིག་པས་ནམ་མཁའ་གང་བར་ཐལ་བ། འདུས་མ་བྱས་ལ་རྟེན་འབྲེལ་མི་རུང་བར་ཐལ་བ། སྨིན་ལས་སླར་སྨིན་གྱི་སྐྱོན་སྤོང་མི་ནུས་པ། གཅིག་དང་ཐ་དད་བརྟགས་པའི་ཉེས་པ་སྟེ་བརྒྱད་དང་། གཞན་ཡང་སྐྱོན་གྱི་རང་བཞིན། སྐྱོན་གྱི་ཕུང་པོ། སྐྱོན་གྱི་འབྱུང་གནས་སུ་འདུག་པས་ཁོ་བོས་བྱས་པའི་འཇུག་པའི་དཀའ་འགྲེལ་དུ་རྒྱས་པར་བཀག་ཟིན་པ་ལས་བལྟ་བར་བྱའོ། །གཉིས་པ་དོན་དམ་བདེན་པའི་མཚན་གཞི་ལ་གསུམ་སྟེ། རང་གི་ངོ་བོ་ཇི་ལྟ་བ་བཞིན་མཚན་གཞི་སོགས་ཀྱིས་བསྟན་པར་མི་ནུས་པའི་ཚུལ། ཐ་སྙད་བདེན་པར་སྒྲོ་བཏགས་ནས་བསྟན་པའི་རིམ་པ་དང་དགོངས་པ་བཤད་པ། དེ་ལྟར་བསྟན་པའི་མཚན་གཞི་དངོས་བཤད་པའོ། །དང་པོ་ནི། དོན་དམ་པའི་བདེན་པ་འཕགས་པའི་མཉམ་བཞག་གིས་ཇི་ལྟར་སྤྲོས་པ་དང་བྲལ་བའི་ཚུལ་གྱིས་མྱོང་བ་ལྟར་མཚན་ཉིད་དང་མཚན་གཞི་སོགས་གང་གིས་ཀྱང་བསྟན་པར་མི་ནུས་ཏེ། ཚིགས་གིས་བརྗོད་པར་བྱ་བ་མ་ཡིན་ཞིང་། བློས་ཡུལ་དུ་བྱ་བ་མ་ཡིན་པའི་ཕྱིར་ཏེ། མདོ་ལས། དོན་དམ་པའི་བདེན་པ་ནི་གང་ལ་སེམས་ཀྱི་རྒྱུ་བ་ཡང་མེད་ན་ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་དང་། བརྗོད་པར་བྱ་བ་ལྡོག་པ་སྟེ། །ཞེས་པའི་འགྲེལ་པར་ཚིག་གསལ་ལས། བརྗོད་པར་བྱ་བ་འགའ་ཞིག་ཡོད་ན་ནི་དེ་སྟོན་པར་འགྱུར་བ་ཞིག་ན་གང་གི་ཚེ་བརྗོད་པར་བྱ་བ་ལོག་ཅིང་ཚིག་དག་གི་ཡུལ་ཡོད་པ་མ་ཡིན་པ་དེའི་ཚེ་སངས་རྒྱས་རྣམས་ཀྱིས་ཅུང་ཟད་ཀྱང་མ་བསྟན་ཏོ། །ཡང་ཅིའི་ཕྱིར་བརྗོད་པར་བྱ་བ་མེད་ཅེ་ན། སེམས་ཀྱི་སྤྱོད་ཡུལ་ལྡོག་པས་སོ། །ཞེས་གསུངས་ཏེ། སེམས་ཀྱི་སྤྱོད་ཡུལ་ནི་སེམས་ཀྱི་སྤྱོད་ཡུལ་ལོ། །སྤྱོད་ཡུལ་ནི་ཡུལ་ཏེ་དམིགས་པ་ཞེས་བྱ་བའི་ཐ་ཚིག་གོ །གལ་ཏེ་སེམས་ཀྱི་སྤྱོད་ཡུལ་འགའ་ཞིག་ཡོད་པར་གྱུར་ན་ནི་དེར་རྒྱུ་མཚན་འགའ་ཞིག་སྒྲོ་བཏགས་ནས་ཚིག་དག་འཇུག་པར་འགྱུར་ན། གང་གི་ཚེ་སེམས་ཀྱི་སྤྱོད་ཡུལ་ཉིད་མི་འཐད་པ་དེའི་ཚེ་རྒྱུ་མཚན་སྒྲོ་བཏགས་ནས་ཚིག་གར་འཇུག་པར་འགྱུར། ཡང་ཅིའི་ཕྱིར་སེམས་ཀྱི་སྤྱོད་ཡུལ་མེད་ཅེ་ན། བསྟན་པའི་ཕྱིར། མ་སྐྱེས་པ་དང་མ་འགགས་པ། །ཆོས་ཉིད་མྱ་ངན་འདས་དང་མཚུངས། །ཞེས་གསུངས་ཏེ། གང་གི་ཕྱིར་མ་སྐྱེས་པ་དང་མ་འགགས་པའི་ཆོས་ཉིད་དེ་ཆོས་ཀྱི་ངོ་བོ་དང་། ཆོས་ཀྱི་རང་བཞིན་མྱ་ངན་ལས་འདས་པ་དང་མཚུངས་པར་བཞག་པ་དེའི་ཕྱིར་དེ་ལ་སེམས་མི་འཇུག་གོ །སེམས་མི་འཇུག་ན་རྒྱུ་མཚན་སྒྲོ་འདོགས་པར་ག་ལ་འགྱུར་ལ་དེ་མེད་པའི་ཕྱིར་ཚིག་དག་འཇུག་པར་ག་ལ་འགྱུར་ཏེ། དེའི་ཕྱིར་སངས་རྒྱས་རྣམས་ཀྱིས་ཅུང་ཟད་ཀྱང་མ་བསྟན་ཏོ། །ཞེས་བྱ་བར་གནས་སོ། །ཞེས་གསུངས་སོ། །གཉིས་པ་ནི། འོ་ན་གདུལ་བྱས་དོན་དམ་པ་རྟོག་པའི་ཐབས་མེད་པར་འགྱུར་རོ་སྙམ་ན་གདུལ་བྱས་དེ་རྟོགས་པའི་དོན་དུ་ཚིག་གི་བརྗོད་བྱ་དང་། སེམས་ཀྱི་སྤྱོད་ཡུལ་དུ་ཐ་སྙད་ཀྱི་བདེན་པར་སྒྲོ་བཏགས་ནས་བསྟན་པ་སྟེ། ཐམས་ཅད་ཡང་དག་ཡང་དག་མིན། །ཞེས་པའི་སྔ་འགྲེལ་དུ། ཚིག་གསལ་ལས། དེ་ལ་ངག་དང་སེམས་དག་འཇུག་པ་ཡོད་པ་མ་ཡིན་མོད་ཀྱི་དེ་ལྟ་ན་ཡང་དེ་མ་བསྟན་ན་གདུལ་བྱའི་སྐྱེ་བོ་རྣམས་ཀྱིས་ཤེས་པར་མི་ནུས་པས་གདུལ་བྱའི་སྐྱེ་བོ་རྣམས་དེ་ལ་འཇུག་པར་བྱ་བའི་ཕྱིར་གདོན་མི་ཟ་བར་ཀུན་རྫོབ་ཀྱི་བདེན་པ་ལ་ལྟོས་ནས་ཇི་ཞིག་ལྟར་དེ་བསྟན་པའི་རིམ་པ་ཞིག་ཡོད་དགོས་པས་དེ་བརྗོད་པར་བྱའོ་ཞེ་ན། བརྗོད་པ་འདིར་སངས་རྒྱས་བཅོམ་ལྡན་འདས་རྣམས་ཀྱི་དེ་ཁོ་ན་ཉིད་ཀྱི་བདུད་རྩི་ལ་འཇུག་པའི་བསྟན་པའི་རིམ་པ་ནི་འདི་ཡིན་པར་ཤེས་པར་བྱ་སྟེ། ཞེས་དང་། གཞན་ལས་ཤེས་མིན་ཞི་བ་དང་། །ཞེས་པའི་སྔ་འགྲེལ་དུ། དེ་ལྟར་ཡིན་མོད་ཀྱི་འོན་ཀྱང་འཇིག་རྟེན་པའི་ཐ་སྙད་ཁས་བླངས་པ་ལྟར་ཐ་སྙད་ཀྱི་བདེན་པའི་ངོར་སྒྲོ་བཏགས་ནས་དེའི་མཚན་ཉིད་ཀྱང་བརྗོད་པར་བྱ་དགོས་སོ་ཞེ་ན། དེ་བརྗོད་པར་བྱ་སྟེ་ཞེས་གསུངས་པས་སོ། །དེ་ལྟར་བསྟན་པའི་རིམ་པ་གང་ཞེ་ན་ཐོག་མར་ལས་དང་འབྲས་བུ་མེད་པར་ལྟ་བ་དག་ལ་ལས་འབྲས་བདེན་པར་བཟུང་ནས་བླང་དོར་བྱ་བ་ལ་འཇུག་པའི་ཆེད་དུ་ཕུང་པོ་དང་ཁམས་དང་སྐྱེ་མཆེད་སོགས་ཐམས་ཅད་བདེན་པར་ཡོད་དོ། །ཞེས་བསྟན། དེ་ནས་བདེན་པར་འཛིན་པ་ནི་སྡུག་བསྔལ་གྱི་རྒྱུ་ཡིན་པས་དེ་ཟློག་པའི་ཆེད་དུ་ཐམས་ཅད་བདེན་པར་མེད་དོ་ཞེས་བསྟན། དེ་ནས་དེ་ལྟ་བུའི་ཡོད་མེད་ཀྱང་བློ་སོ་སོའི་ངོར་ཡིན་པ་ཤེས་པའི་ཆེད་དུ་གཉིས་ཀ་ཡིན་པར་བསྟན། དེ་ནས་འཕགས་པའི་མཉམ་གཞག་གི་ངོར་སྤྲོས་པ་གང་ཡང་མེད་པར་ཤེས་པའི་ཆེད་དུ་གཉིས་ཀ་མ་ཡིན་ཞེས་བསྟན་ཏེ། དབུ་མ་རྩ་བར། ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །འདི་ནི་སངས་རྒྱས་རྗེས་བསྟན་པའོ། །ཞེས་དང་། རྗེས་བསྟན་པའི་དོན་འགྲེལ་པ་མཐར་གྱིས་བསྟན་པ་དང་། གདུལ་བྱའི་བློ་དང་འཚམ་པར་བསྟན་པ་གཉིས་ལ་གསུངས་སོ། །དེ་བཞིན་དུ། སྟོང་ངོ་ཞེས་ཀྱང་མི་བརྗོད་དེ། །ཞེས་པའི་འགྲེལ་པར། འདི་དག་ཐམས་ཅད་བརྗོད་པར་བྱ་བ་མ་ཡིན་མོད་ཀྱི་འོན་ཀྱང་མ་བརྗོད་ན་རྟོག་པ་པོ་རྣམས་ཀྱིས་ཇི་ལྟ་བ་བཞིན་གནས་པའི་རང་བཞིན་རྟོགས་པར་མི་ནུས་ཏེ། དེའི་ཕྱིར་ཁོ་བོ་ཅག་ཐ་སྙད་ཀྱི་བདེན་པ་ལ་གནས་ནས་ཐ་སྙད་ཀྱི་དོན་དུ་གདུལ་བྱའི་སྐྱེ་བོའི་ངོར་ལྷག་པར་སྒྲོ་བཏགས་ནས་སྟོང་པ་ཞེས་ཀྱང་སྨྲ་ལ། མི་སྟོང་པ་ཞེས་བྱ་བ་དང་། སྟོང་པ་ཡང་ཡིན་ལ་མི་སྟོང་པ་ཡང་ཡིན་ཞེས་བྱ་བ་དང་། སྟོང་པ་ཡང་མ་ཡིན་ལ་མི་སྟོང་པ་ཡང་མ་ཡིན་པ་ཞེས་ཀྱང་སྨྲའོ། །དེ་ཉིད་ཀྱི་ཕྱིར། གདགས་པའི་དོན་དུ་བརྗོད་པར་བྱ། །ཞེས་གསུངས་ཏེ། བཅོམ་ལྡན་འདས་ཀྱིས། དགོངས་པ་གང་གིས་སྟོང་པ་ཉིད་ལ་སོགས་པ་བསྟན་པ་དེ་ནི་བདག་བརྟགས་པ་ལས་ཁོང་དུ་ཆུད་པར་བྱའོ། །ཞེས་གསུངས་སོ། །རིམ་པ་དེ་ལྟར་བསྟན་པའི་དགོས་པ་གང་ཞེ་ན་བདག་བརྟག་པར་ཚིག་གསལ་ལས་སངས་རྒྱས་བཅོམ་ལྡན་འདས་རྣམས་ཀྱིས་བསྟན་པ་དེ་དག་ཐམས་ཅད་ནི་དེ་ཁོ་ན་ཉིད་ཀྱི་བདུད་རྩི་ལ་འཇུག་པའི་ཐབས་ཉིད་དུ་རྣམ་པར་གནས་སོ། །དེ་བཞིན་གཤེགས་པ་རྣམས་ནི་གསུང་དེ་ཁོ་ན་ཉིད་ཀྱི་བདུད་རྩི་ལ་འཇུག་པའི་ཐབས་སུ་མ་གྱུར་པ་མི་གསུང་སྟེ། ནད་དང་རྗེས་སུ་མཐུན་པའི་སྨན་ཉེ་བར་སོགས་པ་ལྟར་འདུལ་བའི་སྐྱེ་བོ་རྗེས་སུ་གཟུང་བར་བཞེད་པས་ཇི་ལྟར་འཚམ་པ་ལྟར་སྟོན་པར་མཛད་པ་ཡིན་ནོ། །ཇི་སྐད་དུ་བརྒྱ་པ་ལས། ཡོད་དང་མེད་དང་ཡོད་མེད་དང་། །གཉིས་ཀ་མིན་ཞེས་ཀྱང་བསྟན་ཏེ། །ནད་ཀྱི་དབང་གིས་ཐམས་ཅད་ནི། །སྨན་ཞེས་བྱ་བར་འགྱུར་མིན་ནམ། །ཞེས་བཤད་དོ། །ཞེས་གསུངས་པ་ལྟར། མཐར་སྤྲོས་པ་ཐམས་ཅད་དང་བྲལ་བ་སྟོང་པ་ཉིད་ཀྱི་བདུད་རྩི་ལ་འཇུག་པའི་ཆེད་ཡིན་པར་ཤེས་པར་བྱའོ། །གསུམ་པ་ནི། དེ་ལྟར་གདུལ་བྱའི་ངོར་མཚན་གཞི་སོགས་ཀྱིས་བསྟན་ན་མཚན་གཞི་གང་སྙམ་ན་དོན་དམ་པའི་མཚན་གཞི་ནི་སྤྲོས་པ་དང་བྲལ་བ་སྟེ། འདི་ལ་སྤྲོས་པ་དང་བྲལ་བའི་དོན་ཉིད་ངོས་གཟུང་བ་དང་། སྤྲོས་བྲལ་དེ་མཐར་ཐུག་པའི་དོན་དུ་བསྒྲུབ་པ་དང་། སྤྲོས་བྲལ་དོན་དམ་པའི་མཚན་གཞིར་བསྙད་པའི་ཚུལ་གསུམ་ལས། དང་པོ་ནི། འདིར་སྤྲོས་པ་ཞེས་པ་བདེན་པའི་དངོས་པོའམ་མ་ཡིན་དགག་ཁོ་ན་མ་ཡིན་གྱི་གང་ལ་བློ་འཇུག་ཅིང་འཕྲོ་བ་དགག་སྒྲུབ་ཀྱི་ཆོས་ཀྱི་མཚན་མ་ཐམས་ཅད་ཡིན་ཏེ་མདོ་ལས་གཟུགས་སྟོང་ཞེས་བྱ་བར་མི་སྤྲོ་བ་འཕྲོ་བར་མི་བྱེད་དོ་ཞེས་སོགས་དང་། ཇི་ཙམ་དུ་སེམས་འཇུག་པ་དེ་ཙམ་དུ་སྤྲོས་པ་ལགས་སོ་ཞེས་དང་། སྤྲོས་པ་ཉེར་ཞི་ཞི་བ་སྟེ། །ཞེས་པའི་འགྲེལ་པར་ཚིག་གསལ་ལས་འདིར་སྤྲོས་པ་སྟེ་མཚན་མ་རྣམས་གང་ཉེ་བར་ཞི་བ་སྟེ་མི་འཇུག་པ་གང་ཡིན་པ་དེ་མྱ་ངན་ལས་འདས་པ་ཡིན་ལ། ཞེས་གསུངས་པས་སོ། །གཞན་ལས་ཤེས་མིན་ཞེས་སོགས་ཀྱི་འགྲེལ་པར་སྤྲོས་པ་ནི་ངག་སྟེ་དོན་རྣམས་སྤྲོ་བར་བྱེད་པའི་ཕྱིར་རོ། །སྤྲོས་པ་རྣམས་ཀྱིས་མ་སྤྲོས་པ་ནི་ངག་ངག་གིས་མ་བརྗོད་པའོ། །ཞེས་བྱ་བའི་ཐ་ཚིག་གོ །ཞེས་དང་། གང་དག་སངས་རྒྱས་སྤྲོས་འདས་ཤིང་། །ཞེས་པའི་འགྲེལ་པར། སྤྲོས་པ་ནི་དངོས་པོའི་རྒྱུ་མཚན་ཅན་ཡིན་ན་དེ་བཞིན་གཤེགས་པ་དངོས་པོ་མེད་པ་ལ། སྤྲོས་པ་རྣམས་འཇུག་པ་ག་ལ་ཡོད་དེ། དེའི་ཕྱིར་དེ་བཞིན་གཤེགས་པ་སྤྲོས་པ་ལས་འདས་པ་ཡིན་ནོ། །ཞེས་དང་། འགྲེལ་པ་སྔ་མའི་འཇུག་ཏུ། སྤྲོས་པའི་ངོས་འཛིན་བཞི་ཙམ་འབྱུང་བ་རྣམས་ནི་མཐའ་བཞི་ཆར་སྤྲོས་པ་ལས་མ་འདས་ཀྱང་སྐབས་ཐོབ་ཀྱི་སྤྲོས་པ་ངོས་འཛིན་པའི་དབང་དུ་བྱས་པའོ། །དེ་དང་བྲལ་བའི་དོན་ཡང་འཁྲུལ་ངོའི་ཡོད་མེད་སོགས་ཀྱི་སྤྲོས་པ་འདི་དག་གདོད་མ་ནས་རང་གི་ངོ་བོས་སྟོང་པ་ཡིན་ལ། ཐ་སྙད་ཀྱི་སྒོ་ནས་བསྟན་ཚུལ་ཡང་རང་གི་ངོ་བོའི་སྒོ་ནས་དང་། ཡུལ་ཅན་གྱི་སྒོ་ནས་དང་། བྱེད་པའི་སྒོ་ནས་བསྟན་ཚུལ་གསུམ་ལས། དང་པོ་ནི་མདོ་ལས། ངོ་བོ་མཚན་ཉིད་སྟོང་པ་ཉིད་དང་། དུས་གདོད་མ་ནས་སྟོང་པ་ཉིད་ཅེས་པ་སྟེ། དགག་སྒྲུབ་ཀྱི་ཆོས་ཙམ་དང་བྲལ་བའི་ཅི་ཡང་མ་རྙེད་པ་ཉིད་དེ། མདོ་ལས། སྟོང་པ་ཉིད་ཅེས་བྱ་བ་ནི་ཆོས་ཐམས་ཅད་དང་བྲལ་བའི་ཚིག་བླ་དགས་སོ། །ཞེས་དང་། ཇི་ལྟར་ནམ་མཁའ་ནམ་མཁའ་ཞེས་བརྗོད་ཀྱང་ནམ་མཁའ་ལ་བརྗོད་དུ་མེད་པ་དེ་བཞིན་དུ་སྟོང་པ་ཞེས་བརྗོད་ཀྱང་སྟོང་པ་ཉིད་ལ་ནི་བརྗོད་དུ་མེད་དོ། །ཞེས་གསུངས་སོ། །འདིས་ནི་དངོས་པོར་སྨྲ་བ་འདོད་པའི་དོན་དམ་ལས་ཁྱད་པར་འཕགས་པ་ཡིན་ནོ། །གཉིས་པ་ནི། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །ཞེས་དཔེ་དང་སྒྲ་དང་བློའི་སྤྱོད་ཡུལ་ལས་འདས་པའི་སྒོ་ནས་བསྟན་པ་སྟེ། བདེན་པ་གཉིས་བསྟན་པའི་མདོ་ལས། དོན་དམ་པ་ནི་མཚོན་དུ་མེད་པ་དང་། བརྗོད་དུ་མེད་པ་དང་། ཤེས་པ་བྱར་མེད་པ་སྟེ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་ཀྱང་འདས་པ་ཡིན་ནོ། །ཞེས་གསུངས་ཏེ། འདིས་ནི་དོན་དམ་པ་སྒྲས་བསྟན་པ་དང་། བློས་ཡུལ་དུ་བྱས་པའི་སྒོ་ནས་རྟོགས་པར་རློམ་པ་བསལ་བ་ཡིན་ནོ། །གསུམ་པ་ནི། དེ་ཐམས་ཅད་རྟེན་པའི་གཞི་ཆོས་ཅན་དང་རོ་གཅིག་པའི་ཆོས་ཉིད་ཡིན་པ་སྟེ། རྒྱུད་བླར་སྣོད་ཀྱི་འཇིག་རྟེན་ཐམས་ཅད་ནམ་མཁའ་ལ་བརྟེན་པ་ལྟར་ཕུང་སོགས་ཀྱི་ཆོས་ཐམས་ཅད་སེམས་ཀྱི་རང་བཞིན་ལས་བྱུང་བར་གསུངས་པ་དང་། མདོ་ལས་ཆོས་ཐམས་ཅད་ནི་མཚན་ཉིད་གཅིག་པ་སྟེ་འདི་ལྟ་སྟེ་མཚན་ཉིད་མེད་པའོ། །ཞེས་དང་། ཆོས་རྣམས་ཀྱི་མེད་པ་ཉིད་ལ་ཁྱད་པར་མི་འཐད་པས་རྣམ་གཞག་གཉིས་སུ་མེད་པ་དང་། འདི་ལ་ནི་སྤང་བ་དང་བླང་བར་བྱ་བ་མ་མཆིས་སོ། །ཞེས་ལམ་བསྒྲུབ་ཏུ་མེད་པ་དང་། སེམས་ཅན་དང་སངས་རྒྱས་ཀྱི་རང་བཞིན་ཐ་དད་དུ་མེད་པས་སངས་རྒྱས་གཞན་དུ་མི་བཙལ་བར་གསུངས་པ་སྟེ། འདིས་ནི་དོན་དམ་པ་རི་བོང་གི་རྭ་དང་འདྲ་བར་རྟོག་པ་སྤོང་བ་ཡིན་ནོ། །གཉིས་པ་དེ་ལྟ་བུའི་སྤྲོས་བྲལ་དེ་མཐར་ཐུག་པའི་དོན་དུ་བསྒྲུབ་པ་ལ་གསུམ་སྟེ། མཐར་ཐུག་གི་དོན་ཇི་ལྟར་ཡིན་པ་དང་། དེ་མིང་གི་དོན་དུ་བསྒྲུབ་པ་དང་། དེ་ལ་ནང་འགལ་སྤང་བའོ། །དང་པོ་ལ་དངོས་པོ་རྣམས་ཀྱི་རང་བཞིན་མཐར་ཐུག་པ་དང་། ཟབ་མོ་རྣམས་ཀྱི་ཡུལ་མཐར་ཐུག་པ་དང་། གཉེར་བར་བྱ་བའི་དོན་མཐར་ཐུག་པ་གསུམ་ལས། དང་པོ་ནི། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་། ཆོས་རྣམས་ཀྱི་ཆོས་ཉིད་ནི་གནས་པའོ། །ཞེས་པའི་ཚུལ་གྱིས་གཟུགས་ལ་སོགས་པའི་ཆོས་ཐམས་ཅད་ལ་དུས་ཐམས་ཅད་དུ་མེའི་ཚ་བ་དང་། བུ་རམ་གྱི་མངར་བ་ལྟར་ཅིར་ཡང་མ་གྲུབ་པའི་སྟོང་ཉིད་དེས་ཁྱབ་པ་དང་། རིགས་པ་ཡང་དག་གིས་མཐའ་གང་དུ་གྲུབ་བཙལ་བ་ན་གང་དུའང་མ་གྲུབ་པར་གནས་པ་དང་། དེ་ལ་ཇི་སྐད་བཤད་པའི་རང་བཞིན་གྱི་ཆོས་གསུམ་འཐད་པ་ཉིད་ཀྱི་ཕྱིར་ན་དངོས་པོ་རྣམས་ཀྱི་རང་བཞིན་མཐར་ཐུག་པའོ། །གཉིས་པ་ནི། བློ་ཟབ་མོས་རྟོགས་པ་དང་། སྒྲ་ཟབ་མོས་བསྟན་པ་དང་། དཔེ་ཟབ་མོས་མཚོན་པའི་དོན་ཡིན་པ་སྟེ། དེའང་བློ་ཟབ་མོ་ཤེས་པ་རྣམས་ཀྱི་མཐར་ཐུག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཡུལ་ཏེ་འཇིག་རྟེན་པའི་རྟོག་བཅས་ཀྱི་བློ་མཐར་ཐུག་ཚོལ་བའི་རྗེས་དཔག་གིས་སྤྱིའི་ཚུལ་དུ་རྟོགས་པ་དང་འཕགས་པའི་མཉམ་བཞག་རྣམ་པར་མི་རྟོག་པའི་བློས་སོ་སོ་རང་གིས་རིག་པའི་ཚུལ་གྱིས་རྟོགས་པའི་ཕྱིར་ཏེ། མདོ་སྡུད་པར། ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ཞེས་དང་། དགོངས་འགྲེལ་ལས། མ་སྐྱེས་མི་འགག་ནམ་མཁའི་ངོ་བོ་ཉིད། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་གསུངས་པས་སོ། །སྒྲ་ཟབ་མོས་བསྟན་པའི་དོན་ཡིན་པ་ལའང་ལྔ་ལས། མདོ་ཟབ་མོས་བསྟན་པའི་དོན་ཡིན་པ་ནི་ངེས་དོན་གྱི་གསུང་རབ་ཤེར་ཕྱིན་གྱི་མདོ་དང་། ཏིང་ངེ་འཛིན་རྒྱལ་པོ་དང་། ཡེ་ཤེས་སྣང་བ་རྒྱན་དང་། བདེན་པ་གཉིས་བསྟན་པ་ལ་སོགས་པ་མདོ་སྡེ་ཟབ་མོ་རྣམས་ཀྱི་དོན་ཡིན་པའོ། །བདེན་པའི་ཚིག་ཟབ་མོའི་རྣམ་གྲངས་ཆོས་རྣམས་ཀྱི་རང་བཞིན་དང་། དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཆོས་ཉིད་དང་། ཆོས་ཀྱི་དབྱིངས་དང་། ཆོས་ཀྱི་གནས་ཉིད་དང་། ཆོས་སྐྱོན་མེད་པ་ཉིད་དང་། ཡང་དག་པའི་མཐའ་དང་། བསམ་གྱི་མི་ཁྱབ་པའི་དབྱིངས་ཞེས་པའི་དོན་ཡིན་པ་དང་། ཞི་བའི་ཚིག་ཟབ་མོའི་རྣམ་གྲངས་ཏིང་ངེ་འཛིན་རྒྱལ་པོའི་མདོ་ལས། དངོས་པོ་མེད་པ་དང་། ངོ་བོ་ཉིད་མེད་པ་དང་། མཚན་ཉིད་མེད་པ་དང་། མ་སྐྱེས་པ། མ་འགགས་པ། ཡི་གེ་མེད་པ། སྟོང་པ། གཟོད་མ་ནས་ཞི་བ། རང་བཞིན་གྱིས་རྣམ་པར་དག་པ་ཞེས་པ་རྣམས་ཀྱི་དོན་ཡིན་པ་དང་། མིང་གི་བརྡ་ཟབ་མོའི་རྣམ་གྲངས་དོན་དམ་པ་དང་། ཡང་དག་པ་དང་། ཕྱག་རྒྱ་ཆེན་པོ་དང་། ཤེས་རབ་ཀྱི་ཕ་རོལ་ཏུ་ཕྱིན་མ་དང་། ཨ་མ་ན་ས་ཞེས་གྲགས་པའི་དོན་ཡང་ཡིན་པའི་ཕྱིར་རོ། །ཡི་གེ་ཟབ་མོའི་དོན་ཡིན་པ་ནི་ཨ་ཞེས་པའི་བརྗོད་པ་གཅིག་གིས་ཆོས་ཐམས་ཅད་འགོག་ཅིང་སྐྱེ་བ་མེད་པར་སྟོན་པར་གསུངས་པའི་ཕྱིར་རོ། །མ་བརྗོད་པས་བསྟན་པའི་དོན་ཡང་ཡིན་པ་ནི་འཕགས་པ་འཇམ་དཔལ་གྱིས། ལིཙྪ་བཱི་ལ་དོན་དམ་པ་དྲིས་པའི་ཚེ་ཅི་ཡང་མི་གསུང་བར་ཅིར་ཡང་མ་གྲུབ་པར་གོ་བ་ལྟ་བུའོ། །དཔེ་ཟབ་མོས་མཚོན་པའི་དོན་ཡིན་པ་ནི་གཞུང་དག་ལས། ངོ་བོ་མེད་ཅིང་ཁྱབ་པས་ནམ་མཁའ་དང་། མི་ཤིགས་པས་རྡོ་རྗེ་དང་། སྤྱད་ན་འཆི་བ་མེད་པས་བདུད་རྩི་ཞེས་པའི་མིང་གིས་བརྗོད་པ་ལྟ་བུའོ། །གསུམ་པ་གཉེར་བར་བྱ་བའི་དོན་མཐར་ཐུག་པ་ཡིན་པ་ལའང་གསུམ་སྟེ། རང་གི་ངོ་བོ་དོན་དམ་པའི་དགེ་བ་ཡིན་པ་དང་། དེ་ལ་དམིགས་པས་དོན་ཀུན་འགྲུབ་པ་དང་། དེར་གྱུར་པས་དོན་ཀུན་རྫོགས་པའོ། །དང་པོ་ནི། ཡུལ་མཚན་མ་མེད་པས་དོན་དམ་པའི་དགེ་བ་དང་། ཡུལ་ཅན་གཏི་མུག་མེད་པས་ངོ་བོ་ཉིད་ཀྱི་དགེ་བ་ཡིན་པའི་ཕྱིར་རོ། །གཉིས་པ་ལ་བདག་གི་དོན་འགྲུབ་པ་དང་། གཞན་གྱི་དོན་འགྲུབ་པ་གཉིས་ལས། དང་པོ་ལ་སྡུག་བསྔལ་སྤང་བ་དང་། སྒྲིབ་པ་བསལ་བ་དང་། ཡོན་ཏན་བསྒྲུབ་པའི་ཚོགས་མཆོག་ཡིན་པ་གསུམ། དང་པོ་ནི། རེ་ཞིག་ཚེ་འདིའི་འཚེ་བ་ལས་སྐྱོབ་པ་ཡིན་ཏེ། ཐམས་ཅད་སྟོང་པར་ཡིད་ཆེས་ན། རྒྱུ་བདག་འཛིན་མེད་པས་ཚེ་བའི་གཞི་མེད་པ་དང་། གླགས་ཚོལ་བ་རྣམས་ཀྱིས་མི་མཐོང་བ་དང་། སྟོང་པ་ཉིད་ལ་སྦྱོར་བའི་སྲུང་བ་སྟེ། སྲུང་བ་གཞན་ལ་མི་ལྟོས་པའི་ཕྱིར། མདོ་ལས། གང་གི་རྒྱུ་དང་མི་རྒྱུའི་འགྲོ་བ་ཀུན། །སྒྱུ་མ་ནམ་མཁའ་ལྟ་བུར་རབ་ཤེས་པ། །དོན་དམ་ཤེས་པའི་སྲུང་བ་མཆོག་ཡིན་ཏེ། །སྲུང་བའི་ཆོ་ག་གཞན་དག་འདིར་མི་དགོས། །ཞེས་གསུངས་པས་སོ། །ཚེ་ཕྱི་མའི་སྡུག་བསྔལ་སྤང་བ་ནི་བསག་པའི་སྡིག་པ་སྦྱོང་བའི་སྒོ་ནས་ཡིན་ཏེ། ཁས་བླངས་པ་དང་འགལ་བ་བཅས་པའི་སྡིག་པ་དང་། མི་དགེ་བ་བཅུ་དང་། མཚམས་མེད་པ་ལྔ་དང་། ཆོས་སྤངས་པ་ལ་སོགས་པ་རང་བཞིན་གྱི་སྡིག་པ་ཤིན་ཏུ་ལྕི་བ་རྣམས་ཀྱང་སྟོང་པ་ཉིད་རྟོགས་ན་དག་པར་གསུངས་པའི་ཕྱིར་དང་། མདོ་སྡེ་རྒྱན་ལས། ཆོས་ཀྱི་སྡོམ་ལ་སོ་སོར་རྟོག་པ་དང་། བདེན་པ་མཐོང་བས་ལྟུང་བ་ལས་ངེས་པར་འབྱུང་བ་གསུངས་པ་དང་། མདོ་ལས་གང་གི་ཆེས་ལྕི་བའི་མི་དགེ་བ་བཅུ་པོ་འདི་དག་བྱས་པར་གྱུར་ཀྱང་རྟེན་ཅིང་འབྲེལ་བར་འབྱུང་བའི་ཆོས་ཉིད་ལ་ཡིད་ཆེས་ན་དེ་དག་ལྟུང་བར་ང་མི་སྨྲའོ། །ཞེས་དང་། རྒྱུད་བླ་མར། ཕ་མ་དགྲ་བཅོམ་གསོད་དང་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམས་ན་མྱུར་དུ་དེ་ལས་ཐར་འགྱུར་གྱི། །ཞེས་གསུངས་པས་སོ། །སྒྲིབ་པ་བསལ་བའི་རྒྱུ་ཡིན་པའང་སྤྲོས་པ་མཐའ་དག་ཁེགས་པའི་ཆོས་ཉིད་བསྒོམས་པས་སྒྲིབ་པ་གཉིས་ཀྱི་རྒྱུ་མཚན་མའི་རྣམ་རྟོག་གི་གཉེན་པོ་བྱེད་པའི་ཕྱིར་ཏེ། རྩ་ཤེར་ལས། དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་དང་། སྤྱོད་འཇུག་ལས། ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །ཅེས་དང་། རྒྱུད་བླ་མར། ཤེས་རབ་ལས་གཞན་དེ་དག་ནི། །སྤོང་རྒྱུ་གཞན་མེད་དེ་ཡི་ཕྱིར། །ཞེས་གསུངས་པས་སོ། །ཡོན་ཏན་བསྒྲུབ་པའི་དགེ་ཚོགས་མཆོག་ཡིན་པའང་གཏི་མུག་མེད་པའི་དགེ་བ་ལས་དགེ་བའི་ཚོགས་ཐམས་ཅད་འབྱུང་བ་དང་། དེས་དགེ་བ་གཞན་རྣམས་རྫོགས་པའི་བྱང་ཆུབ་ཏུ་བསྒྱུར་ཞིང་། ཁྲིད་པ་དང་། དེ་བསྒོམ་པའི་ནང་དུ་དགེ་བའི་སྦྱོར་བ་ཕ་རོལ་ཏུ་ཕྱིན་པ་ལྔ་ལ་སོགས་པ་ཐམས་ཅད་འདུ་བ་དང་། དེ་ལ་དམིགས་པའི་དགེ་བའི་ཁྱད་པར་ལས་བདེ་འགྲོ་དང་བྱང་ཆུབ་ཐམས་ཅད་འབྱུང་བས་དགེ་ལེགས་ཐམས་ཅད་ཀྱི་ཡུམ་ཞེས་ཀྱང་བརྗོད་པའི་ཕྱིར་ཏེ། མདོ་ལས། སུ་ལ་སྟོང་ཉིད་འདི་འབྱུང་བ། །དེ་ལ་དོན་རྣམས་ཐམས་ཅད་འབྱུང་། །ཞེས་དང་། ཕ་རོལ་ཕྱིན་ལྔ་བྱང་ཆུབ་ཡོན་ཏན་ཇི་སྙེད་པ། །དེ་དག་ཀུན་ཀྱང་ཤེས་རབ་ཕ་རོལ་ཕྱིན་ལས་སྐྱེ། །ཞེས་དང་། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་དག་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཤེས་རབ་ནམས་ཀྱང་ཟད་པ་མེད་ཅིང་འཕེལ་བ་མེད། །ཅེས་པས་སོ། །གཉིས་པ་གཞན་གྱི་དོན་འགྲུབ་པའི་རྒྱུའང་ཡིན་ཏེ། ཐེག་པ་ཆེན་པོའི་རིགས་ཅན་གྱིས་སྟོང་ཉིད་བསྒོམས་པས་དེ་མ་རྟོགས་པའི་སེམས་ཅན་འཁྲུལ་པས་སྡུག་བསྔལ་བའི་ཚུལ་མཐོང་ནས་བྱམས་པ་སྙིང་རྗེ་སྐྱེ་བས་བདེ་བ་བསྒྲུབ་པའི་ཐབས་ལ་འཇུག་པ་དང་། གཞན་དོན་བྱེད་ཀྱང་ཆགས་པ་དང་འཇིགས་པའི་རྒྱུ་ཟད་པས་རང་ལ་མི་གནོད་པའི་ཕྱིར་ཏེ། མདོ་ལས། སུ་དག་སྟོང་པ་ཉིད་ལ་རྟག་བརྩོན་པ། །དེ་ནི་རྟག་ཏུ་འགྲོ་བ་ཀུན་གྱི་བཤེས། །ཞེས་དང་། སྤྱོད་འཇུག་ལས། རྨོངས་པས་སྡུག་བསྔལ་ཅན་དོན་དུ། །ཆགས་དང་འཇིགས་མཐའ་ལས་གྲོལ་བ། །འཁོར་བར་གནས་པ་འགྲུབ་འགྱུར་བ། །འདི་ནི་སྟོང་ཉིད་འབྲས་བུ་ཡིན། །ཞེས་གསུངས་པས་སོ། །གསུམ་པ་དེར་གྱུར་པས་དོན་ཀུན་རྫོགས་པ་ནི་སྟོང་ཉིད་རྟོགས་ནས་གོམས་པ་མཐར་ཕྱིན་པའི་ཚེ་གློ་བུར་གྱི་དྲི་མ་ཟད་ནས་བློ་ཉིད་ཟག་མེད་ཀྱི་དབྱིངས་སུ་གྱུར་པ་ནི། སྤངས་རྟོགས་ཕུན་སུམ་ཚོགས་པ་དོན་དམ་པའི་སངས་རྒྱས་ཡིན་ལ་དེ་ཉིད་ཀྱི་ཚེ་གཞན་དོན་ཀུན་རྫོབ་ཀྱི་སྐུ་གཞན་ངོར་སྐུ་གསུང་ཐུགས་ཀྱི་མཛད་པ་ཕུན་སུམ་ཚོགས་པ་འབྱུང་བའི་ཕྱིར་རོ། །དེ་ལྟར་བསྒོམས་པ་དང་ཐོབ་པས་ཉེས་པ་སྤོང་ཞིང་བདག་གཞན་གྱི་དོན་ཐམས་ཅད་བསྒྲུབ་པའི་རྒྱུའི་གཙོ་བོ་ཉིད་ཡིན་པའི་དོན་གྱི་དབང་དེ་གཟིགས་ནས་ཆོས་ཀྱི་རྗེས། མདོ་སྡེ་དེ་དང་དེ་ལ་བསྔགས་པ་མཛད་དེ། །ཆོས་འཛིན་བྱང་ཆུབ་སེམས་ཀྱི་དགེ་བས་ཀྱང་། །སྟོང་ཉིད་གོམས་པའི་བཅུ་དྲུག་ཆར་མི་ཕོད། །ཅེས་དང་། བྱང་ཆུབ་ཀྱི་སེམས་དང་བཅས་པའི་ཕ་རོལ་ཏུ་ཕྱིན་པ་ལྔའི་དགེ་བ་རྒྱ་ཆེན་བསྐལ་པར་བསགས་པ་བས་སྟོང་པ་ཉིད་ཀྱི་གཞུང་འདི་ལ་ཞུགས་པ་དང་། མཆོད་པ་དང་། འདོན་པ་ལ་སོགས་པ་བྱ་བ་ཅུང་ཟད་བྱས་པ་བསོད་ནམས་ཆེའོ། །ཞེས་དང་། ལུས་དང་སྲོག་ལ་ལྟ་བ་རབ་སྤངས་ལ། །སྟོང་པ་ཤིན་ཏུ་ཞི་བ་བསྒོམ་པར་གྱིས། །ཞེས་དང་། ཡང་དག་སྟོང་པ་ཉིད་ལ་མངོན་དགའ་བ། །དེ་དག་བྱང་ཆུབ་ལམ་དུ་ཞུགས་པ་ཡིན། །ཞེས་དང་། ཆོས་ཀྱི་རང་བཞིན་ཤིན་ཏུ་ཞི་བར་གང་ཤེས་པ། །དེ་ནི་ཉོན་མོངས་མ་ལུས་ཐམས་ཅད་སྤངས་པ་ཡིན། །དེ་ནི་བདེར་གཤེགས་ཐུགས་སྲས་བསླབ་པ་ཡོངས་མི་འདོར། །དེ་ནི་རིང་པོར་མི་ཐོགས་རྐང་གཉིས་གཙོ་བོར་འགྱུར། །ཆོས་ཀྱི་རང་བཞིན་ཤིན་ཏུ་ཞི་བར་གང་ཤེས་པ། །དེ་ནི་མདོ་སྡེ་བྱེ་བ་མཐའ་ཡས་འཆད་པར་བྱེད། །དེ་ནི་རྟག་ཏུ་འཛམ་བུའི་གླིང་གི་རྒྱལ་མཚན་འགྱུར། །ཞེས་དེ་ལ་འཇུག་པ་གཙོ་བོར་གདམས་པ་དང་། དེའི་གང་ཟག་ལ་བསྔགས་པ་རྣམ་གྲངས་དུ་མས་གསུངས་ལ། དེའི་ཡུལ་ཅན་གྱི་ཤེས་རབ་ཀྱང་བསོད་ནམས་བྱ་བའི་དངོས་པོ་ཐམས་ཅད་ཟིལ་གྱིས་གནོན་པ་དང་བསླབ་གསུམ་དང་ཕ་རོལ་ཏུ་ཕྱིན་པ་དྲུག་ལས་མཆོག་ཉིད་དུ་རྣམ་གྲངས་དུ་མས་བསྟོད་ཅིང་བསྔགས་པ་ཡིན་ནོ། །དེ་ལྟར་ཆོས་རྣམས་ཀྱི་དེ་བཞིན་ཉིད་དང་། བསྟན་པ་ཟབ་མོའི་དོན་དང་། མཐར་ཐུག་དཔྱོད་པའི་རིགས་པས་མཐོང་བ་དག དོན་གཅིག་ལ་འདུས་པའི་སྟོང་པ་ཉིད་སྤྲོས་པ་ཐམས་ཅད་ཉེ་བར་ཞི་བ་ནི་ཆོས་རྣམས་ཀྱི་སྙིང་པོ་དང་། མཆོག་དང་། བླ་མ་ཉིད་དུ་གྱུར་པ་ཡིན་ལ། དེ་རྟོགས་པའང་བསྟན་པ་ཐམས་ཅད་ཀྱི་དོན་གོ་བ་དང་། སྟོན་པ་ཐམས་ཅད་ཀྱི་ཐུགས་གཟུང་བ་དང་། དོན་ཐམས་ཅད་བསྒྲུབ་པའི་གཏེར་རྙེད་པ་ཡིན་ནོ། །འདི་དག་ནི་སྔོན་གྱི་དགེ་བའི་བཤེས་གཉེན་གཙང་ནག་པས་ཇི་ལྟར་གསུངས་པ་ལ་ཚིག་སྦྱོར་བརླིང་པ་རྣམས་ཅུང་ཟད་བདེར་བཏང་བ་ཙམ་བྲིས་པ་ཡིན་པས་འཆད་ཚུལ་འདི་ལ་བརྟེན་ནས་སྟོང་པ་ཉིད་ལ་མོས་པར་མ་ཟད་འཆད་པ་པོ་སྔོན་གྱི་དམ་པ་རྣམས་ལའང་ཤིན་ཏུ་གུས་པར་བྱ་ཞིང་། རང་ཉིད་ཀྱི་ང་རྒྱལ་བཅག་པར་བྱའོ། །གཉིས་པ་དེ་མིང་གི་དོན་དུ་བསྒྲུབ་པ་ནི། དེ་ལྟ་བུའི་ཆོས་གསུམ་པོ་དེ་དག་ཀྱང་དོན་དམ་པའི་བདེན་པ་ཞེས་པའི་མིང་གིས་ཐོབ་པ་ཡིན་ཏེ། དངོས་པོ་རྣམས་ཀྱི་རང་བཞིན་མཐར་ཐུག་པ་ནི་བདེན་པ་ཞེས་དང་། ཟབ་མོ་རྣམས་ཀྱི་ཡུལ་མཐར་ཐུག་པ་ནི་དོན་ཞེས་དང་། གཉེར་བར་བྱ་བའི་དོན་མཐར་ཐུག་པ་ནི་དམ་པ་ཞེས་བསྟན་པའི་ཕྱིར་ཏེ། པ་ར་མ། ཨརྠ་སཏྱ་ཞེས་པ་གསུམ་མས་རིམ་གྱིས་བཟློག་པ་སྟེ། ཆོས་ཀྱི་དབྱིངས་དང་། ཡང་དག་པའི་མཐའ་ལ་སོགས་པ་ཐམས་ཅད་ཀྱང་འདིའི་མིང་གི་རྣམ་གྲངས་ཡིན་པར་ཤེས་པར་བྱའོ། །གསུམ་པ་དེ་ལ་ནང་འགལ་སྤང་བ་ནི། འོ་ན་སྔར་སྤྲོས་བྲལ་ངོས་གཟུང་བའི་སྐབས་སུ་བརྗོད་བྱ་རྗོད་བྱེད་དང་། ཡུལ་ཡུལ་ཅན་དང་། དགག་སྒྲུབ་ཀྱི་མཚན་མ་ཐམས་ཅད་དང་བྲལ་བར་བརྗོད་ནས་འདིར་དེ་ལྟ་བུའི་ཆེ་བ་ནམ་མཁའི་མེ་ཏོག་གི་ཡོན་ཏན་བརྗོད་པ་ལྟར་ཤེས་པར་མི་ནུས་སོ་ཞེ་ན་དེ་ལྟ་མོད་ཀྱི་འདིར་ཡང་དེ་རྟོག་པའི་ཤེས་པ་དང་། མྱོང་བས་ཡུལ་དུ་བྱས་པའམ་འགའ་ཞིག་གི་བྱེད་རྒྱུར་བསྟན་པ་མ་ཡིན་ཏེ། དཔེ་དང་སྒྲ་དང་རྟགས་ལ་སོགས་པས་ཤེས་བྱ་ལ་རིག་པས་དཔྱད་བཟོད་ཀྱི་ཆོས་ཡོད་པའི་སྒྲོ་འདོགས་བསལ་བའི་རྟོག་བཅས་ཀྱི་ཤེས་རབ་ཀྱིས་སྤྲོས་བྲལ་ཙམ་དུ་ངེས་པའི་ཤུགས་དང་། འཕགས་པའི་མི་རྟོག་པའི་ཤེས་རབ་ཀྱིས་སྤྲོས་པ་མཐའ་དག་ཁེགས་པ་ཉིད་ལ་སྟོང་ཉིད་རྟོགས་ཞེས་དང་། བདེན་པ་མཐོང་ཞེས་བསྙད་པ་ཙམ་ཡིན་གྱི་རྟོག་པ་དང་མྱོང་བས་ཡུལ་དུ་བྱས་ན་དོན་སྤྱི་དང་དངོས་པོ་ལས་མ་འདས་སོ། །འདི་ལ་དགོངས་ནས་མདོ་ལས། འགའ་ཡང་མཐོང་བ་མེད་པ་ནི་དེ་ཁོ་ན་མཐོང་བའོ། །ཞེས་བློས་མཐོང་ཚུལ་དང་། ཆོས་རྣམས་སྟོང་པ་ཡི་གེ་མེད་པ་ཡང་། །ཡི་གེ་མེད་པ་ཉིད་ཅེས་ཡི་གེས་བསྟན། །ཞེས་སྒྲས་བརྗོད་ཚུལ་དང་། དཔེ་ལས་འདས་པའི་ཆོས་དེ་ཡང་། །དཔེ་དག་གིས་ནི་ཉེ་བར་བསྟན། །ཞེས་དཔེས་མཚོན་ཚུལ་གསུངས་པ་ཡིན་ནོ། །སྤྲོས་བྲལ་དེ་ཡོན་ཏན་གྱི་འབྱུང་གནས་སུ་བསྟན་པ་ཡང་བྱེད་རྒྱུར་བསྟན་པ་མ་ཡིན་ཏེ། ཉེས་པ་ཐམས་ཅད་སྤྲོས་པ་འབའ་ཞིག་ཏུ་དམིགས་པ་ལས་བྱུང་བས་ན་སྤྲོས་པ་འགའ་ཡང་མ་མཐོང་བས་ཉེས་པ་ཟློག་པ་ལ་འབྲས་བུའི་མིང་གིས་བསྙད་པ་དང་། ཐོབ་པའི་ཡོན་ཏན་རྣམས་ཀྱང་སྤྲོས་པ་འགག་པའི་ཤེས་རབ་དང་མཚུངས་པར་ལྡན་པ་ལས་སྐྱེ་བས་སྤྲོས་བྲལ་གྱི་འབྲས་བུར་བསྙད་པ་ཡིན་པའི་ཕྱིར། དེ་ལྟར་ན་དེ་དག་རི་བོང་རྭའི་ཡོན་ཏན་དང་མཚུངས་པར་རྟོག་པ་སྤོང་བ་ཡིན་ཏེ། དེ་ལ་དེ་ལྟ་བུའི་དགོངས་པ་དང་རྒྱུ་མཚན་མེད་པའི་ཕྱིར་རོ། །གསུམ་པ་སྤྲོས་བྲལ་དོན་དམ་པའི་མཚན་གཞིར་བསྙད་པའི་ཚུལ་ནི་དེ་ལྟར་ཅིར་ཡང་མ་གྲུབ་པ་ཉིད་ཡིན་ཡང་མ་གྲུབ་པ་ཉིད་གདུལ་བྱས་རྟོགས་པའི་དོན་དུ་མཚན་གཞིར་སྒྲོ་བཏགས་ནས་བསྙད་པ་ཡིན་གྱི་མཚན་ཉིད་བརྟན་པའི་གཞིར་གྱུར་པའི་མཚན་གཞི་ནི་མི་སྲིད་དོ། །དེས་མཚོན་པའི་དོན་ཡང་མཚན་ཉིད་དང་། མཚོན་བྱ་དང་། མཚན་གཞི་གསུམ་དུ་སྒྲོ་བཏགས་པའི་ཐ་སྙད་གསུམ་གྱི་སྒོ་ནས་དོན་དམ་པའི་བདེན་པ་ཞེས་ཀུན་རྫོབ་ཀྱི་བདེན་པའི་ཟླ་བོར་བསྙད་པ་ཡིན་ཏེ། མདོ་ལས། མཚན་ཉིད་མཚན་གཞི་མེད་པ་ཡང་། །དེ་དག་གིས་ནི་བསྙད་པ་ཡིན། །ཞེས་གསུངས་སོ། །གཉིས་པ་མཚོན་བྱའི་རབ་ཏུ་དབྱེ་བ་ལ་གཉིས་ཏེ། བདེན་པ་གཉིས་སུ་དབྱེ་བ་དང་། བདེན་པ་གཉིས་སོ་སོའི་དབྱེ་བའོ། །དང་པོ་ལ་དྲུག་སྟེ། གང་ལ་དབྱེ་བའི་གཞི། གང་འབྱེད་པའི་ངོ་བོ། གང་གིས་འབྱེད་པའི་རྒྱུ་མཚན། ཅི་ལྟར་ཕྱེ་བའི་དོན། ཅི་སྙེད་ཕྱེ་བའི་གྲངས་ངེས། ཕྱེ་བ་སོ་སོའི་སྒྲ་བཤད་པའོ། །དང་པོ་ནི། པ་ཚབ་ལོ་ཙཱ་བས། ཤེས་བྱ་ཙམ་དབྱེ་གཞི་ཡིན་ཅེས་ཟེར་བ་ལ། བཟད་པས་དེ་ནི་མ་ཡིན་ཏེ། ཤེས་བྱ་ནི་དངོས་པོ་དང་དངོས་མེད་གཉིས་སུ་འདུས་ལ། དེ་གཉིས་ཀའང་ཀུན་རྫོབ་བདེན་པ་ཡིན་པའི་ཕྱིར་དང་། དོན་དམ་བདེན་པ་ཤེས་བྱ་ཡང་མ་ཡིན་པའི་ཕྱིར་ཏེ། ཡབ་སྲས་འཇལ་བའི་མདོ་ལས། དོན་དམ་པ་གང་ཡིན་པ་དེ་ནི་བརྗོད་དུ་མེད་པ་སྟེ། ཤེས་པར་བྱ་བ་མ་ཡིན་པ་རྣམ་པར་ཤེས་པར་བྱ་བ་མ་ཡིན་པ་ཞེས་གསུངས་པས་སོ། །ཞེས་བཀག་ནས་བདེན་པ་ཙམ་དབྱེ་གཞིར་འཐད་དེ། འཁྲུལ་ངོར་བདེན་པ་ཀུན་རྫོབ་དང་རིགས་ངོར་བདེན་པ་དོན་དམ་ཡིན་པའི་ཕྱིར། ཞེས་རང་ལུགས་བཞག་པ་མཛད་དོ། །དེ་ལ་ལུགས་སྔ་མ་འགོག་པ་མི་འཐད་དེ། བདེན་པ་གཉིས་སུ་ཕྱེ་བ་ནི་གདུལ་བྱ་ལ་ཐ་སྙད་ཀྱི་སྒོ་ནས་བསྟན་པའི་སྐབས་ཡིན་པས་དེའི་ཚེ་ཐ་སྙད་དུ་སྒྲའི་བསྟན་དོན་དང་། བློས་ཡུལ་དུ་བྱ་དགོས་པའི་ཕྱིར་རོ། །རང་ལུགས་བཞག་པ་དང་ཡང་འགལ་བར་སྣང་སྟེ། ཀུན་རྫོབ་བདེན་པ་བདེན་པ་མ་ཡིན་པའི་ཕྱིར་རོ། །གཉལ་བས་རང་བཞིན་མེད་ཙམ་དབྱེ་གཞི་ཡིན་ཏེ། དོན་དམ་པའི་རང་བཞིན་མེད་ཙམ་ལས་ཀུན་རྫོབ་དང་། བདེན་བརྫུན་གཉིས་ཀའི་རང་བཞིན་མེད་ཙམ་ལས་དོན་དམ་བདེན་པ་ཕྱེ་བའི་ཕྱིར་ཞེས་གསུངས་ཀྱང་། མི་འཐད་དེ། རྟག་མི་རྟག་གཉིས་ཀྱི་དབྱེ་གཞིར་རི་བོང་རྭ་མེད་འཇོག་པ་ལྟར་དབྱེ་གཞི་དང་། དབྱེ་བའི་ཡ་གྱལ་མ་འབྱོར་བའི་ཕྱིར་རོ། །ཐུབ་པ་དགོངས་གསལ་ལས། ཁ་ཅིག བདེན་པ་གཉིས་ལ་དབྱེ་གཞི་མེད་དེ། དེ་གཉིས་ལ་ཐུན་མོང་བའི་སྤྱི་མེད་པའི་ཕྱིར་རོ། །ཞེས་ཟེར་བ་མི་འཐད་དེ། དོན་ལ་ཐུན་མོང་བའི་སྤྱི་མེད་ཀྱང་གཞན་སེལ་གྱི་ངོར་ཐ་སྙད་དུ་བློ་ཙམ་ཞིག་མི་འགལ་ཏེ། སློབ་དཔོན་ཟླ་བ་གྲགས་པས་རིགས་པ་དྲུག་ཅུ་པའི་འགྲེལ་པར། བདེན་པ་གཉིས་སུ་འཇོག་པ་དེ་ནི་འཇིག་རྟེན་པའི་བློ་ལ་ལྟོས་ནས་འཇོག་གོ །ཞེས་གསུངས་པས་སོ། །ཞེས་གསུངས་པ་ལྟར་ན་བློ་ཙམ་དབྱེ་གཞིར་བཞེད་པར་སྣང་སྟེ། ཀུན་རྫོབ་ཉིད་ལའང་འཇིག་རྟེན་གྱི་ཐ་སྙད་དུ་བློ་ལ་སྣང་ཚུལ་གྱི་སྒོ་ནས་བདེན་མི་བདེན་གཉིས་སུ་དབྱེ་བ་ལྟར་ཡུལ་གྱི་གནས་ཚུལ་གྱི་ངོས་ནས་བདེན་པ་གཉིས་སུ་མེད་ཀྱང་། བློས་གནས་ཚུལ་མཐོང་བ་དང་། མ་མཐོང་བའི་སྒོ་ནས་བདེན་པ་གཉིས་སུ་དབྱེ་ཞེས་པའི་དོན་དུ་སྣང་བས་ཤིན་ཏུ་ལེགས་སོ། །དེས་ན་གནས་ཚུལ་རང་ངོས་ནས་མཚན་མཚོན་དང་། དབྱེ་གཞི་དང་དབྱེ་བ་སོགས་བྱར་མེད་ཀྱང་ཐ་སྙད་བདེན་པར་སྒྲོ་བཏགས་ནས་གདུལ་བྱ་ལ་བསྟན་པའི་ཚེ་དབྱེ་བའི་ཡ་གྱལ་ཡོད་པ་ལྟར་དབྱེ་གཞིའང་ཡོད་པར་བྱ་དགོས་པས་རྟེན་འབྲེལ་ཙམ་དབྱེ་གཞིར་བྱས་པའང་འགལ་པ་མེད་དེ། རྟེན་འབྲེལ་གྱི་དོན་སྟོང་ཉིད་དང་། རྟེན་ནས་སྐྱེ་བ་གཉིས་ལ་འཇུག་པར་གསུངས་པའི་ཕྱིར་རོ། །ཤེས་བྱ་ཙམ་དབྱེ་གཞིར་བྱས་ནའང་འགལ་བ་མེད་དེ། ཡབ་སྲས་འཇལ་བའི་མདོ་ལས། ཤེས་པར་བྱ་བའང་འདིར་ཟད་དེ། །ཀུན་རྫོབ་དང་དོན་དམ་པའི་བདེན་པའོ། །ཞེས་གསུངས་པས་སོ། །གསུང་རབ་ཀྱི་བརྗོད་བྱ་ཙམ་དབྱེ་གཞིར་བྱས་ན་ཤིན་ཏུའང་འཐད་དེ། མདོ་ལས། འཇིག་རྟེན་མཁྱེན་པས་གཞན་ལ་མ་གསན་པར། །བདེན་པ་འདི་གཉིས་ཀྱིས་ནི་བསྟན་པར་མཛད། །ཅེས་དང་། རྩ་ཤེར་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་གསུངས་པས་སོ། །དབུ་མའི་གཞུང་ལུགས་འདིར་སྒྲས་བསྟན་དུ་མེད་ཀྱང་ཐ་སྙད་དུ་སྒྲས་བསྟན་པ་དང་། བདེན་པ་གཉིས་པོ་དབྱེར་མེད་ཀྱང་གདུལ་བྱ་ལ་དབྱེ་སྟེ་བསྟན་པ་སོགས་གཞུང་འགྲེལ་གྱི་དགོངས་པ་གོང་འོག་སྒྲིགས་ན་འདི་ཉིད་འཐད་པར་སེམས་སོ། །གཉིས་པ་ནི་བདེན་པ་གཉིས་ཏེ། ཡུལ་ཅན་གྱི་བློའི་སྒོ་ནས་ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པ་གཉིས་ཡིན་ལ་སྔ་མ་ལ་འཇིག་རྟེན་ཉིད་ལྟོས་བདེན་པ་དང་། ལོག་པའི་ཀུན་རྫོབ་གཉིས་ཡོད་པར་འཇུག་པར་གསུངས་སོ། །ཡང་དོན་དམ་བདེན་པ་རྟོགས་པའི་ཐབས་ཐབས་བྱུང་གི་དབང་དུ་བྱས་པའི་དབྱེ་ངོ་ནི། ཐ་སྙད་བདེན་པ་དང་། དོན་དམ་བདེན་པ་གཉིས་སམ། འཇིག་རྟེན་ཀུན་རྫོབ་བདེན་པ་དང་། དོན་དམ་བདེན་པ་གཉིས་ཏེ། ཚིག་གསལ་ལས་བརྗོད་པར་བྱ་བ་དང་། རྗོད་པར་བྱེད་པ་དང་ཤེས་པ་དང་ཤེས་བྱ་ལ་སོགས་པའི་མཚན་ཉིད་ཅན་འཇིག་རྟེན་པའི་དོན་དམ་པ་ཁས་མ་བླངས་པར་དོན་དམ་པ་བསྟན་པར་མི་ནུས་ལ་མ་བསྟན་ན་རྟོག་པར་མི་ནུས་ཤིང་། དོན་དམ་པ་མ་རྟོགས་པར་ཡང་མྱ་ངན་ལས་འདས་པའི་གྲོང་ཁྱེར་དུ་ཕྱིན་པར་མི་ནུས་སོ། །ཞེས་བསྟན་པའི་ཕྱིར། ཐ་སྙད་ལ་ནི་མ་བརྟེན་པར། །དམ་པའི་དོན་ནི་བསྟན་མི་ནུས། །དམ་པའི་དོན་ནི་མ་རྟོགས་པར། །མྱ་ངན་འདས་པ་ཐོབ་མི་འགྱུར། །ཞེས་གསུངས་ཏེ། དེའི་ཕྱིར་མྱ་ངན་ལས་འདས་པ་ཐོབ་པའི་ཐབས་ཡིན་པའི་ཕྱིར་ཆུ་འདོད་པས་སྣོད་ལྟར་ཐོག་མར་གདོན་མི་ཟ་བར་ཀུན་རྫོབ་ཇི་ལྟར་གནས་པ་ཁས་བླང་བར་བྱའོ། །ཞེས་གསུངས་སོ། །དེས་ན་ཀུན་རྫོབ་ཇི་ལྟར་གནས་པ་དང་། འཇིག་རྟེན་པའི་དོན་དམ་པ་དང་། ཐ་སྙད་བདེན་པ་དང་། འཇིག་རྟེན་ཉིད་ལྟོས་བདེན་པའི་ཀུན་རྫོབ་དང་། འཇིག་རྟེན་ཀུན་རྫོབ་བདེན་པ་རྣམས་དོན་གཅིག་ཡིན་པས་ཀུན་རྫོབ་བདེན་པ་ཡིན་ན། དེ་དག་ཡིན་པས་མ་ཁྱབ་སྟེ། དབང་པོ་སྐྱོན་ལྡན་གྱི་ཤེས་པ་ཡུལ་དང་བཅས་པ་རྣམས་ཇི་སྐད་བཤད་པ་དེ་དག་ཏུ་མི་རུང་བའི་ཕྱིར་ཏེ། ཚིག་གསལ་ལས། འཇིག་རྟེན་ཀུན་རྫོབ་ཅེས་གང་ལས་དེ་ལྟར་ཁྱད་པར་དུ་བྱེད་པ་འཇིག་རྟེན་མ་ཡིན་པའི་ཀུན་རྫོབ་ཀྱང་ཡོད་དམ་ཞེ་ན་འདི་ནི་དངོས་པོ་ཇི་ལྟར་གནས་པ་རྗེས་སུ་བརྗོད་པ་ཡིན་གྱི་འདིར་དཔྱད་པ་དེ་མི་འཇུག་གོ །རྣམ་པ་གཅིག་ཏུ་ན་རབ་རིབ་དང་ལིང་ཐོག་སྔོན་པོ་དང་། མིག་སེར་ལ་སོགས་པས་དབང་པོ་ཉམས་པས་མཐོང་བ་ཕྱིན་ཅི་ལོག་ལ་གནས་པ་དེ་དག་ནི་འཇིག་རྟེན་མ་ཡིན་ཏེ། དེ་དག་གི་ཀུན་རྫོབ་གང་ཡིན་པ་དེ་ནི་འཇིག་རྟེན་ཀུན་རྫོབ་བདེན་པ་མ་ཡིན་པས་འཇིག་རྟེན་ཀུན་རྫོབ་བདེན་པ་དང་། ཞེས་དེ་ལས་ཁྱད་པར་དུ་བྱས་སོ། །འདིའང་དབུ་མ་ལ་འཇུག་པ་ལས་རྒྱས་པར་བཤད་པས་དེ་ལས་ཁོངས་སུ་ཆུད་པར་བྱའོ། །ཞེས་གསུངས་ཤིང་འཇུག་པར། གནོད་པ་མེད་པའི་དབང་པོ་དྲུག་རྣམས་ཀྱིས། །ཞེས་སོགས་ཚིགས་བཅད་གཅིག་གསུངས་པས་བསྟན་པའི་ཕྱིར་རོ། །མདོར་ན་དོན་དམ་བདེན་པ་རྟོགས་པའི་ཐབས་སུ་གྱུར་པའི་ཀུན་རྫོབ་བདེན་པ་ནི་ས་བོན་ལས་མྱུ་གུ་སྐྱེ་ཞེས་སོགས་འཇིག་རྟེན་ན་ཐ་སྙད་ཇི་ལྟར་གནས་པ་ལྟར་ཡིན་པས་ཐ་སྙད་བདེན་པ་ཐབས་སུ་གྱུར་པ་དང་། དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་གསུངས་ལ། ཐ་སྙད་བདེན་པ་དེའང་བློ་འཁྲུལ་པའི་ངོར་བདེན་པར་སྣང་བ་ཡིན་གྱི་བདེན་པར་གྲུབ་པ་ནི་མ་ཡིན་ནོ། །ཞེས་ཤེས་པའི་ཆེད་དུ་སྤྱིར་ཀུན་རྫོབ་བདེན་པ་ལ་ཡང་ལོག་གཉིས་སུ་ཕྱེ་བ་སྟེ། མིག་ནི་རབ་རིབ་ཅན་གྱིས་དམིགས་པ་ཡིས། །ཞེས་སོགས་ཚིགས་བཅད་གཅིག་གིས་བསྟན་པའི་ཕྱིར་རོ། །གསུམ་པ་ནི། དངོས་པོར་སྨྲ་བ་དག་གིས་ཡུལ་རང་ངོས་ནས་གནས་ལུགས་ལ་གྲུབ་པ་དང་། མ་གྲུབ་པའི་ཆོས་གཉིས་ཡོད་པའི་རྒྱུ་མཚན་གྱིས་བདེན་པ་གཉིས་འབྱེད་པར་འདོད་ཅིང་། དེ་ལའང་ཉན་ཐོས་སྡེ་གཉིས་ཀྱིས་གདགས་གཞི་དོན་དམ་བདེན་པ་རྫས་གྲུབ་ལ་བཏགས་ཆོས་ཀུན་རྫོབ་བདེན་པ་བཏགས་ཡོད་བཏགས་པར་འདོད་དེ། བྱེ་སྨྲས་གདགས་གཞི་ཤེས་བྱ་གཞི་ལྔ་རྫས་གྲུབ་ནི་དོན་དམ་བདེན་པ་དང་། དེ་དག་ལ་བཏགས་པའི་བུམ་སྣམ་སོགས་དང་གང་ཟག་རྣམས་ནི་ཀུན་རྫོབ་བདེན་པ་འདོད་པའི་ཕྱིར་དང་། མདོ་སྡེ་པས་གདགས་གཞི་དོན་ཤེས་རང་མཚན་དོན་དམ་བདེན་པ་དང་། དེ་དག་ལ་བཏགས་པའི་རགས་པ་དང་རྒྱུན་ལ་སོགས་པ་སྤྱི་མཚན་རྣམས་ནི་ཀུན་རྫོབ་བདེན་པར་འདོད་པའི་ཕྱིར་རོ། །ལུགས་འདི་དག་ལ་དོན་དམ་བདེན་པ་མངོན་སུམ་དུ་མཐོང་བས་གྲོལ་བ་ཐོབ་པ་ནི་མ་ཡིན་ཏེ། ཚུར་མཐོང་གི་རྒྱུད་ཀྱི་རང་མཚན་འཇལ་བྱེད་ཀྱི་རྟོག་མེད་ཀྱི་ཤེས་པ་རྣམས་ཀྱིས་དོན་དམ་བདེན་པ་མངོན་སུམ་དུ་མཐོང་བའི་ཕྱིར་རོ། །རྣམ་རིག་པའི་ལུགས་ལ་གདགས་གཞི་གཞན་དབང་རང་གི་མཚན་ཉིད་ཀྱིས་གྲུབ་པ་ནི་བདེན་གཉིས་འཇོག་པའི་གཞི་ཡིན་ཅིང་། འདི་ལ་བག་ཆགས་ཀྱི་དབང་གིས་གཟུང་འཛིན་གཉིས་སུ་སྣང་བའི་ཤེས་པ་གཞན་དབང་དང་། སྣང་བ་ལྟར་གཟུང་འཛིན་གཉིས་སུ་བཏགས་པའི་ཀུན་བརྟགས་གཉིས་ཀའང་ཀུན་རྫོབ་བདེན་པར་འདོད་པའི་ཀུན་རྫོབ་བདེན་པ་ལ་རང་གི་མཚན་ཉིད་ཀྱིས་གྲུབ་པ་དང་། མ་གྲུབ་པ་གཉིས་ཡོད་དོ། །གཞན་དབང་ལ་ཀུན་བརྟགས་ཀྱིས་སྟོང་པའི་དེ་བཞིན་ཉིད་འདུས་མ་བྱས་དང་། དེ་མངོན་སུམ་དུ་མཐོང་བའི་དག་པ་གཞན་དབང་གཉིས་ཀའང་དོན་དམ་བདེན་པར་འདོད་པས་དོན་དམ་བདེན་པ་ལ་འདུས་བྱས་དང་འདུས་མ་བྱས་གཉིས་ཡོད་དོ། །འོ་ན་བདེན་གཉིས་གང་གིས་འབྱེད་སྙམ་ན་གང་ལ་དངོས་སུ་དམིགས་པས་ཀུན་ནས་ཉོན་མོངས་པ་དང་། རྣམ་པར་བྱང་བར་འགྱུར་བའི་དམིགས་པའི་སྒོ་ནས་འབྱེད་དེ། མ་དག་གཞན་དབང་དང་། ཀུན་བརྟགས་ལ་དངོས་སུ་དམིགས་པ་ནི་ཀུན་ནས་ཉོན་མོངས་པར་འགྱུར་བའི་ཕྱིར་དང་། དག་པ་གཞན་དབང་དང་དེ་བཞིན་ཉིད་ལ་དངོས་སུ་དམིགས་པ་ནི་རྣམ་པར་བྱང་བར་འགྱུར་བའི་ཕྱིར་རོ། །དབུ་མའི་གཞུང་ལུགས་འདིར་ནི་ཡུལ་རང་ངོས་ནས་བདེན་པ་གཉིས་སུ་དབྱེར་མེད་ཀྱི་སྣང་བའི་དངོས་པོ་གཅིག་ལའང་ཡུལ་ཅན་བརྫུན་པ་མཐོང་བ་དང་། ཡང་དག་མཐོང་བ་གཉིས་སམ། འཁྲུལ་མ་འཁྲུལ་གཉིས་སམ། རྨོངས་མ་རྨོངས་གཉིས་སམ། ཕྱིན་ཅི་ལོག་མ་ལོག་གཉིས་སམ། ཚད་མ་ཡིན་མིན་གཉིས་ཀྱིས་མཐོང་ཚུལ་གྱི་སྒོ་ནས་ཀུན་རྫོབ་བདེན་པ་དང་། དོན་དམ་བདེན་པ་གཉིས་སུ་ཕྱེ་བ་སྟེ། དང་པོ་གཉིས་ནི་འཇུག་པར། དངོས་ཀུན་ཡང་དག་བརྫུན་པ་མཐོང་བ་ཡིས། །ཞེས་པ་དངོས་སུ་བཤད་ལ། འདི་ལའང་ཡུལ་ཅན་དེས་མཐོང་ཚུལ་ལ་ཡུལ་བདེན་བརྫུན་གཉིས་སུ་བཞག་པས་ཡང་དག་མཐོང་བ་དང་། བརྫུན་པ་མཐོང་བ་ཞེས་པའི་ཐ་སྙད་དང་། ཡུལ་དེ་དག་མཐོང་བ་ལ་ཡུལ་ཅན་འཁྲུལ་མ་འཁྲུལ་གཉིས་སུ་གཞག་པས་མཐོང་བ་བརྫུན་པ་དང་། མཐོང་བ་ཡང་དག་པ་ཞེས་པའི་ཐ་སྙད་འབྱུང་སྟེ། མཐོང་བ་བརྫུན་པ་ཞེས་དངོས་སུ་འབྱུང་བས་མཐོང་བ་ཡང་དག་པ་ཤུགས་ལ་བསྟན་པའི་ཕྱིར་རོ། །འཁྲུལ་མ་འཁྲུལ་དང་རྨོངས་མ་རྨོངས་གཉིས་ནི་མདོ་ལས། དངོས་རྣམས་སྐྱེ་བ་ཀུན་རྫོབ་སྟེ། །དམ་པའི་དོན་དུ་རང་བཞིན་མེད། །རང་བཞིན་མེད་ལ་འཁྲུལ་པ་གང་། །དེ་ནི་ཡང་དག་ཀུན་རྫོབ་འདོད། །ཅེས་དང་། ཡེ་ཤེས་སྙིང་པོ་ཀུན་ལས་བཏུས་ལས། དངོས་མེད་སྟོང་པ་མཁའ་འདྲ་བ། །ཡོད་པ་རྣམ་པར་སྤངས་པ་ནི། །དེ་ཉིད་མཆོག་སྟེ་ཐར་འདོད་རྣམས། །འཁྲུལ་དང་རྨོངས་ཆེན་གནས་ཡིན་ནོ། །ཞེས་དང་། དེ་ཉིད་དམ་པ་མཁའ་འདྲ་ལ། །གང་དག་སེམས་ནི་རབ་རྨོངས་པ། །དེ་དག་ཆོས་ཅན་ནམ་མཁའ་ལ། །མཆོག་ཏུ་རྨོངས་པ་དག་ཏུ་འགྱུར། །ཞེས་པ་རྣམས་ཀྱིས་བསྟན་ཏོ། །ཕྱིན་ཅི་ལོག་མ་ལོག་ནི་རྒྱུད་བླར། སོ་སོ་སྐྱེ་བོ་ཕྱིན་ཅི་ལོག །བདེན་པ་མཐོང་བ་བཟློག་པ་སྟེ། །ཞེས་དང་། དེ་བཞིན་དུ་དབུ་མའི་གཞུང་ལུགས་རྣམས་ལས། ཀུན་རྫོབ་མཐོང་བའི་བློ་ལ་ཕྱིན་ཅི་ལོག་ཏུ་བཤད་པ་ཤིན་ཏུ་མང་ངོ་། །ཚད་མ་ཡིན་མིན་ནི་མདོ་ལས། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །ཞེས་དང་། དེའི་དོན་འཇུག་པར། གལ་ཏེ་འཇིག་རྟེན་ཚད་མ་ཡིན་ན་ནི། །ཞེས་སོགས་ཀྱིས་བསྟན། འོ་ན་ཀུན་རྫོབ་འཇལ་བའི་ཚད་མ་མེད་པར་འགྱུར་ཞིང་། དེའང་འདོད་ན་ཚིག་གསལ་ལས། དེའི་ཕྱིར་དེ་ལྟར་ཚད་མ་བཞི་ལས་འཇིག་རྟེན་གྱི་དོན་རྟོགས་པར་རྣམ་པར་འཇོག་པ་ཡིན་ནོ། །ཞེས་གསུངས་པ་དང་འགལ་ལོ་ཞེ་ན། དེ་ནི་འཇིག་རྟེན་ལ་ལྟོས་ནས་ཚད་མ་ཡིན་པའི་དོན་ཡིན་གྱི་དབུ་མ་པ་རང་གི་བདེན་པ་གཉིས་སུ་ཕྱེ་བའི་ཚེ་ཚད་མ་མིན་ཏེ། ཡུལ་བརྫུན་པ་མཐོང་བ་དང་། ཡུལ་ཅན་ཚད་མ་ཡིན་པ་འགལ་བའི་ཕྱིར་རོ། །འདི་ལ་རང་རྒྱུད་པ་དག་གིས་ཀུན་རྫོབ་ཉིད་ལའང་བདེན་བརྫུན་གཉིས་སུ་ཕྱེ་ནས་ཡུལ་ཅན་ལ་ཚད་མ་ཡིན་མིན་གཉིས་རང་ལུགས་ལའང་འདོད་པར་སྣང་སྟེ་འོག་ཐལ་རང་གི་ཁྱད་པར་གྱི་སྐབས་སུ་འཆད་དོ། །འདི་དག་ཀྱང་དོན་དམ་ལ་རྣམ་གྲངས་ཡིན་མིན་གྱི་ཁྱད་པར་མ་ཕྱེ་ཞིང་། ཡུལ་ཅན་ལ་གཉིས་སྣང་ཡོད་མེད་མ་ཕྱེ་བའི་དབང་དུ་བྱས་ནས་བདེན་པ་གཉིས་འབྱེད་ཚུལ་ཡིན་ལ་དེ་དག་སོ་སོར་ཕྱེ་ན་བློའི་ཡུལ་དུ་བྱས་པ་དང་། བློའི་ཡུལ་ལས་འདས་པའི་སྒོ་ནས་བདེན་པ་གཉིས་སུ་འབྱེད་དེ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཅེས་དང་། མདོ་ལས། དོན་དམ་པའི་བདེན་པ་ནི་རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱི་ཡུལ་ལས་ཀྱང་འདས་པར་གསུངས་པ་ལྟ་བུའོ། །བཞི་པ་ནི། སྤྱིར་གཉིས་སུ་དབྱེ་བ་ཐམས་ཅད་ལ་བུམ་སྣམ་ལྟར་རྫས་ཐ་དད་དམ། བྱས་མི་རྟག་ལྟར་ངོ་བོ་གཅིག་ལ་ལྡོག་པ་ཐ་དད་དམ། ཟླ་བ་དང་བསིལ་ཟེར་བྱེད་པ་ལྟར་རྣམ་གྲངས་པའི་ཐ་དད་དམ། དངོས་པོ་དང་དངོས་མེད་ལྟར་གཅིག་པ་བཀག་པའི་ཐ་དད་ཡིན་ཞེས་བྱ་བ་འདི་དཔྱད་དགོས་པས་བདེན་པ་གཉིས་ལའང་དེ་དཔྱད་པར་བྱའོ། །འདི་ལ་མདོ་ལས་གཅིག་དང་ཐ་དད་ལ་སྐྱོན་བརྗོད་པའི་ཚུལ་དང་། དེའི་དོན་ལ་གཞན་གྱིས་བརྟགས་པ་དགག་པ་དང་། རིགས་པས་འཐད་པའི་ཕྱོགས་རྣམ་པར་གཞག་པ་གསུམ་ལས། དང་པོ་ནི། དགོངས་འགྲེལ་ལས། བདེན་གཉིས་གཅིག་པ་དང་ཐ་དད་པའི་ཕྱོགས་ལ་སྐྱོན་བཞི་བཞི་གསུངས་ཏེ། དང་པོ་ནི་བདེན་པ་གཉིས་གཅིག་ཡིན་ན། བྱིས་པས་ཀུན་རྫོབ་གཟུགས་དང་སྒྲ་ལ་སོགས་པ་མངོན་སུམ་དུ་མཐོང་བ་དེ་བཞིན་དུ་དོན་དམ་པའི་བདེན་པའང་མངོན་སུམ་དུ་མཐོང་བར་ཐལ་བ་དང་། ཀུན་རྫོབ་ལ་གཟུགས་སྒྲ་ལ་སོགས་པ་སྤྲོས་པའི་དབྱེ་བ་དུ་མ་ཡོད་པ་དེ་བཞིན་དུ་དོན་དམ་པ་ལ་ཡང་དབྱེ་བ་དུ་མ་ཡོད་པར་ཐལ་བ་དང་། ཀུན་རྫོབ་ཀུན་ནས་ཉོན་མོངས་པའི་རང་བཞིན་ནམ་མཚན་ཉིད་ཡིན་པ་ལྟར་དོན་དམ་ཡང་དེ་ལྟར་འགྱུར་བ་དང་། ཀུན་རྫོབ་བྱིས་པས་མཐོང་བ་ལ་སོགས་པའི་དོན་ལོགས་སུ་བཙལ་དུ་མེད་པ་དེ་བཞིན་དུ་དོན་དམ་པའི་བདེན་པའང་དེ་ལྟར་ཐལ་བའོ། །གཉིས་པ་ནི། བདེན་པ་གཉིས་ཐ་དད་ཡིན་ན་འཕགས་པ་རྣམས་ཀྱིས་དོན་དམ་མངོན་སུམ་དུ་རྟོགས་ཀྱང་ཀུན་རྫོབ་ཀྱི་འཆིང་བ་ལས་མི་གྲོལ་བར་ཐལ་བ་དང་། ཆོས་ཉིད་དོན་དམ་དེ་ཀུན་རྫོབ་ཀྱི་སྤྱིའི་མཚན་ཉིད་མ་ཡིན་པར་ཐལ་བ་དང་། འདུ་བྱེད་ཀུན་རྫོབ་རབ་ཏུ་མ་འགྲུབ་པའམ། བདག་མེད་པ་དེ་དོན་དམ་མ་ཡིན་པར་ཐལ་བ་དང་། གང་ཟག་གཅིག་གི་རྒྱུད་ལ་ཀུན་ནས་ཉོན་མོངས་ཀྱི་མཚན་ཉིད་དང་། རྣམ་བྱང་གི་མཚན་ཉིད་གཉིས་དུས་གཅིག་ཏུ་སོ་སོར་གྲུབ་པར་ཐལ་བའོ། །འོ་ན་ཅི་ལྟར་གནས་ཞེ་ན་གཅིག་དང་ཐ་དད་ལས་གྲོལ་བར་གནས་ཏེ། མདོ་དེ་ཉིད་ལས། བློ་གྲོས་ཤིན་ཏུ་རྣམ་དག་འདི་ལྟ་སྟེ། །དཔེར་ན་དུང་གི་དཀར་པོ་ཉིད་ནི་དུང་དང་མཚན་ཉིད་ཐ་དད་པ་མ་ཡིན་ཏེ། དངོས་པོ་གཅིག་པའམ་མཚན་ཉིད་ཐ་དད་དེ། རྟ་གླང་བཞིན་དུ་གདགས་པར་སླ་བ་མ་ཡིན་ནོ། །དུང་གི་དཀར་པོ་ཉིད་ཅི་ལྟ་བར་གསེར་གྱི་སེར་པོ་ཉིད་ཀྱང་དེ་བཞིན་ཞེས་བྱ་བ་ལ་སོགས་པ་གསུངས་སོ། །མདོའི་ཚིག་བསྡུས་པ་ནི། དུང་དང་དཀར་པོ་གསེར་དང་སེར་པོ་དང་། །པི་ཝང་སྒྲ་སྙན་ཨ་དཀར་དྲི་ཞིམ་དང་། །ན་ལེ་ཤཾ་ཚ་ཨ་རུ་ར་སྐ་དང་། །ཤིང་བལ་འཇམ་དང་མར་གྱི་ཉིང་ཁུ་དང་། །འདུ་བྱེད་མི་རྟག་ཟག་བཅས་སྡུག་བསྔལ་སོགས། །མཁས་པས་བདེན་གཉིས་རྟོགས་པར་འདོད་རྣམས་ཀྱིས། །འདུ་བྱེད་དོན་དང་དེ་ལྟར་ཤེས་པར་གྱིས། །བློ་གྲོས་ཤིན་ཏུ་རྣམ་དག་ངས་ནི་དེ་ལྟར་དོན་དམ་པ་མཆོག་ཏུ་ཕྲ་བ། མཆོག་ཏུ་ཟབ་པ། མཆོག་ཏུ་རྟོགས་པར་དཀའ་བ། ཐ་དད་པ་དང་ཐ་དད་པ་མ་ཡིན་པ་ལས་ཡང་དག་པར་འདས་པའི་མཚན་ཉིད་མངོན་པར་རྫོགས་པར་སངས་རྒྱས་ཏེ་སངས་རྒྱས་ནས་ཀྱང་བསྙད་ཅིང་གསལ་བར་བྱས། རྣམ་པར་ཕྱེ། གདགས་པར་བྱས། རབ་ཏུ་བསྟན་ཏོ། །ཞེས་དང་། དེ་ཉིད་སྟོན་པས་བསྡུས་ཏེ་ཚིགས་སུ་བཅད་པས་གསུངས་པ། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོགས་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས་སོ། །གཉིས་པ་ནི་སྔོན་གྱི་མཁས་པ་ཆ་པ་སོགས་མདོའི་དོན་ངོ་བོ་ཐ་དད་པ་དང་། ལྡོག་པ་གཅིག་པ་ལ་སྐྱོན་བརྗོད་པ་ཡིན་པས་ངོ་བོ་གཅིག་དང་ལྡོག་པ་ཐ་དད་ཡིན་ཏེ། བྱང་ཆུབ་སེམས་འགྲེལ་ལས། ཀུན་རྫོབ་ལས་ནི་ཐ་དད་པར། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་ཡིན། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་པ་བཞིན་ནོ། །ཞེས་གསུངས་པས་སོ། །ཞེས་བཞེད་དོ། །དེ་ནི་མི་འཐད་དེ། ངོ་བོ་གཅིག་ཡིན་ན་གཅིག་པའི་ཕྱོགས་ལ་བརྗོད་པའི་སྐྱོན་དང་པོ་སྤོང་མི་ནུས་པའི་ཕྱིར་ཏེ། ཡུལ་ངོ་བོ་གཅིག་དང་ཡུལ་ཅན་སྒྲུབ་འཇུག་ཡིན་པའི་ཕྱིར་རོ། །གཞན་ཡང་བདེན་གཉིས་ངོ་བོ་གཅིག་པའི་དོན་འཕགས་པའི་མཉམ་བཞག་གི་བློ་ངོར་ཡིན་ནམ། ཀུན་རྫོབ་ཇི་ལྟར་སྣང་བ་འདི། །རིགས་པས་དཔྱད་ན་འགའ་མི་རྙེད། །མ་རྙེད་པ་དེ་དོན་དམ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་ལང་གཤེགས་ལས་གསུངས་པ་ལྟར་ཐ་སྙད་པའི་བློ་དང་། མཐར་ཐུག་དཔྱོད་པའི་རིག་ངོར་སྣང་བའི་བདེན་གཉིས་ཀྱི་དབང་དུ་བྱས་པ་ཡིན། དང་པོ་ལྟར་ན་མི་འཐད་དེ་བློ་དེའི་ངོར་གཅིག་དང་ཐ་དད་ཀྱི་སྤྲོས་པ་དང་བྲལ་བའི་ཕྱིར་ཏེ། ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞེས་གསུངས་པ་ལྟར་གྱི་རྟེན་འབྲེལ་གྱི་ཁྱད་ཆོས་མངོན་དུ་གྱུར་པའི་ཕྱིར་རོ། །ཕྱི་མ་ལྟར་ན་ངོ་བོ་གཅིག་པ་འགལ་ཏེ་དེ་ལྟ་བུའི་བདེན་གཉིས་ནི། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་བ་སྟེ། །ཞེས་ཐབས་ཐབས་བྱུང་དུ་གསུངས་ལ་ཐབས་ཐབས་བྱུང་ངོ་བོ་གཅིག་ན་རྒྱུ་འབྲས་ངོ་བོ་གཅིག་ཏུ་ཐལ་བའི་ཕྱིར་རོ། །བྱས་པ་དང་མི་རྟག་པ་དཔེར་སྨྲོས་པའང་མེད་ན་མི་འབྱུང་བ་ངེས་པའི་དཔེར་སྨྲོས་པ་ཡིན་གྱི་ངོ་བོ་གཅིག་པའི་དཔེར་སྨྲོས་པ་ནི་མ་ཡིན་ཏེ། གཞན་དུ་ན་བྱས་མི་རྟག་རྟོག་མེད་ཀྱི་ཤེས་པ་ལ་གཅིག་སྣང་ན་གཉིས་ཀ་སྣང་བས་ཁྱབ་པ་ལྟར་བདེན་པ་གཉིས་ལའང་ཐལ་བའི་ཕྱིར་རོ། །ཕྱིས་ཀྱི་དབུ་མ་པར་རློམ་པ་ཁ་ཅིག་ན་རེ། བདེན་གཉིས་ངོ་བོ་གཅིག་ཏུ་རིགས་པས་གྲུབ་སྟེ། གཞི་གྲུབ་ན་ངོ་བོ་གྲུབ་པས་ཁྱབ། ངོ་བོ་གྲུབ་ན་ངོ་བོ་གཅིག་དང་ཐ་དད་གང་རུང་གིས་ཁྱབ་ཅིང་། བདེན་གཉིས་ངོ་བོ་ཐ་དད་པ་རིགས་པས་ཁེགས་པའི་ཕྱིར་ཞེས་སྨྲའོ། །འདིས་ནི་དབུ་མ་ཐལ་འགྱུར་བའི་ལུགས་ཐུན་མོང་མ་ཡིན་པ་འགོག་པ་སྟེ་དེ་ལྟར་ན་མ་རིག་པ་དང་འདུ་བྱེད་ལྟ་བུ་ནང་གི་རྒྱུ་འབྲས་དང་། ས་མྱུག་ལྟ་བུ་ཕྱིའི་རྒྱུ་འབྲས་ཐམས་ཅད་ཆོས་ཅན། ངོ་བོ་གྲུབ་པར་ཐལ། གཞི་གྲུབ་པའི་ཕྱིར། འདོད་ན། ངོ་བོ་གཅིག་དང་ཐ་དད་གང་རུང་དུ་ཐལ། འདོད་པའི་ཕྱིར། འདོད་ན་ངོ་བོ་གཅིག་ཡིན་ན་ནི་རྒྱུ་ལས་འབྲས་བུ་སྐྱེ་བ་ཐམས་ཅད་བདག་སྐྱེར་ཐལ་ཏེ། རྒྱུ་འབྲས་ངོ་བོ་གཅིག་ཡིན་པའི་ཕྱིར། ངོ་བོ་ཐ་དད་ཡིན་ན། རྒྱུ་ལས་འབྲས་བུ་སྐྱེ་བ་ཐམས་ཅད་གཞན་སྐྱེར་ཐལ་ཏེ། རྒྱུ་འབྲས་ངོ་བོ་ཐ་དད་ཡིན་པའི་ཕྱིར། རྗེས་འབྲང་ཐམས་ཅད་འདུས་ཀྱང་ལན་མེད་དོ། །གཞན་ཡང་བདེན་གཉིས་ངོ་བོ་གཅིག་ཡིན་ན་དཔེའི་སྒོ་ནས་རབ་རིབ་ཅན་གྱིས་མཐོང་བའི་སྐྲ་ཤད་དང་། མཐོང་བ་དག་པས་སྐྲ་ཤད་མེད་པར་མཐོང་བ་གཉིས་ངོ་བོ་གཅིག་ཏུ་ཐལ་ཏེ། བདེན་གཉིས་ངོ་བོ་གཅིག་ཡིན་པའི་ཕྱིར། ཁྱབ་པ་ནི་འཇུག་པར་ལྟོས་ཤིག མཚན་ཉིད་ཀྱི་སྒོ་ནས་གཞན་ལས་ཤེས་མ་ཤེས་དང་། ཞི་མ་ཞི་དང་སྤྲོས་པ་ལས་འདས་མ་འདས་དང་། རྣམ་རྟོག་ཡོད་མེད་སོགས་ངོ་བོ་གཅིག་ཏུ་འགྱུར་ཏེ། བདེན་གཉིས་ངོ་བོ་གཅིག་ཡིན་པའི་ཕྱིར། ཁྱབ་པ་ནི་དབུ་མ་རྩ་བར། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཉིད་མཚན་ཉིད་དོ། །ཞེས་གསུངས་ཞིང་། དེ་ལས་ལྡོག་པ་ཀུན་རྫོབ་བདེན་པར་འདོད་དགོས་པའི་ཕྱིར་ཏེ། དབུ་མ་སྣང་བ་ཀུན་རྫོབ་ཀྱི་བདེན་པ་ནི་དོན་དམ་པའི་བདེན་པ་ལས་ལྡོག་པའི་ངོ་བོ་ཡིན་པའི་ཕྱིར་རོ། །ཞེས་གསུངས་པས་སོ། །གཞན་ཡང་འཇིག་རྟེན་གྱི་ཐ་སྙད་དང་དེ་ལས་འདས་པ་དང་སྒྲས་བརྗོད་པར་བྱ་བ་ཡིན་མིན་དང་སེམས་ཀྱི་རྒྱུ་བ་ཡོད་མེད་དང་བརྗོད་བྱ་རྗོད་བྱེད་ཡིན་མིན་དང་། ཤེས་པ་དང་ཤེས་བྱ་ཡིན་མིན་ངོ་བོ་གཅིག་ཏུ་ཐལ་བ་སོགས་བདེན་གཉིས་སྟོན་པའི་སྐབས་ཀྱི་གཞུང་ཐམས་ཅད་འདི་ལ་གནོད་བྱེད་དུ་འབབ་སྟེ། ལུང་རྣམས་ནི་མང་བས་མ་བྲིས་སོ། །གསུམ་པ་ནི། དཔལ་ལྡན་ས་སྐྱ་པཎྜི་ཏའི་བཞེད་པས། མདོ་ལས་གཅིག་དང་ཐ་དད་ལ་སྐྱོན་བརྗོད་པ་ནི་དོན་དམ་གྱི་དབང་དུ་བྱས་པ་ཡིན་པས་དོན་དམ་པར་གཅིག་དང་ཐ་དད་གཉིས་ཀ་ལས་གྲོལ་ལ། ཐ་སྙད་དུ་དངོས་པོ་དང་དངོས་མེད་ལྟར་གཅིག་པ་བཀག་པའི་ཐ་དད་ཡིན་ཅེས་གསུངས་པ་འདི་ཉིད་རིགས་པས་འཐད་པར་མངོན་ཏེ། དོན་དམ་པར་གཅིག་དང་ཐ་དད་ལས་གྲོལ་བ་དང་། འཕགས་པའི་མཉམ་གཞག་གི་ངོར་གཅིག་དང་ཐ་དད་ལས་གྲོལ་བ་དོན་གཅིག་པའི་ཕྱིར་དང་། སྔར་བཤད་པ་ལྟར་ཐབས་དང་ཐབས་བྱུང་གི་དབང་དུ་བྱས་ན་ཐ་སྙད་མཐོང་བའི་བློས་དངོས་པོར་གཟུང་བ་དེ་ཉིད་ལ་གནས་ལུགས་དཔྱོད་པའི་བློས་དངོས་པོ་མ་རྙེད་པ་ཉིད་ལ་དོན་དམ་དུ་འཇོག་དགོས་པའི་ཕྱིར། འདི་དག་ལའང་གདུལ་བྱའི་བློ་ངོར་བསྟན་པའི་བདེན་གཉིས་ཀྱི་དོན་དམ་བདེན་པ་ནི་འཕགས་པའི་མཉམ་གཞག་གི་གཟིགས་ངོའི་དོན་དམ་བདེན་པ་མཚན་ཉིད་པར་རློམ་ནས་དངོས་སུ་རང་ལ་སྣང་བའི་རྗེས་མཐུན་པ་དེ་ཉིད་གཟུང་བ་ལ་སྣང་བཏགས་གཅིག་ཏུ་ཞེན་ནས་དོན་དམ་བདེན་པ་ཞེས་པའི་ཐ་སྙད་བྱེད་པའི་གཞན་སེལ་གྱི་གནད་ཤེས་པ་གལ་ཆེའོ། །ལྔ་པ་ནི་མཐར་ཐུག་བདེན་པ་གཉིས་སུ་དབྱེར་མེད་པས་གྲངས་ངེས་བྱར་མེད་དེ། མདོ་ལས་བདེན་པ་དམ་པ་ནི་གཅིག་ཁོ་ན་སྟེ། འདི་ལྟ་སྟེ། མི་སླུ་བའི་ཆོས་ཅན་གྱི་མྱ་ངན་ལས་འདས་པའོ། །ཞེས་དང་། རིགས་པ་དྲུག་ཅུ་པར། མྱ་ངན་འདས་པ་བདེན་གཅིག་པུ། །ཞེས་གསུངས་པ་ལྟར་རོ། །གདུལ་བྱའི་ངོར་ཕྱེ་སྟེ་བསྟན་པའི་ཚེ། ཡུལ་ཅན་དང་། ཡུལ་དང་། བྱེད་པ་དང་། ནུས་པའི་སྒོ་ནས་གྲངས་ངེས་པ་དང་བཞི་ལས། དང་པོ་ནི་སྔར་བཤད་པ་ལྟར་ཡུལ་ཅན་གྱི་བློ་ལ་རྨོངས་མ་རྨོངས་སོགས་གཉིས་སུ་གྲངས་ངེས་པའོ། །གཉིས་པ་ནི་གཟུགས་སོགས་ཀྱི་སྣང་བ་གཅིག་ཉིད་ལའང་མ་དཔྱད་པའི་བློ་ངོར་དེ་དང་དེར་བདེན་པ་དང་། དཔྱད་ན་མི་རྙེད་པ་གཉིས་སུ་ངེས་པའོ། །གསུམ་པ་ནི་འཆིང་བར་བྱེད་པ་དང་། གྲོལ་བར་བྱེད་པ་གཉིས་སུ་ངེས་པའོ། །བཞི་པ་ནི་བསོད་ནམས་ཀྱི་ཚོགས་བསགས་པ་དང་། ཡེ་ཤེས་ཀྱི་ཚོགས་བསགས་པའི་གཞིར་གྱུར་པས་སྐུ་གཉིས་ཐོབ་པ་གཉིས་སུ་ཞུགས་པའོ། །དྲུག་པ་ལ་གཉིས་ཏེ་ཀུན་རྫོབ་བདེན་པའི་སྒྲ་དོན་དང་། དོན་དམ་བདེན་པའི་སྒྲ་དོན་ནོ། །དང་པོ་ནི་ཚིག་གསལ་ལས། ཀུན་ནས་སྒྲིབ་པས་ན་ཀུན་རྫོབ་སྟེ། མི་ཤེས་པ་ནི་དངོས་པོའི་དེ་ཁོ་ན་ཉིད་ལ་ཀུན་ལས་འགེབས་པར་བྱེད་པའི་ཕྱིར་ཀུན་རྫོབ་ཅེས་བྱའོ། །ཡང་ན་ཕན་ཚུན་བརྟེན་པས་ན་ཀུན་རྫོབ་སྟེ། ཕན་ཚུན་བརྟེན་པ་ཉིད་ཀྱིས་ན་ཞེས་བྱ་བའི་དོན་ཏོ། །ཡང་ན་ཀུན་རྫོབ་ནི་བརྡ་སྟེ། འཇིག་རྟེན་གྱི་ཐ་སྙད་ཅེས་བྱ་བའི་ཐ་ཚིག་གོ །དེ་ཡང་བརྗོད་པ་དང་བརྗོད་བྱ་དང་། ཤེས་པ་དང་ཤེས་བྱ་ལ་སོགས་པའི་མཚན་ཉིད་ཅན་ནོ། །ཞེས་གསུམ་གསུངས་པའི་དང་པོ་ནི། སཾ་བྲྀཏྟི་སཏྱ་ཞེས་པའི་སཾ་ནི་སམྱག་སྟེ་ཡང་དག་པ། བྲྀཏྟི་ནི་སྒྲིབ་པར་བྱེད་པ་སྟེ་ཡང་དག་པའི་དོན་ལ་སྒྲིབ་པར་བྱེད་པས་ན་ཀུན་བརྟགས་དང་ལྷན་སྐྱེས་སོ་སོར་མ་ཕྱེ་བའི་བདེན་འཛིན་གྱི་གཏི་མུག་ནི་ཀུན་རྫོབ་ཀྱི་མཚན་གཞི་སྟེ་ཡང་དག་པའི་དོན་ལ་སྒྲིབ་པར་བྱེད་པའི་ཕྱིར་རོ། །སཏྱ་ནི་བདེན་པ་སྟེ་བློ་དེའི་ངོར་བདེན་པར་སྣང་བས་ན་བདེན་པའོ། །སྒྲ་དོན་འདི་ནི་འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་ཏེ། །ཞེས་དང་། བདེན་གཉིས་ལས། གང་ཞིག་གིས་སམ་གང་ཞིག་ལ། །ཡང་དག་སྒྲིབ་བྱེད་ཀུན་རྫོབ་འདོད། །ཅེས་གསུངས་པའི་ཡང་དག་སྒྲིབ་བྱེད་དང་པོ་དང་མཐུན་པས་ཐལ་རང་གཉིས་ཀ་མཐུན་པར་སྣང་ངོ་། །གཉིས་པ་ནི། སཾ་ནི་སཾཀྵི་ཞེས་པ་བརྟེན་པའམ་ལྟོས་པ་ལ་འཇུག་ལ་བྲྀཏྟི་ནི་འཇུག་པ་སྟེ་བརྟེན་ནས་འཇུག་པའམ་ལྟོས་ནས་འཇུག་པའོ། །གསུམ་པ་ནི་སཾ་ནི་སཾ་ཀེ་ཏ་ཞེས་པ་བརྡ་ཡིན་ལ་བྲྀཏྟི་ནི་སྔ་མ་ལྟར་ཏེ་བརྡ་འཇུག་པས་ན་ཀུན་རྫོབ་སྟེ། ཕྱི་མ་འདི་གཉིས་ཡུལ་ལ་ཀུན་རྫོབ་ཏུ་བཞག་པར་སྣང་བས་འཕགས་པའི་རྗེས་ཐོབ་ཀྱི་ངོར་སྣང་བའི་གཟུགས་སོགས་ལ། བཅོས་མར་གྱུར་པའི་དངོས་ནི་ཀུན་རྫོབ་ཏུའོ། །ཞེས་ཀུན་རྫོབ་ཙམ་དུ་འཇོག་པའི་ཚེ་སྒྲ་དོན་འདི་ངེས་པར་དགོས་པར་སྣང་སྟེ་སྔ་མའི་ཀུན་རྫོབ་ཀྱི་སྒྲ་དོན་འདི་ལ་མི་འཇུག་པའི་ཕྱིར་རོ། །འདི་གཉིས་ལའང་སཏྱ་ཞེས་པ་སྦྱར་བའི་ཚེ་ལྟོས་ནས་འཇུག་པའང་ཡིན་བློ་འཁྲུལ་པའི་ངོར་བདེན་པའང་ཡིན་པས་ན་ཀུན་རྫོབ་བདེན་པ་དང་། བརྡ་འཇུག་པའང་ཡིན། བློ་འཁྲུལ་པའི་ངོར་བདེན་པའང་ཡིན་པས་ན་ཀུན་རྫོབ་བདེན་པ་ཞེས་གང་གིས་བདེན་པར་འཇོག་པའི་བློ་ཁ་བསྐངས་ནས་བདེན་པའི་དོན་ནི་སྔ་མ་ལྟར་བཤད་པར་བྱའོ། །རང་རྒྱུད་པས་ཤེས་པ་གང་ཞིག་ལ་ཡོད་པའི་ཡང་དག་སྒྲིབ་བྱེད་ཅེས་སྒྲ་བཤད་ནས་འཕགས་པའི་རྗེས་ཐོབ་ལ་སྣང་བའི་ཀུན་རྫོབ་ཙམ་ལའང་ཡང་དག་སྒྲིབ་བྱེད་ཀྱི་སྒྲ་བཤད་མཛད་པར་སྣང་སྟེ། བདེན་གཉིས་ཀྱི་འགྲེལ་པར་བློ་གང་ཞིག་གིས་སམ། བློ་གང་ཞིག་ལ་ཡོད་ན་ཡང་དག་པ་སྒྲིབ་པར་བྱེད་པ་འཇིག་རྟེན་ན་གྲགས་པ་དེ་ལྟ་བུ་ནི་ཀུན་རྫོབ་ཏུ་བཞེད་དེ་ཞེས་གསུངས་པས་སོ། །གཉིས་པ་དོན་དམ་པའི་སྒྲ་དོན་ནི་པ་ར་མ་ཨརྠ་སཏྱ་ཞེས་པའི་པ་ར་མ་ནི་དམ་པ། ཨརྠ་ནི་དོན། སཏྱ་ནི་བདེན་པ་སྟེ། འཕགས་པའི་ཡེ་ཤེས་དམ་པའི་སྤྱོད་ཡུལ་དུ་གྱུར་པའི་ཆོས་ཉིད་ནི་རྟོགས་པར་བྱ་བའམ་བརྟག་པར་བྱ་བ་ཡིན་པས་ན་དོན་འདི་ལས་མཆོག་ཏུ་གྱུར་པ་གཞན་མེད་པས་ན་དམ་པ་མི་བསླུ་བས་ན་བདེན་པ་ཞེས་གཞི་མཐུན་གྱིས་བསྡུ་བ་སྟེ། ཚིག་གསལ་ལས། དོན་ཡང་དེ་ཡིན་ལ་དམ་པ་ཡང་དེ་ཡིན་པའི་དོན་དམ་པའོ། །དེ་ཉིད་བདེན་པ་ཡིན་པས་ན་དོན་དམ་པའི་བདེན་པའོ། །ཞེས་གསུངས་པས་སོ། །ཐལ་འགྱུར་བས་ནི་འདི་ལས་གཞན་དོན་དམ་ཡུལ་ཅན་ལ་བྱས་ནས་དེའི་ངོར་བདེན་པ་ཞེས་པའི་སྒྲ་བཤད་མི་མཛད་ལ། རང་རྒྱུད་པས་ནི་གཉིས་ཀ་མཛད་པར་སྣང་སྟེ། རྟོག་གེ་འབར་བ་ལས་དོན་ཞེས་བྱ་བ་ནི་ཤེས་པར་བྱ་བ་ཡིན་པའི་ཕྱིར་དོན་ཏེ། བརྟག་པར་བྱ་བ་དང་། གོ་བར་བྱ་བ་ཞེས་བྱ་བའི་ཐ་ཚིག་གོ །དམ་པ་ཞེས་པ་ནི་མཆོག་ཅེས་བྱ་བའི་ཚིག་གི་སྒྲ་ཡིན་ཏེ། དོན་དམ་པ་ཞེས་བསྡུ་བ་ནི་དེ་དོན་ཡང་ཡིན་ལ་དམ་པ་ཡང་ཡིན་པས་དོན་དམ་པའོ། །ཡང་ན་དམ་པའི་དོན་ཏེ་རྣམ་པར་མི་རྟོག་པའི་ཡེ་ཤེས་དམ་པའི་དོན་ཡིན་པས་དམ་པའི་དོན་ཏོ། །ཡང་ན་དོན་དམ་པ་དང་མཐུན་པ་སྟེ། དོན་དམ་རྟོགས་པ་དང་རྗེས་སུ་མཐུན་པའི་ཤེས་རབ་ལ་དོན་དམ་པ་དེ་ཡོད་པས་དོན་དམ་པ་དང་མཐུན་པའོ། །ཞེས་དང་། དོན་དམ་པ་ནི་རྣམ་པ་གཉིས་ཏེ། དེ་ལ་གཅིག་ནི་མངོན་པར་འདུ་བྱེད་པ་མེད་པར་འཇུག་པ་འཇིག་རྟེན་ལས་འདས་པ་ཟག་པ་མེད་པ་སྤྲོས་པ་མེད་པའོ། །གཉིས་པ་ནི་མངོན་པར་འདུ་བྱེད་པ་དང་བཅས་པར་འཇུག་པ་བསོད་ནམས་དང་ཡེ་ཤེས་ཀྱི་ཚོགས་ཀྱི་རྗེས་སུ་མཐུན་པ་དག་པ་འཇིག་རྟེན་པའི་ཡེ་ཤེས་ཞེས་བྱ་བ་སྤྲོས་པ་དང་བཅས་པ་སྟེ། འདིར་དེ་དམ་བཅས་པའི་ཁྱད་པར་ཉིད་དུ་གཟུང་བས་ཉེས་པ་མེད་དོ། །ཞེས་དང་། དབུ་མ་སྣང་བ་ལས་ཡང་དག་པའི་དོན། ཐོས་པ་དང་བསམ་པ་དང་སྒོམ་པ་ལས་བྱུང་བའི་ཤེས་རབ་ཐམས་ཅད་ནི་ཕྱིན་ཅི་མ་ལོག་པའི་ཡུལ་ཅན་ཡིན་པའི་ཕྱིར། དོན་དམ་པ་ཞེས་བྱ་བ་སྟེ། འདིའི་དོན་དམ་པ་ཡིན་པའི་ཕྱིར་རོ། །མངོན་སུམ་དང་བརྒྱུད་པས་བྱས་པའི་ཁྱད་པར་ནི་ཡོད་དེ། དེ་དག་གི་བསམ་པའི་དབང་གིས་དངོས་པོ་འདི་དག་ཐམས་ཅད་མ་སྐྱེས་པ་ཁོ་ནར་ཤེས་སོ། །ཞེས་གསུངས་པས་སོ། །རྟོག་གེ་འབར་བའི་ལུང་ལས། འཕགས་པའི་རྗེས་ཐོབ་དག་པ་འཇིག་རྟེན་པའི་ཡེ་ཤེས་དང་། ལུང་ཕྱི་མ་ལས་ཐོས་བསམ་ལས་བྱུང་བའི་རིག་ཤེས་ཚད་མ་ཡུལ་ཅན་དོན་དམ་པར་གྲུབ་ཅིང་། སྔ་མའི་རྣམ་པར་མི་རྟོག་པའི་ཡེ་ཤེས་ཞེས་དང་། འཇིག་རྟེན་ལས་འདས་པ་ཟག་པ་མེད་པ་ཞེས་དང་། ཕྱི་མའི་བསྒོམ་པ་ལས་བྱུང་བ་ཞེས་པ་རྣམས་ཀྱིས་འཕགས་པའི་མཉམ་བཞག་ཡུལ་ཅན་དོན་དམ་པར་གྲུབ་པས་དེ་དག་གི་ངོར་སྐྱེ་བ་སོགས་མ་རྙེད་པ་ནི་བློ་དེའི་ངོར་མི་སླུ་བས་ན་བདེན་པ་ཞེས་བཞེད་པར་སྣང་ངོ་། །གཉིས་པ་བདེན་གཉིས་སོ་སོའི་དབྱེ་བ་ལ་གཉིས་ཏེ། ཀུན་རྫོབ་བདེན་པའི་དབྱེ་བ་དང་། དོན་དམ་བདེན་པའི་དབྱེ་བའོ། །དང་པོ་ལ་གཉིས་ཏེ། བློ་དེ་ཉིད་ཀྱི་ངོར་བདེན་མི་བདེན་གྱི་སྒོ་ནས་དབྱེ་བ་དང་། རྗེས་ཀྱི་ཐ་སྙད་པའི་བློ་ངོར་བདེན་མི་བདེན་གྱི་སྒོ་ནས་དབྱེ་བའོ། །དང་པོ་ནི། གཟུགས་སོགས་སྣང་བའི་དངོས་པོ་གཅིག་ཉིད་བདེན་འཛིན་གྱི་མ་རིག་པའི་ངོར་ཡུལ་རང་གི་སྡོད་ལུགས་ཀྱི་ངོས་ནས་དཔྱད་བཟོད་པའམ་མི་བསླུ་བ་ལྟར་གྱི་བདེན་པར་སྣང་བའི་ཆ་ནས་ཀུན་རྫོབ་བདེན་པ་ཞེས་དང་། འཕགས་པའི་རྗེས་ཐོབ་ཡེ་ཤེས་ཀྱི་ངོར་རྫུན་པ་སྒྱུ་མ་ལྟ་བུ་སྣང་བའི་ཆ་ནས་ཀུན་རྫོབ་ཙམ་ཞེས་པ་གཉིས་སུ་དབྱེ་སྟེ། འཇུག་པར། བཅོས་མར་གྱུར་པའི་དངོས་ནི་ཀུན་རྫོབ་ཏུའོ། །ཞེས་པའི་འགྲེལ་པར། དེ་ལྟར་ན་རེ་ཞིག་བཅོམ་ལྡན་འདས་དེས་ཀུན་རྫོབ་ཀྱི་བདེན་པ་དང་། ཀུན་རྫོབ་ཙམ་གསུངས་པ་ཡིན་ནོ། །དེ་ལ་སོ་སོའི་སྐྱེ་བོ་རྣམས་ཀྱི་དོན་དམ་པ་གང་ཡིན་པ་དེ་ཉིད་འཕགས་པ་སྣང་བ་དང་བཅས་པའི་སྤྱོད་ཡུལ་ཅན་རྣམས་ཀྱི་ཀུན་རྫོབ་ཙམ་ཡིན་ལ་དེའི་རང་བཞིན་སྟོང་པ་ཉིད་གང་ཡིན་པ་དེ་ནི་དེ་རྣམས་ཀྱི་དོན་དམ་པའོ། །ཞེས་གསུངས་སོ། །གཉིས་པ་ནི་ཡང་དག་ཀུན་རྫོབ་དང་། ལོག་པའི་ཀུན་རྫོབ་སྟེ། འདི་ལ་རང་རྒྱུད་པའི་ལུགས་འགོད། ཐལ་འགྱུར་བའི་ལུགས་འགོད། དེ་ཉིད་མཆོག་ཏུ་བསྒྲུབ་པ་དང་གསུམ་ལས། དང་པོ་ནི་སློབ་དཔོན་ཡེ་ཤེས་སྙིང་པོས། བརྟགས་པའི་དོན་གྱིས་དབེན་གྱུར་པ། །དངོས་ཙམ་བརྟེན་ནས་གང་སྐྱེས་པ། །དེ་ནི་ཡང་དག་ཀུན་རྫོབ་འདོད། །ཡང་དག་མ་ཡིན་ཀུན་བརྟགས་ཡིན། །ཞེས་དང་། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པས། །ཀུན་རྫོབ་ཀྱི་ནི་དབྱེ་བ་བྱས། །ཞེས་ཡང་ལོག་གི་ཁྱད་པར་གཉིས་གསུངས་སོ། །འདི་དག་གི་དོན་ལ་བོད་སྔ་རབས་པ་ཁ་ཅིག དོན་བྱེད་ནུས་པའི་དོན་ནི་ཁྱད་པར་གསུམ་ལྡན་ཏེ། བརྟགས་པས་དབེན་པ། བརྟེན་ནས་སྐྱེས་པ། མཐུན་པར་སྣང་བའོ། །དོན་བྱེད་མི་ནུས་པའི་དོན་ནི་གསུམ་པོ་ལས་ལྡོག་པའོ། །ཞེས་འཆད། ཡང་ཁ་ཅིག་སྣང་ལ་དོན་བྱེད་ནུས་པ་ནམ་མཁའི་ཟླ་བ་ལྟ་བུ་ནི་ཡང་དག་པའི་ཀུན་རྫོབ། སྣང་ལ་དོན་བྱེད་མི་ནུས་པ་ཆུ་ནང་གི་ཟླ་བ་ལྟ་བུ་ནི་ལོག་པའི་ཀུན་རྫོབ་ཏུ་འཆད་དེ། མདོར་ན་ཀུན་རྫོབ་ནི་འཇིག་རྟེན་པའི་འཁྲུལ་ངོར་སྣང་བ་འབའ་ཞིག་ལ་བྱེད་དོ། །དེ་ལ་ཡང་དག་པའི་ཀུན་རྫོབ་ཀྱི་མཚན་ཉིད་བཞི་སྟེ། མཐུན་པར་སྣང་། དོན་བྱེད་ནུས། རྒྱུ་རྐྱེན་གྱིས་བསྐྱེད། བརྟགས་ན་དབེན་པའོ། །དེ་ལ་མཐུན་པར་སྣང་བ་ནི་མཁས་པ་པཎྜི་ཏ་ནས་བླུན་པོ་བ་ལང་རྫི་ཡན་ཆད་ལ་སྣོད་བཅུད་ཀྱི་སྣང་བ་འདི་མཐུན་པར་སྣང་བས་སོ། །དོན་བྱེད་ནུས་པ་ནི་སས་འགྲོ་བ་ཐམས་ཅད་ཀྱི་རྟེན་བྱེད་པ་ལ་སོགས་པ་དངོས་པོ་ཐམས་ཅད་ཀྱིས་རང་རང་གི་དོན་བྱེད་ནུས་པས་སོ། །རྒྱུ་རྐྱེན་གྱིས་བསྐྱེད་པ་ནི་འབྱུང་བ་བཞི་ལ་སོགས་པའི་རྒྱུ་རྐྱེན་སྣ་ཚོགས་པ་ལས་ཐམས་ཅད་སྐྱེས་པའོ། །བརྟགས་ན་དབེན་པ་ནི་དེ་དག་ལ་དབུ་མའི་གཏན་ཚིགས་ཆེན་པོ་བཞི། རྟེན་འབྲེལ་གྱི་གཏན་ཚིགས། རྡོ་རྗེ་གཟེགས་མའི་གཏན་ཚིགས། ཡོད་མེད་སྐྱེ་འགོག་གི་གཏན་ཚིགས། གཅིག་དུ་བྲལ་གྱི་གཏན་ཚིགས་སོགས་ཀྱིས་བརྟགས་ན་རང་བཞིན་མེད་པས་སོ། །ཞེས་འཆད་དེ། ཕྱི་མ་འདི་གཉིས་ནི་བདེན་གཉིས་ལས། ཇི་ལྟར་སྣང་བཞིན་ངོ་བོའི་ཕྱིར། །འདི་ལ་དཔྱད་པ་མི་འཇུག་གོ །རྣམ་པར་དཔྱོད་པར་བྱེད་ན་དོན། །གཞན་དུ་སོང་བས་གནོད་པར་འགྱུར། །ཞེས་པའི་དོན་དུ་སེམས་པར་སྣང་ངོ་། །དེ་གཉིས་ཡང་སློབ་དཔོན་གྱི་དགོངས་པ་མ་ཡིན་ཏེ། དེ་དག་ནི་གཞུང་སྔ་ཕྱི་གཉིས་བསྲེས་ཏེ་ཕྱི་མའི་དོན་བྱེད་ནུས་པའི་ཁྱད་ཆོས་གཞུང་སྔ་མས་སྟོན་པར་བྱས་ནས་ཡང་ལོག་གི་ཁྱད་པར་གཅིག་ཏུ་འཆད་པའི་ལུགས་སུ་སྣང་ལ་སློབ་དཔོན་ནི་གཞུང་སྔ་མས་དབུ་མ་པ་རང་ལུགས་ཀྱི་ཁྱད་པར་དང་། ཕྱི་མས་འཇིག་རྟེན་ཉིད་ལ་ལྟོས་པའི་བདེན་གཉིས་ཀྱི་ཁྱད་པར་སྟོན་པར་བཞེད་པའི་ཕྱིར་དང་། ཕྱི་མའི་དོན་བྱེད་ནུས་པའི་ཁྱད་ཆོས་སྔ་མས་འཆད་ན་གཞུང་སྔ་མའི་འགྲེལ་པར་དངོས་ཙམ་ཞེས་པའི་དོན་དོན་བྱེད་ནུས་པ་ལ་གསུངས་པས་དོན་བྱེད་ནུས་པའི་ཁྱད་ཆོས་དོན་བྱེད་ནུས་པར་ཞེས་པའང་མ་འབྲེལ་བའི་ཕྱིར་རོ། །དེས་ན་སློབ་དཔོན་གྱི་དགོངས་པ་ཡང་ལོག་གི་ཁྱད་པར་གཉིས་ལས། གཞུང་སྔ་མའི་དོན་བརྟགས་པའི་དོན་གྱིས་དབེན་པ་དང་། དོན་བྱེད་ནུས་པ་དང་། བརྟེན་ནས་སྐྱེས་པ་དང་། འགྲེལ་པར་མཐུན་པར་སྣང་བ་ཞེས་པའང་ཁ་བསྐང་བས་ཁྱད་པར་བཞི་དང་ལྡན་པ་ནི་ཡང་དག་ཀུན་རྫོབ་སྟེ། འདི་ནི་ཡང་དག་པ་གནས་ལུགས་རྟོགས་པའི་ཐབས་སུ་གྱུར་པ་ཡིན་པས་ཡང་དག་ཀུན་རྫོབ་ཞེས་བཞེད་ཀྱི་འཇིག་རྟེན་ལ་ལྟོས་ནས་བདེན་པར་སྣང་བ་ནི་འདིའི་དོན་མ་ཡིན་ཏེ། བདེན་གཉིས་ལས། ཡང་དག་ཀུན་རྫོབ་རྣམས་ཀྱི་སྐས། །མེད་པར་ཡང་དག་ཁང་ཆེན་གྱི། །སྟེང་དུ་འགྲོ་བར་བྱེད་པ་ནི། །མཁས་ལ་རུང་བ་མ་ཡིན་ནོ། །ཞེས་གསུངས་པས་སོ། །ལོག་པའི་ཀུན་རྫོབ་ནི་སྔར་གྱི་ཁྱད་ཆོས་བཞི་ལས་ལྡོག་པ་བདེན་འཛིན་གྱིས་སྒྲོ་བཏགས་པའི་བདེན་པའི་སྐྱེ་བ་སོགས་ཏེ། སྒྲ་དོན་ཡང་ཡང་དག་པ་གནས་ལུགས་ཀྱི་དོན་རྟོགས་པའི་ཐབས་ལས་ལོག་པས་ན་ལོག་པའི་ཀུན་རྫོབ་ཅེས་བཞེད་དོ། །གཞུང་ཕྱི་མས་ནི་འཇིག་རྟེན་ཉིད་ལ་ལྟོས་ནས་དོན་བྱེད་ནུས་མི་ནུས་ལ་ཡང་ལོག་གི་ཁྱད་པར་འཇོག་པ་ཡིན་གྱི་རང་ལུགས་སུ་ནི་མི་བཞེད་པར་སྣང་སྟེ། ཟླ་བར་བདེན་པར་སྣང་བ་ཡང་འཇིག་རྟེན་ཉིད་ལ་ལྟོས་ནས་ཟླ་བའི་དོན་བྱེད་ནུས་ལ་དེ་ནི་གཞུང་སྔ་མའི་དོན་བྱེད་ནུས་པའི་དོན་དུ་མི་རུང་བའི་ཕྱིར་རོ། །དེ་ལྟར་ཡང་ལོག་གི་ཁྱད་པར་མི་འདྲ་བ་གཉིས་སུ་བཞེད་པའང་གཞུང་སྔ་མའི་སྔ་འགྲེལ་དུ་ཀུན་རྫོབ་ནི་ཡང་དག་པ་དང་ཡང་དག་པ་མ་ཡིན་པའི་བྱེ་བྲག་གིས་རྣམ་པ་གཉིས་ཏེ། དེ་ལ་ཞེས་དང་། གཞུང་ཕྱི་མའི་སྔ་འགྲེལ་དུའང་ཀུན་རྫོབ་ནི་རྣམ་པ་གཉིས་སུ་བསྟན་ཏེ་ཞེས་དང་ཕྱི་འགྲེལ་དུ་ཤེས་པ་གསལ་བའི་རྣམ་པ་ཅན་དུ་འདྲ་ཡང་ཅི་ལྟར་སྣང་བ་བཞིན་དུ་དོན་བྱེད་པ་ལ་བསླུ་བ་དང་། མི་བསླུ་བ་ཡིན་པར་ངེས་པར་བྱས་ནས་ཆུ་ལ་སོགས་པ་དང་། སྨིག་རྒྱུ་ལ་སོགས་པ་བདག་འཇིག་རྟེན་གྱིས་ཡང་དག་པ་དང་། ཡང་དག་པ་མ་ཡིན་པར་རྟོགས་སོ། །དངོས་སུ་ན་གཉིས་ནི་ངོ་བོ་ཉིད་མེད་པ་ཉིད་དུ་ངོ་བོ་ཉིད་མཚུངས་པ་ཁོ་ནའོ། །ཇི་ལྟར་སྣང་བ་བཞིན་དུ་ནི་རྣམ་པར་གནས་སོ། །དོན་བྱེད་པ་ལ་བསླུ་བ་དང་། མི་བསླུ་བ་ཡང་ཇི་ལྟར་གྲགས་པ་ཁོ་ན་བཞིན་ཏེ། །དེའང་ངོ་བོ་ཉིད་མེད་པའི་ཕྱིར་རོ། །ཞེས་གསུངས་པས་སོ། །སློབ་དཔོན་དེའི་རྗེས་འབྲང་ཞི་བ་འཚོས། མ་བརྟགས་གཅིག་པུ་ཉམས་དགའ་ཞིང་། །སྐྱེ་དང་འཇིག་པའི་ཆོས་ཅན་པ། །དོན་བྱེད་པ་དག་ནུས་རྣམས་ཀྱི། །རང་བཞིན་ཀུན་རྫོབ་པ་ཡིན་རྟོགས། །ཞེས་གསུངས་པས་ཡང་དག་ཀུན་རྫོབ་བསྟན་པར་བཞེད་དེ། དེའི་འགྲེལ་པར། མཐོང་བ་དང་འདོད་པའི་དངོས་པོ་རྟེན་ཅིང་འབྲེལ་བར་འབྱུང་བ་ཁོ་ན་དག་ནི་བརྟག་མི་བཟོད་པས་ཡང་དག་པའི་ཀུན་རྫོབ་སྟེ། ཞེས་གསུངས་པས་སོ། །འདིའང་ཡང་ལོག་གི་ཁྱད་པར་སྔ་མའི་དོན་དུ་སྣང་སྟེ། ཡང་དག་ཀུན་རྫོབ་ཏུ་འཇོག་པ་བརྟགས་པས་དབེན་པ་ཁྱད་ཆོས་སུ་བཤད་པའི་ཕྱིར་རོ། །ཀ་མ་ལ་ཤཱི་ལས། དབུ་མ་སྣང་བར་བསྟན་བཅོས་བྱེད་པ་ཁ་ཅིག་གིས་གྲགས་པར་ལས་འདས་ཏེ། དངོས་པོ་རྣམས་རྟག་པ་ལ་སོགས་པའི་ངོ་བོར་ཉེ་བར་བརྟགས་པ་གང་ཡིན་པ་དེ་ནི་ལོག་པའི་ཀུན་རྫོབ་ཏུ་ཡོད་ཅེས་བྱ་སྟེ། དེ་ནི་གྲགས་པར་ཡང་མེད་པའི་ཕྱིར་རོ། །གང་ཡང་རྟེན་ཅིང་འབྲེལ་བར་འབྱུང་བ་དང་རྗེས་སུ་མཐུན་པར་རབ་ཏུ་བརྟགས་པ་དཔེར་ན། འདི་ན་བདག་གམ་སེམས་ཅན་མེད། །ཆོས་འདི་རྒྱུ་དང་བཅས་པ་ཡིན། །ཞེས་བྱ་བ་ལྟ་བུ་དེ་ནི་ཡང་དག་པའི་ཀུན་རྫོབ་ཏུ་ཡོད་ཅེས་བྱའོ། །ཞེས་གསུངས་ཏེ། འདིའང་སྔར་གྱི་ཡང་ལོག་གི་ཁྱད་པར་དང་པོའི་དོན་དུ་སྣང་བས། རང་རྒྱུད་ཤར་བ་གསུམ་ཆར་ཡང་ཁྱད་པར་དང་པོ་དབུ་མ་རང་ལུགས་སུ་བཞེད་པར་སྣང་ངོ་། །གཉིས་པ་ལ་གཉིས་ཏེ། སློབ་དཔོན་ཟླ་བས་ཇི་ལྟར་བཀྲལ་བའི་ཚུལ་དང་། ཇོ་བོ་རྗེ་རྗེས་འབྲང་དང་བཅས་པས་ཇི་ལྟར་བཀྲལ་བའི་ཚུལ་ལོ། །དང་པོ་ལ་གསུམ་སྟེ། དབྱེ་གཞི་ངོས་གཟུང་ཞིང་གཉིས་སུ་དབྱེ་བའི་ཚུལ། དེ་ལྟར་ཕྱེ་བའི་དགོས་པ་བསྟན་པ། དེ་གཉིས་ཀྱི་དོན་དང་ཐ་སྙད་རང་ལུགས་ལ་ཁས་ལེན་མི་ལེན་དཔྱད་པའོ། །དང་པོ་ནི་འཇུག་པར། མཐོང་བ་བརྫུན་པས་རྙེད་པའི་དངོས་པོའི་ངོ་བོ་ཀུན་རྫོབ་བདེན་པར་གཞག་པའི་ཀུན་རྫོབ་བདེན་པ་ནི་འདི་གཉིས་ཀྱི་དབྱེ་གཞི་ཡིན་ལ་དེས་ན་དབུ་མ་རྩ་བར། སངས་རྒྱས་རྣམས་ཀྱིས་ཆོས་བསྟན་པ། །ཞེས་པའི་སྐབས་སུ་བསྟན་པའི་བདེན་གཉིས་དབྱེ་ཚུལ་དང་། འདིའི་བདེན་གཉིས་དབྱེ་ཚུལ་ཅུང་ཟད་མི་འདྲ་སྟེ། སྔ་མ་ནི་རྫོགས་པའི་སངས་རྒྱས་ཀྱིས་གདུལ་བྱ་ལ་དེ་ཁོ་ན་ཉིད་རྟོགས་པའི་ཐབས་དང་ཐབས་བྱུང་དུ་བསྟན་པའི་བདེན་གཉིས་ཡིན་པས་དེའི་ཀུན་རྫོབ་ནི་འཇིག་རྟེན་ཀུན་རྫོབ་བདེན་པ་ཁོ་ན་ཡིན་ལ། འཇུག་པར་ནི། ཡང་ལོག་གཉིས་ཀྱི་དབྱེ་གཞིར་གྱུར་པའི་ཀུན་རྫོབ་བདེན་པ་ཙམ་བཀོད་པ་ཡིན་པའི་ཕྱིར་རོ། །དེ་ལ་ཡང་ལོག་གཉིས་སུ་ཕྱེ་བ་ནི། མཐོང་བ་རྫུན་པའང་རྣམ་པ་གཉིས་འདོད་དེ། །ཞེས་སོགས་ཚིགས་བཅད་གཅིག་གིས་བསྟན། ཡང་དག་ཀུན་རྫོབ་དང་ལོག་པའི་ཀུན་རྫོབ་ངོས་གཟུང་བ་ནི། གནོད་པ་མེད་པའི་དབང་པོ་དྲུག་རྣམས་ཀྱིས། །ཞེས་སོགས་ཚིགས་བཅད་གཅིག་གིས་བསྟན། ལོག་པའི་ཀུན་རྫོབ་བྱེ་བྲག་དུ་བཤད་པ་ནི། མི་ཤེས་གཉིད་ཀྱིས་རབ་བསྐྱོད་མུ་སྟེགས་ཅན། །ཞེས་སོགས་ཚིགས་བཅད་གཅིག་གིས་བསྟན། དེ་ལྟར་གཉིས་སུ་ཕྱེ་བའི་དགོས་པ་ནི། མིག་གི་རབ་རིབ་ཅན་གྱིས་དམིགས་པ་ཡིས། །ཞེས་སོགས་ཚིགས་བཅད་གཅིག་གིས་བསྟན། ཡང་དག་ཀུན་རྫོབ་བྱེ་བྲག་དུ་བཤད་པ་ནི། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །ཞེས་སོགས་ཚིག་རྐང་གསུམ་གྱིས་བསྟན་ཏོ། །གཉིས་པ་ནི་འོ་ན་རྩ་ཤེར་ལས། བདེན་པ་གཉིས་སུ་ཕྱེ་བའི་ཚེ་འཇིག་རྟེན་ཀུན་རྫོབ་བདེན་པ་བསྟན་བཞིན་དུ་འཇུག་པར་འཇིག་རྟེན་ཉིད་ལ་ལྟོས་ནས་བདེན་མི་བདེན་གཉིས་སུ་ཕྱེ་བའི་ཀུན་རྫོབ་བདེན་པ་བསྟན་པའི་དགོས་པ་གང་ཞེ་ན། འཕགས་པའི་གཟིགས་ངོའི་དོན་དམ་བདེན་པ་རིགས་པས་གཏན་ལ་ཕབ་པའི་ཚེ་མ་དཔྱད་པའི་བློ་ངོའི་སྐྱེ་བ་འདི་ཉིད་མཐའ་བཞིར་རྣམ་པར་དཔྱད་ནས་སྐྱེ་བ་མེད་པར་བྱ་དགོས་ལ། དེའི་ཚེ་འཇིག་རྟེན་གྱི་ཐ་སྙད་དུ་སྐྱེ་བ་མཐོང་བས་གནོད་དོ་སྙམ་ན་དེ་ནི་འཕགས་པའི་གཟིགས་ངོ་ལ་ལྟོས་ནས་མཐོང་བ་ཕྱིན་ཅི་ལོག་ཡིན་པས་མི་གནོད་དེ། དཔེར་ན་འཇིག་རྟེན་ཉིད་ལའང་དབང་པོ་སྐྱོན་ལྡན་གྱི་ཤེས་པའི་མཐོང་བས་དབང་པོ་སྐྱོན་མེད་ཀྱི་ཤེས་པས་མཐོང་བ་ལ་མི་གནོད་པ་བཞིན་ནོ། །ཞེས་བསྟན་པའི་ཆེད་དུ་སྟེ། མིག་ནི་རབ་རིབ་ཅན་གྱིས་དམིགས་པ་ཡིས། །ཞེས་པའི་འགྲེལ་པར། གང་གི་ཚེ་སྐྱེ་བ་དགག་པ་འདི་ཁྱད་པར་དུ་ཡིན་པ་དེའི་ཚེ་ཇི་ལྟར་རབ་རིབ་ཅན་རྣམས་ཀྱི་སྐྲ་ལ་སོགས་པའི་ངོ་བོ་ལ་དམིགས་པས་རབ་རིབ་མེད་པའི་ཤེས་པ་ལ་མི་གནོད་པ་དེ་བཞིན་དུ་ཟག་པ་མེད་པའི་ཡེ་ཤེས་དང་བྲལ་བ་སོ་སོ་སྐྱེ་བོ་རྣམས་ཀྱི་ཤེས་པས་ཀྱང་གཟིགས་པ་ཟག་