༼ཐ༽༄༅། །ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོའི་བརྟག་པའི་རྣམ་པར་བཤད་པ་གཞན་ཕན་ཀུན་ཁྱབ་ཅེས་བྱ་བ་བཞུགས་སོ།།
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པའི་རྣམ་པར་བཤད་པ་གཞན་ཕན་ཀུན་ཁྱབ་ཅེས་བྱ་བ། བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཇི་སྙེད་ཆོས་ཀུན་ཇི་ལྟའི་དབྱིངས་ཉིད་དུ། །ཡེ་ཤེས་མིག་གིས་རིག་ནས་ཐུགས་རྗེ་ཡིས། །ལམ་མཆོག་རྣམ་པར་སྣང་བའི་འོད་མཛད་པ། །བླ་མ་འཁོར་ལོའི་དབང་ཕྱུག་ཉིད་ལ་འདུད། །གང་ཐུགས་གཉིས་མེད་དང་པོའི་སངས་རྒྱས་མཆོག །འཁོར་གྱི་ཚུལ་འཛིན་གསང་རྒྱུད་སྡུད་མཛད་པ། །རྡོར་སེམས་ཀུན་བཟང་ཕྱག་ན་རྡོ་རྗེ་སོགས། །མཚན་མཆོག་དུ་མས་སྤྲས་ལ་གུས་བཏུད་ནས། །དཔལ་ལྡན་ངན་སོང་སྦྱོང་བའི་རྒྱུད་ཀྱི་དོན། །རྨད་བྱུང་བརྒྱུད་པའི་ཚུལ་ལུགས་ཇི་བཞིན་དུ། །རང་ཉིད་དྲན་པ་གསོ་ཞིང་གཞན་དག་ལའང་། །ཕན་གདགས་ཆེད་དུ་ཅི་ནུས་དབྱེ་བར་བྱ། །འདི་ལ་དོན་གཉིས་ཏེ། བཤད་པའི་སྔོན་དུ་འགྲོ་བ་དང་། བཤད་པ་དངོས་སོ། །དང་པོ་ལ་ལྔ་སྟེ། ཕྱོགས་གར་གཏོགས་ངོས་བཟུང་བ། དེ་འཇིག་རྟེན་དུ་ཇི་ལྟར་བྱུང་བའི་ཚུལ། དེ་ལ་རྒྱ་བོད་དུ་བཤད་སྲོལ་ཇི་ལྟར་བྱུང་བའི་ཚུལ། དེའི་བརྗོད་བྱ་ངོས་བཟུང་བ། བཤད་ཐབས་ཀྱི་མན་ངག་བསྟན་པའོ། །དང་པོ་ནི། སྔགས་དོན་རྣམ་གཟིགས་ལས། རྣལ་འབྱོར་སྤྱོད་དང་བྱ་བའི་རྒྱུད། །དེ་བཞིན་ཕ་རོལ་ཕྱིན་པའི་ཚུལ། །ཞེས་གསུངས་པ་ལྟར། བྱ་བ་དང་། སྤྱོད་པ་དང་། རྣལ་འབྱོར་གྱི་རྒྱུད་གསུམ་ལས། ཁ་ཅིག་རྒྱུད་འདི་བདག་གི་རྣལ་འབྱོར་མི་གསལ་ཞིང་། བྲི་བསྐྱེད་ཤིན་ཏུ་གསལ་བས་ན། སྤྱོད་པའི་རྒྱུད་ཡིན་ནོ་ཞེས་ཟེར་རོ། །དེ་ནི་མི་འཐད་དེ། ཚེ་དཔག་མེད་ཀྱི་སྐབས་ནས་བདག་གི་རྣལ་འབྱོར་གསལ་བར་གསུངས་ཤིང་། སྤྱོད་རྒྱུད་ལ་ཡང་བདག་གི་རྣལ་འབྱོར་གསལ་བས། བདག་གི་རྣལ་འབྱོར་མི་གསལ་བ་དེ་སྤྱོད་རྒྱུད་ཡིན་པའི་ཤེས་བྱེད་དུ་མི་རུང་བའི་ཕྱིར་རོ། །དེས་བྱ་རྒྱུད་ཡིན་པ་ཡང་ཁེགས་པས་ན་རྣལ་འབྱོར་གྱི་རྒྱུད་ཡིན་ཏེ། ཚེ་དཔག་མེད་ཀྱི་སྐབས་ནས། རྡོ་རྗེ་སེམས་པའི་གནས་འདུག་ནས། །ཐམས་ཅད་ཟོས་ཏེ་ཀུན་བྱས་ཀྱང་། །འགྲུབ་འགྱུར་ཉེས་པས་མི་གོས་ན། །སྙིང་རྗེར་ལྡན་པས་སྨོས་ཅི་དགོས། །ཞེས་བདེ་བས་འགྲུབ་པར་གསུངས་པའི་ཕྱིར། འོ་ན་རྩ་རྒྱུད་དང་། བཤད་རྒྱུད་གང་ཡིན་སྙམ་ན། སྲུ་ལུང་པས་བཤད་རྒྱུད་དམ། ཕྱུང་རྒྱུད་དམ། བསྡུས་རྒྱུད་ལྟ་བུ་མ་ཡིན་ཏེ་རྩ་རྒྱུད་རང་རྐྱང་པ་ཡིན་པས། འདི་ལ་རྩ་རྒྱུད་དམ་རྒྱུད་རྒྱས་པ་གཞན་ལོག་ན་མེད་དོ་ཞེས་ཟེར་བ་ནི་མི་འཐད་དེ། དེ་ཉིད་བསྡུས་པ་ལས་གཞན་པའི་ཡོ་གའི་རྒྱུད་ཡིན་ན། དེ་ཉིད་བསྡུས་པ་རྩ་རྒྱུད་དུ་བྱེད་དགོས་པའི་ཕྱིར་རོ། །བུ་སྟོན་གྱིས། རྣལ་འབྱོར་གྱི་རྒྱུད་ལ། རྩ་བའི་རྒྱུད། རྒྱུད་ཕྱི་མ། ཕྱི་མའི་ཕྱི་མ། བཤད་པའི་རྒྱུད། ཆ་མཐུན་པའི་རྒྱུད། འཕྲོས་པའམ་ཡན་ལག་གི་རྒྱུད་དང་དྲུག་ལས། ཕྱི་མ་ཡིན་ཏེ། དེ་ཉིད་བསྡུས་པའི་དུམ་བུ་གཉིས་པ་ལས། ངན་འགྲོ་དགུག་ཅིང་སྡིག་པ་བྲལ་བ་ལས་འཕྲོས་ནས། ངན་སོང་སྦྱོང་བའི་ཐབས་རྒྱ་ཆེར་བསྟན་པས་འཕྲོས་རྒྱུད་དམ། དེ་ཉིད་ཀྱི་རྩ་བའི་ལྷ་ཕལ་ཆེར་དུམ་བུ་དང་པོའི་ལྷ་དང་ཕལ་ཆེར་འདྲ་ཞིང་། དེའི་ཆ་ཤས་སུ་གྱུར་པས་ཡན་ལག་གི་རྒྱུད་ཅེས་གསུངས་སོ། །བླ་མ་རྣམས་ཀྱི་བཞེད་པ་ལ། སློབ་དཔོན་པདྨ་ལྕགས་ཀྱུས། རྩ་རྒྱུད་ཤིན་ཏུ་ཟབ་ཅིང་རྟོགས་དཀའི་དོན། །བཤད་དང་ཆ་མཐུན་རྒྱུད་ཀྱིས་རྣམ་ཕྱེ་བ། །ཞེས་གསུངས་པ་ལྟར། རྩ་རྒྱུད། བཤད་རྒྱུད། ཆ་མཐུན་གྱི་རྒྱུད་དང་གསུམ་ལས། འདི་ཆ་མཐུན་གྱི་རྒྱུད་ཡིན་པར་བཤད་དོ། །གཉིས་པ་ནི། དཔལ་སྡོམ་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་དེ། །འཛམ་གླིང་ཤར་ལྷོའི་ཕྱོགས་མཚམས་ན། །དཔལ་ཞེས་བྱ་བའི་རི་བོ་ལ། །ཐུགས་རྗེས་མཐུན་པའི་བྱིན་རླབས་ཀྱིས། །རྒྱལ་པོ་ཛ་ཞེས་བྱ་བ་ལ། །ལག་ན་རྡོ་རྗེས་གནང་བར་བྱེད། །མི་ལ་སྐལ་ལྡན་དམ་པ་རྣམས། །བྱང་ཆུབ་མཆོག་ཏུ་འགྲུབ་འགྱུར་བས། །དེ་ལ་རྟག་ཏུ་གུས་པས་བྱོས། །ཞེས་འབྱུང་བས་སྟོན་པ་མྱང་ངན་ལས་འདས་ནས་ལོ་བརྒྱ་དང་བཅུ་གཉིས་ཏེ། ཉེར་བརྒྱད་ན་རྒྱ་གར་ཤར་ལྷོའི་ཕྱོགས། གྲོང་ཁྱེར་པ་ཏི་ཀིརྟི་ཞེས་བྱ་བར་རྒྱལ་པོ་རབ་གསལ་ཟླ་བ་ཞེས་བྱ་བ་བྱུང་། དེ་ལ་ཕྱག་ན་རྡོ་རྗེས་རྡོ་རྗེ་དབྱིངས་ཀྱི་དཀྱིལ་འཁོར་སྤྲུལ་ནས་དབང་བསྐུར་ཏེ། ལྷ་གནས་གསུམ་དུ་གྲགས་པ་དེ་ཉིད་བསྡུས་པའི་རྒྱུད་ལ་སོགས་པ་རྣལ་འབྱོར་གྱི་རྒྱུད་མཐའ་དག་གནང་ནས། དེ་ནས་མི་ཡུལ་དུ་དར་རོ། །དེ་ཉིད་བསྡུས་པའི་རྒྱུད་ལ་ལྷ་གནས་གསུམ་དུ་གྲགས་པ་ནི། ལྷ་གནས་དང་པོ་འོག་མིན། གཉིས་པ་རི་རབ་ཀྱི་རྩེ། གསུམ་པ་བཀའ་བསྡུ་བའི་གནས་ལྕང་ལོ་ཅན་དང་གསུམ་དུ་གྲགས་པའོ། །གསུམ་པ་ནི། འཕགས་པའི་ཡུལ་དུ་གྲུབ་ཆེན་ཀུན་སྙིང་གིས་མཛད་པའི་འགྲེལ་པ་སྟོང་ཕྲག་བཅུ་གཉིས་པ་ཡོད་པར་གྲགས་ཀྱང་བོད་དུ་མ་འགྱུར་ཞིང་། ཀ་མ་དྷེ་ནུས་མཛད་པའི་འགྲེལ་པ་ནི་བོད་དུ་འགྱུར་ཡང་བླ་མེད་དུ་འགྲེལ་པའི་ལུགས་སོ། །བོད་དུ་རྒྱུད་འདི་རྒྱལ་པོ་ཁྲི་སྲོང་ལྡེའུ་བཙན་གྱི་དུས་སུ་པཎྜི་ཏ་ཞི་བ་སྙིང་པོ་དང་། ལོ་ཙྪ་བ་སད་མི་མི་བདུན་གྱི་དུས་སུ་འགྱུར་ནས། ཕྱིས་རལ་པ་ཅན་གྱི་དུས་སུ་ཨཱ་ཙརྻ་རིན་ཆེན་མཆོག་གིས་སྐད་གསར་བཅད་ཀྱིས་བཅོས་པ་ལས། དུས་ཕྱིས་ལོཙྪ་བ་གཞན་གྱིས་བཅོས་པ་ནི་མེད་དོ། །འདི་ལ་མེ་ལྟར་འབར་བའི་སྐབས་ནས་དྲག་པོའི་སྦྱིན་སྲེག་ཡོད་ཀྱང་སྔོན་གྱི་རྒྱལ་བློན་རྣམས་ཀྱིས། སྔགས་པས་མངོན་སྤྱོད་བྱས་སུ་དོགས་ནས་མ་བསྒྱུར་བ་ཡིན་ནོ། །ཞེས་སྔ་མ་དག་འཆད་པ་ལ། རྗེ་བཙུན་གྱིས་ལོ་ཙྪ་བ་ཕྱི་མ་རྣམས་ཀྱིས་གཞན་ལ་འགྱུར་ཆད་པ་དག་འཇུག་པ་ལྟར་འདི་ལ་ཡང་འཇུག་པར་རིགས་པ་ལས་མ་བཅུག་པའི་ཕྱིར། རྒྱ་དཔེ་ཉིད་ལ་མེད་དོ་སྙམ་དུ་སེམས་པ་ཡིན་ནོ་ཞེས་གསུང་། སྲུ་ལུང་པས་མེ་ལྟར་འབར་བའི་སྦྱིན་སྲེག་གི་སྐབས་ནས། དེ་ནས་ཁུང་བུ་གསུམ་ལས་རྣམ་གཅིག་ནི་ཞེས་བཤད་པས། མངོན་སྤྱོད་མ་གསུངས་པ་སྟེ། དེའི་རྒྱུ་མཚན་ཡང་དེ་ཉིད་ལས། རྡོ་རྗེ་ཁྲོ་བོའི་ལས་དངོས་སུ། །བསད་པ་ཡིན་པར་བཤད་མོད་ཀྱི། །ཞི་དང་རྒྱས་དང་དབང་རྣམས་ཀྱང་། །དེ་དག་བྱེད་འགྱུར་གདོན་མི་ཟ། །ཞེས་ལས་འཇམ་པོ་དངོས་སུ་བསྟན་པས་དྲག་པོ་ཤུགས་ལས་ཤེས་པ་ལ་དགོངས་སོ་ཞེས་བཞེད་པ་ནི་རྨད་དུ་བྱུང་བའི་བཤད་པར་སྣང་ཞིང་། ལུགས་སྔ་མའི་སྒྲུབ་བྱེད་དུ་འགྲོའོ། །འདི་ལ་བོད་ན་འགྲེལ་པར་མིང་བཏགས་པ་བརྒྱད་ཙམ་སྣང་ཡང་། བོད་ཀྱིས་སྦྱར་བ་ལས། རྒྱ་གར་ནས་འགྱུར་བ་ནི་མེད་གསུང་། དེ་ཡང་གཟི་བརྗིད་བཤད་པ་ཞེས་བྱ་བ་འདིས་བྱས་ཆ་མེད་པ་ཅིག་དང་། མཛེས་པའི་རྒྱན་ཞེས་བྱ་བ་འཁྱིན་ལོ་ཙཱ་བ་དགེ་ཚུལ་ཁྱུང་གྲགས་ཀྱིས་བྱས་ནས་ཀུན་སྙིང་ལ་ཁ་འཕངས་པ་དང་། དེ་ཉིད་སྣང་བའི་རྒྱན་ཞེས་བྱ་བ་འབྲིང་མཚམས་ཀྱི་སྤྲག་ལེ་ཆུང་བས་བྱས་ནས་ཀུན་སྙིང་ལ་ཁ་འཕངས་པ་དང་། ཟངས་དཀར་གྱིས་བྱས་པའི་འབྲུ་འབུམ་མམ། ནམ་མཁའ་དྲི་མེད་ཅེས་བྱ་བ་ཁོང་རང་གིས་མཛད་པ་ཁ་བྱང་བཏབ་པ་དང་། རོང་ཟོམ་ཆོས་ཀྱི་བཟང་པོས་བྱས་པའི་འགྲེལ་པ་དང་། གོ་རུ་པ་ལོ་ཙྪ་བས་བྱས་ནས་ཀུན་སྙིང་ལ་ཁ་འཕངས་པ་འདོད་འཇོའི་བ་བྱ་བ་དང་། འབྲུ་འགྲེལ་ཞེས་བྱ་བ་མཆན་དཀྱུས་སུ་བཅུག་པ་ཅིག་དང་། རྨ་རིན་ཆེན་མཆོག་གིས་བྱས་པའི་དྲིས་ལན་རྒོལ་བ་མིག་ཚར་བྱ་བ་དང་བརྒྱད་དོ། །འོ་ན་བཤད་སྲོལ་གང་གི་རྗེས་སུ་འབྲང་སྙམ་ན། རྒྱལ་པོ་རབ་གསལ་ཟླ་བའི་སློབ་མ་རྒྱལ་བུ་སྒྲ་གཅན་འཛིན་བཟང་པོ་དང་། ཡེ་ཤེས་རྡོ་རྗེ་དང་། པྲཛྙཱསིདྡྷི་དང་། རབ་འབྱོར་བསྐྱངས་དང་བཞི་ཡིན་ལ་ཁ་ཅིག་སྭསྟི་ཕ་ལ་དང་བཞི་ཡིན་གྱི་རབ་འབྱོར་བསྐྱངས་ཀུན་སྙིང་གི་སློབ་བརྒྱུད་ཡིན་ཞེས་ཟེར། ཁ་ཅིག་དེ་གཉིས་ཀ་མ་ཡིན་གྱི་ཉི་མའི་སྙིང་པོ་དང་བཞི་ཡིན་ཞེས་ཟེར་རོ། །དེ་བཞི་ཆར་གྱི་སློབ་མ་ཀུན་དགའ་སྙིང་པོ་སྟེ། འདི་ཉིད་འཇམ་དཔལ་རྩ་བའི་རྒྱུད་ལས། ཡི་གེ་ཨཱ་མིང་བདག་ཉིད་ཆེ། །སྟོན་པའི་བསྟན་པ་གཅེས་འཛིན་བྱེད། །བློ་ལྡན་ཡོན་ཏན་ཀུན་གྱིས་བཀུར། །ཞེས་ལུང་བསྟན་ཅིང་། གྲུབ་ཐོབ་བརྒྱད་ཅུ་རྩ་བཞིའི་བསྟོད་པ་ལས་ཀྱང་། སྒྲོལ་མ་དཀར་མོས་བྱིན་གྱིས་བརླབས། །རྣལ་འབྱོར་རྒྱུད་ལ་འགྲེལ་བཤད་མཛད། །ཀུན་དགའ་སྙིང་པོ་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་བསྟོད་པའི་ཡོན་ཏན་ལ་སོགས་པ་བསམ་གྱིས་མི་ཁྱབ་པ་དང་ལྡན་ནོ། །དེ་ནས་པྲཛྙཱ་ཝ་ལ་ཏི། པྲཛྙཱ་བོདྡྷི། མུ་ཏིག་ཀ་ཀོ་ཤ། དྷརྨཱ་ཕ་ལ་རྣམས་ལས་རིམ་པ་བཞིན་བརྒྱུད་དེ། དྷརྨཱ་ཕ་ལའི་སློབ་མ་ནི། རྗེ་དཱི་པཾ་ཀ་ར་དང་། ལོ་ཙྪ་བ་རིན་ཆེན་བཟང་པོའོ། །ཡང་ཁ་ཅིག་ན་རེ། སློབ་དཔོན་ཆེན་པོ་བུདྡྷ་གུ་ཧྱ་ཞེས་བྱ་བ་དངོས་གྲུབ་བརྙེས་པའི་སློབ་དཔོན་ཞིག་གིས། དེ་ཉིད་བསྡུས་པ་དང་། རྡོ་རྗེ་རྩེ་མོ་དང་། དཔལ་མཆོག་དང་པོ་དང་། ངན་སོང་སྦྱོང་བའི་རྒྱུད་དང་། རྟོག་པ་ཐམས་ཅད་བསྡུས་པ་དང་ལྔའི་དབང་དང་གདམས་པ་རྣམས་འཇམ་དཔལ་ལས་དངོས་སུ་ཐོས་ནས། ཡན་ལག་མེད་པའི་རྡོ་རྗེ་སོགས་ལས་རིམ་པ་བཞིན་བརྒྱུད་དེ། སློབ་དཔོན་ཤཱཀྱ་བཤེས་གཉེན་ཞེས་བྱ་བས་དེ་ཉིད་བསྡུས་པའི་རྒྱ་ཆེར་བཤད་པ་ཤླཽ་ཀ་སྟོང་ཕྲག་བཅུ་གཉིས་པ་ཀོ་ས་ལའི་རྒྱན་ཞེས་བྱ་བ་མཛད། ཡང་སྔར་གྱི་སློབ་དཔོན་གྲུབ་པ་ཐོབ་པ་དེ་དང་མིང་མཚུངས་པའི་སློབ་དཔོན་སངས་རྒྱས་གསང་བ་ཞེས་བྱ་བས་དེ་ཉིད་བསྡུས་པའི་འགྲེལ་པ་མཛད་དེ། དེ་ལྟར་ན་དོན་ལ་མཁས་པ་སངས་རྒྱས་གསང་བ། ཚིག་ལ་ཁས་པ་ཤཱཀྱ་བཤེས་གཉེན། ཚིག་དོན་གཉིས་ཀ་ལ་མཁས་པ་ཀུན་དགའ་སྙིང་པོ་སྟེ། རྣལ་འབྱོར་རྒྱུད་ལ་མཁས་པའི་མི་གསུམ་དུ་གྲགས་སོ་ཞེས་བཞེད་དོ། །ཡང་ཀུན་དགའ་སྙིང་པོའི་མཆེད་གྲོགས་སློབ་དཔོན་འཇམ་དཔལ་གྲགས་པ་ཞེས་བྱ་བ་འཇམ་དཔལ་གྱི་གྲུབ་པ་ཐོབ་ཅིང་སྐུ་ཆེ་བའི་ཡོན་ཏན་ལྔ་དང་ལྡན་པ་དེས། དཔལ་སྦས་བཟང་པོ་ལ་བཤད། དེས་བྲམ་ཟེ་ཡེ་ཤེས་རྡོ་རྗེ་ལ་བཤད། དེས་ན་ལེནྟྲའི་ནུབ་སྒོ་བ་ཤེས་རབ་འབྱུང་གནས་བློ་གྲོས་ལ་བཤད། དེས་བྲམ་ཟེ་བཞད་པའི་རྡོ་རྗེ་དང་། པདྨ་ཀ་ར་དང་། ཤྲདྡྷ་ཀ་ར་གསུམ་ལ་བཤད། ཕྱི་མ་གཉིས་ཀྱིས་ལོ་ཆེན་ལ་བཤད་དོ། །ཡང་སློབ་དཔོན་འཇམ་དཔལ་བཤེས་གཉེན་ཞེས་བྱ་བས། སངས་རྒྱས་ཡེ་ཤེས་ཞབས་དང་། སྒེག་པའི་རྡོ་རྗེ་གཉིས་ལ་བཤད། དེ་ལ་སྒེག་པའི་རྡོ་རྗེ་གསང་མཚན་ཡིན་ལ། མཚན་དངོས་ནི་དཔལ་ལྡན་བྱང་ཆུབ་མཆོག་གི་སྐལ་བ་དང་ལྡན་པ་ཞེས་གྲགས་ཤིང་རིན་པོ་ཆེའི་གླིང་དུ་སྒྲུབ་པ་མཛད་ནས་དངོས་གྲུབ་བརྙེས་པས་ནོར་བུ་གླིང་པ་ཞེས་ཀྱང་གྲགས། མུ་སྟེགས་ཀྱིས་གསོད་པར་བརྩམས་པའི་ཚེ། འཇམ་དཔལ་དུ་སྤྲུལ་ནས་གཟུགས་སྣ་ཚོགས་སུ་སྟོན་པའི་སྣ་ཚོགས་གཟུགས་ཅན་ཞེས་ཀྱང་གྲགས། ཐུགས་རྗེས་གཞན་ལ་ཕན་འདོགས་པས་ཉི་མ་ལྟ་བུའི་སློབ་དཔོན་ཞེས་ཀྱང་གྲགས་སོ། །སློབ་དཔོན་དེས་སཱུརྻ་སིང་ཧ། དེས་དྷརྨཱ་བཛྲ་དང་མུ་དྲྭ་སིདྡྷི། དེས་དེ་ཝ་ཤ་ར་ལ་བཤད། དེ་ལ་ཤཱིནྟི་གརྦྷ་དང་། སྨྲཱྀ་ཏི་ཛྙཱ་ན་སྟེ་སློབ་མ་གཉིས་སོ། །དེ་དག་ལས་བོད་དུ་ཇི་ལྟར་བརྒྱུད་ན། ལོ་ཙྪ་བ་རིན་ཆེན་བཟང་པོ་ཁ་ཆེར་ལན་གསུམ་དུ་བྱོན་པའི་དང་པོ་ལ། ཁ་ཆེའི་མཁན་པོ་ཙནྡྲ་ཧ་རི་ལ་འཇིག་རྟེན་སྣང་བྱེད་ཀྱི་དཀྱིལ་འཁོར་དུ་ཞུགས་ནས་དབང་བསྐུར་ཞུས། ཕྱིས་ཤྲདྡྷ་ཀ་ར་ཝརྨ་ལ། གསང་འདུས་འཇམ་རྡོར་དང་། མི་བསྐྱོད་པ་གཉིས་དང་། རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་ཞུས་ནས་དེ་དག་གི་བཤད་བཀའ་ཡང་གསན་ཅིང་། འགའ་ཞིག་བསྒྱུར། ལན་གཉིས་པ་ལ་པཎྜི་ཏ་པདྨ་ཀ་ར་ཝརྨ་དང་། པྲཛྙཱ་ཀ་ར་ཝརྨ་གཉིས་ལ་གཏུགས་ཏེ་ཡོ་གའི་གཞུང་འགྲེལ་འགའ་ཞིག་བསྒྱུར། དཔལ་མཆོག་གི་ཕྲེང་ཆད་གསོ་བས། དུམ་བུ་དང་པོའི་རྒྱུད་འགྲེལ་གཉིས་ཀ་དག་པར་བཅོས། དེ་ཡན་ཆད་ཀྱི་ལོ་ཆེན་གྱི་སློབ་མ་རྣམས་ནི། ཤྲདྡྷ་ནས་བརྒྱུད་པའི་ཡོ་གའི་སྐོར་འཛིན་པས་ཕྱག་ལེན་ཀུན་དགའ་སྙིང་པོའི་ལུགས་ལ་བྱེད་ཀྱང་དེ་ཉིད་སྣང་བ་མ་འགྱུར་བས། བཤད་པ་ཀོ་ས་ལའི་རྒྱན་གྱི་སྟེང་ནས་མཛད་པས་བསྙེན་པའི་སྐབས་སུ་འཁོར་ལོས་སྒྱུར་བའི་ཆས་སུ་ཞུགས། སྙིང་ཁའི་བདག་འཇུག་ལ་བུམ་པ་འཆའ། རྣམ་སྣང་ལ་མི་བཞི་རྒྱབ་སྤྲོད་ལྟ་བུ་བྱེད་པ་སོགས་བཤད་པ་དང་། ལག་ལེན་ཡང་མི་མཐུན་ཅིང་། བོན་པོ་འདུལ་བའི་ཆེད་དུ་དབྱངས་ལ་སོགས་པའི་སྤྲོས་པ་ཡང་ཆེ་བར་གྲགས་སོ། །ལན་གསུམ་པ་ལ་པཎྜི་ཏ་སངས་རྒྱས་ཞི་བ་ཞེས་བྱ་བ་ནོར་བུ་གླིང་པ་བདེ་བའི་རྡོ་རྗེའི་སློབ་མར་གྲགས་ཤིང་འགའ་ཞིག་དེ་གཉིས་མཚན་དངོས་དང་། གསང་མཚན་གྱི་ཁྱད་པར་མ་གཏོགས་པ་གཅིག་ཡིན་པར་ཡང་འདོད་ལ། པཎྜི་ཏ་དེ་ལ་ཀུན་སྙིང་གི་ལུགས་ཀྱི་ལག་ལེན་དང་བཤད་པ་གཉིས་ཀ་ཞུས་པས་དེ་ཉིད་ལ་ཐུགས་ཆེས་ཤིང་ཐུགས་རྩིས་ཆེ་བར་མཛད། ཅེས་བུ་སྟོན་བཞེད་དོ། །ལོ་ཆེན་གྱི་སྐུ་ཚེའི་མཇུག་ཏུ་རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་ཕ་ལ་མངའ་རིས་སུ་བྱོན་པ་ལ་རྣལ་འབྱོར་རྒྱུད་ཀྱི་སྐོར་གསན་པས། ཀུན་སྙིང་གི་བརྒྱུད་པ་བཞི་པར་འདུག་ཅིང་དེ་ཡི་གདམས་པ་མ་ནོར་བར་བྱུང་སྟེ་མཉེས་སྐད་དོ། །སྦྱོང་རྒྱུད་ལ་ཡང་རྒྱུད་གོང་འོག་འཁྲུགས་བསྡེབས་ནས་མཛད་པ་མ་གཏོགས་གཞན་ནས་རྒྱས་འགེབས་པ་མི་མཛད། བསྙེན་པའི་དུས་སུ་ཆ་ལུགས་ཇི་བཞིན་པ་བུམ་པ་ལྷག་གནས་ལ་རྣམ་རྒྱལ་གཅིག་པོ་རྡོ་རྗེའི་གླུ་མ་གཏོགས་པ་རྣམས་ལ་དབྱངས་མི་མཛད་དོ། །ལོ་ཆེན་དེ་ལ་སྤྱིར་སློབ་མ་མང་ཡང་ཐུགས་ཀྱི་སྲས་མཆོག་བཞི་སྟེ། ལོ་ཆུང་ལེགས་པའི་ཤེས་རབ། མང་ནང་གི་གུར་ཤིང་བརྩོན་འགྲུས་རྒྱལ་མཚན། གྲྭ་པ་གཞོན་ཤེ། སྐྱི་ནོར་ཛྙཱ་ན་དང་བཞི་ལས། དང་པོས་དྷརྨཱ་ཕ་ལའི་ལུགས་མ་གསན། སྔར་གྱི་ཤྲདྡྷ་དང་། སངས་རྒྱས་ཞི་བ་གཉིས་ཀྱི་ལུགས་འཛིན། གཉིས་པས་དྷརྨཱ་ཕ་ལའི་ལུགས་གཙོ་བོར་འཛིན། གསུམ་པས་གཉིས་ཀའི་གུང་སྲོང་། བཞི་པས་ཕྱིས་ཀྱི་གཞུང་སྲོང་འོ། །ཡང་གཞན་དུ་སྦྱངས་ཤིང་དེར་ཐུག་པའི་པུ་ཧྲངས་པ་ཨན་སྟོན་གྲགས་རིན། རྒྱ་ཡེ་ཚུལ། གུངས་པ་དགེ་བཤེས། མར་ཡུལ་པ་དཀོན་མཆོག་བརྩེགས་ཏེ་བཞིའོ། །དབུས་གཙང་ན་མར་དར་ཚུལ་ནི། ལོ་ཆེན་གྱི་དྲུང་དུ་འགྲོ་བ་ལ་རྒྱང་རོ་དཔེ་དམར་གྱི་རྐྱང་པོ་ཆོས་བློ་སྔ། དེ་ནས་ཤངས་ཀྱི་སུམ་སྟོན་ཡེ་འབར། དེ་ནས་ཉང་སྟོན་ལྕེ་ཞར། དེ་ནས་སྤང་ཁ་འདར་ཆུང་གི་ཕ་གཞོན་ནུ་རྒྱ་མཚོ། ལ་སྟོད་ཀྱི་བྲག་སྟེང་པ། སྣུར་ཕྱི་རུའི་དམར་སྟོན་ཆོས་ཀྱི་རྒྱལ་མཚན། མདོག་གླེ་སྟོན། བལ་ཤཱཀྱ་རྡོ་རྗེ། ཐང་སྟོན་ཀོང་ཀ་བ། མདོག་གོང་ག་བ་རྣམས་ཏེ། དེ་དག་ཕལ་ཆེར་ལོ་ཆེན་ལ་ཐུག་པ་ཙམ་བྱས་ནས་གཙོ་བོར་ལོ་ཆུང་གི་དྲུང་དུ་སྦྱངས་ཏེ། དབུས་གཙང་གི་ས་ཆ་སྨད་ཕྱོགས་སུ་དར་བས་ཡོ་ག་སྨད་ལུགས་སུ་གྲགས། ཡང་ལོ་ཆེན་གྱི་སློབ་མ་བྲག་སྟེང་པ་ཡོན་ཏན་ཚུལ་ཁྲིམས། དེས་མལ་གྱོ། དེས་རྗེ་ས་སྐྱ་པ་ལ་བརྒྱུད་དེ། ས་ཆ་སྟོད་དུ་དར་བ་རྣམས་ལ་ཡོ་ག་སྟོད་ལུགས་སུ་གྲགས་སོ། །ཡང་པཎྜི་ཏ་དྷརྨཱ་ཕ་ལ་ནས། ཇོ་བོ་རྗེ། གོ་མི་སྒོམ་ཆེན། སྐྱི་ནོར་ཛྙཱ་ན། རྨྱལ་པ་ཉི་མ་ཤེས་རབ། སྣུར་ཉི་མ་འོད་ཟེར་སོགས་ནས་བརྒྱུད་པ་ལ་ཇོ་བོའི་ལུགས་སམ། རྩ་སྣུར་འཛིམ་གསུམ་ནས་བརྒྱུད་པ་ཞེས་གྲགས་སོ། །བཤད་སྲོལ་དེ་དང་། བྲག་སྟེང་པ་ནས་བརྒྱུད་པ་དེ་དང་། ལོ་ཆུང་ནས་དབུས་པ་དགེ་སེར། གནམ་ཁའུ་པ། ས་ཆེན་རྣམས་ལས་རིམ་པ་བཞིན་བརྒྱུད་པའི་བཤད་པ་རྣམས་ལ། རྩིང་ཞིབ་བག་རེ་དང་ཆོ་ག་གོང་འོག་མི་མཐུན་པ་བག་རེ་མ་གཏོགས། ཕལ་ཆེར་ནི་འདྲ་བ་ཉིད་དུ་སྣང་ཞེས་གསུངས་སོ། །མདོར་ན་པཎྜི་ཏ་དྷརྨཱ་ཕ་ལའི་ལུགས་བྲག་སྟེང་པ་ནས་བརྒྱུད་པ་འདི་ལ་རྗེ་བཙུན་རིན་པོ་ཆེས། རྒྱུད་བཤད་ཐབས་ཀྱི་མན་ངག་གཞན་ཕན་སྤྱི་ཆིངས། རྒྱུད་ཀྱི་ས་བཅད་དང་མཆན་གཉིས། ལག་ཏུ་བླང་བའི་རིམ་པ་གཞན་ཕན་འོད་ཟེར་དང་། གཞན་ཕན་ཉེར་མཁོ་གཉིས་ཏེ། དེ་དག་གི་རྗེས་སུ་འབྲངས་ནས་བཤད་པར་བྱ་བ་ཡིན་ནོ། །བཞི་པ་ལ་གསུམ་སྟེ། བརྗོད་བྱའི་དབྱེ་བ། བསྡུ་བ། གསུངས་པའི་དགོས་པའོ། །དང་པོ་ནི། དེ་བཞིན་གཤེགས་པའི་དཀྱིལ་འཁོར་གཙོ་བོར་གྱུར་པ་དྲུག