༼ན༽
༄༅། །ལུང་རིགས་རྣམ་དག་དང་མཐུན་པར་འཆད་དགོས་ཚུལ་བཞུགས།།
༄༅། །བླ་མ་དང་འཇམ་པའི་དབྱངས་ལ་སྤྱི་བོས་ཕྱག་འཚལ་ལོ། །མཁས་པ་རྣམས་ལས་སྡེ་སྣོད་མང་ཐོས་ཤིང༌། །བླང་དོར་ལེགས་པར་འབྱེད་པའི་བློ་གྲོས་ཅན། །ཚུལ་ཁྲིམས་ལེགས་སྲུང་ལྟ་བ་དག་པ་ཅན། །ཀུན་དགའི་མིང་ཅན་དགེ་སློང་འདི་སྐད་སྨྲ། །ཤཱཀྱ་སེང་གེའི་བསྟན་པ་ནི། །འཕགས་པའི་ཡུལ་ན་རབ་ཏུ་གསལ། །དེ་ནས་གངས་རིའི་ཁྲོད་འདི་རུ། །སྐད་གཉིས་སྨྲ་བ་རྣམས་ཀྱིས་བསྒྱུར། །དང་པོ་དག་ཅིང་དར་བ་ལས། །དེང་སང་ཕལ་ཆེར་ནུབ་པར་གྱུར། །དེ་དག་གསལ་བར་བྱེད་འདོད་པས། །བདག་གིས་སྒྲ་དང་ཚད་མ་དང༌། །སྙན་ངག་སྡེབ་སྦྱོར་ཚིག་གི་རྒྱན། །སྡེ་སྣོད་གསུམ་དང་རྒྱུད་སྡེ་བཞི། །ཕྱི་དང་ནང་གི་གྲུབ་པའི་མཐའ། །ཡོངས་སུ་གྲགས་པ་ཕལ་ཆེར་ཐོས། །ཐོས་པ་དེ་དག་ལེགས་པ་སྦྱངས། །གྲུབ་མཐའ་འཁྲུལ་དང་མ་འཁྲུལ་པའི། །རྣམ་པར་དབྱེ་བ་མཁས་པས་མཛད། །དེ་ཡི་རྗེས་སུ་བདག་གིས་ཀྱང༌། །ལུང་དང་རིགས་པས་ཅུང་ཟད་དཔྱད། །མུ་སྟེགས་བྱེད་ཀྱི་རྟོག་གེ་ལ། །རྫས་དང་བྱེ་བྲག་ཡོན་ཏན་སྤྱི། །འབྲེལ་པ་ལ་སོགས་དོན་ལ་འདོད། །བོད་ཀྱི་རྟོག་གེ་བ་རྣམས་ཀྱང༌། །ཕལ་ཆེར་དེ་ལྟར་འདོད་པ་ཡོད། །དེ་དག་བདག་གིས་ལེགས་པར་བཀག །དེ་བཞིན་འདུལ་བའི་སྡེ་སྣོད་དང༌། །ཕ་རོལ་ཕྱིན་པ་མངོན་པ་དང༌། །རྣམ་རིག་དབུ་མའི་གཞུང་ལུགས་དང༌། །གསང་སྔགས་རྒྱུ་སྡེ་བཞི་པོ་ལ། །འཁྲུལ་པར་འཆད་པ་མང་དུ་ཐོས། །ཐོག་མར་སྐྱབས་འགྲོ་ནས་བརྩམས་ཏེ། །སོ་སོར་ཐར་པའི་སྡོམ་པ་དང༌། །སེམས་བསྐྱེད་དང་ནི་དབང་བསྐུར་ལའང༌། །མདོ་རྒྱུད་དང་ནི་མི་མཐུན་པའི། །ཆོ་ག་མཛད་པ་ཅུང་ཟད་མཐོང༌། །རིམ་པ་གཉིས་ཀྱི་ཏིང་འཛིན་དང༌། །ཡེ་ཤེས་ཕྱག་རྒྱ་ཆེན་པོ་དང༌། །རྡོ་རྗེ་ལུས་ཀྱི་གནས་ལུགས་ཀྱི། །ཕྱི་དང་ནང་གི་རྟེན་འབྲེལ་དང༌། །ས་དང་ལམ་གྱི་བགྲོད་ཚུལ་ལ། །ཐུབ་པའི་གསུང་དང་མི་མཐུན་པའི། །རྣམ་པར་བཤད་པ་འགའ་ཞིག་མཐོང༌། །དེ་འདྲའི་ལུགས་ཀྱི་གྲུབ་མཐའ་ལ། །དེ་དག་འཐད་དང་མི་འཐད་ཅེས། །ལུང་དང་རིགས་པས་རྣམ་པར་དཔྱད། །དེ་ལ་འགའ་ཞིག་ལེགས་ཞེས་ཟེར། །འགའ་ཞིག་མི་འཐད་ཅེས་སུ་སྨྲ། །འོན་ཀྱང་འཐད་དམ་མི་འཐད་པ། །ཤེས་རབ་ལྡན་པས་ལེགས་པར་དཔྱོད། །གལ་ཏེ་རིགས་པས་འཐད་ན་བླང༌། །དེ་ལྟ་མིན་ན་དོར་བར་བྱ། །ལེན་ཡང་ལུང་དང་རིགས་པས་བླང༌། །ལུང་ཡང་ངེས་དོན་ཚད་མར་གཟུང༌། །དྲང་བའི་དོན་ལ་ཡིད་མ་རྟོན། །རིགས་པའང་དངོས་པོ་སྟོབས་ཞུགས་གཟུང༌། །རིགས་པ་ལྟར་སྣང་སྙིང་པོ་མེད། །དེ་ལྟར་དགོངས་པ་བརྟགས་ནས་ནི། །བླང་དོར་བྱེད་པ་མཁས་པའི་ལུགས། །མུ་སྟེགས་གཞུང་དང་རྒན་པོའི་ལུགས། །གཅོར་བྱེད་བླུན་པོའི་རྣམ་ཐར་ཡིན། །སྐྱེ་བོ་དམ་པས་དམ་པའི་ཆོས། །ཆོས་ལུགས་དམ་པ་གཟུང་བར་བྱ། །དེ་ལྟར་བྱས་ན་དམ་པའི་ཆོས། །དགོངས་པ་དམ་པ་འགྲུབ་པར་འགྱུར།། །།དེས་ན་བདག་གིས་སངས་རྒྱས་བཅོམ་ལྡན་འདས་ཀྱི་མདོ་རྒྱུད་དྲི་མ་མེད་པ་ལུང་དང་རིགས་པས་གྲུབ་པ། མཁས་པ་རྣམས་ཀྱིས་བཤད་པ། གྲུབ་ཐོབ་རྣམས་ཀྱིས་བསྒོམ་པ། འཕགས་པ་རྣམས་ཀྱིས་བགྲོད་པར་བྱ་བ་འདི་བླ་མ་དམ་པ་རྣམས་ཀྱི་གསུང་དང་མཐུན་ཞིང་ལུང་དང་རིགས་པས་འདི་ལྟར་འཐད་ཅེས་བཤད་ཀྱི་ཕྱོགས་སུ་ལྷུང་བའི་ཡིད་ཀྱིས་བཤད་པ་མ་ཡིན་ནོ། །དེས་ན་ཐམས་ཅད་ཀྱིས་བདག་གིས་བཤད་པ་འདི། ལུང་དང་རིགས་པ་དང་མཐུན་མི་མཐུན་གཟུ་བོའི་བློས་དཔྱད་པར་ཞུ། དཔལ་ལྡན་ས་སྐྱ་པཎྜི་ཏས་སྦྱར་བ་འདི་རེ་ཞིག་རྫོགས་སོ།། །། ༈ གུ་རུས་དཔར་རྩ་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།