པ་མེད་པ་ལ་གནོད་པ་མ་ཡིན་པས་རྣམ་པ་དེ་ལྟ་བུའི་ཡུལ་ལ་འཇིག་རྟེན་གྱིས་གནོད་པ་མ་ཡིན་ནོ་ཞེས་གསུངས་སོ། །གསུམ་པ་ནི། བོད་སྔ་རབས་པ་རྣམས་ཐལ་རང་གཉིས་ཆར་གྱི་ལུགས་ལ་ཡང་དག་ཀུན་རྫོབ་དང་། ལོག་པའི་ཀུན་རྫོབ་ཀྱི་ཐ་སྙད་ཁྱད་མེད་དུ་ཁས་བླངས་ནས་འཆད་པ་ལ་ཕྱི་མ་ཁ་ཅིག་ན་རེ། ཐལ་འགྱུར་བའི་ལུགས་ལ་ཡང་དག་ཀུན་རྫོབ་ཁས་མི་ལེན་ཏེ། ཡང་དག་ཡིན་ན་ཀུན་རྫོབ་ཡིན་པ་འགལ་བའི་ཕྱིར། དེས་ན་འཇིག་རྟེན་ཉིད་ལ་ལྟོས་ནས་དེ་གཉིས་ཁས་བླངས་པ་ཡིན་ནོ་ཞེས་དང་། ཁ་ཅིག་འཇིག་རྟེན་ཉིད་ལ་ལྟོས་ནས་ཀྱང་དེ་གཉིས་ཀྱི་ཐ་སྙད་ཁས་མི་ལེན་གྱི་འཇིག་རྟེན་ཉིད་ལྟོས་བདེན་པ་དང་། འཇིག་རྟེན་ཉིད་ལྟོས་ལོག་པའི་ཀུན་རྫོབ་ཞེས་པ་ཙམ་ཞིག་ཁས་ལེན་པ་ཡིན་ནོ། །ཞེས་སྨྲའོ། །དེ་དག་ནི་གནད་མ་རྟོགས་པ་སྟེ་འཇིག་རྟེན་ཉིད་ལ་ལྟོས་ནས་བདེན་པ་ཙམ་ལ་ཡང་དག་ཀུན་རྫོབ་ཅེས་པའི་ཐ་སྙད་བྱས་པ་ཡིན་གྱི་ཡང་དག་དང་ཀུན་རྫོབ་ཀྱི་གཞི་མཐུན་ལ་ཡང་དག་ཀུན་རྫོབ་ཀྱི་ཐ་སྙད་བྱས་པ་མ་ཡིན་པའི་ཕྱིར་རོ། །གཞན་དུ་ན་ཀུན་རྫོབ་བདེན་པའང་རང་ལུགས་ལ་ཁས་མི་ལེན་པར་འགྱུར་ཏེ། ཀུན་རྫོབ་ཡིན་ན་བདེན་པ་འགལ་བའི་ཕྱིར་དེ་ཡང་འདོད་ན། འདི་ལས་གཞན་ན་ཆོས་འདི་ནི། །ཞེས་སོགས་ཀྱི་འགྲེལ་པར། རང་ལུགས་ཀྱི་ཀུན་རྫོབ་བདེན་པའི་རྣམ་གཞག་དངོས་པོར་སྨྲ་བ་དང་། ཐུན་མོང་མ་ཡིན་པར་གསུངས་པ་དང་འགལ་ལོ། །གཞན་ཡང་མཐོང་བ་བརྫུན་པ་ལ་དབང་པོ་གསལ་དང་དབང་པོ་སྐྱོན་ལྡན་གྱི་ཤེས་པ་རྣམ་པ་གཉིས་སུ་ཕྱེ་བར་རང་ལུགས་ལ་ཁས་མི་ལེན་པར་འགྱུར་ཏེ། ཁས་བླངས་དེའི་ཕྱིར། དེའང་འདོད་ན། མཐོང་བ་བརྫུན་པ་ཡིན་ན། དབང་པོ་གསལ་ལྡན་གྱི་ཤེས་པ་ཡིན་པར་འགྱུར་རོ། །ལུགས་ཕྱི་མའང་མི་འཐད་དེ། འཇིག་རྟེན་ཉིད་ལ་ལྟོས་ནས་བདེན་པ་དང་ལོག་པའི་རྣམ་གཞག་ཁས་ལེན་ན། དེ་གཉིས་ཀྱི་ཐ་སྙད་ཁས་ལེན་དགོས་པའི་ཕྱིར་ཏེ། བློ་ཀུན་རྫོབ་པ་གཏི་མུག་གི་ངོར་བདེན་པ་ཁས་ལེན་ན། ཀུན་རྫོབ་བདེན་པའི་ཐ་སྙད་ཁས་ལེན་དགོས་པའི་ཕྱིར་རོ། །དེས་ན་འདི་དག་ནི་ཐལ་འགྱུར་བས་ཀུན་རྫོབ་བདེན་པ་ལ་ཡང་དག་ཀུན་རྫོབ་དང་། ལོག་པའི་ཀུན་རྫོབ་གཉིས་སུ་ཕྱེ་བ་ནི་འཇིག་རྟེན་ཉིད་ལ་ལྟོས་ནས་བདེན་བརྫུན་གྱི་སྒོ་ནས་གཉིས་སུ་ཕྱེ་བ་ཡིན་གྱི་རང་ལུགས་ལ་བདེན་བརྫུན་གྱི་སྒོ་ནས་ཕྱེ་བ་མ་ཡིན་པ་དང་། འཇིག་རྟེན་ཉིད་ལ་ལྟོས་ནས་བདེན་བརྫུན་ལ་རང་ལུགས་ཀུན་རྫོབ་གཉིས་ཀྱི་ཐ་སྙད་འཇོག་པའི་ཁྱད་པར་མ་ཕྱེད་པའོ། །དེས་ན་ཐལ་འགྱུར་བའི་ལུགས་ལ་ཡང་དག་ཀུན་རྫོབ་དང་། ལོག་པའི་ཀུན་རྫོབ་ཀྱི་ཐ་སྙད་ཇོ་བོ་རྗེས་གསུངས་པ་འོག་ཏུ་འཆད་པར་འགྱུར་ཞིང་། དེ་གཉིས་ཀྱི་ཁྱད་པར་ནི་གློ་བུར་གྱི་འཁྲུལ་རྒྱུས་གནོད་པ་མེད་པའི་མཐོང་བ་བརྫུན་པའི་ངོར་བདེན་པ་དང་། གློ་བུར་གྱི་འཁྲུལ་རྒྱུས་གནོད་པ་དང་བཅས་པའི་མཐོང་བ་བརྫུན་པའི་ངོར་བདེན་པའོ། །མཚན་གཞི་ནི་དབང་པོ་དྲུག་སྐྱོན་དང་མི་ལྡན་པའི་ཤེས་པ་ཡུལ་བཅས་དང་། དབང་པོ་དྲུག་གློ་བུར་གྱི་སྐྱོན་དང་ལྡན་པའི་ཤེས་པ་ཡུལ་བཅས་ཏེ། ལུགས་འདི་ལ་ཡུལ་གྱི་སྒོ་ནས་ཀུན་རྫོབ་གཉིས་སུ་ཕྱེ་བའི་ཚེ་ཡུལ་ཅན་ལའང་ངེས་པར་ཕྱེ་དགོས་ཏེ། འདི་གཉིས་ཀྱི་ཁྱད་པར་འཇིག་རྟེན་ན་བདེན་བརྫུན་དུ་གྲགས་པའི་སྒོ་ནས་ཕྱེ་བ་ཡིན་ཞིང་འཇིག་རྟེན་ན་ཡུལ་ལ་བདེན་བརྫུན་གྱི་ཁྱད་པར་གྲགས་པ་བཞིན། ཡུལ་ཅན་ལའང་བདེན་བརྫུན་གྱི་ཁྱད་པར་གྲགས་པའི་ཕྱིར་རོ། །དེའང་ཡུལ་སྐྲ་ཤད་ལོག་པའི་ཀུན་རྫོབ་ཡིན་ན། ཡུལ་ཅན་སྐྲ་ཤད་སྣང་བའི་བློ་དེའང་ལོག་པའི་ཀུན་རྫོབ་ཡིན་ཞེས་དམིགས་ཡུལ་གྱི་སྒོ་ནས་ཁས་བླངས་པ་ཡིན་གྱི་གང་ཟག་གི་བདག་དེ་ལོག་པའི་ཀུན་རྫོབ་ཡིན་ན་གང་ཟག་གི་བདག་འཛིན་ལོག་པའི་ཀུན་རྫོབ་ཡིན་ཞེས་འཛིན་སྟངས་ཀྱི་སྒོ་ནས་ཁས་བླངས་པ་ནི་མ་ཡིན་ཏེ། གང་ཟག་གི་བདག་འཛིན་ལྷན་སྐྱེས་ལ་དམིགས་ཡུལ་གང་ཟག་ཡང་དག་ཀུན་རྫོབ་ཡིན་པས་ཡུལ་ཅན་བདག་འཛིན་ལྷན་སྐྱེས་དེའང་ཡང་དག་ཀུན་རྫོབ་ཏུ་ཁས་ལེན་དགོས་པའི་ཕྱིར་དང་། གང་ཟག་གི་བདག་འཛིན་ཀུན་བརྟགས་ལ་དམིགས་ཡུལ་གྲུབ་མཐས་སྒྲོ་བཏགས་པའི་གང་ཟག་ལོག་པའི་ཀུན་རྫོབ་ཡིན་པས་ཡུལ་ཅན་བདག་འཛིན་ཀུན་བརྟགས་དེའང་ལོག་པའི་ཀུན་རྫོབ་ཏུ་ཁས་ལེན་དགོས་པའི་ཕྱིར་རོ། །ཡིད་ཀྱི་དབང་པོ་སྐྱོན་དང་ལྡན་པའི་ལོག་པའི་ཀུན་རྫོབ་ཀྱི་མཚན་གཞིར་ཕྱི་རོལ་པའི་གྲུབ་མཐས་བཏགས་པའི་ཤེས་པ་ཡུལ་བཅས་གསུངས་ཀྱང་། དབུ་མའི་རིགས་པས་དགག་པར་བྱ་བའི་སེམས་ཙམ་པ་མན་ཆད་ཀྱི་གྲུབ་མཐས་བཏགས་པའི་གཟུང་འཛིན་གཉིས་སྟོང་གི་ཤེས་པ་བདེན་པར་གྲུབ་པ་སོགས་ལོག་པའི་ཀུན་རྫོབ་ཏུ་ལུགས་འདི་ལ་ཁས་ལེན་དགོས་པར་སྣང་སྟེ། དེ་དག་ནི་ལྷན་སྐྱེས་ཀྱི་ཆོས་དང་གང་ཟག་མ་ཡིན་གྱི་ཀུན་བརྟགས་ཀྱི་ཆོས་དང་གང་ཟག་ཡིན་པའི་ཕྱིར་དང་། དེ་དག་ཡང་དག་ཀུན་རྫོབ་ཡིན་ན། དོན་དམ་རྟོགས་པའི་ཐབས་སུ་གྱུར་པའི་ཐ་སྙད་བདེན་པར་ཐལ་བ་དང་འཇིག་རྟེན་གྱི་དོན་བདེན་པར་ཐལ་བའི་སྐྱོན་ཡོད་པའི་ཕྱིར་རོ། །སློབ་དཔོན་ཟླ་བའི་བཞེད་པ་བསྟན་ཟིན་ནས་ད་ནི་དོན་གཉིས་པ་ཇོ་བོ་རྗེ་རྗེས་འབྲང་དང་བཅས་པའི་བཞེད་པ་བསྟན་པར་བྱ་སྟེ། བདེན་པ་གཉིས་ལ་འཇུག་པ་ལས། །ཀུན་རྫོབ་རྣམ་པ་གཉིས་སུ་འདོད། །ལོག་པ་དང་ནི་ཡང་དག་གོ །དང་པོ་གཉིས་ཏེ་སྐྲ་ཟླ་དང་། །གྲུབ་མཐའ་ངན་པའི་རྟོག་པའོ། །མ་བརྟགས་གཅིག་པུ་ཉམས་དགའ་བའི། །སྐྱེ་བ་དང་ནི་འཇིག་པའི་ཆོས། །དོན་བྱེད་ནུས་དང་ལྡན་པ་ནི། །ཡང་དག་ཀུན་རྫོབ་ཡིན་པར་འདོད། །ཅེས་གསུངས་ཏེ། དེའི་དགོངས་པ་ལོག་པ་ལ་གཉིས་སུ་ཕྱེ་བ་ལྟར་ཡང་དག་ལའང་གཉིས་སུ་ཕྱེ་དགོས་པས་སྣང་ལ་དོན་བྱེད་མི་ནུས་པ་ཆུ་ནང་གི་ཟླ་བ་ལྟ་བུ་ནི་ལོག་པའི་ཀུན་རྫོབ་སྟེ། ཁྱད་པར་གཅིག་ཡིན་ནོ། །ཡང་གྲུབ་མཐའ་ངན་པས་བཏགས་པའི་བདེན་པའི་སྐྱེ་བ་སོགས་ནི་མ་བརྟགས་གཅིག་པུ་ཉམས་དགའ་བ་སོགས་གསུམ་ལས་ལྡོག་པར་ལོག་པའི་ཀུན་རྫོབ་དང་དབུ་མ་པ་རང་ལུགས་ཀྱི་ཀུན་རྫོབ་ནི་ཁྱད་ཆོས་གསུམ་པོ་དེ་དང་ལྡན་པས་ཡང་དག་ཀུན་རྫོབ་ཏུ་འཇོག་པ་ནི་སྔ་མ་ལས་ཁྱད་པར་གཞན་ཡིན་ཏེ། སྔ་མ་ནི་ཡུལ་སོ་སོ་ཡུལ་ཅན་གྱི་བློ་སོ་སོས་མཐོང་ཚུལ་ལ་འཇོག་ལ། འདི་ནི་ཡུལ་གཅིག་ཉིད་ཡུལ་ཅན་གྱི་བློ་སོ་སོ་ལ་ལྟོས་ནས་འཇོག་པའི་ཕྱིར་རོ། །དེ་ལ་དགེ་བཤེས་སྟོན་པའི་ཞལ་ནས། འཇིག་རྟེན་ཆོས་མཆོག་མན་ཆད་ཀྱི་སོ་སོ་སྐྱེ་བོའི་བློ་ལ་སྣང་ཚད་ཙམ་ལོག་པའི་ཀུན་རྫོབ་ཏུ་འགྲོ་སྟེ། ལོག་ཤེས་ཀྱིས་བསྒྲུབ་པ་ཡིན་པའི་ཕྱིར་རོ། །ལོག་ཤེས་ཀྱི་སྣང་བ་ལ་ལོག་པ་དང་། ཡང་དག་གཉིས་མེད་དེ། དེ་གཉིས་ཀ་ལོག་པའི་ཀུན་རྫོབ་ཡིན་པས་གཉིས་ཀ་ལམ་དུ་མི་འགྲོ་བའི་ཕྱིར་ཡང་དག་གི་སྒྲ་མི་འཇུག་གོ །ས་དང་པོ་ཡན་ཆད་ཀྱི་རྗེས་ཐོབ་ཀྱི་སྣང་བ་དེ་ཐམས་ཅད་ཡང་དག་པའི་ཀུན་རྫོབ་ཅེས་བྱ་སྟེ། སྣང་ཙམ་གཅིག་མ་འགགས་པས་ཀུན་རྫོབ་ཡིན་ལ་དེ་ཉིད་བརྫུན་པར་མངོན་སུམ་དུ་གཟིགས་ཤིང་། དེ་ཉིད་ལམ་དུ་འགྲོ་བའི་ཕྱིར་ན་ཡང་དག་ཀུན་རྫོབ་ཡིན་ནོ་ཞེས་གསུངས་པ་ལ་ལྕེ་སྒོམ་གྱི་ཞལ་ནས་དེ་ཉིད་ཁོ་བོའི་བློ་ལའང་འཐད་དེ། དེ་ཅིའི་སྟེ་ཞེ་ན། སྤྱིར་དམྱལ་བ་མནར་མེད་ནས་ས་བཅུའི་རྗེས་ཐོབ་མན་ཆད་ཀྱི་སྣང་ཚད་ཐམས་ཅད་ཀུན་རྫོབ་ཡིན་ལ། དེའང་སོ་སོ་སྐྱེ་བོའི་བློ་ལ་སྣང་ཚད་ཐམས་ཅད་རང་གི་བློ་འཁྲུལ་པས་བསྐྱེད་པའི་སྣང་བ་ཡིན་ནོ། །དེའང་སོ་སོ་སྐྱེ་བོ་གྲུབ་མཐས་བློ་མ་བསྒྱུར་བ་དང་། ལས་དང་པོ་པ་ལ་སྣང་ཚད་ཙམ་ལོག་པའི་ཀུན་རྫོབ་ཡིན་ཏེ། དེ་ལ་ལོག་པ་དང་ཡང་དག་པ་གཉིས་ཀྱི་སྒྲ་མི་འཇུག་གོ །འོ་ན་སོ་སོ་སྐྱེ་བོའི་བློ་སྣང་ཀུན་རྫོབ་ལ་དབྱེ་བ་མེད་དམ་སྙམ་ན། དབྱེ་བ་ཡོད་དེ། སྣང་ལ་དོན་བྱེད་ནུས་པ་དང་། དོན་བྱེད་མི་ནུས་པ་གཉིས། མིག་སྐྱོན་ཅན་གྱི་སྣང་བ་དང་། སྐྱོན་མེད་ཀྱི་སྣང་བ་གཉིས། བརྟགས་པ་ཡུན་རིང་བ་དང་ཡུན་ཐུང་བ་གཉིས། སྣང་བ་རང་ལོག་ཏུ་འགྲོ་བ་དང་། རང་ལོག་ཏུ་མི་འགྲོ་བ་གཉིས་ལ་སོགས་པའི་དབྱེ་བ་ཡོད་དེ། དེ་ཐམས་ཅད་ལོག་པའི་ཀུན་རྫོབ་འབའ་ཞིག་ཡིན་པས་ཡང་དག་གི་སྒྲ་མི་འཇུག་གོ །མོས་པས་སྤྱོད་པ་རྣམས་ལ་རྟོག་པའི་རྩིས་ཟིན་པའི་དུས་ན་སྣང་བ་ཐམས་ཅད་ཡང་དག་ཀུན་རྫོབ་ཡིན་ལ་རྟོགས་པའི་རྩིས་མ་ཟིན་པའི་དུས་ན་ལོག་པའི་ཀུན་རྫོབ་ཡིན། ས་ཐོབ་ནས་སྣང་ཚད་ཡང་དག་ཀུན་རྫོབ་འབའ་ཞིག་ཡིན་པས་སོ། །འོ་ན་འཇིག་རྟེན་པའི་སྣང་བ་ཐམས་ཅད་བློ་འཁྲུལ་བས་བསྐྱེད་པ་ཡིན་ན། ས་དང་པོ་ནས་ས་བཅུ་པའི་བར་དུ་རྗེས་ཐོབ་ཀྱི་སྣང་བ་དེ་དག་གང་གིས་བསྐྱེད་ཅེ་ན། དེ་ནི་སྔར་ཐོག་མ་མེད་པ་ནས་དངོས་པོར་འཛིན་པའི་བག་ཆགས་མཐུག་པོ་ཡོད་པ་རྣམས་ལམ་བསྒོམས་པའི་སྟོབས་ཀྱིས་དངོས་འཛིན་དང་དེ་ལས་བྱུང་བའི་ཉོན་མོངས་པ་མངོན་དུ་རྒྱུ་རྣམས་སྤངས་ཀྱང་། དེའི་བག་ཆགས་མ་སྤངས་པས་བག་ཆགས་ཀྱིས་བསྐྱེད་པ་སྟེ། དཔེར་ན་གླ་རྩི་བསལ་ཀྱང་སྣོད་སྟོང་པ་ལ་གླ་རྩི་མནམ་པ་ལྟ་བུའོ། །བག་ཆགས་རྩད་ནས་སྤངས་པའི་སངས་རྒྱས་ལ་སྣང་བ་གང་ཡང་མེད་དེ། དོན་དམ་སྤྲོས་བྲལ་འབའ་ཞིག་ཏུ་གནས་པའོ། །སྔགས་ཀྱི་དབང་དུ་བྱས་ན་ཐ་མལ་གྱི་སྣོད་བཅུད་ལ་དངོས་པོར་ཞེན་པ་ནི་ལོག་པའི་ཀུན་རྫོབ་དེའི་གཉེན་པོར་སྣོད་བཅུད་ཐམས་ཅད་དག་པའི་ལྷ་དང་གཞལ་ཡས་ཁང་སྒྱུ་མ་ལྟ་བུར་བསྒྱུར་ནས་བསྒོམ་པ་ནི་ཡང་དག་ཀུན་རྫོབ་བོ། །ཞེས་བཤད་དོ། །འདི་ལ་དཔྱད་པ་ཅུང་ཟད་ཡོད་པ་ནི་འོག་ཏུ་དཔྱོད་དོ། །གསུམ་པ་ཐལ་འགྱུར་པའི་ལུགས་མཆོག་ཏུ་བསྒྲུབ་པ་ནི་དེ་ལྟར་རྣམ་བཞག་དུ་མ་སྣང་བའི་ནང་ནས་དཔལ་ལྡན་ཟླ་བས་འཇིག་རྟེན་ཉིད་ལ་ལྟོས་ནས་བདེན་མི་བདེན་ལ་ཡང་དག་དང་ལོག་པའི་ཀུན་རྫོབ་ཀྱི་ཐ་སྙད་འཇོག་པ་འདི་ཉིད་འཐད་པར་མཐོང་སྟེ། རྣམ་གཞག་གཞན་དག་ནི་ཕལ་ཆེར་ཡང་དག་ཀུན་རྫོབ་དང་། ཡང་དག་པའི་གཞི་མཐུན་བཞེད་པར་སྣང་ལ་དེ་ལྟར་ན་ཡང་དག་དང་། བདེན་པ་དང་། མི་བསླུ་བ་རྣམས་དོན་དམ་བདེན་པའི་དོན་ཡིན་པར་ཐལ་བའི་སྐྱོན་ཡོད་པའི་ཕྱིར་དང་། ཡང་དག་ཀུན་རྫོབ་ཅེས་པའི་ཚིག་ཟུར་གྱི་ཀུན་རྫོབ་ནི་བློ་ཀུན་རྫོབ་པ་མཐོང་བ་བརྫུན་པ་ལའང་གཉིས་སུ་ཕྱེ་བའི་དབང་པོ་གསལ་ལྡན་གྱི་ཤེས་པ་ལ་འཇོག་པའི་ཚེ་དེའི་ངོར་ཡང་དག་ཏུ་སྣང་བ་ལ་ཡང་དག་ཏུ་འཇོག་པའི་ལུགས་མཆོག་ལ་ནི་སྐྱོན་དེ་དག་མི་གནས་པའི་ཕྱིར་རོ། །དེ་ལྟར་འཇིག་རྟེན་ཉིད་ལ་ལྟོས་ནས་བདེན་མི་བདེན་ལ་ཀུན་རྫོབ་གཉིས་སུ་བྱ་བ་ལ་དགོས་པ་ཁྱད་པར་ཅན་ཡང་གཉིས་ཏེ། འཇིག་རྟེན་གྱི་མཐོང་བས་འཕགས་པའི་གཟིགས་པ་ལ་མི་གནོད་པའི་དཔེ་གྲུབ་པ་ནི་སྔར་བཤད་ཟིན་ལ། དགོས་པ་གཉིས་པ་ནི་འཇིག་རྟེན་ལྷན་སྐྱེས་ཀྱི་བློ་ངོར་བདེན་པའི་སྐྱེ་བ་སོགས་སྣང་ཡང་བདེན་པར་མེད་པའི་དཔེ་གྲུབ་པའི་ཆེད་དུ་ཡིན་ཏེ། འདུས་བྱས་སྣང་ཡང་མི་བདེན་པའི་དཔེར་སྒྱུ་མའི་དཔེ་བརྒྱད་ལ་སོགས་པ་བཀོད་པ་རྣམས་དང་ཕུང་པོ་ལྔ་བདེན་པར་མེད་པའི་དཔེར་དབུ་བ་རྡོས་པ་སོགས་བཀོད་པ་རྣམས་འཇིག་རྟེན་ཉིད་ལ་ལྟོས་ནས་ཀྱང་མི་བདེན་པར་གྲུབ་ཟིན་པ་དེ་ཉིད་དཔེར་བཀོད་པ་འབའ་ཞིག་ཏུ་སྣང་བའི་ཕྱིར་རོ། །རང་རྒྱུད་པའི་ཀུན་རྫོབ་གཉིས་ཀྱི་ཁྱད་པར་སྣང་དུ་འདྲ་ཡང་དོན་བྱེད་དག