དེ་བཞིན་གཤེགས་པ་ལ་འཇིག་རྟེན་པའི་འཁོར་གྱིས་བསྐོར་བའི་དཀྱིལ་འཁོར་དྲུག རོ་སྲེག་པའི་དཀྱིལ་འཁོར་རྒྱས་པ་གཅིག ལས་བཞིའི་སྦྱིན་སྲེག་བཞི་སྟེ། བཅུ་བདུན་ནི་བརྗོད་བྱའི་གཙོ་བོ་ཡིན་ལ། དཀྱིལ་འཁོར་བཅུ་གཉིས་པོ་ལ། ཏིང་ངེ་འཛིན་གྱི་དཀྱིལ་འཁོར་དང་། རྡུལ་ཚོན་གྱི་དཀྱིལ་འཁོར་དང་། ཀུན་རིག་དང་ཤཱཀྱ་ཐུབ་པས་དཔཾང་པོ་བྱས་ནས་རས་ལ་བྲི་བ་དང་གསུམ་དུ་ཕྱེ་ན་སོ་དྲུག་དང་། སྡོམ་པས་བཞི་བཅུ་ཞེ་གཅིག་ཏུ་འགྱུར་བ་ཡིན་ནོ། །དེ་ལ་ཀུན་རིག་རྩ་བའི་རྒྱུད་ནས་ཀུན་རིག་གི་དཀྱིལ་འཁོར་དང་། རོ་སྲེག་གི་དཀྱིལ་འཁོར་རྒྱས་པ་དང་། རས་བྲིས་དང་ལས་བཞིའི་སྦྱིན་སྲེག་བསྡུས་པ་ཙམ་བསྟན། རྒྱུད་ཕྱི་མ་ལས་ཤཱཀྱ་ཐུབ་པ་སྐུའི་དཀྱིལ་འཁོར་དང་། ཕྱག་ན་རྡོ་རྗེ་ཐུགས་ཀྱི་དཀྱིལ་འཁོར་གྱི་སྐབས་ནས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གཉིས། ཚེ་དཔག་མེད་གསུང་གི་དཀྱིལ་འཁོར་ནས་དེ་ཉིད་ཀྱི་དཀྱིལ་འཁོར་དང་། རོ་སྦྱོང་བའི་ཐབ་རྒྱས་པ་དང་། ལས་བཞིའི་སྦྱིན་སྲེག་གི་ཅུང་ཟད་གསལ་བ་བྱེད་པ་རྣམས་སྟོན། འཁོར་ལོས་སྒྱུར་བའི་སྐབས་ནས་དེ་ཉིད་ཀྱི་དཀྱིལ་འཁོར་དང་སྔར་གྱི་རོ་སྲེག་གསལ་བར་བྱེད་པ་སྟོན་ནོ། །མེ་ལྟར་འབར་བའི་སྐབས་ནས་དེ་ཉིད་ཀྱི་དཀྱིལ་འཁོར་དང་ལས་གསུམ་གྱི་སྦྱིན་སྲེག་གོང་གི་དེ་རྣམས་གསལ་བར་བྱེད་པའི་ཕྱིར་རྒྱས་པར་སྟོན་ནོ། །གཉིས་པ་ནི། ཡང་དེ་དག་ཐམས་ཅད་ཀྱི་དོན་བསྡུ་ན་ཏིང་ངེ་འཛིན་གྱི་བསྙེན་པ་དང་། རས་བྲིས་ལ་བརྟེན་ཏེ་སྒྲུབ་པ་དང་། རང་དང་གཞན་གྱི་དོན་གྱི་ལས་ལ་སྦྱར་བ་ཞེས་བྱ་བ་གསུམ་དུ་ཡང་གསུངས་པ་ཡིན་ནོ། །ཡང་དེ་དག་གི་དོན་བསྡུ་ན། སྔོན་དུ་སློབ་མ་སྨིན་པར་བྱ་བ་དང་། སྨིན་པ་དེས་དངོས་གྲུབ་ཀྱི་ཡེ་ཤེས་ལ་བསླབ་པར་བྱ་བ་དང་། ཕྱག་རྒྱའི་ཡེ་ཤེས་ལ་བསླབ་པ་དང་། མཚན་མ་ཐོབ་ནས་རང་དང་གཞན་གྱི་དོན་སྒྲུབ་པ་ཞེས་པ་གསུམ་དུའང་བསྡུ་བ་ཡིན་ནོ། །ཡང་དེ་དག་ཐམས་ཅད་ཀྱི་དོན་དགོས་པས་བསྡུ་ན་རང་གི་དོན་དང་གཞན་གྱི་དོན་གཉིས་སུ་འདུ་ལ་གཞན་དོན་ལ་ཚེ་དང་ལྡན་པའི་དོན་བྱ་བ་དང་། ཚེ་འདས་པའི་དོན་བྱ་བ་གཉིས་ཀྱིས་བསྡུས་པ་ཡིན་ནོ། །དེ་དག་ཐམས་ཅད་བསྡུ་ན་འདི་ལྟར་གོ་བར་བྱ་སྟེ། བརྗོད་བྱའི་གཙོ་བོ་ནི་དཀྱིལ་འཁོར་དྲུག་གམ་བཅུ་གཉིས་ཡིན་ལ། རོ་སྲེག་དང་སྦྱིན་སྲེག་གཉིས་ནི་དེའི་ཕྲིན་ལས་ཡིན་ཞིང་། བཟླས་པ་དང་། དངོས་གྲུབ་ཀྱི་ཡེ་ཤེས་དང་། ཕྱག་རྒྱའི་ཡེ་ཤེས་རྣམས་ནི་དེ་དག་གི་གྲོགས་སུ་གྱུར་པ་ཡིན་ནོ། །དེ་དག་ཉམས་སུ་ལེན་ན་ཐོག་མར་སློབ་མ་སྨིན་པར་བྱས་ལ་ཏིང་ངེ་འཛིན་གྱི་བསྙེན་པ་བྱ་ཞིང་རས་བྲིས་ལ་བརྟེན་ནས་བསྒྲུབས་ཏེ། རང་དང་གཞན་གྱི་དོན་བསྒྲུབ་པའི་ཕྲིན་ལས་ལ་སྦྱར་ན་གནས་སྐབས་ཀྱི་འབྲས་བུ་ཇི་ལྟར་འདོད་པ་འགྲུབ་ཅིང་། མཐར་ཐུག་གི་འབྲས་བུ་སངས་རྒྱས་འགྲུབ་པ་ཡིན་ནོ་ཞེས་བྱ་བར་ཤེས་པར་བྱའོ། །གསུམ་པ་ནི། ཐུགས་ཆོས་ཉིད་ལས་མ་གཡོས་པའི་རྟགས་སུ་དཀྱིལ་འཁོར་བསྟན་ལ། ཐུགས་རྗེས་འགྲོ་བའི་དོན་མཛད་པའི་རྟགས་སུ་སྦྱིན་སྲེག་བསྟན་ནོ། །དེ་ཡང་བདེན་པ་གཉིས་དང་མི་འགལ་བའི་ཆེད་དུ་དཀྱིལ་འཁོར་ལ་ཡང་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གཉིས་གསུངས། དངོས་པོར་མངོན་པར་ཞེན་པ་བཟློག་པ་དང་། ཐུགས་རྗེས་འགྲོ་བའི་དོན་མཛད་པ་མཚོན་པའི་ཆེད་དུ། རོ་སྲེག་གི་སྦྱིན་སྲེག་དང་། ཕྲིན་ལས་རྣམ་བཞིའི་སྦྱིན་སྲེག་གཉིས་གསུངས། དེ་དག་གི་གོ་རིམ་ཡང་ཐུགས་ཆོས་ཉིད་ལས་མ་གཡོས་ཀྱང་། རྩ་བ་བྱང་ཆུབ་ཀྱི་སེམས་སུ་འདུས་པའི་རྟགས་སུ་རྩ་བའི་དཀྱིལ་འཁོར་གསུངས། དེ་ལྟར་བྱང་ཆུབ་ཀྱི་སེམས་སུ་འདུས་ཀྱང་ཐུགས་རྗེས་ངན་སོང་གི་རྒྱུ་འབྲས་གཞོམ་པའི་ཕྱིར་ཤཱཀྱ་ཐུབ་པའི་དཀྱིལ་འཁོར་གསུངས། དེ་ལྟར་རྒྱུ་འབྲས་བཅོམ་ཡང་གློ་བུར་གྱི་རྐྱེན་གྱིས་འཆི་བས་དེ་བཟློག་པའི་ཆེད་དུ་ཕྱག་ན་རྡོ་རྗེའི་དཀྱིལ་འཁོར་གསུངས། གློ་བུར་གྱི་རྐྱེན་གྱིས་མི་འཆི་ཡང་སྔོན་གྱི་ལས་ཀྱིས་འཆི་བས་དེ་བཟློག་པའི་ཆེད་དུ་ཚེ་དཔག་མེད་ཀྱི་དཀྱིལ་འཁོར་གསུངས། འཆི་བདག་བཅོམ་ཡང་ཕྲིན་ལས་རྣམ་བཞིའི་སྒོ་ནས་དོན་མཛད་དགོས་པས་འཁོར་ལོས་བསྒྱུར་བའི་དཀྱིལ་འཁོར་གསུངས། འགྲོ་བའི་དོན་མཛད་ཀྱང་མ་རུངས་པ་འདུལ་དགོས་པས་མེ་ལྟར་འབར་བའི་དཀྱིལ་འཁོར་གསུངས། མ་རུངས་པ་བཏུལ་ཡང་དངོས་པོར་ལྟ་བ་སུན་ཕྱུང་དགོས་པས་རོ་སྲེག་གི་དཀྱིལ་འཁོར་གསུངས། དེ་སུན་ཕྱུང་ཡང་ཐུགས་རྗེས་ཆོས་ཉིད་ལས་མ་གཡོས་པའི་རྟགས་སུ་ཞི་བའི་སྦྱིན་སྲེག་གསུངས། དེ་ལྟར་མ་གཡོས་ཀྱང་འགྲོ་བའི་དོན་མཛད་དགོས་པས་རྒྱས་པའི་སྦྱིན་སྲེག་གསུངས། དེ་ལྟར་དོན་མཛད་ཀྱང་འཁོར་བཾ་དབང་དུ་བསྡུ་དགོས་པས་དབང་གི་དཀྱིལ་འཁོར་གསུངས། དབང་དུ་བསྡུས་ཀྱང་མ་རུངས་པ་ལ་མངོན་སྤྱོད་ཀྱི་ལས་དགོས་པས་དྲག་པོའི་སྦྱིན་སྲེག་གསུངས། འཇིག་རྟེན་པའི་གནོད་པ་རྣམས་ཞི་ཞིང་འཇིག་རྟེན་ཀྱི་ཕུན་སུམ་ཚོགས་པར་བསྒྲུབ་པའི་ཕྱིར་དུ་འཇིག་རྟེན་པའི་དཀྱིལ་འཁོར་དྲུག་གསུངས་ལ་སོ་སོའི་དགོས་པ་ནི་གཞུང་ཉིད་ཀྱི་སྟེང་དུ་རྟོགས་པར་བྱའོ། །ལྔ་པ་རྒྱུད་བཤད་ཐབས་ཀྱི་མན་ངག་ནི་སྤྱིར་རྒྱུད་འཆད་ཚུལ་ལ་འགྲེལ་ཆེན་དྲི་མེད་འོད་ཀྱིས་དུས་འཁོར་བསྡུས་རྒྱུད་འཆད་པ་ལྟ་བུ་རྒྱུད་འགྲེལ་པས་འཆད་པ་དང་། གསང་འདུས་ཡེ་ཤེས་ཞབས་ལུགས་ཀྱི་གཞུང་ཕྲན་རྣམས་ལ་བརྟེན་ནས་གསང་བ་འདུས་པའི་རྒྱུད་འཆད་པ་ལྟ་བུ་རྒྱུད་གཞུང་ཕྲན་གྱིས་འཆད་པ་དང་། རྒྱུད་རྒྱུད་ཉིད་ཀྱིས་འཆད་པ་དང་གསུམ་ཡོད་པ་ལས། འདི་ནི་ཕྱི་མ་སྟེ་ས་ཆོག་གཞན་དུ་ཁ་འཕངས་པ་དང་། སེམས་དཔའ་བཅུ་དྲུག་འགོད་པར་གསུངས་ཀྱང་། དེའི་ཞལ་ཕྱག་མ་གསུངས་པ་རྣམས་རྒྱུད་གཞན་གྱིས་ཁ་བསྐང་བ་མ་གཏོགས་རྒྱུད་ཀྱི་དངོས་བསྟན་ལ་ཡོད་པ་རྣམས་ནི་བརྟག་པ་གོང་འོག་འཁྲུག་བསྡེབས་ནས་ཉམས་སུ་བླང་བ་ཡིན་གྱིས། རྒྱུད་སྡེ་གཞན་གྱིས་རྒྱས་བཀབ་པ་ལ་སོགས་པ་མི་བྱེད་པའི་ཕྱིར་རོ། །འཁྲུགས་ཇི་ལྟར་སྡེབ་པའི་ཚུལ་ནི་འོག་གཞུང་དོན་གྱི་སྐབས་སུ་རྟོགས་པར་བྱའོ། །གཉིས་པ་བཤད་པ་དངོས་ལ་གཉིས་ཏེ། མཚན་དོན་གྱི་སྒོ་ནས་མདོར་བསྟན། གཞུང་དོན་གྱི་སྒོ་ནས་རྒྱས་པར་བཤད་པའོ། །དང་པོ་ལ་གཉིས་ལས། དང་པོ་མཚན་བསྒྱུར་བ་ནི། རྒྱ་གར་སྐད་དུ། སརྦ་དུརྒ་ཏི་ནི། བོད་སྐད་དུ། ངན་སོང་ཐམས་ཅད། པ་རི་ཤོ་དྷ་ནི་ནི་ཡོངས་སུ་སྦྱོང་བ། ཏེ་ཛོ་རཱ་ཛཱ་ཡ་ནི། གཟི་བརྗིད་ཀྱི་རྒྱལ་པོ། ཏ་ཐཱ་ག་ཏཱ་ཡ་ནི་དེ་བཞིན་གཤེགས་པ། ཨ་ར་ཧ་ཏེ་ནི་དགྲ་བཅོམ་པ། སཾ་མྱཀ་སཾ་བུདྡྷ་ནི་ཡང་དག་པར་རྫོགས་པའི་སངས་རྒྱས། ནཱ་མ་ནི་ཞེས་བྱ་བ། ཀལ་པ་ནི་བརྟགས་པའོ། །གཉིས་པ་མཚན་བཤད་པ་ནི་རྗེ་བཙུན་གྱིས་ཆོས་ཐམས་ཅད་ཀྱི་དེ་བཞིན་ཉིད་ཇི་ལྟ་བ་དེ་བཞིན་དུ་ཆུད་ཅིང་གཞན་ལ་སྟོན་ནུས་པས་བྱང་སེམས་དང་། སྦྱིན་པ་དང་། ཤེས་རབ་དང་། བརྩོན་འགྲུས་བཞི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །དེས་སྤྱིར་འདོད་ཁམས་ཀྱི་ལྷ། བྱེ་བྲག་ཏུ་ཡུལ་སུམ་ཅུ་རྩ་གསུམ་གྱི་ལྷ་རྣམས་དེ་བཞིན་གཤེགས་པའི་ཞལ་མཐོང་བ་སླབ་པའི་གཞི་བཟུང་། དཀོན་མཆོག་གསུམ་ལ་སྐྱབས་སུ་སོང་། ཕྱིར་མི་ལྡོག་པས་ན་རྒྱུ་དང་འབྲས་བུས་བསྡུས་པའི་ངན་སོང་ཐམས་ཅད་ཡོངས་སུ་སྦྱོང་བའོ། །མཛོད་སྤུའི་འོད་ཟེར་གྱིས་ངན་སོང་ཐམས་ཅད་ཟིལ་གྱིས་གནོན་པས་ན་གཟི་བརྗིད་ཀྱི་རྒྱལ་པོ། བརྟག་པ་ནི་ཆོ་ག་ཞིབ་མོའོ་ཞེས་བཞེད་དོ། །འབྲུ་འགྲེལ་ལས་ནི། དེ་བཞིན་གཤེགས་པ་ནི་མེ་ལོང་ལྟ་བུའི་ཡེ་ཤེས་ཏེ་ཆོས་ཀྱི་སྐུའོ། །དགྲ་བཅོམ་པ་ནི་མཉམ་པ་ཉིད་ཀྱི་ཡེ་ཤེས། ཡང་དག་པར་རྫོགས་པ་ནི་སོ་སོར་རྟོག་པའི་ཡེ་ཤེས་ཏེ་དེ་གཉིས་ནི་ལོངས་སྐུ། སངས་རྒྱས་ནི་བྱ་བ་ནན་ཏན་གྱི་ཡེ་ཤེས་ཏེ་སྤྲུལ་སྐུའོ། །སྐུ་གསུམ་པོ་དེའི་ཕྲིན་ལས་ནི། རྒྱུ་ངན་པ་ལས་དང་ཉོན་མོངས་པའི་དབང་གིས་འབྲས་བུ་ཁམས་གསུམ་དུ་སོང་བས་ན་ངན་སོང་སྟེ། འཁོར་བ་ཐམས་ཅད་ཡོངས་སུ་སྦྱོང་བའོ། །ཇི་ལྟར་ན་རྒྱུ་ཏིང་ངེ་འཛིན་གྱིས་ལས་ཉོན་དང་། འབྲས་བུ་འོད་ཟེར་གྱིས་སྡུག་བསྔལ་སྦྱོང་བས་ན་གཟི་བརྗིད་དོ། །རྒྱལ་པོ་དང་བརྟག་པ་ནི་སྔར་དང་འདྲ་བར་གསུངས་སོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པ་ནི་ལོ་ཙྪ་བས་བཀོད་པའི་མཆོད་བརྗོད་དོ། །དེས་ན་མཚན་དོན་གྱིས་འོག་ནས་འཆད་པར་འགྱུར་བའི་བརྗོད་བྱ་མཐའ་དག་བསྡུས་པས་ན་དབང་པོ་རྣོན་པོས་མཚན་དོན་ལ་བརྟེན་ནས་ཀྱང་བརྗོད་བྱ་མདོར་བསྡུས་ཏེ་རྟོགས་པར་འགྱུར་རོ། །གཉིས་པ་ལ་བཞི་སྟེ། གླེང་གཞི་དང་། གླེང་བསླང་བ་དང་། རྒྱུད་ཀྱི་གཞུང་དངོས་དང་། རྗེས་སུ་ཡི་རང་བའོ། །དང་པོ་ལ་དྲུག ཆོས་དང་། སྡུད་པ་པོ་དང་། དུས་དང་། སྟོན་པ་དང་། གནས་ཕུན་སུམ་ཚོགས་པ་དང་། འཁོར་དང་སྟོན་པའི་ཆེ་བས་བཞུགས་པའོ། །དང་པོ་ནི། འོག་ནས་འབྱུང་བའི་རྒྱུད་ཀྱི་ཚིག་དོན་འདི་སྐད་ཅེས་པ་སྟེ། སྒྲོ་སྐུར་དང་། དབྲི་བསྣན་མེད་ཅེས་པའི་དོན་ནོ། །གཉིས་པ་ནི། ཕྱག་ན་རྡོ་རྗེ་བདག་གིས་སངས་རྒྱས་ཤཱཀྱ་ཐུབ་པ་ལས་མངོན་སུམ་དུ་ཐོས་ཀྱི། གཞན་ལས་བརྒྱུད་པ་མ་ཡིན་ཞེས་པའོ། །ཐོས་པ་ནི་རྣ་བའི་དབང་པོ་སྐྱོན་མེད་པས་ཐོས་ཀྱི། སྒོམ་བྱུང་གིས་དོན་མངོན་སུམ་དུ་གྱུར་པ་ནི་མ་ཡིན་པའོ། །གསུམ་པ་ནི། དུས་གཅིག་ན་ཞེས་པ་སྟེ། དེ་ལ་སྟོན་པ་སྤྱོད་ལམ་གྱི་དུས། ཡང་དག་འཇོག་གི་དུས། སྙོམས་པར་འཇུག་པའི་དུས། ཆོས་འཆད་པའི་དུས་དང་བཞི་ལས། དུས་གཅིག་ཆོས་འཆད་པའི་དུས་སུ་ཐོས་པའོ། །དེ་ཡང་དུས་མཐའི་སྐད་ཅིག་མ་གཅིག་ལ་གསུངས་པར་ནུས་པས་འཆད་བྱེད་སྟོན་པའི་ཆེ་བ། དེའི་ཚེ་ཕྱག་ན་རྡོ་རྗེས་ཁོང་དུ་ཆུད་པས་སྡུད་བྱེད་འཁོར་གྱི་ཆེ་བ། དུས་གཅིག་གི་ཚེ་འདི་ཐོས་ཀྱི་གཞན་དུ་ནི་གཞན་དག་ཀྱང་ཐོས་སོ་ཞེས་པས། སྡུད་པ་པོ་ཐོས་པ་ཆེ་བ། དུས་གཅིག་གི་ཚེ་ཆོས་འདི་འབྱུང་གི་གཞན་གྱི་ཚེ་ནི་མི་འབྱུང་ཞེས་པས་བཤད་བྱ་ཆོས་ཀྱི་ཆེ་བ་དང་བཞི་བསྟན་པ་ཡིན་ནོ། །འདི་དག་ནི་ཕ་རོལ་དུ་ཕྱིན་པའི་ཐེག་པ་དང་ཐུན་མོང་དུ་སྟོན་འཁོར་ཐ་དད་ཀྱི་དབང་དུ་བྱས་པ་ཡིན་གྱི་ཡང་དག་པར་ན་ཕུན་སུམ་ཚོགས་པ་ལྔ་ཀ་ཡང་སྟོན་པ་ཉིད་ཀྱི་ཡེ་ཤེས་ཀྱི་སྣང་བ་ལས་གྲུབ་པ་ཁོ་ན་ཡིན་གྱི་རྒྱུད་ཐ་དད་པ་ནི་ཅུང་ཟད་ཀྱང་མེད་དོ། །བཞི་པ་ནི་བཅོམ་ལྡན་འདས་ཞེས་པ་སྟེ། བདུད་བཞི་བཅོམ་ཞིང་དབང་ཕྱུག་གི་ཡོན་ཏན་དྲུག་དང་ལྡན་པས་ན་བཅོམ་ལྡན་ཏེ། རྡོ་རྗེ་རྩེ་མོ་ལས། ཉོན་མོངས་ལས་དང་དེ་བཞིན་སྐྱེ། །ཉོན་མོངས་ཤེས་བྱའི་སྒྲིབ་དེ་བཞིན། །མི་མཐུན་ཕྱོགས་ཀྱི་ཆོས་རྣམས་གང་། །དེ་བཅོམ་པས་ན་བཅོམ་ལྡན་བརྗོད། །ཅེས་དང་། སཾ་བུ་ཊི་ལས། འདི་ལྟ་སྟེ། དཔལ་དང་ཕུན་སུམ་ཚོགས་པ་དང་། གྲགས་པ་དང་། ཡེ་ཤེས་དང་། དབང་ཕྱུག་དང་། གཟུགས་བཟང་བ་དང་། བརྩོན་འགྲུས་ཕུན་སུམ་ཚོགས་པ་སྟེ། ཡོན་ཏན་དྲུག་གི་སྐལ་བ་དང་ལྡན་པའོ། །ཞེས་སོ། །འོ་ན་བཅོམ་ལྡན་འདས་ཀྱི་སྒྲ་བཤད་ལ་བཞི་བཅོམ་དྲུག་ལྡན་ནོར་བར་བཤད་པ་དང་འགལ་ལོ་སྙམ་ན། དེ་ནི་བཅོམ་པ་དང་ལྡན་པའི་སྐད་དོད་སོ་སོར་བཤད་པ་དགག་པ་ཡིན་གྱི། བྷ་ག་ཝཱན་ཞེས་པའི་ཚིག་ཉིད་བཅོམ་པ་དང་ལྡན་པ་གཉིས་ཀ་ལ་འཇུག་པས་བདུད་བཞི་བཅོམ་པས་ན་བྷ་ག་ཝཱན། དབང་ཕྱུག་གི་ཡོན་ཏན་དྲུག་དང་ལྡན་པས་ན་བྷ་ག་ཝཱན་ཞེས་པའི་སྒྲ་སྐད། དགག་པ་མ་ཡིན་པས་སྐྱོན་མེད་དོ། །ལྔ་པ་ལ་གནས་དངོས་དང་། དེའི་ཁྱད་པར་གཉིས་ལས། དང་པོ་ནི། རྫུ་འཕྲུལ་ཡོད་ཅིང་རང་འོད་དང་ལྡན་པས་ན་ལྷ། བསམ་གཏན་གྱི་བདེ་བ་དང་ལྡན་པས་ན་མཆོག་སྟེ་སུམ་ཅུ་རྩ་གསུམ་པ་ཐམས་ཅད་ཀྱི་ཚལ་ལོ། །དེ་ཇི་ལྟ་བུ་ཞེ་ན། གནས་དེ་ན་ཤར་དུ་ཤིང་རྟ་སྣ་ཚོགས་ཀྱི་ཚལ། ལྷོ་ན་རྩུབ་འགྱུར་གྱི་ཚལ། ནུབ་ན་འདྲེས་པའི་ཚལ། བྱང་ན་དགའ་བའི་ཚལ་དང་བཞི་ཡོད་པ་ལས་ཕྱི་མའོ། །དེ་ཉིད་ལྷ་རྣམས་ཀྱི་བསོད་ནམས་ལས་གྲུབ་པའམ། སངས་རྒྱས་ཀྱི་ཡེ་ཤེས་ཉིད་དེར་སྣང་བས་ན་ཡིད་དུ་འོང་བའོ། །ན་ཞེས་པ་ནི་ཚིག་ཕྲད་དོ། །གཉིས་པ་ལ་ལྔ་སྟེ། མེ་ཏོག་ལ་སོགས་པའི་ཁྱད་པར། རྒྱན་གྱི་ཁྱད་པར། སྒྲའི་ཁྱད་པར། རྩེ་བའི་ཁྱད་པར། བྱིན་རླབས་ཀྱི་ཁྱད་པར་རོ། །དང་པོ་ནི། ནོར་བུ་དང་ཞེས་སོགས་ཏེ། མེ་ཏོག་འདི་དག་ནི་མི་ཡུལ་ན་མེད་ཅིང་སུམ་ཅུ་རྩ་གསུམ་ན་ཡོད་པ་རྣམས་སོ། །གཉིས་པ་ནི། དཔག་བསམ་གྱི་ཤིང་རྣམས་ཀྱིས་མཛེས་པར་བྱས་ཤིང་གཞལ་ཡས་ཁང་གི་རྒྱན་སྣ་ཚོགས་ཀྱིས་བརྒྱན་པའོ། །གསུམ་པ་ནི། དཀོན་མཆོག་བརྩེགས་པ་ནས་བཤད་པ་ལྟ་བུའི་བྱ་མང་པོ་སྣ་ཚོགས་ཞེས་སོགས་ཏེ། ཀ་རེ་ཀོ་ནི་འཁར་རྔའོ། །བཞི་པ་ནི། བརྒྱ་བྱིན་དང་ཞེས་སོགས་ཏེ། བརྒྱ་བྱིན་མིག་བརྒྱ་དང་ལྡན་པའམ། ཡབ་རྒྱལ་པོ་གྷ་ན་པ་ཏིས་ལོངས་སྤྱོད་ཀྱི་རྒྱན་དུ་ནོར་བུ་ཏི་ལ་ཀ་ཁལ་བརྒྱ་དུས་གཅིག་ལ་སྦྱིན་པ་བཏང་བས་ན་བརྒྱ་བྱིན་ནོ། །ཚངས་པ་ནི་ཚད་མེད་བཞིའི་རྣམ་སྨིན་གྱིས་འབྲས་བུའི་གཟུགས་ཁམས་སུ་སྐྱེས་པས་ནའོ། །ལྔ་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་རླབས་པ་ན་ཞེས་པའོ། །དྲུག་པ་ལ་གཉིས་ཏེ། འཁོར་གྱི་ཆེ་བ་དང་སྟོན་པའི་ཆེ་བས་བཞུགས་པའོ། །དང་པོ་ལ་གཉིས་ཏེ། འཇིག་རྟེན་དང་། འཇིག་རྟེན་ལས་འདས་པའོ། །དང་པོ་ནི། བརྒྱ་བྱིན་དང་། ཞེས་སོགས་ཏེ། བརྒྱ་བྱིན་ནི་སུམ་ཅུ་རྩ་གསུམ་པའི་གཙོ་བོ། ཚངས་པ་ནི་གཟུགས་ཁམས་པའི་གཙོ་བོ། རིག་འཛིན་ནི་རྟེན་མིའི་ལུས་ལ་བསམ་གཏན་གྱི་ཏིང་ངེ་འཛིན་སྐྱེས་པ་འཇིག་རྟེན་པའི་རིག་འཛིན་དང་། རྟེན་ལྷའི་ལུས་ལ་བསམ་གཏན་གྱི་ཏིང་ངེ་འཛིན་སྐྱེས་པས་ཚེ་བསྐལ་པར་ཐུབ། སྤྲུལ་སྐུའི་ཞིང་ཁམས་སུ་འགྲོ་ནུས། ཅི་བསམས་པ་ནམ་མཁའ་ལས་འབྱུང་ཞིང་ནམ་མཁའ་མཛོད་ལ་མངའ་བརྙེས་པ་ནི་འཇིག་རྟེན་ལས་འདས་པའི་རིག་འཛིན་ནོ། །ལྷའི་བུ་བུ་མོ་འཁོར་བྱེ་བ་ཁྲག་ཁྲིག་བརྒྱ་སྟོང་དུ་མ་ནི་བྱེ་བ་ནི་བགྲངས་པའི་གྲངས་ཀྱི་གནས་གཞན་བརྒྱད་པའོ། །གནོད་སྦྱིན་ནི་གང་བ་བཟང་པོ་ལ་སོགས་པའོ། །སྲིན་པོ་ནི་ལང་ཀ་མགྲིན་བཅུའོ། །ལྷ་མ་ཡིན་ནི་ཐགས་ཟངས་རིས་ལ་སོགས་པའོ། །དྲི་ཟ་ནི་ཟུར་ཕུད་ལྔ་པ་ལ་སོགས་པའོ། །མིའམ་ཅི་ནི་ལྗོན་པ་རྟ་མགོ་ཅན་ལ་སོགས་པའོ། །ལྟོ་འཕྱེ་ཆེན་པོ་ནི་སྦྲུལ་མགོ་བདུན་པའོ། །ཀླུ་ནི་དགའ་བོ་ལ་སོགས་པ་སྟེ། སོགས་ཀྱི་སྒྲས་བསྡུས་པ་ནི་གྲུལ་བུམ་གསུས་པོ་ཆེ་ལ་སོགས་པའོ། །དེ་ལྟར་འཇིག་རྟེན་པའི་ཚུལ་འཛིན་པའི་འཁོར་དུ་མ་དང་བཅས་པ་ནི་བགྲང་དུ་མི་ལང་བའོ། །གཉིས་པ་ནི། བྱང་ཆུབ་སེམས་དཔའ་ཞེས་སོགས་ཏེ། དངོས་སུ་སྨོས་པའི་བྱང་སེམས་དགུ་པོ། རྩ་སྐྱ་པས་ཕྱག་ན་རྡོ་རྗེ། འཇམ་དཔལ། ནམ་མཁའི་སྙིང་པོ། འཇིག་རྟེན་དབང་ཕྱུག ནམ་མཁའ་མཛོད། འཁོར་ལོས་སྒྱུར་བ། རྡོ་རྗེ་ཁུ་ཚུར། རྡོ་རྗེ་གནོད་སྦྱིན། རྡོ་རྗེ་ལས་རྣམས་ལ་སྦྱོར་བར་མཛད་ཅིང་། རྗེ་བཙུན་གྱིས་འདི་རྣམས་ལ་འདི་ཡིན་བྱ་བ་མེད་པས་དེ་དག་ལ་སྦྱོར་བ་མི་འཐད་གསུང་། ཁ་ཅིག་ཕྱོགས་བཅུའི་སངས་རྒྱས་ཀྱི་རང་བཞིན་ཡིན་པར་ཡང་འདོད། ཕྱིར་མི་ལྡོག་པ་ནི་ས་དང་པོའི་བྱང་སེམས་སྔགས་ཐོབ་པའི་བྱིན་རླབས་ཀྱིས་ཕྱིར་མི་ལྡོག ས་བརྒྱད་པའི་བྱང་སེམས་སྒྲིབ་པ་མེད་པའི་གནས་ཐོབ་པས་ཕྱིར་མི་ལྡོག་སྟེ། དེ་ལྟ་བུའི་དགེ་འདུན་གྲངས་ཀྱི་མཐར་ཐུག་པ་མེད་པ་རྣམས་ཀྱིས་བསྟི་སྟང་སྟེ་བསྙེན་བཀུར་དུ་བྱེད། སྟོན་པ་ཤཱཀྱ་ཐུབ་པ་ལ་བླ་མར་བྱེད། མེ་ཏོག་ལ་སོགས་པས་མཆོད་ཅིང་བརྗོད། རང་ལ་ཡང་ཞེན་པ་མེད་པས་རབ་ཏུ་མཆོད་ཅིང་སངས་རྒྱས་ཀྱི་ཡོན་ཏན་སྤེལ་ཏེ། དེ་ལྟ་བུའི་འཁོར་མང་པོའི་དབུས་ན་བཞུགས་ཞེས་པའོ། །གཉིས་པ་སྟོན་པའི་ཆེ་བས་བཞུགས་པ་ནི། སུ་ཞིག་བཞུགས་ན། ཚད་མེད་པ་བཞི་དང་ལྡན་པས་ན་ཚངས་པ། ཆོས་དབྱིངས་རྟོགས་པའི་དོན་གྱིས་ཆེན་པོ་སྟེ། སངས་རྒྱས་ཤཱཀྱ་ཐུབ་པ་ཉིད་འཁོར་བའི་ཉེས་པས་མ་གོས་པ་མཚོན་པས་པདྨའི་གདན་ལ་བཞུགས་པའོ། །འདིར་ཚངས་པ་ཆེན་པོ་སངས་རྒྱས་ཀྱི་མིང་གི་རྣམ་གྲངས་ཡིན་པའི་དོན་མ་རྟོགས་པར། ཚངས་པ་ཆེན་པོ་ཡིན་ན་ཞལ་བཞི་ཡོད་དགོས་ཞེས་སྨྲ་བ་ནི་རྒྱུད་འགོག་པ་སྟེ། སྟོན་པ་ཤཱཀྱ་ཐུབ་པ་པདྨའི་གདན་ལ་བཞུགས་པ་ལ་ཚངས་པ་ཆེན་པོ་པདྨའི་གདན་ལ་བཞུགས་པར་གསུངས་པའི་ཕྱིར་རོ། །གཉིས་པ་གླེང་བསླང་བ་ལ་གཉིས་ཏེ། སྟོན་པས་གླེང་བསླང་བ་དང་། འཁོར་གྱིས་གླེང་བསླང་བའོ། །དང་པོ་ལ་དྲུག་སྟེ། རྒྱུ་ཏིང་ངེ་འཛིན་ལ་སྙོམས་པར་ཞུགས་པ་དང་། ཐབས་འོད་ཟེར་གྱི་སྤྲོ་བསྡུ་དང་། འབྲས་བུ་ངན་སོང་ལས་གྲོལ་བར་བསྟན་པ་དང་། མཆོད་པ་སྔོན་དུ་སོང་བས་ཆེད་དུ་བརྗོད་པ་དང་། བརྒྱ་བྱིན་ལ་སོགས་པས་ངོ་མཚར་བར་བསྟན་པ་དང་། བཅོམ་ལྡན་འདས་ཀྱིས་ངཾོ་མཚར་བར་བསྟན་པའོ། །དང་པོ་ནི། དེ་ནས་སྟོན་པས་ངན་སོང་གི་རྒྱུད་དེ་རྒྱུ་དང་འབྲས་བུས་བསྡུས་པའི་སྡུག་བསྔལ་དང་འབྲེལ་བའི་ཤེས་པ་སྦྲེང་ཆགས་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །གཉིས་པ་ནི། དེ་ལྟར་སྙོམས་པར་ཞུགས་ནས་ཏིང་ངེ་འཛིན་གྱི་མིང་ངན་སོང་གསུམ་གྱི་རྒྱུད་ལས་རྣམ་པར་གྲོལ་བ་ཞེས་སོགས་ཏེ། གཞན་རྣམས་ནི་གོ་སླ་ལ། བྱང་ཆུབ་སེམས་དཔའ་དང་། སེམས་དཔའ་ཆེན་པོ་ནི་སྙིང་རྗེ་ཆེན་པོ་དང་། ཤེས་རབ་ཆེན་པོའོ། །གསུམ་པ་ནི། ཀུན་དུ་སྣང་བར་བྱས་པས་དེ་སེམས་ཅན་ཐམས་ཅད་ཀྱི་སེམས་འདོད་ཆགས་ལ་སོགས་པའི་ཉོན་མོངས་པས་བྱས་པའི་འཆིང་བ་ལས་རྣམ་པར་གྲོལ། ལུས་སེམས་ཀྱི་བདེ་བ་སོ་སོར་ཐོབ་ནས་སྟོན་པའི་བཞུགས་གནས་དགའ་བའི་ཚལ་ཐམས་ཅད་ཀུན་ཏུ་གང་བར་བྱས་ཏེའོ། །བཞི་པ་ནི། མཆོད་པའི་སྤྲིན་ཞེས་སོགས་ཏེ། ནོར་བུ་དྲི་མ་མེད་པ་ནི་ཐུགས་ཡེ་ཤེས་ས་གཞིར་སྣང་བ་སྟེ། འཇམ་དཔལ་རྩ་རྒྱུད་ལས། སེམས་ཉིད་ནོར་བུ་རིན་པོ་ཆེ། །ཇི་ལྟར་དམིགས་ཤིང་བསམ་པར་སྣང་། །འགྲོ་བའི་སེམས་རྒྱུད་གཉིས་མི་འཆད། །དེ་ནི་ཡེ་ཤེས་ཀུན་གྱི་གཞི། །ཞེས་སོ། །ཨེ་མ་ཧོ་ངོ་མཚར་བ། སངས་རྒྱས་གསུམ་ནི་ཆོས་སྐུ། ལོངས་སྐུ། སྤྲུལ་སྐུ་གསུམ་ཡིན་ལ། དེ་དག་གི་མཛད་པ་ལེགས་པ་ནི། གང་གི་ཕྱིར་ན་རྒྱུད་དང་འབྲས་བུས་བསྡུས་པའི་ངན་སོང་ལས་བདག་ཅག་རྣམས་སྨིན་མཚམས་ཀྱི་མཛོད་སྤུའི་འོད་ཟེར་གྱིས་སྦྱངས་ནས་ཆོས་ཉན་པའི་སྐལ་བ་ཅན་དུ་བྱས་པས་བྱང་ཆུབ་སྤྱོད་པ་ཉིད་ལ་བཀོད་པའི་ཕྱིར་རོ། །འདི་དག་གིས་སྔོན་བྱུང་ལ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུའི་འོད་ཟེར་གྱི་སྤྲོ་བསྡུས་ངན་སོང་སྦྱངས་ནས་དེ་དག་གི་ཆེད་བརྗོད་བྱས་པར་བསྟན་ལ། རྗེས་འཇུག་ལ་བདག་བསྐྱེད་ཀྱི་གཙོ་བོའི་ང་རྒྱལ་གྱིས་ཏིང་ངེ་འཛིན་ལ་འཇུག་དགོས་པར་སྟོན་ནོ། །ལྔ་པ་ནི། དེ་ནས་ལྷའི་དབང་པོ་ཞེས་སོགས་ཏེ་གོ་སླའོ། །དྲུག་པ་ནི། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ཞེས་བོས་ནས་འདི་ནི་ངོ་མཚར་ཆེཾ་སྟེ། དེའི་རྒྱུ་མཚན། སངས་རྒྱས་བཅོམ་ལྡན་འདས་རྣམས་ནི་རྒྱུའི་དུས་ན། ཚད་མེད་གྲངས་མེད་པའི་བསོད་ནམས་ཀྱི་ཚོགས་ཕར་ཕྱིན་དྲུག་གིས་བསྡུས་པ་ཡང་དག་པར་བསགས་པའོ། །འབྲས་བུའི་དུས་ན་རེ་འདོད་ཐམས་ཅད་སྐོང་བར་བྱེད་པས་ཡོན་ཏན་རིན་པོ་ཆེའི་འབྱུང་ཁུངས་སུ་གྱུར་པའོ། །རྒྱུའི་དུས་སུ་ཤེས་རབ་ཆེན་པོའི་སྒོ་ནས་ཚད་མེད་པའི་ཐབས་ཡང་དག་པར་རྫོགས་པའོ། །ཐོས་བསམ་སྒོམ་གསུམ་གྱི་ཤེས་རབ་ཚད་མེད་པ་བསགས་པའོ། །སྐུ་གསུང་ཐུགས་ཀྱི་སྤྱོད་པ་ནི་ཚད་མེད་པའོ། །འབྲས་བུའི་དུས་སུ་གདུལ་བྱའི་སྐྱེ་བོ་ཚད་མེད་པ་རྣམས་གསང་སྔགས་སྤྱོད་པའི་སྣོད་དུ་གྱུར་པར་མཛད་པའོ། །མི་མཉམ་པ་ནི། སོ་སོ་སྐྱེ་བོ། ཕྱི་རོལ་པ། ཉན་རང་། བྱང་སེམས་རྣམས་དང་མི་མཉམ་པ་ཡིན་ལ། མཉམ་པ་ནི་དུས་གསུམ་གྱི་སངས་རྒྱས་ཀུན་དང་ཆོས་དབྱིངས་མཉམ་པར་རྟོགས་པའོ། །དེ་ལྟ་བུའི་ཡེ་ཤེས་ནི་རྡོ་རྗེ་རྩེ་མོ་ལས། ཡེ་ནས་ཤེས་པས་ཡེ་ཤེས་ཏེ། །སླར་ཡང་ཆོས་སུ་རྟོགས་པ་མིན། །རྟག་དང་ཆད་པ་སྤོང་བྱེད་པ། །འཆི་མེད་དེ་ལ་ཡེ་ཤེས་བརྗོད། །ཅེས་པ་ལྟར་རོ། །རྫུ་འཕྲུལ་ནི་ལུས་ཀྱི་མཐུའོ། །སྨོན་ལམ་གྱི་སྟོབས་ནི་འབད་རྩོལ་ལ་མི་ལྟོས་པས་སྨོན་ལམ་མོ། །རྒྱུ་མཚན་དགུ་པོ་དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་ནི་སྐུའི་སྒོ་ནས་སྣོད་ཇི་ལྟ་བ་བཞིན་དུ། གསུང་གི་སྒོ་ནས་ཇི་ལྟར་འདུལ་བ་བཞིན་དུ་དང་། ཐུགས་ཀྱི་སྒོ་ནས་མོས་པ་ཇི་ལྟ་བ་བཞིན་དུ་སེམས་ཅན་གྱི་དོན་མཛད་པ་ཡིན་པར་ཤེས་པར་བྱས་ཏེ་འདི་ལ་ཞེས་སོགས་སོ། །གཉིས་པ་འཁོར་གྱིས་གླེང་བསླང་བ་ལ་བརྒྱད་དེ། བརྒྱ་བྱིན་གྱིས་སྟོན་པ་ལ་སྤོབས་པ་བསྐྱེད་ཅིག་པར་གསོལ་བ་གདབ་པ་དང་། ནོར་བུ་དྲི་མ་མེད་པ་གང་དུ་སྐྱེས་པར་ལུང་བསྟན་པར་གསོལ་ཞེས་ཞུས་པ་དང་། བཅོམ་ལྡན་འདས་ཀྱིས་དུས་ལ་བབ་ན་ཉོན་ཅིག་པར་གདམས་པ་བསྟན་པས་བརྒྱ་བྱིན་གྱིས་དུས་ལ་བབ་པར་ཁས་བླངས་པ་དང་། དྲི་མ་མེད་པའི་སྐྱེ་རྒྱུད་བསྟན་པ་དང་། བརྒྱ་བྱིན་ལ་སོགས་པ་སྐྱོ་བ་སྐྱེས་ཏེ་འགྱེལ་བ་དང་། བཅོམ་ལྡན་འདས་ལ་ནོར་བུ་དྲི་མ་མེད་པ་སྡུག་བསྔལ་ལས་ཐར་པའི་ཐབས་ཞུས་པ་དང་། བཅོམ་ལྡན་འདས་ཀྱིས་ཉོན་ཅིག་པར་བསྟན་པ་དང་། ཞུས་པ་དངོས་སོ། །དང་པོ་ནི། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་རང་གི་སྟན་ལས་ལངས་ཏེ་ཞེས་སོགས་ཏེ། སྤྱིར་རིགས་དྲུག་གིས་བསྡུས་པའི་སེམས་ཅན་ཐམས་ཅད་ལ་བདེ་བ་དང་བདེ་བའི་རྒྱུ་དང་འཕྲད་པར་འདོད་པའི་ཕན་པ་ཉིད་དུ་བགྱི་བ་དང་། དུད་འགྲོ་ལ་སྡུག་བསྔལ་དང་བྲལ་བར་འདོད་པའི་སྙིང་བརྩེ་བ་ཉིད་དུ་བགྱི་བ་དང་། ཡི་དྭགས་ལ་སྙིང་རྗེ་ཅན་ཉིད་དུ་བགྱི་བ་དང་། དམྱལ་བ་ལ་སྙིང་བརྩེ་བ་ཅན་ཆེན་པོ་ཉིད་དུ་བགྱི་བ་དང་། ཐུན་མོང་དུ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བདེ་བ་དང་ཡིད་བདེ་བས་བསྡུས་པའི་བསམ་པ་ཐམས་ཅད་ཞེས་སོགས་ཏེ། བདག་སྤོབས་པ་བསྐྱེད་པ་ནི་བློ་ཆེན་པོ་དང་ལྡན་པར་བྱིན་གྱིས་རློབས་ཤིག་པའི་དོན་ནོ། །གཉིས་པ་ནི། བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་རིས་འདི་ཉིད་ནས་ཞེས་སོགས་སོ། །གསུམ་པ་ནི། བཀའ་སྩལ་པ། ལྷའི་དབང་པོ་ཅི་སྟེ་ཞེས་སོགས་སོ། །བཞི་པ་ནི། བཀའ་སྩལ་པ། ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཞེས་སོགས་སོ། །ལྔ་པ་ནི། དེ་ནས་བརྒྱ་བྱིན་ལ་སོགས་པ་ལྷའི་བུ་ཐམས་ཅད་ཀྱིས་ཐོས་ནས་ཞེས་སོགས་སོ། །དྲུག་པ་ནི། དེ་ནས་ཡང་ལངས་ནས་ཞེས་སོགས་སོ། །བདུན་པ་ནི། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་སངས་རྒྱས་ཞེས་སོགས་སོ། །བརྒྱད་པ་ལ་གཉིས་ཏེ། བརྒྱ་བྱིན་གྱིས་ཞུས་པ་དང་། ཚངས་པ་ལ་སོགས་པས་ཞུས་པའོ། །དང་པོ་ནི། དེ་ནས་ལྷའི་དབང་པོ་བརྒྱ་བྱིན་གྱིས་ཡང་བཅོམ་ལྡན་འདས་ལ་ཞེས་སོགས་སོ། །གཉིས་པ་ནི། དེ་ནས་ཚངས་པ་ལ་སོགས་ཞེས་སོགས་སོ། །གསུམ་པ་རྒྱུད་ཀྱི་གཞུང་དངོས་ལ་གཉིས་ཏེ། སྟོན་པས་འཁོར་བྱིན་གྱིས་བརླབས་པ་དང་། རྒྱུད་དངོས་སོ། །དང་པོ་ནི། གསོལ་བ་བཏབ་པའི་རྗེས་དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་ཚངས་པ་ལ་སོགས་པ་འཁོར་དུ་འདུས་པའི་ལྷའི་བུ་དེ་དག དེ་བཞིན་གཤེགས་པ་ཐམས་ཅད་ཀྱི་ཐུགས་བསྐུལ་བའི་དོན་གྱིས་སྙིང་པོ་འདིས་འཁོར་རྣམས་སྣོད་རུང་དུ་བྱིན་གྱིས་བརླབ་པར་བྱ་བའི་ཕྱིར། འབྲས་བུའི་སྐལ་བ་ཅན་དུ་བྱེད་པས་ན་དོན་ཡོད་པ། སྟོང་ཉིད་རྡོ་རྗེས་བྱིན་གྱིས་བརླབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཡང་སྔགས་འདི་ཕྱུང་ནས་ལྷ་དེ་དག་སྔགས་ཀྱི་དམ་ཚིག་ཅན་དུ་བྱིན་གྱིས་བརླབས་སོ། །ཨོཾ་ནི་བཀྲ་ཤིས་པ་སྟེ། རྩེ་མོ་ལས། ཡི་གེ་ཨོཾ་ནི་ཅི་ཡིན་བརྗོད། །མཆོག་དང་ནོར་གཏེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་སོགས་སོ། །ཨ་དྷི་ནི་བདག་པོའོ། །ཏིཥྛ་ནི་བྱིན་རླབས། ཛྙ་ན་ཡེ་ཤེས། ས་མ་ཡ་ནི་དམ་ཚིག ཧཱུྃ་ནི་ཡེ་ཤེས་ལྔ་འདུས་པའོ། །དེ་ལྟར་ཏིང་འཛིན་ལ་སྙོམས་པར་ཞུགས་ནས་ཀྱང་། གདོན་མི་ཟ་བ་སྟེ་ངེས་པར་ཚད་མེད་པའི་དོན་གྱིས་ན་མི་ཆོམས་པས་རྡོ་རྗེས་བྱིན་གྱིས་རླབས་ཀྱིས་བརྒྱ་བྱིན་ལ་སོགས་པ་བྱིན་གྱིས་བརླབས་ཞེས་པའོ། །འདི་དག་གི་དོན་ནི། སྔོན་བྱུང་ལ་སྟོན་པས་འཁོར་རྣམས་ཡེ་ཤེས་ཀྱི་དཀྱིལ་འཁོར་དུ་བཅུག་སྟེ། རྒྱུད་ཉན་པའི་སྐལ་བ་ཅན་དུ་མཛད་པ་ཡིན་ལ། རྗེས་འཇུག་གི་གདུལ་བྱས་རྒྱུད་ཉན་པ་ལ་དབང་བསྐུར་སྔོན་དུ་འགྲོ་དགོས་པར་བསྟན་ཅིང་ཆོ་ག་ཉམས་སུ་ལེན་པ་ན། ཚེ་ལྡན་དང་ཚེ་འདས་ལ་སྔགས་འདིས་བྱིན་གྱིས་བརླབ་དགོས་པར་བསྟན་ནོ། །གཉིས་པ་ལ་གཉིས་ཏེ། ཤཱཀྱ་ཐུབ་པས་གསུངས་པའི་ཀུན་རིག་རྩ་བའི་དཀྱིལ་འཁོར་དང་། ཕྱག་ན་རྡོ་རྗེའི་ཞལ་ནས་གསུངས་པའི་བརྟག་པ་ཕྱི་མའོ། །དང་པོ་ལ་དྲུག་སྟེ། སྔགས་ཀྱི་ཕྲེང་བ་ཕན་ཡོན་དང་བཅས་པ་བསྟན་པ་དང་། ནང་གི་དཀྱིལ་འཁོར་སྔོན་དུ་འགྲོ་བས་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་། རས་བྲིས་ལ་བརྟེན་པའི་དངོས་གྲུབ་དང་། ངན་སོང་གི་སྡིག་པ་སྦྱོང་བའི་ཐབས་ཀྱི་བྱེ་བྲག་རྣམས་བསྟན་པ་དང་། ནོར་བུ་དྲི་མ་མེད་པ་ངན་སོང་ལས་ཐོན་པ་ཕན་ཡོན་དང་བཅས་ཏེ་བསྟན་པ་དང་། རྒྱུད་ཀྱི་ཆེ་བ་བསྟན་པའོ། །དང་པོ་ལ་གཉིས། སྔགས་ཀྱི་ཕྲེང་བ་དངོས་དང་། ཕན་ཡོན་ནོ། །དང་པོ་ནི། ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་སོགས་ཏེ། སྔོན་བྱུང་ལས། སྔགས་འདི་དག་སྟོན་པའི་ཐུགས་ཁ་ནས་ཕྱུང་བ་ཕན་ཡོན་དང་བཅས་པ་བསྟན་ལ། རྗེས་འཇུག་ལ། སྔོན་དུ་བསྙེན་པའི་ཆོ་ག་ཉམས་སུ་ལེན་པ་བསྟན་ཏེ། དེ་ལ་ཡང་དཔའ་བོ་གཅིག་པའི་བསྙེན་པ་དང་། དཀྱིལ་འཁོར་ཡོངས་རྫོགས་ཀྱི་བསྙེན་པ་གཉིས་ལས། ཕྱི་མ་བསྟན་ནོ། །ཇི་ལྟར་ན། ཨོཾ་ཤ་ཞེས་པས་སྣོད་བཅུད་སྟོང་ཉིད་དུ་སྦྱང་པ་བསྟན་ལ། ཨོཾ་བྷ་ཞེས་པས་འབྱུང་བ་རིམ་རྩེགས་བསྒོམ་པ་བསྟན་ཅིང་། ཤུགས་ལས་གཞལ་ཡས་ཁང་གདན་བཅས་བསྒོམ་པ་ཡང་བསྟན་ནོ། །དེ་ནས་རིགས་ལྔའི་སྔགས་དང་པོས་ནི་ཟློས་སྔགས་དང་། རིགས་ལྔའི་སྔགས་གཉིས་པས་ནི་བསྐྱེད་སྔགས་དང་། རིགས་ལྔའི་སྔགས་གསུམ་པས་ནི་བུམ་པ་ལ་བཟློས་སྔགས་བསྟན། རྩ་རིག་ནི་ཐུན་མོང་གི་བཟློས་སྔགས་དང་། སྔགས་དངོས་སུ་མ་བསྟན་པ་རྣམས་ཀྱི་བསྐྱེད་སྔགས་བསྟན་ནོ། །ཡང་རོ་ཆས་སུ་གཞུག་པའི་ཚེ། གནས་རྣམས་ལ་གདགས་པའི་ཡི་གེ་ཡང་བསྟན་ནོ། །དེ་ལ་རིགས་ལྔ་སོ་སོ་དང་། གནས་སོ་སོ་ལ་སྦྱོར་ཚུལ་བསྟན་པ་ནི་རིགས་ལྔའི་སྔགས་ཚན་དང་པོས་ནི་རིམ་པ་ལྟར་རྣམ་སྣང་དང་མཛོད་སྤུ། རྒྱ་མཆོག་རིན་ཆེན་དང་རྣ་བ་གཡས། ཤཱཀྱ་རིག་དབང་དང་རྣ་བ་གཡོན། མེ་ཏོག་ཆེར་རྒྱས་དང་གཙུག་ཕུད། སྦྱོང་རྒྱལ་དང་དཔུང་པ་གཡས་རྣམས་སོ། །དེ་ནས་རྩ་རིགས་ནི་ལྷ་ཐམས་ཅད་ཀྱི་ཐུན་མོང་དང་སྙིང་ཁའོ། །རིགས་ལྔའི་སྔགས་ཚན་གཉིས་པ་ནི་རིམ་པ་བཞིན་ཀུན་རིག་དང་སྣ་གོང་། སྦྱོང་རྒྱལ་དང་རྐེད་པ། རྒྱལ་མཆོག་རིན་ཆེན་དང་པུས་མོ་གཡས། ཤཱཀྱ་རིག་དབང་དང་པུས་མོ་གཡོན། མེ་ཏོག་ཆེར་རྒྱས་དང་བོལ་གོང་གཡས་རྣམས་བསྟན་ནོ། །རིགས་ལྔའི་སྔགས་ཚན་གསུམ་པས་ནི་རིམ་པ་བཞིན། ཀུན་རིག་དང་བོལ་གོང་གཡོན། ཤཱཀྱ་རིག་དབང་དང་ལོང་བུ་གཡས། རིན་ཆེན་མེ་ཏོག་དང་ལོང་བུ་གཡོན། སྦྱོང་རྒྱལ་དང་སྣའི་རྩེ་མོ། མེ་ཏོག་ཆེར་རྒྱས་དང་མིག་གཡས་རྣམས་བསྟན་ནོ། །ཨོཾ་ཤ་ནི་མིག་གཡོན། ཨོཾ་བྷ་ནི་གསང་གནས་སོ། །སྔགས་དོན་གཞན་རྣམས་ནི་གོ་སླ་ལ། ཤོ་དྷ་ནི་གཉིས་ནི་སྦྱོང་བ་གཉིས། སརྦ་པཱ་པཾ་ནི་སྡིག་པ་ཐམས་ཅད། བི་ཤོ་དྷ་ནི། རྣམ་པར་སྦྱོང་བ། ཤུདྡྷེ་དག་པ། བི་ཤུདྡྷེ་རྣམ་པར་དག་པ། སརྦ་ཀརྨཱ་ཨཱ་ཝ་ར་ཎ་ནི་ལས་ཀྱི་སྒྲིབ་པ་ཐམས་ཅད། བི་ཤུདྡྷེ་རྣམ་པར་དག་པ། སྭཱ་ཧཱ་ནི་གཞི་ཚུགས་པའོ། །སརྦ་ཨ་བྷ་ཡ་ནི་སྒྲིབ་པ་ཐམས་ཅད། སརྦ་ས་ཏྭ་སེམས་ཅན་ཐམས་ཅད། བི་ཤོ་དྷ་ནི་ཧ་ན་ནི་རྣམ་པར་དག་ཅིང་བསྣུན་པའོ། །ཧཱུྃ་དང་། ཕཊ་དང་། སྭཱ་ཧཱ་གསུམ་ནི་རྡོ་རྗེ་རྩེ་མོ་ལས། ཡི་གེ་ཧཱུྃ་ནི་ཅི་ཡིན་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །སྲིད་པའི་ཞགས་པ་གཅོད་བྱེད་ཅིང་། །གདུག་པ་སྡང་ཞིང་གསོད་བྱེད་པ། །ཧཱུྃ་ནི་མཆོག་ཏུ་དྲན་པར་བྱ། །ཞེས་དང་། ཡི་གེ་ཕཊ་ནི་ཅི་ཡིན་བརྗོད། །གདུག་དང་སྡུག་བསྔལ་འཇོམས་བྱེད་ཅིང་། །བདེ་བ་དག་ནི་འགུགས་པར་བྱེད། །ཕཊ་ནི་འཇོམས་བྱེད་སྒྲ་ཡིན་ཏེ། །གྲོགས་དང་བཅས་ཏེ་འཇོམས་པར་བྱེད། །ཅེས་དང་། སྭཱ་ཧཱ་ཅེས་པ་ཅི་ཡིན་བརྗོད། །སྡིག་པ་ཐམས་ཅད་ཞི་བྱེད་ཅིང་། །དགེ་བའི་ཚོགས་ནི་འཕེལ་བར་བྱེད། །ཉེས་པར་བཅས་པ་འཕྲོག་བྱེད་ཅིང་། །དུ་ཿཁ་ཐམས་ཅད་འཇོམས་པར་བྱེད། །ཅེས་སོ། །གཉིས་པ་ལ་གཉིས་ཏེ། སྔགས་ཐོས་པ་ལ་སོགས་པའི་ཕན་ཡོན། སྔགས་དེ་དང་འབྲེལ་བའི་དཀྱིལ་འཁོར་དུ་ཞུགས་པའི་ཕན་ཡོན་ནོ། །དང་པོ་ནི། ལྷའི་དབང་པོ་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་གསང་བའི་སྙིང་པོ་འདི་ཞེས་སོགས་ཏེ། གཞན་རྣམས་ནི་གོ་སླ་ལ། དུས་མ་ཡིན་པར་འཆི་བ་བརྒྱད་ནི། མཚོན། དུག