དབང་དང་རིམ་གཉིས་ལས་མ་བྱུང་བའི་ཕྱག་ཆེན་འདོད་པ་སོགས་མང་དུ་སྣང་མོད་ཀྱི། སྔར་གཞི་དབུ་མའི་སྐབས་སུའང་དཔྱད་ཟིན་ཅིང་འགའ་ཞིག་ནི་སྡོམ་གསུམ་ཁ་སྐོང་དུའང་དགག་པར་བཤད་ཟིན་ཏོ། །གཉིས་པ་རང་གི་ལམ་ངོས་གཟུང་བ་ནི་མགོན་པོ་བྱམས་པས་མངོན་པར་རྟོགས་པའི་རྒྱན་ལས། མཁྱེན་གསུམ་ཐོས་བསམ་གྱིས་གཏན་ལ་ཕབ་པའི་དོན་སྦྱོར་བཞིས་ཉམས་སུ་བླངས་པ་ལས་འབྲས་བུ་ཆོས་སྐུ་སྐུ་གསུམ་གྱིས་བསྡུས་པ་འབྱུང་བའི་ལམ་གྱི་རྣམ་གཞག་གསུངས་པ་དང་། མདོ་སྡེ་རྒྱན་དུ། རིགས་དང་ཆོས་ལ་མོས་པ་དང་། །དེ་བཞིན་སེམས་ནི་བསྐྱེད་པ་དང་། །སྦྱིན་ལ་སོགས་པ་བསྒྲུབ་པ་དང་། །སྐྱོན་མེད་པ་ལ་འཇུག་ཉིད་དང་། །སེམས་ཅན་རྣམས་ཡོངས་སྨིན་བྱེད་དང་། །ཞིང་ནི་རྣམ་པར་སྦྱོང་བ་དང་། །མི་གནས་མྱ་ངན་འདས་པ་དང་། །བྱང་ཆུབ་མཆོག་དང་སྟོན་པའོ། །ཞེས་ལམ་དང་འབྲས་བུའི་རྣམ་གཞག་བཅུ་གསུངས་ཤིང་། དེ་ཉིད་དབུས་མཐར། མ་ཚང་མེད་དང་མི་སྤོང་དང་། །ཞེས་སོགས་ཀྱི་སྟོན་པ་དང་། ཡང་གཞུང་དེ་ཉིད་ལས། སྒྲུབ་པ་བླ་ན་མེད་པ་དང་། དམིགས་པ་བླ་ན་མེད་པ་དང་། ཡང་དག་འགྲུབ་པ་བླ་ན་མེད་པ་གསུམ་གྱི་ཐེག་པ་ཆེན་པོའི་ལམ་མཐའ་དག་བསྡུས་པར་གསུངས་པ་དང་། ཆོས་དང་ཆོས་ཉིད་རྣམ་འབྱེད་དུ་དམིགས་པ་ཆོས་ཐམས་ཅད་དང་། གསུང་རབ་ཡན་ལག་བཅུ་གཉིས་གཏན་ལ་ཕབ་ནས་ངེས་པར་འབྱེད་པ་དང་། རེག་པ་དང་། རྗེས་སུ་དྲན་པ་དང་། དེའི་བདག་ཉིད་དུ་སོན་པའི་ལམ་བགྲོད་ཚུལ་གསུངས་པ་དང་། རྒྱུད་བླར་ཐེག་ཆེན་གྱི་ཆོས་ལ་མོས་པ་དང་། བདག་མེད་རྟོགས་པའི་ཤེས་རབ་དང་། བསམ་གཏན་དང་། སྙིང་རྗེ་དང་བཞི་ཉམས་སུ་བླངས་པས་ས་དང་པོའི་རྒྱལ་བའི་སྲས་འབྱུང་བའི་ལམ་གསུངས་པ་རྣམས་ནི་བྱམས་ཆོས་ནས་འབྱུང་བའི་ལམ་གྱི་རྣམ་བཞག་གོ །མགོན་པོ་ཀླུ་སྒྲུབ་ཀྱིས་རིན་ཆེན་ཕྲེང་བར། གང་ཞིག་བདག་དང་གཞན་རྣམས་ནི། །བླ་མེད་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐས་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས། །ཞེས་ཆོས་གསུམ་གྱི་ཐེག་པ་ཆེན་པོའི་ཉམས་ལེན་ཐམས་ཅད་བསྡུས་པར་གསུངས་ཤིང་། དེ་ཉིད་དཔལ་ལྡན་ཟླ་བས། སོ་སྐྱེའི་གནས་སྐབས་སུ་ཆོས་གསུམ་ཉམས་སུ་བླངས་པས་ས་དང་པོར་བྱང་ཆུབ་སེམས་དཔའི་གནས་སྐབས་ཐོབ་ལ། དེ་ནས་ས་བཅུའི་མཉམ་གཞག་ངོ་བོ་ལ་ཁྱད་པར་མེད་ཀྱང་སྤང་བྱ་སྤོང་བའི་ནུས་པ་སོགས་དང་། རྗེས་ཐོབ་ཏུ་ཕར་ཕྱིན་ལ་གཙོ་བོར་སྤྱོད་པའི་ཁྱད་པར་གྱིས་འཕགས་པའི་ལམ་ཐམས་ཅད་བགྲོད་པར་བྱས་ནས་སངས་རྒྱས་ཀྱི་གནས་སྐབས་ཐོབ་པའི་རྣམ་གཞག་གསུངས་སོ། །ཆོས་གསུམ་ཉམས་སུ་ལེན་པའི་གོ་རིམ་ལ། དབུ་མ་རྒྱན་ལས། དབང་པོ་རྣོ་རྟུལ་གྱི་འཇུག་ཚུལ་གཉིས་གསུངས་པ་དང་མཐུན་པར་ཐོག་མར་གཉིས་སུ་མེད་པའི་ཡེ་ཤེས་གཏན་ལ་ཕབ་ནས་དེ་མ་རྟོགས་པའི་སེམས་ཅན་ལ་སྙིང་རྗེ་བསྐྱེད་དེ། དེའི་འོག་ཏུ་སེམས་བསྐྱེད་པ་ལ་འཇུག་པའི་ཚུལ་དང་། ཡང་ཐོག་མར་སེམས་ཅན་ཐམས་ཅད་མར་ཤེས་ནས་ཕན་པར་སྒྲུབ་པར་འདོད་པའི་བྱམས་པས་ཀུན་ནས་སློང་བའི་སྙིང་རྗེ་བསྐྱེད་དེ། སེམས་བསྐྱེད་ནས་དེའི་འོག་ཏུ་གཉིས་སུ་མེད་པའི་ཡེ་ཤེས་གཏན་ལ་ཕབ་པའི་ཚུལ་གཉིས་ཡོད་པར་དམ་པ་གོང་མ་དག་བཞེད་པ་ལྟར་དོན་ལའང་གནས་སོ། །རྨ་བྱས་འདི་གཉིས་ལ་མཁས་པ་པཎྜི་ཏའི་འཇུག་ཚུལ་དང་། རྣལ་འབྱོར་ཀུ་ས་ལི་པའི་འཇུག་ཚུལ་ཞེས་པའི་ཐ་སྙད་ཀྱང་མཛད་དོ། །ཡང་རིན་ཆེན་ཕྲེང་བར། ཐེག་པ་ཆེན་པོ་འདི་ལ་ནི། །སྙིང་རྗེ་སྔོན་བཏང་སྤྱོད་པ་དང་། །ཡེ་ཤེས་དྲི་མ་མེད་བཤད་པ། །སེམས་ཡོད་སུ་ཞིག་དེ་ལ་སྨོད། །ཅེས་གསུངས་པའང་སྔ་མའི་དོན་ཡིན་ཞིང་། དེ་ཉིད་སྤྱོད་འཇུག་ལས། བྱང་ཆུབ་སེམས་དཔའི་སྤྱོད་པ་ཐམས་ཅད་སྦྱིན་སོགས་ཕ་རོལ་ཏུ་ཕྱིན་པ་དྲུག་གིས་བསྡུས་པར་གསུངས་པ་དང་ཡང་གནད་འདྲའོ། །མདོར་བསྡུས་ན། རིགས་པ་དྲུག་ཅུ་པར། བསོད་ནམས་ཡེ་ཤེས་ཚོགས་བསགས་ཏེ། །ཞེས་ཚོགས་གཉིས་སུ་འདུས་པར་གསུངས་པ་ནི་ལམ་དབུ་མའི་ངོ་བོའོ། །གསུམ་པ་དེའི་ཉམས་ལེན་ཞིབ་ཏུ་བཤད་པ་ནི་དམ་པ་གོང་མ་དག་ལ་བརྒྱུད་པའི་བཀའ་སྲོལ་མང་དུ་སྣང་ཡང་འདིར་ཉམས་ལེན་གདམས་པའི་བཀའ་བབས་པ་ཇོ་བོ་རྗེ་ལྷ་གཅིག་གིས་བཞེད་པ་ལྟར་བཤད་པ་ལ་གསུམ་སྟེ། རྟེན་ལ་སྐྱབས་སུ་འགྲོ་བ་དང་། ལམ་རྗེས་སུ་བསྒྲུབ་པ་དང་། ལམ་དེས་ངེས་པར་འབྱུང་བའི་ཚུལ་ལོ། །དང་པོ་ལའང་གང་གིས་གང་ལ། ཇི་ལྟར་སྐྱབས་སུ་འགྲོ་བའི་ཚུལ་གསུམ་ལས། གང་ཟག་གང་གིས་སྐྱབས་སུ་འགྲོ་བ་ནི་ཐེག་པ་ཆེན་པོའི་རིགས་སད་པའི་གང་ཟག་གིས་སོ། །རྒྱུ་མཚན་གང་གིས་སྐྱབས་སུ་འགྲོ་བ་ནི། གཞན་དོན་དུ་སངས་རྒྱ་བའི་ཐབས་ཚོལ་བའི་བསམ་པ་སྟེ། བདག་ཉིད་འཁོར་བའི་སྡུག་བསྔལ་ལས་ཐར་ནས་མར་གྱུར་པའི་སེམས་ཅན་ཐམས་ཅད་ཀྱང་སྡུག་བསྔལ་དེ་དག་ལས་བསྒྲལ་བར་བྱ་དགོས་ལ། དེ་ལྟར་ནུས་པའང་རྫོགས་པའི་སངས་རྒྱས་ལས་གཞན་མེད་པས་དེ་ལ་སྐྱབས་འཆའ་སྙམ་པ་དང་། དེའི་དོན་ཡང་དེའི་གོ་འཕང་ཐོབ་པ་ཡིན་པར་ཤེས་པ་ཡིན་པའི་ཕྱིར་ཏེ། ཇི་སྐད་དུ། འདི་ནི་དེ་དངོས་འདོད་པས་ཁས་ལེན་དེ་ཡང་སྙིང་བརྩེ་ལས་རིག་བྱ། །ཞེས་འབྱུང་བ་ལྟར་རོ། །རྒྱུ་དེས་གང་ལ་སྐྱབས་སུ་འགྲོ་བའི་ཡུལ་ནི་ཐོབ་བྱ་འབྲས་བུའི་སྐྱབས་འགྲོ། ཡུལ་བདག་གཞན་གྱི་དོན་ཡོངས་སུ་རྫོགས་པ་མཐར་ཐུག་གི་དཀོན་མཆོག་གསུམ་རང་རྒྱུད་ལ་འབྱུང་བ་དང་། བརྟེན་པ་རྒྱུའི་སྐྱབས་འགྲོ་ཡུལ་སངས་རྒྱས་གཞན་རྒྱུད་ལ་གྲུབ་ཟིན་པ་དང་། ཐེག་པ་ཆེན་པོའི་ཆོས་འགོག་ལམ་གྱིས་བསྡུས་པ་དང་། བྱང་ཆུབ་སེམས་དཔའི་དགེ་འདུན་རྣམས་ལ་བརྟེན་པའོ། །རྒྱུ་དེས་ཡུལ་གང་ལ་ཚུལ་ཇི་ལྟར་སྐྱབས་སུ་འགྲོ་བ་ནི་སྦྱོར་དངོས་རྗེས་གསུམ་གྱི་ཆོ་གའི་སྒོ་ནས་བྱང་ཆུབ་སྙིང་པོའི་བར་དུ་གཞན་རྒྱུད་ལ་གྲུབ་ཟིན་པའི་དཀོན་མཆོག་གསུམ་ལ་ལམ་སྟོན་པ་དང་། ལམ་དངོས་དང་། ལམ་སྒྲུབ་པའི་ཟླ་གྲོགས་ཞུས་ནས། རང་རྒྱུད་ལ་འབྱུང་བའི་དཀོན་མཆོག་གསུམ་སྒྲུབ་པར་ཁས་བླངས་པའོ། །དེ་དག་གི་བསླབ་བྱ་ལ་ཐུན་མོང་གི་བསླབ་བྱ་ཅི་ཟ་བའི་ཕུད་ཀྱིས་མཆོད་པ་ལ་བརྩོན་པ་དང་། ཡོན་ཏན་དྲན་པས་དུས་དྲུག་ཏུ་སྐྱབས་འགྲོ་བྱ་བ་དང་། བྱ་དགའ་དང་སྲོག་གི་ཕྱིར་ཡང་སྐྱབས་འགྲོ་མི་གཏོང་བ་གསུམ་དང་། སོ་སོའི་བསླབ་བྱ་ལྷ་གཞན་ལ་ཕྱག་མི་འཚལ་བ་དང་། སེམས་ཅན་ལ་འཚེ་བ་མི་བྱ་བ་དང་། གྲོགས་མུ་སྟེགས་ཅན་མི་བསྟེན་པ་གསུམ་དང་། སངས་རྒྱས་པ་ཙམ་གྱི་བསླབ་བྱ་དོ་གལ་ཅི་བྱུང་ཡང་ཐབས་གཞན་མི་བཙལ་བ་དང་། ཕྱོགས་གང་དུ་འགྲོ་བའི་སངས་རྒྱས་ལ་ཕྱག་འཚལ་བ་སྟེ། དེ་ལྟར་བརྒྱད་ལ་བསླབ་ཅེས་གསུངས་སོ། །དེ་ལྟར་སྐྱབས་སུ་འགྲོ་བ་ཁྱད་པར་ཅན་བྱས་ནས་སྤྱི་དོན་གཉིས་པ་ཐེག་པ་ཆེན་པོའི་ལམ་རྗེས་སུ་བསྒྲུབ་པ་ལ་གཉིས་ཏེ། རྫོགས་པའི་སངས་རྒྱས་ཀྱི་རྒྱུ་ཉིད་ངོས་གཟུང་བ་དང་། དེ་ཇི་ལྟར་བསྒྲུབ་པའི་ཚུལ་ལོ། །དང་པོ་ལ་གསུམ་སྟེ། མཚན་ཉིད་ངོས་གཟུང་བ་དང་། དེའི་རང་བཞིན་བཤད་པ་དང་། དེའི་རྣམ་གྲངས་བསྟན་པའོ། །དང་པོ་ནི་བདེན་པ་གཉིས་ཀྱི་ཆོས་དང་། སེམས་ཅན་དང་སངས་རྒྱས་ལ་དམིགས་པའི་བསམ་པ་དང་། སྦྱོར་བ་དང་ཡོངས་སུ་བསྔོ་བ་གསུམ་ཡིན་ནོ། །གཉིས་པ་ལ་གསུམ་ལས། བསམ་པ་ནི་འདིར་དམིགས་པ་མེད་པའི་སྙིང་རྗེས་ཀུན་ནས་བསླངས་པའི་འབྲས་བུ་ལ་སྨོན་པའི་བྱང་ཆུབ་ཀྱི་སེམས་ཡིན་པས་དེའང་ངོ་བོ་དང་། རྒྱུ་དང་། འབྲས་བུ་གསུམ་གྱིས་ཤེས་པར་བྱའོ། །ངོ་བོ་ངོས་གཟུང་བ་ལའང་། མཚན་ཉིད་ནི་མགོན་པོ་བྱམས་པས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པ་ལྟར་ཁྱད་པར་གསུམ་ལྡན་ནོ། །དེའི་དབྱེ་བ་ལ་ངོ་བོའི་སྒོ་ནས་སྨོན་འཇུག་གཉིས། ཡུལ་གྱི་སྒོ་ནས་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་ཕྲ་རགས་ཀྱི་སྒོ་ནས་བརྡ་ལས་བྱུང་བ་དང་། ཆོས་ཉིད་ཀྱིས་ཐོབ་པའི་སེམས་བསྐྱེད་གཉིས། ས་མཚམས་ཀྱི་སྒོ་ནས་མོས་པ་དང་། ལྷག་བསམ་རྣམ་པར་དག་པ་དང་། རྣམ་པར་སྨིན་པ་དང་། སྒྲིབ་པ་སྤངས་པའི་སེམས་བསྐྱེད་བཞི། ཆེ་བ་དཔེའི་སྒོ་ནས་ས་དང་གསེར་ལྟ་བུ་ལ་སོགས་པའི་ཉི་ཤུ་རྩ་གཉིས་ཡིན་ནོ། །གཉིས་པ་དེའི་རྒྱུ་ལ་འཐོབ་པའི་རྒྱུ་ནི་ཆགས་པའི་རྟེན་དང་། སྐྱེ་བའི་རྒྱུ་གཉིས་ཡིན་ནོ། །དང་པོ་ལ་ལུས་རྟེན་ནི་དབུ་མ་པ་ལྟར་ན་སངས་རྒྱས་ཀྱིས་བྱིན་གྱིས་བརླབས་པ་དང་། ཆོས་ཟབ་མོ་ཐོབ་པའི་སྟོབས་ཀྱིས་ལྷ་དང་ཀླུ་ལ་སོགས་པ་ལའང་སྐྱེ་བར་བཞེད་ལ། བསམ་པའི་རྟེན་ནི་སྐྱབས་འགྲོ་ཁྱད་པར་ཅན་ནོ། །གཉིས་པ་སྐྱེ་བའི་རྒྱུ་ནི་ཆོས་བཅུ་པའི་མདོ་ལས། དགེ་བའི་བཤེས་གཉེན་གྱིས་བསྐུལ་བ་དང་། སེམས་ཅན་སྡུག་བསྔལ་བར་མཐོང་བ་དང་། སངས་རྒྱས་ཀྱི་ཆེ་བའི་ཡོན་ཏན་མཐོང་བ་དང་། སེམས་བསྐྱེད་ཀྱི་ཕན་ཡོན་མཐོང་བ་སྟེ་བཞི་ཡིན་པར་གསུངས་པ་དང་། དཀོན་མཆོག་སྒྲོན་མེའི་མདོ་ལས། རྒྱུ་དུ་མ་གསུངས་པ་ཐམས་ཅད་སློབ་དཔོན་ཐོགས་མེད་ཀྱིས་ཕྱོགས་གཅིག་ཏུ་བསྡུས་ནས་རིགས་ཕུན་སུམ་ཚོགས་པ་དང་། དགེ་བའི་བཤེས་གཉེན་གྱིས་བསྐུལ་བ་དང་། སྙིང་རྗེ་ཆེ་བ་དང་། འཁོར་བའི་སྡུག་བསྔལ་གྱིས་མི་འཇིགས་པ་སྟེ་རྒྱུ་བཞི་དང་། སངས་རྒྱས་དང་བྱང་ཆུབ་སེམས་དཔའི་ཡོན་ཏན་ལ་མོས་པ་དང་། ཐེག་པ་ཆེན་པོའི་སྡེ་སྣོད་ཐོས་པ་དང་། བྱང་ཆུབ་སེམས་དཔའི་ཆོས་ནུབ་ཏུ་ཉེ་བར་མཐོང་བ་དང་། སེམས་ཅན་ཉོན་མོངས་པ་མཐོང་བ་སྟེ། རྐྱེན་བཞི་དང་། རང་དང་གཞན་གྱིས་བསམ་པ་དང་སྦྱོར་བའི་སྟོབས་བཞི་སྟེ་བཅུ་གཉིས་སུ་གསུངས་ལ། ཇོ་བོ་ནི་རྒྱུ་ཁ་ཡར་བ་དང་བརྒྱུད་པའི་རྒྱུ་ཙམ་ནི་མཐའ་ཡས་ལ་ཚོགས་པ་ཚང་བ་དངོས་ཀྱི་རྒྱུ་ནི། ཆོས་བཅུ་པའི་མདོ་ལས་གསུངས་པའི་བཞི་པོ་ཁོ་ན་ལ་མཛད་གསུང་ངོ་། །གསུམ་པ་འབྲས་བུ་བསྟན་པ་ལ་གཉིས་ལས་ཐོབ་པ་ཕན་ཡོན་གྱི་འབྲས་བུ་ནི་གསུམ་དུ་འདུས་པ་ཡིན་ཏེ། མིང་དང་དོན་འཕོ་བས་རྟེན་ཁྱད་པར་དུ་འགྱུར་བ་དང་། དམ་པ་རྣམས་ཀྱིས་བསྟོད་པ་དང་། བསོད་ནམས་རྒྱ་ཆེན་པོ་ཐོབ་པའི་སྒོ་ནས་སྐྱེས་ཐོབ་ཀྱི་འབྲས་བུ་ངོ་མཚར་བ་དང་། འགྲོ་བའི་བཤེས་སུ་འགྱུར་བ་དང་། སངས་རྒྱས་ཐམས་ཅད་མཉེས་པར་འགྱུར་བ་དང་། བདག་གི་དོན་ཐམས་ཅད་འགྲུབ་པའི་ཚུལ་གྱིས་གནས་སྐབས་ཀྱི་འབྲས་བུ་རྒྱ་ཆེ་བ་དང་། འབྲས་བུ་ལ་འདུན་པ་ཉིད་དང་། བསམ་པས་སྦྱོར་བ་ལ་འཇུག་པ་དང་། བསམ་སྦྱོར་གྱིས་ཚོགས་རྒྱ་ཆེན་པོ་གསོག་པའི་སྒོ་ནས་མཐར་ཐུག་གི་འབྲས་བུ་མྱུར་དུ་ཐོབ་པ་སྟེ། འབྲས་བུ་དེ་ཉིད་ལ་གཞུང་ལས་ཡིད་བཞིན་གྱི་ནོར་བུ་དང་། དུས་མཐའི་མེ་ལ་སོགས་པའི་དཔེའི་རྣམ་གྲངས་དུ་མས་བསྟན་པ་ཡིན་ནོ། །གཉིས་པ་ཉམས་པ་ཉེས་དམིགས་ཀྱི་འབྲས་བུའང་གསུམ་སྟེ། བསམ་པའི་སྟོབས་མེད་པས་སྦྱོར་བའི་བསོད་ནམས་རྒྱ་ཆེན་པོ་ལས་ཉམས་པ་དང་། ཐམས་ཅད་བསྒྲལ་བར་ཁས་བླངས་པ་ཉམས་པས་དམ་པ་རྣམས་ཀྱིས་སྨད་པ་དང་། ཉེས་པ་ལྕི་བས་ངན་འགྲོར་ལྟུང་བར་གསུངས་པའོ། །དེ་ལྟར་ངོ་བོ་དང་། རྒྱུ་དང་། འབྲས་བུ་གསུམ་གྱིས་བསམ་པ་བཤད་ཟིན་ཏོ། །གཉིས་པ་སྦྱོར་བ་ལ་ཁྱད་པར་ཅན་ནི་ཕ་རོལ་ཕྱིན་པ་དྲུག་སྟེ། འདི་ལ་ངོ་བོ་ངོས་གཟུང་བ་དང་། དེའི་ངེས་པར་བསམ་པ། འབྲས་བུ་བསྟན་པ་དང་གསུམ་གྱིས་ཤེས་པར་བྱའོ། །དང་པོ་ལ་སྦྱིན་པ་ནི། གཏོང་བའི་སེམས་པ་མཚུངས་ལྡན་དང་བཅས་པ་སྟེ། དབྱེ་ན་ཟང་ཟིང་དང་མི་འཇིགས་པ་དང་། ཆོས་ཀྱི་སྦྱིན་པ་གསུམ་མོ། །ཚུལ་ཁྲིམས་ནི་ཁ་ན་མ་ཐོ་བ་སྤོང་བའི་སེམས་པ་སྟེ། དབྱེ་ན་ཉེས་སྤྱོད་སྡོམ་པ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་མོ། །བཟོད་པ་ནི་སྲན་ཐུབ་པའི་སེམས་པ་སྟེ། དབྱེ་ན་གནོད་བྱེད་ཀྱིས་མི་འབྱེད་པ་དང་། སྡུག་བསྔལ་དང་དུ་ལེན་པ་དང་། ཆོས་ལ་ངེས་པར་སེམས་པའི་བཟོད་པ་གསུམ་མོ། །བརྩོན་འགྲུས་ནི་དགེ་བ་ལ་སྤྲོ་བའི་སེམས་པ་སྟེ། དབྱེ་ན་གོ་ཆ། སྦྱོར་བ། ཆོག་པར་མི་འཛིན་པའི་བརྩོན་འགྲུས་གསུམ་མོ། །བསམ་གཏན་ནི་དམིགས་པ་རྩེ་གཅིག་པ་སྟེ། དབྱེ་ན་མཐོང་ཆོས་ལ་བདེ་བར་གནས་པ་དང་། ཡོན་ཏན་མངོན་པར་བསྒྲུབ་པ་དང་། གཞན་གྱི་དོན་བྱེད་པའི་བསམ་གཏན་གསུམ་མོ། །ཤེས་རབ་ནི་དོན་དམ་ཤེས་པ་སྟེ། དབྱེ་ན་རྣམ་པར་མི་རྟོག་པའི་སྦྱོར་དངོས་རྗེས་གསུམ་གྱིས་བསྡུས་པའི་ཤེས་རབ་གསུམ་མོ། །འདི་དག་ཀྱང་མི་མཐུན་ཕྱོགས་ཉམས་པ་སོགས་ཆོས་བཞི་དང་ལྡན་ན་ཕ་རོལ་ཏུ་ཕྱིན་པར་འགྱུར་བར་མདོ་སྡེ་རྒྱན་ལས་གསུངས་སོ། །ཅིའི་ཕྱིར་ཕ་རོལ་ཏུ་ཕྱིན་པ་ཞེས་བྱ་ཞེ་ན། པཱ་ར་མི་ཏ་ཞེས་པ་དམ་པ་དང་། རབ་དང་། མཆོག་དང་། ཕ་རོལ་ཏུ་ཕྱིན་པ་རྣམས་ལ་འཇུག་པས་དགེ་བའི་ཆོས་དམ་པ་དང་། རབ་དང་། མཆོག་ཀྱང་ཡིན་ལ། བགྲོད་པར་བྱེད་པའམ་བགྲོད་བྱ་མཐར་ཐུག་པས་ན་ཕྱིན་པ་ཞེས་བྱའོ། །དེ་ལ་དམ་པར་འཇོག་པ་ནི་ཀུན་བཏུས་ཀྱི་འགྲེལ་པ་ངོ་བོ་ཉིད་དང་། ཐབས་དང་། འབྲས་བུ་དམ་པ་གསུམ་དང་ལྡན་པར་བཤད་པ་དང་། དགོངས་འགྲེལ་ལས། མ་ཆགས་པ་དང་མི་ལྟ་བ་དང་། ཁ་ན་མ་ཐོ་བ་མེད་པ་དང་མི་རྟོག་པ་དང་། བསྔོ་བ་དམ་པ་སྟེ་ལྔ་དང་ལྡན་པར་བཤད་པ་དང་། ཐེག་བསྡུས་ལས། གནས་དང་དངོས་པོ་དང་ཆེད་དུ་བྱ་བ་དང་ཐབས་ལ་མཁས་པ་དང་། ཡོངས་སུ་བསྔོ་བ་རྣམ་པར་དག་པ་དམ་པ་སྟེ་དམ་པ་དྲུག་དང་ལྡན་པར་བཤད་པ་དང་། དབུས་མཐའ་ལས། རྒྱ་ཆེ་བ་དང་ཡུན་རིང་དང་། །ཆེད་དུ་བྱ་དང་མི་ཟད་དང་། །རྒྱུན་མི་ཆད་དང་ཚེགས་མེད་དང་། །དབང་འབྱོར་བ་དང་ཡོངས་གཟུང་དང་། །རྩོམ་དང་འཐོབ་དང་རྒྱུ་མཐུན་དང་། །འགྲུབ་པ་དམ་པར་འདོད་པ་ཡིན། །ཞེས་དམ་པ་བཅུ་གཉིས་དང་ལྡན་པར་བཤད་པ་དང་། གཞན་ཡང་གསེར་འོད་དམ་པའི་མདོ་ལས། དམ་པ་ཉི་ཤུ་དང་ལྡན་པ་སོགས་ཀྱང་བཤད་དོ། །གཉིས་པ་དེ་དག་གི་ངེས་པ་ལ་གྲངས་ངེས་པ་དང་། གོ་རིམ་ངེས་པ་དང་། ཕན་ཚུན་ངེས་པ་གསུམ་ལས། དང་པོ་ནི། རྒྱུད་བླར་སངས་རྒྱས་བསྒྲུབ་པ་ལ་རི་མོ་མཁན་གྱིས་དཔེས་ངེས་པའི་ཚུལ་བཤད་པ་དང་། མདོ་སྡེ་རྒྱན་དུ། མངོན་མཐོ་དང་ངེས་ལེགས་བསྒྲུབ་པ་ལ་དྲུག་ཏུ་ངེས་པ་སོགས་ཚུལ་ལྔ་བཤད་དེ་དེ་དག་ཏུ་བལྟ་བར་བྱའོ། །གཉིས་པ་ནི། སྔ་མ་ལས་ཕྱི་མ་འབྱུང་བ་རྒྱུ་འབྲས་དོན་གྱི་རིམ་པ་དང་། རྟོགས་སླ་བ་དང་དཀའ་བ་རགས་པ་དང་ཕྲ་བའི་རིམ་པ་དང་། དམན་པ་དང་མཆོག་གི་རིམ་པ་གསུམ་མོ། །གསུམ་པ་ནི་འདི་དག་རེ་རེའི་ནང་དུ་དྲུག་དྲུག་ཚང་བ་ངོ་བོ་ཉིད་ཀྱིས་ངེས་པ་དང་། རེ་རེ་བྱེད་པ་ལ་དྲུག་ཅར་ཚང