ཅེས་པ་མ་གཏོགས་གཞན་རྣམས་ལ་ཁྱད་པར་འདི་གཉིས་མི་འགྲུབ་པར་སྣང་ངོ་། །ཇོ་བོ་རྗེའི་བཞེད་པའང་། སྐབས་འདི་རང་རྒྱུད་པ་དང་མཐུན་པར་སྣང་མོད་ཀྱི་སློབ་དཔོན་ཟླ་བ་ནས་བརྒྱུད་པའི་བརྒྱུད་པ་གསུམ་པ་ཡིན་པ་དང་། བདེན་གཉིས་ཉིད་ལས་ཀྱང་། སྟོང་ཉིད་གང་གིས་རྟོགས་ཞེ་ན། །དེ་བཞིན་གཤེགས་པས་ལུང་བསྟན་ཅིང་། །ཆོས་ཉིད་བདེན་པ་གཟིགས་པ་ཡི། །ཀླུ་སྒྲུབ་སློབ་མ་ཟླ་གྲགས་ཡིན། །དེ་ལས་བརྒྱུད་པའི་མན་ངག་གིས། །ཆོས་ཉིད་བདེན་པ་རྟོགས་པར་འགྱུར། །ཞེས་གསུངས་པས། ཐལ་འགྱུར་བའི་ཁོངས་སུ་བགྲངས་པའོ། །གཉིས་པ་དོན་དམ་བདེན་པའི་དབྱེ་བ་ནི་རང་གི་ངོ་བོ་ནམ་མཁའ་ལྟར་རོ་གཅིག་པས་རིགས་མི་འདྲ་བའི་དབྱེ་བ་མེད་ཀྱང་རང་རྒྱུད་པ་དག ཡུལ་ཅན་གྱི་བློའི་སྒོ་ནས་རིགས་ཤེས་ཚད་མས་སྤྲོས་པ་བཀག་པའི་དོན་དམ་པ་དང་། འཕགས་པའི་མཉམ་བཞག་གིས་མྱོང་བ་མངོན་དུ་གྱུར་པའི་དོན་དམ་གཉིས་ལས་སྔ་མ་ནི་རྣམ་གྲངས་པ་དང་། ཕྱི་མ་ནི་རྣམ་གྲངས་མ་ཡིན་པར་བཞེད་དོ། །ཡང་སྔོན་གྱི་མཁས་པ་ཁ་ཅིག རང་བཞིན་གཤིས་ཀྱི་དོན་དམ་པ་དང་། དེ་ཉིད་རྟོགས་པ་མངོན་དུ་གྱུར་པའི་དོན་དམ་གཉིས། ཡང་ཐོས་བསམ་གྱིས་སྒྲོ་འདོགས་ཆོད་པའི་དོན་དམ་པ་དང་། རྣལ་འབྱོར་པས་ཉམས་སུ་མྱོང་བའི་དོན་དམ་པ་གཉིས། ཡང་སོ་སོའི་སྐྱེ་བོས་དོན་སྤྱི་རྗེས་དཔག་གི་དོན་དམ་པ་དང་། འཕགས་པ་རྣམས་ཀྱིས་དོན་རང་གི་མཚན་ཉིད་མངོན་སུམ་གྱུར་པའི་དོན་དམ་པ་དང་གཉིས་སུ་ཞེས་བཞེད་དེ། རྣམ་གྲངས་པ་དང་། རྣམ་གྲངས་པ་མ་ཡིན་པའི་སྦྱོར་ཚུལ་ནི་སྔ་མ་དང་འདྲའོ། །ཇོ་བོའི་བདེན་གཉིས་ལས། དམ་པའི་དོན་ནི་གཅིག་ཉིད་དེ། །གཞན་དག་རྣམ་པ་གཉིས་སུ་འདོད། །ཅིར་ཡང་མ་གྲུབ་ཆོས་ཉིད་དེ། །གཉིས་དང་གསུམ་སོགས་ག་ལ་འགྱུར། །ཞེས་གསུངས་པ་འདི་སྔ་རབས་པ་རྣམས་ཀྱིས་རང་རྒྱུད་པས་སྔར་ལྟར་གྱི་དབྱེ་བ་གཉིས་སུ་འདོད་པ་འགོག་པའི་གཞུང་དུ་སྦྱོར་བར་སྣང་སྟེ། རང་རྒྱུད་པས་ཀྱང་རྣམ་གྲངས་པའི་དོན་དམ་བདེན་པ་མཚན་ཉིད་པར་མི་འདོད་པས་གཉིས་སུ་དབྱེ་བ་ཙམ་ལ་སྐྱོན་འདི་མི་འཇུག་མོད། བདེན་པ་གཉིས་ཀྱིས་ཟླས་ཕྱེ་བའི་དོན་དམ་བདེན་པ་ལ་གཉིས་སུ་ཕྱེ་བ་རང་རྒྱུད་པའི་དགོངས་པ་ཡིན་ན་སྐྱོན་འདི་འཇུག་པ་འདྲའོ། །ཐལ་འགྱུར་བས་ནི་སོ་སོ་སྐྱེ་བོས་གནས་ལུགས་དཔྱོད་པའི་རིགས་ཤེས་ཀྱིས་དོན་དམ་གཏན་ལ་ཕབ་པའི་ཚེ་འཕགས་པའི་གཟིགས་ངོའི་དོན་དམ་བདེན་པ་གཏན་ལ་ཕབ་པར་རློམ་ནས་དོན་དམ་བདེན་པ་རྟོགས་ཞེས་པའི་ཐ་སྙད་བྱེད་ལ། དེའི་ཚེ་དོན་དམ་པའི་མཚན་ཉིད་དང་དབྱེ་བ་སོགས་ནི་འཕགས་པའི་གཟིགས་ངོའི་དོན་དམ་བདེན་པ་མཚན་ཉིད་པར་རློམ་ནས་འཇོག་དགོས་པ་ལ་དགོངས་ནས་དབྱེ་བ་གཉིས་སུ་མ་མཛད་དོ། །འདི་དག་ལ་དགག་བྱའི་སྒོ་ནས་གང་ཟག་གི་བདག་གིས་སྟོང་པའི་དོན་དམ་བདེན་པ་དང་ཆོས་ཀྱི་བདག་གིས་སྟོང་པའི་དོན་དམ་བདེན་པ་གཉིས་དང་། ཆོས་ཅན་གྱི་སྒོ་ནས་ཆོས་ཅན་ཕྱིའི་དོན་དམ་བདེན་པ་སོགས་ཉི་ཤུར་དབྱེ་བའང་རུང་མོད་ཀྱི་དེ་དག་གི་ཐ་སྙད་ནི་བདག་མེད་དང་སྟོང་ཉིད་ཀྱི་སྒོ་ནས་འཇོག་པར་སྣང་བས་དེའི་དབྱེ་བར་མ་བཤད་དོ། །གསུམ་པ་མཚོན་པར་བྱེད་པའི་མཚན་ཉིད་ལ་གསུམ་སྟེ། རྒྱ་གར་མཁས་པའི་གཞུང་ལས་བཤད་པའི་ཚུལ། བོད་ཀྱི་སྐྱེས་ཆེན་སྔ་མས་བཤད་པའི་ཚུལ། འཐད་པའི་ཕྱོགས་རྣམས་དགོངས་པ་གཅིག་ཏུ་བསྒྲུབ་པའོ། །དང་པོ་ལ་སློབ་དཔོན་ཟླ་བས་ནི་དོན་དམ་བདེན་པ་དང་། ཀུན་རྫོབ་བདེན་པའི་མཚན་ཉིད་རིམ་པ་ལྟར་མཐོང་བ་ཡང་དག་པས་དངོས་པོའི་ངོ་བོ་རྙེད་པའི་རྙེད་ཡུལ་དང་། མཐོང་བ་བརྫུན་པས་དངོས་པོའི་ངོ་བོ་རྙེད་པའི་རྙེད་ཡུལ་དུ་བཞེད་དོ། །དེ་ལ་སྔ་མས་རྙེད་ཚུལ་ནི་དངོས་པོ་དེའི་ངོ་བོ་ཡོད་མེད་སོགས་སྤྲོས་པའི་མཐའ་ཅིར་ཡང་མ་མཐོང་པའམ། མ་གཟིགས་པའམ། མ་དམིགས་པ་ལ་དངོས་པོའི་ངོ་བོར་རྙེད་ཅེས་ཐ་སྙད་བཏགས་པ་ཙམ་ཡིན་གྱི་དངོས་པོའི་ངོ་བོ་གྲུབ་པ་ཞིག་རྙེད་པ་མ་ཡིན་ཏེ། འཕགས་པ་བདེན་པ་གཉིས་ལ་འཇུག་པ་ལས། ལྷའི་བུ་གལ་ཏེ་དོན་དམ་པར་ན་དོན་དམ་པའི་བདེན་པ་ལུས་དང་། ངག་དང་། ཡིད་ཀྱི་ཡུལ་གྱི་རང་བཞིན་དུ་གྱུར་པ་ནི་དོན་དམ་པའི་བདེན་པ་ཞེས་བྱ་བའི་གྲངས་སུ་མི་འགྲོ་སྟེ། ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །ཞེས་དང་མདོ་ལས། འགའ་ཡང་མཐོང་བ་མེད་པ་ནི། །དེ་ཁོ་ན་ཉིད་མཐོང་བའོ། །ཞེས་པ་འདི་དག་ཐལ་རང་གཉིས་ཆར་གྱི་སྐྱེས་ཆེན་རྣམས་ཀྱིས་ཁུངས་སུ་དྲངས་ནས་དོན་དམ་པའི་བདེན་པ་སྤྲོས་པའི་མཐའ་གང་དུའང་མ་གྲུབ་པ་ལ་འཇོག་པར་མཛད་པའི་ཕྱིར་རོ། །ཡོད་མེད་སོགས་སྤྲོས་པའི་མཐའ་ཅིར་ཡང་མ་གྲུབ་པ་ནི་རིགས་ཤེས་ཚད་མའམ་འཕགས་པའི་མཉམ་གཞག་གིས་དེ་ལས་གཞན་དུ་མཐོང་བར་བྱར་མེད་པས་ན་དང་པོ་ནས་དངོས་པོ་དེའི་རང་བཞིན་དུ་གནས་ཞེས་ཀྱང་བརྗོད་དེ། མདོ་ལས་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་། ཆོས་རྣམས་ཀྱི་ཆོས་ཉིད་ནི་དེ་བཞིན་དུ་གནས་པའོ། །ཞེས་གསུངས་པ་ལྟར་རོ། །ཕྱི་མས་རྙེད་ཚུལ་ནི་དངོས་པོ་དེ་རང་བཞིན་གྱིས་མེད་ཀྱང་ཐོག་མ་མེད་པའི་བདེན་འཛིན་གྱི་བག་ཆགས་སམ་ཚེ་འདིར་གྲུབ་མཐའ་ངན་པ་ཐོས་པའི་རྐྱེན་གྱིས་ཡོད་མེད་སོགས་ཀྱི་མཐའ་གང་རུང་གཅིག་བཟུང་ནས་དངོས་པོ་དེའི་ངོར་སྒྲོ་བཏགས་པས་ན་རྙེད་ཅེས་པའི་ཐ་སྙད་འཇོག་སྟེ། མདོ་ལས། རང་བཞིན་མེད་ལ་འཁྲུལ་པ་གང་། །དེ་ནི་ཡང་དག་ཀུན་རྫོབ་འདོད། །ཅེས་དང་། བདེན་གཉིས་ལས། གང་ཞིག་གིས་སམ་གང་ཞིག་ལ། །ཡང་དག་སྒྲིབ་བྱེད་ཀུན་རྫོབ་འདོད། །ཅེས་པ་ལྟར་རོ། །དེས་ཅི་ལྟར་སྒྲོ་བཏགས་པ་ལྟར་གནས་ལུགས་ལ་དཔྱོད་པའི་རིགས་ཤེས་གྱི་བློའམ། འཕགས་པའི་མཉམ་གཞག་གི་གཟིགས་ངོར་ཅུང་ཟད་ཀྱང་མ་དམིགས་ཤིང་དེ་ལས་གཞན་པའི་དོན་དམིགས་པས་ན་བསླུ་བ་དང་བརྫུན་པ་དང་། མི་བདེན་པ་ཞེས་བྱ་བར་འཇོག་སྟེ། འཇུག་པར། གང་ཕྱིར་དངོས་པོ་འདི་དག་རྣམ་དཔྱད་ན། །དེ་ཉིད་བདག་ཅན་དངོས་ལས་ཚུ་རོལ་ཏུ། །གནས་རྙེད་མ་ཡིན་ཅེས་དང་། བདེན་གཉིས་ལས། རྣམ་པར་དཔྱོད་པར་བྱེད་ན་དོན། །གཞན་དུ་སོང་བས་གནོད་པར་འགྱུར། །ཞེས་གསུངས་པ་ལྟར་རོ། །དེས་ན་དངོས་པོ་ཐམས་ཅད་ཡུལ་ཅན་གྱི་བློས་གནས་ཚུལ་དང་། གནས་ཚུལ་མ་ཡིན་པ་གཉིས་གཟུང་བའི་ཆ་ནས་ངོ་བོ་གཉིས་ཉིད་འཛིན་ཞེས་པ་ཡིན་གྱི། རང་གི་ངོ་བོའི་སྒོ་ནས་ངོ་བོ་གཉིས་འཛིན་པ་ནི་མ་ཡིན་ཏེ། འཇུག་འགྲེལ་ལས། དེ་ལ་དོན་དམ་པ་ནི་ཡང་དག་པར་གཟིགས་པ་རྣམས་ཀྱི་ཡེ་ཤེས་ཀྱི་ཁྱད་པར་གྱི་ཡུལ་ཉིད་ཀྱིས་བདག་གི་རང་གི་ངོ་བོ་རྙེད་པ་ཡིན་གྱི་རང་གི་བདག་ཉིད་ཀྱིས་གྲུབ་པ་ནི་མ་ཡིན་ཏེ། འདི་ནི་ངོ་བོ་གཅིག་ཡིན་ནོ། །གཞན་ནི་སོ་སོ་སྐྱེ་བོ་མ་རིག་པའི་རབ་རིབ་ཀྱི་ལིང་ཐོག་གིས་བློའི་མིག་མ་ལུས་པར་ཁེབས་པ་རྣམས་ཀྱི་མཐོང་བ་བརྫུན་པའི་སྟོབས་ལས་བདག་གི་ཡོད་པ་རྙེད་པ་ཡིན་ཏེ། བྱིས་པ་རྣམས་ཀྱིས་མཐོང་བའི་ཡུལ་དུ་གྱུར་པ་དེ་ལྟ་བུའི་རང་བཞིན་དུ་རང་གི་ངོ་བོས་གྲུབ་པ་ནི་མ་ཡིན་ནོ། །དེའི་ཕྱིར་དངོས་པོ་ཐམས་ཅད་རང་བཞིན་དེ་གཉིས་འཛིན་པ་ཡིན་ནོ། །ཞེས་གསུངས་པས་སོ། །ཕྱིས་ཀྱི་དབུ་མ་སྨྲ་བར་རློམ་པ་དག གཞུང་འདི་དག་གི་དོན་རིགས་ཤེས་ཚད་མས་རྙེད་པའི་རྙེད་དོན་དང་། ཐ་སྙད་ཚད་མས་རྙེད་པའི་རྙེད་དོན་ཞེས་སྨྲ་བ་ནི་ལོག་པར་སྨྲ་བ་ཁོ་ན་སྟེ། རིགས་ཤེས་ཚད་མ་ནི་གཅིག་དུ་བྲལ་སོགས་དབུ་མའི་གཏན་ཚིགས་ཆེན་པོ་རྣམས་ལ་བརྟེན་པའི་རྗེས་དཔག་ཡིན་ལ་འདིའི་མཐོང་བ་ཡང་དག་པ་ནི་གཙོ་བོར་འཕགས་པའི་མཉམ་གཞག་ཡིན་ཅིང་། རིགས་ཤེས་ཚད་མའང་དེའི་ཡུལ་གཏན་ལ་ཕབ་པའི་ཆ་ནས་དེའི་ཁོངས་སུ་བསྡུ་བ་ཡིན་པའི་ཕྱིར་ཏེ། སྔར་དྲངས་པའི་འགྲེལ་པ་ལས་ཀྱང་ཡང་དག་པར་གཟིགས་པ་རྣམས་ཀྱི་ཡེ་ཤེས་ཀྱི་ཁྱད་པར་ཞེས་དང་། དེ་བཞིན་དྲི་མེད་ཡེ་ཤེས་སྤངས་པའི་བློས། །དྲི་མེད་བློ་ལ་གནོད་པ་ཡོད་མ་ཡིན། །ཞེས་པའི་འགྲེལ་པར། ཟག་པ་མེད་པའི་ཡེ་ཤེས་དང་བྲལ་བ་སོ་སོའི་སྐྱེ་བོ་རྣམས་ཀྱི་ཤེས་པས་ཀྱང་། གཟིགས་པ་ཟག་པ་མེད་པ་ལ་གནོད་པ་མ་ཡིན་པས་རྣམ་པ་དེ་ལྟ་བུའི་ཡུལ་ལ་འཇིག་རྟེན་གྱིས་གནོད་པ་མ་ཡིན་ནོ། །ཞེས་གསུངས་པས་སོ། །འདི་དག་ཀྱང་ཐལ་འགྱུར་བས་རྟོགས་པ་དོན་དམ་བདེན་པ་མཚན་ཉིད་པ་འཕགས་པའི་མཉམ་གཞག་གི་གཟིགས་ངོའི་སྤྲོས་པ་མཐའ་དག་དང་བྲལ་བ་དེ་ཉིད་སོ་སོ་སྐྱེ་བོས་གཏན་ལ་ཕབ་པའི་ཚེ་བློ་ངོར་དངོས་སུ་སྣང་བ་རྟོགས་པ་དོན་དམ་བདེན་པ་མ་ཡིན་ཀྱང་དེར་རློམ་ནས་མཚན་ཉིད་སོགས་ཀྱིས་རྣམ་གཞག་བྱེད་པའི་དོན་མ་རྟོགས་པར་ཟད་དོ། །མཐོང་བ་རྫུན་པ་ཐམས་ཅད་ཐ་སྙད་པའི་ཚད་མ་འདོད་པའང་ཤིན་ཏུ་འཁྲུལ་ཏེ། ཐ་སྙད་པའི་ཚད་མ་རྩོད་ཟློག་དང་ཚིག་གསལ་ལས་གསུངས་པ་ལྟར་འཇིག་རྟེན་ན་གྲགས་པའི་ཚད་མ་བཞི་གང་རུང་ཡིན་དགོས་ལ་མཐོང་བ་བརྫུན་པ་ཐམས་ཅད་དེ་ཡིན་ན། དབང་པོ་སྐྱོན་ལྡན་གྱི་ཤེས་པ་རྣམས་ཀྱང་དེར་ཐལ་བའི་ཕྱིར་རོ། །གཞན་ཡང་ཟླ་གཉིས་དང་གྲངས་ཅན་གྱིས་བརྟགས་པའི་གཙོ་བོ་སོགས་འཇིག་རྟེན་གྱི་ཀུན་རྫོབ་དུ་ཡོད་པར་འགྱུར་ཏེ། ཡུལ་ཅན་དེ་དག་ཐ་སྙད་པའི་ཚད་མ་ཡིན་པའི་ཕྱིར། འདོད་ན་མི་ཤེས་གཉིད་ཀྱིས་རབ་བསྐྱོད་མུ་སྟེགས་ཅན། །ཞེས་པའི་འགྲེལ་པར། དེའི་ཕྱིར་འདི་དག་གིས་གང་བརྟགས་པ་ཡོན་ཏན་གསུམ་ལ་སོགས་པ་དེ་དག་ནི་འཇིག་རྟེན་གྱི་ཀུན་རྫོབ་ཏུའང་ཡོད་པ་མ་ཡིན་ནོ། །ཞེས་གསུངས་པ་དང་འགལ་ལོ། །སློབ་དཔོན་ཡེ་ཤེས་སྙིང་པོས་ནི་བདེན་གཉིས་ལས། ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་གཅིག་ཤོས་ཡིན། །ཞེས་མཚན་གཞི་དང་། བསླུ་བ་མེད་པས་རིགས་པ་ནི། །དོན་དམ་ཡིན་ཏེ་ཀུན་རྫོབ་མིན། །དེ་ལྟར་མི་བསླུ་མིན་ཕྱིར་ཏེ། །ཇི་ལྟར་སྣང་བ་དེ་ཉིད་བདེན། །ཞེས་མཚན་ཉིད་གསུངས་སོ། །དེའི་དོན་བདེན་པ་གཉིས་སུ་ཕྱེ་བའི་ཚེ་ཀུན་རྫོབ་ཡུལ་ཅན་དུ་བྱས་ནས་དེའི་ངོར་བདེན་པ་ཞེས་འཇོག་པ་ལྟར་དོན་དམ་ཡང་ཡུལ་ཅན་དུ་བྱས་ནས་དེའི་ངོར་བདེན་པ་ཞེས་འཇོག་དགོས་པས་དེའི་ཚེ་ཡུལ་ཅན་གྱི་དོན་དམ་ནི་གནས་ལུགས་ལ་དཔྱོད་པའི་རིགས་ཤེས་རྗེས་དཔག་ཡིན་པས་དེའི་ངོར་མི་བསླུ་བ་ནི་རེ་ཞིག་བདེན་པ་གཉིས་སུ་ཕྱེ་བའི་སྐབས་ཀྱི་དོན་དམ་བདེན་པ་ཡིན་ཏེ། ཡུལ་ཅན་ལ་དོན་དམ་དང་། ཡུལ་ལ་བདེན་པའི་སྒྲ་དོན་ཚང་བའི་ཕྱིར་སྙམ་དུ་དགོངས་ཏེ། རྗེས་མ། >>>
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།