རྒྱལ་པོའི་ཆད་པ། འབྲུམ་ནད། གཅན་གཟན། ཆོམ་རྐུན། མེར་ཚིག་པ། ཆུར་ཤི་བ་དང་བརྒྱད་དོ། །དེ་དང་འབྲེལ་བའི་རྨི་ལམ་གྱི་རྣམ་པ་ནི་ཐུར་ལ་བབ་པ་གོས་དང་བྲལ་བ་གཅན་གཟན་གྱིས་ཟོས་པ། ཉི་ཟླ་ནུབ་པ། ནམ་སྲོས་པ་ལ་སོགས་པ་ཡིན་པར་རྩ་སྐྱ་པས་བཤད་དོ། །གཉིས་པ་ནི། དཀྱིལ་འཁོར་དུ་ཇི་ལྟ་བ་བཞིན་དུ་ཞུགས་ལ་ཞེས་སོགས་ཏེ། ངན་སོང་དུ་འགྲོ་བར་ཡང་མི་འགྱུར་རོ་ཞེས་པ་ཡན་ཆད་ཀྱིས་ཚེ་ལྡན་ལ་དབང་བསྐུར་བའི་ཕན་ཡོན་དང་། མྱོང་བར་འགྱུར་རོ་ཞེས་པ་ཡན་ཆད་ཀྱིས་ཚེ་འདས་ལ་དབང་བསྐུར་བའི་ཕན་ཡོན་བསྟན་ཏེ། དེ་བཞིན་གཤེགས་པ་ཐམས་ཅད་ཀྱིས་ཆོས་ཉིད་མངོན་སུམ་དུ་བྱེད་པ་ནི་ས་དང་པོ་ཡན་ཆད། བསྙེན་བསྐུར་ནི་རྫུ་འཕྲུལ་གྱི་སྟོབས་ཀྱིས་ལུས་ཀྱི་བསྙེན་བཀུར་བ། ཕྱིར་མི་ལྡོག་པ་ནི་འཁོར་བ་དང་། ཐེག་དམན་ལམ་དུ་ཕྱིར་མི་ལྡོག་པ། རྒྱུད་ངེས་པ་ཅན་ནི་ཐེག་པ་ཆེན་པོར་རོ། །རིགས་སུ་སྐྱེས་པ་ནི་བྱང་ཆུབ་སེམས་དཔར་རོ། །སྒྲིབ་པ་ཐམས་ཅད་རབ་ཏུ་སྤངས་པ་ནི་སེར་སྣ་ལ་སོགས་པའི་ཉོན་སྒྲིབ་དང་། གཟུང་འཛིན་གྱི་རྟོག་པ་ཤེས་བྱའི་སྒྲིབ་པ་དང་། མཚམས་མེད་ལྔ་པོ་ལས་ཀྱི་སྒྲིབ་པ་དང་། སྒྲིབ་པ་ལྔ་པོ་ཆོས་ཀྱི་སྒྲིབ་པ་སྟེ་བཞི་ཡོད་པར་ཀུན་དགའ་སྙིང་པོས་དེ་ཉིད་སྣང་བར་བཤད་དོ། །གཉིས་པ་ནང་གི་དཀྱིལ་འཁོར་སྔོན་དུ་འགྲོ་བས་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ལ་གསུམ་སྟེ། བརྒྱ་བྱིན་གྱིས་བཤད་པར་གསོལ་བ་གདབ་པ། བཅོམ་ལྡན་འདས་ཀྱིས་བཤད་པའི་དོན་དུ་ཏིང་ངེ་འཛིན་ལ་སྙོམས་པར་ཞུགས་པ། བཤད་པ་དངོས་སོ། །དང་པོ་ནི། དེ་ནས་ལྷ་རྣམས་ཀྱི་དབང་པོ་ཞེས་སོགས་སོ། །གཉིས་པ་ནི། དེ་ནས་བཅོམ་ལྡན་འདས་ཞེས་སོགས་ཏེ། ངན་སོང་ཐམས་ཅད་ཡོངས་སུ་སྦྱོང་བའི་ཆོས་དབྱིངས་ཤེས་པས་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དོན་བྱེད་པ་པོ། དེ་བཞིན་གཤེགས་པ་ཐམས་ཅད་ཀྱིས། བྱ་བ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཞེས་བྱ་བའི་སྙིང་པོའམ་ནང་གི་དཀྱིལ་འཁོར་ཆེན་པོ་འདི་གསུངས་སོ། །གསུམ་པ་ལ་གཉིས་ཏེ། ནང་གི་དཀྱིལ་འཁོར་དང་། ཕྱིའི་དཀྱིལ་འཁོར་རོ། །དང་པོ་ནི། ས་བཅུ་གཅིག་པའི་སས་བསྡུས་པའི་སངས་རྒྱས་ཀུན་གྱི་བྱང་ཆུབ་ཀྱི་སེམས་ལ་དོན་དམ་དང་། ཀུན་རྫོབ་གཉིས་ལས། དང་པོ་ནི། ཆོས་ཉིད་སྤྲོས་པ་དང་བྲལ་བ་དམིགས་པ་མེད་པ་ཡིན་ཏེ། དབུ་མ་ལས། སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་པོ་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྟོང་ཉིད་མཚན་ཉིད་བཞེད། །ཅེས་སོ། །དེ་ཉིད་གོང་ན་མེད་ཅིང་ཕུལ་དུ་བྱུང་བས་ན་བླ་ན་མེད་པའོ། །ཀུན་རྫོབ་བྱང་ཆུབ་ཀྱི་སེམས་ནི་དོན་དམ་བྱང་ཆུབ་ཀྱི་སེམས་དེ་རྟོགས་པར་འགྱུར་བའམ་རྟོགས་པའི་ཐབས་སུ་གྱུར་པ་སྟེ། སྨོན་པ་དང་འཇུག་པ་གཉིས་སོ། །དང་པོ་ནི། སེམས་ཅན་གྱི་དོན་དུ་སངས་རྒྱས་འདོད་པའོ། །གཉིས་པ་ནི། ལམ་ལ་འཇུག་པ་སྟེ། བསྙེན་པ་ནས་བརྩམས་ཏེ། རྒྱུད་འདི་ནས་འབྱུང་བའི་རང་དོན་དང་གཞན་དོན་གྱི་ལས་ལ་འཇུག་པའོ། །དེ་ལྟར་གཉིས་ལས། འདས་པའི་རྒྱལ་བ་བྱེ་བ་ཕྲག་བརྒྱད་ཅུ་རྩ་བཞིས་གསུངས་པའི་དོན་དམ་པའི་བྱང་ཆུབ་སེམས་ཀྱི་ཡེ་ཤེས་གང་ཡིན་པ་དེ་ནི་རྟོགས་བྱ་མཐར་ཐུག་དང་། བཅུད་དམ་དྭངས་མར་གྱུར་པས་ན་དཀྱིལ་འཁོར་སྙིང་པོར་གསུངས་སོ། །དེ་རྟོགས་པའི་ཐབས་སུ་གྱུར་པ་འདས་པའི་རྒྱལ་བ་བྱེ་བ་ཕྲག་བརྒྱད་ཅུ་རྩ་བཞིས་གསུངས་པའི་ཀུན་རྫོབ་བྱང་ཆུབ་སེམས་ཀྱི་ཡེ་ཤེས་གང་ཡིན་པ་དེ་ནི་འབྱུང་གནས་སུ་འགྱུར་བའམ་གཅེས་པར་འགྱུར་བའི་དོན་གྱིས་ན་དཀྱིལ་འཁོར་སྙིང་པོར་གསུངས་སོ། །འདིར་ཀུན་རྫོབ་བྱང་ཆུབ་ཀྱི་སེམས་ལ་གཉིས་ལས། འཇུག་པ་བྱང་ཆུབ་ཀྱི་སེམས་ནི་ལམ་ཉམས་སུ་ལེན་པ་ཏིང་ངེ་འཛིན་གྱི་དཀྱིལ་འཁོར་ཡིན་པས་འདིར་མངོན་རྟོགས་ཀྱི་ཐོ་བསྒྲིགས་ཏེ་བཤད་པ་ནི། དཀྱིལ་འཁོར་བཅུ་གཉིས་པོ་ཐམས་ཅད་ལ། སྔོན་དུ་བསྙེན་པ། དཀྱིལ་འཁོར་ལས་རིམ། དངོས་གྲུབ་ཀྱི་ཡེ་ཤེས་ལ་བསླབ་པ་གསུམ་ལས། དང་པོ་ནི། གནས་དབེན་པར་ཁྲུས་བྱས་ཏེ། སྟན་བདེ་བ་ལ་འདུག་ནས་ལྷའི་རྣལ་འབྱོར་ལ་འཇུག་པ་ནི། ཀུན་རིག་ནས། དེ་ནས་ཁྲུས་ལ་སོགས་བྱས་ཏེ། །དྲི་དང་ཕྲེང་མཆོག་ཕྲེང་བ་ཅན། །ཞེས་སོ། །དེ་ནས་སྐྱབས་འགྲོ་ནི། ཐུབ་པའི་སྐབས་ནས། སངས་རྒྱས་ཆོས་དང་དགེ་འདུན་ལ། །ཐོས་ནས་ཀྱང་ནི་སྐྱབས་སུ་སོང་། །ཞེས་དང་། ཚེ་དཔག་མེད་ནས། དཀོན་མཆོག་གསུམ་དང་བྱང་ཆུབ་སེམས། །བླ་མ་དམ་པ་རྣམས་མི་སྤང་། །ཞེས་སོགས་སོ། །ཆོས་བདག་མེད་པ་དྲན་ཅིང་སེམས་བསྐྱེད་པ་ནི། འཁོར་ལོས་སྒྱུར་བ་ནས། སྟོང་པ་མཚན་མ་མེད་པའི་སེམས། །ཞེས་དང་། ཀུན་རིག་ནས། སངས་རྒྱས་ཀུན་གྱི་བྱང་ཆུབ་སེམས། །ཞེས་སོ། །སྲུང་འཁོར་བསྒོམ་པ་ལ། ཐོག་མར་ཕྱག་རྡོར་བསྐྱེད་པ་ནི། མེ་ལྟར་འབར་བ་ནས། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་གསུངས་ལ། དེ་ཉིད་འཇིག་རྟེན་གསུམ་རྒྱལ་དུ་བསྒྱུར་བ་ནི། རང་གི་སྐུ་བོར་ཏེ་རྡོ་རྗེ་སེམས་དཔའི་སྐུར་ཞུགས་ནས་ཞེས་དང་། ཀུན་རིག་ནས། འཇིག་རྟེན་གསུམ་ལས་རྣམ་རྒྱལ་གྱིས། །བདག་བསྲུང་ལ་སོགས་བྱས་ནས་ནི། །ཞེས་སོ། །དེ་ཉིད་ཀྱི་སྐུའི་རྣམ་པ་ནི། མེ་ལྟར་འབར་བ་ནས། མ་རུངས་སྙིང་ཁར་མནན་ནས་བསྡིགས་བྱེད་ཅིང་། །ཞལ་ནི་ཤིན་ཏུ་འཇིགས་འཇིགས་བལྟ། །ཕྱག་ནི་བརྒྱ་ཕྲག་དུ་མར་ལྡན། །སྦྲུལ་དང་མི་སྡུག་མགོས་བརྒྱན་པ། །སྟག་ལྤགས་ཀྱིས་ནི་སྨད་གཡོགས་བགོས། །རྒྱུ་མ་ཐོགས་ཤིང་དབུ་མཐའ་ཡས། །མགོ་ཐོད་ཤས་བཀང་ཕྱག་ན་བསྣམས། །ཞེས་སོ། །བདག་བསྲུང་སོགས་ཀྱི་སྔགས་ནི། དེ་ཉིད་ལས། རྡོ་རྗེ་སེམས་དཔའི་ཁྲོ་བོ་མེ་ཉི་མ་བྱ་བའི་སྙིང་པོ་འདི་ཉིད་ཀྱི་ཐུགས་ཁ་ནས་ཕྱུང་ངོ་། །ཨོཾ་བཛྲ་ས་ཏྭ་ཀྲོ་དྷ་ཞེས་སོགས་གསུངས་སོ། །དེ་དག་ནི་རྒྱུད་ཀྱི་དངོས་བསྟན་གྱི་སྲུང་འཁོར་བསྡུས་པ་ཡིན་ལ། རྒྱས་པ་ནི། སྔར་གྱི་ཚིག་རྐང་གཉིས་པོ་དེ་ལ་བརྟེན་ནས་བླ་མའི་མན་ངག་གི་རྡོ་རྗེ་འབྱུང་བ་བཞིན་མཛད་དོ། །སྲུང་འཁོར་གྱི་རྗེས་ལ་ལག་པ་བྱིན་གྱིས་བརླབ་པ་ནི། འཁོར་ལོས་སྒྱུར་བ་ནས། ལག་པ་གཉིས་མདུན་དུ་བཞག་ལ་ཞེས་པ་ནས་དེ་བཞིན་གཤེགས་པ་རྣམས་ཡིན་པར་མོས་པ་བསྐྱེད་དེ་ཞེས་པའི་བར་གསུངས་ལ། དེ་ནས་ཆོས་ཐམས་ཅད་གཅིག་ལ་གཅིག་འདྲེས་པ་དང་། བདག་དང་ཡང་རྗེས་སུ་དྲན་པར་བྱ་སྟེ། ཞེས་གསུངས་པའི་དོན་གཟུགས་བརྙན་གྱི་སྦྱོར་བ་བྱ་བ་ནི། རྡོ་རྗེ་འབྱུང་བ་ལས། གཟུགས་བརྙན་ལ་སོགས་པའི་སྦྱོར་བས་ཕྱག་རྒྱ་བཅིང་བ་སྔོན་དུ་འགྲོ་བ་དང་། ཆོ་ག་ཐམས་ཅད་རྗེས་སུ་བསྐྱེད་པར་བྱ་སྟེ། ཞེས་དང་། དེ་ཡི་སྔགས་དང་ཕྱག་རྒྱ་ཡང་། ཐལ་མོ་དམ་དུ་བསྡམས་པ་ལས། །སོར་མོ་ཐམས་ཅད་བསྣོལ་བ་ནི། །རྡོ་རྗེ་ཐལ་མོར་བཀའ་སྩལ་ཏེ། །རབ་ཏུ་བསྡམས་ཕྱིར་རྡོ་རྗེ་བསྡམས། །བཛྲ་ཨཉྩ་ལི་ཞེས་བྱ་བ་ནི་རྡོ་རྗེ་ཐལ་མོའི་སྔགས་སོ། །བཛྲ་བནྡྷ་ཞེས་བྱ་བ་ནི་རྡོ་རྗེ་བསྡམས་པ་སྟེ། བཛྲ་བནྡྷ་ཏྲ་ཐ་ཞེས་བྱ་བ་ལན་གསུམ་བརྗོད་ཅིང་སྙིང་ཁར་བཀྲོལ་ལོ་ཞེས་པ་ནས་ཡེ་ཤེས་དབབ་པའི་བར་གསུངས་སོ། །བདག་བསྐྱེད་དངོས་ལ། དཔའ་བོ་གཅིག་པ་དང་། དཀྱིལ་འཁོར་གྱི་འཁོར་ལོ་ཡོངས་རྫོགས་བསྒོམ་པ་གཉིས་ལས། དང་པོ་ནི། ཀུན་རིག་ནས། བདག་གིས་དེ་ཉིད་དྲན་བྱེད་ཅིང་། །ཞེས་པས་སྟོན་ལ། ཇི་ལྟར་སྒོམ་པའི་ཚུལ་ནི་ཚེ་དཔག་མེད་ནས། ཆོས་རྣམས་ཐམས་ཅད་དངོས་མེད་པར། །ཞེས་པ་ནས། སངས་རྒྱས་རྣམས་ཀྱིས་དབང་བསྐུར་རོ། །ཞེས་པའི་བར་གྱིས་བསྟན་ལ། ཟླ་བའི་འོག་ཏུ་པདྨ་བསྒོམ་པ་ནི་གླེང་གཞི་ནས་པདྨའི་གདན་ལ་བཞུགས་ཏེ་ཞེས་པའི་བསྟན། རང་གི་ས་བོན་དང་ཕྱག་རྒྱས་བྱིན་གྱིས་བརླབ་པ་ནི་ཤཱཀྱ་ཐུབ་པ་ནས་གསུངས་ལ། ལྟག་འོག་གོ་རིམ་ཇི་བཞིན་དུ་སངས་རྒྱས་རྣམས་ཀྱིས་དབང་བསྐུར་བའི་སྔགས་ནི་ཕྱག་རྡོར་ནས་གསུངས་སོ། །རྗེ་བཙུན་གྱིས་སྦྱོང་རྒྱུད་ཀྱི་དངོས་བསྟན་བཞིན་མཛད་པས་འདི་ལ་ཡེ་ཤེས་ཀྱི་འཁོར་ལོ་དགུག་གཞུག་མི་མཛད་ལ། རྩ་སྐྱ་བ་ནི་ཡེ་ཤེས་ཀྱི་འཁོར་ལོ་དགུག་གཞུག་ཀྱང་མཛད་དོ། །སྒྲིབ་པ་སྦྱོང་བའི་ཏིང་ངེ་འཛིན་ནི་གླེང་གཞི་ནས་ཚངས་པ་ཆེན་པོ་ཞེས་སོགས་གསུངས། མཆོད་བསྟོད་ནི་མེ་ལྟར་འབར་བ་ནས། རིན་ཆེན་གདུགས་ལ་སོགས་མཆོག་གིས། །མཆོད་པ་སྣ་ཚོགས་བྱས་ནས་ཀྱང་། །ཕྱག་ན་རྡོ་རྗེ་རྒྱས་སྤྱན་ལ། །དགའ་བའི་བསམ་པས་བསྟོད་བྱེད་པ། །སངས་རྒྱས་ཀུན་པས་སྔར་སངས་རྒྱས། །ཞེས་སོགས་གསུངས་སོ། །བཟླས་སྔགས་ནི་གོང་དུ་གསུངས་པའི་རྩ་རིག་ཡིན་ལ། དེའི་དམིགས་པ་ནི་ཕྱག་རྡོར་ནས་འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ། སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་དུ་བྱས་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་དེ་ཉིད་དུ་ཞུགས་པར་གྱུར་ཏོ་ཞེས་སོ། །གཉིས་པ་དཀྱིལ་འཁོར་ཡོངས་རྫོགས་ཀྱི་བསྙེན་པ་ནི། སྔགས་ཀྱི་ཕྲེང་བའི་སྐབས་སུ་བསྟན་པ་སྔར་བཤད་ཟིན་ཅིང་། དེ་ནི་དཀྱིལ་འཁོར་སྙིང་པོར་གསུངས་ཞེས་པའི་དེ་མ་ཐག་ཏུ་ཕྱིའི་དཀྱིལ་འཁོར་གསུངས་པ་ཞེས་པའི་ཤུགས་ཀྱིས་ཀྱང་ནང་གི་དཀྱིལ་འཁོར་བསྒོམ་པ་བསྟན་ལ། དཀྱིལ་འཁོར་སྔ་མ་བཞིན་བསམས་ལ་ཞེས་པས་ཀྱང་བསྟན་ནོ། །སྒོམ་ཚུལ་སྔར་དཔའ་བོ་གཅིག་པའི་སྐབས་སུ་རྡོ་རྗེ་སེམས་དཔའ་འམ་རང་རང་གི་དཀྱིལ་འཁོར་གྱི་གཙོ་བོ་གང་བསྒོམས་ཀྱང་རུང་སྟེ། འགྲོ་བ་ངན་སོང་ལས་གྲོལ་བའི་ཆེད་དུ་བརྗོད་པའི་བར་བྱས་པའི་རྗེས་ལ་རྩ་སྐྱ་པ་ལྟར་ན་སྔར་གྱི་ཕྱག་རྒྱ་ཆེན་པོ་ནམ་མཁར་བཏེག་སྟེ། སྣོད་བཅུད་སྟོང་པར་སྦྱངས་ནས་འབྱུང་བཞི་རི་རབ་དང་བཅས་པའི་སྟེང་དུ་གཞལ་ཡས་ཁང་གདན་བཅས་བསྐྱེད་དེ། དབུས་ཀྱི་གདན་གྱི་སྟེང་དུ་ཕྱག་རྒྱ་ཆེན་པོ་ཕབ་ནས་དེའི་ཐུགས་ཁ་ནས་འཁོར་སྤྲོ་བར་བཞེད་ལ། རྗེ་བཙུན་གྱིས་ནི་ཕྱག་རྒྱ་ཆེན་པོ་ནམ་མཁར་མི་འདེགས་པར་སྟོང་པར་སྦྱངས་ནས་གཞལ་ཡས་ཁང་གདན་བཅས་བསྐྱེད་པའི་བར་བྱས་ལ། དབུས་ཀྱི་གདན་གྱི་སྟེང་དུ་མཐའ་སྐོར་དུ་རྩ་རིག་དང་། ནང་སྐོར་དུ་རྩ་བའི་སྔགས་བཀོད་པ་ལས་འོད་ཟེར་གྱི་སྤྲོ་བསྡུ་བྱས་ནས་གཙོ་བོ་བསྐྱེད། དེའི་ཐུགས་ཁར་ཟླ་བའི་སྟེང་དུ་མཐའ་སྐོར་དུ་རྩ་རིག་དང་། ནང་སྐོར་དུ་འཁོར་གང་ཡིན་གྱི་སྔགས་བཀོད་པ་ལས་འོད་ཟེར་སྤྲོ་བསྡུ་བྱས་ནས་འཁོར་དེ་དང་དེ་བསྐྱེད་དེ་རང་གནས་སུ་སྤྲོ་བར་མཛད་དོ། །དེ་ནས་ཡེ་ཤེས་པ་སྤྱན་དྲངས་པ་ནས་ཕྱག་རྒྱ་བཞིས་རྒྱས་འདེབས་པའི་བར་མདུན་བསྐྱེད་བཞིན་བྱས་ནས་མཆོད་བསྟོད་སྔ་མ་བཞིན་བྱས་ནས་གཙོ་འཁོར་ཐམས་ཅད་ཀྱི་སྔགས་བཟླས་ཏེ་མཇུག་ཏུ་ཡེ་ཤེས་པ་གཤེགས་སུ་གསོལ་ལོ། །རས་བྲིས་ལ་བརྟེན་པའི་བསྙེན་པ་ནི་འོག་གཞུང་དོན་གྱི་སྐབས་སུ་འབྱུང་ངོ་། །གཉིས་པ་དཀྱིལ་འཁོར་ལས་རིམ་ལ་ས་ཆོག་ནི། ཀུན་རིག་ནས། གཙུག་ལག་ཁང་ངམ་སྐྱེད་མོས་ཚལ། །ཞེས་སོགས་ཚིགས་བཅད་གཅིག་གིས་བསྟན། ལྷ་སྟ་གོན་ནི་རྒྱུད་འདིར་དངོས་སུ་མ་གསུངས་པས་མ་བྱས་ཀྱང་རུང་ལ། འོག་ཏུ་སློབ་མ་སྟ་གོན་གསུངས་པའི་ཤུགས་ཀྱིས་བྱེད་པར་སྤྲོ་ན་འགལ་བ་མེད་དོ། །དཀྱིལ་འཁོར་བྲི་བ་ནི། ཀུན་རིག་ནས། གྲུ་བཞི་པ་ལ་སྒོ་བཞི་པ། །ཞེས་པ་ནས། རྩིབས་ནི་ཉིས་འགྱུར་ཉིད་དུ་བྱ། །ཞེས་གསུངས་པའི་བར་གསུངས་ཤིང་། དཀྱིལ་འཁོར་གཞན་རྣམས་ཀྱི་མི་འདྲ་བའི་ཁྱད་པར་ནི་སོ་སོའི་སྐབས་སུ་འབྱུང་ངོ་། །ལྷ་དགོད་ཚུལ་ནི། ཀུན་རིག་ནས། དབུས་ཀྱི་ཕྱོགས་སུ་ཀུན་རིག་ནི། །ཞེས་པ་ནས། ཐིག་ལེ་རྣམས་ཀྱང་བྲི་བར་བྱ། །ཞེས་གསུངས་པའི་བར་གསུངས་ཤིང་། གཞན་རྣམས་ཀྱི་ཁྱད་པར་ཡང་སོ་སོའི་སྐབས་སུ་གསལ་བར་འབྱུང་ངོ་། །མཆོད་གཏོར་དང་བུམ་པ་བཤམ་ཚུལ་ནི། ཀུན་རིག་ནས། དེ་ནས་མཁས་པས་དཀྱིལ་འཁོར་ལ། །ཞེས་པ་ནས། རབ་ཏུ་བཀང་བ་བཞག་པར་བྱ། །ཞེས་གསུང་ཤིང་། སོ་སོའི་སྐབས་སུ་ཅུང་ཟད་འབྱུང་ངོ་། །དཀྱིལ་འཁོར་བསྒྲུབ་པ་ལ། བདག་བསྐྱེད་སྐབས་འདིར་དངོས་སུ་མ་གསུངས་ཀྱང་། རས་བྲིས་ཀྱི་སྐབས་སུ། བདག་གི་དེ་ཉིད་དྲན་བྱེད་ཅིང་། །ཞེས་གསུངས་པས་བསྟན། བུམ་བཟླས་ནི། ཀུན་རིག་ནས། སྔ་མ་བཞིན་དུ་བུམ་པ་ལ། །བརྒྱ་རྩ་བརྒྱད་དུ་བཟླས་ནས་ནི། །ཞེས་གསུངས་ཤིང་དཀྱིལ་འཁོར་གཞན་རྣམས་ལ་ཡང་། ཕྱོགས་སྐྱོང་རང་གི་སྔགས་བཏབ་པའི། །བུམ་པ་རྣམས་ཀྱིས་དབང་བསྐུར་ཏེ། །ཞེས་སོགས་གསུངས་སོ། །མདུན་བསྐྱེད་བསྒྲུབ་པ་ལ། ཐོག་མར་ལུས་ཀྱི་སྤྱོད་ལམ་དང་། དཀྱིལ་འཁོར་ཁང་པར་འཇུག་ཚུལ་ནི། ཀུན་རིག་ནས། དེ་ནས་ཁྲུས་ལ་སོགས་བྱས་ལ། །ཞེས་སོགས་ཚིག་རྐང་ལྔ་གསུངས་དེ་ནས་རྒྱུད་འདིར་མདུན་བསྐྱེད་ལ་དམ་ཚིག་པ་བསྐྱེད་པ་དངོས་སུ་མ་གསུངས་པས་ཡེ་ཤེས་པ་སྤྱན་དྲང་བ་ནི། ཀུན་རིག་ནས། གཙོ་བོ་རྒྱལ་བ་སྲས་ཀྱི་འཁོར། །མང་པོ་རྣམས་ནི་སྤྱན་དྲངས་ཏེ། །ཞེས་གསུངས་ལ། དཀྱིལ་འཁོར་གཞན་རྣམས་ལ་ཡང་འདི་ཁོ་ན་བཞིན་བྱའོ། །དམ་ཚིག་པ་བསྐྱེད་པར་སྤྲོ་ན་རྣལ་འབྱོར་གྱི་རྒྱུད་གཞན་བཞིན་དུ་བྱ་བར་མན་ངག་ལས་འབྱུང་སྟེ། གཞལ་ཡས་ཁང་གདན་བཅས་བསྐྱེད་ནས་འོད་ཟེར་གྱི་སྤྲོ་བསྡུ་ལས་བསྐྱེད་པའམ། སྙིང་པོ་ཚིག་ཙམ་ལས་བསྐྱེད་པ་གང་འགྲུབ་བྱའོ། །དགུག་གཞུག་གི་རྗེས་སུ་ཕྱག་རྒྱ་བཞིས་རྒྱས་འདེབས་པ་ནི་དམ་ཚིག་གི་ཕྱག་རྒྱ་ནི་དངོས་སུ་བཤད་ལ། ལས་ཀྱི་ཕྱག་རྒྱ་ནི་འཁོར་ལོས་སྒྱུར་བའི་སྐབས་ནས་དམ་ཚིག་གི་ཕྱག་རྒྱའི་རྗེས་ལ་དེ་ཉིད་གཉིས་སུ་བྱས་ནས། གར་བྱས་ན་ལས་ཀྱི་འོ་ཞེས་དང་། ཆོས་ཀྱི་ཕྱག་རྒྱ་ཡང་དེ་ཉིད་ལས། སེམས་དཔའ་བཅུ་དྲུག་གི་ས་བོན་ལྟ་བུ་བཤད་ཅིང་། ཕྱག་རྒྱ་ཆེན་པོ་ནི་ཤུགས་ལས་གྲུབ་པ་ཉིད་དོ། །མཆོད་པ། བསྟོད་པ། གཏོར་མ་རྣམས་ནི་ཀུན་རིག་ནས། ཨརྒྷཾ་མཆོག་བཏགས་གསང་ལ་སོགས་པ་ཡི། །ཞེས་པ་ནས། དེ་ཡི་གཏོར་མ་ཇི་ལྟར་མཐུན་པར་བྱ། །ཞེས་པའི་བར་གསུངས་སོ། །སློབ་དཔོན་བདག་ཉིད་འཇུག་ཤིང་དབང་བླང་བ་ནི་ཀུན་རིག་ནས། དངོས་སུ་མ་གསུངས་ཀྱང་ཕྱོགས་སྐྱོང་གི་སྐབས་ནས། དེ་ནས་བདག་ཉིད་ཞུགས་ནས་ཀྱང་། །ཞེས་འཇུག་པ་དང་། ཚེ་དཔག་མེད་ནས། དེ་ནས་བདག་ཉིད་དབང་བསྐུར་ཏེ། །ཞེས་དབང་བླང་བར་གསུངས་ཤིང་། འཁོར་ལོས་སྒྱུར་བ་ནས། སྤྱན་དྲངས་བདག་ཉིད་འཇུག་པར་བྱ། །བདག་ཉིད་ཀྱི་ནི་དབང་ཡང་བསྐུར། །ཞེས་འཇུག་པ་དང་དབང་བླང་བ་གཉིས་ཀྱང་གསུངས་སོ། །མདུན་བསྐྱེད་ལ་དམིགས་པའི་བཟླས་པ་ནི་ཚེ་དཔག་མེད་ནས། སྐྱིལ་ཀྲུང་བཅས་ཏེ་འདུག་ལ་ཞེས་པ་ནས། དེའི་ཚེ་ཡིད་ཀྱི་ལས་ཐམས་ཅད་ནུས་པར་འགྱུར་རོ་ཞེས་པའི་བར་གསུངས། བདག་མདུན་ཐ་མི་དད་དུ་བསྒྲུབ་པ་ནི་ཚེ་དཔག་མེད་ནས། དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ། ཨོཾ་བཛྲ་དྷ་ར་ཞེས་པ་ནས། ང་རྒྱལ་བསྐྱེད་ལ་ཞེས་པའི་བར་གསུངས་སོ། །སློབ་མ་དབང་བསྐུར་ལ་འཇུག་པའི་ཆོས་བཅུ་བདུན་ནི། ཀུན་རིག་ནས། དེ་ནས་སྔགས་པས་བླ་མེད་བྱང་ཆུབ་ཀྱི། །ཞེས་པ་ནས། བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་པའི་བར་གྱིས་གོ་རིམ་བསྟན་ལ། མི་འདྲ་བའི་ཁྱད་པར་རྣམས་ནི་སོ་སོའི་སྐབས་ནས་འབྱུང་ངོ་། །དབང་གི་དངོས་གཞི་ལ་སྔགས་དབང་དང་། བུམ་པ་ལ་སོགས་པའི་དབང་བཅུ་དང་། ཐབས་ཤེས་རབ་ཀྱི་དབང་དང་། རིན་ཆེན་སྣ་བདུན་གྱི་དབང་སྟེ་བཅུ་དགུ་ནི། མོས་པ་བརྟན་དང་ལྡན་པས་དམ་བཅས་ནས། །ཞེས་པ་ནས། སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་པའི་བར་གྱིས་བསྟན་ལ། སྔགས་རྣམས་ནི་ཕྱག་རྡོར་ནས་འབྱུང་ངོ་། །བཀའ་བསྒོ་བ་དང་བླ་མ་ལ་ཡོན་འབུལ་བ་ནི། ཚེ་འདིའི་བདེ་བ་མ་ལུས་དང་། །ཞེས་སོགས་དང་། དེས་ཀྱང་མོས་པས་སྤྱི་བོས་ཕྱག་འཚལ་ཏེ། །ཞེས་སོགས་ཀྱིས་བསྟན་ནོ། །མཇུག་ཆོག་ནི་མེ་ལྟར་འབར་བ་ནས། །དེ་ཡི་ལུས་ལ་དབང་བསྐུར་ཞིང་། །མཉམ་པར་གཞག་པས་བསྲུངས་ནས་ཀྱང་། །མཇུག་དུ་མངོན་པར་མཆོད་ནས་ནི། །ལྷ་རྣམས་ཐམས་ཅད་གཤེགས་པར་གསོལ། །ཞེས་པ་འདི་དངོས་སུ་སྦྱིན་སྲེག་གི་མཇུག་ཆོག་ཏུ་གསུངས་ཀྱང་། མདུན་བསྐྱེད་ཀྱི་མཇུག་ཆོག་ཐམས་ཅད་འདིས་བསྟན་པ་ཡིན་ནོ། །གསུམ་པ་དངོས་གྲུབ་ཀྱི་ཡེ་ཤེས་ལ་བསླབ་པ་ནི་གཞུང་སོ་སོའི་སྟེང་དུ་རྟོགས་པར་བྱའོ། །དེ་ལྟར་ན་རྒྱུད་འདིར་ཁ་འཕངས་པ་ཡོད་ཀྱང་ཆོ་ག་དངོས་སུ་མ་བཤད་པ་རྣམས་དེ་ཉིད་འདུས་པ་སོགས་ནས་ཁ་བསྐང་བ་མ་གཏོགས་རྒྱུད་འདིར་དངོས་སུ་གསུངས་པའི་ཆོ་ག་གོང་འོག་འཁྲུགས་བསྡེབས་ནས། རྒྱུད་ཀྱི་དངོས་བསྟན་བཞིན་དུ་མཛད་པ་འདི་ནི་པཎྜི་ཏ་དྷརྨཱ་ཕ་ལའི་མན་ངག ཇོ་བོ་རིན་ཆེན་བཟང་པོ་ནས་ས་སྐྱ་པ་ལ་བརྒྱུད་པ་དང་། ཇོ་བོ་རྗེ་ནས་རྩ་སྣུར་འཛིམ་གསུམ་ལ་བརྒྱུད་པ་རྣམས་ཕལ་ཆེར་འདྲ་ཞིང་། ཁྱད་པར་དུ་འཕགས་པ་འགའ་ཞིག་ཡོད་པ་འདིའི་རྗེས་སུ་འབྲང་བ་ནི་སྐལ་བ་བཟང་བར་ཤེས་པར་བྱའོ། །གཉིས་པ་ཕྱིའི་དཀྱིལ་འཁོར་ལ་གཉིས་ཏེ། སྡུད་པ་པོའི་མཚམས་སྦྱོར་དང་། གཞུང་ངོ་། །དང་པོ་ནི། དེ་ནས་ཡང་བཅོམ་ལྡན་འདས་ཀྱིས་ཞེས་སོགས་སོ། །གཉིས་པ་ལ་གཉིས་ཏེ། སློབ་དཔོན་གྱི་ལས་དང་། སློབ་མ་གཞུག་ཅིང་དབང་བསྐུར་བའི་ཆོ་གའོ། །དང་པོ་ལ་དྲུག་སྟེ། དཀྱིལ་འཁོར་བྲི་བའི་གནས། སའི་ཆོ་ག ཐིག་བཏབ་སྟེ་བྲི་བ། ལྷ་དགོད་པ། མཆོད་པའི་རྫས་དགོད་པ། ཞུགས་ཏེ་སྒྲུབ་པའོ། །དང་པོ་ནི། རིག་པའི་གནས་ལྔ་མཁྱེན་པའི་པཎྜི་ཏའི་གཙུག་ལག་ཁང་དང་། རྒྱལ་པོའི་སྐྱེ་ཤིང་གི་རྭ་བ་སྐྱེད་མོས་ཚལ་དང་། ཕྱི་བྱང་ཆུབ་ཆེན་པོའི་མཆོད་རྟེན་དང་། ནང་གསུང་རབ་བཞུགས་པའི་ལྷ་ཁང་དང་། དགེ་འདུན་མང་པོ་འདུ་བའི་ཀུན་དགའ་རྭ་བ་དང་། སོགས་ཀྱི་སྒྲས་བསྡུས་པ་གྲོང་དང་གྲོང་ཁྱེར་ལ་སོགས་པའོ། །གཉིས་པ་ནི། ས་ཆོག་བྱ་དགོས་པ་རྣམས་ཀྱི་ཕྱོགས་སུ་རྒྱས་པར་བྱེད་ན། རྡོ་རྗེ་རྩེ་མོའམ། གསང་བ་སྤྱི་རྒྱུད་དམ། དེ་དག་གི་དོན་བསྡུས་པ་ཀུན་དགའ་སྙིང་པོས་མཛད་པར་གྲགས་པའི་དཀྱིལ་འཁོར་གྱི་ཆོ་ག་རྣམས་ནས་གསུངས་པའི་ཇི་བཞིན་པ་ཡི་ཆོ་ག་ཡིས་གནས་ནི་བྱིན་གྱིས་བརླབས་པའི་ཆོ་ག་ཙམ་མོ། །དེ་ཙམ་བྱ་བ་མ་གྲུབ་ན་ས་ཕྱོགས་དེར་གཏོར་མ་རྒྱས་པར་བཏང་ལ། ས་ཕྱོགས་དེ་ན་གནས་པའི་མི་མ་ཡིན་པ་ལ་ཞི་བས་བསླང་། ཁྲོ་བོའི་སྔགས་ཟློས་ཤིང་། གུ་གུལ་གྱི་དུད་པ་དང་། ཡུངས་ཀར་གྱིས་བྲབ་ཅིང་དྲག་པོས་བླང་ངོ་། །ལག་པས་མནན་ལ། ས་གཞི་ནམ་མཁར་བསྒོམས་ནས་ཨོཾ་བྷཱུ་ཁཾ་ཞེས་པ་དང་། ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ། ཞེས་མང་དུ་བཟླས་ཏེ། དཀྱིལ་འཁོར་ཅི་ཙམ་བྱེད་པའི་ས་གཞི་མཛེས་པར་ག་དར་ལེགས་པར་བྱའོ། །ས་ཆོག་བསྡུས་པ་འདི་ནི་བླ་མའི་གསུང་ངོ་། །གསུམ་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ནི། སྤྱི་ཆིངས་ལས། སྤྱིར་དཀྱིལ་འཁོར་ཆེན་པོ་ཐམས་ཅད་ལ་ཆ་ཆེན་བཅུ་དྲུག་བཏབ་ལ། དེ་ནས་རྩིག་པ་དང་། འདོད་ཡོན་དང་། ཕ་གུ་དང་། དྲྭ་ཕྱེད་དང་། མདའ་ཡབ་དང་། དེའི་ཤུགས་ལ་འབྱུང་བ་སྒོ་འགྲམ་དང་། ཡ་ཕུབས་དང་། སྒོ་ཁྱུད་དང་། སྒོ་ལོགས་དང་། ཀ་བ་དང་། རྟ་བབ་སྒོའི་སུམ་འགྱུར་རམ། བཞི་འགྱུར་གང་མཛེས་དང་། རྟ་བབ་ནི་གླང་པོ་ཆེའི་རྒྱབ་བམ། མཆོད་རྟེན་གྱི་དབྱིབས་གང་མཛེས་དང་། འཁོར་ལོ་དང་། རི་དྭགས་དང་བཅས་པ་རྣམས་ལ་སྒོ་ནི་ཆ་ཆེན་གྱི་ཚད་ཡིན་ལ། འདོད་ཡོན་དང་། དྲྭ་ཕྱེད་དང་། འཁོར་ལོ་རྣམས་ནི་ཆ་ཆུང་གི་ཚད་ཡིན་ཞིང་། གཞན་རྣམས་ནི་ཆ་ཕྲན་གྱི་ཚད་ཡིན་པར་ཤེས་པར་བྱ་བ་ནི་ཐམས་ཅད་ཀྱི་ཕྱིའི་དཀྱིལ་འཁོར་གྱི་རྣམ་པར་བཞག་པ་ཡིན་ནོ། །ནང་གི་དཀྱིལ་འཁོར་ནི་ལྷ་སྣམ་ཡོད་པའམ། མེད་པར་ཤེས་པར་བྱས་ལ། དེའི་ནང་དུ་འཁོར་ལོའི་རྩིབས་ལྟེ་བ་མུ་ཁྱུད་དང་བཅས་པར་ཤེས་པར་བྱའོ། །ཀུན་རིག་ལ། ཁྱད་པར་དུ་སྒོ་རྐྱང་དང་སྒོ་སྦྲག་གཉིས་ཀྱི་དབྱེ་བ་ཤེས་པར་བྱ་སྟེ། དེའང་སྒོ་རྐྱང་ལ་སྦྱར་ན། སྲད་བུ་བརྒྱད་དང་ལྡན་པ་དང་། །ཞེས་བྱ་བ་ལ་སོགས་པ་ལ། སྲད་བུ་བརྒྱད་ནི་ཚངས་ཐིག་གི་ངོས་རེ་རེ་ནས་ཆ་ཆེན་བརྒྱད་བརྒྱད་དོ། །དེ་བས་ན་ཆ་བཅུ་དྲུག་ཏུ་འགྱུར་ཏེ། འདི་ནི་སྒོ་རྐྱང་སྒོ་སྦྲགས་གཉིས་ཀའི་ཐུན་མོང་ངོ་། །ཕྱི་ཡི་སྒོ་ཁྱུད་རྣམས་ཀྱིས་བརྒྱན། །ཞེས་བྱ་བ་ནི། སྒོ་ཁྱུད་དང་རྟ་བབས་ལ་སོགས་པ་རྒྱན་རྣམས་བྱའོ། །ཞེས་བྱ་བ་ལ་སོགས་པའི་དོན་ཏོ། །དགུ་ཡི་ཆར་ནི་བགོས་པ་ལས། །ཞེས་པ་ནི། འཁོར་ལོའི་ལྟེ་བ་ལ་ཐིག་གཉིས་བཏབ་པ་ལས་ལེ་ཚེ་དགུར་བྱས་པ་ཡིན་ནོ། །སྒོ་དང་སྒོ་ཁྱུད་སུམ་ཆར་བྱ། །ཞེས་བྱ་བ་ནི་དགུ་ཆའི་ཕྱོགས་གཅིག་ན་འཕར་མ་ལེ་ཚེ་གསུམ་ཡོད་ལ། དེའི་སུམ་ཆ་གཙོ་བོའི་གནས་ལྟ་བུ་གཅིག་དང་། སྒོ་དང་སྒོ་ཁྱུད་མཉམ་པ་ཡིན་ནོ། །དེའང་ཇི་ལྟར་གདབ་ཞེ་ན་སྒོ་རྐྱང་གི་པཎ་རེག་གི་རྩིག་པ་ཕན་ཚུན་ཐད་ཀར་གདུང་གི་ཚུལ་དུ་བཏབ་ལ། དེ་ནས་ལྷ་སྣམ་ཆ་ཆེན་གཅིག་བོར་ལ་ཟླུམ་པོར་བསྐོར། དེ་ནས་པཎ་རེག་གི་ཚད་གཅིག་མུ་ཁྱུད་དུ་བསྐོར། དེ་ནས་ཆ་ཕྲན་སུམ་ཆ་བོར་ལ་ཆ་ཆེན་གཉིས་པའི་ཐིག་ལྔ་བསྐོར་ཏེ་ལྟེ་བ་བྱ། ཆ་ཕྲན་གསུམ་བོར་བ་དེ་ལ་འཁོར་ལོ་རྩིབས་བཅུ་དྲུག་ཕྱོགས་རེ་རེར་བཞི་བཞི་བྱ། དེ་ནས་ནང་གི་ཆ་ཕྲན་གཅིག་ལྟེ་བའི་མུ་ཁྱུད་ལ་བསྐོར་བར་བྱའོ། །ཡང་ལྟེ་བ་ནི་དེ་ཉིད་ཡིན་ལ་འཁོར་ལོ་དང་འཁོར་ལོའི་མུ་ཁྱུད་ལ་ཆ་ཆེན་གཉིས་བཏང་ལ། ལྷ་སྣམ་གྱི་ལྷ་ཚོགས་རྟ་བབས་ཀྱི་གཡས་གཡོན་དུ་འགོད་པ་ཡིན་ཏེ། དེ་ལྟར་ན་འོག་ནས་འབྱུང་བའི་རིམ་པ་གསུམ་དང་ལྡན་པའི་རྩིབས་ནི་ཉིས་འགྱུར་ཉིད་དུ་བྱ། ཞེས་བྱ་བའི་གཞུང་ཡང་གཙོ་བོ་དང་སྦྱོང་བའི་རྒྱལ་པོ་དང་། འཁོར་ལོའི་རྩིབས་ཏེ་རིམ་པ་གསུམ་ཡིན་ལ་ནང་གི་ལྷའི་ས་གཉིས་ལ་ཆ་ཆེན་གཉིས་འཁོར་ལོའི་རྩིབས་ལ་ཆ་ཆེན་གཉིས་ཡིན་པས་ན་རྩིབས་ནི་ཉིས་འགྱུར་ཞེས་བྱའོ། །སྒོ་སྦྲག་གི་དབང་དུ་བྱས་ནས། ཕྱི་ཡི་སྒོ་ཁྱུད་རྣམས་ཀྱི་རྒྱན། །ཞེས་འབྱུང་བས་ན་གོང་དུ་བསྟན་པ་རྣམས་ནང་ནི་དཀྱིལ་འཁོར་ཡིན་པར་མངོན་ནོ། །དེ་ལྟར་ཕྱིའི་ཆ་ཆུང་ནི་ནང་གི་ཆ་ཆེན་དུ་བྱ། ཕྱིའི་ཆ་ཕྲན་ནི་ནང་གི་ཆ་ཆུང་དུ་བྱའོ། །ཕྱིའི་ཆ་ཕྲན་ཕྱེད་ནི་ནང་གི་ཆ་ཕྲན་དུ་བྱས་ལ། ནང་ན་ཆ་ཆེན་བརྒྱད་ཡོད་པ་དེ་ཕྱེད་ཕྱེད་དུ་བགོས་ཏེ་ཆ་ཆེན་བཅུ་དྲུག་དུ་བཏང་ལ། རྟ་བབས་དང་བཅས་པ་ཡོངས་སུ་རྫོགས་པ་ཕྱིའི་དཀྱིལ་འཁོར་བཞིན་བཏབ་ལ། ནང་གི་སྒོ་རྐྱང་གི་ཐིག་པཎ་རེག་གི་ཐིག་རྒྱ་གྲམ་དུ་བཏབ་པས་ལེ་ཚེ་དགུའི་གདུང་གི་ཐིག་བྱས་ལ། ཕྱིའི་དཀྱིལ་འཁོར་བཞིན་ལྷ་སྣམ་ཁོང་རང་གི་ཆ་ཆེན་གཅིག་བོར་བའམ་མ་བོར་ཀྱང་རུང་སྟེ། སྔ་མ་བཞིན་ལྟེ་བ་འཁོར་ལོའི་ཐིག་བསྐོར་བར་བྱའོ། །རྩིབས་ནི་ཉིས་འགྱུར་ཉིད་དུ་བྱ། །ཞེས་བྱ་བ་ནི་ཕྱི་རོལ་ཏུ་ལྷ་སྣམ་བོར་ན་འཁོར་ལོའི་རྩིབས་ཉིས་འགྱུར་གྱིས་ཆུང་བ་ཡིན་ལ། མ་བོར་ན་ཉིས་འགྱུར་གྱིས་ཆེ་བ་ཡིན་ནོ། །གཞུང་ལྷག་མ་ཐམས་ཅད་ནི་སྒོ་རྐྱང་སྦྲག་ཐམས་ཅད་འདྲ་བ་ཉིད་ཡིན་ནོ་ཞེས་གསུངས་སོ། །གཉིས་པ་གཞུང་དོན་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། བྱིན་གྱིས་བརླབ་པ་སྟེ། ས་ཆོག་བྱས་པའི་གནས་དེར་ནི་ཕྱིའི་དཀྱིལ་འཁོར་བྲི་བར་བྱའོ། །འདི་ལ་དགོངས་ནས་གཉལ་པ་སྟ་གོན་མེད་པར་མཛད་པ་ཡང་འགལ་བ་མེད་དེ་ས་ཆོག་བྱས་མ་ཐག་ཏུ་བྲི་བར་བཤད་པའི་ཕྱིར། ཁའུ་པ་གཞུང་ན་མེད་ཀྱང་ཤུགས་འབྱུང་མཛད་པ་ལྟར་ནའང་འགལ་བ་མེད་དེ། སློབ་མ་ལ་ཆོས་ཟབ་མོ་བཤད་པ་དང་། སྡོམ་པ་འབོགས་པར་བཤད་པའི་སྐབས་དེ་བཀའ་དང་བསྟན་བཅོས་ཕལ་ཆེར་ནས་སྟ་གོན་དུ་བཤད་པའི་ཕྱིར་རོ། །དེ་ལ་བྱེད་པར་འདོད་ན། དཀྱིལ་འཁོར་གྱི་ས་བྱི་དོར་ལེགས་པར་བྱས་པའི་སྟེང་དུ་ལྷའི་གནས་ངོ་ཤེས་པར་བྱ་བའི་ཕྱིར། ཅི་འགྲུབ་པའི་ཐིག་བཏབ་ལ། ལྷའི་གནས་རྣམས་སུ་དྲིའི་ཐིག་ལེ་དང་། མེ་ཏོག་ཚོམ་བུ་བྱས་ལ་མཆོད་གཏོར་རྒྱས་པར་བཤམས་ཏེ། བདག་གི་རྣལ་འབྱོར་རྫོགས་ནས་མདུན་དུ་འོག་ནས་འབྱུང་བ་བཞིན་ལྷ་བསྒྲུབ་ལ། ཇི་ལྟར་འབྱོར་པས་མཆོད་ཅིང་གཏོར་མ་བཏང་ནས་འཆད་པར་འགྱུར་བའི་སློབ་མ་འཇུག་པ་ཡན་ཆད་བྱས་ནས་ཅི་བདེར་གནས་ཏེ། ནངས་པར་སྤྱན་དྲངས་པའི་དཀྱིལ་འཁོར་གཤེགས་སུ་གསོལ་ནས་དཀྱིལ་འཁོར་བྲི་བ་ལ་འཇུག་པར་བྱའོ། །གཉིས་པ་ནི། ཚད་མེད་པ་བཞི་དག་པས་གྲུ་བཞི་པ་ལ་རྣམ་ཐར་བཞི་དག་པས་སྒོ་བཞི་པ། བསམ་གཏན་བཞི་དག་པས་རྟ་བབས་བཞི་དང་ལྡན་པ་དང་། སྒོ་ཁང་བཞི་ལ་ཐེམ་སྐས་བཞི་ཡི་ཕྲེང་བ་དང་། རྟ་བབས་ཀྱི་ཀ་བ་ལ་སེང་གེ་དང་། ཕན་གླང་ཆེན་པོ་རྣམས་ཀྱིས་བརྒྱན་པ་དང་། ཁོར་ཡུག་ཏུ་དར་སྣ་ལྔའི་ལྡ་ལྡི་དང་། དོ་ཤལ་དང་། དོ་ཤལ་ཕྱེད་པའི་ཕྲེང་བ་དང་། དྲིལ་བུ་དང་ནི་རྔ་མས་བརྒྱན་ནོ། །སྒོའི་སྟེང་གི་པདྨ་ལ་ཤར་དུ་རྡོ་རྗེ། ལྷོར་རིན་ཆེན། ནུབ་ཏུ་པདྨ་དང་། བྱང་དུ་རྒྱ་གྲམ་པ་ཡི་ཕྱག་རྒྱས་བརྒྱན་ནོ། །སྲད་བུ་བརྒྱད་དང་ལྡན་པ་ནི། རྗེ་བཙུན་གྱིས་ཚངས་ཐིག་གི་གཡས་གཡོན་དུ་ཆ་ཆེན་བརྒྱད་བརྒྱད་ཡོད་པ་ལ་གསུངས་ཤིང་། རྩ་སྐྱ་པས་རེ་མིག་དབུས་མ་ཁྱབ་བྱེད་དུ་བཏང་བའི་རེ་མིག་བརྒྱད་ལ་འཆད། གཉན་སྟོན་གྱིས་ཐིག་ཆེན་བརྒྱད་ལ་འཆད་དོ། །ཕྱིའི་སྒོ་ཁྱུད་རྣམས་ཀྱིས་བརྒྱན་པ་ནི་སྒོ་ཁྱུད་དང་རྟ་བབས་ལ་སོགས་པའི་རྒྱན་རྣམས་རྫོགས་པར་བྱ་བའོ། །དགུའི་ཆར་ནི་བགོས་པ་ནི། ཁའུ་པ་སྤྱིར་འཁོར་ལོའི་ལྟེ་བ་ལ་ལེ་ཚེ་དགུར་བསྒོས་ནས་ཕྱོགས་རེ་ལ་གསུམ་གསུམ་ཡོད་པའི་སུམ་ཆ་གཙོ་བོའི་གནས་ལྟ་བུ་དང་། སྒོ་དང་སྒོ་ཁྱུད་མཉམ་པ་ལ་འཆད་ཅིང་། རྗེ་བཙུན་ཡང་འདི་ཉིད་འཆད་དོ། །གཉལ་པ་ཕྱི་རོལ་གྱི་ཁོར་ཡུག་ལ་ཆ་ཆེན་གཅིག་དང་། ཆ་བཅོ་བརྒྱད་དུ་བྱས་པ་ལ་ཟེར་ལ་སྒོ་དང་སྒོ་ཁྱུད་སུམ་ཆ་ཞེས་བྱ་བ་ནི་དགུ་ཆར་བསྒྱུར་ལ་ཆ་ཆེན་གཅིག་ཡིན་ནོ་ཞེས་ཟེར་བ་འདི་ནི་ནོར་ཏེ། ཁོར་ཡུག་ནི་ཐམས་ཅད་ལ་དགོས་ཀྱང་ཐིག་གི་ཁོངས་སུ་གཏོགས་པ་མ་ཡིན་པས་ཆ་དགུ་པ་ཡང་མ་ཡིན་ལ། སུམ་ཆ་དགུ་ཆར་བསྒྱུར་བ་འདི་བདེ་བར་གཤེགས་པའི་བཀའ་འགོམས་པར་མི་རིགས་སོ། །རྡོ་རྗེའི་སྲད་བུ་ནི་སྲད་བུ་ལ་ཡེ་ཤེས་ལྔའི་ཁམས་ཐིམ་པ་ཡིན་ལ་དེ་ཐིག་གདབ་བོ། །གྲུ་བཞི་པ་དེའི་ནང་དུ་དབུས་ཀྱི་དཀྱིལ་འཁོར་ཟླུམ་པོའི་ཐིག་གདབ་པ་ནི་ཆོས་ཀྱི་འཁོར་ལོ་དང་འདྲ་བར་རྩིབས་རྣམས་ཟླུམ་པོར་བྱས་པ་ལ་ལྟེ་བར་བཅས་ཤིང་རྩིབས་ཀྱི་གྲངས་བཅུ་དྲུག་ལ་མུ་ཁྱུད་ཀྱིས་བསྐོར་བའོ། །རྩིབས་ཀྱི་ཁ་དོག་འདིར་དངོས་སུ་མ་གསུངས་ཀྱང་དམ་པ་གོང་མ་རྣམས་སྔོན་པོར་བཞེད་ལ། རྩ་སྐྱ་པས་ཤེས་རབ་ཀྱི་བསླབ་པ་མཚོན་པས་སྔོན་པོ་ཡིན་ཞེས་གསུངས་ཀྱང་སེམས་དཔའ་བཅུ་དྲུག་པོ་ཐམས་ཅད་རྡོ་རྗེ་སེམས་དཔའ་ཐུགས་ཀྱི་རིགས་ཡིན་པ་ཀུན་དགའ་སྙིང་པོས་བཤད་པས་དེ་མཚོན་བྱེད་དུ་སྔོན་པོ་མཛད་པར་མངོན་ཏེ། བདེ་མཆོག་གི་སྐབས་སུ་ཐུགས་ཀྱི་འཁོར་ལོ་སྔོན་པོར་མཛད་པ་དང་དོན་གཅིག་གོ་སྙམ་དུ་སེམས་སོ། །རང་བཟོ་མཁན་དག་ཞི་བའི་ལས་བསྒྲུབ་པའི་སྐབས་ཡིན་པས་དཀར་པོ་ཡིན་ནོ་ཞེས་ཟེར་བ་ནི་གཞན་ཕན་གནོད་འཇོམས་སུ་བཀག་ཟིན་ཏོ། །དེ་ལྟར་ན་གཙོ་བོ་དང་། སྦྱོང་རྒྱལ་དང་། སེམས་དཔའ་བཅུ་དྲུག་གི་གནས་ཏེ། རིམ་པ་གསུམ་དུ་ལྡན་པ་ལ། རྩིབས་ནི་ཉིས་འགྱུར་ཉིད་དུ་བྱ་སྟེ་ལྷ་སྣམ་ཆ་ཆེན་གཅིག་བཞག་ན་ཉིས་འགྱུར་གྱིས་ཆུང་བ་དང་། མ་བཞག་ན་ཉིས་འགྱུར་གྱིས་ཆེ་བའི་དོན་དུ་རྗེ་བཙུན་གྱིས་བཞེད་དོ། །བཞི་པ་ལྷ་དགོད་པ་ནི། ལེའུ་དགུའི་དབུས་ཀྱི་ཕྱོགས་སུ་ཀུན་རིག་ནི་ཁ་དོག་དུང་དང་། ཀུནྡ་དང་ཟླ་བ་དང་འདྲ་བར་དཀར་ལ། རྒྱུའི་དུས་སུ་བྱང་ཆུབ་ཀྱི་སེམས། སྦྱིན་པ། ཤེས་རབ། བརྩོན་འགྲུས་བཞི་སྤྱོད་ཅིང་རྫོགས་པས་ཞལ་བཞི་པ་ལ་འབྲུ་འགྲེལ་ལྟར་ན། ཕྱག་མཚན་རྡོ་རྗེ་འཛིན་པ་དང་། རྩ་སྐྱ་པས་རྡོ་རྗེ་སྐྱིལ་ཀྲུང་གིས་སེང་གེའི་གདན་ལ་བཞུགས་པ་ཞེས་འཆད་ཀྱང་འདིར་བྱེད་ཚིག་མེད་པས་རྡོ་རྗེས་མཚན་པའི་སེང་གེའི་གདན་ལ་བཞུགས་པའི་དོན་དུ་མངོན་ནོ། །ཕྱག་གཉིས་ཏིང་ངེ་འཛིན་གྱི་ཕྱག་རྒྱར་ལྡན་པ། དང་ནི་སྡུད་པའི་ཚིག་ཡིན་པས་མགྲིན་པ་བག་ཙམ་དགུག