་བས་སྦྱོར་བ་ལ་ངེས་པ་དང་། རེ་རེ་བྱས་པས་དྲུག་ཅར་སྐྱེ་བས་རྒྱུ་མཚན་གྱིས་ངེས་པ་ཡིན་ནོ། །གསུམ་པ་འབྲས་བུ་ལ་སོ་སོའི་འབྲས་བུ་དང་། ཐུན་མོང་གི་འབྲས་བུ་གཉིས་ལས། དང་པོ་ལ་རེ་རེ་ལའང་འབྲས་བུ་ལྔ་ལྔ་སྟེ། སྐྱེས་བུ་བྱེད་པའི་འབྲས་བུ་བདག་གཞན་ལ་ཕན་པ་དང་། བདག་པོའི་འབྲས་བུ་བསོད་ནམས་འབྱུང་བ་དང་། བྲལ་བའི་འབྲས་བུ་སེར་སྣ་ལ་སོགས་པའི་མི་མཐུན་པའི་ཕྱོགས་སྤོང་པ་དང་། རྣམ་སྨིན་གྱི་འབྲས་བུ་ལོངས་སྤྱོད་སོགས། རྒྱུ་མཐུན་གྱི་འབྲས་བུ་གཏོང་བ་སོགས་སྔོན་གྱི་ལས་དེ་བྱེད་པར་འགྱུར་བའོ། །ཐུན་མོང་གི་འབྲས་བུ་ནི་ཐམས་ཅད་ཀྱང་ཡོངས་སུ་བསྔོ་བས་བསྒྱུར་ན་རྒྱ་མཚོ་ཆེན་པོའི་ཆུ་ལྟར་རྫོགས་པའི་བྱང་ཆུབ་ཉིད་དུ་རོ་གཅིག་ཏུ་འགྱུར་བའོ། །གསུམ་པ་ཡོངས་སུ་བསྔོ་བ་ནི་བསགས་པའི་དགེ་བ་འདོད་པའི་དོན་དུ་བསྒྱུར་བ་སྟེ། དེ་ལའང་བཞི་ལས། བསྔོ་བྱའི་དངོས་པོ་ནི་ཚོགས་གཉིས་ཀྱིས་བསྡུས་པའི་དགེ་བ་སྔར་བྱས་པ་ཐམས་ཅད་དང་། ད་ལྟ་བྱེད་བཞིན་པ་དང་། མ་འོངས་པ་ན་བྱ་བར་བསམ་པ་ཐམས་ཅད་བློས་བསྡུས་ནས་སོ། །བསྔོ་བྱེད་ཀྱི་བློ་ནི་བསྔོ་བའི་གནས་ཇི་ལྟ་བ་ཤེས་པའི་ཤེས་རབ་དང་སེམས་པ་དང་འདུན་པ་མཚུངས་ལྡན་དང་བཅས་པའོ། །གང་དུ་བསྔོ་བའི་གནས་ནི་སེམས་ཅན་ཐམས་ཅད་བསྒྲལ་བའི་ཆེད་དུ་རང་གཞན་གྱི་དོན་ཡོངས་སུ་རྫོགས་པ་རྫོགས་པའི་སངས་རྒྱས་ཀྱི་སའོ། །ཇི་ལྟར་བསྔོ་བའི་ཚུལ་ནི། དཀོན་མཆོག་གི་རྟེན་དངོས་སུ་བཞུགས་པའམ་ཡིད་ཀྱིས་བསམ་པའི་དྲུང་དུ་ཕྱག་དང་མཆོད་པ་སོགས་ཡན་ལག་དང་པོ་དྲུག་སྔོན་དུ་བཏང་ནས་སྨོན་ལམ་ཆེན་པོ་འབུམ་ཕྲག་གྲངས་མེད་བཅུ་འདུས་པ་བཟང་པོ་སྤྱོད་པའི་སྨོན་ལམ། དེ་ཐམས་ཅད་འདུས་པ་སྨོན་ལམ་ཆེན་པོ་བཅུའམ། གཞན་ཡང་བཀའ་དང་བསྟན་བཅོས་ཀྱི་ཚིག་དྲི་མ་མེད་པ་བརྗོད་པའི་སྒོ་ནས་བསྔོ་བར་བྱའོ། །དེའང་དགེ་བ་བྱེད་པ་ཉིད་ནས་སྣང་ལ་རང་བཞིན་མེད་པར་ཤེས་པ་རྨི་ལམ་ལྟ་བུའི་བློས་ཟིན་པའམ། བསྔོས་ཟིན་པའི་རྗེས་སུ་ཡང་བསྔོ་བྱ་བསྔོ་བྱེད་སོགས་ཐམས་ཅད་མི་དམིགས་པ་ནམ་མཁའ་ལྟ་བུར་ཤེས་པའི་བློས་ཟིན་ན་བསྔོ་བ་རྣམ་དག་ཏུ་འགྱུར་བ་ཡིན་ནོ། །གསུམ་པ་དེའི་རྣམ་གྲངས་བསྟན་པ་ནི་དེ་ལྟར་བསམ་པ་བྱང་ཆུབ་ཀྱི་སེམས་ཀྱིས་འཕངས་ནས་སྦྱོར་བ་ཕ་རོལ་ཕྱིན་པ་དྲུག་ལྡན་དང་། རྗེས་ཡོངས་སུ་བསྔོ་བ་གསུམ་གྱིས་ཐེག་པ་ཆེན་པོའི་ལམ་མཐའ་དག་བསྡུས་པར་ཇོ་བོ་རྗེས་བཞེད་ལ། དེ་ཉིད་གཞུང་དག་ལས་དགོས་པའི་དབང་གིས་ལྡོག་པ་ཐ་དད་པའི་ཚུལ་གྱིས་རྣམ་གྲངས་གཞན་གྱིས་བསྟན་པ་ནི། རྣམ་བཤད་རིགས་པར་ཚངས་པར་སྤྱོད་པ་ཞེས་པའི་ཚངས་པ་ནི་མྱ་ངན་ལས་འདས་པ་དང་། དེའི་ཆེད་དུ་སྤྱོད་པ་ནི་ལྷག་པའི་ཚུལ་ཁྲིམས་དང་སེམས་དང་། ཤེས་རབ་ཀྱི་བསླབ་པ་གསུམ་ཡིན་པར་གསུངས་པ་ལས་འདིར་ནི་ཐེག་པ་ཆེན་པོའི་བསླབ་པ་གསུམ་མོ། །ཡང་རྣམ་གྲངས་ཀྱིས་ཐབས་དང་ཤེས་རབ་གཉིས་སུའང་བསྟན་ཏེ། མདོ་ལས་བྱང་ཆུབ་སེམས་དཔའ་རྣམས་ཀྱི་ལམ་མདོར་བསྡུས་པ་ནི་གཉིས་ཡིན་ཏེ་ཐབས་དང་ཤེས་རབ་བོ་ཞེས་འབྱུང་བས་སོ། །དེ་དག་གི་ངོ་བོ་ཡང་མདོ་ལས། སྙིང་རྗེས་སེམས་ཅན་དོན་བྱེད་པ། །དེ་ནི་ཐབས་ཀྱི་མཚན་ཉིད་དོ། །འཁོར་གསུམ་རྣམ་པར་མི་རྟོག་པ། །དེ་ནི་ཤེས་རབ་མཚན་ཉིད་དོ། །ཞེས་གསུངས་པས་སོ། །ཡང་བསླབ་བཏུས་ལས། རྣམ་གྲངས་གཞན་གྱིས་ཆོས་བཅུ་གཉིས་སུའང་བསྟན་ཏེ། གཞི་བདག་གི་ལུས་དང་ལོངས་སྤྱོད་དང་དགེ་བ་གསུམ་ལ་གཏོང་བ་དང་། བསྲུང་བ་དང་དག་པ་དང་སྤེལ་བའི་བྱ་བ་བཞི་བཞི་སྦྱར་ནས་བསྟན་པའི་ཕྱིར་རོ། །བྱམས་པ་སེང་གེ་སྒྲའི་མདོ་ལས། རྫོགས་པའི་བྱང་ཆུབ་མྱུར་དུ་བསྒྲུབ་པ་ལ་གཞན་གྱི་དྲིང་མི་འཇོག་པའི་ཆོས་རྣམ་པ་བརྒྱད་ཀྱི་སྒོ་ནས་བསྟན་ཏེ། བསམ་པ་དང་སྦྱོར་བ་དང་སྦྱིན་པ་དང་བསྔོ་བ་དང་བྱམས་པ་དང་སྙིང་རྗེ་དང་ཐབས་དང་ཤེས་རབ་བོ་ཞེས་པས་སོ། །མདོ་སྡེ་ཐམས་ཅད་ཀྱི་དགོངས་པ་ལམ་དང་འཇུག་པ་བདེ་བས་སངས་རྒྱས་པའི་ཆོས་བདུན་གྱི་སྒོ་ནས་བསྟན་ཏེ། ཕྱག་དང་མཆོད་པ་དང་སྡིག་པ་བཤགས་པ་དང་དགེ་བ་ལ་ཡི་རང་བ་དང་བསྐུལ་བ་དང་གསོལ་བ་གདབ་པ་དང་སྨོན་ལམ་བདུན་དུ་གསུངས་པས་སོ། །གཞན་ཡང་ཡེ་ཤེས་ཕྱག་རྒྱའི་མདོ་ལས། བྱང་ཆུབ་སེམས་དཔའ་རྣམས་ཀྱིས་མཆོག་ཏུ་སྤྱི་བོར་ཕྱིན་པའི་ཆོས་བཞི་ལ་སོགས་པ་རྣམ་གྲངས་མང་པོའི་སྒོ་ནས་གསུངས་པར་ཤེས་པར་བྱའོ། །གཉིས་པ་རྫོགས་པའི་སངས་རྒྱས་ཀྱི་རྒྱུར་གྱུར་པའི་ལམ་དེ་ཇི་ལྟར་བསྒྲུབ་པའི་ཚུལ་ལ་གསུམ་སྟེ། ཐེག་པ་ཆེན་པོའི་བསམ་པ་སྦྱོང་བ་དང་། སྦྱོར་བ་ཚོགས་བསགས་པ་དང་། བསམ་པ་དང་སྦྱོར་བའི་གེགས་བསལ་བའོ། །དང་པོ་ལ་གསུམ་སྟེ། བསམ་པ་དེ་ཡང་དག་པར་བླང་བ་དང་། བླངས་ནས་བསླབ་པར་བྱ་བ་དང་། ཉེས་པ་ཕྱིར་བཅོས་པའི་ཐབས་སོ། །དང་པོ་ལ་གསུམ་སྟེ། བླང་བའི་འདུན་པ་བསྐྱེད་པ་དང་། སྐྱེ་བའི་རྒྱུ་སྦྱོང་བ་དང་། ཆོ་གས་བསྐྱེད་པའོ། །དང་པོ་ནི་དེ་ལྟར་སྐྱབས་འགྲོ་ཁྱད་པར་ཅན་བྱས་ནས་རྫོགས་པའི་བྱང་ཆུབ་སྒྲུབ་པར་འདོད་པ་དེས་ཐོག་མར་སེམས་བསྐྱེད་བྱ་བའི་འདུན་པ་བསྐྱེད་པར་བྱ་བ་སྟེ། དེའང་འདི་སྙམ་དུ་དེ་མ་བྱས་ན་ལམ་གང་གིས་བསྒྲུབ་ཀྱང་བྱང་ཆུབ་ཀྱི་ལམ་དུ་མི་འགྱུར་བས་ངེས་པར་བྱ་དགོས་པ་དང་། སྤྱིར་རྟོགས་ལྡན་རྣམས་ཀྱིས་བྱ་བ་ཐམས་ཅད་ཐོག་མར་འབྲས་བུ་ལ་སྨོན་ནས་རྒྱུ་ལ་འཇུག་པ་ཡིན་ཞིང་། ཁྱད་པར་དུས་གསུམ་གྱི་སངས་རྒྱས་ཐམས་ཅད་ཀྱི་ཚུལ་ཡང་ཡིན་པས་ན་ལམ་གྱི་ཐོག་མ་ཉིད་དུ་བྱ་དགོས་པ་དང་ཐེག་པ་ཆེན་པོའི་ལམ་དུ་མ་ཆུད་པར་ཤི་སྲིད་པས་མྱུར་དུ་བྱ་དགོས་པ་དང་། བྱས་ན་སྔར་ཇི་སྐད་བཤད་པའི་ཕན་ཡོན་རྣམས་འབྱུང་བར་བསམ་སྟེ་འདུན་པ་བསྐྱེད་དོ། །གཉིས་པ་ནི་དེ་ལྟར་འདུན་པ་བསྐྱེད་པས་ཀྱང་དེའི་རྒྱུ་སྤྱད་པར་བྱ་སྟེ། དེ་ལའང་སྔར་བསྟན་པའི་བསོད་ནམས་ཀྱི་སྟོབས་དང་སེམས་ཅན་ལ་སྙིང་རྗེ་དང་། སངས་རྒྱས་ལ་དད་པ་གསུམ་ཡིན་པ་ལས། དང་པོ་ནི། མཆོད་པ་དང་སྦྱིན་པ་ལ་སོགས་པའི་བསོད་ནམས་ཅི་ནུས་པ་བསགས་པའོ། །གཉིས་པ་ལ་བསྐྱེད་པའི་ཐབས་དང་། བསྒོམ་པའི་ཚུལ་དང་། གོམས་པའི་ཕན་ཡོན་གསུམ་ལས། དང་པོ་ནི་སློབ་དཔོན་ཀ་མ་ལ་ཤཱི་ལས་བཏང་སྙོམས་ཀྱི་ཞིང་བྱམས་པའི་ཆུས་བཅུས་པའི་སྙིང་རྗེའི་མྱུ་གུ་ལས་དགའ་བའི་ལོ་ཐོག་རྒྱས་པས་བྱང་ཆུབ་ཀྱི་སེམས་སྐྱེ་བར་བཤད་མོད་ཀྱི། ཇོ་བོས་ནི་བཏང་སྙོམས་དང་དགའ་བ་ལོགས་སུ་བསྒོམ་མི་དགོས་པས། བྱམས་པའི་ཆུ་བས་སྙིང་རྗེ་བསྐྱེད་པར་རྒྱན་ལས་གསུངས་པ་ལྟར་བྱམས་པ་ལས་སྐྱེ་བར་གསུངས་སོ། །འདི་བསྒོམ་པ་ལ་གང་གིས་བསྒོམ་པའི་རྒྱུ། ཅི་ལྟར་བསྒོམ་པའི་ཚུལ། གོམས་པར་བྱས་པའི་ཕན་ཡོན་དང་གསུམ་ལས། དང་པོ་ནི་ལས་དང་པོ་པ་རྣམས་ནི་རྒྱུ་མཚན་གྱི་སྒོ་ནས་བསྒོམ་དགོས་པས་བདག་ཉིད་ལ་ཕན་པ་དང་། སངས་རྒྱས་ཀྱིས་བཟུང་བ་དང་། སེམས་ཅན་ཉིད་ཀྱི་ཡོན་ཏན་ཏེ། རྒྱུ་མཚན་གསུམ་གྱིས་བསྒོམ་པར་བྱའོ། །དེ་ལ་བདག་ཉིད་ལ་ཕན་པ་ནི་འདི་ལྟར་ཚེ་འདིའི་མས། བདག་ལྟོར་ཞུགས་ནས་མ་བརླག་མ་སྨྲས་པར་བཟུང་བ་དང་། བཙས་ནས་སྲིན་བུའི་ཆུ་བུར་ལྟར་རེག་མི་བཟོད་པ་བགས་ཀྱིས་བསྐྱངས། ཁ་ཟས་སྙོད་ཅིང་མི་གཙང་བ་ལག་པས་ཕྱགས་བརྩེ་གདུང་ཚད་མེད་པར་བྱས། བྱམས་པའི་མིག་གིས་བལྟས། སྙན་པའི་ཚིག་གིས་བྲིད། འཚམ་པའི་འཚོ་བ་བྱིན། ཡ་ང་བའི་འཇིགས་པ་ཐམས་ཅད་ལས་བསྲུངས། འཇིག་རྟེན་པའི་བརྡ་དང་ཐ་སྙད་ཐམས་ཅད་བསླབས། ནོར་གྱི་སྙིང་པོ་བྱིན་པའི་བུའི་དོན་དུ་ཚེ་འདིར་ལྟོགས་འཁྱགས་ངལ་དུབ་དང་ལུས་སྲོག་འདོར་བའི་དཀའ་བ་སྤྱད། མི་དགེ་བ་བཅུ་ཆར་བསྐྱེད་པས་ཕྱི་མར་ངན་སོང་དུ་ལྷུང་བའི་ལས་བྱས་ཏེ། མདོར་ན་བུའི་ཉེས་པ་སྐྱོབ་ཅིང་ཅི་བཟང་བྱས་པས་ཤིན་ཏུ་དྲིན་ཆེ་བར་བསམ་པས་དེ་སྡུག་ཅིང་ཕན་གདགས་བྱར་འཛིན་པ་འབྱུང་ལ། དེ་བཞིན་དུ། སེམས་ཅན་དག་ནི་རེ་རེས་ཀྱང་། །ཡང་ནས་ཡང་དུ་མ་བྱས་ཏེ། །ཞེས་པའི་ཚུལ་གྱི་སེམས་ཅན་ཐམས་ཅད་ཀྱི་དྲིན་བསམ་པས་དེ་སྙིང་དུ་སྡུག་ཅིང་ཕན་གདགས་བྱར་འཛིན་པ་འབྱུང་ངོ་། །གཉིས་པ་སངས་རྒྱས་ཀྱིས་བཟུང་བ་ནི་སེམས་ཅན་རྣམས་ནི་བུ་གཅིག་པ་ལྟར་དེ་བཟུང་བས་དེ་ལ་གནོད་པ་བྱས་ན་ང་ལ་གནོད་བྱས་ཤིང་། སེམས་ཅན་ཕན་པ་བྱས་ན་ང་ལ་མཆོད་པའི་མཆོག །ཅེས་པའི་ཚུལ་གྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བུ་གཅིག་པ་ལྟར་གཅེས་པར་མཛད་པས་ཀྱང་བླ་མའི་བུ་ལྟར་སྡུག་ཅིང་ཕན་གདགས་པར་བསམ་པའོ། །གསུམ་པ་སེམས་ཅན་ཉིད་ཀྱི་ཡོན་ཏན་ནི་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་པས་ཀྱང་རྒྱལ་པོའི་བུ་དང་། ནོར་བུའི་ཟ་མ་ཏོག་དང་། དར་ཡུག་གི་རྡུལ་བཞིན་སྡུག་ཅིང་ཕན་གདགས་བྱར་བསམ་པའོ། །གཉིས་པ་རྒྱུ་མཚན་དེས་ཇི་ལྟར་བསྒོམ་པའི་ཚུལ་ནི་ཐོག་མར་ཚེ་འདིའི་མ་ལ་བྱམས་པ་རང་གི་ཚད་དུ་བསྒོམ་པར་བྱ། དེ་ནས་མ་དེའི་ཚད་ཀྱིས་ཉེ་འབྲེལ་ནས། ཡུལ་མི་ནས་འཛམ་བུའི་གླིང་ནས་གླིང་བཞི་ནས། སྟོང་གསུམ་ནས་ནམ་མཁའི་མཐར་ཐུག་བར་བསྒོམས་ཏེ་བྱམས་པ་དང་ལྡན་པའི་སེམས་རྒྱ་ཆེན་པོ་ཤིན་ཏུ་ཡངས་པ་ཚད་མེད་པ་ཞེས་པར་འགྱུར་རོ། །གསུམ་པ་གོམས་པར་བྱས་པའི་ཕན་ཡོན་ནི། སེམས་ཅན་རྣམས་ལ་རྗེ་བོ་གཙོས་སུམ་བརྒྱའི་ཁ་ཟས་དུས་གསུམ་རྟག་ཏུ་བྱིན་པ་དང་། སངས་རྒྱས་ལ་ལོངས་སྤྱོད་ཐམས་ཅད་ཀྱིས་རྟག་ཏུ་མཆོད་པ་བས་བསོད་ནམས་ཆེ་བ་དང་། བྱམས་ཆོས་ཡོན་ཏན་བརྒྱད་ལྡན་ཐོབ་པ་དང་། འདིར་སྙིང་རྗེ་དང་བྱང་ཆུབ་ཀྱི་སེམས་སྐྱེ་བའོ། །དེ་དག་གིས་སྙིང་རྗེ་སྐྱེ་བའི་ཐབས་བྱམས་པ་བསྒོམ་པའི་ཚུལ་བསྟན་ཟིན་ཏོ། །གཉིས་པ་སྙིང་རྗེ་ཇི་ལྟར་བསྒོམ་པའི་ཚུལ་ཡང་བྱམས་པ་ལྟར་རྩ་བའི་མ་ནས་ནམ་མཁའི་མཐར་ཐུག་པའི་སེམས་ཅན་ཐམས་ཅད་ལ་སྙིང་རྗེ་དང་ལྡན་པའི་སེམས་རྒྱ་ཆེན་པོ་ཡངས་པ་བུ་གཅིག་པ་མེའི་དོང་དུ་ལྷུང་བ་མཐོང་བའམ་དྲན་ན་མཆི་མ་འབྱུང་བའི་ཚད་དུ་བསྒོམ་པར་བྱའོ། །གསུམ་པ་དེ་ལྟར་བསྒོམ་པའི་ཕན་ཡོན་ནི། མདོ་ལས། བྱང་ཆུབ་སེམས་དཔས་ཆོས་གཅིག་ཉིད་ལ་བསླབ་པར་བྱ་སྟེ་སྙིང་རྗེ་ཆེན་པོའོ། །ཞེས་པའི་ཚུལ་གྱིས་ཐེག་པ་ཆེན་པོའི་ཆོས་ཐམས་ཅད་འདུ་བ་དང་། འདིར་བྱང་ཆུབ་ཀྱི་སེམས་བདེ་བླག་ཏུ་སྐྱེ་བའོ། །གསུམ་པ་སངས་རྒྱས་ལ་དད་པ་ནི་དེ་ལྟར་སྙིང་རྗེས་ཀུན་ནས་བསླངས་ཏེ་སེམས་ཅན་དེ་དག་སྒྲོལ་བའི་ཐབས་བསམ་པས་མི་འདོད་ཅིང་སྦྱོར་བའི་མཐུ་མེད་པའི་སྒོ་ནས་འཇིག་རྟེན་པ་དང་འཇིག་རྟེན་ལས་འདས་པའི་ཉན་རང་གིས་ཀྱང་མི་ནུས་པ་དང་། ཡེ་ཤེས་དང་ཐུགས་རྗེ་དང་ཕྲིན་ལས་ཕུན་སུམ་ཚོགས་པའི་སྒོ་ནས་སངས་རྒྱས་ཀྱིས་ནུས་པ་དང་། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པའི་སྒོ་ནས་སངས་རྒྱས་དེ་ཡང་བདག་གིས་བསྒྲུབ་རུང་དུ་ཡིད་ཆེས་པའི་དང་བ་ཡང་ཡང་སྒོམ་པར་བྱའོ། །དེ་ལྟར་སྐྱེ་བའི་རྒྱུ་ཚོགས་གསུམ་པོ་སྦྱངས་པ་ལས་བྱང་ཆུབ་ཀྱི་སེམས་སྐྱེ་བས། གསུམ་པ་བསྐྱེད་པའི་ཆོ་ག་ནི་སློབ་དཔོན་ཀླུ་སྒྲུབ་ཀྱི་ལུགས་དང་། ཐོགས་མེད་ཀྱི་ལུགས་གཉིས་ཡོད་པ། གཉིས་ཀ་ལའང་བླ་མ་ཡོད་མེད་དང་། ཕལ་པ་དང་རླབས་པོ་ཆེའི་ལུགས་གཉིས་གཉིས་ཡོད་པར་མཐུན་པ་ལས་སྦྱོར་དངོས་རྗེས་གསུམ་གྱི་ཆོ་ག་མི་འདྲ་སྟེ། དང་པོས་སོ་ཐར་གྱི་སྡོམ་པས་རྒྱུད་མ་བསྡམས་པ་ལའང་སྐྱེ་བས་རང་བཞིན་གྱི་ཉེས་པ་ཚབ་པོ་ཆེ་སྦྱོང་བའི་དབང་དུ་བྱས་ནས་སྦྱོར་བ་ཡན་ལག་བདུན་ཀ་བྱེད། དངོས་གཞི་བརྗོད་པ་ཉུང་སྟེ། སྤྱོད་འཇུག་དང་ཡིད་དམ་བླང་བ་ནས་འབྱུང་བ་ལྟར་བྱེད། མཇུག་བསླབ་བྱ་དང་གཏང་རག་མེད་པར་རང་གཞན་དགའ་བ་བསྒོམ་པར་བྱེད་དོ། །གཉིས་པས་སོ་སོ་ཐར་བའི་སྡོམ་པ་སྔོན་དུ་སོང་ནས་རྒྱུད་དག་པ་ལ་སྐྱེ་བའི་དབང་དུ་བྱས་ནས་སྦྱོར་བ་ཕྱག་དང་མཆོད་པ་དང་། སྐྱབས་འགྲོ་ཙམ་བྱེད། དངོས་གཞི་བྱང་སའི་ཚུལ་ཁྲིམས་ལེའུ་འམ་ཇོ་བོའི་སེམས་བསྐྱེད་ཀྱི་ཆོ་ག་ལྟར་བྱེད། མཇུག་བསླབ་བྱ་བརྗོད་པ་དང་གཏང་རག་བྱའོ། །འདི་དག་གི་ཁྱད་པར་ཞིབ་ཏུ་ས་པཎ་གྱིས་མཛད་པའི་སེམས་བསྐྱེད་ཀྱི་ཆོ་གའམ། ཁོ་བོས་བྱས་པའི་སྡོམ་གསུམ་གྱི་སྤྱི་དོན་དུ་བལྟ་བར་བྱའོ། །དེ་ལྟར་ལུགས་གཉིས་པོ་གང་རུང་གིས་བྱང་ཆུབ་སེམས་དཔའི་སྡོམ་པ་བླངས་པར་བྱས་ནས། གཉིས་པ་བླངས་ནས་བསླབ་པར་བྱ་བ་ནི་སྤྱན་རས་གཟིགས་ཀྱི་མདོ་ལས། དབང་པོ་གཉིས་སྦྱོར་བའི་འདོད་པ་མི་བསྟེན་པ་དང་མི་དགེ་བའི་བཤེས་གཉེན་མི་བསྟེན་པ་དང་། ཆོས་ཐམས་ཅད་ལ་ཡོངས་སུ་འཛིན་པ་མི་བྱ་བ་དང་། ཐབས་དང་ཤེས་རབ་ལ་མཁས་པར་བྱ་བ་དང་། སྟོང་པ་ཉིད་ཀྱི་རྣམ་ཐར་བརྟན་པར་བྱ་བ་དང་། འཁོར་བ་ལ་ཞེན་པ་མེད་ཅིང་ཀུན་དུ་རྟོག་པ་ཞི་བར་བྱ་བ་དང་། རྒྱུ་འབྲས་ལ་སྐུར་བ་མི་གདབ་པའོ། །ཞེས་པའི་ཆོས་བདུན་ལ་བསླབ་པར་གསུངས་པའི་དོན་ལེགས་པར་བཤད་པ་ལ་གསུམ་སྟེ། བསླབ་པ་ཉེ་བར་སྟོན་པའི་རྒྱུ་བསྟན་པ་དང་། བསམ་པ་བྱང་ཆུབ་ཀྱི་སེམས་ཉིད་སྦྱོང་བ་ལ་བསླབ་པ་དང་། སྦྱོར་བ་རྗེས་སུ་བསྒྲུབ་པ་ལ་བསླབ་པའོ། །དང་པོ་ནི། དབང་རྟུལ་གྱི་བྱང་ཆུབ་སེམས་དཔའི་བསླབ་པ་ཟབ་ཅིང་རྒྱ་ཆེ་བ་རྣམས་ཐེག་པ་ཆེན་པོའི་དགེ་བའི་བཤེས་གཉེན་ལ་རག་ལས་པས་ན་ནོར་བཟང་གི་རྣམ་ཐར་ལྟར། དེ་མི་ཉམས་ཤིང་འཕེལ་བའི་ཐབས་སྟོན་པའི་ཐེག་པ་ཆེན་པོའི་དགེ་བའི་བཤེས་གཉེན་བསྟེན་པ་དང་དབང་རྣོན་གྱིས་ཐེག་པ་ཆེན་པོའི་མདོ་སྡེའི་དོན་ཚུལ་བཞིན་དུ་དཔྱད་པ་ལས་ཀྱང་རྟོགས་པར་ནུས་པས་ཕྱིའི་རྐྱེན་དེ་དག་བསྟེན་ཅིང་ནང་གི་རྐྱེན་རང་ཉིད་ཀྱིས་དྲན་པ་དང་ཤེས་བཞིན་དང་། བག་ཡོད་བསྟེན་པར་གསུངས་པ་ཡིན་ནོ། །གཉིས་པ་ལྟ་བ་གང་ལ་བརྟེན་པ་དང་ཐབས་གང་གིས་དང་། ཚུལ་ཇི་ལྟར་དང་། དེ་ལྟར་སྦྱངས་པའི་ཕན་ཡོན་དང་བཞི་ལས། དང་པོ་ནི། འོ་ན་བདག་བྱང་ཆུབ་ཀྱི་སེམས་སྦྱོང་བའི་ཚེ་བདག་དང་། སེམས་ཅན་དང་། སངས་རྒྱས་གསུམ་གང་ཟག་རྫས་ཡོད་དམ། སྐྱེས་བུ་བཏགས་ཡོད་དམ། སྒྱུ་མའི་སྐྱེས་བུ་ལྟར་བརྫུན་པར་ཤེས་པས་སྦྱོང་ཞེ་ན། འདིར་གསུམ་ཀ་ལ་སྐྱེ་ཞིང་སྦྱོང་དུ་རུང་སྟེ། དང་པོ་ནི་ཕྱི་རོལ་པའི་ལྟ་བ་སྟེ་གང་ཟག་གསུམ་པོ་རྫས་ཡོད་དུ་འཛིན་པས་ཀྱང་བྱས་པ་གཟོ་བས་སེམས་ཅན་ལ་དམིགས་པའི་བྱམས་སྙིང་རྗེ་དང་བྱང་ཆུབ་ཀྱི་སེམས་སྐྱེའོ། །ཇོ་བོས་གསེར་གླིང་པ་ནས་བརྒྱུད་པའི་བློ་སྦྱོང་འདི་ལྟ་བ་མུ་སྟེགས་པ་དང་མཐུན། ཞེས་གསུངས་པའི་དོན་ཡང་འདི་ཉིད་ཡིན་ཅིང་། མདོ་དང་རྒྱན་གྱི་དགོངས་པ་སྦྱོར་ལམ་བཟོད་པའི་གནས་སྐབས་སུ་ལམ་གྱི་ངོ་བོར་གྱུར་པའི་གང་ཟག་རྫས་ཡོད་ཀྱི་འཛིན་པ་ཡོད་པར་གསུངས་པའང་འདི་ལ་དགོངས་སོ། །གཉིས་པ་ནི་ཉན་ཐོས་དང་། སེམས་ཙམ་པའི་ལྟ་བ་སྟེ། དེ་ལ་བརྟེན་ནས་གང་ཟག་གི་དབེན་པའི་ཆོས་རྫས་ཡོད་ལ་དམིགས་པའི་བྱམས་སྙིང་རྗེའི་སོགས་སྐྱེའོ། །བྱམས་པའི་རྣལ་འབྱོར་པ་ནས་བརྒྱུད་པའི་བློ་སྦྱོང་འདི་ལྟ་བ་བྱེ་བྲག་ཏུ་སྨྲ་བ་དང་མཐུན་ཞེས་གསུངས་པའི་དོན་ཡང་འདི་ཡིན་ནོ། །གསུམ་པ་ནི་དབུ་མའི་ལྟ་བ་སྟེ་དེ་ལ་བརྟེན་ནས་དམིགས་པ་མེད་པའི་བྱམས་སྙིང་རྗེ་ལས་བྱུང་བའི་བྱང་ཆུབ་ཀྱི་སེམས་སྐྱེའོ། །གཉིས་པ་ཐབས་གང་གིས་སྦྱོང་བ་ནི་འདིར་སྦྱོང་ཞེས་པའི་དོན་སྡིག་པ་ལྟར་ཟད་པར་བྱེད་པ་མ་ཡིན་གྱི། གསེར་ལྟར་བཟང་བར་བྱེད་པ་ཡིན་ལ་དེའི་ཐབས་གསུམ་ལས། དང་པོ་ནི་རྩལ་སྦྱོང་བ་ལྟར་རང་གི་ངོ་བོའི་སྒོ་ནས་སྦྱོང་སྟེ། དབུལ་པོས་ནོར་བུ་རྙེད་པ་ལྟར་གཅེས་པའི་མཆོག་ཏུ་བཟུང་ནས་མི་བརྗེད་པར་སྐྱབས་འགྲོ་དང་བཅས་པའི་ཚིག་གིས་ཉིན་མཚན་དུས་དྲུག་ཏུ་སྦྱོང་བའོ། །གཉིས་པ་ནི་ལྷ་ཁང་ལྟར་རྒྱུ་ཚོགས་ཀྱིས་སྦྱོང་བ་སྟེ། གང་ལ་སེམས་དེ་སྐྱེ་ཞིང་འཕེལ་བར་འགྱུར་བའི་རྒྱུ་སེམས་ཅན་རྣམས་ལ་བྱམས་སྙིང་རྗེ་དང་། སངས་རྒྱས་ཀྱི་ཡོན་ཏན་ལ་དད་པ་དང་། སེམས་དེ་ཉིད་ཀྱི་ཕན་ཡོན་ཡང་ཡང་བསམ་པའོ། །གསུམ་པ་ནི། ནོར་བུའི་དྲི་མ་སྦྱོང་བ་ལྟར་མི་མཐུན་ཕྱོགས་བསལ་བའི་སྒོ་ནས་སྦྱོང་བ་སྟེ། གང་གིས་བྱང་ཆུབ་ཀྱི་སེམས་དེ་སྐྱེ་གནས་འཕེལ་བའི་གེགས་སུ་གྱུར་པའི་གྲོགས་པོ་དང་། བསམ་པ་དང་སྦྱོར་བ་དམན་པ་གསུམ་སྦྱོང་བའོ། །གསུམ་པ་ཚུལ་ཇི་ལྟར་སྦྱོང་བ་ནི། བྱང་ཆུབ་སེམས་དཔའི་སྤྱོད་པའི་སྒོ་སྣ་ཚོགས་འབྱུང་ཡང་བྱང་ཆུབ་ཀྱི་སེམས་དེ་ལ་མི་མཐུན་པ་མེད་པས་ངེས་པར་སྦྱོང་བ་དང་། སྐད་ཅིག་ཀྱང་འབྲལ་དུ་མི་རུང་བས་རྟག་པར་སྦྱོང་བ་དང་། བྱེད་པ་ཆེ་བའི་སྒོ་ནས་དགེ་བ་གཞན་ཐམས་ཅད་ལས་གཙོ་བོར་སྦྱོང་བ་སྟེ། བསམ་པས་བྱང་ཆུབ་སེམས་དཔའ་ལ། །དགེ་བའམ་ཡང་ན་མི་དགེ་བ། །ཐམས་ཅད་དགེ་བ་ཉིད་གྱུར་ཏེ། །གང་ཕྱིར་སེམས་དེ་གཙོ་བའི་ཕྱིར། །ཞེས་དང་། སེམས་བསྲུང་བརྟུལ་ཞུགས་མ་གཏོགས་པ། །ཞེས་དང་། སེམས་ནི་ནམ་ཡང་ཉམས་མི་བྱ། །ཞེས་གསུངས་པ་ལྟར་རོ། །བཞི་པ་དེ་ལྟར་སྦྱངས་པའི་ཕན་ཡོན་ལའང་གསུམ་སྟེ། གོམས་པས་མི་བརྗེད་པ་བུ་གཅིག་པའི་མྱ་ངན་ལྟ་བུ་དང་། བརྟན་པས་མི་ལྡོག་པ་རི་རབ་ལྟ་བུ་དང་། སྦྱོར་བ་ལ་འཇུག་པ་བུ་མེ་དོང་ན་མཐོང་བ་ལྟ་བུའོ། །དང་པོ་ནི་གོམས་པ་རབ་འབྲིང་ཐ་མས་དུས་རྒྱུན་དུ་དང་། བྱ་བ་ལ་འཇུག་པའི་ཚེ་དང་། ཐུན་ཚོད་དྲུག་ལས་མི་རིང་བ་རྗེས་སུ་དྲན་པ་དང་། གཉིས་པ་ནི། རྐྱེན་ཆུང་ངུ་དང་། འབྲིང་དང་། ཆེན་པོའི་བྱེ་བྲག་གིས་མི་ལྡོག་པ་སྟེ། བརྟན་པ་གྲོགས་ངན་སྡུག་བསྔལ་དང་། །ཟབ་མོ་ཐོས་པས་མི་གཡོས་སོ། །ཞེས་པ་ལྟར་རོ། །གསུམ་པ་ནི། གཞན་དོན་མཐོང་ན་རང་གི་བདེ་སྡུག་ཁྱད་དུ་བསད་ནས་དེ་ལ་འཇུག་པ་སྟེ། དེ་ལྟར་རྒྱུད་ནི་གོམས་པ་ན། །གཞན་གྱི་སྡུག་བསྔལ་ཞི་དགའ་བས། །པད་མའི་མཚོ་རུ་ངང་པ་ལྟར། །མནར་མེད་པར་ཡང་འཇུག་པར་འགྱུར། །ཞེས་པ་ལྟར་རོ། །གསུམ་པ་ཉེས་པ་ཕྱིར་བཅོས་པའི་ཐབས་ནི་བྱང་ཆུབ་སེམས་དཔའ་ལ་ཉོན་མོངས་པ་འགའ་ཞིག་གིས་བྱང་ཆུབ་ཀྱི་སེམས་གཏོང་བའི་རྒྱུ་དེ་དག་ལས་གང་ཡང་རུང་བ་ཞིག་བྱུང་བ་ལ་ཐུན་ཚད་ལས་མ་འདས་པར་འགྱོད་པས་སླེབས་ན་བྱང་ཆུབ་སེམས་དཔའ་གཅིག་གིས་མདུན་དུ་ཕྱག་འཚལ་ཏེ། བྱང་ཆུབ་སེམས་དཔའ་དགོངས་སུ་གསོལ་བདག་བྱང་ཆུབ་སེམས་དཔའ་མིང་འདི་ཞེས་བགྱི་བ་ལ་བྱང་ཆུབ་ཏུ་སེམས་བསྐྱེད་པའི་བསླབ་བྱ་དང་འགལ་བ་བླ་མ་དང་མཆོད་འོས་བསླུ་བའི་ཉེས་པ་གཅིག་བྱུང་སྟེ་ཞེས་སོགས་གང་བྱུང་བའི་མིང་ནས་བརྗོད་ཅིང་བཤགས་སྡོམ་བྱའོ། །ཐུན་ཚོད་ལས་འདས་པར་ཀུན་དཀྲིས་དྲག་པོས་ཕམ་པ་ལྟ་བུའི་ཆོས་བཞིའམ་བཅུ་བཞི་བྱུང་ན་སྡོམ་པ་གཏོང་བས་སླར་ཡང་ལེན་པ་དང་། ཁྱད་པར་དབུ་མ་ལུགས་ལ་བྱང་ཆུབ་སེམས་དཔའ་སྐྱ་རེངས་ལ་གསོལ་བ་བཏབ་ནས་ནམ་མཁའི་སྙིང་པོ་རྨི་ལམ་དུ་བྱོན་པ་ལ་བཤགས་པའི་ཚུལ་གསུངས་ཤིང་། སེམས་ཙམ་ལུགས་ལ། ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མོངས་བདག་སེམས་བཞིན། །ཞེས་པའི་ཚུལ་གྱིས་ཀྱང་བཤགས་པར་བྱའོ། །གཉིས་པ་སྦྱོར་བ་ཚོགས་བསགས་ལ་གསུམ་སྟེ། བསགས་བྱའི་ཚོགས་གཉིས་ངོས་གཟུང་བ་དང་། དེ་གང་གིས་གསོག་པའི་རྒྱུ་དང་། དེས་ཇི་ལྟར་བསག་པའི་ཚུལ་ལོ། །དང་པོ་ལ་ཚོགས་ཀྱི་ངོ་བོ་ནི་སཾ་བྷ་ར་ཞེས་པའི་སཾ་སནྟ་ནི་རྒྱུན་དུ། བྷ་བྷ་བ་ནི་བསྒོམ་པ་ཐོབ་པ། ར་ར་ཏི་ནི་ཡང་ནས་ཡང་དུ་སྒྲུབ་པ་སྟེ། རྒྱན་ལས། རྒྱུན་དུ་སྒོམ་པ་ཐོབ་ནས་ནི། །དགེ་ལ་ཡང་དག་ཡང་དུ་སྒྲུབ། །ཞེས་སོ། །དེའང་ཕར་ཕྱིན་དྲུག་གི་དགེ་བར་སྒྲུབ་པ་སྟེ། ཕར་ཕྱིན་དང་པོ་གཉིས་བསོད་ནམས་ཀྱི་ཚོགས་དང་། ཤེས་རབ་ཡེ་ཤེས་ཀྱི་ཚོགས་དང་། གཞན་གཉིས་ཀའི་ཚོགས་ཡིན་པའི་ཚུལ་དང་། ཡང་ཕར་ཕྱིན་དང་པོ་ལྔ་རྣམ་པར་མི་རྟོག་པའི་ཤེས་རབ་ཀྱི་ཟིན་ན་ཡེ་ཤེས་ཀྱི་ཚོགས་དང་། ཤེས་རབ་ཀྱང་ཐབས་ཀྱིས་ཟིན་ན་བསོད་ནམས་ཀྱི་ཚོགས་ཡིན་པའི་ཚུལ་གཉིས་གསུངས་སོ། །དེ་ལྟར་གཉིས་སུ་ངེས་པའང་འབྲས་བུ་སྐུ་གཉིས་དང་། ཡུལ་བདེན་པ་གཉིས་དང་། ངོ་བོ་མཚན་མ་དང་བཅས་པ་དང་མཚན་མ་མེད་པས་ངེས་པ་ཡིན་ནོ། །གཉིས་པ་ནི་སྒྲུབ་པ་སྟོབས་དང་ལྡན་པའི་ཁྱད་པར་ལྔས་གསོག་པ་ཡིན་ཏེ། རྟེན་གྱི་ཁྱད་པར་སྟོབས་ཆེ་བ་དགེ་སློང་། རྟེན་དེའི་བསམ་པའི་ཁྱད་པར་སྟོབས་ཆེ་བ་རང་དགེ་བ་གང་བྱེད་པ་ལ་གཞན་ཡང་བསྐུལ་བ་དང་དེའི་བསྔགས་པ་བརྗོད་པ་དང་། གཞན་བྱེད་པ་རྗེས་སུ་བསྟོད་པ་སྟེ་སྒོ་བཞི་ལྡན། སྦྱོར་བ་དེའི་བྱེད་པ་སྟོབས་ཆེ་བ་ནི་བརྩོན་འགྲུས་བརྩམ་པ་དེའི་མཁས་པ་སྟོབས་ཆེ་བ་ནི་བྱ་བ་ཐམས་ཅད་ལ་རྟོག་པ་སྔོན་དུ་གཏོང་བ་དང་། ལས་དང་བྱེད་པའི་ཚོད་རིག་པ་དང་། འཇུག་ལྡོག་ལ་བག་ཡོད་པ་ཡིན་པར་གསུངས་སོ། །གསུམ་པ་རྒྱུ་དེས་ཚོགས་ཇི་ལྟར་བསགས་པ་ནི། ཀླུ་སྒྲུབ་ཀྱིས། དེ་ཉིད་ཚོལ་ལ་ཐོག་མར་ནི། །ཐམས་ཅད་ཡོད་ཅེས་བརྗོད་པར་བྱ། །ཞེས་དང་། འཕགས་པ་ལྷས། བསོད་ནམས་མིན་པ་དང་པོར་བཟློག །ཅེས་དང་། ཟླ་བས། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་གསུངས་པ་ལྟར་སྐྱེ་བའི་རིམ་པ་དང་པོར་ཀུན་རྫོབ་ལ་དམིགས་པའི་ཐབས་ཀྱིས་བསོད་ནམས་གཙོ་བོར་བསགས་པ་དང་། དེ་ནས་དོན་དམ་ལ་དམིགས་པའི་ཤེས་རབ་ཀྱིས་ཡེ་ཤེས་གཙོ་བོར་བསག་པ་དང་། ཚོགས་གཉིས་སྒྲུབ་པའི་ཀུན་ཏུ་སྤྱོད་པའོ། །དང་པོ་ལ་གསུམ་སྟེ། སྨོན་པའི་བསླབ་བྱར་བྱས་སྟེ་བསག་པ་དང་། འཇུག་པའི་བསླབ་བྱར་བྱས་སྟེ་བསག་པ་དང་། བསླབ་པ་ཕུན་སུམ་ཚོགས་པའི་ཡན་ལག་གོ །དང་པོ་ལ་གསུམ་སྟེ། རྫོགས་པའི་སངས་རྒྱས་ཀྱི་གེགས་སྡིག་སྒྲིབ་སྦྱོང་བ་དང་། རྗེས་སུ་ཐུན་པའི་དགེ་ཚོགས་བསྒྲུབ་པ་དང་། སེམས་ཅན་སྨིན་པར་བྱ་བའོ། །དང་པོ་ནི། བསམ་པ་ངོ་ཚ་དང་འཇིགས་པ་དང་། འགྱོད་པས་སྔར་བསག་པའི་སྡིག་པ་རྟེན་གྱི་སྟོབས་དང་། གཉེན་པོའི་སྟོབས་ཀྱི་བཤགས་པ་དང་། བསགས་པའི་ཉེས་སྤྱོད་དགེ་སློང་བྱང་ཆུབ་སེམས་དཔའི་སོ་སོར་ཐར་པ་ཡན་ལག་དྲུག་ལྡན་གྱི་ཚུལ་ཁྲིམས་ཀྱིས་སྡོམ་པ་དང་། དེ་དག་གི་རྒྱུ་མཐོང་སྤང་དུ་གྱུར་པའི་ཉོན་མོངས་པ་རྣམས་བརྩོན་པ་དྲག་པོའི་སྒོ་ནས་སྤོང་དགོས་ཏེ། ཉོན་མོངས་དང་དེས་ཀུན་ནས་བསླངས་པའི་ཉེས་སྤྱོད་ཀྱིས་བདག་རྨས་ན་འགྲོ་བ་མང་པོའི་དོན་ཉམས་པར་འགྱུར་བའི་ཕྱིར་འཇིག་རྟེན་པའི་ཚོང་དཔོན་བཞིན་ནོ། །གཉིས་པ་རྗེས་སུ་མཐུན་པའི་དགེ་ཚོགས་བསྒྲུབ་པ་ནི་འདིར་གཙོ་བོར་བརྩོན་འགྲུས་གྲོགས་སུ་ལྡན་པའི་ཕར་ཕྱིན་དང་པོ་གསུམ་ཡིན་པ་ལས། དང་པོ་སྦྱིན་པའི་དགེ་བར་སྒྲུབ་པ་ལ་གསུམ་སྟེ། ཟང་ཟིང་དང་མི་འཇིགས་པ་དང་ཆོས་ཀྱི་སྦྱིན་པའོ། །དང་པོ་ནི། བྱང་ཆུབ་སེམས་དཔས་ལུས་དང་ལོངས་སྤྱོད་དག །གཞན་ལ་མི་སྦྱིན་པ་ནི་ཡོངས་མེད་དེ། །ཞེས་པའི་ཚུལ་གྱིས་སྤྱིར་བདག་ཉིད་དབང་བའི་ཕྱི་ནང་གི་དངོས་པོ་ཐམས་ཅད་སྦྱིན་པ་ཡིན་པ་ལས་བྱེ་བྲག་ཏུ་ཕྱིའི་དངོས་པོ་ལ་ཕ་མ་མི་སྦྱིན། དགེ་སྦྱོང་གི་ཆོས་གོས་གསུམ་མི་སྦྱིན། དུག་དང་མཚོན་ལ་སོགས་པ་གཞན་ལ་གནོད་པ་མི་སྦྱིན་པ་སྟེ། མདོར་ན་བདག་ལ་རུང་བ་གཞན་ལ་ཚེ་འདིར་བདེ་བའི་རྐྱེན་དང་ཕྱི་མར་ཕན་པའི་རྐྱེན་དུ་འགྱུར་པ་རྣམས་སྦྱིན་ནོ། །གང་ལ་གཏོང་བའི་ཡུལ་ནི། རྟེན་མེད་པ་དང་། ཉེས་པར་སྤྱོད་པ་དང་། སྡུག་ཕོངས་དང་། ཕན་འདོགས་པ་དང་། ཡོན་ཏན་ཅན་དང་ལྔ་ལས་སྔ་མ་སྔ་མ་མེད་ན་ཕྱི་མ་ཕྱི་མ་ལ་སྦྱིན་པར་གསུངས་སོ། །ཅི་ལྟར་གཏོང་བའི་ཚུལ་ནི་བསམ་པ་ལན་དང་རྣམ་སྨིན་ལ་མི་རེ་བར། སྦྱོར་བ་རང་བྱེད་པ་དང་གཞན་བྱེད་དུ་འཇུག་པ་དང་། གཞན་རང་དགར་སྦྱིན་པའི་བསྔགས་པ་བརྗོད་པའོ། །གཉིས་པ་མི་འཇིགས་པའི་སྦྱིན་པ་ནི། ཚེ་འདིར་གཞན་དག་མེ་ཆུ་དང་། གཅན་གཟན་དང་། ཆོམ་རྐུན་ལ་སོགས་པའི་འཇིགས་པ་ལས་སྐྱོབ་ཅིང་དེའི་དགེ་བས་ཕྱི་མར་སེམས་ཅན་འཁོར་བའི་འཇིགས་པ་ཐམས་ཅད་ལས་སྐྱོབ་པར་བསྔོ་བའོ། །ཆོས་ཀྱི་སྦྱིན་པ་ནི། གཞན་སྙིང་ཐག་པ་ནས་སྒྲུབ་པར་འདོད་པ་ལ་རྒྱལ་བའི་བཀའ་དང་དེའི་དགོངས་པ་འགྲེལ་བའི་བསྟན་བཅོས་ཀྱི་ཚིག་དོན། ཀུན་སློང་ཟང་ཟིང་མེད་པར་ཚིག་དོན་ཕྱིན་ཅི་མ་ལོག་པར་འཆད་པ་སྟེ། ཆོས་སྦྱིན་ཉོན་མོངས་ཅན་མིན་པས། །མདོ་སོགས་ཡང་དག་ཇི་བཞིན་སྟོན། །ཞེས་ཏེ། དེའི་རྒྱུ་གླེགས་བམ་དང་། ཤོག་བུ་དང་སྣག་ཚ་ལ་སོགས་པ་རྣམས་ཀྱང་སྦྱིན་པར་བྱའོ། །གཉིས་པ་ཚུལ་ཁྲིམས་ཀྱི་དགེ་བར་སྒྲུབ་པ་ནི། འཇུག་པའི་སྡོམ་པ་བླངས་ན་ཚུལ་ཁྲིམས་ཐམས་ཅད་འཇུག་པའི་བསླབ་བྱར་འགྱུར་བ་ཡིན་མོད་ཀྱི་མ་བླངས་ན་འདིར་སྔར་བཤད་པ་ལྟར་གྱི་བྱང་ཆུབ་སེམས་དཔའི་སོ་སོ་ཐར་པ་ཆོས་དྲུག་ལྡན་བསམ་པ་བྱང་ཆུབ་ཀྱི་སེམས་དང་། སྦྱོར་བ་མ་ཆད་པ་དང་གུས་པ་དང་མཁས་པས་སྐྱེད་པ་དང་བསྐུལ་བ་དང་བསྔགས་པ་གསུམ་དུ་བྱས་ཤིང་དགེ་བ་རྫོགས་པའི་བྱང་ཆུབ་ཏུ་བསྔོ་བ་ཡིན་ནོ། །གསུམ་པ་བཟོད་པ་ནི་བསམ་པ་བྱང་ཆུབ་ཀྱི་སེམས་ཀྱིས་བསླངས་པས་སྦྱོར་བ་བཟོད་པ་གསུམ་ལས། སྡུག་བསྔལ་དང་དུ་ལེན་པའི་བཟོད་པ་བསྒོམ་པ་ནི་དོན་མེད་པའི་སྡུག་བསྔལ་བདག་ཉིད་ཀྱིས་སྔོན་ཇི་སྙེད་གཅིག་སྤྱད་པ་དང་ད་ལྟར་གཞན་དག་འདི་དང་འདི་ལྟ་བུ་སྤྱོད་ན་བདག་གིས་བདག་ཉིད་འཁོར་བའི་སྡུག་བསྔལ་ཐམས་ཅད་སྤོང་བ་དང་། བླ་ན་མེད་པའི་བདེ་བ་ཐོབ་པར་བྱེད་པས་རང་དོན་ཆེ་བ་དང་། སེམས་ཅན་ཐམས་ཅད་ཀྱང་དེ་ལྟ་བུ་ལ་འགོད་པས་གཞན་དོན་ཆེ་བའི་སངས་རྒྱས་བསྒྲུབ་པའི་ཕྱིར་ཅིའི་ཕྱིར་མི་ནུས་སྙམ་དུ་དགའ་བར་བསམ་པའོ། །གནོད་པ་ལ་ཇི་མི་སྙམ་པའི་བཟོད་པ་བསྒོམ་པ་ནི་ཁོང་ཁྲོའི་ཉེས་དམིགས་སྡུག་བསྔལ་འབའ་ཞིག་བསྐྱེད་པ་དང་། སྡིག་ཆེར་གསོག་པ་དང་། ཐོབ་མ་ཐོབ་ཀྱི་དགེ་བ་ཉམས་པར་འགྱུར་བ་བསམ་པ་དང་། གནོད་བྱེད་བྱང་ཆུབ་སྒྲུབ་པའི་གྲོགས་སུ་མཐོང་ནས་བསྒོམ་པར་བྱའོ། །ཆོས་ལ་ངེས་པར་སེམས་པའི་བཟོད་པ་བསྒོམ་པ་ནི་གནོད་བྱ་བདག་དང་། གནོད་བྱེད་དང་། གནོད་པར་བྱ་བའི་ཚུལ་གསུམ་ལ་རིགས་པས་བརྟགས་ན་མི་འཐད་པས་ཡང་དག་པར་ན་གནོད་པ་ཉིད་མི་འགྲུབ་པས་བཟོད་པ་བྱར་མེད་པ་ཤེས་ནས་བསྒོམ་པ་སྟེ། སའམ་ཡང་ན་ཆུའམ་མེ། །རླུང་གི་ཁམས་ལྟར་མི་གནས་ཤིང་། །ཞེས་པ་ལྟར་རོ། །ཡང་བྱང་ཆུབ་སེམས་དཔས་བསྒྲུབ་པའི་བྱ་བ་ཐམས་ཅད་ལ་བརྩོན་འགྲུས་བརྩམ་པར་བྱ་སྟེ། དེ་ཡང་བརྩོན་འགྲུས་བརྩམ་དགོས་པ་དང་། རྩོམ་ནུས་པ་དང་། དགོས་ཤིང་ནུས་པ་ལ་ཅི་ལྟར་བརྩམ་པའི་ཚུལ་གསུམ་ལས། དང་པོ་ནི་སྤྱིར་རྟོགས་ལྡན་རྣམས་ནི་དགོས་ཤིང་ནུས་པའི་བྱ་བ་ལ་བརྩོན་པ་ཡིན་ན། བདག་ཀྱང་དེ་ལྟ་བུའི་དགེ་བ་ལ་ཅིའི་ཕྱིར་མི་བརྩོན་སྙམ་དུ་བསམ་པའོ། །གཉིས་པ་ནི་བསྒྲུབ་པ་ལ་སྒྱིད་ལུག་པའི་ལེ་ལོ་བསལ་བའི་སྒོ་ནས་ཏེ། དེའང་འབྲས་བུ་ལ་རེ་ཐག་ཆད་པ་དང་། ལམ་ལ་སྒྱིད་ལུག་པ་བསལ་བ་གཉིས་ལས། དང་པོ་ནི། སྤྱིར་ཉོན་མོངས་པའི་རང་བཞིན་ཡིན་པས། སེམས་ཅན་ཐམས་ཅད་དང་བྱེ་བྲག་བདག་ལྟ་བུ་ལ་སངས་རྒྱས་ཀྱི་སྐལ་བ་མེད་པས་སངས་རྒྱས་ཐོབ་མི་ནུས་སོ་སྙམ་དུ་སྒྱིད་ལུག་པ་ལ་དྲི་མ་གློ་བུར་བ་ཡིན་པའི་རིགས་པ་དང་། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་གསུངས་པའི་ལུང་གིས་བསལ་བར་བྱའོ། །གཉིས་པ་ལ་སྤྱིར་སྡིག་པ་སྦྱང་བ་དང་། ཚོགས་བསགས་པ་དཀའ་བས་མི་ནུས་སོ་སྙམ་པ་ལ་རྩ་བ་མེད་ཅིང་ངོ་བོ་དམན་པ་ཡིན་པས་སྤང་བྱ་སྟོབས་ཆུང་བ་དང་། རྩ་བ་བདེན་པ་དང་བྱིན་རླབས་ཡོད་པས་དགེ་བ་སྟོབས་ཆེ་བར་བསྟན་པ་དང་། དགེ་ཚོགས་བསྒྲུབ་པ་དེའང་སྔར་བཤད་པ་ལྟར་སྟོབས་ཆེ་བ་ལྔས་བྱེད་པ་ཚད་མེད་པའི་རིགས་པས་བསལ་ཏེ་བརྩོན་འགྲུས་ཉིད་ལ་སྦྱར་བར་བྱའོ། །གསུམ་པ་སེམས་ཅན་སྨིན་པར་བྱ་བ་ལ་བསླབ་པ་ནི་བྱང་ཆུབ་སེམས་དཔས་ཐོག་མར་གཞན་དོན་མི་འགྲུབ་པས་རྒྱུ་འཇིག་རྟེན་མ་དད་པའི་སྤྱོད་པ་སྤང་བར་བྱ་སྟེ། ཕ་རོལ་མ་དད་ན་མི་ཉན་པས་དེའི་དོན་མི་འགྲུབ་ཅིང་རང་ལ་སྨོད་པས་ཕ་རོལ་ཉམས་པའི་དོན་མ་ཡིན་པ་ཐོབ་པའི་ཕྱིར་ཏེ། ཇི་སྐད་དུ། འཇིག་རྟེན་མ་དད་གྱུར་པ་ཀུན། །མཐོང་དང་དྲིས་སྟེ་སྤང་བར་བྱ། །ཞེས་སོ། །དེ་ནས་ཅི་སྲིད་དངོས་སུ་མ་ནུས་པའི་སྐབས་སུ་བྱ་བ་འོས་པའི་བསམ་པ་སྦྱངས་ལ། བསམ་པས་བྱ་བ་ལ་དོན་གྱིས་འཇུག་པར་ཡང་འགྱུར་ཏེ། གང་ལ་དེ་ཡི་སེམས་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་སོ། །སྦྱོར་བས་ཀྱང་ཡི་དྭགས་དང་ལྷ་ཀླུ་ཀུན་ལ་ཟང་ཟིང་དང་ཆོས་ཀྱི་སྦྱིན་པ་བྱ་ཞིང་ནུས་ན་མི་རྣམས་ལའང་ཟས་གོས་ལ་སོགས་པའི་སྦྱིན་པ་དང་བསླབ་བྱ་སྟོན་པའི་སྙན་པར་སྨྲ་བ་དང་། དོན་ལེན་དུ་འཇུག་པའི་དོན་སྤྱོད་པ་དང་། དེ་ལ་བདག་ཉིད་འཇུག་པའི་དོན་མཐུན་པ་ཞེས་བྱ་བ་བསྡུ་བའི་དངོས་པོ་བཞིས་སེམས་ཅན་སྨིན་པ་ལ་བསླབ་པར་བྱའོ། །གཉིས་པ་འཇུག་པའི་བསླབ་བྱར་བྱ་སྟེ་ཚོགས་བསགས་པ་ལ་གསུམ་སྟེ། གང་བླང་བྱ་སྡོམ་པའི་རང་བཞིན་ངོས་གཟུང་། དེ་ཡང་དག་པར་བླང་བའི་ཚུལ། བླངས་ནས་བསླབ་པར་བྱ་བའོ། །དང་པོ་ནི། བྱང་ཆུབ་སེམས་དཔའི་སྡོམ་པ་ཡིན་ལ། འདིའི་མཚན་ཉིད་སྔོན་གྱི་དགེ་བའི་བཤེས་གཉེན་ཁ་ཅིག སྨོན་པའི་སེམས་དང་འཇུག་པའི་ཆོ་གས་བླངས་པ་སེམས་པ་དགེ་བའི་ས་བོན་རྒྱུན་ཆགས་པ་གྲོགས་བྱང་ཆུབ་ཀྱི་སེམས་དང་ལྡན་པ་སྟེ། སྡོམ་པར་མ་གཏོགས་པ་དང་། སོ་སོར་ཐར་པ་དང་། རིག་པ་འཛིན་པ་གསུམ་གཅོད་པའོ། །ཞེས་གསུངས་པ་ནི་མི་འཐད་དེ། བྱང་སར་བྱང་ཆུབ་སེམས་དཔའི་ཚུལ་ཁྲིམས་ཀྱི་བསླབ་པ་གསུམ་གྱི་ནང་མཚན་ཉེས་སྤྱོད་སྤོང་བའི་ཚུལ་ཁྲིམས་ནི་བྱང་ཆུབ་སེམས་དཔའི་རྒྱུད་ཀྱི་སོ་ཐར་རིགས་བདུན་ཉིད་ལ་མཛད་པའི་ཕྱིར་དང་། རིགས་ལྔ་སྤྱིའི་དམ་ཚིག་གི་ནང་དུ་སོ་སོའི་དམ་ཚིག་རྣམས་འདུས་པས་རིག་པ་འཛིན་པའི་བསླབ་པ་ཐམས་ཅད་བྱང་སེམས་ཀྱི་སྡོམ་པར་འདུས་པའི་ཕྱིར་རོ། །དེས་ན་ས་པཎ་གྱིས་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་མི་མཐུན་ཕྱོགས་སྤོང་བའི་སེམས་པ་རྒྱུན་ཆགས་པ་ཞེས་གསུངས་པ་འདི་ཉིད་ལེགས་ཏེ་མཐར་ཐུག་ཐེག་པ་གཅིག་པའི་ལུགས་ལ་ཐེག་པ་གསུམ་གྱི་སྒྲུབ་པ་ཐམས་ཅད་རྫོགས་པའི་བྱང་ཆུབ་ཀྱི་སྒྲུབ་པ་ཡིན་མོད་ཀྱི་ཐེག་པ་འོག་མ་གཉིས་ཀྱི་སྒྲུབ་པ་ལས་དམིགས་པ་སོགས་བདུན་གྱི་སྒོ་ནས་ཁྱད་པར་དུ་འཕགས་པ་ནི་ཐེག་ཆེན་གྱི་སྒྲུབ་པ་ཡིན་ལ། དེ་ལ་མི་མཐུན་པའི་ཕྱོགས་སྤོང་བའི་སེམས་པ་ཡོད་ན་སྡོམ་པར་འགྱུར་བར་གསུངས་པའི་ཕྱིར་རོ། །གཉིས་པ་དེ་ཡང་དག་པར་བླང་བའི་ཚུལ་ལ་གསུམ་སྟེ། བླང་བའི་ཡུལ་ལེན་པའི་ཆོ་ག ཇི་ལྟར་བླང་བའི་ཚུལ་ལོ། །དང་པོ་གཉིས་ནི་སྔར་བཤད་ཟིན་ཏོ། །ལེན་པའི་ཚུལ་ལ་སེམས་ཙམ་ལུགས་ཀྱིས་ངེས་པ་ལྔ་བྲལ་དགོས་པས་བྱང་ཆུབ་མ་ཐོབ་ཀྱི་བར་དུ་བླང་བའི་ཚུལ་ཁོ་ན་གསུངས་ཤིང་དབུ་མ་ལུགས་ལ་དུས་ཉིན་ཞག་གཅིག་དང་། ཟླ་བ་དང་ལོ་དང་ཇི་སྲིད་འཚོའི་བར་དང་། བྱང་ཆུབ་མ་ཐོབ་ཀྱི་བར་རང་ཇི་ཙམ་ནུས་པ་དང་བསླབ་བྱའང་ཇི་ཙམ་སློབ་ནུས་པ་སློབ་པའི་ཚུལ་སྔར་བླ་མ་གོང་མ་རྣམས་གསུངས་སོ། །གསུམ་པ་བླངས་ནས་བསླབ་པར་བྱ་བ་ལ་གསུམ་སྟེ། སྤྱིར་བྱང་ཆུབ་སེམས་དཔའི་ལས་མཐའི་དབྱེ་བ་བསམ་པ། དེ་ལ་ཚུལ་ཁྲིམས་གསུམ་གྱིས་ཇི་ལྟར་བསླབ་པའི་ཚུལ་བྱ་བ་ཐམས་ཅད་ཐེག་པ་ཆེན་པོའི་ཕྱག་རྒྱ་ལས་མི་འདའ་བའོ། །དང་པོ་ལ་གསུམ་སྟེ། འདོད་པ་དང་མི་འདོད་པའི་དོན་ངོས་གཟུང་བ། བདག་དང་གཞན་གྱི་རྒྱུད་ངོས་གཟུང་བ། དེ་དག་ལ་ལས་མཐའི་དབྱེ་བའོ། །དང་པོ་ལ་འདོད་པ་ནི་འཕྲལ་གྱི་བདེ་བ་དང་ཡུན་གྱི་ཕན་པ་སྟེ་ཚེ་འདི་ཉིད་ཀྱི་འཕྲལ་ཕུགས་དང་། འདི་དང་ཕྱི་མའི་དང་མཐོ་རིས་དང་ཐར་པའི་དོན་ཡིན་ལ་མི་འདོད་པ་ནི་བཟློག་པ་སྟེ་འཕྲལ་དུ་སྡུག་པ་དང་ཡུན་དུ་གནོད་པ་ཡིན་ནོ། །གཉིས་པ་ནི། བདག་དང་གཞན་ཞེས་པ་ནི་འདིར་སེམས་བསྐྱེད་རྒྱུད་གཅིག་གིས་བསྡུས་པ་དང་། རྒྱུད་ཐ་དད་ཀྱིས་བསྡུས་པའོ། །གསུམ་པ་ལ་དབྱེ་སྒོ་གསུམ་སྟེ། དོན་གྱི་དབྱེ་བ་ལ་བདེ་བ་དང་ཕན་པ་དང་གཉིས་ཀ་བ་གསུམ་དང་སྡུག་པ་དང་གནོད་པ་དང་གཉིས་ཀ་བ་གསུམ་དང་། སྡུག་ལ་ཕན་པ་དང་བདེ་ལ་གནོད་པ་གཉིས་ཏེ་བརྒྱད་དང་། རྒྱུད་ཀྱི་དབྱེ་བ་ལ་བདག་གཞན་གཉིས་ཀའི་འདོད་པ་གསུམ་དང་། བདག་གཞན་གཉིས་ཀའི་མི་འདོད་པ་གསུམ་དང་། གཞན་འདོད་ལ་བདག་མི་འདོད་པ་དང་། བདག་འདོད་ལ་གཞན་མི་འདོད་པ་གཉིས་ཏེ་བརྒྱད། དོན་རྒྱུད་གཉིས་ཀ་བསྣོལ་བའི་དབྱེ་བ་བདག་སྡུག་ཅིང་གཞན་ལ་ཕན་པ་དང་། བདག་བདེ་ཞིང་གཞན་ལ་གནོད་པ་དང་། བདག་ལ་ཕན་ཞིང་གཞན་ལ་སྡུག་པ་དང་། བདག་ལ་གནོད་ཅིང་གཞན་བདེ་བ་བཞི་དང་། དེ་ལྟར་ན་ཉི་ཤུ་ཐམ་པ་སྟེ། བྱང་ཆུབ་སེམས་དཔའི་འཇུག་ལྡོག་གི་ལས་མཐའ་ནི་འདི་དག་ཙམ་དུ་ཟད་དོ། །གཉིས་པ་དེ་ལ་ཚུལ་ཁྲིམས་གསུམ་གྱིས་ཇི་ལྟར་བསླབ་པ་ལ་གསུམ་སྟེ། དོན་རྒྱུད་མ་བསྣོལ་བ་ཚུལ་ཁྲིམས་གསུམ་གྱི་བྱ་བ་སྤྱིར་བསྟན་པ། དོན་བསྣོལ་བ་དང་རྒྱུད་མ་བསྣོལ་བ་ལ་རིགས་ཀྱི་དམིགས་བསལ་གྱི་བྱ་བ། གཉིས་ཀ་བསྣོལ་བ་ལ་རིགས་དང་། སྟོབས་ཀྱི་དམིགས་བསལ་བ་དང་ཡང་བསལ་བྱ་བའོ། །དང་པོ་ནི་བདག་ཉིད་ཀྱི་དོན་མེད་པའི་སྡུག་གནོད་གཉིས་ཀ་བ་གསུམ་སྤོང་བ་ནི་སྡོམ་པའི་ཚུལ་ཁྲིམས་ཡིན་ཏེ། དེའང་སྔར་སྨོན་པའི་བསླབ་བྱ་བཤད་པ་བས་ཁྱད་པར་དུ་ཆེས་ཆེར་སློབ་པའོ། །བདག་ཉིད་ཀྱི་ཉེས་མེད་ཀྱི་བདེ་ཕན་གཉིས་ཀ་བ་གསུམ་བྱེད་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས་ཡིན་ཏེ། དེའང་སྔར་བསྟན་པའི་ཕ་རོལ་ཏུ་ཕྱིན་པའི་དགེ་ཚོགས་སྒྲུབ་པར་ཁས་བླངས་པ་ཉིད་ལས་ཉམས་ན་ཕྱིར་བཅོས་པ་དང་བཅས་ཏེ་ཆེས་ཆེར་སློབ་པའོ། །གཞན་གྱི་ཉེས་མེད་ཀྱི་བདེ་ཕན་གཉིས་ཀ་བ་གསུམ་དུ་བྱེད་ཅིང་། སྡུག་གནོད་གཉིས་ཀ་བ་གསུམ་སྤོང་བ་ནི་སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ཡིན་ཏེ། དེའང་སྔར་བསྟན་པའི་བྱ་བར་ཁས་བླངས་པ་ལས་ཉམས་ན་ཕྱིར་བཅོས་པ་དང་བཅས་པས་ཆེས་ཆེར་སློབ་པའོ། །གཉིས་པ་ལ་རྒྱུད་གཅིག་ལ་དོན་བསྣོལ་བའི་སྡུག་ཀྱང་ཕན་པ་དང་། བདེ་ཡང་གནོད་པ་སྟེ། དེ་དག་ལ་རིགས་ཀྱིས་དམིགས་བསལ་བྱ་སྟེ། སྨན་དཔྱད་དང་དཀའ་ཐུབ་ལ་སོགས་པ་བདག་གམ་གཞན་ལ་ཡུན་དུ་ཕན་ན་འཕྲལ་དུ་སྡུག་ཀྱང་བྱ་ཞིང་། འདོད་ལོག་ལ་སོགས་པ་འཕྲལ་དུ་བདེ་ཡང་ཡུན་དུ་གནོད་པའི་ལས་མི་བྱའོ། །དོན་གཅིག་གི་རྒྱུད་བསྣོལ་བ་ནི་གཞན་འདོད་ལ་བདག་མི་འདོད་པ་དང་། བདག་འདོད་ལ་གཞན་མི་འདོད་པ་གཉིས་དམིགས་བསལ་བྱ་སྟེ། ལམ་དང་ཁ་ཟས་ལ་སོགས་པ་གཞན་འདོད་ན་བདག་མི་འདོད་ཀྱང་བྱ་ཞིང་གཞན་མི་འདོད་ན་བདག་འདོད་ཀྱང་མི་བྱའོ། །གསུམ་པ་གཉིས་ཀ་བསྣོལ་བ་ལ། བྱ་བའི་གཙོ་བོ་མཐུན་པ་དང་མི་མཐུན་པ་གཉིས་ལས། མཐུན་པ་ནི་བདག་སྡུག་ཀྱང་གཞན་ལ་ཕན་པ་དང་། བདག་བདེ་ཡང་གཞན་ལ་གནོད་པ་གཉིས་ཏེ། དོན་རྒྱུད་གཉིས་ཀའི་རིགས་ཀྱི་དམིགས་བསལ་གྱིས་དང་པོ་བྱ་ཞིང་གཉིས་པ་མི་བྱའོ། །མི་མཐུན་པ་ནི་བདག་ལ་ཕན་ཡང་གཞན་སྡུག་པ་དང་། བདག་ལ་གནོད་ཅིང་གཞན་ལ་བདེ་བ་སྟེ་འདི་གཉིས་བྱང་ཆུབ་སེམས་དཔའ་དད་པས་འཇུག་པའི་དོན་གཙོ་བོར་བྱེད་པས་རྒྱུད་ཀྱི་དམིགས་བསལ་ལ་དོན་གྱི་རིགས་ཀྱིས་ཡང་བསལ་བྱ་སྟེ། དང་པོ་བྱེད་ཅིང་གཉིས་པ་མི་བྱེད་དོ། །བྱང་ཆུབ་སེམས་དཔའ་ཁ་ཅིག་ནི་རྒྱུད་གཙོ་བོར་བྱས་ཏེ་དོན་གྱི་དམིགས་བསལ་ལ་རྒྱུད་ཀྱིས་ཡང་བསལ་བྱས་ནས་གཉིས་པ་བྱེད་ཅིང་དང་པོ་མི་བྱེད་དོ། །དེས་ན་དེ་ལ་ཡང་བསལ་བཞིར་འགྱུར་རོ། །དེ་བཞིན་དུ་སྔར་གྱི་དོན་གྱི་དམིགས་བསལ་གཉིས་ལའང་ཕན་གནོད་པས་བདེ་སྡུག་ཆེ་ན་སྟོབས་ཀྱིས་ཡང་བསལ་བྱ་བ་གཉིས་དང་། རྒྱུད་ཀྱི་དམིགས་བསལ་གཉིས་ལའང་གཞན་གྱི་བས་རང་གི་འདོད་མི་འདོད་ཆེ་ན་སྟོབས་ཀྱིས་ཡང་བསལ་བྱ་བ་གཉིས་དང་། དོན་རྒྱུད་གཉིས་ཀའི་དམིགས་བསལ་གཉིས་ལའང་གཞན་གྱི་ཕན་གནོད་པས་བདག་གི་བདེ་སྡུག་སྟོབས་ཆེ་ན་སྟོབས་ཀྱིས་ཡང་བསལ་ཡང་དཔྱད་པར་བྱའོ། །དེ་ལྟར་ན་དོན་རྒྱུད་མཐུན་པ་སྤྱིར་བསྟན་པའི་བྱ་བ་བཅུ་གཉིས་དང་། དོན་དང་རྒྱུད་གཉིས་ཀའི་སྒོ་ནས་དམིགས་བསལ་གྱི་བྱ་བ་དྲུག་དང་། རིགས་དང་སྟོབས་ཀྱི་སྒོ་ནས་ཡང་བསལ་གྱི་བྱ་བ་བཅུ་སྟེ། བྱང་ཆུབ་སེམས་དཔའི་འཇུག་ལྡོག་གི་བྱ་བ་ནི་ཉི་ཤུ་རྩ་བརྒྱད་ཁོ་ནའོ། །དེ་ལྟར་སྤྱིར་བསྟན་པ་དང་། དམིགས་བསལ་དང་ཡང་བསལ་གྱི་སྤྱོད་པ་དེ་དག་ནི་རིམ་པ་བཞིན་ཚུལ་ཁྲིམས་གསུམ་གྱི་ཡུལ་ཆེ་བས་རྒྱ་ཆེ་བའི་དང་འཕྲལ་གྱི་བདེ་སྡུག་བས་ཕུགས་ཀྱི་ཕན་གནོད་ལ་རྟོགས་པས་རླབས་པོ་ཆེའི་དང་། དད་པ་དང་སྙིང་རྗེའི་རྗེས་སུ་འབྲང་བས་སྐྱེས་བུ་དམ་པའི་དང་། དོན་རྒྱུད་ཀྱི་ཡུལ་སྟོབས་ཀྱིས་བླང་དོར་གཞན་གྱིས་རྟོགས་དཀའ་བས་ཟབ་པའི་སྤྱོད་པ་ཞེས་བྱ་བར་འགྱུར་རོ། །གསུམ་པ་དེ་ལྟར་སྤྱོད་པ་ཐམས་ཅད་ཐེག་པ་ཆེན་པོའི་ཕྱག་རྒྱ་ལས་མི་འདའ་བ་ནི་བྱང་ཆུབ་སེམས་དཔས་གང་ཅི་སྤྱད་པ་ཐམས་ཅད་ཀུན་སློང་བྱང་ཆུབ་ཀྱི་སེམས་དང་ཆེད་དུ་བྱ་བ་སེམས་ཅན་གྱི་དོན་དང་། ལྟ་བ་ཐམས་ཅད་སྟོང་པ་ཉིད་དང་བྱ་བ་ཐམས་ཅད་དོན་ཆེ་བ་ལ་འཇུག་པ་སྟེ། དེ་དག་ལས་གཅིག་མ་ཚང་ཡང་ཐེག་པ་ཆེན་པོའི་ལྟུང་བར་འགྱུར་ཞིང་ལམ་དུ་མི་ཚུད་པའི་ཕྱིར་རོ། །གསུམ་པ་དེ་ལྟར་སྨོན་འཇུག་གི་བསམ་པ་དང་། སྦྱོར་བའི་བསླབ་པ་དེ་དག་ཕུན་སུམ་ཚོགས་པའི་ཡན་ལག་གསུམ་སྟེ། རྗེས་སུ་མཐུན་པའི་གྲོགས། མཁས་པར་བྱ་བ་ལ་མཁས་པ། བླང་དོར་ལ་བག་ཡོད་པའོ། །དང་པོ་ནི་ལྟ་སྤྱོད་མཐུན་པ། ཡོན་ཏན་གྱིས་མཐོ་བ། ཆོས་ལ་གཞོལ་བ། འགྲོགས་ན་ཡོན་ཏན་གྱི་ཁྱད་པར་ཐོབ་པའི་གྲོགས་དང་འགྲོགས་ན་མི་ཉམས་པ་དང་འཕེལ་བའི་རྐྱེན་བྱེད་པ་ཡིན་ཏེ། དམ་པའི་གྲོགས་ཀྱིས་ཁྱོད་བསྐོར་ན། །ཡོན་ཏན་ཕུན་སུམ་ཚོགས་པར་འགྱུར། །ཞེས་གསུངས་པ་ལྟར་རོ། །གཉིས་པ་ནི་རང་གི་བྱ་བ་ལས་ཉེས་པ་སྤོང་བ་དང་། དགེ་བར་སྒྲུབ་པ་དང་། སེམས་ཅན་གྱི་དོན་བྱ་བ་ལ་མཁས་པ་གསུམ་ལས། དང་པོ་ནི་ཁ་ན་མ་ཐོ་བ་ཤིན་ཏུ་ཕྲ་བ་ལའང་འཇིགས་པ་བསྐྱེད་པ་དང་། ངོ་ཚ་ཁྲེལ་ཡོད་ཀྱིས་འཛེམ་བཞིན་དུ་སྤྱོད་པ་དང་། ཆེན་པོ་སྤང་བའི་ཕྱིར་ཆུང་ངུ་སྤྱོད་པ་དང་། དུས་དྲན་གྱི་སྒོ་ནས་ཉོན་མོངས་ཉེས་སྤྱོད་རྣམས་དང་པོ་ནས་མི་འབྱུང་བའི་ཐབས་དང་། སྐྱབས་འགྲོ་སེམས་བསྐྱེད་སྡོམ་པ་གསུམ་གྱི་བཅས་པ་དང་། རང་བཞིན་གྱི་སྡིག་པ་བྱས་པ་རྣམས་བྱིན་རླབས་ཀྱིས་མི་འཕེལ་བ་དང་། ཡང་ཡང་ཉམས་པ་རྣམས་སོ་སོའི་ཆོ་གས་ཕྱིར་བཅོས་པ་དང་། རབ་བྱུང་གི་རྩ་ལྟུང་བྱུང་ནའང་རྟེན་དེ་ཉིད་ཀྱིས་ཐེག་པ་ཆེན་པོའི་སེམས་བསྐྱེད་ཀྱི་སྡོམ་པ་ལ་བརྟེན་ནས་ལས་སྒྲིབ་བཤགས་པའི་སྒོ་ནས་བྱུང་བ་ཕྱིར་བཅོས་ལ་མཁས་པའོ། །གཉིས་པ་ལ་གཉིས་ཏེ། དགེ་བ་མངོན་པར་བསྒྲུབ་པ་ལ་མཁས་པ་དང་། སྤེལ་བ་ལ་མཁས་པའོ། །དང་པོ་ལ་གསུམ་སྟེ། དགེ་བ་ཅི་ལྟར་བྱ་བའི་རིམ་པ་ལ་མཁས་པ་དང་། དགེ་བ་རྒྱ་བསྐྱེད་པ་དང་། ཐམས་ཅད་ཚོགས་སུ་བསྒྱུར་བའོ། །དང་པོ་ནི་རྟོག་པ་སྔོན་དུ་གཏོང་བས་དགེ་བ་གང་བྱེད་པ་དེའི་བྱ་བའི་གོ་རིམ་མ་ནོར་བ་དང་། ཆུང་རིམ་ནས་མི་སུན་པར་བསླབ་པའོ། །གཉིས་པ་ནི་སྦྱིན་པ་ལ་སོགས་པའི་དངོས་པོ་ཉིད་རྒྱ་བསྐྱེད་པ་དང་། བསམ་པ་རྒྱ་བསྐྱེད་པ་ཀུན་སློང་བྱང་ཆུབ་ཀྱི་སེམས་དང་། ཕྱག་དང་མཆོད་པ་ལ་སོགས་པ་བྱེད་པ་པོ་དང་། ཞིང་དང་བྱ་བ་བློས་སྤྲུལ་པ་དང་། གཞན་གྱི་དགེ་བ་ལ་རྗེས་སུ་ཡི་རང་བར་བྱ་བ་དང་། སྦྱོར་བ་རྒྱ་བསྐྱེད་པ་སྦྱོར་བ་ཅི་བྱེད་ཐམས་ཅད་གཞན་ཡང་བྱེད་དུ་འཇུག་ཅིང་བྱེད་པའི་བསྔགས་པའང་བརྗོད་པའོ། །གསུམ་པ་ལ་གསུམ་སྟེ། བྱེད་སྣང་ཐམས་ཅད་དགེ་བའི་ཚོགས་སུ་བསྒྱུར་བ་དང་། ལུས་སེམས་ཀྱི་མྱོང་བ་ཐམས་ཅད་ཚོགས་སུ་བསྒྱུར་བ་དང་། སྣོད་བཅུད་ཀྱི་སྣང་བ་ཐམས་ཅད་ལམ་དུ་བྱ་བའོ། །དང་པོ་ནི་བདག་གི་སྒོ་གསུམ་གྱིས་ཅི་བྱེད་ཐམས་ཅད་སངས་རྒྱས་ཐོབ་པའི་ཕྱིར་རོ། །ཞེས་འཕེན་པས་བྱ་བྱེད་ཐམས་ཅད་ཚོགས་སུ་བསྒྱུར་བ་དང་། དངོས་སུ་ཆོས་བྱེད་པ་དང་། དེའི་མཐུན་རྐྱེན་བསྒྲུབ་པ་དང་། འགལ་རྐྱེན་བསལ་བའི་སྒོ་ནས་བྱེད་པ་ཚོགས་སུ་བསྒྱུར་བ་དང་། བྱ་བ་ཐམས་ཅད་ལ་སྤྱོད་ཡུལ་ཡོངས་སུ་དག་པའི་མདོ་བཞིན་དུ་སྨོན་ལམ་གྱི་འདུན་པས་བྱ་བ་ཐམས་ཅད་ཚོགས་སུ་བསྒྱུར་བའོ། །གཉིས་པ་ནི་བདག་གི་གནས་སྐབས་ལུས་སེམས་ལ་མི་འདོད་པའི་སྡུག་བསྔལ་བྱུང་བའི་ཚེ་འདི་ནི་བདག་ཉིད་ཀྱིས་མི་དགེ་བ་བྱས་པའི་འབྲས་བུ་ཡིན་ངེས་སོ་ཞེས་ཡིད་ཆེས་པའི་དད་པ་དང་ཕྱིན་ཆད་འདི་འདྲ་བ་འབྱུང་བའི་ལས་མི་བྱའོ་ཞེས་སྡིག་པ་ལས་བཟློག་པ་དང་། བདག་གི་སྡུག་བསྔལ་འདིས་བདག་དང་སེམས་ཅན་ཐམས་ཅད་ཀྱི་སྡུག་བསྔལ་ཟད་པར་གྱུར་ཅིག ཅེས་མི་འདོད་པ་ལ་བརྟེན་ནས་དགེ་བའི་སེམས་གསུམ་བསྐྱེད་པ་དང་བདག་ལ་བདེ་བ་དང་སྐྱིད་པ་བྱུང་བའི་ཚེ་འདི་ནི་སྔོན་ཆད་དགེ་བ་བྱས་པའི་འབྲས་བུ་ཡིན་ནོ་ཞེས་དང་། ད་དུང་དགེ་བ་བྱའོ་ཞེས་དང་། སེམས་ཅན་རྣམས་ཀྱིས་ཀྱང་འདི་འདྲ་བའི་བདེ་སྐྱིད་ཐོབ་པར་གྱུར་ཅིག་ཅེས་འདོད་པ་ལ་བརྟེན་ནས་དགེ་བའི་སེམས་གསུམ་བསྐྱེད་པར་བྱའོ། །གསུམ་པ་ལ་སེམས་ཅན་གྱི་གནས་སྐབས་ལམ་དུ་བྱ་བ་ནི་སེམས་ཅན་འབྲས་བུ་འབྱོར་པར་ལྡན་པ་དང་། རྒྱུ་ལེགས་པ་སྤྱོད་པའི་མཆོག་རྣམས་ལ་རྗེས་སུ་ཡི་རང་བར་བྱ་བ་དང་། འབྲས་བུ་རྒུད་པ་དང་། རྒྱུ་ཉེས་སྤྱོད་ལ་ཞུགས་པའི་དམན་པ་རྣམས་ལ་སྙིང་རྗེ་བསྒོམ་པའོ། །བྱེ་བྲག་ཏུ་བདག་ལ་ཕན་བྱེད་རྣམས་ལ་བྱས་པ་ཤེས་པ་དང་། ཆགས་པ་སྤོང་བ་དང་། ཆོས་ཀྱི་དྲིན་ལན་བསབ་པའི་དགེ་བ་དང་། གནོད་བྱེད་རྣམས་ལ་ཕན་འདོགས་བྱེད་དང་། འཁྲུལ་པར་བསམ་ཏེ་བྱམས་སྙིང་རྗེ་བསྒོམས་པས་ལམ་དུ་བྱ་བའོ། །སྣོད་ཀྱི་འཇིག་རྟེན་ཡང་སེམས་ཅན་རྣམས་ཀྱི་ལས་ཀྱི་འབྲས་བུ་ལྟ་སྟེ་བཟང་བ་མཐོང་ན་དེ་ལ་ལྟོས་པའི་ལས་བསགས་པ་དང་། ངན་པ་སྙིང་རྗེ་དང་བདག་གིས་སངས་རྒྱས་ཀྱི་ཞིང་ཡོངས་སུ་དག་པ་བསྒྲུབ་པའི་དམིགས་རྐྱེན་དུ་བྱ་བའོ། །གསུམ་པ་དགེ་བ་སྤེལ་བ་ལ་མཁས་པ་ནི། དགེ་བའང་འཛད་པའི་རྒྱུ་འགྱོད་པ་དང་། བཀྱོྃན་པ་དང་རྩ་བའི་ལྟུང་བ་དང་། ཡུལ་ཁྱད་པར་ཅན་ལ་ལོག་པར་བསྒྲུབ་པ་ལ་སོགས་པ་ལ་བག་བྱ་བ་དང་། རང་གཞན་གྱིས་བྱས་པ་ལ་རྗེས་སུ་ཡི་རང་བ་བྱ་བ་དང་། དགེ་བའི་སྦྱིན་པ་གོང་ནས་གོང་དུ་རྣམ་པར་སྤེལ་བའོ། །གསུམ་པ་སེམས་ཅན་གྱི་དོན་བྱ་བ་ལ་མཁས་པ་ནི་བསམ་འབྱོར་གཉིས་ཀ་འཛོམས་པས་གདུལ་བྱ་རྗེས་སུ་བཟུང་བ་ལ་མཁས་པ་དང་། བསམ་པ་འཇམ་ཞིང་སྦྱོར་བ་རྩུབ་པས་ཚར་གཅོད་པ་ལ་མཁས་པར་བྱ་བའོ། །གསུམ་པ་བླང་དོར་ལ་བག་ཡོད་པར་བྱ་བ་ནི། ཁས་བླངས་པའི་བསླབ་བྱ་དེ་དག་ལས་དྲན་པ་དང་། ཤེས་བཞིན་དང་ངོ་ཚ་ཁྲེལ་ཡོད་སྔོན་དུ་འགྲོ་བས་ལྡོག་པ་དང་འཇུག་པའི་བག་ཡོད་པས་ཁས་བླངས་པའི་བསླབ་བྱ་དང་། ཐོབ་པའི་གནས་མི་ཉམས་པར་བྱ་བའི་ཕྱིར་བསླབ་དགོས་ཏེ། ལུང་དག་ལས། དགེ་བའི་ཆོས་སུ་བརྗོད་པ་ཇི་སྙེད་པ། །ཀུན་གྱི་རྩ་བ་བག་ཡོད་འདི་ཡིན་ཏེ། །ཞེས་སོགས་མང་དུ་གསུངས་སོ། །དེ་དག་གིས་ནི་སྟོང་པ་ཉིད་ལ་མོས་པ་ཙམ་བྱ་སྟེ། ཀུན་རྫོབ་ལ་དམིགས་པའི་ཐབས་ཀྱིས་བསོད་ནམས་ཀྱི་ཚོགས་གཙོ་བོར་གསོག་པ་བསྟན་ཟིན་ནས། ད་ནི་གཉིས་པ་དོན་དམ་ལ་དམིགས་པའི་ཤེས་རབ་ཀྱིས་ཡེ་ཤེས་ཀྱི་ཚོགས་གཙོ་བོར་གསོག་པ་ལ་གསུམ་སྟེ། ཤེས་རབ་ཀྱི་བྱེད་པ་ཞི་གནས་ལ་ལྟོས་པ། དེས་ན་ཐོག་མར་ཞི་གནས་བསྐྱེད་པ། ཞི་གནས་གྲུབ་ནས་ཤེས་རབ་བསྒོམ་པའོ། །དང་པོ་ནི། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །ཞེས་གསུངས་པའི་ཚུལ་གྱིས་ཏིང་ངེ་འཛིན་མེད་ན་ལུས་སེམས་རྒུད་པས་བཟླས་བརྗོད་ལ་སོགས་པའི་དགེ་བའང་མཐུ་ཆུང་བ་དང་། ཐོས་བསམ་གྱི་ཤེས་རབ་ཙམ་གྱིས་སྟོང་པ་ཉིད་ཀྱི་རོ་མི་མྱོང་ཞིང་ཉོན་མོངས་མི་སྤོང་བས་རང་དོན་གྱི་མཐུ་ཆུང་ལ། མངོན་ཤེས་མེད་པས་གཞན་དོན་ཡང་མི་ནུས་པས་ཐོག་མ་སེམས་ལས་སུ་རུང་བའི་ཞི་གནས་བཙལ་བར་བྱ་སྟེ། འདི་ལ་དགོངས་ནས་བསླབ་པ་ཕྱི་མ་གཉིས་དང་། ཕ་རོལ་ཏུ་ཕྱིན་པ་ཕྱི་མ་གཉིས་ཀྱི་གོ་རིམ་ཡང་དེ་ལྟར་གསུངས་སོ། །གཉིས་པ་ལ་གསུམ་སྟེ། ཞི་གནས་ཀྱི་ཚོགས་ལ་གནས་པ། དེས་ཉེར་བསྡོགས་བསྐྱེད་པ། དེས་བསམ་གཏན་གྱི་དངོས་གཞི་བསྐྱེད་པའོ། །དང་པོ་ལ་གང་དུ་བསྒྲུབ་པའི་གནས་དང་། གང་དང་སྒྲུབ་པའི་གྲོགས་དང་། དེ་བྱ་བའི་རིམ་པ་དང་གསུམ་ལས། དང་པོ་ནི། གནས་བྱིན་གྱིས་བརླབས་པའི་བཀྲ་ཤིས་པ་ཡིད་དང་མཐུན་པ། འདུ་འཛི་དང་འཚེ་བས་དབེན་པར་གྲོགས་ཏིང་ངེ་འཛིན་གྱི་ཉམས་ཅན་བླ་མ་ཉིད་དམ་རྗེས་སུ་མཐུན་པ་ལ་བརྟེན། དེར་བྱ་བའི་རིམ་པ་ནི། འཇིག་རྟེན་གྱི་བྱ་བ་དང་། འདོད་པ་དང་གནོད་སེམས་ལ་སོགས་པ་སྤྲོས་པའི་རྣམ་རྟོགས་ཐམས་ཅད་དོར་བ་དང་། རྟེན་ཁྱད་པར་ཅན་བཞུགས་པ་ལ་མཆོད་པ་དང་། ཆོས་སྐྱོང་དང་འབྱུང་པོ་ལ་གཏོར་མ་དང་། གསོལ་བ་གདབ་པ་དང་བཟླས་བརྗོད་ལ་སོགས་པས་བར་གཅོད་ཟློག་པ་དང་། དེ་བཞིན་གཤེགས་པའི་ཡི་གེ་བརྒྱ་པ་ལ་སོགས་པས་སྡིག་སྒྲིབ་སྦྱོང་བའི་སྒོ་ནས་སྐྱེ་བའི་གེགས་བསལ་བ་དང་ལུས་ངག་ཡིད་གསུམ་དམ་པའི་སྤྱོད་ལམ་དང་། ཟས་ལ་སོགས་པ་འཚམ་པའི་འཚོ་བ་དང་མཚན་མོ་སྟོད་སྨད་ཀྱི་རྣལ་འབྱོར་གྱིས་མཐུན་པའི་རྒྱུ་བསྟན་པ་དང་། གནས་སྐབས་ཐམས་ཅད་དུ་དྲན་ཤེས་བག་ཡོད་དང་ལྡན་པས་གཞི་ཚུལ་ཁྲིམས་ལ་སོགས་པའི་ཐབས་ལམ་མ་ཉམས་པར་བྱ་བའོ། །གཉིས་པ་ལ་གསུམ་སྟེ། དམིགས་པའི་ཁྱད་པར་ངོས་གཟུང་། དེ་ལ་སེམས་གཞག་པའི་ཐབས། ལེགས་པར་ཟིན་པའི་རྟགས་སོ། །དང་པོ་ནི། སྤྱིར་དམིགས་པ་གང་ཡང་རུང་བ་གཅིག་ལ་ཞེས་འབྱུང་སྟེ། མེ་ཏོག་སྔོན་པོ་ལ་སོགས་པའི་རྟེན་མཛེས་པ་ཉེ་རིང་རན་པ་མི་གཡོ་བ་ཞིག་ལ་དམིགས་པས་ཀྱང་སྐྱེ་མོད་ཀྱི། འོན་ཀྱང་གཞུང་ནས་བསྔགས་པ་བྱིན་རླབས་འབྱུང་བས་སྤྱིར་ཁ་ཕྱིར་ལྟ་ལྷ་སྐུ་དང་། ཟད་པར་ཟིན་གནོན་དང་བྱམས་སྙིང་རྗེ་ལ་དམིགས་པ་དང་། ནང་ལྟ་རང་གི་ལུས་ཀྱི་ཀེང་རུས་དང་ལུས་ལ་བརྟེན་པའི་རྩ་རླུང་ལ་སོགས་པ་ལ་དམིགས་པའི་ཚུལ་གཉིས་བཤད་པ་ལས་འདིར་ནི་མདོ་ལས། གསེར་གྱི་ཁ་དོག་ལྟ་བུའི་སྐུ་ལུས་ཀྱི། །ཞེས་འབྱུང་བས་ལྷའི་སྐུ་ལ་བསླབ་པར་བྱའོ། །གཉིས་པ་ལ་མཉམ་རྗེས་གཉིས་ལས། དང་པོ་ལ་སྦྱོར་དངོས་རྗེས་གསུམ་ལས། དང་པོ་ནི། བྱང་ཆུབ་ཀྱི་སེམས་ཀྱིས་ཀུན་ནས་བསླངས་པས་དཀོན་མཆོག་དང་བླ་མ་ལ་ཕྱག་དང་མཆོད་པ་ལ་སོགས་པའི་ཡན་ལག་བདུན་པ་བྱས་ནས་གསོལ་བ་དྲག་ཏུ་བཏབ་སྟེ་སྟོན་པ་བྱང་ཆུབ་ཀྱི་ཤིང་དྲུང་ན་བཞུགས་པའི་སྤྱོད་ལམ་གྱིས་འདུག་པར་བྱའོ། །དེ་ནས་དངོས་གཞི་ནི། ཏིང་ངེ་འཛིན་གྱི་ཕན་ཡོན་ལ་སྤྲོ་བས་དམིགས་རྟེན་བརྟན་པར་བྱས་ཏེ། དེ་ལ་སེམས་རྩེ་གཅིག་ཏུ་གཞག་པའི་ཐབས་དགོས་ཏེ་མདོ་ལས་སེམས་འཇོག་ཀུན་ཏུ་འཇོག ངེས་པར་འཇོག་ཉེ་བར་འཇོག་དུལ་བར་བྱེད་ཞི་བར་བྱེད་ཉེ་བར་ཞི་བར་བྱེད་རྒྱུད་གཅིག་ཏུ་བྱེད་མཉམ་པར་འཇོག་པར་བྱེད་ཅེས་སེམས་གནས་པའི་ཐབས་དགུས་གནས་པར་གསུངས་པའི་དང་པོ་སེམས་འཇོག་པ་ནི། དམིགས་པའི་རྟེན་དེ་ཉིད་ལ་ཉིན་པར་མིག་གི་ཤེས་པ་དང་ཡིད་ཤེས་གཉིས་རྩེ་གཅིག་ཏུ་གཏད་ཅིང་རྣམ་པ་གསལ་པོའི་སྒོ་ནས་བསྒོམས་ལ། མཚན་མོར་དམིགས་རྟེན་དྲན་པའི་སྒོ་ནས་རྩོལ་བ་བསྒྲིམས་ཏེ་རྩེ་གཅིག་ཏུ་བཞག་པའོ། །གཉིས་པ་ཀུན་ཏུ་འཇོག་པ་ནི་སྔར་གྱི་དམིགས་པའི་རྒྱུན་དེ་ཉིད་སྐྱོང་བའོ། །གསུམ་པ་ངེས་པར་འཇོག་པ་ནི་ཤེས་པ་ཕྱིར་འཕྲོ་ན་ངའི་ཤེས་པ་རྒོད་པར་སོང་སྙམ་དུ་ཤེས་པ་དྲན་པ་མྱུར་དུ་བླན་ཏེ། རིངས་པར་བླངས་ལ་བློ་འཇོག་པའོ། །བཞི་པ་ཉེ་བར་འཇོག་པ་ནི་དམིགས་པ་གཅིག་གིས་སེམས་སྐྱོ་ན་མེ་ཏོག་སེར་པོའམ་ལྷའི་གཙུག་ཏོར་ལྟ་བུ་ལ་ཐུན་རེ་རེ་ཙམ་བསྒོམས་པས་དབུགས་དབྱུང་ལ་ཡང་སྔར་གྱི་དེ་ཉིད་བསྒོམ་པར་བྱའོ། །ལྔ་པ་དུལ་བར་བྱེད་པ་ནི་ཏིང་ངེ་འཛིན་ལ་ཡོན་ཏན་དཔག་ཏུ་མེད་པ་ཡོད་པར་ཤེས་པར་བྱས་ལ་སྤྱོད་ལམ་ཐམས་ཅད་དུའང་དམིགས་པ་གསལ་བ་མེད་ཀྱང་དམིགས་རྐྱེན་གྱི་རྣམ་པ་རྟག་ཏུ་དྲན་པས་སེམས་འདུལ་བར་བྱའོ། །དྲུག་པ་ཞི་བར་བྱེད་པ་ནི་རྣམ་པར་རྟོག་པ་འཕྲོ་བ་ནའང་མི་དགའ་བར་གྱུར་པའི་ཚེ་དམིགས་སྟེང་དུ་སེམས་གློད་དེ་ཞི་བར་བྱའོ། །བདུན་པ་ཉེ་བར་ཞི་བར་བྱེད་པ་ནི་བརྣབ་སེམས་ལ་སོགས་པའི་མི་དགེ་བའི་སེམས་བསྐྱེད་པའི་ཚེ་དམིགས་པ་ལ་བརྟེན་ནས་ཞི་བར་བྱེད་པའོ། །བརྒྱད་པ་རྩེ་གཅིག་ཏུ་བྱེད་པ་ནི་སེམས་ཕྱིར་མི་འཕྲོ་བར་གནས་ན་དེ་ཉིད་ཀྱི་སྟེང་དུ་རྩེ་གཅིག་ཏུ་འཇོག་པར་བྱེད་པའོ། །དགུ་པ་ཤིན་ཏུ་མཉམ་པར་འཇོག་པར་བྱེད་པ་ནི་དམིགས་པ་དེ་དག་བརྟན་ནས་ཆེད་དུ་མ་བསྒྲུབས་པར་ཡང་ཏིང་ངེ་འཛིན་འབྱུང་བ་ཡིན་ནོ། །དེ་དག་ཀྱང་མདོ་སྡེ་རྒྱན་ལས། དམིགས་པ་ལ་ནི་སེམས་གཏད་ནས། །དེའི་རྒྱུན་རྣམ་པར་གཡེང་མི་བྱ། །རྣམ་གཡེང་མྱུར་དུ་རྟོགས་བྱས་ནས། །དེ་ལ་སླར་ཡང་བླན་པར་བྱ། །བློ་ལྡན་གོང་ནས་གོང་དུ་ཡང་། །སེམས་ནི་ནང་དུ་བསྡུ་བར་བྱ། །དེ་ནས་ཡོན་ཏན་མཐོང་བའི་ཕྱིར། །ཏིང་ངེ་འཛིན་ལ་སེམས་གདུལ་ལོ། །རྣམ་གཡེང་ཉེས་པ་མཐོང་བའི་ཕྱིར། །དེ་ལ་མི་དགའ་ཞི་བར་བྱ། །བརྣབ་སེམས་ཡིད་མི་བདེ་ལ་སོགས། །ལངས་པ་དེ་བཞིན་ཞི་བར་བྱ། །དེ་ནས་སྡོམ་བརྩོན་ཅན་གྱིས་ནི། །སེམས་ལ་མངོན་པར་འདུ་བྱེད་བཅས། །རང་གི་ངང་གིས་འབྱུང་བ་འཐོབ། །དེ་གོམས་པ་ལས་འདུ་མི་བྱེད། །ཅེས་གསུངས་སོ། །དེ་ལྟར་དེ་དག་ཀྱང་ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་བརྟེན་པའི་སྒོ་ནས་བསྒོམ་པར་ཡང་གསུངས་ཏེ། ལེ་ལོའི་གཉེན་པོར་དད་པ་དང་འདུན་པ་དང་བརྩོན་འགྲུས་དང་ཤིན་ཏུ་སྦྱངས་པ་དང་། གདམས་ངག་བརྗེད་པའི་གཉེན་པོར་དྲན་པ། བྱིང་རྒོད་ཀྱི་གཉེན་པོར་ཤེས་བཞིན། གཉེན་པོར་འདུ་མི་བྱེད་པའི་གཉེན་པོར་སེམས་མངོན་པར་འདུ་བྱེད་པའི་སེམས་པ། བྱིང་རྒོད་ཞི་བ་ན་ཧ་ཅང་རྩོལ་བའི་གཉེན་པོར་བཏང་སྙོམས་བསྟེན་ཏེ་བསྒོམ་པ་ན་དགུ་པ་མཉམ་པར་འཇོག་པའི་སྐབས་སུ་ཤིན་ཏུ་སྦྱངས་པའི་བདེ་བ་མ་ཐོབ་པའི་ཚེ་འདོད་སེམས་རྩེ་གཅིག་པ་ཡིན་ཅིང་དེ་ཐོབ་པའི་ཚེ་བསམ་གཏན་གྱི་ཉེར་བསྡོགས་ཀྱིས་བསྡུས་པའི་ཞི་གནས་ཡིན་པས་འདི་ལ་བརྟེན་ནས་ལྷག་མཐོང་བསྒོམས་ན་ཞི་ལྷག་ཟུང་འབྲེལ་དུ་འགྱུར་རོ། །བོད་དག་མེ་ཏོག་སྔོན་པོ་སོགས་ཀྱི་དམིགས་རྟེན་ལ་བརྟེན་ནས་ཞི་གནས་བསྒྲུབ་པ་ལ། ཞི་གནས་ཡིད་ཤེས་ཀྱི་སྟེང་དུ་བསྒྲུབ་པ་ལ་མིག་ཤེས་ཀྱིས་དམིགས་རྟེན་ལ་ལྟ་བ་དོན་མེད་ཅེས་དགག་པ་བྱེད་པ་ནི་ཐོས་པ་ཡིད་ཤེས་སྟེང་དུ་བསྒྲུབ་རྒྱུ་ཡིན་པ་ལ་ཉན་ཤེས་ཀྱིས་གསུངས་རབ་ཉན་པ་དགོས་པ་མེད་ཅེས་སྨྲ་བ་དང་མཚུངས་སོ། །རྗེས་ནི་དགེ་བའི་རྩ་བ་བྱང་ཆུབ་ཏུ་བསྔོ་བར་བྱའོ། །གཉིས་པ་རྗེས་ཐོབ་ཀྱི་བྱ་བ་ནི་བྱང་ཆུབ་ཀྱི་སེམས་སྔོན་དུ་འགྲོ་བས་ཚོགས་གཉིས་བསགས་པ་དང་། གནས་སྐབས་ཐམས་ཅད་དུ་འདོད་པའི་དམིགས་པ་མི་བླང་བ་དང་། ལུས་སེམས་ལ་གནོད་པའི་ལས་སྤོང་བ་དང་། སྤྱོད་ལམ་ཐམས་ཅད་དུ་དྲན་ཤེས་བཞིན་གྱིས་ཟིན་པར་བྱའོ། །གསུམ་པ་སེམས་ལེགས་པར་ཟིན་པའི་རྟགས་ནི་གང་བསྒོམས་པའི་དམིགས་པ་འབྱུང་ཞིང་མི་འདོད་པ་མི་འབྱུང་བ་དང་། ཇི་སྲིད་འདོད་བར་དུ་འབྱུང་བ་དང་ལུས་སེམས་ཤིན་ཏུ་སྦྱངས་པར་ལྡན་པའོ། །གཉིས་པ་དེས་བསམ་གཏན་གྱི་དངོས་གཞི་བསྐྱེད་པ་ནི། རྒྱན་ལས། ཞི་གནས་དེ་ཐོབ་པ་ན་ཡིད་བྱེད་བཅུ་གཅིག་ལ་བརྟེན་ནས་བསྒྲུབ་ཚུལ་བཤད་པ་ནི་ཞི་ལྷག་ཟུང་འབྲེལ་གྱིས་ཆོས་རྒྱུན་གྱི་ཏིང་ངེ་འཛིན་བསྒྲུབ་པའི་དབང་དུ་བྱས་ལ་བསམ་གཏན་གྱི་དངོས་གཞི་ཙམ་བསྒྲུབས་ན་ཡིད་བྱེད་དྲུག་གིས་འདོད་པའི་ཉོན་མོངས་ཆེ་འབྲིང་དགུ་སྤངས་ནས་བསམ་གཏན་གྱི་དངོས་གཞི་གྲུབ་ན་ཞི་གནས་སྔར་བས་ཆེས་ཕུལ་དུ་བྱུང་བར་འགྱུར་ཏེ། རྒྱུད་བདེ་བས་རྒྱས་པ་དང་། སྡིག་པ་དང་ཉོན་མོངས་པའི་ཉེས་པས་མ་གོས་ཞིང་བྱ་བ་སྒྲུབ་པའི་མཐུ་ཆེ་བའི་ཕྱིར་རོ། །དེ་ལྟར་ཞི་གནས་གྲུབ་ནས། གསུམ་པ་དེས་ཤེས་རབ་ལྷག་མཐོང་བསྒོམ་པ་ལ། བསྒོམ་པའི་ཚུལ་དང་གོམས་པའི་བྱེད་པ་གཉིས་ལས། དང་པོ་ལའང་གསུམ་སྟེ། གཅིག་ཅར་འཇུག་པ་དང་རིམ་གྱིས་འཇུག་པ་དང་མན་ངག་གི་གནད་བསྡུས་ཏེ་བསྒོམ་པའོ། །དང་པོ་ནི་གང་ཟག་གམ་ཆོས་གང་ཡང་རུང་བ་ཞིག་ལ་སྔར་བཤད་པའི་རིགས་པ་རྣམས་ཀྱིས་དཔྱད་ནས་མ་རྙེད་པར་བྱས་ལ་རིགས་པ་དེ་ཉིད་ཀྱིས་སྣང་བའི་དངོས་པོ་གཞན་ཐམས་ཅད་ལའང་དཔྱད་དེ་མ་རྙེད་པར་བྱས་ནས་དེའི་ངང་ལ་ཏིང་ངེ་འཛིན་གྱི་སྐྱོན་རྣམས་སྤངས་ནས་བཞག་པ་ན་སྔར་གྱི་ཞི་གནས་ཀྱི་དབང་གིས་ཇི་སྲིད་འདོད་ཀྱི་བར་དུ་གནས་པར་འགྱུར་བ་ནི་ཞི་ལྷག་ཟུང་འབྲེལ་ལོ། །འདི་ལ་ཆོས་ཀྱི་བདག་མེད་སྒྲུབ་པའི་རིགས་པ་གང་ཟག་ལ་སྦྱོར་བ་དང་གང་ཟག་གི་བདག་མེད་སྒྲུབ་པའི་རིགས་པ་ཆོས་ལ་བསྒྲེ་བའི་གནད་ཤེས་དགོས་ཏེ། སྔར་གཞི་དབུ་མའི་སྐབས་སུ་བཤད་ཟིན་ཏོ། །གངས་རིའི་ཁྲོད་འདིར་སྔོན་བྱུང་བ་ཐོས་བསམ་གྱིས་གཏན་ལ་ཕབ་པའི་ངེས་པ་མ་རྙེད་ཀྱང་། རྟོག་པ་ཁ་ཚོམ་ལ་སྒོམ་དུ་སྨྲ་བ་ཧྭ་ཤང་གི་ལྟ་བ་དང་། ཕྱིས་བྱུང་བ་ང་མེད་ང་མེད་ཅེས་པའི་རྟོག་པའི་ཕྲེང་བ་བགྲང་བ་ལ་སྒོམ་དུ་སྨྲ་བ་ནི་ལྟ་བའི་སྙིགས་མ་ཡིན་པས་གཞན་དུ་དགག་པ་བྱས་ཟིན་པ་དྲན་པར་བྱའོ། །གཉིས་པ་ནི། དང་པོར་གང་ཟག་གི་བདག་མེད་སྒྲུབ་པའི་རིགས་པས་གང་ཟག་གི་བདག་མ་རྙེད་པར་བྱས་ནས་དེའི་ངང་ལ་བཞག་པ་དང་། དེ་ནས་དྲུག་གི་གཅིག་ཅར་སྦྱར་བའི་རིགས་པས་ཕྱི་དོན་མ་རྙེད་པར་བྱས་ནས་དེའི་ངང་ལ་བཞག་པ་དང་། དེ་ནས་གཟུང་བ་མེད་ན་དེར་འཛིན་ཀྱང་མ་རྙེད་པས་དེའི་ངང་ལ་བཞག་པ་དང་། དེ་ནས་གཉིས་མེད་ཀྱི་རྣམ་ཤེས་དེ་ཡང་མཐའ་བཞིའི་སྤྲོས་པ་དང་བྲལ་བར་བྱས་ནས་དེའི་ངང་ལ་བཞག་པར་བྱའོ། །གསུམ་པ་ནི་རྨི་ལམ་གྱི་དཔེ་སྣང་བ་ཐམས་ཅད་སེམས་སུ་བསྒྱུར་བ་དང་། དེ་ནས་སྒྱུ་མའི་དཔེས་སྣང་བ་ཐམས་ཅད་སྒྱུ་མར་བསྟན་པ་དང་། དེ་ནས། ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང་། །མི་འཕོ་བར་ནི་མཁས་རྟོགས་བྱ། །ཞེས་པའི་དཔེས་སྒྱུ་མ་དེའང་རྟེན་འབྲེལ་དུ་བསྒྲུབས་ཏེ། རྟེན་འབྲེལ་དེ་ཡང་བརྗོད་པར་བྲལ་བར་ཤེས་པར་བྱས་ནས་དེའི་ངང་ལ་བློ་བཞག་པས་མཐོང་སྤང་གིས་བསྡུས་པའི་ཉོན་མོངས་པ་ཐམས་ཅད་སྤངས་ནས་ཟག་པ་མེད་པའི་ཡེ་ཤེས་སྐྱེ་བར་འགྱུར་ཏེ། ཐོས་པའི་ཤེས་རབ་ཀྱིས་ཉོན་མོངས་པ་ལ་མི་མཐུན་པའི་བློ་སྐྱེས་པ་དང་། བསམ་པས་རྩེ་འཇིལ་བ་དང་འཇིག་རྟེན་པའི་སྒོམ་བྱུང་གིས་མགོ་གནོན་པ་དང་། འཇིག་རྟེན་ལས་འདས་པའི་སྒོམ་བྱུང་གིས་ས་བོན་རྩ་བ་ནས་སྤངས་པ་ནི་སྤང་བྱ་དང་གཉེན་པོའི་གོ་རིམ་ཁྱད་པར་ཅན་ཡིན་པའི་ཕྱིར་རོ། །གསུམ་པ་ཚོགས་གཉིས་སྒྲུབ་པའི་ཀུན་ཏུ་སྤྱོད་པ་ལ་བདུན་ཏེ་རྟེན་དགེ་སྦྱོང་གི་ཀུན་དུ་སྤྱོད་པ། གནས་དགོན་པའི་ཀུན་ཏུ་སྤྱོད་པ། འཚོ་བ་བསོད་སྙོམས་ཀྱི་ཀུན་ཏུ་སྤྱོད་པ། ལུས་གཙང་བའི་ཀུན་ཏུ་སྤྱོད་པ། ན་བའི་ཀུན་ཏུ་སྤྱོད་པ། འཆི་བའི་ཀུན་ཏུ་སྤྱོད་པ། དགེ་བའི་ཀུན་ཏུ་སྤྱོད་པའོ། །དང་པོ་ནི། ཚུལ་ཁྲིམས་ལ་སོགས་པ་ཕུན་སུམ་ཚོགས་པ་དང་། སྦྱངས་པའི་ཡོན་ཏན་དང་ལྡན་པ་དང་། དགེ་སྦྱོང་གི་ཆོས་བསྲུང་བ་དང་། བསྲིང་པ་གཉིས་དང་ལྡན་པ་དང་། འཕགས་པའི་རིགས་ལ་གནས་པ་སྟེ་ལྔའོ། །གཉིས་པ་ནི་བདག་དགོན་པ་འདིར་ཅིར་འོངས་བསམ་པ་དང་། མ་འོངས་པའི་ཉེས་པ་ལུས་སེམས་ཀྱི་འདུ་འཛིན་མི་བྱེད་པ་དང་། འོངས་པའི་དོན་སྒྲུབ་ཕྱིར་རྣལ་འབྱོར་ལ་བརྩོན་པ་དང་། རྟག་ཏུ་ལྷ་རྣམས་ཀྱི་སྤྱན་སྔར་བསམ་ཏེ་ཉེས་སྤྱོད་ལ་འཛེམ་པ་དང་། མི་དང་མི་མ་ཡིན་གྱི་འཇིགས་པ་ལ་བག་མི་ཚ་བ་དང་ལྔའོ། །གསུམ་པ་ནི་མི་མཐུན་པའི་རྐྱེན་ལས་ལུས་བསྲུང་བ་དང་། བསོད་སྙོམས་ཀྱི་ཕྱིར་ཉོན་མོངས་ཉེས་སྤྱོད་ཀྱི་ལས་མི་བྱ་བ་དང་། ཆོག་ཤེས་ཤིང་མགུ་སླ་བ་དང་། ང་རྒྱལ་བཅོམ་ཞིང་ལོག་བསྒྲུབ་བཟོད་པ་དང་། དད་པས་བྱིན་པ་དོན་ཡོད་པར་སྤྱོད་པ་དང་ལྔའོ། །བཞི་པ་ནི། ཟས་དང་། གོས་དང་། གཉིད་དང་། ཉམས་ང་བསྲུང་བ་དང་། ཁམས་སྙོམས་པ་དང་ལྡན་པ་ལྔའོ། །ལྔ་པ་ནི་ལུས་ལྷར་བསྒོམ་པ་དང་། ངག་སྔགས་བཟླས་པ་དང་། སེམས་གནོད་བྱེད་ལ་བྱམས་སྙིང་རྗེ་དང་། ན་ཚ་ལས་ངན་གྱི་འབྲས་བུ་ཤེས་པ་དང་། དེ་ལ་བརྟེན་ནས་བདག་གཞན་བརྗེ་བ་བསྒོམ་པ་དང་ལྔའོ། །དྲུག་པ་ནི་ཐེག་ཆེན་འཕོ་བའི་མན་ངག་ནི། སྟོབས་ལྔ་ཉིད་ཡིན་སྤྱོད་ལམ་གཅེས། །ཞེས་པ་ལྟར་སྟོབས་ལྔའོ། །བདུན་པ་ལ་གསུམ་སྟེ། འཕེན་འཕངས་བསྡུས་པས་ཉིན་ཞག་གཅིག་གི་དང་། སྦྱོར་དངོས་རྗེས་གསུམ་གྱི་དགེ་བ་སྣ་གཅིག་གི་སྤྱོད་པ་ཇི་ལྟར་བྱ་བའི་སྤྱོད་པ་དང་། སྒོམ་པ་དང་བཟླས་པ་དང་། ཕུང་པོ་གསུམ་པ་དང་། བློ་སྤེལ་བ་དང་། ཟང་ཟིང་དང་། ཆོས་ཀྱི་སྦྱིན་པ་སྟེ་ལྔས་གང་བྱ་བའི་ཀུན་ཏུ་སྤྱོད་པ་དང་། ལོ་དང་ཟླ་བའི་དུས་བཟང་བཞི་དང་། ཉི་ཟླ་ཤི་བ་དང་། བླ་མ་འདས་པ་དང་། གནོད་པ་ཆེན་པོ་བྱུང་བའི་དུས་ལྔས་དུས་ཁྱད་པར་ཅན་དུ་བྱ་བའོ། །གསུམ་པ་དེའི་སྐབས་སུ་བསམ་སྦྱོར་གྱི་གེགས་བསལ་བ་ལ། བསམ་པ་ལྡོག་པའི་རྒྱུ་རྒྱུ་རྐྱེན་ལ་ཞུམ་པ་བསལ་བ་དང་། སྦྱོར་བ་ཆད་པའི་རྒྱུ་ལུས་སེམས་ཀྱི་གནོད་པ་བསལ་བ་དང་། བསམ་སྦྱོར་ཕྱིན་ཅི་ལོག་གི་རྒྱུ་བདུད་ཀྱི་ལས་སྤང་བ་དང་གསུམ་ཡིན་པ་ལས། བདུད་ཀྱི་ལས་སྤང་བ་འདི་ལའང་བདུད་རང་གི་ངོ་བོ་སྤྱིར་བཞི་ལས། བྱེ་བྲག་ལྷའི་བུའི་བདུད་དང་། བདུད་འཇུག་པའི་རྒྱུ་སྤྱིར་ཐེག་ཆེན་གྱི་དགེ་བ་ལ་བརྩོན་པ་དང་། བྱེ་བྲག་ཧ་ཅང་དད་པ་ཆེ་བ་སོགས་དང་། ཇི་ལྟར་འཇུག་པའི་ཚུལ་མེ་ཏོག་གི་མདའ་ལྔ་བཏང་བས། འདོད་ཡོན་ལ་ཞེན་པ་དང་། བླང་དོར་གྱི་གནས་ལ་ལོག་ཤེས་དང་ཐེ་ཚོམ་བསྐྱེད་པར་བྱེད་པ་དང་། ཞུགས་པའི་ལས་ཐོབ་མ་ཐོབ་ཀྱི་དགེ་བ་ལས་ཉམས་པར་བྱེད་པ་དང་། ཉེས་སྤྱོད་ལ་སྦྱོར་བ་དང་། སྡུག་བསྔལ་བསྐྱེད་པར་བྱེད་པ་རྣམས་ཤེས་པར་བྱས་ནས་སྤོང་བའི་ཐབས། བླ་མ་དང་། དཀོན་མཆོག་དང་། ཆོས་སྐྱོང་ལ་བདག་བདུད་ཀྱི་དབང་དུ་མི་འགྲོ་བར་གསོལ་བ་གདབ་པ་དང་། ལེགས་པར་བརྟགས་ཤིང་གང་གིས་ཡང་དག་སྤོང་བ་འཕེལ་བ་བྱ་བ་དང་། སེམས་ཅན་རྣམས་ལ་བྱམས་སྙིང་རྗེ་བསྒོམ་པ་དང་། སྡུག་མི་སྡུག་གི་མཚན་མ་ཅི་བྱུང་རྨི་ལམ་ལྟར་ཞེན་པ་མེད་པར་བྱས་པའི་སྒོ་ནས་བདུད་ཀྱི་ལས་སྤངས་ཏེ་ཐེག་པ་ཆེན་པོའི་ལམ་མཐར་ཕྱིན་པར་བྱའོ། །གསུམ་པ་དེས་ངེས་པར་འབྱུང་བའི་ཚུལ་ནི། དེ་ལྟར་ལམ་དེ་དག་ཚོགས་སྦྱོར་གྱི་གནས་སྐབས་སུ་སེམས་ཅན་ཐམས་ཅད་འཁོར་བ་ལས་བརྒལ་བའི་ཕྱིར་སངས་རྒྱས་སྒྲུབ་པའི་སེམས་བསྐྱེད་ནས་བརྩོན་འགྲུས་མེ་འབར་བ་ལྟ་བུས་སྦྱོར་བ་རྒྱ་ཆེར་བ་དྲག་པ་ཡུན་རིང་བས་སྙིང་རྗེའི་སེམས་དང་། གཉིས་སུ་མེད་པའི་བློ་དང་། ཀུན་རྫོབ་བྱང་ཆུབ་ཀྱི་སེམས་གསུམ་ལ་བསླབ་པས། བསྐལ་པ་གྲངས་མེད་གཅིག་ནས་ཐེག་པ་ཆེན་པོའི་མཐོང་ལམ་ཐོབ་པར་འགྱུར་ཞིང་། དེ་ནས་ས་བཅུ་པོའི་མཉམ་གཞག་རྣམ་པར་མི་རྟོག་པའི་ཡེ་ཤེས་ལ་ཕར་ཕྱིན་བཅུ་ལྡོག་པའི་སྒོ་ནས་ཚང་བ་ཁྱད་པར་མེད་ཀྱང་། རྗེས་ཐོབ་ཏུ་ས་བཅུ་སོ་སོ་ལ་ཕར་ཕྱིན་བཅུ་གཙོ་བོར་སྤྱོད་པའི་ཚོགས་གཉིས་ཟུང་འཇུག་དེས་བསྐལ་པ་གྲངས་མེད་གཉིས་ནས་སངས་རྒྱས་ཀྱི་སར་ངེས་པར་འབྱུང་བའོ། །ལམ་དབུ་མ་ཚོགས་གཉིས་ཟུང་འཇུག་ལེགས་པར་བཤད་ཟིན་ཏོ། །ཇི་ལྟར་བཤད་པའི་ལམ་དེ་ཉིད་ལ་གུས་སྦྱོར་དང་། རྟག་སྦྱོར་གྱི་བརྩོན་འགྲུས་ཀྱིས་སྤངས་པ་དང་རྟོགས་པའི་དགེ་བའི་ཚོགས་ཡོངས་སུ་རྫོགས་པ་ན། ས་བཅུ་གཅིག་པ་འབྲས་བུ་དབུ་མ་འབྱུང་བས་དེའི་རང་བཞིན་ངེས་པར་བྱ་བ་ལ་གསུམ་སྟེ། འབྲས་བུ་སངས་རྒྱས་ཀྱི་སྤངས་རྟོགས་མི་འཐད་པ་སྤངས་བ། སངས་རྒྱས་པའི་ངོ་བོ་ལ་ལོག་རྟོག་དགག་པ། རང་ལུགས་འབྲས་བུའི་རྣམ་གཞག་བཤད་པའོ། །དང་པོ་ལ་ཕྱི་རོལ་བ་ཁ་ཅིག