མིག་སྣ་རྩེར་ཕབ། ལྕེ་རྐན་ལ་སྦྱར་བའོ་ཞེས་རྩ་སྐྱ་པ་བཞེད་དེ། དབུ་རྒྱན་ལ་སོགས་པ་རྒྱན་རྣམས་ཀུན་གྱིས་བརྒྱན་པར་བྲིའོ། །དེའི་སྤྱན་སྔ་སྟེ་ཤར་ཕྱོགས་སུ་ངན་སོང་ཀུན་སྦྱོང་བའི་རྒྱལ་པོ་བྲི་བར་བྱ་སྟེ། གདན་དང་ཞལ་མ་གཏོགས་ཀུན་རིག་དང་འདྲ་ཞིང་། རྒྱལ་མཆོག་སྐྱེས་བུ་ནི་སྦྱོང་རྒྱལ་གྱི་མིང་གཉིས་པ་ཡིན་པར་རྗེ་བཙུན་བཞེད་ཅིང་། གང་བ་ནི་མཚན་དཔེས་སྤྲས་པར་རྩ་སྐྱ་པ་བཞེད་དོ། །ཀུན་རིག་གི་རྒྱབ་ཏུ་སྟེ་ནུབ་ཏུ་ཤཱཀྱའི་རིགས་ཀྱི་དབང་པོ་གཙོ་བོ་འཁོར་ལོས་སྒྱུར་བའི་ཆ་བྱད་ཅན་གྱི་ཐུབ་པ་སེར་པོ་ཆོས་འཆད་ཀྱི་ཕྱག་རྒྱ་ཅན་བྲི་བར་བྱའོ། །ཀུན་རིག་གི་གཡས་ཀྱི་ཕྱོགས་ལྷོའི་ཆར་ནི་རྒྱལ་མཆོག་རིན་ཆེན་སྔོན་པོ་མཆོག་སྦྱིན་དང་ཏིང་ངེ་འཛིན་གྱི་ཕྱག་རྒྱ་ཅན་དང་། གཡོན་གྱི་ཕྱོགས་བྱང་གི་ཆར་ནི་མེ་ཏོག་ཆེར་རྒྱས་ལྗང་གུ་སྐྱབས་སྦྱིན་དང་ཏིང་ངེ་འཛིན་གྱི་ཕྱག་རྒྱ་ཅན་གཉིས་བྲི་བར་བྱའོ། །འདིར་ཇོ་བོ་རྗེའི་གསུང་གིས་སྐུ་མདོག་དམིགས་བསལ་མེད་པ་རྣམས་དཀར་པོ་ཡིན་ནོ་ཞེས་གསུང་ཞིང་། རྗེ་བཙུན་གྱིས་ཀྱང་ཀུན་རིག་དང་སྦྱོང་རྒྱལ་གཉིས་དཀར་པོ་ཏིང་ངེ་འཛིན་གྱི་ཕྱག་རྒྱ་ཅན་དུ་དངོས་སུ་གསུངས་པའི་ཤུགས་ཀྱིས་རིགས་གཞན་གསུམ་པོ་ཡང་དེ་ལྟར་དུ་གྲུབ་པ་རྒྱུད་ཀྱི་དགོངས་པར་བཞེད་དོ། །ལོ་ཙ་ན་དང་། མཱ་མ་ཀཱི་དང་། དེ་བཞིན་དུ་གོས་དཀར་མོ་དང་། སྒྲོལ་མ་རྣམས་ནི་རང་གི་རིགས་ཀྱི་མཚན་མ་སྤྱན། རྡོ་རྗེ། པདྨ། ཨུཏྤལ་བཞི་སྟེ། དེའི་རྣམ་པར་ཤར་ལྷོ་ལ་སོགས་པའི་གྲྭ་ཡི་ཕྱོགས་སུ་ནི་ཀུན་ཏུ་བྲིའོ། །འདི་ནི་ཡུམ་བཞི་པོ་མཚན་མའི་གཟུགས་སུ་སྦས་པར་དེ་ཉིད་འདུས་པའི་རྒྱུད་ལས་གསུངས་ཤིང་། ལོ་ཆེན་དང་། སྨྲྀ་ཏིས་བཞེངས་པའི་གཙུག་ལག་ཁང་རྣམས་ན་ཡང་དེ་ལྟར་དུ་ཡོད་པ་དང་དོན་གཅིག་པར་མངོན་ནོ། །འཁོར་ལོའི་རྩིབས་ཀྱི་ནང་ནི་ཐམས་ཅད་དུ་རྡོ་རྗེ་སེམས་དཔའ་ལ་སོགས་པའི་སེམས་དཔའ་ཐུགས་ཀྱི་རིགས་ཡིན་པས་ན་མཆོག སྐུ་མདོག་དང་ཕྱག་མཚན་སྣ་ཚོགས་སུ་སྤྲུལ་པས་ན་རྫུ་འཕྲུལ་ཆེ་བའི་སེམས་དཔའ་རྣམས་བྱང་ཤར་གྱི་ཕྱོགས་ནས་བརྩམས་སྟེ་གཡས་སྐོར་དུ་གོ་རིམ་བཞིན་དུ་བྲི་བར་བྱའོ། །བྲི་བ་ལ་མཁས་པས་ལཱ་སྱེ་ལ་སོགས་པའི་མཆོད་པའི་ལྷ་མོ་བརྒྱད་རྩིབས་ཀྱི་ཕྱི་རོལ་གྱི་གྲྭའི་ཕྱོགས་སུ་བྲིའོ། །ནང་གི་སྒོ་ཡི་ཕྱོགས་ནི་བཞི་པོ་ཐམས་ཅད་དུ་རྡོ་རྗེ་ལྕགས་ཀྱུ་ལ་སོགས་པའི་སྒོ་བ་བཞི་པོ་བྲི་བར་བྱའོ། །རྟ་བབས་ཀྱི་ཁྱམས་ཏེ་སྒོ་ཉིས་སྦྲག་ཏུ་བྱེད་ན་དཀྱིལ་འཁོར་ནང་མའི་རྟ་བབས་ཀྱི་ཁྱམས་དང་། གཅིག་རྐྱང་དུ་བྱེད་ན། དཀྱིལ་འཁོར་གྱི་རྟ་བབས་ཀྱི་གཡས་གཡོན་ཐམས་ཅད་དུ་བྱམས་པ་ལ་སོགས་པའི་བྱང་སེམས་བཅུ་དྲུག་བྲི་བར་བྱ་ཞིང་། དེ་བཞིན་དུ་ཉན་ཐོས་རྒྱལ་བ་བཅུ་དྲུག་པོ་ཐམས་ཅད་དང་། རང་རྒྱལ་གཙོ་བོ་བཅུ་གཉིས་པོ་རྣམས་དང་། ཁྲོ་བོ་མངགས་པ་ཕོ་ཉ་ལ་སོགས་པ་བཅུ་དྲུག་པོ་རྣམས་སྐུ་ཡོངས་སུ་རྫོགས་པ་བྲི་བར་བྱ་བའམ་ཡང་ན་མིང་ཙམ་ཡང་རུང་ངོ་། །གཞན་ཕན་ཉེར་མཁོ་ལས་བྱང་སེམས་བཅུ་དྲུག་སོགས་སྒོ་ཉིས་བརྩེགས་སུ་བྱེད་ན་ནང་མའི་ཁྱམས་སུ་དགོད་ལ། སྒོ་རྐྱང་དུ་བྱེད་ན་ཡང་ལྷ་སྣམ་ཆེ་བར་བྱེད་ལ་རིམ་པ་གཉིས་སུ་བྱ། ནང་མ་ལ་རྩ་བའི་ལྷ་སོ་བདུན། ཕྱི་མ་ལ་མགྲོན་ཐབས་ཀྱི་ལྷ་དྲུག་ཅུ་དགོད་ཅེས་གསུང་ངོ་། །ཡང་ཅེས་པའི་སྒྲས་ནི། སྤྱི་ཆིངས་ལས་ཡང་ལྟེ་བ་ནི་དེ་ཉིད་ཡིན་ལ། འཁོར་ལོ་དང་འཁོར་ལོའི་མུ་ཁྱུད་ལ་ཆ་ཆེན་གཉིས་བཏང་ལ། ལྷ་སྣམ་གྱི་ལྷ་ཚོགས་རྟ་བབས་ཀྱི་གཡས་གཡོན་དུ་དགོད་པ་ཡིན་ཏེ་ཞེས་གསུངས་པ་སྡུད་དེ། ལུགས་གཉིས་འདམ་ཁ་ཅན་དུ་བཞེད་པར་མངོན་ནོ། །ཕྱིའི་དཀྱིལ་འཁོར་གྱི་ཕྱི་རོལ་ཁོར་ཡུག་ཏུ་གླིང་བཞི་པོ་ནི་བྲི་བར་བྱའོ། །ལྷོར་འཛམ་བུ་གླིང་དུ་ཚངས་པ་སེར་པོ་པདྨ་ཐོགས་པ། ཆུང་མ་ཚངས་མ་དབྱངས་ཅན་གཉིས་འཁོར་ཚངས་པ་བརྒྱད་དང་བཅས་པ་བྲིའོ། །བྱང་སྒྲ་མི་སྙན་དུ་ནི་དབང་ཕྱུག་ཆེན་པོ་མདུང་རྩེ་གསུམ་ཐོགས་པ། འཁོར་ཆུང་མ་བརྒྱད་དེ་ཨུ་མ་སྔོ། གྷ་གྷ་དཀར། ཡ་མ་ན་ལྗང་། དམར་མོ་སེར། འཇིགས་བྱེད་མ་དཀར། ལྗང་གི་ལྷ་མོ་དམར། སྟོབས་བཟང་མ་དཀར། ཀུ་མཱ་རི་དམར་སྐྱ་བདེ་བའི་ལག་ཆ་འཛིན་པ་བྲིའོ། །ཤར་གྱི་ལུས་འཕགས་གླིང་དུ་ནི། བརྒྱ་བྱིན་སེར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ། ཐིག་ལེ་འཛིན་ཤ་རྩི་དང་། ཐིག་ལེ་མཆོག་གཉིས་དཀར་མོའོ། །ནུབ་བ་གླང་སྤྱོད་དུ་ནི། གཏོགས་འདོད་སྟེ་ཁྱབ་འཇུག་སྔོན་པོ་བཙུན་མོ་ནོར་རྒྱུན་མ་དང་། དབྱངས་ཅན་གཉིས་དཀར་སེར་ཏེ་ཐམས་ཅད་ཀྱང་འཁོར་དང་བཅས་ཏེ་བྲི་བར་བྱ་བའི་དོན་ནི་བཤད་ཟིན་ཏོ། །བཞི་པོ་ལས་གཞན་དག་ཀྱང་ནི་དེ་བཞིན་དུ་ཁོར་ཡུག་ཏུ་བྲི་བར་བྱ་སྟེ། ནུབ་ཕྱོགས་སུ་ལྷ་མ་ཡིན་གྱི་དབང་པོ་ཐགས་བཟངས་རིས་སྔོན་པོ་འཁོར་དང་བཅས་པ། ཤར་ཕྱོགས་སུ་དྲི་ཟའི་རྒྱལ་པོ་ཟུར་ཕུད་ལྔ་པ་ཆུང་མ་གཉིས། ཕོ་ཉ་གཉིས་ཏེ་བཞི། བྱང་སྟོད་དུ་ནམ་མཁའ་ལྡིང་གི་རྒྱལ་པོ་གསེར་མིག་ཅན་ཆུང་མ་དང་བཅས་པ་ཕྱག་བཞི་གཡས་གཉིས་ན་གནྡྷེ་དང་བགྲང་ཕྲེང་། གཡོན་གཉིས་པདྨ་དང་མཆོག་སྦྱིན། བྱང་ཕྱོགས་སུ་གནོད་སྦྱིན་ནོར་བུ་བཟང་པོ་ལ་རྒྱལ་བ་ཁྱུ་མཆོག་དང་། ཡང་དག་ཤེས་དང་། ལྔས་རྩེན་གྱིས་བསྐོར་བ་ནེའུ་ལེ་དང་བི་ཛ་པུ་ར་འཛིན་པ་སེར་པོའོ། །ལྟོ་འཕྱེ་ནི་ནུབ་ཏུ་ཀླུའི་རྒྱལ་པོ་སྦྲུལ་མགོ་བདུན་པ་དང་། མིའམ་ཅིའི་རྒྱལ་པོ་ལྗོན་པ་རྟ་མགོ་ཅན་ནོ། །སྲིན་པོ་ཆེ་ནི་ལྷོ་ནུབ་ཏུ་སྲིན་པོ་ནག་པོ་མི་ལ་ཞོན་པའོ། །འབྱུང་པོ་ནི་བྱང་ཤར་དུ་དབང་ཕྱུག་དཀར་པོ་གླང་ལ་ཞོན་པ་རྩེ་གསུམ་འཛིན་པའོ། །ཡི་དྭགས་ནི་འཆི་བདག་ནག་པོ་སྟེ་མ་ཧེ་ལ་ཞོན་པ་དབྱིག་པ་ཅན་ནོ། །ཀླུ་ནི་ཀླུ་ཆེན་བརྒྱད་དེ་ཁོར་ཡུག་གི་ནུབ་ཕྱོགས་སུ་བྲི་ཞིང་ཁ་དོག་དང་ལག་ཆ་ནི་འོག་འཇིག་རྟེན་པའི་སྐབས་སུ་འབྱུང་ངོ་། །གྲུལ་བུམ་རླིག་པོ་ཆེ་ཕོ་ཉ་མོ་དང་བཅས་པ་ནག་པོ་དང་། རི་རྣམས་དང་ཞེས་པའི་ནི་རི་བརྒྱད་སྟོན་ནོ། །ཕྱོགས་བཞིར་རྒྱལ་པོ་བཞི་བྲི་བར་བྱ་ཞིང་གཟའ་བརྒྱད་དང་སྐར་མ་གཞན་རྣམས་དང་། རྒྱུ་སྐར་ཉེར་བརྒྱད་ཕྱོགས་རེར་བདུན་བདུན་ཏེ་དེ་དག་གི་ཕྱག་མཚན་ཡང་འོག་ཏུ་འབྱུང་ངོ་། །ཁྲོ་བོ་ནི་ཤར་དུ་གདོན་གྱི་བདག་པོ་སྔོ་སྐྱ། མ་རུངས་འཚེ་བ་ནི། ལྷོར་རྡོ་རྗེ་མཆུ་དང་། རྡོ་རྗེ་སྤྲིན་གཉིས་སྨུག་པོ། ནུབ་ཏུ་སྤྲིན་གྱི་སྒྲོལ་མ་དམར་མོ་རྡོ་རྗེ་རྩེ་གསུམ་དང་སྡིགས་མཛུབ་མཛད་པའོ། །བགེགས་ཀྱི་རྒྱལ་པོ་བྱི་ན་ཡ་ག་ནི་གླང་སྣ་དཀར་པོ་གཡས་བགྲང་ཕྲེང་དང་ལ་ཕུག གཡོན་དགྲ་སཏྭ་དང་ལ་དུའི་སྣོད་འཛིན་པའོ། །གོང་དུ་བཤད་པ་དེ་རྣམས་ཀྱང་སངས་རྒྱས་ཀྱི་ཡེ་ཤེས་ཉིད་གདུལ་བྱའི་དོན་དུ་དེ་དང་དེའི་སྐུར་སྟོན་པས་ན་སེམས་ཅན་ཀུན་ལ་ཕན་པར་བྱེད་པ་སྟེ། འདིས་ནི་འཇིག་རྟེན་པ་རང་རྒྱུད་པར་འདོད་པ་བཀག་གོ །དྲང་སྲོང་སྐལ་བ་ཆེན་པོ་རྣམས་ཀྱི་གཟུགས་ནི་ཤར་ལྷོར་རྒྱས་པ་དང་། གར་མཁན་གྱི་བུ་ལ་སོགས་པ་ཅི་རིགས་པར་བྲི་བར་བྱ་སྟེ། སྐུ་མདོག་དང་ལག་ཆ་ལ་ངེས་པ་མེད་དོ། །ཕྲ་མེན་མ་ནི། ལྷོ་ནུབ་ཏུ་གཽ་རཱི་དང་ཙཽ་རཱི་དང་། མ་ཏཾ་ཀི་ལ་སོགས་པ་ཅི་རིགས་པར་བྲིས་ཏེ། ཁ་དོག་དང་ལག་ཆ་ལ་ངེས་པ་མེད་དོ། །བུད་མེད་ནི་ཙ་མུནྟི་དང་། རིའུ་ཏི་མ་ལ་སོགས་པ་གཞུང་གང་ཡང་རུང་བ་ནས་འབྱུང་བ་བཞིན་བྲིའོ། །དེ་བཞིན་དུ་ནུབ་བྱང་དུ་སྲིང་མོ་བཞི་ནི་འདོད་པ་མ་ནག་མོ། ཕག་མོ་དཀར་མོ་རྡོ་རྗེ་ཐོད་པ་འཛིན་པའོ། །ཐོད་པ་མོ་དམར་མོ་ལྕགས་ཀྱུ་འཛིན་པ། གྲུབ་མ་ལྗང་ཁུ་བགྲང་ཕྲེང་འཛིན་པ། དེའི་རྩར་མིང་པོ་གསུམ་རྒྱལ་བར་བྱེད་པ་ལྗང་ཁུ་དྲིལ་བུ་འཛིན་པ། སྦྲང་རྩིར་བྱེད་པ་དཀར་པོ་ལྕགས་ཀྱུ་འཛིན་པ། དོན་ཀུན་གྲུབ་པར་བྱེད་པ་དམར་པོ་ལྕགས་སྒྲོགས་འཛིན་པའོ། །བྱང་ཤར་དུ་རྣལ་འབྱོར་མ་བཞི་ནི་སྲིན་མོ་ནག་མོ་ཐོད་པ་འཛིན་པ། བེ་ཅོན་མ་དཀར་མོ་བེ་ཅོན་འཛིན་པ། མཚན་མོ་ནག་མོ་དགྲ་སཏྭ་འཛིན་པ། གནོད་སྦྱིན་མ་ནག་མོ་མཆེ་བ་འཛིན་པའོ། །འབྱུང་བ་བཞིའི་ལྷ་ཆེན་པོ་ནི། སའི་ལྷ་མོ་སེར་མོ་བུམ་པ་འཛིན་པ། ཆུ་ལྷ་དཀར་པོ་ཞགས་པ་འཛིན་པ། མེ་ལྷ་དམར་པོ་ར་ལ་ཞོན་པ། རླུང་ལྷ་ལྗང་ཁུ་ཤ་བ་ལ་ཞོན་པའོ། །ཁྱིམ་གྱི་ལྷ་ནི། ཕྱུག་ལྷ་གླང་ཞོན་དཀར། ལམ་གྱི་ལྷ་རྟ་ཞོན་ཁྲམ་ཐོགས་སྔོ། ཁྱིམ་ལ་བརྟེན་པ་དམར་སྐྱའོ། །རི་ལ་གནས་པ་ནི་རིའི་ལྷའོ། །ཤིང་ལྷ་ནི་ཤིང་གསེབ་ན་ལྗང་། ཀུན་དགའི་ལྷ་ནི་སྐྱེད་ཤིང་གསེབ་ན་དམར། ལྗོངས་ཀྱི་ལྷ་ནི་ལྗོངས་ཆེན་པོ་ལ་བརྟེན་པ་ནི་སོགས་ཀྱིས་བསྡུས་པའོ། །དུར་ཁྲོད་ན་གནས་པ་ནི་འདྲེ་ནག་པོའོ། །གྲོང་ཁྱེར་ན་གནས་པ་ནི་གྲོང་ན་གནས་པའོ། །དེ་རྣམས་ཀྱི་སྐུ་ཕྱག་རྒྱ་ཆེན་པོའམ། མིང་ངམ། བརྡ་སྟེ་ཚོམ་བུའམ། ཡང་ན་ནི་ཐིག་ལེ་རྣམས་ཀྱང་བྲི་བར་བྱའོ། །ལྔ་པ་མཆོད་པའི་རྫས་དགོད་པ་ནི། དེ་ནས་མཁས་པས་དཀྱིལ་འཁོར་ལ། །ཞེས་སོགས་སོ། །གཞན་རྣམས་ནི་གོ་སླ་ལ། བརྒྱད་དམ་བཅུ་དྲུག་ལྷག་ཀྱང་རུང་། །ཅེས་པས་མཆོད་བུམ་དང་། བུམ་པ་ལྔ་ནི་བཞག་པར་བྱ། །ཞེས་པས་དབང་བུམ་དང་། མར་མེ་གཏོར་མ་བུམ་པ་དང་། །ཞེས་པའི་བུམ་པས་ནི་ཉེ་བར་མཁོ་བའི་བུམ་པ་བསྟན་ནོ། །གནོད་སྦྱིན་སྲིན་པོའི་ཁ་ཟས་སུ། །གཏོར་མ་རྣམ་པ་སྣ་ཚོགས་བཞག །ཅེས་པས་བགེགས་གཏོར་དང་། འབྱུང་པོ་དག་དང་ཞེས་པས་ནི་ཕྱོགས་སྐྱོང་སོགས་སྤྱིར་བསྟན་ལ། ཀླུ་དག་དང་ཞེས་སོགས་ཀྱིས་འབྱུང་པོའི་གཏོར་མ་བསྟན། རྣམ་རྒྱལ་བུམ་པ་ནི་གོ་སླའོ། །དྲུག་པ་ཞུགས་ཏེ་བསྒྲུབ་པ་ལ་བཞི་སྟེ། སློབ་དཔོན་བདག་ཉིད་དཀྱིལ་འཁོར་གྱི་སྒོ་དྲུང་དུ་འདུག་པ། ཡེ་ཤེས་སེམས་དཔའ་སྤྱན་དྲངས་ཏེ་བསྒྲུབ་པ། མཆོད་པ་དང་བསྟོད་པ། གཏོར་མ་གཏོང་བའོ། །དང་པོ་ནི། མཆོད་གཏོར་སོགས་བཤམས་ཟིན་པའི་རྗེས་དེ་ནས། ཁྲུས་དང་ལ་སོགས་པས་ཆས་གོས་ཀྱིས་བརྒྱན་པར་བྱས་ལ་དྲི་ཞིམ་པོས་བྱུགས་པ་དང་། མེ་ཏོག་གི་ཕྲེང་བ་མཆོག་གི་ཕྲེང་བ་ཅན་དུ་བྱས་པ་དང་། དྲི་ཞིམ་པོའི་ཆུས་ཁ་བཀང་སྟེ་མཆོག་ཏུ་མཛེས་པར་བྱས་ནས་རྡོ་རྗེ་འཛིན་མའི་སྔགས་དང་ཕྱག་རྒྱས་དཀྱིལ་འཁོར་གྱི་ཁང་པར་བཞུགས་ནས་ཀྱང་མེ་ཏོག་ཐོགས་ཏེ། དཀྱིལ་འཁོར་གྱི་ཤར་སྒོའི་ཕྱོགས་སུ་འདུག་གོ །འདིར་སྣུར་པ་བྲིས་པའི་རྗེས་དེ་ཉིད་ལ། དཀྱིལ་འཁོར་མ་བསྒྲུབས་པར་འཇུག་པའི་ཆོས་རྣམས་ལེན་ནོ་ཞེས་ཟེར་དེ་ནི་མི་འཐད་དེ། དཀྱིལ་འཁོར་མ་བསྒྲུབ་པར་འཇུག་པ་ལ་དོན་མེད་པའི་ཕྱིར་དང་། འཁོར་ལོས་སྒྱུར་བའི་སྐབས་ནས་ཀྱང་། །དེ་ནས་སྔགས་མཁན་བདག་ཉིད་ཀྱིས། །སྤྱན་དྲངས་བདག་ཉིད་འཇུག་པར་བྱ། །བདག་ཉིད་ལ་ནི་དབང་ཡང་བསྐུར། །ཞེས་འབྱུང་བ་དང་འགལ་བའི་ཕྱིར་རོ། །དེས་ན་ཁའུ་པ། སྒྲུབ་མཆོད་བྱས་ནས་འཇུག་པ་ལེན། །འོ་ན་འདིར་རྡོ་རྗེ་འཛིན་མས་ཞུགས་ཅེས་པ་དང་མི་འགལ་ལམ་ཞེ་ན། དེ་ནི་དཀྱིལ་འཁོར་གྱི་སྒོ་དྲུང་དུ་ཕྱག་རྒྱ་བཅས་ཏེ་འདུག་པ་ཙམ་ལ་དགོངས་ཞེས་གསུངས་པ་འདི་ཉིད་འཐད་པའི་ཕྱོགས་ཡིན་ནོ། །གཉིས་པ་ནི། གཙོ་བོ་རྒྱ་བ་སྲས་ཀྱི་འཁོར། །ཞེས་སོགས་ཏེ། རྒྱུད་འདིར་མདུན་བསྐྱེད་བསྒྲུབ་པའི་གོང་དུ་བདག་བསྐྱེད་དངོས་སུ་མ་གསུངས་ཀྱང་། འོག་རས་བྲིས་ཀྱི་སྐབས་སུ། བདག་གི་དེ་ཉིད་དྲན་བྱེད་ཅིང་། །ཞེས་པས་བདག་བསྐྱེད་ཟིན་ལ། འོག་ནས་སྔགས་མཁན་ཞེས་པས་ཀྱང་བདག་བསྐྱེད་བསྟན་པས་མཆོད་པ་བྱིན་དབབ་སྔོན་དུ་སོང་ནས། བདག་བསྐྱེད་རྒྱས་བསྡུས་གང་རུང་བསྒོམས་ཏེ། སྟ་གོན་མ་བྱས་ན་སྐབས་འདིར་བུམ་པའི་བཟླས་པ་ཡང་བྱས་ལ་མདུན་བསྐྱེད་བསྒྲུབ་པ་ལ་འཇུག་གོ །འདིར་རྒྱས་བསྡུས་གཉིས་ལས། རྒྱས་པར་བྱེད་ན་ཤཱུ་ནྱ་ཏཱའི་སྔགས་ཀྱིས་དཀྱིལ་འཁོར་སྟོང་པར་བསམས། ཨོཾ་བྷ་ཞེས་པས་འབྱུང་བ་རིམ་བརྩེགས་ཀྱི་སྟེང་དུ་གཞལ་ཡས་ཁང་གདན་བཅས་བསྐྱེད་ནས་བརྟེན་པ་ལྷ་རྣམས་སྙིང་པོ་ཚིག་ཙམ་གྱིས་བསྐྱེད་པའམ་སྤྲོ་བསྡུ་ལས་བསྐྱེད་པ་གང་རུང་བྱའོ། །བསྡུས་པ་ནི་བྲིས་པའི་དཀྱིལ་འཁོར་ཉིད་ལ་ཡེ་ཤེས་པ་སྤྱན་འདྲེན་པ་སྟེ་རྒྱུད་ཀྱི་དངོས་བསྟན་ལ་འདི་ཉིད་གསལ་ལོ། །གང་ལྟར་ཡང་འདི་མན་ཆད་འདྲ་བ་ཉིད་ཡིན་པས་སྤྱན་དྲང་ཞེས་པ་བཤད་པའི་གཞིར་བཞག་ནས་གང་ན་གཙོ་བོ་ནི་རྩ་བའི་ལྷ་སོ་བདུན། སྲས་ནི། མགྲོན་ཐབས་ཀྱི་ལྷ། འཁོར་ནི་འཇིག་རྟེན་པའོ། །རྩ་སྐྱ་པས་ནི་གཙོ་བོ་ནི་ཀུན་རིག རྒྱལ་བ་དེ་བཞིན་གཤེགས་པ་བཞི། སྲས་ནི་ཡུམ་བཞི་ནས་སྒོ་བཞིའི་བར། འཁོར་ནི་བསྐལ་བཟང་ཉན་རང་། མང་པོ་རྣམས་ནི་ཁོར་ཡུག་གི་འཇིག་རྟེན་པའི་ལྷ་གྲངས་མང་བའོ་ཞེས་བཤད་དེ་སྤྱན་དྲང་བའོ། །རྣལ་འབྱོར་གང་གིས་ན་རྡོ་རྗེ་བསྡུ་བའི་ཕྱག་རྒྱ་དང་། སྔགས་དང་སྒྲུབ་པ་པོ་འདི་ཉིད་ལྡན་ཞིང་རྡོ་རྗེ་ལྕགས་ཀྱུ་ལ་སོགས་པ་སྤྲོ་བའི་རྣལ་འབྱོར་གྱིས་སོ། །རྡོ་རྗེ་བསྡུ་བའི་སྔགས་ནི། ཛཿཧཱུྃ་བཾ་ཧོཿས་ཐུགས་རྗེའི་བདག །ཚུར་གཤེགས་ཞེས་ནི་བརྗོད་ནས་ཀྱང་། །ཞེས་པ་སྟེ། ཤཱཀ་ཐུབ་ཀྱི་སྐབས་ནས་འབྱུང་བའི་སྔགས་དེ་ཉིད་དོ། །ལྕགས་ཀྱུ་སོགས་ཀྱི་ཕྱག་རྒྱ་གང་ཞེ་ན། གསང་བའི་བཅིང་བ་བཅིངས་ནས་ནི། །ཞེས་སོགས་ཏེ། དགུག གཞུག བཅིང་། དབང་དུ་བྱས་ནས་རིགས་གསུམ་སྤྱིའི་ཕྱག་རྒྱས་བྱིན་གྱིས་བརླབ། ཕྱག་རྒྱ་བཞིས་རྒྱས་གདབ་པ་ནི། དཀྱིལ་འཁོར་བསྒྲུབ་པ་སྟེ། དམ་ཚིག་པ་ལ་ཡེ་ཤེས་པ་འཇུག་པ་དེ་ནས་རས་བྲིས་ཀྱི་སྐབས་ནས་བསྟན་པའི་མཚན་མ་སྐྱེས་ནས་ནི། ཆོས་ཀྱི་དབྱིངས་ཐོག་མར་མཐོང་བ་ནས། ཐ་མ་རྫོགས་ཀྱི་བར་མངོན་སུམ་དུ་མཐོང་བར་འགྱུར་རོ། །གསུམ་པ་ནི། ཨརྒྷཾ་ནི། མཆོད་ཡོན་ཏེ། དེས་མཚོན་པའི་མེ་ཏོག་ལ་སོགས་པ་ལྔ་མི་རྟོག་པས་ཟིན་པས་མཆོག་ཏུ་བརྟགས་པའོ། །གསང་བ་ནི་ལྷ་མོ་བརྒྱད། སོགས་ཀྱི་སྒྲས་བསྡུས་པ་ནི། རྡོ་རྗེ་རྩེ་མོ་བཞིན་ངོ་མཚར་བའི་མཆོད་པ་བཅོ་བརྒྱད་དང་། འདི་ཉིད་ནས་འབྱུང་བའི་མཆོད་པ་ཉི་ཤུ་རྩ་ལྔའོ། །དབྱངས་སྙན་པའི་བསྟོད་པ་ནི་མཚན་བརྒྱ་རྩ་བརྒྱད་པའམ། དཀྱིལ་ཆོག་རྣམས་ནས་འབྱུང་བའི་ལྷ་སོ་སོའི་མཆོད་བསྟོད་ཅི་ནུས་པའོ། །ལྷ་རྫས་མཆོག་གི་དམ་པ་ནི། རིན་ཆེན་སྣ་བདུན་དང་། འདོད་ཡོན་ལྔའོ། །བཞི་པ་ནི། ཕྱོགས་ན་གནས་པ་རྣམས་ལ་རྣམ་པར་བརྟག་ཅེས་པ་ཡར་དྲངས་ཏེ་ཕྱོགས་སྐྱོང་གི་གཏོར་མ་དང་། དེ་ནས་འབྱུང་པོ་ཀུན་གྱི་གཏོར་མ་བྱ། །ཞེས་པས་འབྱུང་པོའི་གཏོར་མ་སྔར་བཤད་པའི་བགེགས་གཏོར་དང་གསུམ་པོ་དེའི་གཏོར་མ་དཔུང་བཟངས་ལ་སོགས་པ་ནས་བཤད་པ་ལྟར་མཐུན་པར་བྱའོ། །སེམས་ཅན་བཀྲེས་ཤིང་སྐོམས་ལ་བཏུང་བ་དང་། །ཞེས་པ་ནི་རིགས་དྲུག་དང་། ཡི་དྭགས་ཀྱི་གཏོར་མའོ། །གཉིས་པ་སློབ་མ་མཇུག་ཅིང་དབང་བསྐུར་བ་ལ་གཉིས་ཏེ། མདོར་བསྟན་པ་དང་རྒྱས་པར་བཤད་པའོ། །དང་པོ་ནི། སྐབས་འདིར་སློབ་དཔོན་བདག་ཉིད་འཇུག་ཅིང་དབང་བླང་བ་མ་གསུངས་ཀྱང་། འོག་ཕྱོགས་སྐྱོང་དང་། ཚེ་དཔག་མེད་དང་། འཁོར་ལོས་སྒྱུར་བའི་སྐབས་ནས་འབྱུང་བ་ལྟར་བདག་ཉིད་འཇུག་ཅིང་དབང་བླང་། མདུན་བསྐྱེད་ལ་དམིགས་པའི་བཟླས་པ་དང་། བདག་མདུན་ཐ་མི་དད་དུ་བསྒྲུབ་པའི་རྗེས་དེ་ནས་སྔགས་པ་རྡོ་རྗེ་སློབ་དཔོན་གྱིས་བླ་ན་མེད་པའི་བྱང་ཆུབ་ཀྱི་སེམས་ས་བཅུ་གཅིག་པ་འབྱུང་བའི་གནས། དཀྱིལ་འཁོར་དུ་སློབ་མ་རྣམས་ཡོངས་སུ་སྨིན་པར་བྱའོ། །གཉིས་པ་ལ་གཉིས་ཏེ། འཇུག་པ་དང་། དབང་ངོ་། །དང་པོ་ལ་སློབ་མ་ལྷག་པར་གནས་པ། སེམས་བསྐྱེད་པ། སློབ་མ་འཇུག་པ། དམ་ཚིག་བསྒྲག་པ་སྔོན་དུ་སོང་ནས་སྡོམ་པ་འབོགས་པ་གསུམ་དུ་གསུངས་ཀྱང་། གཞན་ཕན་འོད་ཟེར་ལས་འཇུག་པའི་ཆོས་བཅུ་བདུན་གསུངས་པ་ལྟར་བཤད་ན། སེམས་བསྐྱེད་གཙོ་བོར་གྱུར་པའི་རྒྱུན་བཤགས་བྱ་བ་དང་། བྱིན་གྱིས་བརླབ་པ་དང་། སྨོན་ལམ་གདབ་པ་དང་། ཟབ་མོའི་ཆོས་བཤད་པ་དང་། བསྲུང་བ་བྱ་བ་དང་། གདོང་གཡོགས་བཅིང་བ་དང་། ཕྱག་རྒྱ་བཅིངས་ནས་འཇུག་པ་དང་། ཡེ་ཤེས་དབབ་པ་དང་། དམ་ལ་བཞག་པ་དང་། མེ་ཏོག་དོར་བ་དང་། མགོ་ལ་བཅིང་བ་དང་། གདོང་གཡོགས་དབྱེ་བ་དང་། དཀྱིལ་འཁོར་བསྟན་པ་དང་། དམ་ཚིག་བསྐྱེད་པ་དང་། དམ་ཚིག་བརྟན་པར་བྱ་བ་དང་། དམ་ཚིག་བསྒྲག་པ་དང་། སྡོམ་པ་སྦྱིན་པ་དང་བཅུ་བདུན་ལས། དང་པོ་ནི། འགྲོ་ལ་ཕན་ཕྱིར་མྱུར་དུ་བྱང་ཆུབ་བར་ཞེས་པ་སྟེ་རྡོ་རྗེ་འབྱུང་བ་ལྟར་རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པ་དང་ནང་གི་སེམས་བསྐྱེད་པ་དང་། རིགས་ལྔའི་སྡོམ་པ་གཟུང་བ་རྣམས་སོ། །གཉིས་པ་ནི། དེ་རྣམས་བྱིན་བརླབ་ཞེས་པ་སྟེ། རིགས་གསུམ་སྤྱིའི་ཕྱག་རྒྱས་བྱིན་གྱིས་བརླབ་པ་དང་། ཨོཾ་བཛྲ་ཨ་དྷི་ཏིཥྛ་ཞེས་སོགས་དང་། རྡོ་རྗེ་ཁུ་ཚུར་གཉིས་ཀྱིས་གནས་ཉི་ཤུ་རྩ་གཉིས་སུ་བྱིན་གྱིས་བརླབ་པའོ། །གསུམ་པ་ནི། བྱང་ཆུབ་སྨོན་ལམ་གདབ་ཅེས་པ་སྟེ། བདག་གི་དགེ་བའི་རྩ་བ་འདིས་ཞེས་སོགས་སོ། །བཞི་པ་ནི། ཟབ་ཅིང་རྒྱ་ཆེ་བའི་ཆོས་བསྒྲགས་ལ་ཞེས་པ་སྟེ། རྣམ་སྣང་མངོན་བྱང་ལས་འབྱུང་བ་བཞིན། འཇིག་རྟེན་དུ་ནི་ཀུན་མཁྱེན་དག །ཞེས་སོགས་སོ། །ལྔ་པ་ནི། བསྲུང་བ་བྱས་ནས་ཞེས་པ་སྟེ། །མེ་ལྟར་འབར་བའི་སྔགས་དང་། ཕྱག་རྒྱས་ལན་གསུམ་བསྲུང་བའོ། །ས་ཆོག་གི་རྗེས་སུ་བྲི་བ་མ་གྲུབ་ན་སྟ་གོན་བྱེད་པར་གསུངས་པ་ལྟར་ན་ནུབ་སྔ་མ་ལ་བྱེད་དགོས་པས། སོ་ཤིང་། ཀུ་ཤ། སྲུང་སྐུད་གསུམ་འདིས་ཟིན་ཏོ། །དྲུག་པ་ནི། སློབ་མ་མི་དགེ་བ་བཅུ་སྤངས་པའི་བརྟུལ་ཞུགས་ཀྱི་སྡོམ་པ་ལ་གནས་པ་སེམས་བསྐྱེད་པས་རབ་ཏུ་ཞི་བ་དེ་རང་གི་ཁ་ནས་སྔགས་བརྗོད་པའི་སྒོ་ནས་དཀྱིལ་འཁོར་དུ་གཞུག་པར་བྱ་ཞེས་མདོར་བསྟན་ནས། ཐོག་མར་དར་རམ། རས་ལ་སོགས་པའི་མིག་གཉིས་གཡོགས་ནས་ནི་ཞེས་པའོ། །བདུན་པ་ནི། རྡོ་རྗེ་འཛིན་པ་དཔལ་གྱི་ལག་གཉིས་བྱ། །ཞེས་པ་སྟེ། དེའི་སྔགས་ནི། ཨོཾ་བཛྲ་ཨ་དྷི་ཏིཥྛ་ཧཱུྃ། ཞེས་པའོ། །མེ་ཏོག་རིན་ཆེན་ལ་སོགས་པས་སློབ་མའི་ལུས་དེ་བརྒྱན་ལ། བླ་མ་ལ་འབུལ་བའི་ཡོན་གྱིས་ལག་པ་བཀང་སྟེ་གཞུག་པར་བྱ། དེའི་སྔགས་ནི། ཨོཾ་བཛྲ་ས་མ་ཡ་ཧཱུྃ་ཞེས་པའོ། །བརྒྱད་པ་ནི། ཨོཾ་བཛྲ་པྲ་བྷེ་ཤ་ཡ་ཧཱུྃ་ཞེས་པ་སྟེ། རྡོ་རྗེ་ཕོབ་ཤིག་ཅེས་པའི་དོན་ནོ། །དགུ་པ་ནི། ཨ་ས་མེ་ནི་སྐྱེ་བ་མེད་པ། ཏྲི་ས་མེ་ནི་སྐུ་གསུང་ཐུགས། མཧཱ་ས་མ་ཡེ་ནི་དམ་ཚིག་ཆེན་པོ། ཧཱུྃ་ནི་སྡུས་ཤིག་པའོ། །བཅུ་པ་ནི། དེ་ནས་སྔགས་འདིས་ཞེས་སོགས་ཏེ་གོ་སླའོ། །བཅུ་གཅིག་པ་ནི། ཨོཾ་བཛྲ་པྲ་ཏཱིཙྪ་བཛྲ་ས་མ་ཡ་སཏྭཾ་ཞེས་པའོ། །བཅུ་གཉིས་པ་ནི། ཕྱག་ན་རྡོ་རྗེའི་སྐབས་ནས། ཨོཾ་བཛྲ་ཧ་སེ་ཨུད་ག་ཊ་ཡ་ཧཱུྃ་ཞེས་པའོ། །བཅུ་གསུམ་པ་ནི། ཕྱག་རྡོར་ནས། ཨོཾ་བཛྲ་པ་ཤྱཱ་ཧོ་ཞེས་པས་དཀྱིལ་འཁོར་བསྟན་ནས། མེ་ཏོག་རིན་ཆེན་ལ་སོགས་པ་ཞེས་སོགས་ཏེ་གོ་སླའོ། །བཅུ་བཞི་པ་ནི། དེ་ནས་སྔགས་ལ་མཁས་པ་ཡིས། །ཞེས་སོགས་སོ། །བཅོ་ལྔ་པ་ནི། །ཨོཾ་ནི་བཤད་ཟིན་བཛྲ་ས་མ་ཡ་ནི་རྡོ་རྗེ་དམ་ཚིག་ཧྲྀ་ད་ཡ་མི་ནི་སྙིང་ལ། པྲ་བྷེ་ཤཱ་ནི་ཕབ་ནས་ཌིཌྷ་ཏིཥྛ་ནི་གནས་ཤིང་བརྟན་པའོ། །བཅུ་དྲུག་པ་ནི། དེ་ནས་འདིས་ཞེས་སོགས་ཏེ། བདུན་བརྒྱུད་རིགས་ནི་ཁའུ་པ་མར་གྱི་རྒྱུད་བུ་ཚ་ལ་སོགས་པ་ལ་བྱེད། སྣུར་པ་སྒྲུབ་པ་པོ་མ་གཏོགས་པ་ཡར་གྱི་བདུན་བརྒྱུད་དེ་ཕ་མེས་ལ་སོགས་པ་བདུན་བརྒྱུད་ལ་བྱེད་དོ། །བཅུ་བདུན་པ་ནི། ཁྱོད་ཀྱིས་སྲོག་ཆགས་བསད་མི་བྱ། །ཞེས་སོགས་སོ། །འདིར་དགེ་བསྙེན་གྱི་བསླབ་གཞི་ལྔ་བསྲུང་དགོས་པར་གསུངས་ཤིང་། རྡོ་རྗེ་རྩེ་མོ་ལས་ཀྱང་དེ་ལྟར་གསུངས་པས་སྔགས་པ་ཁྱིམ་པ་ཡིན་ན་ཡང་དགེ་བསྙེན་གྱི་བསླབ་གཞི་ལྔ་ངེས་པར་བསྲུང་དགོས་ཞེས་བླ་མ་མུས་པ་ཆེན་པོ་གསུངས་ཤིང་། རྩ་ལྟུང་འཁྲུལ་སྤོང་དང་མངོན་རྟོགས་ལྗོན་ཤིང་གི་དགོངས་པ་ཡང་འདི་ཉིད་དུ་སྣང་ངོ་། །གདོན་གྱི་ལས་སོགས་བྱ་བ་མིན་ནི་རང་གི་དངོས་གྲུབ་ལ་བར་ཆད་མི་བྱེད་ན། གཞན་གྱི་འདྲེ་རྒོད་གཟིར་བ་དང་། ཕུར་བུས་གདབ་པ་སོགས་མི་བྱའོ། །མུ་སྟེགས་ཅན་ལ་ཡང་སྨད་པར་མི་བྱ་སྟེ། རྣམ་སྣང་མངོན་བྱང་ལས། རྣམ་པར་སྣང་མཛད་རིང་བའི་རྒྱུར་གསུངས་པའི་ཕྱིར་རོ། །མདོར་ན་སྤང་བླང་གི་དམ་ཚིག་ལ་ཡིད་གཉིས་དང་སོམ་ཉི་དང་ཐེ་ཚོམ་མི་བྱ་སྟེ། དེར་མ་ཟད་བདག་གི་དེ་ཁོ་ན་ཉིད་དང་། སྔགས་ཀྱི་དེ་ཁོ་ན་ཉིད་དང་། སོགས་ཀྱིས་སྒྲས་བསྡུས་པ་དེ་དག་སྟོན་པའི་བླ་མ་ལ་ཡང་དེ་བཞིན་དུ་ཡིད་གཉིས་སོགས་མི་བྱའོ། །གཉིས་པ་དབང་ལ་གཉིས་ཏེ། དབང་བསྐུར་བ་དང་། རྗེས་བླ་མ་ལ་མཆོད་པ་ཕན་ཡོན་དང་བཅས་པ་བསྟན་པའོ། །དང་པོ་ནི། སློབ་མ་སྔར་གྱི་དམ་ཚིག་དེ་དག་ལ་མོས་པ་བརྟན་པོ་དང་ལྡན་པས་དམ་ཚིག་བསྲུང་བར་དམ་བཅས་ནས། དབང་གི་དངོས་གཞི་བསྐུར་བར་བྱའི། དམ་ཚིག་བསྲུང་མི་ནུས་པ་ནི་འཇུག་པ་ཙམ་བྱས་ནས་བཏང་ངོ་། །དེའང་ཚེ་ལྡན་གྱི་དབང་དུ་བྱས་ཀྱིས། ཚེ་འདས་ལ་ནི་དབང་མཐའ་དག་བསྐུར་བར་གསུངས་སོ། །འདིས་ཚེ་འདས་ལ་དབང་བསྐུར་བ་ནི་སྡིག་པ་སྦྱོང་བའི་ཐབས་ཙམ་ཡིན་གྱིས་སྡོམ་པ་སྐྱེ་བ་མ་ཡིན་པར་གསལ་ལོ། །དབང་གི་དངོས་གཞི་ཇི་ལྟར་བསྐུར་ན། འདི་ལ་སྔགས་ཀྱི་དབང་བུམ་པ་ལ་སོགས་ཀྱི་དབང་བཅུ། ཐབས་ཤེས་རབ་ཀྱི་དབང་། རིན་ཆེན་སྣ་བདུན་གྱི་དབང་སྟེ་བཅུ་དགུ་ཡོད་པ་ལས། དང་པོ་ནི། སརྦ་བིད་ཀྱིས་སྔར་སྔགས་ཀྱི་ཕྲེང་བའི་སྐབས་སུ་བཤད་པ་ཅི་བཞིན་གྱི་དབང་བསྐུར་སྟེ། རྩ་རིག་ལ་སོགས་པ་སྔགས་བཅུ་གསུམ་མོ། །དེ་ནས་བུམ་པ་ལ་སོགས་པའི་དབང་རྫས་ཇི་སྙེད་པ་མང་པོ་སྟེ་བཅུ་ཐོགས་པས་བུམ་པ་ལ་སོགས་པ་བཅུ་པོ་རྣམས་ཀྱི་དབང་བཅུ་ཅི་དགར་བསྐུར་ཏེ། སྔགས་རྣམས་ནི་ཕྱག་རྡོར་ནས་འབྱུང་ངོ་། །དེ་ནས་ལག་ཏུ་རྡོ་རྗེ་དང་དྲིལ་བུ་བྱིན་ནས་ཐབས་དང་ཤེས་རབ་ཀྱི་དབང་བསྐུར་རོ། །དེ་ནས་འཁོར་ལོ་ལ་སོགས་པའི་རིན་ཆེན་སྣ་བདུན་ཐོགས་ལ་གནས་སྐབས་སུ་མི་དབང་དབང་ཕྱུག་འཁོར་ལོས་སྒྱུར་བའི་གོ་འཕང་ཐོབ་པ་དང་། མཐར་ཐུག་སྡིག་པ་གཞོམ་པའི་ཕྱིར་དབང་བདུན་ནི་བསྐུར་བར་བྱའོ། །འདི་ལ་བུམ་པ་དངོས་སུ་སྨོས་པས་རིན་པོ་ཆེའི་ཅོད་པཎ་དང་། དར་གྱི་ཅོད་པཎ་སོ་སོར་བྱས་ཏེ་སོགས་ཁོངས་ནས་བཅུ་བསྡུས་ནས་སྔགས་དབང་མ་གཏོགས་པའི་དབང་བཅུ་དགུ་གསུངས་པའང་ཡོད་མོད་ཀྱི། འཁོར་ལོ་ལ་སོགས་རིན་ཆེན་བདུན་ཐོགས་ལ། །ཞེས་པའི་ཚིག་འགྲོས་དང་བསྟུན་ན། སྔ་མ་ཉིད་འཐད་པའི་ཕྱོགས་སུ་སྣང་ངོ་། །བུམ་པ། རིགས་ལྔའི་ཅོད་པཎ། རིན་པོ་ཆེའི་ཅོད་པཎ་དང་དར་དཔྱངས། ཕྱག་རྒྱ་ལྔ། མིང་། ཕྲིན་ལས། ཆོས་ཀྱི་འཁོར་ལོ། བདག་པོ། གཟུངས། གསང་བའི་དབང་རྣམས་ནི་བུམ་པ་ལ་སོགས་པའི་དབང་བཅུའོ། །གཉིས་པ་ནི། སྔགས་བསྒྲུབ་ཕྱིར་ན་མོས་ལྡན་སློབ་མ་ལ་ཞེས་སོགས་ཏེ། ཚེ་འདིའི་བདེ་བ་མ་ལུས་དང་། །ཞེས་སོགས་ཀྱི་བཀའ་བསྒོས་ནས་སློབ་མས་བླ་མ་ལ་ཕྱག་འཚལ་ནས་ཡོན་ཕུལ་བ་སྟེ་གོ་སླའོ། །སྐབས་འདིར་རྩ་སྐྱ་པས་ཆོས་བཤད་པའི་རྗེས་གནང་། དངོས་གྲུབ་བསྒྲུབ་པ་སྔགས་ཀྱི་རྗེས་གནང་། ཕྲིན་ལས་ཐམས་ཅད་བསྒྲུབ་པ་བཀའི་རྗེས་གནང་དང་གསུམ་མཛད་པར་སྣང་ཡང་འདིར་མི་གསལ་ཞིང་། ཁ་ཅིག ཚེ་དཔག་མེད་ཀྱི་སྐབས་ནས་བཤད་པའི་བཀའི་དབང་བསྐུར་བ་འདིར་བྱེད་པ་ནི་མི་འཐད་དེ། སྐབས་དེར་དམ་ཚིག་དང་བཀའི་དབང་བསྐུར་བ་གཉིས་གསུངས་པའི་དམ་ཚིག་གི་དབང་དང་འདིར་བསྟན་པའི་བཀའ་བསྒོ་བ་གཉིས་དོན་གཅིག་ཏུ་སྣང་བས་བཀའ་བསྒོ་བ་དང་། བཀའི་དབང་བསྐུར་བ་གཉིས་དོན་མི་གཅིག་པའི་ཕྱིར་རོ། །གསུམ་པ་རས་བྲིས་ལ་བརྟེན་པའི་དངོས་གྲུབ་ལ་གཉིས་ཏེ། སྡུད་པ་པོའི་མཚམས་སྦྱོར་དང་། གཞུང་དངོས་སོ། །དང་པོ་ནི། དེ་ནས་བཅོམ་ལྡན་འདས་ཀྱིས་ཞེས་སོགས་སོ། །གཉིས་པ་ལ་གསུམ་སྟེ། རྟེན་རས་བྲིས་བྲི་བ། རྟེན་རྫོགས་པ་ལ་རབ་གནས་བྱ་བ། དེ་ལ་སྒྲུབ་པའོ། །དང་པོ་ནི། རས་ལ་བཅོམ་ལྡན་འདས་ཞེས་སོགས་ཏེ། ཤཱཀ་ཐུབ་སེར་པོ་ཆོས་འཆད་ཀྱི་ཕྱག་རྒྱ་ཅན། སྤྱན་རས་གཟིགས་ནི་གཡས་མཆོག་སྦྱིན་དང་། གཡོན་པདྨ་བསྣམས་པ། ཕྱག་ན་རྡོ་རྗེ་ནི། སྔོ་སྐྱ་གཡས་རྡོ་རྗེ་ཐུགས་ཁར་འཛིན་ཅིང་། གཡོན་དྲིལ་བུ་དཀུར་བརྟེན་པའོ། །རང་གི་ལྷ་ལ་བརྟེན་པར་བྲི་བ་ནི། སྤྱན་རས་གཟིགས་ཀྱི་འོག་ཏུ་རྟ་མགྲིན་དམར་པོ་ཞལ་གཅིག་ཕྱག་གཉིས་སྤྱི་བོར་རྟ་མགོ་ལྗང་གུས་བརྒྱན་པ། གཡས་རྡོ་རྗེས་མཚན་པའི་བེ་ཅོན་ཐུགས་ཀར་འཛིན་ཅིང་གཡོན་སྡིག་མཛུབ་དཀུར་བསྒྲེང་བའོ། །ཕྱག་རྡོར་གྱི་འོག་ཏུ་འཇིག་རྟེན་གསུམ་རྒྱལ་སྔོ་ནག་ཤིན་ཏུ་ཁྲོས་པ་ཕྱག་གཉིས་ཀྱིས་རང་གི་སྙིང་ཁར་ཧཱུྃ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ་འཛིན་པའོ། །དེ་བཞིན་གཤེགས་པ་བཞི་ནི་རྡོ་རྗེའི་སྐྱིལ་ཀྲུང་། སྤྱན་རས་གཟིགས་དང་། ཕྱག་ན་རྡོ་རྗེ་ནི་ཕྱེད་ཀྲུང་། རྟ་མགྲིན་དང་གསུམ་རྒྱལ་ནི་གཡོན་བརྐྱང་གཡས་བསྐུམ་དུ་བཞུགས་པའོ། །གཞན་རྣམས་ནི་གོ་སླའོ། །གཉིས་པ་ནི། བྲིས་ཟིན་པའི་རྗེས་དེ་ནས། ཡོ་བྱད་ཚོགས་པར་བྱས་ཏེ་རབ་གནས་ཀྱི་ཆོ་ག་ཚང་བར་བྱས་ལ་དངོས་གཞིའི་སྐབས་སུ་རི་མོའི་སྐུ་གཟུགས་དེ་ལ་དམ་ཚིག་པ་བསྐྱེད། ཡེ་ཤེས་པ་བཅུག་ནས་མཆོད་པ་ཅི་འབྱོར་པས་མཆོད་དེ། ཨོཾ་ཙཀྵུ་ཞེས་སོགས་ཀྱིས་བདག་ཉིད་ཀྱི་སྤྱན་དབྱེ་བར་བྱ་ཞིང་། མཆོད་བསྟོད་རྫོགས་པར་བྱས་ལ། བདེན་པའི་བྱིན་གྱིས་བརླབ་པར་དམིགས་པར་བྱ་བ་ནི། དཀོན་མཆོག་གསུམ་གྱི་བདེན་པའི་བྱིན་གྱིས་རླབས་ཀྱིས་འཇིག་རྟེན་གྱི་ཁམས་མ་ཞིག་གི་བར་དུ། བདག་ཅག་གི་རྟེན་ལ་གནས་པར་གྱུར་ཅིག དངོས་གྲུབ་ཐམས་ཅད་སྩོལ་ཅིག བར་དུ་གཅོད་པ་ཐམས་ཅད་ཞི་བར་གྱུར་ཅིག ཅེས་བརྗོད་ཅིང་མེ་ཏོག་དོར་བའོ། །དེ་ནས་སྐུ་གཟུགས་དེའི་ཐུགས་ཁར་སྔགས་བཀོད་ལ། རྩ་རིག་དང་ལས་ཐམས་ཅད་པའི་སྔགས་བཟླས་པས་མཚན་མ་ཞིག་མཐོང་ན་ནི་ཞེས་སོགས་ནི་གོ་སླའོ། །གསུམ་པ་ལ་བཞི་སྟེ། བསྙེན་པ། ཉེ་བསྙེན། སྒྲུབ་པ། སྒྲུབ་པ་ཆེན་པོའོ། །དང་པོ་ནི། སྒྲུབ་པ་པོ་རྟག་ཏུ་རས་བྲིས་ཀྱི་མངོན་སུམ་དུ་འདུག་ནས་ཀྱང་། འཇིག་རྟེན་གསུམ་ལས་རྣམ་རྒྱལ་གྱིས། བདག་བསྲུང་བ་ལ་སོགས་པའི་སྲུང་འཁོར་བསྡུས་པ་བྱས་ནས་ཀྱང་། བདག་གི་དེ་ཉིད་ལྷའི་རྣལ་འབྱོར་རྫོགས་པར་དྲན་པར་བྱས་ཤིང་རས་བྲིས་དམིགས་ཡུལ་དུ་བཞག་ནས་ཕྱག་རྒྱ་སྟོན་ཅིང་། དངོས་གྲུབ་ཀྱི་མཚན་མ་མ་བྱུང་གི་བར་དུའམ། གྲངས་ཀྱི་བསྙེན་པ་འབུམ་ཕྲག་གསུམ་མམ། ཡང་ན་འབུམ་ཕྲག་དྲུག་རྩ་རིག་བཟླས་པར་བྱའོ། །གཉིས་པ་ནི། དེ་ནས་དབེན་པའི་གནས་སུ་ཞེས་སོགས་སོ། །གསུམ་པ་ནི། དེ་ནས་བཟླས་པའི་མཇུག་ཏུ་ནི། རས་བྲིས་ཀྱི་དཀྱིལ་འཁོར་སྔ་མ་བཞིན་དུ་བསམས་ལ་ཞེས་པའམ། ཡང་ན་ཏིང་ངེ་འཛིན་གྱི་དཀྱིལ་འཁོར་སྔ་མ་རྡུལ་ཚོན་གྱི་དཀྱིལ་འཁོར་བཞིན་དུ་བསམས་ལ། རས་བྲིས་ལ་མཆོད་པ་རྒྱ་ཆེན་བྱས་ནས་ཀྱང་ཞེས་སོགས་སོ། །བཞི་པ་ནི། ཕྱག་མཚན་དངོས་གྲུབ་ལ་སོགས་བླང་། །ཞེས་སོགས་ཏེ་གོ་སླའོ། །བཞི་པ་ངན་སོང་གི་སྡིག་པ་སྦྱོང་བའི་ཐབས་ཀྱི་བྱེ་བྲག་བསྟན་པ་ལ་བཞི་སྟེ། ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ཞུས་པ་དང་། བཅོམ་ལྡན་འདས་ཀྱིས་བཀས་གནང་བ་དང་། ངན་སོང་གི་སྡིག་པ་སྦྱོང་བའི་ཐབས་བཤད་པའི་གཞུང་དངོས་དང་། དེའི་ཕན་ཡོན་བསྟན་པའོ། །དང་པོ་ནི། དེ་ནས་ལྷ་ཐམས་ཅད་ཀྱི་དབང་པོ་བརྒྱ་བྱིན་གྱིས་ཞེས་སོགས་སོ། །གཉིས་པ་ནི། བཅོམ་ལྡན་འདས་ཀྱིས་ཞེས་སོགས་སོ། །གསུམ་པ་ལ་དགུ་སྟེ། ཀུན་རིག་རྩ་བའི་དཀྱིལ་འཁོར་དུ་དབང་བསྐུར་ཏེ་སྡིག་པ་སྦྱང་བ་དང་། ཀུན་རིག་རྩ་བའི་དཀྱིལ་འཁོར་དུ་དབང་བསྐུར་ཏེ་མཆོད་རྟེན་གྱི་དབུས་སུ་བཞག་སྟེ་སྡིག་པ་སྦྱང་བ་དང་། དབང་བསྐུར་ཏེ་དྲི་གཙང་ཁང་དུ་བཞག་པས་སྡིག་པ་སྦྱང་བ་དང་། མཆོད་རྟེན་བྱ་བས་སྦྱང་བ་དང་། བཟླས་པ་བྱ་བས་སྦྱང་བ་དང་། སྦྱིན་སྲེག་བྱ་བས་སྦྱང་བ་དང་། རོ་བསྲེགས་ཏེ་སྡིག་པ་སྦྱང་བ་དང་། རྟེན་མེད་པ་ལ་སྡིག་པ་སྦྱང་བ་དང་། ཕྱིར་བཟློག་གིས་སྡིག་པ་སྦྱང་བའོ། །དང་པོ་ལ་གཉིས་ཏེ། རྟེན་རོ་ཡོད་པ་ལ་སྦྱང་བ་དང་། རྟེན་མེད་ན་གཟུགས་བརྙན་ལ་དབང་བསྐུར་ཏེ་སྡིག་པ་སྦྱང་བའོ། །དང་པོ་ནི། དེ་ནས་དཀྱིལ་འཁོར་བྲིས་ནས་ནི། །ཞེས་སོགས་ཏེ། ས་ཆོག་ནས་བརྩམས་ཏེ། དཀྱིལ་འཁོར་བྲི་བ་དང་། བདག་གི་རྣལ་འབྱོར་དང་། བུམ་པ་ལ་བཟླས་པ་དང་། མདུན་བསྐྱེད་ལ་བདག་མདུན་ཐ་མི་དད་དུ་བསྒྲུབ་པའི་བར་རྫོགས་པར་བྱས་ལ། རྟེན་རོ་དེ་བགེགས་སྦྱོང་བ། རྟེན་བསྐྱེད་པ། རྟེན་དགུག་པ། སྡིག་པ་བྲལ་བ་དང་བཞི་བྱས་ནས། སྔ་མ་བཞིན་དུ་འཇུག་པ་དང་། དབང་རྫོགས་པར་བསྐུར་ཏེ། དེའི་ཕན་ཡོན་ནི། དེ་ནས་སྡིག་པ་ཀུན་སྦྱངས་ཏེ། །ཞེས་སོགས་སོ། །གཉིས་པ་ནི། དེ་ཡི་གཟུགས་བརྙན་བྲི་བའམ། །ཞེས་སོགས་ཏེ་གོ་སླའོ། །གཉིས་པ་ནི། དེ་ནས་རྣལ་འབྱོར་ཅན་གྱིས་ནི། །ཞེས་སོགས་ཏེ། རྟེན་རོ་ཡོད་པ་ལ་སྦྱང་བར་མི་འདོད་པའམ། རོ་མེད་ན་སཱཙྪ་འདེབས་པར་མི་འདོད་པའི་དབང་དུ་བྱས་པ་སྟེ། སྔ་མ་བཞིན་དུ་དབང་ཐམས་ཅད་བསྐུར་ལ། ཁྱད་པར་རྟེན་དེ་ལྷ་དཔའ་བོ་གཅིག་པའམ་དཀྱིལ་འཁོར་རྫོགས་པར་བསྐྱེད་ནས། དེ་ལ་ཡེ་ཤེས་པ་སྤྱན་དྲངས་ནས་མཆོད་པས་མཆོད་དེ་མཆོད་རྟེན་གྱི་དབུས་སུ་བཞག་པར་བྱའོ། །ལྷག་མ་རྣམས་ནི་སྔ་མ་བཞིན་ནོ། །གསུམ་པ་ནི། རང་གི་ལྷའམ་ལྷ་གཞན་གྱི་ཞེས་སོགས་ཏེ། རོ་ཡོད་པའམ། མེད་ཀྱང་གཟུགས་སུ་བྲིས་པ་ནི་ཅིས་ཀྱང་དགོས་ཏེ། དེ་སྦྱང་བ་དང་། མཆོད་རྟེན་དུ་འཇོག་པ་དང་། སཱཙྪ་བྱེད་པ་ཡང་མི་འདོད་ཅིང་། རང་གི་ཁྱིམ་དུ་འཇོག་པར་འདོད་པའི་དབང་དུ་བྱས་པ་སྟེ་དེ་ལ་སྔར་བཞིན་དབང་བསྐུར་ལ། ཁྱད་པར་རྒྱུད་འདི་དང་། རྒྱུད་གཞན་ནས་འབྱུང་བའི་སྔགས་མང་པོ་གསེར་རམ། དངུལ་ལམ། གུར་གུམ་གྱིས་བྲིས་པ་དེའི་སྙིང་ཁར་གདགས་ཏེ། རྟེན་དེ་གོས་དང་། དྲི་ལ་སོགས་པས་བརྒྱན་ཏེ་ལྷར་བསྐྱེད། ཡེ་ཤེས་པ་བཀུག་ལ་ཇི་ལྟར་གྲུབ་པས་མཆོད་ནས་བསྟོད་དེ། རང་གི་ཁྱིམ་གྱི་ཕྱོགས་ཅིག་དབེན་པའམ་དྲི་གཙང་ཁང་དྲིས་བྱུགས་པར་བཞག་ལ་དུས་ནར་མར་ལྷ་བསྐྱེད་པའི་རྟེན་དེ་ལ་མཆོད་བསྟོད་བྱེད་ཅིང་བཞག་གོ །ལྷག་མ་ཐམས་ཅད་ནི་སྔ་མ་བཞིན་ནོ། །བཞི་པ་ནི། དེ་ཡི་མིང་ནས་སྨོས་ནས་ནི། །ཞེས་སོགས་ཏེ། སྔགས་ལ་མིང་སྤེལ་ཚིག་ཏུ་བྱས་པའི་གཟུངས་སྙིང་དུ་བཅུག་སྟེ། མཆོད་རྟེན་བཏབ་པའོ། །ལྔ་པ་ནི། དེ་ཡི་མིང་ནས་བརྗོད་ནས་ནི། །ཞེས་སོགས་ཏེ། བདག་གི་རྣལ་འབྱོར་དང་ལྡན་པའི་སྙིང་ཁར་ཟླ་བ་ལ་མཐའ་སྐོར་དུ་རྩ་རིག ནང་དུ་གཙོ་བོ་གང་ཡིན་གྱི་སྔགས་བཀོད་ལ་ཕྱག་ན་རྡོ་རྗེའི་སྐབས་ནས་བཤད་པ་བཞིན་དེ་ལས་འོད་ཟེར་འཕྲོས་པས་ཚེ་ལས་འདས་པས་གཙོར་བྱས་པའི་ངན་སོང་ཐམས་ཅད་རབ་ཏུ་ཞི་སྟེ། སེམས་ཅན་དམྱལ་བ་དང་། བྱོལ་སོང་དང་། ཡི་དྭགས་སུ་སྐྱེས་པའི་སེམས་ཅན་ཐམས་ཅད་གྲོལ་བར་བདག་ཉིད་ཀྱིས་རབ་ཏུ་ཤེས་སོ། །འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ། སྣང་བར་བྱས་ནས་ཀྱང་། སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་དུ་བྱས་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་དེ་ཉིད་དུ་ཞུགས་པར་གྱུར་ཏོ་ཞེས་བསམ་ཞིང་། རྒྱུད་ནས་འབྱུང་བའི་སྔགས་ཐམས་ཅད་དང་། གཙོ་བོར་རྩ་བའི་རིགས་པ་བཟླས་པར་བྱའོ། །དྲུག་པ་ནི། དེ་ཡི་མིང་ནས་བརྗོད་ནས་ཀྱང་། །ཞེས་སོགས་ཚིགས་སུ་བཅད་པ་བརྒྱད་དེ། འདི་དང་ཚེ་དཔག་མེད་ནས་ཚིགས་སུ་བཅད་པ་བཅུ་གསུམ་གྱིས་ཚེ་འདས་ཀྱི་ལས་གཙོ་བོར་བསྟན་ཅིང་། ཚེ་ལྡན་ལ་ཞར་ལ་སྦྱར་བར་བསྟན་ལ། འཁོར་ལོས་སྒྱུར་བ་དང་མེ་ལྟར་འབར་བ་གཉིས་ནས་ཚེ་ལྡན་གྱི་བྱ་བ་བསྟན་ཏེ། ཆོ་ག་ནི་ཁྱད་པར་མེད་དོ། །དེ་ལ་བཞི་སྟེ། ཞི་བ་དང་། རྒྱས་པ་དང་། དབང་དང་། དྲག་པོའོ། །དེ་དག་ཀྱང་དཀྱིལ་འཁོར་དང་མ་འབྲེལ་ན་ནི་ཕྱོགས་ཤར་དུ་ཞི་བ། བྱང་དུ་རྒྱས་པ། ནུབ་ཏུ་དབང་། ལྷོར་དྲག་པོའི་ཐབ་བརྩིགས་ལ་སྒྲུབ་པ་པོའི་ཁ་ཡང་ཞི་བ་ལ་ཤར་དུ་སྟེ། དེ་བཞིན་དུ་དེ་དག་གི་ཕྱོགས་སུ་བལྟའོ། །དཀྱིལ་འཁོར་དང་འབྲེལ་ན་དཀྱིལ་འཁོར་གྱི་ནུབ་ཏུ་ཞི་བའི་ཐབ་བཅས་ལ་ཁ་ཤར་དུ་བལྟ། དེ་བཞིན་དུ་ཐམས་ཅད་སྒྲུབ་པ་པོ་དཀྱིལ་འཁོར་ལ་ཕྱོགས་ཏེ་བལྟ་བས་ལྷོར་རྒྱས་པ་ཁ་བྱང་དུ་བལྟ། ཤར་དུ་དབང་ཁ་ནུབ་ཏུ། བྱང་དུ་དྲག་པོའི་ཐབ་བཅས་ལ་ཁ་ལྷོར་བལྟའོ། །དེ་ལ་ཞི་བའི་སྦྱིན་སྲེག་ནི་གཙོ་བོ་ཡིན་ལ། ལྷག་མ་གསུམ་ནི། ཅི་གྲུབ་པ་ཉམས་སུ་བླང་ངོ་། །དེའང་ཞི་བ་རྟོགས་ན་འོག་མ་གསུམ་ཞར་ལ་རྟོགས་པར་འགྱུར་རོ། །དེ་ལ་དགུ་སྟེ། ཐབ་བཅའ་བ་དང་། བུད་ཤིང་བཤམ་པ་དང་། མཆོད་པ་ལ་སོགས་པ་རྒྱན་དགྲམ་པ་དང་། བསྲེག་རྫས་དང་། སྒྲུབ་པ་པོའི་ཡན་ལག་དང་། མེ་སྦར་བ་དང་། འཇིག་རྟེན་པའི་མེ་ལྷ་དང་། འདས་པའི་ལྷ་སྤྱན་དྲངས་ཞིང་མཆོད་བསྟོད་སོགས་སྦྱང་བ་དང་། མཇུག་གི་བྱ་བ་དང་། ཕན་ཡོན་ནོ། །དང་པོ་ནི། ཚེ་དཔག་མེད་ནས་འབྱུང་བ། མདོར་ན་ཐིག་ནི་བཏབ་ནས་ཀྱང་། །ཆོ་ག་བཞིན་དུ་བྲི་བར་བྱ། །དེ་ནི་མཐོང་བ་བརྒྱུད་པས་ཤེས་སོ། །ལྷ་ཡི་བུ་རྣམས་ཞི་བ་ཡི། །ཧོམ་ཁུང་བར་མ་ཐ་མ་མཆོག །ཁྲུ་གང་ཁྲུ་དོ་ཁྲུ་བཞི་པའི། །ཟླུམ་པོ་ཉིད་དུ་བྱས་ནས་ནི། །དེ་ནི་དབྱིབས་སོ། །དེ་ཡི་དབུས་སུ་འཁོར་ལོ་ནི། །རྩིབས་བརྒྱད་འོད་ཟེར་དཀའ་པོ་བྲི། །དེ་ནས་རོ་སྲེག་སྐབས་ནས་འབྱུང་བ་ལྟེ་བར་རིགས་ལྔའི་མཚན་མ་དང་། སེམས་དཔའ་བཅུ་དྲུག་བྲི། དེ་ནས་སོར་བཞི་སྐྱེད་པ་ལ་ཁོར་ཡུག་གི་རྡོ་རྗེ་རྩེ་ལྔ་པ་འོད་ཟེར་དཀར་པོ་དང་ལྡན་པ་བྲི། དེ་ནས་རྡོ་རྗེ་རྒྱ་གྲམ་དང་། དེ་ནས་སོར་གཉིས་སྨད་པ་དང་། ཡང་སོར་གཉིས་པོ་སྨད་པ་ལ། རྡོ་རྗེ་རིན་ཆེན་ཆུ་སྐྱེས་མཆོག །དེའི་ཕྱི་རོལ་གྱི་ལྷ་སྣམ་ལ། དེ་ནས་སྡིག་པ་གཞོམ་པའི་ཕྱིར། །ཕྱག་རྒྱ་སྣ་ཚོགས་བཞག་པར་བྱ། །ཞེས་པ་སྟེ། བྱང་ཆུབ་སེམས་དཔའ་དང་། ཉན་ཐོས་དང་རང་རྒྱལ་རྣམས་ཀྱི་མཚན་མ་བྲི། སྒོ་བཞིར། ཕྱིའི་རྡོ་རྗེའི་རིགས་རྣམས་ནི། །ཕྱག་རྒྱ་རྣམས་ནི་ཕྱི་རིམ་བྲི། །དེ་ནས་སྒོ་བྱ་བའམ་ཡང་ན། །ཟླུམ་པོ་ཉིད་ལ་འཁོར་ཡུག་ལ། །གཟའ་དང་སྐར་མའི་མཚན་མ་ལ། །དེ་ལྟར་འཇིག་རྟེན་སྐྱོང་བ་རྣམས། །ཞེས་པས་བསྟན་ཏེ། ཁོར་ཡུག་ལ་ལྷ་ཆེན་བརྒྱད། ཀླུ་ཆེན་བརྒྱད། གཟའ་བརྒྱད། ཕྱོགས་སྐྱོང་བ་བཅུ། འཇིགས་བྱེད་དགུ། རྒྱལ་ཆེན་བཞི། རྒྱུ་སྐར་ཉི་ཤུ་རྩ་བརྒྱད་རྣམས་མིང་ངམ། བརྡའམ། ཐིག་ལེར་བྲི་བར་བྱའོ། །དེ་ནས་མེ་ལྟར་འབར་བ་ནས། །བུད་ཤིང་ཞོ་དང་ལྡན་པ་ལ། །དྲི་ཆུས་བཀུས་པས་ཤེས་པར་བྱ། །ཞེས་པ་སྟེ། བུད་ཤིང་མཛེས་པར་བཤམ་པར་བྱ། དེ་ནས་རྒྱན་དགྲམ་པ་ནི་གཙོ་བོ་རི་མོ་ལུགས་མའང་རུང་། རྡོ་རྗེ་ཅན་དང་ལྷན་ཅིག་བཞག །བྱ་དང་བུམ་པ་བཀང་བ་དང་། །གཏོར་མ་ལྷ་བཤོས་རབ་བཀང་བཞག །ཞེས་པ་སྟེ་དེ་དག་ཀྱང་མེ་ལྟར་འབར་བ་ནས་ཀྱང་། བདུག་སྤོས་མེ་ཏོག་མར་མེ་རྣམས་ཀྱང་བཞག །མཆོད་པ་བྱ་བའི་ཕྱིར་ནི་བླ་རེ་དང་། །གདུགས་དང་རྒྱལ་མཚན་རྔ་ཡབ་ལ་སོགས་བཞག །ནངས་རེ་ག་བུར་བཅས་པའི་དྲི་ཞིམ་དང་། །ཙན་དན་ལ་སོགས་པ་ཡི་བྱུག་པས་བྱུག །ཅེས་པས་རྒྱན་དགྲམ་པའོ། །བསྲེག་རྫས་ནི་ཀུན་རིག་ནས། ཏིལ་དང་ཡུངས་ཀར་འབྲས་རྣམས་དང་། །ར་ཡི་འོ་མ་ལྡན་པ་དང་། །དྲི་ཡིས་བཀུས་པའི་ཡམ་ཤིང་གིས། །ཆོ་ག་བཞིན་དུ་སྦྱིན་སྲེག་བྱ། །ཞེས་པ་དང་། །ཚེ་དཔག་མེད་ཉིད་ཀྱིས། དེ་ཡི་མིང་དང་ཡུངས་ཀར་གྱིས། །བརྒྱ་ཕྲག་སྟོང་དུ་བསྲེགས་བྱས་ན། །ངན་སོང་ཀུན་ལས་ཐར་བར་འགྱུར། །དེ་ཡི་ཤ་དང་རུས་པ་དང་། །སྐྲ་དང་ཐལ་བ་ལ་སོགས་པས། །ཆོ་ག་དེ་དང་འདྲ་བར་ནི། །སྦྱིན་སྲེག་བྱས་ན་ངན་སོང་ཡང་། །ཀུན་ལས་རྣམ་པར་ཐར་བར་འགྱུར། །མར་དང་འོ་མ་སྦྲང་རྩི་ཅན། །འབྲས་ཡོས་ཡུངས་མར་བསྲེས་པ་དང་། །དེ་ཡི་རུས་པ་ཤ་ལ་སོགས། །མེད་ན་མིང་ནས་སྨོས་ཏེ་བྱ། །ཞེས་པས་བསྲེག་རྫས་བསྟན་ནོ། །དེ་ནས་སྒྲུབ་པ་པོའི་ཡན་ལག་ནི། དཀར་པོའི་གོས་ནི་གྱོན་ནས་ཀྱང་། །སངས་རྒྱས་གཟུགས་ཅན་མི་འཇིགས་པས། །ངན་སོང་རྒྱུད་ན་གནས་པ་ཡི། །སེམས་ཅན་རྗེས་སུ་དྲན་བྱེད་ཅིང་། །ཞེས་བྱ་བ་དང་། འཁོར་ལོས་སྒྱུར་བ་དང་། མེ་ལྟར་འབར་བ་ནས་ཀྱང་བསྟན་པ་བཞིན་ཏེ། རྒྱན་ལ་སོགས་པ་དཀར་པོར་བྱས་བྱང་ཆུབ་ཀྱི་སེམས་དང་ལྡན་པས་རྡོ་རྗེ་སྐྱིལ་ཀྲུང་ངམ། སེམས་དཔའི་འདུག་སྟངས་ཀྱིས་གནས་པ་བདག་གི་རྣལ་འབྱོར་དཔའ་བོ་གཅིག་པ་བསྙེན་པ་བཞིན་བསྒོམ་པར་བྱའོ། །དེ་ནས་མེ་སྦར་བ་ནི། ཡམ་ཤིང་གིས་མེ་སྦར་ཏེ། མེ་ལྟར་འབར་བ་ནས། འདབ་བདུན་མེ་ཏོག་འབྲས་བུ་རྣམས། །ཞོ་དང་ལྡན་པའི་ཡམ་ཤིང་གིས། །དེ་དག་ཐབ་ཁུང་ཁྱད་པར་ལས། །རང་གི་སོར་གྱི་གཞལ་བྱ་ཞིང་། །ཉི་ཤུ་རྩ་བརྒྱད་མན་ཆད་མཆོག །བཅུ་བདུན་སོར་ནི་བར་མ་སྟེ། །ཐ་མ་བཅུ་གཉིས་ཉིད་དུ་ཤེས། །ཤིན་ཏུ་ཆུང་ན་སོར་བརྒྱད་དོ། །བུད་ཤིང་ཞོ་དང་ལྡན་པ་ལ། །དྲི་ཆུས་བཀུས་པས་ཤེས་པར་བྱ། །བསྲེག་ཤིང་དེ་ལས་བྱུང་བའི་མེ། །སྦར་ནས་དྲི་ཆུས་གཏོར་ནས་ནི། །ཞེས་པའི་དོན་ཡམ་ཤིང་གིས་མེ་སྦར་ལ་དེ་ནས་བདུད་རྩི་འཁྱིལ་པའི་སྔགས་ཟློས་ཤིང་། ཐབ་དང་རྫས་ཐམས་ཅད་ལ་ཀུ་ཤའི་རྩེ་མོས་དྲི་ཆུས་གཏོར་ཞིང་བསངས་ལ། མཆོད་རྫས་ཐམས་ཅད་བདུད་རྩི་མཆོག་ཏུ་བསམ་པར་བྱའོ། །དེ་ནས་འཇིག་རྟེན་དང་འཇིག་རྟེན་ལས་འདས་པ་མཆོད་པ་ནི། མེ་ལྟར་འབར་བ་ནས། པདྨ་དཀར་པོ་ཞལ་འདྲ་དགེ །པདྨ་ནོར་བུའི་རིལ་བ་ཐོགས། །ལག་ན་དབྱུགས་པ་མཆོག་ཐོགས་པ། །པདྨ་དཀར་པོའི་འདབ་སྟེང་འདུག །དེ་ལྟའི་མེ་ལྷ་བཀུག་ནས་ཀྱང་། །མཆོད་ཡོན་བླངས་ཏེ་དབུལ་བར་བྱ། །དེ་ནས་ཟླ་བ་དཀར་པོ་ལ། །བཞུགས་པའི་འགྲོ་ཕན་སྤྱན་དྲངས་ཏེ། །པདྨ་དཀར་པོ་ཤར་ཕྱོགས་སུ། །བསམ་སྟེ་སྟེང་དུ་བཞག་པར་བྱ། །དེ་ནས་དེ་ལྟར་བསམས་ནས་ཀྱང་། །བསྒྲུབ་བྱ་རྟག་དུ་མདུན་བཞག་སྟེ། །དེ་ཡི་ཉེས་པ་དྲངས་ནས་ནི། །ཤིན་ཏུ་དཀྲིས་ཏེ་སྦར་བར་བྱ། །ནངས་པར་སྔར་ནི་བརྩང་འགྱུར་ཅིང་། །ཤིན་ཏུ་དྲི་ཞིམ་ལུས་བྱུགས་ལ། །བདུད་རྩི་བཞིན་བསམ་སྦྱིན་སྲེག་བྱ། །དམ་ཚིག་འདི་ནི་འདའ་བར་དཀའ། །ལྷ་རྫས་བདུད་རྩི་བྲོ་ལྔ་ནི། །དང་པོ་མེ་ལྷ་བརྟགས་བྱས་ལ། །ཁྲོ་བོ་དེ་ནི་དེ་ལུས་ལ། །སྤྱན་དྲངས་ནས་ནི་གཞུག་པར་བསམ། །དེ་ནས་དང་པོ་ཁྲོ་བོ་ལ། །བསྲེག་བྱ་ལན་གསུམ་དབུལ་བར་བྱ། །དེ་ནས་དཀོན་མཆོག་གསུམ་ལ་དབུལ། །དེ་ནས་མེ་ལྷ་ཉིད་ལ་གསུམ། །དེ་ནས་རྡོ་རྗེ་སེམས་དཔའ་ལ། །དེ་ནས་ལྷ་རྣམས་རེ་རེ་ལ། །དེ་ནས་བགེགས་ལ་སོགས་ལ་འབུལ། །ཡིད་དུ་འོང་བའི་ལྷ་ཡང་རུང་། །དེ་ལ་དང་པོ་ཁྲོ་བོ་ཡི། །སྔགས་ཀྱིས་ཡམ་ཤིང་སྦྱིན་སྲེག་བྱ། །དེ་ནས་གཅིག་ཏུ་བསྲེས་ནས་ཀྱང་། །བདུད་རྩིའི་སྔགས་ཀྱིས་བཏབ་ནས་ནི། །དེ་བཞིན་སྦྱིན་སྲེག་བྱས་འོག་ཏུ། །བརྒྱ་སྟོང་ཉིད་དམ་ཡང་ན་ཡང་། །བརྒྱ་རྩ་བརྒྱད་ཀྱི་བར་དུ་ནི། །ཁྲོ་བོ་ཉིད་ལ་དབུལ་བར་བྱ། །ཞེས་བཤད་དོ། །དེ་དག་གི་དོན་ནི་འདི་ཡིན་ཏེ། སྔར་བསྟན་པ་བཞིན་དུ་ཐབ་ཁུང་ལེགས་པར་བྱས་ནས་བུད་ཤིང་མཛེས་པར་བརྩིགས་ཏེ། མཆོད་པ་དང་གཏོར་མ་ལ་སོགས་པ་ལེགས་པར་བཤམས་ལ། མར་དང་ཏིལ་གཙོ་བོར་གྱུར་པའི་བསྲེག་རྫས་རྣམས་དྲུང་དུ་ཉེ་བར་བསགས་ཏེ། བདག་སྔ་དྲོའི་དུས་སུ་ཁ་ཤར་དུ་བལྟས་གོས་དང་རྒྱན་དཀར་པོས་བརྒྱན་ཏེ། དཔའ་བོ་གཅིག་པའི་རྣལ་འབྱོར་བསྙེན་པ་བཞིན་རྫོགས་པར་བྱས་ནས་ཅི་འབྱོར་གྱིས་བདག་ཉིད་ལ་མཆོད་ལ་ཡམ་ཤིང་ལ་མེ་སྦར་ཏེ། ཨོཾ་བཛྲ་ཛྭ་ལ་ཛྭ་ལ་ཧཱུྃ་ཞེས་བརྗོད་པས་ཐབ་ཏུ་མེ་སྦར་ལ། ཀུ་ཤའི་ཆུན་པོས་དྲི་ཞིམ་པོའི་ཆུས་ཐབ་དང་། ཡོ་བྱད་ལ་གཏོར་ཞིང་ཨོཾ་བཛྲ་ཨ་མྲྀ་ཏེ་ཧཱུྃ་ཕཊ་ཞེས་པས་བསངས་ལ། ཐབ་ཨོཾ་ཤས་སྟོང་པར་བསམས། ཨོཾ་བྷ་ཞེས་པས་ཐབ་དྭངས་ཤིང་ཐོགས་པ་མེད་པ་དཀར་པོ་རྒྱ་དང་ཚད་ཡོངས་སུ་མ་ཆད་པ་བསྐྱེད་ལ། ཨོཾ་ཨགྣེ་ཡེ་ཛཿཧཱུྃ་བཾ་ཧོཿཞེས་བྱ་བ་ཙམ་མམ། ཚིགས་བཅད་ལ་སོགས་པ་རྒྱས་པ་བྱས་ཀྱང་རུང་སྟེ། ཤར་ལྷོ་ནས་མེ་ལྷ་དཀར་པོ་ར་སྐྱེས་དང་པདྨ་དཀར་པོའི་གདན་ཅན་སྐུ་མདོག་དཀར་པོ་ཞལ་གཅིག་ཕྱག་བཞི་པ་ཕྱག་དང་པོ་གཉིས་གཡས་རིན་པོ་ཆེ་དང་། གཡོན་པདྨ། འོག་མ་གཉིས་ཀྱིས་གཡོན་རིལ་བ་དང་། གཡས་དབྱུག་པ་འཛིན་པ་སྤྱན་དྲངས་ཏེ་ཐབ་ཏུ་བཞུགས་པ་ལ་མཆོད་ཡོན་དང་ཞབས་བསིལ་དབུལ། མེ་ལྷའི་སྦྱིན་སྲེག་འདིར་འབུལ་བའམ། འོག་དུ་འབུལ་བ་གང་རུང་བྱས་ཏེ། གཞུང་ནས་འོག་ཏུ་བྱ་བར་བཤད་དོ། །དེ་ནས་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་གོང་དུ་བཤད་པའི་ཚིགས་བཅད་ལ་སོགས་པས་སྤྱན་དྲངས་ལ། ཐབ་ཀྱི་ཤར་དུ་པདྨའི་སྟེང་དུ་སྤྱན་དྲངས་ལ་ཡང་ཅི་འབྱོར་གྱིས་མཆོད། མེ་ལྷའི་ལྟོ་བ་ཡངས་པར་སྤྱན་དྲངས་ལ། དེའི་ཐུགས་ཀའི་འོད་དང་། བདག་གི་ཐུགས་ཀའི་འོད་ཀྱིས་བསྒྲུབ་བྱའི་སྡིག་པ་རྣམས་བཀུག་ཏེ་མེ་ལ་ཐིམ་པས་སྡིག་པ་ཐམས་ཅད་བསྲེགས་པར་བསམས་ནས་བསྲེག་རྫས་རྣམས་སོ་སོར་བྱ་བའམ་ཐམས་ཅད་བསྲེས་ནས་བྱས་ཀྱང་བཏུབ་སྟེ། བདུད་རྩི་འཁྱིལ་པའི་སྔགས་བཏབ་པས་ཐམས་ཅད་བདུད་རྩིར་བསམས་ལ། ཨོཾ་ཨགྣེ་ཡེ་ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བྱ་བས་མེ་ལྷ་ལ་ལན་གསུམ་དབུལ་བར་བྱའོ། །དེ་ནས་མེ་ལྷའི་ལྟོ་བ་ལ་བཞུགས་པའི་ཁམས་གསུམ་རྣམ་རྒྱལ་ལ། ཨོཾ་བཛྲ་སཏྭ་ཀྲོ་དྷ་ཨ་ན་ལརྐ་མཧཱ་བཛྲ་ཀྲོ་དྷ་དྲ་བ་དྲ་བ་བི་ཏྲ་བ་བི་ཏྲ་བ་སརྦ་ཨ་པ་ཡ་ན་ཤ་ཡ་ན་ཤ་ཡ་ཧ་ར་ཧ་ར་པྲ་ནན་ཧཱུྃ་ཕཊ། ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞེས་བྱ་བས་སྡིག་པ་ཐམས་ཅད་ཞི་བར་བྱ་བའི་དོན་དུ་ཁྲོ་བོ་ལ་ལན་གསུམ་ལ་སོགས་པ་ཅི་རིགས་པ་ཞིག་དབུལ་བར་བྱའོ། །དེ་ནས། ན་མོ་རཏྣ་ཏྲ་ཡཱ་ཡ། བུདྡྷ་དྷརྨཱ་སཾ་ག་ཡ་བྷྱཿ ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞེས་བྱ་བས་དཀོན་མཆོག་གསུམ་ལ་ལན་ཅི་རིགས་པར་དབུལ་བར་བྱའོ། །དེ་ནས་ཡང་མེ་ལྷ་ལ་ལན་གསུམ་དབུལ་བར་བྱའོ། །དེ་ནས་རིགས་སྔགས་ཐམས་ཅད་ཀྱི་བདག་པོ་རྡོ་རྗེ་སེམས་དཔའ་ཁྲོ་བོའི་ལྟོ་བར་བསམས་ལ། ཨོཾ་བཛྲ་སཏྭ་ཧཱུྃ་ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞེས་པས་ལན་ཅི་རིགས་པར་དབུལ་བར་བྱའོ། །དེ་ནས་དཀྱིལ་འཁོར་གྱི་ལྷ་ཐམས་ཅད་རྡོ་རྗེ་སེམས་དཔའི་ལྟོ་བར་སྤྱན་དྲངས་ལ་རང་རང་གི་སྔགས་སམ། རྩ་བའི་རིག་པས་ཅི་འབྱོར་པ་དབུལ་བར་བྱའོ། །དེ་ནས་ཁྲོ་བོ་ཁམས་གསུམ་རྣམ་རྒྱལ་ལ། བགེགས་ཉེ་བར་ཞི་བར་བྱ་བའི་ཕྱིར་ལན་མང་དུ་དབུལ་བར་བྱའོ། །དེ་ནས་ཕྱོགས་སྐྱོང་དང་བགེགས་ལ་སོགས་པ་ཐབ་ཀྱི་ཕྱོགས་གཅིག་ཏུ་བཀུག་ལ་རང་རང་གི་སྔགས་ཀྱིས་ཅི་རིགས་པ་དབུལ་ལོ། །དེ་ནས་ཡང་རང་གི་ཕྱོགས་སྐྱོང་བ་དང་དཔལ་མགོན་པོ་ལ་སོགས་པ་ཐབ་ཀྱི་ཕྱོགས་གཅིག་ཏུ་བཀུག་ལ་རང་སྔགས་ཀྱིས་ཅི་རིགས་པ་དབུལ་ལོ། །དེ་ནས་རྩ་བའི་རིག་པས་རིགས་དྲུག་བཀུག་ལ་ཅི་རིགས་པར་སྦྱིན་ནོ། །དེ་ནས་ཡང་མེ་ལྷ་ཉིད་ལ་ཅི་རིགས་པར་སྦྱིན་པར་བྱའོ། །མཇུག་གི་བྱ་བ་ནི་མེ་ལྟར་འབར་བ་ལས། དེ་ཡི་ལུས་ལ་དབང་བསྐུར་ཞིང་། །མཉམ་པར་བཞག་པས་བསྲུངས་ནས་ཀྱང་། །མཇུག་ཏུ་མངོན་པར་མཆོད་ནས་ནི། །ལྷ་རྣམས་ཐམས་ཅད་གཤེགས་སུ་གསོལ། །ཞེས་འབྱུང་བ་སྟེ་དེའི་དོན་ནི་འདི་ཡིན་ཏེ། སྦྱིན་སྲེག་རྫོགས་པ་དང་། བསྒྲུབ་བྱ་ལ་ཅི་རིགས་པར་དབང་བསྐུར་ལ། མེ་ལྟར་འབར་བའི་སྔགས་ཀྱི་བསྲུང་བ་བྱས་ལ་ལྷ་ཐམས་ཅད་ལ་ཅི་འབྱོར་པས་མཆོད་དེ། ཡི་གེ་བརྒྱ་པ་བརྗོད་དེ་ཆོ་ག་ལྷག་ཆད་ཁ་བསྐང་ཏེ་གཤེགས་སུ་གསོལ་བར་བྱའོ། །དེ་ལྟར་ན་སྦྱིན་སྲེག་དབང་དང་འབྲེལ་བར་བྱེད་ན། ལྷ་བསྒྲུབས་ནས་མཆོད་པའི་སྐབས་སུ་སྦྱིན་སྲེག་བྱས་ལ་གདོད་དབང་བསྐུར་བ་དང་། བཟླས་པ་དང་ཕྱིར་ཟློག་ལ་སོགས་པ་བྱ་བའམ། མཇུག་ཏུ་སྦྱིན་སྲེག་བྱས་ལ་མཇུག་གི་བྱ་བ་གང་རུང་ཡིན་ནོ། །དགོས་པ་ནི་ཀུན་རིག་ནས། དེ་ཡི་མིང་ནས་བརྗོད་ནས་ཀྱང་། །མཁས་པས་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་རྙེད་དུ། །སྦྱིན་སྲེག་བྱས་པར་གྱུར་པ་ནི། །དམྱལ་བ་ཆེན་པོར་གྱུར་པ་འདི། །སྡིག་པ་དེ་ལས་ཐར་བར་འགྱུར། །ཞེས་བྱ་བ་དང་། སྡིག་པ་བྱང་བའི་རྟགས་ཀྱང་། ཡང་ན་ཧོཾ་ཁུང་ནང་དུ་ནི། །མེ་ཡིས་ལྟས་ནི་སྟོན་པར་འགྱུར། །དཀར་པོ་ཉིད་དང་གཡས་སུ་འཁྱིལ། །ཞེས་བྱ་བ་ལ་སོགས་པ་གསུངས་སོ། །སྤོགས་ཆོག་ནི་བདག་མེད་བསྒོམ་པའོ། །ཞི་བའི་སྦྱིན་སྲེག་གོ །ལས་འོག་མ་གསུམ་པོ་ལ་མི་འདྲ་བའི་ཁྱད་པར་བག་ཙམ་རེ་བཤད་པས་རྟོགས་པར་འགྱུར་བས་དེ་བརྗོད་པར་བྱའོ། རྗེས་མ། >>>
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།