ཉོན་མོངས་པ་སེམས་ཀྱི་རང་བཞིན་ཡིན་པ་དང་། སྤོང་བའི་ཐབས་མི་ཤེས་པ་དང་། སྤངས་པ་མི་བརྟན་པས་སྤངས་པ་ཕུན་ཚོགས་མི་རུང་ལ། ཆུའི་ཚ་བ་ལྟར་རིག་པའི་རྟེན་མི་བརྟན་པ་དང་། མཆོངས་པ་གོམས་པ་ལྟར་འབད་པ་ལ་ལྟོས་པ་དང་། གསེར་གྱི་སྲ་བ་ལྟར་རྟོགས་པ་སླར་ལྡོག་པས་ཡེ་ཤེས་ཕུན་ཚོགས་ཀྱང་མི་རུང་ངོ་ཞེས་སྨྲའོ། །འདི་དགག་པ་ལ་སྤངས་པ་ཕུན་ཚོགས་མི་འཐད་པའི་སྐྱོན་གསུམ་མེད་དེ། སེམས་རང་བཞིན་གྱིས་རྣམ་པར་དག་པ་དང་ཉོན་མོངས་པ་གློ་བུར་བ་ཡིན་པས་སྤོང་ནུས་པའི་ཕྱིར་དང་། རྒྱུ་བདེན་ཞེན་དང་འགལ་བ་སྟོང་ཉིད་གོམས་པར་མཛད་པས་སྤོང་བའི་ཐབས་ཤེས་པའི་ཕྱིར་དང་། ཟག་མེད་ལམ་གྱིས་ས་བོན་དང་བག་ཆགས་སྤངས་པས་སྤངས་པ་བརྟན་པའི་ཕྱིར་ཏེ། རྣམ་འགྲེལ་ལས། སེམས་ཀྱི་རང་བཞིན་འོས་གསལ་ཏེ། །དྲི་མ་རྣམས་ནི་གློ་བུར་བ། །ཞེས་དང་། རྒྱུ་ཡོད་ཕྱིར་དང་རྒྱུ་ཡི་ནི། །གཉེན་པོ་གོམས་པས་ཟད་ཕྱིར་དང་། །རྒྱུ་ཡི་རང་བཞིན་ཤེས་པ་ཡིས། །དེ་ཤེས་པ་ཡང་གྲུབ་པ་ཡིན། །ཞེས་དང་། བདག་ལྟའི་ས་བོན་སྤངས་པའི་ཕྱིར། །སླར་མི་གཤེགས་པ་ཉིད་ཡིན་ནོ། །ཞེས་བྱ་བའི་རིགས་པས་སོ། །ཡེ་ཤེས་ཕུན་ཚོགས་མི་འཐད་པའི་སྐྱོན་གསུམ་ཡང་མི་འཐད་དེ། རིག་པའི་རྒྱུན་བརྟན་པའི་ཕྱིར་དང་། བྱས་ཟིན་འབད་པ་ལ་མི་ལྟོས་པས་གོམས་པ་རང་གི་ངང་གིས་ཁྱད་པར་དུ་འགྱུར་བའི་ཕྱིར་དང་། སྒྲིབ་པའི་ས་བོན་བཅོམ་པས་རྟོགས་པ་བརྟན་པའི་ཕྱིར་ཏེ། རྣམ་འགྲེལ་ལས། ཐ་མའི་སེམས་ནི་སེམས་གཞན་དང་། །མཚམས་སྦྱོར་བ་ལ་འགལ་ཅི་ཡོད། །ཅེས་དང་། སེམས་ལ་བརྩེ་སོགས་གོམས་སྐྱེ་བ། །རང་གིས་ངང་གིས་འཇུག་འགྱུར་ཏེ། །ཞེས་དང་། འཚེ་བ་མེད་དང་ཡང་དག་དོན། །ངོ་བོ་ཉིད་ལ་ཕྱིན་ལོག་གིས། །འབད་དུ་ཟིན་ཀྱང་མི་བཟློག་སྟེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་བྱ་བའི་རིགས་པས་སོ། །གཉིས་པ་ལ་གཉིས་ཏེ། ཉན་ཐོས་སྡེ་པའི་ལུགས་དགག་པ། ཐེག་ཆེན་བཀར་ཁས་ལེན་པའི་མདོ་སེམས་ཀྱི་ལུགས་དགག་པའོ། །དང་པོ་ནི། ཐེག་པ་ཆེན་པོ་བཀར་མི་འདོད་པའི་ཉན་ཐོས་པ་དག་ཚོགས་ལམ་གྱི་གནས་སྐབས་སུ་བསྐལ་པ་གྲངས་མེད་གསུམ་ཚོགས་བསགས་སྲིད་པ་ཐ་མ་པའི་རྟེན་ལ་བྱང་ཆུབ་ཀྱི་ཤིང་དྲུང་དུ་སྟན་ཐོག་གཅིག་ལ་དྲོད་ནས་བཟུང་སྟེ་ཟད་མི་ཤེས་ཀྱི་བར་གྱི་རྟོགས་པ་ཐམས་ཅད་མངོན་དུ་བྱེད་པ་ཡིན་པས་ལོངས་སྐུ་མེད་ལ། རྣམ་པར་འགྲོལ་བའི་ཆོས་ཀྱི་སྐུ་དང་། གཟུགས་ཀྱི་སྐུ་གཉིས་ཁོ་ན་ཡིན་ཅིང་། ཕྱི་མ་ནི། ཤཱཀྱ་ཐུབ་པ་ལྟ་བུ་རང་རྒྱུད་པ་འདི་ཁོ་ན་ཡིན་ནོ། །རྡོ་རྗེ་ལྟ་བུའི་ཏིང་ངེ་འཛིན་གྱིས། ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པའི་མུན་པ་གཏན་བཅོམ་པའི་སྤངས་པ་ནི། འདུས་མ་བྱས་རྫས་སུ་གྲུབ་པ་ཡིན་ཅིང་། དེ་སངས་རྒྱས་ནི་མ་ཡིན་ཏེ། གང་གིས་སངས་རྒྱས་སུ་བྱེད་པའི་ཆོས་ཐེག་ཆེན་མི་སློབ་པའི་ལམ་བདེན་ཀྱང་མ་ཡིན། དེས་སངས་རྒྱས་སུ་བྱས་པའི་གཟུགས་ཀྱི་སྐུའང་མ་ཡིན་པའི་ཕྱིར། ཞེས་སྨྲའོ། །དེ་དག་ནི་མི་འཐད་དེ། མངོན་རྟོགས་རྒྱན་ལས། དབང་པོ་རྟུལ་དང་རྣོན་པོ་དག །ཞེས་སོགས་གསུངས་པས་ཉན་ཐོས་ལ་སློབ་པ་འཕགས་པའི་གནས་སྐབས་སུ་འཁོར་བར་སྐྱེ་བ་ལེན་ཚུལ་ཇི་ལྟར་ཡོད་པ་ལྟར་བྱང་འཕགས་ལའང་ཡོད་པའི་ཕྱིར་དང་། ཀླུ་སྒྲུབ་ཀྱིས། ཇི་ལྟར་ཉན་ཐོས་ཐེག་པ་ལ། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །ཞེས་གསུངས་པས། བྱང་སེམས་ལ་ས་བཅུའི་རྣམ་གཞག་ཀྱང་གྲུབ་པའི་ཕྱིར་རོ། །ལོངས་སྐུ་མི་འཐད་པ་དང་། ཤཱཀྱ་ཐུབ་པ་ལྟ་བུའི་གཟུགས་སྐུ་གསར་དུ་སངས་རྒྱས་པའི་རང་རྒྱུད་པར་འདོད་པའང་མི་འཐད་དེ། ལང་ཀར་གཤེགས་པ་ལས། གཙང་མའི་གནས་ནི་སྤངས་པ་ཡི། །འོག་མིན་གནས་ནི་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱ། །ཞེས་སོགས་མང་དུ་གསུངས་པའི་ཕྱིར་རོ། །སྤངས་པ་ཕུན་ཚོགས་སངས་རྒྱས་མ་ཡིན་པར་འདོད་པའང་མི་འཐད་དེ། དེ་ལྟར་ན་ཡེ་ཤེས་ཕུན་ཚོགས་ཀྱང་སངས་རྒྱས་མ་ཡིན་པར་ཐལ་བའི་ཕྱིར་རོ། །མྱ་ངན་ལས་འདས་པ་བདེན་དངོས་སུ་འདོད་པའང་མི་འཐད་དེ། མདོ་ལས། མྱ་ངན་ལས་འདས་པ་རྨི་ལམ་ལྟ་བུ། སྒྱུ་མ་ལྟ་བུ་མྱ་ངན་ལས་འདས་པ་ལས་ལྷག་པའི་ཆོས་གཞན་ཞིག་ཡོད་ཀྱང་དེའང་རྨི་ལམ་ལྟ་བུ་སྒྱུ་མ་ལྟ་བུ་ཞེས་གསུངས་པའོ། །གལ་ཏེ་དེ་དག་ནི་ཐེག་པ་ཆེན་པོའི་བཀའ་དང་བསྟན་བཅོས་ཀྱི་ལུང་ཡིན་ལ། ཁོ་བོ་ཐེག་ཆེན་བཀར་མི་འདོད་པས་དེ་དག་ལུང་དུ་མི་རུང་ངོ་སྙམ་ན། དེ་དགག་པ་ལ་མགོན་པོ་བྱམས་པས། མདོ་སྡེ་རྒྱན་དང་། ཀླུ་སྒྲུབ་ཀྱིས་རིན་ཆེན་ཕྲེང་བ་དང་། ཞི་བ་ལྷས་སྤྱོད་འཇུག་དང་། ལེགས་ལྡན་འབྱེད་ཀྱིས་རྟོག་གེ་འབར་བ་རྣམས་སུ་ཐེག་ཆེན་བཀར་སྒྲུབ་གསུངས་པས་ཐེག་ཆེན་བཀར་གྲུབ་པ་ན་སྔར་གྱི་རྣམ་གཞག་དེ་དག་ཐམས་ཅད་འགྲུབ་པའོ། །གཉིས་པ་ནི། མདོ་སྡེ་པ་ལ་ཐེག་ཆེན་བཀར་འདོད་མི་འདོད་གཉིས་ཡོད་པའི་བཀར་འདོད་པ་རྣམ་འགྲེལ་ནས་གསུངས་པའི་མདོ་སྡེ་པ་དང་། སེམས་ཙམ་པ་རྣམས་ནི། བྱང་ཆུབ་སེམས་དཔའ་གཞན་དོན་དུ་འཁོར་བར་སྐྱེ་བ་ལེན་པ་དང་། ས་བཅུའི་རྣམ་གཞག་དང་། སྐུ་གསུམ་གྱི་རྣམ་བཞག་རྣམས་ཐེག་པ་ཆེན་པོའི་མདོ་སྡེ་ལས་གསུངས་པས་ཁས་ལེན་ཀྱང་། སངས་རྒྱ་བའི་ཚུལ་ནི་གཞན་དབང་གིས་བསྡུས་པའི་དྲི་མ་བདེན་གྲུབ་གཉེན་པོ་བདེན་གྲུབ་ཀྱིས་བཅོམ་ནས་སངས་རྒྱ་བ་དང་། ཆོས་ཀྱི་སྐུ་ནི་དབྱིངས་བདེན་གྲུབ་གློ་བུར་གྱི་དྲི་མ་དག་ནས་དག་པ་གཉིས་ལྡན་དུ་སོང་བའི་ཆོས་དབྱིངས་འདུས་མ་བྱས་རྫས་གྲུབ་པ་དང་། གཞན་དབང་གིས་བསྡུས་པའི་སེམས་གློ་བུར་གྱི་དྲི་མ་དག་ནས་ཕྱིན་ཅི་མ་ལོག་པའི་ཡོངས་གྲུབ་འདུས་བྱས་བདེན་གྲུབ་ཀྱི་དངོས་པོ་ཡིན་པར་འདོད་དོ། །དེ་ལ་དྲི་མ་སྤང་ཚུལ་ནི། མགོན་པོ་བྱམས་པས། འགོག་པ་མེད་པའི་རང་བཞིན་ལ། །ཞེས་སོགས་དངོས་སྟོབས་ཀྱི་རིགས་པ་དང་། གཞན་གྱི་ཆོས་རྣམས་ཀྱང་ཡོད་ལ། ཞེས་སོགས་ཁས་བླངས་འགལ་བས་དགག་པར་མཛད་དོ། །དབྱིངས་དང་ཡེ་ཤེས་བདེན་པར་གྲུབ་པ་ནི་སྔར་ལམ་དབུ་མའི་སྐབས་སུ་བཤད་པ་ལྟར། ཀླུ་སྒྲུབ་ཡབ་སྲས་ཀྱི་གཞུང་ལས་གསུངས་པའི་མཐའ་བཞིའི་སྤྲོས་བྲལ་སྒྲུབ་པའི་རིགས་པ་རྣམས་ཀྱིས་བཀག་ཟིན་ཏོ། །གསུམ་པ་ལ་གཉིས་ཏེ། ཁྱད་པར་གྱི་ཆོས་དུ་མ་དཔྱད་པས་ཐུན་མོང་མ་ཡིན་པའི་ཁྱད་ཆོས་ངོས་བཟུང་བ་དང་། ཁྱད་པར་གྱི་གཞི་རྣམ་པར་གཞག་པས་ཐུན་མོང་མ་ཡིན་པའི་རྣམ་པར་གཞག་པ་བཤད་པའོ། །དང་པོ་ལ་ལྔ་སྟེ། སངས་རྒྱས་ཀྱི་སར་བདེན་གཉིས་ཡོད་མེད་དཔྱད། སྣང་བ་ཡོད་མེད་དཔྱད། ཡེ་ཤེས་ཡོད་མེད་དཔྱད། སེམས་དང་སེམས་བྱུང་ཡོད་མེད་དཔྱད། སྐྱེ་འགག་ཡོད་མེད་དཔྱད་པའོ། །དང་པོ་ནི། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་དང་། དངོས་ཀུན་ཡང་དག་བརྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཞེས་པའི་སྐབས་ནས་བསྟན་པའི་ཀུན་རྫོབ་བདེན་པ་ནི་མེད་དེ། ཡུལ་ཅན་མཐོང་བ་བརྫུན་པ་མེད་པས། དེའི་ཡུལ་མེད་པའི་ཕྱིར་རོ། །བདེན་གཉིས་ཟུང་དུ་འཇུག་པའི་ཀུན་རྫོབ་བདེན་པ་ནི་ཡོད་དེ། ཟུང་འཇུག་ལ་ཡ་གྱལ་དགོས་པའི་ཕྱིར་རོ། །འདི་ནི་སངས་རྒྱས་རང་སྣང་གི་བདེན་པ་གཉིས་ཡིན་པས། གདུལ་བྱ་ལ་བསྟན་པའི་བདེན་པ་གཉིས་དང་དོན་མི་གཅིག་གོ །གཉིས་པ་ནི། སྔོན་གྱི་དབུ་མ་པ་ཁ་ཅིག སྣང་བ་ཡོད་ན་འཁྲུལ་སྣང་དང་བཅས་དགོས་པས། སྣང་བ་གཏན་མེད་པ་འདོད་དོ། །དེའང་མི་འཐད་དེ། ཤེས་བྱ་ཐམས་ཅད་དག་པ་རབ་འབྱམས་འབའ་ཞིག་ཏུ་སྣང་བ་ཞེས་དང་། ཤེས་བྱ་ཐམས་ཅད་ཆོས་ཀྱི་དབྱིངས་སུ་སྣང་བ་ཞེས་པ་དེ་སངས་རྒྱས་རང་གི་རང་སྣང་ཡིན་ནམ། གདུལ་བྱ་གཞན་ལ་སྣང་བའི་གཞན་སྣང་ཡིན། དང་པོ་ལྟར་ན། སངས་རྒྱས་ལ་སྣང་བ་མེད་པ་དང་འགལ་ལ། ཕྱི་མ་ལྟར་ན་གདུལ་བྱ་དེས་ཀྱང་དག་པ་མཐར་ཐུག་སྣང་བར་ཐལ་ལོ། །དེས་ན་སྐྱེ་འགག་ལ་སོགས་པ་གདུལ་བྱ་ལ་བསྟན་པའི་ཡ་གྱལ་གྱི་ཀུན་རྫོབ་བདེན་པའི་སྣང་བ་མེད་ཀྱང་དབྱིངས་རིག་དབྱེར་མེད་ཀྱི་དོན་དམ་པ་སྣང་བའི་སྣང་བ་ཡོད་དགོས་ཏེ། གཞན་དུ་ཆོས་དབྱིངས་གོམས་པ་མཐར་ཐུག་པའི་ཚེ་ཆོས་དབྱིངས་མི་སྣང་ན། ཆོས་དབྱིངས་སྣང་བའི་ཡེ་ཤེས་མཐར་ཐུག་མེད་པར་ཐལ་བའི་ཕྱིར་རོ། །དེར་མ་ཟད་མཚན་དང་དཔེ་བྱད་ལ་སོགས་པ་གཟུགས་སྐུ་སྣང་བའང་ཡོད་དེ། རྒྱུད་བླར། རང་བྱུང་རྣམས་ཀྱི་ཐམས་ཅད་མཁྱེན། །སངས་རྒྱས་ཉིད་ཅེས་གང་བརྗོད་པ། །མཆོག་ཏུ་མྱ་ངན་འདས་བསམ་མེད། །དགྲ་བཅོམ་སོ་སོའི་བདག་གྱུར་པ། །དེ་དབྱེ་ཟབ་དང་རྒྱ་ཆེ་དང་། །བདག་ཉིད་ཆེན་པོའི་ཡོན་ཏན་གྱི། །ཞེས་སྐུ་གསུམ་ཆར་རྫོགས་པའི་སངས་རྒྱས་ཀྱིས་སོ་སོ་རང་གིས་རིག་པར་བྱ་བ་ཡིན་པར་གསུངས་ལ། གདུལ་བྱ་ལ་དངོས་སུ་སྣང་བའི་གཟུགས་སྐུ་གཉིས་ནི་སོ་སོ་རང་གིས་རིག་པར་བྱ་བར་མི་རུང་བའི་ཕྱིར་རོ། །དེ་ལྟར་ནའང་གཉིས་སྣང་དང་བཅས་པའི་སྣང་བ་ནི་མེད་དེ། འཁྲུལ་པའི་བག་ཆགས་མ་ལུས་པར་སྤངས་པའི་ཕྱིར་རོ། །གསུམ་པ་ནི། དགེ་བའི་བཤེས་གཉེན་གཙང་ནག་པ་སོགས་སྔོན་གྱི་དབུ་མ་པ་ཁ་ཅིག་སངས་རྒྱས་ལ་རང་རྒྱུད་ཀྱིས་བསྡུས་པའི་ཡེ་ཤེས་མེད་དེ། ཡོད་ན་ཤེས་བྱ་བརྫུན་པའི་ཡུལ་ཅན་གྱི་འཁྲུལ་པ་མངའ་བས་སྤངས་པ་ཕུན་ཚོགས་མི་རུང་བ་དང་། རྫོགས་པའི་སངས་རྒྱས་ཀྱིས་སྤྲུལ་པ་དུ་མ་སྤྲུལ་པ་ན་དེ་རྣམས་རྒྱུད་ཐ་དད་ན་རིགས་པ་དང་འགལ་ཞིང་། གཅིག་ཡེ་ཤེས་རྒྱུད་ལ་ལྡན་ཏེ། གཞན་རྣམས་ཡེ་ཤེས་དང་མི་ལྡན་པར་ཡང་བརྗོད་མི་ནུས་པས་ཡེ་ཤེས་ཕུན་ཚོགས་མི་འཐད་པ་དང་། འདས་མ་འོངས་སོགས་ཀྱི་དོན་མི་སྲིད་པས། དུས་གསུམ་མངོན་དུ་མཛད་པ་མི་རུང་བའི་ཕྱིར་ཞེས་སྨྲའོ། །དེའང་མི་འཐད་དེ། རྒྱུན་མཐའི་རྡོ་རྗེ་ལྟ་བུའི་ཏིང་ངེ་འཛིན་གྱི་ཤེས་བྱ་སྐྱེ་འགག རྟག་ཆད་ལ་སོགས་པའི་སྤྲོས་པའི་བུད་ཤིང་བསྲེགས་ནས་སྤྲོས་པ་མཐའ་དག་ཞི་བའི་ཆོས་དབྱིངས་དང་། སྔར་གྱི་རིག་པའི་རྒྱུན་དེའང་སྐྱེ་འགག་ལ་སོགས་པའི་སྤྲོས་པ་མཐའ་དག་ཞི་ནས་དེ་གཉིས་དབྱེར་མེད་དུ་གྱུར་པ་ལ་ཡེ་ཤེས་སུ་འཇོག་པའི་ཕྱིར་རོ། །ཀླུ་སྒྲུབ་ཀྱིས། དྲི་མ་མེད་པའི་ཆོས་སྐུ་ལ། །ཡེ་ཤེས་རྒྱ་མཚོ་རྣམ་པར་གནས། །ཞེས་དང་། འཇུག་འགྲེལ་ལས། དེར་མངོན་པར་རྫོགས་པར་འཚང་རྒྱ་བ་ན། བཅོམ་ལྡན་འདས་ཀྱིས་སྐད་ཅིག་སྐད་ཅིག་ཁོ་ན་ལ་ཐམས་ཅད་མཁྱེན་པའི་ཡེ་ཤེས་བརྙེས་སོ། །ཞེས་དང་། མཁྱེན་བཟང་ཁྱོད་ཀྱིས་སྐད་ཅིག་གི་ནི་ཤེས་བྱ་ཐུགས་སུ་ཆུད། །ཞེས་དང་། དེའི་འགྲེལ་པར། བཅོམ་ལྡན་འདས་ཀྱིས་མཁྱེན་པའི་སྐད་ཅིག་གཅིག་ཁོ་ནས་ཐམས་ཅད་མཁྱེན་པའི་ཡེ་ཤེས་བརྙེས་སོ། །ཞེས་གསུངས་པས་སོ། །བཞི་པ་ནི། སེམས་ཙམ་པ་དང་རང་རྒྱུད་པ་དག སངས་རྒྱས་ཀྱི་སར་སེམས་དང་སེམས་ལས་བྱུང་བ་ཡོད་པར་འདོད་ཀྱང་། དེའང་མི་འཐད་དེ། དབུས་མཐར། སེམས་དང་སེམས་བྱུང་ཁམས་གསུམ་པ། །དེ་ལ་དོན་མཐོང་རྣམ་པ་ཤེས། །དེ་ཡི་ཁྱད་པར་སེམས་ལས་བྱུང་། །ཞེས་སེམས་སེམས་བྱུང་ནི་ཁམས་གསུམ་པའི་རྣམ་པ་ཅན་གྱི་གཉིས་སྣང་དང་བཅས་པ་དང་། དོན་གྱི་ངོ་བོ་དང་ཁྱད་པར་མཐོང་བའི་ཁྱད་པར་ཡོད་པ་དང་། དོན་གྱི་ཁྱད་པར་ལའང་མི་འདྲ་བ་དུ་མ་མཐོང་བའི་སྒོ་ནས་བཞག་པར་གསུངས་ལ། འདིར་ཤེས་བྱ་སྐྱེ་འགག་ལ་སོགས་པའི་སྤྲོས་པ་མཐའ་དག་དང་བྲལ་བའི་ཤེས་པ་དང་དབྱེར་མེད་པ་མངོན་དུ་གྱུར་པའི་ཚེ་གཉིས་སྣང་དང་འཛིན་སྟངས་མི་འདྲ་བའི་ཁྱད་པར་ཅུང་ཟད་ཀྱང་མེད་པའི་ཕྱིར་རོ། །འདི་ལ་དགོངས་ནས་འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགགས་པས་དེ་སྐུ་ཡིས་མངོན་སུམ་མཛད། །ཅེས་དང་། དེའི་འགྲེལ་པར། དེ་ལྟར་ན་ཡེ་ཤེས་ཀྱི་ཡུལ་དེ་ཁོ་ན་ཉིད་ལ་རྣམ་པ་ཐམས་ཅད་དུ་དེའི་ཡུལ་ཅན། སེམས་དང་སེམས་ལས་བྱུང་བ་རྣམས་མི་འཇུག་པས་སྐུ་ཁོ་ནས་མངོན་སུམ་མཛད་པར་ཀུན་རྫོབ་དུ་རྣམ་པར་བཞག་གོ །ཞེས་པ་དང་། ཞི་སྐུ་ཞེས་པའི་འགྲེལ་པར། སྐུ་གང་གིས་དེ་ཁོ་ན་ཉིད་འདི་མངོན་སུམ་དུ་མཛད་པར་བཤད་པ་དེ་ནི་ཞི་བའི་རང་བཞིན་ཅན་དུ་འདོད་དེ། སེམས་དང་སེམས་ལས་བྱུང་བ་དང་བྲལ་བའི་ཕྱིར་རོ། །ཞེས་གསུངས་པས་སོ། །ལྔ་པ་ནི། བདེན་གཉིས་ལས། བརྟགས་པའི་ངོ་བོས་དབེན་པ་ཡི། །ཇི་ལྟར་སྣང་བ་འདི་ཁོ་ན། །བརྟེན་ཏེ་སྐྱེས་པ་ཐམས་ཅད་ནི། །ཐམས་ཅད་མཁྱེན་པས་མངོན་སུམ་གཟིགས། །ཞེས་ཡུལ་སྐྱེ་འགག་དང་བཅས་པའི་ཀུན་རྫོབ་སྣང་བས་ཡུལ་ཅན་ཡང་སྐྱེ་འགག་དང་བཅས་པ་འདོད་པ་དང་། སེམས་ཙམ་པས་སངས་རྒྱས་ཀྱི་ཡེ་ཤེས་འདུས་བྱས་ཡིན་ཞིང་། འདུས་བྱས་ཐམས་ཅད་སྐད་ཅིག་མ་ཡིན་པས་སྐྱེ་འགག་དང་བཅས་པར་འདོད་པ་གཉིས་ཀའང་མི་འཐད་དེ། འདུས་བྱས་ཡིན་ན། བརྫུན་པ་བསླུ་བའི་ཆོས་ཅན་ཡིན་དགོས་པའི་ཕྱིར་དང་། སྐྱེ་འགག་སྣང་ན་རྟེན་ཅིང་འབྲེལ་བར་འབྱུང་བ་སྐྱེ་མེད་ཀྱི་དོན་མངོན་དུ་མ་གྱུར་པར་ཀླུ་སྒྲུབ་ཀྱིས་གསུངས་པའི་ཕྱིར་ཏེ། རིགས་པ་དྲུག་ཅུ་པ་ལས། ཆོས་ཤེས་པ་ཡི་འོག་ཏུ་ནི། །འདི་ལ་བྱེ་བྲག་དབྱེར་ཡོད་ན། །ཤིན་ཏུ་ཕྲ་བའི་དངོས་རྣམས་ལ། །གང་གིས་སྐྱེ་བར་རྣམ་བརྟགས་པ། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་གསུངས་པས་སོ། །དེས་ན་སངས་རྒྱས་ཀྱི་ཡེ་ཤེས་དང་། དེའི་རང་སྣང་ལ་སྐྱེ་འགག་མེད་དེ། མདོ་ལས་འཇམ་དཔལ་སྐྱེ་བ་མེད་ཅིང་འགག་པ་མེད་པ་ཞེས་བྱ་བ་འདི་ནི་དེ་བཞིན་གཤེགས་པའི་ཚིག་བླ་དྭགས་སོ། །ཞེས་དང་། ཀླུ་སྒྲུབ་ཀྱིས། གང་གིས་སྐྱེ་དང་འཇིག་པ་དག །ཚུལ་འདི་ཡིས་ནི་སྤངས་གྱུར་པ། །རྟེན་ཅིང་འབྱུང་བ་གསུངས་པ་ཡིས། །ཐུབ་དབང་དེ་ལ་ཕྱག་འཚལ་ལོ། །ཞེས་དང་། འཇུག་པར། དེ་ཚེ་སྐྱེ་བ་མེད་ཅིང་འགག་པ་མེད། །ཅེས་པའི་འགྲེལ་པར། ཡེ་ཤེས་ཀྱི་རང་བཞིན་ཅན་གྱི་སྐུ་ཤེས་བྱའི་བུད་ཤིང་སྐམ་པོ་མ་ལུས་པ་བསྲེགས་པ་ལས་ཤེས་བྱ་སྐྱེ་བ་མེད་པས་སྐྱེ་བ་མེད་པ་དང་ལྡན་པར་གྱུར་པ་གང་ཡིན་པ་འདི་ནི་སངས་རྒྱས་རྣམས་ཀྱི་ཆོས་ཀྱི་སྐུའོ། །ཞེས་སོགས་མང་དུ་གསུངས་པའི་ཕྱིར་རོ། །གདུལ་བྱའི་ངོར་སྐྱེ་འགག་ཏུ་སྣང་བ་ནི་གཞན་སྣང་ཡིན་གྱི་རང་སྣང་མ་ཡིན་ཏེ། རྒྱུད་བླར། དགེ་བ་སྐྱེ་དང་འཇིག་པས་ན། །སངས་རྒྱས་སྐུ་ནི་སྐྱེ་དང་འཇིག །བརྒྱ་བྱིན་བཞིན་དུ་ཐུབ་པ་ནི། །ཆོས་ཀྱི་སྐུ་ཡི་སྐྱེ་འཇིག་མེད། །ཅེས་བཻཌཱུརྻའི་ས་གཞི་ལ་ཤར་བའི་བརྒྱ་བྱིན་གྱི་གཟུགས་བརྙན་སའི་ཡོན་ཏན་དང་བྲལ་མ་བྲལ་གྱིས་སྐྱེ་འཇིག་ཏུ་སྣང་ཡང་དེ་ལྟ་བུའི་སྐྱེ་འཇིག་བརྒྱ་བྱིན་ལ་མེད་པ་དཔེར་བྱས་ནས། གདུལ་བྱའི་རྒྱུད་ཀྱི་དགེ་བ་ཡོད་མེད་ཀྱི་དབང་གིས་བློ་སྣང་གི་གཟུགས་སྐུ་ལ་སྐྱེ་འཇིག་ཏུ་སྣང་ཡང་སངས་རྒྱས་རང་ལ་སྐྱེ་འཇིག་མེད་པར་གསུངས་པའི་ཕྱིར་རོ། །སྤྱོད་འཇུག་ལས། གལ་ཏེ་དེ་ལྟར་ཀུན་རྫོབ་མེད། །དེ་ལ་བདེན་གཉིས་ག་ལ་ཡོད། །དེ་ཡང་ཀུན་རྫོབ་གཞན་གྱིས་ན། །སེམས་ཅན་མྱང་ངན་ག་ལ་འདའ། །ཞེས་པའི་ལན་དུ། འདི་ནི་གཞན་སེམས་རྣམ་རྟོག་སྟེ། །དེ་ནི་རང་གི་ཀུན་རྫོབ་མིན། །ཕྱིས་དེ་ངེས་ན་དེ་ཡོད་དེ། །མིན་ན་ཀུན་རྫོབ་མེད་པ་ཉིད། །ཅེས་གསུངས་པའི་དོན་ཡང་འདི་ཉིད་ཡིན་ནོ། །མདོར་ན་རྩ་བ་ཤེས་རབ་ཀྱི་མཆོད་བརྗོད་ཀྱི་སྐབས་ཀྱི་སྐྱེ་འགག་ལ་སོགས་པ་བརྒྱད་དང་། རབ་བྱེད་ཉི་ཤུ་རྩ་བདུན་གྱིས་དཔྱད་པར་བྱ་བའི་རྐྱེན་ནས་ལྟ་བའི་བར་ཉི་ཤུ་རྩ་བདུན་དང་། དེས་མཚོན་ནས་ཀུན་རྫོབ་ཐ་སྙད་ཀྱི་རྣམ་གཞག་ཐམས་ཅད་སྤྲོས་པ་ཡིན་པས་དེ་དག་སངས་རྒྱས་ཀྱི་སར་ཆོས་ཀྱི་དབྱིངས་སུ་རོ་གཅིག་པར་ཡེ་ཤེས་སྐད་ཅིག་མ་གཅིག་གིས་མངོན་དུ་གྱུར་པའི་ཚེ་སྤྲོས་པ་དེ་དག་མི་སྣང་ཡང་དེ་དག་རྟོགས་ཞེས་པའི་ཐ་སྙད་ནི་མི་འགལ་ཏེ་སྐྱེ་འགག་མེད་པ་ལ་སོགས་པའི་ཆོས་དབྱིངས་མངོན་དུ་གྱུར་པས་སྐྱེ་འགག་ལ་སོགས་པའི་ཆོས་ཅན་ལ་སྒྲོ་འདོགས་ཆོད་ནས་གདུལ་བྱ་ལ་ཇི་ལྟ་བ་བཞིན་སྟོན་ནུས་པ་ཙམ་ལ་རྟོགས་པའི་ཐ་སྙད་མཛད་པའི་ཕྱིར་རོ། །དཔེར་ན་ཐེག་ཆེན་གྱི་མཐོང་ལམ་སྤྲོས་པ་སོ་གཉིས་དང་བྲལ་བའི་ཆོས་དབྱིངས་མངོན་དུ་གྱུར་པས་མི་རྟག་ལ་སོགས་བཅུ་དྲུག་མི་སྣང་ཡང་རྗེས་ཐོབ་ཏུ་དེ་ལ་སྒྲོ་འདོགས་ཆོད་པའི་ངེས་ཤེས་འདྲེན་པས་དེ་རྟོགས་པར་བཞག་པ་བཞིན་ནོ། །གཉིས་པ་ལ་གསུམ་སྟེ། རྟེན་སྐུ་བཤད་པ། བརྟེན་པ་ཡེ་ཤེས་བཤད་པ། མཛད་པ་ཕྲིན་ལས་བཤད་པའོ། །དང་པོ་ནི། འཇམ་དཔལ་གྱི་རང་གི་ལྟ་བའི་འདོད་པ་མདོར་བསྟན་པའི་མདོ་ལས། སྐུ་གཅིག་ནས་ལྔའི་བར་གྱི་རྣམ་གཞག་བཤད་པ་ཡོད་ཀྱང་། བྱམས་མགོན་དང་ཀླུ་གྲུབ་ཀྱི་གཞུང་ལས། སྐུ་གཉིས་ཀྱི་རྣམ་གཞག་དང་། སྐུ་གསུམ་གྱི་རྣམ་གཞག་གསུངས་པ་ལས། དང་པོ་ནི་རྒྱུད་བླར། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་དང་། རིགས་པ་དྲུག་ཅུ་པ་ལས། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་ནི་ཐོབ་པར་ཤོག །ཞེས་དང་། རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་འཁྲུངས་པ་སྟེ། །དེ་བཞིན་ཆོས་ཀྱི་སྐུ་དག་ནི། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་པ་རྣམས་ཀྱིས་སྟོན་ཏོ། །དེ་ལ་གཟུགས་སྐུ་གཞན་དོན་ཀུན་རྫོབ་པའི་སྐུ་ཡིན་པར་གསུངས་པ་ནི། འཇིག་རྟེན་མཐུན་འཇུག་ལྟར་ན། གདུལ་བྱའི་རྣམ་རིག་ལ། ལོངས་སྐུ་དང་སྤྲུལ་སྐུར་དངོས་སུ་སྣང་བ་ཉིད་ཡིན་ལ། ཐ་སྙད་དཔྱོད་པའི་རིགས་པ་ལྟར་ན། སངས་རྒྱས་རང་སྣང་གི་སྐུ་གཉིས་ཏེ། རྒྱུད་བླར། རང་བཞིན་གནས་རིགས་ཆོས་སྐུའི་རྒྱུ་དང་། རྒྱས་འགྱུར་གྱི་རིགས་གཟུགས་སྐུའི་རྒྱུར་གསུངས་ཤིང་། ཀླུ་སྒྲུབ་ཀྱི་གཞུང་ལས་ཚོགས་གཉིས་པོ་སྐུ་གཉིས་ཀྱི་རྒྱུར་གསུངས་པའི་དོན། སངས་རྒྱས་རང་གི་སྔོན་གྱི་རིགས་གཉིས་དང་། ཚོགས་གཉིས་ལ་འཇོག་དགོས་ལ། དེ་ནི་གདུལ་བྱའི་རྣམ་རིག་གི་རྒྱུར་མི་རུང་བའི་ཕྱིར་རོ། །གཉིས་པ་སྐུ་གསུམ་གྱི་རྣམ་གཞག་ནི། རྒྱུད་བླར། དེ་དབྱེ་ཟབ་དང་རྒྱ་ཆེ་དང་། །བདག་ཉིད་ཆེན་པོའི་ཡོན་ཏན་གྱི། །ཞེས་དང་། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡིན། །དང་པོས་སྐུ་ནི་དང་པོ་སྟེ། །གཉིས་པ་ཡི་ནི་ཕྱི་མ་གཉིས། །ཞེས་དང་། ཀླུ་སྒྲུབ་ཀྱིས་སྐུ་གསུམ་ལ་བསྟོད་པ་ལས། གཅིག་མིན་དུ་མ་མ་ཡིན་བདག་དང་གཞན་ལ་ཕན་པ་ཕུན་སུམ་ཚོགས་ཆེན་གཞིར་གྱུར་པ། །དངོས་མིན་དངོས་པོ་མེད་པ་མ་ཡིན་མཁའ་ལྟར་རོ་གཅིག་རྟོགས་པར་དཀའ་བའི་རང་བཞིན་ཅན། །གོས་པ་མེད་ཅིང་མི་འགྱུར་ཞི་ལ་མི་མཉམ་པ་ལ་ཁྱབ་པ་ཅན་དེ་སྤྲོས་མེད་པ། །སོ་སོ་རང་རིག་རྒྱལ་བ་རྣམས་ཀྱི་ཆོས་སྐུ་དཔེ་མེད་གང་ཡིན་དེ་ལ་བདག་ཕྱག་འཚལ། །རང་གི་འབྱོར་པ་འཇིག་རྟེན་ལས་འདས་བསམ་གྱིས་མི་ཁྱབ་ལེགས་སྤྱད་བརྒྱ་ཡི་འབྲས་བུ་ནི། །བློ་ཅན་རྣམས་ཀྱི་དགའ་བ་བསྐྱེད་ཕྱིར་འཁོར་གྱི་ནང་དུ་སྣ་ཚོགས་རྒྱས་པར་སྟོན་མཛད་ཅིང་། །རྟག་ཏུ་དམ་པའི་ཆོས་ཀྱི་སྒྲ་སྐད་རྒྱ་ཆེན་འཇིག་རྟེན་ཀུན་དུ་འཕྲོ་བར་མཛད་པ་པོ། །སངས་རྒྱས་ལོངས་སྤྱོད་རྫོགས་སྐུ་ཆོས་ཀྱི་རྒྱལ་སྲིད་གནས་པ་གང་ཡིན་དེ་ལ་ཕྱག་འཚལ་ལོ། །སེམས་ཅན་རྣམས་ནི་སྨིན་པར་མཛད་ཕྱིར་ལ་ལ་དག་ཏུ་མེ་འབར་བཞིན་དུ་གང་སྣང་ཞིང་། །ལ་ལར་ཡང་ནི་རྫོགས་པར་བྱང་ཆུབ་ཆོས་ཀྱི་འཁོར་ལོ་རབ་ཏུ་ཞི་བ་གང་སྣང་ལ། །སྣ་ཚོགས་ཐབས་ཚུལ་རྣམས་ཀྱིས་རྣམ་པ་དུ་མར་འཇུག་ཅིང་སྲིད་པ་གསུམ་གྱི་འཇིགས་སེལ་བ། །ཕྱོགས་བཅུར་ཆུབ་མཛད་ཐུབ་པ་རྣམས་ཀྱི་སྤྲུལ་སྐུ་དོན་ཆེན་གང་ཡིན་དེ་ལ་ཕྱག་འཚལ་ལོ། །སེམས་ཅན་དོན་གཅིག་རྒྱུན་དུ་མཛད་ཅིང་བསོད་ནམས་ཡེ་ཤེས་ཆེན་པོ་དཔག་མེད་ལས་བྱུང་བའི། །བདེ་བར་གཤེགས་པ་རྣམས་ཀྱི་སྐུ་གསུམ་ཡིད་དང་ཚིག་གི་ལམ་ལས་རབ་ཏུ་འདས་པ་ལ། །བདག་གིས་དད་པས་ཕྱག་བྱས་དགེ་བ་བྱང་ཆུབ་ས་བོན་བསགས་པར་གྱུར་པ་གང་ཡིན་དེས། །སྐུ་གསུམ་ཐོབ་ནས་འགྲོ་བ་མ་ལུས་པ་རྣམས་བྱང་ཆུབ་ལམ་ལ་ངེས་པར་འཛུད་པར་ཤོག །ཅེས་གསུངས་པ་ལྟར་རོ། །འཇུག་པར། ཆོས་སྐུ་དང་། ལོངས་སྐུ་དང་། དེའི་རྒྱུ་མཐུན་གྱི་སྐུ་ཞེས་པའི་ཐ་སྙད་མཛད་ནས། དང་པོ་ནི། སྔར་བཤད་པའི་དབྱིངས་དང་ཡེ་ཤེས་དབྱེར་མེད་པ་ཉིད་དོ། །གཉིས་པ་ནི། དེ་ཉིད་མངོན་སུམ་དུ་མཛད་པའི་སྐུ་འོག་མིན་གྱི་གནས་ན་བཞུགས་པའི་མཚན་དང་དཔེ་བྱད་ཀྱི་སྤྲས་པའོ། །གསུམ་པ་ནི། རང་ཉིད་ཀྱི་སྐུ་གཅིག་གམ་བ་སྤུའི་ཁུང་བུ་གཅིག་ལའང་རང་གཞན་གྱི་དུས་གསུམ་གྱི་སྤྱོད་པ་དང་འཁོར་འདས་ཀྱི་སྣང་བ་མ་ལུས་པ་སྟོན་པ་སྟེ། འདི་ལ་སྤྲུལ་པའི་སྐུ་ཞེས་པའི་ཐ་སྙད་ནི་མི་མཛད་པར་སྣང་ངོ་། །འདི་དག་ལ་སྐུ་གསུམ་ཞེས་པའི་ཐ་སྙད་མཛད་པ་ཡང་། །དག་པ་འདི་ནི་བཞེད་པ་འཇུག་པ་ཡིས། །ཞེས་པའི་སྔ་འགྲེལ་དུ། སྐུ་གསུམ་རྫོགས་པར་བརྗོད་ན་རྣམ་པར་རྟོག་པ་མི་མངའ་བར་ཟིན་ཀྱང་བཞེད་པ་ལ་མངའ་བསྒྱུར་བ་ཉིད་ཕུན་སུམ་ཚོགས་པར་བསྟན་པའི་ཕྱིར་བཤད་པ། ཞེས་པས་འགྲུབ་བོ། །འོ་ན་སྤྲུལ་སྐུའི་ཐ་སྙད་གཏན་མི་བཞེད་དམ་སྙམ་ན། དེ་ལྟ་བུའི་སྐུ་གསུམ་བརྙེས་ཟིན་ནས་གདུལ་བྱ་གང་ན་ཡོད་པའི་གནས་དེ་དང་དེར་མཛད་པ་བཅུ་གཉིས་ལ་སོགས་པའི་གང་ལ་ཅི་འདུལ་སྟོན་པ་ཉིད་སྤྲུལ་སྐུར་བཞེད་དེ། སླར་ཡང་མི་གཡོའི་སྐུ་མངའ་ཁྱོད་ཀྱི་སྲིད་གསུམ་བྱོན་ནས་སྤྲུལ་རྣམས་ཀྱིས། །ཞེས་དང་། དེའི་འགྲེལ་པར། བཅོམ་ལྡན་འདས་ནི་ཁམས་གསུམ་ལས་འདས་སུ་ཟིན་ཀྱང་སྤྲུལ་པའི་སྐུ་རྣམས་ཀྱིས་ཡབ་དང་ཡུམ་དང་སྲས་ལ་སོགས་པ་དང་འབྲེལ་པར་སྟོན་ཅིང་འཇིག་རྟེན་དང་རྗེས་སུ་མཐུན་ཏེ། ཞེས་གསུངས་སོ། །གཉིས་པ་བརྟེན་པ་ཡེ་ཤེས་ནི། རྗེ་བཙུན་རྩེ་མོས། ཕ་རོལ་ཏུ་ཕྱིན་པའི་ཐེག་པར་སྐུ་གསུམ་དང་ཡེ་ཤེས་བཞི་ལས་མ་བཤད་ལ། སྐུ་བཞི་དང་ཡེ་ཤེས་ལྔ་ནི་རྡོ་རྗེ་ཐེག་པའི་ཁྱད་ཆོས་ཡིན་པར་གསུངས་པས། འདིར་ཡང་ཡེ་ཤེས་ནི་བཞི་སྟེ། མེ་ལོང་ལྟ་བུའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་རྟོག་པའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་སོ། །དང་པོ་ལ། རྒྱུ་དང་ངོ་བོ་གཉིས་ལས། རྒྱུ་ལ་ངོ་བོའི་རྒྱུ་དང་གནས་གྱུར་གྱི་རྒྱུ་གཉིས། དང་པོ་ནི། ཐོས་བསམ་གྱི་ཤེས་རབ་སྟེ། མདོ་སྡེ་རྒྱན་ལས། འཛིན་པའི་ཕྱིར་དང་ཞེས་སོ། །གཉིས་པ་ནི། ཀུན་གཞི་སྟེ། སངས་རྒྱས་ཀྱི་ས་ལས། ཀུན་གཞིའི་རྣམ་ཤེས་གང་ཡིན་པ། །དེ་ནི་མེ་ལོང་ཡེ་ཤེས་གྱུར། །ཞེས་སོ། །གཉིས་པ་ངོ་བོ་ནི། གཡོ་བྱེད་གཟུང་འཛིན་གཉིས་དང་བྲལ་བའི་ཆ་ནས་འཇོག་པའོ། །མཉམ་ཉིད་ཡེ་ཤེས་ལའང་གཉིས་ལས། རྒྱུ་ལ་ངོ་བོའི་རྒྱུ་ནི། སེམས་ཅན་ཐམས་ཅད་ལ་སེམས་མཉམ་པ་ཉིད་བསྒོམ་པ་ལས་བྱུང་བ་ཡིན་ཏེ་སེམས་མཉམ་ཕྱིར་ཞེས་སོ། །གནས་གྱུར་གྱི་རྒྱུ་ནི་ཉོན་མོངས་པ་ཅན་གྱི་ཡིད་དོ། །ངོ་བོའི་ཁྱད་པར་ནི་འཁོར་འདས་ཀྱི་མཐའ་ལ་མི་གནས་པའི་ཆ་ནས་འཇོག་པའོ། །སོ་སོར་རྟོག་པའི་ཡེ་ཤེས་ལ་གཉིས་ལས། རྒྱུ་ལ་ངོ་བོའི་རྒྱུ་ནི་གཞན་ལ་ཆོས་བསྟན་པ་ལས་བྱུང་བ་ཡིན་ཏེ། ཡང་དག་ཆོས་རབ་སྟོན་ཕྱིར་དང་། །ཞེས་སོ། །གནས་གྱུར་གྱི་རྒྱུ་ནི་ཡིད་ཀྱི་རྣམ་པར་ཤེས་པའོ། །ངོ་བོའི་ཁྱད་པར་ནི་ཆོས་ཅན་ཇི་སྙེད་པ་མཁྱེན་པའི་ཆ་ནས་འཇོག་པའོ། །བྱ་བ་གྲུབ་པའི་ཡེ་ཤེས་ལ་གཉིས་ལས། རྒྱུ་ལ་ངོ་བོའི་རྒྱུ་ནི་གཞན་གྱི་བྱ་བ་བསྒྲུབ་པ་ལ་བརྟེན་ནས་བྱུང་བ་ཡིན་ཏེ། བྱ་བ་སྒྲུབ་པ་ཉིད་ཀྱི་ཕྱིར། །ཞེས་སོ། །གནས་གྱུར་གྱི་རྒྱུ་ནི་སྒོ་ལྔའི་རྣམ་པར་ཤེས་པའོ། །ངོ་བོའི་ཁྱད་པར་ནི་སེམས་ཅན་གྱི་ཁམས་དང་། བག་ལ་ཉལ་མཁྱེན་པའི་སྒོ་ནས་འཇོག་པའོ། །དེ་ལྟར་ཡེ་ཤེས་བཞི་པོ་དེ་དག་སྤྲོས་པ་དང་བྲལ་བའི་སངས་རྒྱས་ཀྱི་ཡེ་ཤེས་གཅིག་ཉིད་ལ་རྒྱུ་དང་ཡོན་ཏན་གྱི་ལྡོག་པ་གཞན་སྣང་གི་བློས་རྣམ་པར་གཞག་པ་ཙམ་ཞིག་ནི་འགལ་བ་མེད་ལ། རང་སྣང་ལ་ནི་མི་འདྲ་བའི་དབྱེ་བ་མེད་དོ། །དེ་བཞིན་དུ་འཇུག་པར། ཇི་ལྟར་སྣོད་ཀྱི་དབྱེ་བས་མཁའ་ལ་དབྱེ་བ་མེད་དེ་ལྟར། །དངོས་བྱས་དབྱེ་བ་འགའ་ཡང་དེ་ཉིད་ལ་མེད་དེ་ཡི་ཕྱིར། །རོ་མཉམ་ཉིད་དུ་ཡང་དག་ཐུགས་སུ་ཆུད་པར་མཛད་གྱུར་ནས། །ཞེས་པའི་ལྡོག་པ་ནས་ཇི་ལྟ་བ་མཁྱེན་པའི་ཡེ་ཤེས་དང་། །མཁྱེན་བཟང་ཁྱོད་ཀྱིས་སྐད་ཅིག་གིས་ནི་ཤེས་བྱ་ཐུགས་སུ་ཆུད། །ཅེས་པའི་ཡོན་ཏན་གྱི་ལྡོག་པ་ནས་ཇི་སྙེད་པ་མཁྱེན་པའི་ཡེ་ཤེས་སུ་བཞག་སྟེ། དེ་གཉིས་ཐ་དད་དུ་སྣང་བ་གཞན་སྣང་དང་། རང་སྣང་ལ་དབྱེ་བ་མེད་པའི་ཚུལ་ནི་སྔ་མ་ལྟར་རོ། །གསུམ་པ་མཛད་པ་ཕྲིན་ལས་ལ་བཞི་སྟེ། དབྱེ་བ་དང་། རྣམ་པར་རྟོག་པ་མི་མངའ་བའི་ཚུལ་དང་། དེས་ལྷུན་གྱིས་གྲུབ་པར་བཞག་པའི་ཚུལ་དང་རྒྱུན་མི་འཆད་པའི་ཚུལ་ལོ། །དང་པོ་ལ་གཉིས་ཏེ། ས་མཚམས་ཀྱི་སྒོ་ནས་དབྱེ་བ། རྣམ་པའི་སྒོ་ནས་དབྱེ་བའོ། །དང་པོ་ནི། མངོན་རྟོགས་རྒྱན་ལས། གདུལ་བྱ་ལམ་གྱི་རྟེན་ལ་འགོད་པ་ནས་ལམ་གྱི་འབྲས་བུ་ལ་འགོད་པའི་བར་ཉི་ཤུ་རྩ་བདུན་གསུངས་སོ། །གཉིས་པ་ནི་མདོ་དག་ལས་གསུངས་པའི་ཚུལ་བསྡུ་ན། སྣ་ཚོགས་པ་དང་། ཁྱབ་བྱེད་པ་དང་། ལྷུན་གྱིས་གྲུབ་པ་དང་། གཅིག་ཏུ་ཕན་པ་དང་། དུས་ལས་མི་འདའ་བ་དང་། བར་མི་ཆད་པ་དང་། རྒྱུན་མི་ཆད་པ་དང་། འདྲེས་པ་ལས་སོ་ཞེས་གསུངས་པ་རྣམས་སོ། །གཉིས་པ་ནི། དེ་ལྟར་གདུལ་བྱ་གང་དང་གང་གིས་གདུལ་བ་ལ་ཇི་ལྟར་འཚམས་པ་ལྟར་དེ་དང་དེའི་རྣམ་པ་སྣ་ཚོགས་སྟོན་ཡང་འདི་བྱའོ་སྙམ་པའི་རྣམ་པར་རྟོག་པ་མི་མངའ་བ་སྟེ། སྤྱོད་འཇུག་ལས། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱར་སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ་། །དཔེར་ན་ནམ་མཁའ་ལྡིང་གི་ནི། །མཆོད་སྡོང་བསྒྲུབས་ནས་འདས་གྱུར་པ། །དེ་འདས་ཡུན་རིང་ལོན་ཡང་དེ། །དུག་ལ་སོགས་པ་ཞི་བྱེད་ལྟར། །བྱང་ཆུབ་སྤྱོད་པའི་རྗེས་མཐུན་པར། །རྒྱལ་བའི་མཆོད་སྡོང་བསྒྲུབས་པ་ཡང་། །བྱང་ཆུབ་སེམས་དཔའ་མྱ་ངན་ལས། །འདས་ཀྱང་དོན་རྣམས་ཐམས་ཅད་མཛད། །ཅེས་དང་། འཇུག་པ་ལས། ཇི་ལྟར་རྫ་མཁན་སྟོབས་ཆེན་ལྡན་པས་འདིར། །ཡུན་རིང་ཆེས་འབད་པས་བསྐོར་འཁོར་ལོ་ནི། །དེའི་རྩོལ་ད་ལྟ་སྐྱེས་པ་མེད་བཞིན་དུའང་། །འཁོར་ཞིང་བུམ་པ་ལ་སོགས་རྒྱུར་མཐོང་ལྟར། །དེ་བཞིན་ད་ལྟ་སྐྱེས་རྩོལ་མེད་བཞིན་དུ། །ཆོས་ཀྱི་བདག་ཅན་སྐུ་ཉིད་ལ་བཞུགས་དེའི། །འཇུག་པ་སྐྱེ་བོའི་དགེ་དང་སྨོན་ལམ་གྱི། །ཁྱད་པར་གྱིས་འཕངས་ལས་ཆེས་བསམ་མི་ཁྱབ། །ཅེས་གསུངས་པ་ལྟར་རོ། །གསུམ་པ་ནི། རྣམ་པར་རྟོག་པ་མི་མངའ་བར་ཕྲིན་ལས་སྣ་ཚོགས་འབྱུང་བས་ལྷུན་གྱིས་གྲུབ་པ་ཉིད་ཀྱི་དཔེ་ནི། རྒྱུད་བླར། བརྒྱ་བྱིན་རྔ་སྤྲིན་ཚངས་པ་དང་། །ཉི་མ་ནོར་བུ་རིན་ཆེན་བཞིན། །དེ་བཞིན་གཤེགས་པ་སྒྲ་བརྙན་བཞིན། །ནམ་མཁའ་དང་ནི་ས་བཞིན་ནོ། །ཞེས་དཔེ་དགུའི་སྒོ་ནས་བསྟན་ཏོ། །བཞི་པ་ནི། རྒྱུད་བླ་མ་ལས། རྒྱུད་མཐའ་ཡས་དང་སེམས་ཅན་ཟད་མེད་དང་། །བརྩེ་དང་འཕྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུད་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་གཟུགས་སྐུ་རྟག་པའི་རྒྱུ་བདུན་དང་། ཆོས་སྐུ་རྟག་པའི་རྒྱུ་གསུམ་བཤད་དོ། །དེས་ན་བཅོམ་ལྡན་འདས་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མས་བསྐྲུན་ནས། སྙིང་རྗེའི་མ་མ་ལ་གཏད་པས། འཇིག་རྟེན་མཐའ་དག་སངས་རྒྱས་ཉིད་དུ་འགྱུར་བ་མ་ཡིན་པ་དང་། ཇི་སྲིད་ནམ་མཁའ་འཇིག་པར་མི་འགྱུར་བ་དེ་སྲིད་ཀྱི་བར་དུ་ཕྲིན་ལས་རྒྱུན་མི་ཆད་པ་ཡིན་ཏེ། འཇུག་པ་ལས། རྒྱལ་བ་ཇི་སྲིད་འཇིག་རྟེན་མཐའ་དག་མཆོག་ཏུ་རབ་ཞི་བར། །འགྲོ་བ་མིན་ཞིང་ནམ་མཁའ་རྣམ་འཇིག་འགྱུར་མིན་དེ་སྲིད་དུ། །ཤེས་རབ་ཡུམ་གྱིས་བསྐྱེད་པ་ཁྱོད་ལ་ཐུགས་བརྩེ་མ་མ་ཡིས། །ཚུལ་ལུགས་བྱེད་པས་རབ་ཏུ་ཞི་བར་འགྱུར་བ་གང་ལ་མངའ། །ཞེས་གསུངས་པས་སོ། །དེ་ལྟར་ན་རྫོགས་པའི་སངས་རྒྱས་ཀྱི་ཕྲིན་ལས་ནི་སྣ་ཚོགས་པ་དང་། རྒྱུན་མི་ཆད་པ་དང་། ལྷུན་གྱིས་གྲུབ་པ་འབྱུང་བར་ཤེས་པར་བྱའོ། །ད་ནི་ཁྱད་པར་ཅན་གྱི་དབུ་མ་དེ་ཉིད་ལ་འཇུག་པ་གདམས་པར་བྱ་སྟེ། དེ་ལྟར་ཤེས་བྱ་སྟོང་པ་ཉིད་ལ། ལུང་དང་རིགས་པའི་སྒྲོན་མེས། སློབ་དཔོན་ཀླུ་སྒྲུབ་ཡབ་སྲས་ཀྱིས་གཞི་ལམ་འབྲས་བུ་ཁྱད་པར་འཕགས་པའི་དབུ་མ་གསལ་བར་བསྡུས་པ་འདི་ནི། སྐྱེ་བོ་རྟོགས་པ་དང་ལྡན་པ་དག་གིས་དབུ་མའི་ལུགས་དང་སྟོང་པ་ཉིད་ལེགས་པར་རྟོགས་པའང་དོན་ཆེ་བ་ཉིད་དང་། ཤིན་ཏུ་རྙེད་པར་དཀའ་བ་ཉིད་དང་། བར་ཆད་མང་བ་ཉིད་དུ་ཤེས་པར་བྱས་ནས། བདུད་ཀྱི་ལས་དང་། བསམ་པ་དང་སྦྱོར་བའི་དྲི་མ་སྤངས་ཏེ། དགའ་བ་དང་། དད་པ་དང་། གུས་པས་མཉན་པ་དང་། ཐོས་ནས་ཀྱང་ནམ་ཡང་ཆུད་མི་ཟ་བར་ཚུལ་བཞིན་དུ་བསམ་པས་ངེས་པར་བྱ་བ་དང་། བྱང་ཆུབ་ཀྱི་སེམས་བསྒོམ་པ་དང་། གཞན་ལ་བསྟན་པའི་བྱ་བ་ལ་བརྩོན་པར་བྱའོ། །དེ་བས་གང་དག་འདིའི་དོན་ལ་རྟོག་དཔྱོད་མེད་པ་དག་གིས་ཀྱང་གཞུང་འདི་ཉིད་ལ་སྤྲོ་བས་བྲི་བ་དང་། ཀློག་པ་དང་། མཆོད་པར་བྱ་བ་དང་། དོན་རྟོགས་པ་ཉིད་དུ་སྨོན་ལམ་གདབ་པར་ཡང་བྱ་སྟེ། བསོད་ནམས་ཚད་མེད་པ་ཐོབ་པ་དང་། ནམ་ཞིག་རྟོགས་པར་ངེས་པ་དང་། དེ་ལ་བརྟེན་ནས་རང་གཞན་གྱི་དོན་ཕུན་སུམ་ཚོགས་པ་འབྱུང་བའི་རྒྱུ་ཡིན་པའི་ཕྱིར་རོ། །གང་ཞིག་བསྟེན་པས་ཟབ་མོ་དབུ་མའི་གནད། །ཚུལ་བཞིན་དཔྱོད་པའི་སྐལ་བ་བཟང་ཐོབ་པ། །ཡོངས་འཛིན་དམ་པའི་ཚོགས་ཀྱི་ཞབས་པད་མོར། །བཀའ་དྲིན་དྲན་པས་སླར་ཡང་ཕྱག་བགྱི་འོ། །མི་སྡུག་ཆུ་ཡིས་འདོད་ཆགས་དྲི་མ་འཁྲུད་ཀྱང་སྡང་བའི་བྲག་རི་བཤིག་མི་ནུས། །བྱམས་པའི་མེ་ཡིས་ཞེ་སྡང་ཚང་ཚིང་བསྲེག་ཀྱང་ཆགས་པའི་དྲི་མ་འཁྲུད་པ་མིན། །སྟོང་དང་རྟེན་འབྱུང་གཅིག་པར་རྟོགས་པའི་ཡེ་ཤེས་མཚོན་གྱིས་སྐྱེ་བའི་འབྲས་བུ་ཅན། །ལས་དང་ཉོན་མོངས་ཡལ་འདབ་རྒྱས་པའི་བདག་ལྟའི་ལྗོན་ཤིང་རྩད་ནས་གཅོད་པར་བྱེད། །ཟབ་མོའི་བཅུད་འདི་སྐྱོབ་པ་ཉི་མ་ཡིས། །རྣམ་པར་ཕྱེ་བའི་གསུང་རབ་འདབ་བརྒྱའི་ཚལ། །ལ་ལར་དངོས་བསྟན་ལ་ལར་དྲང་ཕྱིར་དུ། །ཀུན་རྫོབ་སྤྲོས་པའི་ཚོགས་ཀྱི་སྟོན་པར་མཛད། །དེ་སླད་དྲང་སྲོང་གསུང་ཀུན་སྟོང་ཉིད་ལ། །གཅིག་ཏུ་འབབ་ཅིང་གཞོལ་བའི་གཏམ་གྱི་ཕུལ། །ཇི་བཞིན་སྨྲ་བ་ཀླུ་སྒྲུབ་སྙིང་པོའོ་ཞེས། །རྣམ་མང་མདོ་སྡེའི་ཚོགས་ལས་རབ་ཏུ་བསྔགས། །བསྔགས་འོས་དེ་ཡིས་དོན་དམ་ལ་དགོངས་ནས། །རིགས་པའི་ཚོགས་ལས་སྤྲོས་པ་མ་ལུས་བཀག །བསྟོད་ཚོགས་འགའ་ལས་སྐྱོན་ལྔ་སྤང་ཕྱིར་དུ། །ཆོས་དབྱིངས་སྒྲུབ་པའི་ཚུལ་གྱིས་ཡོད་པར་གསུངས། །འདི་དང་རྒྱལ་ཚབ་དམ་པའི་གཞུང་གཉིས་སུ། །ཇི་ལྟར་མཐོང་ཚེ་སྤྲོས་པ་ཉེར་ཞི་ཞིང་། །ཇི་སྙེད་མཐོང་ཚེ་འགྲོ་ཀུན་སངས་རྒྱས་ཀྱི། །སྙིང་པོ་ཅན་དུ་གཟིགས་པར་གསུངས་པ་མཐུན། །འདི་ལས་གཞན་དུ་སྨྲ་བ་ངན་པ་དག །ཆོས་དབྱིངས་བདེན་པར་ཡོད་ཅེས་སྒྲོགས་པ་དང་། །ལ་ལ་གཞན་སེམས་གནས་ལུགས་མཐར་ཐུག་ཏུ། །སྨྲ་བ་གཉིས་ཀ་རྟག་ཆད་གཡང་སར་ལྷུང་། །གནས་ལུགས་དཔྱོད་ཚེ་ཡོད་མེད་ཕྱོགས་བཤིག་ནས། །ཐ་སྙད་འཇོག་ཚེ་ཡོད་མེད་ཡིན་མིན་སོགས། །འཇིག་རྟེན་ལྷན་སྐྱེས་ཇི་ལྟར་ཁས་བླངས་བཞིན། །འཇོག་པ་ལུགས་འདིའི་ཆོས་སུ་ཟླ་བས་བཞེད། །དེ་སོགས་ཟབ་ཅིང་གཏིང་དཔག་དཀའ་བའི་དོན། །མང་དུ་ཐོས་པའི་རྣ་བས་མྱོང་བ་དང་། །བློ་གྲོས་གསལ་བའི་མིག་གིས་མཐོང་བ་བཞིན། །སྡེབ་ལེགས་མཆུ་སྒྲོས་མཛེས་པའི་ངག་གིས་བཤད། །དེ་ལྟ་ན་ཡང་དུས་ཤུགས་སྙིགས་མ་དང་། །སྙིགས་དུས་མི་རྣམས་བསོད་ནམས་དམན་པའི་མཐུས། །བློ་གྲོས་དམན་པའི་ཚིག་སྒྲོས་ངན་པ་རྣམས། །ཡིད་འོང་མཛེས་པའི་རྒྱན་དུ་རེ་བ་མཐོང་། །སྐལ་བཟང་སྐྱེ་བོ་རྣམ་མང་ཐོས་པ་ཡིས། །བློ་གྲོས་ལུས་བཟང་མཛེས་པ་འགའ་ཞིག་ནི། །དོན་བཟང་ཚིག་གི་ཕྲེང་བར་སྡེབ་ལེགས་པ། །འདི་འདྲའི་རྒྱན་བཟང་འཆང་བའང་ཡིད་ལ་རེ། །སྔོན་དུས་མཁས་མང་ལེགས་བཤད་ཉ་བ་ཅན། །ཟབ་དོན་གསལ་བའི་བཞིན་རས་མཛེས་པ་དག །སྐལ་ལྡན་སྐྱེ་བོ་གདུལ་བྱའི་ཚོགས་རྣམས་ལ། །ཇི་བཞིན་སྟོན་པ་ཇི་འདྲར་བདག་གིས་བཤད། །འདི་ལས་རབ་དཀར་དགེ་ཚོགས་ཟླ་དཀར་རྒྱས་པའི་འོད་དཀར་ལྟ་བུ་གང་ཐོབ་དེས། །བདེ་གཤེགས་གསུང་རབ་ཀུནྡའི་དཔལ་རབ་རྒྱས་པའི་ཚལ་རབ་འགྲོ་བས་མཐོང་གྱུར་ཏེ། །དམ་ཆོས་བསིལ་ཟེར་འཕྲོ་བའི་ཟླ་ཟེར་གཙུག་ནོར་འོད་ཟེར་དང་འདྲེས་བསྟེན་པའི་མཐུས། །སྲིད་ཞིའི་དཔལ་འབྱོར་མ་ལུས་ཀུན་འབྱུང་ཟུང་འཇུག་རྣལ་འབྱོར་སངས་རྒྱས་ཉིད་ཐོབ་ཤོག །རྒྱལ་བ་ཐམས་ཅད་ཀྱི་ཐུགས་ཀྱི་དགོངས་པ་ཟབ་མོ་དབུ་མའི་དེ་ཁོ་ན་ཉིད་སྤྱིའི་ངག་གིས་སྟོན་པ་ངེས་དོན་རབ་གསལ་ཞེས་བྱ་བ་འདི་ནི་མགོན་པོ་ཀླུ་སྒྲུབ་ཀྱི་གཞུང་ལུགས་ཚོགས་གསུམ་དང་། དེའི་དགོངས་འགྲེལ་ཐལ་རང་གི་གཞུང་འགྲེལ་པ་འགྲེལ་བཤད་དང་བཅས་པ་དང་། འཇིག་རྟེན་མི་འབྱེད་རྔོག་ལོ་བརྒྱུད་པ་དང་བཅས་པའི་ལེགས་བཤད་འགའ་ཞིག་དང་། མཐའ་བྲལ་དབུ་མའི་སྲོལ་འཛིན་པ་ཚབ་བརྒྱུད་པ་དང་བཅས་པའི་ལེགས་བཤད་རྣམས་དང་། གསུང་རབ་རྒྱ་མཚོའི་དོན་ལ་འཁྲུལ་པའི་དྲི་མ་ཟད་པ་རྗེ་བཙུན་ས་སྐྱ་པ་ཡབ་སྲས་ཀྱིས་ལེགས་པར་བཀྲལ་བའི་ལྟ་བའི་གཞུང་བཟང་རྣམས་ལ་བརྟེན་ནས་མང་དུ་ཐོས་པའི་དགེ་སློང་བསོད་ནམས་སེང་གེས་རྟ་ནག་རིན་ཆེན་རྩེ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། ༈ །།ཨོཾ་སྭསྟི་སིདྡྷཾ། བསྐལ་པ་གྲངས་མེད་ཚོགས་གཉིས་རབ་བསྒྲུབས་ཤིང་། །སྨོན་ལམ་རྒྱ་ཚོའི་མཐར་སོན་སྙིགས་དུས་ཀྱི། །སྐྱེ་རྒུའི་དཔལ་མགོན་ཤཱཀྱ་སེང་གེ་ཡི། །གསང་གསུམ་ཡོན་ཏན་བསམ་མི་ཁྱབ་དེར་བསྔགས། ༡ །རྒྱལ་བ་དེ་ཡིས་སྣ་ཚོགས་གདུལ་བྱའི་ངོར། །ཆོས་སྒོ་དུ་མར་གསུངས་ཀུན་དངོས་བརྒྱུད་ཀྱི། །མི་གནས་བྱང་ཆུབ་ཆེན་པོ་ལ་གཞོལ་ཞེས། །ཆུ་བོ་རྒྱ་མཚོར་འབབ་པའི་དཔེ་ཡིས་བསྟན། ༢ །གནས་སྐབས་རིགས་ཅན་རྣམ་གསུམ་བཀྲི་བའི་ཕྱིར། །ཐེག་གསུམ་ལམ་དང་མཐར་ཐུག་ཐེག་གཅིག་གཞུང་། །ཟབ་རྒྱས་མཁའ་དང་གཞལ་མེད་ཁང་བཞིན་དུ། །ཆེན་པོ་བདུན་ལྡན་ཐེག་མཆོག་དབུ་མ་ལ། ༣ །འཇུག་ཚུལ་ཤིང་རྟའི་སྲོལ་འབྱེད་རྣམ་གཉིས་ལས། །ཟབ་མོ་ལྟ་བའི་ལམ་སྟོན་ཀླུ་སྒྲུབ་ཀྱིས། །ཚོགས་གསུམ་སེང་གེའི་ང་རོས་དངོས་སྨྲའི་ཝ། །ཕམ་མཛད་བདེན་གཉིས་གཞི་ལམ་འབྲས་བུའི་ཚུལ། ༤ །ཆོས་ཅན་ཆོས་ཉིད་ཟུང་འཇུག་ལ་དགོངས་ནས། །སྟོང་དང་རྟེན་འབྱུང་དབྱེར་མེད་དབུ་མ་ཆེའི། །སྲོལ་བཏོད་འཕགས་པ་ལྷ་སོགས་སློབ་ཚོགས་ཀྱིས། །གྲུབ་མཐའི་རྩེར་གྱུར་དེ་ཉིད་རྒྱ་ཆེར་སྤེལ། ༥ །གཞུང་ལུགས་ཕྱི་མོའི་དབུ་མ་ཀུ་མུད་ཚལ། །ལེགས་བཤད་འདབ་བརྒྱར་གྲོལ་མཛད་ཟླ་བའི་ཞབས། །བཞེད་ཚུལ་ཐལ་འགྱུར་བདུད་རྩིའི་བསིལ་འོད་འབུམ། །ལོ་ཆེན་ཉི་མའི་གཟི་བྱིན་དང་འདྲེས་ནས། ༦ །ལྗོངས་འདིའི་སྐལ་བཟང་དཔལ་དུ་ཤར་བའི་མོད། །མཐའ་བཞིའི་སྤྲོས་པའི་རྨོངས་མུན་རབ་བཅོམ་ཞིང་། །གནས་ལུགས་རྟོགས་པའི་འབྲས་བཟང་སྨིན་པ་དང་། །ལྷན་ཅིག་ངེས་ལེགས་མཆོག་གི་འབྱོར་པ་བརྟས། ༧ །རྒྱུད་དང་སྡེ་སྣོད་གཙོར་གྱུར་ཤེས་བྱའི་གནས། །འཁྲུལ་བྲལ་ཇི་བཞིན་གཟིགས་པའི་སྤྱན་མངའ་བ། །ས་སྐྱའི་འཇམ་མགོན་རྣམས་དང་ཨེ་ཝཾ་པས། །འཕགས་པ་ཡབ་སྲས་ལུགས་བཟང་རྒྱས་པར་མཛད། ༨ །དེ་ཚེ་བློ་གསལ་རྒྱུ་སྐར་ཚོགས་འགའ་ཞིག །འཆད་རྩོད་རྩོམ་པའི་རང་འོད་ཆེར་སྤྲོས་ཀྱང་། །ཐུབ་བསྟན་སྙིང་པོའི་ལེགས་བཤད་མ་རྙེད་ཅིང་། །ལྟ་གྲུབ་རྣམ་དག་ལམ་བཟང་གསལ་མ་གྱུར། ༩ །ཕུལ་བྱུང་བློ་གྲོས་མིག་དབང་མ་ཐོབ་པས། །དམུས་ལོང་གཟུགས་ལ་དཔྱོད་བཞིན་དབུ་མའི་དོན། །ཡོད་མེད་ཕྱོགས་བཟུང་གསར་བྱུང་གྲུབ་མཐའ་ལ། །ཕལ་ཆེར་མོས་པ་སྙིགས་མའི་ཆོས་ཉིད་དོ། ༡༠ །ཐེག་པ་སྣ་ཚོགས་བསྟན་པའི་འཇུག་སྒོ་དུ། །དགོངས་དང་ལྡེམ་དགོངས་ཚུལ་གྱིས་གསུངས་པ་སྟེ། །ངེས་དོན་དབུ་མའི་ཐེག་པ་དུས་གསུམ་གྱི། །རྒྱལ་བ་སྲས་བཅས་གཤེགས་པའི་ལམ་ཆེན་ཡིན། ༡༡ །དེ་སླད་གཞུང་འདིར་ཐོས་དང་རྟོགས་དཀའ་ཞིང་། །བདུད་ལས་ཀྱིས་འཚེ་མི་དགེའི་བཤེས་གཉེན་གྱིས། །ལྟ་སྒོམ་ལོག་པར་སྤྱོད་པས་ཡིད་ཅན་རྣམས། །ཕུང་འགྱུར་གསུང་རབ་ཉིད་ལས་གསལ་བར་བཤད། ༡༢ །དེ་ཕྱིར་རྣམ་དཔྱོད་ལྡན་པས་གྲུབ་པའི་མཐའ། །ཡང་དག་ལ་འཇུག་མཁས་པའི་གཞུང་ལུགས་བསྟེན། །དད་གུས་བརྩོན་འགྲུས་རྣམ་གསུམ་ཤེས་རབ་ཀྱིས། །རྣམ་དག་ལྟ་བར་རྟོགས་པའི་ཐབས་ལ་འབད། ༡༣ །སྡུག་བསྔལ་ཕྲག་བརྒྱའི་རྩ་བ་བདེན་འཛིན་ཚལ། །དམིགས་བྲལ་ལྟ་བའི་ཞུགས་ཀྱིས་རབ་བསྲེགས་པས། །ཐབས་ཤེས་ཟུང་འཇུག་ལམ་མཆོག་དབུ་མ་ནི། །མཐོང་འགྱུར་ཐབས་གཞན་རྒྱལ་བས་གསུངས་པ་མེད། ༡༤ །བརྗོད་བྱ་དོན་གྱི་དབུ་མ་གཞི་ལམ་འབྲས། །མཁའ་དང་ཤིང་རྟ་ནོར་བུ་རིན་ཆེན་བཞིན། །བདེན་གཉིས་ཚོགས་ཟུང་སྐུ་དང་ཡེ་ཤེས་རྣམས། །ཀུན་ལ་ཁྱབ་ཅིང་བདེན་བརྫུན་རང་བཞིན་མེད། ༡༥ །འཁོར་འདས་གོ་འབྱེད་སྲིད་ཞིར་མི་ལྷུང་བརྟན། །མྱ་ངན་ཚོགས་བྲལ་བདེ་ཞིང་འབྲས་ཐོབ་མྱུར། །འབྱུང་བ་དཀོན་ལ་ཕན་ཆེ་བླང་དོར་སོགས། །རྣམ་རྟོག་མི་མངའ་ཕྲིན་ལས་ལྷུན་གྱིས་གྲུབ། ༡༦ །རྗོད་བྱེད་དབུ་མ་བཀའ་དང་བསྟན་བཅོས་གཉིས། །ཤེར་ཕྱིན་འབུམ་པ་ལ་སོགས་དང་པོ་སྟེ། །རྩ་བ་ཤེས་རབ་ལ་སོགས་ཕྱི་མ་ཡིན། །དེ་དག་དགོངས་པ་འགྲེལ་བྱེད་རྣམས་མང་ཡང་། ༡༧ །མཐའ་བྲལ་དབུ་མའི་ཆོས་ཉིད་ཀུན་གསལ་ངོས། །ནོར་འཁྲུལ་མུན་པ་རིང་སྤངས་ལེགས་བཤད་ཀྱི། །སྣང་བ་འབུམ་འབྱེད་བསྟན་པའི་ཉི་མ་ནི། །ཀུན་མཁྱེན་གོ་རམས་ཆེན་པོ་ཞེས་སུ་གྲགས། ༡༨ །རྒྱལ་བའི་ཕྲིན་ལས་ཡུལ་དུས་གདུལ་བྱ་ལ། །དགོངས་ནས་གང་འདུལ་སྤྲུལ་པའི་ཟློས་གར་གྱིས། །ལོག་ལམ་འཕྱན་པའི་འགྲོ་རྣམས་དྲང་བ་དང་། །ངེས་དོན་ལུང་གི་དགོངས་པ་འགྲེལ་བའི་ཕྱིར། ༡༩ །བསོྃད་ནྃམས་ཡེ་ཤེས་ལུས་སྟོབས་ཆེར་རྒྱས་ཤིང་། །བདེ་གཤེགས་གསུང་རབ་སེངྃ་གེའིྃ་ང་རོ་ཡིས། །ཐུབ་བསྟན་གངས་རིར་སྐྱོང་ཞིང་རྒོལ་ངན་གྱི། །གཉིས་འཐུང་དྲེགས་པའི་ཀླད་འགེམས་དེ་ཉིད་ཀྱིས། ༢༠ །ཡིད་ཆེས་ལུང་དང་དམ་པའི་མན་ངག་དང་། །དངོས་སྟོབས་རིགས་པའི་རྣམ་དཔྱོད་ཀྱིས་བཀྲལ་བའི། །ཁྱད་པར་བཞི་ལྡན་ངེྃས་གསང་དབུ་མའི་དོྃན། །རྃབ་གསྃལ་ཡིད་བཞིན་ནོར་མཚུངས་གཞུང་བཟང་འདིར། ༢༡ །གཟུར་གནས་བློ་ལྡན་སྐྱེ་བོས་རྟོགས་པ་དང་། །ལྟ་གྲུབ་དག་དང་མ་དག་འབྱེད་པའི་ཕྱིར། །བཤད་སྒྲུབ་བསྟན་པའི་རྒྱལ་མཚན་རྩེ་མོ་རུ། །ངོ་མཚར་ཡི་གེའི་གཟུགས་ཀྱི་ཆོ་གས་བཀོད། ༢༢ །ཉི་ཟླའི་གཟི་བརྗིད་ནོར་བུའི་བྱིན་མཐུ་དང་། །རིགས་སྔགས་གྲུབ་དང་སྨན་གྱི་ནུས་པ་ལྟར། །བསྟན་བཅོས་མཆོག་འདིར་སྤར་དུ་ལེགས་བསྒྲུབས་པའི། །རྣམ་དཀར་གང་མཆིས་ཡོངས་སུ་བསྔོས་པའི་མཐུས། ༢༣ །བསླབ་གསུམ་ནོར་ལྡན་དགེ་འདུན་སྡེ་འཕེལ་ཞིང་། །ཐུབ་བསྟན་དྲི་མེད་ཕྱོགས་བརྒྱར་དར་བ་དང་། །རྨད་བྱུང་འཁོར་ལོ་གསུམ་གྱི་ཕྲིན་ལས་ཀྱིས། །ལུང་རྟོགས་བསྟན་པ་སྲིད་མཐར་སྤེལ་གྱུར་ཅིག ༢༤ །ཆོས་ཀྱི་དབྱིངས་གཤེགས་བླ་མ་དམ་པའི་ཚོགས། །ས་ལམ་མྱུར་བགྲོད་ཟག་མེད་ཐུགས་དགོས་རྫོགས། །ཕ་མས་ཐོག་དྲངས་དམིགས་ཡུལ་འབྲེལ་ཐོགས་རྣམས། །དོན་གཉིས་མཐར་ཕྱིན་སངས་རྒྱས་ཐོབ་གྱུར་ཅིག ༢༥ །བསྟན་དང་འགྲོ་ལ་འཚེ་བའི་ཡིད་སྲུབས་དཔུང་། །དགེ་བའི་སྣང་བྲལ་སྐྱེས་ངན་འབྱུང་པོའི་བྱ། །ཆོས་མིན་ལོག་པའི་མུན་ཁྲོད་གནས་བཅས་ཀུན། །ལེགས་བྱས་ཉིན་མོའི་སྣང་བར་མཐོང་གྱུར་ཅིག ༢༦ །ལྷར་བཅས་འགྲོ་རྣམས་རང་རང་ལས་མཐུན་པའི། །ལམ་སྟེགས་ལམ་དངོས་འགོད་སོགས་ཕྲིན་ལས་ཀྱིས། །ངན་སོང་འཁོར་བའི་ལས་ལམ་རྒྱུན་བཅད་ནས། །གཏན་བདེ་ཐར་པའི་དཔལ་ལ་འགོད་གྱུར་ཅིག ༢༧ །ཡང་དག་རྒྱུད་སྦྱངས་ཐེག་ཆེན་རིགས་ཅན་གྱིས། །ཟབ་མོའི་ལྟ་བས་དོན་དམ་གནས་ལུགས་རྟོགས། །རྒྱ་ཆེན་སྤྱོད་པས་རྫོགས་སྨིན་སྦྱོང་མཐར་ཕྱིན། །ཞིང་ཁམས་རྒྱ་མཚོའི་སྒྲོན་མེ་ཉིད་གྱུར་ཅིག ༢༨ །ཕན་བདེའི་འབྱུང་གནས་མཆོག་གསུམ་ཉི་ཟླའི་ཕུང་པོ་སྲིད་མཁར་རྟག་བརྟན་པས། །བསྐལ་ངན་རྒུད་པའི་སྨག་ཞི་འགྲོ་ཀུན་དགེ་བཅུའི་ཆོས་ལམ་རབ་ཞུགས་ཤིང་། །སྡེ་བཞིའི་འབྲས་སྨིན་ཕྱོགས་དུས་ཀུན་དུ་རྫོགས་ལྡན་གསར་བའི་དགེ་མཚན་གྱིས། །མཛེས་ཤིང་བཀྲ་ཤིས་དམ་པའི་སྣང་བ་དཀར་པོས་འཇིག་རྟེན་ཁྱབ་གྱུར་ཅིག ༢༩ །ཅེས་ཐུབ་པའི་བསྟན་པ་ལ་སྟོན་པ་གཉིས་པའི་ཕྲིན་ལས་ཅན་ཀུན་མཁྱེན་ཆོས་ཀྱི་རྒྱལ་པོ་བསོད་ནམས་སེང་གེའི་ཞལ་སྔ་ནས་མཛད་པའི་གསུང་རབ་ཟབ་མོ་ལྟ་བའི་རྣམ་གཞག་གསལ་བར་སྟོན་པ་འདི་ཉིད་བློ་གསལ་རྣམས་ཀྱིས་ཐོས་བསམ་བྱེད་པའི་གཞི་དང་། རང་གཞན་གྱི་རྒྱུད་ལ་ལྟ་བ་རྣམ་པར་དག་པ་བདེ་བླག་ཏུ་སྐྱེ་བའི་ཕྱིར། ལྷག་བསམ་དགེ་བའི་བློ་ཅན་སྤར་གཉེར་ངག་དབང་འཇིགས་མེད་ཀྱིས་མཐུན་རྐྱེན་བགྱིས་ཏེ་རབ་ཚེས་ས་སྤྲེལ་ལོར། གྲུབ་དབང་ཐང་སྟོང་རྒྱལ་པོའི་གདན་ས་སྡེ་དགེ་ལྷུན་གྲུབ་སྟེང་གི་སྤར་ཁང་ཆོས་མཛོད་བཀྲ་ཤིས་སྒོ་མང་དུ་སྤར་དུ་བསྒྲུབས་སྐབས་ཡོན་སྦྱོར་བ་པོ་འཇམ་དབྱངས་མཁྱེན་རབ་མཐའ་ཡས་ཀྱིས་ཞུ་དག་དང་ཆབས་ཅིག་སྨྲས་པ་དགེ་ལེགས་རྣམ་པར་རྒྱལ་བར་གྱུར་ཅིག ཐུབ་པའི་རྒྱལ་ཚབ་འཇམ་དབྱངས་ས་སྐྱ་པའི། །ལྟ་གྲུབ་འཁྲུལ་མེད་སེང་གེའི་ང་རོ་ཡིས། །ཕས་རྒོལ་གླང་པོའི་ཀླད་འགེམས་གོ་རམས་ཆེའི། །རིང་ལུགས་ཕྱོགས་བརྒྱར་འབར་བའི་བཀྲ་ཤིས་ཤོག །སརྦ་མངྒ་ལཾ། དགེའོ།། །། ༈ བལ་ཡུལ་མཆོད་རྟེན་ཉེ་འདབས་ནས་རྒྱལ་ཡོངས་ས་ཆེན་ཞེས་པ་ལས། སློབ་བུ་ཐ་ཤལ་པ་གུ་རུས་སྤེལ་བའོ།།
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།